മുളവൂർ യുപി സ്കൂൾ അക്കാദമിക് ബ്ലോക്ക് നിർമാണോദ്ഘാടനം
1463435
Thursday, October 24, 2024 1:18 AM IST
മൂവാറ്റുപുഴ: മുളവൂർ യുപി സ്കൂളിലെ പുതിയ അക്കാദമിക്ക് ബ്ലോക്കുകളുടെ നിർമാണോദ്ഘാടനം നടത്തി. സ്കൂൾ വികസനത്തിന് പൊതുവിദ്യാഭ്യാസ വകുപ്പിൽ നിന്ന് 80 ലക്ഷവും മാത്യു കുഴൽനാടൻ എംഎൽഎയുടെ ആസ്തി വികസന ഫണ്ടിൽ നിന്ന് 50 ലക്ഷവുമാണ് നിർമാണത്തിനായി അനുവദിച്ചത്. നിർമാണോദ്ഘാടനം മാത്യു കുഴൽനാടൻ എംഎൽഎ നിർവഹിച്ചു. എംഎൽഎ ഫണ്ടിൽ നിന്നും അനുവദിച്ച കെട്ടിടത്തിൽ മൂന്ന് ക്ലാസ് മുറികൾ പുതിയ കെട്ടിടത്തിലുണ്ടാകും. 1800 ചതുരശ്രയടി ചുറ്റളവിലാണ് കെട്ടിടം നിർമിക്കുന്നത്.
മുളവൂർ ഗവ. യുപി സ്കൂൾ ഹൈസ്ക്കുൾ ആയി ഉയർത്തണമെന്ന ആവശ്യത്തിന് വർഷങ്ങളുടെ പാഴക്കമുണ്ട്. കെട്ടിടത്തിന്റെ നിർമാണം ആറുമാസത്തിനകം പൂർത്തീകരിക്കും. മുവാറ്റുപുഴ ബ്ലോക്ക് പഞ്ചായത്ത് എൻജിനിയറിംഗ് വിഭാഗമാണ് എംഎൽഎ ഫണ്ടിൽ നിന്നുള്ള പദ്ധതിയുടെ നിർമാണ മേൽനോട്ടം വഹിക്കുന്നത്.
പഞ്ചായത്ത് പ്രസിഡന്റ് പി.എം അസീസ് അധ്യക്ഷത വഹിച്ചു. ഹെഡ്മിസ്ട്രസ് എം.എച്ച്. സുബൈദ,ബ്ലോക്ക് പഞ്ചായത്ത് പ്രസിഡന്റ് കെ.ജി. രാധാകൃഷ്ണൻ, ജില്ലാ പഞ്ചായത്ത് അംഗം ഷാന്റി ഏബ്രഹാം , ബ്ലോക്ക് പഞ്ചായത്ത് അംഗം ഒ.കെ. മുഹമ്മദ്, പഞ്ചായത്ത് സ്ഥിരംസമിതി അധ്യക്ഷരായ എം.സി. വിനയൻ, സാജിത, അംഗങ്ങളായ എം.എസ്. അലി, ഇ.എം. ഷാജി, വി.ഇ. നാസർ, ബസി എൽദോ, മുൻ പഞ്ചായത്ത് പ്രസിഡന്റ് മാത്യുസ് വർക്കി, കെ.എച്ച്. സിദ്ധീഖ്, എം.എം. സീതി, കെ.എം. പരീത്, പി.എം. അബുബക്കർ, സുലൈഖ മക്കാർ, പിടിഎ പ്രസിഡന്റ് അസീസ് കുഞ്ചാട്ട്, പി.പി. അഷ്റഫ്, പി.എ. അതിൽ, എഇഒ കെ.വി. ബെന്നി എന്നിവർ പ്രസംഗിച്ചു.