ADVERTISEMENT

ADVERTISEMENT

ലഹരിവിമുക്തകേരളം റാലിയും പൊതുസമ്മേളനവും

കൊടുങ്ങല്ലൂർ: ഇന്ത്യൻ മെഡിക്കൽ അസോസിയേഷൻ കൊടുങ്ങല്ലൂർ പൗരാവലിയും ചേർന്നു സംഘടിപ്പിച്ച ലഹരിവിമുക്ത കേരളം റാലിയും പൊതുസമ്മേളനവും കേരള യൂണിവേഴ്സിറ്റി ഓഫ് ഹെൽത്ത് സയൻസ് വൈസ് ചാൻസലർ ഡോ. മോഹൻ കുന്നുമ്മൽ ഉദ്ഘാടനം ചെയ്തു.

ഐഎംഎ പ്രസിഡന്‍റ് നദീറ ഭാനു അധ്യക്ഷത വഹിച്ചു. വി.ആർ. സുനിൽകുമാർ എംഎൽ എ, ഇ.ടി. ടൈസൺ എംഎൽഎ, മുനിസിപ്പൽ ചെയർപേഴ്സൺ ടി.കെ. ഗീത, ഇ.എം.ജബീർ, ഡോ. മുഹമ്മദ് റഷീദ്, എഞ്ചിനീയർ സിദ്ദീഖ് എന്നിവർ പ്രസംഗിച്ചു.

ADVERTISEMENT

പീഡാനുഭവസ്മരണയിൽ ദുഃഖവെള്ളി ആചരണം

തൃശൂർ: യേശുനാഥന്‍റെ പീഡാനുഭവത്തിന്‍റെയും കുരിശുമരണത്തിന്‍റെയും സ്മരണയിൽ നടന്ന ദുഃഖവെള്ളി ആചരണങ്ങളിൽ സാക്ഷികളായി വിശ്വാസിസമൂഹം. ദേവാലയങ്ങളിൽ പ്രത്യേക പ്രാർഥനകളും നഗരികാണിക്കലും നടന്നു. വ്യാകുലമാതാവിൻ ബസിലിക്കയിൽനിന്ന് ആരംഭിച്ച നഗരികാണിക്കൽ പ്രദക്ഷിണത്തിലും വിശുദ്ധ കുരിശിന്‍റെ വഴിയിലും ആയിരങ്ങൾ പങ്കാളികളായി. യേശുനാഥന്‍റെ പ്രതീകാത്മക മൃതദേഹവുംവഹിച്ച് സ്വരാജ് റൗണ്ട് ചുറ്റിയുള്ള പ്രദിക്ഷണത്തിന് അതിരൂപത ആർച്ച്ബിഷപ് മാർ ആൻഡ്രൂസ് താഴത്ത് നേതൃത്വം വഹിച്ചു. ബസിലിക്ക റെക്ടർ ഫാ. തോമസ് കാക്കശേരി, അസിസ്റ്റന്‍റ് വികാരിമാരായ ഫാ. ബെൻവിൻ തട്ടിൽ, ഫാ. പ്രിൻസ് ചെറുതാനിക്കൽ, കൈക്കാരന്മാരായ വി.ആർ. ജോണ്‍, ജോണി കുറ്റിച്ചാക്കു, പി.ആർ. ജോർജ്, അബി ചെറിയാൻ, പ്രോഗ്രാം കണ്‍വീനർ മോനി പൊന്മാണി തുടങ്ങിയവർ ചടങ്ങുകൾക്കു നേതൃത്വം നൽകി. ലൂർദ് കത്തീഡ്രലിൽ നടന്ന ദുഃഖവെള്ളി തിരുക്കർമങ്ങൾക്ക് അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത് മുഖ്യകാർമികത്വം വഹിച്ചു. കത്തീഡ്രൽ വികാരി ഫാ. ജോസ് വല്ലൂരാൻ, ഫാ. ഫ്രാൻസീസ് പള്ളിക്കുന്നത്ത്, ഫാ. ഹേഡ്‌ലി നീലങ്കാവിൽ, സഹ വികാരിമാരായ ഫാ. പ്രിജോവ് വടക്കേത്തല, ഫാ. ജീസ്മോൻ ചെമ്മണൂർ എന്നിവർ സഹകാർമികരായി. നടത്തുകൈക്കാരൻ ലൂവി കണ്ണാത്ത്, മറ്റു കൈക്കാരന്മാരായ ജോസ് ചിറ്റാട്ടുകര, ജോജു മഞ്ഞില, തോമസ് കോനിക്കര തുടങ്ങിയവർ നേതൃത്വം നൽകി. ഇരിങ്ങാലക്കുട: സെന്‍റ്തോമസ് കത്തീഡ്രലില്‍ നടന്ന പീഢാനുഭവ തിരുക്കര്‍മങ്ങള്‍ക്കു ബിഷപ് മാര്‍ പോളി കണ്ണൂക്കാടന്‍ മുഖ്യകാര്‍മികത്വം വഹിച്ചു. ഉച്ചത്തിരിഞ്ഞ് മൂന്നിന് പീഢാനുഭവ സന്ദേശം നല്‍കി. തുടര്‍ന്ന് ക്രിസ്തുവിന്‍റെ തിരുശരീരവുമായി നഗരികാണിക്കലും പരിഹാര പ്രദക്ഷിണവും നടന്നു. രൂപത വികാരി ജനറാൾമാരായ മോണ്‍. ജോസ് മാളിയേക്കല്‍, മോണ്‍. വില്‍സണ്‍ ഈരത്തറ, കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍, ഫാ. ആന്‍റോ തച്ചില്‍, ബിഷപ് സെക്രട്ടറി ഫാ. ജോര്‍ജി തേലപ്പിള്ളി, അസി. വികാരിമാരായ ഫാ. ഓസ്റ്റിന്‍ പാറയ്ക്കല്‍, ഫാ. ബെല്‍ഫിന്‍ കോപ്പുള്ളി, ഫാ. ആന്‍റണി നമ്പളം എന്നിവര്‍ നേതൃത്വം നല്‍കി.

ജില്ലയിൽ മൂന്നാംഘട്ട ഡിജിറ്റൽ സർവേ നടപടികൾ ആരംഭിച്ചു

പട്ടിക്കാട്: തൃശൂർ ജില്ലയിൽ മൂന്നാംഘട്ട ഡിജിറ്റൽ സർവേ നടപടികളുടെയും പാണഞ്ചേരി വില്ലേജിന്‍റെ ഡിജിറ്റൽ ലാൻഡ് സർവെ ക്യാമ്പ് ഓഫീസിന്‍റെയും ഉദ്ഘാടനം റവന്യൂ മന്ത്രി കെ. രാജൻ നിർവഹിച്ചു. ജില്ലാ പഞ്ചായത്ത് പ്രസിഡന്‍റ് വി. എസ്. പ്രിൻസ് അധ്യക്ഷത വഹിച്ചു. ഒല്ലൂക്കര ബ്ലോക്ക് പഞ്ചായത്ത് പ്രസിഡന്‍റ് കെ.ആർ. രവി മുഖ്യാതിഥിയായി. കേരളത്തിലെ റീസർവെ നടപടികൾ വിജയകരമായി വേഗത്തിൽ മുന്നോട്ട് പോകുകയാണെന്ന് മന്ത്രി പറഞ്ഞു. ജിയോളജിക്കൽ സർവെയുടെ സഹായത്തോടെ അത്യാധുനിക ഉപകരണങ്ങൾ ഉപയോഗിച്ച് ആരംഭിച്ച ഡിജിറ്റൽ റീസർവേയുടെ മൂന്നാം ഘട്ടമാണ് ഇപ്പോൾ നടക്കുന്നത്. ആദ്യഘട്ടത്തിൽ 200 വില്ലേജുകളിലും രണ്ടാം ഘട്ടത്തിൽ 238 വില്ലേജുകളിലും മൂന്നാം ഘട്ടത്തിൽ 200 വില്ലേജുകളിലും റിസർവെ നടക്കുന്നുണ്ടെന്നും മന്ത്രി പറഞ്ഞു. ജില്ലാ പഞ്ചായത്തംഗങ്ങളായ പി.എസ്. വിനയൻ, കെ.വി. സജു, ഒല്ലൂക്കര ബ്ലോക്ക് പഞ്ചായത്ത് വൈസ് പ്രസിഡന്‍റ് ഫ്രാൻസീന ഷാജു, ബ്ലോക്ക് പഞ്ചായത്തംഗം രമ്യ രാജേഷ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്‌സൺ സുബൈദ അബൂബക്കർ, വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ഇ.ടി. ജലജൻ, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്‌സൺ കെ.വി. അനിത, പാണഞ്ചേരി ഗ്രാമപഞ്ചായത്ത് വൈസ് പ്രസിഡന്‍റ് സാവിത്രി സദാനന്ദൻ, സബ്കളക്ടർ അഖിൽ. വി മേനോൻ, എൽ.ആർ. ഡെപ്യൂട്ടി കളക്ടർ എം.സി. ജ്യോതി, എൽ.എ. ഡെപ്യൂട്ടി കളക്ടർ ആർ. മനോജ്, തൃശൂർ സർവെ ഡെപ്യൂട്ടി ഡയറക്ടർ വി.ഡി.സിന്ധു, തൃശൂർ തഹസിൽദാർ ടി. ജയശ്രീ, ഒല്ലൂക്കര സബ് രജിസ്ട്രാർ കെ.പി. റസീന, പാണഞ്ചേരി വില്ലേജ് ഓഫീസർ പി. പി. ആന്‍റോ തുടങ്ങിയവർ പങ്കെടുത്തു.

തീരദേശപരിപാലന ചട്ടം ലംഘിച്ചു നടത്തിയ നിർമാണങ്ങൾ തടഞ്ഞു

ഏനാമാവ്: കോടതിവിധി കാറ്റിൽ പറത്തി, തീരദേശ പരിപാലന ചട്ടം ലംഘിച്ച് നടത്തിയ നിർമാണങ്ങൾ വെങ്കിടങ്ങ് ഗ്രാമ പഞ്ചായത്ത് അധികൃതർ തടഞ്ഞു. ഏനാമാവ് പള്ളി കടവിൽ പുഴയോട് ചേർന്ന സ്ഥലത്താണ് സ്വകാര്യ വ്യക്തി അനധികൃത നിർമാണം നടത്തിയത്. വെങ്കിടങ്ങ് പഞ്ചായത്ത് മുൻ പ്രസിഡന്‍റും മെമ്പറുമായ ചാന്ദിനി വേണു, സെക്രട്ടറി പി.എ. ഷൈല, ജൂണിയർ സൂപ്രണ്ട് കെ.ജി. ഷീബ, പാവറട്ടി എസ്ഐ എം.എൻ. ഉണ്ണികൃഷ്ണൻ എന്നിവരുടെ നേതൃത്വത്തിലുള്ള സംഘമാണ് നേരിട്ട് സ്ഥലത്ത് എത്തി അനധികൃത നിർമാണം തടഞ്ഞത്. ഹൈക്കോടതി ഉത്തരവ് ഇറങ്ങിയിട്ടും നിർമാണവും നികത്തലും തുടരുകയായിരുന്നുവെന്ന് പഞ്ചായത്ത് സെക്രട്ടറി പി.എ. ഷൈല പറഞ്ഞു. തണ്ണീർത്തടത്തിന്‍റെ സ്വഭാവത്തിലുള്ളതും തീരദേശപരിപാലന നിയമത്തിന്‍റെ പരിധിയിൽ വരുന്നതുമായ വെങ്കിടങ്ങ് വില്ലേജിൽ ഉൾപ്പെട്ട ഭൂമിയുടെ ഘടനക്ക് രൂപമാറ്റം വരുത്തിയാണ് നിർമാണ പ്രവർത്തനങ്ങൾ ദ്രുത ഗതിയിൽ നടത്തുന്നത്. കേരള ഹൈക്കോടതി വിധിയുടെ അടിസ്ഥാനത്തിൽ വെങ്കിടങ്ങ് കൃഷി ഓഫീസർ തുടർ നടപടി സ്വീകരിച്ചുവരുന്നതിനിടയിലാണ് വീണ്ടും മണ്ണടിച്ച് സ്വകാര്യ വ്യക്തി പുഴയോരത്ത് സംരക്ഷണഭിത്തി നിർമിച്ചിരുന്നത്. രണ്ട് വർഷങ്ങളായി ഏനാമാവ് പുഴയോരത്ത് നടക്കുന്ന അനധികൃത നിർമ്മാണത്തിനും നികത്തലിനുമെതിരെ വിവിധ രാഷ്ട്രിയ കക്ഷികളുടെ നേതൃത്വത്തിൽ നിരന്തര സമരം നടന്നിരുന്നു. ഇതിനെ തുടർന്ന് അന്നത്തേ കളക്ടർ ഇടപ്പെടുകയും അനധികൃത നിർമാണം പൊളിച്ചുനീക്കുകയും ബോർഡ് സ്ഥാപിക്കുകയും ചെയ്തിരുന്നു. എന്നാൽ ഒരു ഇടവേളക്കുശേഷമാണ് വീണ്ടും അനധികൃത നികത്തലും നിർമാണവും നടന്നിരിക്കുന്നത്.

മദ്യ രാസ ലഹരികൾ മാനവികതയെ കാർന്നുതിന്നുന്നു: മാർ നീലങ്കാവിൽ

തൃശൂർ: മദ്യ രാസ ലഹരികൾ മാനവികതയെ കാർന്നുതിന്നുന്നുവെന്ന് അതിരൂപത സഹായമെത്രാൻ മാർ ടോണി നീലങ്കാവിൽ. കെസിബിസി മദ്യവിരുദ്ധസമിതി തൃശൂർ അതിരൂപത കോടന്നൂർ സെന്‍ററിൽ ഈസ്റ്റർ മദ്യവിമുക്തമാക്കുക എന്ന ലക്ഷ്യത്തോടെ സംഘടിപ്പിച്ച ഏകദിന പ്രാർഥനാ ഉപവാസയജ്ഞം ഉദ്ഘാടനം ചെയ്യുകയായിരുന്നു അദ്ദേഹം. അതിരൂപത പ്രസിഡന്‍റ് വി.എം. അഗസ്റ്റിൻ അധ്യക്ഷത വഹിച്ചു. കോടന്നൂർ പള്ളി വികാരി ഫാ. ആന്‍റണി ആലുക്ക, അതിരൂപത ഡയറക്ടർ റവ.ഡോ. ദേവസി പന്തല്ലൂക്കാരൻ, മുൻ ഡയറക്ടർ ഫാ. ഡേവിസ് ചക്കാലയ്ക്കൽ, സ്വാമി തേജസ്വരൂപാനന്ദ, ഇസാബിൻ അബ്ദുൾ കരീം, ഇ.എ. ജോസഫ്, സിസ്റ്റർ എൻസ്വീഡ് സിഎസ്‌സി, എ.ടി. പോൾസൺ, സിജോ ഇഞ്ചോടിക്കാരൻ, ടി.എസ്. എബ്രഹാം, സി.പി. ഡേവിസ്, ടി.എൽ. ആന്‍റണി, ഷിബി ചാഴൂർ, റെനിൽ കള്ളിക്കാടൻ, സി.ആർ. ലോജു, ഡെൻസൺ ചിറയത്ത്, ഔസേഫ് കോടന്നൂർ, സി.വി. ജോസഫ് എന്നിവർ പ്രസംഗിച്ചു. ഒല്ലൂർ ഫൊറോന വികാരി ഫാ. വർഗീസ് കുത്തൂർ സമാപനസന്ദേശം നല്കി, പ്രോഗ്രാം കൺവീനർ ജോഷി വല്ലച്ചിറക്കാരൻ, ബെന്നി പുളിക്കൻ, ജോസ് വടക്കേത്തല, എൻ.വി. ജോസഫ്, ജയിൻ കുരിയൻ തുടങ്ങിയവർ നേതൃത്വം നല്കി.

നവീകരിച്ച അരിമ്പൂർ ഗ്രാമപഞ്ചായത്ത് ഓഫീസിന്‍റെ ഉദ്ഘാടനം ഇന്ന്‌

അരിമ്പൂർ: ആധുനിക രീതിയിൽ നവീകരിച്ച അരിമ്പൂർ ഗ്രാമപഞ്ചായത്ത് ഓഫീസിന്‍റെ ഉദ്ഘാടനം ഇന്ന് ഉച്ചകഴിഞ്ഞ് മൂന്നിന് മന്ത്രി വി. അബ്ദുറഹ്മാൻ നിർവഹിക്കുമെന്ന് ഗ്രാമ പഞ്ചായത്ത് വൈസ് പ്രസിഡന്‍റ് സി.ജി. സജീഷ്, വികസന സ്റ്റാൻഡിംഗ് കമ്മിറ്റി ചെയർ പേഴ്സൺ സിന്ധു സഹദേവൻ, അംഗങ്ങളായ സി.പി.പോൾ, ജില്ലി വിത്സൻ എന്നിവർ വാർത്താ സമ്മേളനത്തിൽ അറിയിച്ചു. 38 ലക്ഷം രൂപ ചെലവിലാണ് നവീകരിച്ചത്. വിവിധ ആവശ്യങ്ങൾക്കായി വരുന്നവർക്ക് തടസമില്ലാത്ത രീതിയിൽ സേവനങ്ങൾ ലഭ്യമാക്കുന്നതിന് ഓഫീസ് നവീകരണം ഉപകരിക്കും. മുരളി പെരുനെല്ലി എംഎൽഎ അധ്യക്ഷത വഹിക്കും. അന്തിക്കാട് ബ്ലോക്ക് പ്രസിഡന്‍റ് കെ.കെ.ശശിധരൻ മുഖ്യാതിഥിയായിരിക്കും.

ചാഴൂരിൽ ആന ഇടഞ്ഞു

ചാഴൂർ: പാറക്കുളങ്ങര ശാസ്ത ക്ഷേത്രത്തിലെ ഉത്സവത്തിനിടെ ആന ഇടഞ്ഞു. വെള്ളിയാഴ്ച വൈകുന്നേരത്തെ എഴുന്നള്ളിപ്പിനു ശേഷം ആനയെ കെട്ടാൻ ശ്രമിക്കുന്നതിനിടെയാണ് പീച്ചിലിയിൽ ശിവൻ എന്ന ആന ഇടഞ്ഞത്. 10 മിനിറ്റിനകം ആനയെ പാപ്പാൻമാർ ചേർന്ന് തളച്ചതിനാൽ അനിഷ്ഠ സംഭവങ്ങൾ ഒന്നും ഉണ്ടായില്ല. ആനയെ പിന്നീട് കൊണ്ട് പോയി.

കാട്ടുപന്നി ആക്രമണം: കാൽനടയാത്രക്കാരന് പരിക്കേറ്റു

വിലങ്ങന്നൂർ: പായ്ക്കണ്ടത്തു നിന്നും വിലങ്ങന്നൂരിലേക്ക് നടന്നു പോകുന്നതിനിടെ ഉണ്ടായ കാട്ടുപന്നി ആക്രമണത്തിൽ വിലങ്ങന്നൂർ സ്വദേശിക്ക് പരിക്കേറ്റു. വിലങ്ങന്നൂർ പായ്ക്കണ്ടം കുഴിക്കാട്ടിൽ മനോജിനാണ് (56) പരിക്കേറ്റത്. ഇദ്ദേഹത്തെ പട്ടിക്കാട് സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ രാവിലെ 8.45നാണ് സംഭവം ഉണ്ടായത്. കാട്ടുപന്നിയെ വെടിവെച്ചു കൊല്ലുന്നതിന് ഷൂട്ടർമാരെ അനുവദിക്കണമെന്ന് ആവശ്യപ്പെട്ട് രേഖാമൂലം കത്ത് നൽകിയിട്ടും പഞ്ചായത്ത് ഭരണസമിതി കാണിച്ച അനാസ്ഥ മൂലമാണ് മനോജിന് കാട്ടുപന്നി ആക്രമണം നേരിടേണ്ടി വന്നതെന്ന് വാർഡ് മെമ്പർ ഷൈജു കുര്യൻ ആരോപിച്ചു. വന്യജീവി ആക്രമണങ്ങളിൽ നിന്നും ജനങ്ങളുടെ സുരക്ഷ ഉറപ്പുവരുത്താൻ സർക്കാർ വേണ്ട നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു.

പാലപ്പിള്ളിയില്‍ ബൈക്ക് യാത്രക്കാരായ കുടുംബത്തിനുനേരേ പാഞ്ഞടുത്ത് കാട്ടാന

പാലപ്പിള്ളി: കുണ്ടായിയില്‍ ബൈക്ക് യാത്രക്കാരായ കുടുംബത്തിന് നേരെ പാഞ്ഞടുത്ത് കാട്ടാന.കുണ്ടായി എസ്റ്റേറ്റ് ജീവനക്കാരനായ കുഞ്ഞിപ്പയും ഭാര്യയും മകളും ബൈക്കില്‍ പോകുമ്പോഴാണ് സംഭവം. മകളെ ആശുപത്രിയിലേക്ക് കൊണ്ടുപോയി മടങ്ങുന്നതിനിടെ റോഡില്‍ നിന്നിരുന്ന കാട്ടാനയുടെ മുന്‍പില്‍ അകപ്പെടുകയായിരുന്നു. വ്യാഴാഴ്ച രാത്രി 12 മണിയോടെയായിരുന്നു സംഭവം. ആനയുടെ അഞ്ച് മീറ്റര്‍ അകലെയെത്തിയ ഇവര്‍ക്ക് നേരെ ആന പാഞ്ഞടുക്കുകയായിരുന്നു. ബൈക്ക് റോഡിലിട്ട് ഓടിയ മൂന്നുപേരും തലനാരിഴക്കാണ് ആനയുടെ ആക്രമണത്തില്‍ നിന്ന് രക്ഷപ്പെട്ടത്. ഓടുന്നതിനിടെ ശ്വാസം കിട്ടാതെ റോഡില്‍ ഇരുന്ന കുഞ്ഞപ്പയുടെ അടുത്തേക്ക് പാഞ്ഞുവന്ന ആനയെ ഭാര്യ കൈയില്‍ കരുതിയ ടോര്‍ച്ച് എടുത്ത് എറിയുകയായിരുന്നു. ഇതിനിടെ ഇവരുടെ നിലവിളി കേട്ട് സമീപത്തെ ഡിസ്‌പെന്‍സറിയിലെ ജീവനക്കാരനും ഓടിയെത്തി. അതുവഴി വന്ന വെള്ളിക്കുളങ്ങര ഫോറസ്റ്റ് ഉദ്യോഗസ്ഥര്‍ അവരുടെ ജീപ്പിലാണ് ഇവരെ വീട്ടില്‍ എത്തിച്ചത്. കൂട്ടം തെറ്റിയ ആന ദിവസങ്ങളായി പ്രദേശത്ത് ഭീതി പരത്തുകയാണ്. ജനവാസ മേഖലയില്‍ ഇറങ്ങിയ ഒറ്റയാനെ മയക്കുവെടിവെച്ച് പിടികൂടണമെന്നാണ് നാട്ടുകാരുടെ ആവശ്യം.

