കുടമാളൂർ ക്ലാരമഠം ജൂബിലിനിറവിൽ :75-ാം വർഷ ജൂബിലി ആഘോഷം ആർച്ച്ബിഷപ് മാർ ജോസഫ് പെരുന്തോട്ടം ഉദ്ഘാടനം ചെയ്തു
1463656
Thursday, October 24, 2024 7:18 AM IST
കുടമാളൂർ: കുടമാളൂർ പള്ളിയോടു ചേർന്ന് ഫ്രാൻസിസ്കൻ ക്ലാരിസ്റ്റ് മഠം സ്ഥാപിതമായിട്ട് 75 വർഷം. 1949 മേയ് 19 നാണ് കുടമാളൂരിൽ മഠം സ്ഥാപിതമായത്. ചങ്ങനാശേരി അതിരൂപതാധ്യക്ഷൻ മാർ ജോസഫ് പെരുന്തോട്ടം കൃതജ്ഞതാബലി അർപ്പിച്ച് ജൂബിലി ആഘോഷങ്ങൾ ഉദ്ഘാടനം ചെയ്തു. കുടമാളൂര് ക്ലാരിസ്റ്റ് മഠം സമൂഹത്തിന്റെ ആത്മീയ വളര്ച്ചയ്ക്കു നല്കിയ സംഭാവനകള് നിസ്തുലമാണെന്ന് അദ്ദേഹം പറഞ്ഞു.
കുടമാളൂരിൽ മഠം സ്ഥാപിക്കുന്നതിന് കാരണക്കാരനായ അന്നത്തെ ചങ്ങനാശേരി മെത്രാൻ ബിഷപ് മാർ ജയിംസ് കാളാശേരിയെയും അന്ന് കുടമാളൂർ പള്ളി വികാരിയായിരുന്ന ഫാ. ജോസഫ് ഇത്തിപ്പറമ്പിൽ മുതല് ഇപ്പോഴത്തെ ആര്ച്ച് പ്രീസ്റ്റ് റവ.ഡോ. മാണി പുതിയിടം വരെയുള്ള വികാരിമാരുടെ സഹകരണങ്ങളെയും പ്രാര്ഥനയെയും നന്ദിയോടെ സ്മരിക്കുന്നതായി പ്രൊവിന്ഷ്യൽ സുപ്പീരിയര് സിസ്റ്റർ ലിസ് മേരി എഫ്സിസി പറഞ്ഞു.
1946 ല് വിശുദ്ധ അല്ഫോന്സാമ്മയുടെ സ്വര്ഗീയ പ്രവേശനത്തിനു ശേഷമുള്ള വിശുദ്ധയുടെ അനുഗ്രഹത്തിന്റെയും പ്രാര്ഥനയുടെയും ഫലമായി കൂടിയാണ് മഠം സ്ഥാപിതമായതെന്ന് ഞങ്ങള് വിശ്വസിക്കുന്നെന്നും സിസ്റ്റർ ലിസ് മേരി പറഞ്ഞു. മഠത്തിലെ ഏറ്റവും മുതിർന്ന അംഗം 96 വയസുള്ള സിസ്റ്റർ ഫ്രാൻസിസിനെ മാർ ജോസഫ് പെരുന്തോട്ടം പൊന്നാട അണിയിച്ച് ആദരിച്ചു.
ആഘോഷ പരിപാടികളിൽ ആര്ച്ച്പ്രീസ്റ്റ് റവ. ഡോ. മാണി പുതിയിടം, ഫാ. റോയി കണ്ണന്ചിറ സിഎംഐ, ഫാ. ജോസഫ് മുട്ടത്തുപാടം, ഫാ. കുര്യന് ചാലങ്ങാടി സിഎംഐ, സിസ്റ്റര് റോസ് മേരി എഫ്സിസി, ഫാ. നിതിന് അമ്പലത്തുങ്കല്, ഫാ. പ്രിന്സ് എതിരേറ്റുകുടിലില്, ഫാ. അലോഷ്യസ് വല്ലാത്തറ, ഫ്രാങ്ക്ളിന് ജോസഫ് പുത്തന്പറമ്പില്, ജോര്ജ് ജോസഫ് പാണംപറമ്പില് എന്നിവര് സന്നിഹിതരായിരുന്നു.