വെളിച്ചെണ്ണവില ഉയർന്നതോടെ മറ്റ് സസ്യ എണ്ണകൾക്കും വില വർധിച്ചുതുടങ്ങിയിട്ടുണ്ട്. പാം ഓയിലിന് നേരത്തേ ലിറ്ററിന് 90 രൂപയായിരുന്നുവിലയെങ്കിൽ നിലവിൽ 125 രൂപയായി വർധിച്ചു.സൂര്യകാന്തി എണ്ണയ്ക്കും വില കൂടിയിട്ടുണ്ട്.
വെളിച്ചെണ്ണ വില കിലോയ്ക്ക് 180-ൽനിന്ന് 220 രൂപയായി. തമിഴ്നാട്ടിൽനിന്ന് ദിവസേന ലോഡ്കണക്കിനു നാളികേരമാണ് കേരളത്തിന്റെ വിപണിയിലേക്ക് എത്തിയിരുന്നത്. വില വർധിച്ചതോടെ തമിഴ്നാട്ടിൽനിന്നുള്ള വരവും കുറഞ്ഞു. ഇത് ആഭ്യന്തരവിപണിയിൽ വീണ്ടും വില വർധിക്കാൻ ഇടയാക്കും.
കോഴിക്കോട്, കാസർഗോഡ് പ്രദേശങ്ങളിലാണ് സംസ്ഥാനത്ത് നാളികേരം കൂടുതലായി ഉത്പാദിപ്പിക്കുന്നത്. തമിഴ്നാട്, കർണാടക തുടങ്ങിയ സംസ്ഥാനങ്ങളിൽ നാളികേരത്തിൽനിന്നും മൂല്യവർധിത ഉത്പ ന്നങ്ങളായ തേങ്ങാപ്പാൽ, തേങ്ങാപ്പൊടി, സൗന്ദര്യവർധക വസ്തുക്കൾ തുടങ്ങിയവ ഉത്പാദിപ്പിക്കാൻ തുടങ്ങിയതും വിപണിയിൽ നാളികേരത്തിന്റെ വരവ് കുറയാൻ ഇടയാക്കിയിട്ടുണ്ട്. ഇതിനു പുറമെ ഇത്തവണ തമിഴ്നാട്ടിൽ ഉത്പാദനം കുറഞ്ഞതും തിരിച്ചടിയായി.