പക്ഷാഘാത ബോധവത്കരണം : Deepika.com Nattu Visesham

എംഎൽഎയുടെ വ്യാജ പ്രചാരണങ്ങൾക്കെതിരെ റാലിയും പൊതുസമ്മേളനവും ഇന്ന്

മൂവാറ്റുപുഴ: പുതുപ്പാടി-ഇരുമലപ്പടി റോഡ് നിർമാണവുമായി ബന്ധപ്പെട്ട് മാത്യു കുഴൽനാടൻ എംഎൽഎയുടെ വ്യാജ പ്രചാരണങ്ങൾക്കെതിരെ ഇന്ന് മുളവൂരിൽ എൽഡിഎഫ് റാലിയും പൊതുസമ്മേളനവും നടക്കും. വൈകുന്നേരം അഞ്ചിന് മുളവൂർ പിഒ ജംഗ്ഷനിൽനിന്ന് ആരംഭിക്കുന്ന റാലി മുളവൂർ പൊന്നിരിക്കപറമ്പിൽ സമാപിക്കും. തുടർന്ന് പൊതുസമ്മേളനം സിപിഎം ജില്ലാ സെക്രട്ടറിയേറ്റ് അംഗം കെ.എസ്. അരുൺ കുമാർ ഉദ്ഘാടനം ചെയ്യും. മുൻ എംഎൽഎ ബാബുപോൾ, സിപിഎം ഏരിയ സെക്രട്ടറി അനീഷ് എം. മാത്യു എന്നിവർ പ്രസംഗിക്കും.

സംസ്ഥാന വിത്തുത്പാദന കേന്ദ്രത്തിൽ ബോട്ട് ജെട്ടി ഉദ്ഘാടനം നാളെ

ആലുവ: തുരുത്ത് സംസ്ഥാന വിത്തുത്പാദന കേന്ദ്രത്തിൽ നിർമിച്ച ബോട്ട് ജെട്ടിയുടെ ഉദ്ഘാടനം നാളെ ബെന്നി ബഹനാൻ എംപി നിർവ്വഹിക്കും. ജില്ലാ പഞ്ചായത്ത് വികസനഫണ്ടായ 30 ലക്ഷം രൂപ ചെലവഴിച്ചാണ് ബോട്ട് ജെട്ടി നിർമിച്ചത്. കൊച്ചി കപ്പൽശാലയുടെ ഫണ്ടിൽ നിന്ന് ലഭിച്ച 50 ലക്ഷം രൂപ ഉപയോഗിച്ച് നിർമിച്ച സോളാർ ബോട്ടും ഇവിടെ പ്രവർത്തനക്ഷമമാക്കിയിട്ടുണ്ട്.

മാടവന ഭഗവതി ക്ഷേത്രത്തിൽ പ്രതിഷ്ഠാ ദിന മഹോത്സവം

മൂവാറ്റുപുഴ: മാടവന ഭഗവതി ക്ഷേത്രത്തിലെ പ്രതിഷ്ഠാ ദിന മഹോത്സവം നാളെ മുതൽ 30 വരെ നടക്കും. നാളെ രാവിലെ 5.15ന് അഭിഷേകം, ഗണപതി ഹോമം, 7.40ന് കേളികൊട്ട്, എട്ടിന് മഹാമൃത്യുഞ്ജയ ഹോമം, 8.30ന് വലിയ കാണിക്ക, വൈകുന്നേരം ആറിന് വലിയ വിളക്ക്, 6.30ന് സോപാന സംഗീതം, എട്ടിന് പ്രസാദ ഊട്ട്. 29ന് രാവിലെ 8.30ന് സർപ്പത്തിനും രക്ഷസിനും ഘണ്ഠകർണ്ണനും വിശേഷാൽ പൂജ, 9.30ന് കലംകരിക്കൽ, വൈകുന്നേരം 6.45നു ദീപാരാധന, ശേഷം കളമെഴുത്ത്പാട്ട്, 7.20ന് നൃത്തം, എട്ടിന് പ്രസാദഊട്ട്, 8.10ന് അവാർഡ് ദാനവും ആദരിക്കലും. 30ന് രാവിലെ 8.30ന് തന്ത്രി മനയത്താറ്റ് ആര്യൻ നമ്പൂതിരിപ്പാടിന്‍റെ കാർമികത്വത്തിൽ കലശപൂജ, 10.30ന് കലശാഭിഷേകം, വൈകിട്ട് അഞ്ചിന് താലപ്പൊലി രഥ ഘോഷയാത്ര, എട്ടിന് വിശേഷാൽ ദീപാരാധന, 8.15ന് കളമെഴുത്ത്പാട്ട്, 9.30ന് മഹാപ്രസാദ ഊട്ട്, 12ന് തൂക്കം വഴിപാട് എന്നിവയുണ്ടാകും. ക്ഷേത്ര കാര്യദർശി സുദർശൻ ശാന്തി, മേൽശാന്തി സുനിൽ ശാന്തി എന്നിവർ മുഖ്യകാർമികത്വം വഹിക്കും.

മൂവാറ്റുപുഴ നഗര റോഡ് വികസനം : റോഡരികിൽ കേബിള്‍ക്കൂന; പരാതിയുമായി കൗൺസിലർ

മൂവാറ്റുപുഴ: നഗര റോഡ് വികസനത്തിന്‍റെ ഭാഗമായി നീക്കം ചെയ്ത കേബിളുകള്‍ റോഡരികുകളില്‍ കൂട്ടിയിട്ടിരിക്കുന്നതിനെതിരെ പരാതിയുമായി നഗരസഭാ കൗണ്‍സിലര്‍ ജിനു ആന്‍റണി. പിഒ ജംഗ്ഷന്‍ മുതല്‍ കച്ചേരിത്താഴം വരെയുള്ള ഭാഗത്തെ വൈദ്യുത പോസ്റ്റുകള്‍ നീക്കം ചെയ്ത് വരികയാണെങ്കിലും പോസ്റ്റുകളില്‍നിന്ന് നീക്കം ചെയ്ത ഇന്‍റര്‍നെറ്റ് കേബിളുകളടക്കമുള്ളവ റോഡിലും നടപ്പാതകളിലുമായി കൂട്ടിയിട്ടിരിക്കുന്നതിനെതിരെ മൂവാറ്റുപുഴ സ്റ്റേഷന്‍ ഹൗസ് ഓഫീസര്‍ക്കും തഹസീല്‍ദാര്‍ക്കുമാണ് പരാതി നല്‍കിയിരിക്കുന്നത്. വാഹന യാത്രക്കാര്‍ക്കും കാല്‍നട യാത്രക്കാര്‍ക്കും അപകട ഭീഷണി ഉയര്‍ത്തുന്ന കേബിളുകള്‍ നീക്കം ചെയ്യണമെന്ന് കെഎസ്ഇബി ഉദ്യോഗസ്ഥര്‍ നിരവധി തവണ കരാറുകാരോട് ആവശ്യപ്പെട്ടെങ്കിലും നടപടി സ്വീകരിക്കാത്തതിനെ തുടര്‍ന്നാണ് പരാതിയുമായി രംഗത്തെത്തിയതെന്ന് ജിനു ആന്‍റണി പറഞ്ഞു. കേബിളുകള്‍ ഉടന്‍ നീക്കം ചെയ്തില്ലെങ്കില്‍ നിയമപരമായ നടപടി സ്വീകരിക്കണമെന്നും കൗണ്‍സിലര്‍ കൂട്ടിച്ചേർത്തു.

സിപിഐ ആവോലി ലോക്കല്‍ സമ്മേളനം

മൂവാറ്റുപുഴ: സിപിഐ 25-ാമത് പാര്‍ട്ടി കോണ്‍ഗ്രസിന് മുന്നോടിയായുള്ള ആവോലി ലോക്കല്‍ സമ്മേളനത്തിന് തുടക്കമായി. മൂന്ന് ദിവസങ്ങളിലായി നടക്കുന്ന ലോക്കല്‍ സമ്മേളനത്തിന്‍റെ ഭാഗമായി പതാകദിനം, പതാക പ്രചാരണ ജാഥ എന്നിവ നടത്തി. ആഘോഷങ്ങളുടെ ഭാഗമായി ആനിക്കാട് ചിറയില്‍ വാട്ടര്‍ ട്യൂബ് റൈസിംഗും ഒരുക്കിയിരുന്നു. പതാക ദിനത്തിന്‍റെ ഭഗമായി വിവിധ യൂണിറ്റുകളുടെ നേതൃത്വത്തില്‍ പതാകദിനം ആചരിച്ചു. ലോക്കല്‍ സമ്മേളനത്തിന്‍റെ ഭാഗമായി എം.ടി. കുട്ടപ്പന്‍ സ്മൃതി മണ്ഡപത്തില്‍നിന്ന് ആരംഭിച്ച പ്രചാരണ ജാഥ കമ്പനിപ്പടി, ഹോസ്റ്റല്‍ ജംഗ്ഷൻ, രണ്ടാര്‍കര എന്നിവിടങ്ങളില്‍ പര്യടനം നടത്തി ആനിക്കാട് കാനം രാജേന്ദ്രന്‍ നഗറില്‍ സമാപിച്ചു. ശനിയാഴ്ച ആനിക്കാട് സര്‍വീസ് സഹകരണ ബാങ്ക് ഓഡിറ്റോറിയത്തില്‍ നടന്ന പ്രതിനിധി സമ്മേളനം എഐവൈഎഫ് സംസ്ഥാന പ്രസിഡന്‍റ് എന്‍. അരുണ്‍ ഉദ്ഘാടനം ചെയ്തു. ഞായറാഴ്ച നടക്കുന്ന പൊതുസമ്മേളനം നിയമസഭ ഡെപ്യൂട്ടി സ്പീക്കര്‍ ചിറ്റയം ഗോപകുമാര്‍ ഉദ്ഘാടനം ചെയ്യും.

സാഹോദര്യ പദയാത്ര തിങ്കളാഴ്‌ച ജില്ലയിൽ

മൂവാറ്റുപുഴ: നാടിന്‍റെ നന്മയ്‌ക്ക് നമ്മൾ ഒന്നാകണം എന്ന സന്ദേശമുയർത്തി വെൽഫെയർ പാർട്ടി സംസ്ഥാന പ്രസിഡന്‍റ് റസാഖ് പാലേരി നയിക്കുന്ന സാഹോദര്യ പദയാത്ര തിങ്കളാഴ്‌ച ജില്ലയിൽ പ്രവേശിക്കും. വൈകുന്നേരം അഞ്ചോടെ ജില്ലാ അതിർത്തിയായ വാഴക്കുളത്ത് എത്തുന്ന യാത്രയെ ജില്ല പ്രസിഡന്‍റ് സമദ് നെടുമ്പാശേരി, ജില്ല ജനറൽ സെക്രട്ടറിമാരായ എം.കെ. ജമാലുദ്ദീൻ, അസൂറ നാസർ എന്നിവരുടെ നേതൃത്വത്തിൽ ജില്ല കമ്മറ്റി അംഗങ്ങൾ സ്വീകരിക്കുമെന്ന് ജില്ലാ ഭാരവാഹികൾ പത്രസമ്മേളനത്തിൽ അറിയിച്ചു. തുടർന്ന് മൂവാറ്റുപുഴയിൽ എത്തുന്ന യാത്രയെ കക്കടാശേരിയിൽനിന്ന് പദയാത്രയായി പെരുമറ്റം പാലത്തിന് സമീപം തയാറാക്കിയ ജോൺ അമ്പാട്ട് നഗറിലേക്ക് ആനയിക്കും. തുടർന്നു പൊതുസമ്മേളനം. മൂവാറ്റുപുഴ, കോതമംഗലം മണ്ഡലം കമ്മിറ്റികളുടെ നേതൃത്വത്തിലാണ് മൂവാറ്റുപുഴയിൽ സ്വീകരണം ഒരുക്കിയിരിക്കുന്നത്. ചൊവ്വാഴ്ച രാവിലെ കുന്നത്തുനാട്, പള്ളിക്കര, പെരിങ്ങാല എന്നിവിടങ്ങളിലെ സ്വീകരണത്തിന് ശേഷം പെരുമ്പാവൂരിൽ സമാപിക്കും. നാലു ദിവസങ്ങളിലായി ജില്ലയുടെ വിവിധ പ്രദേശങ്ങളിൽ പര്യടനം നടത്തുന്ന യാത്ര മേയ് രണ്ടിന് സമാപിക്കും.

വീൽചെയറും തയ്യൽ മെഷീനും വിതരണം ചെയ്തു

കോതമംഗലം: കോതമംഗലം ലയൺസ് ക്ലബിൽ ഡിസ്ട്രിക്ട് ഗവർണറുടെ സന്ദർശനത്തോടനുബന്ധിച്ചു നാല് നിർധന വനിതകൾക്ക് തയ്യൽ മെഷീൻ ഡിസ്ട്രിക്ട് ഗവർണർ രാജൻ നമ്പൂതിരി വിതരണം ചെയ്തു. കോതമംഗലം ഗവൺമെന്‍റ് ആശുപത്രിയിലെ പാവപ്പെട്ട കിടപ്പുരോഗികൾക് സൗജന്യമായി വിതരണം ചെയ്യുന്നതിനായി എട്ടു വീൽചെയറുകൾ എംഎ എൻജിനീയറിംഗ് കോളജ് എൻഎസ്എസ് വോളന്‍റിയർമാർക്ക് കൈമാറി. ലയണിസ്റ്റിക് ജില്ലയിലെ മികച്ച പ്രവർത്തനം കാഴ്ചവച്ചതിന് ക്ലബ്‌ ഭാരവാഹികളെ ഡിസ്ട്രിക്ട് ഗവർണർ അനുമോദിച്ചു. ക്ലബ്‌ പ്രസിഡന്‍റ് ബിനോജ് ജോർജ് അധ്യക്ഷത വഹിച്ചു. ലയൺസ് പ്രസ്ഥാനത്തിൽ 55 വർഷമായി മികച്ച പ്രവർത്തനം നടത്തുന്നതിന് മൊണാർക്ക് ഷെവറോൺ അവാർഡ് മുൻ മന്ത്രി ഷെവലിയാർ ടി.യു. കുരുവിളയ്‌ക്ക് നൽകി ആദരിച്ചു.

മുറിക്കല്ല് ബൈപ്പാസ് ടെൻഡർ; മികച്ച പ്രതികരണമെന്ന് എംഎൽഎ

മാർപാപ്പ അനുസ്മരണം

കോതമംഗലം: കീരംപാറ സെന്‍റ് സെബാസ്റ്റ്യൻസ് ഇടവകയിൽ പരിശുദ്ധ ഫ്രാൻസിസ് മാർപാപ്പയുടെ നിര്യാണത്തിൽ അനുശോചനവും കരുണക്കൊന്ത റാലിയും നടത്തി. മാർപാപ്പയ്ക്കായി വികാരി ഫാ. മാത്യു കൊച്ചുപുരക്കൽ ദേവാലയത്തിൽ പ്രത്യേകം ദിവ്യബലിയർപ്പിച്ച് അനുസ്മരണ പ്രഭാഷണം നടത്തി. ദിവ്യബലിക്ക് ശേഷം പാപ്പയുടെ ചിത്രത്തിൽ ഇടവക സമൂഹം പുഷ്പാർച്ചനയും പാപ്പയുടെ ഫോട്ടോയും വഹിച്ച് ടൗൺചുറ്റി കരുണക്കൊന്ത റാലിയും നടത്തി. പരിപാടികൾക്ക് വികാരി ഫാ. മാത്യു കൊച്ചുപുരയ്ക്കൽ, മൈക്കിൾ തെക്കേകുടി, ജെയിംസ് തേക്കേക്കര, ജിജി പുളിക്കൽ, ജോൺസൻ കറുകപ്പിള്ളിൽ, ജോസ് കച്ചിറ, ഷോജി കണ്ണംപുഴ എന്നിവർ നേതൃത്വം നൽകി. വാഴക്കുളം: സെന്‍റ് ജോർജ് ഫൊറോന പള്ളിയുടെ ആഭിമുഖ്യത്തിൽ ഫ്രാൻസിസ് പാപ്പ അനുസ്മരണം നടത്തി. വികാരി ഫാ. ഫ്രാൻസിസ് ആലപ്പാട്ട് യോഗത്തിൽ അധ്യക്ഷത വഹിച്ചു. കാലത്തിനതീതമായി സഭയെ നയിച്ച അപൂർവ വ്യക്തിത്വമായിരുന്നു ഫ്രാൻസിസ് മാർപാപ്പയെന്ന് യോഗം അനുസ്മരിച്ചു. ഫാ. ജോസ് മോനിപ്പിള്ളി, ഫാ. ജോൺസൺ വാമറ്റത്തിൽ, ഫാ. ജോസഫ് കൊച്ചുപുത്തൻപുരയിൽ, ജോസ് പുതിയടം, രാജീവ് കുന്നംകുളത്തിൽ, ലിസി ഇടപ്പഴത്തിൽ, ജോഷ്വ ആക്കപ്പടിക്കൽ എന്നിവർ പ്രസംഗിച്ചു.

പഹൽഗാം ആക്രമണം; ഭീകരവിരുദ്ധ പ്രതിജ്ഞ ചൊല്ലി

കോലഞ്ചേരി: ജമ്മു കശ്മീരിലെ പഹൽഗാമിൽ നടന്ന ഭീകരക്രമണത്തെ അപലപിച്ചുകൊണ്ട് ഇന്ത്യൻ നാഷണൽ കോൺഗ്രസ് പുത്തൻകുരിശ് മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ മെഴുകുതിരി കത്തിച്ച് ഐക്യദാർഢ്യ സദസും ഭീകരവിരുദ്ധ പ്രതിജ്ഞയും ചൊല്ലി. മണ്ഡലം പ്രസിഡന്‍റ് മനോജ്‌ കാരക്കാട്ടിലിന്‍റെ അധ്യക്ഷതയിൽ കെപിസിസി സെക്രട്ടറി ഐ.കെ. രാജു യോഗം ഉദ്ഘാടനം ചെയ്തു. പുത്തൻകുരിശ് ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് പോൾസൺ പീറ്റർ ഭീകരവിരുദ്ധ പ്രതിജ്ഞ ചൊല്ലിക്കൊടുത്തു.

ഹെറോയിനുമായി ആസാം സ്വദേശി അറസ്റ്റിൽ

കോതമംഗലം: ഹെറോയിനുമായി ആസാം സ്വദേശി അറസ്റ്റിൽ. ആസം മോറിഗോണ്‍ സ്വദേശി അജിജുല്‍ ഇസ്ലാം (39) ആണ് അറസ്റ്റിലായത്. 6.861 ഗ്രാം ഹെറോയിനുമായി കുറ്റിലഞ്ഞി പുതുപ്പാലം ഭാഗത്തുവച്ചാണ് പ്രതിയെ പിടികൂടിയത്. കോതമംഗലം എക്സൈസ് സർക്കിൾ ഇൻസ്പെക്ടർ രാജേഷ് ജോണിന്‍റെ നേതൃത്വത്തിലുള്ള സംഘമാണ് അറസ്റ്റ് ചെയ്തത്.

റോഡരികിൽ തടസമായി പൈപ്പുകൾ

കുടിവെള്ള പദ്ധതിക്ക് എത്തിച്ച പൈപ്പുകളാണ് നീക്കാതെ കടിക്കുന്നത് കോതമംഗലം: നെല്ലിമറ്റം-ഉപ്പുകുളം-ഊന്നുകല്‍ റോഡിന്‍റെ പലഭാഗങ്ങളിലും ഉപയോഗം കഴിഞ്ഞ് കൂട്ടിയിട്ടിരിക്കുന്ന വലിയ പൈപ്പുകൾ നീക്കം ചെയ്യാത്തത് വാഹന യാത്രക്കാർക്ക് തടസമാകുന്നു. കവളങ്ങാട് പഞ്ചായത്തിലെ കുടിവെള്ള പദ്ധതിക്ക് വേണ്ടി ഇറക്കിയ പൈപ്പുകളാണ് റോഡരികില്‍ കൂട്ടിയിട്ടിരിക്കുന്നത്. നെല്ലിമറ്റം-ഉപ്പുകുളം-ഊന്നുകല്‍ റോഡിന്‍റെ പലഭാഗങ്ങളിലും വലിയ പൈപ്പുകളുടെ കൂട്ടം കാണാം. കുടിവെള്ള പദ്ധതിയുടെ ആവശ്യത്തിന് ഉപയോഗിച്ച ശേഷം ബാക്കിവന്ന പൈപ്പുകളാണ് നീക്കം ചെയ്യാതെ റോഡരികില്‍തന്നെ ഇട്ടിരിക്കുന്നത്. വീതി കുറഞ്ഞ റോഡാണിവിടെ. പൈപ്പുകള്‍മൂലം വാഹനങ്ങള്‍ക്ക് സൈഡുകൊടുക്കാന്‍ കഴിയില്ല. വാഹനങ്ങള്‍ പെട്ടെന്ന് വെട്ടിച്ചുമാറ്റേണ്ടിവരുമ്പോള്‍ പൈപ്പുകളില്‍തട്ടി അപകടമുണ്ടാകാറുണ്ട്. ഇരുചക്ര വാഹനങ്ങള്‍ക്കാണ് കൂടുതല്‍ ഭീഷണി. രാത്രിയില്‍ പൈപ്പുകള്‍ കാണാനും പ്രയാസമാണ്. അപകടകരമായി കിടക്കുന്ന പൈപ്പുകള്‍ നീക്കാത്തതില്‍ നാട്ടുകാര്‍ക്ക് പ്രതിഷേധമുണ്ട്. താലൂക്ക് വികസനസമിതിയിലുള്‍പ്പെടെ പലതവണ ഈ പ്രശ്നം ഉന്നയിച്ചെങ്കിലും പരിഹാരം കാണാന്‍ അധികൃതര്‍ തയാറാകുന്നില്ല.

