ADVERTISEMENT

ADVERTISEMENT

ശ്രേഷ്ഠജന കൂട്ടായ്മ

ചേരാനല്ലൂർ: ചേരാനല്ലൂർ സെന്‍റ് ഫ്രാൻസീസ് സേവ്യേഴ്സ് പള്ളിയിൽ വിൻസന്‍റ് ഡി പോൾ സംഘടനയുടെ നേതൃത്വത്തിൽ ശ്രേഷ്ഠജന കൂട്ടായ്മ നടത്തി. 70നു മുകളിൽ പ്രായമുള്ള 200 ഓളം വയോജനങ്ങൾ പരിപാടിയിൽ പങ്കെടുത്തു.

കുമ്പസാരം, കുർബാന, പൊതുസമ്മേളനം, സ്നേഹവിരുന്ന് എന്നിവയിൽ ഏല്ലവരും സജീവമായി പങ്കെടുത്തു. പൊതുയോഗത്തിൽ കോൺഫ്രൻസ് പ്രസിഡന്‍റ് ജോസഫ് പുതുശേരി അധ്യക്ഷത വഹിച്ചു. പളളി വികാരി ഫാ. തോമസ് പെരുമായൻ യോഗം ഉദ്ഘാടനം ചെയ്തു.

ബ്രദർ ബെന്‍റ്‌ലി താടിക്കാരൻ, ബ്രദർ ജോസ് പോൾ എന്നിവർ ആശംസകൾ അർപ്പിച്ചു.

ADVERTISEMENT

ലഹരിക്കെതിരെ നാഷണല്‍ സര്‍വീസ് സ്‌കീമിന്‍റെ ‘ലൈഫ് ഈസ് ബ്യൂട്ടിഫുൾ’

കൊച്ചി: ഉന്നത വിദ്യാഭ്യാസ വകുപ്പും നാഷണല്‍ സര്‍വീസ് സ്‌കീമും സംസ്ഥാന വ്യാപകമായി നടപ്പിലാക്കുന്ന ലഹരിവിരുദ്ധ ബോധവത്കരണ കാമ്പയിൻ ലൈഫ് ഈസ് ബ്യൂട്ടിഫുള്‍ പരിപാടിയുടെ എറണാകുളം ജില്ലാതല ഉദ്ഘാടനം നടത്തിയ കളമശേരി ഗവ. പോളിടെക്‌നിക് കോളജില്‍ സംസ്ഥാന എന്‍എസ്എസ് ഓഫീസര്‍ ഡോ. ആര്‍.എന്‍. അന്‍സര്‍ ഉദ്ഘാടനം ചെയ്തു. കോളജ് പ്രിന്‍സിപ്പൽ ഡോ. ഐജു തോമസ് അധ്യക്ഷത വഹിച്ചു. എക്‌സൈസ് അസി. കമ്മീഷണര്‍ മുഹമ്മദ് ഹാരിസ് മുഖ്യപ്രഭാഷണം നടത്തി. സിറ്റര്‍ ജോയിന്റ് ഡയറക്ടര്‍ ഇന്‍ ചാര്‍ജ് കെ.ആര്‍. ദീപ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. ശ്രീശങ്കര യൂണിവേഴ്‌സിറ്റി എന്‍എസ്എസ് പ്രോഗ്രാം കോ-ഓര്‍ഡിനേറ്റര്‍ ഡോ. പി.എച്ച്. ഇബ്രാഹിംകുട്ടി, എന്‍എസ്എസ് ആസാദ് സേന ജില്ലാ കോ-ഓര്‍ഡിനേറ്റര്‍ സിജോ ജോര്‍ജ, പ്രോഗ്രാം ഓഫീസര്‍ എ.എസ്. മുഹമ്മദ് സഹല്‍, എല്‍ബി വര്‍ഗീസ്, പി.ആര്‍. രാജീവ്, വി.പി. അനൂപ് എന്നിവര്‍ പ്രസംഗിച്ചു. ജില്ലയിലെ വിവിധ കലാലയങ്ങളില്‍ നിന്നായി ഇരുനൂറോളം വിദ്യാര്‍ഥികള്‍ പങ്കെടുത്തു.

വഴിയരികിൽ ഫ്രഷ് മത്തിയുമായി മത്സ്യത്തൊഴിലാളികൾ

വൈപ്പിൻ: പിൻമാറാൻ ഒരുക്കമില്ലാതെ വൈപ്പിൻ തീരത്ത് ചാളച്ചാകരക്കോള് തുടരുന്നത് പരമ്പരാഗത മത്സ്യ തൊഴിലാളികൾക്ക് ഏറെ ആശ്വാസമാകുന്നു. കടൽ വറുതിയിലാകേണ്ട സമയത്താണ് കടലമ്മയുടെ ഈ കനിവ് എന്നതാണ് ആശ്വാസം. ദിവസവും രാവിലെയും വൈകുന്നേരവും ചെറുയാനങ്ങളിൽ തീരക്കടലിൽ വലനീട്ടുന്ന പരമ്പരാഗത മത്സ്യത്തൊഴിലാളികളെയാണ് കടലമ്മ വറുതിക്കാലത്തും വല നിറയെ ചെറിയ ചാള നൽകി അനുഗ്രഹിച്ചു കൊണ്ടിരിക്കുന്നത്. കഴിഞ്ഞ കുറെ മാസങ്ങളായുള്ള പ്രതിഭാസമാണിത്. മത്സ്യത്തൊഴിലാളികളാവട്ടെ ഇടനിലക്കാരെ ഒഴിവാക്കി വല ഉൾപ്പെടെ റോഡ് വക്കിലെത്തിച്ച ശേഷം പേർത്തെടുത്ത് ഐസ് ഇടാത്ത പ്രഷ് ചാള ആവശ്യക്കാർക്ക് നേരിട്ട് നൽകുകയാണ് ചെയ്യുന്നത്. വിലയാകട്ടെ ഒന്നര കിലോവിന് 100 രൂപയും. സംസ്ഥാന പാതയിൽ എടവനക്കാട്, അയ്യമ്പിള്ളി, പിന്നെ ചെറായി ബണ്ട് എന്നിവിടങ്ങളിൽ ഇപ്പോൾ ഇത് സ്ഥിരം കാഴ്ചയാണ്.

പാലിയേക്കരയിലെ ടോള്‍ നിര്‍ത്തിവയ്ക്കണം: എംപി

കൊച്ചി: അങ്കമാലി മുതല്‍ പാലിയേക്കര വരെ ഫ്‌ളൈ ഓവറുകളുടെ നിര്‍മാണം പൂര്‍ത്തിയാകുന്നതുവരെ പാലിയേക്കരയിൽ ടോള്‍ ഈടാക്കുന്നത് താത്കാലികമായി നിര്‍ത്തിവയ്ക്കണമെന്ന് ബെന്നി ബെഹനാന്‍ എംപി. പാലിയേക്കര ടോള്‍ പ്ലാസയില്‍ നിന്നുള്ള ടോള്‍ ഈടാക്കല്‍ താത്കാലികമായി നിര്‍ത്തണമെന്ന് ദേശീയപാത 544ലെ യാത്രക്കാരുടെ കനത്ത ദുരിതം ചൂണ്ടിക്കാട്ടി, കേന്ദ്ര മന്ത്രി നിതിന്‍ ഗഡ്കരയോട് കത്തയച്ച് ബെന്നി ബെഹനാന്‍ എംപി ആവശ്യപ്പെട്ടു. അങ്കമാലി മുതല്‍ പാലിയേക്കര വരെയുള്ള ഏകദേശം 40 കിലോമീറ്റര്‍ ദൂരത്തില്‍ ചിറങ്ങര, കൊരട്ടി, മുരിങ്ങൂര്‍, പേരാമ്പ്ര, ആമ്പല്ലൂര്‍ എന്നിവിടങ്ങളില്‍ ഫ്‌ളൈഓവര്‍ നിര്‍മാണം നടക്കുന്നതിനാല്‍ വളരെ രൂക്ഷമായ ഗതാഗത കുരുക്കും സമയനഷ്ടവുമുണ്ടാകുന്നുണ്ടെന്ന് എംപി ചൂണ്ടിക്കാട്ടി. ഈ ദേശീയപാത ഉപയോഗിക്കുന്ന തൊഴില്‍, വിദ്യാഭ്യാസ മേഖലകളിലെയും ചരക്ക് ഗതാഗത മേഖലയിലെയും നിരവധി ആളുകള്‍ക്കും കൂടാതെ കൊച്ചി അന്താരാഷ്ട്ര വിമാനത്താവളത്തിലേക്കും തിരിച്ചും യാത്ര ചെയ്യുന്നവര്‍ക്കും ഏറെ ബുദ്ധിമുട്ടാണ് നേരിടേണ്ടിവരുന്നത്. റോഡ് സൗകര്യത്തിന് അനുസൃതമായ ടോള്‍ മാത്രമേ ഈടാക്കാവു എന്നും ബെന്നി ബഹനാന്‍ എംപി പറഞ്ഞു.

ബസില്‍ മറന്നുവച്ച കാമറ കണ്ടെത്തി നല്‍കി പോലീസ്

കൊച്ചി: ബസ് യാത്രയ്ക്കിടെ യാത്രികൻ മറന്നുവച്ച ലക്ഷങ്ങൾ വിലവരുന്ന കാമറ കണ്ടെത്തി നല്‍കി എറണാകുളം നോര്‍ത്ത് പോലീസ്. ഇന്നലെ രാവിലെ എറണാകുളം സെമിത്തേരിമുക്കില്‍ നിന്ന് ഹൈക്കോര്‍ട്ട് ജംഗ്ഷനിലേക്ക് പോകാനായി ബസില്‍ കയറിയ പ്രഫഷണല്‍ ഫോട്ടോഗ്രാഫറായ തിരുവനന്തപുരം സ്വദേശി പ്രവീണിന്‍റെ മൂന്നര ലക്ഷം രൂപ വിലവരുന്ന കാമറയാണ് നഷ്ടമായത്. രാവിലെ 7.15ന് ബസില്‍ കയറിയ ഇദ്ദേഹം ഹൈക്കോര്‍ട്ട് ജംഗ്ഷനില്‍ ഇറങ്ങി. 7.25 ഓടെയാണ് തന്‍റെ കൈവശമുണ്ടായിരുന്ന മൂന്നര ലക്ഷത്തിന്‍റെ കാമറ ബസില്‍ മറന്നുവച്ചുവെന്ന് മനസിലായത്. ഉടന്‍ എറണാകുളം നോര്‍ത്ത് പോലീസ് സ്‌റ്റേഷനിലെത്തി പരാതി നല്‍കിയെങ്കിലും ഏതു ബസിലാണ് യാത്ര ചെയ്തതെന്ന് പ്രവീണിന് ഓര്‍മയില്ലായിരുന്നു. നോര്‍ത്ത് പോലീസ് ഇന്‍സ്‌പെക്ടര്‍ ജിജിന്‍ ജോസഫ്, പ്രൊബേഷന്‍ എസ്‌ഐ ഹരികൃഷ്ണന്‍ എന്നിവരുടെ നേതൃത്വത്തിലുള്ള പോലീസ് സംഘം ഉടന്‍ സമീപത്തെ സിസി ടിവി ദൃശ്യങ്ങള്‍ പരിശോധിച്ചെങ്കിലും ബസിനെക്കുറിച്ച് വിവരം ലഭിച്ചില്ല. തുടര്‍ന്ന് ആ സമയത്ത് അതുവഴി പോകുന്ന ബസുകളുടെ വിവരമെടുത്ത് നടത്തിയ അന്വേഷണത്തിലാണ് എറണാകുളം- തേവര റൂട്ടില്‍ സര്‍വീസ് നടത്തുന്ന കൃഷ്ണവേണി എന്ന ബസില്‍ കാമറ കണ്ടെത്തിയ വിവരം കണ്ടക്ടര്‍ ജൂഡ് അറിയിച്ചത്. പിന്നീട് സ്‌റ്റേഷനിലെത്തിയ ജൂഡ് പോലീസ് സാന്നിധ്യത്തില്‍ കാമറ ഉടമയ്ക്ക് കൈമാറുകയായിരുന്നു. വാഗമണില്‍ ഫോട്ടോ ഷൂട്ടിന് പോകാനായി എത്തിയതായിരുന്നു പ്രവീണ്‍.

തിരുവാഭരണ മോഷണം: പ്രതി പിടിയിൽ

അരൂർ: എഴുപുന്ന ശ്രീനാരായണപുരം മഹാവിഷ്ണു ക്ഷേത്രത്തിലെ തിരുവാഭരണം മോഷണംപോയ സംഭവത്തിൽ കീഴ്ശാന്തിയെ അരൂർ പോലീസ് അറസ്റ്റ് ചെയ്തു. കൊല്ലം ഈസ്റ്റ് കല്ലട രാംനിവാസിൽ രാമചന്ദ്രൻ പോറ്റിയാണ്(42) പിടിയിലായത്. ഇയാളുടെ പക്കൽനിന്നും തിരുവാഭരണത്തിലെ കിരീടം പോലീസ് കണ്ടെടുത്തു. കഴിഞ്ഞ 14നാണ് വിഗ്രഹത്തിൽ ചാർത്തിയിരുന്ന തിരുവാഭരണം മോഷണം പോയത്. അതോടൊപ്പം കീഴ്ശാന്തിയെയും കാണാതായതിനെ തുടർന്നാണ് ക്ഷേത്രക്കമ്മിറ്റി അരൂർ പോലീസിൽ പരാതി നൽകിയത്. അന്വേഷണം ആരംഭിച്ച പോലീസിന് കീഴ്ശാന്തിയെക്കുറിച്ചുള്ള വിവരങ്ങൾ കമ്മിറ്റിക്കാരുടെ കൈയിൽ ഇല്ലാത്തത് കൂടുതൽ തലവേദനയായി. അടുത്ത ദിവസം ബാക്കിയുള്ള ആഭരണങ്ങൾ പരിശോധിച്ചപ്പോൾ അത് മുക്കുപണ്ടമാണെന്ന് കണ്ടെത്തിയത് പോലീസിനെ കൂടുതൽ ആശയക്കുഴപ്പത്തിലാക്കി. അന്വേഷണസംഘത്തെ മൂന്നാക്കി തിരിച്ച് രണ്ട് ടീമുകളെ കൊല്ലം ജില്ലയിലേക്കും, ഒരു സംഘം എറണാകുളം ജില്ലയിലേക്കും നിയോഗിക്കുകയായിരുന്നു. അന്വേഷണത്തിനിടെ പ്രതി എറണാകുളം വിട്ട് പോയിട്ടില്ല എന്ന് ബോധ്യമായി. തുടർന്ന് കൊല്ലം ജില്ലയിലെ അന്വേഷണസംഘവും എറണാകുളത്തെത്തി തെരച്ചിൽ തുടരുകയായിരുന്നു. രണ്ടുദിവസത്തെ തിരച്ചിലിനൊടുവിൽ പ്രതിയെ ദർബാർ ഹാൾ ഗ്രൗണ്ടിന് സമീപത്തുള്ള ശിവക്ഷേത്രത്തിന് സമീപത്തുനിന്നും പ്രതിയെ പിടികൂടുകയായിരുന്നു. അതിനിടെ തന്നെ പോലീസ് ഇയാൾ തേവര ഫെഡറൽ ബാങ്കിൽ സ്വർണം പണയം വെച്ചതായി കണ്ടെത്തിയിരുന്നു. പണം മുഴുവനും ഇയാൾ ഷെയർ ട്രേഡിങ്ങിൽ മുടക്കിയിട്ടുള്ളതായി പോലീസ് പറഞ്ഞു. ജില്ലാ പോലീസ് മേധാവി എം.പി. മോഹനചന്ദ്രൻ നായരുടെ നിർദേശപ്രകാരം അരൂർ പോലീസ് സ്റ്റേഷൻ ഇൻസ്പെക്ടർ കെ.ജി. പ്രതാപചന്ദ്രന്‍റെ നേതൃത്വത്തിൽ രൂപീകരിച്ച പ്രത്യേക സംഘമാണ് അന്വേഷണം നടത്തി പ്രതിയെ കണ്ടെത്തിയത്.

പ്ലാസ്റ്റിക് ഗോഡൗണിൽ വൻ തീപിടുത്തം

പറവൂർ: വെടിമറ ജാറപ്പടിയിലെ പ്ലാസ്‌റ്റിക് സംഭരണ ഗോഡൗണിൽ വൻ തീപിടുത്തം. ബുധനാഴ്‌ച രാത്രി 12 ഓടെയാണ് സംഭവം. പറവൂർ, ഗാന്ധിനഗർ, ആലുവ, അങ്കമാലി, ഏലൂർ, മാള എന്നിവിടങ്ങളിലെ അഗ്നിരക്ഷാസേന യൂണിറ്റുകളെത്തി മണിക്കൂറുകൾ നീണ്ട പരിശ്രമത്തിനൊടുവിലാണ് തീ നിയന്ത്രണവിധേയമാക്കിയത്. സമീപത്തു താമസിച്ചിരുന്ന ഗോഡൗൺ ജീവനക്കാരായ എട്ട് അതിഥി തൊഴിലാളികളുടെ കുടുംബങ്ങൾ തക്ക സമയത്ത് ഉണരുകയും വീടൊഴിയുകയും ചെയ്തതിനാൽ വൻ ദുരന്തം ഒഴിവായി. അഗ്നിരക്ഷാസേന ഒരുവട്ടം തീയണച്ചെങ്കിലും കനൽ നിലനിന്നതിനാൽ ഇന്നലെ ഉച്ചയ്ക്ക് ശേഷം വീണ്ടും തീ ആളിപ്പടർന്നു. വൈപ്പിൻ, ഏലൂർ, അങ്കമാലി എന്നിവിടങ്ങളിൽ നിന്നു വീണ്ടും ഫയർ എൻജിനുകൾ എത്തിച്ചാണ് തീ കെടുത്തിയത്. അർധരാത്രിയിലുണ്ടായ തീപിടുത്തം നാട്ടുകാരിൽ പരിഭ്രാന്തി പരത്തി. മേഖലയിലാകെ പ്ലാസ്‌റ്റിക് കത്തിയതിന്‍റെ ഗന്ധം പരന്നതിനെത്തുടർന്ന് പരിസരവാസികൾക്ക് ദേഹാസ്വാസ്ഥ്യം അനുഭവപ്പെട്ടു. പറവൂർ മൂഞ്ഞേലി ലിജുവാണ് പ്ലാസ്റ്റിക് വസ്‌തുക്കൾ സംഭരിച്ചു റീസൈക്കിൾ ചെയ്യുന്ന ഗോഡൗണിന്‍റെ ഉടമ. കെമിക്കൽസ് കൊണ്ടുവരുന്ന ടാങ്കുകളും ഇവിടെ കൊണ്ടുവന്നു റീസൈക്കിൾ ചെയ്യുന്നുണ്ട്. കെമിക്കലുകളുടെ അംശം ടാങ്കുകളിൽ ഉണ്ടായിരുന്നതിനാലാണ് തീ നിയന്ത്രണ വിധേയമാക്കാൻ സമയമെടുത്തത്. ഗോഡൗണിനു തീപിടിച്ചതിനെത്തുടർന്നു ഭൂരിഭാഗം ടാങ്കുകളും നാട്ടുകാരും അഗ്നിരക്ഷാ സേനയും ചേർന്നു പുറത്തേക്കു നീക്കിയത് തീപിടുത്തത്തിന്‍റെ വ്യാപ്തി അൽപം കുറച്ചു. എന്നാൽ, ഗോഡൗൺ കത്തിയതിന്‍റെ കാരണം വ്യക്ത‌മല്ല. ജനവാസ മേഖലയിൽ ഗോഡൗൺ പ്രവർത്തിക്കുന്നതിനെതിരെ നേരത്തെ പരാതികൾ ഉയർന്നിരുന്നു. പ്ലാസ്റ്റിക് ശേഖരണ യൂണിറ്റിന്‍റെ ഓഫീസ് പ്രവർത്തിക്കുന്നതിനുള്ള ലൈസൻസ് മാത്രമാണ് പഞ്ചായത്ത് നൽകിയിരുന്നത്. ബാക്കി നിർമാണങ്ങൾ അനധികൃതമായതിനാൽ പൊളിച്ചു നീക്കണമെന്ന് ആവശ്യപ്പെട്ട് ഉടമയ്ക്ക് നോട്ടീസ് നൽകിയിരുന്നതായി പഞ്ചായത്ത് പ്രസിഡന്‍റ് ശാന്തിനി ഗോപകുമാർ പറഞ്ഞു. ലിജുവിന്‍റെ ഉടമസ്‌ഥതയിൽ തന്നെ തത്തപ്പിള്ളിയിൽ പ്രവർത്തിച്ചിരുന്ന ഇത്തരത്തിലുള്ള ഗോഡൗൺ ഏതാനും വർഷങ്ങൾക്കു മുൻപു സമാന രീതിയിൽ കത്തിനശിച്ചിരുന്നു.

എഐ മികവില്‍ പീഡാനുഭവ യാത്ര സിനിമയാക്കി

കൊച്ചി: കുരിശിന്‍റെ വഴി പ്രമേയമാക്കി ആര്‍ട്ടിഫിഷല്‍ ഇന്‍റലിജന്‍റ്സ് മികവില്‍ ചിത്രമൊരുക്കി മലയാളിയായ ലിയോ ടി. ദേവസി. ചരിത്രത്തില്‍ ആദ്യമായാണ് എഐ സാങ്കേതികതയില്‍ ക്രിസ്തുവിന്‍റെ പീഡാനുഭവ യാത്ര സിനിമയാകുന്നത്. ‘ക്രക്‌സ്’ എന്നു പേരിട്ടിരിക്കുന്ന ചിത്രം ഇന്തോ-ജര്‍മന്‍ സംരംഭമായ സെവന്‍ത് പാം പ്രൊഡക്‌ഷന്‍സിന്‍റെ ബാനറില്‍ ജര്‍മനിയില്‍ പ്രദര്‍ശനം തുടരുകയാണ്. ജര്‍മന്‍ ഭാഷയില്‍ തയാറാക്കിയിരിക്കുന്ന 16 മിനിറ്റ് ദൈര്‍ഘ്യമുള്ള ചിത്രത്തില്‍ യേശുക്രിസ്തുവിന്‍റെ കുരിശുമരണവും പീഡാസഹന യാത്രയുമാണ് ഉള്ളടക്കം. കുരിശിലേറ്റപ്പെടുന്നതിനു മുമ്പുള്ള 14 സ്ഥലങ്ങളിലൂടെയും യേശു കടന്നുപോകുന്നതും മാതാവിനെയും ശിമയോനെയുമൊക്കെ കാണുന്നതും ചാട്ടവാറിന്‍റെ അടിയേറ്റ് മൂന്നുവട്ടം നിലത്തു വീഴുന്നതും കാല്‍വരിയിലെ സംഭവവികാസങ്ങളുമൊക്കെ ചിത്രത്തില്‍ ദൃശ്യവത്കരിച്ചിട്ടുണ്ട്. ചലച്ചിത്രമേഖലയിലെ ജനറേറ്റീവ് എഐയുടെ വരുംകാല സാധ്യതകള്‍കൂടി ‘ക്രക്‌സ്’ അടയാളപ്പെടുത്തുന്നതായും, ചിത്രത്തിന്‍റെ ഒടിടി റിലീസ് സംബന്ധിച്ച് ചര്‍ച്ചകള്‍ നടന്നുവരികയാണെന്നും ഡയറക്‌ടര്‍ ലിയോ ടി. ദേവസി, എക്‌സിക്യൂട്ടീവ് പ്രോഡ്യൂസര്‍ ഡോ. മേരി കള്ളിയത്ത് എന്നിവര്‍ പത്രസമ്മേളനത്തില്‍ പറഞ്ഞു. ആറുമാസംകൊണ്ടാണു ചിത്രം പൂര്‍ത്തീകരിച്ചത്. ഇംഗ്ലീഷും മലയാളവും ഉള്‍പ്പെടെയുള്ള പത്തു ഭാഷകളില്‍ ചിത്രം പ്രേക്ഷകരില്‍ എത്തിക്കുകയാണ് ലക്ഷ്യമെന്നും ഇരുവരും പറഞ്ഞു.

