ADVERTISEMENT

ADVERTISEMENT

സ്പീക്കർ ശ്രേഷ്ഠ കാതോലിക്കയെ സന്ദർശിച്ചു

കൊച്ചി: നിയമസഭാ സ്പീക്കർ എ.എൻ. ഷംസീർ യാക്കോബായ സഭ ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവയെ സന്ദർശിച്ചു.

പുത്തൻകുരിശ് പാത്രിയർക്കാ സെന്‍ററിൽ നടന്ന കൂടിക്കാഴ്ചയിൽ പി.വി. ശ്രീനിജൻ എംഎൽഎ, സഭാ ട്രസ്റ്റി കമാൻഡർ തമ്പു ജോർജ് തുകലൻ, സഭാ സെക്രട്ടറി ജേക്കബ് സി. മാത്യു തുടങ്ങിയവരും പങ്കെടുത്തു.

ADVERTISEMENT

ഡി. അപ്പുക്കുട്ടന്‍ നായര്‍ പുരസ്‌കാരം കലാമണ്ഡലം സജിത്ത് വിജയന്

കൊച്ചി: കഥകളി, കൂടിയാട്ടരംഗത്തെ യുവകലാകരന്മാര്‍ക്കായി മൂഴിക്കുളം നേപത്ഥ്യ കൂടിയാട്ട ഗുരുകുലം ഏര്‍പ്പെടുത്തിയ ഡി. അപ്പുക്കുട്ടന്‍ നായര്‍ പുരസ്‌കാരത്തിന് മിഴാവ് കലാകാരന്‍ കലാമണ്ഡലം സജിത്ത് വിജയന്‍ അര്‍ഹനായി. കേരള കലാമണ്ഡലത്തിലെ താത്കാലിക അധ്യാപകനാണ് സജിത്ത്. 10,000 രൂപയും ശില്പവും പ്രശസ്തിപത്രവും അടങ്ങുന്ന പുരസ്‌കാരം മേയ് 23ന് നേപത്ഥ്യയില്‍ നടക്കുന്ന അനുസ്മരണ ചടങ്ങില്‍ സമര്‍പ്പിക്കുമെന്ന് നേപത്ഥ്യ ഡയറക്‌ടര്‍ മാര്‍ഗി മധു അറിയിച്ചു.

അമിതഭാരം: വാഹന ഉടമയ്ക്കും ഡ്രൈവര്‍ക്കും 54,000 രൂപ വീതം പിഴ

കൊച്ചി: അമിതഭാരം കയറ്റിയ വാഹനത്തിന്‍റെ ഉടമയ്ക്കും ഡ്രൈവർക്കും 54,000 രൂപ വീതം പിഴശിക്ഷ. എറണാകുളം ആര്‍ടി എന്‍ഫോഴ്‌സ്‌മെന്‍റ് ഫയൽ ചെയ്ത കേസിലാണ് എറണാകുളം അഡീഷണല്‍ ചീഫ് ജുഡീഷ്യല്‍ മജിസ്‌ട്രേറ്റ് (സ്‌പെഷ്യല്‍ കോര്‍ട്ട് ഫോര്‍ എംപി/എംഎല്‍എ) മേരി ബിന്ദു ഫെര്‍ണാണ്ടസ് പ്രതികള്‍ക്ക് പിഴയിട്ടത്. 2021 ഫെബ്രുവരി 22ന് അസിസ്റ്റന്‍റ് മോട്ടോര്‍ വെഹിക്കിള്‍ ഇന്‍സ്‌പെക്ടര്‍ എം.ബി. ശ്രീകാന്ത് കാലടിയില്‍ നടത്തിയ വാഹന പരിശോധനയ്ക്കിടെയാണ് അമിതഭാരം കയറ്റിവന്ന ടോറസ് കണ്ടെത്തിയത്. 35 ടണ്‍ മാത്രം അനുവദിച്ചിട്ടുള്ള വാഹനത്തില്‍ 52,490 കിലോ ഭാരം കയറ്റിയിരുന്നു. 17 ടണ്‍ അമിതഭാരം കണ്ടെത്തിയതിനെ തുടര്‍ന്ന് 35,500 രൂപ കോമ്പൗണ്ട് ചെയ്യാന്‍ ഇ-ചെല്ലാന്‍ നല്‍കിയിരുന്നു. എന്നാല്‍ വാഹന ഉടമയും ഡ്രൈവറും കോമ്പൗണ്ട് ചെയ്യാന്‍ തയാറല്ലാത്തതിനാല്‍ ആര്‍ടിഒയുടെ നിര്‍ദേശപ്രകാരം എഎംവിഐ ജോബിന്‍ എം.ജേക്കബ് കോടതിയില്‍ കേസ് ഫയല്‍ ചെയ്യുകയായിരുന്നു. വാഹന ഉടമയായ പട്ടിമറ്റം സ്വദേശി ടി.യു. ബെന്നി, ഡ്രൈവര്‍ ഇടുക്കി മഞ്ഞപ്പാറ സ്വദേശി പ്രിന്‍സ് ജോസഫ് എന്നിവര്‍ കോടതിയില്‍ കുറ്റം നിഷേധിച്ചതിനാല്‍ കേസ് വിചാരണയിലേക്ക് നീണ്ടു. മോട്ടോര്‍ വാഹന വകുപ്പിന് വേണ്ടി കോടതിയില്‍ അസിസ്റ്റന്‍റ് പബ്ലിക് പ്രോസിക്യൂട്ടര്‍ സുമി പി. ബേബി ഹാജരായി. കോമ്പൗണ്ടിംഗ് ഫീ അടച്ച് തീര്‍പ്പാക്കാത്ത എല്ലാ കേസുകളും കോടതിയില്‍ പ്രോസിക്യൂഷന്‍ നടപടികള്‍ക്കായി സമര്‍പ്പിച്ചിട്ടുണ്ട്. ഹൈക്കോടതിയുടെ ഉത്തരവ് അനുസരിച്ച് ഡ്രൈവിംഗ് ലൈസന്‍സില്‍ അയോഗ്യത കല്‍പ്പിക്കുന്ന നടപടികള്‍, വാഹനത്തിന്‍റെ പെര്‍മിറ്റില്‍ നടപടി എടുക്കുന്നതിനു വേണ്ടിയുള്ള നടപടികള്‍ എന്നിവ നടന്നുവരുന്നതായി ആര്‍ടിഒ കെ.മനോജ് അറിയിച്ചു. നിലവില്‍ കോടതിയില്‍ പ്രോസിക്യൂഷന്‍ നടപടികള്‍ നടക്കുന്ന കേസുകളില്‍ എറണാകുളം ജില്ലാ ലീഗല്‍ സര്‍വീസ് അഥോറിറ്റി നടത്തുന്ന വാരാന്ത്യ അദാലത്ത് പ്രയോജനപ്പെടുത്താവുന്നതാണെന്നും വാഹന ഉടമ അല്ലെങ്കില്‍ ഡ്രൈവര്‍ എന്നിവരില്‍ ആരെങ്കിലും ഒരാള്‍ ഓഫീസില്‍ നേരിട്ട് എത്തിയാല്‍ കോമ്പൗണ്ട് ചെയ്യാന്‍ അവസരം ഉണ്ടായിരിക്കുമെന്നും ആര്‍ടിഒ അറിയിച്ചു.

നിയന്ത്രണംവിട്ട കാർ കടയിലേക്ക് ഇടിച്ചു കയറി

കാലടി: മറ്റൂർ എയർപോർട്ട് റോഡിൽ പിരാരൂരിൽ നിയന്ത്രണം വിട്ട കാർ കടയിലേക്ക് ഇടിച്ച് കയറി. പൊതുപ്രവർത്തകൻ വാവച്ചൻ താടിക്കാരന്‍റെ കടയുടെ മുൻഭാഗത്താണ് കാർ ഇടിച്ചുകയറിയത്. അവിടെ പാർക്ക് ചെയ്ത മൂന്നു ബൈക്കുകൾക്കും സൈക്കിളിനും നാശനഷ്ടം സംഭവിച്ചു. സൈക്കിളിൽ ഉണ്ടായിരുന്നയാളെ ഗുരുതര പരിക്കുകളോടെ സ്വകാര്യ ആശുപത്രിയിൽ പ്രവേശിപ്പിച്ചു. എയർപോർട്ടിൽ നിന്നും കാലടി ഭാഗത്തേക്ക് പോയ കാറാണ് നിയന്ത്രണം വിട്ട് ദിശമാറി കടയിലേക്ക് ഇടിച്ചുകയറിയത്. കടയ്ക്ക് ഭാഗികമായി കേടുപാട് സംഭവിച്ചു. ഡൈവർ ഉറങ്ങിപ്പോയതാണ് കാരണം. ഇന്നലെ വൈകിട്ട് അഞ്ചിനാണ് സംഭവം.

ഉദയംപേരൂരിൽ പഴകിയ മത്സ്യം പിടിച്ചെടുത്തു

ഉദയംപേരൂർ: മത്സ്യ വില്പനശാലയിൽ നിന്നും പഴകിയ മത്സ്യങ്ങൾ പിടിച്ചെടുത്ത് നശിപ്പിച്ചു. ഉദയംപേരൂർ 5-ാം വാർഡിലെ വൈപ്പിൻ പച്ചമീൻ കട എന്ന സ്ഥാപനത്തിൽ പഞ്ചായത്ത് ആരോഗ്യ വകുപ്പും ഭക്ഷ്യസുരക്ഷാ വകുപ്പും സംയുക്തമായി നടത്തിയ പരിശോധനയിലാണ് പഴകിയതും ഭക്ഷ്യയോഗ്യമല്ലാത്തതുമായ മത്സ്യം പിടിച്ചടുത്തത്. സാമ്പിളുകൾ ശേഖരിച്ച് ഭക്ഷ്യസുരക്ഷാ ലാബിൽ പരിശോധനയ്ക്കായി നൽകി. പരിസര ശുചിത്വവും മാലിന്യ സംസ്കരണ സംവിധാനവും ഹെൽത്ത് കാർഡുമില്ലായെന്ന് കണ്ടെത്തിയതിനെ തുടർന്നാണ് പൊതുജനാരോഗ്യ നിയമപ്രകാരം നോട്ടീസ് നൽകി. പബ്ലിക് ഹെൽത്ത് ഓഫീസർ ഡോ. ഐ.കെ. സാവിത്രി, ഭക്ഷ്യസുരക്ഷാ ഓഫീസർ വിമല മാത്യു, ഹെൽത്ത് ഇൻസ്പെക്ടർമാരായ റാഫി ജോസഫ്, സി.ടി. അനുജ എന്നിവർ പരിശോധനയ്ക്ക് നേതൃത്വം നൽകി.

പീഡനക്കേസ് പ്രതി അറസ്റ്റിൽ

തോപ്പുംപടി: കണ്ണമാലി ചെറിയകടവിൽ 18 കാരിയെ പീഡിപ്പിച്ച സംഭവത്തിൽ പ്രതി അറസ്റ്റിൽ. കണ്ണമാലി ചെറിയകടവ് പുളിയാംപിള്ളി വീട്ടിൽ ഫ്രാൻസിസ് സിനുവാണ് (45) അറസ്റ്റിലായത്. കഴിഞ്ഞ മാസം 30 ന് പെൺകുട്ടിക്ക് ദേഹാസ്വാസ്ഥ്യം അനുഭവപ്പെട്ടതിനെ തുടർന്നാണ് കഴിഞ്ഞ രണ്ട് വർഷത്തിലേറേയായി പ്രതി തന്നെ പീഡിപ്പിക്കുന്നുണ്ടെന്ന വിവരം ബന്ധുവായ സ്ത്രീയോട് പറഞ്ഞത്. ഇതേതുടർന്ന് ബന്ധുക്കൾ പോലീസിൽ അറിയിക്കുകയായിരുന്നു. പോലീസ് പെൺകുട്ടിയെ മജിസ്‌ട്രേറ്റിന് മുമ്പിൽ ഹാജരാക്കി രഹസ്യമൊഴി നൽകിയിരുന്നു. പ്രതിക്കെതിരെ പോക്സോ കേസ് ചുമത്തിയാണ് കേസെടുത്തിരിക്കുന്നത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

യുപിഐ ആപ്പ് വഴി കെഎസ്ആര്‍ടിസി ടിക്കറ്റ് : ഉടൻ ജില്ലയിലും

കൊച്ചി: യുപിഐ ആപ്പ് മുഖേന കെഎസ്ആര്‍ടിസിയില്‍ ടിക്കറ്റെടുക്കുന്ന സംവിധാനം വൈകാതെ ജില്ലയിലെത്തും. നിലവില്‍ തൃശൂരില്‍ പുതിയ സംവിധാനത്തിന്‍റെ പരീക്ഷണം നടന്നുവരികയാണ്. ഇത് പൂര്‍ത്തിയാകുന്ന മുറയ്ക്ക് ജില്ലയിലേക്കും വ്യാപിപ്പിക്കും. തിരുവനന്തപുരത്ത് പൈലറ്റ് പദ്ധതിയായി ആരംഭിച്ച സംവിധാനം പിന്നീട് കൊല്ലത്തേക്കും വ്യാപിപ്പിച്ചിരുന്നു. ക്യുആര്‍ കോഡ് സംവിധാനമുള്ള ആന്‍ഡ്രോയ്ഡ് ടിക്കറ്റ് മെഷീന്‍ സ്വകാര്യ കമ്പനിയുടെ സഹകരണത്തോടെ ലഭ്യമാക്കിയാണ് പദ്ധതി. ക്യുആര്‍ കോഡ് സ്‌കാന്‍ ചെയ്ത് ടിക്കറ്റ് കാശ് നല്‍കാം. ഡെബിറ്റ് കാര്‍ഡ് സൗകര്യവും ഉണ്ടാകും. ഇന്‍റര്‍നെറ്റ് സൗകര്യം കുറവുള്ള മലയോരമേഖലകളില്‍ ഓഫ്‌ലൈനായും ക്യുആര്‍ കോഡ് ഉപയോഗിച്ച് ടിക്കറ്റെടുക്കാനാകും. കെഎസ്ആര്‍ടിസി ബസ് എത്തുന്ന സമയം, എവിടെ എത്തി, ഏത് റൂട്ട് എന്നിവ അറിയുന്നതിനായി മുംബൈ ആസ്ഥാനമായി പ്രവര്‍ത്തിക്കുന്ന ചലോ മൊബിലിറ്റി പ്രൈവറ്റ് ലിമിറ്റഡ് കമ്പനി വികസിപ്പിച്ച ആപ്ലിക്കേഷനാണ് ഇതിനായി ഉപയോഗിക്കുക. ഈ കമ്പനി തന്നെയാകും ടിക്കറ്റ് മെഷീനുകള്‍ ലഭ്യമാക്കുന്നത്. നിലവിലുള്ള ടിക്കറ്റ് സംവിധാനവും ഇതിനൊപ്പം ഉണ്ടാകും. ബസില്‍ ജിപിഎസ് സംവിധാനമുള്ളതിനാല്‍ സര്‍വീസിന്‍റെ കൃത്യത, എവിടെ എത്തി തുടങ്ങിയ വിവരങ്ങള്‍ കെഎസ്ആര്‍ടിസി ആസ്ഥാനത്തെ കണ്‍ട്രോള്‍ റൂമിന് നിരീക്ഷിക്കാനാകും. മറ്റ് ഇടങ്ങളിലെപ്പോലെ പരീക്ഷണാടിസ്ഥാനത്തില്‍ തുടങ്ങി വ്യാപകമാക്കാനാണ് നീക്കം.

സ്ലാബിൽ തട്ടി നിയന്ത്രണംവിട്ട സ്കൂട്ടർ ടാങ്കർ ലോറിയിൽ തട്ടി മറിഞ്ഞ് യാത്രക്കാരി മരിച്ചു

കാക്കനാട്: റോഡരികിലെ കോണ്‍ക്രീറ്റ് സ്ലാബിൽ തട്ടി നിയന്ത്രണംവിട്ട സ്കൂട്ടർ, ടാങ്കർ ലോറിയിൽ തട്ടി മറിഞ്ഞ് സ്കൂട്ടറിന്‍റെ പിൻസീറ്റിലിരുന്ന യാത്രക്കാരി മരിച്ചു. നെട്ടൂർ മൂലയിൽതിട്ട ഉണ്ണികൃഷ്ണന്‍റെ ഭാര്യ കെ.വി. മഹേശ്വരി (52) ആണ് മരിച്ചത്. സ്കൂട്ടർ ഓടിച്ചിരുന്ന ഉണ്ണികൃഷ്ണൻ നിസാരപരിക്കുകളോടെ രക്ഷപ്പെട്ടു. ഇന്നലെ രാവിലെ ഒൻപതോടെ ചെന്പുമുക്കിലാണ് അപകടം. തൃക്കാക്കര മുനിസിപ്പൽ സഹകരണ ആശുപത്രിയിലെ ഹൗസ് കീപ്പിംഗ് വിഭാഗത്തിൽ ജീവനക്കാരിയായ മഹേശ്വരി ഭർത്താവിനൊപ്പം യാത്ര ചെയ്യവേ നിരത്തിൽ, ഉയർന്നു നിന്ന കോണ്‍ക്രീറ്റ് സ്ലാബിൽ തട്ടി വാഹനം നിയന്ത്രണം വിട്ട് അതുവഴി വന്ന ടാങ്കർ ലോറിയിൽ തട്ടിയതോടെ റോഡിലേക്ക് തലയടിച്ചുവീഴുകയായിരുന്നു. ഉടൻതന്നെ തൃക്കാക്കര സഹകരണ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. സംസ്കാരം നടത്തി. മക്കൾ: സനൽ, സന്ധ്യ. മരുമക്കൾ: സേവ്യർ, രമ്യ.

