ADVERTISEMENT

ADVERTISEMENT

കളിചിരി മേളങ്ങളോടെ വീ വേള്‍ഡ് സീസണ്‍-6

തെങ്ങണ: ഗുഡ് ഷെപ്പേര്‍ഡ് പബ്ലിക് സ്‌കൂളില്‍ കുരുന്നുകളുടെ കളിചിരി മേളങ്ങളോടെ വീ വേള്‍ഡ് സീസണ്‍ -6 അരങ്ങേറി.

കുട്ടികളിലെ നൈസര്‍ഗിക കലാവാസനകള്‍ കണ്ടെത്തി പ്രോത്സാഹിപ്പിക്കാന്‍ അവസരമൊരുക്കുകയാണ് വീ വേള്‍ഡ് എന്ന സംരംഭത്തിലൂടെ.

സ്‌കൂള്‍ ചെയര്‍മാന്‍ ഡോ. വര്‍ക്കി ഏബ്രഹാം ഉദ്ഘാടനം നിര്‍വഹിച്ചു. ഡയറക്ടര്‍ ഫാ. ടി.എ ഇടയാടി, പ്രിന്‍സിപ്പല്‍ സുനിത സതീഷ്, പിടിഎ പ്രസിഡന്‍റ് സെബിന്‍ ജോണ്‍, ഹെഡ്മിസ്ട്രസ് ശ്യാമ സജീവ്, മാനേജര്‍ ജോണ്‍സണ്‍ ഏബ്രഹാം എന്നിവര്‍ പ്രസംഗിച്ചു.

ADVERTISEMENT

കേരള കോണ്‍. ജില്ലാ നേതൃക്യാന്പ് ഇന്നും നാളെയും മാന്നാനത്ത്

കോട്ടയം: കേരള കോണ്‍ഗ്രസ് ജില്ലാ നേതൃ ക്യാമ്പ് ഇന്നും നാളെയും മാന്നാനം കെഇ സ്‌കൂള്‍ ഓഡിറ്റോറിയത്തില്‍ നടക്കും. ഇന്നു വൈകുന്നേരം നാലിന് ജില്ലാ പ്രസിഡന്‍റ് ജയ്‌സന്‍ ജോസഫ് പതാക ഉയര്‍ത്തും. നാളെ രാവിലെ 10ന് ചെയര്‍മാന്‍ പി.ജെ. ജോസഫ് ക്യാമ്പ് ഉദ്ഘാടനം ചെയ്യും. വൈകുന്നേരം അഞ്ചിന് സമാപന സമ്മേളനം എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ ഉദ്ഘാടനം ചെയ്യും. ജോയി ഏബ്രഹാം, കെ. ഫ്രാന്‍സിസ് ജോര്‍ജ്, അപു ജോണ്‍ ജോസഫ് എന്നിവര്‍ വിവിധ വിഷയങ്ങള്‍ അവതരിപ്പിക്കും.

കെജിഒഎ ജില്ലാ സമ്മേളനം ഇന്നു മുതൽ

കോട്ടയം: കേരള ഗസറ്റഡ് ഓഫീസേഴ്സ് അസോസിയേഷന്‍ 44-ാമതു ജില്ലാ സമ്മേളനം ഇന്നു തുടങ്ങും. പാലാ കിഴതടിയൂര്‍ സര്‍വീസ് സഹകരണ ബാങ്ക് ഓഡിറ്റോറിയത്തില്‍ ഉച്ചകഴിഞ്ഞ് 12.30ന് ജില്ലാ പ്രസിഡന്‍റ് പതാകയുയര്‍ത്തുന്നതോടെ സമ്മേളനം ആരംഭിക്കും. ജില്ലാ കൗണ്‍സില്‍ കണക്കും തെരഞ്ഞെടുപ്പും നടക്കും. വൈകുന്നേരം 4.30ന് കിഴതടിയൂര്‍ സര്‍വീസ് സഹകരണ ബാങ്കിനു സമീപത്തുനിന്ന് ആരംഭിക്കുന്ന പ്രകടനം പാലാ നഗരസഭാ കാര്യാലയത്തിനു സമീപം അവസാനിക്കും. തുടര്‍ന്നു നടക്കുന്ന പൊതുസമ്മേളനം രാജു ഏബ്രഹാം ഉദ്ഘാടനം ചെയ്യും. ജില്ലാ പ്രസിഡന്‍റ് കെ.ടി. സാജുമോന്‍ അധ്യക്ഷത വഹിക്കും. നഗരസഭ ചെയര്‍മാന്‍ തോമസ് പീറ്റര്‍, സിഐടിയു ജില്ലാ വൈസ് പ്രസിഡന്‍റ് ലാലിച്ചന്‍ ജോര്‍ജ്, പി.എം. ജോസഫ്, കെജിഒഎ സംസ്ഥാന ട്രഷറര്‍ എ. ബിന്ദു, ജില്ലാ സെക്രട്ടറി ഷാജിമോന്‍ ജോര്‍ജ്, ജില്ലാ ട്രഷറര്‍ ടി.എസ്. അജിമോന്‍ എന്നിവര്‍ പ്രസംഗിക്കും. നാളെ രാവിലെ 10ന് പ്രതിനിധി സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. കെജിഒഎ ജില്ലാ പ്രസിഡന്‍റ് അധ്യക്ഷത വഹിക്കും. എഫ്എസ്ഇടിഒ ജില്ലാ സെക്രട്ടറി കെ.ആര്‍. അനില്‍കുമാര്‍, കോണ്‍ഫെഡറേഷന്‍ ഓഫ് സെന്‍ട്രല്‍ ഗവണ്‍മെന്‍റ് എംപ്ലോയീസ് ആന്‍ഡ് വര്‍ക്കേഴ്സ് ജില്ലാ സെക്രട്ടറി രാജേഷ് ഡി. മാന്നാത്ത്, കെജിഒഎ സംസ്ഥാന സെക്രട്ടേറിയറ്റംഗം പി. സെയ്തലവി തുടങ്ങിയവര്‍ പ്രസംഗിക്കും.

റോഡിന്‍റെ സംരക്ഷണഭിത്തി തകർന്നിട്ട് നാളേറെ; നടപടിയെടുക്കാതെ അധികൃതർ

മാന്തുരുത്തി: റോഡിന്‍റെ സംരക്ഷണഭിത്തി ഇടിഞ്ഞ് തോട്ടിലേക്കു വീണിട്ട് ഒന്നരവർഷം; കണ്ടിട്ടും കാണാതെ അധികൃതർ. മാന്തുരുത്തി ജംഗ്ഷനിൽ നിന്നാരംഭിക്കുന്ന മാന്തുരുത്തി-കൊല്ലകരപ്പടി റോഡിന്‍റെ പത്തടിയോളം ഉയരമുള്ള കരിങ്കൽക്കെട്ടാണ് ഒന്നരവർഷമായി ഇടിഞ്ഞുകിടക്കുന്നത്. 2023ലെ മഴക്കാലത്ത് തോട്ടിൽ വെള്ളം ഉയർന്നപ്പോൾ ആദ്യം ഒരു ഭാഗം ഇടിഞ്ഞുവീഴുകയായിരുന്നു. തുടർന്ന് രണ്ടു തവണയായി 20 അടിയോളം നീളത്തിൽ കൽക്കെട്ട് ഇടിഞ്ഞു തോട്ടിലക്കു വീണു. അവശേഷിക്കുന്ന കൽക്കെട്ടും ഇടിഞ്ഞ് അപകടാവസ്ഥയിലാണ്. മഴക്കാലത്ത് വെള്ളമുയർന്നാൽ കൂടുതൽ ഭാഗങ്ങൾ ഇടിഞ്ഞു തോട്ടിലേക്ക് വീഴാൻ സാധ്യതയുണ്ട്. കൽക്കെട്ട് തകർന്നാൽ പഞ്ചായത്ത് റോഡ് കൂടുതൽ അപകടാവസ്ഥയിലാകും. നിരവധി വാഹനങ്ങൾ കടന്നു പോകുന്ന റോഡാണിത്. അപകടാവസ്ഥയിലുള്ള ഭാഗം കൂടുതൽ ഇടിഞ്ഞാൽ വാഹനങ്ങൾ തോട്ടിലേക്ക് മറിയാനും സാധ്യതയുണ്ട്. ഒരു വശം ഇടിഞ്ഞു കിടക്കുന്നതിനാൽ ഒരേസമയം രണ്ട് വാഹനങ്ങൾക്ക് കടന്നുപോകാൻ പ്രയാസമാണ്. ഇവിടെ അപായസൂചന പോലും ഇതുവരെ സ്ഥാപിച്ചിട്ടില്ല. ഇടിഞ്ഞുപോയ കൽക്കെട്ട് മഴക്കാലം തുടങ്ങും മുന്പ് പൊളിച്ച് പുനർനിർമിക്കണമെന്നാണ് നാട്ടുകാരുടെ ആവശ്യം. പലവട്ടം വിഷയം പഞ്ചായത്ത് അധികൃതരെ ധരിപ്പിച്ചിട്ടും നടപടിയുണ്ടായില്ലെന്ന് പ്രദേശവാസികൾ പരാതിപ്പെടുന്നു.

വിഷു ഈസ്റ്റര്‍: ചെന്നൈ-കൊല്ലം സ്‌പെഷല്‍ ട്രെയിന്‍ അനുവദിച്ചു

ചങ്ങനാശേരി: വിഷു, ഈസ്റ്റര്‍ പ്രമാണിച്ച് 06113/06114 ചെന്നൈ സെന്‍ട്രല്‍ കൊല്ലം ചെന്നൈ സെന്‍ട്രല്‍ എക്‌സ്പ്രസ് അനുവദിച്ചതായി കൊടിക്കുന്നില്‍ സുരേഷ് എംപി അറിയിച്ചു. സ്‌പെഷല്‍ ട്രെയിനിന് മാവേലിക്കര മണ്ഡലത്തിലെ ചങ്ങനാശേരി, ചെങ്ങന്നൂര്‍, മാവേലിക്കര റെയില്‍വേ സ്റ്റേഷനുകളില്‍ സ്റ്റോപ്പ് അനുവദിച്ചിട്ടുണ്ട്. നാളെയും 19നും ഈ ട്രെയിന്‍ ചെന്നൈ സെന്‍ട്രലില്‍നിന്നു കൊല്ലത്തേക്കും, 13, 20 തീയതികളില്‍ കൊല്ലത്തുനിന്നു ചെന്നൈയിലേക്കുമായി സര്‍വീസ് നടത്തും. യാത്രക്കാരുടെ അഭ്യര്‍ഥനയെത്തുടര്‍ന്ന് സ്‌പെഷല്‍ ട്രെയിന്‍ അനുവദിക്കുന്നതിനായി റെയില്‍വേ മന്ത്രി, റെയില്‍വേ ബോര്‍ഡ് ചെയര്‍മാന്‍ എന്നിവരിൽ സമ്മര്‍ദം ചെലുത്തിയതിന്‍റെ ഭാഗമായിട്ടാണ് ചെന്നൈ-കൊല്ലം സെക്‌ടറില്‍ സ്‌പെഷല്‍ ട്രെയിന്‍ അനുവദിച്ചതെന്ന് എംപി പറഞ്ഞു.

"എന്നും അരികെ' പദ്ധതി തുടങ്ങി

ചങ്ങനാശേരി: സമൂഹത്തില്‍ ഒറ്റപ്പെടല്‍, വിഷാദം, തിരസ്‌കരണം എന്നിവ അനുഭവിക്കുന്ന സ്ത്രീകള്‍ക്കായി ചങ്ങനാശേരി വൈഡബ്ല്യുസിഎയുടെ നേതൃത്വത്തില്‍ "എന്നും അരികെ' എന്ന പദ്ധതി ആരംഭിച്ചു. ഇത്തിത്താനം ആയുഷ്യ മുന്‍ ഡയറക്ടര്‍ ഡോ. സിസ്റ്റര്‍ എല്‍സ പദ്ധതി ഉദ്ഘാടനം ചെയ്തു. പ്രസിഡന്‍റ് മിനി വിന്‍സി അധ്യക്ഷത വഹിച്ചു. സെക്രട്ടറി ബിന്ദു ബോസ് ആശംസകള്‍ നേര്‍ന്നു. സമൂഹത്തില്‍ അവഗണന അല്ലെങ്കില്‍ വിഷാദം അനുഭവിക്കുന്നവരെ ചേര്‍ത്തുനിര്‍ത്തുക എന്നതാണ് പദ്ധതിയുടെ ലക്ഷ്യം. നിങ്ങളുടെ വിഷമങ്ങള്‍ പങ്കിടാന്‍ വിളിക്കൂ... 8075873497, 9446571163.

ലഹരി ഉപയോഗം, സംഘട്ടനം, ഗുണ്ടായിസം : ബാറില്‍ യുവാവിനെ കുത്തിപ്പരിക്കേല്പിച്ചവർ സ്ഥിരം പ്രശ്നക്കാരെന്ന് പോലീസ്

ചങ്ങനാശേരി: ലഹരി ഉപയോഗം, സംഘട്ടനം, ഗുണ്ടായിസം തുടങ്ങി തെങ്ങണയിലെ ബാറില്‍ യുവാവിനെ കുത്തിപ്പരിക്കേല്‍പ്പിച്ച പ്രതികള്‍ സ്ഥിരം കുഴപ്പക്കാരെന്നു പോലീസ്. ഒമ്പതംഗ സംഘമാണ് ബാറില്‍ അക്രമം അഴിച്ചുവിട്ടത്. രണ്ടുപേരെ റെയില്‍വേ പോലീസും അഞ്ചുപേരെ തൃക്കൊടിത്താനം പോലീസും അറസ്റ്റ് ചെയ്തിരുന്നു. ചങ്ങനാശേരി, തൃക്കൊടിത്താനം പ്രദേശങ്ങളിലുള്ളവരാണ് പിടികിട്ടാനുള്ളവരെന്നും ഇവര്‍ ഒളിവിലാണെന്നും തൃക്കൊടിത്താനം പോലീസ് പറഞ്ഞു. ഇവര്‍ക്കായി തൃക്കൊടിത്താനം പോലീസ് അന്വേഷണം ഊര്‍ജിതമാക്കി. പിടികിട്ടാനുള്ള ഒരാളുടെ പേരില്‍ മൂന്നിലേറെ കേസുകളുള്ളതായും തൃക്കൊടിത്താനം പോലീസ് പറഞ്ഞു. തെങ്ങണയിലെ ബാറില്‍ യുവാവിനെ കുത്തിപ്പരിക്കേല്പിച്ചശേഷം കടന്നുകളഞ്ഞ പ്രതികൾ രണ്ടുപേരെ കോട്ടയം റെയില്‍വേ സ്റ്റേഷനിൽവച്ച് യാത്രക്കാരനെ ബിയറുകുപ്പികൊണ്ട് ആക്രമിച്ചതിനെത്തുടർന്നാണ് റെയില്‍വേ പോലീസ് കയ്യോടെ പിടികൂടിയത്. ഫാത്തിമാപുരം പുതുപ്പറമ്പില്‍ മുഹമ്മദ് അമീന്‍(23), കുറിച്ചി മന്ദിരം തകിടിപ്പറമ്പില്‍ സിയാദ്(32) എന്നിവരെ കോട്ടയം റെയില്‍വേ സ്റ്റേഷനില്‍നിന്നു റെയില്‍വേ പോലീസും കുരിശുംമൂട് കാഞ്ഞിരത്തില്‍ സാജു(30), കടമാഞ്ചിറ ചക്കാലയില്‍ ടോണ്‍സണ്‍(25), തെങ്ങണ വട്ടച്ചാല്‍പ്പടി പുതുപ്പറമ്പില്‍ കെവിന്‍(26), ഫാത്തിമാപുരം നാലുപറയില്‍ ഷിബിന്‍(25), തൃക്കൊടിത്താനം മാലൂര്‍ക്കാവ് അമ്പാട്ട് ബിബിന്‍(37) എന്നിവരെ തൃക്കൊടിത്താനം പോലീസുമാണ് അറസ്റ്റ് ചെയ്തത്. സംഭവത്തെക്കുറിച്ച് തൃക്കൊടിത്താനം പോലീസിന്‍റെ വിശദീകരണം ഇങ്ങനെ: ഒമ്പതംഗസംഘത്തില്‍പ്പെട്ട എല്ലാവരും വിവിധ ക്രിമിനല്‍ കേസുകളിലെ പ്രതികളാണ്. ഇവര്‍ക്കു മറ്റൊരു സംഘവുമായി നിലനിന്നിരുന്ന തര്‍ക്കം പരിഹരിക്കുന്നതിനാണ് തിങ്കളാഴ്ച രാത്രി എട്ടിന് തെങ്ങണ കണ്ണവട്ടയിലുള്ള ബാറിലെത്തിയത്. അവരുമായുള്ള ചര്‍ച്ച കഴിഞ്ഞു പുറത്തിറങ്ങുമ്പോഴാണ് സംഘവും കുറവിലങ്ങാട് സ്വദേശിയും പായിപ്പാട്ട് താമസക്കാരനുമായ ജോമോനു(27)മായി തര്‍ക്കമുണ്ടായത്. വാക്കേറ്റത്തെ തുടര്‍ന്ന് സംഘത്തിൽപ്പെട്ടവര്‍ കത്തികൊണ്ട് ജോമോന്‍റെ വയറിൽ കുത്തുകയായിരുന്നു. കോട്ടയം മെഡിക്കല്‍ കോളജ് ആശുപത്രിയില്‍ ചികിത്സയിലുള്ള ജോമോന്‍റെ ശ്വാസകോശത്തിനും മുറിവേറ്റിട്ടുണ്ടെന്ന് തൃക്കൊടിത്താനം പോലീസ് പറഞ്ഞു. ജോമോനൊപ്പമുണ്ടായിരുന്ന പായിപ്പാട് സ്വദേശി ഷിജു(30) വിനും സംഘത്തിന്‍റെ അടിയേറ്റിരുന്നു. മണ്ണുഖനന മടകള്‍ക്കു കാവല്‍ നില്‍ക്കുന്ന സംഘത്തില്‍പ്പെട്ടവരാണ് ജോമോനും ഷിജുവും. അക്രമിസംഘത്തില്‍പ്പെട്ടവര്‍ ഗുണ്ടാപ്പിരിവു ചോദിച്ചതു സംബന്ധിച്ച് ജോമോനുമായി തര്‍ക്കം നിലനിന്നിരുന്നു. ബാറിനു മുമ്പില്‍വച്ച് തര്‍ക്കം സംഘര്‍ഷത്തിലെത്തുകയും കത്തിക്കുത്തില്‍ കലാശിക്കുകയുമായിരുന്നു. സംഭവശേഷം സിയാദ് ഷാജിയും മുഹമ്മദ് അമീനും ചങ്ങനാശേരി റെയില്‍വേ സ്റ്റേഷനിലെത്തി മലബാര്‍ എക്‌സ്പ്രസില്‍ കയറി മംഗലാപുരത്തേക്ക് പോകുന്നതിനിടെ ട്രെയിന്‍ കോട്ടയത്തെത്തിയപ്പോള്‍ ട്രെയിനില്‍ കയറാനെത്തിയ വിനു എന്ന യാത്രക്കാരനെ ഇരുവരും ചേര്‍ന്നു തടഞ്ഞു. തര്‍ക്കത്തിനിടെ ഇവർ കയ്യില്‍ കരുതിയിരുന്ന ബിയര്‍കുപ്പികൊണ്ട് യാത്രക്കാരന്‍റെ തലയ്ക്കടിച്ചു. തലപൊട്ടിയ വിനുവും ചികിത്സയിലാണ്. സംഭവവുമായി ബന്ധപ്പെട്ടു കോട്ടയം റെയില്‍വേ പോലീസ് ഇവരെ കയ്യോടെ പിടികൂടുകയായിരുന്നു. ഇവരെ ചോദ്യം ചെയ്തതില്‍നിന്നു ലഭിച്ച വിവരത്തിന്‍റെ അടിസ്ഥാനത്തിലാണ് അഞ്ചുപേരെ തൃക്കൊടിത്താനം പോലീസ് പിടികൂടിയത്. റിമാന്‍ഡില്‍ കഴിയുന്ന അഞ്ചുപേരെയും പോലീസ് കസ്റ്റഡിയില്‍ വാങ്ങി വീണ്ടും ചോദ്യം ചെയ്യും.

പീഡാനുഭവ വാരാചരണം

മെത്രാപ്പോലീത്തൻ പള്ളിയിൽ 8നാല്പതു ദിനരാത്ര ആരാധന ഇന്നു സമാപിക്കും ചങ്ങനാശേരി: സെന്‍റ് മേരീസ് മെത്രാപ്പോലീത്തന്‍ പള്ളിയില്‍ പീഡാനുഭവ ആചരണത്തിനു തുടക്കമാകുന്നു. മര്‍ത്ത്മറിയം കബറിട പള്ളിയില്‍ നടന്നുവരുന്ന നാല്പതുദിനരാത്ര ആരാധന ഇന്നു സമാപിക്കും. ഇന്നു രാവിലെ 5.30നും ഏഴിനും 11നും 12നും വിശുദ്ധകുര്‍ബാന, സ്ലീവാപ്പാത. ഒന്നിന് നേര്‍ച്ചക്കഞ്ഞി. വൈകുന്നേരം 4.30ന് വിശുദ്ധ കുര്‍ബാന. തുടർന്ന് മാര്‍ക്കറ്റ് ചുറ്റി സ്ലീവാപ്പാത. ഗ്രോട്ടോയില്‍ സമാപന സന്ദേശം ആര്‍ച്ച്ബിഷപ് മാര്‍ ജോസഫ് പെരുന്തോട്ടം. സ്ലീവാവന്ദനം. തു‌ടർന്ന് കരുണാര്‍ഥന പ്രാര്‍ഥന, സമാപനം, ആരാധന, പരിശുദ്ധ കുർബാനയുടെ പ്രദക്ഷിണം, നേര്‍ച്ചക്കഞ്ഞി. നാളെ രാവിലെ 5.30ന് വിശുദ്ധകുര്‍ബാന, സ്ലീവാപ്പാത, ഏഴിന് വിശുദ്ധകുര്‍ബാന, കൊഴുക്കട്ട ആശീര്‍വാദം, വൈകിട്ട് 4.45ന് റംശ, വിശുദ്ധകുര്‍ബാന. ഓശാനഞായര്‍ രാവിലെ 6.15ന് പാരിഷ്ഹാളില്‍ കുരുത്തോല വെഞ്ചരിപ്പ്, പ്രദക്ഷിണം, വിശുദ്ധകുര്‍ബാന, പ്രസംഗം: ആര്‍ച്ച്ബിഷപ് മാര്‍ തോമസ് തറയില്‍. 9.15നും 11നും വൈകുന്നേരം അഞ്ചിനും വിശുദ്ധകുര്‍ബാന. 14, 15, 16 തീയതികളില്‍ രാവിലെ 5.30ന് വിശുദ്ധകുര്‍ബാന, സ്ലീവാപ്പാത, ഏഴിന് വിശുദ്ധകുര്‍ബാന, എട്ടുമുതല്‍ രാത്രി എട്ടുവരെ വിശുദ്ധ കുര്‍ബാനയുടെ ആരാധന. അഞ്ചിന് വിശുദ്ധകുര്‍ബാന. വൈകുന്നേരം 4.30 മുതല്‍ രാത്രി 8.30 വരെ കുമ്പസാരത്തിന് അവസരമുണ്ടായിരിക്കും. 16ന് രാത്രി 7.30ന് വിശുദ്ധകുര്‍ബാനയുടെ പ്രദക്ഷിണം. പെസഹാവ്യാഴം വൈകുന്നേരം നാലിന് വിശുദ്ധകുര്‍ബാന, കാല്‍കഴുകല്‍ ശുശ്രൂഷ, പ്രസംഗം, ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികത്വം വഹിക്കും. തുടര്‍ന്ന് പൊതുആരാധന. പീഡാനുഭവവെള്ളി ദിനത്തില്‍ രാവിലെ ആറുമുതല്‍ 12 വരെ ആരാധന, ഉച്ചകഴിഞ്ഞ് 2.30ന് പീഡാനുഭവ തിരുക്കര്‍മങ്ങള്‍, നഗരികാണിക്കല്‍, സ്ലീവാപ്പാത, പ്രസംഗം: ഫാ. ജോണ്‍ വാഴപ്പനടിയില്‍, തുടര്‍ന്ന് കബറടക്ക ശുശ്രൂഷ. വലിയശനി വൈകുന്നേരം 4.30ന് വിശുദ്ധകുര്‍ബാന, പുത്തന്‍തീ, പുത്തന്‍വെള്ളം വെഞ്ചരിപ്പ്. 20ന് പുലര്‍ച്ചെ 2.45ന് ഉയിര്‍പ്പ് കര്‍മങ്ങള്‍, വിശുദ്ധകുര്‍ബാന, പ്രദക്ഷിണം, പ്രസംഗം; ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികത്വം വഹിക്കും. രാവിലെ 6.45നും 8.30നും 10നും വിശുദ്ധ കുര്‍ബാന. മേരിമൗണ്ട് പള്ളിയില്‍ ചങ്ങനാശേരി: മേരി മൗണ്ട് റോമന്‍ കത്തോലിക്കാ പള്ളിയിലെ ഓശാനഞായര്‍ തിരുക്കര്‍മങ്ങള്‍ രാവിലെ 7.30ന് ക്ലൂണി സ്‌കൂള്‍ അങ്കണത്തില്‍നിന്ന് വികാരി ഫാ. മാത്യു ഒഴത്തില്‍ നയിക്കുന്ന കുരുത്തോല പ്രദക്ഷിണത്തോടെ ആരംഭിക്കും. തുടര്‍ന്ന് വിശുദ്ധകുര്‍ബാന. 14ന് രാവിലെ ആറിന് കുരിശിന്‍റെ വഴി, വിശുദ്ധകുര്‍ബാന. 15ന് വൈകുന്നേരം നാലിന് വചന പ്രഘോഷണം, ആരാധന, വിശുദ്ധകുര്‍ബാന, വിശുദ്ധ അന്തോസീസിന്‍റെ നൊവേന. 16ന് രാവിലെ ആറിന് കുരിശിന്‍റെ വഴി, വിശുദ്ധകുര്‍ബാന. പെസഹാ വ്യാഴം വൈകുന്നേരം അഞ്ചിന് തിരുവത്താഴപൂജ, കാല്‍കഴുകല്‍ ശുശ്രൂഷ, ദിവ്യകാരുണ്യ പ്രദക്ഷിണം. രാത്രി 7.30 മുതല്‍ 10.30 വരെ ദിവ്യകാരുണ്യ ആരാധന. ദുഃഖവെള്ളി രാവിലെ ഒമ്പതിന് കുരിശിന്‍റെ വഴി. 2.45ന് പീഡാനുഭവ തിരുക്കര്‍മങ്ങള്‍. വലിയ ശനി രാവിലെ ഏഴിന് പ്രഭാത പ്രാര്‍ഥന. ഉയിര്‍പ്പ് ഞായര്‍ വിശുദ്ധകുർബാന രാവിലെ 7.30.

കുറിച്ചി കക്കുഴി-ആലപ്പാട് പാടശേഖരത്ത് മില്ലുകാര്‍ക്കു വേണം, 20 കിലോ കിഴിവ് !

ചങ്ങനാശേരി: കുറിച്ചി, നാട്ടകം കൃഷിഭവനുകളുടെ പരിധിയിലുള്ള കക്കുഴി ആലപ്പാട് പാടശേഖരത്തിലെ കര്‍ഷകര്‍ മന്ദിരം-കൈനടി റോഡ് ഉപരോധിച്ചു. 13 ദിവസമായി കൊയ്തിട്ടിരിക്കുന്ന നെല്ലിന് 20 കിലോ കിഴിവ് ചോദിച്ച് മില്ലുകാര്‍ മാറിനില്‍ക്കുന്ന സാഹചര്യത്തിലാണ് കര്‍ഷകര്‍ റോഡ് ഉപരോധിച്ചത്. പാടശേഖര സമിതി പ്രസിഡന്‍റ് ഷമ്മി വിനോദിന്‍റെ അധ്യക്ഷതയില്‍ നെല്‍കര്‍ഷക സംരക്ഷണ സമിതി രക്ഷാധികാരി വി.ജെ. ലാലി ഉദ്ഘാടനം ചെയ്തു. യുദ്ധകാലാടിസ്ഥാനത്തില്‍ നെല്ല് സംഭരിച്ചില്ലെങ്കില്‍ ശക്തമായ സമരത്തിനു നേതൃത്വം കൊടുക്കുമെന്ന് വി.ജെ. ലാലി പറഞ്ഞു. കോണ്‍ഗ്രസ് മണ്ഡലം പ്രസിഡന്‍റ് അരുണ്‍ ബാബു, പാടശേഖര സമിതി സെക്രട്ടറി ലീലാമ്മ ഈശോ, ആര്‍. രാജഗോപാല്‍, ടി.എസ്. സാബു, അശ്വിന്‍, പി.പി. മോഹനന്‍, വിഷ്ണു പങ്കജാക്ഷന്‍, പഞ്ചായത്തംഗം മഞ്ജു എന്നിവര്‍ പ്രസംഗിച്ചു. നെല്ല് കൈയിലെടുത്തുപിടിച്ച് കര്‍ഷകര്‍ പോരാട്ട പ്രതിജ്ഞയുമെടുത്തു.