നോന്പിൽ നന്മയായി ജീസസ് യൂത്തിന്‍റെ ഹ്രസ്വചിത്രം

കൊച്ചി: യുവജനങ്ങളെ വലിയനോന്പിന്‍റെ ആത്മീയതലങ്ങളിലേക്ക് കൈപിടിച്ചുയർത്തുന്ന ഹ്രസ്വചിത്രം ശ്രദ്ധേയമാകുന്നു. രണ്ടു യുവാക്കളെ കേന്ദ്ര കഥാപാത്രങ്ങളാക്കി ജീസസ് യൂത്ത് പ്രവർത്തകർ ഒരുക്കിയ ‘കലിപ്പ്’ എന്ന ഹ്രസ്വചിത്രമാണ് നോന്പുകാലത്തെ വേറിട്ട കാഴ്ചാനുഭവമാകുന്നത്. ജീവിതത്തിൽ അനാവശ്യമായ ദേഷ്യത്തെ നിയന്ത്രിക്കാൻ നോന്പിന്‍റെ സാധ്യത ഉപയോഗപ്പെടുത്തുന്നതിനെ തന്മയത്വത്തോടും രസകരമായും ചിത്രത്തിൽ അവതരിപ്പിക്കുന്നു. നാലു വർഷം മുന്പ് ‘കടുപ്പം’ എന്നപേരിൽ പുറത്തിറങ്ങിയ ശ്രദ്ധേയമായ ഹ്രസ്വചിത്രത്തിന്‍റെ നാലാം ഭാഗമായാണ് ‘കലിപ്പ്’ എത്തിയത്. ‘കടുപ്പം 2’, ‘പുണ്യം’ എന്നീ പേരുകളിൽ കഴിഞ്ഞ വർഷങ്ങളിലെ വലിയ നോന്പുകളിൽ രണ്ടും മൂന്നും ഭാഗങ്ങൾ പുറത്തിറങ്ങിയിരുന്നു. ഇവയ്ക്കെല്ലാം സമൂഹമാധ്യമങ്ങളിലൂടെ ലഭിച്ച വലിയ സ്വീകാര്യതയാണ് പുതിയ ചിത്രത്തിനു പ്രചോദനമായതെന്ന് ചിത്രത്തിന്‍റെ തിരക്കഥാകൃത്തും സംവിധായകനുമായ ജെയ്ബി അഗസ്റ്റിൻ പറഞ്ഞു. റൂബൻ ജെറോം, സുനീഷ് സെബാസ്റ്റ്യൻ, അനി വി. രാജു, സച്ചിൻ യേശുദാസ്, ഗിബ്സൺ അഗസ്റ്റിൻ തുടങ്ങിയ ജീസസ് യൂത്ത് അംഗങ്ങളും ഹ്രസ്വചിത്രത്തിന്‍റെ അണിയറയിലുണ്ട്. യു ട്യൂബിൽ റിലീസ് ചെയ്ത ചിത്രം ഇതിനകം ആയിരക്കണക്കിനാളുകൾ കണ്ടു.

ഭക്തിനിർഭരമായി പെസഹാ ആചരണം

ഇന്നു ദുഃഖവെള്ളി കൊച്ചി: ക്രൈസ്തവ ദേവാലയങ്ങളിൽ പെസഹാ ആചരണം ഭക്തിനിർഭരമായി. ക്രിസ്തു വിശുദ്ധ കുർബാന സ്ഥാപിച്ചതിന്‍റെയും അന്ത്യ അത്താഴത്തിന്‍റെയും സ്മരണയിൽ, കാൽകഴുകൽ ശുശ്രൂഷ, ആഘോഷമായ ദിവ്യബലി, ദിവ്യകാരുണ്യ ആരാധന എന്നിവയുണ്ടായിരുന്നു. കാക്കനാട് സെന്‍റ് ഫ്രാന്‍സിസ് അസീസി പള്ളിയിൽ പെസഹാ ശുശ്രൂഷകളില്‍ സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ മുഖ്യകാര്‍മികത്വം വഹിച്ചു. എറണാകുളം സെന്‍റ് ഫ്രാന്‍സിസ് അസീസി കത്തീഡ്രലില്‍ പെസഹാ ശുശ്രൂഷകൾക്ക് ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍, സഹായമെത്രാൻ ഡോ. ആന്‍റണി വാലുങ്കൽ എന്നിവർ കാർമികനായി. കോതമംഗലം ബിഷപ് മാര്‍ ജോര്‍ജ് മഠത്തിക്കണ്ടത്തില്‍ കോതമംഗലം സെന്‍റ് ജോർജ് കത്തീഡ്രലിൽ പെസഹാ ശുശ്രൂഷകളിൽ‌ മുഖ്യകാർമികത്വം വഹിച്ചു. യാക്കോബായ സഭ ശ്രേഷ്ഠ കാതോലിക്ക ബസേലിയോസ് മാർ ജോസഫ് ബാവയുടെ മുഖ്യകാർമികത്വത്തിൽ കോതമംഗലം മർത്ത മറിയം കത്തീഡ്രൽ വലിയ പള്ളിയിൽ പെസഹാ ശുശ്രൂഷകൾ നടന്നു. ക്രിസ്തുവിന്‍റെ പീഡാനുഭവവും കുരിശുമരണവും അനുസ്മരിച്ചു ദേവാലയങ്ങളിൽ ഇന്നു ദുഃഖവെള്ളി ആചരിക്കും. പീഡാനുഭവവായന, ദിവ്യകാരുണ്യസ്വീകരണം, കുരിശുചുംബനം, കുരിശിന്‍റെ വഴി, നഗരികാണിക്കൽ എന്നിവ ശുശ്രൂഷകളുടെ ഭാഗമായി നടക്കും. മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ രാവിലെ 6.30ന് കോലഞ്ചേരി പള്ളിയിലെ ദുഃഖവെള്ളി ശുശ്രൂഷകളിൽ കാർമികത്വം വഹിക്കും. കറുകുറ്റി മൗണ്ട് കാര്‍മല്‍ മൊണാസ്ട്രിയിൽ‌ നടക്കുന്ന ദുഖവെള്ളി ശുശ്രൂഷകളില്‍ കര്‍ദിനാള്‍ മാർ ജോർജ് ആലഞ്ചേരി കാർമികനാകും. കോതമംഗലം ബിഷപ് മാര്‍ ജോര്‍ജ് മഠത്തിക്കണ്ടത്തില്‍ ഇന്നു രാവിലെ 7.15ന് ഞായപ്പിള്ളി സെന്‍റ് ആന്‍റണീസ് പള്ളിയിൽ നടക്കുന്ന ദുഃഖവെള്ളി തിരുക്കർമങ്ങളിൽ മുഖ്യകാർമികത്വം വഹിക്കും. എറണാകുളം സെന്‍റ് ഫ്രാന്‍സിസ് അസീസി കത്തീഡ്രലില്‍ വൈകുന്നേരം 4.30ന് ദുഖവെള്ളി ശുശ്രൂഷകളിൽ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ കാർമികനാകും. തിരുവാങ്കുളം സെന്‍റ് ജോർജ് പള്ളിയിൽ നാളെ രാത്രി 10.30ന് ആരംഭിക്കുന്ന ഉയിർപ്പിന്‍റെ ശുശ്രൂഷകളിൽ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ കാർമികത്വം വഹിക്കും. തിരുവനന്തപുരം ലൂര്‍ദ് ഫൊറോന പള്ളിയില്‍ ഞായർ പുലര്‍ച്ചെ മൂന്നിന് നടക്കുന്ന തിരുക്കര്‍മങ്ങളില്‍ കര്‍ദിനാള്‍ മാര്‍ ജോർജ് ആലഞ്ചേരി മുഖ്യ കാര്‍മികനാകും.

മലയാറ്റൂരിലേക്ക് തീർഥാടകപ്രവാഹം

മലയാറ്റൂർ: ക്രിസ്തുവിന്‍റെ പീഡാനുഭവ സ്മരണകളിൽ പ്രാർഥനാനിർഭരമായ മനസോടെ അന്തർദേശീയ തീർഥാടനകേന്ദ്രമായ മലയാറ്റൂർ കുരിശുമുടിയിലേക്ക് തീർഥാടകപ്രവാഹം. പെസഹാദിനമായിരുന്ന ഇന്നലെ പുലർച്ചെ മുതൽ തീർഥാടകരുടെ വലിയ തിരക്ക് അനുഭവപ്പെട്ടു. ഇന്നലെ വൈകുന്നേരത്തോടെ കുരിശുമുടിയും പരിസരവും വിശ്വാസികളാൽ നിറഞ്ഞു. മലയടിവാരത്തെ തോമാശ്ലീഹായുടെ തിരുസ്വരൂപത്തിനു മുന്നിൽ പ്രാർഥനയോടെയാണു വിശ്വാസികൾ മലകയറ്റമാരംഭിക്കുന്നത്. സംഘങ്ങളായി കുരിശുകളേന്തി മലകയറാനെത്തുന്നവരും നിരവധി. അകലങ്ങളിൽനിന്നു കാൽനടയായി എത്തുന്നവർ ഇക്കുറി അധികമാണ്. മരക്കുരിശുകളുമേന്തി കുരിശിന്‍റെ വഴി പ്രാർഥനയും ചൊല്ലി മലമുകളിലെത്തുന്ന തീർഥാടകർ വിശുദ്ധ കുർബാനയിലും അനുബന്ധ ശുശ്രൂഷകളിലും പങ്കെടുത്തു വിശ്രമിച്ചശേഷമാണ് മലയിറങ്ങുന്നത്. ദുഃഖവെള്ളിദിനമായ ഇന്ന് വലിയതോതിലെത്തുന്ന തീർഥാടകർക്കായി ക്രമീകരണങ്ങൾ സജ്ജമാണ്. കുരിശുമുടിയിലും താഴത്തെ പള്ളിയിലും ഇന്നലെ നടന്ന പെസഹാ തിരുക്കർമങ്ങളിൽ നിരവധി വിശ്വാസികൾ പങ്കെടുത്തു. പുതുഞായർ തിരുനാളിന് കുരിശുമുടിയിലും താഴത്തെ പള്ളിയിലും 24ന് കൊടിയേറും. 27നാണ് തിരുനാൾ. . തീർഥാടകർക്കു വിപുലമായ സൗകര്യങ്ങൾ മലയാറ്റൂർ കുരിശുമുടിയിലും അടിവാരത്തും മലമുകളിലേക്കുള്ള പാതയിലും തീർഥാടകർക്ക് ആവശ്യമായ സൗകര്യങ്ങൾ ഒരുക്കിയിട്ടുണ്ട്. രാത്രി മുഴുവൻ മല കയറാൻ വിശ്വാസികളുടെ തിരക്കുള്ളതിനാൽ ആവശ്യമായ പ്രകാശസംവിധാനവും കുടിവെള്ളവും ഒരുക്കിയിട്ടുണ്ട്. കെഎസ്ആർടിസിയും സ്വകാര്യ ബസുകളും അടിവാരത്തേക്ക് പ്രത്യേക സർവീസുകൾ തുടർച്ചയായി നടത്തുന്നുണ്ട്. സ്വകാര്യബസുകൾക്ക് പ്രത്യേക പെർമിറ്റ് നൽകിയിട്ടുണ്ട്. തിരക്കേറിയ സമയങ്ങളിൽ വൺവേ സമ്പ്രദായം ഏർപ്പെടുത്തും.

‘പിഎംജിഎസ്‌‌‌വൈ ഫണ്ട് ഉപയോഗിച്ച് ഗ്രാമീണ റോഡുകൾ വികസിപ്പിക്കും’

കോതമംഗലം: പിഎംജിഎസ്‌‌‌വൈ ഫണ്ട് ഉപയോഗിച്ച് നിയോജകമണ്ഡലത്തിലെ വിവിധ പഞ്ചായത്തുകളിൽ ഗ്രാമീണ റോഡുകൾ കൂടുതൽ വികസിപ്പിക്കുന്നതിന് ശ്രമിക്കുമെന്ന് ഡീൻ കുര്യാക്കോസ് എംപി. പ്രധാനമന്ത്രി ഗ്രാമീണ സടക്ക് യോജന പദ്ധതി പ്രകാരമുള്ള ഫണ്ടും സംസ്ഥാന സർക്കാരിന്‍റെ ഫണ്ടും ഉപയോഗിച്ച് കോതമംഗലം നിയോജകമണ്ഡലത്തിലെ പല്ലാരിമംഗലം വാരപ്പെട്ടി പഞ്ചായത്തിനെയും മൂവാറ്റുപുഴ നിയോജകമണ്ഡലത്തിലെ ആയവന പഞ്ചായത്തിനെയും ബന്ധിപ്പിക്കുന്ന അടിവാട് തെക്കേകവല കനാൽ ജംഗ്ഷൻ നിന്ന് ആരംഭിച്ച മൈലൂർ ഏറാന്പ്ര - കരിങ്ങാട്ട്ഞാൽ - ഓളികോട്ടുപടി - സംഗമം കവല - ആന്‍റണി കവല - കടുംപിടി റോഡിന്‍റെ (8.5 കിലോ മീറ്റർ) നിർമാണോദ്ഘാടനം വാരപ്പെട്ടി ഏറാന്പ്ര കനാൽ ജംഗ്ഷനിൽ നിർവഹിക്കുകയായിരുന്നു എംപി. ജില്ലയിൽ പ്രധാനമന്ത്രി സടക്ക് യോജന പദ്ധതി ഉപയോഗിച്ച് ഏറ്റവും കൂടുതൽ റോഡ് നിർമിച്ചിട്ടുള്ളത് വാരപ്പെട്ടി പഞ്ചായത്തിലാണ്. മാത്യു കുഴൽനാടൻ എംഎൽഎ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് പി.കെ. ചന്ദ്രശേഖരൻ നായർ ആമുഖ പ്രസംഗം നടത്തി.

അവധിക്കാല ധ്യാനം

വാഴക്കുളം: കുട്ടികൾക്കായി വിവിധ ധ്യാന കേന്ദ്രങ്ങളിൽ അവധിക്കാല ധ്യാനം നടത്തും. അഞ്ചു മുതൽ 12 വരെ ക്ലാസുകളിൽ പഠിക്കുന്ന കുട്ടികൾക്കു വേണ്ടിയാണ് പ്രത്യേക ധ്യാനം നടത്തുന്നത്. 21 മുതൽ 24 വരെ ഭരണങ്ങാനം അസീസി ധ്യാനകേന്ദ്രത്തിൽ എട്ട് മുതൽ 12 വരെ ക്ലാസുകളിലെ കുട്ടികൾക്ക് ധ്യാനം നടത്തും. ഫോണ്‍: 8590124063. 22 മുതൽ 25 വരെ മൂവാറ്റുപുഴ നെസ്റ്റ് പാസ്റ്ററൽ സെന്‍ററിൽ 10 മുതൽ 12 വരെ ക്ലാസുകളിലെ കുട്ടികൾക്കും മേയ് അഞ്ച് മുതൽ എട്ട് വരെ അഞ്ച് മുതൽ ഒന്പതു വരെ ക്ലാസുകളിലെ കുട്ടികൾക്കുമായി ധ്യാനം നടത്തും. ഫോണ്‍: 8848194020. 27 മുതൽ 30 വരെ ഏഴുമുട്ടം താബോർ ധ്യാനകേന്ദ്രത്തിൽ ഒന്പത് മുതൽ 12 വരെ ക്ലാസുകളിലെ കുട്ടികൾക്ക് ധ്യാനം നടത്തും. 27 മുതൽ 30 വരെ വാഴക്കുളം അഭിഷേകാഗ്നി ധ്യാനകേന്ദ്രത്തിൽ പ്ലസ് വൺ, പ്ലസ് ടു വിദ്യാർഥികൾക്കും മേയ് ഒന്ന് മുതൽ നാല് വരെ പത്താം ക്ലാസ് വിദ്യാർഥികൾക്കും മേയ് 13 മുതൽ 16 വരെ എട്ട്, ഒന്പത് ക്ലാസുകളിലെ വിദ്യാർഥികൾക്കുമായി ധ്യാനം നടത്തും. ഫോണ്‍: 9072427245.

ലഹരിക്കെതിരെ കലാസന്ധ്യ

മൂവാറ്റുപുഴ: തൃക്കളത്തൂരിൽ ബാലവേദിയുടെ ആഭിമുഖ്യത്തിൽ ലഹരി വ്യാപനത്തിനെതിരെ വിവിധ കലാപരിപാടികൾ അവതരിപ്പിച്ചു. കാവുംപടിയിൽ നാടകങ്ങളും ഗാനങ്ങളും നൃത്തച്ചുവടുകളുമായാണ് ബാലവേദി കലാസന്ധ്യ അവതരിപ്പിച്ചത്. മൂവാറ്റുപുഴ എക്സൈസ് സർക്കിൾ ഇൻസ്പെക്ടർ കൃഷ്ണകുമാർ ഉദ്ഘാടനം ചെയ്തു. കെ.വി ശ്രീലേഖ അധ്യക്ഷത വഹിച്ചു.

അനുമോദിച്ചു

കോതമംഗലം: പഞ്ചാബിൽ നടന്ന ഓൾ ഇന്ത്യ യൂണിവേഴ്സിറ്റി വടംവലി ചാന്പ്യൻഷിപ്പിൽ രണ്ടാം സ്ഥാനം കരസ്ഥമാക്കിയ കണ്ണൂർ യൂണിവേഴ്സിറ്റി ടീമിലെ മീത മാമ്മൻ മങ്ങാട്ടിനെ കേരള കോണ്‍ഗ്രസ് കോതമംഗലം നിയോജക മണ്ഡലം കമ്മറ്റിയുടെ ആഭിമുഖ്യത്തിൽ നടന്ന ചടങ്ങിൽ മുൻ മന്ത്രി ടി.യു. കുരുവിള മെമന്‍റോ നൽകി അനുമോദിച്ചു. സ്കൂൾ തലം മുതൽ തുടർച്ചയായി ദേശീയതല മത്സരത്തിൽ പങ്കെടുക്കുന്ന കായികതാരമാണ് മീത മാമ്മൻ. നെല്ലിമറ്റം മങ്ങാട്ട് മാമ്മൻ സ്കറിയ - മിനി മാമ്മൻ ദന്പതികളുടെ മകളാണ് മീത മാമ്മൻ. നിയോജക മണ്ഡലം പ്രസിഡന്‍റ് എ.ടി. പൗലോസ് അധ്യക്ഷത വഹിച്ചു.

മൂവാറ്റുപുഴ കാർഷികോത്സവ്: മേയ് രണ്ട് മുതൽ 12 വരെ

മൂവാറ്റുപുഴ: ഗതാഗത നിയന്ത്രണത്തിന്‍റെ പശ്ചാത്തലത്തിൽ മൂവാറ്റുപുഴ കാർഷികോത്സവ് മേയ് രണ്ട് മുതൽ 12 വരെ ഇഇസി മാർക്കറ്റിൽ നടക്കുമെന്ന് ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ അറിയിച്ചു. കാർഷികോത്സവത്തിന്‍റെ ഭാഗമായി ഇറക്കിയിട്ടുള്ള മുൻകൂർ ടിക്കറ്റുകൾ ഏപ്രിൽ 30 വരെ വിതരണം ചെയ്യുന്നതാണെന്നും അതുവരെ വിതരണം ചെയ്യുന്ന ടിക്കറ്റുകൾ നറുക്കെടുപ്പിൽ പങ്കെടുപ്പിക്കുന്നതാണെന്നും പ്രസിഡന്‍റ് അറിയിച്ചു. 21 മുതൽ 30 വരെ കാർഷികോത്സവം സംഘടിപ്പിക്കാനായിരുന്നു നേരത്തെ തീരുമാനിച്ചിരുന്നത്.

സ്കൂളിൽ കവർച്ച : മണിക്കൂറുകൾക്കുള്ളിൽ മോഷ്ടാവ് പിടിയിൽ

വാഴക്കുളം: സ്കൂളിൽ മോഷണം നടത്തിയയാൾ മണിക്കൂറുകൾക്കുള്ളിൽ പോലീസ് പിടിയിൽ. ആനിക്കാട് സെന്‍റ് സെബാസ്റ്റ്യൻസ് സ്കൂളിൽ മോഷണം നടത്തിയ പേഴക്കപ്പിള്ളി തട്ടുപറമ്പ് കാനാംപറമ്പിൽ വീരാൻകുഞ്ഞിനെ (കുരിശ് ജലീൽ - 67) യാണ് മൂവാറ്റുപുഴ പോലീസ് മണിക്കൂറുകൾക്കുള്ളിൽ പിടികൂടിയത്. ഇന്നലെ പുലർച്ചെ സ്കൂളിലെ പ്രധാനാധ്യാപികയുടെ മുറി കുത്തിത്തുറന്ന് മോണിറ്റർ ഉൾപ്പെടെയുള്ള സാധനങ്ങൾ മോഷ്ടിക്കുകയും കാമറ കേടുവരുത്തുകയും ചെയ്യുകയായിരുന്നു. കോതമംഗലം, അങ്കമാലി, ഇരിഞ്ഞാലക്കുട എന്നിവിടങ്ങളിൽ മോഷണം നടത്തിയതായി ചോദ്യം ചെയ്യലിൽ ഇയാൾ സമ്മതിച്ചതായി പോലീസ് പറഞ്ഞു. പാലക്കാട്‌ നോർത്ത്,പാലക്കാട്‌ സൗത്ത്, ചിറ്റൂർ, കോങ്ങാട്, മഞ്ചേരി, തൃശൂർ ഈസ്റ്റ്‌, കളമശേരി എന്നിവിടങ്ങളിൽ നിരവധി മോഷണം, ഭവനഭേദന കേസുകൾ ഇയാളുടെ പേരിൽ നിലവിലുള്ളതായും പോലീസ് അറിയിച്ചു. മൂവാറ്റുപുഴ ഇൻസ്‌പെക്ടർ ബേസിൽ തോമസിന്‍റെ നേതൃത്വത്തിൽ നടത്തിയ ശാസ്ത്രീയ അന്വേഷണത്തിനൊടുവിൽ പ്രതിയെ പിടികൂടുകയായിരുന്നു.