ഒരു കിലോ കഞ്ചാവുമായി ആസാം സ്വദേശി പിടിയില്‍

കൊച്ചി: ഇതര സംസ്ഥാനക്കാർക്കിടയിൽ വില്പന നടത്താനെത്തിച്ച കഞ്ചാവുമായി ആസാം സ്വദേശി പിടിയില്‍. മൊഹദ് ഇസാബ് അലി(23)യെ ആണ് പട്രോളിംഗിനിടെ ഇന്‍ഫോപാര്‍ക്ക് പോലീസ് അറസ്റ്റ് ചെയ്തത്. ഇയാളുടെ പക്കല്‍നിന്നും 1.045 കിലോ കഞ്ചാവ് പിടിച്ചെടുത്തു. കാക്കനാട് ഭാഗത്തുള്ള ഇതര സംസ്ഥാനക്കാർക്കിടയിൽ വില്പന നടത്താനാണ് കഞ്ചാവ് എത്തിച്ചതെന്ന് പ്രതി പോലീസിനോടു പറഞ്ഞു.

വീട്ടിൽ ചാരായം സൂക്ഷിച്ചയാൾ അറസ്റ്റിൽ

പറവൂർ: വീട്ടിൽ ചാരായം സൂക്ഷിച്ച കേസിൽ മധ്യവയസ്കൻ അറസ്റ്റിൽ. കെടാമംഗലം വലിയപറമ്പിൽ രാജീവിനെ(54)യാണ് എക്സൈസ് സംഘം പിടികൂടിയത്. അഞ്ചര ലിറ്റർ ചാരായം ഇവിടെനിന്നും കണ്ടെടുത്തു. വിഷു-ഈസ്‌റ്റർ ആഘോഷങ്ങൾ പ്രമാണിച്ചാണ് ഇയാൾ ചാരായം വാറ്റിയതെന്നും സ്വന്തം ഉപയോഗത്തിനായി ഇയാൾ ചാരായം വാറ്റുന്നതു പതിവായിരുന്നെന്നും എക്സൈസ് അധികൃതർ പറഞ്ഞു. പെയിന്‍റിംഗ് തൊഴിലാളിയായ രാജീവിനെ രഹസ്യവിവരത്തിന്‍റെ അടിസ്ഥാനത്തിൽ എക്സൈസ് സർക്കിൾ ഇൻസ്പെക്‌ടർ എം.ഒ. വിനോദിന്‍റെ നേതൃത്വത്തിലാണ് പിടികൂടിയത്. കോടതിയിൽ ഹാജരാക്കി റിമാൻഡ് ചെയ്തു.

ഹെറോയിനും കഞ്ചാവുമായി മൂന്ന് ഇതര സംസ്ഥാനക്കാർ പിടിയിൽ

പെരുമ്പാവൂർ: ഹെറോയിനും കഞ്ചാവുമായി മൂന്ന് ഇതര സംസ്ഥാനക്കാർ എക്‌സൈസ് പിടിയിൽ. ആസാം സ്വദേശികളായ ഷറിഫുൾ ഇസ്‌ലാം (25), ഹബീബുർ റഹ്‌മാൻ (25) എന്നിവരെ പെരുമ്പാവൂർ മീൻ മാർക്കറ്റിന് സമീപത്തുനിന്നുമാണ് ഹെറോയിനുമായി പിടികൂടിയത്. ഷറിഫുൾ ഇസ്‌ലാമിന്‍റെ പക്കൽ നിന്നും 2.50 ഗ്രാം ഹെറോയിനും, ഹബീബുർന്‍റെ പക്കൽ നിന്നും 1.50 ഗ്രാം ഹെറോയിനും കണ്ടെടുത്തു. പെരുമ്പാവൂർ കാളച്ചന്തയ്ക്കു സമീപത്തുനിന്നും കഞ്ചാവുമായി ആസാം സ്വദേശി അബുൽ കാസിം (45)നെയും പിടികൂടി. ഇയാളുടെ പക്കൽ നിന്നും 15 ഗ്രാം കഞ്ചാവ് പിടികൂടി.

വിദേശജോലി വാഗ്ദാനം; ലക്ഷങ്ങൾ തട്ടിയ‌ പ്രതി പിടിയിൽ

മുളന്തുരുത്തി: വിദേശത്തുള്ള തൊഴിലവസരങ്ങളുടെ പേരിൽ പലരിൽ നിന്ന് ലക്ഷക്കണക്കിന് രൂപ തട്ടിയ പ്രതിയെ മുളന്തുരുത്തി പോലീസ് അറസ്റ്റ് ചെയ്തു. നോർത്ത് പറവൂർ സ്വദേശി കോട്ടുവള്ളി വീട്ടിൽ രാഹുൽ രാജു (32) ആണ് പിടിയിലായത്. പാലക്കാടുള്ള സുഹൃത്തിന്‍റെ വീട്ടിൽ നിന്ന് സാഹസികമായാണ് പ്രതിയെ പിടികൂടിയത്. പോളണ്ടിൽ ജോലി വാഗ്ദാനം ചെയ്ത് ആരക്കുന്നം സ്വദേശികളായ വിഷ്ണു പ്രകാശ്, വിഷ്ണുവിന്‍റെ സുഹൃത്തായ നിഥിൻ ചന്ദ്രൻ എന്നിവരിൽ നിന്ന് നാലര ലക്ഷത്തിലധികം രൂപ പലപ്പോഴായി കൈപ്പറ്റുകയായിരുന്നു. നിരവധി കേസുകളിൽ പ്രതിയാണ് രാഹുൽ രാജെന്നും പലരിൽ നിന്നായി പ്രതി ലക്ഷങ്ങൾ തട്ടിയെടുത്തുന്നുവെന്നും പോലീസ് പറയുന്നു. ഇയാളുടെ പേരിൽ നോർത്ത് പറവൂർ പോലീസ് സ്റ്റേഷനിലടക്കം നിരവധി സ്റ്റേഷനുകളിൽ തട്ടിപ്പ് കേസ് നിലവിലുണ്ടെന്ന് മുളന്തുരുത്തി എസ്എച്ച്ഒ മനേഷ് പൗലോസ് പറഞ്ഞു. തട്ടിപ്പ് നടത്തിയ പ്രതി ആർഭാട ജീവിതം നയിക്കുന്നതിന്‍റെ ഭാഗമായി ബംഗളൂരു, പാലക്കാട് എന്നിവിടങ്ങളിൽ വാടകയ്ക്ക് താമസിക്കുകയാണ് പതിവ്. നിരന്തരമായ അന്വേഷണത്തെ തുടർന്ന് പാലക്കാടുള്ള സുഹൃത്തിന്‍റെ വീട്ടിൽ ഒളിവിലുണ്ടെന്നറിഞ്ഞതിനെ തുടർന്ന് പ്രത്യേക അന്വേഷണത്തിനൊടുവിലാണ് അറസ്റ്റ്. കസ്റ്റഡിയിലെടുത്ത പ്രതിയെ കോടതിയിൽ ഹാജരാക്കി റിമാൻഡ് ചെയ്തു. എസ്.ഐ പ്രിൻസി ആർ, സിപിഒമാരായ ജയകുമാർ, റെജിൻപ്രസാദ് എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്.

ദേവാലയങ്ങളിൽ പെസഹാ ആചരണം

കൊച്ചി: ക്രിസ്തു വിശുദ്ധ കുർബാന സ്ഥാപിച്ചതിന്‍റെയും അന്ത്യ അത്താഴത്തിന്‍റെയും സ്മരണയിൽ ക്രൈസ്തവർ ഇന്നു പെസഹാ ആചരിക്കും. ദേവാലയങ്ങളിൽ കാൽകഴുകൽ ശുശ്രൂഷ, ആഘോഷമായ ദിവ്യബലി, ദിവ്യകാരുണ്യ ആരാധന എന്നിവയുണ്ടാകും. കാക്കനാട് സെന്‍റ് ഫ്രാന്‍സിസ് അസീസി പള്ളിയിൽ ഇന്നു രാവിലെ 6.30ന് ആരംഭിക്കുന്ന പെസഹാ ശുശ്രൂഷകളില്‍ സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ മുഖ്യകാര്‍മികത്വം വഹിക്കും. കർദിനാൾ മാർ ജോർജ് ആലഞ്ചേരി ഇടുക്കി തങ്കമണി സെന്‍റ് തോമസ് ഫൊറോന പള്ളിയിലെ പെസഹാ ശുശ്രൂഷകളിൽ കാർമികനാകും. എറണാകുളം സെന്‍റ് ഫ്രാന്‍സിസ് അസീസി കത്തീഡ്രലില്‍ പെസഹാ ശുശ്രൂഷകൾ വൈകുന്നേരം അഞ്ചിനാണ് ആരംഭിക്കുക. ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ കാർമികനാകും. ഫോർട്ട്കൊച്ചി സാന്താക്രൂസ് ബസിലിക്കയിൽ രാവിലെ ആറിന് പെസഹാ ശുശ്രൂഷകൾ ആരംഭിക്കും. യാക്കോബായ സഭ ശ്രേഷ്ഠ കാതോലിക്ക ബസേലിയോസ് മാർ ജോസഫ് ബാവയുടെ മുഖ്യകാർമികത്വത്തിൽ തിരുവാങ്കുളം കൃംതാ സെന്‍റ് ജോർജ് കത്തീഡ്രലിൽ ഇന്നലെ വൈകുന്നേരം പെസഹാ ശുശ്രൂഷകൾ നടന്നു. കോതമംഗലം വിശുദ്ധ മര്‍ത്തമറിയം യാക്കോബായ സുറിയാനി കത്തീഡ്രല്‍ വലിയ പള്ളിയില്‍ ഇന്ന് വൈകുന്നേരം നാലിനു ശ്രേഷ്ഠ കാതോലിക്കയുടെ കാര്‍മികത്വത്തില്‍ കാല്‍കഴുകല്‍ ശുശ്രൂഷ ഉണ്ടായിരിക്കും.

രാജപാത കേസ് : ‘ജനകീയ പ്രക്ഷോഭത്തിന് മുന്നില്‍ സര്‍ക്കാര്‍ പരാജയപ്പെട്ടു’

കോതമംഗലം : ആലുവ മൂന്നാര്‍ രാജപാതയിലൂടെ നടത്തിയ ജനമുന്നേറ്റ സമരത്തിന് നേതൃത്വം നല്‍കിയതിന്‍റെ പേരില്‍ ബിഷപ് മാര്‍ ജോര്‍ജ് പുന്നക്കോട്ടിലിനും മറ്റുള്ളവര്‍ക്കും എതിരെ എടുത്ത കേസ് പിന്‍വലിച്ച് സര്‍ക്കാര്‍ പരാജയം സമ്മതിച്ചെന്ന് യുഡിഎഫ് ജില്ലാ കണ്‍വീനര്‍ ഷിബു തെക്കുംപുറം. വര്‍ഷങ്ങള്‍ക്കു മുന്നേ താന്‍ നടന്നുപോയ വഴി പൊതുസഞ്ചാരത്തിന് തുറന്നു ലഭിക്കുന്നതിന് വേണ്ടി നടത്തിയ സമരത്തില്‍ ജനപ്രതിനിധികള്‍ക്കും മറ്റു ജനനേതാക്കള്‍ക്കും ഒപ്പം ബിഷപ്പും പങ്കാളിയായതിന് വനംവകുപ്പ് കള്ളക്കേസ് എടുക്കുകയായിരുന്നു. വനം വകുപ്പ് കേസെടുത്തതിനെ തുടര്‍ന്ന് കത്തോലിക്കാ സഭയും വിവിധ രാഷ്ട്രീയകക്ഷികളും നിരന്തരമായി നടത്തിയ സമരത്തിന്‍റെ ഫലമാണ് കേസ് പിന്‍വലിക്കാന്‍ സര്‍ക്കാര്‍ നിര്‍ബന്ധിതരായത്. ആലുവ മൂന്നാര്‍ രാജപാത പിഡബ്ല്യുഡി റോഡാണ്. രാജപാത നാടിനായി തുറന്നു നല്‍കുന്നതുവരെ ശക്തമായ സമരപരിപാടികളുമായി യുഡിഎഫ് മുന്നോട്ട് പോകുമെന്നും അദ്ദേഹം പറഞ്ഞു.

ഫാസിസത്തിനെതിരെ സംസാരിക്കുന്നവരുടെ വായടപ്പിക്കുന്നു: ടി.ജെ. വിനോദ്

കൊച്ചി: ഫാസിസത്തിന് എതിരായി സംസാരിക്കുന്നവരുടെ നാവടപ്പിക്കാനാണ് സര്‍ക്കാരിന്‍റെ അന്വേഷണ ഏജന്‍സികളെ ഉപയോഗപ്പെടുത്തി ബിജെപിയും നരേന്ദ്രമോദിയും ശ്രമിക്കുന്നതെന്ന് ടി.ജെ. വിനോദ് എംഎല്‍എ. എതിരാളികളെ ആക്രമിച്ചും അന്വേഷണ ഏജന്‍സികളെ ഉപയോഗപ്പെടുത്തിയും നിശബ്ദരാക്കുകയുമാണ് രാജ്യത്ത് നടക്കുന്നത്. നാഷണല്‍ ഹെറാള്‍ഡ് കേസില്‍ സോണിയ ഗാന്ധിക്കും രാഹുല്‍ ഗാന്ധിക്കും കോണ്‍ഗ്രസ് പരിപൂര്‍ണ പിന്തുണ നല്‍കിയിട്ടുണ്ടെന്നും എംഎല്‍എ പറഞ്ഞു. രാഷ്ട്രീയ എതിരാളികള്‍ക്കെതിരെ ഇഡി കള്ളക്കേസെടുത്ത് പീഡിപ്പിക്കുന്നുവെന്നാരോപിച്ച് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ നടന്ന എന്‍ഫോഴ്‌സ്‌മെന്‍റ് ഡയറക്ടറേറ്റ്(ഇഡി) ഓഫീസിലേക്ക് നടത്തിയ മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇഡി നടപടിയില്‍ പ്രതിഷേധിച്ച് രാജ്യവ്യാപകമായി കോണ്‍ഗ്രസ് നടത്തിയ പ്രതിഷേധത്തിന്‍റെ ഭാഗമായാണ് കൊച്ചിയില്‍ മാര്‍ച്ച് സംഘടിപ്പിച്ചത്. ഡിസിസി ഓഫീസില്‍ നിന്നാരംഭിച്ച മാര്‍ച്ച് ഇഡി ഓഫീസിന് സമീപം പോലീസ് തടഞ്ഞു. മാര്‍ച്ചിന് നേരെ പോലീസ് ജലപീരങ്കി പ്രയോഗിച്ചു. ഡിസിസി ജനറല്‍ സെക്രട്ടറി അബ്ദുള്‍ ലത്തീഫ് അധ്യക്ഷത വഹിച്ചു. കെ.പി. ധനപാലന്‍, ഡൊമിനിക് പ്രസന്റേഷന്‍, ടോണി ചമ്മിണി, എം.ആര്‍. അഭിലാഷ് തുടങ്ങിയവരും പങ്കെടുത്തു. photo: ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ നടന്ന ഇഡി ഓഫീസ് മാര്‍ച്ചില്‍ ബാരിക്കേഡ് മറികടക്കാന്‍ ശ്രമിച്ച പ്രവര്‍ത്തകരെ പോലീസ് അറസ്റ്റ് ചെയ്തു നീക്കുന്നു.