പ്രത്യാശയുടെ തിരുനാൾ

സമാധാനവും പ്രതീക്ഷയും പകരുന്ന തിരുനാൾ: മാർ ആൻഡ്രൂസ് താഴത്ത് തൃശൂർ അതിരൂപത മെത്രാപ്പോലീത്ത ‌തിരുനാളുകളുടെ തിരുനാൾ എന്നാണ് ഉയിർപ്പുതിരുനാളിനെ വിശേഷിപ്പിക്കുന്നത്. കാരണം, ക്രൈസ്തവവിശ്വാസത്തിന്‍റെ അടിസ്ഥാനമാണ് ഈശോയുടെ ഉത്ഥാനം. “ക്രിസ്തു ഉയിർപ്പിക്കപ്പെട്ടില്ലെങ്കിൽ ഞങ്ങളുടെ പ്രസംഗം വ്യർഥമാണ്; നിങ്ങളുടെ വിശ്വാസവും വ്യർഥം”(1 കോറി. 15:14). ഉത്ഥിതനായ ക്രിസ്തു നൽകുന്ന ഏറ്റവും വലിയ സന്ദേശം സമാധാനമാണ്. അവൻ പറഞ്ഞു, “ നിങ്ങൾക്ക് സമാധാനം” (ലൂക്കാ 24:36). അതുവഴി ഭയത്തെ അവിടുന്ന് ഇല്ലാതാക്കി. സമാധാനത്തിന്‍റെയും കടുത്ത ഭയത്തിന്‍റെയും മധ്യത്തിലൂടെയാണ് ലോക ജനത ഇന്നു കടന്നുപോകുന്നത്. രാഷ്ട്രങ്ങൾ തമ്മിലും രാഷ്ട്രത്തിനകത്തും കുടുംബബന്ധങ്ങൾ തമ്മിലും കുടുംബത്തിന് അകത്തും സമാധാനമില്ലായ്മയും ഭയപ്പാടും നിറയുന്നു. ഇവിടെയാണ് ഈശോയുടെ ഉത്ഥാനതിരുനാളിന്‍റെ സന്ദേശം പ്രസക്തമാകുന്നത്. തിന്മ എങ്ങനെയൊക്കെ നന്മയുടെ രൂപംധരിച്ചാലും അസത്യം സത്യത്തിന്‍റെ മുഖം അണിയാൻ ശ്രമിച്ചാലും സകല മറകളും നീക്കി എല്ലാ പ്രതിബന്ധങ്ങളെയും അതിജീവിച്ച് കല്ലറയ്ക്കുള്ളിൽനിന്ന് സത്യം ഉയിർത്തെഴുന്നേൽക്കും. അതു യഥാർഥസ്വാതന്ത്ര്യത്തിലേക്കുള്ള ഉയിർത്തെഴുന്നേൽപ്പ് ആയിരിക്കും. ക്രിസ്തുവാകുന്ന നിത്യസത്യം ആരെയെങ്കിലും ഭയപ്പെടുത്തുന്നുണ്ടെങ്കിൽ അതു തിന്മയാണ്, അസത്യമാണ്. മരണത്തിന്‍റെ നിഴൽ വീണ താഴ്വരകൾക്കപ്പുറത്തു പ്രതീക്ഷയുടെ പൊൻപുലരിയുണ്ടെന്ന് ഓർമിപ്പിക്കുന്ന തിരുനാളാണ് ഉത്ഥാനത്തിരുനാൾ. പ്രത്യാശയോടെ നമുക്കും കാത്തിരിക്കാം. ഏവർക്കും ഉയിർപ്പുതിരുനാളിന്‍റെ ആശംസകൾ. മുറിവേറ്റ ലോകത്തിന്‍റെ വലിയ പ്രതീക്ഷ: മാർ ഔഗിൻ കുര്യാക്കോസ് മെത്രാപ്പോലിത്ത ഗലീലിയിൽനിന്ന് തലയോടിടം എന്നർഥമുള്ള ഗൊൽഗോഥായിലെ ക്രൂശിലേക്ക് അവനോടുകൂടെ പോന്ന സ്ത്രീകൾ സുഗന്ധവർഗവും പരിമളതൈലവും ഒരുക്കി ആഴ്ചവട്ടത്തിന്‍റെ ഒന്നാംദിവസം അതികാലത്തു കല്ലറയ്ക്കൽ എത്തി നോക്കിയപ്പോൾ യേശുവിന്‍റെ ശരീരം കണ്ടില്ല. പകരം അവിടെനിന്നിരുന്ന രണ്ടു ദൂതന്മാർ അവരോടു പറഞ്ഞു. (ലൂക്ക 24: 5-6) നിങ്ങൾ ജീവനുള്ളവനെ മരിച്ചവരുടെ ഇടയിൽ അന്വേഷിക്കുന്നത് എന്ത്? അവൻ ഇവിടെ ഇല്ല; ഉയിർത്തെഴുന്നേറ്റിരിക്കുന്നു. അതാണ് ഉയിർപ്പിന്‍റെ സുവിശേഷം. ലോകം ഉണ്ടായതുമുതൽ ഇതുവരെയും ആരുംചെയ്യാത്ത അദ്ഭുതങ്ങളും അടയാളങ്ങളും ചെയ്ത് സാത്താനെയും പാപത്തെയും അവസാനം മരണത്തെപ്പോലും ജയിച്ച ലോകരക്ഷിതാവിന്‍റെ ഉയിർപ്പുതിരുനാൾ ഇന്നത്തെ മുറിവേറ്റ ലോകത്തിനും ആഗോളജനതയ്ക്കും വലിയ പ്രതീക്ഷയേകുന്നു. സ്നേഹവും ദയയും ക്ഷമയും അനുകന്പയുമാണ് തന്‍റെ രക്ഷാദൗത്യത്തിന്‍റെ ആയുധങ്ങളെന്നും, പ്രാർഥന, ഉപവാസം, സഹനം, ക്രൂശിന്‍റെ അനുഭവം എന്നിവയാണ് ഈ ലോകത്തിലെ സമൃദ്ധിയായ ജീവനും പരലോകത്തെ നിത്യജീവനിലേക്കുമുള്ള മാർഗം എന്നും ക്രിസ്തു തന്‍റെ ജീവിതംകൊണ്ട് സാക്ഷ്യപ്പെടുത്തി. ഇന്നത്തെ മുറിവേറ്റ ലോകവും ജനതയും പുനരുത്ഥാനത്തിനായി ക്രിസ്തുവിലേക്ക് ഉറ്റുനോക്കുന്നു. ക്രിസ്തുവിന്‍റെ വചനത്തിനും ക്രൂശിന്‍റെ മാർഗത്തിനും ഇന്നു മൂല്യം ഏറിവരുന്നു. ലോകസമാധാനത്തിനായി ക്രൂശ് എടുക്കാനും ആ ക്രൂശിന്‍റെ, സ്നേഹത്തിന്‍റെ, സഹനത്തിന്‍റെ മാർഗത്തിലൂടെ ജീവിതം പുനഃസൃഷ്ടിക്കാനും സമൂഹത്തെ വീണ്ടെടുക്കാനും ഉയിർപ്പുതിരുനാൾ നമുക്ക് പ്രചോദനമേകട്ടെ. ഈസ്റ്റർ: പ്രത്യാശയുടെ ഉണർത്തുപാട്ട്: മാര്‍ പോളി കണ്ണൂക്കാടന്‍ ഇരിങ്ങാലക്കുട രൂപത മെത്രാന്‍ ‌ക്രൈസ്തവവിശ്വാസത്തിന്‍റെ ആധാരശിലയാണ് ഈസ്റ്റര്‍. അന്ധകാരശക്തികള്‍ക്കും പീഡനങ്ങള്‍ക്കും കുരിശുമരണത്തിനുംമേല്‍ വിജയംവരിച്ച നിത്യതയുടെ വിളംബരമായിരുന്നു ക്രിസ്തു വിന്‍റെ പുനരുത്ഥാനം. തളര്‍ച്ചയിലും തകര്‍ച്ചയിലും പ്രതിസന്ധികളിലും വെല്ലുവിളികളിലും സമസ്തജനങ്ങള്‍ക്കും പ്രത്യാശയുടെ ഉണര്‍ത്തുപാട്ടാണ് ഈസ്റ്റര്‍. യുദ്ധവും സംഘര്‍ഷവും കലഹങ്ങളും അക്രമങ്ങളും നമ്മുടെ ജീവിതപരിസരങ്ങളില്‍ അശാന്തിയും ആശങ്കകളും പരത്തിയിരിക്കുന്നു. വ്യക്തികളും ജനസമൂഹങ്ങളും ദേശങ്ങളും രാജ്യങ്ങളും ചിന്തയിലും പ്രവര്‍ത്തനങ്ങളിലും മതിലുകള്‍തീര്‍ത്ത് സ്വാര്‍ഥതയുടെ തുരുത്തുകളായി മാറിക്കൊണ്ടിരിക്കുന്ന കാലം. സത്യവും നീതിയും സ്‌നേഹവും കാരുണ്യവും, വിഭാഗീയതകള്‍ക്കും വിദ്വേഷപ്രചാരണങ്ങള്‍ക്കുംമുന്നില്‍ തമസ്‌കരിക്കപ്പെടുന്ന കാലം. മദ്യവും ലഹരിയും അഴിമതിയും അക്രമവും ചൂഷണവും വഞ്ചനയും മനുഷ്യജീവിതങ്ങളുടെ നിറംകെടുത്തിക്കൊണ്ടിരിക്കുന്ന ആസുരകാലം. ഇവയ്‌ക്കെല്ലാം ഇരകളായി മനസുമടുത്ത് മോചനത്തിനുവേണ്ടി കേഴുന്നവരുടെ ശബ്ദങ്ങള്‍ അടിച്ചമര്‍ത്തപ്പെടുകയും അവഗണിക്കപ്പെടുകയും ചെയ്യുന്നു. ക്രിസ്തുവിന്‍റെ ഉയിര്‍ത്തെഴുന്നേല്‍പ്പ് ചൂണ്ടിക്കാട്ടുന്നതു പ്രത്യാശയിലേക്കും നവജീവിതത്തിലേക്കുമുള്ള നടപ്പാതകളെയാണ്. വിദ്വേഷവും വിഭാഗീയതയും ശത്രുവത്കരണവും അന്യവത്കരണവും മനസില്‍നിന്നകറ്റി പുതിയ ജീവിതത്തിലേക്കു ചുവടുവയ്ക്കാന്‍ ഈസ്റ്റര്‍ പ്രചോദനമാകണം. പ്രത്യാശയിലേക്കും വിശ്വമാനവികതയിലേക്കും ഉയിര്‍ത്തെഴുന്നേല്‍ക്കാന്‍ വ്യക്തികള്‍ക്കും സമൂഹങ്ങള്‍ക്കും ഈസ്റ്റര്‍ നിമിത്തമാകട്ടെ. ഈസ്റ്റർ: മനുഷ്യരാശിക്കു പ്രത്യാശയുടെ പ്രകാശം: മാർ ടോണി നീലങ്കാവിൽ തൃശൂർ അതിരൂപത സഹായമെത്രാൻ ക്രിസ്തുവിന്‍റെ പുനരുത്ഥാനം മനുഷ്യരാശിക്കു പ്രത്യാശയുടെ പ്രകാശമാണ്. മരണത്തെ തരണംചെയ്ത യേശുക്രിസ്തു, നമുക്കു ജീവിതത്തിലും സമാധാനത്തിലും വിജയിക്കാനുള്ള കരുത്ത് പകരുന്നു. ക്രിസ്തീയവിശ്വാസത്തിന്‍റെ പരമോന്നത സാക്ഷ്യമാണ് ഈസ്റ്റർ. മരണത്തിനുമേലെയുള്ള ജീവന്‍റെ വിജയവും നിരാശയ്ക്കുമേലെയുള്ള പ്രത്യാശയുടെ ഉണർവുമാണ് ഉത്ഥാനതിരുനാൾ. നമ്മുടെ വിശ്വാസത്തെ പുതുക്കാനും ദൈവത്തിന്‍റെ അതിരില്ലാത്ത കരുണയെ സ്വീകരിക്കാനും ക്രിസ്തുവിന്‍റെ വിജയത്തിന്‍റെ പ്രകാശത്തിൽ നടക്കാനും ഈ ദിനം നമ്മെ ആഹ്വാനം ചെയ്യുന്നു. കത്തോലിക്കാസഭയുടെ മതബോധനഗ്രന്ഥം 638-ാമത്തെ ഖണ്ഡിക ഇപ്രകാരം പറഞ്ഞുവയ്ക്കുന്നു: ""യേശുവിന്‍റെ പുനരുത്ഥാനം ക്രിസ്തുവിലുള്ള നമ്മുടെ വിശ്വാസത്തിന്‍റെ പരമോന്നതസത്യമാണ്. ആദിമ ക്രൈസ്തവസമൂഹം കേന്ദ്രസത്യമായി ഇതു വിശ്വസിക്കുകയും ജീവിക്കുകയും അടിസ്ഥാനപരമായി ഒന്നായി പാരന്പര്യത്തിലൂടെ പകർന്നുനൽകുകയും ചെയ്തു. ഇതു പുതിയനിയമരേഖകളാൽ സ്ഥാപിതവും കുരിശിനോടൊപ്പം പെസഹാരഹസ്യത്തിന്‍റെ കാതലായ ഒരു ഭാഗമായി പ്രഘോഷിക്കപ്പെട്ടതുമാണ്.'' യേശുവിന്‍റെ ഉത്ഥാനമാണ് നമ്മുടെ ഉത്ഥാനത്തിന്‍റെയും അടിസ്ഥാനം. തന്‍റെ കഷ്ടപ്പാടുകളിലും മരണത്തിലും ക്രിസ്തു നമ്മുടെ പാപഭാരങ്ങൾ വഹിച്ച് മനുഷ്യരാശിയെ ദൈവത്തോട് അനുരഞ്ജിപ്പിച്ചു. ആ ക്രൂശിൽമാത്രം അവസാനിപ്പിക്കാതെ, പുനരുത്ഥാനത്തിലൂടെ നിത്യജീവിതത്തിന്‍റെ വാതിലുകൾ തുറന്നു. ക്രിസ്തുവിൽ എല്ലാം സാധ്യമാണ് എന്ന പ്രത്യാശയിൽ നമുക്കു പിടിച്ചുനിൽക്കാം. ഈസ്റ്റർ പ്രതീക്ഷയുടെ വിളിച്ചുചൊല്ലൽ: ഡോ. അംബ്രോസ് പുത്തൻവീട്ടിൽ കോട്ടപ്പുറം രൂപത ബിഷപ് മരണത്തിന്‍റെ ഇരുളിനെ ജയിച്ച് ഉയിർത്തെഴുന്നേറ്റ യേശുവിന്‍റ വിജയത്തിന്‍റെ ഓർമ പുതുക്കുന്നതാണ് വിശുദ്ധ ഈസ്റ്റർ.ഇന്ന് നമ്മുടെ കേരളം അഭിമുഖീകരിക്കുന്ന പ്രശ്നങ്ങൾ മനസാക്ഷിയെ വേദനിപ്പിക്കുന്നതാണ്. മദ്യാസക്തിയിലും മയക്കുമരുന്ന് ഉപയോഗത്തിലും നമ്മുടെ കൊച്ചുകേരളം മുൻപന്തിയിലാണ്. ആത്മഹത്യകളും കൊലപാതകങ്ങളും വന്യജീവി ആക്രമണങ്ങൾമൂലം ജീവൻ നഷ്ടപ്പെടുന്ന സംഭവങ്ങളും നമ്മെ ഭയപ്പെടുത്തുന്നുണ്ട്. നീതിക്കുവേണ്ടിയും സാമൂഹികമായ അവകാശങ്ങൾക്കുവേണ്ടിയും നടക്കുന്ന സമരങ്ങൾ, അമ്മമാരുടെയും മക്കളുടെയും കണ്ണുനീരും ഒക്കെ നമ്മെ വളരെയധികം വേദനിപ്പിക്കുന്നതാണ്. ഭൂമിയിലെ എല്ലാവിധ ബുദ്ധിമുട്ടുകളും ദുരിതങ്ങളും സഹനങ്ങളും ഉണ്ടാകുമ്പോഴും അതിനെ അതിജീവിക്കുവാൻ നമുക്ക് കഴിയുന്നത് എങ്ങനെയാണെന്ന് ഈശോയുടെ ഉയിർപ്പ് നമ്മെ ഓരോരുത്തരെയും പഠിപ്പിക്കുന്നുണ്ട്. ദൈവപുത്രനായ യേശു നമ്മെ ഓരോരുത്തരെയും വിളിക്കുന്നതും ക്ഷണിക്കുന്നതും ഈ ഉയിർപ്പിലേക്കാണ്. ഈസ്റ്റർ പ്രതീക്ഷയുടെ വിളിച്ചുചൊല്ലലാണ്. കുരിശിന്‍റെ വേദനകൾക്ക് അപ്പുറം ഉയിർപ്പിന്‍റെ വെളിച്ചം തീർച്ചയായും ഉണ്ട് എന്ന് ഉയിർപ്പുഞായർ നമ്മെ ഓരോരുത്തരെയും ഓർമിപ്പിക്കുന്നു. കുരിശും ശൂന്യമായ കല്ലറയും നമ്മോടു പറയുന്നു- അന്ധകാരത്തിന് അവസാനമുണ്ട്; പുതിയ ഒരു തുടക്കം ഒരിക്കലും അകലെയല്ല. ഭീതിയില്ലാതെ ജീവിതത്തെ സ്നേഹിക്കുവാനും മറ്റു മനുഷ്യർക്കായി ജീവിക്കുവാനും ഉയിർപ്പുഞായർ നമ്മെ പ്രചോദിപ്പിക്കട്ടെ. പ്രത്യാശ മുളയെടുക്കുന്ന ഹാപ്പി ഈസ്റ്റർ: മാർ ജേക്കബ് തൂങ്കുഴി ആർച്ച്ബിഷപ് എമരിറ്റസ് പത്തൊന്പതാംനൂറ്റാണ്ടിൽ റഷ്യയിലെ ഒരു കൊവേന്തയിൽ ജീവിച്ചിരുന്ന ഒരു സന്യാസി ഉണ്ടായിരുന്നു. വലിയൊരു വിശുദ്ധനായിരുന്നു അദ്ദേഹം. തങ്ങളുടെ ദുഃഖദുരിതങ്ങൾ പങ്കുവച്ച് ആശ്വാസം കണ്ടെത്താനായി അനേകംപേർ അദ്ദേഹത്തിന്‍റെ പക്കൽ പോയിരുന്നു. തന്‍റെ പക്കലേക്കുവരുന്നവരെ കാണുന്പോൾ ദൂരെവച്ചുതന്നെ ഈ സന്യാസി നിറഞ്ഞ സന്തോഷത്തോടെ ഉച്ചസ്വരത്തിൽ അഭിവാദനം ചെയ്യുക പതിവായിരുന്നു. ഓ! എന്തൊരു സന്തോഷം, ക്രിസ്തു ഉത്ഥാനം ചെയ്തു... പുണ്യവാന്‍റെ അധരങ്ങളിൽനിന്ന് പുറപ്പെടുന്ന ഈ അഭിവാദനത്തിന് എന്തോ ഒരു മാന്ത്രികശക്തിയുണ്ടായിരുന്നു. ആശ്വാസം തേടി വന്നവരുടെ ഹൃദയങ്ങളിൽനിന്ന് കദനഭാരം ഇറങ്ങിയപോലെ... ഹൃദയങ്ങളിൽ വലിയൊരു പ്രത്യാശ മുളയെടുക്കുന്നതുപോലെ അനുഭവപ്പെട്ടിരുന്നു. എന്തൊരു സന്തോഷം, എന്തൊരു സൗഭാഗ്യം. ഈശോ ഉത്ഥാനം ചെയ്തിരിക്കുന്നു. യേശുവിന് അസാധ്യമായതൊന്നുമില്ല. നമ്മുടെ എല്ലാ പ്രശ്നങ്ങൾക്കും പരിഹാരം യേശു തന്നെയാണ്. യേശുവിന്‍റെ സ്നേഹവും സന്തോഷവും സമാധാനവും പ്രത്യാശയും നിങ്ങളുടെ ഹൃദയങ്ങളിൽ കുടികൊള്ളട്ടെ. എല്ലാവർക്കും ഹാപ്പി ഈസ്റ്റർ. ആഘോഷം പാവങ്ങളുടെ പക്ഷംചേർന്നാവണം: മാർ അപ്രേം മെത്രാപ്പോലീത്ത യേശുക്രിസ്തു ഉയിർത്തെഴുന്നേറ്റു എന്നുള്ളതു സന്തോഷവാർത്തയാണെങ്കിലും ആഘോഷം മദ്യത്തിലും അമിതഭക്ഷണത്തിലും ആകുന്നതു ക്രൈസ്തവധർമത്തിനു യോജിച്ചതല്ല. അന്പതുനോന്പ് ആചരിച്ച് പ്രാർഥനാപൂർവം വേണം ഈസ്റ്റർ ആഘോഷിക്കുവാൻ. ഈസ്റ്റർ നമ്മെ ഓർമ്മപ്പിക്കുന്നതു സന്തോഷമുളവാക്കുന്ന സംഭവമാണെങ്കിലും ആഘോഷം ദുഃഖവെള്ളിയാഴ്ചയിലെ കർത്താവിന്‍റെ കഷ്ടപ്പാടിനെ മറക്കുന്നവിധത്തിൽ ആകരുത്. ചാട്ടവാറടികൊണ്ട് വേദനിക്കുന്ന ക്രിസ്തുവിന്‍റെ ചിത്രം നമ്മുടെ മന‌സിൽ എപ്പോഴും ഉണ്ടാകണം. പാവങ്ങളുടെ പക്ഷംചേരാൻ ക്രിസ്ത്യാനികൾക്കു ചുമതലയുണ്ട്. കർത്താവിന്‍റെ ഇഹലോകവാസത്തിൽ സാധാരണക്കാരും മുക്കുവൻമാരുമാണ് കൂടെ കൂടിയിരുന്നത്. അവർക്കു സൗഖ്യവും കൃപകളും കർത്താവ് നൽകി. അഞ്ചപ്പംകൊണ്ട് അയ്യായിരംപേരെ പോഷിപ്പിച്ച യേശുക്രിസ്തു ഇന്നു നമ്മോടു പറയുന്നുണ്ട്. "നിന്‍റെ ആർത്തികൊണ്ടല്ലേ പാവങ്ങൾക്ക് ഒരുനേരമെങ്കിലും ഭക്ഷണംകിട്ടാത്തത്?’ അന്ത്യപരിശോധനയ്ക്കും ത്യാഗത്തിനും സേവനത്തിനുമായി നമ്മെ പുനഃപ്രതിഷ്ഠിക്കാൻ ഈസ്റ്റർ സഹായകമാകട്ടെ.

21-ാം വർഷവും രക്തദാന ക്യാന്പുമായി ഹെൽത്ത് കെയർ സൊസൈറ്റി

തൃശൂർ: പരിശുദ്ധ വ്യാകുലമാതാവിൻ ബസിലിക്കയുടെ ശതാബ്ദിവർഷത്തിൽ ഹെൽത്ത് കെയർ സൊസൈറ്റി ജൂബിലി മെഡിക്കൽ കോളജിന്‍റെ സഹകരണത്തോടെ രക്തദാനക്യാന്പ് നടത്തി. ഫാ. ബെൻവിൻ തട്ടിൽ രക്തം ദാനംചെയ്ത് ക്യാന്പ് ഉദ്ഘാടനം ചെയ്തു. ‌ഹെൽത്ത് കെയർ സൊസൈറ്റി പ്രസിഡന്‍റ് ടി.കെ. അന്തോണിക്കുട്ടി അധ്യക്ഷത വഹിച്ചു. ബസിലിക്ക റെക്ടർ ഫാ. തോമസ് കാക്കശേരി അനുഗ്രഹപ്രഭാഷണം നടത്തി. ജനറൽ കണ്‍വീനർ പോൾസണ്‍ ആലപ്പാട്ട്, ബസിലിക്ക അസിസ്റ്റന്‍റ് വികാരി ഫാ. പ്രിൻസ് ചെറുതാണിക്കൽ, കൈക്കാരൻ ജോണി കുറ്റിച്ചാക്കു എന്നിവർ പ്രസംഗിച്ചു. ഡോ. ശ്രീദേവി ബോധത്കരണ ക്ലാസിനു നേതൃത്വം നൽകി. 21 വർഷമായി രക്തദാനക്യാന്പ് നടത്തുന്ന സൊസൈറ്റി ഈ വർഷം 1000 ലിറ്റർ രക്തശേഖരണത്തോട് അടുക്കുകയാണെന്നും ഭാരവാഹികൾ അറിയിച്ചു.

ആംബുലൻസ് കാറുമായി കൂട്ടിയിടിച്ചു

എരുമപ്പെട്ടി: കാഞ്ഞിരക്കോട് സെന്‍ററിൽ ആംബുലൻസും കാറും കൂട്ടിയിടിച്ച് അപകടം. രോഗിയുമായി പോകുകയായിരുന്ന ആംബുലൻസാണ് കാറിൽ ഇടിച്ചത്. വടക്കാഞ്ചേരി കുന്നംകുളം റോഡിൽ വെള്ളിയാഴ്ച ഉച്ചയ്ക്ക് രണ്ട് മണിയോടെയാണ് അപകടം ഉണ്ടായത്. പുന്നയൂർക്കുളത്തു നിന്നും രോഗിയുമായി പാലക്കാട്ടേക്ക് പോകുകയായിരുന്ന ആംബുലൻസ് കോഴിക്കോട് നിന്ന് തിരുവനന്തപുരത്തേക്ക് പോവുകയായിരുന്ന കാറിന്‍റെ പിന്നിൽ ഇടിക്കുകയായിരുന്നു. അപകടത്തിൽ ആംബുലൻസിനും കാറിനും കാര്യമായി കേടുപാടുകൾ സംഭവിച്ചുവെങ്കിലും യാത്രക്കാർക്ക് ആർക്കും പരിക്കില്ല. ആംബുലൻസിൽ ഉണ്ടായിരുന്ന രോഗിയെ ആക്ട്സിന്‍റെ ആംബുലൻസിൽ മാറ്റി കയറ്റി കൊണ്ടുപോയി. ഈ സമയം അതുവഴി പോവുകയായിരുന്ന കുന്നംകുളം എംഎൽഎ എ.സി. മൊയ്തീൻ അപകട സ്ഥലത്ത് ഇറങ്ങുകയും രക്ഷാപ്രവർത്തനത്തിന് ആവശ്യമായ നടപടികൾ സ്വീകരിക്കുകയും ചെയ്തു.

മരിയാപുരത്ത് ഭീഷണിയായി ഉണങ്ങിയ മരം

കുട്ടനെല്ലൂർ: തൃശൂർ പുത്തൂർ റോഡിൽ മരിയാപുരം പള്ളിക്ക് സമീപം റോഡിൽ നിൽക്കുന്ന ഉണങ്ങിയമരം അപകടം ഭീഷണിയാകുന്നു. ഏതുസമയത്തും മരം വീഴാവുന്ന രീതിയിലാണ് നിൽക്കുന്നത് . ഉണങ്ങിയ മരത്തിന്‍റെ ചെറിയ കൊമ്പുകൾ ഇടയ്ക്കിടെ വീഴുന്നത് പതിവാണ്. യാത്രക്കാർ തലനാരിഴയ്ക്കാണ് പലപ്പോഴും രക്ഷപ്പെടുന്നത്. നൂറുകണക്കിന് വാഹനങ്ങൾ കടന്നുപോകുന്ന വഴിയിലെ അപകടാവസ്ഥയിലായ മരം ഉടൻ മുറിച്ചു നീക്കണമെന്ന് നാട്ടുകാർ ആവശ്യപ്പെട്ടു.

വടക്കാഞ്ചേരി നഗരസഭയുടെ വാർഷിക പദ്ധതിക്ക് അംഗീകാരം

വടക്കാഞ്ചേരി: നഗരസഭയുടെ 2025-26 വാർഷിക പദ്ധതിക്ക് ജില്ലാ ആസൂത്രണ സമിതിയുടെ അംഗീകാരം. സമഗ്ര വികസനം ലക്ഷ്യമിട്ട് സമസ്ത മേഖലകളെയും സ്പർശിക്കുന്ന പദ്ധതികളാണ് നഗരസഭ 2025 -26 സാമ്പത്തിക വർഷം നടപ്പാക്കുന്നത്. ബഡ്ജറ്റ് വർഷം ആരംഭിക്കുന്നതിന് മുമ്പേ 100 പട്ടികജാതി കുടുംബത്തിന് ലൈഫ് പദ്ധതിയിൽ ഉൾപ്പെടുത്തി വീട് വെക്കാൻ ധനസഹായം നൽകി. ഉത്പാദന മേഖലക്ക് 18487267 രൂപയും, സേവന മേഖലയിൽ 143827176 രൂപയും, പശ്ചാതലമേഖലയിൽ 32325000 രൂപയും, പട്ടികജാതി വിഭാഗത്തിൽ 32725000 രൂപയും, ആകെ 323622865 രൂപയുടെ പദ്ധതിക്കാണ് അംഗീകാരം ലഭിച്ചത്. ലൈഫ് ഭവന നിർമാണം എസ് സി സ്പെഷ്യൽ പ്രൊജക്റ്റ്‌ന് 25000000 രൂപ, അതിദാരിദ്യ നിർമാർജന പദ്ധതിക്കായി ( വീട് റിപ്പയർ, ഭക്ഷണ കിറ്റ്) 15 ലക്ഷം രൂപ, ചിൽഡ്രൻസ് പാർക്കിനായി 18 ലക്ഷം രൂപ, സ്കൂൾ മെയിന്റനൻസ്, അംഗൻവാടി മെയിന്റനൻസ്, ലഹരി വിരുദ്ധ സന്ദേശ പരിപാടികൾ, ഡയാലിസിസ് വിഭാഗത്തിന് നഗരസഭ വിഹിതമായി 18 ലക്ഷം രൂപ, പാർളിക്കാട് പകൽ വീട് 1950000, കുട്ടികൾ, ഭിന്നശേഷിയുള്ളവർ എന്നിവർക്ക് 4806740 രൂപ, വനിതകൾക്കായി 9613480 രൂപ, വയോജനങ്ങൾക്കായി 4806740 രൂപ എന്നിങ്ങനെയാണ് നഗരസഭ നടപ്പാക്കുന്നപദ്ധതികളെന്ന് നഗരസഭ ചെയർമാർ പി എൻ സുരേന്ദ്രൻ, സെക്രട്ടറി കെ കെ മനോജ് എന്നിവർ അറിയിച്ചു.

സീത ഫിസിക്കൽ നാടകാവതരണം നാളെ

തൃശൂർ: അമീഷ് ത്രിപാഠിയുടെ "സീത - മിഥിലയിലെ യോദ്ധാവ്' എന്ന കൃതിയെ ആസ്പദമാക്കിയുള്ള ഫിസിക്കൽ നാടകം "സീത'യുടെ അവതരണം നാളെ രാത്രി ഏഴിനു റീജണൽ തിയേറ്ററിൽ നടക്കുമെന്നു നവനീതം കൾച്ചറൽ ട്രസ്റ്റ് ചെയർമാൻ ടി.ആർ. വിജയകുമാർ പത്രസമ്മേളനത്തിൽ പറഞ്ഞു. ക്ഷമയുടെയും ത്യാഗത്തിന്‍റെയുംമാത്രം വ്യക്തിത്വമായല്ലാതെ രാമായണത്തിലെ ഇതിഹാസനായികയെ യോദ്ധാവ്, രാഷ്‌ട്രതന്ത്രജ്ഞ, നേതാവ് എന്നീ നിലകളിൽ അവതരിപ്പിക്കുകയാണ് സീതയിൽ. കളരിപ്പയറ്റ്, കഥകളി, ഭരതനാട്യം, കഥക്, സത്രിയ കലാരൂപങ്ങളുടെ സമന്വയം സീതയിൽ ദൃശ്യമാകും. 70 മിനിറ്റ് ദൈർഘ്യമുള്ള നാടകം ബെൽരാജ് സോണിയാണ് സംവിധാനം ചെയ്തിട്ടുള്ളത്. ടി.വി. ബാലകൃഷ്‌ണനാണു തിയേറ്റർ കൺസൾട്ടന്‍റ്, സംഗീതം: പി.കെ. സുനിൽകുമാർ, ലൈറ്റ്സ്: ഷൈമോൻ ചേലാട്, മേക്കപ്പ്: നിപിൻ ഉണ്ണി, വസ്ത്രാലങ്കാരം: ആര്യ ജാനകി എന്നിവർ നിർവഹിച്ചിരിക്കുന്നു. പത്രസമ്മേളനത്തിൽ ബൽരാജ് സോണി, ജോജി സ്വാമിനാഥൻ, ടി.വി. ബാലകൃഷ്ണ‌ൻ എന്നിവരും പങ്കെടുത്തു.

കഞ്ചാവ്: പ്രതി അറസ്റ്റിൽ

എളവള്ളി: കരിക്ക് കച്ചവടത്തിന്‍റെ മറവിൽ കഞ്ചാവ് കച്ചവടം ചെയ്തുവരുന്നയാളെ പാവറട്ടി പോലീസ് പിടികൂടി. പെരുവല്ലൂർ കോട്ടപ്പാടം സ്വദേശി അരീക്കര പ്രദീപിനെയാണ് (39) പാവറട്ടി എസ്ഐ അനുരാജിന്‍റെ നേതൃത്വത്തിലുള്ള സംഘം പിടികൂടിയത്. കടവല്ലൂരിൽ റെയിൽവേ ക്രോസിന് സമീപത്ത് കരിക്ക് കച്ചവടത്തിന്‍റെ മറവിൽ കഞ്ചാവ് കൈവശം വെച്ച് വില്പന നടത്തിവരുന്നതായി രഹസ്യവിവരം ലഭിച്ചതിന്‍റെ അടിസ്ഥാനത്തിലാണ് പ്രതിയെ അറസ്റ്റ് ചെയ്തത്.

പ്രതിഷേധ കൂട്ടായ്മ സംഘടിപ്പിച്ചു

കുറുമാൽ: ജബൽപുരിലും ഒറീസയുടെ വിവിധ ഭാഗങ്ങളിലും വൈദികരേയും ക്രൈസ്തവ വിശ്വാസികളയും മർദിക്കുന്നവർക്കെതിരെ നടപടി സ്വീകരിക്കണമെന്നും മയക്കമരുന്ന്, ലഹരി മദ്യ മാഫിയകളിൽ നിന്നും ജനങ്ങളെ രക്ഷിക്കണമെന്നും ആവശ്യപ്പെട്ട് കുറുമാൽ സെന്‍റ് ജോർജ് ഇടവകയിൽ കത്തോലിക്ക കോൺഗ്രസ് പ്രതിഷേധ കൂട്ടായ്മ നടത്തി. വികാരി ഫാ. ഡോ. സേവ്യർ ക്രിസ്റ്റി പള്ളിക്കുന്നത്ത് ഉദ്ഘാടനം ചെയ്തു. കത്തോലിക്ക കോൺഗ്രസ് യൂണിറ്റ് പ്രസിഡന്‍റ് സേവി ജേക്കബ്, ഭാരവാഹികളായ പി.കെ.വി. ജോസ്, വി.ടി. സേവി, വി.സി. ജോസഫ്, കാലിക്കറ്റ് യൂണിവേഴ്സിറ്റി സെനറ്റ് മെമ്പറും വിശ്വാസ പരിശീലന പ്രിൻസിപ്പലുമായ ലിന്‍റോ വടക്കൻ, കുടുംബ കൂട്ടായ്മ കൺവീനർ സണ്ണി വടക്കൻ, കൈക്കാരൻമാരായ സി.ജെ. ബിൻസൻ, കെ.പി. ഷാജു, മദർ സൂപ്പീരിയർ നോബർട്ടമ്മ, മാധ്യമ പ്രവർത്തകനും ഇടവക ശുശ്രൂഷിയുമായ പോൾസൺ വാഴപ്പിള്ളി എന്നിവർ പ്രതിഷേധ കൂട്ടായ്മക്ക് നേതൃത്വം നല്കി.

ഹാൻസ് പിടികൂടി

കേച്ചേരി: നിരോധിത പുകയില ഉൽപ്പന്നങ്ങളുടെ വൻശേഖരവുമായി കേച്ചേരിയിൽ നിന്നും രണ്ടുപേരെ കുന്നംകുളം പൊലീസ് പിടികൂടി. കേച്ചേരി പട്ടിക്കര സ്വദേശി അദ്‌നാൻ (48), കേച്ചേരി മണലി സ്വദേശി ഭാസി (62) എന്നിവരെയാണ് കുന്നംകുളം സ്റ്റേഷൻ ഹൗസ് ഓഫീസർ യു.കെ.ഷാജഹാന്‍റെ നിർദേശപ്രകാരം സബ് ഇൻസ്‌പെക്ടർ ജാബിറിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. അദ്‌നാനന്‍റെ പക്കൽ നിന്ന് 124 പാക്കറ്റും ഭാസിയിൽ നിന്ന് 15 പാക്കറ്റും ഹാൻസാണ് പിടിച്ചെടുത്തത്.

ദേശീയപാതയിൽ കാർ മറിഞ്ഞ് പത്തുപേർക്കു പരിക്കേറ്റു

ചാലക്കുടി: ദേശീയപാതയിൽ ക്രസന്‍റ് സ്കൂളിനു സമീപം ടാറ്റാ സുമൊ മറിഞ്ഞ് കാറിൽ സഞ്ചരിച്ച പത്തുപേർക്ക് പരിക്കേറ്റു. ഊരകം പറപ്പൂർ സ്വദേശികളായ ചീരോത്ത് രാജേഷ് (38), നാലുപുരക്കൽ സുമേഷ് ഭാര്യ വിബിന (28), നാലു‌പുരയ്ക്കൽ സിദ്ധാർഥൻ (75), ഭാര്യ മല്ലിക (58), നാലുപുരയ്ക്കൽ അനീഷ് ഭാര്യ സന്ധ്യ (25), മക്കളായ ജാൻവി (4), ജാനവ് (3), കുന്നംകുളം കോഴിപ്പറമ്പിൽ പ്രവീൺ ഭാര്യ സിനി (30), മക്കളായ ആരാധ്യ (8), അധ്യാന്മിക (2) എന്നിവരെ സെന്‍റ് ജെയിംസ് ആ ശുപത്രിയിൽ പ്രവേശിപ്പിച്ചു. ഇന്നലെ രാവിലെ 11.25 നാണ് അപകടം ഉണ്ടായത്.

