ADVERTISEMENT

ADVERTISEMENT

ഉപജില്ലാ സ്‌കൂള്‍ ശാസ്‌ത്രോത്സവം തുടങ്ങി

ഇരിങ്ങാലക്കുട: വിദ്യാഭ്യാസ ഉപജില്ല സ്‌കൂള്‍ ശാസ്‌ത്രോത്സവം കല്പറമ്പ് ബിവിഎംഎച്ച്എസ് സ്‌കൂളില്‍ വെള്ളാങ്കല്ലൂര്‍ ബ്ലോക്ക് പഞ്ചായത്ത് പ്രസിഡന്‍റ്് സുധ ദിലീപ് ഉദ്ഘാടനം ചെയ്തു. പൂമംഗലം പഞ്ചായത്ത് പ്രസിഡന്‍റ് കെ.എസ്. തമ്പി അധ്യക്ഷത വഹിച്ചു.

ബ്ലോക്ക് പഞ്ചായത്ത് വൈസ് പ്രസിഡന്‍റ് ഉണ്ണികൃഷ്ണന്‍ കുറ്റിപ്പറമ്പില്‍, വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ കത്രീന ജോര്‍ജ്, വാര്‍ഡ് മെമ്പര്‍ ജൂലി ജോയ്, ജനറല്‍ കണ്‍വീനര്‍ ഇ. ബിജു ആന്‍റണി, ടി.കെ. ലത, സിന്ധു മേനോന്‍, എം.എ. രാധാകൃഷ്ണന്‍, വിക്ടര്‍ കല്ലറക്കല്‍ എന്നിവര്‍ പ്രസംഗിച്ചു.

എഇഒ എം.എസ്. രാജീവ് സ്വാഗതവും വികസന‌സമിതി കണ്‍വീനര്‍ ഡോ. എ.വി. രാജേഷ് നന്ദിയും പറഞ്ഞു. ബിവിഎംഎച്ച്എസ്എസ്, ജിയുപിഎസ് വടക്കുംകര, എച്ച്‌സിസി എല്‍പിഎസ് എന്നിവടങ്ങളിലാണ് ശാസ്‌ത്രോത്സവം നടക്കുന്നത്.

ADVERTISEMENT

രക്ഷവേണം കർഷകന്; കർഷക കോൺഗ്രസ് വാഹനപ്രചാരണ ജാഥ ഇന്നും മറ്റന്നാളും

തൃശൂർ: രക്ഷവേണം കർഷകന് എന്ന മുദ്രാവാക്യമുയർത്തി കേരള പ്രദേശ് കർഷക കോൺഗ്രസ് സംസ്ഥാനവ്യാപകമായി സംഘടിപ്പിക്കുന്ന വാഹനപ്രചാരണജാഥ ഇന്നും മറ്റന്നാളും ജില്ലയിൽ പര്യടനം നടത്തുമെന്നു സംസ്ഥാന പ്രസിഡന്‍റ് മാജുഷ് മാത്യു, ജില്ലാ പ്രസിഡന്‍റ് രവി പോലുവളപ്പിൽ എന്നിവർ പത്രസമ്മേളനത്തിൽ പറഞ്ഞു. ജാഥയുടെ ജില്ലാതല ഉദ്ഘാടനം ഇന്നു രാവിലെ ഒന്പതിനു ചേലക്കരയിൽ ഡിസിസി പ്രസിഡന്‍റ് അഡ്വ. ജോസഫ് ടാജറ്റ് നിർവഹിക്കും. എം.പി. വിൻസെന്‍റ് മുഖ്യാതിഥിയാകും. 10.30നു വടക്കാഞ്ചേരി ഓട്ടുപാറ, ഉച്ചയ്ക്കു 12.30നു പട്ടിക്കാട് ജംഗ്ഷൻ, 1.30നു മരോട്ടിച്ചാൽ, 3.30നു വരന്തരപ്പിള്ളി ജംഗ്ഷൻ, 4.30നു കോടാലി സെന്‍റർ എന്നിവിടങ്ങളിലെ സ്വീകരണത്തിനുശേഷം സമാപനം ആറിനു പരിയാരം സെന്‍ററിൽ സനീഷ്കുമാർ ജോസഫ് എംഎൽഎ ഉദ്ഘാടനം ചെയ്യും. നെല്ലിന്‍റെ സംഭരണവില 35 രൂപയാക്കുക, സംഭരണം സർക്കാർ ഏറ്റെടുക്കുക, സംഭരിച്ച നെല്ലിന്‍റെ വില ഉടൻ നൽകുക, റബറിന് 200 രൂപ നിരക്കിൽ വിലസ്ഥിരതാഫണ്ട് അനുവദിക്കുക, റബർകൃഷിക്കു കാർബൺ ഫണ്ട് ലഭിക്കാനുള്ള നടപടിക്രമങ്ങൾ കേന്ദ്ര-സംസ്ഥാന സർക്കാരുകൾ സ്വീകരിക്കുക, റബറിനു കേരപദ്ധതിയിൽ 14 ജില്ലകളെയും ഉൾപ്പെടുത്തി ആവർത്തനകൃഷിക്കും പുതിയ കൃഷിക്കും സബ്സിഡി നൽകുക, പ്രകൃതിക്ഷോഭങ്ങളുടെ നഷ്ടപരിഹാരത്തുകകൾ ഉടൻ നൽകുക, കാർഷിക ക്ഷേമനിധി ബോർഡിന്‍റെ ദുരവസ്ഥ പരിഹരി ക്കുക, വന്യമൃഗശല്യത്തിനു ശാശ്വതപരിഹാരം കാണുക തുടങ്ങിയ ആവശ്യങ്ങളുന്നയിച്ചാണ് ജാഥ സംഘടിപ്പിക്കുന്നത്. പത്രസമ്മേളനത്തിൽ സംസ്ഥാനസെക്രട്ടറിമാരായ കെ.എൻ. സജീവൻ, മറായി കെ. ദേവസി, ജില്ലാ സെക്രട്ടറി ഷാജി ചിറ്റിലപ്പിള്ളി എന്നിവരും പങ്കെടുത്തു.

അതിരപ്പിള്ളിയിൽ ലൈബ്രറി കെട്ടിടം കാട്ടാനക്കൂട്ടം തകർത്തു

അതിരപ്പിള്ളി: കാലടി പ്ലാന്‍റേഷൻ കല്ലാല എസ്റ്റേറ്റിൽ ലൈബ്രറി കെട്ടിടം കാട്ടാനക്കൂട്ടം തകർത്തു. കല്ലാല ബി ഡിവിഷനിലെ ലൈബ്രറിയാണ് വ്യാ ഴാഴ്ച രാത്രി കാട്ടാനക്കൂ ട്ടം നശിപ്പിച്ചത്. ലൈബ്രറിയുടെ വാതിൽ പൊളിച്ച് അകത്തു കടന്ന കാട്ടാനക്കൂട്ടം സാധനസാമഗ്രികൾ നശിപ്പിച്ചു. പുറത്തു സ്ഥാപിച്ചിരുന്ന വാട്ടർ പൈപ്പും ആന നശിപ്പിച്ചു. പ്രദേശത്തെ പോളിംഗ് ബൂത്തായി ഉപയോഗിക്കുന്ന കെട്ടിടമാണിത്. കെട്ടിടത്തിനു ചുറ്റും വൈദ്യുതിവേലി സ്ഥാപിക്കണമെന്നും കാട്ടാനശല്യം കുറയ്ക്കുന്നതിനായി വനംവകുപ്പ് നടപടികൾ സ്വീകരിക്കണമെന്നും നാട്ടുകാർ ആവശ്യപ്പെട്ടു.

കോർപറേഷൻ വികസനസദസ് ബഹിഷ്കരണ സദസായി

തൃശൂർ: വികസനപ്രവർത്തനങ്ങൾ ജനങ്ങളിൽ എത്തിക്കാനായി നടത്തിയ കോർപറേഷൻ വികസനസദസ് പ്രതിപക്ഷത്തോടൊപ്പം ബഹിഷ്കരിച്ച് ഭരണപക്ഷത്തെ സിപിഐയും. ജനങ്ങളുടെ പണമെടുത്ത് തെരഞ്ഞെടുപ്പുപ്രചരണത്തിനായി നടത്തുന്ന പ്രഹസനത്തിനു കൂട്ടുനിൽക്കില്ലെന്നു വ്യക്തമാക്കി ബിജെപിയും സദസ് ബഹിഷ്കരിച്ചു. രണ്ടുദിവസമായി സംഘടിപ്പിച്ച പരിപാടിയുടെ ആദ്യദിനം കഴിഞ്ഞപ്പോഴാണ് തങ്ങളെ ഇക്കാര്യം അറിയിച്ചതെന്നായിരുന്നു ബഹിഷ്കരിച്ചവരുടെ മറുപടി. വികസനസദസിന്‍റെ നോട്ടീസിൽ പാർട്ടി ജില്ലാ സെക്രട്ടറിയുടെ പേരുചേർക്കാത്തതിൽ പ്രതിഷേധിച്ച് സിപിഐയുടെ സ്ഥിരംസമിതി അധ്യക്ഷ സാറാമ്മ റോബ്സൺ ആദ്യദിവസംതന്നെ ചടങ്ങിൽനിന്ന് ഇറങ്ങിപ്പോയിരുന്നു. ഇതിനുപിറകെയാണ് ഇന്നലെ നടന്ന പരിപാടി സിപിഐയുടെയും യുഡിഎഫിന്‍റെയും ബിജെപിയുടെയും കൗൺസിലർമാർ ബഹിഷ്കരിച്ചത്. വേദിയിൽ നിരത്തിയ കസേരകളിൽ പലതും ഒഴിഞ്ഞുകിടന്നു. മുൻമേയർമാരെ ആദരിക്കുന്ന ചടങ്ങിൽ അജിത ജയരാജൻ മാത്രമാണ് എത്തിയിരുന്നത്. ഇത്തരം ഒരു സദസ് നടത്തുന്നതുമായി ബന്ധപ്പെട്ട് കൗൺസിലിൽ അറിയിക്കുകയോ യോഗം വിളിക്കുകയോ ചെയ്യാതെ തലേദിവസം ക്ഷണിക്കുന്ന രീതി ശരിയല്ലെന്ന് പ്രതിപക്ഷനേതാവ് രാജൻ ജെ. പല്ലൻ പറഞ്ഞു. തട്ടിപ്പുപരിപാടിക്കു ജനങ്ങളുടെ പണം ഉപയോഗിക്കുന്നുവെന്നും തെരഞ്ഞെടുപ്പ് മുന്നിൽക്കണ്ടുള്ള പബ്ലിസിറ്റി സ്റ്റണ്ട് മാത്രമാണിതെന്നും ബിജെപി പാർലമെന്‍ററി പാർട്ടിനേതാവ് വിനോദ് പൊള്ളാഞ്ചേരി പറഞ്ഞു. ഭരണപക്ഷത്താണെങ്കിലും ഘടകകക്ഷിനേതാവായ തന്നെപ്പോലും ഒരു പരിപാടിയും അറിയിക്കുകയോ കൂടിയാലോചനകൾക്കു വിളിക്കുകയോ ചെയ്യാറില്ലെന്നും അതിനാലാണ് പരിപാടി ബഹിഷ്കരിച്ചതെന്നും ഭരണമുന്നണിയിലെ ഷീബ ബാബുവും, സ്വതന്ത്ര ഭരണപക്ഷ കൗൺസിലർ സി.പി. പോളിയും വ്യക്തമാക്കി. അതേസമയം, തന്‍റെ അഭാവം ബഹിഷ്കരണമല്ലായിരുന്നുവെന്നും ഡിവിഷനിലെ തിരക്കുകൾകൊണ്ടായിരുന്നുവെന്നും ആദ്യദിനം പങ്കെടുത്തിരുന്നുവെന്നും ഡെപ്യൂട്ടി മേയർ എം.എൽ. റോസി അറിയിച്ചു. സിപിഐ ബഹിഷ്കരണം നടത്തിയപ്പോഴും സദസ് ഉദ്ഘാടനംചെയ്തത് ജില്ലാ പഞ്ചായത്ത് പ്രസിഡന്‍റും സിപിഐ നേതാവുമായി വി.എസ്. പ്രിൻസ് ആണ്. ജില്ലാ പഞ്ചായത്ത് പ്രസിഡന്‍റ എന്ന പദവിയുടെ പേരിലാണ് അദ്ദേഹം പങ്കെടുത്തതെന്നായിരുന്നു ഇതേക്കുറിച്ച് സാറാമ്മ റോബ്സന്‍റെ പ്രതികരണം. മേയർ എം.കെ. വർഗീസ്, സ്റ്റാൻഡിംഗ് കമ്മിറ്റി ചെയർപേഴ്സൺ വർഗീസ് കണ്ടംകുളത്തി, മുൻ മേയർ അജിത ജയരാജൻ, സെക്രട്ടറി പി.വി. ഷിബു, സൂപ്രണ്ടിംഗ് എൻജിനീയർ ഷൈബി, ജനറൽ ആശുപത്രി സൂപ്രണ്ട് ഡോ. താജ് പോൾ തുടങ്ങിയവർ പങ്കെടുത്തു. തൊഴുത്തു പോലെയായിരുന്ന കോർപറേഷൻ ഇപ്പോൾ സെൽഫി പോയിന്‍റ്: മേയർ ഘട്ടം ഘട്ടമായി വികസനപ്രവർത്തനങ്ങൾ നടപ്പാക്കിയതിലൂടെ 1500 കോടിയുടെ വികസനപ്രവർത്തനങ്ങൾ നടത്താൻ കഴിഞ്ഞ അഞ്ചുവർഷംകൊണ്ട് സാധിച്ചുവെന്നു മേയർ എം.കെ. വർഗീസ്. കുടിവെള്ളം ഉൾപ്പെടെ എല്ലാവർക്കും സമഗ്രമായ വികസനം എത്തിക്കാൻ ഈ കാലയളവിൽ സാധിച്ചിട്ടുണ്ട്. നഗരത്തെ ഏഷ്യയിലെതന്നെ ആദ്യ ലേണിംഗ് സിറ്റിയാക്കി മാറ്റാനും രാജ്യത്തെതന്നെ ആദ്യ ആകാശപ്പാത നടപ്പാക്കാനും കഴിഞ്ഞുവെന്ന് ചടങ്ങിൽ അധ്യക്ഷത വഹിച്ച മേയർ പറഞ്ഞു. താൻ വരുമ്പോൾ വരുന്നവരും പോകുന്നവരും കയറിയിറങ്ങുന്നവിധം തൊഴുത്തുപോലെ ഉണ്ടായിരുന്ന കോർപറേഷൻ ഓഫീസ് സെൽഫി പോയിന്‍റ് പോലെയാക്കാൻ കഴിഞ്ഞതും ഈ ഭരണത്തിന്‍റെ നേട്ടമാണെന്ന് അദ്ദേഹം കൂട്ടിച്ചേർത്തു.

ഒരുക്കങ്ങൾ വിപുലം, മുത്തിയുടെ തിരുനാൾ ഇന്നും നാളെയും

കൊരട്ടി: നാനാജാതിമതസ്ഥരായ ജനങ്ങൾ അനുഗ്രഹം തേടിയെത്തുന്ന കൊരട്ടി സെന്‍റ് മേരീസ് ഫൊറോന പള്ളിയിൽ അദ്ഭുതപ്രവർത്തകയായ കൊരട്ടിമുത്തിയുടെ തിരുനാൾ ഇന്നും നാളെയും ആഘോഷിക്കും. ഭക്തജനപ്രവാഹം മുന്നിൽക്കണ്ട് വിപുലമായ ക്രമീകരണങ്ങളാണ് പള്ളിയിലും പരിസരപ്രദേശങ്ങളിലും ഒരുക്കിയിട്ടുള്ളത്. ഇന്നു രാവിലെ 5.30 നു വിശുദ്ധ കുർബാനയ്ക്കുശേഷം പൂവൻകായ വെഞ്ചരിപ്പ്. ഏഴിനു ഫാ. ലൂക്കോസ് കുന്നത്തൂരിന്‍റെ കാർമികത്വത്തിൽ വിശുദ്ധ കുർബാന, നൊവേന. ഒന്പതിന് ഫാ. ജോസഫ് ഓലിപ്പറമ്പിൽ ലത്തീൻ റീത്തിൽ ദിവ്യബലി അർപ്പിക്കും. 10.30 ന് ആഘോഷമായ സമൂഹബലിക്ക് ഇടവകവൈദികർ നേതൃത്വം നൽകും. ഉച്ചയ്ക്ക് 1.30 നു ഫാ. മാർട്ടിൻ കല്ലുങ്കൽ ഇംഗ്ലീഷിൽ കുർബാന അർപ്പിക്കും. മൂന്നിന് ഫാ. പോൾസൺ പെരേപ്പാടന്‍റെ കാർമികത്വത്തിൽ സുറിയാനി കുർബാന. അഞ്ചിന് ആഘോഷമായ പാട്ടുകുർബാനയ്ക്ക് ഫാ. ആൽബിൻ വെള്ളാഞ്ഞിയിൽ കാർമികനാകും. 8.30 നും ദിവ്യബലി ഉണ്ടായിരിക്കും. തിരുനാൾദിനമായ നാളെ രാവിലെ അഞ്ചിന്, വർഷത്തിൽ ഒരു ദിവസംമാത്രം വണക്കത്തിനായി മദ്ബഹയിൽനിന്നു കൂടുതുറന്ന് പുറത്തേക്ക് എടുക്കാറുള്ള അദ്ഭുതരൂപം എഴുന്നള്ളിച്ചുവയ്ക്കും. വികാരി ഫാ. ജോൺസൺ കക്കാട്ട് മുഖ്യകാർമികത്വം വഹിക്കും. ഏഴിനും 8.30 നും ദിവ്യബലികൾക്കു യഥാക്രമം ഫാ. ജിൻസ് ഞാണയ്ക്കലും ഫാ. റോമൽ കണിയാംപറമ്പിലും നേതൃത്വം നൽകും. 10.30 ന് ആഘോഷമായ തിരുനാൾപാട്ടുകുർബാന. ഫാ. വിപിൻ വേരൻപിലാവ് കാർമികനാകും. ഉച്ചയ്ക്ക് 1.30 നു തമിഴിൽ വിശുദ്ധകുർബാന. 2.30ന് ഫാ. പ്രവീൺ വെള്ളാട്ടുപറമ്പിലിന്‍റെ കാർമികത്വത്തിൽ പാട്ടുകുർബാനയെതുടർന്ന് നാല് അങ്ങാടിചുറ്റി പ്രദക്ഷിണം. 4.30നും 7.30നും 9.30നും വിശുദ്ധ കുർബാനകൾ. 11.30ന് അദ്ഭുതരൂപം അകത്തേക്കു കയറ്റിവയ്ക്കും. 18, 19 തീയതികളിൽ എട്ടാമിടവും 25, 26 തീയതികളിൽ പതിനഞ്ചാമിടവും ആഘോഷിക്കും. ആത്മീയനിറവിൽ ഇടവകജനങ്ങളുടെ കാഴ്ചസമർപ്പണം കൊരട്ടി: 39 കുടുംബ യൂണിറ്റുകളിൽനിന്ന് കാൽനടയായും വാഹനങ്ങളുടെ അകമ്പടിയോടെയും ഇടവകജനം പള്ളിയിലെത്തി കാഴ്ചസമർപ്പണം നടത്തി. വികാരി ഫാ. ജോൺസൺ കക്കാട്ട് പ്രാർഥനാശുശ്രൂഷയ്ക്കുശേഷം കാഴ്ചക്കുലകൾ ഏറ്റുവാങ്ങി. തുടർന്നുനടന്ന ദിവ്യബലിക്കു ഫാ. ജെറിൻ കിളിയന്തറ കാർമികനായി.

ടിങ്കർ ഫെസ്റ്റ് നടത്തി

മേലൂർ: എറണാകുളം അങ്കമാലി അതിരൂപത കോർപ്പറേറ്റ് വിദ്യാഭ്യാസ ഏജൻസിയുടെ കീഴിലുള്ള സ്കൂളുകളെ പങ്കെടുപ്പിച്ച "ടിങ്കർ ഫെസ്റ്റ് 2025' മേലൂർ സെന്‍റ്് ജോസഫ് എച്ച്എസ്എസിൽ നടത്തി. "റീച്ചിംഗ് ഔട്ട് ക്വാളിറ്റി ലൈഫ് ത്രൂ സസ്റ്റൈനബിൾ ഡെവലപ്മെന്‍റ്" എന്ന വിഷയത്തെ അടിസ്ഥാനപ്പെടുത്തി തൃശൂർ, എറണാകുളം, ആലപ്പുഴ, കോട്ടയം എന്നീ നാല് ജില്ലകളിൽ നിന്നുള്ള വിദ്യാർഥികൾ പ്രോജക്ടുകൾ അവതരിപ്പിച്ചു മാറ്റുരച്ചു. കോർപ്പറേറ്റ് മാനേജർ ഫാ. തോമസ് നങ്ങേലിമാലിൽ അധ്യക്ഷത വഹിച്ചു. കമ്പനി സിഇഒ ജിലു ജോസഫ് ഉദ്ഘാടന കർമം നിർവഹിച്ചു. പ്രിൻസിപ്പൽ ഡോ. മേഴ്സി തോമസ്, മാനേജർ ഫാ. ജോസ് പൊള്ളയിൽ, അസിസ്റ്റന്‍റ് കോർപ്പറേറ്റ് മാനേജർ ഫാ. വർഗീസ് പാലാട്ടി, ഹെഡ്മാസ്റ്റർ സോണി ജോസഫ്, പിടിഎ പ്രസിഡന്‍റ്് ടി. ബെന്നി, കോ ഒാർഡിനേറ്റർ ഡോ. പി. ആശ, ജയ്റോസ് പാപ്പച്ചൻ എന്നിവർ പ്രസംഗിച്ചു. എവർറോളിംഗ് ട്രോഫികൾ പ്രഫ. ഫ്രാൻസിസ് ജോസഫ് സമ്മാനിച്ചു. 100 ഓളം വിദ്യാർഥികൾ മാറ്റുരച്ച ഫെസ്റ്റിൽ വിജയികളായവർക്ക് സമ്മാനദാനവും നടത്തി.

നവീകരിച്ച അങ്കണവാടി ഉദ്ഘാടനം ചെയ്തു

മേലൂര്‍: പഞ്ചായത്തിലെ പൂലാനി എസ്എന്‍ നഗറിലെ നവീകരിച്ച താര അങ്കണവാടിയുടെ ഉദ്ഘാടനം ജില്ല പഞ്ചായത്ത് പ്രസിഡന്‍റ്് വി.എസ്. പ്രിന്‍സ് നിര്‍വഹിച്ചു. മേലൂര്‍ പഞ്ചായത്ത് പ്രസിഡന്‍റ്് എം.എസ്.സുനിത അധ്യക്ഷത വഹിച്ചു. രണ്ട് കെട്ടിടങ്ങളിലായി പ്രവര്‍ത്തിച്ചിരുന്ന അങ്കണവാടിയാണ് പതിനഞ്ച് ലക്ഷം രൂപ ചിലവിൽ നവീകരണം പൂര്‍ത്തിയാക്കിയിരിക്കുന്നത്. പഞ്ചായത്ത് വൈസ് പ്രസിഡന്‍റ്് പോളി പുളിക്കന്‍, സ്ഥിരം സമിതി അധ്യക്ഷന്‍മാരായ പി.പി. പരമേശ്വരന്‍, സതി ബാബു, ബ്ലോക്ക് മെമ്പര്‍ ഇന്ദിര പ്രകാശന്‍, സിഡിപിഒ ഷീബ നാല്‍പ്പാട്ട്, ഐസിഡിഎസ് സൂപ്പര്‍വൈസര്‍ കെ.കെ. ദീപ, വാര്‍ഡ്മെമ്പര്‍ അംബിക ബാബു, പഞ്ചായത്തംഗങ്ങളായ സൗമ്യ മോഹന്‍ദാസ്, ഇ.ആര്‍. രഘുനാഥ്, ഷീജ പോളി, അങ്കണവാടി ടീച്ചര്‍ ഇ ആർ.എല്‍സി തുടങ്ങിയവർ പ്രസംഗിച്ചു.

കലാഭവൻ മണി സ്മാരകം: ശിലാസ്ഥാപനം കഴിഞ്ഞ് അഞ്ചു മാസമായിട്ടും നിർമാണം ആരംഭിച്ചില്ല

ചാലക്കുടി: ഏറെ വർഷങളുടെ കാത്തിരിപ്പിനൊടുവിൽ നിർമാണോദ്ഘാടനം നടത്തിയ കലാഭവൻ മണി സ്മാരക നിർമാണം ഇനിയും ആരംഭിച്ചില്ല. കഴിഞ്ഞ മേയ് 27ന് സാംസ്കാരിക മന്ത്രി സജി ചെറിയനാണ് കലാഭവൻ മണി സ്മാരക നാടൻ കലാപഠന ഗവേഷണ കേന്ദ്രത്തിന്‍റെ നിർമാണോദ്ഘാടനം നടത്തിയത്. കേരള ഫോക്‌ലോർ അക്കാദമിയുടെ ഉപകേന്ദ്രമായിട്ടാണ് സ്മാരകനിർമാണം. എന്നാൽ ശിലാസ്ഥാപന ചടങ്ങ് കൊട്ടും കുരവയുമായി ആഘോഷമായി നടത്തിയതല്ലാതെ നിർമാണം ആരംഭിച്ചില്ല. ഊരാളുങ്കൽ ലേബർ സൊസൈറ്റിക്കാണ് നിർമാണചുമതല നൽകിയിരുന്നത്. എന്നാൽ സൊസൈറ്റി ഇവിടേക്ക് തിരിഞ്ഞുപോലും നോക്കുന്നില്ല. നേരത്തെ സ്മാരകനിർമാണം ആരംഭിക്കാത്തതിനെ ചൊല്ലി ഏറെ പ്രക്ഷോഭങ്ങൾ ഉയർന്നിരുന്നു. ഇപ്പോൾ എല്ലാവരും ഇക്കര്യം മറന്നമട്ടാണ്. 2017ൽ ഭരണാനുമതി ലഭിച്ച പദ്ധതിക്ക് മൂന്ന്കോടി രൂപ സർക്കാർ അനുവദിച്ചിരുന്നു. എന്നാൽ സർക്കാരിൽ പണം ഇല്ലാത്തതാണ് സ്മാരക നിർമാണം ആരംഭിക്കാത്തതെന്ന് അറിയുന്നു.

സമൂഹത്തിനു നന്മചെയ്യുന്ന മണപ്പുറം ഫൗണ്ടേഷന്‍റെ പ്രവര്‍ത്തനങ്ങള്‍ ശ്ലാഘനീയമെന്ന്

ഇരിങ്ങാലക്കുട: സമൂഹത്തിന് നന്മ ചെയ്യുന്ന മണപ്പുറം ഫൗണ്ടേഷന്‍റെ പ്രവര്‍ത്തനങ്ങള്‍ ശ്ലാഘനീയമെന്ന് മുകുന്ദപുരം തഹസില്‍ദാര്‍ സിമിഷ് സാഹു പറഞ്ഞു. മണപ്പുറം ഫൗണ്ടേഷന്‍ സാമൂഹിക പ്രതിബദ്ധത വിഭാഗത്തിന്‍റെ സൗജന്യ ചികിത്സ ധനസഹായ പദ്ധതിയുടെ ഭാഗമായുള്ള ചെക്ക് വിതരണ ചടങ്ങ് മാകെയര്‍ ഇരിങ്ങാലക്കുടയില്‍ ഉദ്ഘാടനം ചെയ്ത് സംസാരിക്കുകയായിരുന്നു സിമിഷ് സാഹു. പല വ്യാധികളാല്‍ ദുരിതമനുഭവിക്കുന്ന, തെരഞ്ഞെടുക്കപ്പെട്ട 70 പേര്‍ക്ക് 3.5 ലക്ഷം രൂപയാണ് ഈ പദ്ധതിയുടെ ഭാഗമായി ധനസഹായമായി നല്‍കിയത്. മണപ്പുറം ഫൗണ്ടേഷന്‍ സിഇഒ ജോര്‍ജ് ഡി. ദാസ് അധ്യക്ഷത വഹിച്ചു. സിഎസ്ആര്‍ വിഭാഗം മേധാവി ശില്‍പ ട്രീസ സെബാസ്റ്റ്യന്‍, ഇരിങ്ങാലക്കുട മാകെയര്‍ ബിസിനസ് ഹെഡ് ഐ. ജെറോം, ഡിജിറ്റല്‍ മാര്‍ക്കറ്റിംഗ് അഡ്മിന്‍ ആശംസാറാണി, സെയില്‍സ് ഹെഡ് പി.എസ്. ശ്രീജിത്ത്, മാകെയര്‍ സെന്‍റര്‍ ഹെഡ് സി.ആര്‍. ബിബിന്‍ എന്നിവര്‍ സംസാരിച്ചു.