പഠന ശിബിരം 22 മുതല്‍: രജിസ്‌ട്രേഷന്‍ ആരംഭിച്ചു

കൊച്ചി: പഠനവൈകല്യമുള്ള കുട്ടികള്‍ക്കായി എറണാകുളം പനമ്പിള്ളി നഗറില്‍ പ്രവര്‍ത്തിക്കുന്ന ചൈല്‍ഡ് കെയര്‍ സെന്‍ററിന്‍റെ നേതൃത്വത്തില്‍ 22 മുതല്‍ മേയ് ആറുവരെ പഠന ശിബിരം നടത്തും. പഠനവൈകല്യമുള്ള കുട്ടികളുടെ കഴിവുകള്‍ വികസിപ്പിച്ച് പഠനമികവ് മെച്ചപ്പെടുത്തുകയാണ് പഠന ശിബിരത്തിന്റെ ലക്ഷ്യമെന്ന് ചൈല്‍ഡ് കെയര്‍ സെന്‍റര്‍ എക്‌സിക്യൂട്ടീവ് ഡയറക്ടര്‍ ഡോ. ഏബ്രഹാം പോള്‍ പറഞ്ഞു. ശ്രദ്ധക്കുറവ്, ഓര്‍മക്കുറവ്, വായന, എഴുത്ത്, ഭാഷമനസിലാക്കല്‍, അപഗ്രഥിക്കല്‍, കണക്ക് പഠനത്തിലെ ക്രിയകള്‍ മനസിലാക്കല്‍ എന്നിവയിലാണ് പഠനവൈകല്യമുള്ള കുട്ടികള്‍ സാധാരണ ബുദ്ധിമുട്ട് നേരിടുന്നത്. ഇത്തരം കുറവുകള്‍ പരിഹരിക്കുന്നതിനും പഠനഭാരം കുറയ്ക്കുന്നതിനും പഠനശിബിരം സഹായിക്കും. ഇത്തരം കുട്ടികളെ സഹായിക്കുന്നതിനായി മാതാപിതാക്കള്‍ക്കായുള്ള പേരന്‍റിംഗ് ക്ലാസും കൂടാതെ സംസാര, ഭാഷ ശേഷി മെച്ചപ്പെടുത്താനുള്ള ക്ലാസുകള്‍ കൊച്ചുകുട്ടികള്‍ക്കും പഠനശിബിരത്തില്‍ ഉണ്ടാകുമെന്നും ഡോ. ഏബ്രാഹം കെ. പോള്‍ പറഞ്ഞു. കുട്ടികളിലെ ശ്രവണ, സംസാര, വൈകല്യങ്ങള്‍ പരിശോധിക്കുന്നതിനുള്ള ക്യാമ്പ് മേയ്, ഏഴ്, എട്ട് തിയതികളില്‍ നടക്കും. വിശദ വിവരങ്ങള്‍ക്കും രജിസ്‌ട്രേഷനുമായി 20ന് മുമ്പായി ചൈല്‍ഡ് കെയര്‍ സെന്‍ററുമായി ബന്ധപ്പെടണം. ഫോണ്‍: 04847961167, 9895705080.

എളവൂർ കുന്നേൽ പള്ളിയിൽ കാൻസർ പരിശോധനാ ക്യാമ്പും സെമിനാറും

നെടുമ്പാശേരി : ഏളവൂർ സെന്‍റ് ആന്‍റണീസ് ദേവാലയത്തിന്‍റെ ഒരു വർഷം നീണ്ടുനിൽക്കുന്നസിൽവർ ജൂബിലിയാഘോഷത്തിന്‍റെ ഭാഗമായി എറണാകുളം ലക്‌ഷോർ ഹോസ്പ്പിറ്റലിന്‍റെയും ആത്മജീവൻ ചാരിറ്റബിൾ സൊസൈറ്റിയുടെയും സഹകരണത്തോടെ പാരിഷ് ഹാളിൽ വച്ച് കാൻസർ പരിശോധനാ ക്യാമ്പും സെമിനാറും നടത്തി. കാൻസർ ബോധവത്കരണ സെമിനാറിനോടനുബന്ധിച്ച് സ്ത്രീകളിലെ ഗർഭാശയ കാൻസർ കണ്ട് പിടിക്കുവാൻ സാധിക്കുന്ന പാപ്സ്മിയർ ടെസ്റ്റും സ്തനാർബുദം കണ്ട് പിടിക്കാൻ മാമ്മോഗ്രാഫി ടെസ്റ്റും നടത്തി. ഇരുനൂറോളം സ്ത്രീകൾക്ക് ടെസ്റ്റ് ഗുണകരമായി. മെഡിക്കൽ ക്യാമ്പ് റോജി എം. ജോൺ എംഎൽഎ ഉദ്ഘാടനം ചെയ്തു. വികാരി ഫാ. ജോൺ പൈനുങ്കൽ അധ്യക്ഷത വഹിച്ചു. കാൻസർ രോഗ വിദഗ്ദ്ധ ഡോ. ചിത്രാതാര ഗംഗാധരൻ ക്യാമ്പിന് നേതൃത്വം നൽകി. സഹവികാരി ഫാ. പീറ്റർ ആലക്കാടൻ, ജൂബിലി കമ്മിറ്റി കൺവീനർ ജോർജ് മണവാളൻ, ട്രസ്റ്റിമാരായ കുര്യാക്കോസ് നെല്ലിശേരി , ജോയി നെടുങ്ങാടൻ, വൈസ് ചെയർമാൻ സാന്‍റോ പാനികുളം ,ജോയിന്‍റ് കൺവീനർമാരായ ബേബി ചക്യേത്ത്, സുമ പോളി, ബിജു തോമസ് , അത്മജീവൻ ചാരിറ്റബിൾ സൊസൈറ്റി പ്രസിഡന്‍റ് ജോജോ മനയംമ്പിള്ളി എന്നിവർ പ്രസംഗിച്ചു.

വടക്കേക്കരയിലെ കുടിവെള്ളക്ഷാമം: സിപിഎം ധർണ നടത്തി

പറവൂർ: വടക്കേക്കര പഞ്ചായത്തിലെ രൂക്ഷമായ കുടിവെള്ള ക്ഷാമം പരിഹരിക്കുക, പ്രശ്നം പരിഹരിക്കുന്നതിന് പ്രതിപക്ഷനേതാവ് വി.ഡി. സതീശനും ജല അഥോറിറ്റി ഉദ്യോഗസ്ഥരും കാണിക്കുന്ന അനാസ്ഥ അവസാനിപ്പിക്കുക എന്നീ ആവശ്യങ്ങളുന്നയിച്ച് സിപിഎം വടക്കേക്കര, മൂത്തകുന്നം ലോക്കൽ കമ്മിറ്റികളുടെ നേതൃത്വത്തിൽ പറവൂർ ജല അഥോറിറ്റി ഓഫീസിന് മുന്നിൽ ധർണ നടത്തി. ഏരിയ സെക്രട്ടറി ടി.വി. നിധിൻ ഉദ്ഘാടനം ചെയ്തു. വടക്കേക്കര ലോക്കൽ സെക്രട്ടറി എ.ബി. മനോജ് അധ്യക്ഷനായി. വിഷു ദിനത്തിൽപ്പോലും കുടിവെള്ളമില്ലാതെ വലയുന്ന സാഹചര്യമായിരുന്നെന്നും, മാല്യങ്കര പ്രദേശങ്ങളിൽ ആഴ്ചകളായി കുടിവെള്ളം ലഭിച്ചിട്ടെന്നും സമരക്കാർ ആരോപിച്ചു. ജില്ലാ പഞ്ചായത്തംഗം എ.എസ്. അനിൽകുമാർ, പറവൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് കെ.എസ്. സനീഷ്, ഏരിയ കമ്മിറ്റിയംഗം കെ.എം. അംബ്രോസ്, മൂത്തകുന്നം ലോക്കൽ സെക്രട്ടറി പി.ഡി. രാജീവ് എന്നിവർ സംസാരിച്ചു.

ഓഞ്ഞിപ്പുഴയെ വീണ്ടെടുക്കാൻ രാപ്പകൽ സമരം തുടങ്ങി

ആലുവ: പെരിയാറിന്‍റെ കൈവഴിയായ ഓഞ്ഞിപ്പുഴയിലെ 64 കൈയേറ്റങ്ങൾ തിരിച്ചുപിടിക്കണമെന്നാവശ്യപ്പെട്ട് ഓഞ്ഞിത്തോട് സംരക്ഷണ ജനകീയ സമിതിയുടെ നേതൃത്വത്തിൽ രാപ്പകൽ സമരം ആരംഭിച്ചു. കടുങ്ങല്ലൂർ ഗ്രാമപഞ്ചായത്ത് കവലയിൽ സംവിധായകൻ സന്തോഷ് പണ്ഡിറ്റ് രാപ്പകൽ സമരം ഉദ്ഘാടനം ചെയ്തു. സി.ആർ. നീലകണ്ഠൻ, ജസ്റ്റിസ് കെ. സുകുമാരൻ, അഡ്വ. ജയശങ്കർ, പ്രകൃതി പരിസ്ഥിതി പ്രവർത്തകൻ ശ്രീമൻ നാരായണൻ, സുന്ദരം ഗോവിന്ദ് തുടങ്ങിയവർ പ്രസംഗിച്ചു. നാളെ രാവിലെ 11ന് സമാപിക്കും. കടുങ്ങല്ലൂർ, ആലങ്ങാട് പഞ്ചായത്തുകളിലായി ജില്ല കളക്‌റുടെ സ്പെഷൽ സർവേ ടീം കണ്ടെത്തിയ 64 കൈയേറ്റങ്ങൾ തിരിച്ചുപിടിക്കണമെന്നാണ് സമിതിയുടെ പ്രധാന ആവശ്യം. ഓഞ്ഞിത്തോട് സംരക്ഷണ ജനകീയ സമിതിയുടെ ഹർജിയെ തുടർന്നാണ് 2021 ൽ കേരള ഹൈക്കോടതിയുടെ ഇടപെട്ട് സർവെ നിർദേശിച്ചത്.

ഓൺലൈൻ ടാക്സി സർവീസിനെതിരെ മരടിൽ പ്രതിഷേധം

മരട്: ഓൺലൈൻ ടാക്സി സർവീസിനെതിരെ അസംഘടിത തൊഴിലാളി കോൺഗ്രസ് മരട് മണ്ഡലം കമ്മിറ്റിയുടെ നേതൃത്വത്തിൽ പ്രതിഷേധം. ഫോറം മാളിൽ നിന്ന് സവാരിയെടുക്കുന്ന ഓൺലൈൻ ഓട്ടോ ടാക്സികൾക്കെതിരെയും ഒത്താശ ചെയ്യുന്ന ഉദ്യോഗസ്ഥർക്കെതിരെയും യുഡബ്ലിയുഇസി സംഘടിപ്പിച്ച സമരം മരട് നഗരസഭ ചെയർമാൻ ആന്‍റണി ആശാംപറമ്പിൽ ഉദ്ഘാടനം ചെയ്തു.യുഡബ്ലിയുഇസി മരട് മണ്ഡലം പ്രസിഡന്‍റ് നജീബ് താമരക്കുളം അധ്യക്ഷത വഹിച്ചു. ജിൻസൺ പീറ്റർ, സി.ഇ. വിജയൻ, ആന്‍റണി കളരിക്കൽ, പി.പി.സന്തോഷ്, രാജി സുമേഷ്, ചന്ദ്രകലാധരൻ, സി.പി.ഷാജികുമാർ, സുനിത തെക്കേവീട്ടിൽ, കെ.പി. രമേശൻ തുടങ്ങിയവർ പ്രസംഗിച്ചു.

അശമന്നൂരിൽ ഭരണ-പ്രതിപക്ഷാംഗങ്ങൾ തമ്മിൽ കൈയേറ്റം

പെരുമ്പാവൂർ: അശമന്നൂർ പഞ്ചായത്ത്‌ ഓഫീസിൽ ഭരണപക്ഷ പ്രതിപക്ഷ മെമ്പർമാർ തമ്മിൽ കയ്യാങ്കളിയും വാക്കേറ്റവും. പഞ്ചായത്ത്‌ ഓഫീസിന് മുന്നിലെ കിണറിനോട് ചേർന്ന് മാലിന്യം നിക്ഷേപിച്ചതുമായി ബന്ധപ്പെട്ടാണ് പ്രശ്നങ്ങൾ രൂക്ഷമായത്. പഞ്ചായത്ത് ഓഫീസിന് മുന്നിലെ കക്കൂസ് ടാങ്ക് പൊട്ടി മാലിന്യം കിണറിലേക്ക് ഒഴുകുകയാണ് എന്നും കിണർ വെള്ളം ആശുദ്ധമാണെന്നും അടിയന്തിരമായി കിണർ ശുദ്ധീകരിക്കണമെന്നും പ്രതിപക്ഷ മെമ്പർമാർ ആവശ്യപ്പെട്ടു. ഓടക്കാലി ടൗൺ ക്ലീൻ ചെയ്യുന്ന മാലിന്യങ്ങൾ, ഹരിത കർമ്മ സേന ശേഖരിക്കുന്ന മാലിന്യങ്ങൾ എന്നിവയെല്ലാം പഞ്ചായത്ത്‌ ഓഫീസിന് മുന്നിലെ കിണറിനോട് ചേർന്നാണ് നിക്ഷേപിച്ചത്. മൂന്നാഴ്ച മുമ്പ് ആരോഗ്യ വകുപ്പ് ഉദ്യോഗസ്ഥർ പഞ്ചായത്ത് സെക്രട്ടറിയോട് മാലിന്യങ്ങൾ ഉടൻ നീക്കം ചെയ്യണമെന്നും അല്ലാത്തപക്ഷം ഗുരുതരമായ ആരോഗ്യപ്രശ്നങ്ങൾക്ക് കാരണമാകുമെന്നും മുന്നറിയിപ്പ് നൽകിയിരുന്നു. എന്നാൽ ഒരു നടപടിയും സ്വീകരിക്കാൻ പഞ്ചായത്ത് ഉദ്യോഗസ്ഥർ തയാറായില്ല. പഞ്ചായത്ത് ഉദ്യോഗസ്ഥരെ നിയന്ത്രിക്കാൻ ഭരണ സമിതി ക്ക് കഴിയില്ലെങ്കിൽ രാജിവച്ചു പോകുന്നതാണ് നല്ലതെന്ന് പ്രതിപക്ഷ മെമ്പർമാർ പറഞ്ഞു.കിണറിനോട് ചേർന്നുള്ള മാലിന്യം നീക്കം ചെയ്യാതെ ഞങ്ങൾ പിരിഞ്ഞു പോകില്ലെന്ന് പ്രതിപക്ഷ മെമ്പർമാരായ പി.കെ. ജമാൽ, സുബൈദപരീത്, എൻ.എം. നൗഷാദ്,പി.പി. രഘുകുമാർ എന്നിവർ വാശിപിടിച്ചതോടെ നിർവാഹമില്ലാത്ത സാഹചര്യത്തിൽ പഞ്ചായത്ത് ഉദ്യോഗസ്ഥരും ആരോഗ്യ സ്റ്റാൻഡിംഗ് കമ്മിറ്റി അംഗങ്ങളും ചേർന്ന് മാലിന്യങ്ങൾ നീക്കം ചെയ്തു.

മിസ്റ്റർ എറണാകുളം ഐസക് ഷാജുവിനെ അനുമോദിച്ചു

മഞ്ഞപ്ര : 75 കിലോ കാറ്റഗറി മൽസരത്തിൽ മിസ്റ്റർ എറണാകുളം പട്ടം നേടി സ്വർണമെഡിന് അർഹനായ മഞ്ഞപ്ര തെക്കിനേൻ ഐസക് ഷാജുവിനെ അനുമോദിച്ചു. ഇന്ദിരാ ഗാന്ധി കൾച്ചറൽ ഫോറം മഞ്ഞപ്ര മണ്ഡലം കമ്മിറ്റിയുടെ നേതൃത്വത്തിൽ മുതിർന്ന കോൺഗ്രസ് അംഗം ഐസക്കിന് ഉപഹാരം നൽകി ആദരിച്ചു. കോൺഗ്രസ് ബ്ലോക്ക് ജനറൽ സെക്രട്ടറി ഡേവിസ് മണവാളൻ , യൂത്ത് കോൺഗ്രസ് ബ്ലോക്ക് ജനറൽ സെക്രട്ടറി അലക്സ് ആന്‍റു, ഐഎൻടിയുസി മണ്ഡലം പ്രസിഡന്‍റ് ജോസൺ വി. ആന്‍റണി, നേതാക്കളായ എം.ഇ. സെബാസ്റ്റ്യൻ, ഡേവീസ് ചൂരമന, ജോൺസൺ തിരുതനത്തിൽ എന്നിവർ പ്രസംഗിച്ചു. പണിക്കേഴ്സ് ബോഡി ബിൽഡിംഗ് അസോസിയേഷൻ സംഘടിപ്പിച്ച മൽസരത്തിലാണ് ഐസക്ക് ഷാജു ഗോൾഡ് മെഡലിന് അർഹനായത്. മഞ്ഞപ്ര പഞ്ചായത്ത് ഒൻപതാം വാർഡിൽ പി ആൻഡ് പി കവലക്ക് സമീപം താമസിക്കുന്ന തെക്കിനേൻ വീട്ടിൽ പ്ലാന്‍റേഷൻ കോർപറേഷൻ ഫീൽഡ് എക്സിക്യൂട്ടിവ് ടി.എ. ഷാജുവിന്‍റെയും റീനയുടെയും മകനാണ് ഐസക്ക്.

