ശബരിമല: അവലോകനയോഗം ചേര്‍ന്നു
1463662
Thursday, October 24, 2024 7:30 AM IST
കോട്ടയം: ശബരിമല തീര്‍ഥാടനകാലത്തിനു മുന്നോടിയായി ജില്ലയിലെ മുന്നൊരുക്കങ്ങള്‍ സംബന്ധിച്ച് ജില്ലാ കളക്ടര്‍ ജോണ്‍ വി. സാമുവലിന്‍റെ അധ്യക്ഷതയില്‍ കളക്‌ടറേറ്റ് കോണ്‍ഫറന്‍സ് ഹാളില്‍ അവലോകനയോഗം ചേര്‍ന്നു. മന്ത്രി വി.എന്‍. വാസവന്‍റെ നേതൃത്വത്തില്‍ നാളെ നടക്കുന്ന ശബരിമല അവലോകനയോഗങ്ങള്‍ക്കു മുന്നോടിയാണ് ജില്ലാ കളക്ടറുടെ നേതൃത്വത്തില്‍ യോഗം ചേര്‍ന്നത്.
എരുമേലിയിലെ ക്രമീകരണങ്ങള്‍ സംബന്ധിച്ചു ജില്ലയിലെ ഇടത്താവളങ്ങളിലെ ഒരുക്കങ്ങള്‍ സംബന്ധിച്ചും വിശദമായി യോഗം ചര്‍ച്ച ചെയ്തു. പതിനായിരക്കണക്കിന് തീര്‍ഥാടകര്‍ എത്തുന്ന എരുമേലിയിലെ മാലിന്യസംസ്‌കരണം കാര്യക്ഷമമാക്കാന്‍ തദ്ദേശസ്വയം ഭരണവകുപ്പിന്‍റെ നേതൃത്തില്‍ കര്‍മപദ്ധതി തയാറാക്കണമെന്നു ജില്ല കളക്ടര്‍ നിര്‍ദേശിച്ചു.
പാര്‍ക്കിംഗ് ക്രമീകരണം, പാര്‍ക്കിംഗ് ഫീസ്എന്നിവ സംബന്ധിച്ചു കൃത്യമായ നടപടികളുണ്ടാകണമെന്നു കളക്ടര്‍ വ്യക്തമാക്കി. ഭക്ഷ്യവസ്തുക്കളുടെ വില ഏകീകരിക്കണം, മതിയായ കുടിവെള്ളം ഉറപ്പാക്കണം, ദിശാബോര്‍ഡുകള്‍ വിവിധ ഭാഷകളില്‍ പ്രദര്‍ശിപ്പിക്കാന്‍ തീരുമാനമുണ്ടാകണമെന്നും ജില്ലാ കളക്ടര്‍ ആവശ്യപ്പെട്ടു.
അഡീഷണല്‍ ജില്ലാ മജിസ്ട്രേറ്റ് ബീന. പി. ആനന്ദ്, സബ് കളക്ടര്‍ ഡി. രഞ്ജിത്ത്, വിവിധ വകുപ്പ് ഉദ്യോഗസ്ഥര്, ദേവസ്വം ബോര്‍ഡ് ഉദ്യോഗസ്ഥര് എന്നിവര്‍ യോഗത്തില്‍ പങ്കെടുത്തു.