തളിപ്പറമ്പില്‍നിന്നു ക്രെയിന്‍ മോഷ്ടിച്ചവരെ ഐങ്കൊമ്പിൽനിന്ന് പോലീസ് പിടികൂടി
1497234
Wednesday, January 22, 2025 3:11 AM IST
രാമപുരം: തളിപ്പറമ്പ് കുപ്പം എന്ന സ്ഥലത്ത് നിര്‍ത്തിയിട്ടിരുന്ന ക്രെയിന്‍ മോഷ്ടിച്ച പ്രതികളെ രാമപുരം പോലീസ് പിടികൂടി. പൊന്‍കുന്നം കിഴക്കേതില്‍ ബിബിന്‍ മാര്‍ട്ടിന്‍ (24), എരുമേലി വെച്ചൂച്ചിറ മറ്റത്ത് ജോസഫ് ചാക്കോ (52), മകന്‍ മാര്‍ട്ടിന്‍ ജോസഫ്(24) എന്നിവരാണ് പോലീസിന്‍റെ പിടിയിലായത്. രാമപുരം പോലീസ് സ്റ്റേഷന്‍റെ പരിധിയില്‍ ഐങ്കൊമ്പിലാണു മോഷ്ടിച്ചുകൊണ്ടുവന്ന ക്രെയിന്‍ അടക്കം പോലീസ് പിടികൂടുന്നത്. ശനിയാഴ്ച രാത്രി 11 നും ഞായറാഴ്ച രാവിലെ 8.30 നും ഇടയിലാണ് ക്രെയിന്‍ മോഷണം പോയത്.
തളിപ്പറമ്പ് പോലീസ് സ്റ്റേഷനില്‍ നിന്നും രാമപുരം സ്റ്റേഷനിലേക്കു വന്ന അറിയിപ്പിനെ തുടര്‍ന്ന് എസ്എച്ച്ഒ അഭിലാഷ് കുമാറിന്‍റെ നേതൃത്വത്തിലുള്ള പോലീസ് സംഘമാണ് പ്രതികളെ പിടികൂടിയത്. ഇവരെ തളിപ്പറമ്പ് പോലീസിന് കൈമാറി.