ഉമ്മൻ ചാണ്ടി പാലിയേറ്റീവ് കെയറിന്‍റെ ഉദ്ഘാടനം നടത്തി

അയ്യമ്പുഴ: ഇന്ദിരാ ഗാന്ധി കൾച്ചറൽ ഫോറം അയ്യമ്പുഴ മണ്ഡലം കമ്മിറ്റിയുടെ നേതൃത്വത്തിൽ ഉമ്മൻ ചാണ്ടി പാലിയേറ്റീവ് കെയറിന്‍റെ ഉദ്ഘാടനം ബെന്നി ബെഹനാൻ എംപി നിർവഹിച്ചു. റോജി എം. ജോൺ എംഎൽഎ പാലിയേറ്റീവ് കെയർ ഉപകരണങ്ങളുടെ വിതരണോദ്‌ഘാടനം നിർവഹിച്ചു. കൾച്ചറൽ ഫോറം പ്രസിഡന്‍റ് അനൂപ് അഗസ്റ്റിൻ അധ്യക്ഷനായിരുന്നു. കൾച്ചറൽ ഫോറം കൺവീനർ വർഗീസ് മാണിക്യത്താൻ, ഷെൽബി ബെന്നി, കെ.പി. ബേബി, കെ.ഒ. വർഗീസ്, വി.പി. ചെറിയാൻ, ബിജു കാവുങ്ങ, ചാക്കോ വർഗീസ്, ചെറിയാൻ തോമസ്, ലൈജു ഈരാളി, പി.ടി. അശോകൻ, സി.ജെ. ഫ്രാൻസിസ്, വാർഡ് മെമ്പർമാരായ ജാൻസി ജോണി, ജയ ഫ്രാൻസിസ് തുടങ്ങിയവർ സംസാരിച്ചു.

കുത്തേറ്റ് യുവാവ് ആശുപത്രിയിൽ

മരട്: കടം വാങ്ങിയ പണം തിരികെ നൽകാൻ വൈകിയതിനെ തുടർന്ന് യുവാവിനെ നാലംഗ സംഘം കത്തിക്ക് കുത്തി പരിക്കേല്പിച്ചതായി പരാതി. ഞാറയ്ക്കൽ പീച്ചുള്ളിൽ വീട്ടിൽ പ്രമോദ് പി.പി (21) നാണ് വിഷു ദിനത്തിൽ രാത്രി കുണ്ടന്നൂർ പാലത്തിനടിയിൽ വച്ച് കുത്തേറ്റത്. രാത്രി 10.45ഓടെ നാലംഗ സംഘം പ്രമോദിനെ തടഞ്ഞുനിർത്തി കത്തികൊണ്ട് നെഞ്ചിലും വാരിയെല്ലിലും കുത്തുകയായിരുന്നുവെന്ന് പറയുന്നു. ഗുരുതര പരിക്കേറ്റ പ്രമോദിനെ കളമശേരി മെഡിക്കൽ കോളജിൽ പ്രവേശിപ്പിച്ചു. മരട് പോലീസ് കേസെടുത്തു.

ഫിസാറ്റിൽ ഏഴുകോടിയുടെ പത്തിലേറെ അന്തർദേശീയ ലാബുകൾക്ക് അനുമതി

അങ്കമാലി: അങ്കമാലി ഫിസാറ്റ് എൻജിനീയറിംഗ് കോളജിൽ പത്തിലേറെ അന്തർദേശീയ ലാബുകൾക്ക് കേന്ദ്രസർക്കാർ അനുമതി. ആപ്പിൾ, എ ഡബ്ല്യൂഎസ്, ഇന്‍റൽ, വിഎൽഎസ്ഐ, ഐബി എം, മാത്ത് വർക്സ്, കേംബ്രിഡ്ജ്, മൈക്രോസോഫ്റ്റ്, ഓട്ടോഡെസ്‌ക്, സ്‌നൈഡർ ഇലക്ട്രിക്ക്, സ്‌നൈഡർ ഹോം ഓട്ടോമേഷൻ ലാബ് തുടങ്ങി പത്തിലേറെ അന്തർദേശിയ ലാബുകൾ തുടങ്ങുന്നതിനാണ് കേന്ദ്രസർക്കാർ അനുമതി നൽകിയിരിക്കുന്നത്. ഡൽഹിയിൽ കേന്ദ്ര നൈപുണ്യ സംഭരംഭകത്വ വികസന മന്ത്രാലയത്തിൽ നടന്ന ചടങ്ങിൽ ഫിസാറ്റ് ചെയർമാൻ പി.ആർ. ഷിമിത്തും നാഷണൽ സ്കിൽ ഡെവലപ്മെന്‍റ് കോർപറേഷൻ ചീഫ് എക്സിക്യൂട്ടീവ് ഓഫീസർ വേദ് തിവാരിയും ധാരണാ പത്രത്തിൽ ഒപ്പുവച്ചു. ക്‌ളാസ് മുറികളിലെ പഠനത്തോടൊപ്പം വ്യവസായിക മേഖലകളിലെ നൂതന സാദ്ധ്യതകൾ തിരിച്ചറിഞ്ഞു ഫിസാറ്റിലെ മുഴുവൻ വിദ്യാർഥികൾക്കും പഠനത്തോടൊപ്പം ഇതു വഴി ഗ്ലോബൽ സർഫിഫിക്കേഷനും ലഭിക്കും. ബിടെക്, എം ടെക്, എം സിഎ, എംബിഎ എന്നീ കോഴ്സുകളിൽ പഠനം പൂർത്തിയാക്കുന്ന വിദ്യാർഥികൾക്ക് ഡിഗ്രിക്ക് പുറമെ അന്തർദേശീയ ലാബുകളിൽ നിന്നുള്ള ഏഴു ഗ്ലോബൽ സർട്ടിഫിക്കേഷൻ പ്രോഗ്രാമുകൾ കൂടി ലഭിക്കും. ഏഴുകോടി രൂപയാണ് കേന്ദ്രസർക്കാർ ഇതിനായി അനുവദിച്ചിരിക്കുന്നത്. കേരളത്തിൽ ആദ്യമായിട്ടാണ് ഒരു എൻജിനീയറിഗ് കോളജിന് പത്തിലേറെ അന്തർദേശീയ ലാബുകൾ അനുവദിക്കുന്നത്. ഈ വർഷം ജൂലൈയോട് കൂടി ലാബുകൾ പ്രവർത്തന ക്ഷമമാകുമെന്ന് ചെയർമാൻ പി.ആർ. ഷിമിത്ത് പറഞ്ഞു. ചടങ്ങിൽ നാഷണൽ സ്കിൽ ഡെവലപ്മെന്‍റ് കോർപറേഷൻ ജനറൽ മാനേജർ വരുൺ ബത്ര, എത്തനോ ടെക് സൊല്യൂഷൻസ് സിഇഓ ഡോ. കിരൺ രാജണ്ണ, എൻഎസ്ഡിസി മാനേജർ സഹിൽ ഗോയൽ, ഫിസാറ്റ് കോളജ് ട്രഷറർ ജെനിബ് ജെ. കാച്ചപ്പിള്ളി, പ്രിൻസിപ്പൽ ഡോ. ജേക്കബ് തോമസ്, ചീഫ് ലെയ്സൺ ഓഫീസർ ഷിന്‍റോ സെബാസ്റ്റ്യൻ തുടങ്ങിയവർ പങ്കെടുത്തു.

ശ്രേഷ്ഠജന കൂട്ടായ്മ

ചേരാനല്ലൂർ: ചേരാനല്ലൂർ സെന്‍റ് ഫ്രാൻസീസ് സേവ്യേഴ്സ് പള്ളിയിൽ വിൻസന്‍റ് ഡി പോൾ സംഘടനയുടെ നേതൃത്വത്തിൽ ശ്രേഷ്ഠജന കൂട്ടായ്മ നടത്തി. 70നു മുകളിൽ പ്രായമുള്ള 200 ഓളം വയോജനങ്ങൾ പരിപാടിയിൽ പങ്കെടുത്തു. കുമ്പസാരം, കുർബാന, പൊതുസമ്മേളനം, സ്നേഹവിരുന്ന് എന്നിവയിൽ ഏല്ലവരും സജീവമായി പങ്കെടുത്തു. പൊതുയോഗത്തിൽ കോൺഫ്രൻസ് പ്രസിഡന്‍റ് ജോസഫ് പുതുശേരി അധ്യക്ഷത വഹിച്ചു. പളളി വികാരി ഫാ. തോമസ് പെരുമായൻ യോഗം ഉദ്ഘാടനം ചെയ്തു. ബ്രദർ ബെന്‍റ്‌ലി താടിക്കാരൻ, ബ്രദർ ജോസ് പോൾ എന്നിവർ ആശംസകൾ അർപ്പിച്ചു.

സ്കൂട്ടർ യാത്രിക ലോറി തട്ടി മരിക്കാനിടയായ സംഭവം : കെഎംആർഎൽ അധികൃതരുടേത് അനങ്ങാപ്പാറ നയമെന്ന് വ്യാപാരികൾ

ഫുട്പാത്തുകളിലൂടെ ഇരുചക്ര വാഹനങ്ങൾ ചീറിപ്പായുന്നത് നിത്യസംഭവം കോൺക്രീറ്റു പില്ലറുകൾ സ്ഥാപിക്കുമെന്ന് മെട്രോ റെയിൽ അധികൃതർ കാക്കനാട്: ഇന്നലെ ചെമ്പുമുക്കിൽ സ്കൂട്ടർ യാത്രിക ടാങ്കർലോറി മുട്ടി മരിക്കാനിടയായ സംഭവത്തിൽ മെട്രോ റെയിൽ അധികൃതരുടേത് കനത്ത അനാസ്ഥയെന്ന് ഡിവിഷൻ കൗൺസിലർ കെ.എക്സ്. സൈമൺ. ഫുട്പാത്തുകളിൽ കോൺക്രീറ്റു സ്റ്റോപ് പില്ലറുകൾ സ്ഥാപിക്കണമെന്ന് മൂന്ന് മാസം മുൻപ് തന്നെ മെട്രോറെയിൽ അധികൃതരോട് ആവശ്യപ്പെട്ടിരുന്നതായി ഡിക്സൺ പറഞ്ഞു. മെട്രോ റയിൽ രണ്ടാംഘട്ട നിർമാണം മൂലം ആലിൻ ചുവടു മുതൽ കാക്കനാട് കുന്നുംപുറം വരെ രാവിലെയും വൈകുന്നേരങ്ങളിലും കനത്ത ഗതാഗതക്കുരുക്ക് ഉണ്ടാവാറുണ്ട്. തിരക്ക് ഒഴിവാക്കാൻ ഇരു ചക്രവാഹന യാത്രക്കാർ ഫുട്പാത്തുകളിലൂടെ സഞ്ചരിക്കുന്നത് നിത്യകാഴ്ചയാണ്. അപകടത്തിൽപെട്ട സ്കൂട്ടർ യാത്രികരും ഫുട്പാത്തിലൂടെ സഞ്ചരിക്കുന്നതിനിടയിലാണ് അപകടത്തിൽപ്പെട്ടതെന്ന് ദൃക്സാക്ഷികൾ പറയുന്നു. കച്ചവട സ്ഥാപനങ്ങൾക്കു മുന്നിലുള്ള ഫുട്പാത്തിലൂടെ അതിവേഗം ഇരുചക്ര വാഹനങ്ങൾ ചീറി പാഞ്ഞുവരുന്നത് പലപ്പോഴും അപകടകാരണമായിട്ടുണ്ട്. അതേസമയം ഫുട്പാത്തിൽ കോൺക്രീറ്റു പില്ലറുകൾ സ്ഥാപിച്ചിരുന്നെങ്കിൽ അപകടം ഒഴിവാക്കാൻ കഴിയുമായിരുന്നു എന്ന അഭിപ്രായമാണ് വ്യാപാരികൾക്കുള്ളത് തൃക്കാക്കര നഗരസഭാ ഡിവിഷൻ കൗൺസിലർ കെ.എക്സ്. സൈമൺ കെഎംആർഎൽ അധികൃതരുമായി നടത്തിയ ചർച്ചയിൽ എത്രയും വേഗം കോൺക്രീറ്റു പില്ലറുകൾ സ്ഥാപിക്കാൻ നടപടി സ്വീകരിക്കുമെന്ന് ബന്ധപ്പെട്ടവർ അറിയിക്കുകയായിരുന്നു.

അങ്കമാലി ബസിലിക്കയിൽ പുതുഞായർ തിരുനാൾ

അങ്കമാലി: അങ്കമാലി സെന്‍റ് ജോര്‍ജ് ബസിലിക്കയില്‍ വിശുദ്ധ ഗീവര്‍ഗീസ് സഹദായുടെ തിരുനാളും പുതുഞായറും 19 മുതല്‍ മെയ് നാലു വരെയുള്ള തീയതികളില്‍ ആഘോഷിക്കും. ബസിലിക്ക റെക്ടര്‍ ഫാ. ലൂക്കോസ് കുന്നത്തൂര്‍, ജനറൽ കൺവീനർ ജോബെല്‍റ്റ് ആറ്റുപുറം എന്നിവരുടെ നേതൃത്വത്തിൽ 150 അംഗ കമ്മിറ്റിയാണ് തിരുനാൾ ആഘോഷങ്ങള്‍ക്ക് നേതൃത്വം നല്‍കുന്നത്. എഡി 450ല്‍ സ്ഥാപിച്ച അങ്കമാലി പള്ളിയില്‍ ഈസ്റ്റര്‍ കഴിഞ്ഞു വരുന്ന പുതുഞായറാഴ്ചയോനോടനുബന്ധിച്ചാണ് ഇടവക മധ്യസ്ഥന്‍റെ തിരുനാള്‍ ആഘോഷിക്കുന്നത്. വടി എഴുന്നള്ളിക്കലാണ് പ്രധാന നേര്‍ച്ച. ദുഃഖശനിയുടെ തിരുക്കര്‍മങ്ങള്‍ക്കു ശേഷം തിരുനാളിന് ഒരുക്കമായ നൊവേന ആരംഭിക്കും. പാരമ്പര്യ ആചാരപ്രകാരം കിഴക്കേപ്പള്ളി സെന്‍റ് ഹോര്‍മീസ് ദേവാലയത്തില്‍ 25 വെള്ളിയാഴ്ച രാവിലെ കൊടിയേറ്റും. ബസലിക്ക ദേവാലയത്തില്‍ 26 ശനിയാഴ്ച വൈകിട്ട് കൊടിയേറ്റും. 27 പുതുഞായറാഴ്ചയും ഏ28 വിശുദ്ധ ഗീവര്‍ഗീസ് സഹദായുടെ തിരുനാള്‍ ദിനത്തിലും രാവിലെ മുതല്‍ തിരുകര്‍മങ്ങളില്‍ പങ്കെടുക്കുവാനും അടിമ വെയ്ക്കുവാനും വടി എഴുള്ളിക്കാനും അവസരം ലഭിക്കും. തിരുനാളിന്‍റെ അങ്ങാടി പ്രദക്ഷിണം 27 ഞായറാഴ്ചയും, ആഘോഷമായ പ്രദക്ഷിണം 28 തിങ്കളാഴ്ചയും ആണ്. 27ന് വൈകീട്ട് ആട്ടം കലാസമിതിയും - തേക്കിന്‍കാട് മ്യൂസിക് ബാന്‍റിന്‍റെ മ്യൂസിക് ഫ്യൂഷന്‍, 28 ന് വൈകിട്ട് ആകാശവിസ്മയം, ലൈറ്റ് ആന്‍ഡ് സൗണ്ട് ഷോ. മെയ് നാല് ഞായറാഴ്ചയാണ് എട്ടാമിടം. വൈകിട്ട് വര്‍ഗീസ്-ജോര്‍ജ് നാമധാരികളുടെ സംഗമം, ഇടവകക്കാര്‍ ഒരുക്കുന്ന കലാസന്ധ്യയും നടക്കും. ഏപ്രില്‍ 29 ചൊവ്വാഴ്ച വൈകിട്ട് ഇടവകയിലെ മരിച്ചുപോയവര്‍ക്ക് റാസ കുര്‍ബാന തുടർന്ന്‌ സമര്‍പ്പിത സംഗമം. ഏപ്രില്‍ 30 ബുധന്‍ വൈകിട്ട് വിവിധ ഭക്തസംഘടനകളുടെ വാര്‍ഷികം, കലാപരിപാടികള്‍, മെയ് ഒന്ന് വ്യാഴം വൈകിട്ട് യൂത്ത് ഫെസ്റ്റ്, മെയ് രണ്ട് വെള്ളി ആദ്യ വെള്ളി ആചരണം.