ടെക്‌നോളജി ബോധവത്കരണ ക്യാമ്പ് കാരിക്കടവ് ആദിവാസി ഉന്നതിയില്‍

ഇരിങ്ങാലക്കുട: സെന്‍റ് ജോസഫ്സ് കോളജ് കമ്പ്യൂട്ടര്‍ സയന്‍സ് വിഭാഗവും ജേര്‍ണലിസം ആന്‍ഡ് മാസ് കമ്മ്യൂണിക്കേഷന്‍ വിഭാഗവും സംയുക്തമായി സംഘടിപ്പിച്ച ടെക്‌നോളജി ബോധവത്കരണ പരിപാടി കാരിക്കടവ് ആദിവാസി ഉന്നതിയില്‍ നടന്നു. സമൂഹ്യ വികസനം ലക്ഷ്യമാക്കി സംഘടിപ്പിച്ച പരിപാടിയില്‍ വെള്ളിക്കുളങ്ങര റേഞ്ചിന് കീഴിലുള്ള മറ്റത്തൂര്‍ പഞ്ചായത്തിലെ കാരിക്കടവ് ആദിവാസി ഉന്നതിയിലെ 17 കുടുംബങ്ങള്‍ക്ക് ഭക്ഷ്യകിറ്റ് വിതരണം നടത്തി. സാങ്കേതിക വിദ്യയിലൂടെ വനവിഭവങ്ങളുടെ വിപണനം എന്ന വിഷയത്തില്‍ വിദ്യാര്‍ഥികള്‍ ഉന്നതി നിവാസകളുമായി സംവദിച്ചു. 20 വിദ്യാര്‍ഥികളും അഞ്ച് അധ്യാപകരും പങ്കെടുത്ത ക്യാമ്പില്‍, ഉന്നതിയിലെ 53 പേര്‍ പങ്കെടുത്തു. ക്യാമ്പ് വനസംരക്ഷണ സമിതി പ്രതിനിധികളുടെ സാന്നിധ്യത്തില്‍ ബീറ്റ് ഫോറെസ്റ്റ് ഓഫീസര്‍ പ്രവീണ്‍ ഉദ്ഘാടനം ചെയ്തു. പരിപാടിയിലൂടെ ഉന്നതി വാസികള്‍ക്ക് ഡിജിറ്റല്‍ സൗകര്യങ്ങളുടെ പ്രയോജനങ്ങള്‍ കൂടുതല്‍ മനസിലാക്കാനും, സുരക്ഷിതമായ ടെക്‌നോളജി ഉപയോഗ മാര്‍ഗങ്ങള്‍ അറിയാനും സാധിച്ചു. കാരിക്കടവ് സ്വയംസഹായ സംഘത്തിന്‍റെ ഓണ്‍ലൈന്‍ വിപണന ശ്രമങ്ങള്‍ കൂടുതല്‍ ശക്തമാക്കാനുള്ള പദ്ധതികളും രൂപപ്പെടുത്തി. ക്യാമ്പ് വിദ്യാര്‍ഥികള്‍ക്ക് സാമൂഹിക ഇടപെടലിന്‍റെയും ഫീല്‍ഡ് അനുഭവത്തിന്‍റെയും അവസരമായി.

വിദ്യോദയ ഇംഗ്ലീഷ് മീഡിയം സ്‌കൂളിൽ ബ്ലൂമിംഗ് ബഡ്സ് പ്രീ സ്‌കൂൾ

ഇരിങ്ങാലക്കുട: വിദ്യോദയ ഇംഗ്ലീഷ് മീഡിയം സ്‌കൂളിന്‍റെ നൂതന കാല്‍വെപ്പ് ആയ ബ്ലൂമിംഗ് ബഡ്സ് പ്രീ സ്‌കൂളിന്‍റെ ഉദ്ഘാടനം ഇരിങ്ങാലക്കുട മുനിസിപ്പല്‍ ചെയര്‍പേഴ്‌സണ്‍ മേരിക്കുട്ടി ജോയ് നിര്‍വഹിച്ചു. ഫ്‌ളവേഴ്‌സ് ടോപ് സിംഗര്‍ സീസണ്‍ അഞ്ചിലെ സെക്കന്‍ഡ് റണ്ണറപ്പ് ആയ സെബാ മൂണ്‍ വിശിഷ്ടാതിഥിയായിരുന്നു. സ്‌കൂള്‍ മാനേജര്‍ വിപിആര്‍ മേനോന്‍, പിടിഎ പ്രസിഡന്‍റ്് ഹരിത ഉണ്ണികൃഷ്ണന്‍, സീനിയര്‍ അധ്യാപിക എ.പി. ശ്രീദേവി എന്നിവര്‍ സംസാരിച്ചു. സ്‌കൂള്‍ ഹെഡ്മാസ്റ്റര്‍ വി.എ. ഹരിദാസ് സ്വാഗതവും ബ്ലൂമിങ്ങ് ബഡ്സ് കോ ഓര്‍ഡിനേറ്റര്‍ ഫീമ മൈക്കിള്‍ നന്ദിയും പറഞ്ഞു.

സൗകര്യമൊരുക്കലാണ് വേണ്ടത്; ജനങ്ങളെ ബുദ്ധിമുട്ടിക്കലല്ല: മന്ത്രി ആര്‍. ബിന്ദു

ഇരിങ്ങാലക്കുട: റെയില്‍വേ സ്റ്റേഷനില്‍ പ്ലാറ്റ്ഫോമുകളിലേക്കുള്ള പ്രവേശനം ഗേറ്റ് സ്ഥാപിച്ച് തടയുന്ന നടപടി അടിയന്തരമായി അവസാനിപ്പിക്കണമെന്ന് റെയില്‍വേ അധികൃതരോട് ആവശ്യപ്പെട്ടിട്ടുണ്ടെന്ന് ഉന്നത വിദ്യാഭ്യാസ- സാമൂഹ്യനീതി മന്ത്രി ആര്‍. ബിന്ദു പറഞ്ഞു. അടിസ്ഥാന പശ്ചാത്തലസൗകര്യങ്ങള്‍ ആവശ്യാനുസരണം ഒരുക്കുന്നതിനു പകരം ജനങ്ങള്‍ക്ക് ഉപദ്രവകരമായ നടപടികളെടുക്കുന്നത് അംഗീകരിക്കാനാവില്ലെന്ന് മന്ത്രി ഡോ. ആര്‍. ബിന്ദു പ്രസ്താവനയില്‍ പറഞ്ഞു. അടിസ്ഥാന പശ്ചാത്തലസൗകര്യങ്ങള്‍ സ്ഥാപിക്കുക, നിര്‍ത്തിവെച്ച സ്റ്റോപ്പുകള്‍ വീണ്ടും നല്‍കുക, ആവശ്യപ്പെട്ട പുതിയ സ്റ്റോപ്പുകള്‍ അനുവദിക്കുക, ഇരിങ്ങാലക്കുടയെ തൃശൂര്‍ ജില്ലയിലെ രണ്ടാമത്തെ മുഖ്യ സ്റ്റേഷനാക്കി ഉയര്‍ത്തുക എന്നീ ആവശ്യങ്ങള്‍ ഉയര്‍ത്തിയുള്ള വലിയ ജനകീയ പ്രക്ഷോഭങ്ങളാണ് റെയില്‍വേയ്ക്കെതിരെ ഉയര്‍ന്നു തുടങ്ങിയിട്ടുള്ളത്. ഇവയ്ക്ക് തെല്ലും വിലകല്‍പ്പിക്കാതെ ജനകീയ ആവശ്യങ്ങളെ അവഗണിക്കുകയും വെല്ലുവിളിക്കുകയും ചെയ്യുന്ന സമീപനമാണ് പ്ലാറ്റ്ഫോമുകളിലേക്കുള്ള പ്രവേശനം ഗേറ്റ് സ്ഥാപിച്ച് തടയുന്ന നടപടിയില്‍ ഉള്ളത്. ജനവിരുദ്ധ നടപടികളല്ല ജനകീയാവശ്യങ്ങള്‍ അംഗീകരിക്കലാണ് ഉണ്ടാവേണ്ടത്. ജനകീയ ആവശ്യങ്ങള്‍ നിരന്തരമായി ഉന്നയിച്ചുകൊണ്ടിരിക്കുന്ന ജനപ്രതിനിധിയെന്ന നിലയ്ക്ക് ഈ പ്രക്ഷോഭങ്ങളുടെ മുന്‍നിരയില്‍ ഞാനുണ്ടാകുമെന്നും മന്ത്രി പറഞ്ഞു. സബ്‌വേ ആവശ്യപ്പെട്ട് ജനകീയ സമരസദസ് ഇരിങ്ങാലക്കുട: ബദല്‍ സംവിധാനങ്ങള്‍ ഒരുക്കാതെ കല്ലേറ്റുംകരയിലെ ഇരിങ്ങാലക്കുട റെയില്‍വേ സ്റ്റേഷന്‍ പ്ലാറ്റ്‌ഫോമിലൂടെയുള്ള നടപ്പാത അടച്ചുപൂട്ടിയതിനെതിരെ ഇന്ന് വൈകീട്ട് നാലിന് കല്ലേറ്റുംകര വികസന സമിതിയും സംയുക്തമായി ജനകീയ സമര സദസ് സംഘടിപ്പിക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. അപകടയാത്രയ്ക്കുള്ള അവകാശവാദമല്ല, ജീവസുരക്ഷയ്ക്കുള്ള ബദല്‍ മാര്‍ഗങ്ങളാണ് സമരസദസിലൂടെ ലക്ഷ്യമാക്കുന്നതെന്ന് വര്‍ഗീസ് തൊടുപറമ്പില്‍, പ്രസിഡന്‍റ് വര്‍ഗീസ് പന്തല്ലൂക്കാരന്‍, വര്‍ക്കിംഗ് പ്രസിഡന്‍റ്് അഡ്വ. കെ.എഫ്. ജോസ്, പാസഞ്ചേഴ്‌സ് അസോസിയേഷന്‍ പ്രസിഡന്‍റ് കെ.കെ. ബാബു, കല്ലേറ്റുംകര വികസന സമിതി വര്‍ക്കിംഗ് പ്രസിഡന്‍റ്് പി.എല്‍. ജോസ് എന്നിവര്‍ അറിയിച്ചു.

വീട്ടിലെ ലൈബ്രറിയുടെ കവിതാപുരസ്‌കാരം

കാറളം: വീട്ടിലെ ലൈബ്രറി ഏര്‍പ്പെടുത്തിയ പ്രഥമ കവിതാ പുരസ്‌കാരം പ്രഖ്യാപിച്ചു. ആലപ്പുഴ സ്വദേശി നാസര്‍ ഇബ്രാഹിമിന്‍റെ "മഴയില്‍ ഉണക്കി വെയില്‍ നനച്ചെടുത്ത കീറും കുട്ടിക്കുപ്പായങ്ങള്‍' എന്ന കൃതിക്ക് ആണ് അവാര്‍ഡ്. സ്‌പെഷല്‍ ജൂറി പുരസ്‌കാരത്തിന് ഒമ്പത് കൃതികള്‍ തെരഞ്ഞെടുത്തു. പൂയപ്പിള്ളി തങ്കപ്പന്‍, ജി. ശോഭ (ചേലക്കര), സി.ജി. മധു കാവുങ്കല്‍ (ആലപ്പുഴ), ബിന്ദു പ്രതാപ് (പാലക്കാട്), അഹം അശ്വതി (എറണാകുളം), വി.വി. ശ്രീല (ഇരിങ്ങാലക്കുട), ഗീത എസ്. പടിയത്ത് (തൃശൂര്‍), രജിത അജിത് (തൃശൂര്‍) എന്നിവര്‍ക്കാണ് ജൂറി പുരസ്‌കാരങ്ങള്‍. കോഴിക്കോട് മെഡിക്കല്‍ കോളജിലെ നഴ്‌സ് സ്റ്റാഫ് കൂട്ടായ്മയുടെ തണല്‍ വഴികള്‍ എന്ന കവിതാ സമാഹാരത്തിന് പ്രത്യേക പുരസ്‌കാരം നല്‍കുന്നു. നവംബര്‍ രണ്ടിന് കാറളത്തെ വീട്ടിലെ ലൈബ്രറിയില്‍ അവാര്‍ഡ് സമര്‍പ്പണം നടത്തും.

ലിസ്യു കോണ്‍വന്‍റ്് സ്‌കൂളില്‍ കഥാക്കൂട്ടം ശില്പശാല

ഇരിങ്ങാലക്കുട: കാട്ടുങ്ങച്ചിറ ലിസ്യു കോണ്‍വന്‍റ് സ്‌കൂളില്‍ കഥാക്കൂട്ടം ശില്പശാല സമാപന സമ്മേളനം നഗരസഭ വൈസ് ചെയര്‍മാന്‍ ബൈജു കുറ്റിക്കാടന്‍ ഉദ്ഘാടനം ചെയ്തു. പിടിഎ വൈസ് പ്രസിഡന്‍റ്് നീതു ചടങ്ങില്‍ അധ്യക്ഷത വഹിച്ചു. ഹെഡ്മിസ്ട്രസ് സിസ്റ്റര്‍ ജീസ് റോസ്, മുനിസിപ്പല്‍ വാര്‍ഡ് കൗണ്‍സിലര്‍ ബിജു പോള്‍ അക്കാരക്കാരന്‍, പിടിഎ പ്രസിഡന്‍റ്് സുനീഷ് ആന്‍റണി, ആലിസ് എന്നിവര്‍ സംസാരിച്ചു. സിനിമാ- ടെലിവിഷന്‍ രംഗത്തെ പ്രശസ്ത കോമഡി താരമായ സൂര്യകല മുഖ്യാതിഥിയായിരുന്നു.

ചാലക്കുടി ഉപജില്ലാ ശാസ്ത്രോത്സവം 14, 15 തീയതികളിൽ കൊരട്ടിയിൽ

കൊരട്ടി: വിദ്യാഭ്യാസ ഉപജില്ലാ കേരള സ്‌കൂൾ ശാസ്ത്രോത്സവം 14, 15 തീയതികളിൽ കൊരട്ടിയിൽ നടക്കും. 14ന് രാവിലെ 9.30ന് സനീഷ്കുമാർ ജോസഫ് എംഎൽഎ ഉദ്ഘാടനം നിർവഹിക്കും. ഗ്രാമപഞ്ചായത്ത് പ്രസിഡന്‍റ് പി.സി. ബിജു അധ്യക്ഷത വഹിക്കും. എംഎഎം എച്ച്എസ്എസ് കൊരട്ടി, എംഎഎം എച്ച്എസ് കൊരട്ടി, ചർച്ച് എൽപിഎസ് കൊരട്ടി, ജ്യോതി ഇംഗ്ലീഷ് മീഡിയം സ്‌കൂൾ, കോനൂർ, സെന്‍റ്് ജോസഫ് ചർച്ച് പാരീഷ് ഹാൾ, കോനൂർ, കൊരട്ടി പഞ്ചായത്ത് കമ്മ്യൂണിറ്റി ഹാൾ എന്നിവിടങ്ങളിലാണ് വേദി. ചാലക്കുടി ഉപജില്ലയിലെ എൽപി മുതൽ ഹയർസെക്കൻഡറി വരെയുള്ള 90 വിദ്യാലയങ്ങളിലെ വിദ്യാർഥികൾ പങ്കെടുക്കും. പത്രസമ്മേളനത്തിൽ സംഘാടകസമിതി ചെയർമാൻ കൊരട്ടി പഞ്ചായത്ത് പ്രസിഡന്‍റ് പി.സി. ബിജു, ചാലക്കുടി എഇഒ പി.ബി. നിഷ, സി. മേരി വർക്കി, ജനറൽ കൺവീനർ രതീഷ് ആർ. മേനോൻ, എൻ. പാർവതി എന്നിവർ പങ്കെടുത്തു.

പുറമ്പോക്കുഭൂമിക്കു നഷ്ടപരിഹാരം നല്‍കാനാവില്ലെന്ന്

ഒല്ലൂര്‍: സെന്‍റർ വികസനത്തിനുവേണ്ടി ഭൂമി എറ്റെടുക്കുമ്പോള്‍ പുറമ്പോക്കുഭൂമിക്ക് നഷ്ടപരിഹാരം നല്‍കാനുള്ള നീക്കം അനുവദിക്കാനാവില്ലെന്ന് ആന്‍റി കറപ്ഷന്‍ പിപ്പിള്‍സ് മൂവ്‌മെന്‍റ് ജില്ലാ സെക്രട്ടറി ബാബു പുത്തനങ്ങാടി വാര്‍ത്താസമ്മേളനത്തില്‍ പറഞ്ഞു. 2014 ല്‍ എം.എസ്. ജയ ജില്ലാ കളക്ടര്‍ ആയിരിക്കുമ്പോള്‍ ഒല്ലൂര്‍ സെന്‍റര്‍ അളന്ന് പുറമ്പോക്ക് തിരിച്ചെടുക്കുന്നതിനുള്ള പ്രവര്‍ത്തനങ്ങളുമായി മുന്നോട്ടുപോകുമ്പോഴാണ് ഉദ്യോഗസ്ഥരെ സ്ഥലംമാറ്റി നടപടി തടസപ്പെടുത്തിയത്. പിന്നീട് 2024 ഡിസംബറില്‍ 19 ലെ ഹൈക്കോടതിവിധി പ്രകാരം ചീരാച്ചി മുതല്‍ തലോര്‍വരെയുള്ള കെെയേറ്റങ്ങള്‍ പൊളിക്കാന്‍ നിര്‍ദേശംനല്‍കി. എന്നാല്‍ ഉദ്യോഗസ്ഥര്‍ ഇതു നടപ്പിലാക്കുന്നതില്‍ വിമുഖത കാണിക്കുകയാണെന്ന് ബാബു ആരോപിച്ചു. ഈ സ്ഥിതി തുടരുകയാണെങ്കില്‍ വീണ്ടും കോടതിയെ സമീപിക്കാനാണ് ഉദ്ദേശ്യം. ജനങ്ങളുടെ നികുതിപ്പണം അര്‍ഹതയില്ലാത്തവര്‍ക്കു നല്‍കാനുള്ള നീക്കം അനുവദിക്കാനാകില്ലെന്നും ബാബു പുത്തനങ്ങാടി പറഞ്ഞു. വ്യാപാരികള്‍ക്ക് മതിയായ നഷ്ടപരിഹാരം നല്‍കാതെ ഒഴിപ്പിക്കാനുള്ള നിക്കമാണ് ഇപ്പോള്‍ നടക്കുന്നതെന്ന് വ്യാപാരി വ്യവസായി സമിതി ജില്ലാ വൈസ് പ്രസിഡന്‍റ് അജിത് ബാബു ആരോപിച്ചു. നഷ്ടപരിഹാരത്തുക പ്രഖ്യാപിക്കാതെ, മാന്യമായ നഷ്ടപരിഹാരം വാഗ്ദാനംചെയ്ത്, അവസാനത്തെ കുടിക്കാഴ്ചയില്‍ ഒരുലക്ഷം രൂപമാത്രം അനുവദിക്കുന്ന നടപടി അംഗീകരിക്കാന്‍ കഴിയില്ല. വ്യാപാരികളുടെ പുനരധിവാസം ഉള്‍പ്പെടെയുള്ള വിഷയത്തില്‍ മൗനംപാലിക്കുന്നതിനെതിരേ ശക്തമായ സമരപരിപാടികളുമായി വ്യാപാരി വ്യവസായി സമിതിയുടെ നേതൃത്വത്തില്‍ രംഗത്തുവരുമെന്നും അറിയിച്ചു.

എൻജിൻ തകരാർ: മുള്ളൂർക്കരയിൽ ട്രെയിൻഗതാഗതം തടസപ്പെട്ടു

വടക്കാഞ്ചേരി: എൻജിൻ തകരാർമൂലം മുള്ളൂർക്കരയിൽ രണ്ടരമണിക്കൂറോളം ട്രെയിൻ ഗതാഗതം തടസപ്പെട്ടു. ഇന്നലെ പുലർച്ചെയാണ് മുള്ളൂർക്കരയിലെത്തിയ മംഗള എക്സ്പ്രസിന്‍റെ എൻജിൻ തകരാറിലായത്. ട്രെയിൻ നിർത്തിയിട്ടതിനെത്തുടർന്ന് യാത്രക്കാർ ദുരിതത്തിലായി.ഷൊർണൂരിൽനിന്ന് മറ്റൊരു എൻജിൻ എത്തിച്ചു. തകരാറുസംഭവിച്ച എൻജിൻ വള്ളത്തോൾ നഗർ സ്റ്റേഷനിലേക്കുമാറ്റിയാണ് തകരാർ പരിഹരിച്ചത്. തുടർന്നാണ് തിരുവനന്തപുരം ഭാഗത്തേക്കുള്ള ട്രെയിനുകൾ ഓടിത്തുടങ്ങിയത്. ട്രാക്കിൽ ട്രെയിൻ കിടന്നതുമൂലം രണ്ട് ട്രെയിനുകൾ ഷൊർണൂരിൽ പിടിച്ചിടുകയുംചെയ്തു. ഇന്നലെ രാവിലെ 8.30 ഓടെയാണ് പൂർണമായും ട്രെയിൻ ഗതാഗതം പുനസ്ഥാപിച്ചത്.

ലോറിയിടിച്ച് റെയില്‍വേ ഗേറ്റ് വൈദ്യുതികമ്പിയിലേക്കു വീണു

പുതുക്കാട്: ഗ്യാസ് സിലിണ്ടര്‍ കയറ്റിവന്ന ലോറിയിടിച്ച് പുതുക്കാട് റെയില്‍വേ ഗേറ്റ് വൈദ്യുതി കമ്പിയില്‍വീണു. ഗേറ്റ് വൈദ്യുതി കമ്പിയില്‍ തടഞ്ഞുനിന്നു. ഹൈ വോള്‍ട്ടേജ് വൈദ്യുതി പ്രവഹിക്കുന്ന സമയമായതിനാല്‍ ലോറിയുടെ മുകളിലേക്ക് തീപ്പൊരി ചിതറിയെങ്കിലും ഗ്യാസ് സിലിണ്ടറുകളില്‍ തീ പടരാതിരുന്നത് വന്‍ അപകടം ഒഴിവാക്കി. ഇന്നലെ ഉച്ചയ്ക്ക് പന്ത്രണ്ടരയോടെയായിരുന്നു അപകടം. കൊച്ചിയില്‍നിന്ന് ഭാരത് പെട്രോളിയത്തിന്‍റെ ഗ്യാസ് സിലിണ്ടറുകളുമായി വന്ന ലോറിയാണ് റെയില്‍വേ ഗേറ്റില്‍ ഇടിച്ചത്. ഇടിയുടെ ആഘാതത്തില്‍ ഗേറ്റ് മുറിഞ്ഞ് വൈദ്യുതികമ്പിയിലേക്ക് വീഴുകയായിരുന്നു. കോഴിക്കോട് ഭാഗത്തേക്കുള്ള പരശുറാം എക്‌സ്പ്രസിന് പോകാന്‍ ഗേറ്റ് അടയ്ക്കുന്നതിനിടെ ലോറി കടന്നുപോകാന്‍ ശ്രമിച്ചതാണ് അപകടത്തിനിടയാക്കിയത്. ഗേറ്റില്‍ ഇടിച്ചതറിയാതെ ലോറി മുന്നോട്ടെടുത്തു. നാട്ടുകാര്‍ അറിയിച്ചതിനെതുടര്‍ന്നാണ് ലോറി പിന്നിലേക്കു മാറ്റിയത്. റെയില്‍വേ ജീവനക്കാരെത്തി വൈദ്യുതി കമ്പിയില്‍നിന്ന് ഗേറ്റ് മാറ്റി. ചാലക്കുടിയില്‍നിന്ന് റെയില്‍വേ എൻജിനീയര്‍ വിഭാഗം സ്ഥലത്തെത്തി വൈദ്യുതി കമ്പിയിലെ അറ്റകുറ്റപ്പണികള്‍ നടത്തി. അപകടത്തെത്തുടര്‍ന്ന് ഇരുഭാഗത്തേക്കുമുള്ള ട്രെയിന്‍ ഗതാഗതം ഒരുമണിക്കൂറോളം തടസപ്പെട്ടു. രണ്ടരയോടെ ഗതാഗതം പുനഃസ്ഥാപിച്ചു. ഗേറ്റ് തകര്‍ന്നതോടെ പുതുക്കാട്, ഇരിങ്ങാലക്കുട, ഊരകം റോഡിലും ഗതാഗതം തടസപ്പെട്ടു.

ഗുരുവായൂരില്‍ ആറുപേര്‍ക്ക് തെരുവുനായയുടെ കടിയേറ്റു

ഗുരുവായൂര്‍: നഗരസഭയുടെ മാവിന്‍ചുവട് മേഖലയില്‍ ആറുപേര്‍ക്ക് തെരുവുനായയുടെ കടിയേറ്റു. വെള്ളിയാഴ്ച വൈകീട്ടാണ് സംഭവം. പുല്ലുപറിക്കുകയായിരുന്ന ഇല്ലിക്കോട്ട് വാഹിദ(53)യുടെ ചെവിയുടെ ഒരു ഭാഗം നായ കടിച്ചെടുത്തു. ബൈക്കില്‍ പോവുകയായിരുന്ന സഹദ് അബൂബക്കറിനെ(25) നായ പിന്തുടര്‍ന്ന് കടിച്ചു. സോന ജോണ്‍സന്‍(21), പാല്‍വില്‍പനക്കാരന്‍ ഹരിദാസ് (55), പുലിക്കോട്ടില്‍ റെജി ആന്‍റോ (37), കറുപ്പംവീട്ടില്‍ അഷ്‌റഫ് (53) എന്നിവര്‍ക്കും നായയുടെ കടിയേറ്റു. തെരുവുനായയുടെ കടിയേറ്റവര്‍ക്ക് ചികിത്സാച്ചെലവടക്കം സാമ്പത്തികസഹായം നഗരസഭ നല്‍കണമെന്ന് നഗരസഭ പ്രതിപക്ഷനേതാവ് കെ.പി. ഉദയന്‍ ആവശ്യപ്പെട്ടു.

ഒരുമനയൂർ തിരുനാൾ ഇന്നും നാളെയും

ചാവക്കാട്: ഒരുമനയൂർ ലിറ്റിൽ ഫ്ലവർ ദേവാലയത്തിലെ വിശുദ്ധ കൊച്ചുത്രേസ്യയുടെയും വിശുദ്ധ സെബസ്ത്യാനോസിന്‍റെയും തിരുനാൾ ഇന്നും നാളെയുമായി ആഘോഷിക്കും. ഇതിന്‍റെ ഭാഗമായിട്ടുള്ള ദീപക്കാഴ്ചയുടെ സ്വിച്ച്ഓൺ ഇന്നലെ രാത്രി എസ്ഐ എ.യു. മനോജ് നിർവഹിച്ചു. തിരുക്കർമങ്ങൾക്ക് ചിറ്റാട്ടുകര വികാരി ഫാ. ജയിംസ് വടക്കൂട്ട് കാർമികനായി. ഇന്ന് വൈകിട്ട് ആറിന് ജപമാല, ലദീഞ്ഞ്, വിശുദ്ധ കുർബാന, നൊവേന, വള, അമ്പ് എഴുന്നള്ളിപ്പ്, വേസ്പര, പ്രസുദേന്തി വാഴ്ച, രൂപം എഴുന്നള്ളിപ്പ്. വാടാനപ്പള്ളി വികാരി ഫാ. ഏബിൾ ചിറമൽ മുഖ്യകാർമികനാകും. ാളെ രാവിലെ ആറിന് ജപമാല വിശുദ്ധ കുർബാന. 10ന് ആഘോഷമായ തിരുനാൾ പാട്ടുകുർബാന. ചേറൂർ ക്രൈസ്റ്റ് വില്ല ഡയറക്ടർ ഫാ. സാജൻ വടക്കൻ മുഖ്യ കാർമികനാകും. ഫാ ജസ്റ്റിൻ പൂഴിക്കുന്നേൽ സന്ദേശംനൽകും. തുടർന്ന് പ്രദക്ഷിണം. രാത്രി ഒമ്പതുമുതൽ എഴുന്നള്ളിപ്പ്, 10ന് വർണമഴ. വികാരി ഫാ. ജോവി കണ്ടുകുളങ്ങര, ട്രസ്റ്റിമാരായ ഇ.എഫ്. ജോസഫ്, റോസി ജോൺസൺ, സാജി ടോണി, ജനറൽ കൺവീനർ ഇ.പി. കുരിയാക്കോസ്, കൺവീനർമാരായ ഷെലിനോവ് അബ്രാഹം, ഇ.കെ. ജോസ്, കെ.ജെ. ചാക്കോ, ജോഷി ഫ്രാൻസിസ് തുടങ്ങിയവർ നേതൃത്വംനൽകും.