ഐക്യദാർഢ്യവുമായി വ്യാപാരികൾ

ഏലൂർ: പഹൽഗാമിൽ തീവ്രവാദികളാൽ കൊല്ലപ്പെട്ട എൻ. രാമചന്ദ്രൻ ഉൾപ്പെടെയുള്ളവരുടെ കുടുംബങ്ങൾക്ക് കേരള വ്യാപാരി വ്യവസായി ഏകോപന സമിതി ഏലൂർ യൂണിറ്റ് ഐക്യദാർഢ്യം പ്രഖ്യാപിച്ചു. ഏലൂർ ഗോപിനാഥ് അധ്യക്ഷത വഹിച്ചു. എസ്. രംഗൻ, കെ.കെ. നസീർ, എം.എക്സ്. സിസോ, കെ.ബി. സക്കീർ, രേണു വേണുഗോപാൽ തുടങ്ങിയവർ പങ്കെടുത്തു.

മലിഗ്നന്‍റ് ബോണ്‍ ട്യൂമര്‍ കോഴ്‌സ് ഇന്ന് സമാപിക്കും

കൊച്ചി: അമൃത ആശുപത്രിയിലെ ഓര്‍ത്തോപീഡിക്‌സ് വിഭാഗം സംഘടിപ്പിച്ച ദ്വിദിന മലിഗ്നന്‍റ് ബോണ്‍ ട്യൂമര്‍ കോഴ്‌സ് ഇന്ന് സമാപിക്കും. മലിഗ്നന്‍റ് ബോണ്‍ ട്യൂമറുകൾ സംബന്ധിച്ച് അടിസ്ഥാന ബോധവത്കരണം നടത്തുന്നതിനായി തിയറിയുടെയും കേസ് ചര്‍ച്ചകളുടെയും സഹായത്തോടെ ആണ് കോഴ്‌സ് നടക്കുന്നത്. കോഴ്‌സിന്‍റെ ഉദ്ഘാടനം അമൃത ഹോസ്പിറ്റല്‍സ് ഗ്രൂപ്പ് മെഡിക്കല്‍ ഡയറക്ടര്‍ ഡോ. പ്രേം നായര്‍ നിര്‍വഹിച്ചു. കൊച്ചി അമൃത ആശുപത്രി ഓര്‍ത്തോപ്പീഡിക്‌സ് വിഭാഗം മേധാവിയും ഓര്‍ഗനൈസിംഗ് ചെയര്‍മാനുമായ ഡോ. കെ.കെ. ചന്ദ്രബാബു, ചീഫ് മെഡിക്കല്‍ അഡ്മിനിസ്‌ട്രേറ്റര്‍ ഡോ. പ്രതാപന്‍ നായര്‍, സീനിയര്‍ മെഡിക്കല്‍ അഡ്മിനിസ്‌ട്രേറ്റര്‍ ഡോ. അജോയ് മേനോന്‍, അമല ആശുപത്രി ഓര്‍ത്തോപ്പീഡിക്‌സ് വിഭാഗം മേധാവി ഡോ. ഡൊമിനിക് പുത്തൂര്‍ തുടങ്ങിയവരും പങ്കെടുത്തു.

ആലുവ മാർക്കറ്റ് കെട്ടിട സമുച്ചയം നിർമാണോദ്ഘാടനം ഇന്ന്

ആലുവ: പതിനൊന്ന് വർഷം മുമ്പ് തറക്കല്ലിട്ടിട്ടും ഫണ്ട് ലഭിക്കാതെ നീണ്ടുപോയ ആലുവ മാർക്കറ്റ് കെട്ടിട സമുച്ചയത്തിന്‍റെ നിർമാണോദ്ഘാടനം ഇന്ന് നടക്കും. മുഖ്യമന്ത്രി പിണറായി വിജയൻ ഉദ്ഘാടകനാകുന്ന ചടങ്ങിൽ കേന്ദ്ര ഫിഷറീസ് സഹമന്ത്രി ജോർജ് കുര്യൻ, സംസ്ഥാന ഫിഷറീസ് മന്ത്രി സജി ചെറിയാൻ എന്നിവരും പങ്കെടുക്കും. 50 കോടി ചെലവ് പ്രതീക്ഷിക്കുന്ന പദ്ധതിക്ക് പ്രധാനമന്ത്രി മത്സ്യസമ്പത്ത് യോജനയിൽ നിന്നും 30 കോടി രൂപ അനുവദിച്ചതോടെയാണ് കെട്ടിട സമുച്ചയം യാഥാർഥ്യമാവുന്നത്. ശേഷിച്ച 20 കോടി രൂപയിൽ 15 കോടി കേരള സർക്കാരും, അഞ്ച് കോടി ആലുവ മുനിസിപ്പാലിറ്റിയും വഹിക്കും. ബാങ്ക് വായ്പ സ്വീകരിച്ച് രണ്ടരയേക്കർ ഭൂമിയിൽ കെട്ടിട സമുച്ചയം നിർമിക്കാമെന്ന പ്രതീക്ഷയിലാണ് 2014ൽ പഴയ കെട്ടിടം പൊളിച്ചു കളഞ്ഞത്. എന്നാൽ സ്ഥലത്തിന്‍റെ ആധാരം കാണാതായതോടെ വായ്പാ വാഗ്ദാനത്തിൽ നിന്ന് ബാങ്ക് പിൻമാറി. പിന്നീട് കിഫ്ബിയും വിവിധ സർക്കാർ ഏജൻസികളും താത്പര്യം കാണിച്ചെങ്കിലും ഒന്നും നടന്നില്ല. കഴിഞ്ഞ വർഷമാണ് കേന്ദ്ര സർക്കാർ അനിശ്ചിതത്വത്തിലായ പദ്ധതി പരിഗണിച്ച് 30 കോടി അനുവദിച്ചത്. പുതുതായി നിർമിക്കുന്ന മാർക്കറ്റിന്‍റെ രൂപരേഖ പ്രകാരം ബേസ്‌മെന്‍റ് ഫ്ലോർ, ഗ്രൗണ്ട് ഫ്ലോർ, മെസാനിൻ ഫ്ലോർ, ഒന്നാം നില ഇങ്ങനെ നാലു നിലകളിലായി 1,82,308 ചതുരശ്ര അടിയിലാണ് നിർമാണം. മൽസ്യ-മാംസാദികൾ ശീതീകരിച്ച് സൂക്ഷിക്കുന്നതിനും ഇവിടെ സൗകര്യം ഉണ്ടായിരിക്കും. മലിനജലം ശുദ്ധീകരിക്കുന്നതിന് ട്രീറ്റ്മെന്‍റ് പ്ലാന്‍റും രൂപരേഖയിൽ ഉൾപ്പെടുത്തിയിട്ടുണ്ട്.

ചമയം ഫിലിം ഫെസ്റ്റിവൽ സമാപിച്ചു

മൂക്കന്നൂർ: മൂക്കന്നൂർ ഗവ. ഹയർ സെക്കൻഡറി സ്കൂളിൽ നടന്നുവന്ന ത്രിദിന ‘ചമയം ഫിലിം ഫെസ്റ്റിവൽ 2025’ സമാപിച്ചു. മുൻ മന്ത്രി ജോസ് തെറ്റയിൽ ഉദ്ഘാടനം ചെയ്ത ഫെസ്റ്റിവലിൽ ഗ്രാമപഞ്ചായത്ത് പ്രസിഡന്‍റ് കെ.വി. ബിബീഷ് അധ്യക്ഷത വഹിച്ചു. മലയാള സിനിമകളുടെ പ്രദർശന വിഭാഗത്തിൽ ജി. അരവിന്ദൻ സംവിധാനംചെയ്ത കുമ്മാട്ടിയും മറ്റു ലഘുചിത്രങ്ങളും പ്രദർശിപ്പിച്ചു.‘മാറുന്ന മലയാള സിനിമ' എന്ന വിഷയത്തിൽ മുരിങ്ങൂർ ഡിവൈൻ ഇൻസ്റ്റിറ്റ്യൂട്ട് ഓഫ് മീഡിയ സയൻസ് പ്രിൻസിപ്പൽ റവ. ഡോ. റോബിൻ ചിറ്റൂപറമ്പൻ ക്ലാസ് നയിച്ചു. പൂർവവിദ്യാർഥിയും സംഗീത ആൽബങ്ങളിലൂടെ ശ്രദ്ധേയനുമായ ബിജു മൂക്കന്നൂരിനെ ഫെറ്റിവലിൽ ആദരിച്ചു. ലോകസിനിമാ വിഭാഗത്തിൽ ഇംഗ്ലിഷ് ചിത്രവും തമിഴ് ഹ്രസ്വചിത്രവും പ്രദർശിപ്പിച്ചു.

ലഹരിക്കെതിരെ കീഴ്മാട് ജനകീയ സദസ്

ആലുവ : രാസ ലഹരിയുടെ മാരക വിപത്തിനെതിരെ അതിജീവനം എന്ന ലക്ഷൃത്തോടെ കീഴ്മാട് ഗ്രാമപഞ്ചായത്തിൽ രൂപീകരിച്ച ജനകീയ കൂട്ടായ്മയുടെ നേതൃത്വത്തിൽ ജനകീയ സദസ് ഇന്ന് കുട്ടമശേരിയിൽ നടക്കും. അൻവർ സാദത്ത് എംഎൽഎ ഉദ്ഘാടനം ചെയ്യും. റൂറൽ ജില്ലാ പോലീസ് മേധാവി എം. ഹേമലത, മഞ്ചേരി ചീഫ് ജുഡീഷ്യൽ മജിസ്ട്രേറ്റ് ടി.ബി. ഫസീല, സിനി ആർട്ടിസ്റ്റ് കലാഭവൻ നവാസ് തുടങ്ങിയവർ പങ്കെടുക്കും.

ഏബ്രഹാം മാര്‍ സേവേറിയോസ് മെത്രാപ്പോലീത്തയ്ക്ക് പുരസ്‌കാരം

പെരുമ്പാവൂര്‍: മൂല്യാധിഷ്ഠിത ജീവിതത്തിന് പ്രേരണയും പ്രചാരണവും നല്‍കുന്ന മികച്ച മലയാള കൃതിക്കുള്ള വായന പൂര്‍ണിമയും എല്‍ദോസ് കുന്നപ്പിള്ളി എംഎല്‍എയുടെ ‘ലൗവ് മൈ ലൈബ്രറി ' പദ്ധതിയും ചേര്‍ന്ന് ഏര്‍പ്പെടുത്തിയ സാഹിത്യ ശ്രേഷ്ഠ പുരസ്‌കാരം ഏബ്രഹാം മാര്‍ സേവേറിയോസ് വലിയ മെത്രാപ്പോലീത്തയ്ക്ക് ലഭിച്ചു. ദിനംതോറും വൈദികതയിലേക്ക് എന്ന പുസ്തകത്തിനാണ് പുരസ്‌കാരം. എല്‍ദോസ് കുന്നപ്പിള്ളി എംഎല്‍എ സേവേറിയോസ് മെത്രാപ്പോലീത്തയ്ക്ക് പുരസ്‌കാരം സമ്മാനിച്ചു. വായന പൂര്‍ണിമ കോ-ഓർഡിനേറ്റര്‍ ഇ.വി. നാരായണന്‍, കേരള പ്രദേശ് ഗാന്ധിദര്‍ശന്‍ വേദി സംസ്ഥാന സെക്രട്ടറി എം.പി. ജോര്‍ജ്, അജിത് കടമ്പനാട് എന്നിവര്‍ പ്രസംഗിച്ചു.

പറവൂര്‍ സെന്‍റ് തോമസ് യാക്കോബായ പള്ളിയില്‍ ശ്രേഷ്ഠ ബാവയ്ക്ക് സ്വീകരണം നല്‍കി

പറവൂര്‍: യാക്കോബായ സഭയുടെ പുതിയ ശ്രേഷ്ഠ കാതോലിക്ക മാര്‍ ബസേലിയോസ് ജോസഫ് ബാവയ്ക്ക് പറവൂര്‍ സെന്‍റ് തോമസ് യാക്കോബായ സുറിയാനി പള്ളിയില്‍ സ്വീകരണം നല്‍കി. മെത്രാപ്പോലീത്തമാരായ മാത്യൂസ് മാര്‍ അന്തിമോസ്, ഗീവര്‍ഗീസ് മാര്‍ അത്താനാസിയോസ്, വികാരി ഫാ. എല്‍ദോ ആലൂക്ക, ഫാ.എല്‍ദോ വര്‍ഗീസ് കുളങ്ങര, ഫാ. ഡോണ്‍ പോള്‍ താടിക്കാരന്‍, ബന്ന്യമിന്‍ മുളയിരിക്കല്‍ റമ്പാന്‍, സ്ളീബ കൊള്ളന്നൂര്‍ റമ്പാന്‍, കോട്ടയ്ക്കാവ് സെന്‍റ് തോമസ് ഫൊറോന വികാരി ഫാ. ജോസ് പുതിയേടത്ത്, ഫാ.സുജിത്ത് കോവേലില്‍, ഫാ. ഏബ്രഹാം ആലിയാട്ടുകുടി, ഫാ. ജോര്‍ മാത്യു അരിമ്പൂര്, ഫാ.എല്‍ദോസ് വെള്ളരിങ്ങല്‍, ഫാ. എല്‍ദോസ് കാക്കനാട്ട്, പള്ളി സെക്രട്ടറി പ്രഫാ. രഞ്ജന്‍ ഏബ്രഹാം തുടങ്ങി‌യവരും വിശ്വാസികളും ചേര്‍ന്ന് കത്തിച്ച മെഴുകുതിരികളുമായി സ്വീകരണത്തിന് നേതൃത്വം നല്‍കി. പഴയ കെഎസ്ആര്‍ടിസി സ്റ്റാന്‍ഡില്‍ എത്തിയ കാല്‍നട തീര്‍ഥാടകരെ ശ്രേഷ്ഠ ബാവയും മെത്രാപ്പോലീത്തമാരും വൈദികരും വിശ്വാസികളും ചേര്‍ന്ന് സ്വീകരിച്ചു. പ്രാര്‍ഥനയ്ക്കുശേഷം അനുമോദനസമ്മേളനവും ഉപഹാര സമര്‍പ്പണവും പ്രതിപക്ഷനേതാവ് വി.ഡി.സതീശന്‍ ഉദ്ഘാടനം ചെയ്തു. മെത്രാപ്പോലീത്തമാരായ മാത്യൂസ് മാര്‍ അന്തിമോസ്, മാത്യൂസ് മാര്‍ ഇവാനിയോസ്, ഗീവര്‍ഗീസ് മാര്‍ അത്താനാസിയോസ്, ഏലിയാസ് മാര്‍ യൂലിയോസ്, മുന്‍ മന്ത്രി എസ്.ശര്‍മ നഗരസഭാ ചെയര്‍പേഴ്‌സണ്‍ ബീന ശശിധരന്‍ തുടങ്ങിയവർ പ്രസംഗിച്ചു. ഇന്ന് രാവിലെ ആറിന് പ്രഭാത പ്രാര്‍ഥന, 6.30 ന് കബറിങ്കല്‍ കുര്‍ബാന. ഒമ്പതിന് മൂന്നിന്മേല്‍ കുര്‍ബാന, ഉച്ചക്ക് 12ന് നേര്‍ച്ച സദ്യ എന്നിവ ഉണ്ടാകും.

കോണ്‍ഗ്രസും സിപിഎമ്മും തീവ്രവാദത്തെ പിന്തുണയ്ക്കുന്നു: ബിജെപി

കൊച്ചി: കാഷ്മീരിലെ പഹല്‍ഗാമില്‍ നടന്ന ഭീകരാക്രമണത്തെ അപലപിക്കാന്‍ പോലും തയാറാകാത്ത കോണ്‍ഗ്രസും സിപിഎമ്മും തീവ്രവാദത്തെ പ്രോത്സാഹിപ്പിക്കുന്ന നടപടിയാണ് സ്വീകരിക്കുന്നതെന്ന് ബിജെപി സംസ്ഥാന വക്താവ് കെ.വി.എസ്. ഹരിദാസ്. ബിജെപി സിറ്റി ജില്ലാ നേതൃയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കാഷ്മീരിലെ സമാധാനത്തെയും വികസനത്തെയും അട്ടിമറിക്കുന്നതിനുള്ള ശ്രമമാണ് പാക്കിസ്ഥാന്‍ പിന്തുണയോടെ ഭീകരവാദികള്‍ നടത്തിയത്. കേരളത്തില്‍ ഇതിന്‍റെ പേരില്‍ വിഭാഗീയത സൃഷ്ടിക്കാനാണ് വി.ഡി. സതീശനും വി.ടി. ബലറാമിനെ പോലുള്ള കോണ്‍ഗ്രസ് നേതാക്കളും എം.എ. ബേബി, എം.വി.ഗോവിന്ദന്‍ തുടങ്ങിയ സിപിഎം നേതാക്കളും നടത്തുന്നതെന്നും അദ്ദേഹം ആരോപിച്ചു. ബിജെപി ജില്ലാ ഓഫീസില്‍ നടന്ന യോഗത്തില്‍ സിറ്റി ജില്ലാ പ്രസിഡന്‍റ് അഡ്വ. കെ.എസ്. ഷൈജു അധ്യക്ഷത വഹിച്ചു. ജില്ലാ ജനറല്‍ സെക്രട്ടറിമാരായ അഡ്വ. എസ്. സജി, ശ്രീക്കുട്ടന്‍ തുണ്ടത്തില്‍, അഡ്വ. പ്രിയ പ്രശാന്ത് തുടങ്ങിയവരും പങ്കെടുത്തു.

ചാപ്പ കടപ്പുറത്തെ പട്ടികവര്‍ഗ കുടുംബങ്ങളുടെ ഭവന നിര്‍മാണോദ്ഘാടനം മേയ് അവസാനം

വൈപ്പിൻ: ചാപ്പ കടപ്പുറത്തെ ഭൂരഹിത പട്ടികവര്‍ഗ കുടുംബങ്ങളെ പുനരധിവസിപ്പിക്കുന്നതിന് ലാന്‍ഡ് ബാങ്ക് പദ്ധതിയുടെ ഭാഗമായി എളങ്കുന്നപ്പുഴയില്‍ വാങ്ങിയ ഭൂമിയില്‍ അതിര്‍ത്തി കല്ല്, ഇന്‍റേണല്‍ റോഡ്, ഭവനം എന്നിവയുടെ നിര്‍മാണോദ്ഘാടനം മേയ് അവസാനത്തോടുകൂടി നടക്കുമെന്ന് കെ. എന്‍. ഉണ്ണികൃഷ്ണന്‍ എംഎല്‍എ ജില്ലാ വികസന സമിതി യോഗത്തിൽഅറിയിച്ചു. അടിസ്ഥാന സൗകര്യങ്ങള്‍ ലഭ്യമാക്കുന്നതിന് ജില്ലാ നിര്‍മിതി കേന്ദ്രത്തിന് അറിയിപ്പ് നല്‍കിയിട്ടുണ്ട്. ഇതുമായി ബന്ധപ്പെട്ട നടപടികള്‍ ഉടനടി പൂര്‍ത്തികരിക്കാന്‍ ജില്ലാ കളക്ടറേറ്റ് കോണ്‍ഫറന്‍സ് ഹാളില്‍ നടന്ന ജില്ലാ വികസന സമിതി യോഗത്തില്‍ എംഎല്‍എ ഉദ്യോഗസ്ഥർക്ക് നിര്‍ദേശം നല്‍കി. ജില്ലാ കളക്ടർ എൻ. എസ്.കെ. ഉമേഷ് അധ്യക്ഷനായിരുന്നു.

പൂര്‍വ വിദ്യാര്‍ഥി സംഗമം

കൊച്ചി : ചാത്യാത്ത് സെന്‍റ് ജോസഫ്‌സ് ഹൈസ്‌കൂള്‍ ശതാബ്ദി ആഘോഷങ്ങളോടനുബന്ധിച്ച് ഗുരുവന്ദനവും പൂര്‍വ വിദ്യാര്‍ഥി സംഗമവും ഇന്ന് സ്‌കൂള്‍ ഓഡിറ്റോറിയത്തില്‍ നടക്കും. 100 വര്‍ഷം പിന്നിടുന്ന സെന്‍റ് ജോസഫ്‌സ് ഹൈസ്‌കൂളിലെ 90 ല്‍പരം പൂര്‍വ അധ്യാപകരെയും അനധ്യാപകരെയും പൂര്‍വവിദ്യാര്‍ഥികള്‍ ആദരിക്കും. മൺമറഞ്ഞുപോയ അധ്യാപകർക്കും അനധ്യാപകര്‍ക്കും സ്മൃതി മണ്ഡപത്തില്‍ പുഷ്പാര്‍ച്ചന നടത്തിയാണ് ഗുരുവന്ദനം ആരംഭിക്കുന്നത്. ഉച്ചയ്ക്ക് രണ്ടിന് പിന്നണി ഗായകന്‍ കെസ്റ്ററിന്‍റെ വന്ദനാലാപനത്തോടെ ആരംഭിക്കുന്ന ഗുരുവന്ദന യോഗത്തില്‍ മാനേജര്‍ ഫാ. പോള്‍സണ്‍ കൊറ്റിയത്ത് അധ്യക്ഷത വഹിക്കും. തുടര്‍ന്ന് ചേരുന്ന ശതാബ്ദിയാഘോഷ ജനറല്‍ ബോഡി യോഗത്തില്‍ പ്രധാനാധ്യാപിക വി.എസ്.അനിത അധ്യക്ഷയായിരിക്കും.

