ബൈക്ക് മതിലിലിടിച്ച് പരിക്കേറ്റ് ചികിത്സയിലായിരുന്ന യുവാവ് മരിച്ചു
1539912
Saturday, April 5, 2025 10:32 PM IST
കൈപ്പുഴ: ബൈക്ക് നിയന്ത്രണം വിട്ട് മതിലിൽ ഇടിച്ച് തലയ്ക്ക് ഗുരുതര പരിക്കേറ്റ് മെഡിക്കൽ കോളജിൽ ചികിത്സയിലായിരുന്ന യുവാവ് മരിച്ചു. കൈപ്പുഴ കുന്നത്തേൽ പറമ്പിൽ അനന്ദു കെ. ഷാജി (27) ആണ് മരിച്ചത്.
ഒരു മാസം മുമ്പ് അനന്ദവും രണ്ട് സുഹൃത്തുക്കളും സഞ്ചരിച്ചിരുന്ന ബൈക്ക് കല്ലറ കൈതക്കനാൽ റോഡിൽ മുടക്കാലി പാലത്തിനും കല്ലറ ജംഗ്ഷനും ഇടയ്ക്ക് നിയന്ത്രണം വിട്ട് റോഡ് വക്കിലെ മതിലിൽ ഇടിക്കുകയായിരുന്നു.
അപകടത്തെത്തുടർന്ന് മൂവരേയും മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും ബൈക്ക് ഓടിച്ചിരുന്ന കൈപ്പുഴ സ്വദേശിയായ യുവാവ് അന്ന് മരിച്ചിരുന്നു.
ബൈക്കിന്റെ പിന്നിലിരുന്ന അനന്ദു ബൈക്കിൽനിന്നും തെറിച്ചുവീണ് തലയ്ക്ക് ഗുരുതര പരിക്കേറ്റിരുന്നു. ഇതേത്തുടർന്ന് അടിയന്തര ഓപ്പറേഷന് വിധേയമാക്കുകയും ട്രോമ കെയർ യൂണിറ്റിൽ ചികിത്സയിൽ പ്രവേശിപ്പിക്കുകയും ചെയ്തു.
ഒരു മാസക്കാലമായി ഇവിടെ ചികിത്സയിലിരിക്കെയാണ് ഇന്നലെ ഉച്ചയ്ക്ക് മരിച്ചത്. മൃതദേഹം മെഡിക്കൽ കോളജ് ആശുപത്രി മോർച്ചറിയിൽ. സംസ്കാരം ഇന്ന് വൈകുന്നേരം മൂന്നിന് വീട്ടുവളപ്പിൽ. ഷാജിയാണ് പിതാവ്. അമ്മ: സിന്ധു. സഹോദരി: കമലു.