നിലവിലെ കെട്ടിടങ്ങള്‍ക്ക് തകരാറൊന്നുമില്ലെന്നിരിക്കെയാണ് അതേ ആവശ്യത്തിനായി പുതിയ കെട്ടിടങ്ങള്‍ നിര്‍മിക്കുന്നത്. ഈ വിഷയത്തില്‍ സര്‍ക്കാരും പാര്‍ട്ടിയും ഇടപെടണം.
മനുഷ്യരും മൃഗങ്ങളും തമ്മിലുള്ള സംഘര്‍ഷവിഷയത്തില്‍ സര്‍ക്കാര്‍ കൃത്യമായി ഇടപെടാതിരുന്നതിനാല്‍ കഴിഞ്ഞ പാര്‍ലമെന്‍റ്തെരഞ്ഞെടുപ്പില്‍ 20 ശതമാനം വോട്ടാണു പാര്‍ട്ടിക്കു നഷ്ടമായതെന്ന് അന്‍വര്‍ കുറ്റപ്പെടുത്തി. വനത്തിനകത്തുവച്ച് കാട്ടാനയുടെ ആക്രമണത്തില്‍ അപകടം പറ്റിയാല്‍ അതു മനസിലാക്കാം. എന്നാല്‍ നാട്ടിലിറങ്ങി കാട്ടാന മനുഷ്യനെ കൊന്നാല്‍ ആരാണ് ഉത്തരവാദിയെന്ന് എംഎല്‍എ ചോദിച്ചു.
കുളങ്ങള്‍ കുഴിച്ചും മുളകള്‍ വച്ചുപിടിപ്പിച്ചും കാട്ടിനുള്ളില്‍ വന്യമൃഗങ്ങളെ സംരക്ഷിക്കാന്‍ ശ്രമിക്കാതെയുള്ള വന്യമൃഗസംരക്ഷണമാണ് ഇവിടെ വനംവകുപ്പ് നടത്തുന്നത്. ഇതിനൊന്നും വനംവകുപ്പിന്‍റെ കൈയില്‍ പണമില്ല. കോടികള്‍ ചെലവഴിച്ച് കെട്ടിടം നിര്‍മിക്കാന്‍ പണമുണ്ട്.
മരണപ്പെട്ട വനപാലകന്‍റെ മൃതദേഹം വനം ഡിവിഷന്‍ ഓഫീസ് പരിസരത്ത് പൊതുദര്‍ശനത്തിനു വയ്ക്കാന്‍ പോലും മടിച്ച ഡിഎഫ്ഒയ്ക്കെതിരേ എന്തു നടപടി എടുത്തുവെന്നും അന്‍വര്‍ വേദിയിലുണ്ടായിരുന്ന വനം മന്ത്രി എ.കെ. ശശീന്ദ്രനോടു ചോദിച്ചു.
കാട്ടാനയുടെ ആക്രമണത്തില്‍ മരണപ്പെട്ട വിവരം അറിയിക്കാന്‍ ചെന്നയാളോട് 10 ലക്ഷം രൂപ കിട്ടില്ലേ പിന്നെന്താ എന്നാണു ചോദിച്ചത്. ഈ രീതി കമ്യൂണിസമല്ലെന്നും ഉദ്യോഗസ്ഥരെ വരച്ച വരയില്‍ നിര്‍ത്തണമെന്നും അന്‍വര്‍ പറഞ്ഞു.
1972 ലെ വനം നിയമത്തില്‍ കാലോചിതമായ മാറ്റം വരുത്തണമെന്നും എംഎല്‍എ ആവശ്യപ്പെട്ടു. വന്യജീവികളെക്കൊണ്ടുള്ള പ്രയാസം മൂലം കഷ്ടപ്പെടുന്ന കര്‍ഷകരെ സംരക്ഷിക്കണമെന്നാവശ്യപ്പെട്ട് താന്‍ സുപ്രീം കോടതിയെ സമീപിച്ചപ്പോള്‍ സംസ്ഥാന സര്‍ക്കാരിന്‍റെ ഭാഗത്തുനിന്നു വേണ്ട പിന്തുണ ലഭിച്ചില്ലെന്നും അന്‍വര്‍ പറഞ്ഞു.