വീട്ടുമുറ്റത്ത് കഞ്ചാവ് ചെടി വളർത്തി; ആസാം സ്വദേശി അറസ്റ്റിൽ : Deepika.com Nattu Visesham

കോതമംഗലം: വാടാട്ടുപാറ മേഖലയിലെ ഏഴ് അങ്കണവാടികളുടെ സംയുക്ത വാർഷികം നടത്തി. പഞ്ചായത്ത് അരോഗ്യ വിദ്യാഭ്യാസ സ്ഥിരം സമിതി അധ്യക്ഷൻ ഇ.സി. റോയി അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് പി.എ.എം. ബഷീർ ഉദ്ഘാടനം നിർവഹിച്ചു. ബ്ലോക് പഞ്ചായത്ത് ആരോഗ്യ വിദ്യാഭ്യാസ സ്ഥിരംസമിതി അധ്യക്ഷൻ ജെയിംസ് കോറന്പേൽ മുഖ്യപ്രഭാഷണം നടത്തി.

മൂത്തകുന്നം മുസിരിസ് ടൂറിസം ഫെസ്റ്റ് ഇന്ന് സമാപിക്കും

പറവൂർ: പറവൂർ ബ്ലോക്ക് പഞ്ചായത്തും വടക്കേക്കര പഞ്ചായത്ത് സാമൂഹ്യക്ഷേമ സഹകരണ സംഘവും ചേർന്ന് സംഘടിപ്പിച്ച മൂത്തകുന്നം മുസിരിസ് ടൂറിസം ഫെസ്റ്റ് ഇന്ന് സമാപിക്കും. ഇന്നലെ സഹകരണ മേഖലയിലെ വൈവിധ്യവത്കരണം എന്ന വിഷയത്തിൽ നടന്ന സെമിനാർ കെ.എൻ. ഉണ്ണികൃഷ്ണൻ എംഎൽഎ ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ അധ്യക്ഷനായി. എസ്. സുമേഷ് വിഷയാവതരണം നടത്തി. വടക്കേക്കര പഞ്ചായത്ത് പ്രസിഡന്‍റ് രശ്മി അനിൽകുമാർ, ജില്ലാ പഞ്ചായത്തംഗം ഷാരോൺ പനയ്ക്കൽ, ഇ.പി. തമ്പി, ടി.ആർ. ബോസ്, കെ.എസ്. സനീഷ്, ജെൻസി തോമസ് തുടങ്ങിയവർ പ്രസംഗിച്ചു. തുടർന്ന് തിരുവാതിര, കലാപരിപാടികൾ, നൃത്തസന്ധ്യ എന്നിവ നടന്നു. ഇന്ന് വൈകീട്ട് അഞ്ചിന് സമാപന സമ്മേളനം വി.ആർ. സുനിൽകുമാർ ഉദ്ഘാടനം ചെയ്യും.

ജനവാസ മേഖലയിൽ നായ ഷെൽട്ടർ : നടത്തിപ്പുകാരിക്ക് ഒഴിയാൻ ആർഡിഒയുടെ നോട്ടീസ്

കിഴക്കമ്പലം: കുന്നത്തുനാട് പഞ്ചായത്തിലെ ജനവാസ മേഖലയിൽ തെരുവുപട്ടികളെ വളർത്തുന്ന ഷെൽട്ടറുമായി ബന്ധപ്പെട്ട വിവാദത്തിൽ നടത്തിപ്പുകാരിയോട് 30 ദിവസത്തിനുള്ളിൽ മറ്റൊരു സ്‌ഥലത്തേക്ക് മാറാൻ ആർഡിഒ നോട്ടീസ് നൽകി. പറക്കോട് വെമ്പിള്ളി ഭാഗത്താണ് ജനവാസ മേഖലയിൽ തെരുവുപട്ടികളെ സംരക്ഷിച്ചിരുന്നത്. ഈ സംഭവത്തെചൊല്ലി ഏതാനും ദിവസങ്ങളായി മേഖലയിൽ വിവാദവും സംഘർഷവും ഉടലെടുത്തിരുന്നു. നാട്ടുകാർ രോഷാകുലരായതോടെ ആർഡിഒ സംഭവസ്ഥലം സന്ദർശിച്ച് ഹിയറിംഗ് നടത്തുകയായിരുന്നു. രണ്ടാമത് ഹിയറിംഗിൽ ജനവാസം കുറഞ്ഞ പഞ്ചായത്തുകളിൽ സൗകര്യം ലഭിക്കുന്ന മുറയ്ക്ക് മാറാമെന്ന് നടത്തിപ്പുകാരി അറിയിച്ചു. എന്നാൽ ഇതിൽ നടപടിയില്ലാതെ വന്നതോടെയാണ് ഇപ്പോൾ ആർഡിഒ നോട്ടീസ് നൽകിയിരിക്കുന്നത്. മൂന്ന് മാസം മുമ്പ് 50,000 രൂപ അഡ്വാൻസായി നൽകി എടുത്ത വീട്ടിൽ 60-ഓളം തെരുവു നായ്ക്കളെയാണ് പാർപ്പിച്ചിരിക്കുന്നത്. വാടക ഇതുവരെ ലഭിക്കാത്തതിലും പരിസര മലിനീകരണവുമായി ബന്ധപ്പെട്ട് നാട്ടുകാരുടെ പരാതി മൂലവും വിട്ടുടസ്ഥൻ ബുദ്ധിമുട്ടിലായിരിക്കുകയാണ്.

വിഷു വിപണിയിൽ പൊടിപൊടിച്ച് കണിക്കൊന്ന കച്ചവടം

മൂവാറ്റുപുഴ: നഗരത്തിലെ വിഷു വിപണിയിൽ കണിക്കൊന്നകച്ചവടം പൊടിപൊടിച്ചു. വിഷുക്കണിയിലെ പ്രധാനിയായ കൊന്നപൂക്കള്‍ക്ക് വന്‍ ഡിമാന്‍റായിരുന്നു വിപണിയില്‍. പ്ലാസ്റ്റിക് കൊന്നപ്പൂക്കള്‍ വിപണിയില്‍ സുലഭമാണെങ്കിലും നാടന്‍ കണിക്കൊന്നകളോടാണ് പ്രിയം. തെരുവോരങ്ങളിലും വ്യാപാര സ്ഥാപനങ്ങളിലും ഇന്നലെ രാവിലെ മുതൽ കണിക്കൊന്നകള്‍ നിറഞ്ഞിരുന്നു. പിഒ ജംഗ്ഷനിലും ആരക്കുഴ, തൊടുപുഴ റോഡുകളിലും കച്ചേരിത്താഴം, വെള്ളൂര്‍ക്കുന്നം തുടങ്ങിയിടങ്ങളിലാണ് കൊന്നപ്പൂ കച്ചവടം നടന്നത്. നിരത്തിലിറങ്ങുന്നവരെ ആകര്‍ഷിക്കുന്ന മഞ്ഞ വസന്തമാണ് മൂവാറ്റുപുഴയില്‍ നിറഞ്ഞത്. വിഷുവിന് നാളുകള്‍ മുന്‍പേ കൊന്നകള്‍ പൂത്തതിനാലും വേനല്‍ മഴ തകൃതിയായി പെയ്തതിനാലും പൂക്കള്‍ നേരത്തെ കൊഴിഞ്ഞുതുടങ്ങിയത് തിരിച്ചടിയായിരുന്നുവെന്ന് വ്യാപാരികൾ പറഞ്ഞു. നാടന്‍ കൊന്നപൂക്കളുടെ ദൗര്‍ലഭ്യം മുന്നില്‍കണ്ട് വ്യാപാരികള്‍ പ്ലാസ്റ്റിക് കൊന്നപ്പൂക്കളും വിപണിയിൽ എത്തിച്ചിരുന്നു. നഗരത്തിലെ ഗതാഗതക്കുരുക്കിനിടയിലും വിഷു ആഘോഷമാക്കുകയാണ് മൂവാറ്റുപുഴക്കാര്‍.

കേന്ദ്ര, സംസ്ഥാന സർക്കാരുകൾ ശബരി റെയിൽപാതയിൽനിന്ന് ഒഴിഞ്ഞുമാറുന്നുവെന്ന്

കോതമംഗലം: നിർമാണ ചെലവ് ഏഴ് മടങ്ങിൽ അധികം വർധിച്ചതോടെ കേന്ദ്ര, സംസ്ഥാന സർക്കാരുകൾ ശബരി റെയിൽപാതയിൽ പണം മുടക്കാതെ ഒഴിഞ്ഞുമാറുന്നുവെന്ന് സമരസമിതി. 1997-98 കാലഘട്ടത്തിൽ പദ്ധതി ആരംഭിക്കുമ്പോൾ നിർമാണ ചെലവ് 550 കോടി രൂപ മാത്രമായിരുന്നു. ഇപ്പോഴിത് 3800 കോടി രൂപയും പിന്നിട്ടിരിക്കുന്നു. ഈ സാഹചര്യത്തിൽ കേന്ദ്രവും സംസ്ഥാനവും പല വിയോജിപ്പുകൾ ചൂണ്ടിക്കാട്ടി കാൽ നൂറ്റാണ്ടിൽ അധികമായി പദ്ധതി നടപ്പാക്കാതിരിക്കാനാണ് ശ്രമിച്ചുകൊണ്ടിരിക്കുന്നത്. തന്മൂലം ജനങ്ങൾ കടുത്ത മാനസികവും സാമ്പത്തികവുമായ വെല്ലുവിളികൾ നേരിടുകയാണ്. വിഷയത്തിൽ കേന്ദ്ര, സംസ്ഥാന സർക്കാരുകൾക്ക് ജനങ്ങളോട് തുറന്നുപറയാനുള്ളത് പറയണമെന്നും ജനങ്ങളുടെ ആശങ്കയകറ്റണമെന്നും സമരസമിതി കൺവീനർ ഗോപാലൻ വെണ്ടുവഴി വാർത്താകുറിപ്പിൽ അവശ്യപ്പെട്ടു.

പിറവത്ത് അമ്മമാർക്കൊപ്പം വിഷു ആഘോഷിച്ച് റോട്ടറി ക്ലബ്

പിറവം: പിറവം റിവർവാലി റോട്ടറി ക്ലബിന്‍റെ നേതൃത്വത്തിൽ അമ്മമാർക്കൊപ്പം വിഷു ആഘോഷിച്ചു. നിർധനരും നിരാലംബരുമായ 150ഓളം അമ്മമാർക്കാണ് വിഷുക്കൈനീട്ടവും ഭക്ഷ്യധാന്യ കിറ്റും സദ്യയും നൽകി ആദരിച്ച് യാത്രയാക്കിയത്. പിറവത്ത് കുട്ടികളുടെ പാർക്കിൽ നടന്ന ചടങ്ങിൽ നഗരസഭയിലെ 27 ആശാവർക്കർമാർക്ക് വിഷുക്കൈനീട്ടമായി സമ്മാനങ്ങൾ നൽകി ആദരിച്ചു. മികച്ച പഞ്ചായത്തായി തെരഞ്ഞെടുത്ത മണീടിന്‍റെ പ്രസിഡന്‍റ് പോൾ വർഗീസിന്ന് പുരസ്കാരം നൽകി. സിനിമ-സീരിയൽ താരം സീമ ജി. നായർ ഉദ്ഘാടനം നിർവഹിച്ചു. റോട്ടറി ഗവർണർ കെ.ജി. അജയകുമാർ അധ്യക്ഷത വഹിച്ചു. വിവിധ മേഖലകളിൽ നിന്നുള്ള അഞ്ചു വനിതകൾക്ക് മികച്ച പ്രവർത്തനങ്ങൾക്ക് പുരസ്കാരവും ഫലകവും നൽകി ആദരിച്ചു.

വിശുദ്ധവാരാചരണം

വാഴക്കുളം: സെന്‍റ് ജോർജ് ഫൊറോന പള്ളിയിൽ വിശുദ്ധവാര തിരുക്കർമങ്ങൾക്ക് തുടക്കമായി. 15നും 16നും രാവിലെ 5.45ന് കുർബാന, കുരിശിന്‍റെ വഴി, 6.45ന് കുർബാന. രണ്ടു ദിവസവും രാവിലെ ഒൻപത് മുതൽ 11 വരെയും വൈകുന്നേരം മൂന്ന് മുതൽ ആറു വരെയും കുമ്പസാരം നടത്തും. 17ന് രാവിലെ 6.30ന് കുർബാന, കാൽകഴുകൽ ശുശ്രൂഷ, തുടർന്ന് വൈകുന്നേരം ആറു വരെ ആരാധന. 18ന് രാവിലെ 6.30ന് പീഡാനുഭവ തിരുക്കർമങ്ങൾ, കുരിശിന്‍റെ വഴി. വൈകുന്നേരം നാലിന് പരിഹാര പ്രദക്ഷിണം. 19ന് രാവിലെ 6.30ന് ജ്ഞാനസ്നാന വ്രത നവീകരണം, പുത്തൻ വെള്ളം, തിരിവെഞ്ചരിപ്പ്, കുർബാന. 20ന് രാവിലെ മൂന്നിന് ഉയിർപ്പ് തിരുക്കർമങ്ങൾ, കുർബാന, തുടർന്ന് 5.45ന്, 7.30ന്, 9.15ന് കുർബാന.

വിഷു വിപണന മേള ആരംഭിച്ചു

തിരുമാറാടി: കുടുംബശ്രീ സിഡിഎസിന്‍റെ നേതൃത്വത്തിൽ വിഷു വിപണന മേള ആരംഭിച്ചു. പഞ്ചായത്ത് പ്രസിഡന്‍റ് സന്ധ്യമോൾ പ്രകാശ് ഉദ്ഘാടനം നിർവഹിച്ചു. തിരുമാറാടി കുടുംബശ്രീ ചെയർപേഴ്സൺ തങ്കമ്മ ശശി അധ്യക്ഷത വഹിച്ചു. കുടുംബശ്രീ അംഗങ്ങളുടെ ഉത്പന്നങ്ങൾ, നാടൻ പച്ചക്കറികൾ എന്നിങ്ങനെ വൈവിധ്യങ്ങളാർന്ന വിഭവങ്ങൾ മേളയിലുണ്ട്. ശനിയാഴ്ച ആരംഭിച്ച വിപണി ഇന്ന് സമാപിക്കും.

വഖഫ് ഭേദഗതി ബില്‍ കത്തിച്ച് പ്രതിഷേധിച്ചു

മൂവാറ്റുപുഴ: വഖഫ് നിയമ ഭേദഗതി പിന്‍വലിക്കണമെന്ന് ആവശ്യപ്പെട്ട് സിപിഐ മൂവാറ്റുപുഴ ടൗണ്‍ ലോക്കല്‍ കമ്മിറ്റിയുടെ നേതൃത്വത്തില്‍ പ്രതിഷേധ യോഗവും വഖഫ് ഭേദഗതി ബില്‍ കത്തിച്ചുള്ള പ്രതിഷേധവും നടത്തി. പ്രതിഷേധ യോഗം സിപിഐ ജില്ലാ അസിസ്റ്റന്‍റ് സെക്രട്ടറി എല്‍ദോ ഏബ്രഹാം ഉദ്ഘാടനം ചെയ്തു.

പാറമടയിൽനിന്നു കല്ല് വീട്ടുമുറ്റത്ത്

കല്ലൂർക്കാട്: മണിയന്തടം ചാറ്റുപാറയിലെ പാറമടയിൽനിന്നു വീണ്ടും പാറക്കല്ല് വീട്ടുമുറ്റത്തേക്ക് തെറിച്ചുവീണു. കിളിവള്ളിക്കൽ ഷാജി ഏബ്രാഹമിന്‍റെ വീട്ടുമുറ്റത്താണ് കഴിഞ്ഞ ദിവസം കല്ല് വീണത്. ഇത് രണ്ടാം തവണയാണ് പാറ പൊട്ടിക്കുമ്പോൾ കല്ല് തെറിച്ച് ഇതേ വീട്ടുമുറ്റത്ത് പതിക്കുന്നത്. അപകട സമയത്ത് മുറ്റത്ത് ആളുകൾ ഇല്ലാത്തതിനാൽ അപകടം ഒഴിവായി. കഴിഞ്ഞ ജനുവരിയിൽ ഇതിന് സമീപത്തു തന്നെയുള്ള തേവരോലിൽ സുരേഷ് ബാബുവിന്‍റെ വീടിന് മുകളിൽ വലിയ കല്ല് പതിച്ച് വീടിന് സാരമായ കേടുപാടുകൾ സംഭവിച്ചിരുന്നു. അപകടസമയത്ത് വീട്ടിലും മുറ്റത്തും ആളില്ലാതിരുന്നതിനാൽ കുടുംബാംഗങ്ങൾ പരിക്കേൽക്കാതെ രക്ഷപ്പെട്ടു. ഇതേത്തുടർന്നുള്ള പരാതിയും അന്വേഷണവും നടക്കുന്ന സമയത്തുതന്നെ വീണ്ടും സമാനമായ സംഭവം ഉണ്ടായത് പ്രദേശവാസികളെ ഭീതിയിലാക്കിയിരിക്കുകയാണ്. പകൽ സമയത്ത് ക്വാറി പ്രവർത്തിക്കുമ്പോൾ ജീവനും വസ്തുവകകളും സംരക്ഷിക്കാൻ പ്രദേശവാസികൾക്ക് ഏറെ കരുതൽ വേണമെന്ന ആശങ്കയാണ് ഉയരുന്നത്.

ദേവാലയങ്ങളിൽ ഓശാന ഞായർ ആചരിച്ചു

കൂത്താട്ടുകുളം: ടൗൺ തിരുകുടുംബ പള്ളിയിൽ ഓശാന ഞായർ ആചരിച്ചു. വിശുദ്ധ വാരത്തിന് തുടക്കം കുറിച്ച് ദേവാലയത്തിൽ നടന്ന തിരുക്കർമങ്ങൾക്ക് വികാരി ഫാ. ജെയിംസ് കുടിലിൽ, സഹവികാരി ഫാ. ജോസഫ് മരോട്ടിക്കൽ എന്നിവർ നേതൃത്വം നൽകി. രാവിലെ പ്രത്യേക പ്രാർഥന തിരുകർമങ്ങളോടെയാണ് ഓശാന ഞായർ ആചരണം ആരംഭിച്ചത്. പാരിഷ് ഹാളിൽ നടത്തിയ പ്രത്യേക പ്രാർഥനകൾക്ക് ശേഷം വിശ്വാസികൾ കുരുത്തോല പ്രദക്ഷിണം നടത്തി. ഈസ്റ്ററിന് മുന്നോടിയായാണ് ഓശാന ഞായർ ആചരിക്കപ്പെടുന്നത്. ക്രിസ്തു ജെറുസലേം ദേവാലയത്തിലേക്ക് കഴുതപ്പുറത്ത് രാജകീയമായി പ്രവേശിച്ചതിന്‍റെ സ്മരണ പുതുക്കിയാണ് ക്രൈസ്തവ വിശ്വാസികൾ ഓശാന ഞായർ ആചരിക്കുന്നത്. മൂവാറ്റുപുഴ: വിശുദ്ധവാര തിരുകര്‍മങ്ങള്‍ക്ക് തുടക്കം കുറച്ച് ദേവാലയങ്ങളില്‍ ഓശാന ഞായര്‍ ആചരിച്ചു. മൂവാറ്റുപുഴ ഹോളി മാഗി ഫൊറോന പള്ളിയില്‍ നടന്ന ഓശാന ഞായര്‍ ആചരണം ഭക്തിസാന്ദ്രമായി. രാവിലെ 6.45ന് നിര്‍മല സ്‌കൂള്‍ മെതനത്തില്‍ ഓശാന തിരുക്കര്‍മങ്ങള്‍ക്ക് തുടക്കംകുറിച്ചു. വികാരി ഫാ. കുര്യാക്കോസ് കൊടകല്ലില്‍ നേതൃത്വം നല്‍കി. ശേഷം നൂറുകണക്കിന് വിശ്വാസികൾ കുരുത്തോല കൈയിലേന്തി ഓശാന പ്രദക്ഷിണവും നടന്നു. ഫാ. ആന്‍റണി പുത്തന്‍കുളം, ഫാ. ജോസഫ് കാരക്കുന്നേല്‍ എന്നിവര്‍ സഹകാർമികരായി. സിഎംഐ മൂവാറ്റുപുഴ ആശ്രമ സുപ്പീരിയര്‍ ഫാ. ബിജു വെട്ടുകല്ലേല്‍ ഓശാന തിരുനാള്‍ സന്ദേശം നല്‍കി.

കെ.എം. മാണി അനുസ്മരണം

കോതമംഗലം: കേരള കോണ്‍ഗ്രസ് (എം) കോതമംഗലം നിയോജക മണ്ഡലം കമ്മിറ്റിയുടെ നേതൃത്വത്തില്‍ കെ.എം. മാണി അനുസ്മരണം നടത്തി. നിയോജക മണ്ഡലം പ്രസിഡന്‍റ് എന്‍.സി. ചെറിയാന്‍ ഉദ്ഘാടനം ചെയ്തു. സണ്ണി പുതുശേരി അധ്യക്ഷത വഹിച്ചു.