നേര്യമംഗലത്ത് മിനിഅഗ്നിരക്ഷാ നിലയം ചുവപ്പു നാടയിൽ

കോതമംഗലം: നേര്യമംഗലത്ത് മിനി അഗ്നിരക്ഷാ നിലയം സ്ഥാപിക്കുമെന്ന പ്രഖ്യാപനം ചുവപ്പു നാടയിൽ. ആറ് വർഷത്തിലേറെയായി പ്രഖ്യാപനങ്ങളല്ലാതെ യാഥാർഥ്യത്തിലാക്കാൻ അധികൃതർക്ക് സാധിക്കാത്തതിൽ പ്രതിഷേധം വ്യാപകമായിട്ടുണ്ട്. നേര്യമംഗലത്തും പരിസര പ്രദേശങ്ങളിലും അപകടങ്ങൾ ഉണ്ടാകുന്പോൾ രക്ഷാ പ്രവർത്തനം വൈകുന്നുവെന്ന ആക്ഷേപങ്ങളും ഇതോടെ ശക്തമായിരിക്കുകയാണ്. ഹൈറേഞ്ചിലേക്ക് പ്രവേശിക്കുന്ന പ്രധാന രണ്ട് റോഡുകളും മലയോര ഹൈവേയുടേയുമെല്ലാം സംഗമഭൂമിയാണ് നേര്യമംഗലം. ഇടുക്കി റോഡിലും അടിമാലി റോഡിലും അപകടങ്ങൾ സംഭവിക്കുന്പോൾ ആദ്യം ഓടിയെത്തുന്നത് കോതമംഗലത്തു നിന്നുള്ള അഗ്നിരക്ഷാസേനയാണ്. മൂന്നാറിലേക്ക് ഉൾപ്പെടെ വിനോദ സഞ്ചാര കേന്ദ്രത്തിലേക്ക് ആയിരക്കണക്കിന് വാഹനങ്ങൾ ദിനംപ്രതി വന്നുപോകുന്ന പാതകൾ എപ്പോഴും വാഹന തിരക്കിലായിരിക്കും. ഈ തിരക്കിനിടയിലൂടെ 22 കിലോമീറ്റർ അപ്പുറത്തുനിന്ന് നേര്യമംഗലം എത്തി പിന്നേയും അപകട മേഖലയിലേക്ക് കിലോമീറ്ററോളം സഞ്ചരിച്ചാണ് സേനാംഗങ്ങൾ എത്തുക. ഇതോടെ അപകടങ്ങളുണ്ടായാൽ യഥാസമയം എത്തിച്ചേരാൻ കഴിയാത്തത് വലിയ ആക്ഷേപങ്ങൾക്ക് കാരണമാകുന്നുണ്ട്. കഴിഞ്ഞ ചൊവ്വാഴ്ച നടന്ന കെഎസ്ആർടിസി ബസ് അപകടത്തിൽപ്പെട്ട ഇടുക്കി സ്വദേശിനിയായ അനിന്‍റ മുക്കാൽ മണിക്കൂറോളം ബസിനടിയിൽ കുടുങ്ങി കിടന്നു. പിന്നീട് ക്രെയിൻ എത്തിച്ച് കുട്ടിയെ പുറത്തെടുത്തപ്പോഴേക്കും ജീവൻ നഷ്ടമായിരുന്നു. ഇവിടേക്ക് കോതമംഗലത്തുനിന്ന് 26 കിലോമീറ്റർ ദൂരമുണ്ട്. മഴക്കാലത്ത് കാറ്റിലും മണ്ണിടിച്ചിലിലും മരങ്ങളും പാറക്കല്ലും മറ്റും റോഡിലേക്കും മറ്റിടങ്ങളിലേക്കും പതിക്കുന്നതും നിത്യസംഭവമാണ്. വനമേഖല ഉൾപ്പെട്ട താലൂക്കിന്‍റെ വിവിധ പ്രദേശങ്ങളിൽ ഇത്തരം സന്ദർഭത്തിലെല്ലാം രക്ഷാപ്രവർത്തനത്തിന് ഓടി എത്തണം. നേര്യമംഗലത്ത് അഗ്നിരക്ഷാ നിലയം സ്ഥാപിച്ചാൽ മാമലകണ്ടം, ഊന്നുകൽ, ഇഞ്ചത്തൊട്ടി, കാഞ്ഞിരവേലി, ദേശീയ പാതയിൽ വാളറ വരേയും ഇടുക്കി റോഡിൽ പാംബ്ല വരേയും പ്രയോജനം ചെയ്യും. നേര്യമംഗലം ബസ് സ്റ്റാൻഡിന് പിന്നിൽ നിലയത്തിനായി കവളങ്ങാട് പഞ്ചായത്ത് വക സാംസ്കാരിക നിലയം കെട്ടിടം ഇതിനായി ഏറ്റെടുക്കുമെന്ന് കഴിഞ്ഞ ജനുവരി 24നും ആന്‍റണി ജോണ്‍ എംഎൽഎ അറിയിച്ചിരുന്നു. സ്റ്റേഷൻ പ്രവർത്തനത്തിന് അഗ്നിരക്ഷാ വകുപ്പ് നൽകിയ നിർദേശപ്രകാരം അടിസ്ഥാന സൗകര്യം ഏർപ്പെടുത്തുമെന്നാണ് എംഎൽഎയുടെ ചോദ്യത്തിനുള്ള മറുപടിയിൽ മുഖ്യമന്ത്രി നിയമസഭയിൽ അറിയിച്ചത്. ഗ്യാരേജ്, ശുചിമുറി, തറ കട്ട വിരിക്കൽ, വാഹനം കയറാൻ സ്ലാബ് തുടങ്ങിയ അനുബന്ധ സൗകര്യം ഒരുക്കുന്നതിന് പഞ്ചായത്ത് വാർഷിക പദ്ധതിയിൽ തുക വകയിരുത്തിയിട്ടുമുണ്ട്. സ്ഥലവും കെട്ടിടവും ഏറ്റെടുക്കുന്നത് സംബന്ധിച്ച് അഗ്നിരക്ഷാസേന അധികൃതർക്ക് അറിയിപ്പൊന്നും ലഭിച്ചിട്ടില്ല. അറിയിപ്പ് കിട്ടിയാൽ ദ്രുതഗതിയിൽ പ്രവർത്തനം മുന്നോട്ട് കൊണ്ടുപോകുമെന്നാണ് സേന അധികൃതർ പറയുന്നത്. നേര്യമംഗലത്ത് മിനിഅഗ്നിരക്ഷാ നിലയം സ്ഥാപിക്കാൻ ബന്ധപ്പെട്ടവർ ഉടൻ നടപടി സ്വീകരിക്കണമെന്നാണ് ജനങ്ങളുടെ ആവശ്യം.

ചരക്കുവാഹനം ഓട്ടോറിക്ഷകളിൽ ഇടിച്ച് രണ്ട് പേർക്ക് പരിക്ക്

മൂവാറ്റുപുഴ: നിയന്ത്രണം നഷ്ടപ്പെട്ട ചരക്കുവാഹനം നിർത്തിയിട്ടിരുന്ന ഓട്ടോറിക്ഷകളിൽ ഇടിച്ച് ഓട്ടോ ഡ്രൈവർമാരായ രണ്ട് പേർക്ക് പരിക്ക്. വ്യാഴാഴ്ച രാവിലെ ആറോടെ എംസി റോഡിൽ പേഴയ്ക്കാപ്പിള്ളി സബൈൻ ആശുപത്രിക്ക് മുന്നിലാണ് അപകടം. ഓട്ടോ ഡ്രൈവർമാരായ പേഴയ്ക്കാപ്പിള്ളി പുന്നേക്കുടിയിൽ ടി.എം. അലിയാർ (64), കല്ലോത്തറ അബൂബക്കർ (73) എന്നിവർക്കാണ് പരിക്കേറ്റത്. പെരുന്പാവൂർ ഭാഗത്തുനിന്നു മൂവാറ്റുപുഴയ്ക്ക് വരികയായിരുന്ന ചരക്കുവാഹനം നിയന്ത്രണം നഷ്ടപ്പെട്ട് സ്റ്റാൻഡിൽ നിർത്തിയിട്ടിരുന്ന രണ്ട് ഓട്ടോറിക്ഷകളിലേക്ക് ഇടിച്ച് കയറുകയായിരുന്നു. ഇടിയുടെ ആഘാതത്തിൽ റോഡിലേക്ക് തെറിച്ച് വീണാണ് ഓട്ടോ ഡ്രൈവർമാർക്ക് പരിക്കേറ്റത്. ഇവരിൽ അബൂബക്കറിന്‍റെ പരിക്കുകൾ ഗുരുതരമാണ്. പരിക്കേറ്റവരെ ഉടൻ എറണാകുളത്തെ സ്വകാര്യ ആശുപത്രികളിൽ പ്രവേശിപ്പിച്ചു. അപകടത്തിൽ റോഡരികിൽ സ്ഥാപിച്ചിരുന്ന ബേക്കറിയുടെ ബോർഡും തകർന്നു.

നിയന്ത്രണംവിട്ട കാർ തലകീഴായ് താഴ്ചയിലേക്ക് മറിഞ്ഞു

കോതമംഗലം: തീർഥാടക സംഘം സഞ്ചരിച്ചിരുന്ന കാർ നിയന്ത്രണംവിട്ട് തലകീഴായ് പത്തടി താഴ്ചയിൽ വീട്ടുമുറ്റത്ത് പതിച്ചു. യാത്രക്കാർ നിസാര പരിക്കുകളോടെ രക്ഷപ്പെട്ടു. കൊച്ചി-ധനുഷ്കോടി ദേശീയപാതയിൽ കവളങ്ങാട് പഞ്ചായത്ത് മിനി സ്റ്റേഡിയത്തിന് സമീപം ഇന്നലെ പുലർച്ചെ ആറോടെയാണ് സംഭവം. നെടുങ്കണ്ടം സ്വദേശികൾ മലയാറ്റൂർ തീർഥാടനം കഴിഞ്ഞ് തിരികെ പോകുന്നതിനിടെ ഡ്രൈവർ ഉറങ്ങിപ്പോയതാണ് അപകടത്തിനിടയാക്കിയത്. സംഭവം ശ്രദ്ധയിൽപ്പെട്ട വീട്ടുകാരും സമീപവാസികളുമാണ് രക്ഷാപ്രവർത്തന നടത്തിയത്. ആർക്കും കാര്യമായ പരിക്കില്ല. വാഹനത്തിന്‍റെ മുൻവശം തകർന്നു. തലനാരിഴയ്ക്കാണ് ദുരന്തം ഒഴിവായത്.

ഇ-ഫയലിംഗ് നടപടിക്രമങ്ങൾ ലളിതവത്കരിക്കണം

കോതമംഗലം: ഉപഭോക്താക്കളുടെ പരാതികൾ കാര്യക്ഷമമായും വേഗത്തിലും തീർപ്പാക്കാൻ ഇ-ഫയലിംഗ് നടപടി ക്രമങ്ങൾ ലളിതവത്കരിക്കുകയും അതിൽ പരിശീലനം ലഭ്യമാക്കുകയും ചെയ്യണമെന്ന് ഉപഭോക്തൃ ജാഗ്രതാ സമിതി പ്രസിഡന്‍റ് ഗോപാലൻ വെണ്ടുവഴി ആവശ്യപ്പെട്ടു. ഉപഭോക്തൃ കോടതികളിൽ അഭിഭാഷകരെ കൂടാതെ സാധാരണക്കാരും കേസ് ഫയൽ ചെയ്യുന്നതിന് എത്തുന്നുണ്ട്. സാധാരണക്കാരനായ ഒരു പരാതിക്കാരന് ഇ-ഫയലിംഗ് അത്ര എളുപ്പമുള്ള പ്രവർത്തിയല്ല. പരാതി നൽകുന്നതിന് മുന്പ് ഓണ്‍ലൈനായി രജിസ്ട്രേഷൻ എടുക്കണം. പിന്നീട് പരാതികളും അനുബന്ധ പ്രമാണങ്ങളും സർക്കാരിന്‍റെ വെബ് സൈറ്റിൽ അപ് ലോഡ് ചെയ്യണം. തുടർന്ന് എല്ലാ രേഖകളുമായി ഉപഭോക്തൃ കോടതിയിൽ നേരിട്ട് എത്തണം. അതിനാൽ കന്പ്യൂട്ടർ പരിജ്ഞാനവും സൗകര്യങ്ങളും ഇല്ലാത്ത ഒരു പരാതിക്കാരന് വിദഗ്ധ സേവനം ലഭിച്ച മറ്റൊരാളുടെ സഹായം ഇല്ലാതെ ഇവിടെ പരാതി നൽകാൻ കഴിയാതെ വരുന്നുണ്ടെന്നും ഗോപാലൻ വെണ്ടുവഴി പറഞ്ഞു.

ക്രിസ്തുവിന്‍റെ അന്ത്യഅത്താഴ സ്മരണ പുതുക്കി പെസഹ ആചരിച്ചു

മൂവാറ്റുപുഴ: ക്രിസ്തുവിന്‍റെ അന്ത്യഅത്താഴ സ്മരണപുതുക്കി ക്രൈസ്തവ ദേവാലയങ്ങളിൽ പെസഹാ വ്യാഴം ആചരിച്ചു. മൂവാറ്റുപുഴ ഹോളി മാഗി ഫൊറോന പള്ളിയിലെ പെസഹാ വ്യാഴ തിരുക്കർമങ്ങൾക്ക് വികാരി ഫാ. കുര്യാക്കോസ് കൊടകല്ലിൽ നേതൃത്വം നൽകി. റവ.ഡോ. ആന്‍റണി പുത്തൻകുളം, സഹവികാരി ഫാ. ജോസഫ് കാരക്കുന്നേൽ എന്നിവർ സഹകർമികരായിരുന്നു. രാവിലെ കുർബാനയോട് കൂടി ആരംഭിച്ച തിരുക്കർമങ്ങൾ 12 യുവജനങ്ങളുടെ കാലുകൾ കഴുകിയാണ് നിർവഹിച്ചത്. അന്ത്യ അത്താഴ സമയത്ത് ഈശോ 12 ശിഷ്യന്മാരുടെ കാലുകൾ കഴുകി വിനയത്തിന്‍റെയും എളിമയുടെയും മാതൃക കാണിച്ചതിന്‍റെ ഓർമയാചരണമാണ് പാദം കഴുകൽ തിരുക്കർമത്തിലൂടെ അനുഷ്ഠിച്ചത്. തുടർന്ന് കുർബാനയും ആരാധനയും ഉണ്ടായിരുന്നു. മൂവാറ്റുപുഴ നിർമല ഹയർ സെക്കൻഡറി സ്കൂൾ പ്രിൻസിപ്പൽ റവ.ഡോ. ആന്‍റണി പുത്തൻകുളം പെസഹാദിന സന്ദേശം നൽകി. ഇടവകയിലെ ആയിരക്കണക്കിന് ജനങ്ങളാണ് തിരുക്കർമങ്ങളിൽ പങ്കെടുത്തത്. കൂത്താട്ടുകുളം: ടൗണ്‍ തിരുകുടുംബ ദേവാലയത്തിൽ പെസഹാദിന ശുശ്രൂഷകൾ നടന്നു. വിശുദ്ധ വാരത്തോടനുബന്ധിച്ച് ദേവാലയത്തിൽ നടന്ന പെസഹാ തിരുക്കർമങ്ങൾക്ക് വികാരി ഫാ. ജെയിംസ് കുടിലിൽ, സഹവികാരി ഫാ. ജോസഫ് മരോട്ടിക്കൽ എന്നിവർ നേതൃത്വം നൽകി. ദേവാലയത്തിൽ രാവിലെ നടന്ന പ്രത്യേക പ്രാർഥന തിരുക്കർമങ്ങളോടെയാണ് പെസഹ ശുശ്രൂഷകൾ ആരംഭിച്ചത്. ശുശ്രൂഷകളുടെ ഭാഗമായി കാൽകഴുകൽ ശുശ്രൂഷയും നടന്നു. ഇലഞ്ഞി: സെന്‍റ് പീറ്റേഴ്സ് ആന്‍ഡ് സെന്‍റ് പോൾസ് ഫൊറോന പള്ളിയിൽ പെസഹാദിന ശുശ്രൂഷകൾ നടന്നു. പെസഹാ തിരുക്കർമങ്ങൾക്ക് വികാരി ഫാ. ജോസഫ് ഇടത്തുംപറന്പിൽ, സഹവികാരി ഫാ. ജോസഫ് ആലാനിക്കൽ, ഫാ. ജോർജ് വടയാറ്റുകുഴി എന്നിവർ നേതൃത്വം നൽകി. ദേവാലയത്തിൽ രാവിലെ നടന്ന പ്രത്യേക പ്രാർഥന തിരുക്കർമങ്ങളോടെയാണ് പെസഹാ ശുശ്രൂഷകൾ ആരംഭിച്ചത്. കാൽകഴുകൽ ശുശ്രൂഷയും നടന്നു. പിറവം: പാമ്പാക്കുട സെന്‍റ് ജോൺസ് എഫേസോസ് ഓർത്തഡോക്സ് സിറിയൻ വലിയ പള്ളിയിൽ നടന്ന കാൽകഴുകൽ ശുശ്രൂഷയ്ക്ക് മലങ്കര മൽപ്പാൻ ഫാ. ജോൺസ് ഏബ്രഹാം കോനാട്ട് കോറെപ്പിസ്ക്കോപ്പാ മുഖ്യകാർമികത്വം വഹിച്ചു. 98 വർഷങ്ങൾക്ക് ശേഷമാണ് കോനാട്ട് കുടുംബം ഇങ്ങനെയൊരു ചടങ്ങ് നടത്തുന്നത്. വൈദികർ, കോറെപ്പിസ്ക്കോപ്പമാർ എന്നിവർക്ക് കാൽകഴുകൽ ശുശ്രൂഷയ്‌ക്ക് അനുമതിയില്ല. എന്നാൽ റീശ് കോറെപ്പിസ്ക്കോപ്പാ എന്ന നിലയിൽ ഫാ. ജോൺസ് ഏബ്രഹാം കോനാട്ടിന് ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ പ്രത്യേക അനുമതി നൽകിയിരുന്നു.

‘എളിമയുടെയും വിനയത്തിന്‍റെയും സംസ്കാരം കാലഘട്ടത്തിന് അനിവാര്യം’

മൂവാറ്റുപുഴ: അപരന്‍റെ കാൽപ്പാദം വരെ താഴ്ന്നുള്ള വിളിയാണ് പെസഹാ തിരുനാളെന്നും എളിമയുടെയും വിനയത്തിന്‍റെയും സംസ്കാരം ഈ കാലഘട്ടത്തിന്‍റെ അനിവാര്യ ഘടകമാണെന്ന് മൂവാറ്റുപുഴ രൂപതാധ്യക്ഷൻ യുഹാനോൻ മാർ തെയോഡോഷ്യസ്. വിശുദ്ധ വാരത്തിന്‍റെ ഭാഗമായി പെസഹ ആചരണത്തോടനുബന്ധിച്ച് കാൽകഴുകൽ ശുശ്രുഷ നിർവഹിക്കുകയായിരുന്നു അദ്ദേഹം. വാഴപ്പിള്ളി സെന്‍റ് ജോസഫ്സ് കത്തീഡ്രൽ കത്തോലിക്ക ദേവാലയത്തിൽ രൂപതയുടെ ആഭിമുഖ്യത്തിലാണ് കാൽകഴുകൽ ശുശ്രൂഷ നടന്നത്. ഒന്പതാം മണിയുടെ പ്രാർഥനയോടെ ആരംഭിച്ച ശുശ്രൂഷയിൽ 12 ശിഷ്യന്മാരുടെ സ്മരണാർഥം 12 പേരുടെ കാലുകൾ കഴുകിത്തുടച്ച് സുഗന്ധദ്രവ്യമൊഴിച്ച് ചുംബിച്ചാണ് ചടങ്ങ് പൂർത്തീകരിച്ചത്. തുടർന്ന് 12 പേരുടെ പ്രതിനിധിയായ ഒരാൾ രൂപതാധ്യക്ഷന്‍റെ കാലുകൾ കഴുകി ആദരവ് പ്രകടിപ്പിച്ചു. കാൽ കഴുകൽ ശുശ്രൂഷയെ തുടർന്ന് പെസഹ കുർബാന രൂപതാധ്യക്ഷന്‍റെ നേതൃത്വത്തിൽ നടന്നു. കാൽകഴുകൽ ശുശ്രൂഷയ്ക്ക് ഭദ്രാസന വികാരി ജനറൽ മോണ്‍. തോമസ് ഞാറക്കാട്ട് കോറെപ്പിസ്കോപ്പ, ഡിസ്ട്രിക്ട് വികാരി ഫാ. വർഗീസ് മഠത്തിക്കുന്നത്ത്, കത്തീഡ്രൽ വികാരി ഫാ. ജേക്കബ് കിയ്യാലിൽ, പ്രോകൂറേറ്റർ ഫാ. തോമസ് ആറ്റുമാലിൽ എന്നിവർ നേതൃത്വം നൽകി.

ശ്രേഷ്ഠ കാതോലിക്കാ ബാവാ പ്രഥമ കാൽകഴുകൽ ശുശ്രൂഷ നിർവഹിച്ചു

കോതമംഗലം: ശ്രേഷ്ഠ കാതോലിക്കാ ബസേലിയോസ് ജോസഫ് ബാവാ പ്രഥമ കാൽകഴുകൽ ശുശ്രൂഷ കോതമംഗലം മർത്തമറിയം കത്തീഡ്രലിൽ വലിയപള്ളിയിൽ നടന്ന പെസഹ ആചരണത്തിൽ നിർവഹിച്ചു. മെത്രാപ്പോലീത്തമാരായ ഏലിയാസ് മാർ യൂലിയോസ്, മാത്യൂസ് മാർ അന്തീമോസ് എന്നിവർ സഹകാർമികരായി. ഇന്ന് രാവിലെ 6.30നു നമസ്കാരത്തോടെ ദുഃഖവെള്ളി ശുശ്രൂഷ തുടങ്ങും. ആറിനു പ്രാർഥന. നാളെ 10ന് കുർബാന, ആറിനു സന്ധ്യാനമസ്കാരം, പാതിരാ നമസ്കാരം, ഉയിർപ്പ് ശുശ്രൂഷ, കുർബാന.

നഗര വികസന ഗതാഗത ക്രമീകരണം : വലിയ വാഹനങ്ങൾ തട്ടി വൈദ്യുതി കന്പികൾ പൊട്ടുന്നു

മൂവാറ്റുപുഴ: നഗര വികസനത്തിന്‍റെ ഭാഗമായി ഗതാഗത ക്രമീകരണങ്ങൾ ഏർപ്പെടുത്തിയതോടെ മാറാടി കായനാട് വഴി പോകുന്ന വലിയ വാഹനങ്ങൾ തട്ടി വൈദ്യുതി കന്പികൾ നിരന്തരം പൊട്ടുന്നത് അപകട ഭീഷണിയാകുന്നു. ഇതേതുടർന്ന് പ്രദേശങ്ങളിൽ മണിക്കൂറുകളോളം വൈദ്യുതി വിശ്ചേദിക്കപ്പെടുകയാണെന്ന് പഞ്ചായത്ത് പ്രസിഡന്‍റ് ഒ.പി. ബേബി പറഞ്ഞു. കണ്ടെയ്നറുകൾ പോലെയുള്ള വാഹനങ്ങൾ ഊരമന ശിവലി ഭാഗത്ത് ലിഫ്റ്റ് ഇറിഗേഷൻ അക്വഡേറ്ററുകളിൽ തട്ടുന്നുണ്ട്. അക്വഡേറ്ററിന് സമീപം എത്തുന്ന വാഹനങ്ങൾ കടന്നുപോകാതെ വരുന്നതോടെ ഈ (പൊക്കമുള്ള) വാഹനങ്ങൾ തിരിക്കാൻ 500 മീറ്ററോളം പിന്നോട്ട് പോകേണ്ട അവസ്ഥയാണ്. ഇത് ഇവിടെ ഗതാഗതക്കുരുക്കിന് കാരണമാകുകയാണ്. ഒപ്പം പ്രദേശത്ത് റോഡരികുകൾ ഇടിഞ്ഞിരിക്കുകയാണെന്നും ഇത് വലിയ അപകടത്തിന് കാരണമാകുമെന്നും പ്രസിഡന്‍റ് പറഞ്ഞു. കായനാട് കവല മുതൽ പൊട്ടിപ്പൊളിഞ്ഞ റോഡുകൾ അറ്റകുറ്റപ്പണി ചെയ്യാത്തതുമൂലം റോഡുകളിൽ വലിയ കുഴികൾ രൂപപ്പെട്ടിട്ടുണ്ട്. പൊക്കം കൂടിയ വലിയ വാഹനങ്ങൾ മറ്റു വഴികളിലൂടെ തിരിച്ചുവിടണമെന്നും റോഡിലെ ഇടിഞ്ഞ ഭാഗങ്ങൾ അടിയന്തരമായി അറ്റകുറ്റപ്പണികൾ ചെയ്യണെമെന്നും ഒ.പി. ബേബി ആവശ്യപ്പെട്ടു. മുന്നൊരുക്കങ്ങൾ നടത്തി ലിങ്ക് റോഡുകൾ ക്രിയാത്മകമായി ഗതാഗതത്തിന് ഉപയോഗിക്കാത്തതിനാൽ വരും ദിവസങ്ങളിൽ ഗതാഗത പ്രശ്നം കൂടുതൽ രൂക്ഷമാകും. അടിയന്തരമായി ലിങ്ക് റോഡുകൾ ക്രമീകരിച്ച് ഗതാഗതത്തിനായി ഉപയോഗിക്കണമെന്നാണ് ആവശ്യമുയർന്നിരിക്കുന്നത്.