ലേബര്‍ കോഡുകള്‍ പിന്‍വലിക്കണം: എച്ച്എംഎസ്; മേയ് 20നു പണിമുടക്ക്

തൃശൂര്‍: തൊഴിലാളിവിരുദ്ധ നിയമങ്ങള്‍ ഉള്‍പ്പെടുന്ന നാലു ലേബര്‍ കോഡുകള്‍ പിന്‍വലിക്കണമെന്ന് എച്ച്എംഎസ് ജില്ലാ ജനറല്‍ കൗണ്‍സില്‍ യോഗം ആവശ്യപ്പെട്ടു. ഏകപക്ഷീയമായി ലേബര്‍ കോഡുകള്‍ നടപ്പാക്കാനുള്ള കേന്ദ്ര സര്‍ക്കാര്‍ നീക്കത്തില്‍ പ്രതിഷേധിച്ച് സംയുക്ത ട്രേഡ് യൂണിയന്‍ സമിതി മേയ് 20നു ദേശീയ പണിമുടക്ക് നടത്തും. തൊഴിലിടങ്ങളില്‍ രൂപപ്പെട്ടിരിക്കുന്ന പീഡനങ്ങളെക്കുറിച്ച് പ്രത്യേക കമ്മീഷനെവച്ച് അന്വേഷിക്കുക. സീതാറാം മില്‍, വടക്കാഞ്ചേരി വിരുപ്പാക്ക സ്പിന്നിംഗ് മില്‍ തുടങ്ങി ജില്ലയില്‍ അടഞ്ഞുകിടക്കുന്ന വ്യവസായസ്ഥാപനങ്ങള്‍ തുറന്നുപ്രവര്‍ത്തിക്കാന്‍ നടപടി സ്വീകരിക്കണമെന്നും കൗണ്‍സില്‍ അംഗീകരിച്ച പ്രമേയത്തില്‍ ആവശ്യപ്പെട്ടു. നിര്‍മാണത്തൊഴിലാളികളുടെ പെന്‍ഷനും ആനുകൂല്യങ്ങളും കുടിശികതീര്‍ത്തു വിതരണംചെയ്യണമെന്ന് ആവശ്യപ്പെട്ട് മേയ് നാലിനു കളക്ടറേറ്റിനു മുന്നില്‍ ധര്‍ണ നടത്തും. ജില്ലാ പ്രസിഡന്‍റ് ഡേവിസ് വില്ലടത്തുകാരന്‍ അധ്യക്ഷത വഹിച്ച യോഗം എച്ച്എംഎസ് സംസ്ഥാന ജനറല്‍ സെക്രട്ടറി ടോമി മാത്യു ഉദ്ഘാടനം ചെയ്തു. ഓള്‍ കേരള മാര്‍ബിള്‍ ആന്‍ഡ് ടൈല്‍ വര്‍ക്കേഴ്‌സ് യൂണിയന്‍ - എച്ച്എംഎസ് സംസ്ഥാനസമ്മേളനം മേയ് 10, 11 തീയതികളില്‍ തൃ ശൂരിലും, കേരള കര്‍ഷകത്തൊഴിലാളി യൂണിയന്‍ ജില്ലാ സമ്മേളനം 12നു കുന്നംകുളത്തും കേരള വഴിവാണിഭസഭ ജില്ലാ സമിതി രൂപീകരണയോഗം 22നു കൊടുങ്ങല്ലൂരിലും നടക്കും. എച്ച്എംഎസ് ഭാരവാഹികള്‍: ഡേവിസ് വില്ലടത്തുകാരൻ- ജില്ലാ പ്രസിഡന്‍റ്, കെ.എസ്. ജോഷി - ജനറല്‍ സെക്രട്ടറി, എം.എന്‍. സുരേഷ് - വര്‍ക്കിംഗ് പ്രസിഡന്‍റ്, ടി.എല്‍. ദാസ്- ട്രഷറർ, രാഘവന്‍ മുളങ്ങാടന്‍, ആന്‍റോ പോ ള്‍, വികാസ് ചക്രപാണി, പി.ജെ. ജെയിംസ്, പി.ഡി. ലോനപ്പന്‍ - വൈസ് പ്രസിഡന്‍റുമാർ, രാഹുല്‍ വി. നായര്‍, മോളി ജോബി, കെ.സി. കാര്‍ത്തികേയന്‍, ലിജോ ചെ‌റിയാന്‍, എ.ആര്‍. രഞ്ജിത്ത്, പി.ആര്‍. റാസിക്, പി.ജെ.തോമസ് മാസ്റ്റര്‍, പി.എം.ഷംസുദ്ദീൻ- സെക്രട്ടറിമാർ.

കേരളത്തിൽ ബിജെപിയെ മാറ്റിനിർത്തിയുള്ള വികസനം സാധ്യമല്ല: പ്രമീളാദേവി

തൃശൂർ: കേരളത്തിൽ ബിജെപിയെ മാറ്റിനിർത്തിയുള്ള വികസനം സാധ്യമല്ലെന്നു പാർട്ടി സംസ്ഥാന ഉപാധ്യക്ഷ ഡോ. ജെ. പ്രമീളാദേവി. "മാറുന്ന കാലത്തെ വികസിതകേരളം' എന്ന വിഷയത്തിൽ ബിജെപി ജില്ലാ സമിതി നടത്തിയ ആത്മനിർഭർ ഭാരത് സെമിനാറിൽ സംസാരിക്കുകയായിരുന്നു അവർ. കേരളം മാറിമാറി ഭരിച്ച രണ്ടു മുന്നണിയും കേരളത്തിന്‍റെ കാർഷിക-സാന്പത്തികമേഖലയെ തകർത്തുവെന്നും കേരളത്തെ 19-ാം നൂറ്റാണ്ടിലേക്കു തിരിച്ചുവിട്ടുവെന്നും അവർ പറഞ്ഞു. സിറ്റി ജില്ലാ പ്രസിഡന്‍റ് ജസ്റ്റിൻ ജേക്കബ് അധ്യക്ഷത വഹിച്ചു. സംസ്ഥാന സെക്രട്ടറി എ. നാഗേഷ്, മേഖലാ പ്രസിഡന്‍റ് വി. ഉണ്ണികൃഷ്ണൻ, ജനറൽ സെക്രട്ടറി രവികുമാർ ഉപ്പത്ത്, ജില്ലാ ജനറൽ സെക്രട്ടറിമാരായ പി.കെ. ബാബു, അജിഘോഷ് എന്നിവർ പ്രസംഗിച്ചു.

വിവരാവകാശ കമ്മീഷൻ ക്യാന്പ് സിറ്റിംഗ് 28ന്

ചാലക്കുടി: സംസ്ഥാന വിവരാവകാശ കമ്മീഷൻ 28 ന് ജില്ലയിൽ ക്യാന്പ് സിറ്റിംഗ് നടത്തും. രാവിലെ 10.30 ന് ചാലക്കുടി മരാമത്ത് റസ്റ്റ് ഹൗസ് കോണ്‍ഫറൻസ് ഹാളിൽ സിറ്റിംഗ് ആരംഭിക്കും. സംസ്ഥാന വിവരാവകാശ കമ്മിഷണർ ഡോ. എ. അബ്ദുൽ ഹക്കീമിന്‍റെ നേതൃത്വത്തിലുള്ള സംഘം തെളിവെടുപ്പ് നടത്തും. നോട്ടീസ് ലഭിച്ച കേസുകളിൽ പരാതിക്കാലത്തെയും ഇപ്പോഴത്തെയും പൊതുബോധന ഓഫീസർമാർ, ഒന്നാം അപ്പീൽ അധികാരികൾ, ഹരജിക്കാർ, അഭിഭാഷകർ, സാക്ഷികൾ തുടങ്ങിയവർ പങ്കെടുക്കണം. രാവിലെ 10.15 ന് രജിസ്ട്രേഷൻ ആരംഭിക്കും. കഴിഞ്ഞ ഡിസംബർ 27 ന് തൃശൂർ കളക്ടറേറ്റിൽ ഹിയറിംഗ് നടത്താതെ മാറ്റിയ കേസുകളാണ് പരിഗണിക്കുക.

പികെഎസ് സിവില്‍ സര്‍വീസ് അക്കാദമിയില്‍ സൗജന്യ പരിശീലനം

തൃശൂര്‍: പട്ടികജാതി ക്ഷേമസമിതി (പികെഎസ്) ജില്ലാ കമ്മിറ്റിയുടെ നേതൃത്വത്തില്‍ എല്ലാവിഭാഗം വിദ്യാര്‍ഥികള്‍ക്കുമായി ആരംഭിക്കുന്ന സൗജന്യ സിവില്‍ സര്‍വീസ് അക്കാദമി ഉദ്ഘാടനം ഇന്നു രാവിലെ 9.30ന് കെ. രാധാകൃഷ്ണന്‍ എംപി നിര്‍വഹി ക്കും. ജില്ലാ കളക്ടര്‍ അര്‍ജുന്‍ പാണ്ഡ്യന്‍ മുഖ്യാതിഥിയാകും. ഏഴുമുതൽ ബിരുദംവരെയുള്ള കുട്ടികൾക്കാണ് സിവില്‍ സര്‍വീസ് ഫൗണ്ടേഷന്‍ കോഴ്‌സുകള്‍ ആരംഭിക്കുന്നത്. ഏഴുമുതല്‍ പത്താംക്ലാസ് വരെ ഒരുബാച്ചും പ്ലസ് വണ്‍ മുതല്‍ ഡിഗ്രിവരെ മറ്റൊരു ബാച്ചായുമാണ് പരിശീലനം. ഞായറാഴ്ചകളിലും മറ്റ് ഒഴിവുദിനങ്ങളിലുമായി ഒരുവർഷം 36 ക്ലാസുകള്‍ നല്‍കും. മുന്‍നിര ഫാക്കല്‍റ്റികളായ ഫസല്‍ റഹ്‌മാനും മറ്റു വിദഗ്ധരും പരിശീലനത്തിനു നേതൃത്വം നല്‍കും. വിവരങ്ങള്‍ക്ക്: 8589043490. പത്രസമ്മേളനത്തില്‍ എന്‍.ബി. സന്തോഷ്, ലെജു കുട്ടന്‍, പി.എ. പുരോഷത്തമന്‍, എന്‍.കെ. പ്രമോദ്, കെ.വി. രാജേഷ് എന്നിവര്‍ പങ്കെടുത്തു.

തീരദേശ പോലീസ് സ്റ്റേഷനിലെ ബോട്ടുകളിൽ നിയമനം

അഴിക്കോട്: തീരദേശ പോലീസ് സ്റ്റേഷനിലെ ബോട്ടുകളിൽ അസിസ്റ്റൻറ് ബോട്ട് കമാൻഡർ, ബോട്ട് എൻജിൻ ഡ്രൈവർ എന്നീ ഒഴിവുകളിലേക്ക് താത്കാലിക അടിസ്ഥാനത്തിൽ നിയമനം നടത്തുന്നു. ഉദ്യോഗാർഥികൾ 30 നകം ജില്ലാ പോലീസ് മേധാവി, തൃശൂർ റൂറൽ, ഇരിങ്ങാലക്കുട എന്ന വിലാസത്തിൽ അപേക്ഷ സമർപ്പിക്കണം. ഫോണ്‍: 04802823000.

ജീവനു ഭീഷണിയായി ജല്‍ജീവന്‍ പൈപ്പുകള്‍

ഇരിങ്ങാലക്കുട: റോഡുകളില്‍ ജല്‍ജീവന്‍ മിഷന്‍റെ ഭാഗമായി കുടിവെള്ള വിതരണത്തിന് പൈപ്പുകള്‍ കൂട്ടിയിട്ടിരിക്കുന്നത് കണ്ടാല്‍ തോന്നും ഇഴജന്തുക്കള്‍ക്ക് വാസസ്ഥലമൊരുക്കുന്നതിനു വേണ്ടിയാണെന്ന്. മുരിയാട് പഞ്ചായത്തില്‍ പണിയുന്ന ടാങ്കിലേക്ക് വെള്ളം എത്തിക്കുന്നതിനു വേണ്ടിയുള്ള പൈപ്പുകളാണ് റോഡരികില്‍ ഇത്തരത്തില്‍ കൂട്ടിയിട്ടിരിക്കുന്നത്. മാസങ്ങളെറെയായി ഇങ്ങനെ കിടക്കാന്‍ തുടങ്ങിയ പൈപ്പുകള്‍ക്ക് സമീപം ഇപ്പോള്‍ കാടു വളര്‍ന്നതോടെ ഇഴജന്തുക്കളുടെയും തെരുവുനായ്ക്കളുടെയും വാസസ്ഥലമായി മാറി. പൈപ്പിനുള്ളില്‍ നിറയെ അപകടകാരികളായ ഇഴജന്തുക്കളുടെ സാന്നിധ്യം പലപ്പോഴും ശ്രദ്ധയില്‍പ്പെട്ടിട്ടുണ്ടെന്ന് സമീപവാസികള്‍ പറയുന്നു. പൈപ്പുകള്‍ റോഡരില്‍ കൂട്ടിയിട്ടിരിക്കുന്നതിനാല്‍ വഴിയാത്രക്കാര്‍ക്ക് അപകട ഭീഷണിയുമുണ്ട്. കാല്‍നടക്കാര്‍ക്കും ഇരു ചക്രവാഹനങ്ങളില്‍ യാത്രചെയ്യുന്നവര്‍ക്കും ഇത് ഏറെ ബുദ്ധിമുട്ടുകളാണ് സൃഷ്ടിക്കുന്നത്. പൈപ്പുകളില്‍ തട്ടി ബൈക്കുയാത്രക്കാര്‍ ഇടക്കിടെ വീഴുന്നതും പതിവായിട്ടുണ്ട്. മുരിയാട് പഞ്ചായത്തിലെ വനിതാ വ്യവസായ‌കേന്ദ്രത്തിന് സമീപം നിര്‍മിക്കുന്ന 12 ലക്ഷം ലിറ്റര്‍ സംഭരണ ശേഷിയുള്ള ശുദ്ധജല ടാങ്കിലേക്കുള്ള വെള്ളം പമ്പ് ചെയ്യുന്നതിനാണ് ഈ പൈപ്പുകള്‍. എന്നാല്‍ ടാങ്കിന്‍റെ നിര്‍മാണം നിലച്ചിട്ട് ഒരുവര്‍ഷത്തിലധികമായി. തൂണുകളില്‍ മാത്രമായി ഒതുങ്ങിയ ടാങ്ക് നിര്‍മാണം ഇപ്പോള്‍ കാടുകയറിയ അവസ്ഥയിലാണ്. ടാങ്കിന്‍റെ നിര്‍മാണം നിലച്ചതോടെ പൈപ്പുകള്‍ സ്ഥാപിക്കുന്ന പണികളും നിലച്ച അവസ്ഥയിലാണ്. നഗരസഭയെയും മുരിയാട്, വേളൂക്കര പഞ്ചായത്തുകളെയും കുടിവെള്ള സ്വയംപര്യാപ്തതയിലേക്ക് നയിക്കുന്ന സമ്പൂര്‍ണ കുടിവെള്ള പദ്ധതിയാണിത്. 2052 ലെ ജല ആവശ്യകത കണക്കിലെടുത്ത് മുരിയാട് 33,574 പേര്‍ക്കു കുടിവെള്ളം നല്‍കാനാണ് പദ്ധതിയുടെ ആദ്യഘട്ടത്തില്‍ വിഭാവനം ചെയ്യുന്നത്. എന്നാല്‍ ഈ എല്ലാം താളം തെറ്റിയ അവസ്ഥയിലാണിപ്പോള്‍. റോഡരികിലെ അപകടാവസ്ഥയിലായ പൈപ്പുകള്‍ ശുദ്ധജലവിതരണത്തിനായി ഉടന്‍ സ്ഥാപിക്കണമെന്നും അപകട ഭീഷണി ഒഴിവാക്കണമെന്നുമാണ് നാട്ടുക്കാരുടെ ആവശ്യം.

ചിറങ്ങര ഗ്രാമീണ ബാങ്കിനു മുന്നിൽ കാനയ്ക്ക് മുകളിലെ സ്ലാബ് വീണ്ടും തകർന്നു

കൊരട്ടി: ചിറങ്ങര ഗ്രാമീണ ബാങ്കിന് മുന്നിൽ കാനയ്ക്ക് മുകളിലെ സ്ലാബ് വീണ്ടും തകർന്നു. ഒന്നര മാസം മുമ്പ് ഭാരവണ്ടികൾ കയറി തകർന്ന് പുനർനിർമിച്ച സ്ലാബ് ആണ് ഇന്നലെ വീണ്ടും തകർന്നത്. ദേശീയപാത വികസനത്തിന്‍റെ ഭാഗമായി മുരിങ്ങൂരിലും കൊരട്ടിയിലും ചിറങ്ങരയിലും പുതുതായി നിർമിച്ച കാനകളും കാനക്ക് മുകളിലെ സ്ലാബും തകരുന്നത് പ്രദേശവാസികളെ ആശങ്കയിലാഴ്ത്തുകയാണ്. യാതൊരു ഗുണനിലവാരവുമില്ലാത്ത നിർമാണം മൂലം നിർദിഷ്ട ഇടങ്ങളിൽ എട്ടിലേറെ സ്ഥലങ്ങളിൽ സ്ലാബുകൾ തകർന്നു വീണിരുന്നു. കൊരട്ടിയിൽ എൻഎച്ചിൽ നിന്നും റെയിൽവേ മേൽപ്പാലത്തിലേക്കുള്ള റോഡിനു കുറുകെ നിർമിച്ച സ്ലാബും ഭാരവണ്ടി കയറിയതുമൂലം നിലംപൊത്തിയിരുന്നു. കോൺക്രീറ്റ് മിശ്രിതത്തിലെ അനുപാതത്തിൽ വരുന്ന ഏറ്റക്കുറച്ചിലുകളും പര്യാപ്തമായ കമ്പികളുടെ അഭാവവും സ്ലാബുകൾ നനയ്ക്കാൻ കൂട്ടാക്കാത്തതും വിള്ളലുകൾ വീഴാനും ബലക്ഷയത്തിനും കാരണമാകുന്നതായാണു പരാതി.

ദുഃഖവെള്ളിദിനത്തില്‍ കനകമല കുരിശുമുടി കയറി കളക്ടര്‍ അര്‍ജുന്‍ പാണ്ഡ്യന്‍

കൊടകര: തീര്‍ഥാടന കേന്ദ്രമായ കനകമല കുരിശുമുടി കയറാന്‍ ദുഃഖവെള്ളിദിനത്തില്‍ കളക്ടര്‍ അര്‍ജുന്‍ പാണ്ഡ്യനെത്തി. ജില്ലയിലെ ഏക കുരിശുമുടി തീര്‍ഥാടനകേന്ദ്രമായ കനകമല കുരിശുമുടി കയറാന്‍ ചാലക്കുടി തഹസില്‍ദാര്‍ കെ.എ. ജേക്കബ് അടക്കമുള്ളവരോടൊപ്പമാണ് രാവിലെ കളക്ടര്‍ എത്തിയത്. കുരിശുമല കയറിയിറങ്ങിയപ്പോള്‍ നല്ല അനുഭവമാണ് ഉണ്ടായതെന്ന് കളക്ടര്‍ പറഞ്ഞു. തീര്‍ഥാടന കേന്ദ്രം റെക്ടര്‍ ഫാ. മനോജ് മേക്കാടത്ത്, സഹവികാരിമാരായ ഫാ. അജിത്ത് തടത്തില്‍, ഫാ. റെയ്‌സണ്‍ തട്ടില്‍, കൈക്കാരന്മാരായ ജോസ് കറുകുറ്റിക്കാരന്‍, ജോജു ചുള്ളി, ജോസ് വെട്ടുമണിക്കല്‍, ജോയ് കളത്തിങ്കല്‍, ജനറല്‍ കണ്‍വീനര്‍ തോമസ് കുറ്റിക്കാടന്‍, പിആര്‍ഒ ഷോജന്‍ ഡി. വിതയത്തില്‍, ജോയ് നെല്ലിശേരി എന്നിവര്‍ കളക്ടറെ സ്വീകരിച്ചു.

ഗുണ്ട "മിലിറ്ററി നിഖിലി'നെ കാപ്പ ചുമത്തി നാടുകടത്തി

ഇരിങ്ങാലക്കുട: കുപ്രസിദ്ധ ഗുണ്ട പാലക്കല്‍ പാലിശേരി വില്ലേജില്‍ പേരാമംഗലത്ത് വീട്ടില്‍ മിലിറ്ററി നിഖില്‍ എന്നു വിളിക്കുന്ന നിഖിലിനെ (30 ) കാപ്പ ചുമത്തി ഒരു വര്‍ഷത്തേക്ക് നാടുകടത്തി. നിഖില്‍ ഇരിങ്ങാലക്കുട പോലീസ് സ്റ്റേഷനില്‍ ഒരു കഞ്ചാവ് കേസും ചേര്‍പ്പ് പോലീസ് സ്റ്റേഷനില്‍ ഒരു വധശ്രമം, തൃശൂര്‍ എക്‌സൈസ് സ്‌പെഷല്‍ സ്‌ക്വാഡ് എംഡിഎംഎ പിടിച്ചതടക്കം ആറോളം ക്രിമിനല്‍ കേസുകളില്‍ പ്രതിയാണ്. തൃശൂര്‍ റൂറല്‍ ജില്ല പോലീസ് മേധാവി ബി. കൃഷ്ണ കുമാര്‍ ഐപിഎസ് നല്കിയ ശുപാര്‍ശയില്‍ തൃശൂര്‍ റേഞ്ച് ഡിഐജി ഹരിശങ്കര്‍ ഐപിഎസ് ആണ് ഉത്തരവ് പുറപ്പെടുവിച്ചത്. 2025ല്‍ മാത്രം ഇതുവരെ തൃശൂര്‍ റൂറല്‍ ജില്ലയില്‍ 33 പേരെ കാപ്പ പ്രകാരം ജയിലിലടച്ചു. ആകെ 77 ഗുണ്ടകളെ കാപ്പ ചുമത്തി. 44 പേര്‍ക്കെതിരെ കാപ്പ പ്രകാരം നാടു കടത്തിയും, മറ്റുമുളള നടപടികള്‍ സ്വീകരിച്ചു.

മതസൗഹാര്‍ദസന്ദേശവുമായി വിവാഹക്ഷണക്കത്ത്

മൂന്നുമുറി: മത സൗഹാര്‍ദത്തിന്‍റെ സന്ദേശം ഉള്‍ക്കൊള്ളുന്ന ചിത്രങ്ങള്‍ ഉള്‍പ്പെടുത്തി തയാറാക്കിയ വിവാഹക്ഷണക്കത്ത് വേറിട്ടതായി. മൂന്നുമുറി ഒമ്പതുങ്ങലിലുള്ള ചൂരക്കാടന്‍ പ്രശാന്തിന്‍റെ മകള്‍ ആര്‍ഷയുടെ വിവാഹക്ഷണക്കത്തിലാണു വിവിധ മതവിഭാഗങ്ങളെ പ്രതിനിധാനം ചെയ്യുന്ന ചിത്രങ്ങള്‍ ചേര്‍ത്തിട്ടുള്ളത്. ഈ മാസം 27ന് ഒമ്പതുങ്ങല്‍ ശ്രീ കൈലാസശിവക്ഷേത്രത്തിലാണ് വിവാഹം. മതമേതായാലും മനുഷ്യന്‍ നന്നായാല്‍ മതി എന്ന ഗുരുവചനത്തിനൊപ്പം ശ്രീനാരായണഗുരുവിന്‍റെ ചിത്രവും കൈലാസനാഥനായ ശിവഭഗവാന്‍, മൂന്നുമുറി ഇടവക മധ്യസ്ഥനായ വിശുദ്ധ സ്‌നാപക യോഹന്നാന്‍ എന്നിവരുടെ ചിത്രങ്ങളും ക്ഷണക്കത്തില്‍ ഉള്‍പ്പെടുത്തിയിട്ടുണ്ട്.

ജനകീയസമരങ്ങൾ തോറ്റ ചരിത്രമില്ല: മുഹമ്മദ് ഷിയാസ്

കൊടുങ്ങല്ലൂർ: ജനകീയ സമരങ്ങൾ കേരളത്തിൽ തോറ്റ ചരിത്രം ഇല്ലെന്ന് എറണാകുളം ഡിസിസി പ്രസിഡന്‍റ് മുഹമ്മദ് ഷിയാസ്. അശാസ്ത്രീയ തീരദേശ ഹൈവേ അലൈൻമെന്‍റിനെതിരെ ഒരു വർഷമായി എറിയാട് പേബസാറിൽ ഗ്രാമപഞ്ചായത്ത് ഓഫീസിനു മുൻവശം തീരദേശ ഹൈവേ അവകാശ സംരക്ഷണ സമിതി നടത്തിവരുന്ന സയാഹ്ന ധർണയുടെ ഒന്നാം വാർഷിക ദിനാചരണം ഉദ്ഘാടനം ചെയ്തു സംസാരിക്കുകയായിരുന്നു മുഹമ്മദ് ഷിയാസ്. സർവകക്ഷി സംയുക്ത സമരസമിതി ചെയർമാൻ പി.എ. കരുണാകരൻ അധ്യക്ഷത വഹിച്ചു. തീരദേശ അവകാശ സംരക്ഷണ സമിതി ചെയർമാൻ എ.എ. മുഹമ്മദ് ഇക്ബാൽ, കോൺഗ്രസ് ബ്ലോക്ക് പ്രസിഡന്‍റ് പി.ബി. മൊയ്തു, എറിയാട് ഗ്രാമപഞ്ചായത്ത് കോൺഗ്രസ് പാർലമെന്‍ററി പാർട്ടി നേതാവ് പി.കെ. മുഹമ്മദ്, മുസ്‌ലിംലീഗ് മണ്ഡലംപ്രസിഡന്‍റ് വി.എം. ഹനീഫ, എറിയാട് കോൺഗ്രസ് മണ്ഡലം കമ്മിറ്റി പ്രസിഡന്‍റ് മുഹമ്മദ് സഗീർ, ജനതാദൾ കയ്പമംഗലം മണ്ഡലം പ്രസിഡന്‍റ് എൻ.എ. ഇസ്മയിൽ, എറിയാട് സർവീസ് സഹകരണ ബാങ്ക് പ്രസിഡന്‍റ് പി.എസ്. മുജീബ് റഹ്മാൻ, അഴീക്കോട് സർവീസ് സഹകരണ ബാങ്ക് പ്രസിഡന്‍റ് പി.പി. ജോൺ, പ്രവാസി കോൺഗ്രസ് എറിയാട് ബ്ലോക്ക് പ്രസിഡന്‍റ് നജീബ് പി മുഹമ്മദ്, എറിയാട് പഞ്ചായത്ത് അംഗം കെ.എം. സാദത്ത്, എടവിലങ്ങ് പഞ്ചായത്ത് അംഗം പി.കെ. സന്തോഷ്, ബിൽഡിംഗ് ഓണേഴ്സ് അസോസിയേഷൻ പ്രസിഡന്‍റ് കെ. ബാലഗോപാൽ, തീരദേശ ഹൈവേ അവകാശ സംരക്ഷണ സമിതി ജനറൽ സെക്രട്ടറി സിദ്ദിഖ് പഴങ്ങാടൻ, സർവകക്ഷി സംയുക്ത സമരസമിതി കൺവീനർ ഇ.കെ. ദാസൻ എന്നിവർ പ്രസംഗിച്ചു.

അതിരപ്പിള്ളിയിൽ കാട്ടാനശല്യത്തിൽനിന്നു രക്ഷപ്പെടാൻ റോഡരികിലെ കാട് വൃത്തിയാക്കി ജനകീയ സംരക്ഷണസമിതി

അതിരപ്പിള്ളി: കാട്ടാന ശല്യം രൂക്ഷമായതിനെ തുടർന്ന് റോഡരികിലെ കാട് വൃത്തിയാക്കാൻ ജനകീയ സംരക്ഷണ സമിതി. വളർന്നുനിൽക്കുന്ന കാടുകൾക്കിടയിൽ റോഡരികിൽ കാട്ടാന നിലക്കുന്നത് അറിയാൻ കഴിയാതെ കാട്ടാനകളുടെ മുൻപിൽ ചെന്ന് പെടുന്ന അവസ്ഥയാണ്. ഇതിനു പരിഹാരമായി അതിരപ്പിള്ളി ഒന്നാം വാർഡിൽ ജനകീയ സംരക്ഷണ സമിതി റോഡരികിലെ കാടുകൾ വൃത്തിയാക്കി. കെ.എ. സെബാസ്റ്റ്യൻ, മുരളി നമ്പിട്ടത്ത് തുടങ്ങിയവർ നേതൃത്വം നൽകി. കാട് വൃത്തിയാക്കുന്നതിനിടയിലും കാട്ടാന എത്തി.

കൊരട്ടി സിഎൽസി നവതിയുടെ നിറവിൽ

കൊരട്ടി: സിഎൽസി കൊരട്ടിയുടെ ഒരു വർഷം നീണ്ടുനിൽക്കുന്ന നവതി ആഘോഷങ്ങൾക്കു തുടക്കമായി. ആഘോഷങ്ങളുടെ ഭാഗമായി വിപുലമായ പരിപാടികളാണ് ആസൂത്രണം ചെയ്തിരിക്കുന്നത്. തിരുമുടിക്കുന്ന് ഗാന്ധിഗ്രാം ത്വക് രോഗാശുപത്രിയിലെ അന്തേവാസികൾക്ക് ആവശ്യമായ വസ്ത്രങ്ങൾ കൈമാറിയാണ് വാർഷികത്തോടനുബന്ധിച്ച് വിഭാവനംചെയ്ത കൈത്താങ്ങ് എന്ന ചാരിറ്റി പദ്ധതി ഉദ്ഘാടനം ചെയ്തത്. കൊരട്ടി സെന്‍റ് മേരീസ് ഫൊറോന പള്ളി വികാരിയും സിഎൽസി ഡയറക്ടറുമായ ഫാ. ജോൺസൺ കക്കാട്ട് ഉദ്ഘാടനം ചെയ്തു. സിഎൽസി പ്രമോട്ടർ ഫാ. ജിൻസ് ഞാണയ്ക്കൽ, സിഎൽസി പ്രസിഡന്‍റ്്‌ ഡാരിസ് പോൾ, ഭാരവാഹികളായ പ്രവീൺ, ജെറിൻ, ആൽവിൻ, ഷെറിൻ എന്നിവരുടെയും യൂണിറ്റ് അംഗങ്ങളുടെയും സാന്നിധ്യത്തിലായിരുന്നു പരിപാടികൾക്കു തുടക്കം കുറിച്ചത്.