സംസ്ഥാന വിത്തുത്പാദന കേന്ദ്രത്തിൽ ബോട്ട് ജെട്ടി ഉദ്ഘാടനം നാളെ

ആലുവ: തുരുത്ത് സംസ്ഥാന വിത്തുത്പാദന കേന്ദ്രത്തിൽ നിർമിച്ച ബോട്ട് ജെട്ടിയുടെ ഉദ്ഘാടനം നാളെ ബെന്നി ബഹനാൻ എംപി നിർവ്വഹിക്കും. ജില്ലാ പഞ്ചായത്ത് വികസനഫണ്ടായ 30 ലക്ഷം രൂപ ചെലവഴിച്ചാണ് ബോട്ട് ജെട്ടി നിർമിച്ചത്. കൊച്ചി കപ്പൽശാലയുടെ ഫണ്ടിൽ നിന്ന് ലഭിച്ച 50 ലക്ഷം രൂപ ഉപയോഗിച്ച് നിർമിച്ച സോളാർ ബോട്ടും ഇവിടെ പ്രവർത്തനക്ഷമമാക്കിയിട്ടുണ്ട്.

മാല മോഷണം പോയെന്ന ഭാര്യയുടെ പരാതിയിൽ ഭർത്താവിന് പോലീസ് മർദനമെന്ന്

ചോറ്റാനിക്കര: ഭാര്യയുടെ പരാതിയിൽ മാല മോഷണം പോയ കേസിന്‍റെ അന്വേഷണത്തിനായി സ്റ്റേഷനിൽ വിളിച്ചുവരുത്തിയ ഭർത്താവിനെ പോലീസ് മർദിച്ചതായി പരാതി. ചോറ്റാനിക്കരയിൽ വാടകയ്ക്ക് താമസിക്കുന്ന കൊല്ലം കുണ്ടറ പെരുമ്പുഴ പുനുക്കന്നൂർ ചേരിയിൽ ബിനോദ് (37) നെ ചോറ്റാനിക്കര സിഐ മർദിച്ചവശനാക്കിയതായാണ് പരാതി. കഴിഞ്ഞ 16ന് കേസന്വേഷണത്തിനായി ബിനോദിനെയും ഭാര്യ ഷൈനിയെയും വിളിച്ചുവരുത്തി വിവരങ്ങൾ ശേഖരിച്ച സിഐ പി.കെ. മനോജ് ഇരുവരെയും മടക്കിയയച്ചു. പിന്നീട് കൊല്ലത്തേക്ക് പോയ ബിനോദിനെ 22ന് വീണ്ടും സ്റ്റേഷനിലേക്ക് വിളിപ്പിക്കുകയും സിഐ വീണ്ടും ചോദ്യം ചെയ്യുകയും, മാല എടുത്തിട്ടില്ലെന്ന് ആവർത്തിച്ചതോടെ ക്രൂരമായി മർദിക്കുകയുമായിരുന്നെന്ന് പരാതിയിൽ പറയുന്നു. സ്വർണം വാങ്ങിക്കൊടുക്കാമെന്ന് സമ്മതിക്കുന്നതുവരെ മർദനം തുടർന്നു. പിന്നീട് വഴിയിലിറക്കിവിടുകയായിരുന്നു. ഇരുചക്ര വാഹനം വാങ്ങുന്നതിനെ തുടർന്നുള്ള തർക്കമാണ് പരാതിയിലെത്തിയതെന്നും കാണാതായ മാല വീട്ടിൽ നിന്നും കണ്ടെടുത്തതായും ബിനോദ് പറഞ്ഞു. സംഭവത്തിൽ മുഖ്യമന്ത്രിക്കും റൂറൽ എസ്പിക്കും ഇയാൾ പരാതി നൽകിയിട്ടുണ്ട്.

ദേശീയപാത സർവീസ് റോഡിൽ ഒഴിപ്പിച്ച കൈയേറ്റങ്ങൾ തിരികെയെത്തുന്നു

ആലുവ: ഒരു മാസത്തിനിടെ ആലുവ നഗരസഭാ ആരോഗ്യ വിഭാഗം കൈയേറ്റമൊഴിപ്പിച്ച ദേശീയപാത സർവീസ് റോഡിൽ വീണ്ടും അനധികൃത കച്ചവടങ്ങൾ തകൃതിയെന്ന് പരാതി. കൂടാതെ ദേശീയപാത മേൽപ്പാലത്തിനടിയിൽനിന്ന് ഒഴിപ്പിച്ച ലോട്ടറി കച്ചവട സ്റ്റാളുകളും തിരികെയെത്തിയിട്ടുണ്ട്. മെട്രോ പില്ലർ നമ്പർ 20 മുതൽ 30 വരെയുള്ള ഭാഗത്താണ് കൈയേറ്റം രൂക്ഷമായിരിക്കുന്നത്. പച്ചക്കറി മാർക്കറ്റിന് സമീപത്തെ സർവീസ് റോഡാണ് വീണ്ടും കൈയേറ്റക്കാരുടെ പിടിയിലായിരിക്കുന്നത്. ഇവിടെനിന്നും രണ്ടുവട്ടം നഗരസഭാ അധികൃതർ കൈയേറ്റക്കാരെ ഒഴിപ്പിച്ചിരുന്നു. വാഹനങ്ങൾ കടന്നുപോകുന്നതിനും കാൽ നടയാത്രക്കാർക്കും തടസം സൃഷ്ടിച്ചാണ് അനധികൃത കച്ചവടം. ഇതിനെതിരെ പൊതുപ്രവർത്തകൻ ആർ. പത്മകുമാർ വീണ്ടും ദേശീയപാത, ആലുവ നഗരസഭ, കൊച്ചി മെട്രോ എന്നിവർക്ക് പരാതി നൽകിയിട്ടുണ്ട്.

ഹെറോയിനുമായി ജെറ്റ് ഭായ് അറസ്റ്റിൽ

പെരുമ്പാവൂർ: രണ്ട് ലക്ഷം രൂപ വിലമതിക്കുന്ന ഹെറോയിനുമായി ഹരിയാന സ്വദേശിയും ഇതരസംസ്ഥാനക്കാർക്കിടയിൽ ജെറ്റ് ഭായ് എന്നും അറിയപ്പെടുന്ന റിജ് അലി(32)യെ കുന്നത്തുനാട് എക്‌സൈസ് സംഘം അറസ്റ്റ് ചെയ്തു. ഇയാളുടെ പക്കൽ നിന്നും 13.05 ഗ്രാം ഹെറോയിൻ പിടിച്ചെടുത്തു. ബൈക്കിൽ ഹെറോയിൻ വില്പനയ്ക്ക് ഇറങ്ങിയപ്പോഴാണ് ഇയാൾ പിടിയിലായത്. ആവശ്യക്കാർക്ക് ബൈക്കിലെത്തി ഹെറോയിൻ നേരിട്ടു നൽകുന്നതാ ണ് ഇയാളുടെ രീതി. മയക്കുമരുന്ന് വില്പന നടത്തി അമിത വേഗത്തിൽ ബൈക്ക് ഓടിച്ച് പോകുന്നതിനാലാണ് ഇയാൾക്ക് ജെറ്റ് ഭായ് എന്ന വിളിപ്പേര് ലഭിച്ചത്. ഹെറോയിൻ വില്പനയിലൂടെ ലഭിച്ച 2000 രൂപയും ബൈക്കും എക്‌സൈസ് കസ്റ്റഡിയിലെടുത്തു. വിപണിയിൽ രണ്ട് ലക്ഷം രൂപ വിലമതിക്കുന്ന ഹെറോയിനാണു പിടികൂടിയതെന്ന് എക്സൈസ് പറഞ്ഞു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കുന്നത്തുനാട് എക്‌സൈസ് സർക്കിൾ ഇൻസ്‌പെക്ടർ എസ്. ബിനുവിന്‍റെ നേതൃത്വത്തിൽ അസി. എക്‌സൈസ് ഇൻസ്‌പെക്ടർമാരായ സലീം യൂസഫ്, സി.എൻ. രാജേഷ്, സിവിൽ എക്‌സൈസ് ഓഫീസർമാരായ ജിതിൻ ഗോപി, അരുൺ ലാൽ, ബെന്നി പീറ്റർ എന്നിവരടങ്ങുന്ന സംഘമാണ് ഇയാളെ പിടികൂടിയത്.

ഉഡുപ്പി-സിഎസ്എല്‍ നിര്‍മിച്ച ഡ്രൈ കാര്‍ഗോ കപ്പല്‍ നോര്‍വേ കമ്പനിക്ക് കൈമാറി

കൊച്ചി: കൊച്ചിന്‍ ഷിപ്‌യാര്‍ഡ് ലിമിറ്റഡിന്‍റെ (സിഎസ്എല്‍) പൂര്‍ണ ഉടമസ്ഥതയിലുള്ള അ നുബന്ധ സ്ഥാപനമായ കര്‍ണാടകയിലെ ഉഡുപ്പി കൊച്ചിന്‍ ഷിപ്പ് യാര്‍ഡ് ലിമിറ്റഡ് (ഉഡുപ്പി -സിഎസ്എല്‍), 3800 ടണ്‍ ഡി.ഡബ്ല്യു ഡ്രൈ കാര്‍ഗോ കപ്പലുകളുടെ പരമ്പരയിലെ ആദ്യത്തെ കപ്പല്‍ യൂറോപ്പിലെ ഏറ്റവും വലിയ ഷോര്‍ട്ട് സീ ഷിപ്പിംഗ് കമ്പനിയായ നോര്‍വേയിലെ വില്‍സണ്‍ ഷിപ്പ് മാനേജ്‌മെന്‍റ് എഎസിന് കൈമാറി. ന്യൂ മാംഗ്ലൂര്‍ തുറമുഖത്ത് നടന്ന ചടങ്ങില്‍ ന്യൂ മാംഗ്ലൂര്‍ തുറമുഖ അഥോറിറ്റി ചെയര്‍മാന്‍ ഡോ. വെങ്കട രമണ അക്കരാജുവിന്‍റെ പത്‌നി ഡോ.സുഷമ അക്കരാജു പുതിയ കപ്പലിന്‍റെ ഔപചാരിക വിതരണം അടയാളപ്പെടുത്തി. നോര്‍വേയിലെ എംഎസ് വില്‍സണ്‍ ഷിപ്പ് മാനേജ്‌മെന്‍റ് എഎസിന്‍റെ മുതിര്‍ന്ന ഉദ്യോഗസ്ഥന്‍ ഐനാര്‍ ടോര്‍ സ്‌നെസ്, ചീഫ് ഫിനാന്‍ഷ്യല്‍ ഓഫീസര്‍ സെര്‍ജി ബോഗാഷോവ്, വില്‍സണ്‍ സൈറ്റ് ടീം എന്നിവരും ന്യൂ മാംഗ്ലൂര്‍ തുറമുഖ അഥോറിറ്റിയിലെ മുതിര്‍ന്ന ഉദ്യോഗസ്ഥരും ഉഡുപ്പി-സിഎസ്എല്‍ സിഇഒ എ.ഹരികുമാര്‍, ഉഡുപ്പി സിഎസ്എല്‍ ജനറല്‍ മാനേജര്‍ (ബിസിനസ് ഡെവലപ്‌മെന്‍റ്), ശിവറാം എന്‍. സ്വാമി, എറിക് വീത്ത്, ബ്യൂറോ വെരിറ്റാസ് എന്നിവരും ചടങ്ങില്‍ പങ്കെടുത്തു. ഇത്തരം ആറു കപ്പലുകള്‍ നിര്‍മിക്കാനാണ് ഉഡുപ്പി-സിഎസ്എല്‍ വില്‍സണ്‍ ഷിപ്പ് മാനേജ്‌മെന്‍റ് എഎസുമായി ധാരണയിലെത്തിയിരുന്നത്. വെസലുകളുടെ ഉത്പാദനം ആരംഭിച്ചതിനുശേഷം, ഉഡുപ്പി-സിഎസ്എലുമായി ചേര്‍ന്ന് 1041 കോടി രൂപ ചെലവില്‍ എട്ട് 6300 ടിഡിഡബ്ല്യു ജനറല്‍ കാര്‍ഗോ വെസലുകള്‍ നിര്‍മിക്കുന്നതിനുള്ള മറ്റൊരു കരാറിലും വില്‍സണ്‍ ഷിപ്പ് മാനേജ്‌മെന്‍റ് എഎസ് ഒപ്പുവച്ചു.

നെടുമ്പാശേരിയിൽ വൻ കഞ്ചാവ് വേട്ട

നെടുമ്പാശേരി: നെടുമ്പാശേരി വിമാനത്താവളം വഴി റാസൽഖൈമയിലേക്ക് കടത്താൻ ശ്രമിച്ച അഞ്ചരക്കോടി രൂപ വിലവരുന്ന ഹൈബ്രിഡ് കഞ്ചാവുമായി യാത്രക്കാരൻ കസ്റ്റംസ് പ്രിവന്‍റീവ് വിഭാഗത്തിന്‍റെ പിടിയിലായി. ഇൻഡിഗോ വിമാനത്തിൽ റാസൽഖൈമയിലേക്ക് പോകാനെത്തിയ മലപ്പുറം സ്വദേശിയായ ഷിബു ആണ് പിടിയിലായത്. 5.5 കിലോഗ്രാം ഹൈബ്രിഡ് കഞ്ചാവ് ഇയാളുടെ പക്കൽനിന്ന് കണ്ടെടുത്തു. വിമാനത്താവളം വഴി ഒരു യാത്രക്കാരൻ മയക്കുമരുന്ന് കടത്തുന്നതായി രഹസ്യവിവരം ലഭിച്ചതിന്‍റെ അടിസ്ഥാനത്തിലാണ് കസ്റ്റംസ് പ്രിവന്‍റീവ് വിഭാഗം ഉദ്യോഗസ്ഥർ പരിശോധനയ്ക്കെത്തിയത്. കസ്റ്റംസ് കൊച്ചിൻ പ്രിവന്‍റീവ് കമ്മീഷണറേറ്റിലെ (സിസിപി) ഹൈ പെർഫോമൻസ് യൂണിറ്റ് (എച്ച്പിയു) ഉദ്യോഗസ്ഥരാണ് പരിശോധന നടത്തിയത്. ഹൈബ്രിഡ് കഞ്ചാവ് വിവിധ പായ്ക്കറ്റുകളിലാക്കി ഭക്ഷണ പൊതികൾക്കിടയിൽ ബാഗേജിൽ ഒളിപ്പിച്ചിരിക്കുകയായിരുന്നു. വിദേശത്തേക്ക് കടത്താൻ ശ്രമിക്കുന്നതിനിടെ നെടുമ്പാശേരിയിൽ ഹൈബ്രിഡ് കഞ്ചാവ് പിടികൂടുന്നത് ഇതാദ്യമാണ്. വിദേശത്തുനിന്നു കൊണ്ടുവരുന്ന ഹൈബ്രിഡ് കഞ്ചാവ് പലപ്പോഴായി വിമാനത്താവളങ്ങളിൽ പിടികൂടിയിട്ടുണ്ടെങ്കിലും ഇന്ത്യയിൽ നിന്ന് വിദേശത്തേക്ക് കടത്താൻ ശ്രമിക്കുന്നതിനിടെ ഇത്ര വലിയ അളവിൽ ഹൈബ്രിഡ് കഞ്ചാവ് പിടികൂടുന്നത് ആദ്യമാണെന്ന് അന്വേഷണ ഉദ്യോഗസ്ഥർ വ്യക്തമാക്കി. തായ്‌ലൻഡിൽ നിന്ന് എത്തിച്ച ഹൈബ്രിഡ് കഞ്ചാവാണ് റാസൽഖൈമയിലേക്ക് കടത്താൻ ശ്രമിച്ചത്. ഇതുമായി ബന്ധപ്പെട്ട് വിശദമായ അന്വേഷണം നടത്തിവരികയാണ്.

എംഡിഎംഎയുമായി യുവതി ഉൾപ്പെടെ രണ്ടുപേർ പിടിയിൽ

പെരുമ്പാവൂർ: അഞ്ചു ഗ്രാം എംഡിഎംഎ യുമായി യുവതി ഉൾപ്പെടെ രണ്ടുപേർ പിടിയിൽ. ആലുവ കുട്ടമശേരി കുന്നപ്പിള്ളി വീട്ടിൽ അബൂബക്കർ സിദ്ദിഖ് (42), കീഴ്മാട് പുത്തൻപുരയ്ക്കൽ സ്മിഷ (31) എന്നിവരെയാണ് പെരുമ്പാവൂർ എഎസ്പിയുടെ പ്രത്യേക അന്വേഷണസംഘം പിടികൂടിയത്. വെള്ളിയാഴ്ച രാത്രി പെരുമ്പാവൂർ ഔഷധി ജംഗ്ഷനിലെ ലോഡ്ജിൽ നിന്നാണ് ഇവരെ കസ്റ്റഡിയിലെടുത്തത്. ജില്ലാ പോലീസ് മേധാവി എം.ഹേമലതയ്ക്ക് ലഭിച്ച രഹസ്യ വിവരത്തെ തുടർന്നായിരുന്നു പരിശോധന. യുവാക്കൾക്കായിരുന്നു ഇവർ വില്പന നടത്തിയിരുന്നത്. ചെറിയ പൊതികളിലാക്കി 1000 രൂപ നിരക്കിലായിരുന്നു കച്ചവടം. അബൂബക്കർ സിദ്ദിഖിനെതിരേ ആലുവ, പെരുമ്പാവൂർ പോലീസ് സ്റ്റേഷനുകളിലായി അഞ്ച് മയക്കുമരുന്ന് കേസുകൾ നിലവിലുണ്ട്. കഴിഞ്ഞ ഡിസംബറിൽ ഇയാളെ ഒരു ഗ്രാം എംഡിഎംഎ യുമായി പ്രത്യേക അന്വേഷണസംഘം പിടികൂടിയിരുന്നു. 72 ദിവസം ജയിലിൽ കഴിഞ്ഞ ഇയാൾ കഴിഞ്ഞ മാർച്ച് ഒന്നിനാണ് ജയിലിൽ നിന്ന് പുറത്തിറങ്ങിയത്. ജയിലിൽ നിന്ന് ഇറങ്ങിയതിനുശേഷം ഇയാൾ മയക്കുമരുന്ന് വില്പന നടത്തിവരികയായിരുന്നു. ബംഗളൂരുവിൽ നിന്നാണ് ഇയാൾ മയക്കുമരുന്ന് എത്തിച്ചിരുന്നത്. പെരുമ്പാവൂർ എഎസ്പി ശക്തി സിംഗ് ആര്യ, ഇൻസ്പെക്ടർ ടി.എം. സൂഫി, എസ്ഐമാരായ പി.എം. റാസിഖ്, ജോഷി തോമസ്, എഎസ്ഐമാരായ പി.എ. അബ്ദുൽ മനാഫ്, റെനി, സീനിയർ സിപിഒമാരായ ടി.എ. അഫ്സൽ, വർഗീസ് വേണാട്ട്, ബെന്നി ഐസക്, ബേസിൽ, സിബിൻ സണ്ണി എന്നിവരാണ് അന്വേഷണസംഘത്തിൽ ഉണ്ടായിരുന്നത്.

ലഹരിക്കെതിരെ ക്രിക്കറ്റ് ടൂര്‍ണമെന്‍റ്

കൊച്ചി: ലഹരിക്കെതിരെ സന്ദേശമുയര്‍ത്തി എറണാകുളം വിപി എസ് ലേക്‌ഷോര്‍ ആശുപത്രി മേയ് ഒമ്പത്, 10, 11 തിയതികളില്‍ മരട് കുഫോസ് ഗ്രൗണ്ടില്‍ സോഫ്റ്റ് ബോള്‍ ഫ്‌ളഡ്‌ലിറ്റ് ക്രിക്കറ്റ് ടൂര്‍ണമെന്‍റ് സംഘടിപ്പിക്കും. കോര്‍പറേറ്റ് സ്ഥാപനങ്ങള്‍ക്കും മറ്റു സ്ഥാപനങ്ങളിലെ ജീവനക്കാര്‍ക്കും ടൂര്‍ണമെന്‍റില്‍ പങ്കെടുക്കാം. ജേതാക്കള്‍ക്ക് ഒരു ലക്ഷം രൂപയും രണ്ടാം സ്ഥാനക്കാര്‍ക്ക് 50,000 രൂപയുമാണ് സമ്മാനം. ടൂര്‍ണമെന്‍റില്‍ പോലീസ് ഉദ്യോഗസ്ഥരും രാഷ്ട്രീയ നേതാക്കളും സിനിമാ താരങ്ങളും പങ്കെടുക്കും. രജിസ്‌ട്രേഷനും കൂടുതൽ വിവരങ്ങൾക്കും ഫോണ്‍: 95392 32794.