ഗതാഗത സംവിധാനത്തിൽ നൂതന ആശയം: വിദ്യാർഥികളെ ആദരിച്ചു

ആലുവ: ട്രാഫിക്ക് മേഖലയിൽ അപകടങ്ങൾ ഒഴിവാക്കാൻ നൂതനാശയങ്ങൾ അവതരിപ്പിച്ച വിദ്യാർഥികൾക്ക് റൂറൽ ജില്ലാ പോലീസ് മേധാവി ഡോ. വൈഭവ് സക്സേനയുടെ അഭിനന്ദനം. ചിറ്റൂർ എസ്ബിഒഎ പബ്ലിക്ക് സീനിയർ സെക്കൻഡറി സ്കൂളിലെ വിദ്യാർഥികളേയും പ്രധാന അധ്യാപികമാരെയുമാണ് ജില്ലാ പോലീസ് മേധാവിയുടെ ചേമ്പറിൽ വച്ച് അഭിനന്ദനപ്പത്രം നൽകിയത്. ഷോൺ ജോസഫ്, വൈഷ്ണവ് സുബിൻ , ജെഫിൻ ആന്‍റണി, എൻറിക്ക് റോട്രിസ്, രാഹുൽ രാജ്, അഹമ്മദ് ഫംദാൻ, മെർവിൻ മാത്യു ജോർജ്, ആൽവിൻ ജോസഫ്, അവിൻ റോട്രിഗസ് എന്നീ വിദ്യാർഥികൾ, പ്രിൻസിപ്പൽ ശ്രീകല കരുണാകരൻ, പ്രധാനാധ്യാപിക ട്രീസ ബിജു എന്നിവരുമാണ് പദ്ധതിയ്ക്ക് പിന്നിൽ പ്രവർത്തിച്ചത്. ആലുവയിൽ സംഘടിപ്പിച്ച ഗതാഗത സെമിനാറിലാണ് വിദ്യാർഥികൾ പ്രൊജക്ട് അവതരിപ്പിച്ചത്. വാഹനങ്ങൾ അമിത വേഗത്തിലോടിച്ചാൽ ഉദ്യോഗസ്ഥരുടെ മൊബൈലിൽ സന്ദേശം വരുന്ന സംവിധാനം, എതിർ വശത്തുനിന്നും വരുന്ന വാഹനങ്ങളുടെ വെളിച്ചം മൂലം അപകടം തടയുന്ന സംവിധാനം, വഴിയരികിൽ സ്ഥാപിക്കുന്ന ബോക്സിനകത്തെ സ്വിച്ച് വഴി ജിപിഎസ് മോഡ്യൂൾ വഴി പോലീസ് -ഫയർഫോഴ്‌സ് എന്നിവരെ അറിയിക്കുന്ന സംവിധാനം, കാർഡ് വഴി ഗേറ്റ് തുറക്കുന്ന സംവിധാനം തുടങ്ങിയവയുടെ ലഘുരൂപങ്ങളാണ് അവതരിപ്പിച്ചത്. ഭാവിയുടെ പ്രതീക്ഷകളാണ് വിദ്യാർഥികളെന്ന് എസ്പി പറഞ്ഞു.

ചാന്തേലിപ്പാടത്തെ 25 ഏക്കറിൽ കൊയ്ത്ത് ഉത്സവം നടത്തി

നെടുമ്പാശേരി: ചെങ്ങമനാട് സഹകരണ ബാങ്കിന്‍റെ നേതൃത്വത്തിൽ കിഴക്കേ ദേശം ചാന്തേലിപ്പാടം 25 ഏക്കറിൽ നടത്തിയ നെൽക്കൃഷിയുടെ കൊയ്ത്ത് ഉത്സവം പാറക്കടവ് ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് ഉദ്ഘാടനം ചെയ്തു. ചെങ്ങമനാട് സഹകരണ ബാങ്ക് പ്രസിഡന്‍റ് എം.കെ. അസീസ് അധ്യക്ഷനായി. ചെങ്ങമനാട് പഞ്ചായത്ത് പ്രസിഡന്‍റ് ജയ മുരളീധരൻ മുഖ്യാതിഥിയായി. പഞ്ചായത്ത് അംഗങ്ങളായ നൗഷാദ് പാറപ്പുറം, ടി.വി. സുധീഷ് , നഹാസ്‌, സഹകരണ ബാങ്ക് മുൻ പ്രസിഡന്‍റ് പി.ജെ. അനിൽ, ബോർഡ് അംഗങ്ങളായ എം.കെ. പ്രകാശൻ, എം.ടി. അനൂപ്, സിദ്ധിക് ബാബു, ടി.എൻ. ജിഷ്ണു, ടി.എം. അസീസ്, സീമ അരുൺ, ഷൈല അശോകൻ, കൃഷി ഓഫീസർ സ്വപ്ന എന്നിവർ സംസാരിച്ചു.

ലഹരി വിരുദ്ധ സാന്ത്വനം പദ്ധതിക്കു തുടക്കമായി

നെടുമ്പാശേരി: അകപ്പറമ്പ് സെന്‍റ് ഗർവാസീസ് ആൻഡ് പ്രോത്താസീസ് പള്ളിയിൽ ലഹരിയുടെ ദൂഷ്യവശങ്ങളെക്കുറിച്ച് ബോധവത്കരണം നൽകുന്ന സാന്ത്വനം പദ്ധതി ജില്ലാ ജഡ്ജി സ്മിത ജോർജ് ഉദ്ഘാടനം ചെയ്തു. വികാരി ഫാ. മൈക്കിൾ ആറ്റുമേൽ അധ്യക്ഷനായിരുന്നു. ലഹരിയുടെ ഉപയോഗം വ്യക്തികളെയും കുടുംബങ്ങളെയും സമൂഹത്തെയും എങ്ങനെ നശിപ്പിക്കും എന്നതിനെക്കുറിച്ച് എക്സ് സൈസ് പ്രിവന്‍റീവ് ഓഫീസർ സി.എ. സിദ്ദിഖ് ക്ലാസുകൾ നൽകി. സഹ വികാരി ഫാ. യോഹന്നാൻ പാറേക്കാട്ടിൽ, ട്രസ്റ്റി രഞ്ജി പെട്ടയിൽ , അഡ്വ. അൽഫോൻസാ ഡേവിഡ്, അഡ്വ. വർഗീസ് മൂലൻ , വൈസ് ചെയർമാൻ ജോസ് പടത്തറ , റോമി പേട്ടയിൽ , ജീമോൻ കോലഞ്ചേരി എന്നിവർ പ്രസംഗിച്ചു.

പൈനാടത്ത് കുടുംബയോഗം വാർഷികാഘോഷം മേയ് ഒന്നിന്

കറുകുറ്റി: പൈനാടത്ത് കുടുംബയോഗം നാല്പതാം വാർഷികാഘോഷം മേയ് ഒന്നിനു നടത്തും. രാവിലെ ഒന്പതിനു കുടുംബയോഗം ഓഡിറ്റോറിയത്തിൽ പതാക ഉയർത്തും. 10.30ന് കറുകുറ്റി സെന്‍റ് സേവ്യേഴ്സ് ഫൊറോന പള്ളിയിൽ പരേതർക്കായുള്ള ദിവ്യബലി, സെമിത്തേരിയിൽ ഒപ്പീസ്, തുടർന്ന് ഓഡിറ്റോറിയത്തിൽ പ്രസിഡന്‍റ് വർഗീസ് പോളിന്‍റെ അധ്യക്ഷതയിൽ കൂടുന്ന പൊതുസമ്മേളനം രക്ഷാധികാരി ഫാ. ജോസ് പൈനാടത്ത് ഉദ്ഘാടനം ചെയ്യും. കറുകുറ്റി ഫൊറോന പള്ളി വികാരി ഫാ. സേവ്യർ ആവള്ളിൽ അനുഗ്രഹപ്രഭാഷണം നടത്തും. ഫാ. സാജു പൈനാടത്ത്, ഫാ. മാർട്ടിൻ പൈനാടത്ത് , ഫാ. വിൽസൻ പൈനാടത്ത് , സിസ്റ്റർ ലിൻസിയ, സിസ്റ്റർ അനൂപ, ഫ്രാൻസിസ് ആന്‍റണി, സാജൻ ജോർജ്, കുഞ്ഞുവറീത് സെബാസ്റ്റ്യൻ എന്നിവർ പ്രസംഗിക്കും. വിവാഹ രജത, സുവർണജൂബിലി ആഘോഷിക്കുന്നവരെയും പഠനരംഗത്ത് ഉന്നതവിജയം നേടിയവരെയും സമൂഹത്തിൽ ഉന്നതപദവികൾ ലഭിച്ചവരെയും ചടങ്ങിൽ അനുമോദിക്കും. കുടുംബയോഗം അംഗങ്ങളിൽനിന്നു സമാഹരിച്ച ജീവകാരുണ്യ ഫണ്ട് കൈമാറും. സ്നേഹവിരുന്ന്, കലാകായികമത്സരങ്ങൾ, ഗാനമേള, സമ്മാനദാനം എന്നിവയുണ്ടാകും.

മുടക്കുഴ ഹരിത കാർഷിക വിപണി: നവീകരണ പ്രവർത്തനങ്ങൾ ആരംഭിച്ചു

പെരുമ്പാവൂർ: എറണാകുളം ജില്ലാ പഞ്ചായത്തിന്‍റെ 10 ലക്ഷം രൂപ വിനിയോഗിച്ച് മുടക്കുഴ പഞ്ചായത്തിലെ ഹരിത കാർഷിക വിപണിയുടെയും ബഡ്സ് സ്കൂളിന്‍റെയും നവീകരണ പ്രവർത്തനങ്ങൾ ആരംഭിച്ചു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ നിർമാണ ഉദ്ഘാടനം നിർവഹിച്ചു. പഞ്ചായത്ത് പ്രസിഡന്‍റ് പി.പി. അവറാച്ചൻ അധ്യക്ഷത വഹിച്ചു. പഞ്ചായത്ത് അംഗങ്ങളായ ഡോളി ബാബു, കെ.ജെ. മാത്യു, ജോസ് എ. പോൾ, വൽസ വേലായുധൻ, സഹകരണ ബാങ്ക് പ്രസിഡന്‍റ് ജോഷി തോമസ്, കാർഷിക വിപണി പ്രസിഡന്‍റ് വി.ടി. പത്രോസ്, സെക്രട്ടറി പി.ഒ. ബെന്നി, എൻ.പി. രാജീവ്, ബാബു പാത്തിക്കൽ എന്നിവർ പ്രസംഗിച്ചു.

മലയാറ്റൂർ തീർഥാടകർക്ക് വിശ്രമ കേന്ദ്രവുമായി യൂത്ത് കോൺ.

ആലുവ: ദേശീയപാത വഴി കാൽനടയായി വരുന്ന മലയാറ്റൂർ തീർഥാടകർക്ക് വിശ്രമ കേന്ദ്രം ഒരുക്കി യൂത്ത് കോൺഗ്രസ് ചൂർണിക്കര മണ്ഡലം കമ്മിറ്റി. കമ്പനിപ്പടിയിൽ ആരംഭിച്ച വിശ്രമ കേന്ദ്രത്തിൽ തീർഥാടകർക്ക് ലഘുഭക്ഷണം നൽകി അന്‍വര്‍ സാദത്ത് എംഎല്‍എ ഉദ്ഘാടനം ചെയ്തു. യൂത്ത് കോണ്‍ഗ്രസ് മണ്ഡലം പ്രസിഡന്‍റ് ജിതിൻ രാജ് അധ്യക്ഷത വഹിച്ച ചടങ്ങില്‍ യൂത്ത് കോൺഗ്രസ് സംസ്ഥാന ജനറൽ സെക്രട്ടറി ലിന്‍റോ പി. ആന്‍റു, മണ്ഡലം വൈസ് പ്രസിഡന്‍റുമാരായ മുഹമ്മദ് ഷാഫി, പി.എച്ച് . ആഷൽ എന്നിവർ പ്രസംഗിച്ചു. വിശ്രമ കേന്ദ്രത്തിൽ കുടിവെള്ളം, പഴം, കുമ്മട്ടി, ബിസ്കറ്റ് ഉൾപ്പെടുന്ന ലഘുഭക്ഷണവും ഒരുക്കിയിട്ടുണ്ടെന്ന് സംഘാടകർ അറിയിച്ചു.

മെഡിക്കൽ ക്യാമ്പിലെ കണ്ണടകൾ വിതരണം ചെയ്തു

കളമശേരി:വ്യവസായ മന്ത്രി പി.രാജീവിന്‍റെ നേതൃത്വത്തിൽ സംഘടിപ്പിച്ച ഒപ്പം മെഡിക്കൽ ക്യാമ്പിൽ പങ്കെടുത്തവർക്കുള്ള കണ്ണടകൾ വിതരണം ചെയ്തു. നേത്രപരിശോധനയുടെ ഭാഗമായി പുതിയ കണ്ണട നിർദേശിക്കപ്പെട്ട 642 പേർക്കാണ് സൗജന്യമായി കണ്ണടകൾ നൽകിയത്. കുന്നുകര അഹാന ഓഡിറ്റോറിയത്തിൽ നടന്ന ചടങ്ങിൽ മന്ത്രി പി. രാജീവ് കണ്ണടകൾ വിതരണം ചെയ്തു. നാല് വർഷങ്ങളിലായി 2,246 കണ്ണടകളാണ് വിതരണം ചെയ്തത്.

ദേശീയ ബാഡ്മിന്‍റൺ മത്സരം: ഐസിമോൾക്ക് ഡബിൾസിൽ വെങ്കലം

ആലുവ: ഓൾ ഇന്ത്യ പോലീസ് ബാഡ്മിൻറൺ ടൂർണമെന്‍റിൽ കൂത്താട്ടുകുളം പോലീസ് സ്റ്റേഷനിലെ എഎസ്ഐ ഐസിമോൾക്ക് ഡബിൾസിൽ വെങ്കലം. ഐസിമോളുടെ വിജയത്തെ ജില്ലാ പോലീസ് മേധാവി ഡോ. വൈഭവ് സക്സേന അഭിനന്ദിച്ചു. കൊച്ചി സിറ്റിയിലെ ലിസി മത്തായിയുമായി ചേർന്നുള്ള പോരാട്ടത്തിലാണ് മെഡൽ നേടിയത്. 45 പ്ലസിൽ എറണാകുളത്തായിരുന്നു മത്സരം. ഇന്ത്യയിൽ നിന്ന് ഈ ഇനത്തിൽ പതിനഞ്ച് ടീമുകളാണ് ഉണ്ടായിരുന്നത്. കഴിഞ്ഞ ദേശീയ മീറ്റിൽ ഇരട്ട വെങ്കലം ഐസിമോൾ നേടിയിരുന്നു.

ഹൈമാസ്റ്റ് ലൈറ്റ് സ്വിച്ച് ഓൺ ചെയ്തു

കളമശേരി : കളമശേരി എംഎൽഎ, പി. രാജീവിന്‍റെ പ്രാദേശിക വികസന ഫണ്ടിൽ നിന്ന് അനുവദിച്ച തുക ഉപയോഗിച്ച് കളമശേരി നഗരസഭ മുപ്പത്തി ഒന്നാം വാർഡിൽ പത്തടിപ്പാലത്ത് സ്ഥാപിച്ച ഹൈമാസ്റ്റ് ലൈറ്റിന്‍റെ സ്വിച്ച് ഓൺ കർമം മന്ത്രിപി. രാജീവ് നിർവഹിച്ചു. നഗരസഭ ചെയർപേഴ്‌സൺ സീമകണ്ണൻ അധ്യക്ഷത വഹിച്ചു. കൗൺസിലർ കെ.ടി. മനോജ് സ്വാഗതവും, ഹെൽത്ത് സ്റ്റാൻഡിംഗ് കമ്മിറ്റി ചെയർമാർ എ.കെ. നിഷാദ് നന്ദി പറഞ്ഞു.

മൊബൈൽ മോഷ്ടാവ് അറസ്റ്റിൽ

പെരുമ്പാവൂർ: മൊബൈൽ മോഷ്ടാവ് അറസ്റ്റിൽ. തോപ്പുംപടി കരുവേലിപ്പടി തുണ്ടത്തിൽപ്പറമ്പ് വീട്ടിൽ നൗഷാദി(49) നെയാണ് പെരുമ്പാവൂർ പോലീസ് അറസ്റ്റ് ചെയ്തത്. പെരുമ്പാവൂരിലെ ഒരു ഹോട്ടലിൽ ക്യാഷ് കൗണ്ടറിന്‍റെ മേശപ്പുറത്തിരുന്ന 35,000 രൂപ വിലയുള്ള ഫോണാണ് മോഷ്ടിച്ചത്. ഇൻസ്പെക്ടർ ടി.എം. സൂഫിയുടെ നേതൃത്വത്തിലുള്ള സംഘമാണ് അന്വേഷണം നടത്തിയത്.

കനിവ് നറുക്കെടുപ്പ്; സമ്മാനങ്ങൾ നൽകി

നെടുമ്പാശേരി: കനിവ് പെയിൻ ആൻഡ് പാലിയേറ്റീവ് കെയർ, നെടുമ്പാശേരി ചാരിറ്റബിൾ സൊസൈറ്റിയുടെ ധനശേഖരണർഥം സംഘടിപ്പിച്ച സമ്മാനക്കൂപ്പൺ നറുക്കെടുപ്പിൽ വിജയികൾക്ക് സമ്മാനങ്ങൾ വിതരണം നടത്തി. പറമ്പയത്തു സർവീസ് സഹകരബാങ്ക് ഓഡിറ്റോറിയത്തിൽ നടന്ന ചടങ്ങിൽ ഒന്നാം സമ്മാനം ലഭിച്ച അബൂബക്കറിന് ഒരു പവൻ സ്വർണനാണയം നൽകികൊണ്ട് മുൻമന്ത്രി എസ്. ശർമ ഉദ്ഘാടനം നിർവഹിച്ചു. ബ്ലോക്ക്‌ പഞ്ചായത്ത് പ്രസിഡന്‍റ് ടി.വി. പ്രദീഷ്, ചെങ്ങമനാട് പഞ്ചായത്ത്‌ പ്രസിഡന്‍റ് ജയ മുരളീധരൻ, സിപിഎം ഏരിയ സെക്രട്ടറി ഏ.പി. ഉദയകുമാർ, ബാങ്ക് പ്രസിഡന്‍റ് എം.കെ. അസിസ്, സി.എ. ഗീത, എന്നിവർ സംസാരിച്ചു. കനിവ് പ്രസിഡന്‍റ് പി.ആർ. രാജേഷ് അധ്യക്ഷനായിരുന്നു. സെക്രട്ടറി കെ.ജെ. ഐസക്, ട്രഷറർ ടി.ആർ. ദീപു എന്നിവർ സംസാരിച്ചു.

ലഹരിക്കെതിരെ സ്ക്വാഡുകൾ രൂപീകരിച്ച് തൃക്കാക്കര നഗരസഭ

കാക്കനാട്: ഐടിമേഖലയും അതിഥിതൊഴിലാളികളുടെ വാസസ്ഥലങ്ങളും ഉൾപ്പെടെയുള്ളമേഖലകൾ കേന്ദ്രീകരിച്ചുള്ള ലഹരി വ്യാപനം തടയാൻ നിരീക്ഷണ സ്‌ക്വാഡുകൾ രൂപീകരിക്കാൻ തൃക്കാക്കര നഗരസഭാ കൗൺസിലിൽ തീരുമാനം. പോലീസിനെയും എക്സൈസിനെയും ഇതര അന്വേഷണ ഏജൻസികളെയും ലഹരിക്കെതിരെ യുള്ള പ്രവർത്തനങ്ങളിൽ സഹായിക്കാനാകും വിധമുള്ള സ്ക്വാഡുകളാകും രൂപീകരിക്കുക. ഇതുമായി ബന്ധപ്പെട്ടു നഗരസഭ വിദ്യാഭ്യാസ-സാംസ്ക‌ാരിക സ്‌ഥിര സമിതി തയ്യാറാക്കിയ മാർഗ നിർദേശങ്ങൾ നഗരസഭ കൗൺസിൽ അംഗീകരിച്ചു. കൗൺസിലർമാരുടെ മേൽനോട്ടത്തിലാകും ഓരോ കേന്ദ്രങ്ങളിലേയും നിരീക്ഷണ സ്ക്വാഡുകളുടെ പ്രവർത്തനമെന്നു നഗരസഭാധ്യക്ഷ രാധാമണി പിള്ളയും വിദ്യാഭ്യാസ സ്‌ഥിരം സമിതി ചെയർമാൻ നൗഷാദ് പല്ലച്ചിയും അറിയിച്ചു. ഐടി പാർക്കുകൾ, വിദ്യാഭ്യാസസ്‌ഥാപനങ്ങൾ, ടർഫുകൾ, ജിംനേഷ്യം, അതിഥി തൊഴിലാളി ക്യാന്പുകൾ, കച്ചവട കേന്ദ്രങ്ങൾ, രാത്രികാലങ്ങളിൽസഞ്ചാരത്തിരക്കുള്ള മേഖലകൾ എന്നിവിടങ്ങളിൽ നിരീക്ഷണം ഏർപ്പെടുത്തും. പുതിയ അധ്യയനവർഷാരംഭം മുതൽ നഗരസഭാ പരിധിയിലെ സ്‌കൂൾ, കോളജ് പരിസരങ്ങളിൽ നിരീക്ഷണം തുടങ്ങും. അസ്വഭാവിക ആൾക്കൂട്ടങ്ങളെ പ്രത്യേകം നിരീക്ഷിക്കും. റസിഡന്‍റ്സ് അസോസിയേഷനുകൾ ഉൾപ്പെടെയുള്ള സംഘടനകളുടെ സഹകരണവും ഇക്കാര്യത്തിൽ ഉറപ്പാക്കുമെന്ന് നൗഷാദ് പല്ലച്ചി പറഞ്ഞു. അതേസമയം തൃക്കാക്കര പോലീസ് ഇൻസ്പെക്ടർ എ.കെ. സുധീറിന്‍റെ നേതൃത്വത്തിൽ ലഹരി സംഘങ്ങൾക്കെതിരെയുള്ള നിരീക്ഷണവും നടപടിയും പരിശോധനകളും ശക്തമാക്കിയതോടെ ലഹരി വില്പനക്കാരും ഇരകളുമടങ്ങുന്ന രാത്രികാല സംഘങ്ങളുടെ കൂടിച്ചേരലുകൾക്ക് അയവു വന്നിട്ടുണ്ട്.

തൊഴിൽമേളയും സെമിനാറും 21ന്

തൃപ്പൂണിത്തുറ: മഹാത്മ ഗ്രന്ഥശാല, കേരള സ്റ്റേറ്റ് സർവീസ് പെൻഷനേഴ്സ് യൂണിയൻ എന്നിവയുടെ ആഭിമുഖ്യത്തിൽ 21ന് മഹാത്മാ ഗ്രന്ഥശാലയിൽ തൊഴിൽ മേളയും സെമിനാറും നടക്കും. വൈകിട്ട് 4.30 മുതൽ എസ്.ബി.ഐ ലൈഫ് നടത്തുന്ന തൊഴിൽ മേള. 6.15ന് വയോജനങ്ങളും മാനസികാരോഗ്യവും എന്ന വിഷയത്തിൽ ആരോഗ്യ വിദഗ്ധനും റിട്ട. സർക്കാർ സിവിൽ സർജനുമായ ഡോ. തോമസ് ജോൺ ക്ലാസ് നയിക്കും.

