തീര്ത്തും അപ്രതീക്ഷിതമായ സമാനതകളില്ലാത്ത സാഹചര്യങ്ങളിലൂടെയായിരുന്നു കണ്ണാടിക്കലിലെ അര്ജുന്റെ കുടുംബം കടന്നു പോയത്.
ആദ്യ രണ്ടുദിവസങ്ങളില് അവന് ജീവനോടെ വരുമെന്നായിരുന്നു പ്രതീക്ഷ. പക്ഷെ ദിനങ്ങള് കടന്നുപോയപ്പോള് കാലാവസ്ഥ ചതിച്ചപ്പോള്, ആ കുടുബത്തിന്റെ പ്രതീക്ഷയറ്റു. അതിനിടയില് അര്ജുനില്ലാത്ത ആദ്യ ഓണമെത്തി... കണ്ണീര് സദ്യയുണ്ട് ആ കുടുംബം കാത്തിരുന്നു. ഇന്നലെ വൈകുന്നേരം ദൃശ്യമാധ്യമങ്ങളില് ലോറിയെയും അര്ജുനെയും കണ്ടെത്തിയെന്ന വാര്ത്ത വന്നപ്പോള് മാതാപിതാക്കളും സഹോദരിമാരും വീട്ടിലുണ്ടായിരുന്നു.
ജോലിക്കുപോയ അര്ജുന്റെ ഭാര്യ കൃഷ്ണ പ്രിയ വാര്ത്ത അറിഞ്ഞ് ബാങ്കില്നിന്നു വീട്ടിലെത്തി. തീരാവേദന ഉള്ളിലൊതുക്കിക്കഴിയുന്ന അവരോട് ആശ്വാസ വാക്കുകള് പറയാന്പോലും കഴിയാത്ത അവസ്ഥയില് ബന്ധുക്കളും.