മുല്ലപ്പൂവിന് പൊന്നുംവില
1488726
Friday, December 20, 2024 8:31 AM IST
കോട്ടയം: മുല്ലപ്പൂവിന് പൊന്നുംവിലയായി. ഒരു കിലോ മുല്ലപ്പൂവിന് വില കഴിഞ്ഞദിവസം നാലായിരം രൂപ വരെയെത്തി. വിവാഹ സീസണ്‍ വരാനിരിക്കെ ഒരു മുഴം തലയില്‍ ചൂടാന്‍ ആയിരം രൂപ വേണമെന്ന സ്ഥിതിയാകും.
ആഘോഷങ്ങള്‍ക്കും അനുഷ്ഠാനങ്ങള്‍ക്കും അണിഞ്ഞൊരുങ്ങലിനും തത്കാലം മുല്ലപ്പൂ ഒഴിവാക്കേണ്ട സാഹചര്യമാണ്. വില കേട്ടല്‍ ജനം ഞെട്ടുന്ന സാഹചര്യത്തില്‍ പൂക്കടക്കാര്‍ ഓര്‍ഡര്‍ അനുസരിച്ച് മാത്രമേ പൂവ് എത്തിക്കുന്നുള്ളൂ. മുല്ലപ്പൂവിന് സമാനമായ വെള്ളപ്പൂക്കള്‍ വാങ്ങി തൃപ്തിയടയുന്നവരുമുണ്ട്.
തമിഴ്‌നാട്ടില്‍ ചുഴലിക്കാറ്റും പെരുമഴയും വന്നതോടെ ചെടികള്‍ നശിച്ചുപോയതോടെയാണ് വില കുതിച്ചുയര്‍ന്നത്. തമിഴ്നാടിന്‍റെ തെക്കന്‍ ജില്ലകളിലാണ് മുല്ലപ്പൂ കൃഷി കൂടുതലായുള്ളത്. ഇവിടങ്ങളില്‍ മഴ വ്യാപക നാശം വിതച്ചിരുന്നു. ജനുവരി വരെ വില കുറയില്ലെന്നാണ് സൂചന. കഴിഞ്ഞ ഓണത്തിന് ഒരു കിലോ മുല്ലപ്പൂവിന് 5,500 രൂപയ്ക്ക് മുകളില്‍ എത്തിയിരുന്നു.