വൈപ്പിൻ ബ്ലോക്കിലെ ചുറ്റുമതിൽ വിവാദം : വിജിലൻസ് സംഘം 22ന് പരിശോധനയ്ക്കെത്തും

വൈപ്പിൻ: വൈപ്പിൻ ബ്ലോക്ക് പഞ്ചായത്ത് ഓഫീസിനു പുതിയ ചുറ്റുമതിൽ കെട്ടിയപ്പോൾ ഭൂമി നഷ്ടപ്പെട്ടെന്ന് ആരോപിച്ച് പ്രതിപക്ഷം നൽകിയ പരാതിയിൽ 22ന് വിജിലൻസ് സംഘം നേരിട്ടെത്തി സ്ഥല പരിശോധന നടത്തും. പരാതിക്കാരെ വിളിപ്പിച്ച് വിശദാംശങ്ങൾ ശേഖരിക്കുകയും ചെയ്യും. പരാതി നൽകിയ പ്രതിപക്ഷ അംഗങ്ങൾക്ക് ഇതു സംബന്ധിച്ച് വിജിലൻസിൽ നിന്നും അറിയിപ്പ് ലഭിച്ചിട്ടുണ്ട്. കൃത്യമായ അതിർത്തി നോക്കാതെ മതിൽ നിർമിച്ചതിനെ തുടർന്ന് ബ്ലോക്ക് പഞ്ചായത്തിന്‍റെ ഒന്നര മുതൽ രണ്ട് സെന്‍റ് വരെ സ്ഥലം സ്വകാര്യ വ്യക്തിയുടെ കോമ്പൗണ്ടിലായെന്നാണ് പ്രതിപക്ഷമായ കോൺഗ്രസിന്‍റെ ആരോപണം. ഇക്കാര്യം ചൂണ്ടിക്കാട്ടി ബ്ലോക്ക് പ്രസിഡന്‍റിനും സെക്രട്ടറിക്കും നിവേദനം നൽകിയെങ്കിലും നടപടിയില്ലാതെ വന്ന സാഹചര്യത്തിലാണ് പ്രതിപക്ഷ മെമ്പർമാരായ അഗസ്റ്റിൻ മണ്ടോത്ത്, പി.എൻ. തങ്കരാജ്, ഷീൽഡ് റിബറോ, ട്രീസ ക്ലീറ്റസ് എന്നിവർ ചേർന്ന് വിജിലൻസിനു പരാതി നൽകുകയായിരുന്നു.

ഫയർ മോക്ഡ്രില്ലും സുരക്ഷാ ബോധവത്കരണവുമായി സിവിൽ ഡിഫൻസ്

കാക്കനാട്: ദുരന്തമുഖങ്ങളിലെഅടിയന്തിര സാഹചര്യങ്ങളെ നേരിടാനുള്ള പരിശീലനത്തിന്‍റെ ഭാഗമായി അഗ്‌നി രക്ഷാ സേനയും സിവിൽ ഡിഫൻസും സംയുക്തമായി തൃക്കാക്കര നഗരസഭാ ഓപ്പൺ എയർ സ്റ്റേജിനു സമീപം ഇന്നലെ നടത്തിയ മോക്ഡ്രിൽശ്രദ്ധേയമായി. തുടർന്ന് നടത്തിയ ബോധവൽക്കണ ക്ലാസുകേൾക്കാനും ധാരാളം പേരെത്തി. ഓർക്കാപ്പുറത്തുണ്ടാവുന്ന അപകടങ്ങൾ, അഗ്നിബാധ എന്നിവയൊക്കെ എങ്ങനെനേരിടണമെന്ന് അറിയാത്തതുമൂലംഅപകടത്തിന്‍റെ വ്യാപ്തി പലപ്പോഴും കൂടാറുണ്ട്. ഇത്തരം സാഹചര്യങ്ങളെ ധൈര്യപൂർവം നേരിടാമെന്ന് തൃക്കാക്കര സിവിൽ ഡിഫൻസിന്‍റെ നേതൃത്വത്തിൽ നടന്ന ഫയർ മോക്ഡ്രിൽ പ്രയോജനപ്പെട്ടു. കനത്ത ചൂടിൽ പ്ലാസ്റ്റിക് ഉൾപ്പടെയുള്ള അജൈവ മാലിന്യങ്ങളിൽ അഗ്നിബാധ ഉണ്ടായാൽ അടിയന്തിരമായി ഇടപെടേണ്ട രീതികളായിരുന്നു മോക്ഡ്രില്ലിലൂടെ ഇന്നലെ അവതരിപ്പിച്ചത്. തൃക്കാക്കര ഫയർ ഓഫീസറും സിവിൽ ഡിഫൻസ് കോ ഓർഡിനേറ്ററുമായ എം.പി. നിസാമിന്‍റെ നേതൃത്വത്തിലാണ് പ്രത്യേക പരിശീലനം നൽകിയത്. നിമ ഗോപിനാഥ്, സിജു ടി. ബാബു, പി.എം. മാഹിൻകുട്ടി തുടങ്ങിയവർ നേതൃത്വം നൽകി.

കരുമാലൂർ ഖാദി ഉത്പാദന കേന്ദ്രത്തിന് പുതിയ കെട്ടിടം; മന്ത്രി പി. രാജീവ് തറക്കല്ലിട്ടു

കരുമാലൂർ: കേരള ഖാദി ഗ്രാമ വ്യവസായ ബോര്‍ഡിന്‍റെ കരുമാല്ലൂർ ഉത്പാദന കേന്ദ്രത്തിനായി നിർമിക്കുന്ന പുതിയ കെട്ടിടത്തിന്‍റെ നിർമാണത്തിന് തുടക്കമായി. ഒരു കോടി രൂപ ചെലവഴിച്ച് നിർമിക്കുന്ന മാഞ്ഞാലിയിലെ കെട്ടിടത്തിന്‍റെ ശിലാസ്ഥാപനം വ്യവസായ മന്ത്രി പി. രാജീവ് നിർവഹിച്ചു. കളമശേരി മണ്ഡലത്തിൽ ഖാദി ബോർഡിന് രണ്ട് ഉത്പാദന കേന്ദ്രങ്ങളാണ് ഉള്ളത്; കുന്നുകരയും, കരുമാല്ലൂരും. സ്പിന്നിംഗിലും വീവിംഗിലും ഡൈയിംഗിലുമായി 40 തൊഴിലാളികള്‍ കരുമാല്ലൂർ കേന്ദ്രത്തിൽ ജോലി ചെയ്യുന്നുണ്ട്. കൂടുതല്‍ തൊഴിലാളികള്‍ക്ക് ജോലി നല്‍കാൻ ലക്ഷ്യമിട്ടാണ് പുതിയ കെട്ടിടം നിർമിക്കുന്നത്. 100 പേരെയെങ്കിലും ഉള്‍പ്പെടുത്തി വിപുലമായ യൂണിറ്റാണ് കരുമാല്ലൂരില്‍ വിഭാവനം ചെയ്യുന്നത്. പുതിയ കെട്ടിടത്തിൽ ഗ്രാമവ്യവസായ യൂണിറ്റുകള്‍ക്ക് കോമണ്‍ ഫെസിലിറ്റി സെന്‍ററായി ഉപയോഗിക്കാനുള്ള സൗകര്യവും ഏർപ്പെടുത്തും. പ്രാദേശിക ഉത്പന്നങ്ങള്‍ക്ക് പാക്കിംഗ് ജോലികള്‍ ചെയ്യാന്‍ കഴിയത്തക്കവിധം ക്രമീകരണവും ഏർപ്പെടുത്തും. കുന്നുകര ഉത്പാദന കേന്ദ്രത്തിൽ സ്പിന്നിംഗ് ആൻഡ് വീവിംഗില്‍ 18 തൊഴിലാളികളും റെഡിമെയ്ഡ് ഗാര്‍മെന്‍റ് യൂണിറ്റില്‍ ഏഴ് തൊഴിലാളികളും പ്രവര്‍ത്തിക്കുന്നു. പാപ്പിലിയോ എന്ന ബ്രാന്‍ഡിലാണ് ഇവിടെ റെഡിമെയ്ഡ് ഗാര്‍മെന്‍റുകള്‍ ഉല്പാദിപ്പിക്കുന്നത്. കരുമാലൂര്‍ പഞ്ചായത്ത് ഷെഡ്യൂള്‍‍ഡ് ട്രൈബ് വില്ലേജ് ഇന്‍ഡസ്ട്രീസ് കോ ഓപ്പറേറ്റീവ് സൊസൈറ്റി പുന:രുദ്ധരിച്ച് പ്രവര്‍ത്തന സജ്ജമാക്കുന്നതിനുള്ള നടപടിയും സ്വീകരിച്ചു വരികയാണെന്ന് മന്ത്രി പി.രാജീവ് പറഞ്ഞു. പരമ്പരാഗത അറിവുകള്‍ ഉപയോഗിച്ച് നിർമിക്കുന്ന പ്രകൃതിദത്ത ഉത്പങ്ങള്‍ പായ്ക്ക് ചെയ്ത് വിപണനം ചെയ്യുന്നതിനുളള നടപടികളും പുരോഗമിക്കുകയാണ്. സൊസൈറ്റിയുടെ കെട്ടിടത്തില്‍ ഒരു 'വർക്ക് നിയർ ഹോം' സംവിധാനവും തുടങ്ങും.

പെരിയാറിൽ യുവാവ് മുങ്ങി മരിച്ചു

കോതമംഗലം: പെരിയാറിൽ സുഹൃത്തുക്കളുമൊത്ത് കുളിക്കുന്നതിനിടെ യുവാവ് മുങ്ങി മരിച്ചു. പുന്നേക്കാട് കൃഷ്ണപുരം കോലഞ്ചേരിയിൽ അമ്മിണിയുടെ മകൻ അജയ് മാത്യു(42)വാണ് മരിച്ചത്. കീരംപാറ പഞ്ചായത്തിലെ കൂരിക്കുളം കടവിന് സമീപം ഇന്നലെ ഉച്ചയോടെയായിരുന്നു അപകടം. ഉടൻ പുന്നേക്കാട് പ്രാഥമികാരോഗ്യ കേന്ദ്രത്തിലെത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം മൂവാറ്റുപുഴ ജനറൽ ആശുപത്രി മോർച്ചറിയിൽ. കുളിക്കുന്നതിനിടെ ആന്പൽപ്പൂ പറിക്കാൻ ശ്രമിച്ചപ്പോൾ വെള്ളത്തിൽ താഴ്ന്നു പോവുകയായിരുന്നുവെന്നാണ് സുഹൃത്തുക്കൾ പറഞ്ഞത്. ഇവരുടെ മൊഴികളിൽ വൈരുധ്യമുള്ളതിനാൽ പോലീസ് കൂടുതൽ പരിശോധന നടത്തുന്നുണ്ട്. ഇന്ന് പോസ്റ്റുമോർട്ടത്തിനുശേഷം മൃതദേഹം ബന്ധുക്കൾക്ക് വിട്ടുകൊടുക്കും. അവിവാഹിതനാണ്.

ഡി. അപ്പുക്കുട്ടന്‍ നായര്‍ പുരസ്‌കാരം കലാമണ്ഡലം സജിത്ത് വിജയന്

കൊച്ചി: കഥകളി, കൂടിയാട്ടരംഗത്തെ യുവകലാകരന്മാര്‍ക്കായി മൂഴിക്കുളം നേപത്ഥ്യ കൂടിയാട്ട ഗുരുകുലം ഏര്‍പ്പെടുത്തിയ ഡി. അപ്പുക്കുട്ടന്‍ നായര്‍ പുരസ്‌കാരത്തിന് മിഴാവ് കലാകാരന്‍ കലാമണ്ഡലം സജിത്ത് വിജയന്‍ അര്‍ഹനായി. കേരള കലാമണ്ഡലത്തിലെ താത്കാലിക അധ്യാപകനാണ് സജിത്ത്. 10,000 രൂപയും ശില്പവും പ്രശസ്തിപത്രവും അടങ്ങുന്ന പുരസ്‌കാരം മേയ് 23ന് നേപത്ഥ്യയില്‍ നടക്കുന്ന അനുസ്മരണ ചടങ്ങില്‍ സമര്‍പ്പിക്കുമെന്ന് നേപത്ഥ്യ ഡയറക്‌ടര്‍ മാര്‍ഗി മധു അറിയിച്ചു.

അമിതഭാരം: വാഹന ഉടമയ്ക്കും ഡ്രൈവര്‍ക്കും 54,000 രൂപ വീതം പിഴ

കൊച്ചി: അമിതഭാരം കയറ്റിയ വാഹനത്തിന്‍റെ ഉടമയ്ക്കും ഡ്രൈവർക്കും 54,000 രൂപ വീതം പിഴശിക്ഷ. എറണാകുളം ആര്‍ടി എന്‍ഫോഴ്‌സ്‌മെന്‍റ് ഫയൽ ചെയ്ത കേസിലാണ് എറണാകുളം അഡീഷണല്‍ ചീഫ് ജുഡീഷ്യല്‍ മജിസ്‌ട്രേറ്റ് (സ്‌പെഷ്യല്‍ കോര്‍ട്ട് ഫോര്‍ എംപി/എംഎല്‍എ) മേരി ബിന്ദു ഫെര്‍ണാണ്ടസ് പ്രതികള്‍ക്ക് പിഴയിട്ടത്. 2021 ഫെബ്രുവരി 22ന് അസിസ്റ്റന്‍റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍ എം.ബി. ശ്രീകാന്ത് കാലടിയില്‍ നടത്തിയ വാഹന പരിശോധനയ്ക്കിടെയാണ് അമിതഭാരം കയറ്റിവന്ന ടോറസ് കണ്ടെത്തിയത്. 35 ടണ്‍ മാത്രം അനുവദിച്ചിട്ടുള്ള വാഹനത്തില്‍ 52,490 കിലോ ഭാരം കയറ്റിയിരുന്നു. 17 ടണ്‍ അമിതഭാരം കണ്ടെത്തിയതിനെ തുടര്‍ന്ന് 35,500 രൂപ കോമ്പൗണ്ട് ചെയ്യാന്‍ ഇ-ചെല്ലാന്‍ നല്‍കിയിരുന്നു. എന്നാല്‍ വാഹന ഉടമയും ഡ്രൈവറും കോമ്പൗണ്ട് ചെയ്യാന്‍ തയാറല്ലാത്തതിനാല്‍ ആര്‍ടിഒയുടെ നിര്‍ദേശപ്രകാരം എഎംവിഐ ജോബിന്‍ എം.ജേക്കബ് കോടതിയില്‍ കേസ് ഫയല്‍ ചെയ്യുകയായിരുന്നു. വാഹന ഉടമയായ പട്ടിമറ്റം സ്വദേശി ടി.യു. ബെന്നി, ഡ്രൈവര്‍ ഇടുക്കി മഞ്ഞപ്പാറ സ്വദേശി പ്രിന്‍സ് ജോസഫ് എന്നിവര്‍ കോടതിയില്‍ കുറ്റം നിഷേധിച്ചതിനാല്‍ കേസ് വിചാരണയിലേക്ക് നീണ്ടു. മോട്ടോര്‍ വാഹന വകുപ്പിന് വേണ്ടി കോടതിയില്‍ അസിസ്റ്റന്‍റ് പബ്ലിക് പ്രോസിക്യൂട്ടര്‍ സുമി പി. ബേബി ഹാജരായി. കോമ്പൗണ്ടിംഗ് ഫീ അടച്ച് തീര്‍പ്പാക്കാത്ത എല്ലാ കേസുകളും കോടതിയില്‍ പ്രോസിക്യൂഷന്‍ നടപടികള്‍ക്കായി സമര്‍പ്പിച്ചിട്ടുണ്ട്. ഹൈക്കോടതിയുടെ ഉത്തരവ് അനുസരിച്ച് ഡ്രൈവിംഗ് ലൈസന്‍സില്‍ അയോഗ്യത കല്‍പ്പിക്കുന്ന നടപടികള്‍, വാഹനത്തിന്‍റെ പെര്‍മിറ്റില്‍ നടപടി എടുക്കുന്നതിനു വേണ്ടിയുള്ള നടപടികള്‍ എന്നിവ നടന്നുവരുന്നതായി ആര്‍ടിഒ കെ.മനോജ് അറിയിച്ചു. നിലവില്‍ കോടതിയില്‍ പ്രോസിക്യൂഷന്‍ നടപടികള്‍ നടക്കുന്ന കേസുകളില്‍ എറണാകുളം ജില്ലാ ലീഗല്‍ സര്‍വീസ് അഥോറിറ്റി നടത്തുന്ന വാരാന്ത്യ അദാലത്ത് പ്രയോജനപ്പെടുത്താവുന്നതാണെന്നും വാഹന ഉടമ അല്ലെങ്കില്‍ ഡ്രൈവര്‍ എന്നിവരില്‍ ആരെങ്കിലും ഒരാള്‍ ഓഫീസില്‍ നേരിട്ട് എത്തിയാല്‍ കോമ്പൗണ്ട് ചെയ്യാന്‍ അവസരം ഉണ്ടായിരിക്കുമെന്നും ആര്‍ടിഒ അറിയിച്ചു.

നിയന്ത്രണംവിട്ട കാർ കടയിലേക്ക് ഇടിച്ചു കയറി

കാലടി: മറ്റൂർ എയർപോർട്ട് റോഡിൽ പിരാരൂരിൽ നിയന്ത്രണം വിട്ട കാർ കടയിലേക്ക് ഇടിച്ച് കയറി. പൊതുപ്രവർത്തകൻ വാവച്ചൻ താടിക്കാരന്‍റെ കടയുടെ മുൻഭാഗത്താണ് കാർ ഇടിച്ചുകയറിയത്. അവിടെ പാർക്ക് ചെയ്ത മൂന്നു ബൈക്കുകൾക്കും സൈക്കിളിനും നാശനഷ്ടം സംഭവിച്ചു. സൈക്കിളിൽ ഉണ്ടായിരുന്നയാളെ ഗുരുതര പരിക്കുകളോടെ സ്വകാര്യ ആശുപത്രിയിൽ പ്രവേശിപ്പിച്ചു. എയർപോർട്ടിൽ നിന്നും കാലടി ഭാഗത്തേക്ക് പോയ കാറാണ് നിയന്ത്രണം വിട്ട് ദിശമാറി കടയിലേക്ക് ഇടിച്ചുകയറിയത്. കടയ്ക്ക് ഭാഗികമായി കേടുപാട് സംഭവിച്ചു. ഡൈവർ ഉറങ്ങിപ്പോയതാണ് കാരണം. ഇന്നലെ വൈകിട്ട് അഞ്ചിനാണ് സംഭവം.

ഉദയംപേരൂരിൽ പഴകിയ മത്സ്യം പിടിച്ചെടുത്തു

ഉദയംപേരൂർ: മത്സ്യ വില്പനശാലയിൽ നിന്നും പഴകിയ മത്സ്യങ്ങൾ പിടിച്ചെടുത്ത് നശിപ്പിച്ചു. ഉദയംപേരൂർ 5-ാം വാർഡിലെ വൈപ്പിൻ പച്ചമീൻ കട എന്ന സ്ഥാപനത്തിൽ പഞ്ചായത്ത് ആരോഗ്യ വകുപ്പും ഭക്ഷ്യസുരക്ഷാ വകുപ്പും സംയുക്തമായി നടത്തിയ പരിശോധനയിലാണ് പഴകിയതും ഭക്ഷ്യയോഗ്യമല്ലാത്തതുമായ മത്സ്യം പിടിച്ചടുത്തത്. സാമ്പിളുകൾ ശേഖരിച്ച് ഭക്ഷ്യസുരക്ഷാ ലാബിൽ പരിശോധനയ്ക്കായി നൽകി. പരിസര ശുചിത്വവും മാലിന്യ സംസ്കരണ സംവിധാനവും ഹെൽത്ത് കാർഡുമില്ലായെന്ന് കണ്ടെത്തിയതിനെ തുടർന്നാണ് പൊതുജനാരോഗ്യ നിയമപ്രകാരം നോട്ടീസ് നൽകി. പബ്ലിക് ഹെൽത്ത് ഓഫീസർ ഡോ. ഐ.കെ. സാവിത്രി, ഭക്ഷ്യസുരക്ഷാ ഓഫീസർ വിമല മാത്യു, ഹെൽത്ത് ഇൻസ്പെക്ടർമാരായ റാഫി ജോസഫ്, സി.ടി. അനുജ എന്നിവർ പരിശോധനയ്ക്ക് നേതൃത്വം നൽകി.

പീഡനക്കേസ് പ്രതി അറസ്റ്റിൽ

തോപ്പുംപടി: കണ്ണമാലി ചെറിയകടവിൽ 18 കാരിയെ പീഡിപ്പിച്ച സംഭവത്തിൽ പ്രതി അറസ്റ്റിൽ. കണ്ണമാലി ചെറിയകടവ് പുളിയാംപിള്ളി വീട്ടിൽ ഫ്രാൻസിസ് സിനുവാണ് (45) അറസ്റ്റിലായത്. കഴിഞ്ഞ മാസം 30 ന് പെൺകുട്ടിക്ക് ദേഹാസ്വാസ്ഥ്യം അനുഭവപ്പെട്ടതിനെ തുടർന്നാണ് കഴിഞ്ഞ രണ്ട് വർഷത്തിലേറേയായി പ്രതി തന്നെ പീഡിപ്പിക്കുന്നുണ്ടെന്ന വിവരം ബന്ധുവായ സ്ത്രീയോട് പറഞ്ഞത്. ഇതേതുടർന്ന് ബന്ധുക്കൾ പോലീസിൽ അറിയിക്കുകയായിരുന്നു. പോലീസ് പെൺകുട്ടിയെ മജിസ്‌ട്രേറ്റിന് മുമ്പിൽ ഹാജരാക്കി രഹസ്യമൊഴി നൽകിയിരുന്നു. പ്രതിക്കെതിരെ പോക്സോ കേസ് ചുമത്തിയാണ് കേസെടുത്തിരിക്കുന്നത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

യുപിഐ ആപ്പ് വഴി കെഎസ്ആര്‍ടിസി ടിക്കറ്റ് : ഉടൻ ജില്ലയിലും

കൊച്ചി: യുപിഐ ആപ്പ് മുഖേന കെഎസ്ആര്‍ടിസിയില്‍ ടിക്കറ്റെടുക്കുന്ന സംവിധാനം വൈകാതെ ജില്ലയിലെത്തും. നിലവില്‍ തൃശൂരില്‍ പുതിയ സംവിധാനത്തിന്‍റെ പരീക്ഷണം നടന്നുവരികയാണ്. ഇത് പൂര്‍ത്തിയാകുന്ന മുറയ്ക്ക് ജില്ലയിലേക്കും വ്യാപിപ്പിക്കും. തിരുവനന്തപുരത്ത് പൈലറ്റ് പദ്ധതിയായി ആരംഭിച്ച സംവിധാനം പിന്നീട് കൊല്ലത്തേക്കും വ്യാപിപ്പിച്ചിരുന്നു. ക്യുആര്‍ കോഡ് സംവിധാനമുള്ള ആന്‍ഡ്രോയ്ഡ് ടിക്കറ്റ് മെഷീന്‍ സ്വകാര്യ കമ്പനിയുടെ സഹകരണത്തോടെ ലഭ്യമാക്കിയാണ് പദ്ധതി. ക്യുആര്‍ കോഡ് സ്‌കാന്‍ ചെയ്ത് ടിക്കറ്റ് കാശ് നല്‍കാം. ഡെബിറ്റ് കാര്‍ഡ് സൗകര്യവും ഉണ്ടാകും. ഇന്‍റര്‍നെറ്റ് സൗകര്യം കുറവുള്ള മലയോരമേഖലകളില്‍ ഓഫ്‌ലൈനായും ക്യുആര്‍ കോഡ് ഉപയോഗിച്ച് ടിക്കറ്റെടുക്കാനാകും. കെഎസ്ആര്‍ടിസി ബസ് എത്തുന്ന സമയം, എവിടെ എത്തി, ഏത് റൂട്ട് എന്നിവ അറിയുന്നതിനായി മുംബൈ ആസ്ഥാനമായി പ്രവര്‍ത്തിക്കുന്ന ചലോ മൊബിലിറ്റി പ്രൈവറ്റ് ലിമിറ്റഡ് കമ്പനി വികസിപ്പിച്ച ആപ്ലിക്കേഷനാണ് ഇതിനായി ഉപയോഗിക്കുക. ഈ കമ്പനി തന്നെയാകും ടിക്കറ്റ് മെഷീനുകള്‍ ലഭ്യമാക്കുന്നത്. നിലവിലുള്ള ടിക്കറ്റ് സംവിധാനവും ഇതിനൊപ്പം ഉണ്ടാകും. ബസില്‍ ജിപിഎസ് സംവിധാനമുള്ളതിനാല്‍ സര്‍വീസിന്‍റെ കൃത്യത, എവിടെ എത്തി തുടങ്ങിയ വിവരങ്ങള്‍ കെഎസ്ആര്‍ടിസി ആസ്ഥാനത്തെ കണ്‍ട്രോള്‍ റൂമിന് നിരീക്ഷിക്കാനാകും. മറ്റ് ഇടങ്ങളിലെപ്പോലെ പരീക്ഷണാടിസ്ഥാനത്തില്‍ തുടങ്ങി വ്യാപകമാക്കാനാണ് നീക്കം.

