യുറേക്ക ഇന്റർനാഷണൽ ബിസിനസ് മോഡൽ മത്സരം: സെന്റ് ആന്റണീസ് കോളജിലെ പത്തു വിദ്യാർഥികൾ ഫൈനൽ റൗണ്ടിൽ
1463598
Thursday, October 24, 2024 5:43 AM IST
പെരുവന്താനം: സെന്റ് ആന്റണീസ് കോളജിലെ ഇ-സെല്ലിലും ഇൻസ്റ്റിറ്റ്യൂഷൻ ഇന്നവേഷൻ ക്ലബ്ബിലും പ്രവർത്തിക്കുന്ന പത്തു വിദ്യാർഥികൾ ബോംബെ ഐഐടി നടത്തുന്ന യുറേക്ക ഇന്റർനാഷണൽ ബിസിനസ് മോഡൽ മത്സരങ്ങളുടെ ഫൈനൽ റൗണ്ടിലേക്ക് തെരഞ്ഞെടുക്കപ്പെട്ടു. 25,000 മത്സരാർഥികളിൽനിന്നാണ് കോളജിലെ പത്ത് വിദ്യാർഥികളുടെ അഞ്ചു നൂതന ആശയങ്ങൾ തെരഞ്ഞെടുക്കപ്പെട്ടത്.
26ന് ബാംഗ്ലൂർ ജയിൻ യൂണിവേഴ്സിറ്റി കാമ്പസിലാണ് ഫൈനല് റൗണ്ട് മത്സരങ്ങള് നടക്കുന്നത്. ഇതിനു മുന്നോടിയായി മുംബൈ ഐഐടി ഫാക്കല്റ്റികള് ഇന്നു രാവിലെ പത്തിന് സെന്റ് ആന്റണീസ് കോളജില് ഏകദിന ശില്പശാല നടത്തും. ചെയർമാൻ ബെന്നി തോമസ് ഉദ്ഘാടനം ചെയ്യും. പ്രിൻസിപ്പൽ ഡോ. ആന്റണി ജോസഫ് കല്ലമ്പള്ളി അധ്യക്ഷത വഹിക്കും. തുടര്ന്ന് വൈദ്യുതി വാഹനങ്ങള് പൊതു സ്ഥലങ്ങളില് ചാര്ജ് ചെയ്യുന്ന രീതി അവതരിപ്പിച്ച സ്റ്റാര്ട്ടപ്പ് കമ്പനിയായ ചാര്ജ് എംഒഡിയുടെ സ്ഥാപകന് എം. രാമന് ക്ലാസുകള് നയിക്കും.
26നു നടക്കുന്ന ഫൈനല് റൗണ്ടിൽ നിരവധി നിക്ഷേപകര് എത്തുന്ന സമ്മിറ്റിൽ വിദ്യാർഥികള്ക്ക് ആശയങ്ങൾ അവതരിപ്പിക്കാനും യോഗ്യത നേടുന്ന പക്ഷം കാമ്പസിനോടു ചേർന്ന് വ്യവസായങ്ങൾ ആരംഭിക്കാനുള്ള അവസരവും നൽകുമെന്ന് പ്രിൻസിപ്പൽ ഡോ. ആന്റണി ജോസഫ് കല്ലമ്പള്ളി, ഐഐസി കോ-ഓര്ഡിനേറ്റർ ജോഷി എം. വർഗീസ്, വിദ്യാർഥി പ്രതിനിധികളായ സിറിയക് ജയേഷ്, ആനന്ദ് എസ്. ബോസ്കോ, അഡോണിയ സൈറസ്, ജീവ ജയൻ വര്ഗീസ് എന്നിവർ അറിയിച്ചു.