തൃക്കാക്കര നഗരസഭ: അബ്ദുഷാന വൈസ് ചെയർമാൻ പദവി രാജിവച്ചു

കാക്കനാട് : തൃക്കാക്കര നഗരസഭാ വൈസ് ചെയർമാൻ അബ്ദുഷാന പദവി രാജിവച്ചുള്ള കത്ത് മുനിസിപ്പൽ സെക്രട്ടറിക്കു കൈമാറി. കാക്കനാട് ഇടച്ചിറ ഡിവിഷനിൽ നിന്നും സ്വതന്ത്ര സ്ഥാനാർഥിയായി മൽസരിച്ച് നഗരസഭാ കൗൺസിലിൽ എത്തിയ അബ്ദു ഷാന യുഡിഎഫിന് അധികാരത്തിലെത്താൻ തുടക്കം മുതൽ പിന്തുന്ന നൽകിയിരുന്നു. പിന്തുണയുമായി ഒപ്പം നിന്ന മറ്റൊരു സ്വതന്ത്ര കൗൺസിലർ ഇ.പി. കാതരു കുഞ്ഞ് മൂന്നര വർഷത്തിനു ശേഷം യുഡിഎഫ് വിട്ട് ഇടതുമുന്നണിക്കൊപ്പം ചേർന്നിരുന്നു.

പൾസ് ഓഫ് തൃപ്പൂണിത്തുറയ്ക്ക് പുരസ്കാരം സമ്മാനിച്ചു

തൃപ്പൂണിത്തുറ: സേവന സന്നദ്ധ സംഘടനയായ പൾസ് ഓഫ് തൃപ്പൂണിത്തുറയുടെ നേതൃത്വത്തിൽതൃപ്പൂണിത്തുറ നഗരസഭയുടെ മാലിന്യ സംസ്കരണത്തിനായി നടത്തുന്ന സേവന പ്രവർത്തനങ്ങൾക്കായി നൽകിയ നഗരസഭയുടെ പുരസ്കാരം ജില്ലാ കളക്ടർ എൻ.എസ്.കെ. ഉമേഷിൽ നിന്നും പൾസ് ഓഫ് തൃപ്പൂണിത്തുറ ഭാരവാഹികളായ പ്രകാശ് അയ്യർ, എം.എം. മോഹനൻ, ജെയിംസ് മാത്യു എന്നിവർ ചേർന്ന് ഏറ്റുവാങ്ങി. നഗരസഭാ ചെയർപേഴ്സൺ രമ സന്തോഷ്, വൈസ് ചെയർമാൻ കെ.കെ. പ്രദീപ് കുമാർ, മുനിസിപ്പൽ സെക്രട്ടറി പി.കെ. സുഭാഷ്, സ്റ്റാൻഡിംഗ് കമ്മിറ്റി ചെയർമാൻമാരായ സി.എ. ബെന്നി, യു.കെ. പീതാംബരൻ, ജയ പരമേശ്വരൻ, മാലിന്യ സംസ്കരണ കോ ഓർഡിനേറ്റർ ത്യാഗരാജൻ പോറ്റി തുടങ്ങിയവർ ചടങ്ങിൽ പങ്കെടുത്തു.

ലക്കി സ്റ്റാർ ഫുട്‌ബോൾ ടൂർണമെന്‍റ് 20 മുതൽ

ആലുവ: മർച്ചന്‍റ്സ് അസോസിയേഷന്‍റെ ആഭിമുഖ്യത്തിൽ ലക്കി സ്റ്റാർ ട്രോഫിയ്ക്കു വേണ്ടിയുള്ള അഖിലേന്ത്യ ഫ്ളഡ്‌ ലിറ്റ് ഫുട്‌ബോൾ ടൂർണമെന്‍റ് 20 ന് ആരംഭിക്കും. രാത്രി 7.30 ന് ആലുവ മുനിസിപ്പൽ ഫ്ളഡ്‌ലിറ്റ് സ്റ്റേഡിയത്തിൽ ആലുവ നഗരസഭാ ചെയർമാൻ എം.ഒ. ജോൺ ഉദ്ഘാടനം ചെയ്യും. 27 വരെ നീണ്ടു നിൽക്കുന്ന മത്സരത്തിൽ ഇന്ത്യയിലെ പ്രമുഖ ടീമുകളായ സൗത്ത് കോസ്റ്റ് തൂത്തുക്കുടി, ഹീറോസ് മദ്രാസ്, ബേസിക് പെരുമ്പാവൂർ, ലക്കി സ്റ്റാർ ആലുവ, സെവൻസ് കോതമംഗലം, മദീന എഫ്സി ചെർപ്പുളശേരി, മലബാർ എഫ്സി മലപ്പുറം, അൽഷാബ് ഇന്ത്യൻസ് തൃശൂർ എന്നീ ടീമുകളാണ് മാറ്റുരയ്ക്കുന്നത്. ഉദ്ഘാടന മത്സരത്തിൽ മലബാർ എഫ്സിമലപ്പുറവും സെവൻസ് കോതമംഗലവും തമ്മിൽ ഏറ്റുമുട്ടും. 26 ന് പ്രദർശന മത്സരത്തിൽ പ്രമുഖ രാഷ്ട്രീയ നേതാക്കളുടെ ടീമും ആലുവ മർച്ചന്‍റ്സ് അസോസിയേഷൻ ടീമും തമ്മിലുള്ള മത്സരം നടക്കും. പ്രവേശനം സൗജന്യം.

പേരണ്ടൂർ കനാലിൽ പടക്ക മാലിന്യം തള്ളി; 12,500 രൂപ പിഴ

കൊച്ചി: വിഷു ദിനത്തില്‍ തേവര പേരണ്ടൂര്‍ കനാലില്‍ പ്ലാസ്റ്റിക് അടക്കം പടക്കമാലിന്യങ്ങള്‍ തള്ളിയെന്ന പരാതിയില്‍ കുറ്റക്കാര്‍ക്കെതിരേ നടപടിയെടുത്ത് കോര്‍പറേഷന്‍ ഹെല്‍ത്ത് വിഭാഗം. എളമക്കര നേര്‍ത്ത് ഡിവിഷനിലെ ഗ്രീന്‍ ട്രിപ്പിള്‍ ലൈനിലുള്ള ഫ്ലാറ്റ് സമുച്ഛയത്തിലെ താമസക്കാരനായ അരുണ്‍ കിഷോറില്‍ നിന്നാണ് ഹെല്‍ത്ത് ഇന്‍സ്‌പെക്ടര്‍ പ്രജീഷ് കുമാറിന്‍റെ നേതൃത്വത്തിലുള്ള സ്‌ക്വാഡ് 12,500 രൂപ പിഴ ഈടാക്കിയത്. ഇയാള്‍ക്കൊപ്പം കനാലില്‍ മാലിന്യം നിക്ഷേപിച്ചതായി കണ്ടെത്തിയ സ്ത്രീക്കെതിരെയും കേസെടുത്തിട്ടുണ്ട്. എന്നാല്‍ ഇവരെ കണ്ടെത്താന്‍ കഴിഞ്ഞിട്ടില്ലാത്തതിനാല്‍ പിഴ ഈടാക്കിയില്ല. തിങ്കളാഴ്ച രാത്രിയില്‍ ഫ്ലാറ്റിന് സമീപം പടക്കം പൊട്ടിച്ച ശേഷം പ്ലാസ്റ്റിക് കവര്‍ ഉള്‍പ്പടെയുള്ള മാലിന്യങ്ങള്‍ പേരണ്ടൂര്‍ കനാലില്‍ തള്ളിയെന്ന് കാട്ടി പ്രദേശവാസിയായ ഒരാള്‍ നല്‍കിയ പരാതിയിലാണ് നടപടി. സ്ഥലത്തെത്തിയ ഹെല്‍ത്ത് വിഭാഗം ഉദ്യോഗസ്ഥര്‍ പരിശോധന നടത്തുകയും കനാലില്‍ മാലിന്യം കണ്ടെത്തുകയും ചെയ്തു. ഫ്ലാറ്റിലെ സെക്യൂരിറ്റിയെ ചോദ്യം ചെയ്തതില്‍ നിന്നാണ് അരുണും മറ്റൊരാളും അന്നേ ദിവസം പടക്കം പൊട്ടിച്ചതായി വിവരം ലഭിച്ചത്. അരുണിനെ ചോദ്യം ചെയ്തപ്പോള്‍ കുറ്റം സമ്മതിക്കുകയും ചെയ്തു. തുടര്‍ന്ന് 12,500 രൂപ പിഴ ഈടാക്കിയ ശേഷം ഇയാളെക്കൊണ്ട് തന്നെ മാലിന്യം കനാലില്‍ നിന്ന് നീക്കം ചെയ്യിച്ചു. മാലിന്യം നിക്ഷേപിച്ച മറ്റൊരു സ്ത്രീക്കെതിരെ കേസെടുത്തിട്ടുണ്ടെന്നും ഇവരെ ഫോണില്‍ ബന്ധപ്പെടാന്‍ കഴിഞ്ഞിട്ടില്ലെന്നും ഹെല്‍ത്ത് ഇന്‍സ്‌പെക്ടര്‍ പ്രജീഷ് കുമാര്‍ പറഞ്ഞു.

ഹാശാ ആഴ്ച ശുശ്രൂഷകൾ ഇന്നാരംഭിക്കും

മൂവാറ്റുപുഴ: വെള്ളൂർക്കുന്നം മൗണ്ട് താബോർ സെന്‍റ് പോൾസ് ചാപ്പൽ ഹാശാ ആഴ്ചയിലെ ശുശ്രൂഷകൾ ഇന്ന് ആരംഭിക്കും. വൈകുന്നേരം ആറിന് നമസ്കാരം. നാളെ പെസഹാ ശുശ്രൂഷ, തുടർന്ന് കുർബാന. 18ന് ദുഃഖവെള്ളിയാഴ്ച രാവിലെ ഏഴിന് നമസ്കാരം, തുടർന്ന് ശുശ്രൂഷകൾ. 19ന് രാവിലെ ഏഴിന് നമസ്കാരം, എട്ടിന് കുർബാന, വൈകുന്നേരം ആറിന് നമസ്കാരം, ഉയിർപ്പ് ശുശ്രൂഷകൾ, തുടർന്ന് കുർബാന. ചടങ്ങുകൾക്ക് വികാരി ജോർജ് മാന്തോട്ടം കോറെപ്പിസ്കോപ്പ കാർമികത്വം വഹിക്കുമെന്ന് ട്രസ്റ്റിമാരായ ജോയി വർഗീസ്, വി.ടി. പൈലി എന്നിവർ അറിയിച്ചു.

വീട്ടുമുറ്റ സദസ് സംഘടിപ്പിച്ചു

മൂവാറ്റുപുഴ: "വേണ്ട ലഹരിയും ഹിംസയും’ എന്ന മുദ്രാവാക്യം ഉയർത്തി ഡിവൈഎഫ്ഐ മൂവാറ്റുപുഴ സൗത്ത് ടൗണ്‍ യൂണിറ്റിന്‍റെ ആഭിമുഖ്യത്തിൽ വീട്ടുമുറ്റ സദസ് സംഘടിപ്പിച്ചു. മൂവാറ്റുപുഴ എക്സൈസ് ഇൻസ്പെക്ടർ റോയി എം. ജേക്കബ് ഉദ്ഘാടനം നിർവഹിച്ചു. മൂവാറ്റുപുഴ എക്സൈസ് ഓഫീസർ പി.പി. ഹസൈനാർ മുഖ്യപ്രഭാഷണം നടത്തി. രാജേഷ് കുമാർ അധ്യക്ഷത വഹിച്ചു.

വിശുദ്ധ വാരാചരണം

മൂവാറ്റുപുഴ: വാഴപ്പിള്ളി ക്രിസ്തുരാജ റോമൻ കത്തോലിക്ക പള്ളിയിൽ വിശുദ്ധവാരം ഇന്ന് ആരംഭിക്കും. വൈകുന്നേരം അഞ്ചിന് ദിവ്യപൂജ, കാൽകഴുകൽ ശുശ്രൂഷ, ദിവ്യകാരുണ്യ പ്രദക്ഷിണം. നാളെ ഉച്ചയ്ക്ക് 12ന് കുരുശിന്‍റെ വഴി, കർത്താവിന്‍റെ പീഡാസഹനത്തിന്‍റെ ആചരണം. 19ന് രാത്രി 11ന് പെസഹാജാഗരം, ദീപാർച്ചന, പെസഹാ പ്രഘോഷണം, ദൈവ വചനപ്രഘോഷണം, സ്തോത്ര യാഗകർമം. 20ന് സെന്‍റ് വിൻസെന്‍റെ് ഡിപോളിന്‍റെ ആഭിമുഖ്യത്തിൽ ഭക്ഷ്യധാന്യ കിറ്റുകൾ വിതരണം ചെയ്യും.

സ്മാർട്ട് അങ്കണവാടി മന്ദിര ശിലാസ്ഥാപനം

മൂവാറ്റുപുഴ: മുവാറ്റുപുഴ നഗരസഭ അഞ്ചാം വാർഡിലെ ആസാദ് റോഡിൽ നിർമിക്കുന്ന സ്മാർട്ട് അങ്കണവാടി മന്ദിരത്തിന്‍റെ ശിലാസ്ഥാപനം നഗരസഭാധ്യക്ഷൻ പി.പി. എൽദോസ് നിർവഹിച്ചു. വർഷങ്ങളായി അഞ്ചാം വാർഡിൽ വാടക കെട്ടിടത്തിലാണ് അങ്കണവാടി പ്രവർത്തിക്കുന്നത്. നഗരസഭാംഗം പി.വി. രാധാകൃഷ്ണന്‍റെ ശ്രമഫലമായി ചെറുകപിള്ളി മുഹമ്മദ് സൗജന്യമായി വിട്ടുനൽകിയ സ്ഥലത്ത് അദ്ദേഹത്തിന്‍റെ പിതാവ് സി.എം. അലിക്കുഞ്ഞിന്‍റെ സ്മരണാർഥമാണ് സ്മാർട്ട് അങ്കണവാടി നിർമിക്കുന്നത്. ഇതിനായി നഗരസഭാ ഫണ്ടിൽനിന്നും 18 ലക്ഷം അനുവദിച്ചു.

പേ വാർഡ് ഉദ്ഘാടനം

കൂത്താട്ടുകുളം: എംഎൽഎയുടെ ആസ്തി വികസന ഫണ്ടിൽനിന്നു 50 ലക്ഷം വിനിയോഗിച്ച് നിർമാണം പൂർത്തീകരിച്ച ചെള്ളക്കപ്പടി ജേക്കബ് ഫിലിപ്പ് മെമ്മോറിയൽ ഗവ. ആയുർവേദ ആശുപത്രി പേ വാർഡിന്‍റെ ഉദ്ഘാടനം അനൂപ് ജേക്കബ് എംഎൽഎ നിർവഹിച്ചു. നഗരസഭാധ്യക്ഷ വിജയ ശിവൻ അധ്യക്ഷത വഹിച്ചു. വൈസ് ചെയർമാൻ സണ്ണി കുര്യാക്കോസ് മുൻ ഡോക്ടർമാരെ ആദരിച്ചു. മൂന്നു പേ വാർഡ് മുറികൾ, ഒരു ഡ്യൂട്ടി റൂം, ഒരു ട്രീറ്റ്മെന്‍റ് റൂം എന്നിങ്ങനെ ആധുനിക സൗകര്യത്തോടെയാണ് പണി പൂർത്തീകരിച്ചിട്ടുള്ളത്.

വക്കീൽ ഗുമസ്തർ ധർണ നടത്തി

മൂവാറ്റുപുഴ: സർക്കാർ വർധിപ്പിച്ച കോർട്ട് ഫീസ് പിൻവലിക്കണമെന്ന് ആവശ്യപ്പെട്ട് മൂവാറ്റുപുഴ, കോതമംഗലം, കോലഞ്ചേരി എന്നീ സ്ഥലങ്ങളിലെ വക്കീൽ ഗുമസ്തർ പണിമുടക്കി മൂവാറ്റുപുഴ ആർഡിഒ ഓഫീസിനു മുന്നിൽ ധർണ നടത്തി. കേരള സർക്കാർ അതിഭീമമായി വർധിപ്പിച്ച കോർട്ട് ഫീസ് ഉടൻ പിൻവലിക്കണമെന്ന് ധർണ സമരം സർക്കാരിനോട് ആവശ്യപ്പെട്ടു. ക്ലർക്കുമാർ ഈ ആവശ്യം ഉന്നയിച്ച് രണ്ടാംഘട്ടം നടത്തിയ സമരമാണിത്. ധർണ സമരത്തിന് അസോസിയേഷൻ പ്രസിഡന്‍റ് റെജി പ്ലാച്ചേരി അധ്യക്ഷത വഹിച്ചു. മൂവാറ്റപുഴ ബാർ അസോസിയേഷൻ പ്രസിഡന്‍റ് ജോസ് വർഗീസ് ഉദ്ഘാടനം ചെയ്തു.