അമലയിൽ ദേശീയ സന്നദ്ധ രക്തദാനദിനം ആചരിച്ചു

അമലനഗർ: അമല കോളജ് ഓഫ് അലൈഡ് ഹെൽത്ത് സയൻസസിലെ വിദ്യാർഥികളുടെയും സ്റ്റാഫ് അംഗങ്ങളുടെയും അമല ബ്ലഡ് സെന്‍ററിന്‍റെയും നേതൃത്വത്തിൽ ദേശീയ സന്നദ്ധ രക്തദാനദിനം ആചരിച്ചു. 105 പേർ രക്തം ദാനംചെയ്തു. രക്തദാനത്തിന്‍റെ മഹത്വത്തെക്കുറിച്ച് സിസ്റ്റർ ഡോ. ലീനസ് സന്ദേശം നൽകി. 135 തവണ രക്തം ദാനംചെയ്ത ടൈനി ഫ്രാൻസിസ് പടിക്കലയെ പൊന്നാടയണിയിച്ച് ആദരിച്ചു. ജോയിന്‍റ് ഡയറക്ടർമാരായ ഫാ. ആന്‍റണി പെരിഞ്ചേരി, ഫാ. ജെയ്സൺ മുണ്ടൻമാണി, ഫാ. ഷിബു പുത്തൻപുരയ്ക്കൽ, അമല അലൈഡ് ഹെൽത്ത് സയൻസസ് പ്രിൻസിപ്പൽ പ്രഫ. ഷീബ ഭാസ്കർ, ട്രാൻസ്ഫ്യൂഷൻ മെഡിസിൻ വിഭാഗം മേധാവി, ഡോ. വിനു വിപിൻ, ക്യാമ്പ് ഓർഗനൈസർ നൗഷാദ്, ഡിഎംഎൽടി വിദ്യാർഥിനി അനാമിക വിനോദ് എന്നിവർ പ്രസംഗിച്ചു. സന്നദ്ധരക്തദാന ക്യാമ്പുകൾ സംഘടിപ്പിച്ചവരെയും തുടർച്ചയായി രക്തം ദാനംചെയ്തവരെയും മെമന്‍റോ നൽകി ആദരിച്ചു. റാലിയും മൈമും ഫ്ലാഷ് മോബും നടത്തി. എഐ പോസ്റ്റർ, ട്രോൾ മത്സരങ്ങളിലെ വിജയികൾക്കു സമ്മാനങ്ങൾ നൽകി.

തകർന്നടിഞ്ഞ് വെളുത്തൂർ അടമ്പുംചാൽ റോഡ്: കാൽനടപോലും ദുഷ്‌കരം

അരിമ്പൂർ: കനത്തമഴയിൽ മുങ്ങിയ വെളുത്തൂർ വാരിയം കോൾപ്പാടശേഖരത്തിലെ അടമ്പുംചാൽ റോഡ് വെള്ളമിറങ്ങിയതോടെ ഉപയോഗശൂന്യം. റോഡിലൂടെ സഞ്ചരിക്കാൻ കഴിയാത്തവിധം കല്ലും മണ്ണും വന്നടിഞ്ഞതായി കർഷകർ പറഞ്ഞു. കൃഷിയിടത്തിലും മണ്ണുനിറഞ്ഞ് ദുരിതത്തിലായെന്നും കർഷകർ. ബണ്ട് റോഡിൽ ഇപ്പോൾ നടന്നുപോകാൻ പോലും ബുദ്ധിമുട്ടാണ്. കർഷകർക്ക് വാഹനസഞ്ചാരത്തിന് റോഡിലെ തടസം മുഴുവൻ നീക്കേണ്ടതുണ്ട്. വെള്ളമിറങ്ങിയിട്ടും കെഎൽഡിസി അധികൃതർ വേണ്ടത്ര ശ്രദ്ധ കൊടുക്കുന്നില്ല എന്നാണ് കർഷകരുടെ പരാതി. ഈ മാസം 28ന് കൃഷിയിറക്കേണ്ട പടവാണിത്. പാടശേഖര സമിതിയുടെ ആവശ്യപ്രകാരം വാരിയംകോളിലും വിളക്കുമാടം പടവിലും അശാസ്ത്രീയമായി ഇട ബണ്ട് റോഡ് ഉയർത്തിപ്പണിതതിനെതിരേ ഒരു വിഭാഗം കർഷകർ പ്രതിഷേധിച്ചിരുന്നു. 650 മീറ്റർ നീളമുള്ള അടമ്പുംചാൽ ബണ്ട് റോഡ് 1.7 മീറ്ററാണ് ഉയർത്തി നിർമിച്ചത്. ഇതുമൂലം മഴക്കാലത്ത് പാടശേഖരത്ത് എത്തുന്ന വെള്ളം ബണ്ടിന്‍റെ ഉയരക്കൂടുതൽ മൂലം കടന്നുപോവാനാകാതെ ബുദ്ധിമുട്ടിലായിരുന്നു. സമീപത്തുള്ള വാരിയംകോൾപ്പടവിലും അവസ്ഥ സമാനമായിരുന്നു. പാടശേഖരസമിതിയുടെ ആവശ്യപ്രകാരമാണ് കെഎൽഡിസി ഇത്തരത്തിൽ ബണ്ട് നിർമിച്ചത് എന്നായിരുന്നു ആക്ഷേപം. ബണ്ടിന്‍റെ നിർമാണത്തിലെ അഴിമതി ചൂണ്ടിക്കാട്ടി കെഎൽഡിസി ക്കെതിരേ വിജിലൻസിൽ പരാതിയും നിലവിലുണ്ട്. അടമ്പുംചാൽ ബണ്ടിനോടുചേർന്നുള്ള കൃഷിയിടത്തിൽ അഞ്ചും ആറും മീറ്റർ ഉയരത്തിൽ മണ്ണ് വന്നടിഞ്ഞുകിടക്കുകയാണെന്ന് കർഷകർ പറഞ്ഞു.

ശബരിമലക്ഷേത്ര സ്വർണമോഷണം: കോൺഗ്രസ്, ബിജെപി പ്രതിഷേധം

ഉപ്പുതിന്നവർ വെള്ളംകുടിക്കും: അഡ്വ. ജോസഫ് ടാജറ്റ് തൃശൂർ: ശബരിമല ക്ഷേത്രത്തിലെ സ്വർണപ്പാളിമോഷണത്തിൽ ഉപ്പുതിന്നവർ വെള്ളം കുടിക്കുമെന്നു ഡിസിസി പ്രസിഡന്‍റ് അഡ്വ. ജോസഫ് ടാജറ്റ്. പിണറായിസർക്കാർ ശബരിമലവിശ്വാസികളോടു കൊടുംക്രൂരതയാണു കാട്ടിയത്. ക്ഷേത്രസ്വത്തുക്കൾ കൊള്ളയടിച്ചവർ ശിക്ഷക്കപ്പെടുന്നതുവരെ നീതിക്കുവേണ്ടി വിശ്വാസിസമൂഹത്തോടൊപ്പം കോണ്‍ഗ്രസ് ഉണ്ടാകും. ദേവസ്വം മന്ത്രി രാജിവയ്ക്കണമെന്നും ബോർഡ് പിരിച്ചുവിടണമെന്നും ആവശ്യപ്പെട്ടു കെപിസിസിയുടെ ആഹ്വാനപ്രകാരം മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തിൽ തൃശൂരിൽ നടത്തിയ പന്തംകൊളുത്തിപ്രകടനത്തിന്‍റെ ജില്ലാതല ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. ബ്ലോക്ക് പ്രസിഡന്‍റ് ഫ്രാൻസിസ് ചാലിശേരി, നേതാക്കളായ സുനിൽ അന്തിക്കാട്, രാജേന്ദ്രൻ അരങ്ങത്ത്, ജോണ്‍ ഡാനിയൽ, എ. പ്രസാദ്, കെ.ബി. ശശികുമാർ, ഐ.പി പോൾ, രാജൻ പല്ലൻ, രവി താണിക്കൽ, കെ.എച്ച്. ഉസ്മാൻ ഖാൻ, എം.എസ്. ശിവരാമകൃഷ്ണൻ, കെ. ഗിരീഷ് കുമാർ, കെ.പി. രാധാകൃഷ്ണൻ, ജേക്കബ് പുലിക്കോട്ടിൽ, അഡ്വ. ആശിഷ് മൂത്തേടത്ത്, ജോർജ് ചാണ്ടി, കെ. ഗോപാലകൃഷ്ണൻ, സുനിത വിനു, സിന്ധു ആന്‍റോ ചാക്കോള, മേഴ്സി അജി, ബിന്ദു കുമാരൻ, ഹാപ്പി മത്തായി എന്നിവർ നേതൃത്വം നൽകി. ബിജെപി മാർച്ചിൽ സംഘർഷം തൃശൂർ: ശബരിമല സ്വർണപ്പാളിമോഷണത്തിൽ പ്രതിഷേധിച്ചു ബിജെപി നടത്തിയ പ്രതിഷേധമാർച്ചിൽ സംഘർഷം. പ്രവർത്തകർക്കെതിരേ പോലീസ് ജലപീരങ്കി പ്രയോഗിച്ചു.

പടിഞ്ഞാറേകോട്ടയിൽനിന്നു ജാഥയായി എത്തിയ പ്രവർത്തകർ ബാരിക്കേഡ് മറികടക്കാൻ ശ്രമിച്ചെങ്കിലും പോലീസ് തടഞ്ഞു. ബിജെപി മുൻ സംസ്ഥാന അധ്യക്ഷൻ സി.കെ. പദ്മനാഭൻ മാർച്ച് ഉദ്ഘാടനം ചെയ്തു. അയ്യപ്പന്‍റെ സ്വർണം തിരിച്ചുകിട്ടുംവരെ ബിജെപി സമരപാതയിൽ തുടരുമെന്ന് അദ്ദേഹം പറ ഞ്ഞു. കേരളം നന്പർ വണ്‍ ആണെന്നു മുഖ്യമന്ത്രി നാഴികയ്ക്കു നാല്പതുവട്ടം ആവർത്തിക്കുന്നുണ്ട്. ഇപ്പോൾ ക്ഷേത്രശ്രീകോവിലിലെ സ്വർണം അടിച്ചുമാറ്റുന്നതിലും കേരളം നന്പർ വണ്‍ ആയിരിക്കുകയാണെന്ന് പദ്മനാഭൻ പറഞ്ഞു. നോർത്ത് ജില്ലാ പ്രസിഡന്‍റ് അഡ്വ. നിവേദിത സുബ്രഹ്മണ്യം, സിറ്റി ജില്ലാ പ്രസിഡന്‍റ് ജസ്റ്റിൻ ജേക്കബ്, മേഖലാ പ്രസിഡന്‍റ് എ. നാഗേഷ്, വൈസ് പ്രസിഡന്‍റ് ബിജോയ് തോമസ്, ജനറൽ സെക്രട്ടറി അഡ്വ. രവികുമാർ ഉപ്പത്ത്, ജില്ലാ ജനറൽ സെക്രട്ടറിമാരായ പി.കെ. ബാബു, കെ.പി. ഉണ്ണികൃഷ്ണൻ, സംസ്ഥാന സമിതി അംഗങ്ങളായ എം.എസ്. സന്പൂർണ എന്നിവർ നേതൃത്വം നൽകി.

പരുന്തുപാറയില്‍ കാട്ടാനക്കൂട്ടം വ്യാപകമായി കൃഷി നശിപ്പിച്ചു

ഇഞ്ചക്കുണ്ട്: പരുന്തുപാറ ജനവാസ മേഖലയില്‍ കാട്ടാനക്കൂട്ടം ഇറങ്ങി വ്യാപകമായി കൃഷി നശിപ്പിച്ചു. കഴിഞ്ഞ രാത്രിയിലാണ് സംഭവം. നാല് ആനകളാണു പറമ്പുകളില്‍ എത്തിയത്. കൊട്ടിശേരി സണ്ണിയുടെ പറമ്പിലെ 200 ഓളം വാഴകളും വിളവെടുക്കാറായ 500 ഓളം മുളകുതൈകളും റബര്‍ മരങ്ങളും ആനകള്‍ നശിപ്പിച്ചു. ആയിരക്കണക്കിനു രൂപയുടെ നഷ്ടമാണ് കര്‍ഷകനു സംഭവിച്ചത്. മന്ത്രിക്കുത്ത് ഹനീഫ, എടത്തിനാല്‍ മാണി, കൈതിക്കല്‍ തോമസ്, നീണ്ടുതലിക്കല്‍ ജസ്റ്റിൻ എന്നിവരുടെ പറമ്പുകളിലും ആനകള്‍ ഇറങ്ങി കൃഷിനശിപ്പിച്ചു. പറമ്പുകളുടെ വേലിയും ആനകള്‍ തകര്‍ത്ത നിലയിലാണ്. ആനകള്‍ കൃഷി നശിപ്പിക്കുന്നതുകണ്ട കര്‍ഷകര്‍ വിവരമറിയിച്ചതിനെ തുടര്‍ന്ന് വനപാലകരെത്തിയാണ് ഇവയെ കാടുകയറ്റിയത്. ഏറ്റവും കൂടുതല്‍ കൃഷിനാശം സംഭവിച്ച സണ്ണിയുടെ പറമ്പില്‍ നാലാം തവണയാണ് ആനകള്‍ എത്തുന്നത്. മുന്പ് കൃഷി നശിപ്പിച്ചതിന്‍റെ നഷ്ടപരിഹാരം ഇതുവരെ ലഭിച്ചില്ലെന്നും കര്‍ഷകന്‍ പറയുന്നു. വാഴകൃഷി വിളവെടുപ്പിന് പാകമാകുന്ന സമയത്താണ് ആനകളെത്തി നശിപ്പിക്കുന്നത്. നാലുവര്‍ഷത്തിനിടെ ലക്ഷങ്ങളുടെ നഷ്ടമാണ് കര്‍ഷകര്‍ക്കു സംഭവിച്ചത്. പ്രദേശത്തുള്ളവരുടെ ഉപജീവനമായ കൃഷി ആനകളിറങ്ങി തുടര്‍ച്ചയായി നശിപ്പിച്ചിട്ടും അര്‍ഹമായ നഷ്ടപരിഹാരം നല്‍കാന്‍ വനംവകുപ്പ് തയാറാകുന്നില്ലെന്നാണ് കര്‍ഷകരുടെ ആക്ഷേപം. ആനശല്യത്താല്‍ പൊറുതിമുട്ടിയ നാട്ടുകാര്‍ കൃഷി ഉപേക്ഷിക്കാനുള്ള ഒരുക്കത്തിലാണ്. കാര്‍ഷിക മേഖലയായ ഈ പ്രദേശത്തേക്ക് കാട്ടാനകള്‍ എത്താതിരിക്കാന്‍ വനംവകുപ്പ് ഇടപെടണമെന്നും കൃഷിനാശം സംഭവിച്ചവര്‍ക്ക് നഷ്ടപരിഹാരം നല്‍കണമെന്നുമാണ് കര്‍ഷകരുടെ ആവശ്യം.

സ്തനാർബുദത്തിനെതിരേ കാൻവാക്ക് സംഘടിപ്പിച്ചു

തൃശൂർ: ഗൈനക്കോളജി വിദഗ്ധരുടെ നേതൃത്വത്തിൽ സ്തനാർബുദത്തിനെതിരായ ബോധവത് കരണ പരിപാടിയുടെ ഭാഗമായി കാൻവാക്ക് എന്ന പേരിൽ വാക്കത്തോണ്‍ സംഘടിപ്പിച്ചു. ഗൈനക് ഡോക്ടർമാരുടെ സംഘടനയായ തൃശൂർ ഒബ്സ്റ്റട്രിക്സ് ആൻഡ് ഗൈനക്കോളജി സൊസൈറ്റിയും കേരള ഫെഡറേഷൻ ഓഫ് ഒബ്സ്റ്റട്രിക്സ് ആൻഡ് ഗൈനക്കോളജിയും ചേർന്നാണു കാൻവാക്ക് സംഘടിപ്പിച്ചത്. വടക്കേ സ്റ്റാൻഡിനു സമീപത്തെ പള്ളിത്താമം ഗ്രൗണ്ടിൽ വാക്കത്തോണിന്‍റെ ഫ്ളാഗ് ഓഫ് ജില്ലാ മെഡിക്കൽ ഓഫിസർ ഡോ. ടിപി. ശ്രീദേവി നിർവഹിച്ചു. ഗൈനക്കോളജി വിദഗ്ധരും നഴ്സിംഗ് കോളജ് വിദ്യാർഥികളുമടക്കം 1000 പേർ മൂന്നു കിലോമീറ്റർ വാക്കത്തണിൽ പങ്കെടുത്തു. റീജണൽ തിയറ്ററിൽ നടന്ന സമാപനസമ്മേളനം തൃശൂർ ഒബ്സ്റ്റട്രിക്സ് ആൻഡ് ഗൈനക്കോളജി സൊസൈറ്റി പ്രസിഡന്‍റ് ഡോ. ബിന്ദു മേനോൻ ഉദ്ഘാടനം ചെയ്തു. അവതാരക ലക്ഷ്മി നക്ഷത്ര, ഗായിക ഇന്ദുലേഖ വാര്യർ, തൃശൂർ ഒബ്സ്റ്റട്രിക്സ് ആൻഡ് ഗൈനക്കോളജി സൊസൈറ്റി ഉപദേശകൻ ഡോ.വി.പി. പൈലി, സെക്രട്ടറി ഡോ. സി.ആർ. രശ്മി, കാൻവാക്ക് ജനറൽ കണ്‍വീനർ ഡോ. എം. വേണുഗോപാൽ, ഡോ. എം. ദീപ്തി എന്നിവർ പ്രസംഗിച്ചു.

ഒപി ബഹിഷ്കരിക്കാതെ പ്രതിഷേധവുമായി ഡോക്ടർമാർ

തൃശൂർ: താമരശേരിയിൽ ഡോക്ടർക്കുനേരേയുണ്ടായ ആക്രമണത്തിൽ പ്രതിഷേധിച്ച് കോർപറേഷൻ ജനറൽ ആശുപത്രിയിൽ ഡോക്ടർമാർ സമരം നടത്തി. ഒപി ബഹിഷ്കരിക്കാതെയാണ് എണ്‍പതോളം ഡോക്ടർമാർ സമരത്തിന്‍റെ ഭാഗമായത്. ആരെയും ബുദ്ധിമുട്ടിക്കാൻ ആഗ്രഹിക്കുന്നില്ലെന്നും വർധിച്ചുവരുന്ന ആക്രമണങ്ങളിൽ പ്രതിരോധം തീർക്കാൻ മാത്രമാണ് പ്രതിഷേധമെന്നും ഡോക്ടർമാർ പറഞ്ഞു. കെജിഎംഒഎയുടെയും ഐഎംഎയുടെയും സംയുക്താഭിമുഖ്യത്തിൽ ആശുപത്രി അങ്കണത്തിൽ നടന്ന പ്രതിഷേധം ഡോ.പി. ഗോപകുമാർ ഉദ്ഘാടനം ചെയ്തു. ഐഎംഎ ജില്ലാ പ്രസിഡന്‍റ് ഡോ. ജോസഫ് ജോർജ്, ഡോ.എം.ആർ. മനോജ്, ഡോ. ജിൽഷോ ജോർജ്, ഡോ. ദിവ്യ, ഡോ. ബേബി തോമസ് എന്നിവർ പ്രസംഗിച്ചു.

ചിറയോരം ടൂറിസത്തിന് മാറ്റുകൂട്ടാന്‍ ബോട്ടിംഗും

മുരിയാട്: ഇരിങ്ങാലക്കുട മണ്ഡലത്തിലെ പ്രഥമ ടൂറിസം ഡെസ്റ്റിനേഷന്‍ ആയ മുരിയാട് പഞ്ചായത്തിലെ പുല്ലൂര്‍ ചിറയോരം ടൂറിസത്തിന്‍റെ മൂന്നാം‌ഘട്ട പ്രവര്‍ത്തനത്തിന് ആരംഭം കുറിക്കുന്നു. 2026 മാര്‍ച്ചില്‍ പൂര്‍ത്തീകരിക്കാന്‍ ഉദ്ദേശിക്കുന്ന മൂന്നാംഘട്ടത്തില്‍ കുട്ടികളുടെ പാര്‍ക്കും ബോട്ടിംഗുമാണ് ഉണ്ടാകുക. ബോട്ടിംഗ് ആരംഭിക്കുന്നതിന്‍റെ പ്രാഥമിക‌ഘട്ടം എന്ന നിലയ്ക്ക് തൃശൂര്‍ ജില്ലാ കളക്ടര്‍ അര്‍ജുന്‍ പാണ്ഡ്യന്‍റെ നിര്‍ദേശാനുസരണം ജില്ലാ ടൂറിസം പ്രമോഷന്‍ കൗണ്‍സിലിന്‍റെ ഇടപെടലില്‍ പൂമല ഡാമില്‍നിന്നും രണ്ടു ബോട്ടുകള്‍ പുല്ലൂര്‍ പൊതുമ്പുചിറയില്‍ എത്തിച്ചു. ഏറ്റവും വെള്ളം കുറഞ്ഞ അവസ്ഥയില്‍ പരീക്ഷണാടിസ്ഥാനത്തില്‍ ബോട്ടിംഗ് നടത്തുകയും പരീക്ഷണ പരിശോധനകള്‍ വിജയകരമായി പൂര്‍ത്തീകരിച്ചതിന്‍റെ അടിസ്ഥാനത്തില്‍ ബോട്ടിംഗ് ആരംഭിക്കുന്നതിനുള്ള സാധ്യത തെളിഞ്ഞു. രണ്ടു മാസത്തിനുള്ളില്‍ ബോട്ടിംഗ് ആരംഭിക്കാന്‍ കഴിയുമെന്നും ഇരിങ്ങാലക്കുട എംഎല്‍എയും ഉന്നത വിദ്യാഭ്യാസ മന്ത്രിയുമായ ഡോ. ആര്‍. ബിന്ദുവിന്‍റെ പ്രാദേശിക വികസന ഫണ്ട് ഉപയോഗിച്ച് ചില്‍ഡ്രന്‍സ് പാര്‍ക്കിന്‍റെ നിര്‍മാണം ഉടന്‍ ആരംഭിക്കുമെന്നും മുരിയാട് പഞ്ചായത്ത് പ്രസിഡന്‍റ് ജോസ് ജെ. ചിറ്റിലപ്പിള്ളി അറിയിച്ചു. ട്രയല്‍ റണ്ണിന് പഞ്ചായത്ത് പ്രസിഡന്‍റിനും പൂമല ഡാമിലെ ബോട്ട് ഓപ്പറേറ്റേഴ്സിനുമൊപ്പം ആരോഗ്യ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ.യു. വിജയന്‍, പഞ്ചായത്തംഗം സേവ്യര്‍ ആളൂക്കാരന്‍, സെക്രട്ടറി എം. ശാലിനി, അസി. എന്‍ജിനീയര്‍ സിമി സെബാസ്റ്റ്യന്‍ പാടശേഖരസമിതി ഭാരവാഹി ചാര്‍ളി, ഓവര്‍സിയര്‍ ഗ്രീഷ്മ എന്നിവരും പങ്കെടുത്തു.

ചാലക്കുടി നഗരസഭ ശ്മശാനഭൂമിയിൽ വയോജനങ്ങൾക്കു ക്ഷേമകേന്ദ്രം

ചാലക്കുടി: പതിറ്റാണ്ടുകളുടെ പഴക്കമുള്ളതും ഇപ്പോൾ കാര്യമായി ഉപയോഗമില്ലാതെ കിടക്കുന്നതുമായ നഗരസഭയുടെ ആര്യങ്കാല പൊതുശ്മശാന ഭൂമിയിൽ വയോജനങ്ങൾക്കായി ക്ഷേമമന്ദിരം ഒരുങ്ങുന്നു. നഗരസഭയി ലെ വാർഡ്‌ 31‌ ലെ ആര്യങ്കാല പൊതുശ്മശാനത്തിന്‍റെ ഭൂമിയിൽ ഒരു ഭാഗത്താണ് വയോജനങ്ങൾക്കായി പകൽവീട് നിർമിക്കുന്നത്. ചാലക്കുടി പഞ്ചായത്ത് ആയിരുന്ന കാലം മുതൽ മൃതദേഹങ്ങൾ സംസ്കരിക്കുന്നതിന് പൊതു ശ്മശാനമായി ഉപയോഗിച്ചിരുന്നതാണ് ഈ സ്ഥലം. നഗരസഭയിൽ ഗ്യാസ് ക്രിമറ്റോറിയം വന്നതോടുകൂടി ആര്യങ്കാലയിൽ മൃതദേഹ സംസ്കാരം വളരെ കുറഞ്ഞിരുന്നു. മാത്രമല്ല, വളരെ അപൂർവമായ ഉണ്ടാകുന്ന ചില അനാഥ മൃതദേഹങ്ങൾ മാത്രമാണ് ഇപ്പോൾ ഇവിടെ സംസ്കരിക്കുന്നത്. ഈ സാഹചര്യത്തിലാണ് വിസ് തൃതമായിട്ടുള്ള ശ്മശാനത്തിന്‍റെ സ്ഥലത്തിൽനിന്നും ഒരു ഭാഗം തിരിച്ചെടുത്ത് ഇവിടെ വയോജനങ്ങൾക്ക് അവരുടെ മാനസിക ഉല്ലാസങ്ങൾക്കും മറ്റും ഒത്തു ചേരുന്നതിനുള്ള ഒരു പകൽവീട് നിർമിക്കണമെന്ന് ആശയം ഉണ്ടായത്. ഇവിടുത്തെ വാർഡ് സഭയുടെയും കൗൺസിലർ ജോജി കാട്ടാളന്‍റെയും ഇതുസംബന്ധിച്ച നിർദേശം നഗരസഭ കൗൺസിൽ ചർച്ച ചെയ്യുകയും കൗൺസിൽ പദ്ധതിക്ക് അംഗീകാരം നൽകുകയും ചെയ്തു. പൊതുശ്മശാനത്തിൽനിന്നും കുറച്ചുഭൂമി റവന്യൂവകുപ്പിനെക്കൊണ്ട് അളന്നുതിരിച്ച് ഇവിടെ പകൽവീട് നിർമിക്കുന്നതിന് 15 ലക്ഷം രൂപ അനുവദിക്കുകയും നിർമാണം ഇപ്പോൾ പൂർത്തിയായി വരികയുമാണ്. പകൽവീടിനുള്ള സ്ഥലം പ്രത്യേകം മതിൽകെട്ടി തിരച്ച് മറ്റൊരു റോഡിൽ നിന്നും ഇവിടേക്ക് പ്രവേശനസൗകര്യവും ഒരുക്കിയിട്ടുണ്ട്. വാർഡ് സഭകൾ ചേരുന്നതിനും കുടുംബശ്രീ ഉൾപ്പെടെയുള്ള മീറ്റിംഗുകൾ നടത്തുന്നതിനും സാധ്യമാകുന്ന രീതിയിലാണ് പകൽ വീടിന്‍റെ നിർമാണം പുരോഗമിക്കുന്നത്. നഗരസഭ ചെയർപേഴ്സൺ ഷിബു വാലപ്പൻ, വാർഡ് കൗൺസിലർ ജോജി കാട്ടാളൻ, കൗൺ സിലർ വത്സൻ ചമ്പക്കര, മുനിസിപ്പൽ എൻജിനീയർ ശിവപ്രസാദ് എന്നിവർ നിർമാണ പ്രവർത്തനങ്ങൾ വിലയിരുത്താൻ സ്ഥ ലത്തെത്തി. നിർമാണം അടിയന്തരമായി പൂർത്തിയാക്കി, പകൽവീട് വയോജനങ്ങൾക്ക് എത്രയും വേഗം തുറന്നു കൊടുക്കുമെന്ന് ചെയർപേഴ്സണും വാർഡ് കൗൺ സിലറും അറിയിച്ചു.