ഫ്രാന്‍സീസ് പാപ്പ മാനവികത മുറുകെപ്പിടിച്ച മനുഷ്യസ്‌നേഹി: പ്രഫ. എം.കെ. സാനു

കൊച്ചി: ഒരു ആധ്യാത്മിക ആചാര്യനും കടന്നുചെല്ലാത്ത വഴികളിലൂടെ സഞ്ചരിച്ച മഹനീയ വ്യക്തിത്വമായിരുന്നു ഫ്രാന്‍സീസ് പാപ്പയുടേതെന്ന് പ്രഫ. എം.കെ സാനു പറഞ്ഞു. കെആര്‍എല്‍സിസിയുടെ ആഭിമുഖ്യത്തില്‍ എറണാകുളത്ത് സംഘടിപ്പിച്ച "പാപ്പാസ്മൃതി' ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. എന്തിനേക്കാളും ഉപരിയായി മനുഷ്യജീവനാണ് എക്കാലത്തും അദ്ദേഹം മുന്‍ഗണന നല്‍കിയത്. പാപ്പ പകര്‍ന്നു നല്‍കിയ നന്മയുടെ വെളിച്ചം ലോകത്ത് ജ്വലിപ്പിക്കാന്‍ നമുക്ക് കഴിയണമെന്നും അദ്ദേഹം കൂട്ടിച്ചേര്‍ത്തു. കച്ചേരിപ്പടി സോഷ്യല്‍ സര്‍വീസ് സൊസൈറ്റി ഓഡിറ്റോറിയത്തില്‍ ചേര്‍ന്ന അനുസ്മരണ യോഗത്തില്‍ കെആര്‍എല്‍സിസി വൈസ് പ്രസിഡന്‍റ് ജോസഫ് ജൂഡ് അധ്യക്ഷത വഹിച്ചു. വരാപ്പുഴ അതിരൂപത സഹായ മെത്രാന്‍ ഡോ. ആന്‍റണി വാലുങ്കല്‍ മുഖ്യപ്രഭാഷണം നടത്തി. ഹൈബി ഈഡന്‍ എംപി, കെ.എന്‍. ഉണ്ണികൃഷ്ണന്‍ എംഎല്‍എ, കെആര്‍എല്‍സിസി ജനറല്‍ സെക്രട്ടറി റവ. ഡോ. ജിജു ജോര്‍ജ് അറക്കത്തറ, ആലുവ അദ്വൈതാശ്രമം സെക്രട്ടറി സ്വാമി ധര്‍മചൈതന്യ, എറണാകുളം ഗ്രാന്റ് മസ്ജിദ് ഇമാം ഫൈസല്‍ അസ്ഹരി, അരൂര്‍ ഗ്രാമപഞ്ചായത്ത് പ്രസിഡന്‍റ് അഡ്വ. രാഖി ആന്‍റണി, ജീവനാദം ചീഫ് എഡിറ്റര്‍ ജെക്കോബി, കെഎല്‍സിഎ സംസ്ഥാന പ്രസിഡന്‍റ് അഡ്വ. ഷെറി ജെ. തോമസ്, കെആര്‍എല്‍സിസി ട്രഷറര്‍ ബിജു ജോസി, സോണിയ ബിനു എന്നിവര്‍ അനുസ്മരണ പ്രഭാഷണം നടത്തി.

പുഴയിൽ വീണ സഹോദരിയെ രക്ഷിക്കുന്നതിനിടെ കോളജ് വിദ്യാർഥിനി മുങ്ങിമരിച്ചു

പെരുന്പാവൂർ: കാൽവഴുതി പുഴയിൽ വീണ സഹോദരിയെ രക്ഷിക്കാനുള്ള ശ്രമത്തിനിടെ വിദ്യാർഥിനി മുങ്ങിമരിച്ചു. മൗലൂദ്പുര പുളിയ്ക്കക്കുടി ഷാജിയുടെ മകൾ ഫാത്തിമ ഷെറിൻ (19) ആണ് മരിച്ചത്. കാൽവഴുതി വീണ ഇളയ സഹോദരി ഫർഹത്തിനെ സമീപത്തുണ്ടായിരുന്നയാൾ രക്ഷപ്പെടുത്തി ആശുപത്രിയിൽ പ്രവേശിപ്പിച്ചു. ഇന്നലെ രാവിലെ 6.30ഓടെ മുടിക്കൽ ഡിപ്പോ കടവിലായിരുന്നു സംഭവം. ഇരുവരും നടക്കാനിറങ്ങുന്നതു പതിവായിരുന്നു. ഇന്നലെ രാവിലെ പതിവുപോലെ നടക്കാനിറങ്ങുകയും ഡിപ്പോയിലെത്തിയപ്പോൾ സമീപത്തെ പാറയിൽ നിന്ന് ഫോട്ടോ എടുക്കുന്നതിനിടെ ഫർഹത്ത് കാൽ വഴുതി പുഴയിലേക്ക് വീണു. ഉടന്‍ ഫർഹത്തിനെ രക്ഷപ്പെടുത്താൻ ഷെറിൻ പുഴയിലേക്ക് ഇറങ്ങിയെങ്കിലും രണ്ടുപേരും ഒഴുക്കിൽപ്പെട്ടുകയായിരുന്നു. ബഹളംകേട്ട് സമീപത്ത് ചൂണ്ടയിട്ട് കൊണ്ടിരുന്നയാൾ ഓടിയെത്തി ഫർഹത്തിനെ കരയ്ക്കെത്തിച്ചെങ്കിലും ഷെറിനെ രക്ഷപ്പെടുത്താനായില്ല. തുടർന്ന് പെരുന്പാവൂരിൽ നിന്നുള്ള അഗ്നിരക്ഷാ സേനയും കോതമംഗലത്ത് നിന്നെത്തിയ സ്കൂബാ ടീമും ചേർന്ന് നടത്തിയ തെരച്ചിലിലാണ് ഫാത്തിമ ഷെറിന്‍റെ മൃതദേഹം കണ്ടെത്തിയത്. നടപടിക്രമങ്ങൾ പൂർത്തിയാക്കി ഇന്നലെ രാത്രി ഒന്പതോടെ മൗലൂദ്പുര ജമാ അത്ത് കബർസ്ഥാനിൽ കബറടക്കി. മാതാവ്: സൈന. പെരുന്പാവൂർ മാർത്തോമ്മ കോളജിലെ ബിരുദ വിദ്യാർഥിനിയായിരുന്നു ഷെറിൻ.

നവജാത ശിശുവിനെ കൈമാറിയതായി സംശയം; അന്വേഷണം തുടങ്ങി

തൃപ്പൂണിത്തുറ: നവജാത ശിശുവിനെ കൈമാറിയെന്ന സംശയത്തെ തുടർന്ന്, സംഭവത്തില്‍ പോലീസ് അന്വേഷണം തുടങ്ങി. മുരിയമംഗലം സ്വദേശിയായ യുവതി പ്രസവിച്ച കുഞ്ഞിനെയാണ് കോയമ്പത്തൂര്‍ സ്വദേശിക്ക് കൈമാറിയതായി പറയുന്നത്. വിവാഹിതയും ഒരു കുട്ടിയുടെ അമ്മയുമായ യുവതി രണ്ടാമത് പ്രസവിച്ച കുഞ്ഞിനെ കൈമാറിയതായാണ് വിവരം. യുവതി ജോലി സ്ഥലത്തുവച്ച് പരിചയപ്പെട്ട തൃശൂര്‍ സ്വദേശിയുമായി കുറച്ചുനാള്‍ മുന്‍പ് നാടുവിട്ടിരുന്നു. ഈ സമയത്ത് യുവതി ഗര്‍ഭിണിയായി. ഇതിനിടെ യുവാവുമായി പിണങ്ങിയ യുവതി തിരിച്ച് സ്വന്തം വീട്ടിലെത്തുകയായിരുന്നു. പിന്നീട് തൃപ്പൂണിത്തുറ താലൂക്ക് ആശുപത്രിയിൽ പ്രസവിച്ച കുഞ്ഞിനെയാണ് കോയമ്പത്തൂർ സ്വദേശിക്ക് കൈമാറിയത്. ആശാവര്‍ക്കര്‍മാര്‍ മുഖേനയാണ് സംഭവം പുറത്തറിഞ്ഞത്. തുടർന്ന് പോലീസിനെ അറിയിക്കുകയായിരുന്നു. കുഞ്ഞിനെ തൃപ്പൂണിത്തുറ ഭാഗത്ത് വച്ച് കൈമാറിയതായാണ് വിവരം. ചോറ്റാനിക്കര പോലീസ് യുവതിയിൽ നിന്ന് വിവരങ്ങള്‍ തേടി. എത്രയും പെട്ടെന്ന് കുഞ്ഞിനെ അമ്മത്തൊട്ടിലില്‍ ഏല്‍പ്പിക്കാന്‍ ആവശ്യപ്പെട്ടതായാണ് പോലീസ് പറഞ്ഞത്. സംഭവത്തിൽ ഹിൽപാലസ് പോലീസ് കേസെടുക്കുമെന്നറിയുന്നു.

പി. രാജുവിന്‍റെ മരണം വിവാദമാക്കിയതിൽ സിപിഐ നേതാക്കളടക്കം 17 പേർക്കെതിരേ നടപടിക്ക് ശിപാര്‍ശ

കൊച്ചി: സിപിഐ എറണാകുളം മുന്‍ ജില്ലാ സെക്രട്ടറി പി. രാജുവിന്‍റെ മരണം വിവാദമാക്കിയത് കെ.ഇ. ഇസ്മയില്‍ പക്ഷത്തെ നേതാക്കളെന്ന് അന്വേഷണ കമ്മീഷന്‍റെ കണ്ടെത്തല്‍. സംഭവത്തില്‍ എറണാകുളത്തെ മുതിര്‍ന്ന നേതാക്കള്‍ ഉള്‍പ്പെടെ 17 പേര്‍ക്കെതിരെ നടപടിക്ക് ശിപാര്‍ശ. വിവാദം പാര്‍ട്ടിക്ക് ജനങ്ങള്‍ക്കിടയില്‍ അവമതിപ്പ് ഉണ്ടാക്കിയെന്നുമാണ് കമ്മീഷന്‍റെ കണ്ടെത്തല്‍. സിപിഐ സംസ്ഥാനസമിതി അംഗം പി.കെ. രാജേഷിന്‍റെ നേതൃത്വത്തിലുള്ള അന്വേഷണ കമ്മീഷന്‍റേതാണ് കണ്ടെത്തല്‍. ജില്ലാ എക്‌സിക്യുട്ടീവ് അംഗീകരിച്ച റിപ്പോര്‍ട്ട് സംസ്ഥാന സമിതിക്ക് വിട്ടു. മുന്‍ എംഎല്‍എയും സിപിഐ നേതാവുമായ പി. രാജുവിന്‍റെ മരണത്തില്‍ നടത്തിയ പ്രതികരണങ്ങളാണ് വിവാദമായത്. പി. രാജുവിന് പാര്‍ട്ടി നടപടിയില്‍ വിഷമമുണ്ടായിരുന്നെന്നായിരുന്നു ഇസ്മയിലിന്‍റെ പ്രതികരണം. സാമ്പത്തിക തിരിമറി നടത്തിയെന്ന ആരോപണത്തിലാണ് പി. രാജു സംഘടനാ നടപടിക്ക് വിധേയനായത്. എന്നാല്‍ കുറ്റക്കാരനല്ലെന്ന് കണ്ടെത്തിയിട്ടും പാര്‍ട്ടിയില്‍ തിരിച്ചെടുത്തില്ലെന്നും ഇല്ലാത്ത ചില പ്രശ്‌നങ്ങളുടെ പേരില്‍ പാര്‍ട്ടി രാജുവിനെ വ്യക്തിഹത്യ നടത്തിയെന്നും ഇസ്മയില്‍ പറഞ്ഞിരുന്നു. പിന്നാലെ രാജുവിന്‍റെ മൃതദേഹം പാര്‍ട്ടി ഓഫീസില്‍ പൊതുദര്‍ശനത്തിനു വയ്‌ക്കേണ്ടതില്ലെന്ന് കുടുംബം തീരുമാനിച്ചിരുന്നു.

ജില്ലയിൽ മഞ്ഞപ്പിത്തം പടരുന്നു

കൊച്ചി: ജില്ലയില്‍ മഞ്ഞപ്പിത്ത ബാധിതരുടെ എണ്ണം പ്രതിദിനം കൂടുന്നു. കഴിഞ്ഞ ഏഴ് ദിവസത്തിനിടെ വിവിധയിടങ്ങളിലായി 29 പേര്‍ക്കാണ് മഞ്ഞപ്പിത്തം സ്ഥിരീകരിച്ചത്. പനി ബാധിച്ച് 1008 പേർ വിവിധ ആശുത്രികളില്‍ ചികിത്സ തേടി. ഇതില്‍ 59 പേര്‍ക്ക് മഞ്ഞപ്പിത്ത ലക്ഷണങ്ങള്‍ സംശയിക്കുന്നു. ഇതിനോടകം 10 പേര്‍ക്ക് ഡെങ്കിപ്പനി സ്ഥിരീകരിച്ചു. ഒരാഴ്ചയ്ക്കിടെ അഞ്ച് പേര്‍ക്ക് മലേറിയയും ഒരാള്‍ക്ക് എലിപ്പനിയും സ്ഥിരീകരിച്ചിട്ടുണ്ട്. വേനല്‍ക്കാല രോഗങ്ങള്‍ പടര്‍ന്നു പിടിക്കാന്‍ സാധ്യതയുള്ളതിനാല്‍ മുന്‍കരുതൽ സ്വീകരിക്കണമെന്ന് ആരോഗ്യ വകുപ്പ് മുന്നറിയിപ്പ് നൽകി. രോഗങ്ങളും രോഗലക്ഷണങ്ങളും കണ്ടു തുടങ്ങിയാല്‍ സ്വയം ചികിത്സ ഒഴിവാക്കി ആശുപത്രി ചികിത്സ തേടണം. ഒപ്പം രോഗം പിടിപെടാതിരിക്കാനുള്ള മുന്‍കരുതലുകള്‍ വേണമെന്നും ഡോക്ടര്‍മാര്‍ മുന്നറിയിപ്പ് നല്‍കുന്നു. വേനല്‍ ചൂടിന്‍റെ സാഹചര്യത്തില്‍ പനിയുടെ ലക്ഷണങ്ങള്‍ കണ്ടുതുടങ്ങിയാല്‍ ചികിത്സ തേടേണ്ടതാണ്. പനി പിടിപെട്ടാൽ സ്വയം ചികിത്സ ഒഴിവാക്കി ഏത് തരം പനിയാണെന്ന് സ്ഥിരീകരിച്ച ശേഷമേ ചികിത്സ ആരംഭിക്കാവൂ.ശുചിത്വമില്ലായ്മ മൂലം ഉണ്ടാകുന്ന പനികളും ധാരാളമാണ്. അതുകൊണ്ടുതന്നെ മലിന ജലവുമായുള്ള സമ്പര്‍ക്കം ഒഴിവാക്കണം. ഡെങ്കിപ്പനി, എലിപ്പനി തുടങ്ങിയവ ഇത്തരം വൃത്തിഹീനമായ സാഹചര്യത്തില്‍ നിന്നു പടര്‍ന്നുപിടിക്കുന്നവയാണ്. തിളപ്പിച്ചാറ്റിയ വെള്ളം മാത്രം കുടിക്കണം. കൊതുകു കടിയേല്‍ക്കാതിരിക്കാനും ശ്രദ്ധിക്കണം. തുറസായ സ്ഥലങ്ങളില്‍ വില്‍ക്കുന്ന ഭക്ഷണ പദാര്‍ഥങ്ങള്‍ കഴിക്കരുതെന്നും ആരോഗ്യ വിഭാഗം മുന്നറിയിപ്പ് നല്‍കുന്നു.

ചെക്ക്ഡാമിൽ കുളിക്കാനിറങ്ങിയ വിദ്യാർഥിയെ കാണാതായി

പോത്താനിക്കാട്: സുഹൃത്തുക്കളോടൊപ്പം കാളിയാർ പുഴയിലെ പറന്പഞ്ചേരി ചെക്ക്ഡാമിൽ കുളിക്കാനിറങ്ങിയ വിദ്യാർഥിയെ കാണാതായി. കലാന്പൂര് കൊയക്കാട്ട് എൽദോസിന്‍റെ മകൻ സാം എൽദോസി(15)നെയാണ് കാണാതായത്. ഇന്നലെ വൈകിട്ടായിരുന്നു സംഭവം. പുഴയിൽ കുളിക്കാനിറങ്ങിയ സാം പെട്ടെന്ന് നിലതെറ്റി ഒഴുക്കിൽപ്പെടുകയായിരുന്നു. നാട്ടുകാരും അഗ്നിരക്ഷാ സേനയും ചേർന്ന് തെരച്ചിൽ നടത്തിയെങ്കിലും ഇന്നലെ വൈകിയും കണ്ടെത്താനായില്ല. പുളിന്താനം സെന്‍റ് ജോണ്‍സ് ഹൈസ്കൂളിലെ 10-ാം ക്ലാസ് വിദ്യാർഥിയായിരുന്നു. കാളിയാർ പുഴയിൽ ഒഴുക്ക് ശക്തമായതോടെ രാത്രിയോടെ തെരച്ചിൽ അവസാനിപ്പിച്ചു.

അനുശോചന യോഗവും പ്രാര്‍ഥനാ ശുശ്രൂഷയും

കൊച്ചി: ഫ്രാന്‍സിസ് മാര്‍പാപ്പയുടെ വിയോഗത്തിൽ അനുശോചിച്ച് കത്തോലിക്ക കോണ്‍ഗ്രസ് എറണാകുളം-അങ്കമാലി അതിരൂപത സമിതിയുടെ ആഭിമുഖ്യത്തില്‍ യോഗം ചേർന്നു. പ്രത്യ‌േക പ്രാര്‍ഥനാ ശുശ്രൂഷയും നടത്തി. മലയാറ്റൂര്‍ അടിവാരത്തു നടന്ന യോഗത്തില്‍ അതിരൂപത പ്രസിഡന്‍റ് ഫ്രാന്‍സിസ് മൂലന്‍ അധ്യക്ഷത വഹിച്ചു. ജനറല്‍ സെക്രട്ടറി സെബാസ്റ്റ്യന്‍ ചെന്നേക്കാടന്‍, ട്രഷറര്‍ എസ്.ഐ.തോമസ്, ഗ്ലോബല്‍ വൈസ് പ്രസിഡന്‍റ് ബെന്നി ആന്‍റണി തുടങ്ങിയവര്‍ നേതൃത്വം നല്‍കി.

ഫ്രാന്‍സിസ് പാപ്പയ്ക്ക് പ്രണാമം അര്‍പ്പിച്ചു

കൊച്ചി: കുമ്പളങ്ങി പഴങ്ങാട് ഇടവകയില്‍ ഫ്രാന്‍സിസ് മാര്‍പാപ്പയ്ക്ക് അനുസ്മരണ ബലിയര്‍പ്പിച്ചു. തുടര്‍ന്ന് നടത്തിയ അനുസ്മരണ സമ്മേളനം ദഹോന്‍ ഭവന്‍ സുപ്പീരിയര്‍ ഫാ. ഏബ്രഹാം ഉദ്ഘാടനം ചെയ്തു. വികാരി ഫാ.സെബാസ്റ്റ്യന്‍ പുത്തന്‍പുരക്കല്‍ അധ്യക്ഷത വഹിച്ചു. അനുസ്മരണ സമ്മേളനത്തില്‍ ഇടവക പാസ്റ്ററല്‍ കൗണ്‍സില്‍ സെക്രട്ടറി വില്യം പനക്കല്‍, കോണ്‍ഗ്രസ് സംസ്ഥാന മീഡിയ കമ്മിറ്റി അംഗം ജോസഫ് മാര്‍ട്ടിന്‍ കളത്തിവീട്ടില്‍, പള്ളുരുത്തി ബ്ലോക്ക് മെമ്പര്‍, സാബു തോമസ്, സെന്‍റ് ആന്‍സ് കോണ്‍വെന്‍റ് സുപ്പീരിയര്‍ സിസ്റ്റര്‍ ജാസ്മിന്‍, ഫാ.സേവ്യര്‍ തൈപ്പാടത്ത്, ഇടവക ശുശ്രൂഷ സമിതി കണ്‍വീനര്‍ ജോയ് കമ്പംതോടത്ത്, സെക്രട്ടറി ഷൈനി ബോണിഫസ് എന്നിവര്‍ പ്രസംഗിച്ചു.