കെഎസ്ആർടിസി ബസുകളുടെ ഫിറ്റ്നസ് ഉറപ്പാക്കാൻ അടിയന്തര നടപടി വേണം: എംപി

മൂവാറ്റുപുഴ: ഇടുക്കി ജില്ലയിൽ ഹൈറേഞ്ച് മേഖലയിൽ സർവീസ് നടത്തുന്ന കെഎസ്ആർടിസി ബസുകൾ ഭൂരിഭാഗവും കാലപ്പഴക്കമുള്ളതും ഫിറ്റ്നസ് പരിശോധന പൂർത്തിയാക്കാത്തതും ശരിയായ അറ്റകുറ്റപ്പണികൾ നടത്താത്തതുമാണെന്ന് കാണുന്ന സാഹചര്യത്തിൽ ബസുകളുടെ ഫിറ്റ്നസ് ഉറപ്പാക്കുന്നതിന് അടിയന്തര നടപടി സ്വീകരിക്കണമെന്ന് ഡീൻ കുര്യാക്കോസ് എംപി ഗതാഗത മന്ത്രി കെ.ബി. ഗണേഷ് കുമാറിന് അയച്ച കത്തിൽ ആവശ്യപ്പെട്ടു. മറ്റു മേഖലകളിൽ സർവീസ് നടത്തുന്നതു പോലെയുള്ള ബസുകൾ ഇടുക്കിയിൽ സർവീസ് നടത്തുന്നതിന് അനുയോജ്യമല്ല. ഇതിന്‍റെ ഫലമായാണ് കഴിഞ്ഞദിവസം നേര്യമംഗലത്തിനടുത്ത് അപകടം നടന്നതും 14 വയസുള്ള ഒരു വിദ്യാർഥിനി മരിക്കാനിടയായതും. പീരുമേടിൽ നടന്ന അപകടത്തിൽ ആളപായമുണ്ടായതും സമാന സാഹചര്യത്തിലാണ്. ഇതു വളരെ ഗൗരവമുള്ള ഒരു വിഷയമായി കണക്കിലെടുത്ത് ഹൈറേഞ്ച് മേഖലയിലൂടെ സർവീസ് നടത്തുന്ന കെഎസ്ആർടിസി ബസുകൾ പരമാവധി അഞ്ചു വർഷത്തിൽ താഴെ മാത്രം കാലപ്പഴക്കമുള്ളവയും ശരിയായ ഫിറ്റ്നസ് പരിശോധന പൂർത്തിയാക്കിയതുമായിരിക്കണം. കൂടാതെ അറ്റകുറ്റപ്പണികൾ യഥാസമയം പൂർത്തീകരിക്കുന്നുണ്ടെന്നും സ്പെയർ പാർട്സുകൾ ആവശ്യാനുസരണം ലഭിക്കുന്നുണ്ടെന്നും ഉറപ്പു വരുത്തണമെന്നും എംപി ആവശ്യപ്പെട്ടു.

ലഹരിക്കെതിരെ ജാഗ്രതാ സദസ്

മൂവാറ്റുപുഴ: വേണ്ട ലഹരിയും ഹിംസയും എന്ന സന്ദേശവുമായി ലഹരി വ്യാപനത്തിനെതിരെയുള്ള ജനകീയ പ്രതിരോധത്തിന്‍റെ ഭാഗമായി ഡിവൈഎഫ്ഐ ആരക്കുഴ മേഖല കമ്മിറ്റി ജാഗ്രതാ സദസ് നടത്തി. മൂവാറ്റുപുഴ പോലീസ് സർക്കിൾ ഇൻസ്പെക്ടർ ബേസിൽ തോമസ് യോഗം ഉദ്ഘാടനം ചെയ്തു. മൂവാറ്റുപുഴ ബ്ലോക്ക് പഞ്ചായത്ത് സ്ഥിരം സമിതി അധ്യക്ഷൻ ബെസ്റ്റിൻ ടി. ചേറ്റൂർ അധ്യക്ഷത വഹിച്ചു. വാഴക്കുളം വിശ്വജ്യോതി എൻജിനിയറിംഗ് കോളജ് പ്രിൻസിപ്പൽ കെ.കെ. രാജൻ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു.

ജനകീയ മുന്നേറ്റത്തിന്‍റെ വിജയം: രാജപാത കോ -ഓർഡിനേഷൻ കമ്മിറ്റി

കോതമംഗലം: ആലുവ - മൂന്നാർ രാജപാത വിഷയവുമായി ബന്ധപ്പെട്ട് ബിഷപ് ഉൾപ്പെടെയുള്ളവർക്കെതിരായി എടുത്തിരിക്കുന്ന പോലീസ്, ഫോറസ്റ്റ് കേസുകൾ പിൻവലിക്കാൻ മന്ത്രി പി. രാജീവിന്‍റെ അധ്യക്ഷതയിൽ ചേർന്ന ഉന്നതതല യോഗം തീരുമാനിച്ചത് സ്വാഗതാർഹമെന്ന് രാജപാത കോ ഓർഡിനേഷൻ കമ്മിറ്റി. മേഖലയിൽ നടന്ന വലിയ ജനകീയ മുന്നേറ്റത്തിനായി കഠിനപ്രയത്നം നടത്തിയ രാജപാത കോ -ഓർഡിനേഷൻ കമ്മിറ്റിക്കും ഇത് അഭിമാന നിമിഷമാണെന്ന് കോ ഓർഡിനേഷൻ കമ്മിറ്റി ജനറൽ കണ്‍വീനർ ഫാ. ജോസ് ചിരപ്പറന്പിൽ പറഞ്ഞു. ജനകീയ മുന്നേറ്റത്തിന്‍റെ വിജയമാണിതെന്നും അദ്ദേഹം കൂട്ടിച്ചേർത്തു.

നേര്യമംഗലം ജില്ലാ കൃഷിത്തോട്ടത്തിൽ ഇക്കോ ഷോപ്പ് ഉദ്ഘാടനം ചെയ്തു

കോതമംഗലം: ജില്ലാ പഞ്ചായത്ത് ഫണ്ട് ഉപയോഗിച്ച് നേര്യമംഗലം ജില്ലാ കൃഷിത്തോട്ടത്തിൽ നിർമിച്ച ഇക്കോ ഷോപ്പ് ഉദ്ഘാടനം ചെയ്തു. ജില്ലാ കൃഷിത്തോട്ടത്തിൽ ഉത്പാദിപ്പിക്കുന്ന ഉത്പന്നങ്ങൾ മുഴുവൻ സംഭരിക്കാനും പ്രദർശിപ്പിക്കാനും വിൽക്കുന്നതിനും കഴിയുന്ന വിധത്തിൽ വിപുലമായ സംവിധാനങ്ങളും സൗകര്യങ്ങളുമൊരുക്കി സജീകരിച്ചിരിക്കുന്ന ഇക്കോ ഷോപ്പിന്‍റെ ഉദ്ഘാടനം ഡീൻ കുര്യാക്കോസ് എംപി നിർവഹിച്ചു. സംസ്ഥാനത്തെ ഏറ്റവും മികച്ച ഫാമുകളിലൊന്നായി മാറിയ നേര്യമംഗലം ഫാമിന്‍റെ അനന്തമായ സാധ്യതകൾ മലയോര ടൂറിസം മേഖലയുടെ വളർച്ചയ്ക്ക് മുതൽക്കൂട്ടായി മാറുമെന്നും എംപി പറഞ്ഞു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ അധ്യക്ഷത വഹിച്ചു.

മോക്ഡ്രിൽ സംഘടിപ്പിച്ചു

കൂത്താട്ടുകുളം: അഗ്നിരക്ഷാസേനാദിന വാരാചരണത്തിന്‍റെ ഭാഗമായി കൂത്താട്ടുകുളം ഫയർ ആൻഡ് റസ്ക്യൂ സ്റ്റേഷന്‍റെ ആഭിമുഖ്യത്തിൽ ആറൂർ ഓട്ടോബാൻ ട്രക്കിംഗ് വർക്ക് ഷോപ്പിൽ മോക്ഡ്രിൽ സംഘടിപ്പിച്ചു. രാജ്യത്ത് വർധിച്ചുവരുന്ന അപകടങ്ങളെ ചെറുക്കുവാൻ ഇത്തരം മോക്ഡ്രില്ലുകൾക്ക് സാധിക്കുമെന്ന് ഗ്രേഡ് സ്റ്റേഷൻ ഓഫീസർ ജെ. രാജേന്ദ്രൻ നായർ പറഞ്ഞു. ഫയർ ആൻഡ് റസ്ക്യൂ ഓഫീസർമാരായ റിയോ പോൾ, പി. മൻസൂർ, എ.എം. ജിഷ്ണു, മാനസ് രാജു എന്നിവർ മോക്ഡ്രില്ലിന് നേതൃത്വം നൽകി.

എൻഐഎസ്എം പരിശീലനവും പ്ലേസ്മെന്‍റ് ഡ്രൈവും

ഇലഞ്ഞി: വിസാറ്റ് ആർട്സ് ആൻഡ് സയൻസ് കോളജിന്‍റെയും മുത്തൂറ്റ് സെക്യൂരിറ്റീസിന്‍റെയും സംയുക്താഭിമുഖത്തിൽ 21നു വിസാറ്റിൽ എൻഐഎസ്എം പരിശീലനവും പ്ലേസ്മെന്‍റ് ഡ്രൈവും നടക്കും. എൻഐഎസ്എം പരീക്ഷ പാസാക്കുന്നതിനു വേണ്ടുന്ന പരിശീലനവും ഇതിന്‍റെ ഭാഗമായി നൽകും. ഏകദിന സെമിനാറും പ്ലേസ്മെന്‍റ് ഡ്രൈവും എംജി യൂണിവേഴ്സിറ്റി വിസി പ്രഫ. സി.ടി. അരവിന്ദകുമാർ ഉദ്ഘാടനം ചെയ്യും. വിസാറ്റ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ചെയർമാൻ രാജു കുര്യൻ അധ്യക്ഷത വഹിക്കും. മുത്തൂറ്റ് സെക്യൂരിറ്റീസ് ചീഫ് ബിസിനസ് ഓഫീസർ ജിബി മാത്യു മുഖ്യപ്രഭാഷണം നടത്തും. മുത്തൂറ്റ് സെക്യൂരിറ്റീസ് സ്റ്റേറ്റ് ഹെഡ് ബിനു ജോസഫ്, റീജണർ മാനേജർ കൃഷ്ണ പ്രസാദ് എന്നിവർ ക്ലാസുകൾ നയിക്കും. പരിശീലന പരിപാടി വിജയകരമായി പൂർത്തിയാക്കുന്ന 60 പേർക്ക് മുത്തൂറ്റ് സെക്യൂരിറ്റീസിൽ റിലേഷൻഷിപ്പ് മാനേജരായി നിയമനം നൽകും. പത്തിലധികം ആർട്സ് ആൻഡ് സയൻസ് കോളജുകളിലെ വിദ്യാർഥികൾ പ്ലേസ്മെന്‍റ് ഡ്രൈവിൽ പങ്കെടുക്കും. ഫോണ്‍: 9447302306, 9447697029.

ലഹരി വ്യാപനത്തിനെതിരെ കലാപരിപാടികൾ അവതരിപ്പിച്ചു

മൂവാറ്റുപുഴ: തൃക്കളത്തൂരിൽ ബാലവേദിയുടെ ആഭിമുഖ്യത്തിൽ ലഹരി വ്യാപനത്തിനെതിരെ വിവിധ കലാപരിപാടികൾ അവതരിപ്പിച്ചു. കാവുംപടിയിൽ നാടകങ്ങളും ഗാനങ്ങളും നൃത്തച്ചുവടുകളുമായാണ് ബാലവേദി കലാസന്ധ്യ അവതരിപ്പിച്ചത്. മൂവാറ്റുപുഴ എക്സൈസ് സർക്കിൾ ഇൻസ്പെക്ടർ കൃഷ്ണകുമാർ ഉദ്ഘാടനം ചെയ്തു. കെ.വി. ശ്രീലേഖ അധ്യക്ഷത വഹിച്ചു.

മണികണ്ഠൻ പാലത്തിലെ അപകടങ്ങൾ; മുന്നറിയിപ്പ് ബോർഡുകൾ സ്ഥാപിച്ച് ജെസിഐ

പാലക്കുഴ: മണികണ്ഠൻ പാലത്തിൽ അപകടങ്ങൾ പതിവായതോടെ കൂത്താട്ടുകുളം ജെസിഐയുടെ നേതൃത്വത്തിൽ പാലത്തിന് സമീപം അപകട മുന്നറിയിപ്പ് ബോർഡുകൾ സ്ഥാപിച്ചു. പാലത്തിൽ നിരവധി അപകടങ്ങളാണ് നിത്യവും ഉണ്ടാവുന്നത്. കൈവരി ഉൾപ്പെടുന്ന സംരക്ഷണ ഭിത്തി ഏതു നിമിഷവും തോട്ടിലേക്ക് പതിക്കാവുന്ന നിലയിലാണ്. എംസി റോഡിന് സമാന്തര പാതയായ കൂത്താട്ടുകുളം - പണ്ടപ്പിള്ളി-മൂവാറ്റുപുഴ റോഡിൽ പാലക്കുഴ കവലയ്ക്കു സമീപമാണ് പാലം. പാലത്തിലേക്കെത്തുന്പോൾ റോഡ് കുപ്പിക്കഴുത്ത് പോലെ ചുരുങ്ങുന്നതാണ് അപകടത്തിനു കാരണമാകുന്നത്. ഇറക്കവും വളവും ചേർന്ന ഭാഗമായതിനാൽ അപകട സാധ്യത വർധിക്കുന്നു. ബ്ലോക്ക് പഞ്ചായത്തംഗം സിബി ജോർജിന്‍റെ ഇടപെടലിനെതുടർന്ന് പാലത്തിന് കൈവരികൾ സ്ഥാപിക്കാനുള്ള നടപടികൾ ആരംഭിച്ചിട്ടുണ്ട്.

കാറ്റും മഴയും : കോതമംഗലം താലൂക്കിൽ ലക്ഷങ്ങളുടെ കൃഷിനാശം

കോതമംഗലം: കഴിഞ്ഞ ദിവസങ്ങളിൽ വേനൽമഴക്കൊപ്പമുണ്ടായ ശക്തമായ കാറ്റിൽ കോതമംഗലം താലൂക്കിൽ ലക്ഷങ്ങളുടെ കൃഷിനാശം. കോതമംഗലം നഗരസഭ, നെല്ലിക്കുഴി പഞ്ചായത്ത് പ്രദേശത്താണ് കാറ്റ് നാശം വിതച്ചത്. പത്ത് കർഷകരുടെ രണ്ടായിരത്തിലധികം ഏത്തവാഴയാണ് കാറ്റിൽ നിലംപതിച്ചത്. നെല്ലിക്കുഴി പഞ്ചായത്തിൽ 800 കുലച്ച ഏത്തവാഴയും 650 കുലയ്ക്കാറായ ഏത്തവാഴയും നഗരസഭ പരിധിയിൽ കുലച്ച 500 ഏത്തവാഴകളുമാണ് നശിച്ചത്. ഇതിൽ നെല്ലിക്കുഴി മണലിക്കുടി പൗലോസ് എന്ന കർഷകന്‍റെ മാത്രം 400 ഏത്തവാഴകളാണ് കാറ്റിൽ ഒടിഞ്ഞത്. 16 ലക്ഷം രൂപയുടെ നാശനഷ്ടമാണ് കൃഷിഭവൻ അധികൃതർ പ്രാഥമികമായി കണക്കാക്കിയിരിക്കുന്നത്. പലയിടങ്ങളിലും മരം വീണ് വൈദ്യുത പോസ്റ്റുകളും തകർന്നു. മരം റോഡിന് കുറുകെ വീണ് ഗതാഗത തടസവുമുണ്ടായി. അഗ്നിരക്ഷാ സേനാംഗങ്ങളും നാട്ടുകാരും ചേർന്ന് മരങ്ങൾ മുറിച്ചുമാറ്റി ഗതാഗതം പുനസ്ഥാപിക്കുകയായിരുന്നു. കർഷകർക്ക് വേണ്ടത്ര സാന്പത്തിക സഹായം ലഭിക്കുന്നില്ലെന്ന് നേരത്തെ മുതൽ പരാതിയുള്ളതാണ്. കൃഷിനാശം സംഭവിക്കുന്ന പല കർഷകർക്കും സഹായം പേരിനുമാത്രമായി ഒതുങ്ങുന്നതായും കർഷകർ പറയുന്നു. അധികൃതർ വേണ്ട നടപടി സ്വീകരിക്കണമെന്നാണ് ജനങ്ങളുടെ ആവശ്യം.

ചുറ്റികകൊണ്ട് അടിയേറ്റ് വീട്ടമ്മ മരിച്ചു

അരൂർ: ചുറ്റിക കൊണ്ടുള്ള അടിയേറ്റു മധ്യവയസ്ക മരിച്ചു. അരൂക്കുറ്റി ഒന്നാം വാർഡിൽ പുളിന്താഴത്ത് ശരവണന്‍റെ ഭാര്യ വനജ (50) ആണ് ചുറ്റികകൊണ്ടുള്ള തലയ്ക്കടിയേറ്റ് നിലയിൽ ആശുപത്രിയിലെത്തിച്ച ശേഷം മരിച്ചത്. വനജയുടെ ഭർത്താവ് ശരവണനും മകൻ ശരത്തിനും പരിക്കേറ്റിട്ടുണ്ട്. കഴിഞ്ഞദിവസം രാത്രി പത്തരയോടെ അയൽവാസികളായ ജയേഷ് വിജേഷും ആണ് ഇവരുടെ വീട് കയറി ആക്രമിച്ചതെന്നാണ് വിവരം. കൃത്യം ചെയ്തശേഷം ഒളിവിൽ പോയ പ്രതികളിൽ ജയേഷിനെ പൂച്ചാക്കൽ പോലീസ് അറസ്റ്റ് ചെയ്തു.