വി.കെ. പവിത്രന്‍ ജന്മശതാബ്ദി സമ്മേളനം

കൊച്ചി: മിശ്രവിവാഹ പ്രസ്ഥാനത്തിന്‍റെ സ്ഥാപകനായ വി.കെ. പവിത്രന്‍റെ ജന്മശതാബ്ദി സമ്മേളനം ചങ്ങമ്പുഴ പാര്‍ക്കില്‍ മന്ത്രി പി. രാജീവ് ഉദ്ഘാടനം ചെയ്തു. കേരള മിശ്രവിവാഹ സംഘം പ്രസിഡന്‍റ് അഡ്വ. രാജഗോപാല്‍ വാകത്താനം അധ്യക്ഷത വഹിച്ചു. കെ.എന്‍. ഉണ്ണിക്കൃഷ്ണന്‍ എംഎല്‍എ, ജസ്റ്റീസ് കെ.കെ. ദിനേശന്‍, എഴുത്തുകാരന്‍ സുഭാഷ് ചന്ദ്രന്‍ തുടങ്ങിയവര്‍ പ്രസംഗിച്ചു.

അടുപ്പുകൂട്ടി സമരം

നെടുമ്പാശേരി: കേന്ദ്ര സർക്കാർ പാചകവാതക വിലവധിപ്പിച്ചതിനെതിരേ കെഎസ്കെടിയു കുന്നുകര പഞ്ചായത്ത് വനിതാ സബ് കമ്മിറ്റിയുടെ നേതൃത്വത്തിൽ അടുപ്പുകൂട്ടി പ്രതിഷേധ സമരം നടത്തി. വനിതാ സബ് കമ്മിറ്റി ജില്ലാ പ്രസിഡന്‍റ് എൻ.സി. ഉഷാകുമാരി ഉദ്ഘാടനം ചെയ്തു. കുന്നുകര പഞ്ചായത്ത്‌ കമ്മിറ്റി സെക്രട്ടറി പി.കെ. കൃഷ്ണകുമാർ, പാർട്ടി ലോക്കൽ സെക്രട്ടറി വി.കെ. അനിൽ, സിഡിഎസ് ചെയർപേഴ്സൺ സുബൈദ നാസർ, മുഹമ്മദ്‌ ഫൈസൽ, ഷക്കില ഗോപി, ശ്രീദേവി, പ്രവീണ എന്നിവർ സംസാരിച്ചു.

ശുചിത്വ സാഗരം, സുന്ദര തീരം: പ്ലാസ്റ്റിക് മാലിന്യം നീക്കം ചെയ്തു

വൈപ്പിൻ: കടലും തീരവും പ്ലാസ്റ്റിക് മുക്തമാക്കുന്ന ഏകദിന പ്ലാസ്റ്റിക് നിർമാർജന പരിപാടി ‘ശുചിത്വ സാഗരം, സുന്ദര തീരം'ത്തിന്‍റെ വൈപ്പിൻ മേഖലയിലെ രണ്ടാംഘട്ടം ചെറായി ബീച്ചിൽ കെ.എൻ. ഉണ്ണിക്കൃഷ്ണൻ എംഎൽഎ ഉദ്ഘാടനം ചെയ്തു. മുനമ്പം മത്സ്യഭവനു കീഴിൽ പള്ളിപ്പുറം, കുഴുപ്പിള്ളി, എടവനക്കാട് പഞ്ചായത്തുകളിലെ13 ആക്ഷൻ പോയിന്‍റുകളിലായി മാലിന്യശേഖരണം നടന്നു. ജില്ലയിലെ മൊത്തം 46 സെന്‍ററുകളിലായി 10,916 കിലോ പ്ലാസ്റ്റിക് മാലിന്യമാണ് നീക്കം ചെയ്തത്. ശേഖരിച്ച പ്ലാസ്റ്റിക് മാലിന്യം ക്ലീൻ കേരള കമ്പനി, കൊച്ചി കോർപറേഷൻ, പ്ലാനറ്റ് എർത്ത് എന്നിവയുടെ സഹായത്തോടെ നീക്കം ചെയ്തു. ആകെ 1,591 സന്നദ്ധ പ്രവർത്തകർ യജ്ഞത്തിൽ പങ്കാളികളായി. പള്ളിപ്പുറം ഗ്രാമപഞ്ചായത്ത് പ്രസിഡന്‍റ് രമണി അജയൻ അധ്യക്ഷയായി. കളക്ടർ എൻ.എസ്.കെ. ഉമേഷ്, ഫിഷറീസ് മേഖലാ ഡെപ്യൂട്ടി ഡയറക്ടർ പി. മാജ ജോസ്, പ്ലാനറ്റ് എർത്ത് കോ-ഓർഡിനേറ്റർ അലൻ സിറിയക്, എഡ്രാക് പ്രതിനിധി ഐ.ജെ. ജോളി, പഞ്ചായത്ത് വൈസ് പ്രസിഡന്‍റ് എ.എൻ. ഉണ്ണിക്കൃഷ്ണൻ തുടങ്ങിയവർ പങ്കെടുത്തു.

വിഷു കൈനീട്ടം നൽകി

അങ്കമാലി: അങ്കമാലി അമല ഫെല്ലോഷിപ്പിന്‍റെ നേതൃത്വത്തിൽ അങ്കമാലി നിയമസഭാ മണ്ഡലത്തിലെ നിരാലമ്പരായ കാൻസർ, കിഡ്നി രോഗികൾക്ക് വിഷു കൈനീട്ടവും കേക്ക് വിതരണവും നടത്തി. അങ്കമാലി അമല ഫെല്ലോഷിപ്പിന്‍റെ ടൗൺ ഓഫീസിൽ സംഘടിപ്പിച്ച ചടങ്ങ് സ്ഥിരംസമിതി അധ്യക്ഷ ലക്സി ജോയ് ഉദ്ഘാടനം ചെയ്തു. അമല ഫെല്ലോഷിപ്പ് പ്രസിഡന്‍റ് സി.എ. ജോർജ് കുര്യൻ അധ്യക്ഷത വഹിച്ചു. ജനറൽ കോ-ഓർഡിനേറ്റർ ജോർജ് പടയാട്ടിൽ, ഡാന്‍റി കാച്ചപ്പിള്ളി, ആന്‍റു പെരുമായൻ, കെ.ഒ. ജോസ്, മാത്തച്ചൻ പടയാട്ടിൽ, ജോർജ് മഞ്ഞളി, ലാൽ പോൾ പൈനാടത്ത്, രാജു കോട്ടയ്ക്കൽ, ഡെന്നി പടയാട്ടിൽ, കെ.പി. ജോസഫ്, തമ്പി പാറയ്ക്കൽ തുടങ്ങിയവർ പ്രസംഗിച്ചു.

‘ലഹരിയാകട്ടെ ഫുട്ബോൾ’ ഷൂട്ടൗട്ട് മത്സരം നടത്തി

അങ്കമാലി: ‘ലഹരിയാകട്ടെ ഫുട്‌ബോൾ’ എന്ന ബോധവത്കരണവുമായി യൂത്ത് കോൺഗ്രസ് അങ്കമാലി മണ്ഡലം കമ്മിറ്റിയുടെ നേതൃത്വത്തിൽ സംഘടിപ്പിച്ച ഷൂട്ടൗട്ട് മത്സരം റോജി എം. ജോൺ എംഎൽഎ ഉദ്ഘാടനം ചെയ്തു. യൂത്ത് കോൺഗ്രസ് അങ്കമാലി മണ്ഡലം പ്രസിഡന്‍റ് റിൻസ് ജോസ് അധ്യക്ഷത വഹിച്ചു. കോൺഗ്രസ് ബ്ലോക്ക് പ്രസിഡന്‍റ് ആൻഡും മാവേലി, യൂത്ത് കോൺഗ്രസ് ജില്ലാ സെക്രട്ടറി അനീഷ് മണവാളൻ, ആൻമേരി ടോമി, പോൾ ജോവർ, ബേസിൽ മേച്ചേരി, ബേസിൽ പോൾ, ആൽബർട്ട് തുടങ്ങിയവർ നേതൃത്വം നൽകി.

കോട്ടുവള്ളിയിലും പരിസരങ്ങളിലും ലഹരി സംഘങ്ങളുടെ ശല്യം വ്യാപകമെന്ന് പരാതി

വരാപ്പുഴ: കോട്ടുവള്ളി പഞ്ചായത്തിൽ ഇടറോഡുകളിലും ആളൊഴിഞ്ഞ പറമ്പുകളിലും രാത്രികാലങ്ങളിൽ മദ്യപരുടെയും ലഹരി സംഘങ്ങളുടെയും ശല്യം രൂക്ഷമാകുന്നതായി പരാതി. എക്സൈസ്, പോലീസ് സംഘങ്ങൾ പരിശോധന നടത്തണമെന്നാണ് ആവശ്യം. കോട്ടുവള്ളിയിലെ കൈതാരം നടുമുറി കോളനി ഭാഗത്തെ വീടുകൾക്കു സമീപം മദ്യപരുടെ ശല്യം രൂക്ഷമായിരിക്കുന്നെന്നാണ് ഒടുവിലായുള്ള പരാതി. ഒഴിഞ്ഞു കിടക്കുന്ന പറമ്പുകളിലും ഇടറോഡുകളിലും തമ്പടിക്കുന്ന സംഘങ്ങൾ പ്രദേശവാസികൾക്കും കാൽനട യാത്രക്കാർക്കും ശല്യമായിരിക്കുകയാണ്. ഇതുമൂലം സ്ത്രീകൾക്കും കുട്ടികൾക്കും രാത്രികാലങ്ങളിൽ പുറത്തിറങ്ങി നടക്കാൻ കഴിയാത്ത അവസ്ഥയുമുണ്ട്. കോട്ടുവള്ളിയിലെ മഹിളപ്പടി, പടിഞ്ഞാറേ കൈതാരം, കിഴക്കേപ്പൊക്കം- ബംഗ്ലാവുപടി റോഡിലെ കലുങ്ക്, ആറാട്ടുകടവ് പാലത്തിനു സമീപം എന്നിവിടങ്ങളിലും ലഹരി സംഘങ്ങളുടെ ശല്യമുണ്ട്. ആളുകളെ ഉപദ്രവിച്ച സംഭവവും പലതവണ ഉണ്ടായിട്ടുണ്ട്. ഇതിനാൽ ലഹരിസംഘങ്ങളെ പേടിച്ച് പരാതി പറയാൻ പോലും ആരും തയാറാകുന്നില്ല. രാത്രി പൊലീസ് പട്രോളിംഗ് ഇല്ലാത്തതാണ് മദ്യപരുടെയും ലഹരി സംഘങ്ങളുടെയും ശല്യത്തിനു കാരണമെന്നും ഈ അവസരം മുതലാക്കിയാണ് ഇവർ ലഹരി ഉപയോഗിക്കുന്നതെന്നും പ്രദേശവാസികൾ പറയുന്നു. രാത്രികാലങ്ങളിൽ കോട്ടുവള്ളി പഞ്ചായത്തിലെ ചില സ്ഥലങ്ങൾ കേന്ദ്രീകരിച്ച് രാസലഹരി വില്പന നടക്കുന്നതായി കണ്ടെത്തിയിട്ടുണ്ട്. ഒരാഴ്ച മുൻപു കോതകുളത്തെ വീട്ടിൽ മാരകായുധങ്ങളും കഞ്ചാവുമായി 15ഓളം വിദ്യാർഥികൾ ഒത്തുകൂടിയതും നാട്ടുകാർ പൊലീസിനെ അറിയിച്ചിരുന്നു.

ഹണി റോസ് ഇരിങ്ങോൾ കാവ് സന്ദർശിച്ചു

പെരുമ്പാവൂർ: നടി ഹണി റോസ് ഇന്നലെ ഇരിങ്ങോൾക്കാവ് സന്ദർശിച്ചു. സമൂഹമാധ്യമങ്ങളിലൂടെയാണ് കാവിനെക്കുറിച്ചറിഞ്ഞതെന്നും മറ്റൊരിടത്തേക്കുള്ള യാത്രാമധ്യേയാണ് ഇവിടെയെത്തിയതെന്നും അവർ പറഞ്ഞു. സുരക്ഷാ കാരണങ്ങളാൽ സന്ദർശനവിവരം ആരെയും അറിയിച്ചിരുന്നില്ല. ഇനിയും ഇവിടേക്കെത്തുമെന്നറിയിച്ചാണ് നടി മടങ്ങിയത്.

മൂത്തകുന്നം മുസിരിസ് ടൂറിസം ഫെസ്റ്റ് ഇന്ന് സമാപിക്കും

പറവൂർ: പറവൂർ ബ്ലോക്ക് പഞ്ചായത്തും വടക്കേക്കര പഞ്ചായത്ത് സാമൂഹ്യക്ഷേമ സഹകരണ സംഘവും ചേർന്ന് സംഘടിപ്പിച്ച മൂത്തകുന്നം മുസിരിസ് ടൂറിസം ഫെസ്റ്റ് ഇന്ന് സമാപിക്കും. ഇന്നലെ സഹകരണ മേഖലയിലെ വൈവിധ്യവത്കരണം എന്ന വിഷയത്തിൽ നടന്ന സെമിനാർ കെ.എൻ. ഉണ്ണികൃഷ്ണൻ എംഎൽഎ ഉദ്ഘാടനം ചെയ്തു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ അധ്യക്ഷനായി. എസ്. സുമേഷ് വിഷയാവതരണം നടത്തി. വടക്കേക്കര പഞ്ചായത്ത് പ്രസിഡന്‍റ് രശ്മി അനിൽകുമാർ, ജില്ലാ പഞ്ചായത്തംഗം ഷാരോൺ പനയ്ക്കൽ, ഇ.പി. തമ്പി, ടി.ആർ. ബോസ്, കെ.എസ്. സനീഷ്, ജെൻസി തോമസ് തുടങ്ങിയവർ പ്രസംഗിച്ചു. തുടർന്ന് തിരുവാതിര, കലാപരിപാടികൾ, നൃത്തസന്ധ്യ എന്നിവ നടന്നു. ഇന്ന് വൈകീട്ട് അഞ്ചിന് സമാപന സമ്മേളനം വി.ആർ. സുനിൽകുമാർ ഉദ്ഘാടനം ചെയ്യും.

ലഹരിക്കെതിരേ ബോധവത്കരണം

കൊച്ചി: കരുമാലൂര്‍ തട്ടാംപടി ആര്‍ഷം റസിഡന്‍റ്സ് അസോസിയേഷന്‍റെ നേതൃത്വത്തില്‍ ലഹരി ബോധവത്കരണ ക്ലാസ് സംഘടിപ്പിച്ചു. കുട്ടികള്‍ക്ക് ജേഴ്‌സിയും കായിക ഉപകരണങ്ങളും വിതരണം ചെയ്തു. തുടര്‍ന്ന് കുട്ടികള്‍ക്കായി അസോസിയേഷന്‍ തയാറാക്കിയ ഫുട്‌ബോള്‍ ഗ്രൗണ്ടിന്‍റെ ഉദ്ഘാടനവും നടന്നു. അസോസിയേഷന്‍ പ്രസിഡന്‍റ് ജെനീഷ് ചേരാമ്പിളളി അധ്യക്ഷത വഹിച്ച ചടങ്ങില്‍ ആലുവ വെസ്റ്റ് സ്‌റ്റേഷന്‍ പ്രിന്‍സിപ്പല്‍ എസ് ഐ ജിതിന്‍ കുമാര്‍, അസി.എക്‌സിക്യൂട്ടീവ് പ്രിവന്‍റീവ് ഓഫീസര്‍ സനല്‍ കുമാര്‍, പഞ്ചായത്ത് മെമ്പര്‍ ശ്രീലത ലാലു, മിസ്റ്റര്‍ എറണാകുളം ടി.വി. ലിജു എന്നിവര്‍ പ്രസംഗിച്ചു.

ജനവാസ മേഖലയിലെ നായ ഷെൽട്ടർ : നടത്തിപ്പുകാരിക്ക് ഒഴിയാൻ ആർഡിഒയുടെ നോട്ടീസ്

കിഴക്കമ്പലം: കുന്നത്തുനാട് പഞ്ചായത്തിലെ ജനവാസ മേഖലയിൽ തെരുവുനായ്ക്കളെ വളർത്തുന്ന ഷെൽട്ടറുമായി ബന്ധപ്പെട്ട വിവാദത്തിൽ നടത്തിപ്പുകാരിയോട് 30 ദിവസത്തിനുള്ളിൽ മറ്റൊരു സ്‌ഥലത്തേക്ക് മാറാൻ ആർഡിഒ നോട്ടീസ് നൽകി. പറക്കോട് വെമ്പിള്ളി ഭാഗത്താണ് ജനവാസ മേഖലയിൽ തെരുവുപട്ടികളെ സംരക്ഷിച്ചിരുന്നത്. ഈ സംഭവത്തെചൊല്ലി ഏതാനും ദിവസങ്ങളായി മേഖലയിൽ വിവാദവും സംഘർഷവും ഉടലെടുത്തിരുന്നു. നാട്ടുകാർ രോഷാകുലരായതോടെ ആർഡിഒ സംഭവസ്ഥലം സന്ദർശിച്ച് ഹിയറിംഗ് നടത്തുകയായിരുന്നു. രണ്ടാമത് ഹിയറിംഗിൽ ജനവാസം കുറഞ്ഞ പഞ്ചായത്തുകളിൽ സൗകര്യം ലഭിക്കുന്ന മുറയ്ക്ക് മാറാമെന്ന് നടത്തിപ്പുകാരി അറിയിച്ചു. എന്നാൽ ഇതിൽ നടപടിയില്ലാതെ വന്നതോടെയാണ് ഇപ്പോൾ ആർഡിഒ നോട്ടീസ് നൽകിയിരിക്കുന്നത്. മൂന്ന് മാസം മുമ്പ് 50,000 രൂപ അഡ്വാൻസായി നൽകി എടുത്ത വീട്ടിൽ 60-ഓളം തെരുവു നായ്ക്കളെയാണ് പാർപ്പിച്ചിരിക്കുന്നത്. വാടക ഇതുവരെ ലഭിക്കാത്തതിലും പരിസര മലിനീകരണവുമായി ബന്ധപ്പെട്ട് നാട്ടുകാരുടെ പരാതി മൂലവും വിട്ടുടസ്ഥൻ ബുദ്ധിമുട്ടിലായിരിക്കുകയാണ്.

സഹകരണ മേഖലയെ തകർക്കാൻ അനുവദിക്കില്ല: കെസിഇഎഫ്

പെരുമ്പാവൂർ: സഹകരണ മേഖലയെ തകർക്കാൻ ഇടതു സർക്കാരിനെ അവദിക്കില്ലെന്നും ഇത്തരം നയങ്ങളിൽനിന്നും സർക്കാർ പിന്മാറണമെന്നും കെസിഇഎഫ് ജില്ലാ സമ്മേളന കൗൺസിൽ ആവശ്യപ്പെട്ടു. കെസിഇഎഫ് ജില്ലാ കൗൺസിൽ സമ്മേളനം പെരുമ്പാവൂർ സഫ ഓഡിറ്റോറിയത്തിൽ ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ ഉദ്ഘാടനം ചെയ്തു. ജില്ലാ പ്രസിഡന്‍റ് പി.പി. ഉണ്ണികൃഷ്ണൻ അധ്യക്ഷത വഹിച്ചു. കൗൺസിൽ സമ്മേളനത്തിൽ സംസ്ഥാന സെക്രട്ടറി ഇ.ഡി. സാബു, ബിനു കാവുങ്കൽ, ബിനു കുര്യാക്കോസ്, വനിതാ ഫോറം സംസ്ഥാന കൺവീനർ ശ്രീജ എസ്. നാഥ്, കെ.സി. ജോർജ്, ജില്ലാ ഭാരവാഹികൾ തുടങ്ങിയവർ പ്രസംഗിച്ചു. തുടർന്ന് ഭാരവാഹികളെ തെരഞ്ഞെടുത്തു. ജിജോ വർഗീസ്- പ്രസിഡന്‍റ്, പ്രിൻസൺ തോമസ്-സെക്രട്ടറി, കെ.എ. സിയാദ്-ട്രഷർ, ബേസിൽ കുര്യാക്കോസ്, സുനിൽ വർഗീസ്-വൈസ് പ്രസിഡന്‍റുമാർ, എം.സി. രഞ്ജിത്ത്, ഫസീല-ജോയിന്‍റ് സെക്രട്ടറിമാർ എന്നിവരെ തെരഞ്ഞെടുത്തു.