കെആര്‍എല്‍സിസി "പാപ്പാസ്മൃതി' ഇന്ന്

കൊച്ചി : കെആര്‍എല്‍സിസിയുടെ ആഭിമുഖ്യത്തില്‍ ഫ്രാന്‍സിസ് പാപ്പാ അനുസ്മരണ സമ്മേളനം(പാപ്പാസ്മൃതി) ഇന്നു നടക്കും. വൈകുന്നേരം അഞ്ചിന് എറണാകുളം സോഷ്യല്‍ സര്‍വീസ് സൊസൈറ്റി ഓഡിറ്റോറിയത്തില്‍ നടക്കുന്ന പരിപാടിയിൽ‌ കെആര്‍എല്‍സിസി വൈസ് പ്രസിഡന്‍റ് ജോസഫ് ജൂഡ് അധ്യക്ഷത വഹിക്കും. പ്രഫ. എം.കെ. സാനു ഉദ്ഘാടനം ചെയ്യും. വരാപ്പുഴ സഹായമെത്രാന്‍ ഡോ. ആന്‍റണി വാലുങ്കല്‍ മുഖ്യപ്രഭാഷണം നടത്തും. കെആര്‍എല്‍സിസി ജനറല്‍ സെക്രട്ടറി റവ. ഡോ. ജിജു ജോര്‍ജ് അറക്കക്കത്തറ, ഹൈബി ഈഡന്‍ എംപി, കെ.എന്‍. ഉണ്ണികൃഷ്ണന്‍ എംഎല്‍എ, ആലുവ അദ്വൈതാശ്രമം സെക്രട്ടറി സ്വാമി ധര്‍മ്മചൈതന്യ, എറണാകുളം ഗ്രാന്‍റ് മസ്ജിദ് ഇമാം ഫൈസല്‍ അസ്ഹരി തുടങ്ങിയവർ പ്രസംഗിക്കും.

അഖിലകേരള സ്റ്റാഫ് ക്രിക്കറ്റ് ടൂർണമെന്‍റിന് ആദിശങ്കരയിൽ ഇന്ന് തുടക്കം

കാലടി: ആദിശങ്കര എൻജിനീയറിംഗ് കോളേജിന്‍റെ നേതൃത്വത്തിൽ ആദിശങ്കര കപ്പിന് വേണ്ടിയുളള അഖിലകേരള സ്റ്റാഫ് ക്രിക്കറ്റ് ടൂർണമെന്‍റിന് ആദിശങ്കര എൻജിനീയറിംഗ് കോളജ് മൈതാനത്ത് ഇന്ന് തുടക്കമാകും. 18 കോളജുകളിൽ നിന്നും ടീമുകൾ മത്സരിക്കും. വിജയികൾക്ക് ഒരു ലക്ഷം രൂപയുടെ സമ്മാനങ്ങളാണ് നൽകുന്നത്. ശനിയാഴ്ച രാവിലെ ഒന്പതിന് ആദിശങ്കര മാനേജിംഗ് ട്രസ്റ്റി കെ. ആനന്ദ് ടൂർണമെന്‍റ് ഉദ്ഘാടനം ചെയ്യും. 28ന് ടൂർണമെന്‍റ് സമാപിക്കും. ഇന്ത്യൻ ക്രിക്കറ്റ് ടീം താരം ബേസിൽ തമ്പി വിജയികൾക്ക് സമ്മാനങ്ങൾ വിതരണം ചെയ്യും. പൊതുജനങ്ങൾക്കും മത്സരം കാണാൻ അവസരമുണ്ട്.

പ്രതിരോധ ശൃംഖല സംഘടിപ്പിച്ചു

തൃപ്പൂണിത്തുറ: ഭീകരതക്കെതിരെ ഒന്നിക്കുക എന്ന സന്ദേശവുമായി സിപിഎം തൃപ്പൂണിത്തുറ ഏരിയ കമ്മിറ്റിയുടെ നേതൃത്വത്തിൽ പ്രതിരോധ ശൃംഖല സംഘടിപ്പിച്ചു. കിഴക്കേക്കോട്ട മുതൽ സ്റ്റാച്യു ജംഗ്ഷൻ വരെ സംഘടിപ്പിച്ച ശൃംഖലയിൽ നിരവധി പേർ പങ്കാളികളായി. തുടർന്ന് നടന്ന സമ്മേളനം ഏരിയാ സെക്രട്ടറി പി. വാസുദേവൻ ഉദ്ഘാടനം ചെയ്തു. ജില്ലാ കമ്മറ്റിയംഗം സി.എൻ. സുന്ദരൻ, അഡ്വ. എസ്. മധുസൂദനൻ, എം.പി. ഉദയൻ, നഗരസഭ ചെയർപേഴ്സൺ രമ സന്തോഷ്, യു.കെ. പീതാംബരൻ, ടി.കെ. ജയചന്ദ്രൻ, ബി.എസ്. നന്ദനൻ, എൻ.പി. ബോബി തുടങ്ങിയവർ പ്രസംഗിച്ചു. കെ.ടി. അഖിൽ ദാസ് പ്രതിജ്ഞ ചൊല്ലിക്കൊടുത്തു.

മേയ് 20ലെ പണിമുടക്ക് വിജയിപ്പിക്കണമെന്ന്

നെടുമ്പാശേരി: കേന്ദ്ര ഗവൺമെന്‍റിന്‍റെ തൊഴിലാളി ദ്രോഹ നയങ്ങൾക്കെതിരെ സംയുക്ത ട്രേഡ് യൂണിയൻ നേതൃത്വത്തിൽ നടക്കുന്ന പൊതുപണിമുടക്ക് വിജയിപ്പിക്കണമെന്ന് സിഐടിയു നെടുമ്പാശേരി വെസ്റ്റ് കോ ഓർഡിനേഷൻ കമ്മിറ്റി കൺവൻഷൻ ആവശ്യപ്പെട്ടു. അത്താണി ഇഎംഎസ് സ്മാരക ഹാളിൽ ചേർന്ന കൺവൻഷൻ സിഐടിയു ആലുവ ഏരിയാ സെക്രട്ടറി പി.എ. സഹീർ ഉദ്ഘാടനം ചെയ്തു. എൻ.കെ. ഷാജി അധ്യക്ഷനായി. തമ്പി പോൾ, ടി.വി. പ്രദീഷ്, പി.സി. സോമശേഖരൻ, ഏ.കെ. തോമസ്, എ.എസ്. സുരേഷ്, എൽദോ ഡേവിഡ്, പി.ടി. ബഹനാൻ എന്നിവർ സംസാരിച്ചു. ഭാരവാഹികൾ - എൽദോ ഡേവിഡ് (കൺവീനർ) എൻ.കെ. ഷാജി (ജോയിന്‍റ് കൺവീനർ).

മാലിപ്പുറം സ്വതന്ത്ര മൈതാന നവീകരണം; സമരസമിതിയുടെ നിർദേശം അംഗീകരിച്ചു

വൈപ്പിൻ: അഖില കേരള അടിസ്ഥാനത്തിൽ സെവൻസ് ഫുട്ബോൾ മത്സരങ്ങൾ നടക്കാറുള്ള മാലിപ്പുറം സ്വതന്ത്ര മൈതാനം ചുരുക്കി പൊതുയോഗ സ്ഥലമാക്കാനുള്ള ഹാർബർ എൻജിനീയറിംഗിന്‍റെ പദ്ധതിയിൽ കായികപ്രേമികളുടെ എതിർപ്പിനെ തുടർന്ന് മാറ്റങ്ങൾ വരുത്തി. മൈതാനത്തിന്‍റെ സിംഹഭാഗവും അപഹരിക്കുന്ന തരത്തിൽ 15 മീറ്റർ നീളവും ഒമ്പത് മീറ്റർ വീതിയുമുള്ള കൂറ്റൻ സ്റ്റേജും അതിനു പുറകിൽ ഗ്രീൻ റൂമും ടോയ്‌ലറ്റും പാർക്കിംഗ് ഏരിയയും, ഓപ്പൺ ജിം, വാക്ക് വേ എന്നിവയായിരുന്നു ആദ്യ പ്ലാനിൽ. എന്നാൽ ഇതിനെതിരെ നാട്ടുകാരും കായികപ്രേമികളും സംഘടിച്ച് സമരത്തിനിറങ്ങിയതോടെ ഹാർബർ എൻജിനീയറിംഗ് വകുപ്പ് വെട്ടിലായി. അവസാനം രണ്ടു വട്ട ചർച്ചകൾക്കൊടുവിൽ സെവൻസ് ഫുട്ബോൾ കളിക്കാനാവശ്യമായ 60 മീറ്റർ നീളവും 40 മീറ്റർ വീതിയുമുള്ള ഗ്രൗണ്ട് നിർമിക്കാൻ ധാരണയായി. ഇതിനായി ഇപ്പോൾ നിർമിച്ച സ്റ്റേജിന്‍റെ കുറച്ച് ഭാഗം പൊളിച്ചുമാറ്റും. ഇതോടെ നാളെ നടത്തുമെന്ന് പ്രഖ്യാപിച്ചിരുന്ന എം എൽ എ ഓഫീസിലേക്കുള്ള കായിക താരങ്ങളുടെ കൂട്ടയോട്ടവും സമര പരിപാടികളും തത്കാലത്തേക്ക് ഉപേക്ഷിച്ചതായി സമരസമിതി ചെയർമാൻ സി.ജി. ബിജു അറിയിച്ചു.

ദേശീയ അന്തർസർവകലാശാല സോഫ്റ്റ് ബേസ്ബോൾ ചാമ്പ്യൻഷിപ്പിന് തുടക്കമായി

ആലുവ: ദേശീയ അന്തർ സർവകലാശാല സോഫ്റ്റ് ബേസ്ബോൾ ചാമ്പ്യൻഷിപ്പിന് ആലുവ യൂണിയൻ ക്രിസ്ത്യൻ കോളജിൽ തുടക്കമായി. എംജി സർവകലാശാല വൈസ് ചാൻസിലർ ഡോ. സി.ടി. അരവിന്ദകുമാർ ചാമ്പ്യൻഷിപ്പ് ഉദ്ഘാടനം ചെയ്തു. സിൻഡിക്കേറ്റ് അംഗം ‌ഡോ. ജോജി അലക്സ് അധ്യക്ഷത വഹിച്ചു. മഹാത്മാഗാന്ധി സർവകലാശാല സിൻഡിക്കേറ്റ് അംഗം ഡോ. ബിജു തോമസ്, ഡോ. സുജിത്ത് എസ്. നായർ , ഡോ. ബിനു ജോർജ് വർഗീസ്, ഡോ. കെ.പി. ഔസേപ്പ് തുടങ്ങിയവർ പ്രസംഗിച്ചു. ഉദ്ഘാടന മത്സരത്തിൽ പുരുഷ വിഭാഗത്തിൽ ഭഗവത് യൂണിവേഴ്സിറ്റിയെ 34-9 എന്ന സ്കോറിന് പരാജയപ്പെടുത്തി യൂണിവേഴ്സിറ്റി ഓഫ് കാലിക്കറ്റ് വിജയിച്ചു. ഇന്ന് നടക്കുന്ന പുരുഷ, വനിതാ വിഭാഗം മത്സരങ്ങളിൽ കാലിക്കറ്റ് യൂണിവേഴ്സിറ്റി, സുരേഷ് ജ്ഞാൻ യൂണിവേഴ്സിറ്റി, എംജി യൂണിവേഴ്സിറ്റി, ഭഗവന്ത് യൂണിവേഴ്സിറ്റി, ശ്രീധർ യൂണിവേഴ്സിറ്റി എന്നീ ടീമുകൾ പങ്കെടുക്കും.

കാലടിയിലെ ബസ് ടെർമിനൽ നിർമാണം അശാസ്ത്രീയമെന്ന്: എൽഡിഎഫ് പ്രതിഷേധം

കാലടി: യുഡിഎഫ് ഭരിക്കുന്ന കാലടി പഞ്ചായത്ത് ഭരണ സമിതി നിർമിക്കുന്ന ബസ് ടെർമിനൽ ഷോപ്പിംഗ് കോംപ്ലക്‌സ് അശാസ്ത്രീയമാണന്നാരോപിച്ച് എൽഡിഎഫ് കാലടി പഞ്ചായത്ത് കമ്മിറ്റി പഞ്ചായത്ത് ഓഫീസ് മാർച്ചും ധർണയും സംഘടിപ്പിച്ചു. കാലടിസംസ്കൃത യുണിവേഴ്സിറ്റിയുടെ പടിക്കൽനിന്നു തുടങ്ങിയ പ്രകടനം കാലടി പട്ടണം ചുറ്റി പഞ്ചായത്തിന് മുൻമ്പിൽ സമാപിച്ചു. സമരം സിപിഎം അങ്കമാലി ഏരിയ സെക്രട്ടറി കെ.പി. റജീഷ് ഉദ്ഘടനം ചെയ്തു. ഗോപകുമാർ കാരി കൊത്ത് അധ്യക്ഷനായി. കാലടിയിൽ നടന്ന പ്രതിഷേധത്തിൽ അങ്കമാലി - കാലടി മേഖലയിലെ സ്വകാര്യ ബസ് ഉടമകളും ജീവനക്കാരും പങ്കെടുത്തു. പഞ്ചായത്ത് ബസ് സ്റ്റാൻഡ് അടച്ചു പൂട്ടിയതു മൂലം കാലടിയിൽ ഗതാഗതക്കുരുക്ക് അനുഭവപ്പെടുന്നുണ്ട്. കൂടാതെ ബസ് സർവീസ് പ്രതി സന്ധിയിലുമാണ്. പ്രതിഷേധ സമരത്തിൽ എൽഡി എഫ് നേതാക്കളായ എം.ടി. വർഗീസ്, എം. മുകേഷ്, മാത്യൂസ് കോലഞ്ചേരി, ബേബി കാക്കശേരി, ജയ്സൺ പാനികുളങ്ങര, മാർട്ടിൻ മുണ്ടാടൻ, സി ജോ ചൊവ്വരാൻ, എ പി ജിബി എന്നിവർ സംസാരിച്ചു.

ഗോതുരുത്തിൽ ദൈവ കരുണയുടെ തിരുനാൾ നാളെ

പറവൂർ: ഗോതുരുത്ത് സെന്‍റ് സെബാസ്റ്റ്യൻ ഫൊറോന പള്ളിയിൽ ദൈവ കരുണയുടെ തിരുനാൾ നാളെ നടക്കും. ഫ്രാൻസിസ് പാപ്പയോടുള്ള ആദര സൂചകമായി ഒൻപത്ദിവസത്തെ ദുഃഖാചരണമായതിനാൽ ഊട്ടുസദ്യയും ആഘോഷങ്ങളും ഒഴിവാക്കിയാണ് തിരുനാൾ നടത്തുന്നത്. നാളെ രാവിലെ ഒന്പതിന് പ്രസുദേന്തി വാഴ്ച, 9.30ന് കൊടിയേറ്റം, തുടർന്ന് തിരുനാൾ ദിവ്യബലി, വചനപ്രഘോഷണം. തുടർന്ന് പ്രദക്ഷിണം. ഇന്ന് വൈകിട്ട് 5.30 ന് ദിവ്യബലി, വചനസന്ദേശം. തിരുനാളിന് ആഘോഷങ്ങൾ ഒഴിവാക്കി ലഭിക്കുന്ന തുക ഇടവകയിലെ ജീവകാരുണ്യ പ്രവർത്തനങ്ങൾക്കും മറ്റുമായി ഉപയോഗിക്കുമെന്ന് വികാരി റവ. ഡോ. ആന്‍റണി ബിനോയ് അറയ്ക്കൽ, സഹവികാരി ഫാ. നിവിൻ കളരിത്തറ എന്നിവർ അറിയിച്ചു.

മാർപാപ്പയുടെ ജീവിതം കൊളാഷ് രൂപത്തിൽ

കാലടി: ഭൂമിയിൽ സനേഹത്തിന്‍റെ നീർച്ചാൽ ഒഴുക്കിയ ആത്മീയ ആചാര്യനായ പരിശുദ്ധ പിതാവ് ഫ്രാൻസിസ് മാർപാപ്പയുടെ ജനനം മുതൽ മരണം വരെയുള്ള ജീവിതം ചുള്ളി സെന്റ് ജോർജ് വിശ്വാസ പരിശീലന വിഭാഗത്തിലെ കുട്ടികൾ കൊളാഷ് രൂപത്തിൽ തയാറാക്കി പ്രദർശിപ്പിച്ചു. മാർപാപ്പയുടെ ജനനം, ആദ്യകാല ജീവിതം, പൗരോഹിത്യം, മെത്രാൻ പദവി, കർദിനാൾ പദവി, മാർപാപ്പ, സന്ദർശിച്ച് സ്ഥലങ്ങൾ, ചാക്രിക ലേഖനങ്ങൾ, 12 വർഷത്തെ പ്രവർത്തനങ്ങൾ തുടങ്ങി ഒട്ടേറെ കാര്യങ്ങളാണ് കുട്ടികൾ ചിത്രങ്ങളിലൂടെയും മറ്റും ഒരുക്കിയത്. ഇടവക വികാരി ഫാ. ഷനു മൂഞ്ഞേലി, ഹെഡ്മാസ്റ്റർ നോബിൾ കിളിയേൽക്കുടി, അധ്യാപകർ എന്നിവർ നേതൃത്വം നൽകി.

എടക്കുന്ന്-മൂന്നാംപറമ്പ് റോഡിന്‍റെ നിര്‍മാണോദ്ഘാടനം നടത്തി

അങ്കമാലി: കറുകുറ്റി ഗ്രാമപഞ്ചായത്തിലെ 9, 10 വാര്‍ഡുകളിലൂടെ കടന്നുപോകുന്ന എടക്കുന്ന്-മൂന്നാംപറമ്പ് റോഡിന്‍റെ നിര്‍മാണോദ്ഘാടനം റോജി എം. ജോണ്‍ എംഎല്‍എ നിര്‍വഹിച്ചു. സംസ്ഥാന തദ്ദേശ റോഡ് പുനരുദ്ധാരണ പദ്ധതിയില്‍ ഉള്‍പ്പെടുത്തി 30 ലക്ഷം രൂപ ചെലവൊഴിച്ചാണ് റോഡ് പുനരുദ്ധിക്കുന്നത്. ഏറെ വര്‍ഷക്കാലമായി സഞ്ചാര യോഗ്യമല്ലാതിരുന്ന റോഡ് അഞ്ചു മീറ്റര്‍ വീതിയിലാണ് നിര്‍മിക്കുന്നത്. വീതിയില്ലാത്ത സ്ഥലങ്ങളില്‍ ഭൂവുടമകള്‍ വിട്ടു നല്‍കിയ സ്ഥലം ഉള്‍പ്പെടുത്തിയാണ് വീതി കൂട്ടുന്നത്. ഏഴാറ്റുമുഖം പ്രകൃതിഗ്രാമം, അതിരപ്പിള്ളി ടൂറിസ്റ്റ് കേന്ദ്രം എന്നിവിടങ്ങളിലേക്ക് നിരവധി വാഹനങ്ങൾ കടന്നുപോകുന്ന റോഡാണിത്. പഞ്ചായത്ത് പ്രസിഡന്‍റ് ലതിക ശശികുമാര്‍ അധ്യക്ഷത വഹിച്ച ചടങ്ങില്‍ പഞ്ചായത്ത് വൈസ് പ്രസിഡന്‍റ് ഷൈജോ പറമ്പി, ജില്ലാ പഞ്ചായത്തംഗം ഷൈനി ജോര്‍ജ്, പഞ്ചായത്ത് സ്ഥിരം സമിതി അംഗങ്ങളായ കെ.പി. അയ്യപ്പന്‍, മേരി പൈലി, മേരി ആന്‍റണി, പഞ്ചായത്തംഗങ്ങളായ ജിജോ പോള്‍, മിനി ഡേവിസ് എന്നിവരും ടെസി പോള്‍, സി.പി. സെബാസ്റ്റ്യന്‍ തുടങ്ങിയവർ പങ്കെടുത്തു.