സ്ലാബിൽ തട്ടി നിയന്ത്രണംവിട്ട സ്കൂട്ടർ ടാങ്കർ ലോറിയിൽ തട്ടി മറിഞ്ഞ് യാത്രക്കാരി മരിച്ചു

കാക്കനാട്: റോഡരികിലെ കോണ്‍ക്രീറ്റ് സ്ലാബിൽ തട്ടി നിയന്ത്രണംവിട്ട സ്കൂട്ടർ, ടാങ്കർ ലോറിയിൽ തട്ടി മറിഞ്ഞ് സ്കൂട്ടറിന്‍റെ പിൻസീറ്റിലിരുന്ന യാത്രക്കാരി മരിച്ചു. നെട്ടൂർ മൂലയിൽതിട്ട ഉണ്ണികൃഷ്ണന്‍റെ ഭാര്യ കെ.വി. മഹേശ്വരി (52) ആണ് മരിച്ചത്. സ്കൂട്ടർ ഓടിച്ചിരുന്ന ഉണ്ണികൃഷ്ണൻ നിസാരപരിക്കുകളോടെ രക്ഷപ്പെട്ടു. ഇന്നലെ രാവിലെ ഒൻപതോടെ ചെന്പുമുക്കിലാണ് അപകടം. തൃക്കാക്കര മുനിസിപ്പൽ സഹകരണ ആശുപത്രിയിലെ ഹൗസ് കീപ്പിംഗ് വിഭാഗത്തിൽ ജീവനക്കാരിയായ മഹേശ്വരി ഭർത്താവിനൊപ്പം യാത്ര ചെയ്യവേ നിരത്തിൽ, ഉയർന്നു നിന്ന കോണ്‍ക്രീറ്റ് സ്ലാബിൽ തട്ടി വാഹനം നിയന്ത്രണം വിട്ട് അതുവഴി വന്ന ടാങ്കർ ലോറിയിൽ തട്ടിയതോടെ റോഡിലേക്ക് തലയടിച്ചുവീഴുകയായിരുന്നു. ഉടൻതന്നെ തൃക്കാക്കര സഹകരണ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു. സംസ്കാരം നടത്തി. മക്കൾ: സനൽ, സന്ധ്യ. മരുമക്കൾ: സേവ്യർ, രമ്യ.

ഭർത്താവിന് പിന്നാലെ ഭാര്യയും മരിച്ചു

പനങ്ങാട്: ഭർത്താവ് മരിച്ചതിന് പിന്നാലെ ഭാര്യയും മരിച്ചു. പനങ്ങാട് മല്ലപ്പിള്ളി റോഡ് നെടുംപറന്പിൽ മേരി ആന്‍റണി (72) ആണ് മരിച്ചത്. ഭർത്താവ് നെടുംപറന്പിൽ ആന്‍റണി കഴിഞ്ഞ ദിവസമാണ് മരിച്ചത്. മേരി ആന്‍റണിയുടെ സംസ്കാരം ഇന്ന് 10ന് പനങ്ങാട് സെന്‍റ് ആന്‍റണീസ് പള്ളിയിൽ. മകൻ: ജീസ് മോൻ. മരുമകൾ: സിമി.

കണിയൊരുക്കിയും കൈനീട്ടം നൽകിയുംആനവണ്ടിയിലൊരു വിഷു ആഘോഷം

ആലുവ: ബസിനകത്ത് കണി ഒരുക്കിയും കൈനീട്ടം നൽകിയും വിഷു ആഘോഷിച്ച് ആലുവ കെഎസ്ആർടിസി ജീവനക്കാരും യാത്രികരും. ആലുവ കെഎസ്ആർടിസി ഡിപ്പോയിൽ നിന്ന് രാവിലെ 6.10ന് പുറപ്പെടുന്ന തൃപ്പൂണിത്തറ സർവീസിലെ ജീവനക്കാരും സ്ഥിരം യാത്രക്കാരും ചേർന്നാണ് വിഷു ആഘോഷിച്ചത്. ഡ്രൈവർ കെ.ജെ. ഷാജിയാണ് മേൽ ഉദ്യോഗസ്ഥരുടെ അനുമതിയോടെ പുതുമനിറഞ്ഞ ആശയത്തിന് നേതൃത്വം നൽകിയത്. കെഎൽ-15 8480 ബസ് കണിക്കൊന്നയും പൂമാലകളും കൊണ്ട് അലങ്കരിച്ച് വിഷുക്കണിയും ഒരുക്കി. ടിക്കറ്റിനോടൊപ്പം വിഷുക്കൈനീട്ടവും നൽകി കണ്ടക്ടർ എ.ബി. എൽദോസ് യാത്രക്കാർക്ക് വിഷു ആശംസകൾ നേർന്നു. ഡിപ്പോയിലെ എല്ലാ ജീവനക്കാർക്കും ബസ് കണ്ടക്ടറുടെ കൈനീട്ടം നൽകിയാണ് ചടങ്ങ് തുടങ്ങിയത്. സ്ഥിരം യാത്രക്കാരുടെ പ്രതിനിധിയായി ഏലൂർക്കര സ്വദേശി ഗീത മധുര പലഹാരങ്ങളും യാത്രക്കാർക്ക് വിതരണം ചെയ്തതോടെ വിഷുനാളിലെ യാത്ര അവിസ്മരണീയമായി.

അഭിഭാഷക - വിദ്യാര്‍ഥി സംഘര്‍ഷം: സിസിടിവി ദൃശ്യങ്ങള്‍ കിട്ടാത്തത് അന്വേഷണത്തിന് വെല്ലുവിളി

കൊച്ചി: എറണാകുളം ജില്ലാ കോടതി പരിസരത്ത് അഭിഭാഷകരും മഹാരാജാസ് കോളജിലെ വിദ്യാര്‍ഥികളും ഏറ്റുമുട്ടിയ സംഭവത്തിലെ സിസിടിവി ദൃശ്യങ്ങള്‍ കാത്ത് പോലീസ്. സംഘര്‍ഷത്തിലേക്ക് നയിച്ച കാരണങ്ങളിലടക്കം വ്യക്തത വരുത്താന്‍ ജില്ലാ കോടതിയിലെ സിസിടിവി ദൃശ്യങ്ങള്‍ ആവശ്യപ്പെട്ട് പോലീസ് അപേക്ഷ നല്‍കിയിരുന്നു. ഇതുവരെ ഇവ ലഭ്യമായിട്ടില്ല. ദൃശ്യങ്ങള്‍ കിട്ടുന്ന മുറയ്ക്ക് തുടര്‍നടപടികളിലേക്ക് കടക്കാനാണ് പോലീസിന്‍റെ നീക്കം. കേസില്‍ ആരുടെയും മൊഴി രേഖപ്പെടുത്തിയിട്ടില്ല. ബാര്‍ അസോസിയേഷന്‍ സംഘടിപ്പിച്ച പരിപാടിക്കെത്തിയ വിദ്യാര്‍ഥികള്‍ സ്ത്രീകളെ ശല്യം ചെയ്തതാണ് സംഘര്‍ഷത്തിന് ഇടയാക്കിയതെന്നാണ് അഭിഭാഷകരുടെ വാദം. കോളജ് ഗേറ്റ് വഴി കടക്കാന്‍ ശ്രമിച്ച വിദ്യാര്‍ഥികളോട് അഭിഭാഷകര്‍ മോശമായി പെരുമാറിയതാണ് സംഘര്‍ഷത്തിലേക്ക് നയിച്ചതെന്നാണ് വിദ്യാര്‍ഥികള്‍ പറയുന്നത്. ഇതില്‍ വ്യക്തത തേടിയാണ് പോലീസ് ജില്ലാ കോടതിയിലെ സിസിടിവി ദൃശ്യങ്ങള്‍ ആവശ്യപ്പെട്ടിട്ടുള്ളത്. പരിസരത്ത് വേറെ സിസിടിവി കാമറകള്‍ ഇല്ലാത്തതും അന്വേഷണത്തിന് വെല്ലുവിളിയാകുന്നു. അതേസമയം സംഭവത്തിന് പിന്നാലെയുള്ള തുടര്‍പ്രകോപനങ്ങള്‍ ഒഴിവാക്കാന്‍ കഴിഞ്ഞ ദിവസം എസിപിയുടെ നേതൃത്വത്തില്‍ നടത്തിയ ചര്‍ച്ചയില്‍ ധാരണയായിരുന്നു. ബാര്‍ അസോസിയേഷന്‍ പ്രസിഡന്‍റും വിദ്യാര്‍ഥികളെ പ്രതിനിധീകരിച്ച് എസ്എഫ്‌ഐ ഭാരവാഹികളും യോഗത്തില്‍ പങ്കെടുത്തിരുന്നു. ഇരുകൂട്ടരും പോലീസ് കേസുമായി മുന്നോട്ടുപോകും. കഴിഞ്ഞ വ്യാഴാഴ്ച പുലര്‍ച്ചെ നടന്ന സംഭവത്തില്‍ കോളജിലെ എസ്എഫ്‌ഐ ഭാരവാഹികളടക്കം 15 വിദ്യാര്‍ഥികള്‍ക്കും ഒമ്പത് അഭിഭാഷകര്‍ക്കും രണ്ട് പോലീസുകാര്‍ക്കുമാണ് പരിക്കേറ്റത്. മൂന്ന് പരാതികളിലായി 30 പേര്‍ക്കെതിരെയാണ് എറണാകുളം സെന്‍ട്രൽ പോലീസ് കേസ് രജിസ്റ്റര്‍ ചെയ്തിട്ടുള്ളത്.

‘അതിഥി' പോര്‍ട്ടല്‍ നോക്കുകുത്തി ; ഇതര സംസ്ഥാനക്കാരായ കുറ്റവാളികള്‍ കൂടുന്നു

കൊച്ചി: കുറ്റകൃത്യത്തില്‍ ഏര്‍പ്പെടുന്ന ഇതര സംസ്ഥാനക്കരുടെ എണ്ണം ജില്ലയില്‍ പെരുകുമ്പോഴും തൊഴില്‍ തേടി ഇതര സ്ഥാനത്തുനിന്നെത്തുന്ന ഭൂരിഭാഗം പേരുവിടെ വിവരങ്ങളും സര്‍ക്കാറിന്‍റെ പക്കലില്ല. കഴിഞ്ഞ 15 ദിവസത്തിനിടെ കൊച്ചി സിറ്റിയില്‍ മാത്രം മയക്കുമരുന്ന് വില്‍പ്പന മുതല്‍ വീട് കുത്തിതുറന്നു മോഷണങ്ങളില്‍ വരെ പ്രതികളായത് പത്തോളം ഇതര സംസ്ഥാനക്കാരായ തൊഴിലാളികളാണ്. കേസുകളില്‍പ്പെടുന്നവരില്‍ ഭൂരിഭാഗം പേരും സംസ്ഥാന തൊഴില്‍വകുപ്പ് ഏര്‍പ്പെടുത്തിയിട്ടുള്ള ‘അതിഥി’ വെബ് പോര്‍ട്ടലില്‍ വിവരങ്ങള്‍ നല്‍കാത്തവരാണ്. ഇത് പോലീസ് അന്വേഷണങ്ങള്‍ക്കും പ്രതിസന്ധിയാകുന്നു. കോവിഡിന് ശേഷം സംസ്ഥാനത്തേക്ക് എത്തിയവരുടെ പേരു വിവരങ്ങള്‍ സര്‍ക്കാരിന്‍റെ പക്കല്‍ ലഭ്യമായിരുന്നില്ല. ഇതോടെയാണ് ‘അതിഥി’ പോര്‍ട്ടല്‍ ആരംഭിച്ചത്. ഇതര സംസ്ഥാന തൊഴിലാളികള്‍ക്ക് ആനുകൂല്യങ്ങള്‍ ലഭ്യമാക്കാന്‍ തുടക്കമിട്ട ആവാസ് പദ്ധതിയുടെ ഭാഗമായിട്ടായിരുന്നു വെബ് പോര്‍ട്ടല്‍ തുടങ്ങിയത്. കരാറുകാര്‍, തൊഴിലുടമകള്‍ എന്നിവര്‍ക്കും തൊഴിലാളികള്‍ക്കും സ്വന്തം നിലയില്‍ ‘അതിഥി'യില്‍ വിവരങ്ങള്‍ രജിസ്റ്റര്‍ ചെയ്യാം. തൊഴിലാളികള്‍ക്കും സ്മാര്‍ട്ട് ഫോണ്‍ ഉള്ളതിനാല്‍ ഇതിന്‍റെ ആപ്പും പുറത്തിറക്കിയിരുന്നു. എന്നാല്‍ ഇത്തരത്തില്‍ സംസ്ഥാനത്ത് ശേഖരിക്കുന്ന ഇതര സംസ്ഥാനക്കാരുടെ നാമമാത്രമായ പേരുവിവരങ്ങളാണ് ജില്ലയില്‍ രജിസ്റ്റര്‍ ചെയ്യപ്പെട്ടിട്ടുള്ളത്. ഔദ്യോഗിക കണക്കുകളിലേതിന്‍റെ ഇരട്ടിക്ക് മുകളിലാണ് ജില്ലയിലെ പെരുമ്പാവൂരില്‍ മാത്രമുള്ളത്. നിലവില്‍ സംസ്ഥാനത്ത് ഏറ്റവുമധികം ഇതര സംസ്ഥാന തൊഴിലാളികള്‍ തമാസിക്കുന്ന ജില്ലകളിലൊന്നാണ് എറണാകുളം. പലരും അനധികൃത കുടിയേറ്റക്കാർ ജോലി തേടി ജില്ലയിലെത്തുന്ന ഭൂരിഭാഗം പേരും അനധികൃതമായി കുടിയേറുന്നവരാണെന്ന് ഉദ്യോഗസ്ഥര്‍തന്നെ സമ്മതിക്കുന്നു. പലര്‍ക്കും തിരിച്ചറിയല്‍ രേഖകള്‍ പോലുമില്ല. ഇത്തരക്കാരെ എത്തിക്കുന്ന ഏജന്‍റുമാര്‍ വിവരങ്ങള്‍ സര്‍ക്കാരിന് കൈമാറുന്നുമില്ല. തൊഴിലാളികളെ എത്തിക്കുന്ന പ്രദേശത്തെ പോലീസ് സ്റ്റേഷനിലടക്കം വിവരം കൈമാറണമെന്ന നിര്‍ദേശം നിലനില്‍ക്കെയാണ് ഈ നിയമവിരുദ്ധ പ്രവര്‍ത്തനം. തൊഴിലിനെത്തിക്കുന്ന പലര്‍ക്കും മികച്ച താമസ സൗകര്യവും വേതനവും നല്‍കാത്തതും വിവരങ്ങള്‍ കൈമാറാതിരിക്കാന്‍ കാരണമാകുന്നുണ്ട്. ജില്ലയില്‍ ട്രെയിനിറങ്ങുന്ന പലരും നാട്ടില്‍ വിവിധ കുറ്റകൃത്യത്തില്‍ ഏര്‍പ്പെട്ടിട്ടുള്ളവരുമാണ്. കണക്കില്‍ 3,72,088 ‘അതിഥി’ പോര്‍ട്ടല്‍ മുഖേന കഴിഞ്ഞ മാസം വരെ സംസ്ഥാനത്ത് രജിസ്റ്റര്‍ ചെതിട്ടുള്ളത് 3,72,088 ഇതര സംസ്ഥാന തൊഴിലാളികള്‍ മാത്രമാണ്. ഇതിന്‍റെ മൂന്ന് ഇരട്ടിയിലധികം ആളുകള്‍ ജോലി ചെയ്യുന്ന സ്ഥാനത്താണിത്. നിലവിലെ കണക്കുകള്‍ പ്രകാരം സംസ്ഥാനത്ത് ഏറ്റവുമധികം ഇതര സംസ്ഥാന തൊഴിലാളികള്‍ പശ്ചിമബംഗാളില്‍ നിന്നാണ്. 1,23,755 പേരാണ് ഇവിടെനിന്നുള്ളത്. അസം-65,313, ബീഹാര്‍-51,063, ഒഡീഷ-45,212, ജാര്‍ഖണ്ഡ്-30,392 എന്നിങ്ങനെയാണ് ഏറ്റവുമധികം തൊഴിലാളികള്‍ കുടിയേറിയിട്ടുള്ള മറ്റ് സംസ്ഥാനങ്ങളില്‍ നിന്നുള്ള കണക്ക്. ഇതര സംസ്ഥാന തൊഴിലാളിയുടെ പേര്, മൊബൈല്‍ നമ്പര്‍, വയസ്, ജില്ല, പോലീസ് സ്റ്റേഷന്‍, കേരളത്തിലെ മേല്‍വിലാസം, ജില്ല, താലൂക്ക്, വില്ലേജ്, ജോലിയുടെ സ്വഭാവം, ആധാര്‍, കുടുംബ വിവരങ്ങള്‍ എന്നിവയാണ് സര്‍ക്കാരിന് തൊഴിലാളികള്‍ ‘അതിഥി’ പോര്‍ട്ടല്‍ മുഖേന കൈമാറേണ്ടത്.