സ്ലാബിൽ തട്ടി നിയന്ത്രണംവിട്ട സ്കൂട്ടർ ടാങ്കർ ലോറിയിൽ തട്ടി മറിഞ്ഞ് യാത്രക്കാരി മരിച്ചു

കാക്കനാട്: റോഡരികിലെ കോണ്‍ക്രീറ്റ് സ്ലാബിൽ തട്ടി നിയന്ത്രണംവിട്ട സ്കൂട്ടർ, ടാങ്കർ ലോറിയിൽ തട്ടി മറിഞ്ഞ് സ്കൂട്ടറിന്‍റെ പിൻസീറ്റിലിരുന്ന യാത്രക്കാരി മരിച്ചു. നെട്ടൂർ മൂലയിൽതിട്ട ഉണ്ണികൃഷ്ണന്‍റെ ഭാര്യ കെ.വി. മഹേശ്വരി (52) ആണ് മരിച്ചത്. സ്കൂട്ടർ ഓടിച്ചിരുന്ന ഉണ്ണികൃഷ്ണൻ നിസാരപരിക്കുകളോടെ രക്ഷപ്പെട്ടു. ഇന്നലെ രാവിലെ ഒൻപതോടെ ചെന്പുമുക്കിലാണ് അപകടം. തൃക്കാക്കര മുനിസിപ്പൽ സഹകരണ ആശുപത്രിയിലെ ഹൗസ് കീപ്പിംഗ് വിഭാഗത്തിൽ ജീവനക്കാരിയായ മഹേശ്വരി ഭർത്താവിനൊപ്പം യാത്ര ചെയ്യവേ നിരത്തിൽ, ഉയർന്നു നിന്ന കോണ്‍ക്രീറ്റ് സ്ലാബിൽ തട്ടി വാഹനം നിയന്ത്രണം വിട്ട് അതുവഴി വന്ന ടാങ്കർ ലോറിയിൽ തട്ടിയതോടെ റോഡിലേക്ക് തലയടിച്ചുവീഴുകയായിരുന്നു. ഉടൻതന്നെ തൃക്കാക്കര സഹകരണ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. സംസ്കാരം നടത്തി. മക്കൾ: സനൽ, സന്ധ്യ. മരുമക്കൾ: സേവ്യർ, രമ്യ.

ഒരു കിലോ കഞ്ചാവുമായി ആസാം സ്വദേശി പിടിയില്‍

കൊച്ചി: ഇതര സംസ്ഥാനക്കാർക്കിടയിൽ വില്പന നടത്താനെത്തിച്ച കഞ്ചാവുമായി ആസാം സ്വദേശി പിടിയില്‍. മൊഹദ് ഇസാബ് അലി(23)യെ ആണ് പട്രോളിംഗിനിടെ ഇന്‍ഫോപാര്‍ക്ക് പോലീസ് അറസ്റ്റ് ചെയ്തത്. ഇയാളുടെ പക്കല്‍നിന്നും 1.045 കിലോ കഞ്ചാവ് പിടിച്ചെടുത്തു. കാക്കനാട് ഭാഗത്തുള്ള ഇതര സംസ്ഥാനക്കാർക്കിടയിൽ വില്പന നടത്താനാണ് കഞ്ചാവ് എത്തിച്ചതെന്ന് പ്രതി പോലീസിനോടു പറഞ്ഞു.

വീട്ടിൽ ചാരായം സൂക്ഷിച്ചയാൾ അറസ്റ്റിൽ

പറവൂർ: വീട്ടിൽ ചാരായം സൂക്ഷിച്ച കേസിൽ മധ്യവയസ്കൻ അറസ്റ്റിൽ. കെടാമംഗലം വലിയപറമ്പിൽ രാജീവിനെ(54)യാണ് എക്സൈസ് സംഘം പിടികൂടിയത്. അഞ്ചര ലിറ്റർ ചാരായം ഇവിടെനിന്നും കണ്ടെടുത്തു. വിഷു-ഈസ്‌റ്റർ ആഘോഷങ്ങൾ പ്രമാണിച്ചാണ് ഇയാൾ ചാരായം വാറ്റിയതെന്നും സ്വന്തം ഉപയോഗത്തിനായി ഇയാൾ ചാരായം വാറ്റുന്നതു പതിവായിരുന്നെന്നും എക്സൈസ് അധികൃതർ പറഞ്ഞു. പെയിന്‍റിംഗ് തൊഴിലാളിയായ രാജീവിനെ രഹസ്യവിവരത്തിന്‍റെ അടിസ്ഥാനത്തിൽ എക്സൈസ് സർക്കിൾ ഇൻസ്പെക്‌ടർ എം.ഒ. വിനോദിന്‍റെ നേതൃത്വത്തിലാണ് പിടികൂടിയത്. കോടതിയിൽ ഹാജരാക്കി റിമാൻഡ് ചെയ്തു.

ഹെറോയിനും കഞ്ചാവുമായി മൂന്ന് ഇതര സംസ്ഥാനക്കാർ പിടിയിൽ

പെരുമ്പാവൂർ: ഹെറോയിനും കഞ്ചാവുമായി മൂന്ന് ഇതര സംസ്ഥാനക്കാർ എക്‌സൈസ് പിടിയിൽ. ആസാം സ്വദേശികളായ ഷറിഫുൾ ഇസ്‌ലാം (25), ഹബീബുർ റഹ്‌മാൻ (25) എന്നിവരെ പെരുമ്പാവൂർ മീൻ മാർക്കറ്റിന് സമീപത്തുനിന്നുമാണ് ഹെറോയിനുമായി പിടികൂടിയത്. ഷറിഫുൾ ഇസ്‌ലാമിന്‍റെ പക്കൽ നിന്നും 2.50 ഗ്രാം ഹെറോയിനും, ഹബീബുർന്‍റെ പക്കൽ നിന്നും 1.50 ഗ്രാം ഹെറോയിനും കണ്ടെടുത്തു. പെരുമ്പാവൂർ കാളച്ചന്തയ്ക്കു സമീപത്തുനിന്നും കഞ്ചാവുമായി ആസാം സ്വദേശി അബുൽ കാസിം (45)നെയും പിടികൂടി. ഇയാളുടെ പക്കൽ നിന്നും 15 ഗ്രാം കഞ്ചാവ് പിടികൂടി.

വിദേശജോലി വാഗ്ദാനം; ലക്ഷങ്ങൾ തട്ടിയ‌ പ്രതി പിടിയിൽ

മുളന്തുരുത്തി: വിദേശത്തുള്ള തൊഴിലവസരങ്ങളുടെ പേരിൽ പലരിൽ നിന്ന് ലക്ഷക്കണക്കിന് രൂപ തട്ടിയ പ്രതിയെ മുളന്തുരുത്തി പോലീസ് അറസ്റ്റ് ചെയ്തു. നോർത്ത് പറവൂർ സ്വദേശി കോട്ടുവള്ളി വീട്ടിൽ രാഹുൽ രാജു (32) ആണ് പിടിയിലായത്. പാലക്കാടുള്ള സുഹൃത്തിന്‍റെ വീട്ടിൽ നിന്ന് സാഹസികമായാണ് പ്രതിയെ പിടികൂടിയത്. പോളണ്ടിൽ ജോലി വാഗ്ദാനം ചെയ്ത് ആരക്കുന്നം സ്വദേശികളായ വിഷ്ണു പ്രകാശ്, വിഷ്ണുവിന്‍റെ സുഹൃത്തായ നിഥിൻ ചന്ദ്രൻ എന്നിവരിൽ നിന്ന് നാലര ലക്ഷത്തിലധികം രൂപ പലപ്പോഴായി കൈപ്പറ്റുകയായിരുന്നു. നിരവധി കേസുകളിൽ പ്രതിയാണ് രാഹുൽ രാജെന്നും പലരിൽ നിന്നായി പ്രതി ലക്ഷങ്ങൾ തട്ടിയെടുത്തുന്നുവെന്നും പോലീസ് പറയുന്നു. ഇയാളുടെ പേരിൽ നോർത്ത് പറവൂർ പോലീസ് സ്റ്റേഷനിലടക്കം നിരവധി സ്റ്റേഷനുകളിൽ തട്ടിപ്പ് കേസ് നിലവിലുണ്ടെന്ന് മുളന്തുരുത്തി എസ്എച്ച്ഒ മനേഷ് പൗലോസ് പറഞ്ഞു. തട്ടിപ്പ് നടത്തിയ പ്രതി ആർഭാട ജീവിതം നയിക്കുന്നതിന്‍റെ ഭാഗമായി ബംഗളൂരു, പാലക്കാട് എന്നിവിടങ്ങളിൽ വാടകയ്ക്ക് താമസിക്കുകയാണ് പതിവ്. നിരന്തരമായ അന്വേഷണത്തെ തുടർന്ന് പാലക്കാടുള്ള സുഹൃത്തിന്‍റെ വീട്ടിൽ ഒളിവിലുണ്ടെന്നറിഞ്ഞതിനെ തുടർന്ന് പ്രത്യേക അന്വേഷണത്തിനൊടുവിലാണ് അറസ്റ്റ്. കസ്റ്റഡിയിലെടുത്ത പ്രതിയെ കോടതിയിൽ ഹാജരാക്കി റിമാൻഡ് ചെയ്തു. എസ്.ഐ പ്രിൻസി ആർ, സിപിഒമാരായ ജയകുമാർ, റെജിൻപ്രസാദ് എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്.

ദേവാലയങ്ങളിൽ പെസഹാ ആചരണം

കൊച്ചി: ക്രിസ്തു വിശുദ്ധ കുർബാന സ്ഥാപിച്ചതിന്‍റെയും അന്ത്യ അത്താഴത്തിന്‍റെയും സ്മരണയിൽ ക്രൈസ്തവർ ഇന്നു പെസഹാ ആചരിക്കും. ദേവാലയങ്ങളിൽ കാൽകഴുകൽ ശുശ്രൂഷ, ആഘോഷമായ ദിവ്യബലി, ദിവ്യകാരുണ്യ ആരാധന എന്നിവയുണ്ടാകും. കാക്കനാട് സെന്‍റ് ഫ്രാന്‍സിസ് അസീസി പള്ളിയിൽ ഇന്നു രാവിലെ 6.30ന് ആരംഭിക്കുന്ന പെസഹാ ശുശ്രൂഷകളില്‍ സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ മുഖ്യകാര്‍മികത്വം വഹിക്കും. കർദിനാൾ മാർ ജോർജ് ആലഞ്ചേരി ഇടുക്കി തങ്കമണി സെന്‍റ് തോമസ് ഫൊറോന പള്ളിയിലെ പെസഹാ ശുശ്രൂഷകളിൽ കാർമികനാകും. എറണാകുളം സെന്‍റ് ഫ്രാന്‍സിസ് അസീസി കത്തീഡ്രലില്‍ പെസഹാ ശുശ്രൂഷകൾ വൈകുന്നേരം അഞ്ചിനാണ് ആരംഭിക്കുക. ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ കാർമികനാകും. ഫോർട്ട്കൊച്ചി സാന്താക്രൂസ് ബസിലിക്കയിൽ രാവിലെ ആറിന് പെസഹാ ശുശ്രൂഷകൾ ആരംഭിക്കും. യാക്കോബായ സഭ ശ്രേഷ്ഠ കാതോലിക്ക ബസേലിയോസ് മാർ ജോസഫ് ബാവയുടെ മുഖ്യകാർമികത്വത്തിൽ തിരുവാങ്കുളം കൃംതാ സെന്‍റ് ജോർജ് കത്തീഡ്രലിൽ ഇന്നലെ വൈകുന്നേരം പെസഹാ ശുശ്രൂഷകൾ നടന്നു. കോതമംഗലം വിശുദ്ധ മര്‍ത്തമറിയം യാക്കോബായ സുറിയാനി കത്തീഡ്രല്‍ വലിയ പള്ളിയില്‍ ഇന്ന് വൈകുന്നേരം നാലിനു ശ്രേഷ്ഠ കാതോലിക്കയുടെ കാര്‍മികത്വത്തില്‍ കാല്‍കഴുകല്‍ ശുശ്രൂഷ ഉണ്ടായിരിക്കും.

രാജപാത കേസ് : ‘ജനകീയ പ്രക്ഷോഭത്തിന് മുന്നില്‍ സര്‍ക്കാര്‍ പരാജയപ്പെട്ടു’

കോതമംഗലം : ആലുവ മൂന്നാര്‍ രാജപാതയിലൂടെ നടത്തിയ ജനമുന്നേറ്റ സമരത്തിന് നേതൃത്വം നല്‍കിയതിന്‍റെ പേരില്‍ ബിഷപ് മാര്‍ ജോര്‍ജ് പുന്നക്കോട്ടിലിനും മറ്റുള്ളവര്‍ക്കും എതിരെ എടുത്ത കേസ് പിന്‍വലിച്ച് സര്‍ക്കാര്‍ പരാജയം സമ്മതിച്ചെന്ന് യുഡിഎഫ് ജില്ലാ കണ്‍വീനര്‍ ഷിബു തെക്കുംപുറം. വര്‍ഷങ്ങള്‍ക്കു മുന്നേ താന്‍ നടന്നുപോയ വഴി പൊതുസഞ്ചാരത്തിന് തുറന്നു ലഭിക്കുന്നതിന് വേണ്ടി നടത്തിയ സമരത്തില്‍ ജനപ്രതിനിധികള്‍ക്കും മറ്റു ജനനേതാക്കള്‍ക്കും ഒപ്പം ബിഷപ്പും പങ്കാളിയായതിന് വനംവകുപ്പ് കള്ളക്കേസ് എടുക്കുകയായിരുന്നു. വനം വകുപ്പ് കേസെടുത്തതിനെ തുടര്‍ന്ന് കത്തോലിക്കാ സഭയും വിവിധ രാഷ്ട്രീയകക്ഷികളും നിരന്തരമായി നടത്തിയ സമരത്തിന്‍റെ ഫലമാണ് കേസ് പിന്‍വലിക്കാന്‍ സര്‍ക്കാര്‍ നിര്‍ബന്ധിതരായത്. ആലുവ മൂന്നാര്‍ രാജപാത പിഡബ്ല്യുഡി റോഡാണ്. രാജപാത നാടിനായി തുറന്നു നല്‍കുന്നതുവരെ ശക്തമായ സമരപരിപാടികളുമായി യുഡിഎഫ് മുന്നോട്ട് പോകുമെന്നും അദ്ദേഹം പറഞ്ഞു.

ഫാസിസത്തിനെതിരെ സംസാരിക്കുന്നവരുടെ വായടപ്പിക്കുന്നു: ടി.ജെ. വിനോദ്

കൊച്ചി: ഫാസിസത്തിന് എതിരായി സംസാരിക്കുന്നവരുടെ നാവടപ്പിക്കാനാണ് സര്‍ക്കാരിന്‍റെ അന്വേഷണ ഏജന്‍സികളെ ഉപയോഗപ്പെടുത്തി ബിജെപിയും നരേന്ദ്രമോദിയും ശ്രമിക്കുന്നതെന്ന് ടി.ജെ. വിനോദ് എംഎല്‍എ. എതിരാളികളെ ആക്രമിച്ചും അന്വേഷണ ഏജന്‍സികളെ ഉപയോഗപ്പെടുത്തിയും നിശബ്ദരാക്കുകയുമാണ് രാജ്യത്ത് നടക്കുന്നത്. നാഷണല്‍ ഹെറാള്‍ഡ് കേസില്‍ സോണിയ ഗാന്ധിക്കും രാഹുല്‍ ഗാന്ധിക്കും കോണ്‍ഗ്രസ് പരിപൂര്‍ണ പിന്തുണ നല്‍കിയിട്ടുണ്ടെന്നും എംഎല്‍എ പറഞ്ഞു. രാഷ്ട്രീയ എതിരാളികള്‍ക്കെതിരെ ഇഡി കള്ളക്കേസെടുത്ത് പീഡിപ്പിക്കുന്നുവെന്നാരോപിച്ച് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ നടന്ന എന്‍ഫോഴ്‌സ്‌മെന്‍റ് ഡയറക്ടറേറ്റ്(ഇഡി) ഓഫീസിലേക്ക് നടത്തിയ മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇഡി നടപടിയില്‍ പ്രതിഷേധിച്ച് രാജ്യവ്യാപകമായി കോണ്‍ഗ്രസ് നടത്തിയ പ്രതിഷേധത്തിന്‍റെ ഭാഗമായാണ് കൊച്ചിയില്‍ മാര്‍ച്ച് സംഘടിപ്പിച്ചത്. ഡിസിസി ഓഫീസില്‍ നിന്നാരംഭിച്ച മാര്‍ച്ച് ഇഡി ഓഫീസിന് സമീപം പോലീസ് തടഞ്ഞു. മാര്‍ച്ചിന് നേരെ പോലീസ് ജലപീരങ്കി പ്രയോഗിച്ചു. ഡിസിസി ജനറല്‍ സെക്രട്ടറി അബ്ദുള്‍ ലത്തീഫ് അധ്യക്ഷത വഹിച്ചു. കെ.പി. ധനപാലന്‍, ഡൊമിനിക് പ്രസന്റേഷന്‍, ടോണി ചമ്മിണി, എം.ആര്‍. അഭിലാഷ് തുടങ്ങിയവരും പങ്കെടുത്തു. photo: ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ നടന്ന ഇഡി ഓഫീസ് മാര്‍ച്ചില്‍ ബാരിക്കേഡ് മറികടക്കാന്‍ ശ്രമിച്ച പ്രവര്‍ത്തകരെ പോലീസ് അറസ്റ്റ് ചെയ്തു നീക്കുന്നു.

പഠന ശിബിരം 22 മുതല്‍: രജിസ്‌ട്രേഷന്‍ ആരംഭിച്ചു

കൊച്ചി: പഠനവൈകല്യമുള്ള കുട്ടികള്‍ക്കായി എറണാകുളം പനമ്പിള്ളി നഗറില്‍ പ്രവര്‍ത്തിക്കുന്ന ചൈല്‍ഡ് കെയര്‍ സെന്‍ററിന്‍റെ നേതൃത്വത്തില്‍ 22 മുതല്‍ മേയ് ആറുവരെ പഠന ശിബിരം നടത്തും. പഠനവൈകല്യമുള്ള കുട്ടികളുടെ കഴിവുകള്‍ വികസിപ്പിച്ച് പഠനമികവ് മെച്ചപ്പെടുത്തുകയാണ് പഠന ശിബിരത്തിന്റെ ലക്ഷ്യമെന്ന് ചൈല്‍ഡ് കെയര്‍ സെന്‍റര്‍ എക്‌സിക്യൂട്ടീവ് ഡയറക്ടര്‍ ഡോ. ഏബ്രഹാം പോള്‍ പറഞ്ഞു. ശ്രദ്ധക്കുറവ്, ഓര്‍മക്കുറവ്, വായന, എഴുത്ത്, ഭാഷമനസിലാക്കല്‍, അപഗ്രഥിക്കല്‍, കണക്ക് പഠനത്തിലെ ക്രിയകള്‍ മനസിലാക്കല്‍ എന്നിവയിലാണ് പഠനവൈകല്യമുള്ള കുട്ടികള്‍ സാധാരണ ബുദ്ധിമുട്ട് നേരിടുന്നത്. ഇത്തരം കുറവുകള്‍ പരിഹരിക്കുന്നതിനും പഠനഭാരം കുറയ്ക്കുന്നതിനും പഠനശിബിരം സഹായിക്കും. ഇത്തരം കുട്ടികളെ സഹായിക്കുന്നതിനായി മാതാപിതാക്കള്‍ക്കായുള്ള പേരന്‍റിംഗ് ക്ലാസും കൂടാതെ സംസാര, ഭാഷ ശേഷി മെച്ചപ്പെടുത്താനുള്ള ക്ലാസുകള്‍ കൊച്ചുകുട്ടികള്‍ക്കും പഠനശിബിരത്തില്‍ ഉണ്ടാകുമെന്നും ഡോ. ഏബ്രാഹം കെ. പോള്‍ പറഞ്ഞു. കുട്ടികളിലെ ശ്രവണ, സംസാര, വൈകല്യങ്ങള്‍ പരിശോധിക്കുന്നതിനുള്ള ക്യാമ്പ് മേയ്, ഏഴ്, എട്ട് തിയതികളില്‍ നടക്കും. വിശദ വിവരങ്ങള്‍ക്കും രജിസ്‌ട്രേഷനുമായി 20ന് മുമ്പായി ചൈല്‍ഡ് കെയര്‍ സെന്‍ററുമായി ബന്ധപ്പെടണം. ഫോണ്‍: 04847961167, 9895705080.

എളവൂർ കുന്നേൽ പള്ളിയിൽ കാൻസർ പരിശോധനാ ക്യാമ്പും സെമിനാറും

നെടുമ്പാശേരി : ഏളവൂർ സെന്‍റ് ആന്‍റണീസ് ദേവാലയത്തിന്‍റെ ഒരു വർഷം നീണ്ടുനിൽക്കുന്നസിൽവർ ജൂബിലിയാഘോഷത്തിന്‍റെ ഭാഗമായി എറണാകുളം ലക്‌ഷോർ ഹോസ്പ്പിറ്റലിന്‍റെയും ആത്മജീവൻ ചാരിറ്റബിൾ സൊസൈറ്റിയുടെയും സഹകരണത്തോടെ പാരിഷ് ഹാളിൽ വച്ച് കാൻസർ പരിശോധനാ ക്യാമ്പും സെമിനാറും നടത്തി. കാൻസർ ബോധവത്കരണ സെമിനാറിനോടനുബന്ധിച്ച് സ്ത്രീകളിലെ ഗർഭാശയ കാൻസർ കണ്ട് പിടിക്കുവാൻ സാധിക്കുന്ന പാപ്സ്മിയർ ടെസ്റ്റും സ്തനാർബുദം കണ്ട് പിടിക്കാൻ മാമ്മോഗ്രാഫി ടെസ്റ്റും നടത്തി. ഇരുനൂറോളം സ്ത്രീകൾക്ക് ടെസ്റ്റ് ഗുണകരമായി. മെഡിക്കൽ ക്യാമ്പ് റോജി എം. ജോൺ എംഎൽഎ ഉദ്ഘാടനം ചെയ്തു. വികാരി ഫാ. ജോൺ പൈനുങ്കൽ അധ്യക്ഷത വഹിച്ചു. കാൻസർ രോഗ വിദഗ്ദ്ധ ഡോ. ചിത്രാതാര ഗംഗാധരൻ ക്യാമ്പിന് നേതൃത്വം നൽകി. സഹവികാരി ഫാ. പീറ്റർ ആലക്കാടൻ, ജൂബിലി കമ്മിറ്റി കൺവീനർ ജോർജ് മണവാളൻ, ട്രസ്റ്റിമാരായ കുര്യാക്കോസ് നെല്ലിശേരി , ജോയി നെടുങ്ങാടൻ, വൈസ് ചെയർമാൻ സാന്‍റോ പാനികുളം ,ജോയിന്‍റ് കൺവീനർമാരായ ബേബി ചക്യേത്ത്, സുമ പോളി, ബിജു തോമസ് , അത്മജീവൻ ചാരിറ്റബിൾ സൊസൈറ്റി പ്രസിഡന്‍റ് ജോജോ മനയംമ്പിള്ളി എന്നിവർ പ്രസംഗിച്ചു.