ശ്രേഷ്ഠ കാതോലിക്ക ബാവയ്ക്ക് അങ്കമാലിയിൽ സ്വീകരണം

വടക്കേക്കോട്ട സെന്‍റ് ജോസഫ്സ് പള്ളിയിൽ തിരുനാൾ

ഓഞ്ഞിത്തോട് കൈയേറ്റം: റീസർവേ ആരംഭിച്ചു

ആലുവ: പെരിയാറിന്‍റെ കൈവഴിയായ ഓഞ്ഞിപ്പുഴയിൽ മൂന്ന് വര്ഷമായി നിർത്തിവച്ച റീ സർവ്വെ പുനരാരംഭിച്ചു. കഴിഞ്ഞ ദിവസം ഓഞ്ഞിത്തോട് സംരക്ഷണ ജനകീയ സമിതിയുടെ നേതൃത്വത്തിൽ രാപ്പകൽ സമരം നടത്തിയതോടെയാണ് കൈയേറ്റങ്ങൾ തിരിച്ചുപിടിക്കൽ പുന:രാരംഭിച്ചത്. കടുങ്ങല്ലൂർ, ആലങ്ങാട് പഞ്ചായത്തുകളിലെ ഒഴുകുന്ന ഓഞ്ഞിത്തോടിന്‍റെ 64 കൈയേറ്റങ്ങൾ തിരിച്ചുപിടിക്കണമെന്നാണ് സമിതിയുടെ പ്രധാന ആവശ്യം. പറവൂർ താലൂക്ക് തഹസിൽദാറുടെ നേതൃത്വത്തിൽ നടക്കുന്ന സർവേകല്ലിടൽ 10 ദിവസത്തിനുള്ളിൽ പൂർത്തിയാകും. ഇനി നൂറോളം സർവേക്കല്ലുകളാണ് സ്ഥാപിക്കാനുള്ളത്. മൂന്ന് വർഷം മുമ്പ് 200 ഓളം സ്ഥാപിച്ചിരുന്നു. ഇന്നലെ കടുങ്ങല്ലൂർ മേഖലയിലാണ് റീ സർവേ ആരംഭിച്ചത്. കല്ല് സ്ഥാപിക്കുന്നതിന് മുന്നോടിയായി പലയിടത്തും കാട് വെട്ടിത്തെളിയ്ക്കലും നടക്കുന്നുണ്ട്. 2022 ൽ പുഴയുടെ അതിർത്തി നിർണയം നടത്തിയെങ്കിലും അതിർത്തി കല്ലുകൾ മുഴുവനായി സ്ഥാപിക്കുന്നതിൽ കടുങ്ങല്ലൂർ ആലങ്ങാട് പഞ്ചായത്തുകൾ, റവന്യൂ, സർവേ വകുപ്പുകൾ കൈയേറ്റക്കാരെ ഒഴിപ്പിക്കാൻ താത്പര്യം എടുത്തില്ലെന്നാണ് സംരക്ഷണ സമിതിയുടെ പരാതി.

നിർമിതബുദ്ധി ഉപയോഗിച്ചുള്ള സാമൂഹികക്ഷേമ ഗവേഷണത്തിന് തൃക്കാക്കരയിൽ തുടക്കം

കാക്കനാട്: കേരള സാങ്കേതിക സർവകലാശാലയും തൃക്കാക്കര നഗരസഭയും ചേർന്നു സാമൂഹിക ക്ഷേമ ഗവേഷണങ്ങൾ നടത്താൻ തീരുമാനം. സംസാര വൈകല്യമുള്ള കുട്ടികൾക്ക് സ്‌പീച്ച് തെറാപ്പി നൽകാൻ നിർമിത ബുദ്ധിയുടെ സഹായത്തോടെ വോയ്‌സ് ബേസ്‌ഡ് ഇന്‍റലിജൻസ് സംവിധാനം വികസിപ്പിച്ചെടുക്കലാണ് പ്രധാന ലക്ഷ്യം. ഇതുൾപ്പെടെ അഞ്ചു ഗവേഷണങ്ങൾക്കായി തൃക്കാക്കര നഗരസഭ 10 ലക്ഷം രൂപ അനുവദിച്ചു. ഗവ. മോഡൽ എൻജിനിയറിംഗ് കോളജിൽ പ്രവർത്തിക്കുന്ന സാങ്കേതിക സർവകലാശാല സെന്‍റർ ഓഫ് എക്സലൻസിന്‍റെ നേതൃത്വത്തിലാണ് ഗവേഷണമെന്ന് നഗരസഭാധ്യക്ഷ രാധാമണി പിള്ളയും വിദ്യാഭ്യാസ സ്‌ഥിര സമിതി ചെയർമാൻ നൗഷാദ് പല്ലച്ചിയും പറഞ്ഞു. പച്ചക്കറിയിലും പഴ വർഗങ്ങളിലും ആരോഗ്യത്തിന് ഹാനികരമായ രാസ സാമീപ്യമുണ്ടോയെന്ന് കണ്ടെത്താനുള്ള സാങ്കേതിക വിദ്യയും ശ്വസന വായുവിനെ പഠന വിധേയമാക്കി കാൻസർ പോലുള്ള രോഗങ്ങളെ മുൻകൂട്ടി മനസിലാക്കാനുള്ള സാങ്കേതിക വിദ്യയും ഗവേഷണത്തിലൂടെ കണ്ടെത്തും. ഡിമെൻഷ്യ രോഗികളെ സഹായിക്കാനുള്ള എ1-പവേർഡ് വെർച്വൽ അസിസ്റ്റന്‍റ് മെമോമേറ്റ് സംവിധാനവും വൻകുടലിൽ ബാധിക്കുന്ന കാൻസറുകളെ പ്രാരംഭഘട്ടത്തിൽ നിർണയിക്കാനുള്ള നിർമിത ബുദ്ധി അധിഷ്‌ഠിത സാങ്കേതിക വിദ്യയും ഗവേഷണ വിഷയങ്ങളാണ്. ആറു മാസത്തിനകം ഗവേഷണങ്ങൾ പൂർത്തിയാക്കി ഇതിനാവശ്യമായ ഉപകരണങ്ങൾ വികസിപ്പിച്ചെടുക്കുകയാണ് ലക്ഷ്യം.

പ്രതിപക്ഷ വാർഡുകൾക്ക് ഫണ്ടുകൾ അനുവദിക്കുന്നില്ലെന്ന് : കുന്നത്തുനാട്ടിൽ യുഡിഎഫ് ജനപ്രതിനിധികൾ ഉപവസിച്ചു

കിഴക്കന്പലം: കുന്നത്തുനാട് ഗ്രാമപഞ്ചായത്തിലെ പ്രതിപക്ഷ മെമ്പർമാരുടെ വാർഡുകളിലേക്ക് റോഡ് നിർമാണത്തിന് അടക്കം ഫണ്ടുകൾ അനുവദിക്കാത്തതിൽ പ്രതിഷേധിച്ച് യുഡിഎഫ് ജനപ്രതിനിധികൾ പഞ്ചായത്തിനു മുന്നിൽ ഉപവാസ സമരം നടത്തി. കെ.കെ. മീതിയൻ, ടി.എ. ഇബ്രാഹിം, എം.ബി. യൂനസ്, പി.കെ. അബൂബക്കർ, മായാ വിജയൻ എന്നിവരാണ് പഞ്ചായത്തിന് മുന്നിൽ ഉപവാസം സമരം നടത്തിയത്. സമരത്തിന് അഭിവാദ്യമർപ്പിച്ചു ബെന്നി ബഹനാൻ എംപി, ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, മുൻ വൈസ് പ്രസിഡന്‍റ് സനിത റഹീം, കുന്നത്തുനാട് മണ്ഡലം പ്രിസിഡന്‍റ് കെ.കെ. രമേശ്, പട്ടിമറ്റം മണ്ഡലം പ്രസിഡന്‍റ് ഹനീഫ കുഴിപ്പിള്ളി, മെമ്പർമാരായ ലിസി അലക്സ്, ഷൈനി, മുസ്ലിം ലീഗ് ജില്ലാ വൈസ് പ്രസിഡന്‍റ് കെ.എച്ച്. മുഹമ്മദ് കുഞ്ഞ്, എം.പി. അബൂബക്കർ, മുഹമ്മദ് അഷ്റഫ്, ടി.എച്ച്. അബ്ദുൽ ജബ്ബാർ, പി.പി. അബൂബക്കർ, ഇ.എം. നവാസ്, കെ.എം. സലിം, നവാസ് പട്ടിമറ്റം, ടി.വി. പരീത്, ടി.വി. ശശി, പി.വി. സുകുമാരൻ,വി.ജി. വാസുദേവൻ, സബിത അബ്ദുൽ റഹ്മാൻ, ധന്യ ഉണ്ണികൃഷ്ണൻ,സി.എം. ഷംനാജ്, ബേബി നാരങ്ങത്തോടൻ തുടങ്ങിയവർ സംസാരിച്ചു.

മെട്രോയിൽ വിദ്യാർഥികളുടെ യാത്രായിളവ് പിൻവലിച്ചതായി പരാതി

ആലുവ : മെട്രോ സ്റ്റേഷൻ വിദ്യാർഥികളുടെ യാത്രായിളവ് നിർത്തലാക്കിയതായി പരാതി. വേനലവധി എന്ന പേരിലാണ് കൺസഷൻ പിൻവലിച്ചതെന്നാണ് കൊച്ചി മെട്രോ അധികൃതർ പറയുന്നത്. കോളേജ് വിദ്യാർത്ഥികൾക്കാണ് കൺസഷൻ പിൻവലിച്ചത് തിരിച്ചടിയായത്. മാസം 600 രൂപ എറണാകുളം വൈറ്റില വരെ പോകാമായിരുന്നു. ഇതിന് ഇപ്പോൾ ദിവസം 120 രൂപ വിദ്യാർഥികൾ മുടക്കേണ്ടതായി വന്നിരിക്കുകയാണ്.

സെലിബ്രിറ്റി ക്രിക്കറ്റ് പ്രീമിയര്‍ ലീഗ് കിരീടം ഹിപ്പോ ഹിറ്റേഴ്‌സിന്

കളമശേരി: സിനിമ, ടെലിവിഷന്‍ മേഖലയിലെ കൂട്ടായ്മയായ സെലിബ്രിറ്റി ക്രിക്കറ്റേഴ്സ് ഫ്രെട്ടേണിറ്റി (സിസിഎഫ്) കളമശേരി സെന്‍റ് പോള്‍സ് കോളജ് ഗ്രൗണ്ടില്‍ നടത്തിയ ബ്രാഞ്ച്എക്സ് സിസിഎഫ് പ്രീമിയര്‍ ലീഗില്‍ കിരീടം ഹിപ്പോ ഹിറ്റേഴ്‌സിന്. കലാശപ്പോരാട്ടത്തില്‍ സാജു നവോദയയുടെ ഗോറില്ല ഗില്‍ഡേഴ്സിനെയാണ് ലുക്ക്മാന്‍ ഓണറായുള്ള ഹിപ്പോ തോല്‍പ്പിച്ചത്. 132 റണ്‍സെടുത്ത ഹിപ്പോയുടെ ജയം 27 റണ്‍സിനായിരുന്നു. ഹിപ്പോ ഹിറ്റേഴ്‌സ് താരവും സംവിധായകനുമായ ജീന്‍ പോള്‍ ലാലാണ് മാന്‍ ഓഫ് ദി മാച്ച്. രാവിലെ നടന്ന ആദ്യ സെമിയില്‍ അഖില്‍ മാരാരുടെ ഫിനിക്‌സ് പാന്തേഴ്‌സിനെ 13 റണ്‍സിന് തോല്‍പ്പിച്ചാണ് ഗോറില്ല ഗില്‍ഡേഴ്‌സ് ഫൈനലില്‍ പ്രവേശിച്ചത്. രണ്ടാം സെമിയില്‍ ആന്‍റണി പെപ്പെയുടെ റൈനോ റേഞ്ചേഴ്സിനെതിരെ 21 റണ്‍സിനായിരുന്നു ഹിപ്പോ ഹിറ്റേഴ്‌സിന്‍റെ ജയം.

മുപ്പത്തടം-ഏലൂക്കര റോഡ് പുനരുദ്ധാരണം : വാട്ടർ അഥോറിറ്റി 1.06 കോടി അനുവദിച്ചു

ആലുവ: ഒരു വർഷമായി താറുമാറായിക്കിടക്കുന്ന മുപ്പത്തടം-ഏലൂക്കര റോഡ് പുനരുദ്ധാരണ പ്രവർത്തികൾക്ക് വാട്ടർ അഥോറിറ്റി 1.06 കോടി രൂപ അനുവദിച്ചു. ജനകീയ സമരങ്ങൾ ശക്തമായതിനെ തുടർന്ന് വ്യവസായ മന്ത്രി പി രാജീവ് ഇടപെട്ടാണ് വാട്ടർ അഥോറിറ്റിയുടെ പ്ലാൻ ഫണ്ട് അനുവദിച്ചത്. ജലജീവൻ മിഷൻ പദ്ധതിക്കായി കുത്തിപ്പൊളിച്ച മുപ്പത്തടം പഞ്ചായത്ത് കവല - ഏലൂക്കര റോഡിന്‍റെ ടെൻഡർ വിളിച്ചെങ്കിലും ഏറ്റെടുക്കാൻ ആരും തയാറാകാത്തതിനാൽ റീ ടാറിംഗ് നീണ്ടുപോകുകയായിരുന്നു. ഫെബ്രുവരി 18ന് ജലമിഷൻ പദ്ധതിയിലെ പൈപ്പിടൽ പൂർത്തിയായിട്ടും ടാറിംഗ് നടക്കാതായത് സ്ഥലം എംഎൽഎ കൂടിയായ മന്ത്രിയുടെ ശ്രദ്ധയിൽപ്പെട്ടതോടെയാണ് പ്രത്യേക ഉത്തരവ് ഇറങ്ങിയത്. ജലജീവൻ മിഷൻ പദ്ധതി പ്രകാരം മാർച്ച് 31ന് ശേഷം ടെൻഡർ നടപടികളൊന്നും പാടില്ലെന്ന കേന്ദ്ര സർക്കാർ ഉത്തരവ് ഉള്ളതിനാൽ സംസ്ഥാനത്തെ 92 റോഡുകൾക്ക് ഇതേ പ്രതിസന്ധിയുള്ളതായും മന്ത്രി പി. രാജീവ് പറഞ്ഞു. റോഡിന്‍റെ നിർമാണ പ്രവർത്തനങ്ങൾ ഇന്നാരംഭിക്കും. മഴയ്ക്ക് മുമ്പ് 30 ദിവസത്തിനകം പൂർത്തീകരിക്കണമെന്ന് കരാറുകാരന് നിർദ്ദേശം നൽകിയതായി മന്ത്രി പി. രാജീവ് "ദീപിക' യോട് പറഞ്ഞു. കഴിഞ്ഞ മഴക്കാലത്ത് വാഹനങ്ങൾ ഓടിക്കാനാകാതെ ജനങ്ങൾ ബുദ്ധിമുട്ടിയിരുന്നു. ഏലൂക്കര റോഡ് പ്രത്യേകമായി പരിഗണിച്ച് മന്ത്രിയുടെ സാന്നിധ്യത്തിൽ ബന്ധപ്പെട്ട വകുപ്പ് ഉദ്യോഗസ്ഥരുടെ യോഗം 23ന് തിരുവനന്തപുരത്ത് ചേർന്നാണ് അനുകൂല തീരുമാനമെടുത്തത്. ഇതുപ്രകാരമാണ് കഴിഞ്ഞ ദിവസം മാനേജിംഗ് ഡയറക്ടർ കെ. ജീവൻ ബാബു പ്രത്യേക ഉത്തരവിറങ്ങിയത്.

അഗ്രി ടൂറിസം ഏകദിന പരിശീലന പരിപാടി

കോതമംഗലം: ആർടി ക്ലബും കോഴിക്കോട് എൻഐടിയും സംയുക്തമായി അഗ്രി ടൂറിസം എന്ന വിഷയത്തിൽ ഏകദിന പരിശീലന പരിപാടി നടത്തി. കോതമംഗലം എംഎ കോളജ് സ്റ്റഡീസ് സെന്‍ററിൽ നടന്ന പരിപാടി ജില്ലാ പഞ്ചായത്തംഗം കെ.കെ. ദാനി ഉദ്ഘാടനം ചെയ്തു. ആർടി ക്ലബ് പ്രസിഡന്‍റ് ഡോ. ജോ ജോസഫ് അധ്യക്ഷത വഹിച്ചു. ഡോ. എസ്.എസ്. ശ്രീജിത്ത്, നബാഡ് ഡിഡിഎം അജീഷ് ബാലു, കാപ്കോ സിഇഒ സുനിൽ സിറിയക്, ചെയർമാൻ സേവ്യർ ജോസഫ്, ഡോ. ജയലഷ്മി, റിസർച്ച് അസിസ്റ്റന്‍റ് വീണ, ഹരിത ഫാർമേഴ്സ് സൊസൈറ്റി പ്രസിഡന്‍റ് എം.എം ജോസഫ് എന്നിവർ പ്രസംഗിച്ചു.

സിപിഐ നേതാക്കളെ ആദരിച്ചു

മൂവാറ്റുപുഴ : സിപിഐ മൂവാറ്റുപുഴ ടൗണ്‍ ലോക്കൽ സമ്മേളനത്തിന്‍റെ ഭാഗമായി നടന്ന മുൻകാല നേതാക്കളെ ആദരിച്ചു. എഐവൈഎഫ് സംസ്ഥാന പ്രസിഡന്‍റ് എൻ. അരുണ്‍ ഉദ്ഘാടനം ചെയ്തു. സിപിഐ ലോക്കൽ കമ്മിറ്റിയംഗം പി.വി. രാധാകൃഷ്ണൻ അധ്യക്ഷത വഹിച്ചു. സിപിഐ മണ്ഡലം സെക്രട്ടറി ജോളി പൊട്ടയ്ക്കൽ, ലോക്കൽ സെക്രട്ടറി കെ.പി. അലിക്കുഞ്ഞ്, അസിസ്റ്റന്‍റ് സെക്രട്ടറി ജോർജ് വെട്ടിക്കുഴി, നേതാക്കളായ പി.എ അസീസ്, സി.എം. ഇബ്രാഹിം കരീം, കെ.എ. സനീർ, അസീസ് തെങ്ങുംതോട്ടം എന്നിവർ പങ്കെടുത്തു. കമ്യൂണിസ്റ്റ് പാർട്ടിയുടെയും പുരോഗമന സാംസ്കാരിക വേദിയുടെയും പ്രവർത്തകനായിരുന്ന കാനം വിജയൻ മെമ്മോറിയൽ എൻഡോവ്മെന്‍റ് വിതരണവും നടത്തി. സമ്മേളനത്തിന്‍റെ ഭാഗമായി നടക്കുന്ന പ്രതിനിധി സമ്മേളനം ഇന്ന് രാവിലെ 10ന് കിഴക്കേക്കര ശ്രീഭദ്ര ഓഡിറ്റോറിയത്തിൽ നടക്കും.

രാജ്യാന്തര സുവിശേഷ മഹായോഗം നാളെ സമാപിക്കും

കോലഞ്ചേരി: കാൽവറി പ്രെയർ ഫെല്ലോഷിപ്പിന്‍റെ ആഭിമുഖ്യത്തിൽ കോലഞ്ചേരി ഞാറ്റുംകാലായിൽ ഹിൽടോപ്പിൽ നടന്നുവരുന്ന രാജ്യാന്തര സുവിശേഷ മഹായോഗത്തിന്‍റെ മൂന്നാം ദിവസത്തിൽ യു.ടി. ജോർജ് മുഖ്യസന്ദേശം നൽകി. മനുഷ്യൻ നശിക്കുവാൻ ദൈവം ആഗ്രഹിക്കുന്നില്ലെന്നും യേശുക്രിസ്‌തുവിന്‍റെ തിരുരക്തം മൂലം ലഭിക്കുന്ന ജയജീവിതമാണ് വിശ്വാസത്തിന്‍റെ സൗഭാഗ്യമെന്നും അദ്ദേഹം പറഞ്ഞു. ടെനി ദേവസി, ജോർജ് പോൾ അയർലൻഡ് തുടങ്ങിയവർ വിവിധ ശുശ്രൂഷ കൾക്ക് നേതൃത്വം നൽകി. കൺവൻഷൻ നാളെ സമാപിക്കും. ഇന്ന് രാവിലെ 9 മുതൽ സാക്ഷ്യങ്ങളും സുവിശേഷ പ്രസംഗങ്ങളും, 12 മുതൽ യു.ടി. ജോർജ് നയിക്കുന്ന ബൈബിൾ ക്ലാസു ഉണ്ടായിരിക്കും. വൈകിട്ട് 5.30 ന് ആരംഭിക്കുന്ന യോഗത്തിൽ പ്രഫ. ജിജി കെ. ജോസഫ്, എം.എ. ആൻഡ്രൂസ്, പ്രഫ. സി.എം. മാത്യു ചാന്ത്യം തുടങ്ങിയവർ പ്രസംഗിക്കും.

പഹൽഗാമിൽ ജീവൻ നഷ്ടമായവർക്ക് ആദരാഞ്ജലി

കോതമംഗലം : കാഷ്മീരിലെ പഹൽഗാമിൽ ഭീകരാക്രമണത്തിൽ കൊല്ലപ്പെട്ടവർക്ക് ആദരാഞ്ജലികൾ അർപ്പിക്കാനായി ഇന്ത്യൻ നാഷണൽ കോണ്‍ഗ്രസ് കോതമംഗലം മുനിസിപ്പൽ മണ്ഡലം കമ്മിറ്റിയുടെ നേതൃത്വത്തിൽ കോതമംഗലത്ത് ഗാന്ധി സ്ക്വയറിൽ ദീപം തെളിച്ചു. നഗരസഭ മുൻ അധ്യക്ഷൻ കെ.പി. ബാബു ഉദ്ഘാടനം ചെയ്തു. മണ്ഡലം പ്രസിഡന്‍റ് പി.ആർ. അജി അധ്യക്ഷത വഹിച്ചു. പി.സി ജോർജ്, അനൂപ് ഇട്ടൻ, സണ്ണി വർഗീസ്, സത്താർ വട്ടകൂടി എന്നിവർ പ്രസംഗിച്ചു. വാഴക്കുളം: കോണ്‍ഗ്രസ് ആവോലി മണ്ഡലം കമ്മിറ്റിയുടെ നേതൃത്വത്തിൽ മെഴുകുതിരി തെളിച്ച് പ്രണാമം അർപ്പിച്ചു. ആവോലി പഞ്ചായത്ത് പ്രസിഡന്‍റ് ഷെൽമി ജോണ്‍സ് ഭീകര വിരുദ്ധ പ്രതിജ്ഞ ചൊല്ലിക്കൊടുത്തു. കോണ്‍ഗ്രസ് ആവോലി മണ്ഡലം പ്രസിഡന്‍റ് ഷിബു ജോസ് പരീക്കൽ യോഗത്തിൽ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് ബിജു ജോസ്, പഞ്ചായത്തംഗങ്ങളായ വി.എസ്. ഷെഫാൻ, ബിന്ദു ജോർജ്, സൗമ്യ ഫ്രാൻസിസ് തുടങ്ങിയവർ പ്രസംഗിച്ചു.