‌ഡിജിറ്റൽ സേവാ കേന്ദ്രം കത്തിനശിച്ചു

വൈക്കം: ഡിജിറ്റൽ സേവാകേന്ദ്രത്തിൽ തീപിടിത്തമുണ്ടായതിനെത്തുടർന്ന് കമ്പ്യൂട്ടർ ഉൾപ്പെടെ ലക്ഷങ്ങളുടെ ഉപകരണങ്ങൾ കത്തിനശിച്ചു. ഫയർഫോഴ്സെത്തി ഉടൻ തീ അണച്ചതിനാൽ സമീപത്തെ വ്യാപാര സ്ഥാപനങ്ങളിലേക്ക് തീ പടരാതിരുന്നത് വൻ അപകടം ഒഴിവാക്കി. വ്യാഴാഴ്ച പുലർച്ചെ 5.30ന് വൈക്കത്തെ പഴയ ബസ് സ്റ്റാൻഡിനു സമീപത്തെ നഗരസഭ വ്യാപാരസമുച്ചയത്തിലായിരുന്നു തീപിടിത്തമുണ്ടായത്. കണിയാംതോട് സ്വദേശി സോമന്‍റെ ഉടമസ്ഥതയിലുള്ള സ്ഥാപനത്തിലാണ് തീപിടിത്തം ഉണ്ടായത്. ഷട്ടറിനുള്ളിൽനിന്നും കനത്ത തോതിൽ പുക ഉയരുന്നത് കണ്ടു നാട്ടുകാർ ഫയർഫോഴ്സിൽ വിവരമറിയിക്കുകയായിരുന്നു. ഒരു മണിക്കൂറോളം പ്രയത്നിച്ചാണ് തീ നിയന്ത്രണ വിധേയമാക്കിയത്. മൂന്നു ലക്ഷത്തോളം രൂപയുടെ നാശനഷ്ടം ഉണ്ടായതായി ഉടമ പറഞ്ഞു.ഷോർട്ട് സർക്യൂട്ടാണ് തീ പിടിക്കാൻ കാരണമായതെന്നാണ് കരുതുന്നത്.

വയോജനങ്ങള്‍ക്കായി എത്തിച്ച കട്ടിലുകള്‍ ഗുണനിലവാരമില്ലാത്തതെന്ന്

കടുത്തുരുത്തി: കടുത്തുരുത്തി പഞ്ചായത്തിന്‍റെ നേതൃത്വത്തില്‍ 60 വയസ് കഴിഞ്ഞ വയോജനങ്ങള്‍ക്കു വിതരണം ചെയ്യുന്നതിനായി എത്തിച്ച കട്ടിലുകള്‍ ഗുണനിലവാരമില്ലാത്തതെന്ന് ആക്ഷേപം. ഇന്നലെ വിതരണം ചെയ്യുന്നതിനായി ആലുവയില്‍നിന്നു കടുത്തുരുത്തിയിലെത്തിച്ച കട്ടിലുകളാണ് ആക്ഷേപത്തിനിടയാക്കിയത്. വെള്ളകൂടിയ പാഴ് തടിയിലാണ് കട്ടിലുകള്‍ നിര്‍മിച്ചതെന്നും മുകള്‍ഭാഗത്ത് അടിച്ചിരിക്കുന്നത് ഗുണനിലവാരമില്ലാത്ത പ്ലൈവുഡാണെന്നും പഞ്ചായത്തംഗങ്ങള്‍ ആരോപിച്ചു. സാമ്പിള്‍ കാണിക്കാനെത്തിച്ചത് മികച്ച കട്ടിലായിരുന്നുവെന്നും ഇതുകണ്ടാണ് ഓര്‍ഡര്‍ നല്‍കിയതെന്നും പഞ്ചായത്തധികൃതര്‍ പറഞ്ഞു. വൈകുന്നേരം കട്ടില്‍ വിതരണം നടക്കുമെന്നും നേരത്തേ അറിയിച്ചിരുന്നു. ഇതനുസരിച്ച് ആളുകള്‍ വാഹനങ്ങള്‍ വാടകയ്ക്കു വിളിച്ചു കട്ടില്‍ കൊണ്ടുപോകാനെത്തിയപ്പോഴാണ് വിതരണത്തിനെത്തിച്ചിരിക്കുന്നത് ഗുണനിലവാരമില്ലാത്ത കട്ടിലുകളാണെന്ന വിവരമറിയുന്നത്. തുടര്‍ന്ന് പഞ്ചായത്തംഗങ്ങള്‍ താത്പര്യമില്ലാത്തവര്‍ കട്ടില്‍ കൊണ്ടുപോകണ്ടെന്നും പിന്നീട് വേറേ കട്ടിലുകള്‍ എത്തിച്ചുനല്‍കാമെന്നും അറിയിച്ചു. എന്നാല്‍, വാടകയ്ക്കു വാഹനം വിളിച്ചെത്തിയവര്‍ക്ക് വീണ്ടും വണ്ടിയുമായി എത്തുന്നത് സാമ്പത്തികബാധ്യതയാകുമെന്നതിനാല്‍ പലരും ഗുണനിലവാരമില്ലാത്ത കട്ടിലുകള്‍ കൊണ്ടുപോകാന്‍ തയാറാവുകയായിരുന്നു. കടുത്തുരുത്തി പഞ്ചായത്ത് കട്ടിലൊന്നിന് 4150 രൂപയാണ് നല്‍കിയത്. സാമൂഹ്യക്ഷേമ വകുപ്പ് മുഖേന നടപ്പാക്കുന്ന പദ്ധതിയിലൂടെ കട്ടിലുകള്‍ നല്‍കുന്നതിന് കേരള ഫോറസ്റ്റ് ഇന്‍ഡസ്ട്രിയാണ് ടെന്‍ഡര്‍ എടുത്തത്. ഇവര്‍ ഇതു മറ്റ് ഏജന്‍സിക്ക് സബ് കൊടുത്താണ് കട്ടിലുകള്‍ എത്തിച്ചത്. ആളുകള്‍ കൊണ്ടുപോകാന്‍ തയാറാകാത്ത കട്ടിലുകള്‍ പിന്നീട് വേറേ എത്തിച്ചു നല്‍കുമെന്നാണ് പഞ്ചായത്തധികൃതര്‍ പറയുന്നത്.

നിയന്ത്രണംവിട്ട കാർ സ്കൂളിന്‍റെ ഗേറ്റും കാണിക്കവഞ്ചിയും ഇടിച്ചു തകർത്തു

തലയോലപ്പറമ്പ്: നിയന്ത്രണം വിട്ട കാർ സ്കൂൾ ഗേറ്റും കാണിക്കവഞ്ചിയും തകർത്ത ശേഷം സ്വകാര്യ വ്യക്തിയുടെ മതിലിൽ ഇടിച്ചുനിന്നു. ഇടിയുടെ ആഘാതത്തിൽ കാറിന്‍റെ മുൻവശം പൂർണമായി തകർന്നെങ്കിലും യാത്രക്കാർ പരിക്കേൽക്കാതെ അദ്ഭുതകരമായി രക്ഷപ്പെട്ടു. ഇന്നലെ വൈകുന്നേരം നാലോടെ പാലാംകടവ് - ടോൾ റോഡിൽ കടായി സ്കൂളിന് സമീപമായിരുന്നു അപകടം. അപകടത്തിൽ എസ്എൻഎൽപി സ്കൂളിന്‍റെ ഓർണമെന്‍റൽ ഗേറ്റ്, ഇതിനു സമീപത്തായി സ്ഥാപിച്ചിരുന്ന എസ്എൻഡിപി ശാഖവക ക്ഷേത്രത്തിന്‍റെ കാണിക്കവഞ്ചി എന്നിവയാണ് തകർന്നത്. കോട്ടയം സ്വദേശികളായ കുടുംബം സഞ്ചരിച്ച ഫോർ രജിസ്ട്രേഷൻ കാറാണ് അപകടത്തിൽപ്പെട്ടത്. അച്ഛനും രണ്ടു മക്കളുമാണ് കാറിൽ ഉണ്ടായിരുന്നത്. മക്കൾ ഇരുവരും പിന്നിലെ സീറ്റിലാണ് ഉണ്ടായിരുന്നത്. ഓട്ടത്തിനിടെ ഡ്രൈവർ ഉറങ്ങിപ്പോയതാണ് അപകടത്തിനു കാരണമെന്നു കരുതുന്നു.

കെജിഒഎ ജില്ലാ സമ്മേളനം ഇന്നുമുതൽ പാലായിൽ

കോട്ടയം: കേരള ഗസറ്റഡ് ഓഫീസേഴ്സ് അസോസിയേഷന്‍ 44-ാമതു ജില്ലാ സമ്മേളനം ഇന്നു തുടങ്ങും. കിഴതടിയൂര്‍ സര്‍വീസ് സഹകരണ ബാങ്ക് ഓഡിറ്റോറിയത്തില്‍ ഉച്ചകഴിഞ്ഞ് 12.30ന് ജില്ലാ പ്രസിഡന്‍റ് പതാകയുയര്‍ത്തുന്നതോടെ സമ്മേളനം ആരംഭിക്കും. ജില്ലാ കൗണ്‍സില്‍ കണക്കും തെരഞ്ഞെടുപ്പും നടക്കും. വൈകുന്നേരം 4.30ന് കിഴതടിയൂര്‍ സര്‍വീസ് സഹകരണ ബാങ്കിനു സമീപത്തുനിന്ന് ആരംഭിക്കുന്ന പ്രകടനം പാലാ നഗരസഭാ കാര്യാലയത്തിനു സമീപം അവസാനിക്കും. തുടര്‍ന്നു നടക്കുന്ന പൊതുസമ്മേളനം രാജു ഏബ്രഹാം ഉദ്ഘാടനം ചെയ്യും. ജില്ലാ പ്രസിഡന്‍റ് കെ.ടി. സാജുമോന്‍ അധ്യക്ഷത വഹിക്കും. നഗരസഭ ചെയര്‍മാന്‍ തോമസ് പീറ്റര്‍, സിഐടിയു ജില്ലാ വൈസ് പ്രസിഡന്‍റ് ലാലിച്ചന്‍ ജോര്‍ജ്, പി.എം. ജോസഫ്, കെജിഒഎ സംസ്ഥാന ട്രഷറര്‍ എ. ബിന്ദു, ജില്ലാ സെക്രട്ടറി ഷാജിമോന്‍ ജോര്‍ജ്, ജില്ലാ ട്രഷറര്‍ ടി.എസ്. അജിമോന്‍ എന്നിവര്‍ പ്രസംഗിക്കും. നാളെ രാവിലെ 10ന് പ്രതിനിധി സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും.ജില്ലാ പ്രസിഡന്‍റ് അധ്യക്ഷത വഹിക്കും. കെ.ആര്‍. അനില്‍കുമാര്‍, രാജേഷ് ഡി. മാന്നാത്ത്, പി. സെയ്തലവി തുടങ്ങിയവര്‍ പ്രസംഗിക്കും.

മര്‍ദിച്ചതായി പരാതി

കടുത്തുരുത്തി: റിട്ട. കെഎസ്ആര്‍ടിസി ഡ്രൈവറെ യുവാക്കള്‍ മര്‍ദിച്ചതായി പരാതി. മങ്ങാട് കണ്ണങ്കേരീല്‍ സാബു(58)വിനെയാണ് മൂന്നു യുവാക്കള്‍ ചേര്‍ന്ന് മര്‍ദിച്ചതായി പരാതിയുയര്‍ന്നത്. പരിക്കേറ്റ സാബു മുട്ടുചിറ എച്ച്ജിഎം ആശുപത്രിയില്‍ ചികിത്സതേടി. സംഭവം സംബന്ധിച്ചു സാബു പോലീസിനു നല്‍കിയ പരാതിയില്‍ പറയുന്നത്. വീടിനു സമീപത്തുവച്ചു കഴിഞ്ഞദിവസം രാത്രി 9.30 ഓടെ മൂന്നു യുവാക്കള്‍ ചേര്‍ന്ന് തന്നെ മര്‍ദിക്കുകയായിരുന്നു. ഇതിനിടെ കാറിടിപ്പിക്കാനും ശ്രമിച്ചു. സംഭവം കണ്ടെത്തിയ തന്‍റെ മകളുടെ ഭര്‍ത്താവ് അഖിലാണ് അക്രമികളില്‍നിന്ന് തന്നെ രക്ഷിച്ചത്. പരിക്കേറ്റതിനെത്തുടര്‍ന്ന് ബന്ധുക്കള്‍ക്കൊപ്പം ആശുപത്രിയില്‍ ചികിത്സതേടി. ഈ സമയം യുവാക്കള്‍ ഇവരുടെ മറ്റു സുഹൃത്തുക്കളെ വിളിച്ചുവരുത്തി തന്‍റെ വീടിനും കാറിനും നാശനഷ്ടം വരുത്തിയതായും വീട്ടുകാര്‍ക്കുനേരേ ഭീഷണി മുഴക്കിയതായും സാബു പരാതിയില്‍ പറയുന്നു. സംഭവം സംബന്ധിച്ചു കടുത്തുരുത്തി പോലീസ് കേസെടുത്തു.

കാൽനടക്കാരനെ ഇടിച്ചിട്ട് കടന്നുകളഞ്ഞ ഓട്ടോറിക്ഷ പിടികൂടി

വൈക്കം: വാഹനം ഇടിച്ച് കാൽനട യാത്രക്കാരൻ മരിച്ച സംഭവത്തിൽ നിർത്താതെപോയ വാഹനം വൈക്കം പോലീസ് പിടികൂടി. വൈക്കം നാനാടം മണി മെമ്മോറിയാൽ ആശുപത്രിക്കു സമീപം കഴിഞ്ഞ 20ന് രാവിലെ 5.30നായിരുന്നു അപകടം. ഉദയനാപുരം നാനാടത്തു വിജയ പ്രസ് എന്ന സ്ഥപന നടത്തിയിരുന്ന വിജയനെയാണ് അജ്ഞാതവാഹനം ഇടിച്ച്‌ ഗുരുതരമായി പരിക്കേൽപിച്ചത്. സംഭവത്തിൽ വൈക്കം പോലീസ് കേസ് രജിസ്റ്റർ ചെയ്തിരുന്നു. കോട്ടയം മെഡിക്കൽ കോളജ് ആശുപത്രിയിൽ ചികിത്സയിലിരിക്കേ കഴിഞ്ഞ മൂന്നിന് വിജയൻ മരണപ്പെട്ടു. തുടർന്ന് എസ്ഐ ജയകൃഷ്ണന്‍റെ നേതൃത്വത്തിൽ വൈക്കം മുതൽ എറണാകുളം വരെയുള്ള നൂറോളം സിസി ടിവി ദൃശ്യങ്ങൾ പരിശോധിച്ചാണ് അപകടത്തിനു ശേഷം നിർത്താതെ പോയ ഓട്ടോറിക്ഷയെയും വാഹനം ഓടിച്ചിരുന്നയാളെയും കണ്ടെത്തിയത്. സംഭവവുമായി ബന്ധപ്പെട്ട് എറണാകുളം പാലാരിവട്ടം കുരീക്കോട്ടുപറമ്പിൽ ബാബു(57)വിനെ അറസ്റ്റ് ചെയ്ത് കോടതിയിൽ ഹാജരാക്കി.

കാത്തിരിപ്പിനൊടുവില്‍ വെള്ളാശേരി പാടത്തെ നെല്ല് സംഭരണമാരംഭിച്ചു

കടുത്തുരുത്തി: കാത്തിരിപ്പിനൊടുവില്‍ കടുത്തുരുത്തി വെള്ളാശേരി പാടത്തെ നെല്ല് സംഭരണമാരംഭിച്ചു. മുന്നൂറ് ടണ്ണോളം നെല്ലാണ് സംഭരണം നടക്കാതെ വന്നതോടെ പാടശേഖരത്തിന്‍റെ വിവിധ ഭാഗങ്ങളിലായി കൂട്ടിയിട്ടിരുന്നത്. നാലര കിലോ താരയ്ക്കാണ് നെല്ല് സംഭരണത്തില്‍ ധാരണയായത്. ഇന്നലെ രണ്ടു ലോഡായി 60 ടണ്ണോളം നെല്ല് കയറിപ്പോയി. ഞായറാഴ്ചയോടെ നെല്ല് സംഭരണം പൂർത്തിയാകുമെന്നു കരുതുന്നു. പാടശേഖരത്തുനിന്നു നെല്ലെടുത്ത് റോഡില്‍ മില്ലുകാരുടെ വാഹനം കിടക്കുന്ന സ്ഥലത്ത് കര്‍ഷകര്‍ എത്തിച്ചു നല്‍കണമെന്നാണ് വ്യവസ്ഥ. പാലക്കാടുനിന്നുള്ള മില്ലുകാരാണ് നെല്ലെടുക്കുന്നത്. താരയുടെ പേരില്‍ ഇവിടുത്തെ നെല്ല് സംഭരണം തടസപ്പെട്ടതും ടണ്‍ കണക്കിന് നെല്ല് പാടശേഖരത്ത് കൂട്ടിയിട്ടിരിക്കുന്നതും ദീപിക റിപ്പോര്‍ട്ട് ചെയ്തിരുന്നു. ഇതേത്തുടര്‍ന്നാണ് ജനപ്രതിനിധികള്‍ ഉള്‍പ്പെടെയുള്ളവര്‍ വിഷയത്തില്‍ ഇടപെടുന്നതും പ്രശ്‌നപരിഹാരത്തിന് നടപടികളായതും. മോന്‍സ് ജോസഫ് എംഎല്‍എയും ഫ്രാന്‍സിസ് ജോര്‍ജ് എംപിയും അടക്കമുള്ള ജനപ്രതിനിധികള്‍ ഇടപെട്ടാണ് ഇപ്പോള്‍ മറ്റൊരു മില്ലുകാരെ നെല്ല് സംഭരണത്തിനായി ചുമതലപ്പെടുത്തിയത്. ശക്തമായ വേനല്‍ മഴയ്ക്കു മുമ്പ് നെല്ല് കയറ്റിവിടാന്‍ പറ്റുമെന്ന പ്രതീക്ഷയിലാണ് കര്‍ഷകര്‍.

കുടുംബശ്രീ ലോൺ തട്ടിപ്പ്: കോൺഗ്രസ് ധർണ ഇന്ന്

അതിരമ്പുഴ: അതിരമ്പുഴ പഞ്ചായത്ത് മൂന്നാം വാർഡിൽ സൗപർണിക കുടുംബശ്രീ അയൽക്കൂട്ടത്തിൽ നടന്ന ബാങ്ക് ലിങ്കേജ് ലോൺ തട്ടിപ്പിൽ നടപടി ആവശ്യപ്പെട്ട് കോൺഗ്രസ് അതിരമ്പുഴ മണ്ഡലം കമ്മിറ്റിയുടെ നേതൃത്വത്തിൽ ഇന്ന് പഞ്ചായത്ത് സിഡിഎസ് ഓഫീസിനു മുന്നിൽ ധർണ നടത്തും. കുടുംബശ്രീ അയൽക്കൂട്ടം സെക്രട്ടറിയായിരുന്ന സിപിഎം ബ്രാഞ്ച് സെക്രട്ടറിക്കെതിരേ പോലീസ് അന്വേഷണം നടത്തണമെന്നും തട്ടിപ്പിനു കൂട്ടുനിന്ന സിഡിഎസ് ചെയർപേഴ്സണെ തത്‌സ്ഥാനത്തുനിന്ന് നീക്കണമെന്നും ആവശ്യപ്പെട്ടാണ് സമരം. രാവിലെ 10ന് ആരംഭിക്കുന്ന ധർണ ഡിസിസി പ്രസിഡന്‍റ് നാട്ടകം സുരേഷ് ഉദ്ഘാടനം ചെയ്യും. മണ്ഡലം പ്രസിഡന്‍റ് ജൂബി ഐക്കരക്കുഴി അധ്യക്ഷത വഹിക്കും.

ഡോ. ബി.ആർ. അംബേദ്കർ ജന്മദിനാഘോഷത്തിന് 12ന് തുടക്കം

കോട്ടയം: ഡോ. ബി.ആര്‍. അംബേദ്കറിന്‍റെ 134-ാം ജന്മദിനാഘോഷം സിഎസ്ഡിഎസിന്‍റെ നേതൃത്വത്തില്‍ സംസ്ഥാനവ്യാപകമായി 12 മുതല്‍ 14 വരെ ആഘോഷിക്കും. 12നു രാവിലെ ഒമ്പതിനു സിഎസ്ഡിഎസ് വാഴൂര്‍-നെടുമാവ് അംബേദ്കര്‍ സംസ്ഥാന കമ്മിറ്റി ഓഫീസിലെ അംബേദ്കര്‍ പ്രതിമയില്‍ സംസ്ഥാന നേതാക്കള്‍ പുഷ്പാര്‍ച്ചന നടത്തും. ഉച്ചകഴിഞ്ഞ് രണ്ടിനു നടക്കുന്ന സമ്മേളനം ഗവണ്‍മെന്‍റ് ചീഫ് വിപ് ഡോ. എന്‍. ജയരാജ് ഉദ്ഘാടനം ചെയ്യും. വൈകുന്നേരം നെടുമാവില്‍നിന്നും ആരംഭിക്കുന്ന ജന്മദിന സന്ദേശ വിളംബര ജാഥ കെകെ റോഡുവഴി തിരുനക്കര മൈതാനത്ത് സമാപിക്കും. 13ന് ഉച്ചകഴിഞ്ഞ് രണ്ടിനു വനിതാ യുവജന സമ്മേളനം നടക്കും. 14നു വൈകുന്നേരം നാലിനു നെഹ്‌റു സ്റ്റേഡിയത്തില്‍നിന്നും സാംസ്‌കാരിക ഘോഷയാത്ര ആരംഭിക്കും. 5.30നു തിരുനക്കര മൈതാനത്ത് ജന്മദിന സമ്മേളനം പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്യും. സംസ്ഥാന പ്രസിഡന്‍റ് കെ.കെ. സുരേഷ് അധ്യക്ഷത വഹിക്കും. ഡോ.ബി.ആര്‍. അംബേദ്കര്‍ പുരസ്‌കാരം ഡോ. ഗീവര്‍ഗീസ് മാര്‍ കൂറിലോസിനു നല്‍കും. തിരുവഞ്ചൂര്‍ രാധാകൃഷ്ണന്‍ എംഎല്‍എ, കെ. ഫ്രാന്‍സിസ് ജോര്‍ജ് എംപി, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ഡോ.ആര്‍.എല്‍.വി. രാമകൃഷ്ണന്‍ തുടങ്ങിയവര്‍ പ്രസംഗിക്കും.

സൗജന്യ കായികപരിശീലനം

പുന്നത്തുറ: പുന്നത്തുറ സെന്‍റ് ജോസഫ്സ് സ്കൂളിന്‍റെ ആഭിമുഖ്യത്തിൽ അഞ്ചു മുതൽ 15 വയസുവരെ പ്രായമുള്ള കുട്ടികൾക്കായുള്ള അവധിക്കാല കായികപരിശീലന ക്യാന്പ് തുടങ്ങി. പ്രമുഖ കായികതാരം ഏലിയാമ്മ ഐപ്പ് ക്യാന്പ് ഉദ്ഘാടനം ചെയ്തു. സ്കൂൾ മാനേജർ ഫാ. അനിൽ കരിപ്പിങ്ങാപ്പുറം അധ്യക്ഷത വഹിച്ചു. ഏറ്റുമാനൂർ ഉപജില്ല വിദ്യാഭ്യസ ഓഫീസർ ശ്രീജ പി. ഗോപാൽ ജഴ്സി പ്രകാശനം നടത്തി. സ്കൂൾ അസിസ്റ്റന്‍റ് മാനേജർ ഫാ. അലക്സ് പാലമറ്റം, അയർക്കുന്നം ഗ്രാമപഞ്ചായത്തംഗം ജോണി എടേട്ട് എന്നിവർ പ്രസംഗിച്ചു. കായിക പരിശീലകൻ വി.എൽ. യേശുദാസ് കായികപരിശീലനത്തിന്‍റെ പ്രാധാന്യത്തെക്കുറിച്ച് ക്ലാസെടുത്തു. ബേബി വൈതുണ്ടം, അനീഷ് നാരായണൻ, മെരിലിൻ ജോസഫ്, ഷിബിൾ മേരി എന്നിവർ പങ്കെടുത്തു.

കുടുംബ പ്രശ്‌നം: കിണറ്റില്‍ വീണ ഭാര്യക്കു പിന്നാലെ ഭര്‍ത്താവും ചാടി

ഏറ്റുമാനൂർ: കുടുംബപ്രശ്നത്തെത്തുടർന്നുള്ള കലഹത്തിനിടെ ഭാര്യ കിണറ്റിൽ വീണു. പിന്നാലെ ഭർത്താവ് കിണറ്റിൽ ചാടി. പുന്നത്തുറ കണ്ണമ്പുരയിൽ ഇന്നലെ വൈകുന്നേരമാണ് സംഭവം. കണ്ണമ്പുര സ്വദേശി ശിവരാജിന്‍റെ ഭാര്യ ജിനുവാണ് കിണറ്റിൽ വീണത്. ജിനുവിന്‍റെ കാലിന് പരിക്കുണ്ട്. പിന്നാലെ ചാടിയ ശിവരാജിന് പരിക്കൊന്നുമില്ല. ഫയർഫോഴ്സ് എത്തിയാണ് ഇരുവരെയും കരയ്ക്കു കയറ്റിയത്. ജിനുവിനെ ആശുപത്രിയിൽ പ്രവേശിപ്പിച്ചു. ഇവര്‍ തമ്മില്‍ ദീർഘകാലമായി പ്രശ്‌നങ്ങളുണ്ടായിരുന്നു. പോലീസിലും വനിതാ പ്രൊട്ടക്‌ഷൻ സെല്ലിലും പരാതികൾ നിലവിലുണ്ട്. നഗരസഭാ കൗൺസിലർ പ്രിയ സജീവും പ്രശ്നത്തിൽ ഇടപെട്ടിരുന്നു.

പോക്സോ കേസിൽ 30 വർഷം തടവും 40,000 രൂപ പിഴയും

ഏറ്റുമാനൂർ: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ പ്രതിക്ക് 30 വർഷം തടവും 40,000 രൂപ പിഴയും ശിക്ഷ. ഏറ്റുമാനൂര്‍‍ വെട്ടിമുകള്‍ ജവഹര്‍ കോളനി ഭാഗത്ത്‌ പേമലമുകളേൽ മഹേഷ്‌ എമ്മിനെ(28)യാണ് ഫാസ്റ്റ് ട്രാക്ക് സ്പെഷൽ കോടതി ശിക്ഷിച്ചത്. ഏറ്റുമാനൂർ പോലീസ് സ്റ്റേഷനിൽ 2022 ൽ രജിസ്റ്റർ ചെയ്ത കേസിലാണ് വിധിയുണ്ടായത്. ഏറ്റുമാനൂർ പോലീസ് സ്റ്റേഷൻ എസ്എച്ച്ഒ ആയിരുന്ന ഇൻസ്പെക്ടർ സി.ആർ. രാജേഷ് കുമാർ ആണ് അന്വേഷണം നടത്തി കുറ്റപത്രം കോടതിയിൽ സമർപ്പിച്ചത്.

കേരള കോണ്‍. ജില്ലാ നേതൃക്യാന്പ് ഇന്നും നാളെയും മാന്നാനത്ത്

കോട്ടയം: കേരള കോണ്‍ഗ്രസ് ജില്ലാ നേതൃ ക്യാമ്പ് ഇന്നും നാളെയും മാന്നാനം കെഇ സ്‌കൂള്‍ ഓഡിറ്റോറിയത്തില്‍ നടക്കും. ഇന്നു വൈകുന്നേരം നാലിന് ജില്ലാ പ്രസിഡന്‍റ് ജയ്‌സന്‍ ജോസഫ് പതാക ഉയര്‍ത്തും. നാളെ രാവിലെ 10ന് ചെയര്‍മാന്‍ പി.ജെ. ജോസഫ് ക്യാമ്പ് ഉദ്ഘാടനം ചെയ്യും. വൈകുന്നേരം അഞ്ചിന് സമാപന സമ്മേളനം എക്‌സിക്യൂട്ടീവ് ചെയര്‍മാന്‍ മോന്‍സ് ജോസഫ് എംഎല്‍എ ഉദ്ഘാടനം ചെയ്യും. ജോയി ഏബ്രഹാം, കെ. ഫ്രാന്‍സിസ് ജോര്‍ജ്, അപു ജോണ്‍ ജോസഫ് എന്നിവര്‍ വിവിധ വിഷയങ്ങള്‍ അവതരിപ്പിക്കും.

