കാറുകള്‍ കൂട്ടിയിടിച്ച് യുവതിക്കു പരിക്കേറ്റു
1463657
Thursday, October 24, 2024 7:18 AM IST
കോട്ടയം: മൂന്നുകാറുകള്‍ കൂട്ടിയിടിച്ച് അധ്യാപികയ്ക്കു പരിക്കേറ്റു. സിഎംഎസ് കോളജിലെ അധ്യാപിക സുമി മേരി തോമസിനാണ് പരിക്കേറ്റത്. ഇന്നലെ രാവിലെ 8.30നു കോട്ടയം- കുമരകം റോഡില്‍ ദീപികയ്ക്കു മുന്നിലാണ് അപകടമുണ്ടായത്.
റോഡ് സൈഡിലെ ലേണേഴ്‌സ് ബുക്ക് ഹൗസിനു മുന്നില്‍ നിര്‍ത്തിയിരുന്ന ഇഗ്നീസ് കാര്‍ റോഡിലേക്കിറങ്ങി തിരിഞ്ഞതോടെ സിഎംഎസ് കോളജ് ഭാഗത്തുനിന്നു വന്ന ഇന്നോവ കാര്‍ ഇഗ്നീസ് കാറിൽ ഇടിക്കാതിരിക്കാനായി വലത്തുവശത്തോട്ട് വെട്ടിച്ചതോടെ ബേക്കര്‍ ജംഗ്ഷനില്‍നിന്നു സിഎംഎസ് കോളജ് ഭാഗത്തേക്ക് വന്ന ബെലേനോ കാറില്‍ ഇടിക്കുകയായിരുന്നു. ഇഗ്നീസ് കാര്‍ ഇന്നോവ കാറിന്‍റെ മുന്നിലെ ഇടതുവശത്തുമിടിച്ചു. ബെലേനോ കാര്‍ ഓടിച്ചു സിഎംഎസ് കോളിലേക്കു പോവുകയായിരുന്ന അധ്യാപികയ്ക്കാണു നിസാര പരിക്കേറ്റത്.
ഓടിക്കൂടിയ നാട്ടുകാരാണ് രക്ഷാപ്രവര്‍ത്തനം നടത്തിയത്. കാറിനുള്ളില്‍ കുടുങ്ങിപ്പോയ അധ്യാപികയെ കാറിനുള്ളില്‍നിന്നു പുറത്തെത്തിച്ചു മറ്റൊരു കാറില്‍ ആശുപത്രിയില്‍ എത്തിച്ചു.
ഇടിയുടെ ആഘാതത്തില്‍ മൂന്നു കാറുകള്‍ക്കും സാരമായ കേടുപാടുകള്‍ സംഭവിച്ചു. അപകടത്തെത്തുടര്‍ന്ന്ഏറെ നേരം കോട്ടയം- കുമരകം റോഡില്‍ ഗതാഗതം തടസപ്പെട്ടു. പോലീസെത്തി വാഹനങ്ങള്‍ റോഡില്‍നിന്നു മാറ്റിയശേഷമാണ് ഗതാഗതം പുനഃസ്ഥാപിച്ചത്.