പൊൻകുന്നം: പൊൻകുന്നത്തെ മുസ്ലിം പള്ളിയിലെ ഇമാമിന്റെ മൊബൈൽ ഫോൺ മോഷ്ടിച്ച കേസിൽ തമിഴ്നാട് സ്വദേശിയെ പോലീസ് അറസ്റ്റ് ചെയ്തു. തമിഴ്നാട് തേനി സ്വദേശിയായ മുഹമ്മദ് താഹിറി(41)നെയാണ് പൊൻകുന്നം പോലീസ് അറസ്റ്റ് ചെയ്തത്.
ഇയാൾ കഴിഞ്ഞമാസം 27ന് രാത്രിയോടെ പൊൻകുന്നം മുസ്ലിം പള്ളിയിൽ അതിക്രമിച്ചു കയറി, ഇമാം താമസിക്കുന്ന മുറിയുടെ ജനൽപാളി തുറന്ന് മേശയിൽ വച്ചിരുന്ന 15,000 രൂപ വില വരുന്ന മൊബൈൽ ഫോൺ മോഷ്ടിച്ച് കടന്നുകളയുകയായിരുന്നു. പൊൻകുന്നം പോലീസ് കേസ് രജിസ്റ്റർ ചെയ്തു നടത്തിയ തെരച്ചിലിൽ പ്രതിയെ ചേർത്തലയിൽനിന്നു പിടികൂടുകയായിരുന്നു. ഇയാൾ പള്ളികൾ കേന്ദ്രീകരിച്ച് മോഷണം നടത്തിയിരുന്നതായും 2023 മാർച്ചിൽ പുനലൂരിലുള്ള മുസ്ലിം പള്ളിയിൽനിന്നു ലാപ്ടോപ്പും, മൊബൈൽഫോണും ഹാർഡ് ഡിസ്കും പെൻഡ്രൈവും മോഷ്ടിച്ചിരുന്നതായും പോലീസ് പറഞ്ഞു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.