ജൈവ വൈവിധ്യ പുരസ്‌കാരം ക്രൈസ്റ്റ് കോളജ് ഏറ്റുവാങ്ങി

ഇരിങ്ങാലക്കുട: സംസ്ഥാന സര്‍ക്കാരിന്‍റെ ജൈവ വൈവിധ്യ പുരസ്‌കാരം ഇരിങ്ങാലക്കുട ക്രൈസ്റ്റ് കോളജ് ഏറ്റുവാങ്ങി. കേരള നിയമസഭ ഹാളില്‍ സംഘടിപ്പിച്ച ചടങ്ങില്‍ നിയമസഭാ സ്പീക്കര്‍ എ.എന്‍. ഷംസീറില്‍നിന്ന് കോളജിനുവേണ്ടി മാനേജര്‍ ഫാ. ജോയ് പീണിക്കപ്പറമ്പില്‍, പ്രിന്‍സിപ്പല്‍ റവ. ഡോ. ജോളി ആന്‍ഡ്രൂസ്, അധ്യാപകനായ ഡോ. സുബിന്‍ കെ. ജോസ് എന്നിവര്‍ ചേര്‍ന്നാണ് അവാര്‍ഡ് ഏറ്റുവാങ്ങിയത്. വനം മന്ത്രി എ.കെ. ശശീന്ദ്രന്‍ സന്നിഹിതനായിരുന്നു. ജൈവവൈവിധ്യ സംരക്ഷണ രംഗത്തു നടത്തിവരുന്ന പ്രവര്‍ത്തനങ്ങളുടെയും വിജയകരമായ പരീക്ഷണങ്ങളുടെയും അടിസ്ഥാ നത്തിലാണ് ക്രൈസ്റ്റ് കലാലയം അവാര്‍ഡിന് അര്‍ഹമായത്. പരിസ്ഥിതിസംരക്ഷണം, ജൈവ വൈവിധ്യ സംരക്ഷണമേഖലയില്‍ സൃഷ്ടിച്ച പുതുമ, ശാസ്ത്രീയ മാര്‍ഗങ്ങളിലൂന്നിയ പ്രകൃതിസംരക്ഷണം എന്നിവയ്ക്കുള്ള അംഗീകാരമാണ് ക്രൈസ്റ്റ് കോളജിന് ലഭിച്ച അവാര്‍ഡ്. വൈവിധ്യമാര്‍ന്ന സസ്യജാലങ്ങള്‍ തണല്‍വിരിക്കുന്ന കാമ്പസ് പൂര്‍ണമായും പരിസ്ഥിതി സൗഹാര്‍ദമാണ്. സീറോ വേസ്റ്റ് കാമ്പസ്, കാര്‍ബണ്‍ ന്യൂട്രല്‍ കാമ്പസ്, അഗ്രോ ഇന്നവേഷന്‍ പാര്‍ക്ക് എന്നിവ ക്രൈസ്റ്റിന്‍റെ വ്യതിരിക്തതകളാണ്. ക്രൈസ്റ്റ് കോളജില്‍ കുട്ടികളുടെയും അധ്യാപകരുടെയും മേല്‍നോട്ടത്തില്‍ നടത്തിവരുന്ന ഹരിതാഭമായ അഗ്രോ ഇന്നോവേഷന്‍ പാര്‍ക്കില്‍ ആധുനികതയും പഴമയും ഇഴചേര്‍ന്നുള്ള ജൈവവൈവിധ്യ സംരക്ഷണ പ്രവര്‍ത്തനങ്ങളാണു നടത്തുന്നത്.

സഹൃദയ കോളജില്‍ ലോക തപാല്‍ദിനാചരണം

കൊടകര: സഹൃദയ കോളജ് ഓഫ് അഡ്വാന്‍സ്ഡ് സ്റ്റഡീസിലെ എന്‍എസ്എസ് യൂണിറ്റും ഐക്യു എസിയും സംയുക്തമായി ലോകതപാല്‍ ദിനാചരണം സംഘടിപ്പിച്ചു. കോളജ് എക്‌സിക്യൂട്ടീവ് ഡയറക്ടര്‍ റവ.ഡോ. ഡേവിസ് ചെങ്ങിനിയാടന്‍ ഓസ്‌ട്രേലിയയിലെ സിഡ്‌നിയില്‍നിന്ന് വിദ്യാര്‍ഥികള്‍ക്ക് അയച്ച കത്തുവായിച്ചുകൊണ്ട് പ്രിന്‍സിപ്പല്‍ ഡോ. കെ.എല്‍. ജോയ് ഉദ്ഘാടനം ചെ യ്തു. 20 വര്‍ഷമായി സേവനമനുഷ്ഠിക്കുന്ന പോസ്റ്റ് വുമണ്‍ വിധു രാഘവനെ കോളജ് വൈസ് പ്രിന്‍സിപ്പല്‍ ഡോ. കെ. കരുണ ആദരിച്ചു. കോളജ് ഫിനാന്‍സ് ഓഫീസര്‍ ഫാ. സിബിന്‍ വാഴപ്പിള്ളി, എന്‍എസ്എസ് പ്രോഗ്രാം ഓഫീസര്‍ കെ. ജയകുമാര്‍, ഇരിങ്ങാലക്കുട സബ് ഡിവിഷന്‍ പോസ്റ്റല്‍ അസിസ്റ്റന്‍റ് സൂപ്രണ്ട് എം. സുനില്‍, ജിബിന്‍ ജോര്‍ജ് എന്നിവര്‍ പ്രസംഗിച്ചു. സ്റ്റാമ്പ് പ്രദര്‍ശനം, വിദ്യാര്‍ഥികള്‍ക്കായി കത്തെഴുതല്‍ മത്സരം എന്നിവയും ഉണ്ടായി.

അവകാശസംരക്ഷണ യാത്ര: സ്വാഗതസംഘം ഉദ്ഘാടനം

ഇരിങ്ങാലക്കുട: കത്തോലിക്കാ കോണ്‍ഗ്രസ് ഗ്ലോബല്‍ സമിതിയുടെ സംസ്ഥാന പ്രസിഡന്‍റ് പ്രഫ. രാജീവ് കൊച്ചുപറമ്പിലിന്‍റെ നേതൃത്വത്തില്‍ "നീതി ഔദാര്യമല്ല, അവകാശമാണ്'എന്ന മുദ്രവാക്യം ഉയര്‍ത്തി നടത്തുന്ന അവകാശസംരക്ഷണ യാത്രയ്ക്ക് 18‌ന് രാവിലെ ഒമ്പതിന് ആല്‍ത്തറയ്ക്കല്‍ സ്വീകരണം നല്‍കും. അവകാശസംരക്ഷണ യാത്രയുടെ സ്വീകരണത്തിന്‍റെ സ്വാഗതസംഘം രൂപീകരണ യോഗം കത്തീഡ്രല്‍ വികാരി റവ. ഡോ. ലാസര്‍ കുറ്റിക്കാടന്‍ ഉദ്ഘാടനം ചെയ്തു. രൂപത ചെയര്‍മാന്‍ ഡേവിസ് ഊക്കന്‍ അധ്യക്ഷത വഹിച്ചു. സമ്മേളനത്തില്‍ എകെസിസി രൂപത ഡയറക്ടര്‍ ഫാ. ലിജു മഞ്ഞപ്രക്കാരന്‍, രൂപത ജനറല്‍ സെക്രട്ടറി ഡേവിസ് തുളുവത്ത്, ട്രഷറര്‍ ആന്‍റണി എല്‍. തൊമ്മാന, ഗ്ലോബല്‍ സെക്രട്ടറി പത്രോസ് വടക്കുംഞ്ചേരി, ജനറല്‍ കണ്‍വീനര്‍ ടെല്‍സണ്‍ കോട്ടോളി, ജോയിന്‍റ് കണ്‍വീനര്‍മാരായ ജോ സഫ് തെക്കൂടന്‍, സാബു കൂനന്‍, വില്‍സണ്‍ മേച്ചേരി, കത്തീഡ്രല്‍ ട്രസ്റ്റിമാരായ പി.ടി. ജോര്‍ജ്, തോമസ് തൊകലത്ത് എന്നിവര്‍ പ്രസംഗിച്ചു.

എല്‍ഡിഎഫ് പ്രതിഷേധമാര്‍ച്ചും ധര്‍ണയും നടത്തി

ഇരിങ്ങാലക്കുട: നഗരസഭ യുഡിഎഫ് ദുര്‍ഭരണത്തിനും വികസനമുരടിപ്പിനുമെതിരെ എല്‍ഡിഎഫ് പ്രതിഷേധ മാര്‍ച്ചും നഗരസഭ കാര്യാലയത്തിനു മുന്നില്‍ ധര്‍ണയും നടത്തി. സിപിഎം ജില്ലാ സെക്രട്ടറി കെ.വി. അബ്ദുള്‍ ഖാദര്‍ ധര്‍ണ ഉദ്ഘാടനം ചെയ്തു. സിപിഐ മണ്ഡലം സെ്ര്രകറി എന്‍.കെ. ഉദയപ്രകാശ് അധ്യക്ഷത വഹിച്ചു. സിപിഐ സംസ്ഥാന കൗണ്‍സില്‍ അഗം ടി.കെ. സുധീഷ്, സിപിഎം ഏരിയാ സെക്രട്ടറി വി.എ. മനോജ്കുമാര്‍, കേരള കോണ്‍ഗ്രസ് - എം മണ്ഡലം പ്രസിഡന്‍റ്് ടി.കെ. വര്‍ഗീസ്, ജെഡിയു മണ്ഡലം പ്രസിഡന്‍റ്് രാജു പാലത്തിങ്കല്‍, ആര്‍ജെഡി മണ്ഡലം പ്രസിഡന്‍റ് എ.ടി. വര്‍ഗീസ്, എന്‍സിപി മണ്ഡലം പ്രസിഡന്‍റ് ഗിരീഷ് മണപ്പെട്ടി, ഐഎന്‍എല്‍ മണ്ഡലം പ്രസിഡന്‍റ് റഷീദ് കാട്ടൂര്‍, നഗരസഭ പ്രതിപക്ഷ നേതാവ് അഡ്വ. കെ.ആര്‍. വിജയ എന്നിവര്‍ പ്രസംഗിച്ചു. ഉല്ലാസ് കളക്കാട്ട് സ്വാഗതവും ഡോ. കെ.പി. ജോര്‍ജ് നന്ദിയും പറഞ്ഞു.

കൊരട്ടി മുത്തിയുടെ തിരുനാൾ: റോസറി വില്ലേജ് ഡേ ആഘോഷിച്ചു

കൊരട്ടി: മരിയൻ തീർഥാടന കേന്ദ്രമായ കൊരട്ടി സെന്‍റ് മേരീസ് ഫൊറോന പള്ളിയിൽ അത്ഭുതപ്രവർത്തകയായ കൊരട്ടി മുത്തിയുടെ തിരുനാളിനോടനുബന്ധിച്ച് റോസറി വില്ലേജ് ഡേ ആഘോഷിച്ചു. ദേവാലയത്തിലെ മുഖ്യ ആകർഷണമായ കൊന്ത ഗ്രാമത്തിൽ ഇന്നലെ വൈകീട്ട് നടന്ന ആഘോഷമായ വിശുദ്ധ കുർബാനയ്ക്ക് ഫാ. ഡിന്‍റോ മാണിക്കത്താൻ കാർമിനായി. തുടർന്ന് നടന്ന ജപമാല പ്രദക്ഷിണത്തിൽ നൂറുകണക്കിന് വിശ്വാസികൾ പങ്കെടുത്തു. പള്ളിയോടു ചേർന്ന് കിടക്കുന്ന ഒരേക്കർ ഭൂമിയിൽ കൊന്തയിലെ 20 രഹസ്യങ്ങളുടെ കലാരൂപങ്ങളും 60 ലോകഭാഷയിൽ നന്മ നിറഞ്ഞ മറിയമെ എന്ന പ്രാർഥനയും മനോഹരമായ പിയാത്തെയും പൂന്തോട്ടവും സുന്ദരമായ കവാടവും പത്മാസന രൂപനായ ഈശോയും യഹൂദ പാരമ്പര്യത്തിലെ മിനാറെയും കൊന്ത ഗ്രാമത്തിലെ മുഖ്യ ആകർഷണമാണ്. മാതൃഭക്തിയുടെ നിറവിൽ ജപമാലയുമായി മാതാവിന്‍റെ മാധ്യസ്ഥവും അനുഗ്രഹവുംതേടി പതിനായിരങ്ങൾ തിരുനാൾ ദിനങ്ങളിൽ നാടിന്‍റെ വിവിധയിടങ്ങളിൽനിന്നും ഇവിടെയെത്തും. ഇന്നു വൈകീട്ട് അഞ്ചിന് ഇടവക ജനങ്ങളുടെ പൂവൻകുല സമർപ്പണം നടക്കും. രാവിലെ 5.30 നും ഏഴിനും വൈകീട്ട് അഞ്ചിനും വിശുദ്ധ കുർബാന ഉണ്ടായിരിക്കും. നാളെയും മറ്റന്നാളുമാണു തിരുനാൾ.

മതിലകത്ത് മിന്നൽപരിശോധന; പഴകിയ സാധനങ്ങൾ പിടിച്ചെടുത്തു

കൂളിമുട്ടം: മതിലകത്തു നടന്ന മിന്നൽ പരിശോധനയിൽ പഴകിയ സാധനങ്ങൾ പിടിച്ചെടുത്ത് നശിപ്പിച്ചു. മതിലകം ഗ്രാമപഞ്ചായത്ത് എന്‍ഫോഴ്സ്മെന്‍റ് സ്ക്വാഡിന്‍റെ ആഭിമുഖ്യത്തിലാണു പഞ്ചായത്ത് പരിധിയിലെ 20 സ്ഥാപനങ്ങളില്‍ പരിശോധന നടത്തിയത്. പഴകിയ ഭക്ഷണസാധനങ്ങള്‍ പിടിച്ചെടുത്ത് നശിപ്പിക്കുകയും സ്ഥാപനപരിസരത്ത് മലിനജലം ഒഴുക്കുകയും ചെയ്‌തതിനെതിരെ 10,000 രൂപ പിഴചുമത്തി നോട്ടീസ് നൽകി. സ്ഥാപന പരിസരം വൃത്തിയായി സൂക്ഷിക്കാത്തതിനെതിരെ വിവിധ സ്ഥാപനങ്ങളിൽനിന്നും പിഴ ഈടാക്കി. പരിശോധനയ്ക്കു കൂളിമുട്ടം പ്രാഥമിക ആരോഗ്യകേന്ദ്രം ജൂനിയര്‍ ഹെല്‍ത്ത് ഇന്‍സ്പെക്ടര്‍ സുനില്‍ നേതൃത്വം നല്‍കി. അഭിജാത്, അഞ്ജലി, പ്രത്യുഷ എന്നിവര്‍ പങ്കെടുത്തു.

തെരുവുനായ്, കാട്ടുപന്നി, തേനീച്ച; വലഞ്ഞ് പൊതുജനങ്ങൾ

നാട്ടിൽ തെരുവുനായ്ശല്യം രൂക്ഷം തൃശൂർ: മാടക്കത്തറ പഞ്ചായത്തിൽ കുറ്റിക്കാട് പരിസരത്തു തെരുവുനായകളുടെ ശല്യം രൂക്ഷം. യാത്രക്കാർക്കും വാഹനങ്ങൾക്കും സ്കൂൾവിദ്യാർഥികൾക്കും നേരേ നായ്ക്കൾ രാപ്പകൽഭേദമെന്യേ പാഞ്ഞടുക്കുകയാണെന്നു നാട്ടുകാർ പറഞ്ഞു. കാർഷികസർവകലാശാല, സ്കൂളുകൾ എന്നിവിടങ്ങളിലേക്കു നിരവധിപ്പേരാണ് ഈവഴി യാത്രചെയ്യുന്നത്. മുത്തച്ഛനും പേരക്കുട്ടിക്കും തേനീച്ചക്കുത്തേറ്റു ചേലക്കര: സ്കൂളിൽനിന്നു മടങ്ങുന്നതിനിടെ മുത്തച്ഛനും പേരക്കുട്ടിക്കും തേനീച്ചയുടെ കുത്തേറ്റു. ചേലക്കര ചെട്ടിത്തെരുവ് റോഡിൽ വെങ്ങാനല്ലൂർ സ്വദേശി ലക്ഷ്മണനും പേരക്കുട്ടിക്കുമാണു കുത്തേറ്റത്. ഗുരുതരാവസ്ഥയിലായ ലക്ഷ്മണൻ തൃശൂർ മെഡിക്കൽ കോളജ് ആശുപത്രിയിൽ ചികിത്സയിലാണ്. സ്കൂളിൽനിന്നു പേരക്കുട്ടിയുമായി ബൈക്കിൽ വീട്ടിലേക്കു പോകുന്പോഴാണു സംഭവം. കുട്ടിയെ തേനീച്ച കുത്തിയതോടെ ലക്ഷ്മണ്‍ ബൈക്ക് നിർത്തി. കുട്ടിയോട് ഓടിരക്ഷപ്പെടാൻ ആവശ്യപ്പെട്ടു. ലക്ഷ്മണന്‍റെ മുഖത്തും തലയിലുമടക്കം മാരകമായി കുത്തേറ്റു. അവശനിലയിലായ ഇരുവരെയും മേപ്പാടം താലൂക്ക് ആശുപത്രിയിൽ പ്രവേശിപ്പിച്ചു. പിന്നീടു മെഡിക്കൽ കോളജ് ആശുപത്രിയിലേക്കു മാറ്റി. കപ്പകൃഷി നശിപ്പിച്ച് കാട്ടുപന്നികൾ വടക്കാഞ്ചേരി: കപ്പകൃഷി നശിപ്പിച്ച് കാട്ടുപന്നികൾ. കർഷകർ ദുരിതത്തിൽ. പാർളിക്കാട് ചേനോത്ത് വീട്ടിൽ ജോസിന്‍റെ കൃഷിയിടത്തിലെ കപ്പയാണ് കൂട്ടത്തോടെയെത്തിയ പന്നികൾ തകർത്തത്. കഴിഞ്ഞ ദിവസമാണ് വിളവെടുപ്പിനുപാകമായ കപ്പതോട്ടം പന്നികൾ കുത്തിമറിച്ച് ഭക്ഷണമാക്കിയത്. കുറാഞ്ചേരിക്കടുത്ത് കൃഷിയെ സ്നേഹിക്കുന്ന പ്രദേശവാസികളിലെ ചിലർ സൗജന്യമായി വിട്ടു നൽകിയ കൃഷിയിടത്തിലാണ് 2000 ത്തിലേറെ കൊള്ളിചെടികൾ നട്ടുവളർത്തിയത്. രാത്രി സമയങ്ങളിൽ പാട്ടകൊട്ടിയും പടക്കം പൊട്ടിച്ചും കാവലിരുന്നാലും കണ്ണു തെറ്റിയാൽ കാട്ടുപന്നികൾ ഒരു നിമിഷംനേരംകൊണ്ട് തകർത്തുകളയുന്നത് പതിവാണ്.

തലോരില്‍ തെരുവുനായ് ആക്രമണം; യുവതിക്കു പരിക്കേറ്റു

തലോര്‍: തെരുവുനായയുടെ ആക്രമണത്തില്‍ യുവതിക്ക് പരിക്കേറ്റു. കാലില്‍ കടിയേറ്റ യുവതി മുളങ്കുന്നത്തുകാവ് മെഡിക്കല്‍ കോളജ് ആശുപത്രിയില്‍ ചികിത്സ തേടി. കൊടകര മനക്കുളങ്ങര സ്വദേശി വെളിയങ്ങോട്ട് വീട്ടില്‍ രാജന്‍റെ ഭാര്യ സുഷയ്ക്കാണ് പരിക്കേറ്റത്. കഴിഞ്ഞദിവസം ഉച്ചതിരിഞ്ഞായിരുന്നു സംഭവം. തലോരിലുള്ള സ്വന്തം വീട്ടിലേക്ക് സംസ്ഥാന പാതയോരത്തുകൂടി നടന്നു വരുന്നതിനിടെ പുറകിലൂടെ വന്ന നായ ആക്രമിക്കുകയായിരുന്നു. കാലില്‍ കടിച്ചുവലിച്ച നായയെ കൈയ്യിലുണ്ടായിരുന്ന ബാഗ് കൊണ്ട് പ്രതിരോധിച്ചാണ് ഇവര്‍ രക്ഷപ്പെട്ടത്. നൂറുകണക്കിന് വിദ്യാര്‍ത്ഥികള്‍ പഠിക്കുന്ന ദീപ്തി സ്‌കൂളിന് സമീപത്താണ് തെരുവുനായ ആക്രമണം. ഈ ഭാഗത്തെ തെരുവുനായ ശല്യത്തിനെതിരെ മുന്‍പും പരാതിയുയര്‍ന്നിരുന്നു. കുട്ടികള്‍ സ്‌കൂള്‍വിട്ട് പോകുന്ന സമയത്ത് തെരുവുനായകള്‍ പാഞ്ഞടുക്കുന്നതും പതിവാണ്. അധികൃതര്‍ ഇടപെട്ട് തെരുവുനായ ശല്യത്തിന് പരിഹാരം കാണണമെന്ന് നാട്ടുകാര്‍ ആവശ്യപ്പെട്ടു.

വീട് കുത്തിത്തുറന്ന് മൂന്നുപവൻ കവർന്നു

കൊടുങ്ങല്ലൂർ: ടി.കെ.എസ്. പുരത്തു വീടിന്‍റെ അടുക്കളവാതിൽ കുത്തിത്തുറന്ന് മൂന്നു പവന്‍റെ ആഭരണവും പണവും കവർച്ചചെയ്തു. ടി.കെ.എസ്. പുരം മേത്തല സർവീസ് സഹകരണ ബാങ്കിനു കിഴക്കുഭാഗത്തു തിരുമുപ്പം റോഡിൽ കെഎസ്ഇബി അസി. എൻജിനീയർ ആലിങ്ങപ്പൊക്കം ആനന്ദന്‍റെ വീട്ടിലാണു കവർച്ച നടന്നത്. വീട്ടിൽ അമ്മ അംബുജാക്ഷിയും ഭാര്യ സ്മിതയുംമാത്രമേ ഉണ്ടായിരുന്നുള്ളൂ. ആനന്ദൻ കോഴിക്കോട്ടെ ജോലിസ്ഥലത്താണ്. ഇന്നലെ രാവിലെ അംബുജാക്ഷി മുറിയിൽ എത്തിയപ്പോഴാണ് അലമാര തുറന്നനിലയിലും സാധനങ്ങൾ സമീപത്തെ കട്ടിലിൽ വാരിവലിച്ചിട്ട നിലയിലും കണ്ടത്. പരിശോധനയിൽ കമ്മലും മാലയും ഉൾപ്പെടെ മൂന്നു പവൻ സ്വർണവും 300 രൂപയും നഷ്ടപ്പെട്ടതായി കണ്ടെത്തി. തുടർന്ന് വാർഡ് കൗണ്‍സിലർ മുഖേന കൊടുങ്ങല്ലൂർ പോലീസിൽ വിവരം അറിയിക്കുകയായിരുന്നു. പോലീസ് അന്വേഷണം ആരംഭിച്ചു.

പോലീസിന്‍റെ പരാക്രമം അഭിഭാഷകനോട്; കോടതി ഇടപെട്ടപ്പോൾമാത്രം വടിയെടുത്ത് കമ്മീഷണർ

തൃശൂർ: കേസിൽ പ്രതിയായ കക്ഷിയെ കാണാൻ പോലീസ് സ്റ്റേഷനിൽ ചെന്ന അഭിഭാഷകനോട് അപമര്യാദയായി പെരുമാറിയെന്ന പരാതിയിൽ അസിസ്റ്റന്‍റ് കമ്മീഷണർ നടപടിയെടുക്കാതിരുന്നതിനെ തുടർന്ന് കോടതി ഇടപെട്ടു. ഗത്യന്തരമില്ലാതെ വടിയെടുത്ത് പോലീസ് കമ്മീഷണർ. ആരോപണവിധേയനായ പോലീസ് ഉദ്യോഗസ്ഥനോട് അച്ചടക്കനടപടിയുടെ ഭാഗമായി വിശദീകരണം ആരാഞ്ഞ് പോലീസ് കമ്മീഷണർ താക്കീതുനൽകി. അഡ്വ. സഞ്ജു കെ. ശിവന്‍റെ പരാതിയിലാണു നടപടി. കഴിഞ്ഞ ജൂലൈ 18നു തൃശൂർ വെസ്റ്റ് സ്റ്റേഷനിലെ എസ്ഐ വി.ബി. അനുപിൽനിന്നും മറ്റു പോലീസുകാരിൽനിന്നുമാണ് അഭിഭാഷകനു ദുരനുഭവമുണ്ടായത്. ഒരു കേസിലെ പ്രതിയുടെ അമ്മ ആവശ്യപ്പെട്ടപ്പോഴാണ് അഡ്വ. സഞ്ജു കെ. ശിവൻ സ്റ്റേഷനിലെത്തിയത്. ഈ സമയം പ്രതിയുടെ അമ്മയെ പോലീസുകാർ സ്റ്റേഷനകത്തേക്കു വിളിച്ചു. കൂടെ അഭിഭാഷകനും കയറിയപ്പോൾ പോലീസ് ഉദ്യോഗസ്ഥൻ, നീ ആരാണെന്നു ശബ്ദമുയർത്തി ചോദിക്കുകയും ഇപ്പോൾ സംസാരിക്കാൻ കഴിയില്ലെന്ന് ആജ്ഞാപിച്ച് ഇറക്കിവിട്ട് ഗ്രിൽ അടയ്ക്കുകയുമായിരുന്നു. പ്രതിയെ കണ്ടു സംസാരിക്കണമെന്ന് ആവശ്യപ്പെട്ടപ്പോൾ, നിനക്ക് അതിനുള്ള സമ്മതം ഞങ്ങൾ തരണമെന്നും, തരില്ലെന്നും പറഞ്ഞു. പ്രതി രാജ്യസേവനത്തിനുപോ യ ആളല്ലെന്നും അതിനാൽ നീയൊക്കെ കോടതിയിൽ ഹാജരാക്കുന്ന സമയത്തു കണ്ടാൽ മതിയെന്നും ആക്രോശിച്ചു. ഈ സമയം സ്റ്റേഷനിൽ വേറെയും ആളുകളും ആഭിഭാഷകന്‍റെ കക്ഷിയായ പ്രതിയുടെ അമ്മയും ഉണ്ടാ യിരുന്നു. സ്റ്റേഷൻ ഹൗസ് ഓഫീസറെ കാണണമെന്നു പറഞ്ഞപ്പോൾ പുറത്തു കാത്തിരിക്കണമെന്നും സാർ സമ്മതിച്ചാൽ കാണാമെന്നും അറിയിച്ചു. അരമണിക്കൂറിനുശേഷം വീണ്ടും എസ്എച്ച്ഒയെ കാണാൻ സമ്മതിക്കുമോയെന്നു ചോദിച്ചു. വീണ്ടും കാത്തിരിക്കണമെന്നായിരുന്നു മറുപടി. സംഭവത്തെക്കുറിച്ച് അസിസ്റ്റന്‍റ് കമ്മീഷണർക്കു പരാതി നൽകിയപ്പോൾ, മോശം പെരുമാറ്റം ഉണ്ടായിട്ടില്ലെന്നായി മറുപടി. തുടർന്നാണ് അഭിഭാഷകൻ മുഖ്യമന്ത്രിക്കു പരാതിനൽകുകയും ഹൈക്കോടതിയിൽ റിട്ട് ഫയൽ ചെയ്യുകയും ചെയ്തത്.

അപകടത്തിൽ യുവാവ് മരിച്ച സംഭവം: ഓട്ടോ ഡ്രൈവർക്കെതിരേ കേസ്

പേരാമംഗലം: വാഹനമിടിച്ചു യുവാവ് മരിച്ച സംഭവത്തിൽ ഡ്രൈവർക്കെതിരേ കേസെടുത്തു. സ്കൂട്ടർയാത്രികനായ പെരുന്പിലാവ് സ്വദേശി അക്ഷയ് (19) മരിച്ച സംഭവത്തിൽ അപകടത്തിനിടയാക്കിയ ഓട്ടോറിക്ഷയുടെ ഉടമയും ഡ്രൈവറുമായ തലക്കോ ട്ടുകര സ്വദേശി സി.എൽ. ചേറുണ്ണിക്കെതിരേയാണു കേസെടുത്തത്. ഓട്ടോ കസ്റ്റഡിയിലെടുത്തു. കഴിഞ്ഞമാസം 22നു രാത്രി പത്തരയോടെ ഏഴാംകല്ലിലായിരുന്നു അപകടം. സിസിടിവി പരിശോധനയിലാണ് വാഹനം തിരിച്ചറിഞ്ഞത്.