കുരിശിന്‍റെ വഴിയും ലഹരി വിരുദ്ധ പ്രാര്‍ഥനയും നടത്തി

കൊച്ചി: പാലാരിവട്ടം സെന്‍റ് ജോണ്‍ ദി ബാപ്റ്റിസ്റ്റ് ദേവാലയത്തില്‍ കെസിവൈഎമ്മിന്‍റെ നേതൃത്വത്തില്‍ കുരിശിന്‍റെ വഴിയും, ലഹരി വിരുദ്ധ പ്രാര്‍ഥനയും നടത്തി. കെസിവൈഎം വരാപ്പുഴ അതിരൂപത ഡയറക്ടര്‍ ഫാ.റാഫേല്‍ ഷിനോജ് ആറാഞ്ചേരി പ്രാര്‍ഥനയ്ക്ക് നേതൃത്വം നല്‍കി. വികാരി ഫാ.ജോജി കുത്തുകാട്ട്, സഹവികാരി ഫാ. എഡിസണ്‍ വില്ലനശേരി, ഫാ. അമല്‍ മാളിയേക്കല്‍ എന്നിവര്‍ നേതൃത്വം നല്‍കി.

"വഴിയോര വരക്കാഴ്ചകൾ’ ഒരുക്കി ഗ്രാമയാനം

നെടുമ്പാശേരി: ദേശം ചൈതന്യ ആർട്സ് ആൻഡ് സ്പോർട്സ് ക്ലബിന്‍റെ ആഭിമുഖ്യത്തിൽ നടക്കുന്ന ഗ്രാമയാനത്തിന്‍റെ രണ്ടാംദിവസം 30ൽ അധികം വരുന്ന കലാകാരന്മാർചേർന്നൊരുക്കിയ "വഴിയോര വരക്കാഴ്ചകൾ" ശ്രദ്ധേയമായി. ദേശം ഗ്രാമത്തിന്‍റെ വഴിയോരങ്ങളിൽ വർണവിസ്മയം തീർത്ത്, ദേശം കുന്നുംപുറത്തിന് ഇരുവശവുമുള്ള മതിലുകൾ "ബിനാലെ’ കലാകാരന്മാരും, വിവിധ ചിത്രകാരന്മാരും കുട്ടികളും ചേർന്നാണ് വിവിധ ചിത്രങ്ങൾകൊണ്ട് വർണാഭമാക്കിയത്. ചിത്രകാരൻ ദിനേശൻ കപ്രശേരി വരക്കാഴ്ചയുടെ ഉദ്‌ഘാടനം നിർവഹിച്ചു.

ഫോർട്ട്കൊച്ചിയിൽ മരക്കൊന്പ് വീണ് മൂന്ന് പേർക്ക് പരിക്ക്

ഒരാളുടെ നില ഗുരുതരം മട്ടാഞ്ചേരി: ഫോർട്ട്കൊച്ചി സൗത്ത്ബീച്ചിന് സമീപം ഇന്നലെ കൂറ്റൻ മരത്തിന്‍റെ ശിഖരം ഒടിഞ്ഞുവീണ് മൂന്നുപേർക്ക് പരിക്കേറ്റു. ഒരാളുടെ നില ഗുരുതരം. സൗത്ത്ബീച്ചിന് സമീപം ഇന്നലെ രാവിലെ ഒന്പതരയോടെയായിരുന്നു സംഭവം. ഫോർട്ടുകൊച്ചി സ്വദേശികളായ അഷറഫ്, ജോൺസൻ, ജോസഫ് ആൽവിൻ എന്നിവർക്കാണ് പരിക്കേറ്റത്. ഇവരെ പനയപ്പിള്ളിയിലെ സ്വകാര്യ ആശുപത്രിയിൽ എത്തിച്ച് ചികിത്സ നൽകി. പരിക്ക് ഗുരുതരമായ ജോൺസനെ എറണാകുളം ജനറൽ ആശുപത്രിയിലേക്ക് മാറ്റി. ജോൺസന്‍റെ വാരിയെല്ലിനും തോളെല്ലിനും പൊട്ടലുണ്ട്. മറ്റു രണ്ടുപേരെ പ്രാഥമിക ചികിത്സയ്ക്കു ശേഷം വിട്ടയച്ചു. പരിക്കേറ്റ മൂന്നുപേരും ബീച്ച് ഹെൽത്ത് ക്ലബ് അംഗങ്ങളാണ്. ഞായറാഴ്ചയായതിനാൽ ബീച്ച് ഹെൽത്ത് ക്ലബ്ബിൽ വ്യായാമം കഴിഞ്ഞതിനു ശേഷം വിശ്രമിക്കുമ്പോഴാണ് ശിഖിരം ഒടിഞ്ഞുവീണത്. ഇവിടെ നിർത്തിയിട്ടിരുന്ന ഓട്ടോറിക്ഷയ്ക്കു മുകളിൽ വീണ ശേഷമാണ് ശിഖരം ആളുകളുടെ മേൽ പതിച്ചത്. ഇതിനാൽ വൻ ദുരന്തം ഒഴിവായി. ഓട്ടോറിക്ഷ ഭാഗികമായി തകർന്നിട്ടുണ്ട്.

പീഡാസഹനയാത്ര നടത്തി

കൊച്ചി: കെസിവൈഎം വരാപ്പുഴ അതിരൂപത സമിതിയുടെ നേതൃത്വത്തില്‍ നഗരത്തില്‍ പീഡാസഹനയാത്ര നടത്തി. വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ വിശുദ്ധ കുരിശ് ആശീര്‍വദിച്ച് കെസിവൈഎം വരാപ്പുഴ അതിരൂപത പ്രസിഡന്‍റ് രാജീവ് പാട്രിക്കിന് കൈമാറി. സെന്‍റ് ഫ്രാന്‍സീസ് അസീസി കത്തീഡ്രല്‍ ദേവാലയത്തില്‍ നിന്നാരംഭിച്ച് നഗരം ചുറ്റി കത്തീഡ്രലില്‍ തന്നെ പീഡാസഹന യാത്ര സമാപിച്ചു. കെസിവൈഎം വരാപ്പുഴ അതിരൂപത ഡയറക്ടര്‍ ഫാ. റാഫേല്‍ ഷിനോജ് ആറാഞ്ചേരി, യുവജന കമ്മീഷന്‍ ഡയറക്ടര്‍ ഫാ.ജിജു ക്ലീറ്റസ് തിയ്യാടി, സെന്‍റ് ഫ്രാന്‍സിസ് അസീസി കത്തീഡ്രല്‍ വികാരി ഫാ.പീറ്റര്‍ കൊച്ചുവീട്ടില്‍, കെസിവൈഎം ലാറ്റിന്‍ സംസ്ഥാന വൈസ് പ്രസിഡന്റ് അക്ഷയ് അലക്‌സ്, കെസിവൈഎം വരാപ്പുഴ അതിരൂപത ജനറല്‍ സെക്രട്ടറി കെ.ജെ. റോസ് മേരി, ട്രഷറര്‍ പി.ജെ. ജോയ്‌സണ്‍, എക്‌സിക്യൂട്ടീവ് അംഗങ്ങളായ ദില്‍മ മാത്യു, വിനോജ് വര്‍ഗീസ്, അരുണ്‍ വിജയ്, ഫെര്‍ഡിന്‍ ഫ്രാന്‍സിസ്, അരുണ്‍ സെബാസ്റ്റ്യന്‍ എന്നിവര്‍ നേതൃത്വം നല്‍കി.

ലേബര്‍ കോഡുകള്‍ പിന്‍വലിക്കണം: എച്ച്എംഎസ്

കൊച്ചി: തൊഴിലാളി വിരുദ്ധ നിയമങ്ങള്‍ ഉള്‍പ്പെടുന്ന നാല് ലേബര്‍ കോഡുകള്‍ പിന്‍വലിക്കണമെന്ന് എച്ച്എംഎസ് എറണാകുളം ജില്ലാ കമ്മിറ്റിയോഗം ആവശ്യപ്പെട്ടു. കേന്ദ്രസര്‍ക്കാര്‍ ഏകപക്ഷീയമായി ലേബര്‍ കോഡുകള്‍ നടപ്പാക്കാന്‍ നടത്തുന്ന നീക്കത്തില്‍ പ്രതിഷേധിച്ച് സംയുക്ത ട്രേഡ് യൂണിയന്‍ സമിതി മേയ് 20ന് നടത്തുന്ന ദേശീയ പണിമുടക്ക് വിജയിപ്പിക്കണമെന്നും യോഗം അഭ്യര്‍ഥിച്ചു. എച്ച്എംഎസ് സംസ്ഥാന ജനറല്‍ സെക്രട്ടറി ടോമി മാത്യു യോഗം ഉദ്ഘാടനം ചെയ്തു.

പാര്‍ക്ക് പ്ലസ് കൊച്ചിയിലും

കൊച്ചി: ഇന്ത്യയിലെ ഏറ്റവും വലിയ സ്മാര്‍ട്ട് വാഹന മാനേജ്‌മെന്‍റ് സിസ്റ്റം ദാതാക്കളായ പാര്‍ക്ക് പ്ലസ് കൊച്ചിയില്‍ പ്രവര്‍ത്തനം ആരംഭിച്ചു. എഐ സാങ്കേതിക വിദ്യയുടെ സഹായത്തോടെ വാഹന പാര്‍ക്കിംഗിന് സഹായിക്കുന്ന ആപ്പാണ് പാര്‍ക്ക് പ്ലസ്. രാജ്യത്തെ 40 നഗരങ്ങളിലെ 10,000 റസിഡന്‍ഷ്യല്‍ സൊസൈറ്റികളിലും 600 കോര്‍പറേറ്റ് പാര്‍ക്കുകളിലും 100 മാളുകളിലും പാര്‍ക്ക്പ്ലസ് ഒരുക്കിയ സ്മാര്‍ട്ട് പാര്‍ക്കിംഗ് സംവിധാനങ്ങള്‍ നിലവിലുണ്ട്. കൂടാതെ പാര്‍ക്ക് പ്ലസ് ആപ്പ് വഴി ഫാസ്റ്റ്ടാഗ് റീചാര്‍ജ്, കാര്‍ ലോണിനായി രജിസ്റ്റര്‍ ചെയ്യല്‍, ചലാന്‍ ട്രാക്ക് ചെയ്യല്‍ എന്നിങ്ങനെയുള്ള സേവനങ്ങള്‍ പാര്‍ക്ക് പ്ലസ് ഉപയോക്താക്കള്‍ക്ക് ഉപയോഗിക്കാം. കാര്‍ ഇന്‍ഷ്വറന്‍സ് ഓഫറുകള്‍, കാര്‍ മെയിന്‍റനന്‍സ് കേന്ദ്രങ്ങളുടെ ലിസ്റ്റ്, ഇന്ധനം നിറയ്ക്കാന്‍ ഡിസ്‌കൗണ്ട് വൗച്ചറുകള്‍ എന്നിവയും ഈ ആപ്പ് വഴി ലഭ്യമാക്കുന്നു.

എല്‍എല്‍ബി എന്‍ട്രന്‍സ് പരിശീലനം

കൊച്ചി: എറണാകുളം ഗവ. ലോ കോളജ് എസ്എഫ്‌ഐ യൂണിറ്റ് കമ്മിറ്റിയുടെ നേതൃത്വത്തില്‍ എല്ലാ ജില്ലകളിലുമുള്ള വിദ്യാര്‍ഥികള്‍ക്കായി സൗജന്യ പഞ്ചവത്സര, ത്രിവത്സര എല്‍എല്‍ബി എന്‍ട്രന്‍സ് പരിശീലനം നല്‍കുന്നു. പ്ലസ് ടു, ഡിഗ്രി, പാസായവര്‍ക്കും ഫലം കാത്തിരിക്കുന്നവര്‍ക്കും പങ്കെടുക്കാം. പ്രായപരിധി ഇല്ല. വിവരങ്ങൾക്ക് ഫോണ്‍: 9037391512, 9961946711.

പോലീസ് ഉദ്യോഗസ്ഥരെ ആക്രമിച്ച നാലു പേർ പിടിയിൽ

മട്ടാഞ്ചേരി: മട്ടാഞ്ചേരി പോലീസ് സ്റ്റേഷനിലെ ഉദ്യോഗസ്ഥരെ അക്രമിച്ച കേസിൽ നാലുപേർ പിടിയിൽ. മട്ടാഞ്ചേരി സ്വദേശികളായ മുഹമ്മദ് കൈഫ് (23), ഷിയാസ് (25), പള്ളുരുത്തി സ്വദേശി മുഹമ്മദ് നബീൽ (24), കരുവേലിപ്പടി സ്വദേശി മുഹമ്മദ് റിസ്‌വാൻ (23) എന്നിവരാണ് അറസ്റ്റിലായത്. ശനിയാഴ്ച നൈറ്റ് പട്രോളിംഗ് നടത്തുകയായിരുന്ന പോലീസ് ഉദ്യോഗസ്ഥരെയാണ് പ്രതികൾ അക്രമിച്ചത്. കാറിൽ വരികയായിരുന്ന പ്രതികൾ പാലസ് റോഡിൽ പോലീസ് ഉദ്യോഗസ്ഥരെ അസഭ്യം പറയുകയും കാർ ഓടിച്ച് പോകുകയും ചെയ്തു. പിന്നീട് പനയപ്പിള്ളി ഭാഗത്ത് പോലീസ് ഈ വാഹനം കാണുകയും കാറിലുണ്ടായിരുന്നവരോട് ഇതു സംബന്ധിച്ച് ചോദിച്ചപ്പോൾ തട്ടിക്കയറുകയുമായിരുന്നു. പോലീസ് പ്രതികളെ ജീപ്പിൽ കയറ്റാൻ ശ്രമിച്ചപ്പോൾ ഇവർ പോലീസിനെ അക്രമിച്ചു. ബലപ്രയോഗത്തിലൂടെ ഇവരെ വാഹനത്തിൽ കയറ്റുന്നതിനിടെ അഞ്ചു പേരിൽ ഒരാൾ ഓടി രക്ഷപ്പെട്ടു. പിടിയിലായവരിൽ ഷിയാസ്, നബീൽ എന്നിവർ എറണാകുളം ജില്ലയിലെ വിവിധ സ്റ്റേഷനുകളിലെ മയക്കുമരുന്ന് കേസുകൾ ഉൾപ്പെടെയുള്ളവയിൽ പ്രതികളാണ്. ‌ മട്ടാഞ്ചേരി അസി. കമ്മിഷണര്‍ ഉമേഷ് ഗോയൽ, മട്ടാഞ്ചേരി പോലീസ് ഇന്‍സ്പെക്ടര്‍ കെ.എ. ഷിബിൻ, സബ് ഇൻസ്പെക്ടർ ജയപ്രസാദ്, എഎസ്ഐ ഗിരീഷ്, സീനിയർ സിവിൽ പോലീസ് ഓഫീസർമാരായ അനീഷ്, ബിനു, ബൈജുമോൻ എന്നിവർ ചേർന്നാണ് പ്രതികളെ പിടികൂടിയത്.

സമയക്രമ തർക്കം: ബസ് ജീവനക്കാരെ ആക്രമിച്ച സഹോദരന്മാർ അറസ്റ്റിൽ

ആലുവ: സമയക്രമം തെറ്റിച്ചെന്ന പേരിൽ ബസ് ജീവനക്കാരെ ആക്രമിക്കുകയും ബസിന് നാശനഷ്ടം വരുത്തുകയും ചെയ്ത കേസിൽ സഹോദരങ്ങൾ അറസ്റ്റിലായി. കുഴിവേലിപ്പടി ചാലിയിൽ അയൂബ് (30), സഹോദരൻ അൽത്താഫ് (28) എന്നിവരെയാണ് എടത്തല പോലീസ് അറസ്റ്റ് ചെയ്തത്. നിവേദ്യം ബസിലെ ഡ്രൈവർ ഷബീർ, ക്ലീനർ ആൽബിൻ എന്നിവരെയാണ് പ്രതികൾ മർദിച്ചത്. ബസുകളുടെ സമയക്രമത്തെ ചൊല്ലിയുള്ള തർക്കം മർദനത്തിൽ കലാശിക്കുകയായിരുന്നു. പൂക്കാട്ടുപടിയിലെ ഹോട്ടലിനു മുൻവശത്തെ സ്റ്റോപ്പിൽ യാത്രക്കാരെ ഇറക്കുന്ന സമയം പ്രതികൾ ബസിനു ള്ളിൽ കയറി ആക്രമിക്കുകയായിരുന്നു. ഷബീറിന്‍റെ തലയയിൽ വടി കൊണ്ട് അടിച്ച ശേഷം ബസിന് പുറത്തേക്ക് വലിച്ചിട്ടും മർദിച്ചു. ഇത് തടഞ്ഞപ്പോഴാണ് ക്ലീനർ ആൽബിന് മർദനമേറ്റത്. ബസിന്‍റെ സൈഡ് ഗ്ലാസ്, കണ്ണാടി, കാമറ എന്നിവയും നശിപ്പിച്ചു.

ഉദ്ഘാടനത്തിനൊരുങ്ങി ബ്രഹ്മപുരത്തെ സിബിജി പ്ലാന്‍റ്

മഹാരാജാസ് ഹോക്കി ടര്‍ഫ് ഈ മാസം പൂര്‍ത്തിയാകും

കൊച്ചി: എറണാകുളം മഹാരാജാസ് കോളജ് മൈതാനത്ത് നിർമിക്കുന്ന സിന്തറ്റിക് ഹോക്കി ടര്‍ഫിന്‍റെ നിർമാണം ഈ മാസം പൂര്‍ത്തിയാകും. നിലവില്‍ മൈതാനത്തിനു ചുറ്റും ഇന്‍റര്‍ലോക്ക് ടൈലുകള്‍ വിരിക്കുന്നതിന്‍റെയും ഫ്ലഡ്‌ലിറ്റുകള്‍ സ്ഥാപിക്കുന്നതിന്‍റെയും ജോലികള്‍ അവസാനഘട്ടത്തിലാണ്. ഇതോടൊപ്പം പമ്പിംഗ് റൂമിന്‍റെ ഇലക്ട്രിക്കല്‍ ജോലികളും നടക്കുകയാണ്. ഇതു പൂര്‍ത്തിയാകുന്നതോടെ ഈ മാസം അവസാനത്തോടെ ഹോക്കി ടര്‍ഫിന്‍റെ ഔദ്യോഗിക ഉദ്ഘാടനം നടത്താനാണ് നീക്കം. ‌ വാം അപ് ഗ്രൗണ്ടിനുസമീപം ടര്‍ഫ് തുടര്‍ച്ചയായി നനയ്ക്കാനുള്ള, ഒരു ലക്ഷം ലിറ്റര്‍ ശേഷിയുള്ള ടാങ്കിന്‍റെ നിര്‍മാണം പൂര്‍ത്തിയായിട്ടുണ്ട്. സംസ്ഥാനത്തെ മൂന്നാമത്തെ സിന്തറ്റിക് ടര്‍ഫാണിത്. ഇന്‍റര്‍നാഷണല്‍ ഹോക്കി ഫെഡറേഷന്‍ (ഐഎച്ച്എഫ് ) മാനദണ്ഡം പാലിച്ചാണ് ടര്‍ഫിന്‍റെ നിര്‍മാണം പൂര്‍ത്തിയാക്കുന്നത്. 9.51 കോടി രൂപയാണ് ചെലവ്. സിഎസ്എംഎല്‍ ഫണ്ടാണിത്. ഗ്രേറ്റ് സ്‌പോര്‍ട്‌സ് ടെക് ലിമിറ്റഡാണ് നിര്‍മാണം. വേനല്‍മഴ കാരണം നിര്‍മാണത്തിന് ചെറിയ തടസം നേരിട്ടിരുന്നു. അതേ സമയം ടര്‍ഫില്‍ ഗാലറിയില്ലെന്നത് പോരായ്മയാണ്. ചാമ്പ്യന്‍ഷിപ്പുകള്‍ക്ക് താത്കാലിക ഗാലറി നിര്‍മിക്കേണ്ടിവരും. സ്ഥിരം ഗാലറിക്കുള്ള സാധ്യതയും തേടുന്നതായാണ് വിവരം. ഉദ്ഘാടനത്തോടൊപ്പം അഖിലേന്ത്യാ ചാമ്പ്യന്‍ഷിപ്പിന് വേദിയാകാന്‍ എറണാകുളം ഹോക്കി അസോസിയേഷന്‍ ഇതികം കോളജ് അധികൃതരെയും സ്‌പോര്‍ട്‌സ് കൗണ്‍സിലിനെയും സന്നദ്ധത അറിയിച്ചിട്ടുണ്ട്. തിരുവനന്തപുരം ജി.വി. രാജ സ്റ്റേഡിയം, കൊല്ലം ഹോക്കി സ്റ്റേഡിയം എന്നിവയാണ് കേരളത്തിലെ മറ്റ് സിന്തറ്റിക്ക് ഹോക്കി ടര്‍ഫുകള്‍. ഇവിടെയാണ് ഭൂരിഭാഗം ചാമ്പ്യന്‍ഷിപ്പുകളും നടക്കുന്നത്. എറണാകുളത്ത് സിന്തറ്റിക് ടര്‍ഫ് വരുന്നതോടെ കൂടുതല്‍ ചാമ്പ്യന്‍ഷിപ്പുകള്‍ക്ക് വഴിതുറക്കും. താമസസൗര്യത്തിനടക്കം സാധ്യതകള്‍ ഏറെയുള്ളതും അനുകൂലമാണ്.