പെട്രോൾ പമ്പിൽ യുവാവിനെ മർദിച്ചവർ പിടിയിൽ

ഗാന്ധിനഗർ: പേരൂർ നിവാസിയായ യുവാവിനെ പെട്രോൾ പമ്പിൽവച്ച് മർദിച്ച കേസിൽ ഗാന്ധിനഗർ പോലീസ് മൂന്നുപേരെ അറസ്റ്റ് ചെയ്തു. വില്ലൂന്നി സ്വദേശികളായ വിഷ്ണു‌ദത്ത്, സൂര്യദത്ത്, കൊച്ചവൻ, ഇവരോടൊപ്പമുണ്ടായിരുന്ന മറ്റൊരാളുമാണ് ഗാന്ധിനഗർ പോലീസിന്‍റെ പിടിയിലായത്. കഴിഞ്ഞ നാലിനാണ് സംഭവം. മെഡിക്കൽ കോളജിനു സമീപത്തുള്ള പെട്രോൾ പമ്പിൽ ബൈക്കിനു മുമ്പിൽ പാർക്ക് ചെയ്തിരുന്ന ഓട്ടോറിക്ഷ മാറ്റാൻ യുവാവിന്‍റെ സുഹൃത്ത് പറഞ്ഞതിലുള്ള വിരോധമാണ് അക്രമത്തിനു കാരണം. ഗാന്ധിനഗർ എസ്എച്ചഒ ടി. ശ്രീജിത്തിന്‍റെ നേതൃത്വത്തിലുള്ള പോലീസ് സംഘം പ്രതികളെ പിടികൂടി കോടതിയിൽ ഹാജരാക്കി റിമാൻഡ് ചെയ്തു.

രേഖകളില്ലാതെ വിദേശ ജോലി റിക്രൂട്ട്മെന്‍റ്: രണ്ടു സ്ഥാപനങ്ങൾക്കെതിരേ നടപടി

ഏറ്റുമാനൂർ: മതിയായ രേഖകളില്ലാതെ വിദേശ ജോലി റിക്രൂട്ട്മെന്‍റ് നടത്തിവന്ന രണ്ട് സ്ഥാപനങ്ങൾക്കെതിരേ നടപടി. ഏറ്റുമാനൂർ ഇമ്മാനുവേൽ നഴ്സിംഗ് റിക്രൂട്ട്മെന്‍റ് ഏജൻസി, കോട്ടയത്ത് പ്രവ‍ർത്തിക്കുന്ന ആക്സിസ് ഓവ‍ർസീസ് കരിയേഴ്സ് എന്നീ സ്ഥാപനങ്ങൾക്കെതിരേയാണ് നടപടി. ഇരുസ്ഥാപനങ്ങളിലും പ്രൊട്ടക്‌ടർ ഓഫ് എമിഗ്രന്‍റ്സ് പരിശോധന നടത്തി രേഖകൾ പിടിച്ചെടുത്തു. രണ്ടു സ്ഥാപനങ്ങൾക്കും നിയമാനുസൃതമുള്ള ലൈസൻസ് ഇല്ല. പ്രൊട്ടക്‌ടർ ഓഫ് എമിഗ്രന്‍റ്സിന്‍റെ റിപ്പോർട്ടിന്‍റെ അടിസ്ഥാനത്തിൽ സ്ഥാപനങ്ങൾക്കെതിരേ ഏറ്റുമാനൂർ, കോട്ടയം ഈസ്റ്റ് പോലീസ് സ്റ്റേഷനുകളിൽ എമിഗ്രേഷൻ ആക്ട് പ്രകാരം കേസ് രജിസ്റ്റർ ചെയ്തു.

കെജിഒഎ ജില്ലാ സമ്മേളനം ഇന്നു മുതൽ

കോട്ടയം: കേരള ഗസറ്റഡ് ഓഫീസേഴ്സ് അസോസിയേഷന്‍ 44-ാമതു ജില്ലാ സമ്മേളനം ഇന്നു തുടങ്ങും. പാലാ കിഴതടിയൂര്‍ സര്‍വീസ് സഹകരണ ബാങ്ക് ഓഡിറ്റോറിയത്തില്‍ ഉച്ചകഴിഞ്ഞ് 12.30ന് ജില്ലാ പ്രസിഡന്‍റ് പതാകയുയര്‍ത്തുന്നതോടെ സമ്മേളനം ആരംഭിക്കും. ജില്ലാ കൗണ്‍സില്‍ കണക്കും തെരഞ്ഞെടുപ്പും നടക്കും. വൈകുന്നേരം 4.30ന് കിഴതടിയൂര്‍ സര്‍വീസ് സഹകരണ ബാങ്കിനു സമീപത്തുനിന്ന് ആരംഭിക്കുന്ന പ്രകടനം പാലാ നഗരസഭാ കാര്യാലയത്തിനു സമീപം അവസാനിക്കും. തുടര്‍ന്നു നടക്കുന്ന പൊതുസമ്മേളനം രാജു ഏബ്രഹാം ഉദ്ഘാടനം ചെയ്യും. ജില്ലാ പ്രസിഡന്‍റ് കെ.ടി. സാജുമോന്‍ അധ്യക്ഷത വഹിക്കും. നഗരസഭ ചെയര്‍മാന്‍ തോമസ് പീറ്റര്‍, സിഐടിയു ജില്ലാ വൈസ് പ്രസിഡന്‍റ് ലാലിച്ചന്‍ ജോര്‍ജ്, പി.എം. ജോസഫ്, കെജിഒഎ സംസ്ഥാന ട്രഷറര്‍ എ. ബിന്ദു, ജില്ലാ സെക്രട്ടറി ഷാജിമോന്‍ ജോര്‍ജ്, ജില്ലാ ട്രഷറര്‍ ടി.എസ്. അജിമോന്‍ എന്നിവര്‍ പ്രസംഗിക്കും. നാളെ രാവിലെ 10ന് പ്രതിനിധി സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. കെജിഒഎ ജില്ലാ പ്രസിഡന്‍റ് അധ്യക്ഷത വഹിക്കും. എഫ്എസ്ഇടിഒ ജില്ലാ സെക്രട്ടറി കെ.ആര്‍. അനില്‍കുമാര്‍, കോണ്‍ഫെഡറേഷന്‍ ഓഫ് സെന്‍ട്രല്‍ ഗവണ്‍മെന്‍റ് എംപ്ലോയീസ് ആന്‍ഡ് വര്‍ക്കേഴ്സ് ജില്ലാ സെക്രട്ടറി രാജേഷ് ഡി. മാന്നാത്ത്, കെജിഒഎ സംസ്ഥാന സെക്രട്ടേറിയറ്റംഗം പി. സെയ്തലവി തുടങ്ങിയവര്‍ പ്രസംഗിക്കും.

പഴയ സെമിനാരിയിൽ

കോട്ടയം: പഴയ സെമിനാരിയിലെ പീഡാനുഭവ ആഴ്ച ശുശ്രൂഷകള്‍ക്ക് ഏബ്രഹാം മാര്‍ സ്തേഫാനോസ് മെത്രാപ്പോലീത്ത മുഖ്യകാര്‍മികത്വം വഹിക്കും. 13നു രാവിലെ 6.30നു പ്രഭാതനമസ്‌കാരം, 7.30ന് വിശുദ്ധ കുര്‍ബാനയും ഓശാന ശുശ്രൂഷയും വൈകുന്നേരം ആറിന് സന്ധ്യാനമസ്‌കാരം, പ്രസംഗം. 14ന് രാവിലെ 5ന് രാത്രി നമസ്‌കാരം, വാദെദല്‍മീനോ ശുശ്രൂഷ, എട്ടിനു പ്രഭാത നമസ്‌കാരം, 12ന് ഉച്ചനമസ്‌കാരം. വൈകുന്നേരം ആറിന് സന്ധ്യാനമസ്‌കാരം, പ്രസംഗം. 15ന് രാവിലെ അഞ്ചിന് രാത്രി നമസ്‌കാരം, എട്ടിന് പ്രഭാത നമസ്‌കാരം, 12ന് ഉച്ചനമസ്‌കാരം. വൈകുന്നേരം ആറിന് സന്ധ്യാനമസ്‌കാരം, പ്രസംഗം. 16ന് രാവിലെ 5ന് രാത്രി നമസ്‌കാരം, എട്ടിന് പ്രഭാത നമസ്‌കാരം, 12ന് ഉച്ചനമസ്‌കാരം. വൈകുന്നേരം ആറിന് സന്ധ്യാനമസ്‌കാരം, പ്രസംഗം. പെസഹാ ശുശ്രൂഷകള്‍ 17ന് പുലര്‍ച്ചെ രണ്ടിന് ആരംഭിക്കും. 12.30ന് ഉച്ചനമസ്‌കാരം, രണ്ടിനു കാല്‍കഴുകല്‍ ശുശ്രൂഷ, വൈകുന്നേരം ആറിന് സന്ധ്യാനമസ്‌കാരം. ദുഃഖവെള്ളിയാഴ്ച ശുശ്രൂഷകള്‍ 18ന് രാവിലെ എട്ടിനു പ്രഭാത നമസ്‌കാരത്തോടെ ആരംഭിക്കും. 19ന് ദുഃഖശനിയാഴ്ച രാവിലെ 9.45ന് നമസ്‌കാരവും 10.30ന് വിശുദ്ധ കുര്‍ബാന, വൈകുന്നേരം ആറിന് സന്ധ്യാനമസ്‌കാരം. 20നു പുലര്‍ച്ചെ രണ്ടിന് രാത്രി നമസ്‌കാരവും ഉയിര്‍പ്പ് ശുശ്രൂഷയും വിശുദ്ധ കുര്‍ബാനയും ഉണ്ടായിരിക്കും.

നാല്പതാംവെള്ളി ആചരണം മാന്നാനം ആശ്രമ ദേവാലയത്തിൽ

മാന്നാനം: സെന്‍റ് ജോസഫ്സ് ആശ്രമ ദേവാലയത്തിൽ നാല്പതാംവെള്ളി ആചരണം ഇന്ന് നടക്കും. വൈകുന്നേരം 4.30ന് ഫാ. റെന്നി കളത്തിൽ സിഎംഐയുടെ മുഖ്യ കാർമികത്വത്തിൽ വിശുദ്ധ കുർബാന. തുടർന്ന് വിശുദ്ധ യൗസേപ്പിതാവിന്‍റെ കപ്പേളയിൽനിന്നാരംഭിക്കുന്ന കുരിശിന്‍റെ വഴി കേരളത്തിൽ കുരിശിന്‍റെ വഴി പ്രാർഥന ആദ്യമായി ആരംഭിച്ച വിശുദ്ധ ചാവറയച്ചന്‍റെ കബറിടം സ്ഥിതി ചെയ്യുന്ന ആശ്രമ ദേവാലയത്തിലെത്തി സമാപിക്കും. ഫാ. ടിസൺ പാത്തിക്കൽ സിഎംഐ സന്ദേശം നൽകും.

പണയത്തിന് മുക്കുപണ്ടം, ആധാറും‍ വ്യാജം; യുവാവ് അറസ്റ്റിൽ

ചിങ്ങവനം: വ്യാജ ആധാര്‍ കാര്‍ഡുമായി മുക്കുപണ്ടം പണയം വയ്ക്കാനെത്തിയ ആള്‍ ചിങ്ങവനം പോലീസിന്‍റെ പിടിയിലായി. പാക്കില്‍ സെന്‍റ് തോമസ് സ്വര്‍ണ പണയ സ്ഥാപനത്തില്‍ എട്ടുഗ്രാം വീതം തൂക്കം വരുന്ന രണ്ടുവളകള്‍ പണയം വയ്ക്കാന്‍ ചെന്ന പാമ്പാടി എസ്എന്‍ പുരം പുത്തന്‍പുരയ്ക്കല്‍ ദില്‍ജിത് ( 28) ആണ് പിടിയിലായത്. രണ്ടുപവന്‍ തൂക്കം വരുന്ന വളകള്‍ക്ക് 96,000 രൂപ ആവശ്യപ്പെട്ട യുവാവിന്‍റെ പെരുമാറ്റത്തില്‍ സംശയം തോന്നിയ സ്ഥാപനമുടമ വളകള്‍ പരിശോധിച്ചു. മുക്കുപണ്ടമാണെന്നു മനസിലായതോടെ യുവാവിനെ തടഞ്ഞുവച്ച് ചിങ്ങവനം പോലീസില്‍ വിവരമറിയിക്കുകയായിരുന്നു. ചിങ്ങവനം എസ്എച്ച്ഒ അനില്‍കുമാര്‍, എസ്‌ഐ ഷാജിമോന്‍ എന്നിവരുടെ നേതൃത്വത്തിലെത്തിയ പോലീസ് സംഘം പ്രതിയെ ചോദ്യം ചെയ്തതിലും രേഖകള്‍ പരിശോധിച്ചതിലും ഇയാള്‍ പല സ്റ്റേഷനുകളിലായി നിരവധി കേസുകളില്‍ പ്രതിയാണെന്നും ഇയാള്‍ കൊടുത്ത ആധാര്‍ കാര്‍ഡിലെ അഖില്‍ അശോക് എന്ന പേര് വ്യാജമായി നിർമിച്ചതാണെന്നും കണ്ടെത്തി. തുടര്‍ന്ന് അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി.

ഗീവർഗീസ് സഹദായുടെ ഓർമപ്പെരുന്നാൾ: പുതുപ്പള്ളി പള്ളിയിൽ ആലോചനാ ‍യോഗം

പുതുപ്പള്ളി: പൗരസ്ത്യ ജോർജിയൻ തീർഥാടന കേന്ദ്രമായ പുതുപ്പള്ളി പള്ളിയിൽ വിശുദ്ധ ഗീവർഗീസ് സഹദായുടെ ഓർമ പെരുന്നാളിനു മുന്നോടിയായി വിവിധ വകുപ്പ് മേധാവികളുടെ നേതൃത്വത്തിൽ ആലോചന യോഗം ചേർന്നു. സബ് കളക്‌ടർ ഡി. രഞ്ജിത്ത് അധ്യക്ഷത വഹിച്ചു. വികാരി റവ.ഡോ. വർഗീസ് വർഗീസ് കല്ലൂർ വിശദീകരിച്ചു. തഹസിൽദാർ, ജില്ലാ മെഡിക്കൽ ഓഫീസർ, ജില്ലാ ഇൻഫർമേഷൻ ഓഫീസർ, ഡപ്യൂട്ടി എക്സൈസ് കമ്മീഷണർ തുടങ്ങി വിവിധ വകുപ്പുകളുടെ പ്രതിനിധികളും സഹവികാരിമാരായ ഫാ. കുര്യാക്കോസ് ഈപ്പൻ, ഫാ. ബ്ലസൻ മാത്യു ജോസഫ്, ഭാരവാഹികളായ പി.എം. ചാക്കോ , ജോണി ഈപ്പൻ, മോനു പി. ജോസഫ് എന്നിവരും പങ്കെടുത്തു.

ശ്രേഷ്ഠ കാതോലിക്കാ ബാവ മണർകാട് കത്തീഡ്രലിൽ

കോട്ടയം: യാക്കോബായ സുറിയാനി സഭയുടെ ശ്രേഷ്ഠ കാതോലിക്കാ മാർ ബസേലിയോസ് ജോസഫ് ബാവ ഓശാനയ്ക്കും ദുഃഖവെള്ളിക്കും ആഗോള മരിയൻ തീർഥാടന കേന്ദ്രമായ മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിലെ ശുശ്രൂഷകൾക്ക് മുഖ്യകാർമ്മികത്വം വഹിക്കും. ശ്രേഷ്ഠ കാതോലിക്കാ സ്ഥാനത്തെത്തിയ ശേഷമുള്ള അദ്ദേഹത്തിന്‍റെ ആദ്യത്തെ ഓശാന, ദുഃഖവെള്ളി ശുശ്രൂഷകളാണിത്. ഓശാന ഞായറാഴ്ച രാവിലെ 6.30ന് പ്രഭാത പ്രാർഥന, 7.30ന് പ്രദക്ഷിണം, ഓലവാഴ്‌വ്, 8.30ന് വിശുദ്ധ മൂന്നിന്മേൽ കുർബാന. 18ന് രാവിലെ 7.30ന് ശ്രേഷ്‌ഠ കാതോലിക്കാ ബാവയുടെ കാർമികത്വത്തിൽ ദുഃഖ വെള്ളി ശുശ്രൂഷ ആരംഭിക്കും.

വിമലഗിരി കത്തീഡ്രലിലെ വിശുദ്ധവാര തിരുക്കര്‍മങ്ങള്‍

കോട്ടയം: വിമലഗിരി കത്തീഡ്രലിലെ വിശുദ്ധവാര തിരുക്കര്‍മങ്ങൾ 13 മുതല്‍ 20 വരെ ബിഷപ് ഡോ. സെബാസ്റ്റ്യന്‍ തെക്കത്തെച്ചേരിലിന്‍റെ മുഖ്യകാര്‍മികത്വത്തില്‍ നടക്കും. 13നു രാവിലെ 6.30നു കുരിശിന്‍റെ വഴി, 7.30നു കുരുത്തോല വെഞ്ചരിപ്പ് തുടര്‍ന്നു സമൂഹബലി, വൈകുന്നേരം അഞ്ചിനു വിശുദ്ധ കുര്‍ബാന, 15നു രാവിലെ ആറിനു വിശുദ്ധ കുര്‍ബാന, വിശുദ്ധ അന്തോണീസിന്‍റെ നൊവേന, 16നു രാവിലെ 7.30നു തൈലാശീര്‍വാദ തിരുബലിയും പൗരോഹിത്യ വ്രതനവീകരണവും നടത്തും. 17നു വൈകുന്നേരം 6.30നു തിരുവത്താഴ പൂജയും പാദക്ഷാളനകര്‍മവും ദിവ്യകാരുണ്യാരാധനയും നടക്കും. 18നു രാവിലെ ഏഴിനു കുരിശിന്‍റെ വഴി കോട്ടയം നല്ലിടയന്‍ ദേവാലയത്തില്‍നിന്നാരംഭിച്ചു വിമലഗിരി കത്തീഡ്രലില്‍ സമാപിക്കും. ഫാ. സെബാസ്റ്റ്യന്‍ അട്ടിച്ചിറ പീഡാനുഭവ പ്രഘോഷണം നടത്തും. ഉച്ചകഴിഞ്ഞു മൂന്നിനു പീഡാനുഭവ തിരുക്കര്‍മങ്ങളും കുരിശിന്‍റെ ആരാധനയും നഗരികാണിക്കലും. 19നു രാവിലെ ഏഴിനു സങ്കീര്‍ത്തനാലാപനത്തോടെ പ്രഭാതപ്രാര്‍ഥന, രാത്രി ഒന്പതിന് ഉയിര്‍പ്പ് തിരുക്കര്‍മങ്ങള്‍, പുത്തന്‍ തീയും വെള്ളവും വെഞ്ചരിപ്പ്, ഉയിര്‍പ്പ് ദൃശ്യാവിഷ്കാരം. 20നു രാവിലെ ഏഴിനും വൈകുന്നേരം അഞ്ചിനും വിശുദ്ധ കുര്‍ബാന.

പാമ്പാടിയിൽ കഞ്ചാവുമായി യുവാക്കൾ പിടിയിൽ

പാമ്പാടി: കഞ്ചാവുമായി രണ്ടു യുവാക്കളെ എക്സൈസ് സംഘം പിടികൂടി. വടവാതൂര്‍ ശാന്തിഗ്രാം കോളനി മുഞ്ഞനാട്ട്പറമ്പില്‍ എം.പി. അജോമോന്‍ (22), കൊല്ലം മയ്യനാട് വടക്കുംകര കിഴക്കഞ്ചേരികര ഓമനഭവന്‍ എ. അനുരാഗ് (24) എന്നിവരെയാണ് പാമ്പാടി എക്സൈസ് റേഞ്ച് പിടികൂടിയത്. ഇന്നലെ രാവിലെ കൂരോപ്പട ഭാഗത്തുനിന്നാണ് അജോമോനെ എക്സൈസ് സംഘം പിടികൂടിയത്. കൂരോപ്പട തോട്ടുങ്കല്‍ ഭാഗത്തു നടത്തിയ പരിശോധനയിലാണ് സംശയാസ്പദമായ സാഹചര്യത്തില്‍ കണ്ട ഇയാളുടെ കൈയില്‍നിന്നും 50 ഗ്രാം കഞ്ചാവ് പിടികൂടിയത്. മണര്‍കാട്, പാമ്പാടി, കൂരോപ്പട ഭാഗങ്ങളിൽ ഇയാള്‍ വ്യാപകമായി കഞ്ചാവ് വില്പന നടത്തുന്നതായി സൂചനയുണ്ട്. ഇതേത്തുടര്‍ന്ന് ഇയാള്‍ എക്സൈസ് സംഘത്തിന്‍റെ നിരീക്ഷണത്തിലായിരുന്നു. പാമ്പാടി മുനിസിപ്പല്‍ മൈതാനത്തിന്‍റെ ഭാഗത്തുനിന്നാണ് അനുരാഗിനെ എക്സൈസ് സംഘം പിടികൂടിയത്. ഇയാളുടെ കൈ യില്‍നിന്നു 10 ഗ്രാം കഞ്ചാവ് എക്സൈസ് സംഘം പിടികൂടിയിട്ടുണ്ട്. എക്സൈസ് ഇന്‍സ്പെക്ടര്‍ പി.ജെ. ടോംസി, അസിസ്റ്റന്‍റ് എക്സൈസ് ഇന്‍സ്പെക്ടര്‍മാരായ ബിനോയ് കെ. മാത്യു, കെ.എന്‍. അജിത്കുമാര്‍, പ്രിവന്‍റീവ് ഓഫീസര്‍മാരായ പി. ശ്രീകാന്ത്, അനില്‍ വേലായുധന്‍, പ്രിവന്‍റീവ് ഓഫീസര്‍ ഗ്രേഡുമാരായ സി.എ. അഭിലാഷ്, അഖില്‍ പവിത്രന്‍, സിവില്‍ എക്സൈസ് ഓഫീസര്‍മാരായ പി.എ. സാജിദ്, ഷെബിന്‍ ടി. മാര്‍ക്കോസ്, നിധിന്‍ നെല്‍സണ്‍, വനിതാ എക്സൈസ് ഓഫീസര്‍ സി.എസ്. അഞ്ജു എന്നിവര്‍ അടങ്ങുന്ന സംഘമാണു പ്രതിയെ പിടികൂടിയത്.

ഷിബുവിന്‍റെ സത്യസന്ധത: ജെസിക്ക് തിരിച്ചുകിട്ടിയതു രണ്ടു പവന്‍റെ താലിമാല

കുമരകം: റോഡിൽനിന്നു കളഞ്ഞുകിട്ടിയ രണ്ടുപവന്‍റെ സ്വർണമാല വീട്ടമ്മയ്ക്ക് തിരികെ നൽകിയ ഷിബുവിന് അഭിനന്ദന പ്രവാഹം. കുമരകം പുത്തൻപറമ്പിൽ ജെസി സെബാസ്റ്റ്യന്‍റെ താലിമാലയാണ് രണ്ടു ദിവസത്തിനു ശേഷം ഇന്നലെ രാവിലെ തിരികെ ലഭിച്ചത്. പള്ളിച്ചിറ വീട്ടിൽ ഷിബു പി. കുര്യന്‍റെ സത്യസന്ധതയാണ് വീട്ടമ്മയ്ക്ക് തുണയായത്. കഴിഞ്ഞ ചൊവ്വാഴ്ച വടക്കുംകര സെന്‍റ് ജോൺസ് പള്ളിയിൽ ധ്യാനത്തിനുപോയി തിരികെയെത്തിയപ്പാേഴാണ് വീട്ടമ്മ താലിമാല നഷ്ടമായതറിഞ്ഞത്. അന്നുതന്നെ വടക്കുംകര പള്ളിയിൽ ധ്യാനത്തിൽ പങ്കെടുത്തു തിരികെപ്പോകുന്പോൾ രാത്രി 8.45ന് ഓളിയിൽ വീടിനുസമീപം റോഡിൽ നിന്നാണ് ഷിബുവിന് മാല കളഞ്ഞു കിട്ടിയത്. ഉടമയെ തിരിച്ചറിഞ്ഞതോടെ ഷിബു ഇന്നലെ ജെസിമോൾക്ക് മാല കൈമാറി.

കുറിച്ചി കക്കുഴി-ആലപ്പാട് പാടശേഖരത്ത് മില്ലുകാര്‍ക്കു വേണം, 20 കിലോ കിഴിവ് !

ചങ്ങനാശേരി: കുറിച്ചി, നാട്ടകം കൃഷിഭവനുകളുടെ പരിധിയിലുള്ള കക്കുഴി ആലപ്പാട് പാടശേഖരത്തിലെ കര്‍ഷകര്‍ മന്ദിരം-കൈനടി റോഡ് ഉപരോധിച്ചു. 13 ദിവസമായി കൊയ്തിട്ടിരിക്കുന്ന നെല്ലിന് 20 കിലോ കിഴിവ് ചോദിച്ച് മില്ലുകാര്‍ മാറിനില്‍ക്കുന്ന സാഹചര്യത്തിലാണ് കര്‍ഷകര്‍ റോഡ് ഉപരോധിച്ചത്. പാടശേഖര സമിതി പ്രസിഡന്‍റ് ഷമ്മി വിനോദിന്‍റെ അധ്യക്ഷതയില്‍ നെല്‍കര്‍ഷക സംരക്ഷണ സമിതി രക്ഷാധികാരി വി.ജെ. ലാലി ഉദ്ഘാടനം ചെയ്തു. യുദ്ധകാലാടിസ്ഥാനത്തില്‍ നെല്ല് സംഭരിച്ചില്ലെങ്കില്‍ ശക്തമായ സമരത്തിനു നേതൃത്വം കൊടുക്കുമെന്ന് വി.ജെ. ലാലി പറഞ്ഞു. കോണ്‍ഗ്രസ് മണ്ഡലം പ്രസിഡന്‍റ് അരുണ്‍ ബാബു, പാടശേഖര സെക്രട്ടറി ലീലാമ്മ ഈശോ, ആര്‍. രാജഗോപാല്‍, ടി.എസ്. സാബു, അശ്വിന്‍, പി.പി. മോഹനന്‍, വിഷ്ണു പങ്കജാക്ഷന്‍, പഞ്ചായത്തംഗം മഞ്ജു എന്നിവര്‍ പ്രസംഗിച്ചു. നെല്ല് കൈയിലെടുത്ത് പിടിച്ചു കര്‍ഷകര്‍ പോരാട്ട പ്രതിജ്ഞയുമെടുത്തു.

സർക്കാരിന്‍റെ നിസംഗത അവസാനിപ്പിക്കണം; തിരുവഞ്ചൂർ രാധാകൃഷ്ണൻ എംഎൽഎ

എരുമേലി: വന്യ മൃഗങ്ങളുടെ ആക്രമണത്തിൽ മരണപ്പെട്ടവരുടെ കുടുംബത്തിന് സാമ്പത്തിക സഹായം മാത്രം നൽകി സർക്കാർ കൈയൊഴിയുകയാണെന്ന് തിരുവഞ്ചൂർ രാധാകൃഷ്ണൻ എംഎൽഎ. കാർഷിക മേഖലയിലെ വന്യമൃഗ ആക്രമണം തടയണമെന്നും ബഫർ സോൺ ഉൾപ്പെടെയുള്ള വിഷയങ്ങൾക്ക് ശാശ്വത പരിഹാരം കണ്ടെത്തണമെന്നും ആവശ്യപ്പെട്ട് യുഡിഎഫ് സംസ്ഥാന വ്യാപകമായി നടത്തുന്ന സമരത്തിന്‍റെ രണ്ടാം ഘട്ടമായി ജില്ലാ കമ്മിറ്റിയുടെ നേതൃത്വത്തിൽ ഫോറസ്റ്റ് റേഞ്ച് ഓഫീസിലേക്ക് നടത്തിയ പ്രതിഷേധ മാർച്ച് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വന്യ മൃഗങ്ങളുടെ ആക്രമണത്തിൽ നൂറുകണക്കിനാളുകൾ കൊല്ലപ്പെട്ടിട്ടും ക്രിയാത്മകമായ ഒരു നടപടിയും സ്വീകരിക്കാത്ത സർക്കാർ നടപടി പ്രതിഷേധാർഹമാണ്. വനം വകുപ്പ് ഭരണം ഇത്രയേറെ വിമർശന വിധേയമായ ഒരു കാലഘട്ടം ഇതിനുമുമ്പ് ഒരിക്കലും ഉണ്ടായിട്ടില്ലെന്നും അദ്ദേഹം കൂട്ടിച്ചേർത്തു. വന്യമൃഗ ശല്യത്തിനുള്ള ശാശ്വത പരിഹാരത്തിന് നടപടി സ്വീകരിക്കുക, കർഷകർക്ക് ദോഷകരമാകാത്ത രീതിയിൽ വനാതിർത്തി പുനർനിർണയിക്കുക, വന്യമൃഗ ശല്യം കാരണമുള്ള കൃഷി നാശത്തിനും നഷ്ടങ്ങൾക്കും വിള ഇൻഷ്വറൻസ് നടപ്പാക്കുക തുടങ്ങിയ ആവശ്യങ്ങൾ ഉന്നയിച്ചുകൊണ്ടായിരുന്നു യുഡിഎഫ് രണ്ടാം ഘട്ടം സമരം നടത്തിയത്. സമരത്തിന്‍റെ ഒന്നാംഘട്ടമായി പ്രതിപക്ഷ നേതാവ് വി.ഡി. സതീശന്‍റെ നേതൃത്വത്തിൽ മലയോര സംരക്ഷണ യാത്ര നടത്തിയിരുന്നു. യുഡിഎഫ് ജില്ലാ കൺവീനർ ഫിൽസൺ മാത്യൂസ് അധ്യക്ഷത വഹിച്ചു. മാണി സി. കാപ്പൻ എംഎൽഎ മുഖ്യപ്രഭാഷണം നടത്തി. ജോയി ഏബ്രഹാം, കെപിസിസി ജനറൽ സെക്രട്ടറി പി.എ. സലീം, ഡിസിസി പ്രസിഡന്‍റ് നാട്ടകം സുരേഷ്, യുഡിഎഫ് നേതാക്കൾ തുടങ്ങിയവർ പ്രസംഗിച്ചു.

