സെന്റ് ജോസഫ്സ് സെൻട്രൽ സ്കൂളിന് ഓവറോൾ കിരീടം
1463601
Thursday, October 24, 2024 5:49 AM IST
മുണ്ടക്കയം: പതിമൂന്നാമത് സതേൺ ഇന്റർ സ്കൂൾ ആൻഡ് ഇന്റർ കോളജ് യോഗാസന സ്പോർട്സ് ചാമ്പ്യൻഷിപ്പിൽ തുടർച്ചയായ രണ്ടാം തവണയും മുണ്ടക്കയം സെന്റ് ജോസഫ്സ് സെൻട്രൽ സ്കൂൾ ഓവറോൾ കിരീടം നേടി. പാമ്പാടി വിമലാംബിക സീനിയർ സെക്കൻഡറി സ്കൂളിൽ നടന്ന അഷ്ടാംഗ സ്കൂൾ ഓഫ് യോഗയാണ് ചാമ്പ്യൻഷിപ്പ് സംഘടിപ്പിച്ചത്.
മൂന്ന് ജില്ലകളിൽ നിന്നും യോഗാസന, ഫ്രീ ഫ്ലോ വിഭാഗങ്ങളിലായി എട്ട് വയസുമുതൽ 18 വയസുവരെയുള്ള 400 കുട്ടികൾ പങ്കെടുത്ത ചാമ്പ്യൻഷിപ്പിൽ 150 പോയിന്റുകൾ നേടി മുണ്ടക്കയം സെന്റ് ജോസഫ്സ് സെൻട്രൽ സ്കൂൾ ഓവറോൾ കിരീടം നേടി. 127 പോയിന്റുകൾ നേടി പാമ്പാടി വിമലാംബിക സീനിയർ സെക്കൻഡറി സ്കൂൾ രണ്ടാം സ്ഥാനവും 85 പോയിന്റുകൾ നേടി ചെങ്ങന്നൂർ ക്രൈസ്റ്റ് ചർച്ച് വിദ്യാപീഡ് മൂന്നാം സ്ഥാനവും കരസ്ഥമാക്കി.
ഏഷ്യൻ യോഗ റഫറി പി. കെ. അശോകൻ സമ്മാനദാനം നിർവഹിച്ചു. സ്കൂൾ മാനേജർ റവ.ഡോ. പ്രദീപ് വാഴത്തറമലയിൽ, പ്രിൻസിപ്പൽ റൂബി ബെന്നി, ഏഷ്യൻ യോഗ റഫറി എസ്. ജോമോൻ എന്നിവർ പ്രസംഗിച്ചു.