വടക്കേക്കരയിലെ കുടിവെള്ളക്ഷാമം: സിപിഎം ധർണ നടത്തി

പറവൂർ: വടക്കേക്കര പഞ്ചായത്തിലെ രൂക്ഷമായ കുടിവെള്ള ക്ഷാമം പരിഹരിക്കുക, പ്രശ്നം പരിഹരിക്കുന്നതിന് പ്രതിപക്ഷനേതാവ് വി.ഡി. സതീശനും ജല അഥോറിറ്റി ഉദ്യോഗസ്ഥരും കാണിക്കുന്ന അനാസ്ഥ അവസാനിപ്പിക്കുക എന്നീ ആവശ്യങ്ങളുന്നയിച്ച് സിപിഎം വടക്കേക്കര, മൂത്തകുന്നം ലോക്കൽ കമ്മിറ്റികളുടെ നേതൃത്വത്തിൽ പറവൂർ ജല അഥോറിറ്റി ഓഫീസിന് മുന്നിൽ ധർണ നടത്തി. ഏരിയ സെക്രട്ടറി ടി.വി. നിധിൻ ഉദ്ഘാടനം ചെയ്തു. വടക്കേക്കര ലോക്കൽ സെക്രട്ടറി എ.ബി. മനോജ് അധ്യക്ഷനായി. വിഷു ദിനത്തിൽപ്പോലും കുടിവെള്ളമില്ലാതെ വലയുന്ന സാഹചര്യമായിരുന്നെന്നും, മാല്യങ്കര പ്രദേശങ്ങളിൽ ആഴ്ചകളായി കുടിവെള്ളം ലഭിച്ചിട്ടെന്നും സമരക്കാർ ആരോപിച്ചു. ജില്ലാ പഞ്ചായത്തംഗം എ.എസ്. അനിൽകുമാർ, പറവൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.എസ്. സനീഷ്, ഏരിയ കമ്മിറ്റിയംഗം കെ.എം. അംബ്രോസ്, മൂത്തകുന്നം ലോക്കൽ സെക്രട്ടറി പി.ഡി. രാജീവ് എന്നിവർ സംസാരിച്ചു.

ഓഞ്ഞിപ്പുഴയെ വീണ്ടെടുക്കാൻ രാപ്പകൽ സമരം തുടങ്ങി

ആലുവ: പെരിയാറിന്‍റെ കൈവഴിയായ ഓഞ്ഞിപ്പുഴയിലെ 64 കൈയേറ്റങ്ങൾ തിരിച്ചുപിടിക്കണമെന്നാവശ്യപ്പെട്ട് ഓഞ്ഞിത്തോട് സംരക്ഷണ ജനകീയ സമിതിയുടെ നേതൃത്വത്തിൽ രാപ്പകൽ സമരം ആരംഭിച്ചു. കടുങ്ങല്ലൂർ ഗ്രാമപഞ്ചായത്ത് കവലയിൽ സംവിധായകൻ സന്തോഷ് പണ്ഡിറ്റ് രാപ്പകൽ സമരം ഉദ്ഘാടനം ചെയ്തു. സി.ആർ. നീലകണ്ഠൻ, ജസ്റ്റിസ് കെ. സുകുമാരൻ, അഡ്വ. ജയശങ്കർ, പ്രകൃതി പരിസ്ഥിതി പ്രവർത്തകൻ ശ്രീമൻ നാരായണൻ, സുന്ദരം ഗോവിന്ദ് തുടങ്ങിയവർ പ്രസംഗിച്ചു. നാളെ രാവിലെ 11ന് സമാപിക്കും. കടുങ്ങല്ലൂർ, ആലങ്ങാട് പഞ്ചായത്തുകളിലായി ജില്ല കളക്‌റുടെ സ്പെഷൽ സർവേ ടീം കണ്ടെത്തിയ 64 കൈയേറ്റങ്ങൾ തിരിച്ചുപിടിക്കണമെന്നാണ് സമിതിയുടെ പ്രധാന ആവശ്യം. ഓഞ്ഞിത്തോട് സംരക്ഷണ ജനകീയ സമിതിയുടെ ഹർജിയെ തുടർന്നാണ് 2021 ൽ കേരള ഹൈക്കോടതിയുടെ ഇടപെട്ട് സർവെ നിർദേശിച്ചത്.

ഓൺലൈൻ ടാക്സി സർവീസിനെതിരെ മരടിൽ പ്രതിഷേധം

മരട്: ഓൺലൈൻ ടാക്സി സർവീസിനെതിരെ അസംഘടിത തൊഴിലാളി കോൺഗ്രസ് മരട് മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധം. ഫോറം മാളിൽ നിന്ന് സവാരിയെടുക്കുന്ന ഓൺലൈൻ ഓട്ടോ ടാക്സികൾക്കെതിരെയും ഒത്താശ ചെയ്യുന്ന ഉദ്യോഗസ്ഥർക്കെതിരെയും യുഡബ്ലിയുഇസി സംഘടിപ്പിച്ച സമരം മരട് നഗരസഭ ചെയർമാൻ ആന്‍റണി ആശാംപറമ്പിൽ ഉദ്ഘാടനം ചെയ്തു.യുഡബ്ലിയുഇസി മരട് മണ്ഡലം പ്രസിഡന്‍റ് നജീബ് താമരക്കുളം അധ്യക്ഷത വഹിച്ചു. ജിൻസൺ പീറ്റർ, സി.ഇ. വിജയൻ, ആന്‍റണി കളരിക്കൽ, പി.പി.സന്തോഷ്, രാജി സുമേഷ്, ചന്ദ്രകലാധരൻ, സി.പി.ഷാജികുമാർ, സുനിത തെക്കേവീട്ടിൽ, കെ.പി. രമേശൻ തുടങ്ങിയവർ പ്രസംഗിച്ചു.

അശമന്നൂരിൽ ഭരണ-പ്രതിപക്ഷാംഗങ്ങൾ തമ്മിൽ കൈയേറ്റം

പെരുമ്പാവൂർ: അശമന്നൂർ പഞ്ചായത്ത്‌ ഓഫീസിൽ ഭരണപക്ഷ പ്രതിപക്ഷ മെമ്പർമാർ തമ്മിൽ കയ്യാങ്കളിയും വാക്കേറ്റവും. പഞ്ചായത്ത്‌ ഓഫീസിന് മുന്നിലെ കിണറിനോട് ചേർന്ന് മാലിന്യം നിക്ഷേപിച്ചതുമായി ബന്ധപ്പെട്ടാണ് പ്രശ്നങ്ങൾ രൂക്ഷമായത്. പഞ്ചായത്ത് ഓഫീസിന് മുന്നിലെ കക്കൂസ് ടാങ്ക് പൊട്ടി മാലിന്യം കിണറിലേക്ക് ഒഴുകുകയാണ് എന്നും കിണർ വെള്ളം ആശുദ്ധമാണെന്നും അടിയന്തിരമായി കിണർ ശുദ്ധീകരിക്കണമെന്നും പ്രതിപക്ഷ മെമ്പർമാർ ആവശ്യപ്പെട്ടു. ഓടക്കാലി ടൗൺ ക്ലീൻ ചെയ്യുന്ന മാലിന്യങ്ങൾ, ഹരിത കർമ്മ സേന ശേഖരിക്കുന്ന മാലിന്യങ്ങൾ എന്നിവയെല്ലാം പഞ്ചായത്ത്‌ ഓഫീസിന് മുന്നിലെ കിണറിനോട് ചേർന്നാണ് നിക്ഷേപിച്ചത്. മൂന്നാഴ്ച മുമ്പ് ആരോഗ്യ വകുപ്പ് ഉദ്യോഗസ്ഥർ പഞ്ചായത്ത് സെക്രട്ടറിയോട് മാലിന്യങ്ങൾ ഉടൻ നീക്കം ചെയ്യണമെന്നും അല്ലാത്തപക്ഷം ഗുരുതരമായ ആരോഗ്യപ്രശ്നങ്ങൾക്ക് കാരണമാകുമെന്നും മുന്നറിയിപ്പ് നൽകിയിരുന്നു. എന്നാൽ ഒരു നടപടിയും സ്വീകരിക്കാൻ പഞ്ചായത്ത് ഉദ്യോഗസ്ഥർ തയാറായില്ല. പഞ്ചായത്ത് ഉദ്യോഗസ്ഥരെ നിയന്ത്രിക്കാൻ ഭരണ സമിതി ക്ക് കഴിയില്ലെങ്കിൽ രാജിവച്ചു പോകുന്നതാണ് നല്ലതെന്ന് പ്രതിപക്ഷ മെമ്പർമാർ പറഞ്ഞു.കിണറിനോട് ചേർന്നുള്ള മാലിന്യം നീക്കം ചെയ്യാതെ ഞങ്ങൾ പിരിഞ്ഞു പോകില്ലെന്ന് പ്രതിപക്ഷ മെമ്പർമാരായ പി.കെ. ജമാൽ, സുബൈദപരീത്, എൻ.എം. നൗഷാദ്,പി.പി. രഘുകുമാർ എന്നിവർ വാശിപിടിച്ചതോടെ നിർവാഹമില്ലാത്ത സാഹചര്യത്തിൽ പഞ്ചായത്ത് ഉദ്യോഗസ്ഥരും ആരോഗ്യ സ്റ്റാൻഡിംഗ് കമ്മിറ്റി അംഗങ്ങളും ചേർന്ന് മാലിന്യങ്ങൾ നീക്കം ചെയ്തു.

മിസ്റ്റർ എറണാകുളം ഐസക് ഷാജുവിനെ അനുമോദിച്ചു

മഞ്ഞപ്ര : 75 കിലോ കാറ്റഗറി മൽസരത്തിൽ മിസ്റ്റർ എറണാകുളം പട്ടം നേടി സ്വർണമെഡിന് അർഹനായ മഞ്ഞപ്ര തെക്കിനേൻ ഐസക് ഷാജുവിനെ അനുമോദിച്ചു. ഇന്ദിരാ ഗാന്ധി കൾച്ചറൽ ഫോറം മഞ്ഞപ്ര മണ്ഡലം കമ്മിറ്റിയുടെ നേതൃത്വത്തിൽ മുതിർന്ന കോൺഗ്രസ് അംഗം ഐസക്കിന് ഉപഹാരം നൽകി ആദരിച്ചു. കോൺഗ്രസ് ബ്ലോക്ക് ജനറൽ സെക്രട്ടറി ഡേവിസ് മണവാളൻ , യൂത്ത് കോൺഗ്രസ് ബ്ലോക്ക് ജനറൽ സെക്രട്ടറി അലക്സ് ആന്‍റു, ഐഎൻടിയുസി മണ്ഡലം പ്രസിഡന്‍റ് ജോസൺ വി. ആന്‍റണി, നേതാക്കളായ എം.ഇ. സെബാസ്റ്റ്യൻ, ഡേവീസ് ചൂരമന, ജോൺസൺ തിരുതനത്തിൽ എന്നിവർ പ്രസംഗിച്ചു. പണിക്കേഴ്സ് ബോഡി ബിൽഡിംഗ് അസോസിയേഷൻ സംഘടിപ്പിച്ച മൽസരത്തിലാണ് ഐസക്ക് ഷാജു ഗോൾഡ് മെഡലിന് അർഹനായത്. മഞ്ഞപ്ര പഞ്ചായത്ത് ഒൻപതാം വാർഡിൽ പി ആൻഡ് പി കവലക്ക് സമീപം താമസിക്കുന്ന തെക്കിനേൻ വീട്ടിൽ പ്ലാന്‍റേഷൻ കോർപറേഷൻ ഫീൽഡ് എക്സിക്യൂട്ടിവ് ടി.എ. ഷാജുവിന്‍റെയും റീനയുടെയും മകനാണ് ഐസക്ക്.

ഉമ്മൻ ചാണ്ടി പാലിയേറ്റീവ് കെയറിന്‍റെ ഉദ്ഘാടനം നടത്തി

അയ്യമ്പുഴ: ഇന്ദിരാ ഗാന്ധി കൾച്ചറൽ ഫോറം അയ്യമ്പുഴ മണ്ഡലം കമ്മിറ്റിയുടെ നേതൃത്വത്തിൽ ഉമ്മൻ ചാണ്ടി പാലിയേറ്റീവ് കെയറിന്‍റെ ഉദ്ഘാടനം ബെന്നി ബെഹനാൻ എംപി നിർവഹിച്ചു. റോജി എം. ജോൺ എംഎൽഎ പാലിയേറ്റീവ് കെയർ ഉപകരണങ്ങളുടെ വിതരണോദ്‌ഘാടനം നിർവഹിച്ചു. കൾച്ചറൽ ഫോറം പ്രസിഡന്‍റ് അനൂപ് അഗസ്റ്റിൻ അധ്യക്ഷനായിരുന്നു. കൾച്ചറൽ ഫോറം കൺവീനർ വർഗീസ് മാണിക്യത്താൻ, ഷെൽബി ബെന്നി, കെ.പി. ബേബി, കെ.ഒ. വർഗീസ്, വി.പി. ചെറിയാൻ, ബിജു കാവുങ്ങ, ചാക്കോ വർഗീസ്, ചെറിയാൻ തോമസ്, ലൈജു ഈരാളി, പി.ടി. അശോകൻ, സി.ജെ. ഫ്രാൻസിസ്, വാർഡ് മെമ്പർമാരായ ജാൻസി ജോണി, ജയ ഫ്രാൻസിസ് തുടങ്ങിയവർ സംസാരിച്ചു.

കുത്തേറ്റ് യുവാവ് ആശുപത്രിയിൽ

മരട്: കടം വാങ്ങിയ പണം തിരികെ നൽകാൻ വൈകിയതിനെ തുടർന്ന് യുവാവിനെ നാലംഗ സംഘം കത്തിക്ക് കുത്തി പരിക്കേല്പിച്ചതായി പരാതി. ഞാറയ്ക്കൽ പീച്ചുള്ളിൽ വീട്ടിൽ പ്രമോദ് പി.പി (21) നാണ് വിഷു ദിനത്തിൽ രാത്രി കുണ്ടന്നൂർ പാലത്തിനടിയിൽ വച്ച് കുത്തേറ്റത്. രാത്രി 10.45ഓടെ നാലംഗ സംഘം പ്രമോദിനെ തടഞ്ഞുനിർത്തി കത്തികൊണ്ട് നെഞ്ചിലും വാരിയെല്ലിലും കുത്തുകയായിരുന്നുവെന്ന് പറയുന്നു. ഗുരുതര പരിക്കേറ്റ പ്രമോദിനെ കളമശേരി മെഡിക്കൽ കോളജിൽ പ്രവേശിപ്പിച്ചു. മരട് പോലീസ് കേസെടുത്തു.

ഫിസാറ്റിൽ ഏഴുകോടിയുടെ പത്തിലേറെ അന്തർദേശീയ ലാബുകൾക്ക് അനുമതി

അങ്കമാലി: അങ്കമാലി ഫിസാറ്റ് എൻജിനീയറിംഗ് കോളജിൽ പത്തിലേറെ അന്തർദേശീയ ലാബുകൾക്ക് കേന്ദ്രസർക്കാർ അനുമതി. ആപ്പിൾ, എ ഡബ്ല്യൂഎസ്, ഇന്‍റൽ, വിഎൽഎസ്ഐ, ഐബി എം, മാത്ത് വർക്സ്, കേംബ്രിഡ്ജ്, മൈക്രോസോഫ്റ്റ്, ഓട്ടോഡെസ്‌ക്, സ്‌നൈഡർ ഇലക്ട്രിക്ക്, സ്‌നൈഡർ ഹോം ഓട്ടോമേഷൻ ലാബ് തുടങ്ങി പത്തിലേറെ അന്തർദേശിയ ലാബുകൾ തുടങ്ങുന്നതിനാണ് കേന്ദ്രസർക്കാർ അനുമതി നൽകിയിരിക്കുന്നത്. ഡൽഹിയിൽ കേന്ദ്ര നൈപുണ്യ സംഭരംഭകത്വ വികസന മന്ത്രാലയത്തിൽ നടന്ന ചടങ്ങിൽ ഫിസാറ്റ് ചെയർമാൻ പി.ആർ. ഷിമിത്തും നാഷണൽ സ്കിൽ ഡെവലപ്മെന്‍റ് കോർപറേഷൻ ചീഫ് എക്സിക്യൂട്ടീവ് ഓഫീസർ വേദ് തിവാരിയും ധാരണാ പത്രത്തിൽ ഒപ്പുവച്ചു. ക്‌ളാസ് മുറികളിലെ പഠനത്തോടൊപ്പം വ്യവസായിക മേഖലകളിലെ നൂതന സാദ്ധ്യതകൾ തിരിച്ചറിഞ്ഞു ഫിസാറ്റിലെ മുഴുവൻ വിദ്യാർഥികൾക്കും പഠനത്തോടൊപ്പം ഇതു വഴി ഗ്ലോബൽ സർഫിഫിക്കേഷനും ലഭിക്കും. ബിടെക്, എം ടെക്, എം സിഎ, എംബിഎ എന്നീ കോഴ്സുകളിൽ പഠനം പൂർത്തിയാക്കുന്ന വിദ്യാർഥികൾക്ക് ഡിഗ്രിക്ക് പുറമെ അന്തർദേശീയ ലാബുകളിൽ നിന്നുള്ള ഏഴു ഗ്ലോബൽ സർട്ടിഫിക്കേഷൻ പ്രോഗ്രാമുകൾ കൂടി ലഭിക്കും. ഏഴുകോടി രൂപയാണ് കേന്ദ്രസർക്കാർ ഇതിനായി അനുവദിച്ചിരിക്കുന്നത്. കേരളത്തിൽ ആദ്യമായിട്ടാണ് ഒരു എൻജിനീയറിഗ് കോളജിന് പത്തിലേറെ അന്തർദേശീയ ലാബുകൾ അനുവദിക്കുന്നത്. ഈ വർഷം ജൂലൈയോട് കൂടി ലാബുകൾ പ്രവർത്തന ക്ഷമമാകുമെന്ന് ചെയർമാൻ പി.ആർ. ഷിമിത്ത് പറഞ്ഞു. ചടങ്ങിൽ നാഷണൽ സ്കിൽ ഡെവലപ്മെന്‍റ് കോർപറേഷൻ ജനറൽ മാനേജർ വരുൺ ബത്ര, എത്തനോ ടെക് സൊല്യൂഷൻസ് സിഇഓ ഡോ. കിരൺ രാജണ്ണ, എൻഎസ്ഡിസി മാനേജർ സഹിൽ ഗോയൽ, ഫിസാറ്റ് കോളജ് ട്രഷറർ ജെനിബ് ജെ. കാച്ചപ്പിള്ളി, പ്രിൻസിപ്പൽ ഡോ. ജേക്കബ് തോമസ്, ചീഫ് ലെയ്സൺ ഓഫീസർ ഷിന്‍റോ സെബാസ്റ്റ്യൻ തുടങ്ങിയവർ പങ്കെടുത്തു.

സ്കൂട്ടർ യാത്രിക ലോറി തട്ടി മരിക്കാനിടയായ സംഭവം : കെഎംആർഎൽ അധികൃതരുടേത് അനങ്ങാപ്പാറ നയമെന്ന് വ്യാപാരികൾ

ഫുട്പാത്തുകളിലൂടെ ഇരുചക്ര വാഹനങ്ങൾ ചീറിപ്പായുന്നത് നിത്യസംഭവം കോൺക്രീറ്റു പില്ലറുകൾ സ്ഥാപിക്കുമെന്ന് മെട്രോ റെയിൽ അധികൃതർ കാക്കനാട്: ഇന്നലെ ചെമ്പുമുക്കിൽ സ്കൂട്ടർ യാത്രിക ടാങ്കർലോറി മുട്ടി മരിക്കാനിടയായ സംഭവത്തിൽ മെട്രോ റെയിൽ അധികൃതരുടേത് കനത്ത അനാസ്ഥയെന്ന് ഡിവിഷൻ കൗൺസിലർ കെ.എക്സ്. സൈമൺ. ഫുട്പാത്തുകളിൽ കോൺക്രീറ്റു സ്റ്റോപ് പില്ലറുകൾ സ്ഥാപിക്കണമെന്ന് മൂന്ന് മാസം മുൻപ് തന്നെ മെട്രോറെയിൽ അധികൃതരോട് ആവശ്യപ്പെട്ടിരുന്നതായി ഡിക്സൺ പറഞ്ഞു. മെട്രോ റയിൽ രണ്ടാംഘട്ട നിർമാണം മൂലം ആലിൻ ചുവടു മുതൽ കാക്കനാട് കുന്നുംപുറം വരെ രാവിലെയും വൈകുന്നേരങ്ങളിലും കനത്ത ഗതാഗതക്കുരുക്ക് ഉണ്ടാവാറുണ്ട്. തിരക്ക് ഒഴിവാക്കാൻ ഇരു ചക്രവാഹന യാത്രക്കാർ ഫുട്പാത്തുകളിലൂടെ സഞ്ചരിക്കുന്നത് നിത്യകാഴ്ചയാണ്. അപകടത്തിൽപെട്ട സ്കൂട്ടർ യാത്രികരും ഫുട്പാത്തിലൂടെ സഞ്ചരിക്കുന്നതിനിടയിലാണ് അപകടത്തിൽപ്പെട്ടതെന്ന് ദൃക്സാക്ഷികൾ പറയുന്നു. കച്ചവട സ്ഥാപനങ്ങൾക്കു മുന്നിലുള്ള ഫുട്പാത്തിലൂടെ അതിവേഗം ഇരുചക്ര വാഹനങ്ങൾ ചീറി പാഞ്ഞുവരുന്നത് പലപ്പോഴും അപകടകാരണമായിട്ടുണ്ട്. അതേസമയം ഫുട്പാത്തിൽ കോൺക്രീറ്റു പില്ലറുകൾ സ്ഥാപിച്ചിരുന്നെങ്കിൽ അപകടം ഒഴിവാക്കാൻ കഴിയുമായിരുന്നു എന്ന അഭിപ്രായമാണ് വ്യാപാരികൾക്കുള്ളത് തൃക്കാക്കര നഗരസഭാ ഡിവിഷൻ കൗൺസിലർ കെ.എക്സ്. സൈമൺ കെഎംആർഎൽ അധികൃതരുമായി നടത്തിയ ചർച്ചയിൽ എത്രയും വേഗം കോൺക്രീറ്റു പില്ലറുകൾ സ്ഥാപിക്കാൻ നടപടി സ്വീകരിക്കുമെന്ന് ബന്ധപ്പെട്ടവർ അറിയിക്കുകയായിരുന്നു.