“കൂർക്കഞ്ചേരി ക്ഷേത്രത്തിലെ തിരുവാഭരണം മോഷ്ടിച്ചതല്ല, നഷ്ടപ്പെട്ടത് ”

തൃശൂർ: കൂർക്കഞ്ചേരി ശ്രീമാഹേശ്വര ക്ഷേത്രത്തിലെ തിരുവാഭരണം കൊള്ളയടിക്കപ്പെട്ടെന്ന ക്ഷേത്ര സംരക്ഷണസമിതി പ്രസിഡന്‍റ് പ്രേംകുമാറിന്‍റെ വെളിപ്പെടുത്തലിനെതിരേ ക്ഷേത്രം ഭരണസമിതി. ആഭരണം നഷ്ടപ്പെട്ടതാണെന്നും അത്രയും സ്വർണം ഉത്തരവാദികളായവരിൽനിന്നു ക്ഷേത്രത്തിലേക്കു സമർപ്പിച്ചതായും സംഭവത്തിൽ പോലീസിൽ പരാതി നൽകിയിട്ടുണ്ടെന്നും ക്ഷേ ത്രം ഭരണസമിതി വ്യക്തമാക്കി. ക്ഷേത്രത്തിലെ മുൻപ്രസി‍ഡന്‍റ് കെ.വി. സദാനന്ദൻ തിരുവാഭരണം ഉരുക്കിയെന്നും സംഭവത്തിൽ വിശദമായ അന്വേഷണം വേണമെന്നുമാണ് പ്രേംകുമാർ പ്രമുഖ വാർത്താചാനലിലൂടെ ആവശ്യപ്പെട്ടത്. 2023ലെ പൂയമഹോത്സവത്തിനിടെയാണ് മാല നഷ്ടപ്പെട്ട കാര്യം അറിയുന്നത്. ക്ഷേത്രത്തിലെ മുരുകന്‍റെ വിഗ്രഹത്തിൽ ചാർത്തിയിരുന്ന 16 ഗ്രാമിന്‍റെ മാലയാണ് കാണാതായത്. ഇതു 2022 ജനുവരി 18 ലെ തൈപ്പൂയത്തിനു വിഗ്രഹത്തിൽ ചാർത്താൻ ക്ഷേത്രം മേൽശാന്തിയെ ഏൽപ്പിച്ചതായിരുന്നു. അക്കൊല്ലം ഉത്സവത്തിന് ആന ഇടഞ്ഞുണ്ടായ തിരക്കിനിടെ സ്വർണാഭരണം എണ്ണിത്തിട്ടപ്പെടുത്തി തിരിച്ചേൽപ്പിക്കാൻ ശാന്തിമാർക്കു സാധിച്ചില്ല. ‌ പിന്നീടുവന്ന ഭരണസമിതി 2023ൽ മാല നഷ്ടപ്പെട്ട വിവരം ശ്രദ്ധയിൽപെട്ടപ്പോൾ താംബൂലപ്രശ്‌നം വയ്ക്കുകയും എവിടെയോ മറഞ്ഞുകിടപ്പുണ്ടെന്നു പ്രശ്‌നവശാൽ കാണുകയും ചെയ്തു. ഇതിന്‍റെ അടിസ്ഥാനത്തിൽ 2023 സെപ്റ്റംബർ 18 നു ചേർന്ന കമ്മിറ്റിയോഗ തീരുമാനപ്രകാരം ഈസ്റ്റ് പോലീസിൽ പരാതി നൽകി. മാത്രമല്ല നഷ്ടപ്പെട്ട സ്വർണം ക്ഷേത്രത്തിലേക്ക് ഉത്തരവാദികളിൽനിന്നു മുതൽകൂട്ടിയതായും ക്ഷേത്രം ഭരണസമിതി പ്രസിഡന്‍റ് സദാനന്ദൻ വാഴപ്പുള്ളി, സെക്രട്ടറി മുകുന്ദൻ കുരുന്പേപ്പറന്പിൽ, ഉന്മേശ് പാറയിൽ, അനൂപ്കുമാർ പാന്പുകാട്ടിൽ, കെ.ആർ. മോഹനൻ കാട്ടുങ്ങൽ എന്നിവർ വ്യക്തമാക്കി. തിരുവാഭരണം കൊള്ളയടിക്കപ്പെട്ടെന്നു പ്രചാരണം നടത്തു ന്നവർക്കെതിരേ സിറ്റി പോലീസ് കമ്മീഷണർ, ഐജി, ജില്ലാ കളക്ടർ എന്നിവർക്കു പരാതി നൽകിയതായും ക്ഷേത്രം ഭരണസമിതി അറിയിച്ചു.

സയൻസ് മാഗസിൻ, ഉപന്യാസ മത്സരം: ഞായറാഴ്ച നടത്തുന്നതിൽ പ്രതിഷേധം

തൃശൂർ: ക്രൈസ്തവ വിശ്വാസപരിശീലന ക്ലാസുകളും അർധവാർഷികപരീക്ഷകളും നടക്കുന്ന ഞായറാഴ്ച തൃശൂർ റവന്യൂ ജില്ലാ സയൻസ് മാഗസിൻ, സിവി രാമൻ ഉപന്യാസമത്സരം എന്നിവ നടത്തുന്നതിൽ പ്രതിഷേധം. മിഷൻ ക്വാർട്ടേഴ്സ് സെന്‍റ് ജോസഫ് സ്കൂളിലാണു മത്സരങ്ങൾ. ജില്ലയിലെ 12 ഉപജില്ലകളിൽനിന്നു തെരഞ്ഞെടുക്കപ്പെട്ട വിദ്യാർഥികളാണു പങ്കെടുക്കേണ്ടത്. പ്രതിഷേധത്തെത്തുടർന്ന് എറണാകുളത്തു ഞാ യറാഴ്ച നടക്കേണ്ട മത്സരങ്ങൾ മാറ്റിയെന്നാണു വിവരം.

മുഖ്യമന്ത്രിയുടെ "എട്ടുമുക്കാൽ' പരാമർശം അപമാനകരം: സംസ്കാരസാഹിതി

തൃശൂർ: മുഖ്യമന്ത്രിയിൽനിന്ന് വ്യക്തികളുടെ ശരീരഘടനയെ അടിസ്ഥാനമാക്കി പരിഹാസരൂപേണയുള്ള "എട്ടുമുക്കാൽ' പരാമർശങ്ങൾ കേരളം ഇന്നേവരെ നേടിയെടുത്ത സാംസ് കാരികമൂല്യങ്ങൾക്ക് എതിരും അപമാനകരവുമാണെന്നും സംസ്കാരസാഹിതി. നിയമനിർമാണസഭയിലെ ഒരു അംഗത്തിനുനേരേ മുഖ്യമന്ത്രിയിൽനിന്നുണ്ടായ ദേഹനിന്ദാപരമായ വാക്കുകൾ അദ്ദേഹത്തിന്‍റെ ഉള്ളിലെ മൂല്യച്യുതിയും സങ്കുചിതചിന്താഗതിയുമാണ് പുറത്തുകൊണ്ടുവന്നിരിക്കുന്നത്. പ്രസ്താവന തിരുത്തി മുഖ്യമന്ത്രി പൊതുമാപ്പ് പറയണമെന്നും, ബോഡി ഷെയിമിംഗ്, ലിംഗപരമായ അവഹേളനം എന്നിവയ്ക്കെതിരേ സമഗ്രമായ ബോ ധവത്കരണപ്രവർത്തനങ്ങൾ ആരംഭിക്കാൻ സർക്കാർ മുൻകൈയെടുക്കണമെന്നും അതു മുഖ്യമന്ത്രിയിൽനിന്നുതന്നെ തുടങ്ങണമെന്നും സംസ്കാരസാഹിതി ജില്ലാ ചെയർമാൻ ഗിന്നസ് സത്താർ ആദൂർ, കൺവീനർ അനിൽ സമ്രാട്ട് എന്നിവർ ആവശ്യപ്പെട്ടു.

സെന്‍റ് മേരീസ് കോളജിൽ ദ്വിദിന സെമിനാർ

തൃശൂർ: സെന്‍റ് മേരീസ് ഓട്ടോണമസ് കോളജിലെ അപ്ലൈഡ് ബയോടെക്നോളജി വിഭാഗം കേരള ബയോഡൈവേഴ്സിറ്റി ബോർഡുമായി സഹകരിച്ചുനടത്തുന്ന ദ്വിദിന സെമിനാറിനു തുടക്കം. കാർഷികസർവകലാശാല കൊക്കോ റിസർച്ച് സെന്‍ററിലെ മുഖ്യശാസ്ത്രജ്ഞ ഡോ. ജെ.എസ്. മിനിമോൾ ഉദ്ഘാടനം ചെയ്തു. സെന്‍റ് മേരീസ് കോളജ് വൈസ് പ്രിൻസിപ്പൽ ഡോ. എ. ഡാലി ഡൊമിനിക്, മലയാളവിഭാഗം മേധാവി ഡോ. ജിഷ എലിസബത്ത്, അപ്ലൈഡ് ബയോളജി മേധാവി ഡോ. മഞ്ജുഷ റാണി, ഡോ. കീർത്തി വിജയൻ, ഡോ. പി. വെങ്കിടേഷ്, ഡോ. ദിവ്യ കെ. ലക്ഷ്മണൻ എന്നിവർ പ്രസംഗിച്ചു. കെ. വിശ്വാനന്ദപുലവരുടെ നേതൃത്വത്തിൽ തോൽപ്പാവക്കൂത്തും പ്രദർശിപ്പിച്ചു.

ഓട്ടോറിക്ഷ മതിലിലിടിച്ച് പരിക്കേറ്റു

എരുമപ്പെട്ടി: തിച്ചൂർ സെന്‍ററിനുസമീപം ഓട്ടോറിക്ഷയ്ക്കു മുന്നിലേക്ക് തെരുവുനായ ചാടി നിയന്ത്രണംവിട്ട ഓട്ടോറിക്ഷ മതിലിൽ ഇടിച്ച് രണ്ടുപേർക്കു പരിക്കേറ്റു. തിച്ചൂർ പൊന്നുവീട്ടിൽ രാഹുൽ(30), മഹാദേവൻ(17) എന്നിവർക്കാണ് പരിക്കേറ്റത്. പരിക്കേറ്റവരെ എരുമപ്പെട്ടി ആക്ട്സ് പ്രവർത്തകർ തൃശൂർ ജൂബിലി മിഷൻ ആശുപത്രിയിൽ പ്രവേശിപ്പിച്ചു. ബൈക്കിടിച്ച് രണ്ടുപേർക്കു പരിക്ക് നടത്തറ: നെല്ലിക്കുന്നിൽ റോഡ് ക്രോസ്ചെയ്യുന്നതിനിടെ ബൈക്കിടിച്ച് രണ്ടുപേർക്കു പരിക്കേറ്റു. ബൈക്ക് യാത്രികൻ പൂച്ചട്ടി സ്വദേശി പറങ്ങാശേരി ഷിജോ(37), കാൽനടയാത്രികൻ നെല്ലിക്കുന്ന് സ്വദേശി പുത്തൻവെളി വീട്ടിൽ ഗോപി(73) എന്നിവർക്കാണ് പരിക്കേറ്റത്. ഇരുവരെയും അശ്വിനി ആശുപത്രിയിൽ പ്രവേശിപ്പിച്ചു. കാറും സ്കൂട്ടറും കൂട്ടിയിടിച്ച് അപകടം കേച്ചേരി: തൃശൂർ - കുറ്റിപ്പുറം സംസ്ഥാനപാതയിൽ എരനെല്ലൂർ കപ്പേളയ്ക്കുസമീപം കാറും സ്കൂട്ടറും കൂട്ടിയിടിച്ച് ബൈക്ക് യാത്രികൻ അടാട്ട് സ്വദേശി തച്ചന്തറ വീട്ടിൽ സുഭാഷ് മകൻ വിഷ്ണു(28)വിനു പരിക്കേറ്റു. വിഷ്ണുവിനെ കേച്ചേരി ആക്ട്സ് പ്രവർത്തകർ അമല ആശുപത്രിയിൽ പ്രവേശിപ്പിച്ചു . ഇന്നലെ വൈകീട്ട് അഞ്ചുമണിയോടെയാണ് സംഭവം. ഇരുവാഹനങ്ങൾക്കും കേടുപാടുകൾ സംഭവിച്ചിട്ടുണ്ട്.

അന്തിക്കാട് ഗവ. എൽപി സ്‌കൂളിൽ ഓഡിറ്റോറിയം തുറന്നു

അന്തിക്കാട്: ഗവ. എൽപി സ്‌കൂളിൽ പുതുതായി നിർമാണം പൂർത്തീകരിച്ച ഓഡിറ്റോറിയത്തിന്‍റെ ഉദ്ഘാടനം സി.സി. മുകുന്ദൻ എംഎൽഎ നിർവഹിച്ചു. അന്തിക്കാട് പഞ്ചായത്ത് പ്രസിഡന്‍റ്് ജീന നന്ദൻ അധ്യക്ഷത വഹിച്ചു. പൂർവ വിദ്യാർഥിയും മുൻമന്ത്രിയുമായിരുന്ന കെ.പി. രാജേന്ദ്രന്‍റെ അടിയന്തര ഇടപെടലിൽ രാജ്യസഭാംഗമായിരുന്ന ബിനോയ് വിശ്വത്തിന്‍റെ എംപി ഫണ്ടിൽ നിന്ന് അനുവദിച്ച 75 ലക്ഷം രൂപ ഉപയോഗിച്ച് 2400 സ്ക്വയർ ഫീറ്റ് വിസ്തീർണത്തിലാണ് ഓഡിറ്റോറിയം നിർമിച്ചിട്ടുള്ളത്. ചടങ്ങിൽ അന്തിക്കാട് പ്രസ് ക്ലബ്ബിലെ മാധ്യമ പ്രവർത്തകരെ ആദരിച്ചു. ബ്ലോക്ക് പഞ്ചായത്ത് പ്രസിഡന്‍റ്് കെ.കെ. ശശിധരൻ, ജില്ലാ പഞ്ചായത്ത് അംഗം വി.എൻ. സുർജിത്ത്, അന്തിക്കാട് പഞ്ചായത്ത് വൈസ് പ്രസിഡന്‍റ്് പി.എസ്. സുജിത്ത്‌, ബ്ലോക്ക് പഞ്ചായത്തംഗം സി.കെ. കൃഷ്‌ണകുമാർ, ആരോഗ്യ വിദ്യാഭ്യാസ സ്റ്റാൻഡിംഗ് കമ്മറ്റി ചെയർപേഴ്സൺ ശരണ്യ രാജേഷ്, പ്രധാനാധ്യാപിക സി.വി. സീന, പിടിഎ പ്രസിഡന്‍റ് രാജീവ് സുകുമാരൻ, പിടിഎ വൈസ് പ്രസിഡന്‍റ്് എ.ബി. ബാബു, എംപിടിഎ പ്രസിഡന്‍റ്് ജൂലി ജോസഫ്, പൂർവ വിദ്യാർഥി സംഘടന പ്രസിഡൻന്‍റ്് കെ.വി. രാജേഷ്, സ്കൂൾ വികസന സമിതി കൺവീനർ എ.വി. ശ്രീവത്സൻ, വികസന സമിതി അംഗം എം.കെ. സതീശൻ, രാംകുമാർ കാട്ടാനി, ഷാഹുൽ അന്തിക്കാട് എന്നിവർ പങ്കെടുത്തു.

അമലയുടെ കാൻസർ സുരക്ഷിത പദ്ധതിക്കു തുടക്കം

തൃശൂർ: അമല മെഡിക്കൽ കോളജ് ഓങ്കോളജി വിഭാഗത്തിന്‍റെ നേതൃത്വത്തിൽ തൃശൂർ കോർപറേഷന്‍റെ സഹകരണത്തോടെ കാൻസർ കണ്ടെത്താനുള്ള സുരക്ഷിതപദ്ധതിക്കു തുടക്കം. അമലയുടെ പൂങ്കുന്നം ഡേ കെയർ സെന്‍ററിന്‍റെ ഒന്നാം വാർഷികത്തോടനുബന്ധിച്ചാണ് പദ്ധതിക്കു രൂപംനൽകിയത്. മേയർ എം.കെ. വർഗീസ് ഉദ്ഘാടനം ചെയ്തു. ഡെപ്യൂട്ടി മേയർ എം.എൽ. റോസി, കൗണ്‍സിൽ അംഗങ്ങൾ എന്നിവർ പങ്കെടുത്തു. തെരഞ്ഞെടുത്ത ഡിവിഷനുകളിൽ കാൻസർ സ്ക്രീനിംഗ് ക്യാന്പുകൾ നടത്തും. മാമോഗ്രാം, പാപ്സ്മിയർ, മറ്റു പരിശോധനകളും സൗജന്യമായി നടത്തും. ചടങ്ങിൽ ദേവമാതാ പ്രൊവിൻഷ്യൽ റവ.ഡോ. ജോസ് നന്തിക്കര, കല്യാണ്‍ ജ്വല്ലേഴ്സ് ഉടമ ടി.എസ്. കല്യാണരാമൻ, കല്യാണ്‍ വസ്ത്രാലയ ഉടമ ടി.എസ്. പട്ടാഭിരാമൻ, മണപ്പുറം ഫിനാൻസ് എക്സിക്യൂട്ടീവ് ജോർജ് ഡി. ദാസ്, എഫാത്ത സിഇഒ തോമസ് പൂണേലി, യു.ജെ. ജോയ്, അമല ഡയറക്ടർ ഫാ. ജൂലിയസ് അറയ്ക്കൽ, ഫാ. ഫ്രാൻസിസ് കുരിശേരി, ഡോ. അനിൽ ജോസ് താഴത്ത്, ഡോ. യു. ഉണ്ണികൃഷ്ണൻ, ബോർജിയോ ലൂയിസ് എന്നിവർ പ്രസംഗിച്ചു.

മിൽമ ഷോപ്പി ഉദ്ഘാടനം

വടക്കാഞ്ചേരി: തെക്കുംകര വീരോലിപ്പാടം ക്ഷീരോൽപാദകസഹകരണ സംഘത്തിന്‍റെ നേതൃത്വത്തിൽ മിൽമഷോപ്പി ആരംഭിച്ചു. മിൽമ എറണാകുളം മേഖലാ ചെയർമാൻ സി.എൻ. വത്സലൻ പിള്ള ഉദ്ഘാടനം ചെയ്തു. മേഖലാ ഡയറക്ടർ എൻ.ആർ. രാധാകൃഷ്ണൻ അധ്യക്ഷത വഹിച്ചു. തെക്കുംകര പഞ്ചായത്ത് മെമ്പർ ഷൈബി ജോൺസൻ, സംഘം പ്രസിഡന്‍റ്് പി.എ. ബോവാസ്, താര ഉണ്ണികൃഷ്ണൻ, വിൻസി, പ്രവീണ, ടി.വി. പൗലോസ്, സംഘം സെക്രട്ടറി നിഷ തുടങ്ങിയവർ പങ്കെടുത്തു.

ഫാർമേഴ്സ് സഹകരണ സംഘം മെറിറ്റ് ഡേ

തൃശൂർ: ജില്ലാ ഫാർമേഴ്സ് സഹകരണസംഘം മെറിറ്റ് ഡേ-2025 മുൻ നിയമസഭാ സ്പീക്കർ അഡ്വ. തേറന്പിൽ രാമകൃഷ്ണൻ ഉദ്ഘാടനം ചെയ്തു. എസ്എസ്എൽസി, പ്ലസ്ടു പരീക്ഷകളിൽ ഉന്നതവിജയം നേടിയവരെയും അഡ്വ. ഷാജി ജെ. കോടങ്കണ്ടത്ത്, വാദ്യകലാകാരൻ കുറ്റൂർ രാധാകൃഷ്ണൻ, അങ്കണവാടി അധ്യാപിക പുഷ്പലത രാമനാഥൻ, യുഎഇയിൽ നടന്ന ഏഷ്യൻ യോഗ ചാന്പ്യൻഷിപ്പിൽ ആർട്ടിസ്റ്റിക് യോഗ ഇനത്തിൽ ഒന്നാംസ്ഥാനം ലഭിച്ച സ്വാതികൃഷ്ണ, കലാകായികരംഗത്തു മികവുതെളിയിച്ചവരെയും ആദരിച്ചു. സംഘം പ്രസിഡന്‍റ് എ. പ്രസാദ്, കോർപറേഷൻ കൗണ്‍സിലർ കെ.രാമനാഥൻ, ഡയറക്ടർമാരായ എം. സുജിത് കുമാർ, രശ്മി ഗോപാലൻ, സതിദേവി രതീശൻ, കോണ്‍ഗ്രസ് അയ്യന്തോൾ മണ്ഡലം പ്രസിഡന്‍റ് കെ.സുരേഷ് എന്നിവർ പ്രസംഗിച്ചു.

കൊട്ടേക്കാട് പള്ളിയിൽ തിരുനാളിനു കൊടിയേറി

കൊട്ടേക്കാട്: മരിയൻ തീർഥാടനകേന്ദ്രമായ കൊട്ടേക്കാട് സെന്‍റ് മേരീസ് അസംപ്ഷൻ ഫൊറോന ദേവാലയത്തിലെ ഫാത്തിമനാഥയുടെ തിരുനാൾ കൊടിയേറ്റം തൃശൂർ അതിരൂപത സാന്ത്വനം ഡയറക്ടർ ഫാ. ജോജു ആളൂർ നിർവഹിച്ചു. വിശുദ്ധ കുർബാനയിലും ജപമാലപ്രദക്ഷിണത്തിലും ഫാ. ജോജു ആളൂർ, ഫൊറോന വികാരി ഫാ. ഫ്രാങ്കോ കവലക്കാട്ട്, ഫാ. മിഥുൻ ചുങ്കത്ത് എന്നിവർ കാർമികരായി. 18,19 തീയതികളിലാണു തിരുനാൾ. 18നു വൈകീട്ട് അഞ്ചിനു വിശുദ്ധ കുർബാന. തുടർന്ന് കൂടുതുറക്കലിനു ബിഷപ് മാർ ബോസ്കോ പുത്തൂർ മുഖ്യകാർമികനാകും. തിരുനാൾദിനമായ 19നു രാവിലെ പത്തിന് ആഘോഷമായ തിരുനാൾപാട്ടുകുർബാന. ഉച്ചകഴിഞ്ഞു 3.30നു കിരീടമെഴുന്നള്ളിപ്പ്. വൈകീട്ട് ആറിന് കിരീടം എഴുന്നള്ളിപ്പുകൾ ഫാത്തിമ ഗ്രൗണ്ടിലെത്തും. തുടർന്ന് പ്രസിദ്ധമായ കുടമാറ്റമത്സരം. തൃശൂർ അതിരൂപത വികാരി ജനറാൾ മോണ്‍. ജയ്സണ്‍ കൂനംപ്ലാക്കൽ തിരുനാൾസന്ദേശം നൽകും.

മുണ്ടൂർ മഠം കപ്പേളയിൽ 40 മണിക്കൂർ ആരാധനയ്ക്ക് ഇന്നു തുടക്കം

മുണ്ടൂർ: സെന്‍റ് ഫ്രാൻസീസ് അസീസി മഠം കപ്പേളയിൽ 40 മണിക്കൂർ ആരാധനയ്ക്കു ഇന്നു തുടക്കം.ഇന്നു രാവിലെ 6.15ന് മുണ്ടൂർ പള്ളി വികാരി ഫാ. ബാബു അപ്പാടന്‍റെ നേതൃത്വത്തിൽ നടക്കുന്ന ആഘോഷമായ ദിവ്യബലിയോടെ ആരാധനയ്ക്കു തുടക്കമാകും. രാത്രി ഏഴിന് അസി. വികാരി ഫാ. സാൽവിൻ കണ്ണനായ്ക്കൽ സമൂഹാരാധന, പരിശുദ്ധ കുർബാനയുടെ ആശീർവാദം എന്നിവയ്ക്കു നേതൃത്വം നൽകും. നാളെ രാവിലെ 6.15നു ദിവ്യബലി, ആരാധന എന്നിവയ്ക്കു ഫാ. സാൽവിൻ കണ്ണനായ്ക്കൽ നേതൃത്വം നൽകും. രാത്രി ഏഴിനു സമൂഹാരാധന, പരിശുദ്ധകുർബാനയുടെ ആശീർവാദം എന്നിവയ്ക്ക് എംഎസ്ടി സുപ്പീരിയർ ഫാ. ആന്‍റണി ചീരൻവേലിൽ നേതൃത്വം നൽകും. 12നു രാവിലെ ആറിനു ദിവ്യകാരുണ്യസന്നിധിയിൽ ആരാധന. രാവിലെ ഒമ്പതിന് ആഘോഷമായ ദിവ്യബലി, പ്രസംഗം - ഫാ. ഡേവിഡ് പേരാമംഗലം നേതൃത്വം നൽകും. വൈകീട്ട് നാലിന് ഫാ. വിന്നി അറങ്ങാശേരിയുടെ നേതൃത്വത്തിൽ സമൂഹ ആരാധന, ആശീർവാദം എന്നിവയോടെ 40 മണിക്കൂർ ആരാധനയ്ക്കു സമാപനമാകും.

കേരള കോണ്‍ഗ്രസ് ജന്മദിനം ആഘോഷിച്ചു

കൊടകര: കേരള കോണ്‍ഗ്രസ് - എം കൊടകര മണ്ഡലം കമ്മിറ്റിയുടെ നേതൃത്വത്തില്‍ പാര്‍ട്ടിയുടെ 61-ാം ജന്മദിനം ആഘോഷിച്ചു. സംസ്ഥാന കമ്മിറ്റി അംഗം കെ.ഒ. വര്‍ഗീസ് ജന്മദിനസമ്മേളനം ഉദ്ഘാടനം ചെയ്തു. മണ്ഡലം പ്രസിഡന്‍റ് ടി.സി. പോളി അധ്യക്ഷത വഹിച്ചു, ജെന്‍സണ്‍ ജോണ്‍സണ്‍, സി.എസ്. സുരേഷ്, എം.എസ്. ശ്രീകുമാര്‍, കെ. സുന്ദരന്‍ എന്നിവര്‍ പ്രസംഗിച്ചു. മലയോര ജനതയുടെ ജീവനും സ്വത്തിനും സംരക്ഷണം ഉറപ്പാക്കാന്‍ വന്യജീവി നിയമത്തില്‍ ഭേദഗതി വരുത്തി ബില്‍ പാസാക്കിയ സംസ്ഥാന സര്‍ക്കാരിനെ സമ്മേളനം അഭിനന്ദിച്ചു.