റോഡരികില്‍ അപകടം പതിയിരിക്കുന്നു

കൊടകര: പേരാമ്പ്രയില്‍ ദേശീയപാതയുടെ സര്‍വീസ് റോഡിലുള്ള കലുങ്കുപാലത്തിനോടുചേര്‍ന്ന് റോഡരികില്‍ സുരക്ഷാഭിത്തിയില്ലാത്തത് അപകട ഭീഷണി ഉയര്‍ത്തുന്നു. പേരാമ്പ്ര പെട്രോള്‍ പമ്പിനു സമീപം തോടിനു കുറുകെ നിര്‍മിച്ച കലുങ്കുപാലത്തിനോടുചേര്‍ന്നാണ് അപകട ഭീഷണിയുള്ളത്. സുരക്ഷാഭിത്തിയില്ലാതെ തോട്ടിലേക്ക് തുറന്നിരിക്കുന്ന ഭാഗത്ത് ഷീറ്റുകൊണ്ട് ഉണ്ടാക്കിയ ആള്‍മറ ഇപ്പോള്‍ നശിച്ചനിലയിലാണ്. പേരാമ്പ്ര അടിപ്പാത നിര്‍മാണം നടക്കുന്നതിനാല്‍ സര്‍വീസ് റോഡിലൂടെ കടന്നുപോകുന്ന വാഹനങ്ങളുടെ എണ്ണം കൂടിയിട്ടുണ്ട്. ഈ സാഹചര്യത്തില്‍ അപകടസാധ്യത കുറയ്ക്കുന്നതിനായി എത്രയും വേഗം ഇവിടെ സുരക്ഷ സംവിധാനം ഒരുക്കണമെന്ന് നാട്ടുകാര്‍ ആവശ്യപ്പെട്ടു.

രണ്ടര വയസുകാരൻ കടലിൽ വീണു മരിച്ചു

കയ്പമംഗലം: കൂരിക്കുഴി കമ്പനിക്കടവിൽ മാതാപിതാക്കൾക്കൊപ്പം ബന്ധുവീട്ടിൽ വിരുന്നിനെത്തിയ രണ്ടര വയസുകാരൻ കടലിൽ വീണു മരിച്ചു. മുറ്റിച്ചൂർ സ്വദേശി കുരിക്കപ്പീടിക വീട്ടിൽ നാസർ - ഷാഹിറ ദമ്പതികളുടെ മകൻ അഷ്ഫാക്ക് ആണ് മരിച്ചത്. ശനിയാഴ്ച്ച വൈകീട്ട് അഞ്ചരയോടെയാണ് സംഭവം. കമ്പനിക്കടവിലുള്ള ബന്ധുവീട്ടിൽ എത്തിയതായിരുന്നു കുടുംബം. നാല് വയസുകാരനായ മൂത്ത സഹോദരനോടൊപ്പം അയൽവീട്ടിലേക്ക് പോയതായിരുന്നു അഷ്ഫാഖ്. ഇതിനിടയിൽ വീട്ടുകാരുടെ കണ്ണുവെട്ടിച്ച് കുട്ടി വീടിനു സമീപമുള്ള വഴിയിലൂടെ കടലിലേക്ക് ഇറങ്ങുകയായിരുന്നുവെന്ന് കരുതുന്നു. കുട്ടിയെ കരയ്ക്കടിഞ്ഞ നിലയിൽ കണ്ടെത്തിയ നാട്ടുകാരായ മത്സ്യ തൊഴിലാളികൾ പ്രാഥമിക ശുശ്രൂഷ നൽകിയ ശേഷം ആദ്യം ചെന്ത്രാപ്പിന്നിയിലെ സ്വകാര്യ ആശുപത്രിയിലും തുടർന്ന് കൊടുങ്ങല്ലൂരിലെ സ്വകാര്യ ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല. കയ്പമംഗലം പോലീസ് സ്ഥലത്തെത്തിയിരുന്നു.

മാവില്‍നിന്നു വീണ് മരിച്ചു

പട്ടേപ്പാടം: മാങ്ങ പറിക്കാന്‍ കയറിയ ആള്‍ മാവില്‍നിന്നു വീണു മരിച്ചു. മാങ്ങ പറിക്കാന്‍ മാവില്‍ കയറിയ തെരുവില്‍ പരേതനായ അബ്ദുള്‍ ഖാദര്‍ മകന്‍ ഷാജി(55) യാണ് മരിച്ചത്. കൊറ്റനെല്ലൂര്‍ ആക്കപ്പിള്ളിയില്‍ കച്ചവടം നടത്തിയ മാങ്ങ പറിക്കാന്‍ കയറിയതായിരുന്നു. മാങ്ങ പറിച്ചുകഴിഞ്ഞ് ഇറങ്ങവെ ഉണക്കക്കൊമ്പില്‍ ചവിട്ടി നെഞ്ചടിച്ചു വീഴുകയായിരുന്നു. സംസ്‌കാരം ഇന്ന് രാവിലെ 10ന് പട്ടേപ്പാടം ജുമാമസ്ജിദ് കബര്‍സ്ഥാനില്‍. മാതാവ്: ജമീല. ഭാര്യ: ഷക്കീല. മക്കള്‍: ഷജില, ഷാനവാസ്. മരുമകന്‍: ഷാഹിര്‍.

വ്യാപാരിയെ കടയിൽ മരിച്ചനിലയിൽ കണ്ടെത്തി

അന്തിക്കാട്: മുറ്റിച്ചൂരിൽ വ്യാപാരിയെ കടയിൽ മരിച്ചനിലയിൽ കണ്ടെത്തി. മുറ്റിച്ചൂർ കോക്കാൻ മുക്ക് സെന്‍ററിനു സമീപം അപ്ഹോൾസ്റ്ററി കട നടത്തുന്ന മുറ്റിച്ചൂർ തൈവളപ്പിൽ ക്ഷേത്രത്തിനു സമീപം വടശേരി സന്തോഷ്(54) ആണ് മരിച്ചത്. ശനിയാഴ്ച രാവിലെ 11ന് ഇയാൾ കടയിൽ എത്തിയത് സമീപത്തെ വ്യാപാരികൾ കണ്ടിരുന്നു. പിന്നീട് ഇയാളുടെ സമൂഹമാധ്യമങ്ങളിലെ പോസ്റ്റ് കണ്ട് സുഹൃത്തുക്കൾ തിരഞ്ഞ് വന്നപ്പോഴാണ് കടയുടെ അകത്ത് തൂങ്ങിമരിച്ചനിലയിൽ കണ്ടെത്തിയത്. അന്തിക്കാട് പോലിസ് ഇൻക്വസ്റ്റ് നടത്തി. മൃതദേഹം പോസ്റ്റ് മോർട്ടത്തിനായി ആശുപത്രിയിലേക്ക് മാറ്റി.

നേതാജി ഗ്രൗണ്ടിൽ ഇനിയും പന്തുരുളും, മണ്ണിലല്ല... പുല്ലിൽ

സി.ജി. ജിജാസൽ തൃശൂർ: വീശിയടിക്കുന്ന കാറ്റിൽ പാറിപ്പറക്കുന്ന പൊടിയോ, മഴയിൽ പടരുന്ന ചെളിയോ ഇനി താരങ്ങളെ വലയ്ക്കില്ല. കാലിടറിവീണാൽ ചോര പൊടിയുകയുമില്ല. നേതാജി ഗ്രൗണ്ടിൽ ഇനിയും പന്തുരുളും, മണ്ണിലല്ല... പുല്ലിൽ. കോർപറേഷന്‍റെ ആദ്യ ടർഫ് ഗ്രൗണ്ട് എന്ന പേര് അരണാട്ടുകര നേതാജി ഗ്രൗണ്ടിനു സ്വന്തമാകുന്നു. തൃശൂരിന്‍റെ കളിയാരവങ്ങൾ ഉയരാറുള്ള നേതാജി ഗ്രൗണ്ടിലാണ് നിലവിലെ കളിസ്ഥലത്തെ ബാധിക്കാത്തവിധം ന്യൂജെൻ കളിയിടം പൂർത്തീകരിച്ചിരിക്കുന്നത്. ഗ്രൗണ്ടിന്‍റെ ഉപയോഗശൂന്യമായി കിടന്നിരുന്ന ഭാഗത്തെ പുല്ലും കാടും വെട്ടിനീക്കിയാണ് കായികസ്വപ്‍നങ്ങൾക്കു കരുത്തേകാൻ 47,25,632 രൂപ ചെലവഴിച്ച് കോർപറേഷൻ ടർഫ് ഗ്രൗണ്ട് ഒരുക്കിയത്. 36 x 24 മീറ്റർ വലിപ്പത്തിൽ ഒരുക്കിയിരിക്കുന്ന ടർഫിൽ സെവൻസിനും ഫൈവ്സിനും കളിക്കാനിറങ്ങാം. ഒൻപതു മീറ്ററോളം ഉയരമുള്ള ടർഫിൽ 40 എംഎം, 20 എംഎം, 12 എംഎം, ആറ് എംഎം ബ്രോക്കണ്‍ സ്റ്റോണ്‍, മണൽ എന്നിവ പലതട്ടുകളായി വിരിച്ച് അതിനുമുകളിൽ ഫിഫ പ്രൊ സിന്തറ്റിക് ഗ്രാസ് വിരിച്ചാണ് ടർഫ് സജ്ജമാക്കിയത്. ടർഫിനകത്തു പൈപ്പുകളും പുറത്തു ഡ്രെയിനും ഒരുക്കിയതിനാൽ മഴപെയ്താലും ടർഫിൽ പന്തുതട്ടാമെന്ന പ്രത്യേകതയുണ്ട്. നേതാജി ഗ്രൗണ്ടിൽ ഫ്ലഡ്‌ലൈറ്റ് ഉണ്ടെങ്കിലും ടർഫിനായും പുതിയ ചെറിയ ഫ്ലഡ്‌ലൈറ്റുകൾ സ്ഥാപിക്കും. ടർഫിനുചുറ്റും ഇന്‍റർലോക്ക് കട്ടകൾ വിരിക്കാനും താരങ്ങൾക്കു ശുചിമുറിയോടുകൂടിയുള്ള ഡ്രസിംഗ് റൂമും കാന്‍റീൻ സൗകര്യവും ഒരുക്കാനും കോർപറേഷൻ തീരുമാനിച്ചിട്ടുണ്ട്. ഇതിനുള്ള അനുമതിയും ലഭ്യമായിട്ടുണ്ട്. ഇവയ്ക്കെല്ലാംപുറമെ ക്രിക്കറ്റ് നെറ്റ് പരിശീലനത്തിനും ബാഡ്മിന്‍റണ്‍ പരിശീലനത്തിനുമുള്ള സംവിധാനങ്ങളും ഒരുക്കാൻ പദ്ധതിയുള്ളതായി ഡിവിഷൻ കൗണ്‍സിലർ അനൂപ് ഡേവിസ് കാട പറഞ്ഞു. കൂർക്കഞ്ചേരി, എൽത്തുരുത്ത് എന്നിവിടങ്ങളിലും പുതിയ ടർഫുകൾ നിർമിക്കും. ടർഫിന്‍റെ ഉപയോഗത്തിന് ആദ്യഘട്ടത്തിൽ മണിക്കൂറിനു 100 മുതൽ 200 രൂപവരെ ഈടാക്കാനാണ് ആലോചന. സൗജന്യമായി നൽകാനാണ് ആദ്യം തീരുമാനിച്ചതെങ്കിലും ടർഫിന്‍റെ പരിപാലനത്തിനും ടർഫിനോടുള്ള മതിപ്പും നഷ്ടപ്പെടുത്താതിരിക്കാനാണ് ഫീസ് ഈടാക്കുന്നതെന്നും അടുത്ത മാസംതന്നെ ഇതു തുറന്നുനൽകുമെന്നും കൗൺസിലർ കൂട്ടിച്ചേർത്തു.

ലഹരിയെ ബൗണ്ടറി കടത്താൻ കളക്ടറും ഡിഐജിയും കമ്മിഷണറും മൈതാനത്ത്

തൃശൂർ: ലഹരിയെ ചെറുക്കാം, മൈതാനങ്ങളിലേക്കു മടങ്ങാം എന്ന സന്ദേശംപകർന്ന് ബാറ്റും ബോളും എടുത്ത് ജില്ലാ കളക്ടർ അർജുൻ പാണ്ഡ്യനും തൃശൂർ റേഞ്ച് ഡിഐജി ഹരിശങ്കറും സിറ്റി പോലീസ് കമ്മിഷണർ ആർ. ഇളങ്കോയും ക്രിക്കറ്റ് മൈതാനത്ത്. സുവർണ ജൂബിലി ആഘോഷങ്ങൾക്കു തുടക്കംകുറിച്ച് തൃശൂർ പ്രസ് ക്ലബ് സംഘടിപ്പിച്ച ക്രിക്കറ്റ് ടൂർണമെന്‍റിലാണ് ഓൾറൗണ്ട് പ്രകടനവുമായി കളക്ടർ അർജുൻ പാണ്ഡ്യൻ ക്രിക്കറ്റ് പ്രേമികളുടെയും ആരാധകരുടെയും മനംകവർന്നത്. ഓപ്പണിംഗ് ബാറ്ററായി ഇറങ്ങി സിറ്റി പോലീസ് കമ്മിഷണർ ആർ. ഇളങ്കോ വെടിക്കെട്ട് ബാറ്റിംഗ് കാഴ്ചവച്ചപ്പോൾ, ബൗളറായി തിളങ്ങിയ ഡിഐജി ഹരിശങ്കർ വിക്കറ്റും നേടി. ഓഫീസേഴ്സ് ഇലവനുവേണ്ടിയായിരുന്നു മൂവരുടെയും മിന്നുംപ്രകടനം. ബാറ്റിംഗിലും ബൗളിംഗിലും തിളങ്ങിയ കളക്ടർ ആദ്യമത്സരത്തിൽ കളിയിലെ കേമനുമായി. കളക്ടർ ക്യാപ്റ്റനായ ഓഫീസേഴ്സ് ഇലവനായി സബ് കളക്ടർ അഖിൽ വി. മേനോനും എഎസ്പി ഹാർദിക് മീണയും കളിക്കാനിറങ്ങി. അരണാട്ടുകര ലൂംഗ്സ് അക്കാദമിയിൽ നടന്ന ക്രിക്കറ്റ് ടൂർണമെന്‍റിന്‍റെ ഉദ്ഘാടനം മന്ത്രി കെ. രാജൻ ബാറ്റുചെയ്ത് നിർവഹിച്ചു. പ്രസ് ക്ലബ് പ്രസിഡന്‍റ് എം.ബി. ബാബു അധ്യക്ഷത വഹിച്ചു. കോർപറേഷൻ കൗണ്‍സിലർമാരായ കെ. രാമനാഥൻ, അഡ്വ. അനീസ്, ശ്രീലാൽ ശ്രീധർ, പ്രസ് ക്ലബ് സെക്രട്ടറി രഞ്ജിത്ത് ബാലൻ, സ്പോർട്സ് കണ്‍വീനർ ബി. സതീഷ് എന്നിവർ പങ്കെടുത്തു. മേയർ എം.കെ. വർഗീസ്, കെഎംപി ബിൽഡേഴ്സ് എംഡി കെ.എം. പരമശ്വരൻ, എക്സൈസ് ഇൻസ്പെക്ടർ കെ.വി. റോയി എന്നിവർ ചേർന്ന് സമ്മാനദാനം നിർവഹിച്ചു. ഓഫീസേഴ്സ് ഇലവനെ കൂടാതെ എക്സൈസ് ഇലവൻ, കോർപറേഷൻ കൗണ്‍സിലർമാരുടെ ടീമായ ലീഡേഴ്സ് ഇലവൻ, തൃശർ പ്രസ് ക്ലബ് ഇലവൻ എന്നിവരാണ് ടൂർണമെന്‍റിൽ മാറ്റുരച്ചത്. എക്സൈസ് ഇലവൻ ജേതാക്കളായി. എക്സൈസ് ഇലവന്‍റെ പി.വി. വിശാൽ ടൂർണമെന്‍റിലെ താരമായി.

അങ്കണവാടികളിൽ വായനശാല; പുസ്തകങ്ങളുമായി നിരവധിപേർ

തൃശൂർ: അങ്കണവാടികളിൽ വായനശാലയൊരുക്കാൻ പുസ്തകങ്ങളുമായി നിരവധിപേർ എത്തുന്നു. ജില്ലാ ഭരണകൂടത്തിന്‍റെ വാ, വായിക്കാം പദ്ധതിയിലേക്കാണു പുസ്തകങ്ങൾ എത്തുന്നത്. വരന്തരപ്പിള്ളി പള്ളിക്കുന്ന് അസംപ്ഷൻ ഹൈസ്കൂളിലെ 1999 എസ്എസ്എൽസി ബാച്ച് പൂർവവിദ്യാർഥികൾ 160 പുസ്തകങ്ങൾ കൈമാറി. തോളൂർ ഗ്രാമപഞ്ചായത്തിൽ നൂറു തൊഴിൽദിനങ്ങൾ പൂർത്തിയാക്കിയ തൊഴിലാളികളെ ആദരിച്ച പരിപാടിയിൽ ഗ്രാമപഞ്ചായത്ത് പ്രസിഡന്‍റ് ശ്രീകല കുഞ്ഞുണ്ണിയും മറ്റു ജീവനക്കാരും പുസ്തകങ്ങൾ കൈമാറി. സർക്കാർ ജീവനക്കാരുടെയും പൊതുജനങ്ങളുടെയും പങ്കാളിത്തം പദ്ധതിക്കു ലഭിക്കുന്നുണ്ട്. സംരംഭത്തിൽ പങ്കാളിയാകാനും പദ്ധതിയിലേക്കു പുസ്തകം നല്‍കാനും താത്‍പര്യമുള്ളവര്‍ 8304851680 എന്ന നമ്പറില്‍ ബന്ധപ്പെടണം.

ഇനി തദ്ദേശസ്ഥാപനങ്ങളിലേക്കു നടന്ന് ‌ ഒരാളുടെയും ചെരിപ്പ് തേയില്ല: മന്ത്രി

ഒല്ലൂർ: കേരളത്തിലെ ഒരു തദ്ദേശസ്വയംഭരണ സ്ഥാപനങ്ങളിലേക്കും നടന്ന് ഇനി ആരുടെയും ചെരിപ്പുതേയില്ലെന്നു തദ്ദേശസ്വയംഭരണ മന്ത്രി എം.ബി. രാജേഷ്. തൃശൂർ കോർപറേഷൻ ഒല്ലൂർ മേഖലാ കാര്യാലയത്തിന്‍റെ പുതിയ കെട്ടിടം ഉദ്ഘാടനംചെയ്ത് പ്രസംഗിക്കുകയായിരുന്നു മന്ത്രി. കെ സ്മാർട്ട് ആപ്പിലൂടെ വേഗത്തിൽ, സുതാര്യമായി, അഴിമതിയില്ലാതെ, ഓൺലൈനായി സേവനങ്ങൾ ലഭ്യമാകും. ഇന്ത്യയിലെ ആദ്യ സമ്പൂർണ ഡിജിറ്റൽ സാക്ഷരസംസ്ഥാനമായി കേരളം ഉടൻ മാറുമെന്ന് മന്ത്രി കൂട്ടിച്ചേർത്തു. തൃശൂരിന്‍റെ നഗരവീഥികൾ വൃത്തിയാക്കി മനോഹരമാക്കിയത് അതേരീതിയിൽ സൂക്ഷിക്കുക എന്നത് ഓരോ വ്യക്തിയുടെയും ഉത്തരവാദിത്വമാണെന്നും വൃത്തിഹീനമാക്കുന്നവർക്കെതിരേ നിയമനടപടി എടുക്കാൻ മടി വേണ്ടെന്നും മന്ത്രി ഓർമിപ്പിച്ചു. കെട്ടിടസമുച്ചയത്തിലെ ലിഫ്റ്റ് ഉദ്ഘാടനം റവന്യൂ മന്ത്രി അഡ്വ. കെ. രാജൻ നിർവഹിച്ചു. മേയർ എം.കെ. വർഗീസ് അധ്യക്ഷത വഹിച്ചു. ഡെപ്യൂട്ടി മേയർ എം.എൽ. റോസി കരാറുകാരനെ ആദരിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ വർഗീസ് കണ്ടംകുളത്തി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ശ്യാമള വേണുഗോപാൽ, ആരോഗ്യകാര്യ സ്റ്റാൻഡിംഗ് കമ്മിറ്റി ചെയർമാൻ പി.കെ. ഷാജൻ, നികുതി അപ്പീൽകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സാറാമ്മ റോബ്സൺ, ഡിപിസി അംഗം സി.പി. പോളി, കൗൺസിലർമാരായ ശ്യാമള വേണുഗോപാൽ, നീതു ദിലീഷ്, രാഷ്ട്രീയപാർട്ടി പ്രതിനിധികളായ യു.പി. ജോസഫ്, പി.ഡി. റെജി, ഉണ്ണികൃഷ്ണൻ ഈച്ചരത്ത്, ബാബു തച്ചനാടൻ തുടങ്ങിയവർ പ്രസംഗിച്ചു. സൂപ്രണ്ടിംഗ് എൻജിനിയർ പി.ആർ. ശ്രീലത റിപ്പോർട്ട് അവതരിപ്പിച്ചു. അസിസ്റ്റന്‍റ് എൻജിനിയർ സുജ ജോർജ് നന്ദി പറഞ്ഞു. പെസഹാ വ്യാഴാഴ്ച ഉദ്ഘാടനം വച്ചതിൽ പ്രതിഷേധിച്ച് കോൺഗ്രസ് അംഗങ്ങൾ ചടങ്ങിൽനിന്ന് വിട്ടുനിന്നു.

തിരുവത്താഴസ്മരണയിൽ പെസഹാ ആചരിച്ചു ; ഇന്നു വേദനയുടെ ദുഃഖവെള്ളി

തൃശൂർ: യേശുക്രിസ്തുവിന്‍റെ അന്ത്യ അത്താഴത്തിന്‍റെയും വിശുദ്ധ കുർബാന സ്ഥാപിച്ചതിന്‍റെയും സ്മരണ പുതുക്കി ലോകമെന്പാടുമുള്ള ക്രൈസ്തവർ പെസഹാ ആചരിച്ചു. പള്ളികളിൽ പ്രത്യേക പ്രാർഥനകളും കാൽകഴുകൽ ശുശ്രൂഷയും ദിവ്യകാരുണ്യആരാധനയും പ്രദക്ഷിണവും നടന്നു. അപ്പംമുറിക്കൽ ശുശ്രൂഷയും പുത്തൻപാനവായനയും ഉണ്ടായിരുന്നു. ഇന്നു ദേവാലയങ്ങളിൽ ദുഃഖവെള്ളി ആചരണം നടക്കും. ഉപവാസദിനമായ ഇന്നു രാവിലെ പള്ളികളിൽ പീഡാനുഭവവായന, കുരിശുചായ്ക്കൽ ശുശ്രൂഷകൾ നടക്കും. വൈകീട്ട് പരിഹാരപ്രദക്ഷിണം, നഗരികാണിക്കൽ, ദുഃഖവെള്ളിസന്ദേശം എന്നിവയുണ്ടാകും. തൃശൂർ വ്യാകുലമാതാവിൻ ബസിലിക്കയിൽ നടന്ന പെസഹാ തിരുക്കർമങ്ങൾക്ക് ആർച്ച്ബിഷപ് മാർ ആൻഡ്രൂസ് താഴത്ത് മുഖ്യകാർമികനായി. ലൂർദ് കത്തീഡ്രലിൽ നടന്ന പെസഹാ തിരുക്കർമങ്ങൾക്ക് അതിരൂപത സഹായമെത്രാൻ മാർ ടോണി നീലങ്കാവിൽ മുഖ്യകാർമികത്വം വഹിച്ചു. കത്തീഡ്രൽ വികാരി ഫാ. ജോസ് വല്ലൂരാൻ, സഹവികാരിമാരായ ഫാ. പ്രിജോവ് വടക്കേത്തല, ഫാ. ജീസ്മോൻ ചെമ്മണ്ണൂർ എന്നിവർ സഹകാർമികരായി. കത്തീഡ്രലിലെ സിഎൽസി, കെസിവൈഎം, ജീസസ് യൂത്ത് എന്നീ യുവജനസംഘടനകളിലെ അംഗങ്ങളുടെ പാദങ്ങളാണ് മാർ ടോണി നീലങ്കാവിൽ കഴുകി ചുംബിച്ചത്. ചടങ്ങുകൾക്കു നടത്തുകൈക്കാരൻ ലൂവി കണ്ണാത്ത്, മറ്റു കൈക്കാരന്മാരായ ജോസ് ചിറ്റാട്ടുകര, ജോജു മഞ്ഞില, തോമസ് കോനിക്കര, ഭക്തസംഘടനാംഗങ്ങൾ, കുടുംബകൂട്ടായ്മ ഭാരവാഹികൾ തുടങ്ങിയവർ നേതൃത്വം നൽകി. ഇരിങ്ങാലക്കുട സെന്‍റ് തോമസ് കത്തീഡ്രലില്‍ നടന്ന കാല്‍കഴുകല്‍ശുശ്രൂഷയ്ക്കും തിരുക്കര്‍മങ്ങള്‍ക്കും ബിഷപ് മാര്‍ പോളി കണ്ണൂക്കാടന്‍ മുഖ്യകാര്‍മികത്വം വഹിച്ചു. രൂപത വികാരി ജനറാൾ മോണ്‍. വില്‍സണ്‍ ഈരത്തറ, കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍, ബിഷപ് സെക്രട്ടറി ഫാ. ജോര്‍ജി തേലപ്പിള്ളി, അസിസ്റ്റന്‍റ് വികാരിമാരായ ഫാ. ഓസ്റ്റിന്‍ പാറയ്ക്കല്‍, ഫാ. ബെല്‍ഫിന്‍ കോപ്പുള്ളി, ഫാ. ആന്‍റണി നമ്പളം എന്നിവര്‍ സഹകാര്‍മികരായിരുന്നു. കോട്ടപ്പുറം സെന്‍റ് മൈക്കിൾസ് കത്തീഡ്രലിൽ ബിഷപ് ഡോ. അംബ്രോസ് പുത്തൻവീട്ടിൽ തിരുക്കർമങ്ങൾക്കു മുഖ്യകാർമികനായി. വികാരി ഫാ. ജാക്സണ്‍ വലിയപറന്പിൽ, ഫാ.ജോബി കാട്ടാശേരി, ഫാ. അജയ് കൈതത്തറ എന്നിവർ സഹകാർമികരായിരുന്നു. തൃശൂർ മാർത്ത് മറിയം വലിയ പള്ളിയിൽ നടന്ന പെസഹാ തിരുക്കർമങ്ങൾക്ക് മാർ ഔഗിൻ കുര്യാക്കോസ് മെത്രാപ്പോലീത്ത കാർമികത്വം വഹിച്ചു.

അംഗത്വ സമാശ്വാസനിധി സഹായവിതരണവും മെഡിക്കൽ ക്യാമ്പും

ശ്രീനാരായണപുരം: പൂവത്തുംകടവ് ഫാർമേഴ്സ് സർവീസ് സഹകരണ ബാങ്കിന്‍റെ നേതൃത്വത്തിൽ അംഗത്വ സമാശ്വാസനിധി സഹായവിതരണവും സൗജന്യ മെഡിക്കൽക്യാമ്പും സംഘടിപ്പിച്ചു. സഹകരണസംഘങ്ങളിൽ അംഗങ്ങളായിട്ടുള്ള മാരകരോഗം പിടിപെട്ടവർക്ക് സംസ്ഥാന സർക്കാർ നൽകുന്ന സമാശ്വാസനിധി 17 അംഗങ്ങൾക്ക് വിതരണംചെയ്തു. ഇ.ടി. ടൈസൺ എംഎൽഎ വിതരണ ഉദ്ഘാടനം നിർവഹിച്ചു. തുടർന്നുനടന്ന സൗജന്യ മെഡിക്കൽക്യാമ്പിൽ ഡോ. ജുബിൽ ദേവ് ക്ലാസെടുത്തു. ബാങ്ക് പ്രസിഡന്‍റ് ഇ.വി. സുരേന്ദ്രൻ അധ്യക്ഷനായി. വൈസ് പ്രസിഡന്‍റ് എം.കെ. ചന്ദ്രൻ, മാനേജിംഗ് ഡയറക്ടർ ടി.ബി. ശ്രീജ തുടങ്ങിയവർ പ്രസംഗിച്ചു.

കലാതാത്പര്യം ജനിപ്പിച്ചത് മതിലകത്തുനിന്നുള്ള നാടകാനുഭവങ്ങള്‌: നടൻ സൗബിൻ ഷാഹിർ

കയ്പമംഗലം: മതിലകത്തുനിന്ന് കിട്ടിയ നാടകാനുഭവങ്ങളും മറ്റുമാണ് എന്നിൽ കലാതാൽപര്യം ജനിപ്പിച്ചതെന്ന് നടൻ സൗബിൻ ഷാഹിർ. ജന്മനാടായ മതിലകത്ത് സുഭാഷ് ക്ലബിന്‍റെ നേതൃത്വത്തിൽ നൽകിയ സ്നേഹാദരച്ചടങ്ങിൽ സംസാരിക്കുകയായിരുന്നു സൗബിൻ. സുഭാഷ് ക്ലബിന്‍റെ സുവർണ ജൂബിലിയോടനുബന്ധിച്ച് നവീകരിച്ച ക്ലബ് കെട്ടിടത്തിന്‍റെ ഉദ്ഘാടനം സൗബിൻ നിർവഹിച്ചു. വേദിയിൽ വി.വൈ. നസീർ സൗബിന് ആദരവുനൽകി. സംസ്ഥാന നാടക അവാർഡ് ജേതാവ് രാജേഷ് ഇരുളത്തെയും എഴുത്തുകാരൻ സുനിൽ പി.മതിലകത്തേയും സൗബിൻ ആദരിച്ചു. വുഷുവിൽ ഉയർന്ന നേട്ടങ്ങൾ കൈവരിച്ച ബാസിത് അമീൻ, യൂസഫിനാൻ, പഞ്ചഗുസ്തിയിൽ മികവ് പുലർത്തിയ അഹാന നസ്‌റിൻ എന്നിവർക്കുള്ള ഉപഹാരങ്ങളും സൗബിൻ സമ്മാനിച്ചു. പഞ്ചായത്ത് പ്രസിഡന്‍റ് സീനത്ത് ബഷീർ, ക്ലബ് പ്രസിഡന്‍റ് കെ.കെ. റെനീസ്, സെക്രട്ടറി എം.എച്ച്. മുഹമ്മദ് അബ്ദുൽഖാദർ, ക്ലബിന്‍റെ സ്ഥാപകരായ വി.വൈ. ബഷീർ, മുഹാജിർ തുടങ്ങിയവർ പങ്കെടുത്തു.