അങ്കമാലി ബസിലിക്കയിൽ പുതുഞായർ തിരുനാൾ

അങ്കമാലി: അങ്കമാലി സെന്‍റ് ജോര്‍ജ് ബസിലിക്കയില്‍ വിശുദ്ധ ഗീവര്‍ഗീസ് സഹദായുടെ തിരുനാളും പുതുഞായറും 19 മുതല്‍ മെയ് നാലു വരെയുള്ള തീയതികളില്‍ ആഘോഷിക്കും. ബസിലിക്ക റെക്ടര്‍ ഫാ. ലൂക്കോസ് കുന്നത്തൂര്‍, ജനറൽ കൺവീനർ ജോബെല്‍റ്റ് ആറ്റുപുറം എന്നിവരുടെ നേതൃത്വത്തിൽ 150 അംഗ കമ്മിറ്റിയാണ് തിരുനാൾ ആഘോഷങ്ങള്‍ക്ക് നേതൃത്വം നല്‍കുന്നത്. എഡി 450ല്‍ സ്ഥാപിച്ച അങ്കമാലി പള്ളിയില്‍ ഈസ്റ്റര്‍ കഴിഞ്ഞു വരുന്ന പുതുഞായറാഴ്ചയോനോടനുബന്ധിച്ചാണ് ഇടവക മധ്യസ്ഥന്‍റെ തിരുനാള്‍ ആഘോഷിക്കുന്നത്. വടി എഴുന്നള്ളിക്കലാണ് പ്രധാന നേര്‍ച്ച. ദുഃഖശനിയുടെ തിരുക്കര്‍മങ്ങള്‍ക്കു ശേഷം തിരുനാളിന് ഒരുക്കമായ നൊവേന ആരംഭിക്കും. പാരമ്പര്യ ആചാരപ്രകാരം കിഴക്കേപ്പള്ളി സെന്‍റ് ഹോര്‍മീസ് ദേവാലയത്തില്‍ 25 വെള്ളിയാഴ്ച രാവിലെ കൊടിയേറ്റും. ബസലിക്ക ദേവാലയത്തില്‍ 26 ശനിയാഴ്ച വൈകിട്ട് കൊടിയേറ്റും. 27 പുതുഞായറാഴ്ചയും ഏ28 വിശുദ്ധ ഗീവര്‍ഗീസ് സഹദായുടെ തിരുനാള്‍ ദിനത്തിലും രാവിലെ മുതല്‍ തിരുകര്‍മങ്ങളില്‍ പങ്കെടുക്കുവാനും അടിമ വെയ്ക്കുവാനും വടി എഴുള്ളിക്കാനും അവസരം ലഭിക്കും. തിരുനാളിന്‍റെ അങ്ങാടി പ്രദക്ഷിണം 27 ഞായറാഴ്ചയും, ആഘോഷമായ പ്രദക്ഷിണം 28 തിങ്കളാഴ്ചയും ആണ്. 27ന് വൈകീട്ട് ആട്ടം കലാസമിതിയും - തേക്കിന്‍കാട് മ്യൂസിക് ബാന്‍റിന്‍റെ മ്യൂസിക് ഫ്യൂഷന്‍, 28 ന് വൈകിട്ട് ആകാശവിസ്മയം, ലൈറ്റ് ആന്‍ഡ് സൗണ്ട് ഷോ. മെയ് നാല് ഞായറാഴ്ചയാണ് എട്ടാമിടം. വൈകിട്ട് വര്‍ഗീസ്-ജോര്‍ജ് നാമധാരികളുടെ സംഗമം, ഇടവകക്കാര്‍ ഒരുക്കുന്ന കലാസന്ധ്യയും നടക്കും. ഏപ്രില്‍ 29 ചൊവ്വാഴ്ച വൈകിട്ട് ഇടവകയിലെ മരിച്ചുപോയവര്‍ക്ക് റാസ കുര്‍ബാന തുടർന്ന്‌ സമര്‍പ്പിത സംഗമം. ഏപ്രില്‍ 30 ബുധന്‍ വൈകിട്ട് വിവിധ ഭക്തസംഘടനകളുടെ വാര്‍ഷികം, കലാപരിപാടികള്‍, മെയ് ഒന്ന് വ്യാഴം വൈകിട്ട് യൂത്ത് ഫെസ്റ്റ്, മെയ് രണ്ട് വെള്ളി ആദ്യ വെള്ളി ആചരണം.

തൃക്കാക്കര നഗരസഭ: അബ്ദുഷാന വൈസ് ചെയർമാൻ പദവി രാജിവച്ചു

കാക്കനാട് : തൃക്കാക്കര നഗരസഭാ വൈസ് ചെയർമാൻ അബ്ദുഷാന പദവി രാജിവച്ചുള്ള കത്ത് മുനിസിപ്പൽ സെക്രട്ടറിക്കു കൈമാറി. കാക്കനാട് ഇടച്ചിറ ഡിവിഷനിൽ നിന്നും സ്വതന്ത്ര സ്ഥാനാർഥിയായി മൽസരിച്ച് നഗരസഭാ കൗൺസിലിൽ എത്തിയ അബ്ദു ഷാന യുഡിഎഫിന് അധികാരത്തിലെത്താൻ തുടക്കം മുതൽ പിന്തുന്ന നൽകിയിരുന്നു. പിന്തുണയുമായി ഒപ്പം നിന്ന മറ്റൊരു സ്വതന്ത്ര കൗൺസിലർ ഇ.പി. കാതരു കുഞ്ഞ് മൂന്നര വർഷത്തിനു ശേഷം യുഡിഎഫ് വിട്ട് ഇടതുമുന്നണിക്കൊപ്പം ചേർന്നിരുന്നു.

പൾസ് ഓഫ് തൃപ്പൂണിത്തുറയ്ക്ക് പുരസ്കാരം സമ്മാനിച്ചു

തൃപ്പൂണിത്തുറ: സേവന സന്നദ്ധ സംഘടനയായ പൾസ് ഓഫ് തൃപ്പൂണിത്തുറയുടെ നേതൃത്വത്തിൽതൃപ്പൂണിത്തുറ നഗരസഭയുടെ മാലിന്യ സംസ്കരണത്തിനായി നടത്തുന്ന സേവന പ്രവർത്തനങ്ങൾക്കായി നൽകിയ നഗരസഭയുടെ പുരസ്കാരം ജില്ലാ കളക്ടർ എൻ.എസ്.കെ. ഉമേഷിൽ നിന്നും പൾസ് ഓഫ് തൃപ്പൂണിത്തുറ ഭാരവാഹികളായ പ്രകാശ് അയ്യർ, എം.എം. മോഹനൻ, ജെയിംസ് മാത്യു എന്നിവർ ചേർന്ന് ഏറ്റുവാങ്ങി. നഗരസഭാ ചെയർപേഴ്സൺ രമ സന്തോഷ്, വൈസ് ചെയർമാൻ കെ.കെ. പ്രദീപ് കുമാർ, മുനിസിപ്പൽ സെക്രട്ടറി പി.കെ. സുഭാഷ്, സ്റ്റാൻഡിംഗ് കമ്മിറ്റി ചെയർമാൻമാരായ സി.എ. ബെന്നി, യു.കെ. പീതാംബരൻ, ജയ പരമേശ്വരൻ, മാലിന്യ സംസ്കരണ കോ ഓർഡിനേറ്റർ ത്യാഗരാജൻ പോറ്റി തുടങ്ങിയവർ ചടങ്ങിൽ പങ്കെടുത്തു.

ലക്കി സ്റ്റാർ ഫുട്‌ബോൾ ടൂർണമെന്‍റ് 20 മുതൽ

ആലുവ: മർച്ചന്‍റ്സ് അസോസിയേഷന്‍റെ ആഭിമുഖ്യത്തിൽ ലക്കി സ്റ്റാർ ട്രോഫിയ്ക്കു വേണ്ടിയുള്ള അഖിലേന്ത്യ ഫ്ളഡ്‌ ലിറ്റ് ഫുട്‌ബോൾ ടൂർണമെന്‍റ് 20 ന് ആരംഭിക്കും. രാത്രി 7.30 ന് ആലുവ മുനിസിപ്പൽ ഫ്ളഡ്‌ലിറ്റ് സ്റ്റേഡിയത്തിൽ ആലുവ നഗരസഭാ ചെയർമാൻ എം.ഒ. ജോൺ ഉദ്ഘാടനം ചെയ്യും. 27 വരെ നീണ്ടു നിൽക്കുന്ന മത്സരത്തിൽ ഇന്ത്യയിലെ പ്രമുഖ ടീമുകളായ സൗത്ത് കോസ്റ്റ് തൂത്തുക്കുടി, ഹീറോസ് മദ്രാസ്, ബേസിക് പെരുമ്പാവൂർ, ലക്കി സ്റ്റാർ ആലുവ, സെവൻസ് കോതമംഗലം, മദീന എഫ്സി ചെർപ്പുളശേരി, മലബാർ എഫ്സി മലപ്പുറം, അൽഷാബ് ഇന്ത്യൻസ് തൃശൂർ എന്നീ ടീമുകളാണ് മാറ്റുരയ്ക്കുന്നത്. ഉദ്ഘാടന മത്സരത്തിൽ മലബാർ എഫ്സിമലപ്പുറവും സെവൻസ് കോതമംഗലവും തമ്മിൽ ഏറ്റുമുട്ടും. 26 ന് പ്രദർശന മത്സരത്തിൽ പ്രമുഖ രാഷ്ട്രീയ നേതാക്കളുടെ ടീമും ആലുവ മർച്ചന്‍റ്സ് അസോസിയേഷൻ ടീമും തമ്മിലുള്ള മത്സരം നടക്കും. പ്രവേശനം സൗജന്യം.

പേരണ്ടൂർ കനാലിൽ പടക്ക മാലിന്യം തള്ളി; 12,500 രൂപ പിഴ

കൊച്ചി: വിഷു ദിനത്തില്‍ തേവര പേരണ്ടൂര്‍ കനാലില്‍ പ്ലാസ്റ്റിക് അടക്കം പടക്കമാലിന്യങ്ങള്‍ തള്ളിയെന്ന പരാതിയില്‍ കുറ്റക്കാര്‍ക്കെതിരേ നടപടിയെടുത്ത് കോര്‍പറേഷന്‍ ഹെല്‍ത്ത് വിഭാഗം. എളമക്കര നേര്‍ത്ത് ഡിവിഷനിലെ ഗ്രീന്‍ ട്രിപ്പിള്‍ ലൈനിലുള്ള ഫ്ലാറ്റ് സമുച്ഛയത്തിലെ താമസക്കാരനായ അരുണ്‍ കിഷോറില്‍ നിന്നാണ് ഹെല്‍ത്ത് ഇന്‍സ്‌പെക്ടര്‍ പ്രജീഷ് കുമാറിന്‍റെ നേതൃത്വത്തിലുള്ള സ്‌ക്വാഡ് 12,500 രൂപ പിഴ ഈടാക്കിയത്. ഇയാള്‍ക്കൊപ്പം കനാലില്‍ മാലിന്യം നിക്ഷേപിച്ചതായി കണ്ടെത്തിയ സ്ത്രീക്കെതിരെയും കേസെടുത്തിട്ടുണ്ട്. എന്നാല്‍ ഇവരെ കണ്ടെത്താന്‍ കഴിഞ്ഞിട്ടില്ലാത്തതിനാല്‍ പിഴ ഈടാക്കിയില്ല. തിങ്കളാഴ്ച രാത്രിയില്‍ ഫ്ലാറ്റിന് സമീപം പടക്കം പൊട്ടിച്ച ശേഷം പ്ലാസ്റ്റിക് കവര്‍ ഉള്‍പ്പടെയുള്ള മാലിന്യങ്ങള്‍ പേരണ്ടൂര്‍ കനാലില്‍ തള്ളിയെന്ന് കാട്ടി പ്രദേശവാസിയായ ഒരാള്‍ നല്‍കിയ പരാതിയിലാണ് നടപടി. സ്ഥലത്തെത്തിയ ഹെല്‍ത്ത് വിഭാഗം ഉദ്യോഗസ്ഥര്‍ പരിശോധന നടത്തുകയും കനാലില്‍ മാലിന്യം കണ്ടെത്തുകയും ചെയ്തു. ഫ്ലാറ്റിലെ സെക്യൂരിറ്റിയെ ചോദ്യം ചെയ്തതില്‍ നിന്നാണ് അരുണും മറ്റൊരാളും അന്നേ ദിവസം പടക്കം പൊട്ടിച്ചതായി വിവരം ലഭിച്ചത്. അരുണിനെ ചോദ്യം ചെയ്തപ്പോള്‍ കുറ്റം സമ്മതിക്കുകയും ചെയ്തു. തുടര്‍ന്ന് 12,500 രൂപ പിഴ ഈടാക്കിയ ശേഷം ഇയാളെക്കൊണ്ട് തന്നെ മാലിന്യം കനാലില്‍ നിന്ന് നീക്കം ചെയ്യിച്ചു. മാലിന്യം നിക്ഷേപിച്ച മറ്റൊരു സ്ത്രീക്കെതിരെ കേസെടുത്തിട്ടുണ്ടെന്നും ഇവരെ ഫോണില്‍ ബന്ധപ്പെടാന്‍ കഴിഞ്ഞിട്ടില്ലെന്നും ഹെല്‍ത്ത് ഇന്‍സ്‌പെക്ടര്‍ പ്രജീഷ് കുമാര്‍ പറഞ്ഞു.

ഹാശാ ആഴ്ച ശുശ്രൂഷകൾ ഇന്നാരംഭിക്കും

മൂവാറ്റുപുഴ: വെള്ളൂർക്കുന്നം മൗണ്ട് താബോർ സെന്‍റ് പോൾസ് ചാപ്പൽ ഹാശാ ആഴ്ചയിലെ ശുശ്രൂഷകൾ ഇന്ന് ആരംഭിക്കും. വൈകുന്നേരം ആറിന് നമസ്കാരം. നാളെ പെസഹാ ശുശ്രൂഷ, തുടർന്ന് കുർബാന. 18ന് ദുഃഖവെള്ളിയാഴ്ച രാവിലെ ഏഴിന് നമസ്കാരം, തുടർന്ന് ശുശ്രൂഷകൾ. 19ന് രാവിലെ ഏഴിന് നമസ്കാരം, എട്ടിന് കുർബാന, വൈകുന്നേരം ആറിന് നമസ്കാരം, ഉയിർപ്പ് ശുശ്രൂഷകൾ, തുടർന്ന് കുർബാന. ചടങ്ങുകൾക്ക് വികാരി ജോർജ് മാന്തോട്ടം കോറെപ്പിസ്കോപ്പ കാർമികത്വം വഹിക്കുമെന്ന് ട്രസ്റ്റിമാരായ ജോയി വർഗീസ്, വി.ടി. പൈലി എന്നിവർ അറിയിച്ചു.

വീട്ടുമുറ്റ സദസ് സംഘടിപ്പിച്ചു

മൂവാറ്റുപുഴ: "വേണ്ട ലഹരിയും ഹിംസയും’ എന്ന മുദ്രാവാക്യം ഉയർത്തി ഡിവൈഎഫ്ഐ മൂവാറ്റുപുഴ സൗത്ത് ടൗണ്‍ യൂണിറ്റിന്‍റെ ആഭിമുഖ്യത്തിൽ വീട്ടുമുറ്റ സദസ് സംഘടിപ്പിച്ചു. മൂവാറ്റുപുഴ എക്സൈസ് ഇൻസ്പെക്ടർ റോയി എം. ജേക്കബ് ഉദ്ഘാടനം നിർവഹിച്ചു. മൂവാറ്റുപുഴ എക്സൈസ് ഓഫീസർ പി.പി. ഹസൈനാർ മുഖ്യപ്രഭാഷണം നടത്തി. രാജേഷ് കുമാർ അധ്യക്ഷത വഹിച്ചു.

വിശുദ്ധ വാരാചരണം

മൂവാറ്റുപുഴ: വാഴപ്പിള്ളി ക്രിസ്തുരാജ റോമൻ കത്തോലിക്ക പള്ളിയിൽ വിശുദ്ധവാരം ഇന്ന് ആരംഭിക്കും. വൈകുന്നേരം അഞ്ചിന് ദിവ്യപൂജ, കാൽകഴുകൽ ശുശ്രൂഷ, ദിവ്യകാരുണ്യ പ്രദക്ഷിണം. നാളെ ഉച്ചയ്ക്ക് 12ന് കുരുശിന്‍റെ വഴി, കർത്താവിന്‍റെ പീഡാസഹനത്തിന്‍റെ ആചരണം. 19ന് രാത്രി 11ന് പെസഹാജാഗരം, ദീപാർച്ചന, പെസഹാ പ്രഘോഷണം, ദൈവ വചനപ്രഘോഷണം, സ്തോത്ര യാഗകർമം. 20ന് സെന്‍റ് വിൻസെന്‍റെ് ഡിപോളിന്‍റെ ആഭിമുഖ്യത്തിൽ ഭക്ഷ്യധാന്യ കിറ്റുകൾ വിതരണം ചെയ്യും.

സ്മാർട്ട് അങ്കണവാടി മന്ദിര ശിലാസ്ഥാപനം

മൂവാറ്റുപുഴ: മുവാറ്റുപുഴ നഗരസഭ അഞ്ചാം വാർഡിലെ ആസാദ് റോഡിൽ നിർമിക്കുന്ന സ്മാർട്ട് അങ്കണവാടി മന്ദിരത്തിന്‍റെ ശിലാസ്ഥാപനം നഗരസഭാധ്യക്ഷൻ പി.പി. എൽദോസ് നിർവഹിച്ചു. വർഷങ്ങളായി അഞ്ചാം വാർഡിൽ വാടക കെട്ടിടത്തിലാണ് അങ്കണവാടി പ്രവർത്തിക്കുന്നത്. നഗരസഭാംഗം പി.വി. രാധാകൃഷ്ണന്‍റെ ശ്രമഫലമായി ചെറുകപിള്ളി മുഹമ്മദ് സൗജന്യമായി വിട്ടുനൽകിയ സ്ഥലത്ത് അദ്ദേഹത്തിന്‍റെ പിതാവ് സി.എം. അലിക്കുഞ്ഞിന്‍റെ സ്മരണാർഥമാണ് സ്മാർട്ട് അങ്കണവാടി നിർമിക്കുന്നത്. ഇതിനായി നഗരസഭാ ഫണ്ടിൽനിന്നും 18 ലക്ഷം അനുവദിച്ചു.

പേ വാർഡ് ഉദ്ഘാടനം

കൂത്താട്ടുകുളം: എംഎൽഎയുടെ ആസ്തി വികസന ഫണ്ടിൽനിന്നു 50 ലക്ഷം വിനിയോഗിച്ച് നിർമാണം പൂർത്തീകരിച്ച ചെള്ളക്കപ്പടി ജേക്കബ് ഫിലിപ്പ് മെമ്മോറിയൽ ഗവ. ആയുർവേദ ആശുപത്രി പേ വാർഡിന്‍റെ ഉദ്ഘാടനം അനൂപ് ജേക്കബ് എംഎൽഎ നിർവഹിച്ചു. നഗരസഭാധ്യക്ഷ വിജയ ശിവൻ അധ്യക്ഷത വഹിച്ചു. വൈസ് ചെയർമാൻ സണ്ണി കുര്യാക്കോസ് മുൻ ഡോക്ടർമാരെ ആദരിച്ചു. മൂന്നു പേ വാർഡ് മുറികൾ, ഒരു ഡ്യൂട്ടി റൂം, ഒരു ട്രീറ്റ്മെന്‍റ് റൂം എന്നിങ്ങനെ ആധുനിക സൗകര്യത്തോടെയാണ് പണി പൂർത്തീകരിച്ചിട്ടുള്ളത്.

വക്കീൽ ഗുമസ്തർ ധർണ നടത്തി

മൂവാറ്റുപുഴ: സർക്കാർ വർധിപ്പിച്ച കോർട്ട് ഫീസ് പിൻവലിക്കണമെന്ന് ആവശ്യപ്പെട്ട് മൂവാറ്റുപുഴ, കോതമംഗലം, കോലഞ്ചേരി എന്നീ സ്ഥലങ്ങളിലെ വക്കീൽ ഗുമസ്തർ പണിമുടക്കി മൂവാറ്റുപുഴ ആർഡിഒ ഓഫീസിനു മുന്നിൽ ധർണ നടത്തി. കേരള സർക്കാർ അതിഭീമമായി വർധിപ്പിച്ച കോർട്ട് ഫീസ് ഉടൻ പിൻവലിക്കണമെന്ന് ധർണ സമരം സർക്കാരിനോട് ആവശ്യപ്പെട്ടു. ക്ലർക്കുമാർ ഈ ആവശ്യം ഉന്നയിച്ച് രണ്ടാംഘട്ടം നടത്തിയ സമരമാണിത്. ധർണ സമരത്തിന് അസോസിയേഷൻ പ്രസിഡന്‍റ് റെജി പ്ലാച്ചേരി അധ്യക്ഷത വഹിച്ചു. മൂവാറ്റപുഴ ബാർ അസോസിയേഷൻ പ്രസിഡന്‍റ് ജോസ് വർഗീസ് ഉദ്ഘാടനം ചെയ്തു.

കെഎസ്ആർടിസി ബസുകളുടെ ഫിറ്റ്നസ് ഉറപ്പാക്കാൻ അടിയന്തര നടപടി വേണം: എംപി

മൂവാറ്റുപുഴ: ഇടുക്കി ജില്ലയിൽ ഹൈറേഞ്ച് മേഖലയിൽ സർവീസ് നടത്തുന്ന കെഎസ്ആർടിസി ബസുകൾ ഭൂരിഭാഗവും കാലപ്പഴക്കമുള്ളതും ഫിറ്റ്നസ് പരിശോധന പൂർത്തിയാക്കാത്തതും ശരിയായ അറ്റകുറ്റപ്പണികൾ നടത്താത്തതുമാണെന്ന് കാണുന്ന സാഹചര്യത്തിൽ ബസുകളുടെ ഫിറ്റ്നസ് ഉറപ്പാക്കുന്നതിന് അടിയന്തര നടപടി സ്വീകരിക്കണമെന്ന് ഡീൻ കുര്യാക്കോസ് എംപി ഗതാഗത മന്ത്രി കെ.ബി. ഗണേഷ് കുമാറിന് അയച്ച കത്തിൽ ആവശ്യപ്പെട്ടു. മറ്റു മേഖലകളിൽ സർവീസ് നടത്തുന്നതു പോലെയുള്ള ബസുകൾ ഇടുക്കിയിൽ സർവീസ് നടത്തുന്നതിന് അനുയോജ്യമല്ല. ഇതിന്‍റെ ഫലമായാണ് കഴിഞ്ഞദിവസം നേര്യമംഗലത്തിനടുത്ത് അപകടം നടന്നതും 14 വയസുള്ള ഒരു വിദ്യാർഥിനി മരിക്കാനിടയായതും. പീരുമേടിൽ നടന്ന അപകടത്തിൽ ആളപായമുണ്ടായതും സമാന സാഹചര്യത്തിലാണ്. ഇതു വളരെ ഗൗരവമുള്ള ഒരു വിഷയമായി കണക്കിലെടുത്ത് ഹൈറേഞ്ച് മേഖലയിലൂടെ സർവീസ് നടത്തുന്ന കെഎസ്ആർടിസി ബസുകൾ പരമാവധി അഞ്ചു വർഷത്തിൽ താഴെ മാത്രം കാലപ്പഴക്കമുള്ളവയും ശരിയായ ഫിറ്റ്നസ് പരിശോധന പൂർത്തിയാക്കിയതുമായിരിക്കണം. കൂടാതെ അറ്റകുറ്റപ്പണികൾ യഥാസമയം പൂർത്തീകരിക്കുന്നുണ്ടെന്നും സ്പെയർ പാർട്സുകൾ ആവശ്യാനുസരണം ലഭിക്കുന്നുണ്ടെന്നും ഉറപ്പു വരുത്തണമെന്നും എംപി ആവശ്യപ്പെട്ടു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]