ചേനപ്പാടി - എരുമേലി റോഡ് 1.12 കോടി രൂപ അനുവദിച്ച് റീ ടാറിംഗിന് ടെൻഡറായി

എരുമേലി: പഴയിടം - ചേനപ്പാടി - എരുമേലി റോഡിൽ അവസാന ഭാഗമായ കാരിത്തോട് പാലം മുതൽ എരുമേലി ടൗൺ വരെയുള്ള മൂന്ന് കിലോമീറ്ററോളം ദൂരം റീടാർ ചെയ്യുന്നതിന് 1.12 കോടി രൂപ ഫണ്ട് അനുവദിച്ച് ടെൻഡർ നടപടികൾ സ്വീകരിച്ചതായി സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. 21 വരെ ടെൻഡർ സമർപ്പിക്കാം. 24ന് ടെൻഡർ ഓപ്പൺ ചെയ്യും. പഴയിടം മുതൽ ചേനപ്പാടി - കാരിത്തോട് പാലം വരെയുള്ള പത്ത് കിലോമീറ്ററോളം ദൂരം മൂന്നു ഘട്ടങ്ങളായി അഞ്ചു കോടിയോളം രൂപ അനുവദിച്ച് നേരത്തേ റീ ടാർ ചെയ്തിരുന്നു. ഇതോടൊപ്പം ഓടകൾ, കലുങ്കുകൾ, സംരക്ഷണഭിത്തികൾ, റോഡ് സുരക്ഷാ സംവിധാനങ്ങളും ഒരുക്കിയിരുന്നു. അവശേഷിക്കുന്ന മൂന്നു കിലോമീറ്റർ കൂടി റീ ടാർ ചെയ്യുന്നതിനാണ് ഇപ്പോൾ ടെൻഡറായിരിക്കുന്നത്. കാരിത്തോട് മുതൽ എരുമേലി ടൗൺ വരെ റോഡ് തകർന്നു കിടന്നതിനാൽ ജനങ്ങളും തീർഥാടന കാലത്ത് അയ്യപ്പഭക്തരും ഏറെ ദുരിതമനുഭവിച്ചിരുന്നു. നിർമാണം പൂർത്തിയാകുന്നതോടെ പഴയിടം മുതൽ എരുമേലി വരെ മികച്ച നിലയിൽ ഗതാഗതയോഗ്യമാകുമെന്നും ഇതോടുകൂടി എരുമേലി പഞ്ചായത്തിലെ മുഴുവൻ പൊതുമരാമത്ത് റോഡുകളുടെയും റീ ടാറിംഗ് - പുനരുദ്ധാരണ പ്രവൃത്തികൾ പൂർത്തീകരിക്കുമെന്നും എംഎൽഎ അറിയിച്ചു.

ലഹരി മാഫിയകളുടെയും സാമൂഹ്യവിരുദ്ധരുടെയും കേന്ദ്രമായി 18 നില ഫ്ലാറ്റ് സമുച്ചയം

കാഞ്ഞിരപ്പള്ളി: ലഹരി മാഫിയകളുടെയും സാമൂഹ്യവിരുദ്ധരുടെയും കേന്ദ്രമായി 18 നില ഫ്ലാറ്റ് സമുച്ചയം. കാഞ്ഞിരപ്പള്ളി പഞ്ചായത്തിലെ 21-ാം വാർഡിൽപ്പെട്ട കുന്നുംഭാഗം കണ്ണാശുപത്രിക്ക് സമീപത്തെ ഫ്ലാറ്റ് സമുച്ചയമാണ് സാമൂഹ്യവിരുദ്ധരുടെയും ലഹരി മാഫിയകളുടെയും താവളമായി മാറിയിരിക്കുന്നത്. 2010ൽ നിർമാണം ആരംഭിച്ച കെട്ടിടത്തിന്‍റെ നിർമാണം സ്ട്രക്ചർ നിർമിച്ചു ഭിത്തികെട്ടി തിരിച്ചതോടെ നിലച്ചു. നിലവിൽ 10 വർഷത്തിലേറെയായി ഉപയോഗ യോഗ്യമല്ലാതെ കിടക്കുകയാണ് ഫ്ലാറ്റ് സമുച്ചയം. എറണാകുളം കേന്ദ്രമായുള്ള ഫ്ലാറ്റ് നിർമാണ കമ്പിനിയുടെ ഉടമസ്ഥതയിലുള്ള കെട്ടിടം യാതൊരു അടവുമില്ലാതെ തുറന്നു കിടക്കുന്നതിനാൽ ആളുകൾക്ക് ഏതു സമയവും പ്രവേശിക്കുന്നതിന് തടസങ്ങളില്ല. ഇതോടെ പകലും രാത്രികാലങ്ങളിലുമായി പല സ്ഥലങ്ങളിൽ നിന്നായി നിരവധിയാളുകൾ വന്നുപോകുന്നുണ്ടെന്ന് നാട്ടുകാർ പറയുന്നു. കഴിഞ്ഞ ദിവസം സെൽഫി എടുക്കാൻ കെട്ടിടത്തിനു മുകളിൽ കയറിയ കുട്ടികളെ കെട്ടിടത്തിൽ കൂടുകൂട്ടിയിരിക്കുന്ന കടന്നൽക്കൂട്ടം ആക്രമിച്ച സംഭവവുമുണ്ടായി. ഇതോടെ ലഹരി വിരുദ്ധ പ്രവർത്തനങ്ങൾ ശക്തമാക്കിയ കാഞ്ഞിരപ്പള്ളി, ചിറക്കടവ് പഞ്ചായത്തുകളുടെ അതിർത്തിയിൽ നിൽക്കുന്ന ഫ്ലാറ്റ് സമുച്ചയത്തിൽ പോലീസിന്‍റെ നിരീക്ഷണം ശക്തമാക്കണമെന്ന് ആവശ്യപ്പെട്ട് ഇരുപഞ്ചായത്തുകളും പോലീസിനെ സമീപിച്ചു. കെട്ടിടം അടച്ചുപൂട്ടി ആളുകൾ പ്രവേശിക്കാതിരിക്കാനുള്ള നടപടി സ്വീകരിക്കണമെന്ന് ആവശ്യപ്പെട്ട് ചിറക്കടവ് പഞ്ചായത്ത് അധികൃതർ ഡിവൈഎസ്പിക്ക് പരാതിയും കാഞ്ഞിരപ്പള്ളി പഞ്ചായത്ത് അധികൃതർക്ക് കത്തും നൽകി. നിരീക്ഷണം ശക്തമാക്കണമെന്ന് കഴിഞ്ഞ ദിവസം ചേർന്ന താലൂക്ക് വികസന സമിതിയിൽ പോലീസിനോടും എക്സൈസിനോടും ആവശ്യപ്പെട്ടെന്നും കൂടാതെ ഉടമസ്ഥർക്ക് നോട്ടീസ് നൽകാനും തീരുമാനിച്ചതായും കാഞ്ഞിരപ്പള്ളി പഞ്ചായത്ത് പ്രസിഡന്‍റ് കെ.ആർ. തങ്കപ്പൻ പറഞ്ഞു.

നാല്പതാം വെള്ളി ആചരണവും കുരിശിന്‍റെ വഴിയും

അരുവിത്തുറ വല്യച്ചൻ മലയിൽ മൂന്നിലവ്: സെന്‍റ് മേരീസ് പള്ളിയിൽനിന്ന് അരുവിത്തുറ വല്യച്ചൻ മലയിലേക്ക് നാല്പതാം വെള്ളി ആചരണത്തിന്‍റെ ഭാഗമായി ഇന്ന് കുരിശിന്‍റെ വഴി നടക്കും. വൈകുന്നേരം 5.15ന് അടിവാരത്തുനിന്ന് ആരംഭിക്കുന്ന കുരിശിന്‍റെ വഴിക്ക് മോൺ. ജോസഫ് തടത്തിലിന്‍റെ മുഖ്യ കാർമികത്വത്തിൽ പ്രാരംഭ ആശിർവാദവും സന്ദേശവും നൽകും. മലമുകളിൽ മൂന്നിലവ് സെന്‍റ് മേരീസ് പള്ളി വികാരി ഫാ. കുര്യൻ തടത്തിലിന്‍റെ കാർമികത്വത്തിൽ വിശുദ്ധ കുർബാന അർപ്പിക്കും. സെന്‍റ് സെബാസ്റ്റ്യന്‍സ് പള്ളിയിൽ കുറിഞ്ഞി: സെന്‍റ് സെബാസ്റ്റ്യന്‍സ് പള്ളിയുടെ ആഭിമുഖ്യത്തില്‍ കൂമ്പന്‍ കുരിശുമല കയറ്റം ഇന്ന് നടക്കും. രാവിലെ 6.15ന് വിശുദ്ധ കുര്‍ബാന, 7.15ന് കുരിശുമല കയറ്റം, പ്രസംഗം, നേര്‍ച്ച. രാമപുരം ഫൊറോനാ പള്ളിയില്‍ രാമപുരം: രാമപുരം സെന്‍റ് അഗസ്റ്റ്യന്‍സ് ഫൊറോനാ പള്ളിയില്‍ നാല്പതാം വെള്ളി ആചരണം ഇന്ന് 3.30 ന് ആരംഭിക്കും. പള്ളി അങ്കണത്തില്‍നിന്ന് കുന്നപ്പിള്ളി മലയിലേക്കുള്ള കുരിശിന്‍റെ വഴി നടക്കും. പിതൃവേദി, മാതൃവേദി, എസ്എംവൈഎം രാമപുരം യൂണിറ്റ് തുടങ്ങിയ ഭക്ത സംഘടനകളുടെയും കുന്നപ്പള്ളി നിവാസികളുടെയും വികാരി ഫാ. ബെര്‍ക്കുമാന്‍സ് കുന്നുംപുറത്തിന്‍റെയും നേതൃത്വത്തിലാണ് നാല്പതാം വെള്ളി ആചരണം നടക്കുന്നത്. തുടര്‍ന്ന് നേര്‍ച്ചക്കഞ്ഞി വിതരണവും ഉണ്ടായിരിക്കും. വിശ്വാസികള്‍ക്ക് തിരികെ വരുന്നതിനായി കെഎസ്ആര്‍ടിസി ബസ് സര്‍വീസും ഏര്‍പ്പെടുത്തിയിട്ടുണ്ട്.

തീക്കോയിയിൽ സ്വകാര്യ സ്ഥാപനങ്ങളുടെ പരസ്യ ബോർഡുകൾ അപകടക്കെണിയായി

തീക്കോയി: ഈരാറ്റുപേട്ട -വാഗമൺ സംസ്ഥാന പാതയിൽ അപകടക്കെണിയായി സ്വകാര്യ സ്ഥാപനങ്ങളുടെ പരസ്യ ബോർഡുകൾ. കുറ്റൻ ബോർഡ് കഴിഞ്ഞദിവസം കാറ്റത്ത് മറിഞ്ഞുവീണിട്ട് രണ്ട് കാല്‍നടയാത്രക്കാര്‍ കഷ്ടിച്ചാണ് രക്ഷപ്പെട്ടത്. പൊതുസ്ഥലങ്ങളിൽ അപകടകരമായ രീതിയിൽ സ്ഥാപിച്ചിരിക്കുന്ന ബോർഡുകൾ നീക്കം ചെയ്യേണ്ട പഞ്ചായത്ത് അധികൃതർ മൗനം പാലിക്കുകയാണെന്ന് ആക്ഷേപമുണ്ട്. വൈദ്യുതി ലൈനുമായി വളരെ അടുത്താണ് ബോർഡ് സ്ഥാപിച്ചിരിക്കുന്നത്. ഇത്തരം പരസ്യ ബോർഡുകൾ നീക്കം ചെയ്യാൻ അധികൃതർ തയറാകണമെന്നാണ് നാട്ടുകാരുടെ ആവശ്യം.

വൺ ഇന്ത്യ വൺ പെൻഷൻ രാജ്ഭവൻ മാർച്ച് നടത്തി

പാലാ: 60 വയസു കഴിഞ്ഞ എല്ലാവർക്കും, കുറഞ്ഞത് 10,000 രൂപ ഏകീകൃത പെൻഷൻ നൽകണമെന്നാവശ്യപ്പെട്ട് വൺ ഇന്ത്യ വൺ പെൻഷൻ സംസ്ഥാന കോ-ഓർഡിനേഷൻ കമ്മിറ്റിയുടെ നേതൃത്വത്തിൽ, രാജഭവൻ മാർച്ച് നടത്തി. സംസ്ഥാന കൺവീനർ അഡ്വക്കേറ്റ് ജോസുകുട്ടി മാത്യുവിന്‍റെ നേതൃത്വത്തിൽ ആയിരങ്ങൾ പങ്കെടുത്ത ജനകീയ മാർച്ച് സാമ്പത്തിക വിദഗ്ധൻ ജോസ് സെബാസ്റ്റ്യൻ ഉദ്ഘാടനം ചെയ്തു. മാർച്ചിനു ശേഷം ഗവർണർക്ക് ആവശ്യം ഉന്നയിച്ച് മെമ്മോറാണ്ടം നൽകി. സംസ്ഥാന നേതാക്കളായ മാത്യു കാവുങ്കൽ, സദാനന്ദൻ എ.ജി. റഹീം കല്ലറ, ബെന്നി മാത്യു മേവട, സുഗുണൻ പ്രിയദർശിനി, അനിൽ ചൊവ്വര, അലക്സ് പീറ്റർ, ബാസുരാംഗി, സജി മാത്യു, തോമസുകുട്ടി ആലപ്പുഴ, റോജർ സെബാസ്റ്റ്യൻ തുടങ്ങിയവർ പ്രസംഗിച്ചു.

ഓടയുടെ തകര്‍ച്ച പരിഹരിക്കുന്നില്ല; മാലിന്യവും വെള്ളക്കെട്ടും ദുരിതം പരത്തുന്നു

പാലാ: നഗരത്തില്‍ ജനറൽ ആശുപത്രിക്ക് സമീപമുള്ള ഓടയുടെ തകര്‍ച്ചമൂലം സമീപത്തുള്ള കെട്ടിടങ്ങളിലേക്ക് വെള്ളം ഇരച്ചു കയറി നിരവധി സ്ഥാപനങ്ങളുടെ പ്രവര്‍ത്തനം തകരാറിലായിട്ടും പരിഹരിക്കാതെ അധികൃതര്‍. ജനറൽ ആശുപത്രി ജംഗ്‌ഷനില്‍ കിഴതടിയൂര്‍ സഹകരണ ബാങ്കിന് സമീപമുള്ള കെട്ടിടങ്ങളിലേക്കാണ് വാട്ടര്‍ അഥോറിറ്റിയുടെ ടാങ്ക് കഴുകിയ ശേഷം ഒഴുകിയെത്തുന്ന മലിന ജലം എത്തുന്നത്. വിവിധ കെട്ടിടങ്ങളിലായി 50ല്‍ പരം സ്ഥാപനങ്ങളും അതില്‍ ജോലി ചെയ്യുന്നവരുമാണ് ഒരു മാസമായി പ്രതിസന്ധിയിലായിരിക്കുന്നത്. നഗരസഭയുടെ ശുചീകരണ വിഭാഗം ഓടയുടെ പ്രവര്‍ത്തനം സുഗമമാക്കുവാന്‍ ശ്രമിച്ചെങ്കിലും ഫലവത്തായില്ല. പൊതുമരാമത്ത് വകുപ്പ് അധികൃതരുടെ സഹകരണത്തോടെ പരിശോധിച്ചാല്‍ മാത്രമേ തകരാറ് പരിഹരിക്കുവാന്‍ സാധിക്കുകയുള്ളുവെന്നും ഉടന്‍ നടപടിയെടുക്കുമെന്നുമാണ് നഗരസഭാ ചെയര്‍മാന്‍ തോമസ് പീറ്റര്‍ പറയുന്നത്. കെട്ടിടങ്ങളിലേക്ക് മലിന ജലം തള്ളിക്കയറുന്നതു സംബന്ധിച്ച് നഗരസഭാ അധികൃതര്‍ ശ്രദ്ധയില്‍പ്പെടുത്തിയങ്കിലും വാട്ടര്‍ അഥോറിറ്റി അധികൃതര്‍ മറ്റ് സാധ്യതകള്‍ തേടാതെ മലിന ജലം ഒഴുക്കി വിടുന്നത് തുടരുകയാണ്. പ്രധാന റോഡിന് കുറുകെ ആറടിയോളം താഴ്ചയിലാണ് ഓട കടന്നു പോകുന്നത്. ഈ ഓട തകരാറിലായി മൂന്നുവര്‍ഷം മുമ്പ് റോഡ് ഇടിഞ്ഞിരുന്നു. അന്ന് പൊതുമരാമത്ത് താത്കാലിക നടപടികള്‍ മാത്രമാണ് സ്വീകരിച്ചതെന്ന് പരാതിയുയര്‍ന്നിരുന്നു. വാട്ടര്‍ അഥോറിറ്റി വെള്ളം ഒഴുക്കിവിടുമ്പോഴൊക്കെ ഓടയില്‍നിന്ന് വെള്ളം തിരിച്ചൊഴുകി കെട്ടിടങ്ങളുടെ മുറ്റത്തേക്ക് എത്തും. ഈ ഓടയ്ക്ക് സമീപമുള്ള ഹോട്ടലുകളിലെയുള്‍പ്പെടെയുള്ള മാലിന്യങ്ങള്‍ കെട്ടിടങ്ങളിലേക്ക് ഒഴുകിയെത്തുകയാണ്. ഇന്നലെ മലിന ജലം ടൗണിലേക്കും ഒഴുകിയെത്തിയിരുന്നു.

പാലാ നഗരസഭയില്‍ എന്‍ജിനിയേഴ്‌സ് ബ്ലോക്ക് നിര്‍മിച്ചു

പാലാ : നഗരസഭയില്‍ എന്‍ജിനിയറിംഗ് വിഭാഗത്തിനുവേണ്ടി പുതുതായി നിര്‍മിച്ച എന്‍ജിനിയേഴ്‌സ് ബ്ലോക്കിന്‍റെ ഉദ്ഘാടനം നഗരസഭാ ചെയര്‍മാന്‍ തോമസ് പീറ്റര്‍ നിര്‍വഹിച്ചു. വനിതാ ജീവനക്കാര്‍ക്കാര്‍ക്കായി നിര്‍മിച്ച ടോയ്‌ലറ്റ് ബ്ലോക്കിന്‍റെ ഉദ്ഘാടനം വൈസ് ചെയര്‍പേഴ്‌സണ്‍ ബിജി ജോജോയും നിർവഹിച്ചു. വികസന സ്റ്റാന്‍ഡിംഗ് കമ്മിറ്റി ചെയര്‍മാന്‍ സാവിയോ കാവുകാട്ട്, സെക്രട്ടറി ജൂഹി മരിയ ടോം, എഎക്‌സ്ഇ എ. സിയാദ്, കൗണ്‍സിലര്‍മാരായ ബിന്ദു മനു, ലിസിക്കുട്ടി മാത്യു, ജോസ് ചീരാംകുഴി, ആന്‍റോ പടിഞ്ഞാറെക്കര, സിജി പ്രസാദ്, നീനാ ചെറുവള്ളി, മായാ പ്രദീപ്, ഷാജു തുരുത്തന്‍, ബൈജു കൊല്ലംപറമ്പില്‍, സതി ശശികുമാര്‍, വി.സി പ്രിന്‍സ്, എഇ ബോണി എസ്. തുടങ്ങിയവര്‍ പ്രസംഗിച്ചു. ഇതോടൊപ്പം ആധുനികരീതിയിലുള്ള ഒരു വീഡിയോ കോണ്‍ഫറന്‍സ് റൂമിന്‍റെയും പുതിയ ഒരു മിനി എസി ഹാളിന്‍റെയും പണി നടന്നുവരികയാണെന്ന് വികസന സ്റ്റാന്‍ഡിംഗ് കമ്മിറ്റി ചെയര്‍മാന്‍ സാവിയോ കാവുകാട്ട് പറഞ്ഞു.

രാമപുരം കോളജ് മികച്ച ഹരിത സ്ഥാപനം

രാമപുരം: പഞ്ചായത്തിലെ മികച്ച ഹരിത സ്ഥാപനമായി മാര്‍ ആഗസ്തീനോസ് കോളജിനെ തെരഞ്ഞെടുത്തു. കോളജില്‍ നടന്ന ചടങ്ങില്‍ രാമപുരം പഞ്ചായത്ത് പ്രസിഡന്‍റ് ലിസമ്മ മത്തച്ചന്‍ കോളജിനെ സമ്പൂര്‍ണ ശുചിത്വ സ്ഥാപനമായി തെരഞ്ഞെടുത്തുകൊണ്ടുള്ള പുരസ്‌ക്കാരം കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം, പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍ എന്നിവര്‍ക്ക് കൈമാറി. മാര്‍ ആഗസ്തീനോസ് കോളജില്‍ കാര്യക്ഷമമായി നടപ്പിലാക്കിയിരിക്കുന്ന മികച്ച മാലിന്യ സംസ്‌കരണം പരിഗണിച്ചാണ് കോളജിന് ഈ അംഗീകാരം ലഭിച്ചത്. പേപ്പര്‍, ഭക്ഷണ, പ്ലാസ്റ്റിക് മാലിന്യങ്ങള്‍ തരം തിരിച്ചു ശേഖരിക്കുകയും മാതൃകാപരമായി സംസ്‌കരിക്കുകയും ചെയ്തുവരുന്നു. ഭക്ഷണ മാലിന്യങ്ങള്‍ ഉപയോഗിച്ചു പ്രവര്‍ത്തിക്കുന്ന ബയോ ഗ്യാസ് പ്ലാന്‍റും പ്രവര്‍ത്തിക്കുന്നുണ്ട്. കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം അധ്യക്ഷത വഹിച്ചു. രാമപുരം പഞ്ചായത്ത് പ്രസിഡന്‍റ് ലിസമ്മ മത്തച്ചന്‍ ഉദ്ഘാടനം ചെയ്തു. പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍, വൈസ് പ്രസിഡന്‍റ് സണ്ണി പോരുന്നക്കോട്ട്, പഞ്ചായത്ത് മെംബര്‍ മനോജ് ചീങ്കല്ലേല്‍, അഡ്മിനിസ്‌ട്രേറ്റര്‍ പ്രകാശ് ജോസഫ് തുടങ്ങിയവര്‍ പ്രസംഗിച്ചു.

കത്തോലിക്ക കോണ്‍ഗ്രസ് പ്രതിഷേധിച്ചു

പാലാ : മധ്യപ്രദേശിലെ ജബല്‍പൂരില്‍ അകാരണമായി വൈദികരെയും സിസ്റ്റേഴ്‌സിനെയും അല്‌മായരെയും ആക്രമിക്കുകയും ന്യൂനപക്ഷങ്ങളുടെ സ്‌കൂളുകള്‍ തകര്‍ക്കുകയും ചെയ്തവര്‍ക്കെതിരേ നടപടി സ്വീകരിക്കാത്തതില്‍ കത്തോലിക്ക കോണ്‍ഗ്രസ് പാലാ രൂപത സമിതി പ്രതിഷേധിച്ചു. ആഴ്ചകള്‍ കഴിഞ്ഞിട്ടും ഫലപ്രദമായ യാതൊരു നടപടിയും ഉണ്ടാകാത്തത് ആശങ്കാജനകമാണ്. കുറ്റക്കാര്‍ കൂടുതല്‍ ഭീക്ഷണിയുമായി നടക്കുന്നതും ആരോപണ വിധേയരായ പോലീസ് ഉദ്യോഗസ്ഥര്‍ അതേ സ്ഥാനങ്ങളില്‍ തുടരുന്നതും നിയമവാഴ്ചയ്ക്കെതിരാണ്. പോലീസിന്‍റെ സാന്നിധ്യത്തില്‍ നടന്ന അതിക്രമത്തിലെ പ്രതികളെ കണ്ടെത്താനോ കൃത്യവിലോപം നടത്തിയവര്‍ക്കെതിരേ നടപടിയെടുക്കാനോ ഭരണകര്‍ത്താക്കള്‍ മടിക്കുന്നത് ആശങ്ക ഉണ്ടാക്കുന്നു. ഭരണഘടനാപരമായ അവകാശം എല്ലാ സമുദായത്തിനും ലഭ്യമാക്കണമെന്നും കുറ്റവാളികളെ എത്രയും വേഗം പിടികൂടി മാതൃകാപരമായി ശിക്ഷിക്കണമെന്നും കത്തോലിക്കാ കോണ്‍ഗ്രസ് പാലാ രൂപതാസമിതി ആവശ്യപ്പെട്ടു. രൂപതാ പ്രസിഡന്‍റ് ഇമ്മാനുവല്‍ നിധീരി അധ്യക്ഷത വഹിച്ച യോഗത്തില്‍ റവ.ഡോ. ജോര്‍ജ് വര്‍ഗീസ് ഞാറക്കുന്നേല്‍, ഗ്ലോബല്‍ പ്രസിഡന്‍റ് രാജീവ് കൊച്ചുപറമ്പില്‍, രൂപത ജനറല്‍ സെക്രട്ടറി ജോസ് വട്ടുകുളം, ജോയി കണിപറമ്പില്‍, ആന്‍സമ്മ സാബു, അഡ്വ. ജോണ്‍സണ്‍ വീട്ടിയാങ്കല്‍, രാജേഷ് പാറയില്‍, ജോണ്‍സണ്‍ ചെറുവള്ളി, രാജം ആരു കുഴിപ്പില്‍, ജോബിന്‍ പുതിയടത്തുചാലില്‍, എഡ്വിന്‍ പാമ്പാറ, ലിബി മണിമല, ബെല്ലാ സിബി, ഫ്രാന്‍സീസ് കരിമ്പാനി, അജിത് അരിമറ്റം തുടങ്ങിയവര്‍ പ്രസംഗിച്ചു.

