ജില്ലയില് വാര്ഡ് വിഭജനം അട്ടിമറിക്കാന് ഉന്നതതലനീക്കം: മാര്ട്ടിന് ജോര്ജ്
1539092
Thursday, April 3, 2025 2:02 AM IST
കണ്ണൂര്: തദ്ദേശസ്ഥാപനങ്ങളിലേക്കുള്ള തെരഞ്ഞെടുപ്പ് അടുത്തിരിക്കെ വാര്ഡ് വിഭജനപ്രക്രിയ അട്ടിമറിക്കാന് ഉന്നതതലനീക്കം നടക്കുകയാണെന്ന് ഡിസിസി പ്രസിഡന്റ് മാര്ട്ടിന് ജോര്ജ്. സിപിഎമ്മിന് അനുകൂലമായി വാര്ഡ് വിഭജനം അശാസ്ത്രീയമായി നിര്വഹിക്കാനാണ് നീക്കം നടത്തുന്നത്. ഇതിനു വഴങ്ങാത്ത ഉദ്യോഗസ്ഥരെ സ്ഥലംമാറ്റി ഭരണകക്ഷിയുടെ ഇങ്കിതത്തിനൊത്ത് പ്രവര്ത്തിക്കുന്നവരെ നിയോഗിക്കുകയാണ്. അതിന്റെ ഒടുവിലത്തെ ഉദാഹരണമാണ് നടുവില് പഞ്ചായത്ത് സെക്രട്ടറിയുടെ ചുമതല വഹിക്കുന്ന അസിസ്റ്റന്റ് സെക്രട്ടറി എം.ജി. സുഭാഷിന് നിര്ബന്ധിത അവധി നല്കിയ സംഭവമെന്ന് മാര്ട്ടിന് ജോര്ജ് പറഞ്ഞു.
മുമ്പ് അവധിക്ക് അപേക്ഷിച്ചപ്പോള് ഈ ഉദ്യോഗസ്ഥന് അവധി അനുവദിച്ചിരുന്നില്ല. ഇപ്പോള് അദ്ദേഹത്തിന് അവധി വേണ്ട എന്ന് പറഞ്ഞിട്ടും നിര്ബന്ധിച്ചു അവധി എടുപ്പിക്കുന്ന സാഹചര്യം ആണ് ഉന്നതങ്ങളില് നിന്നുമുണ്ടായത്.
ഏറ്റവും കൂടുതല് ഉത്തരവാദിത്വമുള്ള തളിപ്പറമ്പ് ബ്ലോക്ക് പഞ്ചായത്ത് സെക്രട്ടറിക്കാണ് ഇപ്പോള് നടുവില് പഞ്ചായത്തിന്റെ സെക്രട്ടറിയുടെ ചുമതല നല്കിയിരിക്കുന്നത്.
ഇത്തരത്തില് ജില്ലയില് പല തദ്ദേശസ്ഥാപനങ്ങളിലും രാഷ്ട്രീയ ലക്ഷ്യത്തോടെ വാര്ഡ് വിഭജനപ്രക്രിയ അട്ടിമറിക്കാനുള്ള നീക്കം നടക്കുകയാണ്. ജനാധിപത്യവിരുദ്ധമായ രീതിയില് തദ്ദേശസ്ഥാപനങ്ങളുടെ ഭരണം പിടിച്ചെടുക്കുകയെന്ന ലക്ഷ്യത്തോടെ നടത്തുന്ന അശാസ്ത്രീയ വാര്ഡ് വിഭജനത്തെ രാഷ്ട്രീയമായും നിയമപരമായും നേരിടുമെന്നും ഭരണകക്ഷിയുടെ താത്പര്യത്തില് വാര്ഡ് വിഭജന പ്രക്രിയ അട്ടിമറിക്കാന് കൂട്ടുനില്ക്കുന്ന ഉദ്യോഗസ്ഥര് എക്കാലവും അവര്ക്ക് സിപിഎമ്മിന്റെ സംരക്ഷണമുണ്ടാകുമെന്ന് കരുതേണ്ടെന്നും മാര്ട്ടിന് ജോര്ജ് പറഞ്ഞു.