ചാലക്കുടി നഗരസഭ: 22.11 കോടി രൂപയുടെ പദ്ധതികൾക്ക് അംഗീകാരം

ചാലക്കുടി: നഗരസഭയുടെ 2025-26 വാർഷികപദ്ധതികൾക്ക് ജില്ലാ ആസൂത്രണസമിതിയോഗം അംഗീകാരംനൽകി. വിവിധ മേഖലകളിലായി 22,11,28,666 രൂപയുടെ 143 പദ്ധതികൾക്കാണ് അംഗീകാരംലഭിച്ചത്. വികസന ഫണ്ട് 5.93 കോടി, പട്ടികജാതി വികസന ഫണ്ട് 1.70 കോടി, ധനകാര്യ കമ്മീഷൻ അടിസ്ഥാന ഫണ്ട് 1.91 കോടി, ധനകാര്യ കമ്മീഷൻ ടൈഡ്ഫണ്ട് 2.87 കോടി, റോഡ് മെയിന്‍റനൻസ് ഫണ്ട് 5.59 കോടി, നോൺറോഡ് ഫണ്ട് 3.01 കോടി രൂപയും ഉൾപ്പെടുന്ന പദ്ധതികൾക്കാണ് അംഗീകാരംലഭിച്ചത്. ചാലക്കുടിയിലെ എല്ലാ മേഖലകളിലും വികസന പദ്ധതികൾ എത്തിക്കുന്നതിന്‍റെ ഭാഗമായി വിദ്യാഭ്യാസം, കായികം ഒരുകോടി, ആരോഗ്യം മൂന്നുകോടി, മാലിന്യ നിർമാർജനം, ശുചിത്വം 3.5 കോടി, പട്ടികജാതിക്ഷേമം 1.72 കോടി, ഭവനനിർമാണം 2.60 കോടി, സാമൂഹികക്ഷേമം 1.20 കോടി, റോഡ് വികസനം ആറുകോടി, കൃഷി- മൃഗസംരക്ഷണം- മത്സ്യം ഒരുകോടി എന്നിങ്ങനെയാണ് തുക വകയിരുത്തിയിട്ടുള്ളത്. രാസലഹരിക്കെതിരേയുള്ള പ്രവർത്തനങ്ങളുടെ ഭാഗമായി ‘ചാലക്കുടിയുടെ നന്മലഹരി’ എന്ന പദ്ധതിയിൽ, വിദ്യാർഥികൾക്കും യുവജനങ്ങൾക്കും ഊന്നൽനൽകി കലാ-കായിക- വിദ്യാഭ്യാസ പദ്ധതികൾ ആവിഷ്കരിച്ചിട്ടുണ്ട്. ചാലക്കുടിയിലെ റെയിൽവേ സ്റ്റേഷൻ റോഡ് ട്രാംവെ റോഡുമായി ബന്ധിപ്പിക്കുന്ന ബൈപ്പാസ് റോഡിന് കഴിഞ്ഞവർഷം പദ്ധതിയിൽ ഉൾക്കൊള്ളിച്ചിട്ടുള്ള 40 ലക്ഷത്തിനുപുറമേ ഈ വർഷത്തെ പദ്ധതിയിലും തുക വകയിരുത്തിയിട്ടുണ്ട്. നഗരസൗന്ദര്യവത്കരണം, താലൂക്ക് ആശുപത്രിവികസനം, പൊതുതോടുകളുടേയും കാനകളുടേയും നവീകരണം, അങ്കണവാടി, പകൽവീട് നിർമാണം തുടങ്ങിയ പദ്ധതികളും അംഗീകാരം ലഭിച്ചതായി ചെയർമാൻ ഷിബു വാലപ്പൻ അറിയിച്ചു.

ലഹരിവിരുദ്ധ പരിപാടികള്‍ സംഘടിപ്പിച്ചു

ലഹരിവിരുദ്ധ കാമ്പയിന്‌ കൊടുങ്ങല്ലൂർ: അനാഥ,വിധവ സംരക്ഷണസംവിധാനമായ ദി ലൈറ്റ് ചാരിറ്റബിൾ ട്രസ്റ്റ് കൊടുങ്ങല്ലൂർ ചാപ്റ്ററിന്‍റെ 41-ാമത് കുടുംബസംഗമവും ലഹരിവിരുദ്ധ കാമ്പയിനും സിഐ ബി.കെ. അരുൺ ഉദ്ഘാടനംചെയ്തു. ട്രസ്റ്റ് ചെയർമാൻ സലിം തോട്ടുങ്ങൽ അധ്യക്ഷത വഹിച്ചു. ജിസിസി കാതിയാളം റിലീഫ്കമ്മിറ്റി ട്രഷറർ സലിം പറക്കോട്ട് മുഖ്യാതിഥിയായി . ഓൺലൈൻ ഖുർആൻ പഠനപദ്ധതിയുടെ ആദ്യഘട്ടം പരീക്ഷയിൽ മുഴുവൻ മാർക്കുംനേടിയ മാതാക്കൾക്കുള്ള സമ്മാനദാനം സംസ്ഥാന ചെയർമാൻ സഫറതി ഇസ്മായിൽ വിതരണം ചെയ്തു. തൃശൂർ ഡയറ്റ് ലക്ചറർ മുഹമ്മദ്റാഫി മുഖ്യപ്രഭാഷണംനടത്തി. ലഹരിവിമുക്ത പ്രതിജ്ഞക്ക് ട്രസ്റ്റ് സെക്രട്ടറി താജുദ്ദീൻ സ്വലാഹി നേതൃത്വംനൽകി. ക്യാമ്പ് ഡയറക്ടർ ഇ.ഐ. മുജീബ് വിശദീകരണംനടത്തി. റഹീ പുതിയവീട്ടിൽ, അബ്ദുൽ സത്താർ കാതിയാളം, സിദ്ദീഖ് മാങ്കേരി, ഷക്കീല സഫറലി, റസിയാ ഗഫൂർ, മീന സലീം എന്നിവർ പങ്കെടുത്തു. ലഹരിക്കെതിരേ കർമപദ്ധതിയുമായി ഐഎംഎ കൊടുങ്ങല്ലൂർ: വഴിതെറ്റുന്ന യുവതലമുറയ്ക്ക് വഴികാട്ടാനായി ഇന്ത്യൻ മെഡിക്കൽ അസോസിയേഷന്‍റെ നേതൃത്വത്തിൽ കർമപദ്ധതി. ഐഎംഎയുടെ നേതൃത്വത്തിൽ പന്ത്രണ്ടോളം സംഘടനകളാണ് ലഹരിക്കെതിരേയുള്ള യുദ്ധത്തിൽ കൈകോർക്കുന്നത്. ലഹരിക്കെതിരേ ദീർഘകാലാടിസ്ഥാനത്തിലുള്ള പ്രവർത്തനമാണ് ആവിഷ്ക്കരിച്ചിട്ടുള്ളതെന്ന് സംഘാടകർ വാർത്താസമ്മേളനത്തിൽ അറിയിച്ചു. വീടുകൾ, വിദ്യാലയങ്ങൾ എന്നിങ്ങനെ സമൂഹത്തിന്‍റെ എല്ലാ മേഖലകളിലും പ്രതിരോധപ്രവർത്തനങ്ങളുമായി എത്തുകയാണ് കൂട്ടായ്മയുടെ ലക്ഷ്യം. സന്നദ്ധപ്രവർത്തനത്തിന് തുടക്കംകുറിച്ചുകൊണ്ട് നാളെ നാലിന് കൊടുങ്ങല്ലൂരിൽ റാലിയും സമ്മേളനവും നടക്കും. കുഞ്ഞുകുട്ടൻതമ്പുരാൻ ചത്വരത്തിൽ നടക്കുന്ന സമ്മേളനം ആരോഗ്യ സർവകലാശാല വൈസ് ചാൻസലർ ഡോ. മോഹൻ കുന്നുമ്മൽ ഉദ്ഘാടനംചെയ്യും. ലഹരിവിരുദ്ധ പരിപാടികളുമായി എന്‍എസ്എസും ഇരിങ്ങാലക്കുട: എന്‍എസ്എസ് കരയോഗങ്ങളിലെ ലഹരിവിരുദ്ധ പരിപാടികളുടെ മുകുന്ദപുരം താലൂക്കുതല ഉദ്ഘാടനം പ്രതിനിധിസഭാംഗവും താലൂക്ക് യൂണിയന്‍ ഭരണസമിതി അംഗവുമായ ആര്‍. ബാലകൃഷ്ണന്‍ ഉദ്ഘാടനംചെയ്തു. എക്‌സൈസ് വകുപ്പ് ഉദ്യോഗസ്ഥരും കൗണ്‍സിലിംഗ് വിദഗ്ധരും ഡോക്ടര്‍മാരും സൈക്കോളജിസ്റ്റുകളുമുള്‍പ്പടെയുള്ളവര്‍ വിവിധ കരയോഗങ്ങളില്‍ നേതൃത്വംനല്‍കി. താലൂക്ക് യൂണിയന്‍ സെക്രട്ടറി എസ്. കൃഷ്ണകുമാര്‍ മുഖ്യപ്രഭാഷണംനടത്തി. കരയോഗം പ്രസിഡന്‍റ് സതീഷ് പുളിയത്ത് അധ്യക്ഷതവഹിച്ചു. സെക്രട്ടറി എ. ഉമാദേവി സ്വാഗതവും വനിതാസമാജം പ്രസിഡന്‍റ് എം.കെ. തിലോത്തമ നന്ദിയും പറഞ്ഞു.

ഫ്ലൈഓവറുകളുടെ നിർമാണം പൂർത്തിയാകുംവരെ ടോൾപിരിവ് നിർത്തണം: ബെന്നി ബഹനാൻ എംപി

ചാലക്കുടി: അങ്കമാലി മുതൽ പാലിയേക്കര വരെ ഫ്ലൈഓവറുകളുടെ നിര്‍മാണം പൂര്‍ത്തിയാകുന്നതുവരെ ടോള്‍ ഈടാക്കുന്നത് താത്കാലികമായി നിര്‍ത്തിവയ്ക്കണമെന്ന് ബെന്നി ബെഹനാന്‍ എംപി. യാത്രക്കാരുടെ ദുരിതംചൂണ്ടിക്കാട്ടി കേന്ദ്രമന്ത്രി നിതിൻ ഗഡ്കരിക്ക് അയച്ച കത്തിലാണ് ബെന്നി ബഹനാന്‍ എംപി ഇക്കാര്യം ആവശ്യപ്പെട്ടത്. അങ്കമാലി മുതല്‍ പാലിയേക്കര വരെയുള്ള ഏകദേശം 40 കിലോമീറ്റര്‍ ദൂരത്തില്‍ ചിറങ്ങര, കൊരട്ടി, മുരിങ്ങൂര്‍, പേരാമ്പ്ര, ആമ്പല്ലൂര്‍ എന്നിവിടങ്ങളില്‍ ഫ്ലൈഓവര്‍ നിര്‍മാണം നടക്കുന്നതിനാല്‍ വളരെ രൂക്ഷമായ ഗതാഗതക്കുരുക്കും സമയനഷ്ടവുമാണെന്ന് അദ്ദേഹം ചൂണ്ടിക്കാട്ടി. ഈ ദേശീയപാത ഉപയോഗിക്കുന്ന തൊഴിൽ, വിദ്യാഭ്യാസ മേഖലകളിലെയും ചരക്കുഗതാഗതമേഖലയിലെയും ആളുകൾക്കും കൊച്ചി അന്താരാഷ്ട്ര വിമാനത്താവളത്തിലേക്കും തിരിച്ചും യാത്ര ചെയ്യുന്നവർക്കും ഏറെ ബുദ്ധിമുട്ടാണ് നേരിടേണ്ടിവരുന്നത്. ഫ്ലൈഓവറുകളുടെ നിർമാണം ആരംഭിക്കുന്നതിനുമുമ്പ് പ്രസ്തുത സ്ഥലങ്ങളിൽ സർവീസ് റോഡുകളുടെ നിർമാണം പൂർത്തീകരിക്കണമെന്ന് നിരവധിതവണ നാഷണൽ ഹൈവേ അധികൃതരോടും കേന്ദ്രസർക്കാരിനോടും ആവശ്യപ്പെട്ടിട്ടും നടപടി സ്വീകരിക്കാത്തതാണ് ഗതാഗതക്കുരുക്ക് രൂക്ഷമാവാൻ കാരണമെന്ന് എംപി ചൂണ്ടിക്കാട്ടി. അങ്കമാലി മുതൽ പാലിയേക്കരവരെയുള്ള യാത്രയിൽ ദേശീയപാതയുടെ യാതൊരു ആനുകൂല്യവും നിർമാണ പ്രവർത്തനങ്ങൾ നടക്കുന്നതുകൊണ്ട് യാത്രക്കാർക്ക് ലഭിക്കാത്ത സാഹചര്യത്തിൽ ടോൾ പിരിവ് അടിയന്തരമായി നിർത്തലാക്കുന്നതിന് കേന്ദ്ര സർക്കാരിന്‍റെ ഇടപെടൽ ആവശ്യമാണെന്ന് ബെന്നി ബഹനാന്‍ എംപി വ്യക്തമാക്കി.

സര്‍വീസ് റോഡരികിലെ കോണ്‍ക്രീറ്റ് സ്ലാബ് തകര്‍ന്നു

കൊടകര: ദേശീയപാതയിലെ പേരാമ്പ്ര അടിപ്പാത നിര്‍മാണത്തിന്‍റെ ഭാഗമായി സര്‍വിസ് റോഡരികില്‍ നിര്‍മിച്ച കാനയുടെ മുകളിലെ സ്ലാബുകളിലൊന്ന് തകര്‍ന്നത് യാത്രക്കാര്‍ക്ക് അപകടഭീഷണിയായി. ചാലക്കുടി ഭാഗത്തക്കുള്ള പാതയില്‍ പേരാമ്പ്ര പെട്രോള്‍പമ്പ് കഴിഞ്ഞുള്ള ഭാഗത്താണ് കോണ്‍ക്രീറ്റ് സ്ലാബ് തകര്‍ന്നിട്ടുള്ളത്. അടിപ്പാത നിര്‍മാണംനടക്കുന്നതിനാല്‍ വാഹനഗതാഗതം ഇവിടെ പൂര്‍ണമായും സര്‍വിസ് റോഡിലൂടെയാണ് തിരിച്ചുവിട്ടിട്ടുള്ളത്. സര്‍വിസ് റോഡിന് സമാന്തരമായി നിര്‍മിച്ചിട്ടുള്ള കാനയ്ക്കു മുകളിലൂടെ വാഹനങ്ങള്‍ നിരന്തരമായി കടന്നുപോകുന്നതാണ് സ്ലാബ് ഇടിയാന്‍ ഇടയാക്കിയത്. ഒരാഴ്ചമുമ്പ് മറ്റൊരു കോണ്‍ക്രീറ്റ് സ്ലാബും ഇത്തരത്തില്‍ തകര്‍ന്നു. അധികൃതര്‍ പിന്നീട് ഇതു മാറ്റിസ്ഥാപിച്ചു. ഇപ്പോള്‍ തകര്‍ന്നിട്ടുള്ള സ്ലാബ് അടിയന്തരമായി മാറ്റിസ്ഥാപിച്ചില്ലെങ്കില്‍ ഇരുചക്രവാഹനയാത്രക്കാര്‍ അപകടത്തില്‍പെടാനിടയുണ്ട്.

പരസ്യ മദ്യപാനം ചോദ്യംചെയ്ത പോലീസിനെ ഭീഷണിപ്പെടുത്തികടന്ന മൂന്നു യുവാക്കൾ അറസ്റ്റിൽ

വരന്തരപ്പിള്ളി: പൊതുസ്ഥലത്തു പരസ്യമായി മദ്യപിക്കുന്നതു ചോദ്യംചെയ്തതിലുള്ള വൈരാഗ്യത്തിൽ പോലീസിനെ ഭീഷണിപ്പെടുത്തുകയും ഒൗദ്യോഗിക കൃത്യനിർവഹണം തടസപ്പെടുത്തുകയും ചെയ്ത കേസിൽ മൂന്നുപേരെ വരന്തരപ്പിള്ളി പോലീസ് അറസ്റ്റ് ചെയ്തു. ചെങ്ങാലൂർ കുണ്ടുകടവ് സ്വദേശി പാറമേക്കാടൻ വീട്ടിൽ രമേഷ്, തെക്കെ നന്തിപുലം സ്വദേശി മൂലേക്കാട്ടിൽ വീട്ടിൽ അഭിലാഷ്, സഹോദരൻ അഖിലേഷ് എന്നിവരാണ് അറസ്റ്റിലായത്. ബുധനാഴ്ച രാത്രിയായിരുന്നു സംഭവം. നന്തിപുലം ഇടലപ്പിള്ളി ക്ഷേത്രപരിസരത്ത് പരസ്യമായി മദ്യപിക്കുകയായിരുന്ന ഇവരെ പിടികൂടാൻ ശ്രമിക്കുന്നതിനിടെ എസ്ഐ സി.ജി. മനോജിനെയും പോലീസുകാരെയും ഭീഷണിപ്പെടുത്തുകയും തട്ടിമാറ്റി രക്ഷപ്പെടുകയുമായിരുന്നു. നന്തിപുലത്തുനിന്നാണ് പ്രതികള അറസ്റ്റ് ചെയ്തത്. വരന്തരപ്പിള്ളി എസ്എച്ച്ഒ കെ.എൻ. മനോജ്, എസ്ഐ ജയചന്ദ്രൻ എന്നിവരുടെ നേതൃത്വത്തിലുള്ള സംഘമാണു പ്രതികളെ അറസ്റ്റ് ചെയ്തത്. പുതുക്കാട്, വരന്തരപ്പിള്ളി സ്റ്റേഷനുകളിൽ അടിപിടിക്കേസുകളിൽ പ്രതിയാണ് രമേഷ്. അഭിലാഷിനു വരന്തരപ്പിള്ളി പോലീസ് സ്റ്റേഷനിൽ ഒരു വധശ്രമക്കേസും ഒരു പോക്സോ കേസും നിലവിലുണ്ട്. അഖിലേഷ് വരന്തരപ്പിള്ളി പോലീസ് സ്റ്റേഷനിലെ വധശ്രമക്കേസിലെ പ്രതിയാണ്.

വീട്ടുകാരെയും പോലീസിനെയും ആക്രമിച്ച മൂന്നുപേർ പിടിയിൽ

പുന്നയൂർക്കുളം: പുന്നൂക്കാവിൽ വീട്ടുപടിക്കൽ കാർനിർത്തി വഴിതടഞ്ഞു മദ്യപിച്ചതു ചോദ്യംചെയ്ത വീട്ടുടമയെയും മകനെയും ആക്രമിക്കുകയും പ്രതികളെ പിടികൂടിയ പോലീസുകാരെ ആക്രമിച്ചു പ്രതികളെ രക്ഷപ്പെടുത്തുകയും ചെയ്ത എട്ടംഗസംഘത്തിലെ മൂന്നുപേർ പിടിയിലായി. പെരുന്പടപ്പ് ആമയൂർ സ്വദേശികളായ പടിപ്പുരയ്ക്കൽ നൗഷാദ് (34), വെള്ളക്കട സുഗീഷ് (ചിഞ്ചു -36), മണ്ണായിക്കൽ യഹിയ (29) എന്നിവരെയാണ് വടക്കേക്കാട് എസ്എച്ച്ഒ കെ.അനിൽകുമാർ, എസ്ഐ സാബു, എഎസ്ഐ ബാസ്റ്റിൻ എന്നിവരുടെ നേതൃത്വത്തിൽ അറസ്റ്റ് ചെയ്തത്. പ്രതികൾ സഞ്ചരിച്ച ആഡംബര ജീപ്പും കാറും പോലീസ് കസ്റ്റഡിയിലെടുത്തു. സംഭവത്തിൽ അഞ്ചുപേരെ കൂടി പിടികൂടാനുണ്ട്. അറസ്റ്റിലായ നൗഷാദ്, സുഗീഷ് എന്നിവരാണു പോലീസിനെ ആക്രമിച്ചത്. ഇവരെ കോടതി റിമാൻഡ് ചെയ്തു. ഇക്കഴിഞ്ഞ ചൊവ്വാഴ്ച രാത്രി പത്തോടെ കോറോത്തയിൽ പള്ളിക്കു സമീപം ഷക്കീറിന്‍റെ വീട്ടുപടിക്കലാണു സംഭവം. ഇവിടെ കാർ നിർത്തിയിട്ടു മാർഗതടസം ഉണ്ടാക്കിയതു ചോദ്യംചെയ്ത ഷക്കീറിനെയും 16കാരനായ മകനെയും സംഘം കൈയേറ്റം ചെയ്യുകയായിരുന്നു. വിവരമറിഞ്ഞെത്തി ഇവരെ കസ്റ്റഡിയിൽ എടുക്കാൻ ശ്രമിക്കുന്നതിനിടെ പോലീസിനെയും ആക്രമിച്ചു. പോലീസുകാരായ അർജുനന്‍റെ െ െ കയിൽ കടിക്കുകയും മുഖത്ത് അടിക്കുകയുംചെയ്തു. ഇതിനിടെ കാറിലെത്തിയ മറ്റൊരു സംഘം അക്രമികളെ ബലമായി രക്ഷപ്പെടുത്തി. മൂന്നുപരാതികളിലായാണ് എട്ടുപേർക്കെതിരേ കേസെടുത്തത്. പോലീസുകാരെ ആക്രമിച്ചതിനും പ്രതികളെ രക്ഷപ്പെടുത്തിയതിനും വീട്ടുടമയെ ആക്രമിച്ചതിനുമായാണു മൂന്നു കേസ്.

കൃഷിഭൂമിക്കായി നിരാഹാരം ; വൃദ്ധദന്പതികളെ ആശുപത്രിയിലേക്കു മാറ്റി

വടക്കാഞ്ചേരി: പരന്പരാഗത കൃഷിഭൂമി കളിസ്ഥലമായി വിട്ടുനൽകണമെന്നാവശ്യപ്പെട്ട് സിപിഎം നേതൃത്വത്തിൽ അക്രമം നടത്തിയതിനെത്തുടർന്ന് അനിശ്ചിതകാല നിരാഹാരം ആരംഭിച്ച ആറംഗ കുടുംബത്തിലെ വൃദ്ധദന്പതികളെ ആരോഗ്യനില വഷളായതിനെത്തുടർന്ന് ആശുപത്രിയിൽ പ്രവേശിപ്പിച്ചു. മൂന്നു ദിവസമായി നിരാഹാരം അനുഷ്ഠിക്കുന്ന ചെപ്പാറ സ്വദേശി വടക്കേചിറയിൽ ജോസഫിനെയും ഭാര്യ മോളിയെയുമാണ് വടക്കാഞ്ചേരി ജില്ലാ ആശുപത്രിയിലെ ത്രീവ്രപരിചരണവിഭാഗത്തിലേക്കു മാറ്റിയത്. ഇവരുടെ മകൻ ജോബിയും മൂന്നു കുട്ടികളും സമരം തുടരുകയാണ്. സമരംചെയ്യുന്ന കുടുംബത്തിനു പിന്തുണയുമായി കെപിസിസി സെക്രട്ടറി രാജേന്ദ്രൻ അരങ്ങത്തും നേതാക്കളും സ്ഥലം സന്ദർശിച്ചു. നിയമപരമായ രേഖകൾ കൈവശമുള്ള കർഷകനുനേരെ അതിക്രമത്തിനൊരുങ്ങുന്ന സിപിഎം തങ്ങൾക്കു താൽപര്യമുള്ളവരെ സംരക്ഷിക്കുകയും അല്ലാത്തവർക്കെതിരേ ഗുണ്ടായിസം നടത്തുകയുമാണെന്ന് രാജേന്ദ്രൻ അരങ്ങത്ത് ആരോപിച്ചു. ബ്ലോക്ക് കോണ്‍ഗ്രസ് പ്രസിഡന്‍റ് പി.ജി. ജയദീപ്, ജയൻ മംഗലം, കെ.കെ. അബൂബക്കർ, ഫിലിപ്പ് ജേക്കബ് എന്നിവരും സന്ദർശിച്ചു.

ചുമട്ടുതൊഴിലാളിയെ കൊലപ്പെടുത്താൻ ശ്രമം: പ്രതികളിൽ ഒരാൾ അറസ്റ്റിൽ

വലപ്പാട്: തൃപ്രയാർ സെന്‍ററിൽ കഴിഞ്ഞദിവസം ചുമട്ടുതൊഴിലാളിയെ ആക്രമിച്ചു കൊലപ്പെടുത്താൻ ശ്രമിച്ച കേസിൽ ഒരാൾ അറസ്റ്റിൽ. താന്ന്യം ചക്കമലത്ത് റോഷൻ(26) നെയാണ് വലപ്പാട് പോലീസ് താന്ന്യത്തുവച്ച് അറസ്റ്റ് ചെയ്തത്. ചുമട്ടുതൊഴിലാളി നാട്ടിക സ്വദേശി നന്പെട്ടി വീട്ടിൽ രാധാകൃഷ്ണ(56)നെയാണ് ഇരുന്പുവടി കൊണ്ട് തലയ്ക്കടിച്ചു കൊലപ്പെടുത്താൻ ശ്രമിച്ചത്. ഗുരുതര പരിക്കേറ്റ ഇയാൾ ആശുപത്രിയിൽ ചികിത്സയിലാണ്. രണ്ടുമാസംമുന്പ് തൃപ്രയാറിൽ നടന്ന അടിപിടിക്കേസിൽ രാധാകൃഷ്ണന്‍റെയും സുഹൃത്തിന്‍റെയും പരാതിയിൽ വലപ്പാട് പോലീസ് റോഷനെതിരേ കേസെടുത്തിരുന്നു. ആ സംഭവത്തിന്‍റെ വൈരാഗ്യത്താലാണു റോഷനും സായ്രാജും മറ്റു രണ്ടുപേരുംചേർന്ന് കഴിഞ്ഞദിവസം രാവിലെ രാധാകൃഷ്ണനെ തൃപ്രയാർ സെന്‍ററിൽ വച്ച് ആക്രമിച്ചത്. ഇരുന്പുവടികൊണ്ടും മരത്തിന്‍റെ കന്പുകൊണ്ടും തലയ്ക്കടിച്ചു കൊലപ്പെടുത്താൻ ശ്രമിക്കുകയായിരുന്നു. രാധാകൃഷ്ണന്‍റെയും ഷിബുവിന്‍റെയും ബൈക്കുകളും അക്രമികൾ തല്ലിത്തകർത്തു. മറ്റുള്ളവർ എത്തുന്പോഴേക്കും ഇവർ ബൈക്കിൽ രക്ഷപ്പെട്ടു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. വലപ്പാട് പോലീസ് ഇൻസ്പെക്ടർ എം.കെ. രമേഷ്, സബ് ഇൻസ്പെക്ടർമാരായ സി.എൻ. എബിൻ, പി.ജി., സദാശിവൻ, എഎസ്ഐ ഭരതനുണ്ണി, സീനിയർ സിവിൽ പോലീസ് ഓഫിസർമാരായ സോഷി, സുനിഷ് കുമാർ എന്നിവരാണ് അന്വേഷണസംഘത്തിലുണ്ടായിരുന്നത്.

ചാവക്കാട്‌ നഗരസഭയില്‍ കെ.പി. വത്സലനെ അനുസ്മരിച്ചു

ചാവക്കാട്: നഗരസഭാധ്യക്ഷനായിരിക്കെ കൊല്ലപ്പെട്ട സിപിഎം നേതാവ് കെ.പി. വത്സലന്‍റെ ചരമവാർഷികദിനത്തിൽ നഗരസഭയുടെ നേതൃത്വത്തിൽ പുഷ്പാർച്ചനയും അനുസ്മരണവും നടത്തി. നഗരസഭാധ്യക്ഷ ഷീജ പ്രശാന്ത് പുഷ്പാർച്ചന നടത്തി. വൈസ് ചെയർമാൻ കെ.കെ. മുബാറക് അധ്യക്ഷനായിരുന്നു. ഷാഹിന സലീം, പി.എസ്. അബ്ദുൽ റഷീദ്, ബുഷറ ലത്തീഫ്, എ.വി. മുഹമ്മദ് അൻവർ, പ്രസന്ന രണദിവെ, എം.ആർ. രാധാകൃഷണൻ എന്നിവർ പ്രസംഗിച്ചു. കെ.പി. വത്സലൻ രക്തസാക്ഷിദിനം ചാവക്കാട്: നഗരസഭ ചെയർമാനായിരിക്കെ കൊല്ലപ്പെട്ട കെ.പി. വത്സലന്‍റെ 19-ാം ചരമവാർഷികം സിപിഎമ്മിന്‍റെ നേതൃത്വത്തിൽ ആചരിച്ചു. പ്രകടനവും അനുസ്മരണ പൊതുസമ്മേളനവും നടത്തി. എ.സി. മൊയ്തീൻ എംഎൽഎ ഉദ്ഘാടനം ചെയ്തു. എൻ.കെ. അക്ബർ എംഎൽഎ അധ്യക്ഷനായിരുന്നു. സി. സുമേഷ്, എം. കൃഷ്ണദാസ്, ടി.ടി. ശിവദാസൻ, ഒരുമനയൂർ പഞ്ചായത്ത് പ്രസിഡന്‍റ് വിജിത സന്തോഷ് എന്നിവർ പ്രസംഗിച്ചു. വത്സലനു കുത്തേറ്റ പുന്നയൂർ ഒറ്റയിനിയിൽ രാവിലെ നടന്ന അനുസ്മരണസമ്മേളനം സിപിഎം ജില്ലാ സെക്രട്ടറി കെ.വി. അബ്ദുൽ ഖാദർ ഉദ്ഘാടനം ചെയ്തു. ഏരിയ സെക്രട്ടറി ടി.ടി. ശിവദാസ് അധ്യക്ഷത വഹിച്ചു.