ഇങ്ങനെ പോയാല്‍ പാൽകുടി മുട്ടും

കോട്ടയം: വേനലില്‍ പാല്‍ ഉത്പാദനം കുറഞ്ഞതോടെ ക്ഷീരസംഘങ്ങള്‍ അടച്ചുപൂട്ടല്‍ ഭീഷണിയില്‍. പ്രതിസന്ധിയില്‍ നട്ടംതിരിയുന്ന ക്ഷീരകര്‍ഷകരെ സഹായിക്കാന്‍ അടിയന്തരമായി സര്‍ക്കാര്‍ ഇടപെടണമെന്ന ആവശ്യം ശക്തമായി. പാലിന്‍റെ സംഭരണവില വര്‍ധിപ്പിക്കുക, പാല്‍വില ചാര്‍ട്ട് പരിഷ്‌കരിക്കുക എന്നിവയാണ് കര്‍ഷകര്‍ ആവശ്യപ്പെടുന്നത്. കാലിത്തീറ്റ വിലവര്‍ധന, തൊഴിലാളികളുടെ വേതന വര്‍ധനവ്, തീറ്റപ്പുല്‍ ക്ഷാമം, വെറ്ററിനറി സേവനങ്ങളുടെ ചെലവ് വര്‍ധന തുടങ്ങിയ കാരണങ്ങളാണ് കര്‍ഷകരെ ദുരിതത്തിലാക്കുന്നത്. ഇത്തരം പ്രതിസന്ധികളെത്തുടര്‍ന്ന് സംസ്ഥാനത്ത് പാലിന്‍റെ ഉത്പാദനം കുറയുകയാണ്. ഉത്പാദനച്ചെലവ് വര്‍ധനവും പാല്‍ ലഭ്യതക്കുറവും മൂലം ബുദ്ധിമുട്ടുന്ന കര്‍ഷകരെ സര്‍ക്കാര്‍ അവഗണിക്കുന്നതായി കര്‍ഷക കോണ്‍ഗ്രസ് ക്ഷീര സെല്‍ ജില്ലാക്കമ്മിറ്റി ആരോപിച്ചു. വരവും ചെലവും തമ്മിലെ അന്തരം പാലിനു ലഭിക്കുന്ന വിലയും പശുപരിപാലന ചെലവും പരിശോധിച്ചാല്‍ പിടിച്ചു നില്ക്കാനാവില്ല. ഒരു ലീറ്റര്‍ പാല്‍ ഉത്പാദന ചെലവ് 65 രൂപയോളമാണ്. ക്ഷീരസംഘത്തില്‍നിന്ന് ലീറ്ററിന് 43 രൂപ മാത്രമാണ് ലഭിക്കുന്നത്. ഇത്രയും നഷ്ടം സഹിക്കാന്‍ സാധിക്കാതെ ക്ഷീരകര്‍ഷകര്‍ ഈ മേഖലയില്‍നിന്നു കൊഴിഞ്ഞുപോകുകയാണ്. പ്രതിസന്ധിയില്‍ ക്ഷീരസംഘങ്ങള്‍ പ്രതിസന്ധിയില്‍ നട്ടം തിരിഞ്ഞ് ഒട്ടേറെ ക്ഷീര സംഘങ്ങള്‍ അടച്ചു പൂട്ടി. പലതും പൂട്ടലിന്‍റെ വക്കിലുമാണ്. പാല്‍ സംഭരണം കുറഞ്ഞതാണ് പ്രധാന കാരണം. മിക്ക ക്ഷീര സംഘങ്ങളും 60 രൂപ നിരക്കില്‍ പാല്‍ ചില്ലറ വില്‍പന നടത്തിയാണ് പിടിച്ചുനില്‍ക്കന്‍ ശ്രമിക്കുന്നത്. ഉത്പാദനച്ചെലവിനനുസരിച്ചു വില ലഭിക്കാത്തതുകൊണ്ട് പുതുതായി ആരും ഈ മേഖലയിലേക്കു വരുന്നുമില്ല. അഞ്ചു വര്‍ഷങ്ങള്‍ക്കു മുമ്പു മില്‍മതന്നെ നടത്തിയ പഠനത്തില്‍ ഒരു ലീറ്റര്‍ പാല്‍ ഉത്പാദിപ്പിക്കാന്‍ ചെലവ് 48.68 രൂപയാണ് കണക്കായിരിക്കുന്നത്. പ്രസ്തുത പഠനത്തില്‍ ഒരു കിലോ കാലിത്തീറ്റയ്ക്ക് 23.4 രൂപയാണ് കണക്കാക്കിയിട്ടുള്ളത്. എന്നാല്‍ ഇപ്പോള്‍ ഇത് 32 രൂപയായി വര്‍ധിച്ചു. നിലവിലെ പ്രതിസന്ധി പരിഹരിക്കപ്പെടണമെങ്കില്‍ പാല്‍ സൊസൈറ്റിയില്‍നിന്ന് മിനിമം 70 രൂപയെങ്കിലും ലഭിക്കാനുള്ള നടപടികള്‍ മില്‍മയും സംസ്ഥാന സര്‍ക്കാരും സ്വീകരിക്കണമെന്നാണ് കര്‍ഷകര്‍ ആവശ്യപ്പെടുന്നത്. സര്‍ക്കാരിന്‍റെ അവഗണന കര്‍ഷകരെ രക്ഷിക്കാന്‍ സ്വകാര്യ കാലിത്തീറ്റ കമ്പനികള്‍ ഒരു ചാക്കിന് 25 രൂപ കുറച്ചപ്പോള്‍ സര്‍ക്കാര്‍ നിയന്ത്രണത്തിലുള്ള കമ്പനികള്‍ വില കുറയ്ക്കാന്‍ യാതൊരു നടപടിയും സ്വീകരിച്ചിട്ടില്ല. വില വര്‍ധിപ്പിക്കില്ലെന്ന് നിലപാടെടുത്ത മൃഗസംരക്ഷണ വകുപ്പിന്‍റെ ഫാമുകളില്‍ പാല്‍വില നാലു രൂപ വര്‍ധിപ്പിച്ച് 60 രൂപയാക്കിയിരിക്കുകയാണ്. സര്‍ക്കാര്‍ ഫാമുകള്‍ക്ക് പോലും വില വര്‍ധിപ്പിക്കാതെ മുന്നോട്ടു പോകാന്‍ സാധിക്കാത്ത സാഹചര്യമാണെന്നാണ് ഇത് വ്യക്തമാക്കുന്നത്.

മാര്‍ ജോസഫ് പള്ളിക്കാപറമ്പിലിന്‍റെ 98-ാം ജന്മദിനം ആഘോഷിച്ചു

പാലാ: 99-ാം വയസിലേക്കു പ്രവേശിക്കുന്ന ബിഷപ് മാര്‍ ജോസഫ് പള്ളിക്കാപറമ്പിലിന്‍റെ ജന്മദിനം ലളിതമായി ആഘോഷിച്ചു. രാവിലെ ബിഷപ് ഹൗസ് ചാപ്പലില്‍ അദ്ദേഹത്തിന്‍റെ മുഖ്യകാര്‍മികത്വത്തില്‍ വിശുദ്ധ കുര്‍ബാന അര്‍പ്പിക്കപ്പെട്ടു. ഉച്ചകഴിഞ്ഞ് ബിഷപ് ഹൗസ് ഹാളില്‍ 99 കുട്ടികളുടെ സാന്നിധ്യത്തില്‍ അദ്ദേഹം കേക്കു മുറിച്ചു. ബിഷപ് മാര്‍ ജോസഫ് കല്ലറങ്ങാട്ട്, മുഖ്യവികാരി ജനറാള്‍ മോണ്‍. ജോസഫ് തടത്തില്‍, മോണ്‍. ജോസഫ് മലേപ്പറമ്പില്‍, മോണ്‍. ജോസഫ് കണിയോടിക്കല്‍, മോണ്‍. സെബാസ്റ്റ്യന്‍ വേത്താനത്ത് തുടങ്ങിയവര്‍ പങ്കെടുത്തു. നിരവധി സാമൂഹ്യ-സാസ്‌കാരിക-രാഷ്‌ട്രീയ പ്രവത്തകര്‍ മാര്‍ പള്ളിക്കാപറമ്പിലിന് ആശംസകളുമായി എത്തിയിരുന്നു. മാര്‍ ജോസഫ് പള്ളിക്കാപറമ്പിലിന്‍റെ 98-ാം ജന്മദിനം കത്തീഡ്രല്‍ ഇടവകയില്‍ മിഷന്‍ലീഗിന്‍റെയും സണ്‍ഡേ സ്‌കൂളിന്‍റെയും സംയുക്ത ആഭിമുഖ്യത്തില്‍ ആഘോഷിച്ചു. 99 കുട്ടികള്‍ 99 എന്ന സംഖ്യാ രൂപത്തില്‍ അണിനിരക്കുകയും മാര്‍ പള്ളിക്കാപറമ്പിലിന് ജന്മദിനാശംസകള്‍ നേര്‍ന്ന് ആശംസകള്‍ എഴുതിയ ബലൂണുകള്‍ ആകാശത്തേക്ക് ഉയര്‍ത്തുകയും ചെയ്തു. ഇടവക വികാരി ഫാ. ജോസ് കാക്കല്ലില്‍, സണ്‍ഡേ സ്‌കൂള്‍ ഡയറക്ടര്‍ ഫാ. ഐസക് പെരിങ്ങാമലയില്‍, ഹെഡ്മാസ്റ്റര്‍ ഷാജി ആവിമൂട്ടില്‍, മിഷന്‍ ലീഗ് പ്രസിഡന്‍റ് അനൂപ് വെട്ടിക്കല്‍, സിബി പുളിക്കല്‍, സിസ്റ്റര്‍ റിന്‍സി വരവുകാലായില്‍, അമല്‍ വരവുകാലായില്‍, ജോമിന്‍ വില്ലന്‍കല്ലേല്‍, മാത്യു പരിപ്പിക്കുന്നേല്‍, ലീഡര്‍മാരായ എഡ്വിന്‍ കിഴക്കേപറമ്പില്‍, സ്‌നേഹ പുത്തന്‍പുരക്കല്‍, ടോം വളയത്തില്‍ എന്നിവര്‍ ആശംസാ പ്രസംഗം നടത്തി.

ജില്ലയിലെ തദ്ദേശസ്ഥാപനങ്ങളിലെ സേവനങ്ങള്‍ ഒറ്റ പ്ലാറ്റ്‌ഫോമില്‍

കോട്ടയം: വിവിധ സേവനങ്ങള്‍ക്കായി ഇനി തദ്ദേശസ്ഥാപനങ്ങള്‍ കയറിയിറങ്ങേണ്ട. സേവനങ്ങള്‍ പൊതുജനങ്ങള്‍ക്കു വിരല്‍ത്തുമ്പില്‍ എത്തിക്കാന്‍ ലക്ഷ്യമിടുന്ന കെ-സ്മാര്‍ട് പദ്ധതി ക്ക് എല്ലാ തദ്ദേശസ്ഥാപനങ്ങളിലും തുടക്കമായി. കഴിഞ്ഞ വര്‍ഷം ജനുവരി മുതല്‍ കോര്‍പറേഷനുകളിലും മുനിസിപ്പാലിറ്റികളിലും ലഭ്യമായിരുന്ന കെ-സ്മാര്‍ട്ടാണ് അത്യാധുനികമായ തരത്തില്‍ വിപുലീകരിച്ച് എല്ലാ പഞ്ചായത്തുകളിലും ബ്ലോക്ക്, ജില്ലാ പഞ്ചായത്തുകളിലും ലഭ്യമാക്കിയിരിക്കുന്നത്. ജനന-മരണ-വിവാഹ രജിസ്ട്രേഷന്‍ മുതല്‍ വസ്തു നികുതിയും കെട്ടിട നിര്‍മാണ പെര്‍മിറ്റും വരെ ഒട്ടേറെ ആവശ്യങ്ങള്‍ അതത് തദ്ദേശ സ്ഥാപനങ്ങളെ സമീപിക്കാതെ പൂര്‍ണമായി ഓണ്‍ലൈനായി നേടുന്നതിനായി ഏകീകൃത പ്ലാറ്റ്ഫോമാണ് ഒരുക്കിയിരിക്കുന്നത്. സിവില്‍ രജിസ്ട്രേഷന്‍ (ജനന-മരണ-വിവാഹ രജിസ്ട്രേഷന്‍), വസ്തു നികുതി, തൊഴില്‍ നികുതി, കെട്ടിടങ്ങള്‍, സ്ഥലങ്ങള്‍ എന്നിവയില്‍നിന്നുള്ള വാടക, ബിസിനസ് ഫെസിലിറ്റേഷന്‍ (വ്യാപാരങ്ങള്‍ക്കും വ്യവസായങ്ങള്‍ക്കും ഉള്ള ലൈസന്‍സുകള്‍), ബില്‍ഡിംഗ് പെര്‍മിഷന്‍ മൊഡ്യൂള്‍, പൊതുജന പരാതി പരിഹാരം തുടങ്ങിയ സേവനങ്ങളാണ് കെ-സ്മാര്‍ട്ട് വഴി ലഭ്യമാക്കുന്നത്. കെ-സ്മാര്‍ട്ട് ആപ്പും ഭൂമിയെക്കുറിച്ചുള്ള വിവരങ്ങള്‍ അറിയാന്‍ നോ യുവര്‍ ലാന്‍ഡ് എന്ന ആപ്പും സജ്ജീകരിച്ചിട്ടുണ്ട്. വാട്‌സ് ആപ്പ്, ഇ-മെയില്‍ എന്നിവ വഴി രസീതുകളും സാക്ഷ്യപത്രങ്ങളും ലഭ്യമാക്കും. സമര്‍പ്പിച്ച അപേക്ഷയുടെ നിലവിലെ സ്ഥിതി അറിയാനുള്ള സൗകര്യമാണ് ഇതിന്‍റെ ഏറ്റവും വലിയ പ്രത്യേകത. ഏതൊരാള്‍ക്കും സാക്ഷ്യപത്രങ്ങളുടെ ആധികാരികത പരിശോധിച്ച് ഉറപ്പാക്കാനുള്ള സൗകര്യവുമുണ്ടായിരിക്കും. കെ-സ്മാര്‍ട്ടില്‍ പണമിടപാടുകള്‍ എല്ലാം ഓണ്‍ലൈന്‍ സിസ്റ്റം ഉപയോഗിച്ചാണ് നടത്തുന്നത്. പൊതുജനങ്ങള്‍ക്ക് ഓഫീസില്‍ വരാതെ തന്നെ പണമിടപാടുകൾ ഓണ്‍ലൈനായി നടത്താം. ഓഫീസില്‍ പോയാല്‍ ഇ-പോസ് മെഷീന്‍ ഉപയോഗിച്ച് പണമായോ യുപിഐ കാര്‍ഡ് വഴിയോ പണം അടയ്ക്കാം. ജനന രജിസ്ട്രേഷനും മറ്റ് ജനന സംബന്ധമായ സേവനങ്ങളായ പേര് ഉള്‍പ്പെടുത്തല്‍, പേര് തിരുത്തല്‍, മറ്റ് തിരുത്തലുകള്‍ എന്നിവയ്ക്കും കെ-സ്മാര്‍ട്ട് മുഖേന ഓണ്‍ലൈനായി അപേക്ഷിക്കാം. കെ-സ്മാര്‍ട്ട് വഴി ലോകത്തെവിടെനിന്നും വിവാഹ രജിസ്ട്രേഷന് ഓഫീസില്‍ നേരിട്ട് എത്താതെ അപേക്ഷിക്കാനും പൂര്‍ത്തിയാക്കാനും കഴിയും. എല്ലാതരത്തിലുമുള്ള ട്രേഡ് ലൈസന്‍സുകള്‍ക്കും കെ-സ്മാര്‍ട്ടിലൂടെ അപേക്ഷിക്കാം. ഓരോ വര്‍ഷവും ലൈസന്‍സ് പുതുക്കാന്‍ തദ്ദേശ സ്ഥാപനങ്ങള്‍ സന്ദര്‍ശിക്കാതെ ഓണ്‍ലൈനായി തന്നെ പൂര്‍ത്തിയാക്കാന്‍ സാധിക്കും. പുതിയ ലൈസന്‍സ് അപേക്ഷ സമര്‍പ്പിച്ചാല്‍ സര്‍ക്കാര്‍ നിശ്ചയിച്ച കാലാവധിയില്‍ ഓട്ടോ റിന്യൂവല്‍ വഴി വസ്തുനികുതി-തൊഴില്‍ നികുതി-തദ്ദേശസ്ഥാപന വാടക-ഹരിത കര്‍മസേന ഫീസ് എന്നിവയുടെ കുടിശിക സഹിതം അടവാക്കി പുതുക്കാനുള്ള സൗകര്യം ഉണ്ടാകും. മൈ ബില്‍ഡിംഗ് എന്ന മെനുവിലൂടെ ജനങ്ങള്‍ക്ക് സ്വന്തം കെട്ടിടങ്ങളെ സംബന്ധിച്ച വിവരങ്ങള്‍ എളുപ്പത്തില്‍ ലഭിക്കും. കെട്ടിടങ്ങളുമായി ബന്ധപ്പെട്ട സര്‍ട്ടിഫിക്കറ്റുകളും സാക്ഷ്യപത്രങ്ങളും ഓണ്‍ലൈനായി എടുക്കുന്നതിനും നികുതികള്‍ ഓണ്‍ലൈനായി അടയ്ക്കുന്നതിനും സാധിക്കും. ബില്‍ഡിംഗ് സര്‍ട്ടിഫിക്കറ്റ് ഓണ്‍ലൈനായി ഡൗണ്‍ലോഡ് ചെയ്യാം. ഓണ്‍ലൈനില്‍ പരാതിപ്പെടുന്നതിനു പുറമേ ഓണ്‍ലൈനായി പൊതുജനങ്ങള്‍ക്കു പരാതികള്‍ നല്‍കാനുള്ള സംവിധാനവും കെ-സ്മാര്‍ട്ട് ഒരുക്കിയിട്ടുണ്ട്. പൊതു ഹര്‍ജികള്‍ ഒന്നിലധികം പേര്‍ക്ക് ഡിജിറ്റല്‍ ഒപ്പിട്ട് സമര്‍പ്പിക്കാം. സംയുക്ത പരാതികളും മാസ് പെറ്റീഷനുകളും നല്‍കന്‍ സാധിക്കും. പരാതികളുടെ തല്‍സ്ഥിതി അറിയാനും കഴിയും.

സയന്‍സ് സിറ്റി ; ഒന്നാം ഘട്ട ഉദ്ഘാടനം മേയ് 11 ന് മുഖ്യമന്ത്രി നിർവഹിക്കും

കോട്ടയം: കുറവിലങ്ങാട് കോഴായില്‍ നിര്‍മാണം പുരോഗമിക്കുന്ന കോട്ടയം സയന്‍സ് സിറ്റിയുടെ ഒന്നാം ഘട്ടത്തിന്‍റെ ഉദ്ഘാടനം മേയ് 11 ന് വൈകുന്നേരം നാലിന് മുഖ്യമന്ത്രി പിണറായി വിജയൻ നിർവഹിക്കുമെന്ന് ജോസ് കെ. മാണി എംപി അറിയിച്ചു. കഴിഞ്ഞദിവസം സയന്‍സ് സിറ്റിയില്‍ നടന്ന ഉന്നതതല ഉദ്യോഗസ്ഥര്‍ പങ്കെടുത്ത അവലോകന യോഗത്തിനുശേഷം മുഖ്യമന്ത്രി പിണറായി വിജയനുമായും മന്ത്രി ആർ. ബിന്ദുവുമായും ജോസ് കെ. മാണി ചര്‍ച്ച നടത്തിയിരുന്നു. പദ്ധതിയുടെ ആദ്യഘട്ടമായ സയന്‍സ് സെന്‍ററാണ് പൊതുജനങ്ങൾക്കായി തുറന്നുകൊടുക്കുന്നത്. വിദ്യാര്‍ഥികള്‍ക്ക് പഠനോപകാരപ്രദമായ സയന്‍സ് ഗാലറികള്‍, സയന്‍സ് പാര്‍ക്ക്, ആക്ടിവിറ്റി സെന്‍റര്‍ തുടങ്ങിയവ ഉള്‍ക്കൊള്ളുന്ന സയന്‍സ് സെന്‍റര്‍, ഫുഡ് കോര്‍ട്ട്, വാനനിരീക്ഷണകേന്ദ്രം, ഇലക്‌ട്രിക്കല്‍ സബ്‌ സ്റ്റേഷന്‍, കോംബൗണ്ട് വാള്‍, ഗേറ്റുകള്‍, റോഡിന്‍റെയും ഓടയുടെയും നിര്‍മാണം, വാട്ടര്‍ ടാങ്ക്, തുടങ്ങിയവയാണ് ആദ്യഘട്ടത്തില്‍ പൂര്‍ത്തിയായിരിക്കുന്നത്. സയന്‍സ് സിറ്റിയുടെ രണ്ടാം ഘട്ടത്തിലാണ് വളരയേറെ സാങ്കേതിക മികവോടെയുള്ള സ്‌പേസ് തിയറ്റര്‍, മോഷന്‍ സ്റ്റിമുലേറ്റര്‍, തുടങ്ങിയ സംവിധാനങ്ങള്‍ ഒരുങ്ങുന്നത്. എന്‍ട്രി പ്ലാസ, ആംഫി തിയറ്റര്‍, റിംഗ് റോഡ്, പാര്‍ക്കിംഗ് തുടങ്ങിയവയും അടുത്ത ഘട്ടത്തില്‍ ഉള്‍പ്പെടുത്തിയിട്ടുണ്ട്. ഈ പ്രവൃത്തികള്‍ക്ക് 25 കോടി രൂപ സംസ്ഥാന ബജറ്റില്‍ വകയിരുത്തി യിട്ടുണ്ട്.

തണ്ണീർമുക്കം ബണ്ടിന്‍റെ ഷട്ടറുകൾ ഇന്ന് തുറക്കും

കുമരകം: തണ്ണീർമുക്കം ബണ്ടിന്‍റെ ഷട്ടറുകൾ ഇന്ന് രാവിലെ 10ന് തുറക്കാൻ മന്ത്രി പി. പ്രസാദിന്‍റെ അധ്യക്ഷതയിൽ ആലപ്പുഴ കളക്ടറേറ്റിൽ ചേർന്ന ഉപദേശക സമിതി യോഗത്തിൽ തീരുമാനിച്ചു. ബണ്ടിന്‍റെ ഷട്ടറുകള്‍ തുറക്കുന്നതിന് ഇറിഗേഷൻ മെക്കാനിക്കൽ വിഭാഗം എക്‌സിക്യൂട്ടീവ് എൻജിനിയറെ ചുമതലപ്പെടുത്തി. നെൽകർഷകർക്കും മത്സ്യത്തൊഴിലാളികൾക്കും ബുദ്ധിമുട്ടില്ലാത്ത തരത്തിൽ ഷട്ടറുകൾ ക്രമീകരിക്കാനാണ് സർക്കാർ ശ്രമിക്കുന്നത്. ഇനിയും കൊയ്ത്ത് പൂർത്തിയാക്കാനുള്ള പാടശേഖരങ്ങളിലെ കൊയ്ത്ത് ഉടൻ പൂർത്തിയാക്കണമെന്നും അല്ലാത്ത പക്ഷം ഓരുജലം കയറാത്ത സംവിധാനം ഉറപ്പാക്കണമെന്നും ഷട്ടർ തുറക്കുന്ന സാഹചര്യത്തിൽ മത്സ്യത്തൊഴിലാളികൾ ഉൾപ്പെടെയുള്ള പൊതുജനങ്ങൾ ജാഗ്രത പാലിക്കണമെന്നും നിർദേശമുണ്ട്. യോഗത്തിൽ മന്ത്രിയും തോമസ് കെ. തോമസ് എംഎൽഎയും ഓൺലൈനായാണ് പങ്കെടുത്തത്.

ജില്ലയിൽ വന്യജീവി ആക്രമണം തടയാൻ ചെലവഴിച്ചത് 1.77 കോടി രൂപ

കോട്ടയം: മനുഷ്യ-വന്യജീവി സംഘർഷം ലഘൂകരിക്കാനുള്ള പ്രതിരോധ നടപടികളുടെ ഭാഗമായി ജില്ലയിൽ കഴിഞ്ഞ ഒൻപത് വർഷത്തിനിടെ സംസ്ഥാന സർക്കാർ ചെലവിട്ടത് 1.77 കോടി രൂപ. വന്യജീവികളുടെ കടന്നാക്രമണം തടയുന്നതിന് ജില്ലയുടെ മലയോര അതിർത്തിയിൽ 53.45 കിലോമീറ്റർ നീളത്തിൽ സൗരോർജവേലി അടക്കമുള്ളവയാണ് ഈ കാലയളവിൽ നിർമിച്ചത്. പൂഞ്ഞാർ നിയോജകമണ്ഡലത്തിലെ കോയിക്കക്കാവ് - പായസപ്പടിയിൽ 8.3 കിലോമീറ്റർ നീളത്തിൽ 74.4 ലക്ഷം രൂപ ചെലവിട്ടും മഞ്ഞളരുവി-പാക്കാനം 504 നഗറിൽ മൂന്ന് കിലോമീറ്റർ നീളത്തിൽ 29.8 ലക്ഷം രൂപ ചെലവിട്ടും സൗരോർജവേലി തീർത്തു. പ്ലാച്ചേരി സ്‌റ്റേഷൻ പരിധിയിലെ ഇഞ്ചക്കുഴി-കാരശേരി (അഞ്ച് കിലോമീറ്റർ), കാളകെട്ടി തേക്കുതോട്ടം (5.85 കിലോമീറ്റർ), പ്ലാച്ചേരി സ്‌റ്റേഷൻ പരിധിയിലെ കൊപ്പം-എലിവാലിക്കര (7.5 കിലോമീറ്റർ), പാണപിലാവ് (അഞ്ച് കിലോമീറ്റർ) അരുവിക്കൽ-കാളകെട്ടി (അഞ്ച് കിലോമീറ്റർ), കാരിശേരി 504 കോളനി( അഞ്ച് കിലോമീറ്റർ), മുറിഞ്ഞപുഴ സ്‌റ്റേഷൻ പരിധിയിലെ കണ്ടംകയം-കോരുത്തോട് (3.5 കിലോമീറ്റർ), മാങ്ങാപേട്ട 504 കോളനി (3.5 കിലോമീറ്റർ), മമ്പാടി എസ്‌റ്റേറ്റ് -പാക്കാനം(1.1 കിലോമീറ്റർ) എന്നീ പ്രദേശങ്ങളിലാണ് സൗരോർജവേലി ഈ കാലയളവിൽ നിർമിച്ചത്. വന്യജീവി ആക്രമണങ്ങളിൽ മരിച്ചവരുടെ ആശ്രിതർക്ക് 77 ലക്ഷം രൂപയും പരിക്കേറ്റവർക്ക് 1.6 കോടി രൂപയും നൽകി. വന്യജീവി ആക്രമണത്തിൽ കൃഷിനാശം സംഭവിച്ച കർഷകർക്ക് ഇതുവരെ 25.71 ലക്ഷം രൂപ കൊടുത്തു. കന്നുകാലികൾ കൊല്ലപ്പെട്ടവർക്ക് 6.39 ലക്ഷം രൂപയും വസ്തുനഷ്ടം സംഭവിച്ചവർക്ക് 2.06 ലക്ഷം രൂപയും നൽകി. പൂഞ്ഞാർ വഴിക്കടവിൽ ഇന്‍റഗ്രേറ്റഡ് ചെക്ക് പോസ്റ്റ് സംവിധാനം സ്ഥാപിക്കുന്നതിനായി 79.41 ലക്ഷം രൂപയും ചെലവിട്ടു.

