കോട്ടയം ബൈബിള് കണ്വന്ഷന് നാളെ സമാപനം
1539885
Saturday, April 5, 2025 7:05 AM IST
കോട്ടയം: കോട്ടയം കാത്തലിക് മൂവ്മെന്റിന്റെയും കോട്ടയം കരിസ്മാറ്റിക് സോണിന്റെയും സംയുക്താഭിമുഖ്യത്തില് നാഗമ്പടം സെന്റ് ആന്റണീസ് തിരുശേഷിപ്പ് തീര്ഥാടന കേന്ദ്രത്തില് നടക്കുന്ന കോട്ടയം ബൈബിള് കണ്വന്ഷന് നാളെ സമാപിക്കും. ഇന്നലെ ചങ്ങനാശേരി അതിരൂപത ആര്ച്ച്ബിഷപ് മാര് തോമസ് തറയില് വിശുദ്ധ കുര്ബാനയര്പ്പിച്ചു സന്ദേശം നല്കി.
നാല്പത് വർഷങ്ങളിൽ കോട്ടയം നഗരത്തെ വിശുദ്ധീകരിച്ച ദൈവീക സാന്നിധ്യമായിരുന്നു കോട്ടയം കാത്തലിക് ബൈബിൾ കൺവൻഷനെന്ന് ആർച്ച്ബിഷപ് മാർ തോമസ് തറയിൽ പറഞ്ഞു. തൃശൂര് തലോര് ജറുസലേം ധ്യാനകേന്ദ്രത്തിലെ ഫാ. ഡോവീസ് പട്ടത്ത് ആന്ഡ് ടീമാണ് വചന പ്രഘോഷണത്തിനു നേതൃത്വം നല്കുന്നത്.
കണ്വന്ഷന്റെ നാലാം ദിനമായ ഇന്ന് ഉച്ചകഴിഞ്ഞ് മൂന്നിന് കരുണക്കൊന്തയോടെ ശുശ്രൂഷകള് ആരംഭിക്കും. കോട്ടയം അതിരൂപത സഹായമെത്രാന് ഗീവര്ഗീസ് മാര് അപ്രേം വിശുദ്ധ കുര്ബാനയര്പ്പിച്ച് വചനസന്ദേശം നല്കും. രാത്രി 8.30ന് ദിവ്യകാരുണ്യാരാധനയോടെ കണ്വന്ഷന് സമാപിക്കും.
സമാപന ദിവസമായ നാളെ രാവിലെ 10 മുതല് 12 വരെ ഹിന്ദി, തമിഴ് അതിഥി ത്തൊഴിലാളികളുടെ സംഗമം നടത്തും. ഉച്ചകഴിഞ്ഞു രണ്ടു മുതല് മൂന്നു വരെ സീനിയര് സിറ്റിസണ്സ് സംഗമവുമുണ്ടായിരിക്കും. തുടര്ന്നു വിജയപൂരം രൂപത ബിഷപ് ഡോ. സെബാസ്റ്റ്യന് തെക്കത്തെച്ചേരില് വിശുദ്ധ കുര്ബാനയര്പ്പിച്ചു വചനപ്രഘോഷണം നടത്തും.
കണ്വന്ഷനോടുനുബന്ധിച്ച് ആയിരത്തിയഞ്ഞൂറോളം വിശുദ്ധരുടെ തിരുശേഷിപ്പുകള് വണങ്ങി പ്രാര്ഥിക്കാൻ നിരവധി വിശ്വാസികളാണ് എത്തിച്ചേരുന്നത്.