പാവറട്ടി കുണ്ടുവക്കടവിലെ അനധികൃത നിർമാണം നിർത്തിവയ്ക്കണം

പാവറട്ടി: കുണ്ടവക്കടവിലെ അനധികൃത നിർമാണം നിർത്തിവെയ്ക്കണമെന്നും, നിർമിച്ചവ ഉടൻ പൊളിച്ചു നീക്കണമെന്നും കാണിച്ച് പാവറട്ടി പഞ്ചായത്ത് സെക്രട്ടറി നോട്ടീസ് പതിച്ചു ഉത്തരവിറക്കി. പാവറട്ടി പഞ്ചായത്തിലെ പന്ത്രണ്ടാം വാർഡിൽ കുണ്ടുവക്കടവ് പാലത്തിന് സമീപത്തെ സ്വകാര്യ വ്യക്തിയുടെ സ്ഥലത്താണ് അനധികൃത നിർമാണ പ്രവർത്തനങ്ങൾ നടന്നു കൊണ്ടിരിക്കുന്നത്. തീരദേശ നിയന്ത്രണ നിയമം നിലനിൽക്കുന്ന ഭാഗങ്ങളിൽ നിർമാണ പ്രവർത്തനങ്ങൾക്ക് മുൻകൂർ അനുമതി വേണമെന്നിരിക്കേ അനുമതി ഇല്ലാതെയും, 1994 പഞ്ചായത്ത് രാജ് ആക്ടിനും ബന്ധപ്പെട്ട ചട്ടങ്ങൾക്കും കെട്ടിട നിർമാണ ചട്ടങ്ങൾക്കും തീരദേശ പരിപാലന നിയമങ്ങൾക്കും എതിരായതിനാൽ 24 മണിക്കൂറിനുള്ളിൽ പൊളിച്ചു നീക്കണമെന്ന് ഉത്തരവിൽ പറയുന്നു. നോട്ടീസിലെ വിവരങ്ങൾക്ക് അതീതമായ കാര്യങ്ങൾ നിശ്ചിത സമയ പരിധിക്കുള്ളിൽ സ്ഥലമുടയ്ക്ക് പഞ്ചായത്ത് സെക്രട്ടറിയെ അറിയിക്കാമെന്നും, ഉത്തരവ് അനുസരിക്കാത്ത പക്ഷം സ്ഥലമുടമയ്ക്കെതിരെ നടപടി സ്വീകരിക്കുമെന്നും, തുടർന്നുണ്ടാവുന്ന കഷ്ടനഷ്ടങ്ങൾ ഉടമയിൽ നിന്നും വസൂലാക്കും എന്നും ഉത്തരവിലുണ്ട്.

കാത്തിരിപ്പിനു വിരാമം; തൃപ്രയാറിൽ പുതിയ പാലം നിർമാണം ഉടൻ

തൃപ്രയാർ: തൃപ്രയാറിൽ പുതിയ പാലത്തിന്‍റെ നിർമാണം രണ്ടു മാസത്തിനുള്ളിൽ ആരംഭിക്കും. പുതിയ പാലത്തിനു കോസ്റ്റൽ റെഗുലേഷൻ സോണിന്‍റെ(സിആർസെഡ്) അനുമതി ലഭിച്ചതിനെത്തുടർന്നാണ് പാലംപണി ആരംഭിക്കുന്നത്. കിഫ്ബി സഹായത്തോടെയാണു പാലം നിർമിക്കുക. 2016-17ലെ സംസ്ഥാന ബജറ്റിൽ 28.423 കോടി രൂപയാണ് ഇതിനു വകയിരുത്തിയിട്ടുള്ളത്. സി.സി. മുകുന്ദൻ എംഎൽഎയുടെ ഇടപെടലിനെത്തുടർന്നാണ് സിആർസെഡ് അനുമതി ലഭിച്ചത്. കനോലി കനാലിനു കുറകെ നിർമിക്കുന്ന പാലത്തിന് 200.48 മീറ്ററാണു നീളം. 11.050 മീറ്റർ വീതി. വാഹനഗതാഗതത്തിന് 7.5 മീറ്ററും നടപ്പാതയ്ക്ക് 1.50 മീറ്ററും വീതിയുണ്ടാകും. നാട്ടിക പഞ്ചായത്തിലെ 93 മീറ്ററും താന്ന്യം പഞ്ചായത്തിലെ 73 മീറ്ററും അപ്രോച്ച് റോഡുണ്ടാകും. നാട്ടിക വില്ലേജിൽ 19 സെന്‍റും താന്ന്യം വില്ലേജിൽ 25 സെന്‍റും ഭൂമി ഇതിനായി ഏറ്റെടുത്തു. നിലവിലെ പാലത്തിന്‍റെ വടക്കുഭാഗത്തായാണ് പുതിയ പാലം നിർമിക്കുന്നത്. ആറു പതിറ്റാണ്ടിലേറെ പഴക്കമുള്ള നിലവിലെ പാലത്തിനു ബലക്ഷയമുണ്ടെന്നു കണ്ടെത്തിയതിനെത്തുടർന്നാണ് പുതിയ പാലം നിർമിക്കുന്നത്. തൃപ്രയാർ - ചേർപ്പ് - തൃശൂർ സംസ്ഥാനപാതയിലെ പ്രധാന പാലമാണ് തൃപ്രയാർ പാലം. ദിവസവും നിരവധി സ്വകാര്യ ബസുകളുൾപ്പെടെ നൂറുകണക്കിന് വാഹനങ്ങളും യാത്രക്കാരും ആശ്രയിക്കുന്ന പാലമാണിത്.

ലോറി നിയന്ത്രണംവിട്ടു മറിഞ്ഞ് മൂന്നു യുവാക്കൾക്കു പരിക്ക്

എരുമപ്പെട്ടി: കോട്ടപ്പുറത്ത് നിയന്ത്രണംവിട്ട ലോറി മറിഞ്ഞ് മൂന്നുപേർക്കു പരിക്കേറ്റു. ഇന്നലെ പുലർച്ചെ മൂന്നിനാണ് അപകടമുണ്ടായത്. ലോറിയിലുണ്ടായിരുന്ന കോട്ടയം സ്വദേശികളായ കാവിൽ കിഴക്കേതിൽ സുജിത്ത് (32), കാവിൽ കീഴക്കേതിൽ അഖിൽകുമാർ(33), കുമരൻതറയിൽ ടൈസൻ (33) എന്നിവർക്കാണു പരിക്കേറ്റത്. ഡ്രൈവർ ഷെറിൻ പരിക്കേൽക്കാതെ രക്ഷപ്പെട്ടു. ലോറിക്കടിയിൽ കാൽ കുടുങ്ങിക്കിടന്ന സുജിത്തിനെ പോലീസും ഫയർഫോഴ്സും എരുമപ്പെട്ടി ആക്ട്സ് പ്രവർത്തകരും നാട്ടുകാരും ചേർന്ന് ക്രെയിൻ ഉപയോഗിച്ച് ലോറി ഉയർത്തിയാണു രക്ഷപ്പെടുത്തിയത്. പരിക്കേറ്റവരെ ആക്ട്സ് പ്രവർത്തകർ മുളങ്കുന്നത്തുകാവ് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. സുജിത്തിന്‍റെ കാലുകൾക്കു സാരമായി പരിക്കേറ്റു. മറ്റുള്ളവരുടെ പരിക്ക് സാരമുള്ളതല്ല. മങ്ങാട് - അത്താണി മെഡിക്കൽ കോളജ് റോഡിൽ കോട്ടപ്പുറം ആറ്റത്ര വളവിലാണു ലോറി മറിഞ്ഞത്. കോട്ടയത്തുനിന്ന് ചാലിശേരിയിലേക്കു ഗാനമേള ടീമിനു സൗണ്ട് സിസ്റ്റവുമായി പോകുകയായിരുന്നു ലോറി. കോട്ടപ്പുറം വളവിൽ നിയന്ത്രണംവിട്ട് വൈദ്യുതി പോസ്റ്റും വീട്ടുമതിലും ഗെയ്റ്റും ഇടിച്ചുതകർത്ത് മറിയുകയായിരുന്നു. ആളൂർ സോഫിയ വിൻസെന്‍റിന്‍റെ വീട്ടുമതിലാണു തകർന്നത്. എരുമപ്പെട്ടി, വടക്കാഞ്ചേരി, മെഡിക്കൽ കോളജ് സ്റ്റേഷനുകളിൽനിന്ന് പോലീസും വടക്കാഞ്ചേരിയിൽനിന്ന് ഫയർഫോഴ്സും കെഎസ്ഇബി ജീവനക്കാരുമെത്തിയാണു രക്ഷാപ്രവർത്തനം നടത്തിയത്.

വാഹനാപകടത്തിൽ പരിക്കേറ്റ യുവാവ് മരിച്ചു

അരിമ്പൂർ: വാഹനാപകടത്തിൽ പരിക്കേറ്റ് ചികിത്സയിൽ കഴിഞ്ഞിരുന്ന യുവാവ് മരിച്ചു. പെരിങ്ങോട്ടുകര വടക്കുംമുറിയിൽ വാടകയ്ക്ക് താമസിക്കുന്ന രാഹുൽ(32) ആണ് തൃശൂർ മെഡിക്കൽ കോളജ് ആശുപത്രിയിൽ ചികിത്സയിലിരിക്കെ മരിച്ചത്. അരിമ്പൂരിലെ സർക്കാർ സ്കൂളിനു സമീപം വിഷുത്തലേന്ന് രാത്രിയാണ് അപകടം. ഭാര്യാവീട്ടിൽ നിന്ന് പെരിങ്ങോട്ടുകരയിലെ വീട്ടിലേക്ക് സ്കൂട്ടറിൽ യാത്ര ചെയ്തിരുന്ന രാഹുൽ റോഡിൽ വീണു കിടക്കുന്നതാണ് കണ്ടത്. തുടർന്ന് ആംബുലൻസിൽ ആശുപത്രിയിൽ എത്തിക്കുകയായിരുന്നു. ചികിത്സയിലിരിക്കെ ഇന്നലെ മരിച്ചു. മാഞ്ഞാലിപറമ്പിൽ നാരായണൻകുട്ടിയുടെയും ലളിതയുടെയും മകനാണ്. ഡ്രൈവറായി ജോലി ചെയ്യുന്നു. ഭാര്യ: കൃഷ്ണേന്ദു. മകൻ: വാസുദേവക്. സഹോദരൻ: ഗോകുൽ. അന്തിക്കാട് പോലീസ് മേൽനടപടികൾ സ്വീകരിച്ചു. മൃതദേഹം കുറ്റുമുക്കിലെ ചെറുമുക്ക് അമ്പലത്തിനു സമീപം അമ്മാവൻ ബേബിയുടെ വീട്ടിൽ. സംസ്കാരം ഇന്നു രാവിലെ 11ന് വടൂക്കര ശ്മശാനത്തിൽ.

യുവാവ് കുഴഞ്ഞുവീണ് മരിച്ചു

എരുമപ്പെട്ടി: യുവാവ് കുഴഞ്ഞ് വീണ് മരിച്ചു. കടങ്ങോട് മില്ല് കുഴിപ്പത്ത് നഗറിൽ വലിയ പുരയ്ക്കൽ സനിൽകുമാർ(40) ആണ് മരിച്ചത്. പെരുമ്പിലാവ് അൻസാർ ആശുപത്രിയ്ക്കു സമീപം സ്കൂളിനു മുന്നിൽ വച്ച് ഇന്നലെ വൈകീട്ട് 5.30 ഓടെയാണ് സനിൽകുമാർ കുഴഞ്ഞുവീണത്. ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന സനിൽകുമാറിന് ദേഹാസ്വാസ്ഥ്യമുണ്ടാകുകയും വീഴുകയുമായിരുന്നു. ഉടനെ നാട്ടുകാർ അൻസാർ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭാര്യ: സുദയ. മക്കൾ: അശ്വിൻ, അവന്തിക.

കൊടുങ്ങല്ലൂർ ക്രാഫ്റ്റ് ആശുപത്രിയിൽ രക്തബാങ്ക് ആരംഭിക്കുന്നു

കൊടുങ്ങല്ലൂർ: രക്തഘടകങ്ങൾ വേർതിരിച്ച് സൂക്ഷിക്കുന്നതിനുള്ള സൗകര്യങ്ങൾ ഉൽപ്പടെ ഏറ്റവും ആധുനിക രീതിയിലുള്ള രക്ത ബാങ്ക് കൊടുങ്ങല്ലൂർ ക്രാഫ്റ്റിൽ പ്രവർത്തനം ആരംഭിക്കുന്നു. ക്രാഫ്റ്റ് രക്തബാങ്കിന്‍റെ ഉദ്ഘാടനം ഇന്ന് ഉച്ചയ്ക്ക് 12ന് നഗരസഭ ചെയർപേഴ്‌സൺ ടി.കെ. ഗീത നിർവഹിക്കും. ക്രാഫ്റ്റ് ആശുപത്രി ഗ്രൂപ്പ് ചെയർമാൻ ഡോ. സി. മുഹമ്മദ് അഷറഫ് അധ്യക്ഷനാകും. രണ്ട് കോടിയോളം രൂപ മുതൽമുടക്കിയാണ് ബ്ലഡ് ബാങ്ക് സജ്ജീകരിച്ചിട്ടുള്ളതെന്ന് ക്രാഫ്റ്റ് ആശുപത്രി ഗ്രൂപ്പ് സിഇഒ ഡോ. ജോയ് ഇന്നസെന്‍റ്്, മെഡിക്കൽ സൂപ്രണ്ട് ഡോ. ജി ജയരാജ്, ഗൈനക്കോളജി വിഭാഗം ഉപ മേധാവി ഡോ. അലീഷ ഷഫ്‌ജീർ, ബ്ലഡ് ബാങ്ക് മാനേജർ സഞ്ജു എന്നിവർ വാർത്താസമ്മേളനത്തിൽ പറഞ്ഞു. ചാവക്കാട് മുതൽ വരാപ്പുഴ വരെയുള്ള തീരദേശ മേഖലയിൽ ഇത്രയും വിപുലമായ ഒരു രക്തബാങ്ക് ഇതാദ്യമാണ്. രക്തഘടകങ്ങൾ വേർതിരിക്കാനും സൂക്ഷിക്കാനുമുള്ള സംവിധാനം സമൂഹത്തിന് ഒരു മുതൽ‌കൂട്ടാണ്. ഒരാൾ രക്തം ദാനം ചെയ്യുമ്പോൾ അത് കുറഞ്ഞത് നാലു ഘടകങ്ങൾ ആയി വേർതിരിക്കപ്പെടുകയും അങ്ങനെ നാലു പേർക്ക് ഒരേ സമയം ഇതുകൊണ്ടുള്ള പ്രയോജനം ലഭിക്കുകയും ചെയ്യുന്നു. ഏകദേശം 600 യൂണിറ്റ് രക്തം ഒരേസമയം സൂക്ഷിക്കുവാനുള്ള രക്ത ബാങ്കാണ് സജ്ജീകരിച്ചിരിക്കുന്നത്. അപൂർവ രക്തഗ്രൂപ്പുകൾ ശേഖരിക്കുന്നതിനും ദാതാക്കളെ രക്തം നൽകുന്നതിന്‍റെ ആവശ്യകത ബോധ്യപ്പെടുത്തുന്നതിനും വിവിധതരം കാമ്പയിനുകൾ ആവിഷ്‌കരിച്ചിട്ടുണ്ട്. 24 മണിക്കൂറും പ്രവർത്തിക്കുന്ന രീതിയിലാണ് രക്ത ബാങ്കിന്‍റെ പ്രവർത്തനം. ജനങ്ങൾക്ക് എളുപ്പത്തിൽ എത്തിച്ചേരാൻ സാധിക്കുന്ന തരത്തിൽ ദേശീയ പാതക്കരികിലുള്ള പഴയ കെ.ജെ. ആശുപത്രി കെട്ടിടത്തിൽ ആണ് ബ്ലഡ് ബാങ്ക് പ്രവർത്തനം ആരംഭിക്കുന്നതെന്നും അവർ പറഞ്ഞു.

കത്തീഡ്രല്‍ ഇടവകയില്‍ ലഹരിക്കെതിരേ സിഗ്നേച്ചര്‍ കാമ്പയിനു തുടക്കമായി

ഇരിങ്ങാലക്കുട: ലഹരിയുടെ പ്രചാരകര്‍ ഒരു സമൂഹത്തെയാണ് കൊന്നെടുക്കുന്നതെന്നു ബിഷപ് മാര്‍ പോളി കണ്ണൂക്കാടന്‍. സെന്‍റ്് തോമസ് കത്തീഡ്രല്‍ ഇടവകയിലെ യുവജന സംഘടനകളായ കെസിവൈഎം, സിഎല്‍സി, ജീസസ് യൂത്ത് എന്നിവരുടെ നേതൃത്വത്തില്‍ നടന്ന ലഹരിക്കെതിരേയുള്ള സിഗ്നേച്ചര്‍ കാമ്പയില്‍ ഉദ്ഘാടനംചെയ്തു സംസാരിക്കുകയായിരുന്നു ബിഷപ്. ജീവിതം അമൂല്യമാണ്, അതു തല്ലിക്കെടുത്തരുത്. മയക്കുമരുന്നില്‍ മരുന്നില്ല മരണമാണെന്ന യാഥാര്‍ഥ്യം ഏവരും തിരിച്ചറിയണം. സര്‍ക്കാരിന്‍റെ യും സന്നദ്ധസംഘടനകളുടെയും പ്രവര്‍ത്തനങ്ങളില്‍ പങ്കുചേര്‍ന്ന് നിശ്ചയദാര്‍ഢ്യത്തോടും ആത്മവിശ്വാസത്തോടുംകൂടെ ലഹരിക്കെതിരേയുള്ള പേരാട്ടം ശക്തമാക്കണം. അതിലൂടെ സുന്ദരമായ ഒരു ഭാവിതലമുറയെ വാര്‍ത്തെടുക്കുവാന്‍ സാധിക്കണമന്നും ബിഷപ് കൂട്ടിച്ചേര്‍ത്തു. കത്തീഡ്രല്‍ വികാരി റവ.ഡോ. ലാസര്‍ കുറ്റിക്കാടന്‍ അധ്യക്ഷത വഹിച്ചു. അസിസ്റ്റന്‍റ് വികാരിമാരായ ഫാ. ഓസ്റ്റിന്‍ പാറയ്ക്കല്‍, ഫാ. ബെല്‍ഫിന്‍ കോപ്പുള്ളി, ഫാ. ആന്‍റണി നമ്പളം, കെസിവൈഎം പ്രസിഡന്‍റ്് ഗോഡ്‌സണ്‍ റോയ്, സിഎല്‍സി പ്രസിഡന്‍റ്് അജയ് ബിജു, ജീസസ് യൂത്ത് കോ- ഓര്‍ഡിനേറ്റര്‍ ബെന്‍സണ്‍ തോമസ്, ട്രസ്റ്റി സി.എം. പോള്‍, കുടുംബസമ്മേളന കേന്ദ്രസമിതി പ്രസിഡന്‍റ്് ജോമി ചേറ്റുപുഴക്കാരന്‍, കെസിവൈഎം ആനിമേറ്റര്‍ ജോസ് മാമ്പിള്ളി എന്നിവര്‍ നേതൃത്വം നല്‍കി.

ആനന്ദപുരത്ത് സൗജന്യ പ്രഷര്‍ - ഷുഗര്‍ പരിശോധന ആരംഭിച്ചു

ആനന്ദപുരം: റൂറല്‍ സൊസൈറ്റിയുടെ ജീവകാരുണ്യ പ്രവര്‍ത്തനങ്ങളുടെ ഭാഗമായുള്ള സൗജന്യ പ്രഷര്‍-ഷുഗര്‍ പരിശോധന ക്യാമ്പ് ഐബിഎം സൊസൈറ്റി പ്രസിഡന്‍റ്് ആന്‍റോ പെരുമ്പുള്ളി ഉദ്ഘാടനം ചെയ്തു. റൂറല്‍ സൊസൈറ്റി പ്രസിഡന്‍റ് ജോമി ജോണ്‍ അധ്യക്ഷത വഹിച്ചു. കാട്ടൂര്‍ സര്‍വീസ് സഹകരണ ബാങ്ക് പ്രസിഡന്റ് ജോമോന്‍ വലിയവീട്ടില്‍, റൂറല്‍ സൊസൈറ്റി വൈസ് പ്രസിഡന്റ് പി.സി. ഭരതന്‍, ഡയറക്ടര്‍ ശാരിക രാമകൃഷ്ണന്‍ എന്നിവര്‍ പ്രസംഗിച്ചു. ഇരിങ്ങാലക്കുട ഐസിഎല്‍ മെഡിലാബുമായി സഹകരിച്ച് നടത്തുന്ന പരിശോധന ക്യാമ്പ് എല്ലാ മാസങ്ങളിലും രണ്ടാം ശനിയാഴ്ചകളില്‍ രാവിലെ ഏഴ് മുതല്‍ ഒമ്പത് വരെ ആനന്ദപുരം ഐസിഎല്‍ ലാബില്‍ നടക്കും.

കുട്ടന്‍കുളം നവീകരണം ഉത്സവശേഷം ആരംഭിക്കുമെന്ന് പൊതുമരാമത്തുവകുപ്പ് കെട്ടിടവിഭാഗം

ഇരിങ്ങാലക്കുട: കൂടല്‍മാണിക്യം കിഴക്കേനടയിലെ കുട്ടന്‍കുളം നവീകരണം ഉത്സവശേഷം ആരംഭിക്കുമെന്ന് പൊതുമരാമത്തുവകുപ്പ് കെട്ടിടവിഭാഗം. മണ്ണുപരിശോധന പൂര്‍ത്തിയാക്കി ചീഫ് എന്‍ജിനീയറില്‍നിന്ന് സാങ്കേതികാനുമതി ലഭിച്ച് ടെന്‍ഡര്‍ നടപടികള്‍ പൂര്‍ത്തിയാക്കിയിരുന്നു. ഏപ്രില്‍ 19 നുശേഷം ടെൻഡര്‍ തുറന്ന് കരാറുകാരെ ചുമതലപ്പെടുത്തുമെങ്കിലും കുളം നവീകരണത്തിന് മുന്നൊരുക്കം ആവശ്യമുള്ളതിനാല്‍ ഉത്സവത്തിനുശേഷം മാത്രമേ ആരംഭിക്കുകയുള്ളൂവെന്ന് പൊതുമരാമത്തുവിഭാഗം വ്യക്തമാക്കി. മേയ് എട്ടു മുതല്‍ 18 വരെയാണ് ഉത്സവം. കുട്ടന്‍കുളത്തിന്‍റെ ഇടിഞ്ഞുവീണ തെക്കേ മതിലടക്കം നാലരികിലും മതില്‍ കെട്ടി കുളം വൃത്തിയാക്കി നവീകരിക്കാനാണ് പദ്ധതി. ഇതിനായി സംസ്ഥാന സര്‍ക്കാര്‍ ബജറ്റില്‍ അനുവദിച്ച നാലുകോടി രൂപയാണ് പൊതുമരാമത്ത് വകുപ്പിന് അനുവദിച്ചിരിക്കുന്നത്. പ്രസിദ്ധമായ കുട്ടംകുളം സമരം നടന്ന ചരിത്രപ്രാധാന്യമുള്ളതും കുളം നിര്‍മിച്ച ആളുടെ പേരില്‍ അറിയപ്പെടുന്നതുമായ അപൂര്‍വം കുളങ്ങളില്‍ ഒന്നാണിത്. ഒരു ഏക്കറിലധികം വിസ്തൃതിയില്‍ വളരെ ശാസ്ത്രീയമായ രീതിയില്‍ ദീര്‍ഘചതുരാകൃതിയില്‍ നിര്‍മിച്ച ഈ കുളത്തില്‍ നിഴല്‍ വീഴില്ലെന്ന പ്രത്യേകതയുമുണ്ട്.

തേജസ് അങ്കണവാടി കെട്ടിടം നിര്‍മാണോദ്ഘാടനം നടത്തി

കാറളം: കാറളം പഞ്ചായത്തില്‍ തേജസ് അങ്കണവാടി കെട്ടിടത്തിന്‍റെ നിര്‍മാണോദ്ഘാടനം ഉന്നത വിദ്യാഭ്യാസ സാമൂഹ്യനീതി വകുപ്പ് മന്ത്രി ഡോ. ആര്‍. ബിന്ദു നിര്‍വഹിച്ചു. ഇരിങ്ങാലക്കുട എംഎല്‍എയും സാമൂഹ്യനീതി വകുപ്പ് മന്ത്രിയുമായ ഡോ. ആര്‍. ബിന്ദുവിന്‍റെ ആസ്തി വികസന ഫണ്ടില്‍ നിന്നും 25 ലക്ഷം രൂപ വിനിയോഗിച്ചാണ് പുതിയ അങ്കണവാടി കെട്ടിടം നിര്‍മിക്കുന്നത്. പുതിയ അങ്കണവാടി കെട്ടിടത്തില്‍ സൗകര്യങ്ങളോട് കൂടിയ ഹാള്‍, കിച്ചണ്‍, ശിശു സൗഹൃദ ടോയ്‌ലറ്റ്, റാമ്പ് സൗകര്യം എന്നിവ സജ്ജമാക്കും. ഗ്രാമപ്പഞ്ചായത്ത് പ്രസിഡന്‍റ് ബിന്ദു പ്രദീപ് അധ്യക്ഷത വഹിച്ചു. വാര്‍ഡ് മെമ്പറും സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണുമായ അമ്പിളി റെനില്‍ സ്വാഗതം പറഞ്ഞു. ബ്ലോക്ക് പഞ്ചായത്ത് പ്രസിഡന്‍റ്് ലളിത ബാലന്‍, ബ്ലോക്ക് പഞ്ചായത്ത് വൈസ് പ്രസിഡന്‍റ്് കെ.എസ്. രമേഷ്, ഗ്രാമപ്പഞ്ചായത്ത് വൈസ് പ്രസിഡന്‍റ് സുനില്‍ മാലാന്ത്ര തുടങ്ങിയവര്‍ മുഖ്യാതിഥികളായി. ബ്ലോക്ക് സെക്രട്ടറി നിഖില്‍, ഐസിഡിഎസ് സൂപ്പര്‍വൈസര്‍ ഐശ്വര്യമോള്‍ ഫ്രാന്‍സിസ് എന്നിവര്‍ പങ്കെടുത്തു.

പഞ്ചായത്ത് കമ്മിറ്റി തീരുമാനിക്കാതെ അങ്കണവാടി ഉദ്ഘാടനം; യുഡിഎഫ് അംഗങ്ങൾ പ്രതിഷേധിച്ചു

കാടുകുറ്റി: ഗ്രാമപഞ്ചായത്തിലെ അഞ്ചാം വാർഡിലെ ഒൻപതാം നമ്പർ അങ്കണവാടിക്കായി നിർമിച്ച പുതിയ കെട്ടിടത്തിന്‍റെ ഉദ്ഘാടനം പഞ്ചായത്ത് കമ്മിറ്റി തീരുമാനമെടുക്കാതെ നടത്തിയതിൽ യുഡിഎഫ് അംഗങ്ങൾ പ്രതിഷേധിച്ചു. കെട്ടിടത്തിന്‍റെ ഉദ്ഘാടനം മേയ് 16ന് നടത്താനുള്ള തീരുമാനം ഇന്നലെ ചേർന്ന പഞ്ചായത്ത് കമ്മിറ്റിയിലെ അജൻഡയിൽ ഉൾപ്പെടുത്തിയതായി തങ്ങളെ അറിയിച്ചതാണെന്നും എന്നാൽ അതിനു വിഭിന്നമായി ഇന്നലെ തന്നെ ഉദ്ഘാടനം നടത്തിയ നടപടി പഞ്ചായത്ത് പ്രസിഡന്‍റിന്‍റെ ധാർഷ്ട്യവും ധിക്കാരവുമാണെന്ന് പാർലിമെന്‍ററി പാർട്ടി ലീഡർ മോളി തോമസ് പറഞ്ഞു. പഞ്ചായത്ത് അറിയാതെ നടത്തിയ ഉദ്ഘാടനത്തിന്‍റെ ചെലവ് എഴുതി എടുക്കാനുള്ള തീരുമാനത്തിനെതിരെ യുഡിഎഫ് അംഗങ്ങൾ വിയോജനം രേഖപ്പെടുത്തി. യുഡിഎഫ് അംഗങ്ങളായ ഡെയ്സി ഫ്രാൻസിസ്, കെ.സി. മനോജ്, ലിജി അനിൽകുമാർ, ജീജ സെബാസ്റ്റ്യൻ എന്നിവർ പ്രസംഗിച്ചു. പുതിയ കെട്ടിടം പൂർത്തിയായ സാഹചര്യത്തിൽ ഒന്നര വർഷമായി ഇൻഡോർ സ്റ്റേഡിയത്തിൽ താത്കാലികമായി പ്രവർത്തിച്ചിരുന്ന അങ്കണവാടി അടിയന്തര പ്രാധാന്യത്തോടെ മാറ്റുക മാത്രമായിരുന്നു ലക്ഷ്യമെന്നും മറ്റൊരു ദുരുദ്ദേശമുണ്ടായിരുന്നില്ലെന്നും പ്രസിഡന്‍റ് പ്രിൻസി ഫ്രാൻസീസ് പ്രതികരിച്ചു. 15നായിരുന്നു പഞ്ചായത്ത് കമ്മിറ്റി കൂടാൻ ആദ്യം തീരുമാനിച്ചിരുന്നതെന്നും ഒഴിച്ചുകൂടാനാകാത്ത സാഹചര്യത്തിലാണ് ഇന്നലെ നടത്തിയതെന്നും പ്രസിഡന്‍റ് പറഞ്ഞു. അജൻഡയിൽ 16.4.2025ന് പകരം 16.5.2025 എന്നെഴുതിയത് സങ്കേതിക പിഴവ് മാത്രമായിരുന്നെന്നും ഫോണിൽ വിളിച്ച് മുഴുവൻ മെമ്പർമാരെയും ഉദ്ഘാടനം അറിയിച്ചിരുന്നതാണെന്നും പ്രസിഡന്‍റ്് പറഞ്ഞു. പഞ്ചായത്തിന്‍റെ വാർഷിക പദ്ധതിയിൽ ഉൾപ്പെടുത്തിയാണ് 397 ചതുരശ്രമീറ്റർ വിസ്തൃതിയിൽ അങ്കണവാടി നിർമിച്ചിരിക്കുന്നത്. 2023-24 സാമ്പത്തിക വർഷത്തിലെ വികസന ഫണ്ട് 10 ലക്ഷവും 2024-25 ലെ മെയിന്‍റനൻസ് ഗ്രാന്‍റ് 5 ലക്ഷം രൂപയാണ് അടുക്കള, സ്റ്റാേർ, ടോയ്‌ലറ്റ്, ചുറ്റുമതിൽ, മുകൾനിലയിലെ ട്രസ് വർക്ക് തുടങ്ങിയവയ്ക്കായി വിനിയോഗിച്ചത്.

