ജില്ലാ സ്കൂള് കായികമേള : രണ്ടാം ദിനത്തിലും ഈരാറ്റുപേട്ടയുടെ കുതിപ്പ്; തൊട്ടുപിന്നില് പാലാ
1463819
Friday, October 25, 2024 5:33 AM IST
പാലാ: ജില്ലാ സ്കൂള് കായികമേള രണ്ടാം ദിനം പൂര്ത്തിയാകുമ്പോള് ട്രാക്ക് നിറഞ്ഞ് പ്രതിഭകള്. പകുതിയിലധികം മത്സരങ്ങള് പൂര്ത്തിയായപ്പോള് ഈരാറ്റുപേട്ട ഉപജില്ലയാണ് മുന്നില്. പാലാ തൊട്ടുപിന്നാലെയുണ്ട്. 174.5 പോയിന്റ് നേടിയാണ് ഈരാറ്റുപേട്ട കപ്പിനരികിലെത്തിയത്.
165 പോയിന്റോടെ ആതിഥേയരായ പാലാ ശക്തമായ വെല്ലുവിളി ഉയര്ത്തി തൊട്ടുപിന്നാലെയുണ്ട്. 119 പോയിന്റോടെ കാഞ്ഞിരപ്പളളി ഉപജില്ലയാണ് മൂന്നാം സ്ഥാനത്ത്. ഇന്നലെ ഉച്ചകഴിഞ്ഞുണ്ടായ മഴമൂലം ഏതാനും മത്സരങ്ങള് ഇന്നത്തേക്കു മാറ്റിവച്ചിട്ടുണ്ട്.
ഇന്ന് രാവിലെ 6.30ന് ആരംഭിക്കുന്ന മാരത്തണ് മത്സരത്തോടെ സമാപന ദിനത്തിലെ മത്സരങ്ങള് ആരംഭിക്കും. കൊട്ടാരമറ്റത്തുനിന്നും ആരംഭിക്കുന്ന മാരത്തണ് മത്സരം കെ.എം. മാണി മെമ്മോറിയല് ബൈപാസു വഴിയാണ് ക്രമീകരിച്ചിരിക്കുന്നത്.
വൈകുന്നേരം മൂന്നിന് നടക്കുന്ന സമാപന സമ്മേളനം സെബാസ്റ്റ്യന് കുളത്തുങ്കല് എംഎല്എ ഉദ്ഘാടനം ചെയ്യും. പാലാ നഗരസഭാ വൈസ് ചെയര്പേഴ്സണ് ലീനാ സണ്ണി അധ്യക്ഷത വഹിക്കും.