സീനായ്ഗിരി-മുല്ലശേരിപ്പടി റോഡ് ഉദ്ഘാടനം ചെയ്തു

മൂവാറ്റുപുഴ: പായിപ്ര പഞ്ചായത്തിലെ തൃക്കളത്തൂർ സീനായ്ഗിരി - മുല്ലശേരിപ്പടി റോഡ് റീ ടാറിംഗ് നടത്തി നാടിന് സമർപ്പിച്ചു. 60 ലക്ഷം രൂപ മുടക്കിയാണ് റോഡ് നവീകരിച്ചത്. ഏകദേശം നാല് കിലോമീറ്റർ ദൂരം വരുന്ന റോഡാണ് മാത്യു കുഴൽനാടൻ എംഎൽഎയുടെ നേതൃത്വത്തിൽ സീനായ്ഗിരിയിൽ നിന്നും മുല്ലശേരിപ്പടിച്ചിലേക്ക് പ്രഭാത സവാരി നടത്തി ഉദ്ഘാടനം ചെയ്തത്. പഞ്ചായത്ത് മുൻ പ്രസിഡന്‍റ് മാത്യൂസ് വർക്കി, പഞ്ചായത്ത് സ്ഥിരംസമിതി അധ്യക്ഷരായ മുഹമ്മദ് ഷാഫി, സുകന്യ അനീഷ്, പഞ്ചായത്തംഗം എം.സി വിനയൻ, ഷാൻ പ്ലാക്കുടി, അബ്രഹാം തൃക്കളത്തൂർ, എൽദോസ് പി. പോൾ, സഹീർ മേനാമറ്റം, ഒ.എം തങ്കച്ചൻ, പി.സി മത്തായി, രഞ്ജിത്ത് ജോർജ്, കൃഷ്ണൻകുട്ടി, ശിവശങ്കരൻ നായർ, സിനി സുബിൻ, മഞ്ജു കരുണാകരൻ തുടങ്ങി സാമൂഹിക സാംസ്കാരിക നേതാക്കളും, പൗരപ്രമുഖരും പൊതുജനങ്ങളും പ്രഭാത സവാരിയിൽ പങ്കെടുത്തു.

പുഴയോരത്ത് മുന്നറിയിപ്പ് ബോർഡ് സ്ഥാപിച്ച് അഗ്നിരക്ഷാ സേന‌

പിറവം: ദേശീയ അഗ്നിരക്ഷാ വാരത്തിന്‍റെ ഭാഗമായി പിറവം നിലയത്തിലെ അഗ്നിരക്ഷാ സേനാഗങ്ങളും സിവിൽ ഡിഫൻസ് പ്രവർത്തകരും ശാന്തിഗിരി കോളജും സംയുക്തമായി പിറവം സ്റ്റേഷൻ പരിധിയിലുള്ള പുഴയോര പ്രദേശങ്ങളിൽ മുന്നറിയിപ്പ് ബോർഡുകൾ സ്ഥാപിച്ചു. രാമമംഗലം, മാമലശേരി, പാഴൂർ, പിറവം കടവ്, ആറ്റുതീരം എന്നിങ്ങനെ അപകട സാധ്യത ഏറെയുള്ളതും കൂടുതൽ ആളുകൾ എത്തുന്നതുമായ കുളിക്കടവുകളിലാണ് ബോർഡുകൾ സ്ഥാപിച്ചത്. അവധിക്കാലത്ത് കുട്ടികൾ ഉൾപ്പടെ നിരവധിപ്പേർ മുൻപരിചയമില്ലാത്ത പുഴയുടെ ഭാഗങ്ങളിൽ ഇറങ്ങി ഉണ്ടാകുന്ന അപകടങ്ങൾ ഇല്ലാതാക്കുക എന്ന ലക്ഷ്യം മുൻനിർത്തിയാണ് ബോർഡുകൾ സ്ഥാപിച്ചത്. പിറവം സ്റ്റേഷൻ ഓഫീസർ എ.കെ. പ്രഫുൽ നേതൃത്വം നൽകി. അസി. സ്റ്റേഷൻ ഓഫീസർ ഏബ്രഹാം പുന്നൂസ്, ഫയർ ആൻഡ് റെസ്ക്യൂ ഓഫീസർമാരായ സി. അലക്സ്, കെ.പി. അശ്വന്ത് ലാൽ, പി.കെ. സൈനുൾ ആബിദ്, ഫയർ ആൻഡ് റെസ്ക്യൂ ഡ്രൈവർ ആർ. വിഷ്ണു, സിവിൽ ഡിഫൻസ് പോസ്റ്റ്‌വാർഡൻ പി.ഡി. ശങ്കർ, അംഗങ്ങളായ അമൽ പൗലോസ്, ബോബി മാത്യു, ജിൻസി മോൾ, ചാക്കോ ഷിബു, സാറ എലിസബത്ത് സാജു എന്നിവർ പങ്കെടുത്തു.

വദനാരോഗ്യ ദിനാചരണം

കോതമംഗലം: മാർ ബസേലിയോസ് ദന്തൽ കോളജ് ഓറൽ മെഡിസിൻ ഡിപ്പാർട്ടുമെന്‍റ് ഓഫ് റേഡിയോളജിയുടെ ആഭിമുഖ്യത്തിൽ ലോക വദനാരോഗ്യ ദിനാചരണം നടത്തി. പൊതുജനങ്ങൾക്ക് വായുടെ ആരോഗ്യം കാത്തുസൂക്ഷിക്കുവാനുള്ള മുൻ കരുതലുകൾ ഉൾപ്പെടുത്തിയ ലഘുലേഖകൾ എംബിഎംഎം അസോസിയേഷൻ സെക്രട്ടറി സലിം ചെറിയാൻ പ്രകാശനം ചെയ്തു. പ്രിൻസിപ്പൽ ഡോ. ബൈജു പോൾ കുര്യൻ, ചീഫ് ഓപ്പറേറ്റിംഗ് ഓഫീസർ ഡോ. കെംത്തോസ് പോൾ, ഓറൽ മെഡിസിൻ വിഭാഗം മേധാവി ഡോ. ബീനാകുമാരി എന്നിവർ പങ്കെടുത്തു. തുടർന്ന് വിദ്യാർഥികൾക്കായി വിവിധ മത്സരങ്ങൾ സംഘടിപ്പിച്ചു.

മനുഷ്യ മഹാശൃംഖല തീർത്തു

മൂവാറ്റുപുഴ: ‘വേണ്ട ഹിംസയും ലഹരിയും’ എന്ന മുദ്രാവാക്യമുയർത്തി ഡിവൈഎഫ്ഐ സംസ്ഥാന വ്യാപകമായി സംഘടിപ്പിക്കുന്ന ലഹരിക്കെതിരെ ജനകീയ കവചം കാന്പയിനിന്‍റെ ഭാഗമായി മൂവാറ്റുപുഴയിൽ മനുഷ്യ മഹാശൃംഖല തീർത്തു. ഡിവൈഎഫ്ഐ ബ്ലോക്ക് കമ്മിറ്റിയുടെ നേതൃത്വത്തിൻ പേഴയ്ക്കാപ്പിള്ളി പായിപ്ര കവല മുതൽ വാഴപ്പിളളി പുളിഞ്ചോട് കവല വരെയാണ് ശൃഖല തീർത്തത്. ഡിവൈഎഫ്ഐ ബ്ലോക്ക് സെക്രട്ടറി ഫെബിൻ പി. മൂസ പ്രതിജ്ഞ ചൊല്ലിക്കൊടുത്തു. തുടർന്ന് പായിപ്ര കവലയിൽ നടന്ന ലഹരിക്കെതിരായ ജാഗ്രതാ സദസ് സിപിഎം ജില്ലാ സെക്രട്ടറി എസ്. സതീഷ് ഉദ്ഘാടനം ചെയ്തു. കാഷ്മീരിൽ പഹൽഗാമിൽ ഭീകരാക്രമണത്തിൽ കൊല്ലപ്പെട്ടവർക്ക് ആദരാഞ്ജലി അർപ്പിച്ച് തീവ്രവാദത്തിനെതിരെ ദീപം തെളിച്ചു. ഡിവൈഎഫ്ഐ ജില്ലാ പ്രസിഡന്‍റ് അനീഷ് എം മാത്യു അധ്യക്ഷത വഹിച്ചു.

തട്ടേക്കാട് ചിറയുടെ നിർമാണത്തിൽ അപാകതയെന്ന് ആക്ഷേപം

തിരുമാറാടി: തട്ടേക്കാട് ചിറയുടെ നിർമാണത്തിൽ അപാകതകളുള്ളതായി ആക്ഷേപം. 45 ലക്ഷം ചെലവഴിച്ച് നിർമിക്കുന്ന തട്ടേക്കാട് ചിറയുടെ നിർമാണത്തിന് ഉപയോഗിക്കുന്ന കോണ്‍ക്രീറ്റ് മിശ്രിതം ശരിയായ അളവിലല്ലെന്നാണ് ആക്ഷേപം ഉയർന്നിരിക്കുന്നത്. നിർമാണം നടക്കുന്ന സ്ഥലത്തെ മണ്ണ് കൃത്യമായി നീക്കം ചെയ്യാതെ ചിറയിലെ ചെളിക്ക് മുകളിലാണ് നിർമാണം പുരോഗമിക്കുന്നത്. കൃത്യമായ മേൽനോട്ടം ഇല്ലാതെയാണ് ഇവിടുത്തെ നിർമാണ പ്രവർത്തനങ്ങൾ നടക്കുന്നതെന്നും ആക്ഷേപമുണ്ട്. എക്സിക്യൂട്ടീവ് എൻജിനീയറുടെ മേൽനോട്ടത്തിൽ നടക്കേണ്ട നിർമാണ പ്രവർത്തനങ്ങൾ നിലവിൽ മൈനർ ഇറിഗേഷന്‍റെ ഓവർസീയറുടെ സാന്നിധ്യത്തിൽ ഇതര സംസ്ഥാന തൊഴിലാളികളാണ് ചെയ്യുന്നത്. അടിയൊഴുക്ക് കൂടുതലുള്ള ഈ ഭാഗത്ത് കോണ്‍ക്രീറ്റ് തള്ളിപ്പോകാനുള്ള സാധ്യത ഏറെയാണെന്നും നാട്ടുകാർ ചൂണ്ടിക്കാട്ടുന്നു. ഇതോടൊപ്പം വരും വർഷങ്ങളിൽ ഇവിടെ അറ്റകുറ്റപ്പണിയും ആവശ്യമായി വരും. ഇതും പഞ്ചായത്തിന് അധിക ബാധ്യതയാകുമെന്നും ചൂണ്ടിക്കാട്ടപ്പെടുന്നു.

ഡിസിഎൽ തൊടുപുഴ പ്രവിശ്യയുടെ ത്രിദിന പെറ്റ്സ് ക്യാന്പ് സമാപിച്ചു

മൂവാറ്റുപുഴ രൂപത : ഫ്രാൻസിസ് പാപ്പയെ അനുസ്മരിച്ചു

മൂവാറ്റുപുഴ: സീറോ മലങ്കര സഭാ മൂവാറ്റുപുഴ രൂപതയുടെ ആഭിമുഖ്യത്തിൽ ഫ്രാൻസിസ് മാർപാപ്പ അനുസ്മരണവും പ്രാർഥനാശുശ്രൂഷയും നടത്തി. വാഴപ്പള്ളി സെന്‍റ് ജോസഫ്സ് കത്തീഡ്രലിൽ നടന്ന അനുസ്മരണ യോഗത്തിൽ മെത്രാപ്പോലീത്തമാരായ യൂഹാനോൻ മാർ തെയഡോഷ്യസ്, കുര്യാക്കോസ് മാർ തെയോഫിലോസ്, തോമസ് മാർ അത്തനാസിയോസ്, ഫ്രാൻസിസ് ജോർജ് എംപി, ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, നഗരസഭാധ്യക്ഷൻ പി.പി എൽദോസ്, വികാരി ജനറാൾ ഫാ. തോമസ് ഞാറക്കാട്ട് കോറെപ്പിസ്കോപ്പാ, ഫാ. ജോർജ് അയ്യനേത്ത്, ഫാ. വർഗീസ് മഠത്തിക്കുന്നത്ത്, ഫാ. വർഗീസ് പന്തിരായിതടത്തിൽ, സിസ്റ്റർ ജോസ്ന, ഫാ. കുര്യാക്കോസ് കൊടകല്ലിൽ, ഫാ. വിൻസെന്‍റ് പാറമേൽ, ഫാ. റോയി കണ്ണൻചിറ, വി.സി. ജോർജ്കുട്ടി എന്നിവർ പ്രസംഗിച്ചു. പാപ്പയുടെ ഛായാചിത്രത്തിനു മുന്പിൽ പൂക്കളർപ്പിച്ചു. തുടർന്ന് സീറോ മലബാർ, ലത്തീൻ, സീറോ മലങ്കര ക്രമങ്ങളിൽ പ്രാർഥനാശുശ്രൂഷയും നടന്നു. വൈദികർ, സന്യസ്തർ, പ്രേഷിത സംഘടനകളുടെ ഭാരവാഹികൾ, മൂവാറ്റുപുഴയിലെ സാംസ്കാരിക നേതാക്കൾ, അൽമായർ തുടങ്ങിയവർ പങ്കെടുത്തു.

ബിവ്റേജ് ജംഗ്ഷന്‍ - കാവക്കാട് റോഡ് : ചെളിക്കുളം

പോത്താനിക്കാട്: കുണ്ടും കുഴിയും നിറഞ്ഞ് ചെളികുളങ്ങമായ ബിവ്റേജ് ജംഗ്ഷന്‍-കോന്നന്‍പാറ-കാവക്കാട് റോഡിന്‍റെ ശോച്യാവസ്ഥ പരിഹരിക്കണമെന്ന് ആവശ്യം ശക്തമാകുന്നു. രണ്ടര കിലോമീറ്റര്‍ ദൈര്‍ഘ്യമുള്ള റോഡ് നാശമായി കിടക്കാൻ തുടങ്ങിയിട്ട് വർഷങ്ങളായി. എംവിഐപി വലതുകര കനാലിന്‍റെ പാര്‍ശ്വഭാഗത്തു കൂടിയുള്ള ഗ്രാമീണ റോഡ് 12 വര്‍ഷം മുന്‍പ് മുൻ എംഎല്‍എ ജോസഫ് വാഴയ്ക്കന്‍റെ പ്രാദേശിക വികസനഫണ്ട് ഉപയോഗിച്ചാണ് ആദ്യമായി ടാര്‍ ചെയ്തത്. 2017-18 കാലഘട്ടത്തില്‍ ജില്ലാ പഞ്ചായത്ത് ഫണ്ടുപയോഗിച്ച് റീടാര്‍ ചെയ്തിരുന്നെങ്കിലും പിന്നീട് ഇവിടെ അറ്റകുറ്റ പണികള്‍ ഒന്നും തന്നെ നടത്തിയിട്ടില്ലെന്ന് നാട്ടുകാർ ചൂണ്ടിക്കാട്ടുന്നു. പോത്താനിക്കാട്-ആയവന പഞ്ചായത്തുകളെ ബന്ധിപ്പിക്കുന്ന റോഡിലൂടെ ദിവസേന നിരവധി വാഹനങ്ങളാണ് കടന്നുപോകുന്നത്. കാല്‍നടയാത്ര പോലും ദുഷ്കരമായ ഇവിടെ ഇരുചക്രവാഹനങ്ങള്‍ നിലതെറ്റി മറിയുന്നതും പതിവു കാഴ്ചയാണ്. അധികൃതര്‍ ഉടൻ ഇടപെട്ട് റോഡ് സഞ്ചാരയോഗ്യമാക്കണമെന്നതാണ് ആവശ്യം.

എംഡിഎംഎയും കഞ്ചാവുമായി യുവാവ് പിടിയിൽ

മൂവാറ്റുപുഴ: എംഡിഎംഎയും കഞ്ചാവുമായി യുവാവ് എക്സൈസിന്‍റെ പിടിയിൽ. ജില്ലയിൽ എംഡിഎംഎ വലിയതോതിൽ മൊത്തക്കച്ചവടം നടത്തുന്ന തൃക്കാക്കര തുരുത്തുന്മേൽ സഫലിനെയാണ് വ്യാഴാഴ്ച രാത്രി കുര്യൻമലയിൽ നിന്ന് എക്സൈസ് സംഘം പിടികൂടിയത്. പുലർച്ചെ സമയങ്ങളിൽ എറണാകുളത്തു നിന്നും കാറിലെത്തി പേഴയ്ക്കാപ്പിള്ളിയിലും മൂവാറ്റുപുഴയിലെ മറ്റു പ്രദേശങ്ങളിലും ഇയാൾ സ്ഥിരമായി എംഡിഎംഎ വിൽപന നടക്കുന്നുണ്ടെന്ന് എക്സൈസിന് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ നടത്തിയ പരിശോധനയിലാണ് 17.5 ഗ്രാം കഞ്ചാവും, .09 ഒന്പത് ഗ്രാം എംഡിഎംഎയുമായി പ്രതി പിടിയിലാത്. സഫൽ എംഡിഎംഎയും കഞ്ചാവും വില്പന നടത്തിവന്നിരുന്ന കടാതി കുര്യൻമല സ്വദേശി റെൽവിൻ രാജുവിന്‍റെ വീട്ടിൽ നിന്നുമാണ് പിടിയിലായത്. എംഡിഎംഎ ഉപയോഗിക്കുന്നതിനുള്ള ഗ്ലാസ് ട്യൂബുകളും മൊബൈൽ ഫോണും പണവും എക്സൈസ് സംഘം പിടിച്ചെടുത്തിട്ടുണ്ടെന്ന് സർക്കിൾ ഇൻസ്പെക്ടർ ജി. കൃഷ്ണകുമാർ പറഞ്ഞു. സംഭവവുമായി ബന്ധപ്പെട്ട് റെൽവിൻ രാജുവിന്‍റെ പങ്കും എക്സൈസ് അന്വേഷിക്കുന്നുണ്ട്. ഓപ്പറേഷൻ ക്ലീൻ സ്ലേറ്റ് ഫേസ് ടുവിന്‍റെ അടിസ്ഥാനത്തിൽ വ്യാപകമായ പരിശോധനയാണ് മൂവാറ്റുപുഴ എക്സൈസ് നേതൃത്വത്തിൽ നടത്തിവരുന്നത്. അസിസ്റ്റന്‍റ് എക്സൈസ് ഇൻസ്പെക്ടർ അജയകുമാർ, പ്രിവന്‍റീവ് ഓഫീസർ ഷബീർ, സിവിൽ എക്സൈസ് ഓഫീസർമാരായ റഹിം, നൗഷാദ്, വനിതാ സിവിൽ എക്സൈസ് ഓഫീസർ അനിത, ജയൻ എന്നിവരടങ്ങിയ സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മലന്പാന്പിനെ പിടികൂടി

കോതമംഗലം: അയ്യപ്പൻമുടി റോഡിൽ രാത്രിയെത്തിയ കൂറ്റൻ മലന്പാന്പിനെ പിടികൂടി. എലവുംപറന്പ് - അയ്യപ്പൻമുടി റോഡിൽ ചാപ്പലിനു സമീപം റോഡിനു കുറുകെയാണ് വ്യാഴാഴ്ച രാത്രി പാന്പിനെ കണ്ടത്. നഗരസഭാംഗം സിജോ അറിയിച്ചതനുസരിച്ച് പാന്പുപിടുത്ത വിദഗ്ധൻ മാർട്ടിൻ മേയ്ക്കമാലി സ്ഥലത്തെത്തി ഏറെ നേരത്തെ പരിശ്രമത്തിനൊടുവിൽ പാന്പിനെ പിടികൂടുകയായിരുന്നു. ഇതിനിടെ സ്ഥലത്തെത്തിയ വനപാലകർക്ക് പാന്പിനെ കൈമാറി.