ചാലക്കുടി നഗരസഭയ്ക്ക് പുതിയ മാസ്റ്റർപ്ലാൻ തയാറാക്കുന്നു

ചാലക്കുടി: നഗരസഭയ്ക്ക് പുതിയ മാസ്റ്റർ പ്ലാൻ തയാറാക്കുന്നു. അമൃത് 2.0 പദ്ധതിയുടെ ഭാഗമായാണ് മാസ്റ്റർപ്ലാൻ തയാറാക്കുന്നത്. ആദ്യഘട്ടം ഡ്രോൺ സർവേ ആരംഭിച്ചു. കേന്ദ്ര സർക്കാരിനുവേണ്ടി സർവേ ഓഫ് ഇന്ത്യയ്ക്കാണ് മാസ്റ്റർപ്ലാൻ തയാറാക്കുന്നതിന്‍റെ ഭാഗമായ ഡ്രോൺ സർവേയുടെ ചുമതല. ഇവർക്കുവേണ്ടി സബ്ട്രിഷി എന്ന സ്ഥാപനമാണ് ഡ്രോൺ സർവേ നടത്തുന്നത്. രാജ്യത്തെ അമ്പതിനായിരത്തിലധികം ജനസംഖ്യയുള്ള പട്ടണങ്ങളെയാണ് അമൃത് പദ്ധതിയിൽ ഉൾപ്പെടുത്തി മാസ്റ്റർപ്ലാൻ തയാറാക്കാൻ കേന്ദ്ര സർക്കാർ തെരഞ്ഞെടുത്തിട്ടുള്ളത്. 75 ലക്ഷം രൂപ ചാലക്കുടി നഗരസഭയുടെ മാസ്റ്റർപ്ലാൻ തയാറാക്കുന്നതിനായി അനുവദിച്ചിട്ടുണ്ട്. ഡ്രോൺ സർവേക്കുശേഷം ജില്ലാ ടൗൺ പ്ലാനിംഗ് വിഭാഗമാണ് മാസ്റ്റർപ്ലാൻ തയാറാക്കുക. വിവിധ നടപടിക്രമങ്ങൾക്ക് ശേഷം അന്തിമ മാസ്റ്റർപ്ലാൻ സർക്കാർ അംഗീകരിച്ച് വിജ്ഞാപനം ചെയ്യുമ്പോൾ, നഗരസഭയുടെ നിലവിലുള്ള മാസ്റ്റർപ്ലാൻ ഇല്ലാതാകും. നഗരസഭയ്ക്ക് ആദ്യമായ് സമ്പൂർണ മാസ്റ്റർപ്ലാൻ തയാറാക്കി വിജ്ഞാപനം ചെയ്തത് 2022ലാണ്. 2012 ലാണ് ഈ മാസ്റ്റർപ്ലാൻ തയാറാക്കുന്നതിനുള്ള നടപടികൾ ആരംഭിച്ചത്. നിലവിൽ പ്രസിദ്ധീകരിച്ചിട്ടുള്ള മാസ്റ്റർ പ്ലാനിലെ പല ഡാറ്റകളും 10 വർഷം മുൻപത്തെയാണ്. പുതിയ മാസ്റ്റർ പ്ലാൻ തയാറാകുമ്പോൾ നിലവിലുള്ള ഇപ്പോഴത്തെ ഡാറ്റകളെല്ലാം ഉൾപ്പെടുത്തി പുതുക്കാൻ സാധിക്കും. ഇപ്പോഴത്തെ മാസ്റ്റർപ്ലാനിലെ വിട്ടുപോയ നിർദേശങ്ങൾ ഉൾപ്പെടുത്താനും സാധിക്കും. നിലവിലെ റോഡ്, തോട്, വീടുകൾ, മറ്റ് കെട്ടിടങ്ങൾ തുടങ്ങി എല്ലാ വിവരങ്ങളും ഉൾപ്പെടുന്ന ജിയോ ഡാറ്റാ ബേയ്സ് നഗരസഭക്ക് ലഭിക്കും.നഗരസഭ വികസന പ്രവർത്തനങ്ങൾക്കും ഇതിന്‍റെ ഭാഗമായി പദ്ധതികൾ തയാറാക്കുന്നതിനും ഇത് ഉപകരിക്കും. മാസ്റ്റർപ്ലാൻ തയാറാക്കുന്നതുമായ് ബന്ധപ്പെട്ട ഡ്രോൺ സർവേയുടെ ഉദ്്ഘാടനം ചെയർമാൻ ഷിബു വാലപ്പൻ നിർവഹിച്ചു. വൈസ് ചെയർപേഴ്സൻ സി. ശ്രീദേവി അധ്യക്ഷയായി. സ്റ്റാൻഡിംഗ് കമ്മിറ്റി ചെയർമാൻമാരായ ബിജു എസ്. ചിറയത്ത്, പ്രീതി ബാബു, ദിപു ദിനേശ്, എം.എം. അനികുമാർ, പ്രതിപക്ഷനേതാവ് സി.എസ്. സുരേഷ്, മുൻ ചെയർമാൻമാരായ വി.ഒ. പൈലപ്പൻ, ആലീസ് ഷിബു, വാർഡ് കൗൺസിലർ റോസി ലാസർ, സെക്രട്ടറി കെ. പ്രമോദ്, സൂപ്രണ്ട് ദിലേഷ് പൊന്നമ്പി എന്നിവർ പ്രസംഗിച്ചു.

പാവറട്ടി തീർഥകേന്ദ്രത്തിൽ ബുധനാഴ്ച ആചരണം പൂർത്തിയായി

പാവറട്ടി: സെന്‍റ് ജോസഫ് തീർഥ കേന്ദ്രത്തിൽ വലിയനോമ്പിലെ ബുധനാഴ്ച ആചരണം പൂർത്തിയായി. വിശുദ്ധ യൗസേപ്പിതാവിന്‍റെ വലിയ തിരുനാളിന് ഒരുക്കമായിട്ടാണ് അമ്പതുനോമ്പിലെ ഏഴ് ബുധനാഴ്ചകളിൽ തിരുനാൾ ആഘോഷിക്കുന്നത്. നേർച്ച ഊട്ടിന്‍റെ വെഞ്ചരിപ്പുകർമം റെക്ട‌ർ ഫാ. ആന്‍റണി ചെമ്പകശേരി നിർവഹിച്ചു. പാട്ടുകുർബാനയ്ക്ക് ഫാ. തോമസ് ഊക്കൻ മുഖ്യകാർമികത്വം വഹിച്ചു. തിരുനാൾ ദിവ്യബലിയെതുടർന്ന് പാരീഷ് ഹാളിൽ നടന്ന സൗജന്യ നേർച്ച ഊട്ടിൽ ആയിരക്കണക്കിനു വിശ്വാസികൾ പങ്കുചേർന്നു. തീർഥകേന്ദ്രം അൾത്താരയിൽ നടന്ന കുട്ടികൾക്കുള്ള ആദ്യ ചോറൂണിനും പ്രത്യേക പ്രാർഥനകൾക്കും നിരവധിപേർ എത്തി. ബുധനാഴ്ച ആചരണത്തിന്‍റെ ഭാഗമായി വിശുദ്ധനു ലില്ലിപ്പൂസമർപ്പണം, അടിമ ഇരുത്തൽ എന്നിവ നടന്നു. സഹവികാരിമാരായ ഫാ. ഗോഡ്‌വിൻ കിഴക്കൂടൻ, ഫാ. ലിവിൻ കുരുതുകുളങ്ങര എന്നിവർ തിരുക്കർമങ്ങൾക്ക് സഹകാർമികരായി. ട്രസ്റ്റിമാരായ ഒ.ജെ. ഷാജൻ, പിയൂസ് പുലിക്കോട്ടിൽ, കെ.ജെ.വിൻസെന്‍റ്, വിത്സൻ നീലങ്കാവിൽ, ഊട്ട്കമ്മിറ്റി കൺവീനർ ഡേവിസ് തെക്കേക്കര, ഭാരവാഹികളായ സേവിയർ അറയ്ക്കൽ, സി.വി. സേവിയർ, റാഫി നീലങ്കാവിൽ, എൻ.ജെ. ലിയോ, സുബിരാജ് തോമസ്, ഇ.ജെ.ടി. ദാസ്, കെ.ഒ. ബാബു, ഒ.എം. ഫ്രാൻസിസ്, വി.എൽ. ഷാജു, ഒ.ജെ. ജസ്റ്റിൻ തുടങ്ങിയവർ ആഘോഷപരിപാടികൾക്ക് നേതൃത്വം നൽകി.

ഗുരുവായൂരില്‍ ലോക പൈതൃക ദിനാഘോഷം നാളെ

ഗുരുവായൂര്‍: പൈതൃകം ഗുരുവായൂരിന്‍റെ നേതൃത്വത്തില്‍ ലോക പൈതൃകം ദിനാഘോഷവും സമാദരണ സംഗമവും നാളെ നടക്കുമെന്ന് ഭാരവാഹികള്‍ പത്രസമ്മേളനത്തിൽ അറിയിച്ചു. ഉച്ചകഴിഞ്ഞ് മൂന്നിന് നഗരസഭാ ഇഎംഎസ് ചത്വരത്തില്‍ സംഗീത നാടക അക്കാദമി ചെയര്‍മാന്‍ മട്ടന്നൂര്‍ ശങ്കരന്‍കുട്ടി മാരാർ ഉദ്ഘാടനം ചെയ്യും. ക്ഷേത്രം ഊരാളന്‍ മല്ലിശേരി പരമേശ്വരന്‍ നമ്പൂതിരിപ്പാട് ഭദ്രദീപം കൊളുത്തും. മേള പ്രാമാണികന്‍ കക്കാട് രാജപ്പന്‍ മാരാര്‍ക്ക് പൈതൃകം പുരസ്‌കാരം നല്‍കും. തുള്ളല്‍ ഗുരുനാഥ കേരളശേരി പ്രഭാവതി, എം.ഡി. കമ്മ്യൂണിറ്റി മെഡിസിനില്‍ ഒന്നാം റാങ്ക് നേടിയ ഡോ. ഗായത്രി ശ്രീകാന്ത്, മോഹിനിയാട്ടം കലാകാരി വി.കെ.ഷാലിമ എന്നിവരെ ആദരിക്കും. പൈതൃകം കലാക്ഷേത്രയുടെ പഞ്ചാരിമേളം, ഭജന്‍സ് എന്നിവയും വൃക്ഷത്തെ വിതരണവും ഉണ്ടാകും. ഭാരവാഹികളായ രവി ചങ്കത്ത്, മധു കെ.നായര്‍, വൈശ്രവണത്ത് നാരായണന്‍ നമ്പൂതിരി, കെ.കെ.വേലായുധന്‍, കെ.ദിവാകരന്‍ തുടങ്ങിയവര്‍ പത്ര സമ്മേളനത്തിൽ പങ്കെടുത്തു .

വടക്കാഞ്ചേരി പുഴ നവീകരണം: ചെളിയും മണ്ണും ലേലംചെയ്യും

വടക്കാഞ്ചേരി: പുഴ നവീകരണത്തിന്‍റെ ഭാഗമായി അടിഞ്ഞുകൂടിയ ചെളിയും മണ്ണും നീക്കം ചെയ്യുന്നതിന് ലേല നടപടികൾക്ക് അംഗീകാരമായതായി സേവ്യർ ചിറ്റിലപ്പിള്ളി എംഎൽഎ അറിയിച്ചു. പ്രളയത്തിലും അതിവർഷത്തിലും അടിഞ്ഞുകൂടിയതുൾപ്പെടെ പുഴയിൽ നിന്നെടുക്കുന്ന മണ്ണ് നീക്കം ചെയ്യുന്നതിനുള്ള നടപടിക്രമങ്ങൾ ലഘൂകരിക്കുന്നതിനാണ് സ്പോട്ട് ലേലം നടത്തുക. വാഴാനി ജലസേചന പദ്ധതിയുടെ സമഗ്രമായ വികസനത്തിനുള്ള പദ്ധതി സംസ്ഥാന സർ ക്കാരിന്‍റെ പരിഗണനയിലുണ്ടെന്നു ജലവിഭവമന്ത്രി റോഷി അഗസ്റ്റിൻ ഉറപ്പു നൽകിയിട്ടുണ്ട്. ജില്ലയിലെ പ്രധാനപ്പെട്ട ജലസേചന പദ്ധതിയായ വാഴാനിയുടെ പ്രളയാനന്തര വീണ്ടെടുപ്പിനും സമഗ്രമായ നവീകരണത്തിനുമായി ബൃഹദ് പദ്ധതി നബാർഡ് ഉൾപ്പെടെയുള്ള ഏജൻസികളുടെ സഹായ ത്തോടെ ആവിഷ്കരിച്ച് നടപ്പാക്കണമെന്ന് ആവശ്യപ്പെട്ടു പദ്ധതി നിർദേശം സമർപ്പിച്ചതായി എംഎൽഎ പറഞ്ഞു. മണ്ണുകൊണ്ട് നിർമിച്ച വാഴാനി ഡാമിൽനിന്ന് ആരംഭിച്ച് വടക്കാഞ്ചേരി, കുന്നംകുളം, മണലൂർ നിയോജകമണ്ഡലങ്ങളിലായി 4313 ഹെക്ടറിൽ ജലസേചനത്തിനായി 1959-ൽ പൂർത്തീകരിച്ചതാണ് വാഴാനി ജലസേചന പദ്ധതി. 65 വർഷം മുൻപ് പൂർത്തീകരിച്ച ഈ പദ്ധതിയെ ആശ്രയിച്ചാണ് ജില്ലയിലെ വലിയ പങ്ക് ജനങ്ങൾ കാർഷിക, കുടിവെള്ള ആവശ്യം നിറവേറ്റുന്നത്. വിവിധ ചിറകളുടെ നവീകരണവും നിയമസഭയിൽ എംഎൽഎ സബ്‌മിഷനിലൂടെ ആവശ്യപ്പെട്ടിട്ടുണ്ട്.

ലോറി അപകടം വീണ്ടും; ഡ്രൈവർക്കു പരിക്ക്

ചാവക്കാട്: മരത്തടി കഷണങ്ങൾ കയറ്റി വന്ന ലോറി മറിഞ്ഞു ഡ്രൈവർക്ക് പരിക്ക്. കണ്ണൂർ സ്വദേശി മോഹനന് (67)നിസാര പരിക്കേറ്റു. ഇന്നലെപുലർച്ചെ രണ്ടുമണിയോടെ മണത്തല പള്ളിക്ക് മുൻവശമാണ് അപകടം. കണ്ണൂരിൽ നിന്നും മരകഷണങ്ങൾ കയറ്റി പെരുമ്പാവൂരിലേക്ക് പോകുകയായിരുന്നു. അമിതമായി ലോഡ് കയറ്റി വന്ന ലോറി റോഡിന്‍റെ വശത്തെ കയറ്റിറക്കത്തിൽ ചാടിയതാണ് മറിയാൻ കാരണമായത്. കുറെ സമയം ഗതാഗതം തടസപ്പെട്ടു. രണ്ടാഴ്ചക്കിടയിൽ ദേശീയപാത മണത്തല മേഖലയിൽ ലോറി മറിയുന്നത് മൂന്നാം തവണയാണ് . ഇക്കഴിഞ്ഞ നാലാം തിയതി ഇരുമ്പു പൈപ്പുകൾ കയറ്റി വന്ന ലോറി മറിഞ്ഞിരുന്നു. ദേശീയപാത 66 ന്‍റെ നിർമാണ പ്രവർത്തനങ്ങൾ നടക്കുന്നതിനാൽ റോഡിൽ പലസ്ഥലങ്ങളിലും അപകടം പതിയിരിക്കുകയാണ്. റോഡിന്‍റെ അപാകതയും വാഹനത്തിലെ അമിത ഭാരവുമാണ് അപകടത്തിന് കാരണമാകുന്നത്. പോലീസ് പരിശോധനകൾ നടത്തുന്നില്ലെന്ന് ആക്ഷേപമുണ്ട്.

നെല്ല് സപ്ലൈകോ കൊണ്ടുപോയില്ല; മഴയിൽ മുളപൊട്ടി നശിച്ചു

പുന്നയൂർക്കുളം: ഉപ്പുങ്ങൽ കോൾ പടവിൽ ചാക്കിലാക്കിയ നെല്ല് മുളപൊട്ടി നശിച്ചു. എട്ട് ക്വിന്‍റൽ നെല്ലാണ് ഉപയോഗശൂന്യമായത്. കൊയ്ത്ത് കഴിഞ്ഞ് ചാക്കിലാക്കിവച്ച നെല്ല് സപ്ലൈകോ സംഭരിക്കാത്തതു കാരണമാണ് നശിച്ചതെന്ന് നെൽകർഷകൻ ചെറവല്ലൂർ പ്രാരത്ത് സുബ്രഹ്മണ്യൻ പറഞ്ഞു. 25 ദിവസമായി പാടശേഖരയോരത്ത് ടാർപോളിൻ ഷീറ്റിട്ടു മൂടിയ നെല്ലാണ് മഴ പെയ്തതിനെ തുടർന്നുണ്ടായ ഈർപ്പത്തിൽ മുള പൊട്ടിയത്. ബാക്കിയുള്ള നെല്ലും സപ്ലൈക്കോ കൊണ്ടുപോകാൻ തയാറായിട്ടില്ല. 2000 കിലോയോളം നെല്ല് സ്വകാര്യ സ്കൂൾ ഗ്രൗണ്ടിൽ കൂട്ടിയിട്ടിരിക്കുകയാണ്. ഇതിനിടെ, വേനൽമഴയെ തുടർന്ന് പരൂർ കോൾപടവിൽ നെല്ല് നിലംപതിച്ചു. കഴിഞ്ഞ ദിവസം പെയ്ത മഴയിലാണ് പടവിലെ മിക്ക ഭാഗങ്ങളിലും നെല്ല് വീണത്. കൃഷിയിടങ്ങളിൽ വെള്ളം കെട്ടി നിൽക്കുന്നതിനാൽ വീണ നെൽച്ചെടികൾ കിളിർക്കാൻ സാധ്യതയുമുണ്ട്. പാടത്ത് കൊയ്ത്ത് ആരംഭിച്ചിട്ടുണ്ടെങ്കിലും മഴ പെയ്തു കൃഷിയിടങ്ങളിൽ വെള്ളം കെട്ടി നിൽക്കുന്നതു കാരണം കൊയ്ത്ത് ഭാഗികമായാണ് നടക്കുന്നത്. ഇതു കർഷകർക്ക് അധിക ബാധ്യത വരുത്തി വയ്ക്കും.

കുട്ടികളെ കൊണ്ടുവന്നോളൂ... കുട്ടിക്കഥകൾ നിറഞ്ഞ ഈ വീട്ടിലേക്ക്

തൃശൂർ: ഈ അവധിക്കാലത്തു കുട്ടികളെയുംകൊണ്ട് തൃശൂർ വെളിയന്നൂരിലേക്കു വരിക. അവിടെ കുട്ടിക്കഥകളും കുട്ടിക്കവിതകളുമൊക്കെ നിറഞ്ഞ ഒരു കൊച്ചുവീടുണ്ട്. ഈ അവധിക്കാലം കുട്ടികൾ സ്റ്റേറ്റ് ചിൽഡ്രൻസ് ലൈബ്രറിയുടെ തൃശൂരിലെ ലൈബ്രറിക്കൊപ്പം ആഘോഷിക്കട്ടെ. നാടെങ്ങും ലഹരിവിരുദ്ധപോരാട്ടം നടക്കുന്പോൾ കുട്ടികളെ വായനയുടെ ലഹരിയിലേക്കു ചേർത്തുവയ്ക്കാൻ ലൈബ്രറിയിലെ അസംഖ്യം പുസ്തകങ്ങൾ ധാരാളം. കഥ. നോവൽ, കവിതാ പുസ്തകങ്ങൾക്കുപുറമെ യാത്രാവിവരണം, പ്രസംഗം, മലയാളസാഹിത്യപഠനം, ഇന്ത്യാ ചരിത്രം, കൊച്ചുകുട്ടികളുടെ ഇഷ്ടപുസ്തകങ്ങളായ ജെറോണിം സ്റ്റിൽറ്റർ, നാൻസി ഡ്യൂ, ടോണ്‍ ഗെയിറ്റ്സ് തുടങ്ങി വൈവിധ്യമാർന്ന പുസ്തകശേഖരമാണ് വെളിയന്നൂർ ക്ഷേത്രത്തിന് എതിർവശത്തുള്ള റോഡിൽ സ്ഥിതിചെയ്യുന്ന സ്റ്റേറ്റ് ചിൽഡ്രൻസ് ലൈബ്രറിയിലുള്ളത്. പതിനെട്ടുവയസുവരെയുള്ള വായനാപ്രേമികളെ ലക്ഷ്യമിട്ടാണ് പുസ്തകങ്ങൾ ക്രമീകരിച്ചിട്ടുള്ളത്. ഒരു കുട്ടിക്ക് ഒരുസമയം മൂന്നു പുസ്തകംവരെയെടുക്കാം. രണ്ടാഴ്ച കഴിഞ്ഞാൽ പുസ്തകം തിരച്ചുകൊണ്ടുവരണം. ലൈബ്രറി മെംബർഷിപ്പിന് ആദ്യം അംഗത്വഫീസായി അന്പതുരൂപയും ഒരു വർഷത്തെ വരിസംഖ്യയായി അന്പതുരൂപയുമടക്കം നൂറുരൂപ അടയ്ക്കണം. പിന്നീട് ഓരോ വർഷവും അന്പതു രൂപവീതം നൽകണം. അംഗത്വ അപേക്ഷയിൽ പഠിക്കുന്ന സ്ഥാപനത്തിലെ ഹെഡ്മാസ്റ്ററുടെയോ പ്രിൻസിപ്പലിന്‍റെയോ ഒപ്പും സീലും പതിക്കണം. ലോക്കൽ വായനശാലയിലെ സെക്രട്ടറിയിൽനിന്നുള്ള കത്തായാലും മതി. മാതാപിതാക്കളുടെ തിരിച്ചറിയിൽ കാർഡിന്‍റെ കോപ്പിയും അപേക്ഷയ്ക്കൊപ്പം നൽകണം. രാവിലെ ഒന്പതുമുതൽ പന്ത്രണ്ടുവരെയും വൈകീട്ട് മൂന്നുമുതൽ ആറുവരെയുമാണ് ലൈബ്രറിയുടെ പ്രവർത്തനസമയം. ബുധനാഴ്ചകളിൽ ലൈബ്രറി മുടക്കമാണ്. അവധിക്കാലം തുടങ്ങിയതോടെ കൂടുതൽ കുട്ടികൾ ലൈബ്രറിയിലെത്തുന്നുണ്ട്. അഞ്ഞൂറോളം കുട്ടിയംഗങ്ങൾ ഇവിടെയുണ്ട്. രാവിലെ വന്നു പുസ്തകമെടുത്തു കൊണ്ടുപോയി ഉച്ചയാകുന്പോഴേക്കും വായിച്ച് തിരിച്ചുകൊണ്ടുവരുന്ന മിടുക്കൻമാരും മിടുക്കികളും കൂട്ടത്തിലുണ്ടെന്ന് ലൈബ്രേറിയൻ സീന രവീന്ദ്രൻ പറഞ്ഞു. വിവിധ മത്സരങ്ങളും ലൈബ്രറിയുടെ നേതൃത്വത്തിൽ സംഘടിപ്പിക്കുന്നുണ്ട്. വായനമത്സരം, കഥപറയൽ, ചിത്രരചന, ക്വിസ് എന്നിവ അതിൽ ചിലതുമാത്രം. വായിച്ച പുസ്തകത്തെക്കുറിച്ച് കുട്ടികൾ ആസ്വാദനക്കുറിപ്പു തയാറാക്കുന്പോൾ വായനയ്ക്കൊപ്പം എഴുത്തിന്‍റെ ലോകവും കുട്ടികൾക്കുമുന്നിൽ തുറക്കപ്പെടുന്നു. അപ്പോൾ മാതാപിതാക്കളേ, ഇനി വൈകേണ്ട... കുട്ടികളെയുംകൊണ്ട് കുട്ടിക്കഥകൾ നിറഞ്ഞ ഈ വീട്ടിലേക്കുവരാൻ...

പിഴിഞ്ഞെടുക്കാൻ കോർപറേഷൻ; പേട്ടക്കാശിൽ കുത്തനേ വർധന വാടകവർധനവിനും വിലക്കയറ്റത്തിനും സാധ്യത

തൃശൂർ: അരിയങ്ങാടി, നായരങ്ങാടി മേഖലയിൽ വരുന്ന ചരക്കുവാഹനങ്ങൾക്കു പേട്ടക്കാശ് എന്നപേരിൽ പിരിക്കുന്ന നിരക്ക് കോർപറേഷൻ ക്രമാതീതമായി വർധിപ്പിച്ചതിനെതിരേ ചേംബർ ഓഫ് കൊമേഴ്സ് രംഗത്ത്. കഴിഞ്ഞദിവസംവരെ ചുരുങ്ങിയനിരക്കിൽ നൽകിയിരുന്ന പേട്ടക്കാശ് ഒറ്റയടിക്കു മൂന്നും നാലും ഇരട്ടിയായി ഉയർത്തിയതാണ് പ്രതിഷേധത്തിനു കാരണമായത്. ഇതുമൂലം ചരക്കുമായി വരുന്ന വാഹനങ്ങൾക്കു ഭീമമായ നഷ്ടം ഉണ്ടാകാൻ ഇടയുള്ളതിനാൽ വാഹനങ്ങളുടെ വാടകവർധനവും സാധനങ്ങൾക്കു വിലവർധനവുമുണ്ടാകും. മാർക്കറ്റിനു പുറത്തുള്ള ഇടങ്ങളിൽ വ്യാപാരം ചെയ്യുന്നവർക്ക് ഇത്തരം ചെലവുകൾ ഇല്ലാത്തതിനാൽ അവരുമായി മത്സരിച്ച് കച്ചവടം ചെയ്യുക എന്നുള്ളത് ബുദ്ധിമുട്ടാവുമെന്നും മാർക്കറ്റിന്‍റെ നിലനിൽപ്പിനെത്തന്നെ നിരക്കുവർധന ബാധിക്കുമെന്നും ചേംബർ അറിയിച്ചു. പുതുക്കിയ നിരക്കുപ്രകാരം മൂന്നുചക്ര വാഹനങ്ങൾക്കു 30 രൂപ, നാലുചക്രം 70 രൂപ, ആറുചക്രം 140 രൂപ, 10 ചക്രം 180 രൂപ, 12 ചക്രം 265, 14 ചക്രം 325 രൂപ,16 ചക്രം 649 രൂപ എന്നിങ്ങനെയാണ് ഇനി കോർപറേഷൻ ഈടാക്കുക. മാർക്കറ്റിൽ എത്തുന്ന വാഹനങ്ങളിൽനിന്നു മുഴുവൻ ചരക്കുകളും കടകളിൽ ഇറക്കുന്നില്ല എന്നിരിക്കെ കച്ചവടക്കാർക്കും പുതുക്കിയ നിരക്ക് വലിയ തലവേദന സൃഷ്ടിക്കും. അയൽസംസ്ഥാനങ്ങളിൽ നിന്നു മുൻകാലങ്ങളിൽ വന്നിരുന്ന ചരക്കുവാഹനങ്ങൾ അവധിദിവസങ്ങളിൽ ഒന്നിലധികം ദിവസം നിർത്തിയിട്ടു വിശ്രമിച്ചിരുന്നെങ്കിൽ ഇനി ഓരോ ദിവസത്തിനും ഭീമമായ തുക നൽകേണ്ടിവരും. കഴിഞ്ഞ രണ്ടുമാസങ്ങളിലായി പല റോഡുകളിലും അറ്റകുറ്റപ്പണികൾ നടക്കുന്നതിന്‍റെ പേരിൽ ദുരിതം അനുഭവിക്കുന്നതിനുപിറകെയാണ് ഇടിത്തീ പോലുള്ള പുതിയ നിരക്കുവർധനവെന്നും ഇതു പിൻവലിക്കണമെന്നും ചേംബർ ഓഫ് കൊമേഴ്സ് സെക്രട്ടറി സോളി തോമസ് കവലക്കാട്ട് ആവശ്യപ്പെട്ടു.

തിപ്പലശേരി റോഡിന്‍റെ ശോചനീയാവസ്ഥ പരിഹരിക്കണം; കോൺഗ്രസ് ഒപ്പുശേഖരണം നടത്തി

എരുമപ്പെട്ടി: കടങ്ങോട് പഞ്ചായത്തിലെ വെള്ളറക്കാട് തിപ്പലശേരി റോഡിന്‍റെ ശോചനീയാവസ്ഥ പരിഹരിക്കണമെന്ന് ആവശ്യപ്പെട്ട് കോൺഗ്രസിന്‍റെ നേതൃത്വത്തിൽ ഒപ്പു ശേഖരണവും പ്രതിഷേധ ധർണയും നടത്തി. കടങ്ങോട് പഞ്ചായത്തിലെ രണ്ട്, മൂന്ന്, ഒമ്പത് വാർഡുകളിൽ ഉൾപ്പെട്ട റോഡ് തകർന്നു കുണ്ടും കുഴിയും നിറഞ്ഞിട്ട് വർഷങ്ങളായി. കുന്നംകുളം -വടക്കാഞ്ചേരി സംസ്ഥാനപാതയെയും അക്കിക്കാവ് എരുമപ്പെട്ടി ബൈപാസ് റോഡിനേയും ബന്ധിപ്പിക്കുന്ന റോഡാണ് തകർന്ന് കാൽനട യാത്രയ്ക്ക് പോലും സാധ്യമാകാത്ത അവസ്ഥയിൽ ആയിരിക്കുന്നത്. മഴപെയ്താൽ റോഡ് ചെളിക്കുണ്ടായി മാറും. അധികൃതരുടെ അവഗണനയ്ക്കെതിരെ കോൺഗ്രസ് രണ്ട്, മൂന്ന്, ഒമ്പത് വാർഡ് കമ്മറ്റികളുടെ നേതൃത്വത്തിലാണ് ഒപ്പ് ശേഖരണവും പ്രതിഷേധവും സംഘടിപ്പിച്ചത്. മണ്ഡലം പ്രസിഡന്‍റ് ഷറഫു പന്നിത്തടം ഉദ്ഘാടനം ചെയ്തു. വാർഡ് പ്രസിഡന്‍റ് സി.കെ ശിവരാമൻ അധ്യക്ഷനായി. നേതാക്കളായ കെ.യു. സണ്ണി, സി.ജി. ജാക്സൻ, പി.സി. ഗോപാലകൃഷ്ണൻ, സലാം വലിയകത്ത്, സജീവ് ചാത്തനാത്ത്, ഒ.എസ്. വാസുദേവൻ, പി.വി. കൃഷ്ണൻകുട്ടി, പഞ്ചായത്ത് മെമ്പർമാരായ ജോളി തോമസ്, സൈബുന്നിസ ഷറഫു, രജിത ഷാജി തുടങ്ങിയവർ പ്രസംഗിച്ചു.

