പുതിയ ടെര്‍മിനല്‍ നിര്‍മാണത്തിന് ചങ്ങനാശേരി ഡിപ്പോ അടച്ചു : കെഎസ്ആര്‍ടിസി ബസുകള്‍ക്ക് പുതിയ ക്രമീകരണങ്ങള്‍
1539280
Thursday, April 3, 2025 7:14 AM IST
ചങ്ങനാശേരി: പുതിയ ബസ് ടെര്‍മിനല്‍ നിര്‍മാണത്തിനായി ചങ്ങനാശേരി കെഎസ്ആര്‍ടിസി ഡിപ്പോ അടച്ചു. പ്രാഥമിക ജോലികള്‍ക്കു തുടക്കമായി. ഊരാളുങ്കല്‍ സര്‍വീസ് സൊസൈറ്റിക്കാണ് നിര്‍മാണച്ചുമതല. ഇതിന്‍റെ ഭാഗമായി നഗരത്തില്‍ കെഎസ്ആര്‍ടിസി ബസുകള്‍ക്ക് ഗതാഗത ക്രമീകരണങ്ങള്‍ ഏര്‍പ്പെടുത്തി.
ഡിപ്പോയില്‍നിന്നുള്ള എല്ലാ സര്‍വീസുകളും പെരുന്ന ബസ് സ്റ്റാന്‍ഡില്‍നിന്നുമാണ് സര്‍വീസ് ആരംഭിക്കുന്നത്. നവംബര്‍ അവസാനത്തോടെ നിര്‍മാണം പൂര്‍ത്തിയാകുംവിധമാണ് പദ്ധതി ആവിഷ്‌കരിച്ചിരിക്കുന്നത്.
തിരുവല്ല ഭാഗത്തുനിന്നും കോട്ടയം ഭാഗത്തേക്ക് പോകുന്ന ബസുകള്‍ പെരുന്ന ബസ് സ്റ്റാന്‍ഡിനു മുന്നില്‍ നിര്‍ത്തി യാത്രക്കാരെ ഇറക്കുകയും കയറ്റുകയും ചെയ്ത ശേഷം കെഎസ്ആര്‍ടിസി ബസ് സ്റ്റാന്‍ഡിന് മുന്നില്‍ നിര്‍ത്തി കടന്നുപോകും.
കോട്ടയത്തുനിന്നു തിരുവല്ല ഭാഗത്തേക്ക് പോകുന്ന ബസുകള്‍ ചങ്ങനാശേരി മുനിസിപ്പല്‍ കാര്യാലയത്തിനു മുന്നിലുള്ള ടാക്‌സി സ്റ്റാന്‍ഡ് ഭാഗത്തും പെരുന്ന ബസ് സ്റ്റാൻഡിന്‍റെ സമീപത്തും നിര്‍ത്തി യാത്രക്കാരെ കയറ്റിയിറക്കിയാണ് പോകുന്നത്.
രണ്ടിടത്ത് താത്കാലിക ബസ് കാത്തിരിപ്പു കേന്ദ്രങ്ങള്‍ വേണം
ചങ്ങനാശേരി കെഎസ്ആര്‍ടിസി ബസ് സ്റ്റേഷന്‍ നിര്‍മാണത്തിനായി അടച്ച സാഹചര്യത്തില്‍ ബസുകള്‍ നിര്‍ത്തുന്ന കെഎസ്ആര്‍ടിസി ഡിപ്പോയ്ക്കു മുമ്പിലും നഗരസഭാ കാര്യാലയത്തിനു സമീപവും ബസുകള്‍ കാത്തുനില്‍ക്കുന്ന യാത്രക്കാര്‍ക്ക് മഴ നനയാതെയും വെയിൽകൊള്ളാതെയുമുള്ള താത്കാലിക ഷെല്‍ട്ടര്‍ സംവിധാനം സജ്ജമാക്കാന്‍ അധികാരികള്‍ അടിയന്തര നടപടികള്‍ സ്വീകരിക്കണമെന്ന ആവശ്യം ശക്തമായി.
ബസുകള്‍ നിര്‍ത്തി യാത്രക്കാരെ കയറ്റുകയും ഇറക്കുകയും ചെയ്യുന്ന സ്ഥലങ്ങള്‍ സംബന്ധിച്ച് ട്രാഫിക് പോലീസ് ഉടനെതന്നെ ബോര്‍ഡുകള്‍ സ്ഥാപിക്കണം. ബസുകള്‍ എവിടെ നിര്‍ത്തുമെന്നറിയാതെ യാത്രക്കാര്‍ ബുദ്ധിമുട്ടുന്ന സാഹചര്യത്തിലാണ് ഇത്തരം കാര്യങ്ങള്‍ക്കൂടി അധികാരികളുടെ ശ്രദ്ധയിലേക്ക് കൊണ്ടുവരുന്നത്.