ലേബര്‍ കോഡുകള്‍ പിന്‍വലിക്കണം: എച്ച്എംഎസ്

കൊച്ചി: തൊഴിലാളി വിരുദ്ധ നിയമങ്ങള്‍ ഉള്‍പ്പെടുന്ന നാല് ലേബര്‍ കോഡുകള്‍ പിന്‍വലിക്കണമെന്ന് എച്ച്എംഎസ് എറണാകുളം ജില്ലാ കമ്മിറ്റിയോഗം ആവശ്യപ്പെട്ടു. കേന്ദ്രസര്‍ക്കാര്‍ ഏകപക്ഷീയമായി ലേബര്‍ കോഡുകള്‍ നടപ്പാക്കാന്‍ നടത്തുന്ന നീക്കത്തില്‍ പ്രതിഷേധിച്ച് സംയുക്ത ട്രേഡ് യൂണിയന്‍ സമതി മേയ് 20ന് നടത്തുന്ന ദേശീയ പണിമുടക്ക് വിജയിപ്പിക്കണമെന്നും യോഗം അഭ്യര്‍ഥിച്ചു. തൊഴിലിടങ്ങളില്‍ രൂപപ്പെട്ടിരിക്കുന്ന പീഡനങ്ങളെക്കുറിച്ച് പ്രത്യേക സമിതിയെ വച്ച് പരിശോധിക്കണമെന്ന് യോഗം സംസ്ഥാന സര്‍ക്കാരിനോട് ആവശ്യപ്പെട്ടു. എച്ച്എംഎസ് സംസ്ഥാന ജനറല്‍ സെക്രട്ടറി ടോമി മാത്യു യോഗം ഉദ്ഘാടനം ചെയ്തു. ജില്ലാ പ്രസിഡന്‍റ് വി.യു. ഹംസക്കോയ അധ്യക്ഷത വഹിച്ചു.

പൊതുസ്ഥലത്ത് മാലിന്യം തള്ളല്‍ : കൊച്ചി കോര്‍പറേഷന്‍ പിഴ ഈടാക്കിയത് 1.60 കോടി

മത്സ്യസമ്പത്ത് കുറയുന്നു; തീരം വറുതിയിലേക്ക്

കൊച്ചി: കടലില്‍ മത്സ്യസമ്പത്ത് കുറഞ്ഞതോടെ ജില്ലയിലെ തീരമേഖല വറുതിയിലേക്ക്. മുന്‍ വര്‍ഷങ്ങളില്‍ ഈ സമയം വലനിറയെ മത്സ്യങ്ങള്‍ ലഭിച്ചിരുന്നെങ്കില്‍ ഇന്ന് ഡീസല്‍ ചെലവിന്‍റെ പകുതിക്ക് താഴെ മാത്രമാണ് മീന്‍ കിട്ടുന്നതെന്ന് തൊഴിലാളികള്‍ പറഞ്ഞു. ഇതോടെ ബോട്ടുകള്‍ ഹാര്‍ബറില്‍ കെട്ടിയിടേണ്ട അവസ്ഥയാണ്. കഴിഞ്ഞ വര്‍ഷം ഈ സമയം ചെമ്മീന്‍, കിളി, അയല തുടങ്ങിയ മത്സ്യങ്ങള്‍ ലഭിച്ചിരുന്നു. എന്നാല്‍ ഇന്നിവയ്ക്ക് ക്ഷാമമാണ്. മത്സ്യലഭ്യത കുറഞ്ഞു തുടങ്ങിയിട്ട് നാലു മാസത്തോളമായി. ഇപ്പോള്‍ രൂക്ഷമായിരിക്കുകയാണെന്നും തൊഴിലാളികള്‍ പറയുന്നു. ട്രോളിംഗ് നിരോധന കാലയളവില്‍ ബോട്ടുകള്‍ ഇറക്കാത്ത അതേ അവസ്ഥയാണ് നിലവില്‍. ഈ സ്ഥിതി തുടര്‍ന്നാല്‍ മത്സ്യത്തൊഴിലാളി കുടുംബങ്ങള്‍ പട്ടിണിയിലാകുമെന്നും അവര്‍ പറയുന്നു. ബോട്ടുകളുടെ മാത്രമല്ല മത്സ്യബന്ധനത്തിനിറങ്ങുന്ന ചെറുവള്ളങ്ങളുടെയും സ്ഥിതി വ്യത്യസ്തമല്ല. ചെറുമത്സ്യങ്ങളെ പിടികൂടുന്നത് വര്‍ധിച്ചത് കടലില്‍ മത്സ്യശോഷണത്തിന് കാരണമായിട്ടുണ്ടെന്നാണ് വിലയിരുത്തൽ. ഇതരസംസ്ഥാനങ്ങളില്‍ ബോട്ടുകള്‍ക്ക് ഡീസല്‍ സബ്‌സിഡി നല്‍കുമ്പോള്‍ സംസ്ഥാനത്ത് അത് നല്‍കാത്തതും പ്രതിസന്ധി സൃഷ്ടിക്കുന്നുണ്ടെന്ന് മത്സ്യത്തൊഴിലാളികള്‍ പറയുന്നു. പീലിംഗ് ഷെഡുകളും മത്സ്യമേഖലയിലെ വാഹനങ്ങളുമെല്ലാം സ്തംഭനാവസ്ഥയിലാണ്.

പകൽ ആക്രിപെറുക്കൽ, രാത്രിയിൽ കവർച്ച : ഇതരസംസ്ഥാനക്കാർ പിടിയിൽ

പനങ്ങാട്: വീട് കുത്തിത്തുറന്ന് കവർച്ച നടത്തിയ കേസിൽ ഇതരസംസ്ഥാനക്കാരായ പ്രതികൾ പിടിയിലായി. ഡൽഹി സ്വദേശി ഹിബിസുൾ (22), ബംഗളൂരു സ്വദേശി മുഹമ്മദ്‌ റഫീഖുൾ (25) എന്നിവരെയാണ് പനങ്ങാട് പോലീസ് അറസ്റ്റ് ചെയ്തത്. നെട്ടൂർ സ്വദേശിയുടെ വീട്ടിലാണ് മോഷണം നടന്നത്. പകൽ ആക്രി വസ്തുക്കൾ പെറുക്കിയെടുക്കാനെന്ന വ്യാജേന കറങ്ങിനടന്ന് ആൾത്താമസമില്ലാത്ത വീടുകൾ നോക്കിവച്ച് രാത്രി കവർച്ച നടത്തുകയാണ് പ്രതികളുടെ രീതി. മോട്ടോർ ഘടിപ്പിച്ച സൈക്കിളിൽ കറങ്ങിനടന്നാണ് മോഷണം. നെട്ടൂരിൽ വീടിന്‍റെ മുകളിലത്തെ നിലയുടെ പൂട്ട് തകർത്ത് അകത്തു പ്രവേശിച്ച പ്രതികൾ വിലപിടിപ്പുള്ള ടിവിയും ഓട്ടുവിളക്കുകളും പാത്രങ്ങളും വീട്ടുപകരണങ്ങളും ഇൻവെർട്ടർ ബാറ്ററി ഉൾപ്പെടെ രണ്ട് ലക്ഷത്തോളം രൂപ വിലവരുന്ന സാധനങ്ങൾ മോഷ്ടിച്ച് രക്ഷപ്പെടുകയായിരുന്നു. കേസിൽ ഒന്നാം പ്രതിയായ ഹിബിസുളിന് ആലപ്പുഴ അരൂർ പോലീസ് സ്റ്റേഷനിൽ സമാനമായ കേസുണ്ട്. അന്ന് 10 ലക്ഷത്തോളം വിലമതിക്കുന്ന ഓട്ടു പാത്രങ്ങളാണ് മോഷ്ടിച്ചത്. ഈ കേസിൽ ഇയാൾ ഇപ്പോൾ ജാമ്യത്തിലാണ്. ആലപ്പുഴ ജില്ലയിലും എറണാകുളം ജില്ലയിലുമായി താമസിച്ചിരുന്ന പ്രതിയെ ചളിക്കവട്ടം ഭാഗത്തെ സുഹൃത്തിന്‍റെ വീട്ടിൽ നിന്നും രണ്ടാം പ്രതിയെ മുളവുകാട് ഭാഗത്തു നിന്നുമാണ് പിടികൂടിയത്. എസിപി രാജ്‌കുമാറിന്‍റെ നേതൃത്വത്തിൽ പനങ്ങാട് സിഐ സാജു ആന്‍റണി, എസ്ഐമാരായ മുനീർ, റഫീഖ്, എഎസ്ഐ രാജീവ്, സിപിഒമാരായ അരുൺരാജ്, പ്രശാന്ത്, മഹേശൻ എന്നിവരടങ്ങിയ സംഘമാണ് പ്രതികളെ പിടികൂടിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

ഭക്തിയുടെ നിറവിൽ ഓശാന ആചരിച്ച് വിശ്വാസികൾ

കൊച്ചി: ക്രിസ്തുവിന്‍റെ പീഡാനുഭവത്തിന്‍റെയും ഉയിര്‍പ്പിന്‍റെയും സ്മരണകള്‍ ഉണർത്തി വിശുദ്ധ വാരാചരണത്തിനു തുടക്കം. ഓശാന ഞായറാഴ്ചയായ ഇന്നലെ ദേവാലയങ്ങളില്‍ കുരുത്തോല വെഞ്ചിരിപ്പ്, പ്രദക്ഷിണം, ദിവ്യബലി എന്നിവയുണ്ടായിരുന്നു. സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ ഇടപ്പള്ളി തോപ്പില്‍ മേരി ക്വീന്‍ പള്ളിയില്‍ ഓശാന ഞായര്‍ തിരുക്കര്‍മങ്ങള്‍ക്കു മുഖ്യകാര്‍മികത്വം വഹിച്ചു. എറണാകുളം സെന്‍റ് ഫ്രാന്‍സിസ് അസീസി കത്തീഡ്രലില്‍ ഓശാന ശുശ്രൂഷകളില്‍ വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ കാര്‍മികത്വം വഹിച്ചു. സഹായമെത്രാന്‍ ഡോ. ആന്‍റണി വാലുങ്കല്‍ സഹകാര്‍മികനായി. കോതമംഗലം ബിഷപ് മാര്‍ ജോര്‍ജ് മഠത്തിക്കണ്ടത്തില്‍ പഴമ്പിള്ളിച്ചാല്‍ സെന്‍റ് മേരീസ് പള്ളിയില്‍ ഓശാന തിരുക്കര്‍മങ്ങളില്‍ കാര്‍മികനായി. മൂവാറ്റുപുഴ ബിഷപ് യൂഹാനോൻ മാർ തെയഡോഷ്യസ്‌ കുന്നക്കുരുടി സെന്‍റ് ജോർജ്‌ മലങ്കര കത്തോലിക്ക പള്ളിയിൽ ഓശാന ഞായർ തിരുക്കർമങ്ങൾക്ക്‌ നേതൃത്വം നൽകി. ഫോര്‍ട്ട്‌കൊച്ചി സാന്താക്രൂസ് കത്തീഡ്രല്‍ ബസിലിക്കയില്‍ രാവിലെ ഏഴിന് ആഘോഷമായ കുരുത്തോല വെഞ്ചിരിപ്പ്, പ്രദക്ഷിണം, ദിവ്യബലി എന്നിവയുണ്ടായിരുന്നു. മലയാറ്റൂർ കുരിശുമുടിയിൽ കാലടി: മലയാറ്റൂർ കുരിശുമുടിയിലും സെന്‍റ് തോമസ് പള്ളിയിലും വിശുദ്ധവാര തിരുക്കർമങ്ങൾക്ക് തുടക്കമായി. ഇന്നലെ നടന്ന ഓശാന ഞായർ തിരുക്കർമങ്ങളിൽ നിരവധി വിശ്വാസികൾ പങ്കെടുത്തു. വിശുദ്ധ കുർബാന, കുരുത്തോല പ്രദക്ഷിണം, വിതരണം എന്നിവ ഉണ്ടായി. കുരിശുമുടിയിൽ കുരുത്തോല വെഞ്ചിരിപ്പ് ഫാ. ജോൺ വടക്കൻ നിർവഹിച്ചു. കുരിശുമുടി സ്പിരിച്വൽ ഡയറക്ടർ ഫാ. ജോസ് വടക്കൻ തിരുകർമങ്ങൾക്ക് നേതൃത്വം നൽകി. താഴത്തെ പള്ളിയിൽ റവ. ഡോ. ആന്‍റണി നരികുളം കുരുത്തോല വെഞ്ചിരിപ്പ് നടത്തി. വികാരി ഫാ. ജോസ് ഒഴലക്കാട്ട്, സഹവികാരി നിഖിൽ മുളവരിക്കൽ എന്നിവർ തിരുക്കർമങ്ങൾക്ക് നേതൃത്വം നൽകി.

യുവാവ് ട്രെയിൻതട്ടി മരിച്ചനിലയിൽ

ആലുവ: റെയിൽപ്പാളത്തിൽ യുവാവിനെ ട്രെയിൻതട്ടി മരിച്ച നിലയിൽ കണ്ടെത്തി. ഇടുക്കി ഉപ്പുതോട് കല്ലറക്കൽ സുരേഷ് കുമാറിന്‍റെ മകൻ അനുവാണ് (25) മരിച്ചത്. ശനിയാഴ്ച രാത്രി അന്പാട്ടുകാവ് മെട്രോ സ്റ്റേഷന് സമീപത്തെ റെയിൽപാളത്തിലാണ് മൃതദേഹം കണ്ടെത്തിയത്. അന്പാട്ടുകാവ് ഭാഗത്ത് റിക്കവറി വാഹനം ഓടിക്കുന്നയാളാണ്.

സ്നേഹ സ്പർശം പരിപാടി നടത്തി

കോതമംഗലം: കുട്ടന്പുഴ സെന്‍റ് മേരീസ് പള്ളിയിൽ സ്നേഹ സ്പർശം പരിപാടി നടത്തി. രോഗശയ്യയിൽ കിടക്കുന്നവരെയും 75 വയസിന് മുകളിലുള്ളവരെയും പങ്കെടുപ്പിച്ച് പിതൃവേദി, മാതൃവേദി എന്നിവയുടെ നേതൃത്വത്തിൽ നടത്തിയ പരിപാടി ഫോറോന വികാരി റവ.ഡോ. തോമസ് പറയിടം ഉദ്ഘാടനം ചെയ്തു. ഇടവക വികാരി അരുണ്‍ വലിയതാഴാത്ത്, ഫ്രാൻസിസ് ചാലിൽ, ബിനു മാത്യു, മോളി ബേബി, ആക്സിലിയ ജോയി, പ്രിയ റോജോ, ജിജോ ജോസ്, ജിൻസ് ജോസ്, ഷാമോൻ ദേവസ്യ, ജോഷി കാക്കനാട്ട്, സിസ്റ്റർ ജോർലി എന്നിവർ പ്രസംഗിച്ചു.

അംബേദ്കർ ജയന്തി ആഘോഷം നാളെ

മൂവാറ്റുപുഴ: കെപിഎംഎസ് സംസ്ഥാന കമ്മിറ്റിയുടെ ആഭിമുഖ്യത്തിൽ ഡോ. ബി.ആർ. അംബേദ്കർ ജയന്തി ആഘോഷം നാസ് ഓഡിറ്റോറിയത്തിൽ നാളെ നടക്കും. രാവിലെ 11ന് മാത്യു കുഴൽനാടൻ എംഎൽഎ ഉദ്ഘാടനം നിർവഹിക്കും. കെപിഎംഎസ് സംസ്ഥാന പ്രസിഡന്‍റ് കെ.പി. പ്രസന്നകുമാർ അധ്യക്ഷത വഹിക്കും. സാഹിത്യകാരൻ ഒർണ്ണ കൃഷ്ണൻകുട്ടി മുഖ്യപ്രഭാഷണം നടത്തും. സംസ്ഥാന വർക്കിംഗ് പ്രസിഡന്‍റ് എൻ.കെ ഉണ്ണികൃഷ്ണൻ ആമുഖ പ്രഭാഷണം നടത്തും. നഗരസഭാധ്യക്ഷൻ പി.പി എൽദോസ് ജന്മദിന സന്ദേശം നൽകും.

ഖാദി മേള

കൂത്താട്ടുകുളം: ഖാദി ഗ്രാമസൗഭാഗ്യ ഷോറൂമിൽ ആരംഭിച്ച ഖാദി മേളയുടെ ഉദ്ഘാടനം അനൂപ് ജേക്കബ് എംഎൽഎ നിർവഹിച്ചു. ഖാദി ബോർഡംഗം കെ. ചന്ദ്രശേഖരൻ അധ്യക്ഷത വഹിച്ചു. ആദ്യ വിൽപ്പന പ്രസ് ക്ലബ് പ്രസിഡന്‍റ് എൻ.സി. വിജയകുമാറിൽനിന്നു വ്യാപാരി വ്യവസായി സമിതി എറണാകുളം ജില്ലാ ജോയിന്‍റ് സെക്രട്ടറി ബസന്ത് മാത്യു ഏറ്റുവാങ്ങി. 19 വരെ 30 ശതമാനം റിബേറ്റ് ലഭിക്കും.

‘പെരിയാർവാലി പുറന്പോക്കിൽ താമസിക്കുന്നവർക്ക് പട്ടയം അനുവദിക്കണം’

മൂവാറ്റുപുഴ: പെരിയാർവാലി പുറന്പോക്കിൽ ദീർഘകാലമായി താമസിച്ചു വരുന്നവർക്ക് പട്ടയം അനുവദിക്കണമെന്ന് ആവശ്യപ്പെട്ട് വകുപ്പ് മന്ത്രിക്ക് സിപിഐ തൃക്കളത്തൂർ സൊസൈറ്റിപ്പടി, കാവുംപടി ബ്രാഞ്ച് കമ്മിറ്റികൾ നിവേദനം നൽകി. 1957ലാണ് പെരിയാർവാലി കനാൽ നിർമാണം പൂർത്തീകരിച്ചത്. 50 വർഷമായി കനാൽ ഓരത്ത് ജീവിക്കുന്നവരുൾപ്പെടെ പട്ടയം ഇല്ലാത്തതിനാൽ അർഹമായ ലൈഫ് ഭവന പദ്ധതി പ്രകാരം വീട് നിർമിക്കാൻ പോലും സാധ്യമാകാത്ത അവസ്ഥയിലാണ്. ഇത് പരിഗണിച്ച് ഭൂരഹിതരായ ജനങ്ങൾക്ക് പട്ടയം അനുവദിക്കണമെന്ന് ആവശ്യപ്പെട്ടാണ് സിപിഐ തൃക്കളത്തൂർ കാവുംപടി ബ്രാഞ്ച് സെക്രട്ടറി വി.എൻ പ്രമോദ്, സൊസൈറ്റിപ്പടി ബ്രാഞ്ച് സെക്രട്ടറി ജിനേഷ് ഗംഗാധരൻ എന്നിവർ മന്ത്രിക്ക് നിവേദനം നൽകിയത്. വിഷയം അനുഭാവപൂർവ്വം പരിഗണിക്കുമെന്ന് മന്ത്രി അറിയിച്ചു.

പി.ജെ. ആന്‍റണി ജന്മശതാബ്ദി വർഷം

മൂവാറ്റുപുഴ: മലയാള നാടക, സിനിമ രംഗത്തെ അതുല്യ പ്രതിഭയായിരുന്ന പി.ജെ. ആന്‍റണിയുടെ ജന്മശതാബ്ദി വർഷത്തോടനുബന്ധിച്ച് മൂവാറ്റുപുഴ താലൂക്ക് ലൈബ്രറി കൗണ്‍സിലിന്‍റെ ആഭിമുഖ്യത്തിൽ വിവിധ പരിപാടികളോടെ ആഘോഷിക്കുമെന്ന് താലൂക്ക് ലൈബ്രറി കൗണ്‍സിൽ പ്രസിഡന്‍റ് ജോഷി സ്കറിയ, സെക്രട്ടറി സി.കെ. ഉണ്ണി എന്നിവർ അറിയിച്ചു. ഇതിന്‍റെ ഭാഗമായി കൂത്താട്ടുകുളം ടൗണ്‍ ഹാളിൽ 15ന് സംഘടിപ്പിക്കുന്ന പി.ജെ. ആന്‍റണി ജന്മശതാബ്ദി ആഘോഷ പരിപാടിയുടെ ഉദ്ഘാടനം പി.ജെ. ആന്‍റണി ഫൗണ്ടേഷൻ ചെയർമാൻ ജോണ്‍ ഫെർണാണ്ടസ് നിർവഹിക്കും. മൂവാറ്റുപുഴ നഗരസഭാധ്യക്ഷൻ പി.പി. എൽദോസ് അധ്യക്ഷത വഹിക്കും. പി.ജെ. ആന്‍റണിയുടെ മകൾ എലിസബത്ത് ആന്‍റണി മുഖ്യാതിഥിയായിരിക്കും. ജില്ലാ ലൈബ്രറി കൗണ്‍സിൽ സെക്രട്ടറി മുഖ്യപ്രഭാഷണം നടത്തും. എംജി യൂണിവേഴ്സിറ്റി സിൻഡിക്കേറ്റംഗം പി.ബി. രതീഷ്, പി.ജെ. ആന്‍റണിയുടെ നാടകത്തിലെ അഭിനയ മികവ് തെളിയിച്ച കേരള ബാങ്ക് പ്രസിഡന്‍റ് ഗോപി കോട്ടമുറിക്കൽ, കെ.എം പൗലോസ്, വി.എ രവി എന്നിവരെ ആദരിക്കും.