നടിമാര്‍ക്കെതിരായ പരാമര്‍ശം: ആറാട്ടണ്ണൻ അറസ്റ്റില്‍

കൊച്ചി: മലയാള സിനിമ നടിമാര്‍ക്കെതിരെ സാമൂഹിക മാധ്യമങ്ങളിലൂടെ മോശം പരാമര്‍ശം നടത്തിയ കേസില്‍ കളമശേരി സ്വദേശിയായ വ്‌ളോഗര്‍ സന്തോഷ് മാത്യു വര്‍ക്കി (ആറാട്ടണ്ണന്‍, 38) അറസ്റ്റില്‍. താരസംഘടനയായ അമ്മയുടെ അഡ്‌ഹോക്ക് കമ്മിറ്റി അംഗവും നടിയുമായ അന്‍സിബ ഹസന്‍ കൊച്ചി സിറ്റി പോലീസ് കമ്മീഷണര്‍ക്ക് നല്‍കിയ പരാതിയിലാണ് അറസ്റ്റ്. സ്ത്രീത്വത്തെ അപമാനിച്ചതിനും ഐടി ആക്ട് പ്രകാരവും ജാമ്യമില്ലാ വകുപ്പുകള്‍ ചുമത്തി എറണാകുളം നോര്‍ത്ത് പോലീസാണ് അറസ്റ്റ് ചെയ്തത്. കഴിഞ്ഞദിവസം രാത്രിയാണ് ഫേസ്ബുക്കിലൂടെ സന്തോഷ് നടിമാർക്കെതിരേ പരാര്‍മശങ്ങള്‍ നടത്തിയത്. സിനിമാ മേഖലയില്‍ പ്രവര്‍ത്തിക്കുന്ന സ്ത്രീകളെല്ലാം മോശം സ്വഭാവക്കാരാണെന്നായിരുന്നു പരാമര്‍ശം. ഈ വീഡിയോ സന്തോഷ് നീക്കം ചെയ്‌തെങ്കിലും വ്യാപകമായി പ്രചരിച്ചു. ഇത് താരസംഘടയുടെ ശ്രദ്ധയില്‍പ്പെട്ടതോടെയാണ് അന്‍സിബ ഹസന്‍ പരാതി നല്‍കിയത്. മറ്റു രണ്ട് നടിമാരും പരാതിയുമായി പോലീസിനെ സമീപിച്ചിട്ടുണ്ടെന്നാണ് വിവരം. ഇയാളുടെ ഫോണ്‍കണ്ടെത്താന്‍ പോലീസ് അന്വേഷണം തുടങ്ങി. മുമ്പും സാമൂഹികമാധ്യമങ്ങളിലൂടെ സമാന രീതിയില്‍ നടിമാര്‍ക്കെതിരെ ഇത്തരം പരാമര്‍ശങ്ങള്‍ നടത്തിയിട്ടുള്ള സന്തോഷ് മേക്കപ്പ് ആര്‍ട്ടിസ്റ്റായ ട്രാന്‍സ്‌ജെന്‍ഡറെ കെട്ടിയിട്ട് പീഡിപ്പിച്ച കേസിലെ പ്രതിയാണ്. സന്തോഷിനെ കോടതിയില്‍ ഹാജരാക്കി.

ആലുവയിലെ വാഹന മോഷണം : അഞ്ച് പേർ പിടിയിൽ

ആലുവ: വിവിധയിടങ്ങളിൽ പാർക്ക് ചെയ്തിരുന്ന വാഹനങ്ങൾ മോഷ്ടിച്ച കേസുകളിൽ പ്രതികളായ പ്രായപൂർത്തിയാകാത്ത രണ്ട് പേർ ഉൾപ്പെടെ അഞ്ച് സ്ഥിരം മോഷ്ടാക്കളെ പോലീസ് പിടികൂടി. മാർക്കറ്റിന് സമീപം പാർക്ക് ചെയ്തിരുന്ന ഓട്ടോറിക്ഷ മോഷ്ടിച്ച പേഴയ്ക്കാപ്പിള്ളി കളപ്പുരക്കൽ ഷാജി (അണ്ണാൻകുഞ്ഞ് - 44), മൂവാറ്റുപുഴ മടവൂർ വെളിയത്തുപടി പുത്തൻപുരയിൽ സുനിൽ കുമാർ (53), ബൈപാസ് ഭാഗത്തു നിന്നു സ്കൂട്ടർ മോഷ്ടിച്ച ചുള്ളി തോന്നിക്കോട് കോലാട്ടുകുടി ബിനോയി (43), മാതാ തിയറ്ററിന് സമീപത്തുനിന്ന് ബൈക്ക് മോഷ്ടിച്ച പ്രായപൂർത്തിയാകാത്ത രണ്ടു പേർ എന്നിവരെയാണ് ആലുവ പോലീസ് അറസ്റ്റ് ചെയ്തത്. പ്രതികൾ പലതവണ ജയിൽ ശിക്ഷ അനുഭവിച്ചവരാണെന്ന് ആലുവ ടൗൺ പോലീസ് അറിയിച്ചു. മോഷ്ടിച്ച വാഹനത്തിൽ കറങ്ങിനടന്ന് മറ്റ് സ്റ്റേഷൻ പരിധിയിൽ മോഷണം നടത്തിയതായും തെളിഞ്ഞിട്ടുണ്ട്. പ്രതികൾ മോഷ്ടിച്ച വാഹനങ്ങൾ കണ്ടെടുത്തു. പ്രായപൂർത്തിയായവരെ കോടതിയിൽ ഹാജരാക്കി റിമാൻഡ് ചെയ്തു.

എല്‍കെ ഷോര്‍ട്ട് ഫിലിം ഫെസ്റ്റിവല്‍

കൊച്ചി: എല്‍കെ ഫൗണ്ടേഷന്‍റെ ആഭിമുഖ്യത്തില്‍ എല്‍കെ ഷോര്‍ട്ട് ഫിലിം ഫെസ്റ്റിവല്‍ ഇന്ന് കലൂര്‍ ഗോകുലം കണ്‍വന്‍ഷന്‍ സെന്‍ററില്‍ നടക്കും. മന്ത്രി കടന്നപ്പള്ളി രാമചന്ദ്രന്‍ ഉദ്ഘാടനം ചെയ്യും. ചടങ്ങില്‍ മണിപ്പുര്‍ ചലച്ചിത്ര സംവിധായകന്‍ ഹൗബം പവന്‍ കുമാര്‍, സംവിധായകന്‍ ടി.വി. ചന്ദ്രന്‍ എന്നിവരെ ആദരിക്കും. സംവിധായകന്‍ സിബി മലയില്‍ മുഖ്യാതിഥിയാകും. ഷോര്‍ട്ട് ഫിലിം ഫെസ്റ്റിവല്‍ അവാര്‍ഡ് ജേതാക്കള്‍ക്ക് ചടങ്ങില്‍ സര്‍ട്ടിഫിക്കറ്റും മെമന്‍റോയും വിതരണം ചെയ്യും. എംഎല്‍എമാരായ പി.വി. ശ്രീനിജിന്‍, കെ.എൻ. ഉണ്ണികൃഷ്ണന്‍, ജൂറി ചെയര്‍മാന്‍ കമല്‍, സംവിധായകരായ വിധു വിന്‍സെന്‍റ്, സുന്ദര്‍ ദാസ്, എ.കെ. സാജന്‍, വി.കെ. ജോസഫ്, ബൈജുരാജ്, ചലച്ചിത്ര താരങ്ങളായ വിനയ് ഫോര്‍ട്ട്, അഞ്ജലി നായര്‍ എന്നിവര്‍ പങ്കെടുക്കും.

ലോറി സ്കൂട്ടറിൽ ഇടിച്ച് വീട്ടമ്മ മരിച്ചു

വരാപ്പുഴ: വേളാങ്കണ്ണി യാത്രയ്ക്കായി സ്കൂട്ടറിൽ മകളോടൊപ്പം ബന്ധുവീട്ടിലേക്ക് പോകവെ ലോറിയിടിച്ച് വീട്ടമ്മ മരിച്ചു. ഒളനാട് വാളൂരാൻ വീട്ടിൽ സൂസി സ്കറിയ (55) ആണ് മരിച്ചത്. ഇന്നലെ പുലർച്ചെ ആറോടെയായിരുന്നു അപകടം. ചേരാനല്ലൂർ സിഗ്നൽ കവലയിൽ വച്ചു ടാങ്കർ ലോറി സ്കൂട്ടറിൽ ഇടിക്കുകയായിരുന്നു. റോഡിലേക്കു തെറിച്ചു വീണ സൂസിയെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംസ്കാരം ഇന്നു പുത്തൻപള്ളി സെന്‍റ് ജോർജ് പള്ളിയിൽ. ഭർത്താവ്: പോൾ സ്കറിയ (റിട്ട. ഫാക്ട് ജീവനക്കാരൻ). മക്കൾ: നീതു സ്കറിയ (സൗദി), നിഖില സ്കറിയ. അപകടത്തിൽ നിസാര പരിക്കേറ്റ മകൾ നിഖിലയെ അമൃത ആശുപത്രിയിൽ പ്രവേശിപ്പിച്ചു.

വീടുകൾ കുത്തിത്തുറന്ന് കവർച്ച: ആസാം സ്വദേശി പിടിയിൽ

പെരുമ്പാവൂർ: വീടുകൾ കുത്തിത്തുറന്ന് പണവും മൊബൈൽ ഫോണുകളും മോഷ്ടിച്ച കേസിൽ ആസാം നൗഗോൺ സ്വദേശി അമിത്തി(27)നെ പെരുമ്പാവൂർ പോലീസ് അറസ്റ്റ് ചെയ്തു. കഴിഞ്ഞ നവംബറിൽ പോഞ്ഞാശേരി കനാൽ ജംഗ്ഷൻ ഭാഗത്തുള്ള മുജീബ് റഹ്മാന്‍റെ വീടിന്‍റെ വാതിൽ കുത്തിത്തുറന്നാണ് പ്രതി കവർച്ച നടത്തിയത്. പിന്നീട് ഇയാളുടെ വാടക വീടിന്‍റെ വാതിൽ കുത്തിത്തുറന്ന് അവിടെ താമസിച്ചിരുന്നയാളുടെ മൊബൈൽ ഫോണും പണവും കവർന്നു. തുടർന്ന് കഴിഞ്ഞ ജനുവരി 23ന് വെങ്ങോല ഷാപ്പുംപടി സ്വദേശിനിയുടെ വീട്ടിനുള്ളിൽ അലമാരയിൽ സൂക്ഷിച്ചിരുന്ന പണവും മൊബൈൽ ഫോണും ഇയാൾ തന്നെ മോഷ്ടിച്ചിരുന്നു. ഈ കേസിൽ പിടിയിലായി ചോദ്യം ചെയ്തപ്പോഴാണ് പോഞ്ഞാശേരിയിലെ മോഷണവിവരവും പറഞ്ഞത്. ഇൻസ്പെക്ടർ ടി.എം. സൂഫി, എസ്ഐമാരായ റിൻസ് എം. തോമസ്, പി.എം റാസിഖ്, എസ്. ശിവപ്രസാദ്, എഎസ്ഐ അഷറഫ്, സീനിയർ സിപിഒമാരായ രെജിത്ത് രാജൻ, ബിനീഷ് ചന്ദ്രൻ എന്നിവരാണ് അന്വേഷണ സംഘത്തിലുണ്ടായിരുന്നത്.

പിഞ്ചുകുഞ്ഞിന്‍റെ ശ്വാസനാളത്തില്‍ കുടുങ്ങിയ സേഫ്റ്റി പിന്‍ പുറത്തെടുത്തു

കൊച്ചി: ഒരു വയസുള്ള കുഞ്ഞിന്‍റെ ശ്വാസനാളത്തില്‍ കുടുങ്ങിയ നാല് സെന്‍റീമീറ്റര്‍ നീളമുള്ള സേഫ്റ്റി പിന്‍ വിപിഎസ് ലേക്‌ഷോര്‍ ആശുപത്രിയില്‍ വിജയകരമായി നീക്കം ചെയ്തു. ശ്വാസമെടുക്കാന്‍ കടുത്ത ബുദ്ധിമുട്ട് അനുഭവപ്പെട്ടതിനെ തുടര്‍ന്നാണ് കുട്ടിയെ ആശുപത്രിയിൽ എത്തിച്ചത്. കുട്ടിയുടെ ശ്വാസനാളത്തില്‍ പിൻ കുടുങ്ങിയതായി എക്‌സറേയില്‍ സ്ഥിരീകരിച്ചതിനെത്തുടര്‍ന്ന് അപകട സാധ്യത കണക്കിലെടുത്ത് അടിയന്തിരമായി ബ്രോങ്കോസ്‌കോപ്പി നടത്തി. വിപിഎസ് ലേക്‌ഷോറിലെ പള്‍മണറി ക്രിട്ടിക്കല്‍ കെയര്‍ ആന്‍ഡ് സ്ലീപ് മെഡിസിന്‍ വകുപ്പിലെ കണ്‍സള്‍ട്ടന്‍റായ ഡോ. മുജീബ് റഹ്മാന്‍റെ നേതൃത്വത്തിലാണ് ബ്രോങ്കോസ്‌കോപ്പി നടത്തിയത്. ശ്വാസനാളത്തില്‍ പിന്‍ ഉണ്ടെന്ന് ഇമേജിംഗിലൂടെയാണ് സ്ഥിരീകരിച്ചതെന്ന് ഡോ. മുജീബ് റഹ്മാന്‍ പറഞ്ഞു. പിന്‍ ആസ്പിറേഷന്‍ കേസുകളില്‍, പ്രത്യേകിച്ച് ചെറിയ വസ്തുക്കള്‍ ഉള്ളിലേക്ക് പോകാവുന്ന സാധ്യത കൂടുതലുള്ള കുഞ്ഞുങ്ങളില്‍ വേഗത്തിലുള്ള മെഡിക്കല്‍ ഇടപെടല്‍ പ്രാധാനമാണെന്നും കുട്ടി ഇപ്പോള്‍ സുഖം പ്രാപിച്ചുവരുന്നതായും അദ്ദേഹം വ്യക്തമാക്കി.

ഇടപ്പള്ളി പള്ളിയില്‍ തിരുനാൾ കൊടിയേറി

കൊച്ചി: ചരിത്ര പ്രസിദ്ധ തീര്‍ഥാടന കേന്ദ്രമായ ഇടപ്പള്ളി സെന്‍റ് ജോര്‍ജ് ഫൊറോന പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് വികാരി ഫാ. ആന്‍റണി മടത്തുംപടി കൊടിയേറ്റി. മേയ് ഒന്നിന് വിശുദ്ധന്‍റെ തിരുസ്വരൂപം എഴുന്നളളിക്കും. മൂന്ന്, നാല് തീയതികളിലാണ് പ്രധാന തിരുനാള്‍. എട്ടാമിടം 10നും 11 നും. വിശുദ്ധന്‍റെ തിരുസ്വരൂപം മേയ് ഒന്നിന് വൈകിട്ട് 4.30 ന് സാഘോഷം പുറത്തേക്ക് എഴുന്നള്ളിക്കും. കോഴിനേര്‍ച്ചയാണ് പ്രധാന വഴിപാട്. നേര്‍ച്ചയായി ലഭിക്കുന്ന കോഴികളെ ലേലത്തില്‍ വിറ്റഴിക്കും.

ബസുകളുടെ മത്സരയോട്ടം; യാത്രക്കാരിയുടെ വിരലറ്റു

ബസ് ജീവനക്കാർ അറസ്റ്റിൽ തൃപ്പൂണിത്തുറ: സ്വകാര്യ ബസുകളുടെ മത്സരയോട്ടം വരുത്തിവച്ച അപകടത്തിൽ യാത്രക്കാരിയുടെ വിരലറ്റുപോയി. മറ്റു ചില യാത്രക്കാർക്കും പരിക്കേറ്റു. അപകടമുണ്ടാക്കിയ രണ്ടു ബസുകളിലെ നാലു ജീവനക്കാരെ അറസ്റ്റുചെയ്തു. വ്യാഴാഴ്ച വൈകിട്ടായിരുന്നു സംഭവം. പുതുക്കലവട്ടം- ചോറ്റാനിക്കര റൂട്ടിൽ സർവീസ് നടത്തുന്ന തവക്കൽ ബസും ഇതേ റൂട്ടിൽ സർവീസ് നടത്തുന്ന നടമേൽ ബസുമാണ് ഭീകരാന്തരീക്ഷം സൃഷ്ടിച്ച് മത്സരയോട്ടം നടത്തിയത്. തവക്കൽ ബസിന്‍റെ ഡ്രൈവർ എളമക്കര പുതുക്കലവട്ടം അമ്പലത്തിന് സമീപം ഷങ്കരോത്ത് വീട്ടിൽ ഷെയ്ക്ക് മുഹമ്മദ് ആഷിഫ് (22), കണ്ടക്ടർ തോപ്പുംപടി അമ്മായിമുക്ക് എ.സി.ടി കോളനിയിൽ മുഹൈജിബി (19), നടമേൽ ബസ് ജീവനക്കാരായ തിരുവാങ്കുളം കടുംഗമംഗലം സുകുമാരവിലാസം വീട്ടിൽ ശ്യാം ഉണ്ണിക്കൃഷ്ണൻ (32), അമ്പാടിമല ചാപ്പുറത്ത് വീട്ടിൽ നിഖിൽ ചന്ദ്രൻ (37) എന്നിവരെയാണ് ഹിൽപാലസ് പോലീസ് അറസ്റ്റ് ചെയ്തത്. എറണാകുളം ഭാഗത്തു നിന്നും ചോറ്റാനിക്കരയിലേക്ക് വന്ന രണ്ടു ബസുകളും വടക്കേക്കോട്ട മുതൽ മത്സരയോട്ടമായിരുന്നു. യാത്രക്കാർ ബസ് നിർത്തുന്നതിനായി ഒച്ചവച്ചെങ്കിലും ജീവനക്കാർ തമ്മിൽ അസഭ്യം വിളിച്ചു മുന്നോട്ടു നീങ്ങവെ പഴയ ബസ് സ്റ്റാൻഡിനടുത്തു വച്ച് തവക്കൽ ബസ് മറികടക്കാൻ ശ്രമിച്ചപ്പോൾ നടമേൽ ബസ് അതേ വശത്തേക്ക് വെട്ടിച്ച് ഇരു ബസുകളും വശം ചേർന്ന് ഇടിക്കുകയായിരുന്നു. അപകടത്തിൽ ഒരു സ്ത്രീയുടെ വിരൽ പകുതി അറ്റുപോകുകയും മറ്റ് യാത്രക്കാർക്കും പരിക്കേൽക്കുകയും ചെയ്തു. ജീവനക്കാരെയും ബസുകളും പോലീസ് കസ്റ്റഡിയിലെടുത്തു. അറസ്റ്റിന് ശേഷം കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. ബസുകളുടെ പെർമിറ്റ് റദ്ദാക്കാനുള്ള നടപടികൾ സ്വീകരിച്ചു വരുന്നതായി പോലീസ് പറഞ്ഞു.

ടാങ്കർ ലോറി സ്കൂട്ടറിൽ ഇടിച്ച് വീട്ടമ്മ മരിച്ചു

വരാപ്പുഴ: വേളാങ്കണ്ണി യാത്രയ്ക്കായി മകളോടൊപ്പം വീട്ടിൽ നിന്നിറങ്ങിയ അമ്മ വാഹനാപകടത്തിൽ മരിച്ചു. ഒളനാട് വാളൂരാൻ വീട്ടിൽ സൂസി സ്കറിയ (55) ആണ് ഇന്നലെ പുലർച്ചെ ആറോടെ ചേരാനല്ലൂർ സിഗ്നൽ കവലയിൽ വാഹനാപകടത്തിൽ മരിച്ചത്. ബന്ധുവിന്‍റെ വീട്ടിൽനിന്നു സംഘമായി വേളാങ്കണ്ണിയിലേക്ക് പോകാനായാണു സൂസിയും മകൾ നിഖിലയും സ്കൂട്ടറിൽ വീട്ടിൽനിന്ന് ഇറങ്ങിയത്. ചേരാനല്ലൂർ സിഗ്നലിൽ വച്ചു ടാങ്കർ ലോറി സ്കൂട്ടറിൽ ഇടിച്ച് സൂസി റോഡിലേക്കു തെറിച്ചു വീഴുകയായിരുന്നു. വീഴ്ചയുടെ ആഘാതത്തിൽ തല റോഡിൽ ഇടിച്ച സൂസിയെ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ നിസാര പരിക്കേറ്റ മകൾ നിഖിലയെ അമൃത ആശുപത്രിയിൽ ചികിത്സയിൽ പ്രവേശിപ്പിച്ചു. സംസ്കാരം ഇന്നു പുത്തൻപള്ളി സെന്‍റ് ജോർജ് പള്ളിയിൽ . ഭർത്താവ്: പോൾ സ്കറിയ (റിട്ട. ഫാക്ട് ജീവനക്കാരൻ). മക്കൾ: നീതു സ്കറിയ (സൗദി), നിഖില സ്കറിയ.

ഹെറോയിനുമായി പിടിയിൽ

പെരുമ്പാവൂർ: 10 ബോട്ടിൽ ഹെറോയിലുമായി ഇതര സംസ്ഥാനത്തൊഴിലാളി പിടിയിൽ. അസം നൗഗാവ് സ്വദേശി ഷഫീഖുൽ ഇസ്ലാം ( 24)നെയാണ് പെരുമ്പാവൂർ എഎസ്പിയുടെ പ്രത്യേക അന്വേഷണസംഘം പിടികൂടിയത്. പെരുമ്പാവൂർ പാറപ്പുറം ഭാഗത്തുനിന്നാണ് ഇയാളെ കസ്റ്റഡിയിലെടുത്തത്. ഇതര സംസ്ഥാന തൊഴിലാളികൾക്കിടയിലായിരുന്നു വില്പന.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD