പിഴല അപ്രോച്ച് റോഡ് നിര്മാണം: ജില്ലാ കളക്ടര് ഇടപെടണമെന്ന് മനുഷ്യാവകാശ കമ്മീഷന്
1463423
Thursday, October 24, 2024 1:18 AM IST
കൊച്ചി: കടമക്കുടി ഗ്രാമപഞ്ചായത്തിലെ മൂലമ്പിള്ളി പിഴല പാലവുമായി ബന്ധിപ്പിക്കുന്ന 350 മീറ്റര് പിഴല അപ്രോച്ച് റോഡിന്റെ നിര്മാണം എത്രയും വേഗം പൂര്ത്തിയാക്കാന് ജില്ലാ കളക്ടര് ഇടപെടണമെന്ന് മനുഷ്യാവകാശ കമ്മീഷന് ചെയര്പേഴ്സണ് ജസ്റ്റീസ് അലക്സാണ്ടര് തോമസ് നിര്ദേശിച്ചു.
ഗോശ്രീ ദ്വീപ് വികസന അഥോറിറ്റി സെക്രട്ടറി, കടമക്കുടി ഗ്രാമപഞ്ചായത്ത് സെക്രട്ടറി, എല്എസ്ജിഡി അസിസ്റ്റന്റ് എന്ജിനീയര് എന്നിവരുടെ യോഗം ജില്ലാ കളക്ടര് വിളിച്ചു ചേര്ക്കണം. പിഴല അപ്രോച്ച് റോഡിന്റെ നിര്മാണം പൂര്ത്തിയാക്കാന് കഴിയാത്തതിന്റെ കാരണങ്ങള് മനസിലാക്കി തടസങ്ങള് ഒഴിവാക്കി റോഡ് നിര്മാണം പെട്ടെന്ന് പൂര്ത്തിയാക്കാനുള്ള നിര്ദേശങ്ങള് ഗോശ്രീ ദ്വീപ് വികസന അഥോറിറ്റി സെക്രട്ടറിക്കും ആവശ്യമെങ്കില് കരാറുകാരനും ജില്ലാ കളക്ടര് നല്കണം.
ഉത്തരവിന്റെ അടിസ്ഥാനത്തില് നല്കിയ നിര്ദേശങ്ങള് ഉള്പ്പെടെയുള്ള കാര്യങ്ങള് വിശദമാക്കി സമഗ്രമായ റിപ്പോര്ട്ട് നാലാഴ്ചക്കുള്ളില് ജില്ലാ കളക്ടര് സമര്പ്പിക്കണം. റോഡ് പണി പൂര്ത്തിയാക്കാന് ആവശ്യമായ ചുരുങ്ങിയ സമയം റിപ്പോര്ട്ടില് സൂചിപ്പിക്കണം. ഡിസംബര് മൂന്നിന് എറണാകുളം ഗവ. ഗസ്റ്റ് ഹൗസില് നടക്കുന്ന സിറ്റിംഗില് കേസ് പരിഗണിക്കും.
എറണാകുളം ജില്ലാ കളക്ടര്, കടമക്കുടി ഗ്രാമപഞ്ചായത്ത് സെക്രട്ടറി, ഗോശ്രീ ദ്വീപ് വികസന അഥോറിറ്റി സെക്രട്ടറി എന്നിവര് നിയോഗിക്കുന്ന മുതിര്ന്ന ഉദ്യോഗസ്ഥര് സിറ്റിംഗില് ഹാജരാകണമെന്നും ഉത്തരവില് പറയുന്നു. പിഴല സ്വദേശി ഒ.ജി. സെബാസ്റ്റ്യന് സമര്പ്പിച്ച പരാതിയിലാണ് നടപടി.