ഷേണ്‍സ്റ്റാട്ട് മാതാവിന്‍റെ കപ്പേളയുടെ രജതജൂബിലി ആഘോഷവും തിരുനാളും 18ന്

ഇരിങ്ങാലക്കുട: ഷേണ്‍സ്റ്റാട്ട് മാതാവിന്‍റെ കപ്പേളയുടെ രജതജൂബിലി ആഘോഷവും പരിശുദ്ധ അമ്മയുമായുള്ള സ്‌നേഹ ഉടമ്പടി നവീകരണവും 18 ന് നടത്തും. 15ന് വൈകീട്ട് 5.30 ന് കൊടിയേറ്റ്, ലദീഞ്ഞ്, പ്രസുദേന്തി വാഴ്ച, വിശുദ്ധ കുര്‍ബാന എന്നിവയ്ക്ക് ഇരിങ്ങാലക്കുട സെന്‍റ്് തോമസ് കത്തീഡ്രല്‍ വികാരി റവ. ഡോ. ലാസര്‍ കുറ്റിക്കാടന്‍ കാര്‍മികത്വം വഹിക്കും. 16 ന് വൈകീട്ട് 5.30 ന് ജപമാല, ലദീഞ്ഞ്, പ്രസുദേന്തി വാഴ്ച, വിശുദ്ധ കുര്‍ബാന എന്നിവയ്ക്ക് ആളൂര്‍ മേരിമാതാ ഷേണ്‍സ്റ്റാട്ട് ഭവന്‍ സ്പിരിച്വല്‍ ഡയറക്ടര്‍ ഫാ. സിന്‍റോ വടക്കുമ്പാടന്‍ ഐഎസ്എച്ച് കാര്‍മികനാകും. 17 ന് രാവിലെ ഏഴു മുതല്‍ വൈകീട്ട് അഞ്ചുവരെ അഖണ്ഡ ജപമാല ഉണ്ടായിരിക്കും. വൈകീട്ട് 5.30 ജപമാല, ലദീഞ്ഞ്, പ്രസുദേന്തി വാഴ്ച, വിശുദ്ധ കുര്‍ബാന എന്നിവയ്ക്ക് ഇരിങ്ങാലക്കുട രൂപത വികാരി ജനറാൾ മോണ്‍. വില്‍സന്‍ ഈരത്തറ കാര്‍മികത്വം വഹിക്കും. ആളൂര്‍ ബിഎല്‍എം ധ്യാനകേന്ദ്രം ഡയറക്ടര്‍ ഫാ. നിക്‌സന്‍ ചാക്കേര്യ സന്ദേശം നല്‍കും. തിരുനാള്‍ ദിനമായ 18 ന് വൈകീട്ട് അഞ്ചിന് ആഘോഷമായ തിരുനാള്‍ കുര്‍ബാനയ്ക്ക് ഇരിങ്ങാലക്കുട രൂപത ബിഷപ് മാര്‍ പോളി കണ്ണൂക്കാടന്‍ മുഖ്യകാര്‍മികത്വം വഹിക്കും. പ്രൊവി ഡന്‍സ് പ്രൊവിന്‍സ് സുപ്പീരിയര്‍ ഫാ. പോള്‍ പനങ്കുളം ഐഎസ്എച്ച്, എംടിഎ പ്രൊവിന്‍സ് സുപ്പീരിയര്‍ ഫാ. പുഷ്പരാജ് സഹകാര്‍മികരാകും.

മുത്തിക്കു പൂവൻകുലകളുമായി പോലീസ് സേനയും വ്യാപാരിസമൂഹവും ടാക്സി തൊഴിലാളികളും

കൊരട്ടി: മുത്തിയുടെ തിരുനടയിൽ പൂവൻകുലകളുമായി പോലീസ് സേനയെത്തി. തിരുനാളിന്‍റെ സുരക്ഷാ ക്രമീകരണങ്ങൾക്കായി വിന്യസിക്കും മുമ്പ് കാഴ്ചയായി പൂവൻകുലകൾ സമർപ്പിക്കുകയെന്ന കാലങ്ങളായി തുടർന്നു വരുന്ന ആചാരത്തിന് ഭംഗംവരാതെയാണ് സേന മുത്തിയുടെ സവിധത്തിലെത്തിയത്. ചാലക്കുടി ഡിവൈഎസ്പി പി.സി. ബിജുകുമാർ, സബ് ഇൻസ്പെക്ടർമാരായ ഒ.ജി.ഷാജു, എം.വി. ജോയ്, എം.ഡി. പോളി എന്നിവരുടെ നേതൃത്വം നൽകി. കൊടിയേറ്റ് ദിനത്തിൽ കൊരട്ടിമുത്തിക്ക് പൂവൻ കുലകളുമായിയെത്തുന്ന കൊരട്ടിയിലെ വ്യാപാരി സമൂഹം ആത്മീയനിറവോടെ പതിവുപോലെ ഈ വർഷവും മുത്തിയുടെ സന്നിധിയിലെത്തി. കൊരട്ടി ജംഗ്ഷനിൽ നിന്നും വാദ്യമേളങ്ങളുടെയും വർണാഭമായ കാവടിയാട്ടത്തിന്‍റെ അകമ്പടിയോടെയുമാണ് പള്ളിയിലെത്തിയത്. അസോസിയേഷൻ ജില്ലാ ട്രഷറർ ജോയ് മൂത്തേടൻ, യൂണിറ്റ് ഭാരവാഹികളായ ബെന്നി ജോസഫ്, പി.വി.ഫ്രാൻസീസ്, വി.പി. ജോർജ്, എം.ഡി. പോൾ, വർഗീസ് പൈനാടത്ത്, ടി.ഒ.ഡേവീസ് എന്നിവരുടെ നേതൃത്വത്തിലാണ് വ്യാപാരികൾ കുടുംബസമേതം കാഴ്ച സമർപ്പണത്തിനെത്തിയത്. കൊരട്ടിയിലെ ഓട്ടോ - ടാക്സി ഡ്രൈവേഴ്‌സ് യൂണിയനുകളും സംയുക്തമായി മുത്തിക്ക് നേർച്ച കുലകളുമായി എത്തിയിരുന്നു. ലയൺസ് ക്ലബ് ഇന്‍റർനാഷണൽ, വൈഎംസിഎ, ബിജെപി ന്യൂനപക്ഷ മോർച്ച തുടങ്ങിയ സംഘടനകളും കാഴ്ച സമർപ്പണത്തിനെത്തിയിരുന്നു. വികാരി ഫാ. ജോൺസൺ കക്കാട്ടും സഹവികാരിമാരും നേർന്ന് നേർച്ചക്കുലകൾ ഏറ്റുവാങ്ങി.

കാപ്പ: രണ്ട് ഗുണ്ടകള്‍ക്കെതിരേ നടപടി

ഇരിങ്ങാലക്കുട: കാപ്പ ഉത്തരവ് ലംഘിച്ച് തൃശൂര്‍ ജില്ലയില്‍ പ്രവേശിച്ച കുപ്രസിദ്ധ ഗുണ്ട പതിയാശേരി പുതിയവീട്ടില്‍ നബീല്‍ (24), ആളൂര്‍ സ്റ്റേഷനിലെ കുപ്രസിദ്ധ ഗുണ്ടയായ പതിയാരത്ത് പറമ്പില്‍ വീട്ടില്‍ സജി(28) എന്നിവര്‍ക്കെതിരെ തൃശൂര്‍ റൂറല്‍ പോലീസ് നടപടി സ്വീകരിച്ചു. നബീല്‍ മതിലകം പോലീസ് സ്റ്റേഷനില്‍ ഒരു വധശ്രമകേസും മൂന്ന് അടി പിടികേസും മനുഷ്യജീവന് അപകടം ഉണ്ടാക്കുന്ന വിധത്തില്‍ അശ്രദ്ധമായി വാഹനമോടിച്ചതിന് ഒരു കേസും അടക്കം 10 ക്രിമിനല്‍ കേസുകളിലെ പ്രതിയാണ്. 2025 ല്‍ കാപ്പ ഉത്തരവ് ലംഘിച്ചതിന് രണ്ട് തവണ ശിക്ഷ ലഭിച്ചയാളുമാണ്. ആന സജി കൊടകര, ആളൂര്,‍ വിയ്യൂര്‍ പോലീസ് സ്റ്റേഷനുകളിലായി ഒരു വധശ്രമകേസിലും അഞ്ച് അടിപിടികേസിലും ഒരു മയക്കുമരുന്ന് കേസിലും അടക്കം 12 ക്രിമിനല്‍ കേസുകളിലെ പ്രതിയാണ്. മതിലകം പോലീസ് സ്റ്റേഷന്‍ ഇന്‍സ്‌പെക്ടര്‍ എം കെ ഷാജി, ആളൂര്‍ പോലീസ് സ്റ്റേഷന്‍ ഇന്‍സ്‌പെക്ടര്‍ ബി ഷാജിമോന്‍ എന്നിവരുടെ നേതൃത്വത്തിലായിരുന്നു നടപടി.

വിശുദ്ധ എവുപ്രാസ്യയുടെ ജന്മദിനതിരുനാൾ കൊടിയേറി

കാട്ടൂര്‍: വിശുദ്ധ എവുപ്രാസ്യയുടെ 148 ാം ജന്മദിന തിരുനാളിന് കൊടിയേറി. ഇരിങ്ങാലക്കുട രൂപത വികാരി ജനറാള്‍ മോണ്‍. ജോസ് മാളിയേക്കല്‍ കൊടിയേറ്റു കര്‍മം നിര്‍വഹിച്ചു. തിരുനാള്‍ ദിനമായ 17 ന് വൈകീട്ട് അഞ്ചിന് നടക്കുന്ന ദിവ്യബലിക്ക് ബിഷപ് മാര്‍ പോളി കണ്ണൂക്കാടന്‍ മുഖ്യകാര്‍മികത്വം വഹിക്കും. ഇരിങ്ങാലക്കുട നിത്യാരാധന കേന്ദ്രം വൈസ് റെക്ടര്‍ ഫാ. സീമോന്‍ കാഞ്ഞിത്തറ, ഫാ. ജോര്‍ജി ചെറിയാന്‍ തേലപ്പിള്ളി എന്നിവര്‍ സഹകാര്‍മികരായിരിക്കും. തുടര്‍ന്ന് പ്രദക്ഷിണം ഉണ്ടായിരിക്കും. തിരുനാളിന്‍റെ വിജയത്തിനായി എടത്തിരുത്തി കര്‍മല മാതാ ഫൊറോന പള്ളി വികാരി ഫാ. ജോഷി പാല്യേക്കര, ഇരിങ്ങാലക്കുട ഉദയ പ്രോവിന്‍സ് പ്രൊവിന്‍ഷ്യല്‍ സുപ്പീരിയര്‍ സിസ്റ്റര്‍ ധന്യ സിഎംസി, കാട്ടൂര്‍ വിശുദ്ധ എവുപ്രാസ്യ സ്‌ക്വയര്‍ ഡയറക്ടര്‍ സിസ്റ്റര്‍ ഷീബ സിഎംസി, കാട്ടൂര്‍ എവുപ്രാസ്യ കോണ്‍വെന്‍റ് സുപ്പീരിയര്‍ സിസ്റ്റര്‍ നിര്‍മല സിഎംസി, ജനറല്‍ കണ്‍വീനര്‍ ലോനച്ചന്‍ ഉറുവത്ത് എന്നിവരുടെ നേതൃത്വത്തില്‍ വിപുലമായ കമ്മിറ്റിയാണ് രൂപീകരിച്ചിരിക്കുന്നത്.

സെന്‍റ് ജോസഫ്‌സില്‍ ബയോകോണ്‍ വിസ്റ്റ 2025 ദ്വിദിന അന്താരാഷ്ട്ര സെമിനാർ

ഇരിങ്ങാലക്കുട: സെന്‍റ് ജോസഫ്സ് കോളജിലെ ബയോളജി വിഭാഗം ബയോകോണ്‍ വിസ്റ്റ 2025 എന്ന പേരില്‍ സംഘടിപ്പിക്കുന്ന ദ്വിദിന അന്താരാഷ്ട്ര സെമിനാര്‍ ആരംഭിച്ചു. പോളണ്ടിലെ ഗ്ഡാന്‍സ്‌ക് യൂണിവേഴ്‌സിറ്റി ഓഫ് ടെക്‌നോളജിയില്‍ നിന്നുള്ള പ്രഫ. ജോസഫ് ഹപോനിയുക് ചടങ്ങ് ഉദ്ഘാടനം ചെയ്തു. ജീവശാസ്ത്രത്തിലെ നൂതന വിഷയങ്ങള്‍ ചര്‍ച്ച ചെയ്യാനും പ്രമുഖ ശാസ്ത്രജ്ഞരോടു സംവദിക്കാനും ലക്ഷ്യമിടുന്ന പരിപാടിയില്‍ ബയോമെഡിക്കല്‍ ഗവേഷണവും നവീനചികിത്സാ രീതികളും പ്രധാന പ്രമേയമായി. പ്രിന്‍സിപ്പല്‍ സിസ്റ്റര്‍ ഡോ. ബ്ലെസി അധ്യക്ഷത വഹിച്ചു. ഡിപ്പാര്‍ട്ട്മെന്‍റ് മേധാവി ആന്‍ ആന്‍റണി, സെല്‍ഫ് ഫിനാന്‍സിംഗ് കോ-ഓര്‍ഡിനേറ്റര്‍ സിസ്റ്റര്‍ ഡോ. റോസ് ബാസ്റ്റിന്‍, ഐക്യുഎസി കോ-ഓര്‍ഡിനേറ്റര്‍ ഡോ. ടി.വി. ബിനു തുടങ്ങിയവര്‍ സംസാരിച്ചു.

മറ്റത്തൂരില്‍ സിപിഎമ്മിന്‍റെ അപ്രഖ്യാപിത അടിയന്തിരാവസ്ഥയെന്നു ബിജെപി

കൊടകര: അഞ്ചു വര്‍ഷത്തെ പരാജയപ്പെട്ട ഭരണശേഷം മറ്റത്തൂര്‍ പഞ്ചായത്ത് ഭരണത്തിന് നേതൃത്വം നല്‍കിയ സിപിഎം മനുഷ്യാവകാശങ്ങള്‍ തകര്‍ത്ത് ജനങ്ങളെ ഭീഷിണിപ്പെടുത്തുകയാണെന്ന് ബിജെപി നേതാക്കള്‍ പത്രസമ്മേളനത്തില്‍ ആരോപിച്ചു. കിട്ടാത്ത കേന്ദ്ര അവാര്‍ഡ് തലയില്‍വച്ചു നടന്ന പഞ്ചായത്ത് പ്രസിഡന്‍റ് ചോദ്യംചെയ്യപ്പെടാതിരിക്കാന്‍ പാര്‍ട്ടിയേയും പോലീസിനെയും കാട്ടി ജനങ്ങളെ ഭീഷണിപ്പെടുത്തുകയാണെന്നും നേതാക്കള്‍ ആരോപിച്ചു. കേന്ദ്ര സര്‍ക്കാരിന്‍റെ ഏത് അവാര്‍ഡാണ് മറ്റത്തൂരിനു കിട്ടിയതെന്നു വെളിപ്പെടുത്താന്‍ സിപിഎം തയാറാകണമെന്നും കേന്ദ്ര സെമിനാറില്‍ പങ്കെടുക്കാന്‍ പോയ പ്രസിഡന്‍റ് അതിനുള്ള ക്ഷണം അവാര്‍ഡാണെന്ന് ജനങ്ങളെ തെറ്റിദ്ധരിപ്പിച്ചതായും കിട്ടാത്ത അവാര്‍ഡും നടക്കാത്ത പദ്ധതികളുമാണ് മറ്റത്തൂരിന്‍റെ ബാക്കിപത്രമെന്നും ബിജെപി കുറ്റപ്പെടുത്തി. സ്വന്തം പരാജയങ്ങള്‍ മറച്ചു വയ്ക്കാന്‍ പഞ്ചായത്ത് പ്രസിഡന്‍റ് സ്ത്രീസംരക്ഷണത്തിനും സുരക്ഷയ്ക്കും വേണ്ടി നിര്‍മിച്ച രാജ്യത്തെ നിയമങ്ങള്‍ മറയാക്കുകയാണ്. സിപിഎം രാഷ്ട്രീയം പഴയ ഇരുണ്ടയുഗത്തിലേക്ക് മറ്റത്തൂരിനെ നയിക്കുവാന്‍ ഉദ്ദേശിച്ചുള്ളതാണ്. സിപിഎമ്മിന്‍റെ വനിതാസംഘടന കോടാലിയില്‍ നടത്തിയ പൊതുയോഗത്തില്‍ കൊലവിളിപ്രസംഗം നടത്തിയതായി ആരോപിച്ച നേതാക്കള്‍ ഇതിനെതിരെ ബിജെപി ശക്തമായ പ്രതിഷേധം സംഘടിപ്പിക്കുമെന്നും അറിയിച്ചു. ഒരു യുവവ്യവസായിയുടെ ദുരവസ്ഥ പരസ്യമായിട്ടും ഒന്നും മിണ്ടാതെ എല്‍ഡിഎഫിനൊപ്പം നില്‍ക്കുന്ന യുഡിഎഫിന്‍റെ ദുര്‍ബലത ബിജെപിക്ക് ഇല്ല എന്നും നേതാക്കള്‍ പറഞ്ഞു. വാര്‍ത്തസമ്മേളനത്തില്‍ ബിജെപി സംസ്ഥാന സമിതി അംഗം അഡ്വ.പി.ജി.ജയന്‍, പുതുക്കാട് മണ്ഡലം പ്രസിഡന്‍റ് അരുണ്‍ പന്തല്ലൂര്‍, മറ്റത്തൂര്‍ ഏരിയ പ്രസിഡന്‍റ് പി.കെ.വേണുഗോപാല്‍, സജിത ചന്ദ്രന്‍ എന്നിവര്‍ പങ്കെടുത്തു.

വലപ്പാട് ഉപജില്ലാ ശാസ്ത്രോത്സവം: ചെന്ത്രാപ്പിന്നി സ്കൂളിനു കിരീടം

എടത്തിരുത്തി: വലപ്പാട് ഉപജില്ലാ സ്കൂൾ ശാസ്ത്രോത്സവം സമാപിച്ചു. 769 പോയിന്‍റ് നേടി ചെന്ത്രാപ്പിന്നി ഹയർ സെക്കൻഡറി സ്കൂൾ ഓവറോൾ ഒന്നാം സ്ഥാനം നേടി. 535 പോയിന്‍റോടെ കഴിമ്പ്രം വിപിഎംഎസ്എൻഡിപി ഹയർ സെക്കൻഡറി സ്കൂൾ രണ്ടാം സ്ഥാനവും, 445 പോയിന്‍റ് നേടി ഏങ്ങണ്ടിയൂർ സെന്‍റ് തോമസ് ഹൈസ്കൂൾ മൂന്നാം സ്ഥാനവും നേടി. എല്‍പി, യുപി വിഭാഗങ്ങളില്‍ ഒന്നാം സ്ഥാനം എടത്തിരുത്തി സെന്‍റ് ആന്‍സ് കോണ്‍വെന്‍റ് യുപി സ്‌കൂള്‍ നേടി. രണ്ട് ദിവസങ്ങളിലായി എടത്തിരുത്തി സെന്‍റ് ആൻസ് സ്കൂളിൽ നടന്ന ശാസ്ത്രോത്സവത്തിന്‍റെ സമാപന സമ്മേളനം തളിക്കുളം ബ്ലോക്ക് പഞ്ചായത്ത് പ്രസിഡന്‍റ് കെ.സി.പ്രസാദ് ഉദ്ഘാടനം ചെയ്തു. എടത്തിരുത്തി ഗ്രാമപഞ്ചായത്ത് വൈസ് പ്രസിഡന്‍റ് ശൈലജ രവീന്ദ്രൻ അധ്യക്ഷയായി. ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺ മഞ്ജുള അരുണൻ സമ്മാനദാനം നിർവഹിച്ചു.

ഉണ്ണികൾക്കു കളിക്കാൻ ഇനി സ്വന്തം മണ്ണ്

ചാവക്കാട്: കടപ്പുറം പഞ്ചായത്തിലെ വട്ടേക്കാട് പ്രദേശത്ത് കുട്ടികൾക്ക് കളിക്കാനായി സ്വന്തം മണ്ണ്. വട്ടേക്കാട് സ്വദേശികളായ എം.എ. ഷാഹു ഹാജിയും എം. എ. ഉമ്മർ ഹാജിയും ചേർന്നാണ് ആറ് സെന്‍റ് സ്ഥലം പഞ്ചായത്തിന് സൗജന്യമായി നൽകിയത്. ഇവിടെ പഞ്ചായത്ത് കളിക്കളം നിർമിക്കും. ഇ.ടി. മുഹമ്മദ്‌ ബഷീർ എംപി ആധാരം ഏറ്റുവാങ്ങി. പഞ്ചായത്ത് പ്രസിഡന്‍റ് സാലിഹ ഷൗക്കത്ത് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് നഫീസകുട്ടി വലിയകത്ത്, ജില്ലാപഞ്ചായത്ത് മെംബർ അഡ്വ.വി.എം. മുഹമ്മദ് ഗസ്സാലി എന്നിവർ മുഖ്യാതിഥികളായി. പഞ്ചായത്ത് വൈസ് പ്രസിഡന്‍റ്, മൂക്കൻ കാഞ്ചന, ഹസീന താജുദ്ദീൻ, മുഹമ്മദ് നാസിഫ് എന്നിവർ പ്രസംഗിച്ചു.

കുടുംബാരോഗ്യകേന്ദ്രത്തില്‍ രോഗികള്‍ക്കു നല്‍കിയ ഗുളികയെക്കുറിച്ച് പരാതി

വരന്തരപ്പിള്ളി: കലവറക്കുന്ന് കുടുംബാരോഗ്യകേന്ദ്രത്തില്‍ പ്രഷര്‍ രോഗികള്‍ക്ക് നല്‍കിയ ഗുളികകള്‍ക്കെതിരേ പരാതി. കഴി‌ഞ്ഞമാസം നല്‍കിയ ഗുളികളാണ് പൊട്ടിക്കാന്‍കഴിയാത്ത രീതിയിലുള്ളതാണെന്ന് പരാതിയുയര്‍ന്നത്. പകുതി കഴിക്കേണ്ടവര്‍ക്ക് ഈ ഗുളികകള്‍ പൊട്ടിച്ചെടുക്കാന്‍ കഴിയുന്നില്ലെന്നായിരുന്നു ആക്ഷേപം. 'മെറ്റോപ്രോലോള്‍' എന്ന ഗുളികയാണ് ആശുപത്രി അധികൃതര്‍ നല്‍കിയത്. ഗുളികകള്‍ ലഭിച്ചവര്‍ പലരും പരാതിയുമായെത്തിയപ്പോള്‍ ഇവ മാറ്റി നല്‍കിയതായും പറയുന്നു. 50 മില്ലിഗ്രാം ഗുളികയുടെ പകുതി കഴിക്കേണ്ടിവന്നയാള്‍ ഗുളിക മുറിക്കാന്‍ നോക്കിയപ്പോഴാണ് റബര്‍പോലെയിരിക്കുന്നത് ശ്രദ്ധയില്‍പ്പെട്ടത്. ഹൃദ്രോഗിയായ വേലൂപ്പാടം കിണര്‍ സ്വദേശി കൊമ്മന്‍ഞ്ചേരി ഹംസ 10 ദിവസത്തോളം കഴിച്ചതായും സംശയം തോന്നി ആശുപത്രിയിലെത്തി വിവരം പറഞ്ഞപ്പോള്‍ ഗുളിക മാറ്റിനല്‍കുകയായിരുന്നു. സംഭവത്തില്‍ നിയമനടപടിയുമായി പോകുകയാണെന്ന് ഹംസ പറഞ്ഞു. കഴിഞ്ഞമാസം പലര്‍ക്കും ഈ ഗുളിക വിതരണം ചെയ്തു. പിന്നീട് ഇവരെല്ലാം ആശുപത്രിയില്‍ വിവരം അറിയിക്കുകയായിരുന്നു. തുടര്‍ന്ന് ആശുപത്രി അധികൃതര്‍ ഡിഎംഒയ്ക്കും ഫാര്‍മസിസ്റ്റ് വിഭാഗത്തിലും വിവരമറിയിച്ചു. പരാതിയുയര്‍ന്ന മരുന്നുകളുടെ വിതരണം നിര്‍ത്തിവയ്ക്കുകയും ഗുളിക പരിശോധനയ്ക്ക് അയയ്ക്കുകയും ചെയ്തതായി ആശുപത്രി അധികൃതര്‍ വ്യക്തമാക്കി. സംഭവത്തിൽ അന്വേഷണം നടത്തണമെന്ന് ആവശ്യപ്പെട്ടു പിഡിപി പുതുക്കാട് നിയോജകമണ്ഡലം കമ്മിറ്റി മെഡിക്കല്‍ ഓഫീസര്‍ക്ക് പരാതി നല്‍കി.

70,000ത്തിലേറെ പുസ്‌തകങ്ങൾ: എൽഎഫ് കോളജിന്‍റെ ഹൈടെക് ലൈബ്രറി ഉദ്ഘാടനം നാളെ

ഗുരുവായൂർ: എൽഎഫ് കോളജിന്‍റെ ഹൈടെക് ലൈബ്രറി നാളെ വിദ്യാർഥികൾക്കും സമൂഹത്തിനുമായി തുറന്ന കൊടുക്കുമെന്ന് പ്രിൻസിപ്പൽ സിസ്റ്റർ ഡോ.ജെ. ബിൻസി, വൈസ് പ്രിൻസിപ്പൽ സിസ്റ്റർ ഡോ. അന്ന മറിയ എന്നിവർ പത്രസമ്മേളനത്തിൽ അറിയിച്ചു. മൂന്നുനിലകളിലായാണ് ലൈബ്രറി ഒരുക്കിയിട്ടുള്ളത്. വിദ്യാർഥികൾക്കും അധ്യാപകർക്കും ഗവേഷകർക്കും ഉപകാരപ്രദമാകുന്ന ഡിജിറ്റൽ വിംഗ്- സെർച്ച് ഡോം തയാറായി. ഗവേഷകർക്ക് മാത്രമായി സ്‌കോളേഴ്‌സ് ഹബ്, അധ്യാപകർക്ക് നോളജ് പവലിയൻ, വിദ്യാർഥികൾക്ക് വായനയ്ക്കും ചർച്ചകൾക്കുമായി ഗാർഡൻ ലൈബ്രറി തുടങ്ങിയ സൗകര്യങ്ങളുണ്ട്. പുതിയ ലൈബ്രറി തുറക്കുന്നതോടൊപ്പം ചാവക്കാട് താലൂക്ക് ആശുപത്രിയിലും പുക്കോട് പ്രൈമറി ഹെൽത്ത് സെന്‍ററിലും രോഗികൾക്കും കൂട്ടിരിപ്പുകാർക്കുമായി 500ഓളം പുസ്‌തകശേഖരവുമായി ചെറിയ വായനശാലയും ഒരുക്കിയിട്ടുണ്ട്. പൊതുജനങ്ങൾക്ക് അംഗത്വത്തിലൂടെ ലൈബ്രറി ഉപയോഗിക്കാം. വെള്ളിയാഴ്ച രാവിലെ 10ന് കളക്ടർ അർജുൻ പാണ്ഡ്യൻ ഉദ്ഘാടനംചെയ്യും. പത്രസമ്മേളനത്തിൽ സിസ്റ്റർ ഡോ.എ.ജെ. ജോയ്‌സി, ഡോ. സിതാര കെ.ഉറുമ്പിൽ, ഡോ. ജൂലി ഡൊമിനിക്, ഡോ.പി.ജി. ജസ്റ്റിൻ, കോളജ് വൈസ് ചെയർമാൻ അഞ്‌ജലി നായർ എന്നിവരും പങ്കെടുത്തു.

മാതാപിതാക്കളുടെ ഓർമയിൽ നിർധന കുടുംബങ്ങൾക്കു വീട്

തൃശൂർ: മാതാപിതാക്കളുടെയും വഴികാട്ടിയായ വൈദികന്‍റെയും സ്മരണയിൽ നിർധനരായ മൂന്നു കുടുംബങ്ങൾക്കു വീട് നിർമിച്ചുനൽകാൻ റിട്ട. അധ്യാപകൻ. സെന്‍റ് തോമസ് കോളജിൽനിന്ന് വിരമിച്ച ഡോ. ഫ്രാൻസി ചാഴൂരാണ് വേറിട്ട സ്മരണാഞ്ജലിയർപ്പിക്കുന്നത്. മാതാപിതാക്കളായ വടക്കാഞ്ചേരി ചാഴൂർ ഫ്രാൻസീസ്, ചിറയത്ത് (പച്ച) സെലീന, പൊതുരംഗത്തേക്കു വഴിനടത്തിയ കെസിവൈഎം സ്ഥാപകസാരഥി മോണ്‍. തോമസ് തലച്ചിറ എന്നിവരുടെ ഓർമയ്ക്കായി മൂന്നു വീടുകളാണ് നിർമിക്കുക. 11നു ലൂർദ് കത്തീഡ്രലിൽ നടക്കുന്ന അനുസ്മരണബലിക്കുശേഷം കിഴക്കുംപാട്ടുകര റോഡിലെ ഡോ. ഫ്രാൻസിയുടെ വസതിയിൽ സംഘടിപ്പിക്കുന്ന യോഗത്തിൽ വീടുകളുടെ ശിലാസ്ഥാപനം നടക്കും. മന്ത്രി ആർ. ബിന്ദു ഉദ്ഘാടനം ചെയ്യും. തൃശൂർ കുറുമാൽ ഗാഗുൽത്ത ധ്യാനകേന്ദ്രം ഡയറക്ടർ റവ.ഡോ. ഡേവിഡ് പേരാമംഗലം ശിലകളുടെ ആശീർവാദവും അനുഗ്രഹപ്രഭാഷണവും നടത്തും. മുൻമന്ത്രി പ്രഫ.സി. രവീന്ദ്രനാഥ്, കെ. രാധാകൃഷണൻ എംപി, ഡോ.പി. ഭാനുമതി, എംഎൽഎമാരായ എ.സി. മൊയ്തീൻ, പി. ബാലചന്ദ്രൻ, സേവ്യർ ചിറ്റിലപ്പിള്ളി, സനീഷ്കുമാർ ജോസഫ്, മുരളി പെരുനെല്ലി, വടക്കാഞ്ചേരി നഗരസഭ ചെയർമാൻ പി.എൻ. സുരേന്ദ്രൻ, ഡെപ്യൂട്ടി മേയർ എം.എൽ. റോസി, കൗണ്‍സിലർ ജോണ്‍ ഡാനിയൽ, പ്രഫ. പി.എൻ. പ്രകാശ്. ഡോ വി.ടി. ഹരിദാസ്. ബിജെപി ജില്ലാ പ്രസിഡന്‍റ് ജസ്റ്റിൻ ജേക്കബ്, എം.പി. പോളി, ഫാ. ജിയാന്‍റോ മാഞ്ഞൂരാൻ, ഡേവിസ് കണ്ണനായ്ക്കൽ തുടങ്ങിയവർ പങ്കെടുക്കും. 10 ലക്ഷം രൂപവീതം ചെലവിൽ 700 ചതുരശ്രഅടി വിസ്തീർണത്തിലാണ് വീടുകൾ പണിയുക. വടക്കാഞ്ചേരി, കിഴക്കുംപാട്ടുകര എന്നിവിടങ്ങളിൽ മൂന്നുസെന്‍റ് സ്ഥലത്താണ് വീടു നിർമിക്കുന്നത്.

ഒല്ലൂർ പള്ളി തിരുനാൾ: നേർച്ചപായ്ക്കറ്റുകൾ ഒരുങ്ങുന്നു

ഒല്ലൂർ: സെന്‍റ് ആന്‍റണീസ് ഫൊറോന പള്ളിയിൽ വിശുദ്ധ റപ്പായേൽ മാലാഖയുടെ തിരുനാളിനു ഒരുക്കങ്ങൾ പുരോഗമിക്കുന്നു. തിരുനാളിനോടനുബന്ധിച്ചുള്ള നേർച്ചപ്പൊതികൾ(അരി, അവൽ, പൊരി, കുന്തിരിക്കം) തയാറാക്കൽ ആരംഭിച്ചു. ലിറ്റർജി കമ്മിറ്റിയുടെ നേതൃത്വത്തിലാണ് നേർച്ചപ്പായ്ക്കറ്റ് തയാറാക്കുന്നത്. 5200 കിലോ അരി, 3100 കിലോ അവിൽ, 350 കിലോ കുന്തിരിക്കം എന്നിവയാണ് തയാറാക്കുന്നത്. വികാരി ഫാ. വർഗീസ് കുത്തൂർ, അസിസ്റ്റന്‍റ് വികാരിമാരായ ഫാ. എഡ്വിൻ ഐനിക്കൽ, ഫാ. തേജസ് കുന്നപ്പിള്ളിൽ, കൈക്കാരന്മാരായ ഷോണി അക്കര, ഷാജു പടിക്കല, ജോഫി ചിറമ്മൽ, ജെയ്‌സൺ പ്ലാക്കൽ എന്നിവർ നേതൃത്വം നൽകി.

വടക്കാഞ്ചേരി ഫൊറോന പള്ളി തിരുനാൾ

വടക്കാഞ്ചേരി: സെന്‍റ് ഫ്രാൻസിസ് സേവിയേഴ്സ് ഫൊറോന ദേവാലയത്തിലെ 185-ാം ദർശനത്തിരുനാൾ വെള്ളി, ശനി, ഞായർ ദിവസങ്ങളിൽ ആഘോഷിക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. തിരുനാളിന്‍റെ ഭാഗമായി ഇന്നുരാവിലെ 6.30നും വൈകീട്ട് 5.30നും കുർബാന, ലദീഞ്ഞ്, നൊവേന. തിരുക്കർമങ്ങൾക്കു കടങ്ങോട് പള്ളി വികാരി ഫാ. സന്തോഷ് അന്തിക്കാട് കാർമികനാകും. നാളെ രാവിലെ 6.30നും വൈകീട്ട് 5.30നും കുർബാന, ലദീഞ്ഞ്, നൊവേന, ദർശനസമൂഹം, പ്രസുദേന്തിവാഴ്ച, തിരിപ്രദക്ഷിണം. മരത്താക്കര പള്ളി വികാരി ഫാ. ജോബ് വടക്കൻ കാർമികത്വംവഹിക്കും. ശനിയാഴ്ച രാവിലെ 6.30ന് കുർബാന, ലദീഞ്ഞ്, നൊവേന. വൈകീട്ട് 4.30ന് നേർച്ചവെഞ്ചരിപ്പ്, ഇടവകസമൂഹ പ്രസുദേന്തിവാഴ്ച, കുർബാന, ലദീഞ്ഞ്, നൊവേന. തുടർന്ന്ച കൂടുതുറക്കൽ ശുശ്രൂഷ എന്നീ തിരുക്കർമങ്ങൾക്കു തൃശൂർ അതിരൂപത വൈസ് ചാൻസലർ ഫാ. ഷിജു ചിരിയങ്കണ്ടത്ത് മുഖ്യ കാർമികത്വം വഹിക്കും. വൈകീട്ട് എട്ടിന് പാർളിക്കാട് കുരിശുപള്ളിയിൽനിന്നു കിരീടം എഴുന്നള്ളിപ്പ്. തിരുനാൾദിനമായ ഞായറാഴ്ച രാവിലെ ആറിനും ഏഴിനും എട്ടിനും ഒമ്പതിനും കുർബാനകൾ. തുടർന്ന് 10.30ന് നടക്കുന്ന ആഘോഷമായ തിരുനാൾപാട്ടുകുർബാനയ്ക്ക് അതിരൂപത ചിൽഡ്രൻസ് മിനിസ്ട്രി ഡയറക്ടർ ഫാ.പോൾ മുട്ടത്ത് മുഖ്യകാർമികനാകും. അതിരൂപത സെക്രട്ടറി ചാൻസലർ ഫാ. അൽജോ കരേരക്കാട്ടിൽ തിരുനാൾസന്ദേശം നൽകും. വൈകീട്ട് നാലിന് കുർബാനയ്ക്ക് ഇടവകവൈദികർ കാർമികരാകും. തുടർന്ന് ജപമാലപ്രദക്ഷിണം നടക്കും. തിരുനാളിന്‍റെ ഭാഗമായി ശനിയാഴ്ച വൈകീട്ട് നാലുമുതൽ രാത്രി 10 വരെയും ഞായറാഴ്ച രാവിലെ ഏഴുമുതൽ വൈകീട്ട് മൂന്നുവരെയും ഊട്ടുനേർച്ച കഴിക്കാൻ സൗകര്യമുണ്ട്. തിങ്കളാഴ്ച രാവിലെ 6.30ന് ഇടവകയിൽനിന്നു മരിച്ചുപോയവർക്കു വേണ്ടിയുള്ള തിരുക്കർമങ്ങൾ നടക്കും. തിരുനാളിനോടനുബന്ധിച്ച് നിർധന കുടുംബങ്ങൾക്ക് പലവ്യഞ്ജന കിറ്റുകൾ വിതരണംചെയ്യും. പത്രസമ്മേളനത്തിൽ ഫൊറോന വികാരി ഫാ. വർഗീസ് തരകൻ, കൈക്കാരൻ ജോൺസൻ പുത്തുക്കര, ജനറൽ കൺവീനർ വില്യംസ് നെയ്യൻ, പബ്ലിസിറ്റി കൺവീനർ ഫ്രാൻസിസ് കുരുതുകുളങ്ങര തുടങ്ങിയവർ പങ്കെടുത്തു.

ഓണ്‍ലൈൻരംഗത്തെ തൊഴിൽസുരക്ഷയ്ക്ക് നിയമനിർമാണം നടത്തണം

തൃശൂർ: ഓണ്‍ലൈൻരംഗത്തെ തൊഴിലാളികളുടെ തൊഴിൽസുരക്ഷ ഉറപ്പാക്കാൻ സർക്കാർതലത്തിൽ നിയമനിർമാണം നടത്തണമെന്ന് എഐടിയുസി സംസ്ഥാന ജനറൽ സെക്രട്ടറി കെ.പി. രാജേന്ദ്രൻ. കേരള സ്റ്റേറ്റ് ഗിഗ് വർക്കേഴ്സ് യൂണിയൻ എഐടിയുസി ജില്ലാ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കേരള സ്റ്റേറ്റ് ഗിഗ് വർക്കേഴ്സ് യൂണിയൻ ജില്ലാ പ്രസിഡന്‍റ് മനു ജേക്കബ്, സിപിഐ ജില്ലാ സെക്രട്ടറി കെ.ജി. ശിവാനന്ദൻ, ഗിഗ് വർക്കേഴ്സ് യൂണിയൻ ജനറൽ സെക്രട്ടറി ടി.സി. സഞ്ജിത്ത്, എഐടിയുസി ജില്ലാ സെക്രട്ടറി ടി.കെ. സുധീഷ്, സിപിഐ തൃശൂർ മണ്ഡലം സെക്രട്ടറി അഡ്വ. കെ.ബി. സുമേഷ്, ഗിഗ് വർക്കേഴ്സ് യൂണിയൻ സംസ്ഥാന നേതാക്കളായ വി.എസ്. സുനിൽകുമാർ, എ. വിജയകുമാർ എന്നിവർ പ്രസംഗിച്ചു. പുതിയ ജില്ലാ ഭാരവാഹികളായി കെ.എൻ. രഘു- പ്രസിഡന്‍റ്, മനു ജേക്കബ്- സെക്രട്ടറി, ഷെമീർ വകയിൽ- ട്രഷറർ, ഉനൈസ്, ഗോപിനാഥ്- വൈസ് പ്രസിഡന്‍റുമാർ, ദിബീഷ് ബാല ആന്‍റോ മുരിയാടൻ- ജോയിന്‍റ് സെക്രട്ടറിമാർ എന്നിവരെയും 25 അംഗ ജില്ലാ കമ്മിറ്റിയെയും തെരഞ്ഞെടുത്തു.

ഇനി മത്സരിക്കാനില്ല: എം.കെ. വർഗീസ്

തൃശൂർ: ഇനി കോർപറേഷനിലേക്കു മത്സരിക്കാനില്ലെന്നു മേയർ എം.കെ. വർഗീസ്. നിയമസഭാ തെരഞ്ഞെടുപ്പിൽ മത്സരിക്കുമോയെന്ന് ഇപ്പോൾ പറയാനാകില്ല. കൗണ്‍സിൽ കാലാവധി കഴിഞ്ഞാൽ മൂന്നുമാസം വിശ്രമിക്കും. മുൻവർഷങ്ങളിൽ അഞ്ഞൂറുമുതൽ ആയിരം കോടിവരെ വികസനമാണ് നടന്നത്. സ്വതന്ത്രനായി വന്ന തനിക്ക് 1,500 കോടിയുടെ വികസനം നടത്താൻ കഴിഞ്ഞു. എൽഡിഎഫ് മികച്ച പിന്തുണ നൽകി. സുരേഷ് ഗോപിയുടെ എംപി ഫണ്ടുപയോഗിച്ചു പദ്ധതി നടപ്പാക്കിയതു തൃശൂർ കോർപറേഷൻ മാത്രമാണ്. മന്ത്രിയായശേഷം പദ്ധതികൾ വിഭാവനംചെയ്യുകയോ അറിയിക്കുകയോ ചെയ്തിട്ടില്ല. ചർച്ചകൾക്കു സുരേഷ് ഗോപി വിളിച്ചാൽ പോകാൻ മടിയില്ല. അദ്ദേഹത്തോടു വ്യക്തിപരമായ താത്പര്യമുണ്ട്. നാടിന്‍റെ വികസനംമാത്രമാണ് ലക്ഷ്യമെന്നും മേയർ പറഞ്ഞു.

കോർപറേഷൻ വികസനസദസ് നാളെ

തൃശൂർ: ഭരണസമിതിയുടെ വികസനപ്രവർത്തനങ്ങൾ ജനങ്ങളിലേക്കെത്തിക്കാൻ കോർപറേഷന്‍റെ നേതൃത്വത്തിൽ വികസനസദസ് സംഘടിപ്പിക്കുന്നു. എൽഡിഎഫിന്‍റെ നേതൃത്വത്തിലുള്ള കോർപറേഷൻ ഭരണസമിതി കാലാവധി പൂർത്തിയാക്കാൻ പോകുന്ന വേളയിലാണ് നേട്ടങ്ങളും വികസനപ്രവർത്തനങ്ങളും ജനങ്ങളിലെത്തിക്കാൻ നാളെ ടൗണ്‍ഹാളിൽ വികസനസദസ് സംഘടിപ്പിക്കുന്നത്. സദസിനോടനുബന്ധിച്ച് ഇന്നും നാളെയും കൗണ്‍സിൽ നടപ്പിലാക്കിയ വിവിധ പദ്ധതികളും പ്രവർത്തനങ്ങളും ഉൾപ്പെടുത്തിയുള്ള പ്രദർശനം, വിവരണങ്ങൾ, കലാ സാംസ്കാരിക പ്രവർത്തനങ്ങൾ, ആദരിക്കൽചടങ്ങ് എന്നിവയും നടക്കും. തദ്ദേശതെരഞ്ഞെടുപ്പ് വിജ്ഞാപനം വരുംമുന്പ് പ്രധാനപ്പെട്ട ഉദ്ഘാടനങ്ങളും നിർമാണോദ്ഘാടനങ്ങളും പൂർത്തിയാക്കുകയാണ് ഭരണസമിതിയുടെ ലക്ഷ്യം. ഐ.എം. വിജയൻ അന്താരാഷ്ട്ര സ്പോർട്സ് കോംപ്ലക്സ്, അതിദരിദ്രർക്കുള്ള മാറ്റാന്പുറത്തെ ഫ്ളാറ്റ് കൈമാറൽ, പാലസ് ഗ്രൗണ്ട് നവീകരണം, സംസ്ഥാനത്തെ ആദ്യ അനിമൽ ക്രിമറ്റോറിയം, 55 ഡിവിഷനുകളിലേക്ക് 200 ഹൈമാസ്റ്റ് ലൈറ്റുകൾ, മുളയം കുടിവെള്ളപദ്ധതി, ജനറൽ ആശുപത്രിയിലെ മൾട്ടിലെവൽ കാർ പാർക്കിംഗ് ഉൾപ്പെടെയുള്ള പദ്ധതികളുടെ സമർപ്പണവും വിവിധ പദ്ധതികളുടെ നിർമാണ ഉദ്ഘാടനങ്ങളും ഇക്കാലയളവിൽ നടത്തും. കോർപറേഷനു സ്റ്റാർ റേറ്റിംഗ് കിട്ടിയതിന്‍റെ ഭാഗമായി ശുചിത്വമിഷന്‍റെ നിർദേശപ്രകാരം സെവൻ സ്റ്റാർ പദവിയുള്ള പനാജി സിറ്റി കൗണ്‍സിലർമാരും ഉദ്യോഗസ്ഥരും സന്ദർശിക്കും. മാലിന്യസംസ്കരണ പഠനാർഥമായി നടത്തുന്ന യാത്രയുടെ ചെലവുകൾ സ്വച്ഛ് ഭാരത് മിഷൻ അർബൻ 2.0 കപ്പാസിറ്റി ബിൽഡിംഗ് ഫണ്ടിൽനിന്നു ലഭ്യമാക്കും. ഇത് ഒരു അംഗീകാരമാണെന്നും മേയർ എം.കെ. വർഗീസ് പത്രസമ്മേളനത്തിൽ അറിയിച്ചു. സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ വർഗീസ് കണ്ടംകുളത്തി, പി.കെ. ഷാജൻ, സാറാമ്മ റോബ്സണ്‍ എന്നിവരും പങ്കെടുത്തു.

പാലസ് ഗ്രൗണ്ട് സ്വകാര്യ ക്ലബ്ബിനു നൽകുന്നതിനെതിരേ രാജൻ പല്ലൻ

തൃശൂർ: പാലസ് ഗ്രൗണ്ട് അഞ്ചുവർഷത്തേക്കു സ്വകാര്യ ക്ലബ്ബിനു വിട്ടുനൽകാനുള്ള തീരുമാനത്തെ സർവകക്ഷിയോഗത്തിൽ എതിർത്ത് പ്രതിപക്ഷനേതാവ് രാജൻ ജെ. പല്ലൻ. പാലസ് ഗ്രൗണ്ട് തുടർച്ചയായി ഒരു മാസത്തിൽ കൂടുതൽ ആർക്കും അനുവദിക്കരുതെന്നു കൗണ്‍സിൽ അംഗീകരിച്ച ബൈലോയിൽ പറയുന്നു. ഈ നിയമം നിലനിൽക്കുന്പോൾ മാജിക് എഫ്സി ക്ലബ്ബിന് ഗ്രൗണ്ട് അഞ്ചുവർഷത്തേക്ക് എങ്ങനെ നൽകാനാകുമെന്നു രാജൻ പല്ലൻ ചോദിച്ചു. ഗ്രൗണ്ട് അറ്റകുറ്റപ്പണികൾക്കുമാത്രമാണ് മാജിക് എഫ്സി ക്ലബ്ബിനു കൊടുക്കുന്നതെന്നു മേയർ വിശദീകരിച്ചെങ്കിലും, ബന്ധപ്പെട്ട കരാർ ഉടന്പടിക്കു പ്രത്യേകം കൗണ്‍സിലിന്‍റെ അംഗീകാരം വാങ്ങണമെന്നു പ്രതിപക്ഷനേതാവ് ആവശ്യപ്പെട്ടു. കൗണ്‍സിൽ ഹാളിൽ നടത്തേണ്ട സർവകക്ഷിയോഗം മാധ്യമപ്രവർത്തകരെ ഒഴിവാക്കാൻ മേയറുടെ ചേംബറിലേക്കു മാറ്റിയത് അംഗീകരിക്കാനാകില്ലെന്നും രാജൻ പല്ലൻ പറഞ്ഞു.

സെന്‍റ് മേരീസ് കോളജിൽ അമേരിക്കൻ മൈക്രോബയോളജി സ്റ്റുഡന്‍റ് ചാപ്റ്ററിനു തുടക്കം

തൃശൂർ: സെന്‍റ് മേരീസ് കോളജിന്‍റെ പങ്കാളിത്തത്തോടെ അമേരിക്കൻ സൊസൈറ്റി ഫോർ മൈക്രോബയോളജിയുടെ (എഎസ്എം) കേരളത്തിലെ ആദ്യ സ്റ്റുഡന്‍റ് ചാപ്റ്റർ, ഇന്ത്യൻ അംബാസഡറും കുസാറ്റ് റിട്ട. പ്രഫസറുമായ ഡോ. മുഹമ്മദ് ഹാത്ത അബ്ദുള്ള ഉദ്ഘാടനം ചെയ്തു. എഎസ്എം വഴി വിദ്യാർഥികൾക്കു ലഭിക്കാവുന്ന അന്തർദേശീയ അവസരങ്ങളെക്കുറിച്ച് അദ്ദേഹം വിശദീകരിച്ചു. എഎസ്എമ്മും കുസാറ്റ് എൻസിപിഒആറും സംയുക്തമായി മൈക്രോബിയൽ ഇന്നോവേഷൻസ് ഫോർ സസ്റ്റൈനബിൾ സൊലൂഷൻസ് എന്ന വിഷയത്തിൽ സംഘടിപ്പിച്ച ദേശീയ സെമിനാറിൽ വെള്ളാനിക്കര അഗ്രിക്കൾച്ചർ കോളജ് അസി. പ്രഫസർ ഡോ. രഹ്‌ന അഗസ്റ്റിൻ, പാലക്കാട് ഐഐടി അസി. പ്രഫസർ ഡോ. റിച്ച് അഗ്നിഹോത്രി എന്നിവർ പങ്കെടുത്തു. സ്റ്റുഡന്‍റ് ചാപ്റ്റർ വിദ്യാർഥികൾ വിഷയത്തിൽ തയാറാക്കിയ പുസ്തകപ്രകാശനവും ഒഫിഷ്യൽ ലോഗോ പ്രകാശനവും നടന്നു. പ്രിൻസിപ്പൽ സിസ്റ്റർ ഡോ. മീന കെ. ചെറുവത്തൂർ, വൈസ് പ്രിൻസിപ്പൽമാരായ സിസ്റ്റർ ഡോ. ടെസീന പി. ഇമ്മട്ടി, ഡോ.എ. ഡാലി ഡൊമിനിക്, സെമിനാർ കോഓർഡിനേറ്റർ ഡോ.സി.ആർ. മീര, ആൻമരിയ ഫ്രാൻസിസ് തുടങ്ങിയവർ പ്രസംഗിച്ചു.

റവന്യൂ ജില്ലാ കബഡിയിലും കല്ലുകടി: മത്സരങ്ങൾ രാത്രി 10 വരെ

മണ്ണുത്തി: കായിക അധ്യാപകരുടെ നിസഹകരണം മൂർക്കനിക്കരയിൽ നടന്ന റവന്യൂ ജില്ലാ കബഡിമത്സരത്തിലും പ്രതിഫലിച്ചു. ടൈമർ ഇല്ലാതെയാണ് മത്സരങ്ങൾ നടന്നത്. പെണ്‍കുട്ടികളുടെ ആറു ടീമും ആണ്‍കുട്ടികളുടെ 11 ടീമും പങ്കെടുത്ത കബഡിമത്സരം രാത്രി വൈ കിയാണു സമാപിച്ചത്. രണ്ടു ദിവ സങ്ങളിലായി നടത്തേണ്ട മത്സരം ഒറ്റ ദിവസംകൊണ്ട് തീർക്കുകയായിരുന്നു. മത്സരം നടത്താൻ വേണ്ടത്ര കായികാധ്യാപകർ ഇല്ലാതിരുന്നതിനാൽ വിവിധ കോളജുകളിൽനിന്നുള്ള കബഡിതാരങ്ങളാണ് ഒഫിഷ്യൽസായി പ്രവർത്തിച്ചത്. മത്സരങ്ങൾ രാത്രി 10 വരെ നീണ്ടതോടെ രാവിലെ എട്ടിന് എത്തിയ മത്സരാർഥികൾ പലരും ക്ഷീണിതരായി. ഇതിനിടെ ഒഫിഷ്യൽസിൽ ചിലർക്കുണ്ടായ പിഴവുകൾ പലപ്പോ ഴും തർക്കത്തിനിടയാക്കി.

വയോജന അവകാശപ്രഖ്യാപനം നടത്തി, മുഖ്യമന്ത്രിക്കു നിവേദനം നൽകി

തൃശൂർ: കേരള സീനിയർ സിറ്റിസൺസ് ഫോറം ജില്ലാ കമ്മിറ്റി വയോജനവാരാഘോഷം സമാപനത്തിന്‍റെ ഭാഗമായി കളക്ടറേറ്റ് പടിക്കൽ വയോജന അവകാശപ്രഖ്യാപനം നടത്തി. 70 കഴിഞ്ഞവർക്കുള്ള ആയുഷ്മാൻ ഭാരത് സൗജന്യ ഇൻഷ്വറൻസ് പദ്ധതി ഉടനടി നടപ്പാക്കുക, വയോജന പെൻഷൻ അയ്യായിരം രൂപയാക്കുക, റെയിൽവേ കൺസഷൻ പുനഃസ്ഥാപിക്കുക തുടങ്ങിയ ആവശ്യങ്ങളടങ്ങിയ നിവേദനം ജില്ലാ കളക്ടർവഴി മുഖ്യമന്ത്രിക്കു സമർപ്പിച്ചു. ടി.വി. ചന്ദ്രമോഹൻ ഉദ്ഘാടനം ചെയ്തു. ജില്ലാ പ്രസിഡന്‍റ് കെ. സേതുമാധവൻ അധ്യക്ഷത വഹിച്ചു. സംസ്ഥാനസെക്രട്ടറി പ്രഫ.വി.എ. വർഗീസ്, ജില്ലാ സെക്രട്ടറി സി.സി. ജോസ്, കെ. ഗോവിന്ദൻകുട്ടി മേനോൻ, പി. മുഹമ്മദ് ബാബു, ടി.ആർ. ബാലസുബ്രഹ്മണ്യൻ, സി.എ. ജോസഫ്, എം. എ. വേലായുധൻ, തങ്കം സുധാകരൻ, എസ്. ഗോപകുമാർ, പി.വി. രാമൻ, പി.കെ. ഭാസ്കരൻ, പി. അപ്പുക്കുട്ടൻ, ഇ. പദ്മനാഭൻ തുടങ്ങിയവർ പ്രസംഗിച്ചു.

