കാഞ്ഞിരപ്പള്ളി ഉപജില്ലാ സ്കൂൾ കലോത്സവം ഇളങ്ങുളത്ത്
1463596
Thursday, October 24, 2024 5:43 AM IST
പൊൻകുന്നം: കാഞ്ഞിരപ്പള്ളി ഉപജില്ലാ സ്കൂൾ കലോത്സവം 26, 28, 29, 30 തീയതികളിൽ ഇളങ്ങുളത്ത് നടക്കും. ഇളങ്ങുളം സെന്റ് മേരീസ് പാരീഷ്ഹാൾ, സെന്റ് മേരീസ് ചർച്ച് മിനി ഹാൾ, സെന്റ് മേരീസ് ഹൈസ്കൂൾ, സെന്റ് മേരീസ് എൽപിഎസ്, കൂരാലി ഹിദായത്തുൽ ഇസ്ലാം മദ്രസ ഹാൾ, ഇളങ്ങുളം എൻഎസ്എസ് ഹാൾ, ഇളങ്ങുളം എസ്എൻഡിപി ഹാൾ, ഇളങ്ങുളം ശാസ്താദേവസ്വം കെവിഎൽപിജി സ്കൂൾഹാൾ, കെവിഎൽപിജിഎസ് മിനി ഓഡിറ്റോറിയം എന്നിവിടങ്ങളിലാണ് മത്സരവേദികൾ.
എൽപി, യുപി വിഭാഗത്തിൽ - 72, ഹൈസ്കൂൾ - 32, എച്ച്എസ്എസ് - ഒന്പത്, വിഎച്ച്എസ്എസ് - നാല് എന്നിങ്ങനെയാണ് പങ്കെടുക്കുന്ന വിദ്യാലയങ്ങളുടെ എണ്ണം. 4910 കുട്ടികൾ വിവിധ ഇനങ്ങളിലായി മത്സരിക്കും. 26ന് രാവിലെ 9.30ന് ഇളങ്ങുളം സെന്റ് മേരീസ് പള്ളി പാരിഷ്ഹാളിൽ കലോത്സവം ആന്റോ ആന്റണി എംപി ഉദ്ഘാടനം ചെയ്യും.
എലിക്കുളം പഞ്ചായത്ത് പ്രസിഡന്റ് ജിമ്മിച്ചൻ ഈറ്റത്തോട്ട് അധ്യക്ഷത വഹിക്കും. സിനിമാതാരവും ഗായികയുമായ ജിൻസി ചിന്നപ്പൻ മുഖ്യാതിഥിയാവും. എഇഒ എസ്. സുൽഫിഖർ മുഖ്യപ്രഭാഷണവും സെന്റ് മേരീസ് ഹൈസ്കൂൾ മാനേജർ ഫാ. ഡാർവിൻ വാലുമണ്ണിൽ അനുഗ്രഹപ്രഭാഷണവും നടത്തും. തുടർന്ന് ഭിന്നശേഷി വിദ്യാർഥികളുടെ കലാമേള, എലിക്കുളം പഞ്ചായത്തിലെ 30 ഹരിതസേനാംഗങ്ങളെ ആദരിക്കും.
30ന് ഉച്ചകഴിഞ്ഞ് 3.30ന് സമാപനസമ്മേളനം മാണി സി. കാപ്പൻ എംഎൽഎ ഉദ്ഘാടനം ചെയ്യും. പഞ്ചായത്ത് വൈസ്പ്രസിഡന്റ് സൂര്യമോൾ അധ്യക്ഷത വഹിക്കും. ടിവി ഫെയിം ഷിഹാബ് അലിഫ് മുഖ്യാതിഥിയാവും. പാമ്പാടി ബ്ലോക്ക് പഞ്ചായത്ത് വൈസ്പ്രസിഡന്റ് പ്രഫ.എം.കെ. രാധാകൃഷ്ണൻ സമ്മാനദാനം നടത്തും.
പത്രസമ്മേളനത്തിൽ എഇഒ എസ്. സുൽഫിഖർ, ഇളങ്ങുളം സെന്റ് മേരീസ് ഹൈസ്കൂൾ ഹെഡ്മാസ്റ്റർ തോമസ് ജേക്കബ്, റിസപ്ഷൻ കമ്മിറ്റി കൺവീനർ നാസർ മുണ്ടക്കയം, പ്രോഗ്രാം കമ്മിറ്റി കൺവീനർ റ്റിനോ വർഗീസ്, വി.ആർ. ഹരിത, കെ.എം. സിന്ധു തുടങ്ങിയവർ പങ്കെടുത്തു.