ബിജെപി ലോക്‌സഭാ തെരഞ്ഞെടുപ്പിനെ നേരിട്ടത് ഹിന്ദുത്വ രാഷ്‌ട്രം ലക്ഷ്യമിട്ട്: എം.വി. ഗോവിന്ദൻ
1492288
Friday, January 3, 2025 11:58 PM IST
പാമ്പാടി: ഹിന്ദുത്വ രാഷ്‌ട്രം എന്ന അജണ്ട ലക്ഷ്യമിട്ടാണു കഴിഞ്ഞ ലോക്‌സഭ തെരഞ്ഞെടുപ്പിനെ ബിജെപി നേരിട്ടതെന്ന് സിപിഎം സംസ്ഥാന സെക്രട്ടറി എം.വി. ഗോവിന്ദന്‍.
സിപിഎം ജില്ലാ സമ്മേളനത്തിന്‍റെ ഭാഗമായുള്ള പ്രതിനിധി സമ്മേളനം പാമ്പാടിയില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ആര്‍എസ്എസിന്‍റെ 100-ാം വാര്‍ഷികത്തില്‍ ഹിന്ദുത്വ രാഷ്‌ട്രം ഉണ്ടാക്കാം എന്നതായിരുന്നു ബിജെപിയുടെ അജണ്ട. ഇതിനായി രാമ ക്ഷേത്രത്തെ വരെ വര്‍ഗീയപരമായി ഉപയോഗിച്ചു.
എന്നിട്ടും രാമക്ഷേത്ര ഭൂമി ഉള്‍പ്പെടുന്ന ഫാസിയാബാദില്‍ സമാജ് വാദി പാര്‍ട്ടി ജയിച്ചത് ബിജെപിയുടെ വര്‍ഗീയ അടവ് നയത്തിന് ഏറ്റ തിരിച്ചടിയാണിതൊന്നും അദ്ദേഹം പറഞ്ഞു.
തെരഞ്ഞെടുപ്പിനുശേഷം കോണ്‍ഗ്രസ് ഭരണം നേടാന്‍ ശ്രമിച്ചില്ല, ഇപ്പോഴും ശ്രമിക്കുന്നില്ല. ശരിയായ രീതിയില്‍ ബിജെപിയെ പ്രതിരോധിക്കാന്‍ കോണ്‍ഗ്രസിന് കഴിയുന്നില്ല. ചാതുര്‍വര്‍ണ്യ സ്വഭാവത്തില്‍ അടിസ്ഥിതമായ ഒരു ഭരണഘടന വേണമെന്ന് പറയുന്ന അമിത് ഷായ്ക്ക് അംബേദ്കര്‍ എന്ന പേര് കേള്‍ക്കുന്നത് പോലും സഹിക്കുന്നില്ല. മനുസ്മൃതിയെ അടിസ്ഥാന ബാക്കിയുള്ള ഭരണഘടന വേണം എന്നു പറയുന്ന അവര്‍ സനാതന ധര്‍മം വാക്കിന്‍റെ അര്‍ഥം പോലും മനസിലാക്കാതെയാണ് പ്രയോഗിക്കുന്നതെന്നും എം.വി. ഗോവിന്ദന്‍ പറഞ്ഞു.
ക്ഷേത്ര ആചാരം മാറ്റാന്‍ പാടില്ലെന്ന് എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായര്‍ പറയുന്നു.
ആചാരം മാറ്റിയില്ലെങ്കില്‍ മന്നത്ത് പത്മനാഭന്‍ ഉണ്ടാകില്ലായിരുന്നു. ബൃഹത്തായ ആശയങ്ങള്‍ ഉള്‍പ്പെടുത്തി അധിസ്ഥിതരായ ജനവിഭാഗങ്ങളള്‍ക്കൊപ്പം അനാചാരങ്ങള്‍ക്കെതിരായി പോരാടിയ നവോത്ഥാന നായകനാണ് മന്നത്ത് പത്മനാഭനെന്നും എം.വി. ഗോവിന്ദന്‍ പറഞ്ഞു.