കെ.വി. ബിന്ദു രാജിവയ്ക്കും ഹേമലത പ്രേം സാഗര്‍ പുതിയ പ്രസിഡന്‍റ്
1492283
Friday, January 3, 2025 11:58 PM IST
കോട്ടയം: ജില്ലാ പഞ്ചായത്ത് പ്രസിഡന്‍റ് കെ.വി. ബിന്ദു ഈമാസം അവസാനം രാജിവയ്ക്കും. സിപിഐയിലെ ഹേമലത പ്രേം സാഗര്‍ ഫെബ്രുവരി ആദ്യവാരം ജില്ലാ പഞ്ചായത്ത് പ്രസിഡന്‍റാകും. എല്‍ഡിഎഫ് ധാരണ പ്രകാരമാണ് രാജി. ജില്ലാ പഞ്ചായത്തിന്‍റെ ഇനിയുള്ള ഒരു വര്‍ഷക്കാലം പ്രസിഡന്‍റ് സ്ഥാനം സിപിഐയ്ക്കാണ്. കങ്ങഴ ഡിവിഷനംഗമാണ് ഹേമലതാ പ്രേംസാഗര്‍.
എല്‍ഡിഎഫ് ധാരണ പ്രകാരം രണ്ടു വര്‍ഷം വീതം പ്രസിഡന്‍റ് സ്ഥാനം കേരള കോണ്‍ഗ്രസ് -എമ്മിനും സിപിഎമ്മിനും ഒരു വര്‍ഷക്കാലം സിപിഐയ്ക്കുമെന്നായിരുന്നു. പ്രസിഡന്‍റ് ആദ്യ ടേം കേരള കോണ്‍ഗ്രസ് എമ്മിനു നല്‍കാന്‍ എല്‍ഡിഎഫ് സംസ്ഥാന നേതൃത്വവും അന്ന് തീരുമാനമെടുത്തിരുന്നു.
ഇതിന്‍ പ്രകാരം കുറവിലങ്ങാട് ഡിവിഷനംഗം കേരള കോണ്‍ഗ്രസ് എമ്മിലെ നിര്‍മല ജിമ്മിയായിരുന്നു ആദ്യ ടേം പ്രസിഡന്‍റ്. രണ്ടാമത്തെ ടേമിലാണ് കുമരകം ഡിവിഷനംഗം സിപിഎമ്മിലെ കെ.വി. ബിന്ദു പ്രസിഡന്‍റായത്.
വൈസ്പ്രസിഡന്‍റ് ആദ്യ രണ്ടു വര്‍ഷം സിപിഎമ്മിനും അതു കഴിഞ്ഞ് ഒരു വര്‍ഷം സിപിഐയ്ക്കും അവസാന രണ്ടു വര്‍ഷം കേരള കോണ്‍ഗ്രസ് -എമ്മിനെന്നുമായിരുന്നു ധാരണ. ഇതിന്‍ പ്രകാരം ആദ്യ ടേം വെള്ളൂര്‍ ഡിവിഷനംഗം സിപിഎമ്മിലെ ടി.എസ്. ശരതും അതുകഴിഞ്ഞ് ഒരു വര്‍ഷം എരുമേലി ഡിവിഷനംഗം ശുഭേഷ് സുധാകരനും വൈസ്പ്രസിഡന്‍റായി. ഇപ്പോള്‍ കടുത്തുരുത്തി ഡിവിഷനംഗം കേരള കോണ്‍ഗ്രസ് എമ്മിലെ ജോസ് പുത്തന്‍കാലയാണ് വൈസ്പ്രസിഡന്‍റ്. 22 അംഗ ജില്ലാ പഞ്ചായത്തില്‍ സിപിഎം-ആറ്, കേരള കോണ്‍ഗ്രസ് എം-അഞ്ച്, കോണ്‍ഗ്രസ്-അഞ്ച്, സിപിഐ-മൂന്ന്, കേരള കോണ്‍ഗ്രസ്-രണ്ട്, ബിജെപി-ഒന്ന് എന്നിങ്ങനെയാണു കക്ഷിനില.
ഷോണ്‍ ജോര്‍ജ് അംഗമായിരുന്ന കേരള ജനപക്ഷം ബിജെപിയില്‍ ലയിച്ചതോടെയാണ് ജില്ലാ പഞ്ചായത്തില്‍ ബിജെപിക്ക് പ്രാതിനിധ്യമായത്.