ചങ്ങനാശേരി നഗരസഭ ചെയര്‍പേഴ്‌സണ്‍ തെരഞ്ഞെടുപ്പ് നാളെ
1451705
Sunday, September 8, 2024 7:15 AM IST
ചങ്ങനാശേരി: ചങ്ങനാശേരി നഗരസഭ ചെര്‍പേഴ്‌സണ്‍ തെരഞ്ഞെടുപ്പ് നാളെ രാവിലെ 11ന് മുനിസിപ്പല്‍ കൗണ്‍സില്‍ ഹാളില്‍ നടക്കും. എല്‍ഡിഎഫ് സ്ഥാനാര്‍ഥിയായി സിപിഎം അംഗം കൃഷ്ണകുമാരി രാജശേഖരനെ മത്സരിപ്പിക്കാന്‍ എല്‍ഡിഎഫ് പാര്‍ലമെന്‍ററി പാര്‍ട്ടി യോഗവും യുഡിഎഫ് സ്ഥാനാര്‍ഥിയായി കോണ്‍ഗ്രസ് അംഗം ഷൈനി ഷാജിയെ മത്സരിപ്പിക്കാന്‍ കോണ്‍ഗ്രസ് പാര്‍ലമെന്‍ററി പാര്‍ട്ടി യോഗവും തീരുമാനിച്ചു.
ചെയര്‍പേഴ്‌സണായിരുന്ന ബീനാ ജോബി ഇടതുമുന്നണി യിലെ ധാരണപ്രകാരം രാജിവച്ച ഒഴിവിലാണ് നാളത്തെ തെരഞ്ഞെടുപ്പ്. നിലവില്‍ യുഡിഎഫിന് 15, എല്‍ഡിഎഫിന് 19, ബിജെപിക്ക് മൂന്ന് എന്ന ക്രമത്തിലാണ് അംഗങ്ങളുള്ളത്. ഈ സാഹചര്യത്തില്‍ എല്‍ഡിഎഫിലെ കൃഷ്ണകുമാരി രാജശേഖരന്‍ ചെയര്‍പേഴ്‌സണാകാനാണ് സാധ്യത.
യുഡിഎഫ് ചേരിവിട്ട് സ്വതന്ത്രാംഗം ബീനാ ജോബി, കോണ്‍ഗ്രസ് അംഗങ്ങളായ ബാബു തോമസ്, രാജു ചാക്കോ എന്നിവര്‍ എല്‍ഡിഎഫിലെത്തുകയും എല്‍ഡിഎഫ് സ്ഥാനാര്‍ഥി ബീനാ ജോബിക്ക് അനുകൂലമായി വോട്ടു ചെയ്യുകയും ചെയ്തതോടെയാണ് ബീനാ ജോബി ചെയര്‍പേഴ്‌സണായി തെരഞ്ഞെടുക്കപ്പെട്ടത്. ഇതോടെ യുഡിഎഫിന്‍റെ കൈയില്‍നിന്നു നഗരഭരണം എല്‍ഡിഎഫ് പിടിച്ചെടുക്കുകയായിരുന്നു.