പൗരാണികമായ കൊഴുക്കട്ട ശനി നാളെ

മഹത്തായ ക്രൈസ്തവ പാരമ്പര്യത്തിന്‍റെ ഓര്‍മകള്‍ പേറുന്ന കൊഴുക്കട്ട തിരുനാൾ നാളെ. വലിയനോമ്പിലെ നാല്പത്തൊന്നാം ദിവസം ക്രൈസ്തവ ഭവനങ്ങളില്‍ തയാറാക്കുന്ന പലഹാരമാണിത്. കുഴച്ച അരിപ്പൊടിക്കുള്ളില്‍ തേങ്ങയും ശര്‍ക്കരയും ചേര്‍ത്തുണ്ടാക്കുന്ന രുചിയേറിയ വിഭവം. കൊഴു എന്നാല്‍ മഴു എന്ന് അര്‍ഥം. കൊഴു ഭൂമിയെ പിളര്‍ന്നു ചിതറിക്കുന്നതു പോലെ പാതാള വാതില്‍ക്കല്‍ അവരുടെ അസ്ഥികള്‍ ചിതറിക്കപ്പെട്ടു എന്നാണ് 140-ാം സങ്കീര്‍ത്തന വാചകം. നോമ്പിനെ മുറിക്കാന്‍ ഉപയോഗിക്കുന്നത് എന്ന അര്‍ഥത്തിലാണ് ഇതിന് കൊഴുക്കട്ട എന്ന പേരുണ്ടായത്. കൊഴുക്കട്ട തയാറാക്കുന്നതിനെക്കുറിച്ച് പാരമ്പര്യ വിശ്വാസം പലതാണ്. ബഥാനിയായില്‍നിന്ന് ജറുസലേമിലേക്കുള്ള യാത്രയില്‍ മുന്‍പ് യേശു മരണത്തില്‍നിന്ന് ഉയിര്‍പ്പിച്ച ലാസറിന്‍റെ ഭവനത്തില്‍ യേശു എത്തിയെന്നും ലാസറിന്‍റെ സഹോദരിമാരായ മര്‍ത്തായും മറിയവും തിടുക്കത്തില്‍ മാവു കുഴച്ച് തയാറാക്കി ക്കൊടുത്ത വിരുന്നായിരുന്നു കൊഴുക്കട്ടയെന്ന് ഒരു പാരമ്പര്യം. യേശു മരിച്ചവരില്‍നിന്ന് ഉയിര്‍പ്പിച്ച ലാസറും കുടുംബവും പാര്‍ത്ത ബഥാനിയായിലേക്കു പെസഹായ്ക്ക് ആറു ദിവസം മുന്‍പ് യേശു വീണ്ടും വന്നതായും അവിടെ അവര്‍ യേശുവിന് ഒരു അത്താഴം ഒരുക്കിയതായും അവിടെനിന്നു യേശു പിറ്റേന്ന് കഴുതപ്പുറത്തേറി ജറുസലേമിലേക്ക് പോയതായും വിശുദ്ധ യോഹന്നാന്‍ സുവിശേഷത്തില്‍ സാക്ഷ്യപ്പെടുത്തിയിട്ടുണ്ട്. വലിയ വിരുന്നായ പെസഹായ്ക്കു മുന്‍പ് യേശു ഭക്ഷിച്ച അവസാനത്തെ വിരുന്നായിരുന്നു കൊഴുക്കട്ട എന്ന് കരുതാം. പാചകം ചെയ്യുന്നയാളുടെ കൈവിരല്‍പ്പാടുകള്‍ പതിയുന്ന പലഹാരമാണ് കൊഴുക്കട്ട. പീഡാനുഭവവേളയില്‍ യേശുവിനെ കല്ലെറിയുന്നതിനെ അനുസ്മരിപ്പിക്കുന്നതാണു കൊഴുക്കട്ടയെന്ന് മറ്റൊരു വിശ്വാസവുമുണ്ട്. യേശുവിനെ തൈലാഭിഷേകം നടത്താന്‍ ഭക്തസ്ത്രീകള്‍ കരുതിവച്ച സുഗന്ധദ്രവ്യങ്ങള്‍ അടക്കം ചെയ്ത പാത്രത്തെ സൂചിപ്പിക്കുന്നതാണു മധുരം അകത്തു ചേര്‍ത്ത കൊഴുക്കട്ടയെന്നു പറയുന്നവരുമുണ്ട്. കൊഴുക്കട്ട തയാറാക്കാം ചേരുവ അരിപ്പൊടി ഒരു കപ്പ് തേങ്ങ അരമുറി ഉപ്പ് ആവശ്യത്തിന് ശര്‍ക്കര നൂറു ഗ്രാം ഏലക്ക മൂന്ന് എണ്ണം ചെറിയ ജീരകം ഒരു നുള്ള് പാചകം ശര്‍ക്കര ചൂടാക്കി ഉരുക്കി അരിച്ചെടുത്ത പാനിയില്‍ നാളികേരം ചുരണ്ടിയതും ഏലക്കപ്പൊടിയും ചെറിയ ജീരകം പൊടിച്ചതും ഇട്ടു നന്നായി ഇളക്കുക. അരിപ്പൊടി വെള്ളം ചേർത്തു നന്നായി കുഴച്ചുവയ്ക്കുക. ചൂടുവെള്ളത്തില്‍ കുഴച്ചാല്‍ കൊഴുക്കട്ട തയാറാക്കുമ്പോള്‍ പൊട്ടിപ്പോകില്ല. കുഴച്ച മാവ് ഉരുളകളാക്കി കനംകുറച്ച് പരത്തി നേരത്തേ തയാറാക്കിയ മിശ്രിതം നിറച്ച് വീണ്ടും ഉരുളകളാക്കുക. ഉരുളകള്‍ ആവിയില്‍ വേവിച്ചെടുക്കുക.

അപകട ഭീഷണി ഉയർത്തി ദേശീയപാതയോരത്ത് വൻമരങ്ങൾ

മുണ്ടക്കയം: ദേശീയപാതയുടെ വശങ്ങളിൽ അപകട ഭീഷണി ഉയർത്തി നിരവധി മരങ്ങൾ. യാത്രക്കാർ പലപ്പോഴും അപകടത്തിൽനിന്ന് രക്ഷപ്പെടുന്നത് തലനാരിഴയ്ക്ക്. മുണ്ടക്കയത്തിനും മുറിഞ്ഞപുഴയ്ക്കും ഇടയിൽ റോഡിന്‍റെ വശങ്ങളിൽ ഏത് നിമിഷവും നിലം പതിക്കാവുന്ന രീതിയിൽ നിരവധി മരങ്ങളാണ് നിലകൊള്ളുന്നത്. ചൊവ്വാഴ്ച വൈകുന്നേരമുണ്ടായ ശക്തമായ കാറ്റിലും മഴയിലും മരുതുംമൂടിന് സമീപം റോഡിന്‍റെ വശത്തുനിന്ന വൻമരം കടപുഴകി വീണ് ദേശീയപാതയിൽ രണ്ട് മണിക്കൂറോളം ഗതാഗതം തടസപ്പെട്ടു. ഈ സമയം ദേശീയപാതയിലൂടെ യാത്ര ചെയ്തിരുന്ന വാഹനത്തിന് മുകളിലും മരത്തിന്‍റെ ശിഖരങ്ങൾ പതിച്ചു. യാത്രക്കാർ അദ്ഭുതകരമായാണ് രക്ഷപ്പെട്ടത്. വാഹനത്തിന് സാരമായ കേടുപാട് സംഭവിച്ചു. ഇതുകൂടാതെ മരുതുംമൂടിന് സമീപം മറ്റൊരു മരത്തിന്‍റെ ശിഖരം ഒടിഞ്ഞും ദേശീയപാതയിലേക്ക് വീണിരുന്നു. ഇതിനെത്തുടർന്ന് നൂറുകണക്കിന് വാഹനങ്ങൾ കടന്നുപോകുന്ന ദേശീയപാതയിൽ മണിക്കൂറുകളോളം വലിയ ഗതാഗതക്കുരുക്കാണ് അനുഭവപ്പെട്ടത്. സമാനമായ രീതിയിൽ അപകടഭീഷണി ഉയർത്തി നിരവധി മരങ്ങളാണ് ഈ ഭാഗത്ത് നിലകൊള്ളുന്നത്. ഒരുമാസം മുമ്പ് ചിറ്റടിക്കും ചോറ്റിക്കുമിടയിൽ ആഞ്ഞിലി മരത്തിന്‍റെ ശിഖരം ഒടിഞ്ഞു റോഡിൽ വീണും ഗതാഗത തടസമുണ്ടായിരുന്നു. ദേശീയപാതയിൽ ചുഴുപ്പ്, മുറിഞ്ഞുപുഴ ഭാഗങ്ങളിലെല്ലാം ചുവട്ടിലെ മണ്ണ് ഇളകി മാറി നിരവധി മരങ്ങളാണ് ഏത് നിമിഷവും നിലംപൊത്താവുന്ന അവസ്ഥയിൽ റോഡിന്‍റെ വശത്ത് നിലകൊള്ളുന്നത്. മഴക്കാലങ്ങളിൽ ഇവിടെ മരം റോഡിലേക്ക് കടപുഴകി വീണ് ഗതാഗതം തടസപ്പെടുന്നതും പതിവ് സംഭവമാണ്. അപകടങ്ങൾ തുടർക്കഥയാകുമ്പോഴും അപകട ഭീഷണിയായി നിൽക്കുന്ന മരം മുറിച്ചുമാറ്റുവാൻ അധികാരികൾ തയാറാകുന്നില്ലെന്ന പരാതി ശക്തമാണ്.

കെജിഒഎ ജില്ലാ സമ്മേളനത്തിന് ഇന്നു തുടക്കം

കോട്ടയം: കേരള ഗസറ്റഡ് ഓഫീസേഴ്സ് അസോസിയേഷന്‍ 44-ാമതു ജില്ലാ സമ്മേളനത്തിന് ഇന്നു തുടക്കം. കിഴതടിയൂര്‍ സര്‍വീസ് സഹകരണ ബാങ്ക് ഓഡിറ്റോറിയത്തില്‍ ഉച്ചകഴിഞ്ഞ് 12.30ന് ജില്ലാ പ്രസിഡന്‍റ് പതാക ഉയര്‍ത്തുന്നതോടെ സമ്മേളനം ആരംഭിക്കും. ജില്ലാ കൗണ്‍സില്‍ കണക്കും തെരഞ്ഞെടുപ്പും നടക്കും. വൈകുന്നേരം 4.30ന് കിഴതടിയൂര്‍ സര്‍വീസ് സഹകരണ ബാങ്കിനു സമീപത്തുനിന്ന് ആരംഭിക്കുന്ന പ്രകടനം പാല നഗരസഭാ കാര്യാലയത്തിനു സമീപം അവസാനിക്കും. തുടര്‍ന്നു നടക്കുന്ന പൊതുസമ്മേളനം രാജു ഏബ്രഹാം ഉദ്ഘാടനം ചെയ്യും. ജില്ലാ പ്രസിഡന്‍റ് കെ.റ്റി. സാജുമോന്‍ അധ്യക്ഷത വഹിക്കും. നഗരസഭാ ചെയര്‍മാന്‍ തോമസ് പീറ്റര്‍, സിഐടിയു ജില്ലാ വൈസ് പ്രസിഡന്‍റ് ലാലിച്ചന്‍ ജോര്‍ജ്, പി.എം. ജോസഫ്, കെജിഒഎ സംസ്ഥാന ട്രഷറര്‍ എ. ബിന്ദു, ജില്ലാ സെക്രട്ടറി ഷാജിമോന്‍ ജോര്‍ജ്, ജില്ലാ ട്രഷറര്‍ ടി.എസ്. അജിമോന്‍ എന്നിവര്‍ പ്രസംഗിക്കും. നാളെ രാവിലെ 10ന് പ്രതിനിധി സമ്മേളനം മന്ത്രി വി.എന്‍. വാസവന്‍ ഉദ്ഘാടനം ചെയ്യും. കെജിഒഎ ജില്ലാ പ്രസിഡന്‍റ് അധ്യക്ഷത വഹിക്കും. എഫ്എസ്ഇടിഒ ജില്ലാ സെക്രട്ടറി കെ.ആര്‍. അനില്‍കുമാര്‍, കോണ്‍ഫെഡറേഷന്‍ ഓഫ് സെന്‍ട്രല്‍ ഗവണ്‍മെന്‍റ് എംപ്ലോയീസ് ആന്‍ഡ് വര്‍ക്കേഴ്സ് ജില്ലാ സെക്രട്ടറി രാജേഷ് ഡി. മാന്നാത്ത്, കെജിഒഎ സംസ്ഥാന സെക്രട്ടേറിയറ്റംഗം പി. സെയ്തലവി, കെജിഒഎ സംസ്ഥാന ട്രഷറര്‍ എ. ബിന്ദു എന്നിവര്‍ പ്രസംഗിക്കും.

ഷോപ്പിംഗ് കോംപ്ലക്‌സിനായി 12 ലക്ഷം രൂപ ചെലവ്, പദ്ധതി എങ്ങുമെത്തിയില്ല

കിടങ്ങൂര്‍: പഞ്ചായത്ത് വക സ്ഥലത്ത് ഷോപ്പിംഗ് കോംപ്ലക്‌സ് നിര്‍മിക്കുന്നതിന് പഞ്ചായത്ത് 12 ലക്ഷം രൂപ ചെലവാക്കിയെങ്കിലും പദ്ധതി ആരംഭിക്കാന്‍ സാധിച്ചിട്ടില്ല. ഹൈവേ ജംഗ്ഷനില്‍ പഞ്ചായത്തിന് ആവശ്യമായ സ്ഥലവും സൗകര്യങ്ങളുമുണ്ട്. പഞ്ചായത്തിന്‍റെ കൈവശമുള്ള 1.10 ഏക്കര്‍ സ്ഥലത്ത് ഷോപ്പിംഗ് കോംപ്ലക്‌സും മിനി സിവില്‍ സ്‌റ്റേഷനും നിര്‍മിക്കാനായിരുന്നു പദ്ധതി. നാല് നിലകളിലായി 78 ഷട്ടര്‍ മുറികളാണ് പണിയാന്‍ ഉദ്ദേശിച്ചിരുന്നത്. താഴത്തെ നില പാര്‍ക്കിംഗിനും. 2005-2010 കാലഘട്ടത്തില്‍ കെ.എം. രാധാകൃഷണന്‍ പ്രസിഡന്‍റായിരുന്ന സമയത്താണ് ഈ സ്ഥലം ഏറ്റെടുക്കുന്നത്. 2015-2020 ഭരണസമിതി ഇതിനായി യാതൊന്നും ചെയ്തില്ല. 2020-2025 കാലത്ത് ഭരണസമിതി ഷോപ്പിംഗ് കോംപ്ലക്‌സ് നിര്‍മാണത്തിന് ശ്രമിച്ചിരുന്നു. 2016ല്‍ ഷോപ്പിംഗ് കോംപ്ലക്‌സ് നിര്‍മാണത്തിനായി പ്ലാനും പദ്ധതികളും തയാറാക്കി. കിടങ്ങൂര്‍ ബസ് ബേയ്ക്ക് പിന്നില്‍ കുഴിയെടുത്തതിന് മാത്രമായി 11 ലക്ഷത്തിലധികം രൂപ ചെലവായി. ഹൗസിംഗ് ബോര്‍ഡിനായിരുന്നു നിര്‍മാണച്ചുമതല. സാങ്കേതിക പ്രശ്‌നങ്ങള്‍മൂലം പണി ആരംഭിച്ചില്ല. നിര്‍മാണത്തിന്‍റെ ഭാഗമായി നാളിതുവരെ ഒരു കല്ലുപോലും ഇടാതെ ഇത്രയും തുക ചെലവഴിച്ചത് സംബന്ധിച്ച് അന്വേഷണം വേണമെന്നാണ് കിടങ്ങൂര്‍ പൗരാവകാശ സമിതിയുടെ ആവശ്യം. മണ്ണെടുത്ത കുഴി ഇന്ന് പുല്ലും വെള്ളവും നിറഞ്ഞ് കൊതുക വളര്‍ത്തല്‍ കേന്ദ്രമായി മാറി. നിര്‍മാണം തുടരാന്‍ സാധിച്ചില്ലെങ്കില്‍ എത്രയും വേഗം കുഴി നികത്തി പാര്‍ക്കിംഗ് സൗകര്യം ഏര്‍പ്പെടുത്തണമെന്ന ആവശ്യം ഉയരുന്നു. മാറി മാറി വരുന്ന ഭരണസമിതികള്‍ ഷോപ്പിംഗ് കോംപ്ലക്സ് നിര്‍മാണം ആരംഭിക്കുമെന്ന് പറയുന്നുണ്ടെങ്കിലും നടപടികള്‍ ആരംഭിക്കുന്നില്ല.

കങ്ങഴയിൽ ബസ് കാത്തിരിപ്പു കേന്ദ്രം ഉദ്ഘാടനം ചെയ്തു

കങ്ങഴ: വാഴൂര്‍ ബ്ലോക്ക് പഞ്ചായത്ത് 2024-25 വാര്‍ഷിക പദ്ധതിയില്‍ ഉള്‍പ്പെടുത്തി കറുകച്ചാല്‍-മണിമല റോഡില്‍ ഇലയ്ക്കാട് നിര്‍മിച്ച ബസ് കാത്തിരിപ്പ് കേന്ദ്രത്തിന്‍റെ ഉദ്ഘാടനം വാഴൂര്‍ ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി നിര്‍വഹിച്ചു. കങ്ങഴ പഞ്ചായത്ത് പ്രസിഡന്‍റ് കെ.എസ്. റംലാ ബീഗം അധ്യക്ഷത വഹിച്ചു. ബ്ലോക്ക് പഞ്ചായത്തംഗം ശ്രീകല ഹരി, പഞ്ചായത്തംഗങ്ങളായ വത്സല കുമാരി കുഞ്ഞമ്മ, ജോയിസ് എം. ജോണ്‍സണ്‍, ജയലാല്‍ നടുവത്ര, സി.കെ. ജോസഫ്, ജെസ്റ്റിന്‍ റെജി, മോഹനകുമാരന്‍ നായര്‍, സലീം അരീക്കല്‍, രാജു മാത്യു, കെ.ആര്‍ വിനോദ് കുമാര്‍ തുടങ്ങിയവര്‍ പ്രസംഗിച്ചു.

സെന്‍റ് പീറ്റേഴ്‌സ് സ്‌പോര്‍ട്സ് അക്കാദമി ലഹരിവിരുദ്ധ കൂട്ടയോട്ടം സംഘടിപ്പിച്ചു

കുറുമ്പനാടം: സെന്‍റ് പീറ്റേഴ്‌സ് സ്‌പോര്‍ട്‌സ് അക്കാദമിയുടെ ആഭിമുഖ്യത്തില്‍ ലഹരിക്കെതിരേ കൂട്ടയോട്ടം സംഘടിപ്പിച്ചു. തെങ്ങണ ജംഗ്ഷനില്‍നിന്ന് ആരംഭിച്ച കൂട്ടയോട്ടം സ്‌കൂള്‍ അങ്കണത്തില്‍ സമാപിച്ചു. കുറുമ്പനാടം സെന്‍റ് ആന്‍റണീസ് ഫൊറോന വികാരി റവ. ഡോ. ജോബി കറുകപ്പറമ്പില്‍ ഫ്‌ളാഗ് ഓഫ് ചെയ്തു. സെന്‍റ് പീറ്റേഴ്‌സ് എച്ച്എസ്എസ് ഹെഡ്മാസ്റ്റര്‍ എം.സി. മാത്യു അധ്യക്ഷത വഹിച്ചു. സ്‌പോര്‍ട്‌സ് അക്കാദമി കോ-ഓര്‍ഡിനേറ്റര്‍ സെബിന്‍ മാത്യു, സ്റ്റാഫ് സെക്രട്ടറി ബിബി പി. പോള്‍, ബിനു കുര്യാക്കോസ്, റോയി എസ്. ചെറിയാന്‍, ടെസി വര്‍ഗീസ്, ദീപക് തോമസ്, റ്റിജോ സെബാസ്റ്റ്യന്‍, സുനില്‍ മാത്യു, അപ്പൂസ് ജോയി, സിബിച്ചന്‍ ചീരംവേലില്‍ എന്നിവര്‍ പ്രസംഗിച്ചു.

ചെത്തിപ്പുഴ ആശുപത്രിയില്‍ അഡ്വാന്‍സ്ഡ് ഡയാലിസിസ് യൂണിറ്റ്

ചങ്ങനാശേരി: ചെത്തിപ്പുഴ സെന്‍റ് തോമസ് ആശുപത്രിയില്‍ നവീകരിച്ച് ആധുനിക സൗകര്യങ്ങളോടെ സജ്ജമാക്കിയ കര്‍ദിനാള്‍ മാര്‍ ആന്‍റണി പടിയറ മെമ്മോറിയല്‍ അഡ്വാന്‍സ്ഡ് ഡയാലിസിസ് യൂണിറ്റിന്‍റെ ആശീര്‍വാദവും ഉദ്ഘാടനവും ആര്‍ച്ച്ബിഷപ് മാര്‍ തോമസ് തറയില്‍ നിര്‍വഹിച്ചു. രോഗികളുടെ സുരക്ഷയെ മുന്‍നിര്‍ത്തി നവീകരിച്ച ഈ യൂണിറ്റില്‍ അത്യാഹിതാവസ്ഥയിലുള്ള കിഡ്നി രോഗികള്‍ക്ക് സിആര്‍ആര്‍ടി ഉള്‍പ്പെടെ നിരവധി നവീന ഡയാലിസിസ് ചികിത്സാ സൗകര്യങ്ങള്‍ ഒരുക്കിയിട്ടുണ്ട്. ഇതിലൂടെ ഹൈ-റിസ്‌ക് രോഗികള്‍ക്ക് കൂടുതല്‍ സുരക്ഷിതവും കാര്യക്ഷമവുമായ ഡയാലിസിസ് ചികിത്സ ഉറപ്പാക്കുന്നു. അനുഭവസമ്പന്നരായ ഡോക്ടര്‍മാരുടെ നേതൃത്വത്തിലുള്ള പ്രത്യേക പരിശീലനം നേടിയ നഴ്‌സുമാരും ഡയാലിസിസ് ടെക്നീഷന്മാരും അടങ്ങുന്ന വിദഗ്ധ സംഘമാണ് ചെത്തിപ്പുഴ ആശുപത്രിയിലെ ഡയാലിസിസ് യൂണിറ്റിന് നേതൃത്വം നല്‍കുന്നത്. സാമ്പത്തികമായി പിന്നാക്കം നില്‍ക്കുന്ന (ബിപിഎല്‍ കാര്‍ഡുള്ള) രോഗികള്‍ക്ക് സൗജന്യമായി ഡയാലിസിസ് ചെയ്തുകൊടുക്കുന്ന പദ്ധതിയും നടത്തിവരുന്നു. ഉയര്‍ന്ന നിലവാരമുള്ള ഡയാലിസിസ് ചികിത്സ കുറഞ്ഞ ചെലവില്‍ ലഭ്യമാക്കുക എന്നതാണ് ചെത്തിപ്പുഴ സെന്‍റ് തോമസ് ആശുപത്രിയുടെ ലക്ഷ്യമെന്ന് മാനേജര്‍ റവ. ഡോ. ജോണ്‍ തെക്കേക്കരയും ഹോസ്പിറ്റല്‍ എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്തും അറിയിച്ചു. ഏറ്റവും മികച്ച സേവനം ഉറപ്പാക്കുന്നതിനായി ഡോ. ഹരീഷ് കെ.ജി., ഡോ. മഹേഷ് ദേവദാസ്, ഡോ. ലെനികുമാര്‍ ജോസഫ് എന്നിവരുടെ സേവനം ഹോസ്പിറ്റലിലെ നെഫ്രോളജി ആന്‍ഡ് റീനല്‍ ട്രാന്‍സ്പ്ലാന്‍റേഷന്‍ ഡിപ്പാര്‍ട്ട്മെന്‍റില്‍ ലഭ്യമാണ്. കൂടുതല്‍ വിവരങ്ങള്‍ക്ക് 0481 272 2100 എന്ന നമ്പറില്‍ ബന്ധപ്പെടുക.

കോടതി വ്യവഹാര ഫീസ് വര്‍ധനയില്‍ പ്രതിഷേധം

ചങ്ങനാശേരി: കോടതി വ്യവഹാര ഫീസ് അന്യായമായി വര്‍ധിപ്പിച്ച കേരള സര്‍ക്കാര്‍ നടപടിക്കെതിരേ ഇന്ത്യന്‍ ലോയേഴ്‌സ് കോണ്‍ഗ്രസിന്‍റെ നേതൃത്വത്തില്‍ ചങ്ങനാശേരി മുന്‍സിഫ് കോടതി വളപ്പില്‍ പ്രതിഷേധം സംഘടിപ്പിച്ചു. യൂണിറ്റ് പ്രസിഡന്‍റ് അഡ്വ. കെ.സി. രാജന്‍ അധ്യക്ഷത വഹിച്ചു. അഡ്വ. ആന്‍റണി വര്‍ഗീസ് ഉദ്ഘാടനം ചെയ്തു. പി.എം. അന്‍വര്‍, സി.യു. അജയന്‍, ആര്യ കൃഷ്ണന്‍, അമൃത പി. രാജു, എയ്ഞ്ചല്‍ ഏബ്രഹാം, സാലിമ്മ തോമസ്, എം.എസ്. അനില്‍ കുമാര്‍, വിഷ്ണുപ്രിയ എന്നിവര്‍ പ്രസംഗിച്ചു.

കുട്ടികള്‍ക്ക് ചില്‍ വൈബ്‌സ് സമ്മര്‍ ക്യാമ്പ്

ചങ്ങനാശേരി: വിദ്യാര്‍ഥികളുടെ അവധിക്കാലം ആഘോഷമാക്കി മാറ്റാന്‍ 10 ദിന സമ്മര്‍ ക്യാമ്പ്. "കളികളിലൂടെ പഠനം’ എന്ന ആശയം മുന്‍നിര്‍ത്തി ജെസിഐ ചങ്ങനാശേരി നേതൃത്വം നല്‍കുന്ന ചില്‍ വൈബ്‌സ് സമ്മര്‍ ക്യാമ്പ് നാളെ മുതല്‍ 30 വരെ ജെസിഐ ഭവനില്‍ നടത്തും. ശനി, ഞായര്‍, വിഷു, ദുഃഖവെള്ളി ഒഴികെയുള്ള ദിവസങ്ങളില്‍ രാവിലെ 10 മുതല്‍ വൈകുന്നേരം നാലുവരെയാണ് സമയം. സൈബര്‍ സെക്യൂരിറ്റി, ഫോണ്‍ അഡിക‌്ഷന്‍, ബുള്ളിയിംഗ്, ആങ്കര്‍ മാനേജ്‌മെന്‍റ്, പബ്ലിക് സ്പീക്കിംഗ്, കരിയര്‍ ഗൈഡന്‍സ്, എന്നീ സെഷനുകള്‍ കൂടാതെ ക്രിയേറ്റീവ് വര്‍ക്‌ഷോപ്പ്, ഒബിടി ട്രെയിനിംഗ്, കൗണ്‍സലിംഗ് സെഷനുകള്‍ എന്നിവയും കുട്ടികള്‍ക്കായി ക്രമീകരിച്ചിട്ടുണ്ട്. കൂടുതല്‍ വിവരങ്ങള്‍ക്ക് ഫോൺ: 8547233186,

സ്വകാര്യബസ് സംരക്ഷണ ജാഥയ്ക്കു സ്വീകരണം നല്‍കി

ചങ്ങനാശേരി: സ്വകാര്യ ബസ് വ്യവസായം സംരക്ഷിക്കണമെന്ന് ആവശ്യപ്പെട്ടുകൊണ്ട് ഓള്‍ കേരള ബസ് ഓപ്പറേറ്റേഴ്‌സ് ഓര്‍ഗനൈസേഷന്‍റെ നേതൃത്വത്തില്‍ സംസ്ഥാന ജനറല്‍ സെക്രട്ടറി ടി. ഗോപിനാഥന്‍ നയിക്കുന്ന ബസ് സംരക്ഷണ ജാഥയ്ക്കു കോട്ടയം ബസ്‌സ്റ്റാന്‍ഡില്‍ സ്വീകരണം നല്‍കി. സ്വകാര്യ ബസുകളില്‍ കയറുന്ന വിദ്യാര്‍ഥികളുടെ യാത്രാനിരക്ക് കഴിഞ്ഞ 13 വര്‍ഷക്കാലമായി നിലനില്‍ക്കുന്ന ഒരു രൂപ എന്നത് മാറ്റി ജസ്റ്റീസ് രാമചന്ദ്രന്‍ കമ്മീഷന്‍ ശിപാർശ അനുസരിച്ച് അഞ്ച് രൂപയാക്കി വര്‍ധിപ്പിക്കുക, നിലവില്‍ ഓടിക്കൊണ്ടിരിക്കുന്ന മുഴുവന്‍ സ്വകാര്യ ബസുകളുടെയും ലിമിറ്റഡ് സ്റ്റോപ്പ് ബസുകളുടെയും പെര്‍മിറ്റുകള്‍ അതേപടി പുതുക്കി നല്‍കുക, മോട്ടോര്‍ വാഹന വകുപ്പിന്‍റെയും പോലീസിന്‍റെയും അനാവശ്യ പിഴ ഈടാക്കല്‍ നടപടി നിര്‍ത്തിവയ്ക്കുക, ഗതാഗത നയം പ്രഖ്യാപിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് ജാഥ നടത്തുന്നത്. ജില്ലാ പ്രസിഡന്‍റ് ജോസുകുട്ടി മുളകുപ്പാടം അധ്യക്ഷത വഹിച്ചു. ഓര്‍ഗനൈസേഷന്‍ സംസ്ഥാന വൈസ് പ്രസിഡന്‍റ് എന്‍. വിദ്യാധരന്‍ യോഗം ഉദ്ഘാടനം ചെയ്തു. ജാഥാംഗങ്ങളായ പ്രദീപ്, തോമസ് ആന്‍റണി, സോണി കുര്യന്‍, ജോബിന്‍, സുരേഷ് തുടങ്ങിയവര്‍ പ്രസംഗിച്ചു. ചങ്ങനാശേരി, പാലാ തുടങ്ങിയ സ്ഥലങ്ങളിലും ജാഥയ്ക്ക് സ്വീകരണം നല്‍കി.

