കാഞ്ഞിരപ്പള്ളി സെന്റ് ഡൊമിനിക്സ് കോളജ് വജ്രജൂബിലി ഉദ്ഘാടനം 28ന്
1463822
Friday, October 25, 2024 5:33 AM IST
കാഞ്ഞിരപ്പള്ളി: സെന്റ് ഡൊമിനിക്സ് കോളജ് വജ്രജൂബിലി ആഘോഷങ്ങളുടെ ഉദ്ഘാടനം കേന്ദ്രമന്ത്രി ജോർജ് കുര്യൻ 28നു രാവിലെ 10നു നിർവഹിക്കും. കോളജ് രക്ഷാധികാരി മാർ ജോസ് പുളിക്കൽ അധ്യക്ഷത വഹിക്കും. മുഖ്യപ്രഭാഷണവും ജൂബിലി സ്മാരകമായി നിർമിക്കുന്ന ഗസ്റ്റ് ഹൗസിന്റെ മാതൃകയുടെ അനാവരണവും ചീഫ് വിപ്പ് ഡോ.എൻ. ജയരാജ് നിർവഹിക്കും.
കേന്ദ്ര സർക്കാർ സഹായത്തോടെ കോളജിൽ നിർമിക്കുന്ന വോളിബോൾ കോർട്ടിന്റെ നിർമാണോദ്ഘാടനം ആന്റോ ആന്റണി എംപിയും വിദ്യാർഥികൾക്കു പഠനത്തോടൊപ്പം വരുമാനം ലഭ്യമാക്കുന്നതിനുള്ള പുതിയ പദ്ധതിയുടെ ഉദ്ഘാടനം സെബാസ്റ്റ്യൻ കുളത്തുങ്കൽ എംഎൽഎയും നിർവഹിക്കും.
കോളജിന്റെ വളർച്ചയിൽ നിർണായകമായ സംഭാവനകൾ നൽകിയ വിശിഷ്ടവ്യക്തികളുടെ സ്മരണയ്ക്കായി കോളജിൽ നിർമിക്കുന്ന വിവിധ ഹാളുകൾ മാനേജർ ഫാ. വർഗീസ് പരിന്തിരിക്കൽ സമർപ്പിക്കും. ജൂബിലി സ്മാരക ഗസ്റ്റ് ഹൗസ് നിർമാണ ഫണ്ടിലേക്കുള്ള ആദ്യസംഭാവനയും മാനേജർ സ്വീകരിക്കും.
കോളജ് ബർസാർ റവ.ഡോ. മനോജ് പാലക്കുടി കോളജിന്റെ വളർച്ചയിൽ സംഭാവന നൽകിയ മഹനീയ വ്യക്തിത്വങ്ങളെ അനുസ്മരിക്കും. പാറത്തോട് പഞ്ചായത്ത് പ്രസിഡന്റ് കെ.കെ. ശശികുമാർ, വിരമിച്ച ജീവനക്കാരുടെ സംഘടനാ പ്രസിഡന്റ് പ്രഫ.സി.എ. തോമസ്, പ്രിൻസിപ്പൽ ഡോ. സീമോൻ തോമസ്, ജൂബിലി ജനറൽ കൺവീനർ ബിനോ പി. ജോസ്, കോളജ് യൂണിയൻ ചെയർമാൻ ഫെബിൻ ജോസ് ആന്റണി എന്നിവർ പ്രസംഗിക്കും.
ചങ്ങനാശേരി അതിരൂപതയുടെ ഫൊറോനാ പള്ളിയായിരുന്ന കാഞ്ഞിരപ്പള്ളി സെന്റ് ഡൊമിനിക്സ് പള്ളിയുടെ മാനേജ്മെന്റിൽ ആർച്ച്ബിഷപ് മാർ മാത്യു കാവുകാട്ടാണ് 1965 മാർച്ച് 25ന് കോളജിന്റെ ശിലാസ്ഥാപനം നിർവഹിച്ചത്. ഫാ. സിറിയക് തുരുത്തുമാലിൽ ആദ്യ മാനേജരും ഫാ. കുര്യാക്കോസ് ഏണക്കാട്ട് ആദ്യ പ്രിൻസിപ്പലുമായിരുന്നു.
മഹാത്മാഗാന്ധി യൂണിവേഴ്സിറ്റിയുമായി അഫിലിയേറ്റ് ചെയ്തിരിക്കുന്ന കോളജ് നാക് അക്രെഡിറ്റേഷനിൽ എ പ്ലസ് ഗ്രേഡ് സ്വന്തമാക്കിയിട്ടുണ്ട്. എൻഐആർഎഫ് റാങ്കിംഗിൽ ഇന്ത്യയിലെ മുൻനിര കോളജുകളിൽ ഒന്നുമാണ്. കോളജിൽ 22 പഠന പ്രോഗ്രാമുകളും 1600 വിദ്യാർഥികളും 92 അധ്യാപകരുമാണ് ഉള്ളത്.
ഒരു വർഷം നീണ്ടുനിൽക്കുന്ന വൈവിധ്യമാർന്ന ആഘോഷ പരിപാടികളാണ് മാനേജ്മെന്റും അധ്യാപകരും വിദ്യാർഥികളും ചേർന്ന് വജ്രജൂബിലിയുടെ ഭാഗമായി ആസൂത്രണം ചെയ്തിട്ടുള്ളത്.
പത്രസമ്മേളനത്തിൽ പ്രിൻസിപ്പൽ ഡോ. സീമോൻ തോമസ്, സെൽഫ് ഫിനാൻസിംഗ് ഡയറക്ടർ ഡോ. ജോജോ ജോർജ്, ബർസാർ റവ.ഡോ. മനോജ് പാലക്കുടി, ഡയമണ്ട് ജൂബിലി കൺവീനർ ബിനോ പി. ജോസ്, ഓഫീസ് സൂപ്രണ്ട് ജെസ്ന ജോസ്, കോളജ് യൂണിയൻ ചെയർമാൻ ഫെബിൻ ജോസ് ആന്റണി, ആദ്യ ബാച്ച് വിദ്യാർഥികൾ മാത്യു ചാക്കോ വെട്ടിയാങ്കൽ, ഇ.ജെ. ജോണി എന്നിവർ പങ്കെടുത്തു.