ആറു വയസുകാരൻ വേന്പനാട്ട് കായൽ കൈകൾ ബന്ധിച്ച് നീന്തിക്കടന്നു

കോതമംഗലം: വാരപ്പെട്ടി സ്വദേശിയായ ആറ് വയസുകാരൻ വേന്പനാട്ട് കായൽ ഏഴ് കിലോ മീറ്റർ ദൂരം കൈകൾ ബന്ധിച്ച് നീന്തിക്കടന്നു. വാരപ്പെട്ടി ഇളങ്ങവം ശ്രീജ ഭവനിൽ ശ്രീജിത്ത് - രഞ്ജുഷ ദന്പതികളുടെ മകനും പുതുപ്പാടി കനേഡിയൻ സെൻട്രൽ സ്കൂളിലെ ഒന്നാം ക്ലാസ് വിദ്യാർഥിയുമായ ശ്രാവണ്‍ എസ്. നായരാണ് ഒരു മണിക്കൂർ 29 മിനിറ്റ് കൊണ്ട് നീന്തിക്കടന്നത്. ഇന്നലെ രാവിലെ 7.45നു ആലപ്പുഴ ജില്ലയിലെ വടക്കുംകര അന്പലക്കടവിൽ നിന്ന് കോട്ടയം ജില്ലയിലെ വൈക്കം ബീച്ച് വരെയുള്ള ഏഴ് കിലോമീറ്റർ കൈകൾ ബന്ധിച്ച് നീന്തിയാണ് വേൾഡ് വൈഡ് ബുക്ക് ഓഫ് റിക്കാർഡ്സിൽ ഇടം പിടിച്ചിരിക്കുന്നത്. ഏഴു കിലോമീറ്റർ കൈകൾ ബന്ധിച്ച് നീന്തി കടക്കുന്ന ഏറ്റവും പ്രായം കുറഞ്ഞ കുട്ടിയും ആദ്യത്തെ ആണ്‍കുട്ടിയും ശ്രാവണ്‍ ആണെന്ന് കോതമംഗലം ഡോൾഫിൻ അക്വാട്ടിക് ക്ലബിലെ പരിശീലകൻ ബിജു തങ്കപ്പൻ പറഞ്ഞു. ചേർത്തല അന്പലക്കടവിൽനിന്ന് ചേന്നംപ്പള്ളി പഞ്ചായത്ത് പ്രസിഡന്‍റ് ടി.എസ്. സുധീഷ്, പഞ്ചായത്ത് മുൻ പ്രസിഡന്‍റ് ഹരികുമാർ എന്നിവർ ചേർന്ന് നീന്തൽ ഫ്ളാഗ് ഓഫ് ചെയ്തു.

വിശുദ്ധ വാരാചരണ ഒരുക്കങ്ങൾ പൂർത്തിയായി

മൂവാറ്റുപുഴ: അൻപത് നോന്പിന്‍റെ വ്രതശുദ്ധിയിൽ മൂവാറ്റുപുഴയിലെയും സമീപ പ്രദേശങ്ങളിലെയും ദേവാലയങ്ങളിൽ വിശുദ്ധ വാരാചരണത്തിനുള്ള ഒരുക്കങ്ങൾ പൂർത്തിയായി. ഓശാന ഞായറിലെ തിരുക്കർമങ്ങളോടെയാണ് വിശുദ്ധ വാരാചരണത്തിന് ദേവാലയങ്ങളിൽ തുടക്കമാകുന്നത്. ഓശാന ഞായറിലെ പ്രദക്ഷിണത്തിനായുള്ള കുരുത്തോലകൾ പള്ളികളിൽ ഒരുക്കികഴിഞ്ഞു. മൂവാറ്റുപുഴ ഹോളി മാഗി ഫൊറോന പള്ളിയിൽ വിപുലമായ ക്രമീകരണങ്ങളാണ് ഒരുക്കിയിരിക്കുന്നത്. ഇന്ന് രാവിലെ 6.45ന് നിർമല സ്കൂൾ ഗ്രൗണ്ടിൽ ഓശാന തിരുക്കർമങ്ങൾക്ക് തുടക്കം കുറിച്ച് കുരുത്തോല വെഞ്ചരിപ്പും തുടർന്ന് കുരുത്തോല പ്രദക്ഷിണത്തിൽ ആശീർവദിച്ച കുരുത്തോലകൾ കൈകളിലേന്തി വിശ്വാസികൾ പങ്കാളികളാകും. വികാരി ഫാ. കുര്യാക്കോസ് കൊടകല്ലിൽ തിരുക്കർമങ്ങൾക്ക് മുഖ്യ കാർമികത്വം വഹിക്കും. 17ന് രാവിലെ 6.30ന് പെസഹാ തിരുക്കർമങ്ങളായ കുർബാന, കാൽകഴുകൽ ശുശ്രൂഷ, ദിവ്യ കാരുണ്യ ആരാധന. 18ന് രാവിലെ 6.30ന് കുരിശിന്‍റെ വഴി, കുരിശു ചുംബനം, വൈകുന്നേരം നാലിന് പരിഹാര പ്രദക്ഷിണം, പീഡനുഭവ സന്ദേശം. 20ന് രാവിലെ മൂന്നിന് ഉയിർപ്പുതിരുനാൾ തിരുക്കർമങ്ങൾ, ആറിനും എട്ടിനും 10നും കുർബാന എന്നിവയോടുകൂടി വിശുദ്ധ വാരാചരണം സമാപിക്കും.

‘തങ്കളം-കാക്കനാട് നാലുവരി പാതയും ഭൂതത്താൻകെട്ട് പദ്ധതിയും യാഥാർഥ്യമാക്കണം’

കോതമംഗലം: യുഡിഎഫ് ഭരണകാലത്ത് പ്രഖ്യാപിച്ച് തുടങ്ങിവച്ച തങ്കളം-കാക്കനാട് നാലുവരി പാതയും തങ്കളം-കോഴിപ്പിള്ളി റിംഗ് റോഡും ഭൂതത്താൻകെട്ട് ജലവൈദ്യുതി പദ്ധതിയും ഉടൻ യാഥാർഥ്യമാക്കണമന്ന് ഡിസിസി പ്രസിഡന്‍റ് മുഹമ്മദ് ഷിയാസ്. കോതമംഗലം നിയോജക മണ്ഡലത്തിലെ ചേലാട് സിന്തറ്റിക് സ്റ്റേഡിയവും യാഥാർഥ്യമാക്കണമെന്ന് ആവശ്യപ്പെട്ട് കോണ്‍ഗ്രസ് കോതമംഗലം, കവളങ്ങാട് ബ്ലോക്ക് കമ്മിറ്റികളുടെ നേതൃത്വത്തിൽ സംഘടിപ്പിച്ച പ്രതിഷേധ കൂട്ടായ്മ ഉദ്ഘാടനം ചെയ്യുകയായിരുന്നു അദ്ദേഹം. വനാതിർത്തി മേഖലയിൽ ട്രഞ്ച് നിർമാണം നടത്തുക, വന്യമൃഗാക്രമണത്തിൽ മരണമടഞ്ഞവരുടെ കുടുംബത്തിനുള്ള നഷ്ടപരിഹാരം ഉടൻ നൽകുക, ഗുരുതരമായി പരിക്കേറ്റവർക്ക് പ്രഖ്യാപിച്ച ധനസഹായം നൽകുക, കൃഷി നശിച്ച കർഷകർക്ക് ലഭിക്കേണ്ട മൂന്നര കോടിയുടെ കുടിശിക തുക ഉടൻ നൽകുക, ആലുവ-മൂന്നാർ റോഡ് സമരത്തിൽ പങ്കെടുത്ത ബിഷപ് മാർ ജോർജ് പുന്നക്കോട്ടിൽ, ഡീൻ കുര്യാക്കോസ് എംപി, മറ്റ് ജനപ്രതിനിധികൾ എന്നിവർക്കെതിരെ എടുത്തിട്ടുള്ള കള്ളക്കേസ് പിൻവലിക്കണമെന്നും കോണ്‍ഗ്രസ് കൂട്ടായ്മ ആവശ്യപ്പെട്ടു. കോണ്‍ഗ്രസ് കോതമംഗലം ബ്ലോക്ക് പ്രസിഡന്‍റ് ഷെമീർ പനയ്ക്കൽ അധ്യക്ഷത വഹിച്ചു. കെപിസിസി ജനറൽ സെക്രട്ടറി എസ്. അശോകൻ മുഖ്യപ്രഭാഷണം നടത്തി.

മൂവാറ്റുപുഴയിൽ വിഷു വിപണി സജീവം

മൂവാറ്റുപുഴ: വിഷുക്കണി ഒരുക്കാൻ വിപണി സജീവമായി. കൊന്നപ്പൂവും കണി വെള്ളരിയും ശ്രീകൃഷ്ണ വിഗ്രഹവും ചേർന്ന വിഷുക്കണിയുണ്ടെങ്കിലെ വിഷുദിനത്തിൽ ആഘോഷങ്ങൾ പൂർണമാകൂ. വിഷുക്കണിയിലെ പ്രധാനമായ ശ്രീകൃഷ്ണ വിഗ്രഹങ്ങൾ മൂവാറ്റുപുഴയിലെ വ്യാപാര സ്ഥാപനങ്ങളിൽ നിറഞ്ഞുകഴിഞ്ഞു. പുഞ്ചിരി തൂകുന്ന കൃഷ്ണ വിഗ്രഹമാണ് വിഷു വിപണിയിൽ വ്യാപാര സ്ഥാപനങ്ങളുടെ മുൻനിര കൈയ്യടക്കിയിരിക്കുന്നത്. പല ഭാവത്തിൽ, വർണത്തിൽ, വലിപ്പത്തിലുള്ള കൃഷ്ണ വിഗ്രഹങ്ങളാണ് വിപണിയിൽ എത്തിയിട്ടുള്ളത്. 200 മുതൽ 2000 രൂപ വരെയുള്ള വിഗ്രഹങ്ങൾ വിൽപനയ്ക്കായി മൂവാറ്റുപുഴയിലെ വ്യാപാരികൾ എത്തിച്ചിട്ടുണ്ട്. പാലക്കാട് അടക്കമുള്ള അയൽ ജില്ലകളിൽ നിന്നാണ് കൃഷ്ണ വിഗ്രഹങ്ങളെത്തിക്കുന്നത്. വിഷുപ്പുലരിക്ക് ഒരുനാൾ ശേഷിക്കെ കൃഷ്ണ വിഗ്രഹങ്ങളുടെ വിൽപ്പന തകൃതിയായി നടക്കുകയാണെന്ന് വ്യാപാരികൾ പറഞ്ഞു.

വിപണി കൈയടക്കി ഇത്തവണയും ചൈനീസ് കണിക്കൊന്ന

മൂവാറ്റുപുഴ: വിഗ്രഹത്തിനൊപ്പം ചൈനീസ് കണിക്കൊന്നപൂക്കളും വിപണിയിൽ ഒരുങ്ങിക്കഴിഞ്ഞു. മുൻ വർഷങ്ങളിലേതുപോലെ കൊന്നപ്പൂവിന്‍റെ ക്ഷാമം കണക്കിലെടുത്താണ് വ്യാപാരികൾ ചൈനീസ് കൊന്നപ്പൂക്കളും വിപണിയിലെത്തിക്കുന്നത്. വിഷുവിന് വളരെ നാൾ മുന്പ് തന്നെ നഗരത്തിലെ കണിക്കൊന്നകൾ പൂത്തതിനാലും വേനൽ മഴ തുടർച്ചയായി എത്തിയതിനാലും കണികണ്ടുണരാൻ നാടൻ കൊന്നപൂക്കൾ ലഭിക്കാൻ മൂവാറ്റുപുഴക്കാർ നന്നേ പാടുപെടേണ്ടിവരും. നാടൻ കണിക്കൊന്നയോട് സാമ്യമുള്ള ചൈനീസ് കൊന്നപ്പൂക്കൾ ഫാൻസി, സ്റ്റേഷനറി കടകൾ ഇതിനോടകം തന്നെ അലങ്കരിച്ചുകഴിഞ്ഞു. 30 രൂപ മുതലാണ് വില ആരംഭിക്കുന്നത്. ഒരു തവണ ഉപയോഗിച്ച ശേഷം സൂക്ഷിച്ചുവച്ചാൽ അടുത്ത വർഷവും ഉപയോഗിക്കാമെന്നതും പ്ലാസ്റ്റിക് കൊന്നപ്പൂവിനോടുള്ള പ്രിയം വർധിപ്പിക്കുന്നു.

ഞാറക്കാട് പഞ്ചായത്ത് കിണര്‍ അപകടാവസ്ഥയില്‍

പോത്താനിക്കാട്: ഞാറക്കാട് മറ്റപ്പിള്ളി കവലയിലെ പഞ്ചായത്ത് കിണര്‍ പാര്‍ശ്വഭിത്തികള്‍ ഇടിഞ്ഞ് അപകടാവസ്ഥയിൽ. സമീപത്തെ അങ്കണവാടിയിലേക്കും 22 വീടുകളിലേക്കും കുടിവെള്ളം ശേഖരിക്കുന്നത് ഇവിടെനിന്നാണ്. ജലക്ഷാമം രൂക്ഷമായിട്ടുള്ള ഇവിടെ വരള്‍ച്ച ദുരിതാശ്വാസ പദ്ധതി പ്രകാരം 1983ലാണ് കിണര്‍ നിര്‍മിച്ചത്. 30 അടി ആഴമുള്ള കിണറിന്‍റെ കീഴ്ഭാഗം 16 അടിയോളം റിംഗ് ഇറക്കിയിട്ടുണ്ട്. പകുതിയോളം വരുന്ന മുകള്‍ഭാഗത്ത് റിംഗില്ലാത്തതിനാല്‍ കിണറിന്‍റെ ഭിത്തി ഇടയ്ക്കിടെ ഇടിഞ്ഞുകൊണ്ടിരിക്കുകയാണ്. റിംഗ് പിടിപ്പിച്ചിട്ടുള്ള ഭാഗത്തും എലികള്‍ മാളമെടുത്ത് കിണര്‍ ഭിത്തികള്‍ ഇടിയുന്നുണ്ട്. ഈ കിണറിനോട് ചേര്‍ന്ന് ഒരു വീടും സ്ഥിതി ചെയ്യുന്നുണ്ട്. മഴക്കാലത്ത് വെള്ളം നിറയുന്ന സമയങ്ങളില്‍ കിണറിടിഞ്ഞ് വന്‍ദുരന്തം സംഭവിക്കുമെന്ന ഭീതിയിലാണ് ഈ വീട്ടുകാര്‍ കഴിയുന്നത്. കിണറ്റില്‍ പൂര്‍ണമായും റിംഗിറക്കി പാര്‍ശ്വഭിത്തിക്കും റിംഗിനുമിടയിലുള്ള ഭാഗത്ത് മെറ്റല്‍ നിരത്തി കിണറിന്‍റെ അപകടാവസ്ഥ എത്രയും വേഗം ഒഴിവാക്കണമെന്നാണ് സമീപവാസികള്‍ ആവശ്യപ്പെടുന്നത്.

തൈക്കുടം പള്ളിയിൽ തപസുകാല ധ്യാനവും വിശുദ്ധ വാരാചരണവും

കൊച്ചി: വൈറ്റില തൈക്കൂടം സെന്‍റ് റാഫേൽ പള്ളിയിൽ തപസുകാല ധ്യാനവും വിശുദ്ധവാരാചരണവും ഇന്നാരംഭിക്കും. വൈകുന്നേരം 4.30ന് ജപമാല, ദിവ്യബലി. ഫാ. ജസ്റ്റിൻ കരീത്തറ ധ്യാനം നയിക്കും. 18ന് രാവിലെ ആറിന് കുരിശിന്‍റെ വഴി. പ്രദക്ഷിണം പള്ളിയിൽനിന്ന് തുടങ്ങി തൈക്കൂടം, വൈറ്റില, ജനത പ്രദേശങ്ങളിലൂടെ നീങ്ങി പള്ളിയിൽ സമാപിക്കും. തുടർന്ന് പാർക്കിംഗ് ഗ്രൗണ്ടിൽ കെഎൽസിഎയുടെ നേതൃത്വത്തിൽ യേശുവിന്‍റെ പീഡാ സഹനത്തിന്‍റെയും, മരണത്തിന്‍റെയും ദൃശ്യാവിഷ്കരണം. വരാപ്പുഴ അതിരൂപത സഹായമെത്രാൻ ഡോ. ആന്‍റണി വാലുങ്കൽ സന്ദേശം നൽകും.

ഗാർഹിക സിലിണ്ടർ വില വർധനയ്ക്കെതിരേ ഐഎൻടിയുസി ധർണ

തൃപ്പൂണിത്തുറ: ഗാർഹിക പാചകവാതക സിലിണ്ടറിന് വർധിപ്പിച്ച വില പിൻവലിക്കണമെന്നാവശ്യപ്പെട്ട് ഇരുമ്പനം ഐഎൻടിയുസിയുടെ നേതൃത്വത്തിൽ ഇരുമ്പനം എച്ച്പിസിഎൽ പ്ലാന്‍റിന് മുൻപിൽ പ്രതിഷേധ ധർണ സംഘടിപ്പിച്ചു. കെപിസിസി ഉപാധ്യക്ഷൻ വി.ജെ. പൗലോസ് ഉദ്ഘാടനം ചെയ്തു. ഇരുമ്പനം ജനറൽ വർക്കേഴ്സ് യൂണിയൻ പ്രസിഡന്‍റ് സി.എ. ഷാജി അധ്യക്ഷത വഹിച്ചു. മണ്ഡലം പ്രസിഡന്‍റ് കെ.വി. സാജു, യൂണിയൻ സെക്രട്ടറി അജി കൂനിയത്ത്, ബ്ലോക്ക്‌ സെക്രട്ടറി ജോയ്സൺ, യൂത്ത് കോൺഗ്രസ്‌ പ്രസിഡന്‍റ് വിജിൽ വിൽ‌സൻ, വേണുഗോപാൽ, കെ.പി. ബേബി തുടങ്ങിയവർ പ്രസംഗിച്ചു.

