അന്തര്‍സര്‍വകലാശാല 3 x3 ബാസ്കറ്റ്ബോള് മത്സരം 27 മുതല്‍ കാഞ്ഞിരപ്പള്ളി എസ്ഡി കോളജില്‍
1489082
Sunday, December 22, 2024 5:48 AM IST
കോട്ടയം: എംജി യൂണിവേഴ്സിറ്റി ആതിഥ്യം വഹിക്കുന്ന ഓള്‍ ഇന്ത്യ അന്തര്‍സര്‍വകലാശാല പുരുഷ - വനിതാ 3 x 3 ബാസ്‌കറ്റ് ബോള്‍ മത്സരം 27 മുതല്‍ 31 വരെ കാഞ്ഞിരപ്പള്ളി സെന്‍റ് ഡൊമിനിക്സ് കോളജില്‍ നടക്കും. എംജി യൂണിവേഴ്സിറ്റി വൈസ് ചാന്‍സലര്‍ സി.ടി. അരവിന്ദ് കുമാര്‍ അധ്യക്ഷത വഹിക്കും. മന്ത്രി റോഷി അഗസ്റ്റിന്‍ ഉദ്ഘാടനം ചെയ്യും. കാഞ്ഞിരപ്പള്ളി ബിഷപ് മാര്‍ ജോസ് പുളിക്കല്‍ അനുഗ്രഹ പ്രഭാഷണം നടത്തും.
31ന് നടക്കുന്ന സമാപന സമ്മേളനത്തില്‍ മന്ത്രി വി.എന്‍. വാസവന്‍ സമ്മാനങ്ങള്‍ വിതരണം ചെയ്യും. ദേശീയ ഇന്‍റര്‍ യൂണിവേഴ്സിറ്റി മത്സരങ്ങളില്‍ ആദ്യമായാണ് 3 x 3 ബാസ്കറ്റ്ബോള് മത്സരം ഉള്‍പ്പെടുത്തിയത്. പ്രകടനത്തിന്‍റെ അടിസ്ഥാനത്തില്‍ ജര്‍മനിയില്‍ നടക്കാനിരിക്കുന്ന വേള്‍ഡ് യൂണിവേഴ്സിറ്റി മത്സരങ്ങളില്‍ ഇന്ത്യയെ പ്രതിനിധീകരിച്ചു പങ്കെടുക്കുന്ന ടീമിനെ തെരഞ്ഞെടുക്കും.
രാജ്യത്തിന്‍റെ വിവിധ ഭാഗങ്ങളില്‍നിന്നുമായി അറുപതിലധികം ടീമുകള്‍ മത്സരത്തില്‍ പങ്കെടുക്കും. രാജ്യത്തെ ഏറ്റവും മികച്ച യൂണിവേഴ്സിറ്റി ബാസ്കറ്റ്ബോള് ടീമുകള്‍ മത്സരത്തിന് എത്തിച്ചേരും.
ആന്‍റോ ആന്‍റണി എംപി, സെബാസ്റ്റ്യന്‍ കുളത്തുങ്കല്‍ എംഎല്‍എ, കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ്, പാറത്തോട് പഞ്ചായത്തു പ്രസിഡന്‍റ് കെ.കെ. ശശികുമാര്‍, മാനേജര്‍ ഫാ. വര്‍ഗീസ് പരിന്തിരിക്കല്‍, ജില്ലാ പഞ്ചായത്തംഗം പി.ആര്‍. അനുപമ, ബ്ലോക്ക് പഞ്ചായത്തംഗം ടി.ജെ. മോഹനന്‍,
പഞ്ചായത്തംഗം ഷാലിമ്മ ജയിംസ്, വിരമിച്ച ജീവനക്കാരുടെ പ്രതിനിധി പ്രഫ സി.എ. തോമസ്, മര്‍ച്ചന്‍റ് അസോസിയേഷന്‍ പ്രതിനിധി ബിജി കമാല്‍, പിടിഎ വൈസ് പ്രസിഡന്‍റ് എലിസബത്ത് അലക്‌സ്, യൂണിയന്‍ ചെയര്‍മാന്‍ ഫെബിന്‍ ജോസ് ആന്‍റണി എന്നിവര്‍ സമ്മേളനത്തില്‍ പങ്കെടുക്കും.
എംജി യൂണിവേഴ്സിറ്റി സിന്‍ഡിക്കറ്റംഗം ഡോ. ബിജു തോമസ്, യൂണിവേഴ്സിറ്റി കായിക വകുപ്പ് ഡയറക്ടറും മത്സര ഓര്‍ഗനൈസിംഗ് സെക്രട്ടറിയുമായ ഡോ. ബിനു ജോര്‍ജ് വര്‍ഗീസ്, ജനറല്‍ കണ്‍വീനറും സെന്‍റ് ഡൊമിനിക്സ് കോളജ് പ്രിന്‍സിപ്പലുമായ ഡോ. സീമോന്‍ തോമസ്, കോളജ് ബര്‍സാര്‍ റവ.ഡോ. മനോജ് ജോസഫ്, പബ്ലിസിറ്റി കണ്‍വീനര്‍ ബിനോ പി. ജോസ്, ചാന്പ്യന്‍ഷിപ്പ് കണ്‍വീനര്‍ പ്രവീണ്‍ തര്യന്‍ എന്നിവര്‍ നേതൃത്വം നല്‍കും.