അറിവിന്‍റെ ആഴങ്ങളിലേക്കുള്ള വഴി കാണിച്ചുകൊടുക്കാന്‍ വിദ്യാലയങ്ങള്‍ക്കു സാധിക്കണം: ആന്‍റോ ആന്‍റണി എംപി
1496410
Saturday, January 18, 2025 11:53 PM IST
കാഞ്ഞിരപ്പള്ളി: അറിവിന്‍റെ ആഴങ്ങളെ തിരിച്ചറിഞ്ഞ് അതിലേ‌ക്ക് എത്തിച്ചേരാനുള്ള വഴി കാണിച്ചുകൊടുക്കാന്‍ നമ്മുടെ വിദ്യാലയങ്ങള്‍ക്ക്‌ സാധിക്കണമെന്ന് ആന്‍റോ ആന്‍റണി എംപി. ആനക്കല്ല്‌ സെന്‍റ് ആന്‍റണീസ്‌ പബ്ലിക്‌ സ്‌കൂളിന്‍റെ 39-ാമത്‌ വാര്‍ഷികാഘോഷവും റൂബി ജൂബിലി ഉദ്‌ഘാടനവും നിര്‍വഹിച്ച്‌ പ്രസംഗിക്കുകയായിരുന്നു അദ്ദേഹം.
മാനേജര്‍ റവ.ഡോ. ജോണ്‍ പനച്ചിക്കൽ അധ്യക്ഷത വഹിച്ചു. സെബാസ്റ്റ്യന്‍ കുളത്തുങ്കല്‍ എംഎല്‍എ, പ്രിന്‍സിപ്പല്‍ ഫാ. ആന്‍റണി തോക്കനാട്ട്‌, വൈസ്‌ പ്രിന്‍സിപ്പല്‍ ഫാ. ഷിജു കണ്ടപ്ലാക്കല്‍, പിടിഎ പ്രസിഡന്‍റ് ജോസ്‌ ആന്‍റണി, പാറത്തോട്‌ എസ്‌സിബി പ്രസിഡന്‍റ് ജോര്‍ജുകുട്ടി ആഗസ്‌തി, പൂര്‍വവിദ്യാർഥികളായ എം. നീതു ലക്ഷ്‌മി ഐഎഫ്‌എസ്‌, കെ-ഡിസ്ക് എക്‌സിക്യൂട്ടീവ്‌ ഡയറക്ടര്‍ റോബിന്‍ ടോമി, സ്റ്റാഫ്‌ സെക്രട്ടറി നൈസി ജേക്കബ്‌, സ്‌കൂള്‍ ക്യാപ്‌റ്റന്‍ ഇവാന റോസ്‌ ചെറിയാന്‍, വിദ്യാർഥി പ്രതിനിധി ഗണേഷ്‌ നായര്‍ എന്നിവര്‍ പ്രസംഗിച്ചു.
സര്‍വീസില്‍നിന്നു വിരമിക്കുന്ന പ്രീപ്രൈമറി അധ്യാപിക ആഞ്ചലിന്‍ അല്‍മേഡയെയും 25 വര്‍ഷം സര്‍വീസ്‌ പൂര്‍ത്തിയാക്കിയ അധ്യാപക-അനധ്യാപകരെയും സമ്മേളനത്തില്‍ ആദരിച്ചു. പാഠ്യ-പാഠ്യേതര വിഷയങ്ങളില്‍ മികച്ച വിജയം നേടിയവര്‍ക്കുള്ള സമ്മാനങ്ങള്‍ യോഗത്തില്‍ വിതരണം ചെയ്‌തു.
മൂന്നു ദിവസങ്ങളിലായി നടന്ന വാര്‍ഷികാഘോഷ പരിപാടികള്‍ വിദ്യാർഥികളുടെ വിവിധ കലാപരിപാടികളോടെ അവസാനിച്ചു.