ചെങ്ങമനാട് പുത്തൻതോട് ഇറിഗേഷൻ കനാലിൽ ശുചിമുറി മാലിന്യമൊഴുക്കുന്നു

വിദ്യാർഥിനിയുടെ ചികിത്സയ്ക്കായി പായസചലഞ്ചുമായി കോൺഗ്രസ് കൂട്ടായ്മ

പള്ളുരുത്തി: 19 കാരിയായ ഡിഗ്രി വിദ്യാർഥിനിയുടെ വാൽവ് മാറ്റിവെയ്ക്കൽ ശസ്ത്രക്രിയക്കായി പായസ ചലഞ്ചിലൂടെ പണം സമാഹരിച്ച് കോൺഗ്രസ് കൂട്ടായ്മ. ഇടക്കൊച്ചി പഷ്ണിത്തോട് വിനോജിന്‍റെ മകൾ അശ്വതിയുടെ വാൽവ് മാറ്റിവെക്കല്‍ ശസ്ത്രക്രിയക്ക് കോൺഗ്രസ് ഇടക്കൊച്ചി മണ്ഡലം 17-ാം ഡിവിഷൻ കമ്മിറ്റി പാലട പായസ ചലഞ്ചിലൂടെ പണം സമാഹരിച്ച് നല്‍കുന്നത്. ഡിവിഷൻ പ്രസിഡന്‍റും പള്ളുരുത്തി മിൽമ ഹബ് ഉടമയുമായ ആയ എം.എം.പ്രിജിത്തിന്‍റെ നേതൃത്വത്തിലാണ് പായസം തയാറാക്കി വിതരണം ചെയ്തത്. ചികിത്സക്കായി 15 ലക്ഷം രൂപയോളം വേണ്ടി വരും. ആദ്യ ഘട്ടത്തിൽ 300 ലിറ്ററോളം പായസമാണ് വിതരണം നടത്തിയത്. മിൽമ ഹബ്ബിന്‍റെ കീഴിലുള്ള കൊച്ചിയിലെ 350 ഓളം ഏജൻസികൾ വഴിയായിരുന്നു പായസ വില്പന. പായസം തയാറാക്കുന്നതിനായി സഹപ്രവർത്തകരും മിൽമ ഹബ്ബിലെ ജീവനക്കാരും ഉണ്ടായിരുന്നു. തയാറാക്കിയ പായസം പുലർച്ചയോടെ തന്നെ ഓരോ ലിറ്ററിന്‍റെ കാനുകളിൽ നിറച്ചു ഏജൻസികളിൽ എത്തിച്ചു നൽകി. ചിലവുകൾ കിഴിച്ച് ലഭിച്ച 25,000 രൂപ ചികിത്സാ സമിതിക്ക് കൈമാറുമെന്ന് പ്രിജിത്ത് പറഞ്ഞു. അടുത്ത ഘട്ടത്തിൽ സുമനസുകളിൽ നിന്ന് സഹായം തേടി പായസം തയാറാക്കി തുക പൂർണമായും നൽകുന്നതിനുള്ള ഒരുക്കത്തിലാണ് പ്രിജിത്ത്. പായസ ചലഞ്ചിന് തമ്പി സുബ്രഹ്മണ്യൻ, പി.പി. ജേക്കബ്, കൗൺസിലർ അഭിലാഷ് തോപ്പിൽ, സജന യേശുദാസ്, മഞ്ജു ടീച്ചർ, ബി.സി. സുധീഷ് എന്നിവർ നേതൃത്വം നൽകി. വിദ്യാർത്ഥിനിയുടെ ചികിത്സക്കായി കൗൺസിലർ രഞ്ജിത്ത് മാസ്റ്ററുടെ നേതൃത്വത്തിലാണ് ചികിത്സ സഹായ കൂട്ടായ്മയ്ക്ക് രൂപം നൽകിയിട്ടുള്ളത്. കൂട്ടായ്മയുടെ അക്കൗണ്ട് നന്പർ001800100163271.ധനലക്ഷ്മി ബാങ്ക്, പള്ളുരുത്തി ബ്രാഞ്ച്, ഐഎഫ്എസ്ഇ കോഡ് ഡിഎൽഎക്സ്ബി 0000018 ജി-പേ 807577052.

പന്തയ്ക്കൽ സെന്‍റ് ആന്‍റണീസ് കപ്പേളയുടെ ആശീർവാദ കർമം നടന്നു

കറുകുറ്റി: പന്തയ്ക്കൽ വിശുദ്ധ മദർ തെരേസാ പള്ളിയുടെ കീഴിൽ പുതിയതായി പന്തയ്ക്കൽ ജംഗ്ഷനിൽ പണി കഴിപ്പിച്ച വിശുദ്ധ അന്തോണീസിന്‍റെ നാമേധയത്തിലുള്ള കപ്പേളയുടെ അശീർവാദകർമം ഫാ. ക്രിസ്റ്റി മഠത്തിൽ നിർവഹിച്ചു. തുടർന്ന് നടന്ന അനുമോദന സമ്മേളനത്തിൽ വികാരി ഫാ. ക്രിസ്റ്റി മഠത്തിൽ അധ്യക്ഷത വഹിച്ചു. കറുകുറ്റി പഞ്ചായത്ത് പ്രസിഡന്‍റ് ലതിക ശശികുമാർ, മുൻ വികാരിമാരായ ഫാ. സെബാസ്റ്റ്യൻ പൊട്ടോളി, ഫാ. വർഗീസ് മാണിക്കത്ത്, തിരുമുടിക്കുന്നു പള്ളി വികാരി ഫാ. സെബാസ്റ്റ്യൻ മാടശേരി, എടക്കുന്ന് പള്ളി അസിസ്റ്റന്‍റ് വികാരി ഫാ. സച്ചിൻ മാമ്പുഴക്കൽ, ബസ്‌ലേഹം പള്ളി വികാരി ഫാ. വർഗീസ് പൂതവേലിത്തറ, ഫാ. എബിൻ ചിറയ്ക്കൽ, ഫാ. ജെസാബ് ഇഞ്ചക്കാട്ടുമണ്ണിൽ, ഫാ. വർക്കി കാവാലിപ്പാടൻ വൈസ്ചെയർമാൻ ടോണി പറപ്പിള്ളി, കൺവീനർ ബിജു മുത്തോലി തുടങ്ങിയവർ പ്രസംഗിച്ചു.

ഹരിത കർമസേന മാതൃകാ പ്രവർത്തനത്തിനുള്ള അവാർഡ് റീജയ്ക്ക്

ഉദയംപേരൂർ: സംസ്ഥാന സർക്കാർ സംഘടിപ്പിച്ച വൃത്തി കോൺക്ലേവിൽ ഹരിത കർമസേന മാതൃക പ്രവർത്തനത്തിനുള്ള അവാർഡ് എറണാകുളം ജില്ലയിൽ ഉദയംപേരൂർ ഗ്രാമപഞ്ചായത്ത് ഹരിത കർമ്മ സേനാംഗം റീജ സന്തോഷ് ഏറ്റുവാങ്ങി. പ്ലാസ്റ്റിക്ക് ശേഖരണത്തിനിടെ ഒരു വീട്ടിൽ നിന്ന് 13 പവൻ സ്വർണാഭരണം കളഞ്ഞു കിട്ടിയത് വീട്ടുടമയെ തിരിച്ചേൽപ്പിച്ചതിനാണ് അവാർഡ് ലഭ്യമായത്. ജില്ലയിൽ മികച്ച രീതിയിൽ പ്രവർത്തനം നടത്തുന്ന ഉദയംപേരൂർ പഞ്ചായത്തിൽ ഹരിത കർമസേന സാധാരണ പ്രവർത്തനങ്ങൾ കൂടാതെ സ്വാപ്പ് ഷോപ്പ് പ്രവർത്തനവും നടത്തുന്നുണ്ട്. ഇതിലൂടെ പുനരുപയോഗിക്കാൻ സാധിക്കുന്ന വസ്ത്രങ്ങൾ, ഇലക്ട്രോണിക് ഉപകരണങ്ങൾ ഉൾപ്പെടെ സൗജന്യമായി എത്തിക്കാനും ആവശ്യക്കാർക്ക് സൗജന്യമായി വാങ്ങുന്നതിനും സാധിക്കുന്നു. കൂടാതെ സ്വാപ്പ് ഷോപ്പ് വഴി ഇന്നോകുലം വിതരണവും നടത്തി വരുന്നുണ്ട്.

മയക്കുമരുന്നു വിപത്തിന് തടയിടാൻ ജാഗ്രതാ സമിതികൾ രൂപീകരിക്കണമെന്ന്

പെരുമ്പാവൂർ: മദ്യവും മയക്കുമരുന്നും രാസ ലഹരി വസ്തുക്കളും വിപണനവും സംഭരിക്കലും വർദ്ധിച്ചുവരുന്ന സാഹചര്യത്തിൽ ഇതിന് തടയിടാൻ തദ്ദേശ സ്വയംഭരണ സ്ഥാപനങ്ങൾ ജാഗ്രത സമിതികൾ രൂപീകരണക്കണമെന്ന് ലഹരി വിരുദ്ധ പോരാട്ടം പ്രവർത്തവർ വാർത്താസമ്മേളനത്തിൽ ആവശ്യപ്പെട്ടു. പെരുമ്പാവൂർ കേന്ദ്രീകരിച്ച് ലഹരി വസ്തുക്കളും ഉപയോഗവും വിൽപ്പനയും വലിയ തോതിലാണ് നടക്കുന്നത്. സംസ്ഥാന സർക്കാർ നാളുകളായി ഇതുമായി ബന്ധപ്പെട്ട് നടത്തിയ പ്രവർത്തനങ്ങളുടെ ഭാഗമായി ഒട്ടനവധി ആളുകളെ അറസ്റ്റ് ചെയ്യാനും അവരെ ജയിലിനുള്ളിൽ ആക്കാനും കഴിഞ്ഞെങ്കിലും എന്നാൽ ഇതിന്‍റെ വിപണനവും അത് സംഭരണവും വിവിധ പ്രദേശങ്ങളിൽ വർധിക്കുകയാണെന്നും സംഘടന ചൂണ്ടിക്കാട്ടി. താലൂക്കിന്‍റെ വിവിധ പ്രദേശങ്ങളിൽ വിവിധ കൂട്ടായ്മകൾ വിളിച്ചു കൂട്ടുകയും വിവിധ രാഷ്ട്രീയപാർട്ടികൾ, മത സംഘടനകൾ, സന്നദ്ധ സംഘടനകൾ, ക്ലബുകൾ, റസിഡന്‍റ്സ് അസോസിയേഷനുകൾ എന്നിവയുടെ നേതൃത്വത്തിൽ ലഹരി വിരുദ്ധ പോരാട്ടത്തിന്‍റെ യൂണിറ്റുകൾ രൂപീകരിച്ച് ഓരോ പ്രദേശത്തും ലഹരി വില്പനക്കാർ തമ്പടിക്കുന്ന സ്ഥലങ്ങൾ കണ്ടെത്തി അത്തരം സ്ഥലങ്ങളിൽ നിന്ന് ജനകീയ പങ്കാളിത്തത്തോടെ ഇത്തരം ആളുകളെ ഒഴിവാക്കാനും ലഹരിക്ക് അടിമപ്പെട്ട ഒട്ടനവധി ആളുകളെ ചികിത്സ നടത്തി ജീവിതത്തിലേക്ക് തിരിച്ചുകൊണ്ടുവരുന്നതിനും ലഹരി വിരുദ്ധ പോരാട്ടം പ്രവർത്തകർക്ക് കഴിഞ്ഞതായും സംഘടന അവകാശപ്പെട്ടു. ഓരോ വാർഡിലും ഈ വിഷയം ചർച്ച ചെയ്യുന്നതിന് പ്രത്യേക ഗ്രാമസഭാ യോഗങ്ങൾ വിളിച്ച് ചേർക്കുക. ത്രിതലപഞ്ചായത്ത്, നഗരസഭയുടെ മുഴുവൻ വാർഡുകളിലും ലഹരി മാഫിയ തമ്പടിക്കുന്ന പ്രദേശങ്ങൾ കണ്ടെത്തി ത്രിതലപഞ്ചായത്ത്, നഗരസഭയുടെ നേതൃത്വത്തിൽ ജനകീയ പ്രതിരോധം തീർക്കുക. ഇതിനായി സന്നദ്ധ സംഘടനകളുടെ സഹകരണത്തോടെ മാപ്പ് തയ്യാറാക്കുക. ത്രിതലപഞ്ചായത്ത്, നഗരസഭയുടെ ടർഫുകൾ, സ്‌കൂൾ മൈതാനങ്ങൾ തുടങ്ങിയവയിലെ കായിക മത്സരങ്ങൾക്ക് രാത്രിയിൽ സമയപരിധി നിശ്ചയിക്കുകയും വേണമെന്ന് ഭാരവാഹികൾ ആവശ്യപ്പെട്ടു.

യുവാവിനെ ആക്രമിച്ച കേസിൽ രണ്ടു പേർ പിടിയിൽ

വരാപ്പുഴ : കടയിൽ കയറി യുവാവിനെ ആക്രമിച്ച കേസിൽ രണ്ടു പേർ വരാപ്പുഴ പോലീസിന്‍റെ പിടിയിലായി. വരാപ്പുഴ തിരുമുപ്പം ഭാഗത്തു കടയിൽ കയറി യുവാവിനെ ആക്രമിച്ചു ഗുരുതരമായി പരിക്കേൽപ്പിച്ച കേസിൽ കൊട്ടുവള്ളി കട്ടെത്തറ വിട്ടിൽ അഭിരാം (23), മാലൊത്ത് തറയിൽ വിട്ടിൽ അഭിജിത് (24) എന്നിവരെയാണ് വരാപ്പുഴ പോലീസ് അറസ്റ്റ് ചെയ്തത്. ഒന്പതിന് രാത്രിയാണ് സംഭവം. നിരവധി ക്രിമിനൽ കേസുകളിൽ ഉൾപ്പെട്ടവരാണ് പ്രതികൾ. വരപ്പുഴ പോലീസ് സ്റ്റേഷൻ ഇൻസ്പെക്ടർ പ്രശാന്ത് ക്ലിന്‍റിന്‍റെ നേതൃത്വത്തിലാണ് പ്രതികളെ അറസ്റ്റ് ചെയ്തത്, കോടതിയിൽ ഹാജരാക്കി റിമാൻഡ് ചെയ്തു.

പി.ജെ. ആന്‍റണി ജന്മശതാബ്ദി വർഷം

മൂവാറ്റുപുഴ: മലയാള നാടക, സിനിമ രംഗത്തെ അതുല്യ പ്രതിഭയായിരുന്ന പി.ജെ. ആന്‍റണിയുടെ ജന്മശതാബ്ദി വർഷത്തോടനുബന്ധിച്ച് മൂവാറ്റുപുഴ താലൂക്ക് ലൈബ്രറി കൗണ്‍സിലിന്‍റെ ആഭിമുഖ്യത്തിൽ വിവിധ പരിപാടികളോടെ ആഘോഷിക്കുമെന്ന് താലൂക്ക് ലൈബ്രറി കൗണ്‍സിൽ പ്രസിഡന്‍റ് ജോഷി സ്കറിയ, സെക്രട്ടറി സി.കെ. ഉണ്ണി എന്നിവർ അറിയിച്ചു. ഇതിന്‍റെ ഭാഗമായി കൂത്താട്ടുകുളം ടൗണ്‍ ഹാളിൽ 15ന് സംഘടിപ്പിക്കുന്ന പി.ജെ. ആന്‍റണി ജന്മശതാബ്ദി ആഘോഷ പരിപാടിയുടെ ഉദ്ഘാടനം പി.ജെ. ആന്‍റണി ഫൗണ്ടേഷൻ ചെയർമാൻ ജോണ്‍ ഫെർണാണ്ടസ് നിർവഹിക്കും. മൂവാറ്റുപുഴ നഗരസഭാധ്യക്ഷൻ പി.പി. എൽദോസ് അധ്യക്ഷത വഹിക്കും. പി.ജെ. ആന്‍റണിയുടെ മകൾ എലിസബത്ത് ആന്‍റണി മുഖ്യാതിഥിയായിരിക്കും. ജില്ലാ ലൈബ്രറി കൗണ്‍സിൽ സെക്രട്ടറി മുഖ്യപ്രഭാഷണം നടത്തും. എംജി യൂണിവേഴ്സിറ്റി സിൻഡിക്കേറ്റംഗം പി.ബി. രതീഷ്, പി.ജെ. ആന്‍റണിയുടെ നാടകത്തിലെ അഭിനയ മികവ് തെളിയിച്ച കേരള ബാങ്ക് പ്രസിഡന്‍റ് ഗോപി കോട്ടമുറിക്കൽ, കെ.എം പൗലോസ്, വി.എ രവി എന്നിവരെ ആദരിക്കും.

കലാഭവനിൽ അവധിക്കാല ക്ലാസുകൾ

കൊച്ചി: എറണാകുളം കലാഭവനിൽ അവധിക്കാല ക്ലാസുകളുടെ ഉദ്ഘാടനം ഗായകൻ അഫ്സൽ നിർവഹിച്ചു. പ്രസിഡന്‍റ് ഫാ. ചെറിയാൻ കുനിയന്തോടത്ത് അധ്യക്ഷത വഹിച്ചു. ഭാരവാഹികളായ കെ. എസ്. പ്രസാദ്, കെ.എ. അലി അക്ബർ, അഡ്വ. വർഗീസ് പറമ്പിൽ, പി.ജെ. ഇഗ്നേഷ്യസ് തുടങ്ങിയവർ പ്രസംഗിച്ചു.

ലഹരിക്കെതിരെ മഞ്ഞപ്ര സൂപ്പർ ലീഗ് ഫുട്ബോൾ ടൂർണമെന്‍റ്

കാലടി: മഞ്ഞപ്ര ഫീനിക്സ് സ്പോർട്സ് ക്ലബും, ഗ്രാമക്ഷേമം ലൈബ്രറി യുവവേദിയും സംയുക്തമായി സംഘടിപ്പിക്കുന്ന ലഹരിക്കെതിരെയുള്ള പ്രഥമ മഞ്ഞപ്ര സൂപ്പർ ലീഗ് ഫുട്മ്പോൾ ടൂർണമെന്‍റ് തുടങ്ങി. മഞ്ഞപ്ര പഞ്ചായത്ത് സ്റ്റേഡിയത്തിൽ നടക്കുന്ന ടൂർണമെന്‍റ് പെരുമ്പാവൂർ അസിസ്റ്റന്‍റ് പോലീസ് സൂപ്രണ്ട് ശക്തി സിംഗ് ആര്യ ഉദ്ഘാടനം ചെയ്തു. ലഹരിക്കെതിരെ യുവജനങ്ങളെ അണിനിരത്തുന്നതിന് വേണ്ടിയാണ് ടൂർണമെന്‍റ് സംഘടിപ്പിച്ചിരിക്കുന്നത്. എട്ടു ടീമുകൾ ടൂർണമെന്‍റിൽ പങ്കെടുക്കുന്നുണ്ട്. മഞ്ഞപ്ര പഞ്ചായത്ത് പ്രസിഡന്‍റ് വത്സലകുമാരി വേണു മുഖ്യ പ്രഭാഷണം നടത്തി. ഗ്രാമക്ഷേമം ലൈബ്രറി പ്രസിഡന്‍റ് സജീവ് അരീക്കൽ അധ്യക്ഷത വഹിച്ചു.ഫീനിക്സ് ക്ലബ് പ്രസിഡന്‍റ് എം. ശിവശങ്കർ, ലൈബ്രറി സെക്രട്ടറി കെ.കെ.വിജയൻ, എം. അക്ഷയ് പിള്ള, റോബിൻ ജോസ്, ഡോൺ പോൾ, വിനീത് വേലായുധൻ, ക്രിസ്റ്റഫർ എന്നിവർ പ്രസംഗിച്ചു. ഞായറാഴ്ച നടക്കുന്ന ഫൈനൽ മത്സരത്തിലെ വിജയികൾക്ക് മഞ്ഞപ്ര പഞ്ചായത്ത് പ്രസിഡന്‍റ് ട്രോഫികൾ വിതരണം ചെയ്യും.

പെരുന്പാവൂർ ക്ഷേത്രത്തിൽ മേളപ്രമാണിയായി നടൻ ജയറാം

പെരുമ്പാവൂർ: പെരുമ്പാവൂർ ശ്രീധർമശാസ്താ ക്ഷേത്രോത്സവത്തിന്‍റെ വലിയവിളക്കുനാളായ ശനിയാഴ്ച രാവിലെ 9.30ഓടെ മതിൽക്കെട്ടിനുള്ളിൽ മുഴങ്ങിയത് മധുരഗംഭീര ഉത്സവപ്പഞ്ചാരിനാദം. കേരളത്തിലെ പ്രഗത്ഭരായ നൂറ്റിയിരുപത്തിയാറു വാദ്യകലാകാരന്മാർ അണിനിരന്ന പഞ്ചാരിമേളത്തിലെ ശ്രദ്ധാകേന്ദ്രമായി മാറിയത് മേളപ്രമാണിയായ, മലയാളികളേറെയിഷ്ടപ്പെടുന്ന ചലച്ചിത്ര നടനും പെരുമ്പാവൂരുകാരനുമായ ജയറാം. അഞ്ചുകാലങ്ങളിലും അനായാസമായി ആസ്വദിച്ചു കൊട്ടി രണ്ടരമണിക്കൂറോളം ചെണ്ടമേളപ്രിയരെ പതിവുപോലെ രസിപ്പിച്ചു ജയറാം. ചോറ്റാനിക്കര സതീഷ് നാരായണമാരാരും സംഘവുമായിരുന്നു വാദ്യസംയോജനം നിർവഹിച്ചത്. ചെണ്ടക്കാരുടെ ഒത്തനടുവിൽ മേളപ്രമാണിയായി നിന്ന ജയറാം ആസ്വാദകശ്രദ്ധയാകർഷിച്ചു. കാണാനെത്തിയത് സ്ത്രീകളടക്കം നൂറുകണക്കിനുപേർ. തെക്കുവശത്തെ നടവഴിയിൽ പുറത്തുനിന്നുള്ള കാഴ്ചക്കാർക്കും മേളക്കമ്പക്കാർക്കുമായി ചെറിയ താത്കാലിക ഗാലറിയും നിർമിച്ചിരുന്നു സംഘാടകർ. ജയറാമിന്‍റെ മനസിലേയ്ക്ക് ചെറുപ്പത്തിൽ മേളക്കമ്പം കയറിക്കൂടിയത് പെരുമ്പാവൂരമ്പലത്തിലെ ഉത്‌സവക്കാഴ്ചാനുഭവങ്ങളിൽ നിന്നാണ്. ജയറാം സമയം കിട്ടുമ്പോഴൊക്കെ വന്നുതൊഴുതുപോകുന്ന ഇടംകൂടിയാണ് പെരുമ്പാവൂരമ്പലം. മുനിസിപ്പൽ ചെയർമാൻ പോൾ പാത്തിക്കൽ, വാർഡ് കൗൺസിലർ ടി. ജവഹർ, ക്ഷേത്രോപദേശകസമിതി പ്രസിഡന്‍റ് എൻ.പി. ബാബു, സെക്രട്ടറി ബി. വിജയകുമാർ എന്നിവർ ചേർന്നു നൽകിയ ജന്മനാടിന്‍റെ ആദരം ജയറാം ഏറ്റുവാങ്ങി. 13-നാണ് ഉത്സവം സമാപിക്കുന്നത്.