പ്ലാസ്റ്റിക് മാലിന്യങ്ങള്‍ സംസ്‌കരിക്കാന്‍ മാടപ്പള്ളി ബ്ലോക്ക് പഞ്ചായത്ത്

ചങ്ങനാശേരി: പ്ലാസ്റ്റിക് വിമുക്തമാകാന്‍ മാടപ്പള്ളി ബ്ലോക്ക് പഞ്ചായത്ത്. ബ്ലോക്ക് പഞ്ചായത്ത് കോമ്പൗണ്ടില്‍ പണികഴിപ്പിച്ച ആര്‍ആര്‍എഫിന്‍റെ ഉദ്ഘാടനം ജോബ് മൈക്കിള്‍ എംഎല്‍എ നിര്‍വഹിച്ചു. ബ്ലോക്ക് പഞ്ചായത്തിനു കീഴിലുള്ള അഞ്ച് പഞ്ചായത്തുകളില്‍നിന്നായി ശേഖരിച്ച പ്ലാസ്റ്റിക് മാലിന്യ മുക്തമാക്കുന്നതിനുള്ള ബെയിലിംഗും ആരംഭിച്ചു. ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു അധ്യക്ഷനായിരുന്നു. ബ്ലോക്ക് പഞ്ചായത്തിന്‍റെ പരിധിയിലുള്ള വാകത്താനം, വാഴപ്പള്ളി, മാടപ്പള്ളി, തൃക്കൊടിത്താനം, പായിപ്പാട് എന്നീ അഞ്ച് പഞ്ചായത്തുകളില്‍നിന്ന് ഹരിതകർമസേന ശേഖരിക്കുന്ന പ്ലാസ്റ്റിക് മാലിന്യങ്ങള്‍ ബ്ലോക്ക് പഞ്ചായത്ത് വളപ്പില്‍ പ്രവര്‍ത്തിക്കുന്ന ആര്‍ആര്‍എഫ് ബെയിലിംഗ് മെഷിനില്‍ ബെയ്‌ൽ ചെയ്ത് ക്ലീന്‍ കേരള കമ്പനിക്ക് കൈമാറുന്ന പദ്ധതിയാണ് നടപ്പിലാക്കിയത്. ബ്ലോക്ക് നടപ്പിലാക്കിയ ആര്‍ആര്‍എഫ് പദ്ധതിയുടെ ചുമതലയും ക്ലീന്‍ കേരള കമ്പനിക്കാണ്. ഒന്നര മണിക്കൂറില്‍ 16 ചാക്ക് മാലിന്യം സംസ്‌കരിക്കാം ഒന്നരമണിക്കൂറിനുള്ളില്‍ 16 ചാക്കില്‍ കൊള്ളാനുള്ള പ്ലാസ്റ്റിക് മാലിന്യമാണ് ബെയില്‍ ചെയ്ത് കെട്ടാക്കി ഒരു ചാക്കിനുള്ളില്‍ ശേഖരിച്ച് ക്ലീന്‍ കേരള കമ്പനിക്ക് കൈമാറുന്നത്. ഇത് ഒരു ദിവസം ഒരു ടണ്‍ വരെ വരുന്ന പദ്ധതിയാണ് ബ്ലോക്ക് പഞ്ചായത്തില്‍ ഹരിതകര്‍മസേന വഴി നടത്തുന്നത്. ജില്ലയിലെ ബ്ലോക്ക് പഞ്ചായത്തുകളുടെ കീഴില്‍ ആദ്യമായി മാടപ്പള്ളി ബ്ലോക്ക് പഞ്ചായത്തിലാണ് ഹരിതകര്‍മസേന ശേഖരിക്കുന്ന ഉപയോഗ ശൂന്യമായ പ്ലാസ്റ്റിക്കുകള്‍ ആധുനിക ബെയിലിംഗ് മെഷീനില്‍ കെട്ടുകളാക്കി ക്ലീന്‍ കേരള കമ്പനിക്ക് കൈമാറുന്ന പദ്ധതിയും ആധുനിക മെഷീനും സ്ഥാപിച്ചത്. വിവിധ പഞ്ചായത്തു പ്രസിഡന്‍റുമാരായ മണിയമ്മ രാജപ്പന്‍, കെ.ഡി. മോഹനന്‍, മോളി ജോസഫ്, ഗീത രാധാകൃഷ്ണന്‍, മിനി വിജയകുമാര്‍, ബ്ലോക്ക് വൈസ് പ്രസിഡന്‍റ് സുനിത സുരേഷ്, ബ്ലോക്ക് പഞ്ചായത്ത് സ്ഥിരം സമിതി അധ്യക്ഷരായ ലൈസമ്മ ആന്‍റണി, സബിത ചെറിയാന്‍, ടി. രഞ്ജിത്ത്, ബ്ലോക്ക് മെംബര്‍മാരായ അലക്‌സാണ്ടര്‍ പ്രാക്കുഴി, വിനു ജോബ്, മാത്തുക്കുട്ടി പ്ലാത്താനം, വര്‍ഗീസ് ആന്‍റണി, ബിന്ദു ജോസഫ്, സബിത ചെറിയാന്‍, ടീനാമോള്‍ റോബി, ബീനാ കുന്നത്ത്, സൈന തോമസ്, ബ്ലോക്ക് പഞ്ചായത്ത് സെക്രട്ടറി കെ. വിനോദ്, അസിസ്റ്റന്‍റ് സെക്രട്ടറി എറിക് ജെ. സക്കറിയ എന്നിവര്‍ പ്രസംഗിച്ചു.

കര്‍ഷകരെ അവഗണിച്ച് മുന്നോട്ടു പോകാമെന്നു കരുതേണ്ട: കത്തോലിക്കാ കോണ്‍ഗ്രസ്

ചങ്ങനാശേരി: കര്‍ഷകരുടെ ന്യായമായ അവകാശങ്ങള്‍ അംഗീകരിച്ചില്ലെങ്കില്‍ സമാന ചിന്താഗതിയുള്ള സംഘടനകളെ ഏകോപിപ്പിച്ച് സെക്രട്ടേറിയറ്റിനു മുമ്പിൽ അടക്കം സമരം ചെയ്യുമെന്ന് സര്‍ക്കാരിനു മുന്നറിയിപ്പു നല്‍കി അതിരൂപത കത്തോലിക്ക കോണ്‍ഗ്രസ്. ചുട്ടുപൊള്ളുന്ന വെയിലും കോരിച്ചൊരിയുന്ന മഴയും വകവയ്ക്കാതെ പാടത്ത് അന്നം വിളയിച്ച് നാടിനെ തീറ്റിപ്പോറ്റുന്ന കര്‍ഷക ജനതയെ അവഗണിച്ചാല്‍ തെരുവിലിറങ്ങുന്നതിനു മടിയില്ലെന്നും ചങ്ങനാശേരി കെഎസ്ആര്‍ടിസി ജംഗ്ഷനില്‍ സംഘടിപ്പിച്ച സായാഹ്നധര്‍ണയെ അഭിസംബോധന ചെയ്ത നേതാക്കള്‍ പറഞ്ഞു. കുട്ടനാട്ടിലടക്കം നെല്‍കര്‍ഷകര്‍ ചൂഷണം ചെയ്യപ്പെടുന്നതിനു പരിഹാരം ഉണ്ടാകണമെന്നു സമ്മേളനം ആവശ്യപ്പെട്ടു. സമരങ്ങളെ സര്‍ക്കാര്‍ ഗൗനിക്കാതെ വന്നാല്‍ അധികാരികളുടെ കണ്ണുതുറപ്പിക്കുന്നതുവരെ ശക്തമായ സമരപോരാട്ടങ്ങള്‍ ഉണ്ടാകുമെന്ന് അതിരൂപത വികാരിജനറാള്‍ മോണ്‍. ആന്‍റണി എത്തയ്ക്കാട്ട് പറഞ്ഞു. ജാതി-മത ഭേദമെന്യേ ജനങ്ങളുടെ നിലനില്‍പ്പിനുവേണ്ടിയാണ് സഭ നിലകൊള്ളുന്നതെന്നും അദ്ദേഹം കൂട്ടിച്ചേര്‍ത്തു. കര്‍ഷകന്‍റെ നിലവിളി വനരോദനമാകില്ലെന്നും സര്‍ക്കാരിന്‍റെ കണ്ണുതുറപ്പിക്കുമെന്നും അതിരൂപത ഡയറക്ടര്‍ ഫാ. സെബാസ്റ്റ്യന്‍ ചാമക്കാല മുന്നറിയിപ്പു നല്‍കി. കര്‍ഷകനെ മറന്ന് മുന്നോട്ടു പോകാമെന്ന് ജനപ്രതിനിധികള്‍ക്കും രാഷ്‌ട്രീയക്കാര്‍ക്കും തോന്നലുണ്ടെങ്കില്‍ ഇനി അതു നടക്കില്ലെന്ന് അതിരൂപത പ്രസിഡന്‍റ് ബിജു സെബാസ്റ്റ്യനും ചൂണ്ടിക്കാട്ടി. അതിരൂപതയുടെ വിവിധ യൂണിറ്റുകളില്‍നിന്നുള്ള നൂറുകണക്കിനു പ്രതിനിധികള്‍ സായാഹ്നധര്‍ണയില്‍ അണിനിരന്നു.

അറുനൂറ്റിമംഗലം മലകയറ്റ പള്ളിയില്‍ നാല്‍പതാംവെള്ളി ആചരണവും കുരിശുമലകയറ്റവും

അറുനൂറ്റിമംഗലം: സെന്‍റ് തോമസ് മലകയറ്റ പള്ളിയില്‍ നാല്‍പതാം വെള്ളിയാചരണവും കുരിശുമലകയറ്റവും ഇന്നും നാളെയുമായി നടക്കും. ഇന്നു രാവിലെ 6.45ന് കൊടിയേറ്റ്, തുടര്‍ന്ന് വിശുദ്ധ കുരിശിന്‍റെ തിരുശേഷിപ്പ് പ്രദക്ഷിണമായി മലമുകളിലെ കപ്പേളയിലെത്തിച്ചു പ്രതിഷ്ഠിക്കും. 7.20ന് വിശുദ്ധ കുര്‍ബാന. വൈകൂന്നേരം 6.30ന് കുരിശിന്‍റെ വഴി, തുടര്‍ന്ന് വിശുദ്ധ കുര്‍ബാന. രാത്രി 9.30ന് വിശുദ്ധ കുര്‍ബാനയോടെ ഇന്നത്തെ തിരുക്കര്‍മങ്ങള്‍ സമാപിക്കും. നാല്‍പതാം വെള്ളി ദിനമായ നാളെ രാവിലെ അഞ്ചിന് മലമുകളില്‍ വിശുദ്ധ കുര്‍ബാനയോടെ തിരുക്കര്‍മങ്ങള്‍ ആരംഭിക്കും. വൈകുന്നേരം അഞ്ചിന് മുള്‍മുടി പ്രദക്ഷിണം, 5.45ന് മലമുകളില്‍ മേജര്‍ ആര്‍ച്ച്ബിഷപ് മാര്‍ ജോര്‍ജ് ആലഞ്ചേരി പൊന്തിഫിക്കല്‍ കുര്‍ബാനയർപ്പിച്ചു സന്ദേശം നല്‍കും. രാവിലെ മുതല്‍ വിവിധ സമയങ്ങളില്‍ മലകയറ്റവും വിശുദ്ധ കുര്‍ബാനയും ഉണ്ടായിരിക്കും. രാത്രി 11.30 ന് തിരുശേഷിപ്പ് പ്രദക്ഷിണമായി പള്ളിയിലെത്തിച്ചു പുനഃപ്രതിഷ്ഠിക്കുന്നതോടെ തിരുക്കര്‍മങ്ങള്‍ സമാപിക്കും.

മാഞ്ഞൂര്‍ പഞ്ചായത്ത് അഞ്ചാം വാര്‍ഡില്‍ കുടിവെള്ളക്ഷാമം രൂക്ഷം

കടുത്തുരുത്തി: മാഞ്ഞൂര്‍ പഞ്ചായത്തിലെ അഞ്ചാം വാര്‍ഡില്‍ കുടിവെള്ളക്ഷാമം രൂക്ഷം. ഇവിടത്തെ ഇരുവേലി-പാലാംതൊട്ടി റോഡിലെ മിക്ക വീടുകളിലും കുടിവെള്ളം കിട്ടാനില്ലാത്ത അവസ്ഥയാണ്. പലയിടത്തും പൈപ്പുകള്‍ സ്ഥാപിച്ചിട്ട് വര്‍ഷങ്ങള്‍ പിന്നിടുകയാണ്. ഈ പ്രദേശത്തെ വീടുകളില്‍ കുടിവെള്ള വിതരണത്തിനായി വാട്ടര്‍ അഥോറിറ്റിയുടെ പൈപ്പുകളും മീറ്ററും സ്ഥാപിച്ചിട്ടുണ്ട്. വാട്ടര്‍ അഥോറിറ്റിയുടെ നേതൃത്വത്തില്‍ ഇവിടത്തെ വീടുകളില്‍ പൈപ്പുകള്‍ സ്ഥാപിച്ചിട്ട് ഏഴു വര്‍ഷം കഴിഞ്ഞു. പുരുഷന്മാര്‍ ജോലി കഴിഞ്ഞെത്തിയശേഷമാണ് വെള്ളം ചുമന്നു വീട്ടിലെത്തിക്കുന്നതെന്ന് പ്രദേശവാസികള്‍ പറയുന്നു. കാലങ്ങളായി ഇതാണ് സ്ഥിതിയെന്ന് അഞ്ചാം വാര്‍ഡിലെ തെക്കേപുരയിടത്തില്‍ കവിതാ പ്രകാശന്‍ പറയുന്നു. വാഹനങ്ങളില്‍ കൊണ്ടുവരുന്ന വെള്ളം വില കൊടുത്താണ് വാങ്ങുന്നത്. 3,000 ലിറ്റര്‍ വെള്ളത്തിന് 850 രൂപ നല്‍കണം. മാസത്തില്‍ കുറഞ്ഞത് അഞ്ചു തവണയെങ്കിലും വണ്ടിയിൽ കൊണ്ടുവരുന്ന വെള്ളം വാങ്ങേണ്ടി വരുമെന്നും പ്രദേശവാസികള്‍ പറയുന്നു. നാളിതുവരെ വാട്ടര്‍ അഥോറിറ്റിയുടെ പൈപ്പുകളില്‍ വെള്ളം വന്നിട്ടില്ല. ഇപ്പോള്‍ അധികൃതര്‍ പറയുന്നത് പട്ടിത്താനം രത്നഗിരിയിലുള്ള കുടിവെള്ള ടാങ്കിന്‍റെ നിര്‍മാണം പൂര്‍ത്തിയായല്‍ വെള്ളം ലഭിക്കുമെന്നാണ്. വാര്‍ഡിലെ ഓമല്ലൂര്‍, വാണിയങ്കാവ്, കുത്തംപറമ്പ് തുടങ്ങിയ പ്രദേശങ്ങളിലെല്ലാം കുടിവെള്ള ക്ഷാമം രൂക്ഷമാണ്. കുടിക്കാനായി കിണറുകളില്‍ വെള്ളം ലഭ്യമായ സ്ഥലങ്ങളില്‍ പോയി ശേഖരിക്കുകയാണ്. പണം കൊടുത്തു വാങ്ങുന്ന വെള്ളം ഉപയോഗിച്ചാണ് പലരും വേനല്‍ക്കാലത്ത് കന്നുകാലികളെ പോലും കുളിപ്പിക്കുന്നതെന്നും നാട്ടുകാര്‍ പറയുന്നു.

വായ്പക്കാര്‍ക്കെതിരേ കോടതി വിധി

പുന്നത്തുറ: വായ്പ കുടിശികയായി തിരിച്ചടയ്ക്കാതെ ഹൈക്കോടതിയെ സമീപിച്ച വായ്പക്കാര്‍ക്കെതിരേ കോടതി വിധി. പുന്നത്തുറ സര്‍വീസ് സഹകാരണ ബാങ്കില്‍നിന്നു വായ്പയെടുത്ത് വര്‍ഷങ്ങളായി കുടിശിക വരുത്തിയ വായ്പക്കാരന്‍ ഹൈക്കോടതിയെ സമീപിച്ചു. വായ്പയുടെ മുതലും പലിശയും കൂടി 18 തുല്യ തവണകളായി അടയ്ക്കാന്‍ വായ്പക്കാര്‍ക്കെതിരേ ഹൈക്കോടതി വിധിച്ചു. തവണകള്‍ മുടക്കം വരുത്താന്‍ പാടില്ലായെന്നു വിധിയില്‍ പരാമര്‍ശിച്ചു ബാങ്കിന് അനുകൂലമായി വിധിച്ചു.

നമ്പ്യാകുളം-വേദഗിരി ഹൈടെക് റോഡ് ടാറിംഗിന് തുടക്കം

ഏറ്റുമാനൂര്‍: നമ്പ്യാകുളം - വേദഗിരി ഹൈടെക് റോഡ് ടാറിംഗ് ജോലികള്‍ക്ക് നമ്പ്യാകുളം റെയില്‍വേ ഗേറ്റ് ഭാഗത്തുനിന്നു തുടക്കമായി. ബിഎം ടാറിംഗ് ജോലികള്‍ 11നു വേദഗിരിയില്‍ പൂര്‍ത്തീകരിക്കും. രണ്ടാംഘട്ടത്തിലുള്ള ബിറ്റുമിന്‍ കോണ്‍ക്രീറ്റ് ടാറിംഗ് ജോലികള്‍ മേയ് മാസത്തില്‍ നടപ്പാക്കാനാണു തീരുമാനം. കടുത്തുരുത്തി നിയോജകമണ്ഡലത്തില്‍ സംസ്ഥാന സര്‍ക്കാര്‍ അനുവദിച്ച മൂന്ന് കോടി 30 ലക്ഷം രൂപയുടെ റോഡ് നവീകരണ പദ്ധതിയാണ് നമ്പ്യാകുളം-വേദഗിരി റോഡില്‍ നടപ്പാക്കുന്നത്. മന്ത്രി മുഹമ്മദ് റിയാസും മന്ത്രി കെ.എന്‍. ബാലഗോപാലുമാണ് കടുത്തുരുത്തി മണ്ഡലത്തില്‍ ഉള്‍പ്പെട്ട നമ്പ്യാകുളം-വേദഗിരി റോഡ് കൂടി സംസ്ഥാന സര്‍ക്കാരിന്‍റെ റിന്യൂവല്‍ പ്രോഗ്രാമില്‍ (ആര്‍പി വര്‍ക്ക്) ഉള്‍പ്പെടുത്തി ഭരണാനുമതി നല്‍കാന്‍ സാഹചര്യമുണ്ടാക്കിയത്. റോഡ്സ് വിഭാഗം കടുത്തുരുത്തി സബ്ഡിവിഷന്‍റെ കീഴിലാണ് റോഡിന്‍റെ നവീകരണ പ്രവര്‍ത്തനങ്ങള്‍ നടപ്പാക്കുന്നത്. മോന്‍സ് ജോസഫ് എംഎല്‍എ റോഡ് സന്ദര്‍ശിച്ച് ബന്ധപ്പെട്ട ഉദ്യോഗസ്ഥര്‍ക്ക് നിര്‍ദേശങ്ങള്‍ നല്‍കി. ബ്ലോക്ക് അംഗങ്ങളായ ലൂക്കോസ് മാക്കില്‍, ആന്‍സി ജോസ്, സുനു ജോര്‍ജ്, സി.എം. ജോര്‍ജ്, പഞ്ചായത്ത് അംഗം ബിനോ സക്കറിയ എന്നിവരും പൊതുമരാമത്ത് വകുപ്പിലെ വിവിധ ഉദ്യോഗസ്ഥരും സന്നിഹിതരായിരുന്നു.

എംസി റോഡിലെ കുഴി അടച്ചു : അപകടക്കെണി താത്കാലികമായി ഒഴിവായി

ഏറ്റുമാനൂർ: നഗരഹൃദയത്തിൽ എംസി റോഡിൽ പോസ്റ്റോഫീസിനു സമീപം നാളുകളായി നിലനിന്നിരുന്ന കുഴി പൊതുമരാമത്ത് വകുപ്പ് അധികൃതർ അടച്ചു. റോഡിലെ അപകടക്കെണിയിൽപ്പെട്ട് യാത്രക്കാർ ബുദ്ധിമുട്ടുന്ന കാര്യം ദീപിക കഴിഞ്ഞ ദിവസം വാർത്തയാക്കിയിരുന്നു. റോഡ് പരിപാലനത്തിന് 2022 ൽ സംസ്ഥാന സർക്കാർ ആവിഷ്കരിച്ച ഒപിബിആർസി റോഡ് പരിപാലനപദ്ധതിയിൽ ഉൾപ്പെടുന്ന റോഡിലാണ് ദീർഘകാലമായി കുഴി നിലനിന്നിരുന്നത്. എംസി റോഡിന്‍റെ കോടിമത - അങ്കമാലി റീച്ച് ഉൾപ്പെടെ 107.75 കിലോമീറ്റർ റോഡിന്‍റെ പരിപാലനം 73.83 കോടി രൂപയ്ക്കാണ് കരാർ കൊടുത്തിരിക്കുന്നത്. ഏഴു വർഷമാണ് കരാർ കാലാവധി. പദ്ധതിയുടെ മേൽനോട്ടം പൊതുമരാമത്ത് വകുപ്പ് നിരത്ത് പരിപാലന വിഭാഗത്തെയാണ് ഏല്പിച്ചിരിക്കുന്നത്. ദീപിക ഇക്കാര്യം വാർത്തയിൽ സൂചിപ്പിച്ചിരുന്നു. റോഡിനു കുറുകെ നിർമിച്ച കലുങ്കിനോടു ചേർന്ന ഭാഗം താഴ്ന്നുപോകുന്നതാണ് ഇവിടെ കുഴി രൂപപ്പെടാൻ കാരണമായത്. കുഴി രൂപപ്പെടുകയും കൂടുതൽ ഭാഗത്ത് റോഡ് തകരുകയും ചെയ്തതോടെ കലുങ്കിനോടു ചേർന്ന് താഴ്ന്ന ഭാഗം ഉറപ്പിക്കാതെ ഇന്‍റർലോക്ക് കട്ടകൾ പാകി. ഈ കട്ടകൾ ഉൾപ്പെടെ താഴ്ന്നാണ് കുഴി രൂപപ്പെട്ടിരുന്നത്. ഈ പ്രശ്നത്തിന് ഇത്തവണയും പരിഹാരമായിട്ടില്ല. കട്ടകൾ താഴ്ന്ന ഭാഗത്ത് ടാർ മിശ്രിതം നിറച്ച് കുഴി താത്കാലികമായി അടയ്ക്കുക മാത്രമാണ് ചെയ്തിരിക്കുന്നത്. ഇതിനു മുമ്പ് ടാർ ഉപയോഗിച്ച് കുഴി അടച്ച ഭാഗങ്ങളിൽ ടാർ ഉരുകി രൂപപ്പെട്ട മുഴകൾ ഇപ്പോഴും നിലനിൽക്കുകയാണ്. ഇവയിൽ വാഹനങ്ങൾ കയറി നിയന്ത്രണം വിടുന്നുണ്ട്. ഇരുചക്ര വാഹനങ്ങൾക്കാണ് കൂടുതൽ ബുദ്ധിമുട്ട് ഉണ്ടാകുന്നത്.

കുരുന്ന് സാഹിത്യപ്രതിഭയെ ജലഗതാഗത വകുപ്പ് ആദരിച്ചു

കുമരകം: കുരുന്ന് സാഹിത്യകാരൻ ദേവതീർഥത്തിനെ ഒഴുകുന്ന പുസ്തകശാല ആദരിച്ചു. ഏബ്രഹാം ദുഃഖിതന്‍റെ മരണം സ്വപ്നം സത്യം എന്ന നോവൽ ആണ് ഏഴാം ക്ലാസുകരാനായ ഈ കൊച്ചുമിടുക്കൻ എഴുതി വായനശാലയ്ക്ക് സമർപ്പിച്ചത്. മരണത്തിനും ജീവിതത്തിനുമിടയിലെ സ്നേഹത്തിന്‍റെ കഥയാണ് നോവലിൽ വരച്ചുകാട്ടുന്നത്. ജലഗതാഗത വകുപ്പ് മുഹമ്മ സ്റ്റേഷനിലെ ബോട്ട് ഡ്രൈവറായ ആലപ്പുഴ കാളാത്ത് മഞ്ജിമയിൽ സുനിൽ കുമാറിന്‍റെയും മണ്ണഞ്ചേരി ഗവൺമെന്‍റ് ഹൈസ്കൂൾ അധ്യാപിക സീനയുടെയും മകനാണ് ഈ കൊച്ചു നോവലിസ്റ്റ്. ജലഗതാഗത വകുപ്പ് മുഹമ്മ സ്റ്റേഷനിലെ എസ് 51-ാം നമ്പർ ബോട്ടിൽ സംഘടിപ്പിച്ച ആദരിക്കൽ ചടങ്ങ് അസിസ്റ്റന് മറൈൻ സർവേയർ ദേവരാജ് പി. കർത്ത ഉദ്ഘടനം ചെയ്തു. മുഹമ്മ സ്റ്റേഷൻ മാസ്റ്റർ ഷാനവാസ് ഖാൻ അധ്യക്ഷത വഹിച്ചു. എസ്. സാബു, പി.ആർ. സന്തോഷ്, ബോട്ട് മാസ്റ്റർ കെ. നസീർ, സ്രാങ്ക് ടി. സന്തോഷ്, ഡ്രൈവർ പി.ആർ. സുനിൽ കുമാർ, ലാസ്കർമാരായ കെ.എ. റിയാസ്, കെ.ആർ. ജിനേഷ് എന്നിവർ പങ്കെടുത്തു.

അരുവിക്കുഴി ലൂർദ് മാതാ പള്ളിയിൽ വിശുദ്ധവാര ആചരണം

പള്ളിക്കത്തോട്: അരുവിക്കുഴി ലൂർദ് മാതാ പള്ളിയിലെ വിശുദ്ധ വാരാചരണത്തിന് നാല്പതാം വെള്ളിയാഴ്ചയായ നാളെ തുടക്കമാകും. വൈകുന്നേരം 4.30ന് നോന്പുകാല സായാഹ്ന ധ്യാനം കുരിശിന്‍റെ വഴിയോടുകൂടി ആരംഭിക്കും. തുടർന്ന് ധ്യാന പ്രസംഗം: ഫാ. റിജിൻ കീച്ചേരിൽ സിഎംഐ. വിശുദ്ധ കുർബാന. 6.30ന് മലയാറ്റൂർ തീർഥാടനം. 12ന് ഉച്ചകഴിഞ്ഞ് 2.30ന് വയോജന സംഗമം; കുന്പസാരം, വിശുദ്ധകുർബാന, ക്ലാസ്. 13ന് രാവിലെ 6.30ന് ഓശാനത്തിരുക്കർമങ്ങൾ. കുരുത്തോല വെഞ്ചരിപ്പ്, പ്രദക്ഷിണം, ആഘോഷമായ വിശുദ്ധകുർബാന: വികാരി ഫാ. ജേക്കബ് ചീരംവേലിൽ കാർമികത്വം വഹിക്കും, ഫാ. ജിൻസൺ കീടംകുറ്റിയിൽ എംസിബിഎസ് സന്ദേശം നൽകും. 10ന് വിശുദ്ധകുർബാന: ഫാ. ലൈജു കണിച്ചേരിൽ. 15ന് രോഗികൾക്കും പ്രായമായവർക്കും ഭവനങ്ങളിൽ വിശുദ്ധകുന്പസാരവും വിശുദ്ധ കുർബാനയും. 16ന് മൂന്നുമുതൽ ആറുവരെ വിശുദ്ധകുന്പസാരം. 17ന് പെസഹാ വ്യാഴാഴ്ച ഉച്ചകഴിഞ്ഞ് 3.30ന് ആഘോഷമായ വിശുദ്ധകുർബാന, കാൽകഴുകൽ ശുശ്രൂഷ, തിരുമണിക്കൂർ ആരാധന. ഫാ. ലൈജു കണിച്ചേരിൽ സന്ദേശം നൽകും. പീഡാനുഭവ വെള്ളിയാഴ്ചയായ 18ന് രാവിലെ ആറുമുതൽ ആരാധന. 11 മുതൽ 12 വരെ പൊതുആരാധന 12.30ന് നേർച്ചക്കഞ്ഞി. 1.30ന് ആഘോഷമായ കുരിശിന്‍റെ വഴി. മൂന്നിന് പീഡാനുഭവ തിരുക്കർമങ്ങൾ. സന്ദേശം: ഫാ. ജിൻസൺ കീടംകുറ്റിയിൽ, നഗരികാണിക്കൽ, തിരുസ്വരൂപ വണക്കം. 19ന് വലിയ ശനിയാഴ്ച രാവിലെ 6.15ന് സപ്ര, വിശുദ്ധകുർബാന. ഉയർപ്പു തിരുനാൾ ദിനമായ 20ന് പുലർച്ചെ 2.45 ഉയിർപ്പ് തിരുക്കർമങ്ങൾ. ആഘോഷമായ വിശുദ്ധകുർബാനയ്ക്ക് ഫാ. ജേക്കബ് ചീരംവേലിൽ കാർമികത്വം വഹിക്കും. ഫാ. ജിൻസൺ കീടംകുറ്റിയിൽ സന്ദേശം നൽകും. രാവിലെ 6.30ന് വിശുദ്ധകുർബാന: ഫാ. ലൈജു കണിച്ചേരിൽ.