കത്തിക്കുത്തിൽ യുവാവിന് ഗുരുതര പരിക്ക്; രണ്ടുപേർ പിടിയിൽ

ചേലക്കര: ചേലക്കര വെങ്ങാനെല്ലൂരിൽ കഴിഞ്ഞദിവസം രാത്രിയുണ്ടായ വാക്കുതർക്കത്തെ തുടർന്ന് യുവാവിന് കുത്തേറ്റു. വെങ്ങാനെല്ലൂർ സ്വദേശി ഷാനുബി (19)നാണ് കുത്തേറ്റത്. പരിക്കേറ്റ ഷാനുബിനെ ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് വെങ്ങാനെല്ലൂർ പെരുമ്പാവൂർ വീട്ടിൽ വിപിൻ, പാലേരി വീട്ടിൽ പ്രദീപ് എന്നിവരെ ചേലക്കര പോലീസ് അറസ്റ്റ് ചെയ്തു. വാഹനത്തിന് സൈഡ് കൊടുത്തില്ലന്നു പറഞ്ഞുണ്ടായ തർക്കത്തെ തുടർന്നാണ് കത്തിക്കുത്തിൽ കലാശിച്ചത്. ചേലക്കര പോലീസ് സ്റ്റേഷൻ സിഐ കെ. സതീഷ്കുമാറിന്‍റെ നേതൃത്വത്തിൽ അന്വേഷണം നടത്തിവരുന്നു.

ഗുരുവായൂരിൽ 139 വിവാഹങ്ങൾ; നടപ്പുരനിറഞ്ഞ് ജനം

ഗുരുവായൂർ: ക്ഷേത്രത്തിൽ ഇന്നലെ 139 വിവാഹങ്ങൾ നടന്നു. ദേവസ്വം വേണ്ടത്ര മുന്നൊരുക്കങ്ങൾ നടത്താത്തതിനാൽ വിവാഹത്തിനെത്തിയവരും ഭക്തജനങ്ങളുമായി നടപ്പുര നിറഞ്ഞു. വധൂവരന്മാർ മണ്ഡപത്തിലേക്കെത്താൻ ബുദ്ധിമുട്ടി. വിവാഹങ്ങൾ കൂടുതലുള്ള ദിവസങ്ങളിൽ സാധാരണ ദേവസ്വം മുന്നൊരുക്കം നടത്താറുണ്ട്. കിഴക്കേ നടപ്പുരയിൽ വൺവേ സംവിധാനം ഏർപ്പെടുത്തുന്നതിനാൽ വിവാഹത്തിനെത്തുന്നവർക്ക് തിരക്കനുഭവപ്പെടാതെ വിവാഹമണ്ഡപത്തിലെത്താനാകും. കൂടുതൽ പോലീസിനേയും നിയോഗിക്കാറുണ്ട്. എന്നാൽ ഇന്നലെ ഈ സംവിധാനങ്ങളൊന്നും ഏർപ്പെടുത്തിയില്ല. സെക്യൂരിറ്റി മാത്രമാണ് ജനങ്ങളെ നിയന്ത്രിക്കാൻ ഉണ്ടായിരുന്നത്. നാലു വിവാഹമണ്ഡപങ്ങളിലുമായാണു വിവാഹങ്ങൾ നടന്നത്. ദർശനത്തിനും വലിയ തിരക്കാണ് അനുഭവപ്പെട്ടത്.

പാറമേക്കാവിന്‍റെ പൂരപ്പന്തലിനു കാൽനാട്ടി

തൃശൂർ: പാറമേക്കാവിന്‍റെ പൂരപ്പന്തലിനു കാൽനാട്ടി. മണികണ്ഠനാലിൽ പാറമേക്കാവ് വിഭാഗം ഉയർത്തുന്ന പൂരപ്പന്തലിനാണ് കാൽനാട്ടിയത്. ഇന്നലെ രാവിലെ പാറമേക്കാവ് മേൽശാന്തി കാരേരക്കാട്ട് രാമൻ നന്പൂതിരിയുടെയും കീരംപിള്ളി വാസുദേവൻ നന്പൂതിരിയുടെയും കാർമികത്വത്തിൽ ഭൂമിപൂജ നടത്തിയശേഷമായിരുന്നു പന്തൽകാൽനാട്ട്. ദേവസ്വം ഭാരവാഹികളും തട്ടകക്കാരും പൂരപ്രേമികളും ചേർന്നു കാൽനാട്ടു നടത്തിയപ്പോൾ ആഹ്ലാദസൂചകമായി ആർപ്പുവിളികളുയർന്നു. മുൻമന്ത്രി വി.എസ്. സുനിൽകുമാർ, പാറമേക്കാവ് ദേവസ്വം പ്രസിഡന്‍റ് ഡോ. ബാലഗോപാൽ, സെക്രട്ടറി ജി. രാജേഷ്, വൈസ് പ്രസിഡന്‍റ് ജി. വേണുഗോപാൽ, ജോയിന്‍റ് സെക്രട്ടറി പി.വി. നന്ദകുമാർ, കണ്‍വീനർ കെ. ഉണ്ണികൃഷ്ണൻ, കൊച്ചിൻ ദേവസ്വം ബോർഡ് പ്രസിഡന്‍റ് രാജേന്ദ്രൻ തുടങ്ങിയവർ പങ്കെടുത്തു. എടപ്പാൾ നാദം സൗണ്ട് ഇലക്ട്രിക്കൽസിലെ സി. ബൈജുവാണ് പന്തൽ നിർമിക്കുന്നത്. പാറമേക്കാവിനുവേണ്ടി ബൈജു ഇത് അഞ്ചാംവർഷമാണ് പൂരപ്പന്തൽ നിർമിക്കുന്നത്. പകൽസമയത്തെ രൂക്ഷമായ ചൂട് കണക്കിലെടുത്ത് പരമാവധി പന്തൽപണികൾ രാത്രിയിൽ നടത്താനാണ് തീരുമാനം.

തൃശൂർ പൂരം ഭംഗിയായി നടത്തേണ്ടതു സർക്കാരിന്‍റെ കടമ: തിരുവന്പാടി ദേവസ്വം

തൃശൂർ: വിശ്വപ്രസിദ്ധമായ തൃശൂർ പൂരം ഭംഗിയായി നടത്തേണ്ടതു സർക്കാരിന്‍റെ ചുമതലയാണെന്നു തിരുവന്പാടി ദേവസ്വം. പൂരത്തിന്‍റെ വിജയകരമായ നടത്തിപ്പിനു കേന്ദ്ര, സംസ്ഥാന സർക്കാരുകൾ പ്രത്യേക പാക്കേജ് അനുവദിക്കണമെന്നും ഭാരവാഹികൾ പറഞ്ഞു. വെടിക്കെട്ടും പൂരവുമായി ബന്ധപ്പെട്ട് കഴിഞ്ഞ ഏതാനും വർഷങ്ങളായി തുടരുന്ന വിവാദങ്ങൾ തുടർന്നുള്ള വർഷങ്ങളിൽ ഉണ്ടാകാതിരിക്കാൻ ആഘോഷങ്ങൾക്കു പ്രത്യേക ചട്ടക്കൂട് ഒരുക്കേണ്ടതുണ്ട്. നിലവിൽ വെടിക്കെട്ട് നടത്താമെന്നു നിയമോപദേശം ലഭിച്ചതു സന്തോഷം പകരുന്ന കാര്യമാണ്. പൊതുവെ പെസോ നിയമങ്ങളാണ് വെടിക്കെട്ട് തടസപ്പെടുത്തുന്നത് എന്നുപറയുന്നതിൽ അർഥമില്ല. അവരല്ല നിയമങ്ങൾ പറയുന്നത്. കേന്ദ്ര സർക്കാരാണ് അവ കൊണ്ടുവരുന്നത്. സുരക്ഷിതമായ വെടിക്കെട്ട് നടത്താനുള്ള കാര്യങ്ങൾക്കാണ് പെസോ ശ്രമിക്കുന്നത്. നിലവിൽ പതിവുവർഷങ്ങളെപ്പോലെ വെടിക്കെട്ട് നടത്താൻ കഴിയുമെന്നു കരുതുന്നു. വെടിക്കെട്ടിനു മുൻപുമാത്രം വെടിക്കോപ്പുകൾ കൊണ്ടുവരുന്നതിനാൽ അവ സൂക്ഷിക്കേണ്ട മാഗസിന്‍റെ പ്രാധാന്യമില്ലെന്നു കോടതിയെ ബോധ്യപ്പെടുത്തിയിട്ടുണ്ട്. മറ്റു സംസ്ഥാനങ്ങളിൽ വെടിക്കെട്ടിനു ഡിസ്പ്ലേ ലൈസൻസ് ഇല്ലാതിരിക്കെ സംസ്ഥാനത്ത് അതും നടപ്പാക്കുന്നുണ്ട്. എല്ലാവിധ നിയമങ്ങളും പാലിച്ചാണ് തൃശൂർ പൂരം വെടിക്കെട്ട് നടത്തുന്നത്. അതിനാൽതന്നെ ഇത്തവണ ആശങ്കകൾ ഇല്ലാതെ വെടിക്കെട്ട് നടത്താമെന്നുള്ള ഉറപ്പ് മുഖ്യമന്ത്രി അടക്കമുള്ളവർ നൽകിയിട്ടുണ്ടെന്നും സെക്രട്ടറി കെ. ഗിരീഷ് കുമാറും ജോയിന്‍റ് സെക്രട്ടറി പി. ശശിധരനും അറിയിച്ചു. ഫയർലൈൻ ഉള്ളിലേക്കു നീക്കാൻ സാധ്യത, റൗണ്ടിൽനിന്ന് വെടിക്കെട്ട് കാണാം തൃശൂർ: തൃശൂർ പൂരം വെടിക്കെട്ട് ആളുകൾക്കു സ്വരാജ് റൗണ്ടിൽ നിന്ന് കാണുന്നതിനു ഫയർലൈൻ ഇപ്പോഴത്തേതിനെക്കാൾ ഉള്ളിലേക്കുനീക്കുന്ന കാര്യം ആലോചനയിൽ. പാറമേക്കാവ് ദേവസ്വം ഇതുസംബന്ധിച്ചു സൂചന നൽകി. മാഗസിൻ വെടിക്കോപ്പുകൾ ഒന്നുംവയ്ക്കാതെ കാലിയാക്കിയിടുന്നതിനാൽ വെടിക്കെട്ട് നടത്തുന്നത് കുറച്ചുകൂടി ഉള്ളിലേക്കുനീക്കിയാൽ ആളുകൾക്കു നിയമതടസമില്ലാതെ റൗണ്ടിൽ നിന്ന് വെടിക്കെട്ട് ആസ്വദിക്കാൻ സാധിക്കുമോ എന്ന കാര്യമാണ് ചർച്ചചെയ്യുന്നത്.

കോർപറേഷന്‍റെ വിവിധ വികസന ‌പദ്ധതികളുടെ ഉദ്ഘാടനം ഇന്ന്

തൃശൂർ: കോർപറേഷന്‍റെ വിവിധ വികസന പദ്ധതികളുടെ ഉദ്ഘാടനം ഇന്നു നടക്കും. അത്യാധുനികസൗകര്യങ്ങളോടെ 5.50 കോടി രൂപ ചെലവിൽ നിർമിച്ച പനംകുറ്റിച്ചിറയിലെ ഒല്ലൂർ മേഖലാ ഓഫീസ് രാവിലെ 10 നു മന്ത്രി എം.ബി. രാജേഷ് ഉദ്ഘാടനം ചെയ്യും. മന്ത്രി കെ. രാജൻ ലിഫ്റ്റിന്‍റെ ഉദ്ഘാടനം നിർവഹിക്കും. അടുത്ത ഘട്ടത്തിൽ മാർക്കറ്റും ഷോപ്പിംഗ് കോംപ്ലക്സും ടൗണ്‍ഹാളും മേഖലാ കാര്യാലയത്തിന്‍റെ ഭാഗമാകുമെന്നും മേയർ എം.കെ. വർഗീസ് പത്രസമ്മേളനത്തിൽ പറഞ്ഞു. രണ്ടുകോടി രൂപ ചെലവിൽ നിർമിച്ച പൂത്തോൾ ബിഎംബിസി റോഡിന്‍റെ സമർപ്പണം വൈകീട്ട് 4.30 നും പുനരുദ്ധാരണം പൂർത്തീകരിച്ച നെട്ടിശേരി പനഞ്ചകം ചിറയുടെ സമർപ്പണം വൈകീട്ട് 5.30 നും മന്ത്രി കെ. രാജൻ നിർവഹിക്കും. പി. ബാലചന്ദ്രൻ എംഎൽഎ കരാറുകാരനെ ആദരിക്കും. പനഞ്ചകം ചിറയിലെ അവധിക്കാല നീന്തൽ പരിശീലനവും എംഎൽഎ ഉദ്ഘാടനം ചെയ്യും. നിർമാണം പുരോഗമിക്കുന്ന കൂർക്കഞ്ചേരി - കുറുപ്പം റോഡ് കോണ്‍ക്രീറ്റിംഗും അനുബന്ധനിർമാണ പ്രവർത്തനങ്ങളും പൂരത്തിനുമുൻപേ പൂർത്തീകരിക്കുമെന്നും മേയർ അറിയിച്ചു. ഡെപ്യൂട്ടി മേയർ എം.എൽ. റോസി, സ്റ്റാൻഡിംഗ് കമ്മിറ്റി ചെയർമാൻമാരായ പി.കെ. ഷാജൻ, വർഗീസ് കണ്ടംകുളത്തി, സാറാമ്മ റോബ് സണ്‍, കരോളിൻ ജെറീഷ് പെരിഞ്ചേരി എന്നിവരും പത്രസമ്മേളനത്തിൽ പങ്കെടുത്തു. പെസഹാദിനത്തിലെ ഉദ്ഘാടനങ്ങൾ; ബഹിഷ്കരിക്കുമെന്നു കോണ്‍ഗ്രസ് തൃശൂർ: പെസഹാദിനമായ ഇന്ന് കോർപറേഷന്‍റെ വിവിധ വികസനപ്രവർത്തനങ്ങളുടെ ഉദ്ഘാടനം നടക്കാനിരിക്കെ പ്രതിഷേധവുമായി കോണ്‍ഗ്രസ് രംഗത്ത്. ക്രൈസ്തവരുടെ പുണ്യദിനമായ പെസഹാദിനവും ദുഃഖവെള്ളിയും സംസ്ഥാന സർക്കാർ അവധി പ്രഖ്യാപിച്ചിട്ടും കോർപറേഷൻ വിവിധ പദ്ധതികൾ ഇന്ന് ഉദ്ഘാടനം ചെയ്യാൻ തീരുമാനിച്ചതും മന്ത്രി മാർ അതിന് അനുവാദം നൽകിയതും അംഗീകരിക്കാൻ കഴിയില്ലെന്നും ഉദ്ഘാടനം മാറ്റിവയ്ക്കണമെന്നും പ്രതിപക്ഷനേതാവ് രാജൻ ജെ. പല്ലനും ഉപനേതാവ് ഇ.വി. സുനിൽരാജും പറഞ്ഞു. ചടങ്ങുകൾ ബഹിഷ്കരിക്കുമെന്നും ഇവർ പറഞ്ഞു. ഒല്ലൂർ സോണൽ ഓഫീസ് കെട്ടിടംപണി പൂർത്തീകരിച്ച് മാസങ്ങളോളം പൂട്ടിയിട്ട നിലയിലായിരുന്നു. കൗണ്‍സിൽ യോഗങ്ങളിലും മാധ്യമങ്ങളിലും വിമർശനങ്ങൾ ഉയർന്നപ്പോഴാണ് എൽഡിഎഫ് ഭരണനേതൃത്വം ഉദ് ഘാടത്തിനുതന്നെ തയാറായത്. എന്നാൽ പണി പൂർത്തീകരിച്ച് മാസങ്ങളോളം പൂട്ടിയിട്ട കെട്ടിടം പെസഹാവ്യാഴാഴ്ച തന്നെ ഉദ്ഘാടനം ചെയ്യാൻ നിശ്ചയിച്ചതു സമൂഹത്തോടുള്ള അനീതിയാണെന്നും ഈസ്റ്റർ കഴിഞ്ഞുള്ള ദിവസങ്ങളിൽ മേയർക്കും സംഘങ്ങൾക്കും ടൂർ പോകുന്നതിനുവേണ്ടിയാണ് ഇതെന്നും പ്രതിപക്ഷം ആരോപിച്ചു. ഞാനും ക്രിസ്ത്യാനി, ഏതു ദിനമാണ് പ്രധാനമെന്ന് അറിയാം: മേയർ തൃശൂർ: കോർപറേഷന്‍റെ വികസനപ്രവർത്തനങ്ങൾക്കെതിരേയുള്ള കോണ്‍ഗ്രസ് ആക്ഷേപം മുഖവിലയ്ക്കെടുക്കുന്നില്ലെന്നു മേയർ എം.കെ. വർഗീസ്. ഞാനും ഒരു ക്രിസ്ത്യാനിയാണെന്നും ദിവസങ്ങളും അവയുടെ പ്രാധാന്യവും തനിക്കറിയാമെന്നും മേയർ പറഞ്ഞു. ദുഃഖവെള്ളിയും ഈസ്റ്ററുമാണ് പ്രധാനം. അതിൽ ദുഃഖവെള്ളിദിനത്തിൽ ക്രിസ്ത്യാനികളായവർ പൊതുപരിപാടികളോ ആഘോഷങ്ങളോ നടത്താറില്ലെന്നും കോണ്‍ഗ്രസ് അനാവശ്യ ആരോപണങ്ങൾ ഉന്നയിക്കുന്നതാണെന്നും അദ്ദേഹം പറഞ്ഞു.

പീഡാനുഭവ സ്മരണയിൽ ദേവാലയങ്ങളും വിശ്വാസികളും

താലത്തിൽ വെള്ളമെടുത്തു വെൺകച്ചയുമരയിൽ ചുറ്റി മിശിഹാതൻ ശിഷ്യന്മാരുടെ പാദങ്ങൾ കഴുകി... ഇന്നു രാവിലെ ക്രൈസ്തവദേവാലയങ്ങളിൽനിന്നും ഈ ഗാനവീചികൾ അന്തരീക്ഷത്തിലലിയുന്നതോടെ ക്രൈസ്തവമേലധ്യക്ഷന്മാരും വൈദികരും കാൽകഴുകൽശുശ്രൂഷ ആരംഭിക്കും. യേശു തന്‍റെ ശിഷ്യന്മാരുടെ പാദങ്ങൾ കഴുകി ചുംബിച്ചതിന്‍റെ ഓർമയ്ക്കായി 12 പേരുടെ പാദങ്ങൾതന്നെയാണ് ഇവരും കഴുകി ചുംബിക്കുക. ഗുരുവിന്‍റെ പാദസേവചെയ്യുന്ന ശിഷ്യന്മാരുള്ള ലോകത്ത് ശിഷ്യരുടെ പാദങ്ങൾ കഴുകി വിനയത്തിന്‍റെ മാതൃകകാട്ടിയ ലോകത്തിലെ ഒരേയൊരു ഗുരുവായി യേശു ഉയരുന്നതും സവിശേഷമായ ഈ പ്രവൃത്തിയിലൂടെയാണ്. പാദക്ഷാളനകർമത്തിനുശേഷം വിശുദ്ധകുർബാനസ്ഥാപനത്തിന്‍റെ ഓർമയാചരണവും വിശുദ്ധ കുർബാനയർപ്പണവും ദിവ്യകാരുണ്യപ്രദക്ഷിണവും നടക്കും. തുടർന്ന് അഖണ്ഡ ആരാധന ആരംഭിക്കും. ഓശാനഞായറോടെതന്നെ ദേവാലയവും പരിസരവുമെല്ലാം വിശുദ്ധിയുടെ മേലാപ്പ് ചാർത്തിക്കഴിഞ്ഞു. പലയിടങ്ങളിലും വാർഷികധ്യാനവും വചനപ്രഘോഷണവുംകൊണ്ട് ആത്മീയാന്തരീക്ഷം സംജാതമായി. ആണ്ടുകുന്പസാരം നടത്തി പാപപരിഹാരയാത്രയുംചെയ്ത് തിരുനാളുകളുടെ തിരുനാളായ ഉയിർപ്പുതിരുനാളിനെ വരവേൽക്കാനുള്ള മാനസികവും ആത്മീയവുമായ ഒരുക്കം നടത്തിക്കഴിഞ്ഞു വിശ്വാസികൾ. ഇന്നു ദിവ്യകാരുണ്യ ആരാധനയിൽ പങ്കെടുത്തു കൽത്തപ്പം മുറിച്ച് പെസഹാകുറുക്കും കഴിച്ച് പുത്തൻപാനയും വായിച്ച് കുടുംബങ്ങൾ ദുഃഖവെള്ളിക്കൊരുങ്ങും. ഉപവാസദിനമായ ദുഃഖവെള്ളിയിൽ ദേവാലയങ്ങളിൽ പീഡാനുഭവചരിത്രവായനയും പ്രദക്ഷിണവും വൈകീട്ട് പീഡാനുഭവയാത്രയും നഗരികാണിക്കലും പീഡാനുഭവസന്ദേശവും ഉണ്ടായിരിക്കും. "ഗാഗുൽത്താമലയിൽനിന്നും വിലാപത്തിൻ മാറ്റൊലികേൾപ്പൂ'എന്ന ഗാനം ഏവരുടെയും അധരങ്ങളിൽനിന്നും ഉയരും. അപൂർവമായെങ്കിലും "അമ്മകന്യ മണിതന്‍റെ നിർമലദുഃഖങ്ങളിപ്പോൾ' എന്ന പുത്തൻപാനപദവും കേൾക്കാം. കയ്പ്പിലയും കുറുക്കും കഴിച്ച് വി ശ്വാസികൾ ക്രിസ്തു കുരിശിൽകിടന്ന് കയ്പുനീർ രുചിച്ചതിന്‍റെ സ്മരണ പുതുക്കും. വലിയ ശനിയാഴ്ച രാവിലെ മാമ്മോദീസാവ്രത നവീകരണവും പുതുവെള്ളവും തിരിയും വെഞ്ചരിപ്പും വിശുദ്ധകുർബാനയും ഉണ്ടാകും. ലത്തീൻ ദേവാലയങ്ങളിൽ ശനിയാഴ്ച രാത്രി പത്തരയോടെയേ തിരുക്കർമങ്ങളുള്ളൂ. ദീപാർച്ചന, പെസഹാപ്രഘോഷണം, ജ്ഞാനസ്നാനവ്രതനവീകരണം, പുതുവെള്ളം വെഞ്ചരിപ്പ്, തുടർന്ന് ഉയിർപ്പുതിരുനാൾ ദിവ്യബലിയും ഉണ്ടാകും. സീറോമലബാർ ദേവാലയങ്ങളിൽ ശനിയാഴ്ച രാത്രി പതിനൊന്നരയോടെ ഈസ്റ്റർ തിരുക്കർമങ്ങൾ ആരംഭിക്കും.

ആനത്തലയോളം സംശയങ്ങളുമായി കുട്ടിപ്പട്ടാളം

തൃശൂർ: ലക്ഷ്മിക്കുട്ടിയുടെ ചർമംകണ്ടാൽ പ്രായം തോന്നില്ല. അതുകൊണ്ടുതന്നെ പതിവുതെറ്റിക്കാതെ ഇത്തവണയും കുട്ടികളോടു കളിക്കാനും കൂട്ടുകൂടാനും ലക്ഷ്മിക്കുട്ടി എന്ന ആനക്കുട്ടി ജവഹർ ബാലഭവനിൽ എത്തി. തൃശൂർ തിരുവമ്പാടി ദേവസ്വത്തിന്‍റെ വിജയലക്ഷ്മി എന്ന ലക്ഷ്മിക്കുട്ടി മുടങ്ങാതെ 15 വർഷത്തോളമായി ബാലഭവനിലെ അവധിക്കാല അതിഥിയാണ്. തിരുവമ്പാടി ക്ഷേത്രത്തിലെ രാവിലത്തെ ശീവേലി കഴിഞ്ഞാൽ ഒരുദിവസം നേരേ ബാലഭവനിലേക്ക്. കഴിഞ്ഞ ഒന്നരപതിറ്റാണ്ടായി തെറ്റാത്ത ചിട്ട. ഇന്നലെയും പതിവു തെറ്റിയില്ല. ലക്ഷ്മിക്കുട്ടിയെ കാത്തിരുന്ന കുട്ടിക്കൂട്ടത്തിനുമുന്നിലേക്കു പതിവുപോലെ കുണുങ്ങിക്കുണുങ്ങി അവൾ കയറിവന്നപ്പോൾ ആർപ്പുവിളികളോടെയാണ് കുട്ടികൾ വരവേറ്റത്. കുട്ടികൾ കൈവീശി ആർത്തുവിളിച്ചപ്പോൾ ലക്ഷ്മിക്കുട്ടിയും തുമ്പിക്കൈയുയർത്തി കുട്ടികളെ അഭിവാദ്യംചെയ്തു. അതോടെ കുട്ടിക്കൂട്ടം ഇളകി മറിഞ്ഞു. വർഷങ്ങളായി ലക്ഷ്മിക്കുട്ടിയെ കുട്ടികൾക്കു പരിചയപ്പെടുത്തുന്ന പ്രശസ്ത ആനചികിത്സകൻ ഡോ. പി.ബി.ഗിരിദാസും ബാലഭവനിൽ എത്തിയിരുന്നു. കഴിക്കാനായി തണ്ണിമത്തനും ജിലേബിയും വെള്ളരിയും കൊടുത്തപ്പോൾ ലക്ഷ്മിക്കുട്ടിക്കു ക്ഷ പിടിച്ചു. ആനവായിലേക്ക് അതെല്ലാം പോകുന്നതു കുട്ടികൾ കൗതുകത്തോടെ നോക്കിയിരുന്നു. ആന 200 കിലോ ഭക്ഷണവും 200 ലിറ്റർ വെള്ളവും കഴിക്കുമെന്നു ഡോ. ഗിരിദാസ് പറഞ്ഞത് അദ്ഭുതത്തോടെയാണ് കുട്ടികൾ വാതുറന്നു കേട്ടത്. ലക്ഷ്മിക്കുട്ടിയുടെ ഭാരം 3500 കിലോ ആണെന്നും ഡോക്ടർ വ്യക്തമാക്കി. അപ്പോഴേക്കും കുട്ടിപ്പട്ടാളം നൂറായിരം സംശയങ്ങൾ ചങ്ങല പൊട്ടിച്ചു. ആനയുടെ തുമ്പിക്കൈയിൽ ഉറുമ്പ് പോയാൽ എന്തുചെയ്യും, ആനയ്ക്കു കുട്ടികൾ ഉണ്ടോ, എത്ര പല്ലുണ്ട്, പല്ല് എങ്ങനെയാണ്, കാലിൽ നഖമുണ്ടോ, കൊമ്പെന്താ ഇത്ര ചെറുത്, ആന പാവമാണോ... അതിനെല്ലാം ഡോ. ഗിരിദാസ് വിശദമായി മറുപടി നൽകി. ആനയെ തൊടണോ എന്നു ഗിരിദാസ് ചോദിച്ചപ്പോഴേക്കും കുട്ടികൾ ആനയെ വളഞ്ഞു. പിന്നെ ആനയെ തൊടാനുള്ള തിക്കുംതിരക്കും ബഹളവുമായി. ആന ചിന്നം വിളിക്കുന്നത് എങ്ങനെയാണെന്ന് കേൾപ്പിച്ചുകൊടുത്തപ്പോൾ കുട്ടികൾക്കു വീണ്ടും അത്ഭുതം. ബാലഭവനിലെ ഒരു കുട്ടിയെ ലക്ഷ്മിക്കുട്ടിയുടെ പുറത്തു കയറ്റുകയും ചെയ്തു. കുട്ടികൾക്ക് ഏറെ ഇഷ്ടമുള്ള മൃഗമായതുകൊണ്ടാണ് ആനയെ എല്ലാവർഷവും ബാലഭവനിലേക്കു കൊണ്ടുവരുന്നതെന്നു ബാലഭവനിലെ നാടക അധ്യാപകനായ നിപിൻ ഉണ്ണി പറഞ്ഞു. തൃശൂർ എസ്പിസിഎ ഇൻസ്‌പെക്ടർ അനിൽ, തൃശൂർ റിട്ട. അസിസ്റ്റന്‍റ് ഫോറസ്റ്റ് വെറ്ററിനറി ഓഫീസർ ഡോ.കെ.ജി. അശോകൻ എന്നിവരും ഗിരിദാസിനൊപ്പം കുട്ടികൾക്ക് ആനയെ പരിചയപ്പെടുത്താൻ ഉണ്ടായിരുന്നു. ഒരു മണിക്കൂറിനുശേഷം ലക്ഷ്മിക്കുട്ടി മടങ്ങുമ്പോൾ യാത്രയാക്കാൻ കുട്ടികൾക്കു മനസുണ്ടായിരുന്നില്ല.

വാഹനാപകടം: മരണം രണ്ടായി

പുന്നയൂർക്കുളം: നന്നംമുക്ക് പൂച്ചപ്പടിയിൽ ടോറസ് സ്കൂട്ടിയിൽ ഇടിച്ചുണ്ടായ അപകടത്തിൽ മരണം രണ്ടായി. അപകടത്തിൽ സാരമായി പരിക്കേറ്റ് തൃശൂരിലെ സ്വകാര്യ ആശുപത്രിയിൽ ചികിത്സയിൽ കഴിഞ്ഞിരുന്ന മൂക്കുതല മാക്കാലി താമരശേരി വീട്ടിൽ ലക്ഷ്മണന്‍റെ മകൻ ആദിത്യൻ (20) ഇന്നലെ മരിച്ചു. കഴിഞ്ഞ വെള്ളിയാഴ്ചയുണ്ടായ അപകടത്തിൽ കോലൊളന്പ് കിഴക്കേവട്ടപ്പറന്പിൽ നന്ദനന്‍റെ മകൻ നിധിൻ (20) മരിച്ചിരുന്നു. പോലീസ് നടപടിക്കുശേഷം മൃതദേഹം സംസ്കരിച്ചു. പെരുന്പടപ്പ് ബ്ലോക്ക് പഞ്ചായത്ത് മെന്പർ ആശാലതയാണ് ആദിത്യന്‍റെ അമ്മ. പഴഞ്ഞി എംഡി കോളജിലെ ഒന്നാംവർഷ ബികോം വിദ്യാർഥികളായിരുന്നു നിധിനും ആദിത്യനും. കോളജിലേക്കു പോകുന്നതിനിടെയായിരുന്നു അപകടം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]