കൊരട്ടിമുത്തിയുടെ തിരുനാൾ കൊടിയേറി

കൊരട്ടി: സുപ്രസിദ്ധ മരിയൻ തീർഥാടനകേന്ദ്രമായ കൊരട്ടി സെന്‍റ് മേരീസ് ഫൊറോന പള്ളിയിൽ അത്ഭുതപ്രവർത്തകയായ കൊരട്ടിമുത്തിയുടെ തിരുനാളിനു കൊടിയേറി. ഇന്നലെ വൈകീട്ട് നാലിനു നടന്ന ജപമാലയ്ക്കും ലദീഞ്ഞിനും ശേഷം ആത്മീചൈതന്യം മുറ്റിയ പള്ളിയങ്കണത്തിൽ തൊഴുകൈകളോടെ പ്രാർഥനാനിരതരായിനിന്ന നൂറുകണക്കിന് ഭക്തജനങ്ങളുടെ സാന്നിധ്യത്തിലാണു വികാരി ഫാ. ജോൺസൺ കക്കാട്ട് കൊടിയേറ്റിയത്. തുടർന്ന് പ്രദക്ഷിണമായ വിശ്വാസികൾ ടൗൺ കപ്പേളയിലെത്തി. 5.30ന് ടൗൺ കപ്പേളയിൽ നടന്ന ആഘോഷമായ വിശുദ്ധ കുർബാനയ്ക്ക് ഫാ. ജെസ്‌ലിൻ തെറ്റയിൽ കാർമികനായി. ഫാ. ജോൺസൺ കൂവേലി വചന സന്ദേശം നൽകി. തുടർന്ന് കാവടിയാട്ടവും വർണമഴയും ഉണ്ടായിരുന്നു. രാത്രി പത്തുവരെ വനിതകളുടെ ശിങ്കാരിമേളവും അരങ്ങേറി. പതിവുപോലെ ഈ വർഷവും കൊരട്ടി മർച്ചന്‍റ്സ് അസോസിയേഷനാണ് കപ്പേള തിരുനാൾ ഏറ്റെടുത്ത് നടത്തിയത്. ഇന്നു വൈകീട്ട് 6.30ന് വൈഗ ത്രെഡ്സ് ഗ്രൗണ്ടിൽ തൃശൂർ കലാസദന്‍റെ സൂപ്പർ ഹിറ്റ് ഗാനമേളയും ലൈവ് മ്യൂസിക് ഫെസ്റ്റിവലും ഒരുക്കിയിട്ടുണ്ട്. കൊടിയേറ്റിന് ഗ്രാമപഞ്ചായത്ത് പ്രസിഡന്‍റ് പി.സി. ബിജു, മുൻ എംഎൽഎ ബി.ഡി. ദേവസി, ഡെന്നിസ് കെ. ആന്‍റണി, കെ.ആർ. സുമേഷ് തുടങ്ങിയവർ സന്നിഹിതരായി. അസിസ്റ്റന്‍റ് വികാരിമാരായ ഫാ. അരുൺ തേരുളി, ഫാ. ലിജോ കുരിയേടൻ, ഫാ. ജോമോൻ കൈപ്രമ്പാടൻ, ഫാ. ജിബിൻ എടത്തിപ്പറമ്പൻ, കൈക്കാരന്മാരായ വി.ഡി. ജൂലി യസ്, ജോമോൻ ജോസ്, തിരുനാൾ ജനറൽ കൺവീനർ ജിഷോ ജോസ്, സുനിൽ ജോസ് ഗോപുരൻ, കേന്ദ്രസമിതി വൈസ്ചെയർമാൻ ഡോ. ജോജോ നാൽപ്പാട്ട് എന്നിവർ നേതൃത്വം നൽകി. തിരുനാൾ തിരുക്കർമങ്ങൾ ദീപാലങ്കാരങ്ങളുടെ സ്വിച്ച് ഓൺ കർമം നടന്ന കഴിഞ്ഞ ഞായറാഴ്ച മുതൽ ഭക്തജനപ്രവാഹവും തുടങ്ങി. 11, 12 തീയതികളിലാണു തിരുനാൾ. ഇന്ന് റോസറി വില്ലേജ് ഡേ ആയി ആഘോഷിക്കും. വൈകീട്ട് അഞ്ചിന് റോസറി വില്ലേജിൽ നടക്കുന്ന ആഘോഷമായ പാട്ടുകുർബാനയ്ക്ക് ഫാ. ഡിന്‍റോ മാണിക്കത്താൻ നേതൃത്വം നൽകും. 10ന് വൈകീട്ട് അഞ്ചിന് നടക്കുന്ന വിശുദ്ധ കുർബാനയെ തുടർന്ന് ഇടവക ജനങ്ങളുടെ പൂവൻകുല സമർപ്പണം. ഫാ. ജെറിൻ കിളിയന്തറ കാർമികനാകും. 11ന് രാവിലെ 5.30 ന് നടക്കുന്ന വിശുദ്ധ കുർബാനയ്ക്കു ശേഷം പൂവൻകായ വെഞ്ചരിപ്പ്. ഏഴിന് ഫാ. ലൂക്കോസ് കുന്നത്തൂരിന്‍റെ കാർമികത്വത്തിൽ വിശുദ്ധ കുർബാനയും നാെവേനയും. ഒന്പതിന് ഫാ. ജോസഫ് ഓലിപ്പറമ്പിൽ ലെത്തീൻ റീത്തിൽ ദിവ്യബലി അർപ്പിക്കും. 10.30 ന് നടക്കുന്ന ആഘോഷമായ സമൂഹബലിക്ക് ഇടവക വൈദികർ നേതൃ ത്വം നൽകും. ഉച്ചയ്ക്ക് 1.30 ന് ഫാ. മാർട്ടിൻ കല്ലുങ്കൽ ഇംഗ്ലീ ഷിൽ വിശുദ്ധ കുർബാന അർപ്പിക്കും. മൂന്നിന് ഫാ. പോൾ സൺ പെരേപ്പാടന്‍റെ കാർമികത്വത്തിൽ സുറിയാനി കുർ ബാന. അഞ്ചിന് നടക്കുന്ന ആഘോഷമായ പാട്ടുകുർബാ നയ്ക്ക് ഫാ. ആൽബിൻ വെള്ളാഞ്ഞിയിൽ കാർമികനാകും. 8.30 നും ദിവ്യബലി ഉണ്ടായിരിക്കും. തിരുനാൾ ദിനമായ 12ന് രാവിലെ അഞ്ചിനു വർഷത്തിൽ ഒരു ദിവസം മാത്രം വണക്കത്തിനായി മദ്ബഹയിൽ നിന്നും കൂടു‌തുറന്ന് പുറത്തേക്ക് എടുക്കുന്ന അദ്ഭുതരൂപം എഴുന്നള്ളിച്ചു വയ് ക്കും. വികാരി ഫാ. ജോൺസൺ കക്കാട്ട് മുഖ്യകാർമികത്വം വഹിക്കും. ഏഴിനും 8.30‌നും നടക്കുന്ന ദിവ്യബലികൾക്ക് യഥാക്രമം ഫാ. ജിൻസ് ഞാണയ്ക്കലും ഫാ. റോമൽ കണിയാംപറമ്പിലും നേതൃത്വം നൽകും. 10.30 ന് നടക്കുന്ന ആഘോഷമായ തിരുനാൾ പാട്ടുകുർബാനയ്ക്ക് ഫാ. വിപിൻ വേരൻപിലാവ് കാർമികനാകും. ഉച്ചക്ക് 1.30 ന് തമിഴിൽ വിശുദ്ധ കുർബാന. 2.30 ഫാ. പ്രവീൺ വെള്ളാട്ടുപറമ്പിലിന്‍റെ കാർമികത്വത്തിൽ നടക്കുന്ന ആഘോഷമായ തിരുനാൾ പാട്ടുകുർബാനയെ‌ത്തുടർന്ന് നാല് അങ്ങാടിചുറ്റി പ്രദക്ഷിണം. 4.30നും 7.30നും 9.30 നും വിശുദ്ധ കുർബാന. 11.30ന് അത്ഭുത രൂപം അകത്തേയ്ക്കു കയറ്റിവയ്ക്കും. 18, 19 തീയതികളിൽ എട്ടാമിടവും 25, 26 ന് പതിനഞ്ചാമിടവും ആഘോഷിക്കും.

കാട്ടൂരിലെ കിണറുകളിലെ രാസമാലിന്യം; മണ്ണുപരിശോധനാ റിപ്പോര്‍ട്ട് കൈമാറി

കാട്ടൂര്‍: കിണറുകളില്‍ രാസമാലിന്യം കലര്‍ന്ന സംഭവത്തില്‍ മണ്ണുപരിശോധനാ റിപ്പോര്‍ട്ട് പഞ്ചായത്തിനു കൈമാറി. ഇന്നലെ പഞ്ചായത്ത് പ്രസിഡന്‍റ് ടി.വി. ലത തൃശൂര്‍ ഗവ. എന്‍ജിനീയറിംഗ് കോളജില്‍ നേരിട്ടെത്തി കോളജ് പ്രിന്‍സിപ്പല്‍ ടി.എ. സോളമനില്‍നിന്നാണ് റിപ്പോര്‍ട്ട് വാങ്ങിയത്. ചെന്നൈ ലാബില്‍ നടത്തിയ മണ്ണിന്‍റെ പരിശോധനാഫലവും ഇതുസംബന്ധിച്ച പ്രായോഗിക നടപടികളുമാണ് റിപ്പോര്‍ട്ടിലുള്ളത്. വിശദാംശങ്ങള്‍ പഞ്ചായത്തോ ഗവ. എന്‍ജിനീയറിംഗ് കോളജ് അധികൃതരോ പുറത്തു വിട്ടിട്ടില്ല. മണ്ണുപരിശോധനാഫലം കിട്ടിയശേഷമായിരിക്കും തുടര്‍ നടപടികള്‍ ഉണ്ടാകൂയെന്ന് മുമ്പ് പഞ്ചായത്ത് അധികൃതര്‍ വ്യക്തമാക്കിയിരുന്നു. ഏതെല്ലാം രാസവസ്തുക്കളുടെ സാന്നിധ്യമാണ് മണ്ണില്‍ കൂടുതലായി അടങ്ങിയിരിക്കുന്നതെന്നു പരിശോധനാഫലത്തില്‍ വ്യക്തമാവും. ഈ രാസവസ്തുക്കള്‍ എങ്ങനെ മണ്ണിലും കുടിവെള്ളത്തിലും കലര്‍ന്നുവെന്നതാണ് ആദ്യം പരിശോധിക്കുക. പരിശോധനാഫലം വന്നിട്ടുള്ള മണ്ണിന്‍റെ സാമ്പിളെടുത്തിരിക്കുന്നത് കനത്ത മഴയുള്ളപ്പോഴാണ്. അതിനാല്‍തന്നെ പരിശോധനാഫലത്തില്‍ വ്യക്തത കുറവായിരിക്കുമെന്നു സമരസമിതി ആശങ്ക പ്രകടിപ്പിക്കുന്നു. വേനല്‍ക്കാലത്തും മഴക്കാലത്തും മണ്ണില്‍നിന്നു സാമ്പിളുകള്‍ എടുത്തു പരിശോധിച്ചു കൃത്യത ഉറപ്പാക്കണമെന്നാണ് വിദഗ്ധര്‍ പറയുന്നത്. വീണ്ടും സമരരംഗത്തേക്ക് കാട്ടൂര്‍: പ്രശ്‌നപരിഹാരം കാണുമെന്ന മന്ത്രിയുള്‍പ്പെടെയുള്ളവരുടെ വാക്കുകള്‍ പാഴായ സാഹചര്യത്തില്‍ പരാതിക്കിടയാക്കുന്ന യൂണിറ്റുകൾ പൂട്ടണമെന്നാവശ്യപ്പെട്ട് കുടിവെള്ളസംരക്ഷണസമിതി വീണ്ടും പ്രക്ഷോഭത്തിലേക്ക്. ഇന്നലെ രാത്രി വാദ്യക്കുടം ക്ഷേത്രത്തില്‍ നടന്ന ജനകീയസമിതി യോഗത്തില്‍ സിപിഎം ഒഴികെയുള്ള വിവിധ രാഷ്ട്രീയകക്ഷി നേതാക്കള്‍ പങ്കെടുത്തു. കുടിവെള്ള സംരക്ഷണസമിതി പ്രസിഡന്‍റ് അരുണ്‍ വന്‍പറമ്പില്‍ അധ്യക്ഷത വഹിച്ചു. മിനി ഇൻഡസ്ട്രിയല്‍ എസ്‌റ്റേറ്റ് ഉപരോധിക്കുന്നതടക്കമുള്ള സമരപരിപാടികളുമായി മുന്നോട്ടുപോകാനാണ് യോഗതീരുമാനം. ബിജെപി കാട്ടൂര്‍ മണ്ഡലം പ്രസിഡന്‍റ് കെ.കെ. ഷെറിന്‍, കോണ്‍ഗ്രസ് മണ്ഡലം വൈസ് പ്രസിഡന്‍റ് ജയ്ഹിന്ദ് രാജ്, കേരള കോണ്‍ഗ്രസ് പ്രതിനിധി കെ. സതീഷ്, സമരസമിതി ട്രഷറര്‍ ജോയ് തോമസ്, പഞ്ചായത്തംഗം മോളി പിയൂസ് എന്നിവര്‍ നേ തൃത്വം നല്‍കി. ജനവാസമേഖലയില്‍ രാസവസ്തുക്കളുപയോഗിച്ചുള്ള വ്യവസായ യൂണിറ്റുകള്‍ നടത്താന്‍ അനുവദിക്കില്ലെന്നു വാര്‍ഡ് അംഗം മോളി പിയൂസ് പറഞ്ഞു. ജനങ്ങളുടെ ആരോഗ്യപ്രശ്‌നം അവഗണിച്ച് വ്യവസായ യൂണിറ്റുകള്‍ക്കൊപ്പമാണ് അധികൃതര്‍ നില്‍ക്കുന്നതെന്നും ഭാരവാഹികള്‍ കുറ്റപ്പെടുത്തി.

നെഹ്റു പാർക്ക് ഇനി അഡ്വഞ്ചർ പാർക്ക്

സി.ജി. ജിജാസൽ തൃശൂർ: സാഹസികത ഇഷ്ടപ്പെടുന്ന കുട്ടികൾക്ക് ഇനി നഗരഹൃദയത്തിലും ആവേശംപകരുന്ന പുതിയ അനുഭവങ്ങൾ കാത്തിരിക്കുന്നു. നഗരമധ്യത്തിലുള്ള നെഹ്റു പാർക്കിൽ ടൂറിസം വകുപ്പ് ഒരുക്കിയിരിക്കുന്ന അഡ്വഞ്ചർ പാർക്ക് ഈ മാസംതന്നെ തുറന്നുനൽകിയേക്കും. ഒരു കോടിയിലധികം രൂപ ചെലവിൽ നിർമിച്ചിരിക്കുന്ന ഈ കേന്ദ്രം കുട്ടികൾക്കു വിനോദത്തോടൊപ്പം സാഹസികതയുടെയും അനുഭവം പകരും. പാർക്കിനുള്ളിലെ തണൽമരങ്ങളുടെ താഴെ പണിതീർത്തിട്ടുള്ള ആക്ടിവിറ്റീസ് മേഖല ഇപ്പോൾതന്നെ ശ്രദ്ധയാകർഷിക്കുകയാണ്. ഇവയാണ് ആക്ടിവിറ്റികൾ പുതിയ സംവിധാനത്തിൽ നിരവധി സാഹസിക പ്രവർത്തനങ്ങൾ ഉൾപ്പെടുത്തിയിട്ടുണ്ട്. സിപ്‌ലൈൻ - വായുവിലൂടെ സ്ലൈഡ് ചെയ്യുന്ന അനുഭവം, സുരക്ഷാസംവിധാനങ്ങളോടെ. ക്ലൈംബിംഗ് വാൾ - ചാടലും പിടിച്ചുയരലുമുള്ള രസകരമായ ഫിസിക്കൽ ആക്ടിവിറ്റി. മൾട്ടിസ്റ്റേഷൻ - വ്യത്യസ്ത കളികളുടെയും ചലനങ്ങളുടെയും സംയോജനം. സെൽഫി പോയിന്‍റ് - കുട്ടികൾക്കും രക്ഷിതാക്കൾക്കും സെൽഫി പകര്‍ത്താൻ മനോഹരമായ ബാക്ക്ഡ്രോപ്പ്. പെബിൾ വാക്ക് - പ്രകൃതിയുമായി ബന്ധിപ്പിക്കുന്ന സൗമ്യമായ ആക്ടിവിറ്റി. സർപ്രൈസ് ശില്പം ഉദ്ഘാടനത്തിനു മുന്നോടിയായി പാർക്കിൽ സ്ഥാപിക്കുന്ന പ്രത്യേക ശില്പം ഇപ്പോൾതന്നെ കൗതുകമുണർത്തുന്നു. “അത് ഒരു സർപ്രൈസ് ആകും” എന്നു ടൂറിസം വകുപ്പ് അധികൃതർ. മേൽനോട്ടം കോർപറേഷന് പദ്ധതിയുടെ നിർമാണം പൂര്‍ത്തിയായതോടെ, തൃശൂർ കോർപറേഷനാണ് മേൽനോട്ടവും തുടർപരിപാലനചുമതലയും ഏറ്റെടുക്കുന്നത്. ഒരുവർഷം മുൻപ് ആരംഭിച്ച നിർമാണപ്രവർത്തനങ്ങൾ മുഴുവൻ പൂർത്തിയായ സാഹചര്യത്തിൽ, നവീകരിച്ച നെഹ്റു പാർക്ക് ഉടൻതന്നെ കുട്ടികൾക്കും കുടുംബങ്ങൾക്കും പ്രിയപ്പെട്ട വിനോദകേന്ദ്രമാകുമെന്നാണ് പ്രതീക്ഷ.

ഇരുചക്രവാഹനത്തിൽ കാർ ഇടിച്ച് വീട്ടമ്മ മരിച്ചു

മുരിങ്ങൂർ: മകനുമായി ഇരുചക്ര വാഹനത്തിൽ സഞ്ചരിക്കവെ തൊട്ടു പിന്നിൽ അമിത വേഗത്തിൽ വന്ന കാറിടിച്ച് വീട്ടമ്മക്ക് ദാരുണാന്ത്യം. തിരുമുടിക്കുന്ന് സുഗതി തെക്കിനിയത്ത് ഫ്രാൻസീസ് ഭാര്യ ഷൈനി(53) ആണ് മരിച്ചത്. ഇന്നലെ ഉച്ചയ്ക്ക് ഒന്നരയോടെ ദേശീയപാതയിൽ അങ്കമാലി ദിശയിലേക്കുള്ള ട്രാക്കിൽ മുരിങ്ങൂർ ഡിവൈൻ നഗർ മേൽപാലം ഇറങ്ങി സർവീസ് റോഡുമായി ചേരുന്ന ഭാഗത്തുവച്ചാണ് അപകടം. മകനുമായി ആശുപത്രിയിൽ പോയി വീട്ടിലേക്ക് മടങ്ങുന്ന സമയത്താണ് കാർ ഇടിച്ച് തെറിപ്പിച്ചത്. ഇരുവരും തെറിച്ചു വീഴുകയായിരുന്നു. ഓടിക്കൂടിയ നാട്ടുകാർ ഉടൻ ചാലക്കുടിയിലെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം മോർച്ചറിയിൽ. സംസ്കാരം ഇന്ന് നടക്കും. മക്കൾ: വിബിൻ, ജിബിൻ.

ഹോട്ടൽ ജീവനക്കാരൻ ട്രെയിൻതട്ടി മരിച്ചനിലയിൽ

കൊരട്ടി : തമിഴ്നാട് സ്വദേശിയായ ഹോട്ടൽ ജീവനക്കാരനെ ട്രെയിൻതട്ടി മരിച്ചനിലയിൽ കണ്ടെത്തി. തമിഴ്നാട് വിരുദ്ദുനഗർ ശ്രീവില്ലിപുത്തൂർ മുനിയപ്പ കോവിൽ സ്ട്രീറ്റിൽ ശരത് (28) ആണ് മരിച്ചത്. ചൊവ്വാഴ്ച രാത്രി 11.30 ന് കൊരട്ടി ബിവറേജിനു പിൻഭാഗത്തുള്ള ട്രാക്കിലാണ് മൃതദേഹം കണ്ടത്. ആറു മാസത്തോളമായി കൊരട്ടി ജെടിഎസ് ജംഗ്ഷനു സമീപമുള്ള ഹോട്ടലിൽ ജോലി ചെയ്തു വരികയായിരുന്ന ഇയാൾ നാട്ടിലേക്ക് പോകുന്നുവെന്ന് പറഞ്ഞാണ് ഹോട്ടലിൽ നിന്നു ഇറങ്ങിയതെന്നാണ് സൂചന. കൊരട്ടി പോലീസ് സ്ഥലത്തെത്തി മേൽനടപടികൾ സ്വീകരിച്ചു.

പോന്നോർ സ്വദേശി മാഹി റെയിൽവേ സ്റ്റേഷനിൽ കുഴഞ്ഞുവീണു മരിച്ചു

കൈപ്പറമ്പ്: പോന്നോർ സ്വദേശിയായ യുവാവ് മാഹി റെയിൽവേ സ്റ്റേഷനിൽ കുഴഞ്ഞുവീണ് മരിച്ചു. പേരമംഗലം പൂനൂർ നെടിയിടത്ത് വീട്ടിൽ രാകേഷ് (38) ആണ് മരിച്ചത്. ഓട്ടോറിക്ഷാ ഡ്രൈവറാണ്. ചൊവ്വാഴ്ച രാവിലെ മാഹി റെയിൽവേ സ്റ്റേഷൻ പ്ലാറ്റ്ഫോമിൽ കുഴഞ്ഞുവീഴുകയായിരുന്നു. തുടർന്ന് മാഹി ഗവ. ജനറൽ ആശുപത്രിയിലെത്തിക്കുന്നതിനിടെ വഴിമധ്യേ മരിക്കുകയായിരുന്നു. ആളെ തിരിച്ചറിയുന്ന രേഖകളൊന്നുമുണ്ടായിരുന്നില്ല. പിന്നീടുള്ള അന്വേഷത്തിലാണ് ആളെ വ്യക്തമായത്. 28 മുതൽ ഇയാളെ കാണാനില്ലായിരുന്നുവെന്ന് ബന്ധുക്കൾ പറഞ്ഞു. പോസ്റ്റ്മോർട്ടം നടപടികൾക്കു ശേഷം മൃതദേഹം ബന്ധുക്കൾക്ക് വിട്ട് നൽകി. സംസ്കാരം നടത്തി. ഭാര്യ: രചന. മക്കൾ: ശിവദ, തപസ്യ.

കാണാതായ വിദ്യാർഥിയെ കുളത്തിൽ മരിച്ചനിലയിൽ കണ്ടെത്തി

ചാവക്കാട്: കടപ്പുറം വട്ടേക്കാട് നിന്ന് കാണാതായ വിദ്യാര്‍ഥിയുടെ മൃതദേഹം ഒരുമനയൂര്‍ തെക്കേതല മഹല്ല് പള്ളിക്കുളത്തില്‍നിന്ന് കണ്ടെത്തി. വട്ടേക്കാട് കണ്ടാരശേരി സുബൈർ - റംഷി ദമ്പതികളുടെ മകന്‍ മുഹമ്മദ് റസലാ(15)ണ് മരിച്ചത്. തൃത്തല്ലൂര്‍ കമല നെഹ്റു സ്‌കൂളിലെ ഒന്പതാം ക്ലാസ് വിദ്യാര്‍ത്ഥിയായ റസലിനെ ചൊവ്വാഴ്ച്ച വൈകീട്ടാണ് കാണാതായത്. രാത്രിയായിട്ടും വിവരവും ലഭിക്കാതിരുന്നതിനെതുടര്‍ന്ന് വീട്ടുകാര്‍ പോലീസില്‍ പരാതി നല്‍കി. അന്വേഷണത്തില്‍ ഒരുമനയൂര്‍ റഗുലേറ്റര്‍ പരിസരത്ത് മൊബൈല്‍ ഫോണ്‍ ഉള്ളതായി അറിഞ്ഞു. ഇവിടത്തെ പൊന്തക്കാടുകളിലും ഒഴിഞ്ഞുകിടക്കുന്ന വള്ളങ്ങളിലും നാട്ടുകാരും പോലീസും തെരച്ചില്‍ നടത്തി. ഇതിനിടെ പള്ളിക്കുളത്തിന്‍റെ കരയില്‍ ചെരിപ്പും വസ്ത്രവും കണ്ടു. പള്ളിയിലെ നിരീക്ഷണ കാമറയിൽ റസലും കൂട്ടുകാരനും കുളത്തില്‍ കുളിക്കാനെത്തുന്നതിന്‍റെയും കൂട്ടുകാരന്‍ പിന്നീട് ഓടിപോകുന്നതിന്‍റെയും ദൃശ്യങ്ങള്‍ ലഭിച്ചു. ഗുരുവായൂര്‍ അഗ്നിരക്ഷാസേന കുളത്തില്‍ നടത്തിയ തെരച്ചിലിൽ ഇന്നലെ പുലര്‍ച്ചെ മൃതദേഹം കണ്ടെത്തി. റസല്‍ കുളത്തില്‍ മുങ്ങിത്താഴുന്നത് കണ്ട് പേടിച്ച കൂട്ടുകാരന്‍ വീട്ടിലെത്തി ഇക്കാര്യം ആരോടും പറയാതെ ഭയന്ന് കഴിയുകയായിരുന്നു. കബറടക്കം നടത്തി. സഹോദരൻ: സഹൽ.

പക്ഷിശല്യം: അന്വേഷണത്തിന് ആരോഗ്യമന്ത്രിയുടെ നിർദേശം

തൃശൂർ: സീസൺ കഴിഞ്ഞിട്ടും ഒഴിഞ്ഞുപോകാത്ത ദേശാടനക്കിളികൾ പൊതുജനങ്ങൾക്കുണ്ടാക്കുന്ന ദുരിതത്തെക്കുറിച്ച് അന്വേഷിക്കാൻ ആരോഗ്യമന്ത്രിയുടെ നിർദേശം. ഇക്കാര്യം പരിശോധിച്ച് റിപ്പോർട്ട് നൽകാൻ ആരോഗ്യവകുപ്പ് ഡയറക്ടറോട് ആവശ്യപ്പെട്ടു. വിവിധ ആവശ്യങ്ങൾക്ക് കളക്ടറേറ്റിൽ എത്തുന്നവർക്ക് പക്ഷികൾ മൂലമുണ്ടാകുന്ന പ്രശ്നത്തിൽ അടിയന്തര നടപടി സ്വീകരിക്കണമെന്നാവശ്യപ്പെട്ട് അയ്യന്തോൾ ജനകീയ സമിതി മന്ത്രിക്ക് നിവേദനം നൽകിയിരുന്നു. നഗരത്തിലെന്പാടും ദേശാടനക്കിളികൾ ദുരിതമുണ്ടാക്കുന്ന വിഷയം ദീപിക കഴിഞ്ഞദിവസം പ്രസിദ്ധീകരിച്ചിരുന്നു. വർഷങ്ങളായി തുടരുന്ന ദുരിതത്തിന് പരിഹാരം കാണാൻ നേരത്തെ ഏതാനും പാഴ്മരങ്ങൾ മുറിച്ചുനീക്കിയിരുന്നെങ്കിലും കിളികളുടെ ശല്യത്തിൽ ഇതുവരെയും കുറവുവന്നിട്ടില്ല. മരങ്ങളിൽ തമ്പടിച്ച ഇവയുടെ കാഷ്ടം വഴിയാത്രക്കാരുടെ ദേഹത്തുവീഴുന്നതും മഴയിൽ ഇവ നനഞ്ഞുണ്ടാകുന്ന ദുർഗന്ധവും അസഹനീയമാണ്. ഉണങ്ങിയ കാഷ്ഠത്തിന്‍റെ പൊടികൾ കാറ്റിൽ വ്യാപിക്കുന്നതും പക്ഷികൾ ചത്തുവീഴുന്നതും ആരോഗ്യപ്രശ്നങ്ങളുണ്ടാക്കുന്നുണ്ട്. ഈ സാഹചര്യത്തിലാണ് മന്ത്രിയുടെ നിർദേശമെന്ന് സമിതി കൺവീനർ ജെയിംസ് മുട്ടിക്കൽ പറഞ്ഞു.

റിംഗ് റോഡിൽ കട്ടവിരിക്കലിന് നാളെ തുടക്കമാകും

തൃശൂർ: തകർന്നു തരിപ്പണമായ കെഎസ്ആർടിസി റിംഗ് റോഡിലെ യാത്രാദുരിതത്തിന് പരിഹാരമാകുന്നു. ഇന്‍റർലോക്ക് കട്ടകൾ വിരിക്കുന്നതിനായുള്ള നിർമാണപ്രവർത്തനങ്ങൾക്ക് നാളെ തുടക്കമാകും. കഴിഞ്ഞദിവസം നടന്ന കൗൺസിൽ യോഗത്തിൽ ഇന്നലെ മുതൽ പ്രവർത്തനങ്ങൾ ആരംഭിക്കുമെന്നാണ് മേയറും, ഇന്നുമുതൽ ആരംഭിക്കുമെന്ന് ഡിവിഷൻ കൗൺസിലർ വിനോദ് പൊള്ളാഞ്ചേരിയും അറിയിച്ചിരുന്നു. പോലീസിന്‍റെ നിർദേശപ്രകാരമാണ് നിർമാണം ആരംഭിക്കുന്നത് നാളേക്കു മാറ്റിയതെന്നു മേയർ എം.കെ. വർഗീസ് അറിയിച്ചു. 57 ലക്ഷം രൂപ ചെലവിൽ കെഎസ്ആർടിസി സ്റ്റാൻഡിന്‍റെ തെക്കുഭാഗമായ പെട്രോൾ പമ്പിനു മുൻവശത്തുള്ള റോഡിന്‍റെ ഒന്നാംഘട്ട പ്രവർത്തങ്ങൾക്കാണ് നാളെ തുടക്കമാകുക. ബാക്കി പ്രവർത്തങ്ങൾക്ക് ആവശ്യമായ 20 ലക്ഷം രൂപ ഡിവിഷൻ ഫണ്ടിൽനിന്ന് എടുക്കേണ്ടിവരുമെന്ന് ഡിവിഷൻ കൗൺസിലർ അറിയിച്ചിരുന്നെങ്കിലും അതിനു സാധ്യത കുറവാണെന്നും ആ തുകയും കോർപറേഷൻ എടുക്കേണ്ടിവരുമെന്ന് മേയർ അറിയിച്ചു. എത്രയും വേഗം നിർമാണം പൂർത്തീകരിച്ച് റോഡ് ജനങ്ങൾക്കായി തുറന്നുനൽകാനാണ് ആഗ്രഹിക്കുന്നതെന്നും അദ്ദേഹം പറഞ്ഞു. റോഡിന്‍റെ ശോചനീയാവസ്ഥ: യൂത്ത് കോൺഗ്രസ് പ്രതിഷേധിച്ചു തൃശൂർ: കെഎസ്ആർടിസി റിംഗ് റോഡിന്‍റെ ശോചനീയാവസ്ഥയ്ക്ക് എതിരേ യൂത്ത് കോൺഗ്രസ് തൃശൂർ നിയോജക മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധസമരം സംഘടിപ്പിച്ചു. ഡിസിസി വൈസ് പ്രസിഡന്‍റ് ഐ.പി. പോൾ ഉദ്ഘാടനം ചെയ്തു. മണ്ഡലം പ്രസിഡന്‍റ് കെ. സുമേഷ് അധ്യക്ഷത വഹിച്ചു. യൂത്ത് കോൺഗ്രസ് ജില്ലാ വൈസ് പ്രസിഡന്‍റ് വിഷ്ണു ചന്ദ്രൻ, ഈസ്റ്റ് മണ്ഡലം കോൺഗ്രസ് കമ്മിറ്റി പ്രസിഡന്‍റ് ജോർജ് ചാണ്ടി, ഡെൽജിൻ ഷാജു, നിഖിൽ വടക്കൻ, ഷിനോജ് ഷാജു, എം.എച്ച്. ഷമീർ തുടങ്ങിയവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]