പാലാ: ആഗോള ഭക്ഷണ പ്രദര്‍ശനമേളയായ വേള്‍ഡ് ഫുഡ് ഇന്ത്യ 2024ല്‍ പാലായ്ക്ക് അഭിമാനമായി വിസിബ് ഹോംലി. മലയാളികളുടെ ഇഷ്ട വിഭവങ്ങളായ പ്രഭാത ഭക്ഷണങ്ങള്‍, മസാലക്കൂട്ടുകള്‍, നാളികേര ഉത്പന്നങ്ങള്‍, പലഹാരങ്ങള്‍, അച്ചാറുകള്‍, കാര്‍ഷിക വസ്തുക്കള്‍ തുടങ്ങിയ വൈവിധ്യങ്ങളായ ഉത്പന്നങ്ങളാണ് വിസിബ് ഹോംലിയുടെ ഫുഡ് സ്റ്റാളില്‍ പ്രദര്‍ശിപ്പിച്ചത്.
90 രാജ്യങ്ങളെ പങ്കെടുപ്പിച്ച് നടത്തിയ മേളയില്‍ കേരളത്തിന്‍റെ ഭക്ഷ്യ ഉത്പന്നങ്ങള്‍ പരിചയപ്പെടുത്തിയത് വിസിബ് ഹോംലിയിലൂടെയാണ്. 28 വര്‍ഷങ്ങള്‍ക്കു മുമ്പ് കടനാട് പഞ്ചായത്തിലെ കൊടുമ്പിടിയില്‍ രൂപംകൊണ്ട വനിതാ ഭക്ഷ്യസംസ്‌കരണ യൂണിറ്റാണിത്. ഡല്‍ഹി പ്രഗതി മൈതാനിയില്‍ നടന്ന മേളയിൽ വിസിബ് ഹോംലിയെ പ്രതിനിധീകരിച്ച് ജിബിന്‍ ജോര്‍ജ്, മനു ശ്രീധര്‍, സിബി പുരയിടം എന്നിവര്‍ പങ്കെടുത്തു.