വിദ്യാവിനോദിനി ലൈബ്രറിക്ക് യൂത്ത് ക്ലബ് അവാർഡ് സമ്മാനിച്ചു

ആലുവ: സംസ്ഥാന യുവജന ക്ഷേമ ബോർഡിന്‍റെ ജില്ലയിലെ മികച്ച യൂത്ത് ക്ലബ്ബിനുള്ള അവാർഡ് ആലുവ അശോകപുരം പി.കെ. വേലായുധൻ മെമ്മോറിയൽ വിദ്യാവിനോദിനി ലൈബ്രറിക്ക് സമ്മാനിച്ചു. ഡീൻ കുര്യാക്കോസ് എംപിയിൽനിന്ന് ലൈബ്രറി യൂത്ത് ക്ലബ് ഭാരവാഹികൾ കോതമംഗലത്ത് നടന്ന സംസ്ഥാന കേരളോത്സവ വേദിയിൽ അവാർഡ് ഏറ്റുവാങ്ങി.

സ്വകാര്യ ബസും ഓട്ടോയും ലോറിയും കൂട്ടിയിടിച്ച് അഞ്ച് പേർക്ക് പരിക്ക്

പെരുമ്പാവൂർ : സ്വകാര്യ ബസും ഓട്ടോയും ലോറിയും കൂട്ടിയിടിച്ച് അഞ്ച് പേർക്ക് പരിക്ക്. എംസി റോഡ് ഒക്കലിൽ ഇന്നലെ രാവിലെ ഏഴ് മണിയോടെയാണ് അപകടം. സമീപത്ത് കോഴിക്കടിയിലേക്ക് കോഴികളുമായെത്തിയ വാഹനത്തിൽ നിന്നും റോഡിലേക്ക് ഓടിയ കോഴിയെ പിടിക്കാൻ പിറകെ ഓടിയ ഇതരസംസ്ഥാന സ്വദേശിയെ ഇടിക്കാതിരിക്കാൻ ലോറി വെട്ടിച്ചതാണ് കൂട്ടയിടിയിൽ കലാശിച്ചത്. ഇതരസംസ്ഥാനക്കാരനെ രക്ഷിക്കാനുള്ള ശ്രമത്തിനിടെ ലോറി നിയന്ത്രണം വിട്ട് എതിരെ വന്ന സ്വകാര്യ ബസിലേക്ക് ഇടിക്കുകയായിരുന്നു. ബസ് നിയന്ത്രണം വിട്ട് സമീപത്ത് നിർത്തിയിട്ടിരുന്ന ഓട്ടോയിലേക്ക് ഇടിച്ചുകയറി. സംഭവത്തിൽ അഞ്ച് പേർക്ക് പരിക്കേറ്റു. പെരുമ്പാവൂരിൽ നിന്നും അങ്കമാലിക്ക് പോകുകയായിരുന്നു സ്വകാര്യ ബസ്. അപകടത്തെ തുടർന്ന് ഏറെ നേരം എം.സി റോഡിൽ ഗതാഗതം തടസപ്പെട്ടു.

കുരുക്കൊഴിയാതെ പുറയാർ ഗേറ്റ്: മേൽപ്പാലം നിർമാണം ഇഴയുന്നു

ആലുവ: പുറയാർ റെയിൽവേ മേൽപ്പാലം പദ്ധതി വൈകിയതോടെ റെയിൽവേ ഗേറ്റിൽ വാഹനങ്ങളുടെ നീണ്ട നിര. തുരുത്ത്, കാലടി, ചൊവ്വര മേഖലകളിലേക്ക് പോകുന്ന നൂറു കണക്കിന് ബസുകൾ അടക്കമുള്ള വാഹനങ്ങളാണ് റെയിൽവേ ക്രോസിൽ കുടുങ്ങിക്കിടക്കുന്നത്. കിലോമീറ്ററുകളോളം വാഹനങ്ങളുടെ നീണ്ട നിര റെയിൽവേ ഗേറ്റിനിരുവശത്തും പതിവ് കാഴ്ചയാണ്. മൂന്നും, നാലും ട്രെയിനുകൾ കടന്നു പോയാലേ ഗേറ്റ് തുറക്കൂ. അടിക്കടി തീവണ്ടികൾ ആയതോടെ ഗേറ്റ് തുറന്നിരിക്കുന്ന സമയത്തേക്കാളേറെ അടഞ്ഞുകിടക്കുകയാണ്. തുറന്നാൽ തന്നെ മിനിറ്റുകൾക്കകം അടയ്ക്കുന്നതാണ് ഗതാഗതക്കുരുക്കിന് കാരണമാകുന്നത്. തോട്ടുമുഖം - തുരുത്ത് സീപോർട്ട് എയർപോർട്ട് പാലം വന്നതിനുശേഷം ഇതുവഴി സഞ്ചരിക്കുന്ന വാഹനങ്ങളും പെരുകി. ടോറസുകൾ, ടിപ്പറുകൾ കണ്ടെയ്നർ ലോറികൾ ഉൾപ്പടെ ഇതിലൂടെ സഞ്ചരിക്കുന്ന ഭാരവാഹനങ്ങൾ നിരവധിയാണ്. കാലങ്ങളായുള്ള ജനങ്ങളുടെ ആവശ്യമാണ് ഇവിടെ മേൽപാലമെന്നത്. ആലുവയിൽ നിന്നും കാലടി, മലയാറ്റൂർ, തിരുവൈരാണിക്കുളം തീർഥാടന കേന്ദ്രങ്ങളിലേക്കുള്ള പ്രധാന ഗതാഗത മാർഗമാണിത്. എന്നാൽ ഒച്ചിഴയും വേഗത്തിലാണ് കാര്യങ്ങളുടെ പോക്ക്. പത്ത് ഭൂവുടമകൾക്കായി 3.78 കോടി രൂപ അനുവദിച്ചിട്ടെങ്കിലും സ്ഥലമെടുപ്പ് പൂർത്തിയായിട്ടില്ല. പുറയാർ റെയിൽവേ മേൽപ്പാലത്തിന്‍റെ നിർമാണ പ്രവർത്തനങ്ങൾ ഉടൻ ആരംഭിക്കുന്നതിന് നടപടി കൈക്കൊള്ളണമെന്ന് തുരുത്ത് സമന്വയ ഗ്രാമവേദി ആവശ്യപ്പെട്ടു.

മഹാരാജാസ് ഗ്രൗണ്ടിൽ മത്സരം നടത്താൻ പിടിഎ ഫണ്ടിലേക്കു പണം ആവശ്യപ്പെട്ടു

കൊച്ചി: എറണാകുളം മഹാരാജാസ് കോളജ് ഗ്രൗണ്ടിൽ അഖിലേന്ത്യാ ഫെഡറേഷൻ അത് ലറ്റിക്സ് ചാന്പ്യൻഷിപ്പ് നടത്തുന്നതിന്‍റെ പേരിൽ സംഘാടകരോടു പിടിഎ ഫണ്ടിലേക്കു തുക ആവശ്യപ്പെട്ട് കോളജ് അധികൃതർ. പിടിഎ ഫണ്ടിലേക്ക് 10,000 രൂപയാണ് നടത്തിപ്പുകാരോട് ആവശ്യപ്പെട്ടത്. ഇവയ്ക്കു പുറമേ ഗ്രൗണ്ട് പരിപാലനത്തിനായി പ്രതിദിനം 15,000 രൂപയും ആവശ്യപ്പെട്ടതായി സംഘാടകർ അറിയിച്ചു. ഒരു കായിക മത്സരം ഗ്രൗണ്ടിൽ സംഘടിപ്പിക്കുന്നതിന്‍റെ പേരിൽ കോളജ് പിടിഎ ഫണ്ടിലേക്ക് പണം ആവശ്യപ്പെടുന്നതിന് ന്യായീകരിക്കാനാവില്ലെന്നു ചൂണ്ടിക്കാട്ടി ടി.ജെ. വിനോദ് എംഎൽഎ ജില്ലാ കളക്ടർക്ക് കത്തു നൽകി. ഗ്രൗണ്ടിനോടനുബന്ധിച്ചുള്ള പവലിയനിലെ കടമുറികളുടെ വാടക കുടിശിക ഇനത്തിൽ ലഭിക്കാനുള്ള കോടിക്കണക്കിനു രൂപ‌യും നിയമക്കുരുക്കിലാണ്. ജിസിഡിഎ നിർമിച്ച് 10 വർഷം വാടക ഉൾപ്പടെ പിരിച്ചതിനു ശേഷം ഗ്രൗണ്ട് പരിപാലനത്തിനായി ആവശ്യമായ തുക കണ്ടെത്താനുള്ള മാർഗമെന്ന നിലയിൽ കടമുറികൾ കൈമാറിയതാണ്. വാടകക്കുടിശിക പിരിച്ചു ഗ്രൗണ്ട് പരിപാലത്തിന് ഉപയോഗപ്പെടുത്തതാതെ അതിന്‍റെ ഭാരം കായികമേള സംഘാടകരുടെ മേൽ അടിച്ചേൽപ്പിക്കുന്നത് അന്യായമാണ്. നിലവിലെ കോളജ് അധികൃതരുടെ പ്രവർത്തനവും നിലപാടുകളും മറ്റും കായിക താരങ്ങളെയും മത്സര സംഘാടകരെയും, കായിക സംഘടനകളെയും മഹാരാജാസ് കോളജ് ഗ്രൗണ്ടിലെ പ്രവർത്തനങ്ങളിൽ നിന്നും പിന്നോട്ട് വലിക്കും. നഗരത്തിലെ സിന്തറ്റിക്ക് അത്‌ലറ്റിക് ടർഫുള്ള ഏക സ്റ്റേഡിയം എന്ന നിലയിൽ മഹാരാജാസ് കോളജ് ഗ്രൗണ്ടിലെ വിഷയം ഗൗരവമുള്ളതാണ്. ഇതു കണക്കിലെടുത്ത് ആവശ്യമായ പരിശോധനകൾ നടത്തി അഖിലേന്ത്യാ ഫെഡറേഷൻ അത്‌ലറ്റിക്സ് ചാമ്പ്യൻഷിപ്പിനും തുടർന്ന് വരാനിരിക്കുന്ന മറ്റു കായിക മേളകൾക്കും തടസങ്ങൾ ഉണ്ടാകാതിരിക്കാൻ ജില്ലാ കളക്ടർ ഇടപെടൽ നടത്തണമെന്നും എംഎൽഎ ആവശ്യപ്പെട്ടു.

അഭിഭാഷക-വിദ്യാര്‍ഥി സംഘര്‍ഷം : സിസി ടിവി ദൃശ്യങ്ങള്‍ തേടി പോലീസ്

കൊച്ചി: എറണാകുളം ജില്ലാ കോടതി പരിസരത്ത് അഭിഭാഷകരും മഹാരാജാസ് കോളജിലെ വിദ്യാര്‍ഥികളും ഏറ്റുമുട്ടിയ സംഭവത്തില്‍ സിസി ടിവി ദൃശ്യങ്ങൾ കേന്ദ്രീകരിച്ചുള്ള അന്വേഷണത്തിന് പോലീസ്. സംഘര്‍ഷത്തിനിടയാക്കിയ കാരണമടക്കം സ്ഥിരീകരിക്കാന്‍ ജില്ലാ കോടതിയിലെ സിസി ടിവി ദൃശ്യങ്ങള്‍ ആവശ്യപ്പെട്ട് എറണാകുളം സെന്‍ട്രല്‍ പോലീസ് അപേക്ഷ നല്‍കി. ബാര്‍ അസോസിയേഷന്‍ സംഘടിപ്പിച്ച പരിപാടിക്കെത്തിയ വിദ്യാര്‍ഥികള്‍ സ്ത്രീകളെ ശല്യം ചെയ്തതാണ് സംഘര്‍ഷത്തിനിടയാക്കിയതെന്നാണ് അഭിഭാഷകരുടെ വാദം. എന്നാല്‍ വിദ്യാര്‍ഥിനികളോട് അഭിഭാഷകര്‍ മോശമായി പെരുമാറിയതാണ് സംഘര്‍ഷത്തിലേക്ക് നയിച്ചതെന്നാണ് വിദ്യാര്‍ഥികള്‍ പറയുന്നത്. ഇരുവാദങ്ങളിലും വ്യക്തത വരുത്താനാണ് പോലീസ് സിസി ടിവി ദൃശ്യങ്ങള്‍ പരിശോധിക്കുന്നത്. സംഘര്‍ഷം നടന്ന റോഡിലടക്കം മറ്റു സിസി ടിവി ദൃശ്യങ്ങള്‍ ലഭ്യമാകാത്തതിനാലാണ് ജില്ലാ കോടതിയിലെ സിസി ടിവി ദൃശ്യങ്ങള്‍ ആവശ്യപ്പെട്ടിട്ടുള്ളത്. അതിനിടെ അഭിഭാഷകരുടെയും വിദ്യാര്‍ഥികളുടെയും കേസുകള്‍ ഒത്തുതീര്‍ക്കാന്‍ ശ്രമമുള്ളതായും സൂചനയുണ്ട്. വ്യാഴാഴ്ച പുലര്‍ച്ചെ നടന്ന സംഭവത്തില്‍ കോളജിലെ എസ്എഫ്‌ഐ ഭാരവാഹികളടക്കം 15 വിദ്യാര്‍ഥികള്‍ക്കും, ഒമ്പത് അഭിഭാഷകര്‍ക്കും, രണ്ട് പോലീസുകാര്‍ക്കുമാണ് പരിക്കേറ്റത്. മൂന്ന് പരാതികളിലായി 30 പേര്‍ക്കെതിരെയാണ് പോലീസ് കേസ് രജിസ്റ്റര്‍ ചെയ്തിട്ടുള്ളത്. കേസില്‍ ഇതുവരെ ആരെയും അറസ്റ്റ് ചെയ്തിട്ടില്ല. സംഘര്‍ഷത്തിന് പിന്നാലെ വെള്ളിയാഴ്ച കോടതി വളപ്പില്‍ അഭിഭാഷകര്‍ മദ്യക്കുപ്പികൾ കോളജ് കോമ്പൗണ്ടിലേക്ക് വലിച്ചെറിയുന്നതിന്‍റെ ദൃശ്യങ്ങള്‍ പുറത്തുവന്നിരുന്നു. ഇതിലും പോലീസ് അന്വേഷണം നടത്തുന്നുണ്ട്. കോളജ് അക്രമകാരികളുടെ താവളമാകുന്നു: ബിജെപി കൊച്ചി: എറണാകുളം മഹാരാജാസ് കോളജ് രാപ്പകല്‍ വ്യത്യാസമില്ലാതെ എസ്എഫ്‌ഐ അക്രമകാരികളുടെ താവളമാകുന്നത് തടയുന്നതിനാവശ്യമായ നടപടികള്‍ സ്വീകരിക്കാന്‍ കോളജ് അധികൃതരും പോലീസും തയാറാകണമെന്ന് ബിജെപി. കോളജ് ഹോസ്റ്റലും കാമ്പസും എസ്എഫ്‌ഐ അക്രമകാരികളുടെ താവളങ്ങളായിരിക്കുകയാണ്. ഇതിനെതിരെ ബിജെപി ശക്തമായ നടപടികള്‍ സ്വീകരിക്കുമെന്നും ബിജെപി സിറ്റി ജില്ലാ പ്രസിഡന്‍റ് അഡ്വ. കെ.എസ്. ഷൈജു പ്രസ്താവനയില്‍ പറഞ്ഞു.

കനത്ത ചൂടില്‍ പനിച്ച് ജില്ല

കൊച്ചി: വേനല്‍ കടുത്തതോടെ ജില്ലയില്‍ പകര്‍ച്ചവ്യാധികളും തലപൊക്കി തുടങ്ങി. കഴിഞ്ഞ പത്ത് ദിവസത്തിനിടെ വിവിധ ആശുപത്രികളിലായ പനിക്ക് ചികിത്സ തേടിയത് 1718 പേരാണ്. ജില്ലയില്‍ ഈ ദിവസങ്ങളില്‍ 10 പേര്‍ക്ക് മഞ്ഞപ്പിത്തം സ്ഥിരീകരിച്ചു. ഇതിനുപുറമേ നാലു പേര്‍ക്ക് മലേറിയയും 10 പേര്‍ക്ക് ഡെങ്കിപ്പനിയും റിപ്പോര്‍ട്ട് ചെയ്തിട്ടുണ്ട്. മഞ്ഞപ്ര, ബിനാനിപുരം, മഴുവന്നൂര്‍, മൂക്കന്നൂര്‍, നെടുമ്പാശേരി, ചൊവ്വര, എടത്തല, മൂലംകുഴി, മുളവുകാട്, കാലടി എന്നീ പ്രദേശങ്ങളിലാണ് ഡെങ്കിപ്പനി സ്ഥിരീകരിച്ചിട്ടുള്ളത്. പനിക്ക് ചികിത്സ തേടിയവരില്‍ 35 പേര്‍ക്ക് ഡെങ്കിപ്പനി രോഗ ലക്ഷണങ്ങള്‍ ആരോഗ്യവകുപ്പ് സംശയിക്കുന്നുണ്ട്. രണ്ടു പേര്‍ക്ക് എലിപ്പനിയും ജില്ലയില്‍ റിപ്പോര്‍ട്ട് ചെയ്തിട്ടുണ്ട്. അതിനിടെ പകര്‍ച്ചവ്യാധികള്‍ പടരുന്നത് തടയുകയെന്ന ലക്ഷ്യത്തോടെ ജില്ലാ ആരോഗ്യവകുപ്പ് മഴക്കാലപൂര്‍വ ശുചീകരണ ത‌യാറെടുപ്പുകള്‍ ആരംഭിച്ചിട്ടുണ്ട്. കുടിവെള്ളം എത്തിക്കുന്ന ടാങ്കര്‍ ലോറികളിലടക്കം പരിശോധനകള്‍ നടത്തി വരുന്നതായി ആരോഗ്യവിഭാഗം വ്യക്തമാക്കി.

സപ്ലൈകോ ഫെയറുകള്‍ ഇന്നു തുറന്നു പ്രവര്‍ത്തിക്കും

കൊച്ചി: സപ്ലൈകോയുടെ എല്ലാ വിഷു ഈസ്റ്റര്‍ ഫെയറുകളും സൂപ്പര്‍ മാര്‍ക്കറ്റുകളും ഇന്നു തുറന്നു പ്രവര്‍ത്തിക്കും. മാവേലി സ്റ്റോറുകള്‍ ഇന്ന് പ്രവര്‍ത്തിക്കില്ല. വിഷുദിവസം ഫെയറുകള്‍ക്കും സപ്ലൈകോ വില്‍പ്പനശാലകള്‍ക്കും അവധിയായിരിക്കും.

കെ.എം. മാണി സ്മൃതിസംഗമം

കൊച്ചി: കേരള കോൺഗ്രസ് എം ജില്ലാ കമ്മിറ്റി കെ.എം. മാണി സ്മൃതിസംഗമം നടത്തി. എറണാകളം ഹൈക്കോർട്ട് ജംഗ്ഷനിൽ നടത്തിയ പരിപാടി ജില്ലാ പ്രസിഡന്‍റ് ടോമി ജോസഫ് ഉദ്ഘാടനം ചെയ്തു. നേതാക്കളായ വി.വി. ജോഷി, ജോയി നടുക്കുടി, ജോസി. പി. തോമസ്, ജോജസ് ജോസ്, ടി.ജെ. ബിജു, സാബു നിരപ്പു കാട്ടിൽ, പി.എക്സ്, ജോഷ്വാ എന്നിവർ പ്രസംഗിച്ചു. ജോൺസൺ ലോപ്പസ് അധ്യക്ഷത വഹിച്ചു.

സ്ത്രീത്വത്തെ അപമാനിച്ചു; ഡോക്ടര്‍ക്കെതിരേ പരാതി

കൊച്ചി: സ്ത്രീത്വത്തെ അപമാനിച്ചതിന് ഡോക്ടർക്കെതിരെ യുവതി പരാതി നൽകി. കൊച്ചിയിലെ സ്വകാര്യ ആശുപത്രിയില്‍ ജോലി നോക്കുന്ന ഡോക്ടര്‍ക്കെതിരേയാണ് യുവതി ചേരാനെല്ലൂര്‍ പോലീസില്‍ പരാതി നല്‍കിയത്. എഫ്‌ഐആര്‍ രിജസ്റ്റര്‍ ചെയ്ത പോലീസ് വിശദമായ അന്വേഷണം ആരംഭിച്ചു.