കര്‍ഷകരെ അവഗണിച്ചു മുന്നോട്ടു പോകാമെന്നു കരുതേണ്ട: കത്തോലിക്ക കോണ്‍ഗ്രസ്

ചങ്ങനാശേരി: കര്‍ഷകരുടെ ന്യായമായ അവകാശങ്ങള്‍ അംഗീകരിച്ചില്ലെങ്കില്‍ സമാന ചിന്താഗതിയുള്ള സംഘടനകളെ ഏകോപിപ്പിച്ച് സെക്രട്ടേറിയറ്റിനു മുമ്പിലടക്കം സമരം ചെയ്യുമെന്ന് സര്‍ക്കാരിനു മുന്നറിയിപ്പു നല്‍കി അതിരൂപത കത്തോലിക്കാ കോണ്‍ഗ്രസ്. ചുട്ടുപൊള്ളുന്ന വെയിലും കോരിച്ചൊരിയുന്ന മഴയും വകവയ്ക്കാതെ പാടത്ത് അന്നം വിളയിച്ച് നാടിനെ തീറ്റിപ്പോറ്റുന്ന കര്‍ഷക ജനതയെ അവഗണിച്ചാല്‍ തെരുവിലിറങ്ങുന്നതിനു മടിയില്ലെന്നും ചങ്ങനാശേരി കെഎസ്ആര്‍ടിസി ജംഗ്ഷനില്‍ സംഘടിപ്പിച്ച സായാഹ്ന ധര്‍ണയെ അഭിസംബോധന ചെയ്ത നേതാക്കള്‍ പറഞ്ഞു. കുട്ടനാട്ടിലടക്കം നെല്‍കര്‍ഷകര്‍ ചൂഷണം ചെയ്യപ്പെടുന്നതിനു പരിഹാരം ഉണ്ടാകണമെന്നു സമ്മേളനം ആവശ്യപ്പെട്ടു. സമരങ്ങളെ സര്‍ക്കാര്‍ ഗൗനിക്കാതെ വന്നാല്‍ അധികാരികളുടെ കണ്ണുതുറക്കുന്നതുവരെ ശക്തമായ സമരപോരാട്ടങ്ങള്‍ ഉണ്ടാകുമെന്ന് അതിരൂപത വികാരിജനറാള്‍ മോണ്‍. ആന്‍റണി എത്തയ്ക്കാട്ട് പറഞ്ഞു. ജാതി-മത ഭേദമെന്യേ ജനങ്ങളുടെ നിലനില്‍പ്പിനുവേണ്ടിയാണ് സഭ നിലകൊള്ളുന്നതെന്നും അദ്ദേഹം കൂട്ടിച്ചേര്‍ത്തു. കര്‍ഷകന്‍റെ നിലവിളി വനരോദനമാകില്ലെന്നും സര്‍ക്കാരിന്‍റെ കണ്ണുതുറപ്പിക്കുമെന്നും അതിരൂപത ഡയറക്ടര്‍ ഫാ. സെബാസ്റ്റ്യന്‍ ചാമക്കാല മുന്നറിയിപ്പു നല്‍കി. കര്‍ഷകനെ മറന്ന് മുന്നോട്ടുപോകാമെന്ന് ജനപ്രതിനിധികള്‍ക്കും രാഷ്‌ട്രീയക്കാര്‍ക്കും തോന്നലുണ്ടെങ്കില്‍ ഇനി അത് നടക്കില്ലെന്ന് അതിരൂപത പ്രസിഡന്‍റ് ബിജു സെബാസ്റ്റ്യനും ചൂണ്ടിക്കാട്ടി. അതിരൂപതയുടെ വിവിധ യൂണിറ്റുകളില്‍നിന്നുള്ള നൂറുകണക്കിനു പ്രതിനിധികള്‍ സായാഹ്ന ധര്‍ണയില്‍ അണിനിരന്നു.

കോട്ടയ്ക്കുപുറം വായനശാലയില്‍ ലഹരിവിരുദ്ധ ബോധവത്കരണ ക്ലാസ്

കോട്ടയ്ക്കുപുറം: ഗ്രാമോദ്ധാരണ വായനയില്‍ ലഹരിവിരുദ്ധ ബോധവത്്കരണ ക്ലാസ് ഇന്നു രാവിലെ 9.30നു നടക്കും. പ്രസിഡന്‍റ് കെ.എം.മാത്യു അധ്യക്ഷത വഹിക്കുന്ന ചടങ്ങ് അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം ഉദ്ഘാടനം ചെയ്യും. പഞ്ചായത്ത് മെമ്പര്‍ ടി.ഡി. മാത്യു, ഡോ. ശ്രീദേവി എന്നിവര്‍ പ്രസംഗിക്കും. ഏറ്റുമാനൂര്‍ പോലീസ് സ്‌റ്റേഷന്‍ എസ്എച്ച്ഒ എ.എസ്. ആന്‍സല്‍, പാമ്പാടി പോലീസ് സ്‌റ്റേഷന്‍ എസ്എച്ച്ഒ റിച്ചാര്‍ഡ് വര്‍ഗീസ്, മിനി മാത്യു തുടങ്ങിയവര്‍ ക്ലാസെടുക്കും. സെക്രട്ടറി ജോര്‍ജ് ജോസഫ് സ്വാഗതവും ജോയിന്‍റ് സെക്രട്ടറി ഫ്രാന്‍സിസ് സെബാസ്റ്റ്യന്‍ നന്ദിയും പറയും.

പി. ബാലചന്ദ്രന്‍ അനുസ്മരണം ഇന്ന്

കോട്ടയം: എംജി സര്‍വകലാശാലയിലെ സ്‌കൂള്‍ ഓഫ് ലെറ്റേഴ്‌സ് സംഘടിപ്പിക്കുന്ന പി. ബാലചന്ദ്രന്‍ അനുസ്മരണ പരിപാടി ഇന്നു നടക്കും. സ്‌കൂള്‍ ഓഫ് ലെറ്റേഴ്‌സില്‍ രാവിലെ 10.30ന് വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ ഉദ്ഘാടനം നിര്‍വഹിക്കും. നാടകപ്രവര്‍ത്തകനും ചിത്രകാരനുമായ ഡോ. സാംകുട്ടി പട്ടങ്കരി പി. ബാലചന്ദ്രന്‍ സ്മാരക പ്രഭാഷണം നടത്തും. എഴുത്തുകാരനും വിവര്‍ത്തകനുമായ ഡോ. കെ. രാധാകൃഷ്ണ വാര്യര്‍ പി. ബാലചന്ദ്രനെ അനുസ്മരിക്കും. സുരേഷ് കുമാര്‍ കുഴിമറ്റത്തിന്‍റെ ചിത്രപ്രദര്‍ശനത്തിന്‍റെ ഉദ്ഘാടനവും എബിന്‍ ദേവസ്യയുടെ കേടായ അന്തര്‍വാഹിനികളുടെ യാഡ് എന്ന കവിതാ സമാഹാരത്തിന്‍റെ മൂന്നാം പതിപ്പിന്‍റെ പ്രകാശനവും നടക്കും. കവിയും ചിത്രകാരനുമായ എം.ആര്‍. രേണുകുമാര്‍ പ്രകാശനം നിര്‍വഹിക്കും. സിന്‍ഡിക്കറ്റ് അംഗം ഡോ. പി.എസ്. രാധാകൃഷ്ണന്‍ ആദ്യകോപ്പി ഏറ്റുവാങ്ങും.

മാലിന്യമുക്തം നവകേരളം കാമ്പയിന്‍ ജില്ലാതല പുരസ്‌കാരം ചൈതന്യ പാസ്റ്ററല്‍ സെന്‍ററിന്

കോട്ടയം: സംസ്ഥാന സര്‍ക്കാര്‍ വിഭാവനം ചെയ്തിരിക്കുന്ന മാലിന്യമുക്തം നവകേരളം കാമ്പയിന്‍റെ ഭാഗമായി മാലിന്യനിര്‍മാര്‍ജന പ്രവര്‍ത്തനങ്ങള്‍ ഫലപ്രദമായി നടപ്പിലാക്കുന്ന ജില്ലയിലെ ഏറ്റവും മികച്ച സ്വകാര്യ സ്ഥാപനമായി കോട്ടയം അതിരൂപതയുടെ അജപാലന കേന്ദ്രമായ ചൈതന്യ പാസ്റ്ററല്‍ സെന്‍റര്‍ തെരഞ്ഞെടുക്കപ്പെട്ടു. കാമ്പയിന്‍റെ ഭാഗമായി ജില്ലയെ മാലിന്യ മുക്തമായി പ്രഖാപിച്ച ചടങ്ങിലാണ് ചൈതന്യക്ക് ആദരവ് ലഭിച്ചത്. തിരുനക്കര മൈതാനിയില്‍ സംഘടിപ്പിച്ച ചടങ്ങില്‍ മന്ത്രി വി.എന്‍. വാസവനില്‍നിന്ന് ചൈതന്യ പാസ്റ്ററല്‍ സെന്‍റര്‍ ഡയറക്ടറും കോട്ടയം സോഷ്യല്‍ സര്‍വീസ് സൊസൈറ്റി എക്‌സിക്യൂട്ടീവ് സെക്രട്ടറിയുമായ ഫാ. സുനില്‍ പെരുമാനൂര്‍ ആദരവ് ഏറ്റുവാങ്ങി. ചീഫ് വിപ്പ് ഡോ. എന്‍. ജയരാജ്, ഫ്രാന്‍സിസ് ജോര്‍ജ് എംപി, മോന്‍സ് ജോസഫ് എംഎല്‍എ, ജോബ് മൈക്കിള്‍ എംഎല്‍എ, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, ജില്ലാ കളക്ടര്‍ ജോണ്‍ വി. സാമുവല്‍ തുടങ്ങിയവര്‍ പ്രസംഗിച്ചു.

അപകടാവസ്ഥയിലുള്ള മരം മുറിച്ചുമാറ്റണം

ഏറ്റുമാനൂർ: ഓൾഡ് എംസി റോഡരികിൽ ജനത്തിരക്കേറിയ ഭാഗത്ത് ഉണങ്ങി നിലംപൊത്താറായ നിലയിൽ ആഞ്ഞിലിമരം. അടിയന്തരമായി മരം വെട്ടിമാറ്റിയില്ലെങ്കിൽ അപകടമുണ്ടാകാൻ സാധ്യതയുണ്ട്. തെള്ളകം മാതാ ആശുപത്രിക്കു സമീപമായാണ് ഓൾഡ് എംസി റോഡിൽ മരം അപകടാവസ്ഥയിൽ നിൽക്കുന്നത്. മാതാ, കാരിത്താസ് ആശുപത്രികളിലേക്കുള്ള വാഹനങ്ങളും രോഗികളടക്കം നൂറുകണക്കിനാളുകൾ ദിവസേന സഞ്ചരിക്കുന്ന റോഡാണിത്. കാറ്റും മഴയും ഉണ്ടാകുന്ന സാഹചര്യത്തിൽ മരം അടിയന്തരമായി നീക്കം ചെയ്യാൻ അധികൃതർ നടപടി സ്വീകരിക്കണം.

ലഹരിവിരുദ്ധ അവബോധ ക്ലാസും കരിയർ ഗൈഡൻസ് സെമിനാറും

പെരുവന്താനം: സെന്‍റ് ആന്‍റണീസ് കോളജിന്‍റെ ആഭിമുഖ്യത്തിൽ മണിമല ഹോളി മാഗി ഫൊറോന പള്ളിയിലെ സൺഡേസ്കൂൾ വിദ്യാർഥികൾക്കായി ഏകദിന ലഹരിവിരുദ്ധ അവബോധ ക്ലാസും കരിയർ ഗൈഡൻസ് സെമിനാറും സംഘടിപ്പിച്ചു. ഫൊറോന വികാരി ഫാ. മാത്യു താന്നിയത്ത് സമ്മേളനം ഉദ്ഘാടനം ചെയ്തു. ഫാ. ബിനു ചിറയിൽ അധ്യക്ഷത വഹിച്ചു. ജീവിതമാണ് ലഹരി എന്ന വിഷയത്തിൽ കോളജ് പ്രിൻസിപ്പൽ ഡോ. ആന്‍റണി ജോസഫ്‌ കല്ലമ്പള്ളിയും വിവിധ അഡിക്‌ഷനുകളെക്കുറിച്ച് പ്രഫ. അക്ഷയ് മോഹന്‍ദാസും ലഹരി ഉപയോഗങ്ങളിലെ ദൂഷ്യവശങ്ങളെക്കുറിച്ച് ആവണി സജീവ്‌, ഫാ. ജോസഫ്‌ വാഴപ്പനാടി, ജിനു തോമസ്, ജോസ് ആന്‍റണി, ഹെഡ്മാസ്റ്റര്‍ ജോസ് വര്‍ഗീസ്‌ എന്നിവർ ക്ലാസുകള്‍ നയിച്ചു. തുടർന്ന് ലഹരിവിരുദ്ധ പ്രതിജ്ഞയും ഷോർട്ട് ഫിലിമും ഉണ്ടായിരുന്നു. ലഹരിക്കെതിരേ എൻഎസ്എസ് പൊൻകുന്നം യൂണിയൻ പൊൻകുന്നം: ലഹരിവിരുദ്ധ പ്രചാരണപരിപാടികളുമായി എൻഎസ്എസ് പൊൻകുന്നം യൂണിയൻ. 12ന് യൂണിയന്‍റെ പരിധിയിലെ 53 കരയോഗങ്ങളിലും ലഹരിവിരുദ്ധ പരിപാടികളും ബോധവത്കരണ ക്ലാസുകളും നടത്തുമെന്ന് യൂണിയൻ പ്രസിഡന്‍റ് എം.എസ്. മോഹൻ അറിയിച്ചു. എക്‌സൈസ്, പോലീസ് ഉദ്യോഗസ്ഥരും സാമൂഹിക, സാംസ്‌കാരിക നായകരും പങ്കെടുക്കും.

"വെളിച്ചം 2025' ലഹരിവിമുക്ത സെമിനാർ

കാഞ്ഞിരപ്പള്ളി: രൂപത ഫാമിലി അപ്പൊസ്തലേറ്റിന്‍റെ ആഭിമുഖ്യത്തില്‍ പിതൃവേദിയുടെയും മാതൃവേദിയുടെയും സഹകരണത്തോടെ "വെളിച്ചം 2025' ലഹരിവിരുദ്ധ സെമിനാർ കുട്ടിക്കാനം മരിയന്‍ കോളജില്‍ നടത്തി. ലഹരിവിമുക്ത സമൂഹത്തെ രൂപീകരിക്കുവാനും ലഹരിയുടെ പിടിയില്‍ വീണുപോയവരെ എഴുന്നേല്‍പ്പിക്കാനുമായാണ് സെമിനാർ സംഘടിപ്പിച്ചത്. ഫാമിലി അപ്പൊസ്തലേറ്റ് രൂപത ഡയറക്ടര്‍ ഫാ. മാത്യു ഓലിക്കലിന്‍റെ അധ്യക്ഷതയില്‍ പീരുമേട് ഡിവൈഎസ്പി വിശാല്‍ ജോണ്‍സണ്‍ ഉദ്ഘാടനം ചെയ്തു. കര്‍ണാടക ഹൈക്കോടതിയിലെ അഡ്വ. ജിജില്‍ ജോസഫ് മുഖ്യപ്രഭാഷണം നടത്തി. ലഹരി ജീവിതത്തെ പിടിമുറുക്കുന്ന ഇക്കാലത്ത് ജീവിതം ലഹരിയാക്കണമെന്നും നന്മകളില്‍ ഹരം കണ്ടെത്തേണ്ടത് നിലനിൽപ്പിന്‍റെ ആവശ്യമാണെന്നും അദ്ദേഹം പറഞ്ഞു. പിതൃവേദി പ്രസിഡന്‍റ് സാജു കൊച്ചുവീട്ടില്‍, മാതൃവേദി രൂപത പ്രസിഡന്‍റ് ജിജി ജേക്കബ്, അനിമേറ്റര്‍ സിസ്റ്റർ ജ്യോതി മരിയ സിഎസ്എന്‍, മാതൃവേദി എക്‌സിക്യൂട്ടീവ് അംഗം ബിന്‍സി ജോസി എന്നിവര്‍ പ്രസംഗിച്ചു. ഫാ. തോമസ് ചിന്താര്‍മണിയില്‍ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. രൂപതയിലെ 13 ഫൊറോനകളില്‍ നിന്നുള്ള അംഗങ്ങള്‍ യോഗത്തില്‍ പങ്കെടുത്തു.

കാണാൻ കാമറക്കണ്ണില്ല; എരുമേലി വനപാതയിൽ വീണ്ടും മാലിന്യങ്ങൾ

എരുമേലി: നിരീക്ഷണ കാമറകൾ സ്ഥാപിക്കുന്നതിനുള്ള വനംവകുപ്പിന്‍റെ പദ്ധതി നടപ്പിലായില്ല. വീണ്ടും പഴയപടി മാലിന്യ പാതയായി മാറി എരുമേലി വനപാത. എരുമേലി-റാന്നി സംസ്ഥാന പാതയിലെ കനകപ്പലം മുതൽ മുക്കട വരെ വനത്തിലൂടെ കടന്നുപോകുന്ന റോഡാണ് മാലിന്യ റോഡായി മാറിയിരിക്കുന്നത്. ഈ റോഡിൽ മുമ്പ് വൻ തോതിൽ മാലിന്യങ്ങൾ നിറഞ്ഞിരുന്നു. ടൺ കണക്കിനു മാലിന്യങ്ങൾ നീക്കി പല തവണയായി ശുചീകരണം നടന്നെങ്കിലും ശുചീകരണം കഴിയുമ്പോൾ പിന്നെയും പാത മലീമസമാകുന്ന കാഴ്ചയായിരുന്നു. ഇതോടെയാണ് കുറ്റകൃത്യങ്ങൾ തടയാൻ നിരീക്ഷണ കാമറകൾ സ്ഥാപിക്കാൻ രണ്ടു വർഷം മുമ്പ് വനംവകുപ്പ് പദ്ധതി തയാറാക്കിയത്. ഈ പദ്ധതിയാണ് ഇപ്പോൾ നടപ്പിലാക്കാൻ കഴിയാതെ ഉപേക്ഷിച്ച നിലയിലായത്. കനകപ്പലം മുതൽ മുക്കട വരെയുള്ള വനപാതയിൽ സ്പോൺസർമാർ മുഖേന കാമറകൾ സ്ഥാപിക്കാൻ നടപടികൾ സ്വീകരിച്ചിട്ടുണ്ടെന്ന് എരുമേലി ഫോറസ്റ്റ് റേഞ്ച് ഓഫീസർ ഹരിലാൽ പറഞ്ഞു. കാമറകൾ സ്ഥാപിക്കാനുള്ള പോസ്റ്റുകൾ, ആവശ്യമായ വൈദ്യുതി, ഇന്‍റർനെറ്റ് സൗകര്യങ്ങൾ എന്നിവ നിലവിൽ സജ്ജമാക്കിയിട്ടുണ്ട്. കാമറകൾ നൽകുന്നതിന് മാർ ക്രിസോസ്റ്റം ഫൗണ്ടേഷൻ സന്നദ്ധത അറിയിച്ചിട്ടുണ്ടെന്നു റേഞ്ച് ഓഫീസർ പറഞ്ഞു. നിലവിൽ കനകപ്പലം-വെച്ചൂച്ചിറ റോഡിലെ വനപാതയിൽ മാർ ക്രിസോസ്റ്റം ഫൗണ്ടേഷൻ മുഖേന കാമറകൾ പ്രവർത്തിക്കുന്നുണ്ട്. ഇതുമൂലം ഈ പാതയിൽ മാലിന്യങ്ങൾ തള്ളുന്നില്ല. ഇതേ മാതൃകയിൽ കനകപ്പലം മുതൽ മുക്കട വരെയുള്ള വനപാതയും മാറ്റാനാണ് ആലോചന.

സഹപ്രവർത്തകന് കരുതലുമായി ഓട്ടോറിക്ഷാ ഡ്രൈവർമാർ

പൊൻകുന്നം: ഇരു വൃക്കകളും തകരാറിലായി വൃക്ക മാറ്റിവയ്ക്കൽ ശസ്ത്രക്രിയ ആവശ്യമായ ടൗണിലെ ഓട്ടോ ഡ്രൈവറായിരുന്ന തോണിപ്പാറ കുന്നുംപുറത്ത് ടി.കെ. ബിനു (42)വിനെ സഹായിക്കാനായി സ്‌നേഹയാത്ര നടത്തി സഹപ്രവർത്തകർ. ബിനുവിന്‍റെ വൃക്ക മാറ്റിവയ്ക്കൽ ശസ്ത്രക്രിയയ്ക്കായി 30 ലക്ഷത്തോളം രൂപ കണ്ടെത്തേണ്ടിയിരിക്കുന്നു. വൃക്ക നൽകാൻ ഭാര്യ സുനിതാമോൾ തയാറായെങ്കിലും പരിശോധനയിൽ സുനിതയും വൃക്കരോഗിയാണെന്ന് കണ്ടെത്തി. ഇതോടെ പണം കണ്ടെത്താൻ ജനപ്രതിനിധികളും നാട്ടുകാരും ചേർന്ന് ചികിത്സാ സഹായ സമിതി രൂപികരിച്ചു. സമിതിയുടെ നേതൃത്വത്തിൽ ധനസമാഹരണം നടത്തിയിരുന്നു. ഇതിന്‍റെ തുടർച്ചയായിട്ടാണ് സഹപ്രവർത്തകരുടെ വക കരുതൽ. 1,40,000 രൂപയാണ് സമാഹരിച്ചത്. ഡ്രൈവർമാർ ഇവരുടെ ഒരു ദിവസത്തെ വരുമാനവും വാഹനത്തിൽ കുടുക്ക വച്ചുമാണ് തുക കണ്ടെത്തിയത്. 200ഓളം വണ്ടികൾ സ്‌നേഹയാത്രയിൽ പങ്ക് ചേർന്നു. ഓട്ടോറിക്ഷ ഡ്രൈവേഴ്‌സ് കോ-ഓർഡിനേഷൻ കമ്മിറ്റിയുടെ നേതൃത്വത്തിലായിരുന്നു ധനസമാഹരണം. നിലവിൽ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലാണ് ബിനു. പൊൻകുന്നം എസ്ഐ അനിൽ കുമാർ ഫണ്ട് കൈമാറി. സഹായ സമിതി ചെയർമാൻ ബി. രവീന്ദ്രൻ നായർ, കൺവീനർ ഷാക്കി സജീവ് എന്നിവർ ചേർന്ന് ഏറ്റുവാങ്ങി. ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ, പി.എസ്. സലാഹുദീൻ, കെ.എം. ദിലീപ്, ടോമി ഡൊമിനിക്, കെ. സന്തോഷ്, കെ.ജി. മനോജ്, രാധാകൃഷ്ണൻ, ജഗദീഷ്, കെ.എസ്. സാബു, റജീഫ്, വിനീഷ് ലാൽ എന്നിവർ പങ്കെടുത്തു.

ശക്തമായ കാറ്റിൽ വീടിന്‍റെ മേൽക്കൂര പറന്നുപോയി

മുണ്ടക്കയം: വേനൽ മഴയ്ക്കൊപ്പം എത്തിയ ശക്തമായ കാറ്റിൽ വീടിന്‍റെ മേൽക്കൂര 50 മീറ്ററോളം ദൂരം പറന്നുപോയി സമീപത്തെ റബർത്തോട്ടത്തിൽ പതിച്ചു. വണ്ടൻപതാൽ പത്ത് സെന്‍റ് മുകൾഭാഗത്ത് ഒറവയ്ക്കൽ രാധാമണിയുടെ വീടിന്‍റെ മേൽക്കൂരയാണ് കാറ്റിൽ പറന്നു പോയത്. ചൊവ്വാഴ്ച വൈകുന്നേരം ആറോടുകൂടിയായിരുന്നു സംഭവം. മേഖലയിൽ ശക്തമായ മഴയും കാറ്റുമാണ് അനുഭവപ്പെട്ടത്. ഇതേത്തുടർന്ന് സമീപത്തെ റബർ മരങ്ങളും നിലം പതിച്ചിരുന്നു. ഇതോടെ വീട്ടിൽ ഉണ്ടായിരുന്ന രാധാമണിയും മകൻ റോബിൻ, ഭാര്യ പ്രിയ എന്നിവർ വീടിന് പുറത്തിറങ്ങി വരാന്തയിൽ നിന്നു. ശക്തമായ കാറ്റിൽ വീടിന്‍റെ മേൽക്കൂരയുടെ രണ്ട് കേഡറുകളും നിരവധി ടിൻ ഷീറ്റുകളുമുള്ള ഭാഗം ഉയർന്നുപൊങ്ങി സമീപത്തെ റബർ മരങ്ങൾക്കിടയിലൂടെ താഴേക്ക് പതിക്കുകയായിരുന്നു. ഈ സമയം ഇവിടെ ആരുമില്ലാതിരുന്നത് വലിയ ദുരന്തം ഒഴിവാക്കി. വീടിന്‍റെ മേൽക്കൂര പറന്നുപോയതോടെ മഴയിൽ വീട്ടുപകരണങ്ങൾ പൂർണമായും നനഞ്ഞു നശിച്ചു. ടിൻ ഷീറ്റിന് പകരം ആസ്ബറ്റോസ് ഷീറ്റിട്ട് വീട് നനയാതെയാക്കാനുള്ള ശ്രമത്തിലാണ് ഈ കുടുംബം. അതിശക്തമായ കാറ്റ് അനുഭവപ്പെടുന്ന പ്രദേശമാണ് ഇവിടം. കഴിഞ്ഞവർഷവും ഇവരുടെ സമീപമുള്ള വീടിന്‍റെ മേൽക്കൂരയും ഇതേ രീതിയിൽ ശക്തമായ കാറ്റിൽ തകർന്നിരുന്നു.

പാലാ കത്തീഡ്രലിൽ ലഹരിവിരുദ്ധ ദിനാചരണം

പാലാ: സെന്‍റ് തോമസ് കത്തീഡ്രലിൽ എകെസിസിയുടെ ആഭിമുഖ്യത്തിൽ ലഹരിവിരുദ്ധ ദിനാചരണവും ജനകീയ പ്രതിരോധ സദസും നടത്തി. കത്തീഡ്രൽ പള്ളി വികാരി റവ. ഡോ. ജോസ് കാക്കല്ലിൽ സമ്മേളനം ഉദ്ഘാടനം ചെയ്തു. ഫാ. സെബാസ്റ്റ്യൻ ആലപ്പാട്ടുകോട്ടയിൽ ബോധവത്കരണ ക്ലാസ് നയിച്ചു. ഡയറക്ടർ ഫാ. ജോസഫ് തറപ്പേൽ, ഫാ. ഐസക് പെരിങ്ങാമലയിൽ, പ്രസിഡന്‍റ് ജോബി വർഗീസ് കുളത്തറ, സെക്രട്ടറി ബേബിച്ചൻ സാജു, സലാഷ് തോമസ്, ഷാജി ആവിമൂട്ടിൽ, തോമസ് മേനാംപറമ്പിൽ, അനൂപ് വെട്ടിക്കൽ, ജിസ് കടപ്പൂര്, മാത്തച്ചൻ പന്തലാനി തുടങ്ങിയവർ നേതൃത്വം നൽകി.

തീക്കോയിയിൽ കർഷക മാർക്കറ്റ് തുടങ്ങി

തീക്കോയി: കാർഷിക വികസന കർഷകക്ഷേമ വകുപ്പിന്‍റെ സഹായത്തോടെ ഫാർമേഴ്സ് പ്രൊഡ്യൂസർ ഓർഗനൈസേഷന്‍റെ ആഭിമുഖ്യത്തിൽ ആനിയിളപ്പിലെ ആദം ആർക്കേഡിൽ കർഷക മാർക്കറ്റിന്‍റെ ഔട്ട്‌ലെറ്റ് പ്രവർത്തനം ആരംഭിച്ചു. കൃഷിയധിഷ്ഠിത വികസന പദ്ധതിയിൽ ഉൾപ്പെടുത്തി സമീപ പഞ്ചായത്തുകളിലെ ഉൾപ്പെടെയുള്ള കർഷകർ രൂപംകൊടുത്ത സംരംഭമാണിത്. കർഷകർ ഉത്പാദിപ്പിക്കുന്ന പഴം, പച്ചക്കറി വിത്തുകൾ, ഫലവൃക്ഷത്തൈകൾ, ജൈവവളങ്ങൾ, ചെടിച്ചട്ടികൾ, മറ്റു മൂല്യവർധത ഉത്പന്നങ്ങൾ തുടങ്ങിയവ വാങ്ങാനും വിൽക്കാനും സാധിക്കും. കർഷക മാർക്കറ്റിന്‍റെ ഉദ്ഘാടനം പഞ്ചായത്ത് പ്രസിഡന്‍റ് കെ.സി. ജയിംസ് നിർവഹിച്ചു. വാർഡ് മെംബർ ജയറാണി തോമസുകുട്ടി, തീക്കോയി കൃഷി ഓഫീസർ ഇൻ ചാർജ് ആർ. രമ്യ, എഫ്പിഒ ഭാരവാഹികളായ മനു ജോർജ്, ജോയി പ്ലാക്കൂട്ടം, റോയി ജോസഫ് തുടങ്ങിയവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact editor@deepika.com