ടിവിപുരം: കുടുംബശ്രീയുടെ നൂതന പദ്ധതിയായ ഹോം ഷോപ്പ് വൈക്കം ബ്ലോക്കിലെ ടിവിപുരം പഞ്ചായത്ത് കുടുംബശ്രീ സിഡിഎസിന്‍റെ ആഭിമുഖ്യത്തില്‍ ആരംഭിച്ചു. വയോജന വിശ്രമകേന്ദ്രത്തില്‍ ബ്ലോക്ക് പഞ്ചായത്ത് പ്രസിഡന്റ് കെ.കെ. രഞ്ജിത്ത് പദ്ധതിയുടെ ഉദ്ഘാടനം നിര്‍വഹിച്ചു. പഞ്ചായത്ത് പ്രസിഡന്റ് ശ്രീജി ഷാജി അധ്യക്ഷത വഹിച്ചു. കുടുംബശ്രീ മിഷന്‍ മാര്‍ക്കറ്റിംഗ് ഡിപിഎം ജോബി ജോണ്‍ പദ്ധതി വിശദീകരണം നടത്തി.
കുടുംബശ്രീ സംരംഭകര്‍ ഉത്പാദിപ്പിക്കുന്ന ഗുണമേന്മയുള്ള ഉത്പന്നങ്ങൾക്ക് വിപണി സാധ്യമാക്കാൻ രൂപകല്പന ചെയ്ത പദ്ധതിയാണ് ഹോം ഷോപ്പ്. ഉത്പന്നങ്ങള്‍ നേരിട്ട് ജനങ്ങളിലേക്ക് എത്തിക്കുകയാണ് ലക്ഷ്യം. ഐഡി കാർഡ്, യൂണിഫോം എന്നിവ ധരിച്ചാണ് പ്രതിനിധികൾ വീടുകളിലെത്തുക. ടിവി പുരം പഞ്ചായത്ത് വൈസ് പ്രസിഡന്റ് വി.കെ. ശ്രീകുമാര്‍, വാര്‍ഡ് മെംബർ ടി.എ. തങ്കച്ചന്‍, കുടുംബശ്രീ പ്രവർത്തകർ തുടങ്ങിയവർ പങ്കെടുത്തു.