ആലങ്ങാട് മസ്ജിദിന്‍റെ ഭണ്ഡാരം കുത്തിത്തുറന്ന് മോഷണം

ആലങ്ങാട്: ആലങ്ങാട് ജുമാ മസ്ജിദിന്‍റെ ഭണ്ഡാരം കുത്തിത്തുറന്നു 15,000 രൂപയോളം കവർന്നു. കവാടത്തിനരികിലായി സ്ഥാപിച്ചിരുന്ന ഭണ്ഡാരമാണ് കമ്പിപ്പാര ഉപയോഗിച്ചു കഴിഞ്ഞദിവസം പുലർച്ചെ 1.50ന് കുത്തിത്തുറന്നത്. ഒരു മാസം മുന്പും പള്ളിയിലെ തന്നെ മറ്റൊരു ഭണ്ഡാരം കുത്തിത്തുറന്നിരുന്നു. അന്ന് ഏകദേശം 20,000 ‌ഓളം രൂപയാണു നഷ്ടപ്പെട്ടതെന്നു പള്ളി ഭാരവാഹികൾ പറഞ്ഞു. അന്നു മോഷണം നടത്തിയ പ്രതിയെ ഇതുവരെ പിടികൂടാൻ പോലീസിനായിട്ടില്ല. ബൈക്കിലെത്തിയ യുവാവ് മോഷണം നടത്തുന്ന ദൃശ്യം സിസി ടിവിയിൽ പതിഞ്ഞിട്ടുണ്ട്.

മലയാറ്റൂര്‍ തീര്‍ഥാടനത്തിനായി 500 ഓളം അമ്മമാര്‍ അടിവാരത്തെത്തി

കൊച്ചി: മലയാറ്റൂര്‍ തീര്‍ഥാടനത്തിനായി 500 ഓളം അമ്മമാര്‍ അടിവാരത്ത് ഒത്തുകൂടി. എറണാകുളം അങ്കമാലി അതിരൂപതയുടെ വിമെന്‍ വെല്‍ഫെയര്‍ സര്‍വീസസിലെ 16 ഫൊറോനകളില്‍ നിന്നുള്ള അമ്മമാരാണ് തീര്‍ഥാടനത്തിനെത്തിയത്. തീര്‍ഥാടനത്തോടനുബന്ധിച്ച് അടിവാരത്ത് ലഹരി വിരുദ്ധ പ്രതിജ്ഞയും, ലഹരിക്കെതിരെ വല്ലം ഫെറോനയിലെ ആയത്തുപ്പടി അമ്മമാര്‍ അവതരിപ്പിച്ച ഫ്ലാഷ് മോബും, ലഹരി വിരുദ്ധ ഗാനാലാപനവും സംഘടിപ്പിച്ചു. അതിരൂപത ഡയറക്ടര്‍ ഫാ. പോള്‍ ചെറുപിള്ളി, പ്രസിഡന്‍റ് ജയിനി സാംരാജ്, വൈസ് പ്രസിഡന്‍റ് മോളി ബോബന്‍, ജോയിന്‍ സെക്രട്ടറി സ്‌റ്റെല്ല ആഗസ്റ്റിന്‍, അതിരുപതാ ഭാരവാഹികള്‍, കൗണ്‍സില്‍ അംഗങ്ങള്‍ എന്നിവര്‍ തീര്‍ഥാടനത്തിന് നേതൃത്വം നല്‍കി. ചടങ്ങില്‍ മലയാറ്റൂര്‍ പള്ളി വികാരി ഫാ. ജോസ് ഒഴലക്കാട്ട്, വല്ലം ഫൊറോന വികാരി ഫാ. പോള്‍ മാടശേരി, ഫാ. ജോസ് വടക്കന്‍, ആയത്തുപ്പടി ഇടവക വികാരി ഫാ. വര്‍ഗീസ് പുളിക്കന്‍, കൂടാതെ അനിമേറ്റര്‍ സിസ്‌റ്റേഴ്‌സ്, ഫൊറോനാ ഭാരവാഹികള്‍, യൂണിറ്റ് ഭാരവാഹികള്‍, സംഘാഗംങ്ങള്‍ എന്നിവര്‍ പങ്കെടുത്തു. വചനാധിഷ്ഠിതമായ ജീവിതം നയിക്കുക എന്ന ലക്ഷ്യത്തോടെ അമ്മമാരുടെ നേതൃത്വത്തില്‍ ഇറക്കിയ ലോഗോസ് ബൈബിള്‍ പഠന സഹായി പുസ്തക പ്രകാശനം ഫാ. ജോസ് ഒഴലക്കാട്ട്, ഫാ. ജോസ് വടക്കന് നല്‍കി പ്രകാശനം ചെയ്തു. ലഹരി വിരുദ്ധ പ്രതിജ്ഞ അതിരൂപത പ്രസിഡന്‍റ് ജയിനി സാംരാജ് സംഘാംഗങ്ങള്‍ക്ക് ചൊല്ലിക്കൊടുത്തു. തുടര്‍ന്ന് ഫാ. പോള്‍ ചെറുപിള്ളിയോടൊപ്പം എല്ലാവരും കുരിശുമല കയറി പ്രാര്‍ഥിച്ചു. സ്‌നേഹവിരുന്ന് ശേഷം എല്ലാവരും സ്വഭവനങ്ങളിലേക്ക് യാത്രതിരിച്ചു.

തിരക്കിലമര്‍ന്ന് വിഷു വിപണി

കൊച്ചി: വിഷു ഒരുക്കങ്ങള്‍ക്ക് മുന്നോടിയായി ജില്ലയിലെ വ്യാപാര കേന്ദ്രങ്ങളില്‍ ജനത്തിരക്ക്. വിഷുക്കണി, സദ്യ തുടങ്ങിയവയ്ക്കുള്ള സാധന സാമഗ്രികളും വിഷുക്കോടി വാങ്ങുന്നതിനുമുള്ള തിരക്കിലാണ് ആളുകള്‍. ആഘോഷം പൊടിപൊടിക്കുന്നതിന്‍റെ ഭാഗമായി പടക്ക വിപണിയിലും മുന്‍ വര്‍ഷത്തേക്കാള്‍ കച്ചവടം നടക്കുന്നതായി വ്യാപാരികള്‍ പറയുന്നു. കണിക്കൊന്നയും വെള്ളരിയും ചക്കയും മാങ്ങയുമെല്ലാം അടങ്ങുന്ന വിഷക്കണിക്കുള്ള സാധനങ്ങള്‍ വാങ്ങാന്‍ എറണാകുളം പച്ചക്കറി മാര്‍ക്കറ്റില്‍ തിരക്കേറി. ഇതോടൊപ്പം വിഗ്രഹങ്ങളും റെഡിയാണ്. 150 രൂപ മുതല്‍ 2000 രൂപ വരെ നീളുന്നതാണ് കൃഷ്ണ വിഗ്രഹങ്ങളുടെ വില. പ്ലാസ്റ്റിക് പൂക്കളുണ്ടെങ്കിലും കണിക്കൊന്ന ഓര്‍ജിനലിന് തന്നേയാണ് ഡിമാൻഡ്. നേരത്തെ വാങ്ങിവച്ചാല്‍ വാടി പോകുമെന്നതിനാല്‍ പൂവിപണി ഇന്നത്തോടെ പൂര്‍ണ തോതില്‍ ഉണരും. കണി വെള്ളരി, മാങ്ങ, ചക്ക മുതലായവയാണ് ആളുകള്‍ കൂടുതലായും വാങ്ങാനെത്തുന്നതെന്ന് വ്യാപാരികള്‍ പറയുന്നു. കാര്യമായ വിലവര്‍ധനവ് ഇല്ലാത്തതിനാല്‍ വലിയ തോതില്‍ കച്ചവടം നടക്കുന്നുണ്ടെന്ന് മാര്‍ക്കറ്റിലെ കച്ചവടക്കാര്‍ പറഞ്ഞു. കിലോക്ക് 50 രൂപ വരെയാണ് കണിവെള്ളരിയുടെ വില. 40 മുതല്‍ 60 രൂപ വരെയാണ് ചക്കയുടെ വില. എന്നാല്‍, മാങ്ങയ്ക്ക് കിലോയ്ക്ക് 120 രൂപ വരെയാണ് വില നിലവാരം. സദ്യക്കായി ആളുകള്‍ പച്ചക്കറി വാങ്ങുന്നതില്‍ വലിയ കുറവുണ്ടായിട്ടുണ്ടെന്ന് വ്യാപാരികള്‍ പറയുന്നു. സദ്യയ്ക്ക് കൂടുതലായും കാറ്ററിംഗ് സ്ഥാപനങ്ങളെയും ഹോട്ടലുകളെയുമാണ് ജനങ്ങള്‍ ആശ്രയിക്കുന്നത്. അതുകൊണ്ട് തന്നെ വിഷുസദ്യയ്ക്ക് മികച്ച ഓഫറുകളമായി നഗരത്തിലെ ഹോട്ടലുകളും കാറ്ററിംഗ് സ്ഥാപനങ്ങളും സജീവമാണ്.

എംഡിഎംഎയുമായി യുവാവ് അറസ്റ്റില്‍

കൊച്ചി: വില്പനയ്‌ക്കെത്തിച്ച 44.02 ഗ്രാം എംഡിഎംഎയുമായി യുവാവ് അറസ്റ്റില്‍. കാസര്‍ഗോഡ് തെക്കില്‍ ചാട്ടഞ്ചാല്‍ അഷ്‌റഫി(35) നെയാണ് നാര്‍കോട്ടിക് സെല്‍ അസിസ്റ്റന്‍റ് കമ്മീഷണര്‍ കെ.എ. അബ്ദുല്‍ സലാമിന്‍റെ നേതൃത്വത്തിലുള്ള ഡാന്‍സാഫ് സംഘം അറസ്റ്റ് ചെയ്തത്. എറണാകുളം കളത്തിപ്പറമ്പ് റോഡിന് സമീപത്തെ ഹോട്ടല്‍ മുറിയില്‍ നിന്നാണ് ഇയാള്‍ പിടിയിലായത്. യുവാക്കള്‍ക്കിടയില്‍ രാസലഹരി വില്പന നടത്തുന്ന പ്രധാനിയാണ് ഇയാള്‍. ഇയാളുടെ സംഘത്തില്‍ കൂടുതല്‍ പേര്‍ ഉള്‍പ്പെട്ടിട്ടുണ്ടോയെന്ന് പോലീസ് അന്വേഷിച്ചു വരുന്നു.

ഇന്ന് ഓശാന ഞായർ : ദേവാലയങ്ങളിൽ പ്രത്യേക തിരുക്കർമങ്ങൾ

കൊച്ചി: കുരിശുമരണത്തിനു മുന്പു ക്രിസ്തുവിന്‍റെ ജറുസലേമിലേക്കുള്ള രാജകീയ പ്രവേശനത്തെ അനുസ്മരിച്ച് ഇന്ന് ഓശാന ഞായർ. കുരുത്തോല വെഞ്ചിരിപ്പ്, പ്രദക്ഷിണം, ദിവ്യബലി എന്നിവ ദേവാലയങ്ങളിലുണ്ടാകും. ഓശാന ഞായർ ആചരണത്തോടെ ക്രൈസ്തവ വിശ്വാസികൾ വിശുദ്ധ വാരത്തിലേക്കു പ്രവേശിക്കുന്നു. ഇടപ്പള്ളി തോപ്പില്‍ മേരി ക്വീന്‍ പള്ളിയില്‍ ഓശാന ഞായര്‍ തിരുക്കര്‍മങ്ങള്‍ക്കു സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ മുഖ്യകാര്‍മികത്വം വഹിക്കും. രാവിലെ 6.30നാണ് ശുശ്രൂഷകൾ ആരംഭിക്കുക. എറണാകുളം സെന്‍റ് ഫ്രാന്‍സിസ് അസീസി കത്തീഡ്രലില്‍ ഇന്നു രാവിലെ ഏഴിനാരംഭിക്കുന്ന ഓശാന ശുശ്രൂഷകളില്‍ വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ കാര്‍മികനാകും. കോതമംഗലം ബിഷപ് മാര്‍ ജോര്‍ജ് മഠത്തിക്കണ്ടത്തില്‍ പഴമ്പിള്ളിച്ചാല്‍ സെന്‍റ് മേരീസ് പള്ളിയില്‍ നാളെ രാവിലെ ഏഴിന് ഓശാന ഞായര്‍ തിരുക്കര്‍മങ്ങളില്‍ കാര്‍മികനാകും. പെസഹാവ്യാഴാഴ്ച ദേവാലയങ്ങളിൽ കാൽകഴുകൽ ശുശ്രൂഷ, ദിവ്യബലി, പൂർണദിന ആരാധന എന്നിവയുണ്ടാകും. കാക്കനാട് സെന്‍റ് ഫ്രാന്‍സിസ് അസീസി പള്ളിയിലെ ശുശ്രൂഷകളില്‍ മേജർ ആർച്ച്ബിഷപ് മാര്‍ റാഫേൽ തട്ടില്‍ കര്‍മികത്വം വഹിക്കും. അന്നു വൈകുന്നേരം അഞ്ചിനാണ് എറണാകുളം സെന്‍റ് ഫ്രാന്‍സിസ് അസീസി കത്തീഡ്രലില്‍ പെസഹാ ശുശ്രൂഷകൾ ആരംഭിക്കുക. ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ കാർമികനാകും. ഫോർട്ട്കൊച്ചി സാന്താക്രൂസ് ബസിലിക്കയിൽ രാവിലെ ആറിന് പെസഹാ ശുശ്രൂഷകൾ ആരംഭിക്കും.

ആലങ്ങാട് മേത്താനത്ത് നിർമാണത്തിലിരുന്ന കെട്ടിടം തകർന്നുവീണു

നിലംപൊത്തിയത് 60,000 ചതുരശ്ര അടിയിൽ നിർമിക്കുന്ന ഗോഡൗൺ ആലങ്ങാട്: ആലങ്ങാട് പഞ്ചായത്തിലെ മേത്താനം പാലത്തിന് സമീപത്തുള്ള നിർമാണത്തിലിരിക്കുന്ന ഗോഡൗണിന്‍റെ ഇരുമ്പു ബീമുകളും താഴെ ഉറപ്പിച്ച ഇരുമ്പ് തൂണുകളും തകർന്നു വീണു. ആളപായമില്ല. ഇന്നലെ പുലർച്ചെയായിരുന്നു അപകടം ഉണ്ടായത്. 60000 ചതുരശ്ര അടി വിസ്തീർണത്തിൽ നിർമിക്കുന്ന കുറ്റൻ ഗോഡൗണിന്‍റെ മുഴുവൻ ഭാഗവും പൂർണമായും നിലംപൊത്തുകയായിരുന്നു. ഇരുമ്പു തൂണുകളിൽ പണിതുയർത്തി മുകളിലെ ഹൈ ബീമുകളുടെ നിർമാണം പൂർത്തിയാകാൻ ഇരിക്കവേയാണു ഗോഡൗൺ നിലംപൊത്തിയത്. ആലുവ സ്വദേശി നൈജുവാണു 20 വർഷത്തേക്കു സ്ഥലം പാട്ടത്തിനെടുത്തു ഗോഡൗൺ നിർമിക്കുന്നത്. പ്രമ കമ്പനിയുടെ നേതൃത്വത്തിലാണു നിർമാണം. നിർമാണത്തിലെ അശാസ്ത്രീയതയാണ് അപകടത്തിനു കാരണമെന്നാണു ആരോപണം. സംഭവത്തെ തുടർന്നു പഞ്ചായത്ത് അധികൃതരുടെ നേതൃത്വത്തിൽ പരിശോധന നടത്തി. നിർമാണം താത്കാലികമായി നിർത്തിവയ്ക്കാൻ കാണിച്ചു നോട്ടിസ് നൽകിയിട്ടുണ്ട്. പരിശോധിച്ച ശേഷം മാത്രമേ അനുമതി നൽകുകയുള്ളൂവെന്നാണ്അധികൃതർ അറിയിച്ചിരിക്കുന്നത്. ഇത്രയും വലിയ ഗോഡൗണിന്‍റെ ബീമുകൾ ഉൾപ്പെടെ പൂർണമായും നിലംപൊത്തിയത് സുരക്ഷാവീഴ്ചയാണെന്ന പരാതി ഉയർന്നിട്ടുണ്ട്. രാത്രിയായതിനാലും തൊഴിലാളികൾ ഇല്ലാതിരുന്നതിനാലും വൻ അപകടമാണ് ഒഴിവായത്.

ലഹരി വിരുദ്ധ റാലി നടത്തി

കൂത്താട്ടുകുളം : വടകര സെന്‍റ് ജോണ്‍സ് കത്തോലിക്ക പള്ളിയുടെ നേതൃത്വത്തിൽ വിശ്വാസോത്സവത്തോടനുബന്ധിച്ച് ലഹരി വിരുദ്ധ റാലി നടന്നു. വടകര പള്ളി വികാരി ഫാ. ജോണ്‍ പുതിയാമറ്റം ഫ്ളാഗ് ഓഫ് ചെയ്തു. നാല് ഹൗസുകളായി തിരിഞ്ഞാണ് കുട്ടികളെ നേതൃത്വത്തിൽ റാലി നടന്നത്. ലഹരി വിരുദ്ധ മുദ്രാവാക്യങ്ങളടങ്ങിയ പ്ലക്കാർഡുകളും കൈയിലേന്തി പള്ളിയിൽ നിന്ന് ആരംഭിച്ച റാലി പ്രധാന റോഡിലെത്തി തിരികെ പള്ളിയിലേക്ക് മടങ്ങുകയായിരുന്നു. ലഹരിവിരുദ്ധ തദ്ദേശ പ്രചാരണത്തിന്‍റെ ഭാഗമായി വിദ്യാർഥികൾ വേഷപ്രച്ഛന്നരായി റാലിക്കൊപ്പം ഉണ്ടായിരുന്നു.

അവയവദാന സർട്ടിഫിക്കറ്റ് വൈക്കം വിജയലക്ഷ്മി ഏറ്റുവാങ്ങി

മൂവാറ്റുപുഴ : അജു എഡ്യൂക്കേഷണൽ കൾച്ചറൽ ആൻഡ് ചാരിറ്റബിൾ ഫൗണ്ടേഷന്‍റെ നേതൃത്വത്തിൽ മൂവാറ്റുപുഴ കുമാരനാശാൻ പബ്ലിക് ലൈബ്രറിയുടെ സഹകരണത്തോടെ എസ്എൻ ബിഎഡ് കോളജ് ഓഡിറ്റോറിയത്തിൽ സംഘടിപ്പിച്ച സമ്മേളനത്തിൽ അവയവദാന സർട്ടിഫിക്കറ്റ് ഗായിക വൈക്കം വിജയലക്ഷ്മി ഏറ്റുവാങ്ങി. ഫൗണ്ടേഷൻ ഡയറക്ടർ ടി.എസ് റഷീദ് അധ്യക്ഷത വഹിച്ചു. ഫൗണ്ടേഷൻ ജനറൽ സെക്രട്ടറി പ്രമോദ് കെ. തന്പാൻ, കെ സോട്ടോ ജോയിന്‍റ് ഡയറക്ടർ ഡോ. ബേസിൽ സാജു, കാർഡിയോളജിസ്റ്റ് ഡോ. ജോ ജോസഫ് എന്നിവർ പ്രസംഗിച്ചു. അജു ഫൗണ്ടേഷന്‍റെ ഉപഹാരം കേരള ബാങ്ക് പ്രസിഡന്‍റ് ഗോപി കോട്ടമുറിക്കൽ വൈക്കം വിജയലക്ഷ്മിക്കും ഡോ. ജോ ജോസഫിനും സമ്മാനിച്ചു. തുടർന്ന് വൈക്കം വിജയലക്ഷ്മി ഗാനങ്ങൾ ആലപിച്ചു. കുമാരനാശാൻ പബ്ലിക് ലൈബ്രറി സെക്രട്ടറി രജീഷ് ഗോപിനാഥ്, അജേഷ് കോട്ടമുറിക്കൽ, പി.ബി രഞ്ജൻ, ദിവ്യ സുധിമോൻ എന്നിവർ നേതൃത്വം നൽകി. 200 പേരുടെ അവയവദാന സമർപ്പണ സർട്ടിഫിക്കറ്റാണ് ചടങ്ങിൽ കൈമാറിയത്. ഇതിൽ 50 പേരുടെ ചടങ്ങിന് മുന്പ് കെസോട്ടിൽ രജിസ്റ്റർ ചെയ്തതായും ജനറൽ സെക്രട്ടറി പ്രമോദ് കെ. തന്പാൻ അറിയിച്ചു.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD