പോലീസ് സ്മൃതിദിനം : ചങ്ങനാശേരി പോലീസ് സ്റ്റേഷനില് ആയുധങ്ങളുടെ പ്രദര്ശനം
1463677
Thursday, October 24, 2024 7:37 AM IST
ചങ്ങനാശേരി: പോലീസ് ഇപ്പോള് ഉപയോഗിക്കുന്നതും മുന്കാലങ്ങളില് ഉപയോഗിച്ചിരുന്നതുമായ ആയുധങ്ങളുടെ പ്രദര്ശനം ഇന്നുമുതല് 26വരെ ചങ്ങനാശേരി പോലീസ് സ്റ്റേഷനിലും ലഹരിക്കെതിരേ സിഗ്നേച്ചര് കാമ്പയില് 26, 27 തിയതികളില് കെഎസ്ആര്ടിസി ബസ് സ്റ്റാന്ഡിലും നടക്കും. ഡ്യൂട്ടിയിലിരിക്കെ രക്തസാക്ഷിത്വം വരിച്ച പോലീസുകാരുടെ സ്മൃതിദിനാചരണത്തിന്റെ ഭാഗമായാണ് പരിപാടി സംഘടിപ്പിക്കുന്നത്. രാവിലെ ഒമ്പതുമുതല് വൈകുന്നേരം നാലുവരെയാണ് പ്രദര്ശനം.
ഇന്നു രാവിലെ ഒമ്പതിന് കോട്ടയം അഡീഷണല് എസ്പി വിനോദ് പിള്ള ഉദ്ഘാടനം ചെയ്യും. ഡിവൈഎസ്പി പി.കെ. വിശ്വനാഥ്, മുനിസിപ്പല് ചെയര്പേഴ്സണ് കൃഷ്ണകുമാരി രാജശേഖരന്, വാര്ഡ് കൗണ്സിലര് ബെന്നി ജോസഫ് എന്നിവര് പ്രസംഗിക്കും. പോലീസ് സേനയില് ആദ്യകാലങ്ങളില് ഉപയോഗിച്ചിരുന്ന മുള ലാത്തി മുതല് തോക്കുകള്, വെടിയുണ്ടകള്, ഗ്രനേഡുകള്, കണ്ണീര് വാതകം, ഷീല്ഡുകള്, ബയണറ്റുകള് തുടങ്ങി നിരവധി ആയുധ സാമഗ്രികള് പ്രദര്ശിപ്പിക്കും.
പ്രദര്ശനത്തിലും ‘’ഒപ്പിടൂ ഒപ്പമുണ്ട്’’ എന്ന പേരില് സംഘടിപ്പിക്കുന്ന സിഗ്നേച്ചര് കാമ്പയിനിലും വിദ്യാര്ഥികള്ക്കും പൊതുജനങ്ങള്ക്കും പങ്കെടുക്കാമെന്ന് പോലീസ് എസ്എച്ച്ഒ വിനോദ്കുമാര് അറിയിച്ചു.