സംഗീത പരിപാടിക്കിടെ മൊബൈല് മോഷണം: തെളിവെടുപ്പ് ഇന്ന്
1463945
Saturday, October 26, 2024 2:06 AM IST
കൊച്ചി: അലന് വാക്കറുടെ സംഗീത പരിപാടിക്കിടെ നടന്ന കൂട്ട മൊബൈല് മോഷണക്കേസില് അറസ്റ്റിലായ പ്രതികളുമായി പോലീസ് ഇന്ന് തെളിവെടുപ്പ് നടത്തും.
ഡല്ഹിയില് നിന്ന് അറസ്റ്റിലായ വസീം അഹമ്മദ് (32), ആതിക് ഉര് റഹ്മാന് (38) എന്നിവരെ പരിപാടി നടന്ന ബോള്ഗാട്ടി പാലസിലും, എറണാകുളത്ത് ഇവര് താമസിച്ച നോര്ത്തിലെ ലോഡ്ജിലുമടക്കം എത്തിച്ചാകും തെളിവെടുപ്പ്. കഴിഞ്ഞ മൂന്നു ദിവസമായി മുളവുകാട് പോലീസിന്റെ കസ്റ്റഡിയിലുള്ള പ്രതികളെ പോലീസ് വിശദമായി ചോദ്യം ചെയ്യുകയാണ്. ഇവരില് നിന്ന് 20 ഫോണുകള് കണ്ടെടുത്തതില് നിന്നും ഒരു ആന്ഡ്രോയ്ഡ് ഫോണും ആറ് ഐ ഫോണുകളും കൊച്ചിയില് നിന്നു നഷ്ടപ്പെട്ടതാണെന്ന് പോലീസ് കണ്ടെത്തി.
അതിനിടെ കേസിലെ മുഖ്യപ്രതി യുപി സ്വദേശി പ്രമോദ് യാദവ് വാരണാസിയില് ഒളിവില് കഴിയുന്നതായാണ് അന്വേഷണ സംഘത്തിന് ലഭിച്ചിട്ടുള്ള വിവരം. ഇയാള് അടക്കം നാലുപേരാണ് കേസില് ഇനി അറസ്റ്റിലാകാനുള്ളത്. മോഷ്ടിക്കുന്ന ഫോണുകള് വില്പ്പന നടത്തുന്ന ആളാണ് പ്രമോദ് യാദവെന്ന് പോലീസ് കണ്ടെത്തിയിട്ടുണ്ട്. കൊച്ചിയിലെ പരിപാടി ആസൂത്രണം ചെയ്തതും ഇയാളാണ്.
അതിനിടെ മുംബൈയില് നിന്ന് അറസ്റ്റിലായ സണ്ണി ഭോല യാദവ് (27), ശ്യാം ബെരന്വാള് (32) എന്നിവരെ കസ്റ്റഡിയില് ലഭിക്കുന്നതിനായി പോലീസ് ഇന്ന് കോടതിയെ സമീപിക്കും. ഇന്ന് കസ്റ്റഡിയില് ലഭിച്ചാല് ഇവരുമായും തെളിവെടുപ്പ് നടത്തും. തുടര്ന്ന് പ്രതികളെ നാല് പേരെയും ഒരുമിച്ചിരുത്തിയും ചോദ്യം ചെയ്യും.