ചക്കുമരശേരി ക്ഷേത്രോത്സവം: പുതുപ്പള്ളി കേശവൻ തിടന്പേറ്റി

പറവൂര്‍: വടക്കേക്കര ചക്കുമരശേരി ശ്രീകുമാര ഗണേശമംഗലം ക്ഷേത്രോത്സവത്തോടനുബന്ധിച്ച് ഇന്നലെ രാവിലെ നടന്ന തിടമ്പേറ്റല്‍ ചടങ്ങില്‍ വടക്കേചേരുവാരം അണിനിരത്തിയ പുതുപ്പള്ളി കേശവന്‍ തിടമ്പേറ്റാനുള്ള അര്‍ഹത നേടി. രാവിലെ എട്ടിനായിരുന്നു ക്ഷേത്രത്തിന്‍റെ കിഴക്കേനടയില്‍ തെക്കുഭാഗത്ത് പ്രത്യേകം സജ്ജമാക്കിയ സ്ഥലത്ത് തിടമ്പേറ്റല്‍ ചടങ്ങ് നടന്നത്. കാഴ്ചശ്രീബലിക്ക് മുന്‍പ് നടക്കുന്ന ആചാരപ്രകാരമുള്ള തിടമ്പ് നിര്‍ണയ ചടങ്ങ് കാണാന്‍ ആയിരങ്ങളാണ് ക്ഷേത്രമൈതാനത്ത് തടിച്ചുകൂടിയത്. വടക്കേചേരുവാരം അണിനിരത്തിയ പുതുപ്പിള്ളി കേശവനെ തെക്കേചേരുവാരം ചിറയ്ക്കല്‍ കാളിദാസനിലൂടെയാണ് നേരിട്ടത്. രണ്ട് ആനകളും ഉയരത്തിലും അഴകിലും കിടപിടിക്കുന്നവയായിരുന്നു. ആചാര കതിന വെടി മുഴങ്ങിയ ശേഷം മസ്തകം സ്വയം 10 മിനിറ്റോളം ഉയര്‍ത്തി നില്‍ക്കുന്ന ആനയെയാണ് തിടമ്പേറ്റാന്‍ നിശ്ചയിക്കുന്നത്. 10 മിനിറ്റ് കഴിഞ്ഞപ്പോള്‍ പുതുപ്പിള്ളി കേശവന്‍ തിടമ്പ് വഹിക്കുന്നതിന് അര്‍ഹത നേടിയതായി ക്ഷേത്ര ഭാരവാഹികള്‍ അറിയിച്ചു. ഇതിനിടെ തെക്കേ ചേരുവാരം ഭാരവാഹികള്‍ അതൃപ്തി അറിയിച്ച് ക്ഷേത്രം ഓഫീസിന് മുന്നില്‍ കൂടിനിന്ന് പ്രതിഷേധിച്ചു. ഉച്ചയ്ക്ക് ശേഷം നടന്ന പകല്‍പ്പൂരത്തിന് 11 ആനകള്‍ അണിനിരന്നു. പുതുപ്പിള്ളി കേശവന്‍ ദേവ തിടമ്പേറ്റി. തെക്കേ ചേരുവാരത്തിനു വേണ്ടി ചോറ്റാനിക്കര സുഭാഷ് നാരായണ മാരാരും സംഘവും, വടക്കേ ചേരുവാരത്തിനു വേണ്ടി ടി.ഡി. രാധാകൃഷ്ണനും സംഘവും മേജര്‍സെറ്റ് പഞ്ചവാദ്യം അവതരിപ്പിച്ചു. രമേഷ് ദേവപ്പന്‍റെ നേതൃത്വത്തിലായിരുന്നു ചെണ്ടമേളം. വര്‍ണക്കുടമാറ്റവും ഉണ്ടായിരുന്നു.

കരള്‍ മാറ്റിവച്ച ഡോക്ടറുടെ കൈപിടിച്ച് ശിഖ ആദ്യാക്ഷരം കുറിച്ചു

കൊച്ചി: ഗുരുതര രോഗാവസ്ഥയില്‍ നിന്നും ജീവിതത്തിലേക്ക് കൈപിടിച്ചുയര്‍ത്തിയ അതേ കൈയ്ക്കുളില്‍ കുരുന്നു കരം ചേര്‍ത്തുവച്ച് ആദ്യാക്ഷരം നുകര്‍ന്ന് രണ്ട് വയസുകാരി ശിഖ. വിഷുദിനമായ ഇന്നലെ ആസ്റ്റര്‍ മെഡ്‌സിറ്റിയില്‍ കരള്‍ ശസ്ത്രക്രിയാ വിദഗ്ധന്‍ ഡോ. മാത്യു ജേക്കബാണ് വെങ്കലപ്പാത്രത്തിലെ അരിമണികളില്‍ കുരുന്നുവിരല്‍ ചേര്‍ത്തുപിടിച്ച് ശിഖയ്ക്ക് ആദ്യാക്ഷരം ചൊല്ലിക്കൊടുത്തത്. കായംകുളം സ്വദേശിയായ സിആര്‍പിഎഫ് ഉദ്യോഗസ്ഥന്‍ അനിലാലിന്‍റെയും വിനീതയുടെയും രണ്ടാമത്തെ മകളാണ് ശിഖ. ജനിച്ച് ഏതാനും മാസങ്ങള്‍ കഴിഞ്ഞപ്പോള്‍ ശിഖ ഗുരുതരമായ രോഗലക്ഷണങ്ങള്‍ കാണിച്ചുതുടങ്ങി. നവജാത ശിശുക്കളെ ബാധിക്കുന്ന ബിലിയറി അട്രീഷ്യ എന്ന അപൂര്‍വരോഗമായിരുന്നു ശിഖയെ പിടികൂടിയിരുന്നത്. മികച്ച ചികിത്സയ്ക്ക് വേണ്ടിയുള്ള കുടുംബത്തിന്‍റെ അന്വേഷണം അവസാനിച്ചത് കൊച്ചിയിലെ ആസ്റ്റര്‍ മെഡ്‌സിറ്റിയിലാണ്. പീഡിയാട്രിക് മെഡിക്കല്‍ ഗ്യാസ്‌ട്രോഎൻട്രോളജിസ്റ്റ് ആയ ഡോ. ഗീത മമ്മയില്‍ ആണ് ശിഖയെ ആദ്യം പരിശോധിച്ച ശേഷം വിദഗ്ധ ചികിത്സയ്ക്കായി ഡോ. മാത്യു ജേക്കബിന് റെഫര്‍ ചെയ്തത്. കരള്‍ മാറ്റിവെയ്ക്കുകയല്ലാതെ ശിഖയുടെ ജീവന്‍ രക്ഷിക്കാന്‍ മറ്റ് മാര്‍ഗങ്ങളില്ലെന്ന് അദ്ദേഹം കുടുംബാംഗങ്ങളെ അറിയിച്ചു. അമ്മ വിനീത കരള്‍ പകുത്തുനല്‍കാന്‍ തയാറായെങ്കിലും രക്തം ചേരില്ലായിരുന്നു. പിന്നീട് മുത്തശി കരള്‍ നല്‍കാന്‍ തയാറായി. അങ്ങനെ ഒമ്പത് മാസം മാത്രം പ്രായമുള്ളപ്പോള്‍ ശിഖയ്ക്ക് കരള്‍ മാറ്റിവെയ്ക്കല്‍ ശസ്ത്രക്രിയ നടത്തി. 23 ദിവസത്തെ ആശുപത്രിവാസത്തിന് ശേഷം പൂര്‍ണ ആരോഗ്യവതിയായി ശിഖ വീട്ടിലേക്ക് മടങ്ങി. അതേ കുഞ്ഞിനെ എഴുത്തിനിരുത്താന്‍ ഭാഗ്യം ലഭിച്ചത് ഒരനുഗ്രഹമാണെന്നായിരുന്നു ആദ്യാക്ഷരം പകര്‍ന്ന് നല്‍കിയ ശേഷം ഡോ. മാത്യു ജേക്കബ് പറഞ്ഞത്. ആസ്റ്റര്‍ മെഡ്‌സിറ്റി സിഇഒ ഡോ. നളന്ദ ജയദേവും ഡോ. മാത്യു ജേക്കബും ചേര്‍ന്ന് ശിഖയ്ക്കും സഹോദരിക്കും വിഷുകൈനീട്ടം നല്‍കി.

കൊച്ചി വിമാനത്താവളത്തിൽ വീണ്ടും ഹൈബ്രിഡ് കഞ്ചാവ് വേട്ട

നെടുമ്പാശേരി: കൊച്ചി രാജ്യാന്തര വിമാനത്താവളത്തിൽ എയർ കസ്റ്റംസ് ഇന്‍റലിജൻസ് വിഭാഗം വിഷു ദിവസം വൻ ഹൈബ്രിഡ് കഞ്ചാവു വേട്ട നടത്തി. വിദേശത്തുനിന്നുമെത്തിയ യുവതിയുടെ പക്കൽ നിന്നും 35.70 ലക്ഷം രൂപ വിലയുള്ള കഞ്ചാവാണ് പിടികൂടിയത്. 1,190 ഗ്രാം കഞ്ചാവ് ചെക്ക് ഇൻ ബാഗിൽ ഒളിപ്പിച്ചാണ് കൊണ്ടുവന്നത്. ഇവരുടെ പെരുമാറ്റത്തിൽ സംശയം തോന്നിയതിനെ തുടർന്നാണ് ഗ്രീൻ ചാനലിലൂടെ പോകാൻ ശ്രമിച്ച ബാഗേജ് വിശദമായ പരിശോധനയ്ക്ക് വിധേയമാക്കിയാണ് കഞ്ചാവ് കണ്ടെത്തിയത്. തമിഴ്നാട് സ്വദേശിയായ തുളസി എന്ന യുവതിയാണ് പിടിയിലായത്. ഇവർ ബാങ്കോക്കിൽ നിന്നും തായി ലയൺ എയർവേയ്സ് ഫ്ലൈറ്റിലാണ് കൊച്ചിയിൽ വന്നിറങ്ങിയത്. അങ്കമാലി ഒന്നാം ക്ലാസ് മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു. യുവതി കാരിയർ മാത്രമാണെന്നാണ് ബന്ധപ്പെട്ട ഉദ്യോഗസ്ഥന്മാരുടെ നിഗമനം. ഇവർ ഇതിനുമുൻപും പലവട്ടം കള്ളക്കടത്ത് നടത്തിയിട്ടുള്ളതായാണ് വിവരം.

ലഹരി മരുന്ന് കേസിലെ മുഖ്യപ്രതി പിടിയിൽ

മട്ടാഞ്ചേരി: മയക്കുമരുന്ന് വിൽപ്പന കേസിലെ മുഖ്യപ്രതിയെ ഫോർട്ട്കൊച്ചി പോലീസ് അറസ്റ്റ് ചെയ്തു. കോട്ടയം തലയോലപ്പറമ്പ് വടയാർ സ്വദേശി അർഫാസിനെയാണ് ഫോർട്ട്കൊച്ചി പോലീസ് പിടികൂടിയത്. 2024 ഓഗസ്റ്റിൽ ഫോർട്ടുകൊച്ചി സ്വദേശിയായ ജെർഷോൺ എന്നയാളുടെ പക്കൽ നിന്ന് 17 ഗ്രാം എംഡിഎംഐ കൊച്ചി ഡാൻസാഫും ഫോർട്ടുകൊച്ചി പോലീസും ചേർന്ന് പിടികൂടിയിരുന്നു. അന്വേഷണത്തിൽ മട്ടാഞ്ചേരി സ്വദേശിയായ സഫീർ, മയക്കു മരുന്ന് വിൽപ്പന സംഘത്തിലെ പ്രധാനി മട്ടാഞ്ചേരി സ്വദേശി തൌഫീഖ്, ബംഗളുരുവിൽ മയക്കുമരുന്ന് നിന്നും എത്തിച്ച് നൽകുന്ന മട്ടാഞ്ചേരി സ്വദേശിയായ ഇർഫാൻ, പള്ളുരുത്തി സ്വദേശി തരുൺ, ഫോർട്ട് കൊച്ചി സ്വദേശി ഷാരോൺ എന്നിവരെ നേരത്തെ അറസ്റ്റ് ചെയ്തിരുന്നു. അർഫാസ് ബംഗളൂരുവിൽ ഫ്ലാറ്റ് എടുത്ത് വിവിധ കോഴ്സുകളുടെ അഡ്മിഷൻ തരപ്പെടുത്തി കൊടുക്കുന്ന കൺസൾട്ടൻസിയുടെ മറവിലായിരുന്നു മയക്കുമരുന്ന് വിൽപ്പന, അഡ്മിഷന് എത്തുന്ന വിദ്യാർഥികളും ഇയാളുടെ കെണിയിൽപ്പെട്ട് മയക്കുമരുന്നിടപാടുകളിൽ ഏർപ്പെടുന്നതായും ഇയാളുടെ ഫ്ലാറ്റിൽ ആഫ്രിക്കൻ വംശജർ വന്ന് പോകുന്നതായുള്ള വിവരവും പോലീസിന് ലഭിച്ചു. ഫോർട്ട് കൊച്ചി പോലീസ് ബംഗളൂരുവിലെത്തി പ്രതിയെക്കുറിച്ച് അന്വേഷണം നടത്തിയെങ്കിലും ഇയാൾ പോലീസിനെ കബളിപ്പിച്ച് കടന്നുകളയുകയായിരുന്നു. അർഫാസ് സുഹൃത്തിന്‍റെ വിവാഹത്തിന് മൂവാറ്റുപുഴയിൽ എത്തിയെന്ന രഹസ്യവിവരം ലഭിച്ചതിന്‍റെ അടിസ്ഥാനത്തിൽ ഫോർട്ട് കൊച്ചി പോലീസ് മൂവാറ്റുപുഴ പോലീസിന്‍റെ സഹായത്തോടെ അർഫാസിനെ പിടികൂടുകയായിരുന്നു. മയക്കുമരുന്ന് ആവശ്യക്കാർക്ക് ആഫ്രിക്കൻ വംശജരുടെ ഫോൺ നമ്പർ നൽകി വൻതുക കമ്മീഷൻ വാങ്ങി ഇടനിലക്കാരനായി പ്രവർത്തിച്ചുവരികയായിരുന്നു പ്രതിയെന്നും പോലീസ് പറഞ്ഞു.

തട്ടുകടകൾ പൊളിക്കാൻ പൊടിച്ചത് എട്ടു ലക്ഷം

കാക്കനാട്: നഗരസഭാ പരിധിയിലെ അനധികൃത തട്ടുകടകൾ പൊളിച്ചു മാറ്റാൻ തൃക്കാക്കര നഗരസഭാധികൃതർ അഞ്ചുദിവസംകൊണ്ട്ചെലവാക്കിയ തുകയുടെ കണക്കു കേട്ടാൽ ആരുമൊന്നു ഞെട്ടും. അഞ്ചു ദിവസം കൊണ്ടാണ് നഗരസഭാ എൻജിനീയറിംഗ് വിഭാഗം ദൗത്യം പൂർത്തിയാക്കിയത്. കൃത്യമായി പറഞ്ഞാൽ 2025 ജനുവരി 4,7,9,13,15 ദിവസങ്ങളിൽ രാത്രി ഏഴു മുതൽ രാവിലെ ഏഴുമണിവരെയുള്ളദൗത്യനിർവഹണത്തിനു 8,16,265 രൂപ ചെലവഴിച്ചതായി വിവരാവകാശ പ്രകാരമുള്ള മറുപടിയിൽ പറയുന്നു.ഇനം തിരിച്ചുളള കണക്ക് ചുവടെ, ലേബർകൂലി: 1,18,400, ഗ്യാസ് കട്ടർ 58,500, ജനറേറ്റർ വാടകയിനത്തിൽ ചെലവായത് 45,600, കാർവാടക17,600, കട്ടിംഗ് മെഷീൻ 10,000, വണ്ടി വാടക (ദോസ്ത്) 1,20,000, ഭക്ഷണം, ചായ, വെള്ളം 40,189, മെഡിസിൻ 1232, ഡീസൽ, റൂം റെന്‍റ് 3334, ജെസിബി-ടിപ്പർവാടക 4,01,400. നഗരസഭയ്ക്ക് സ്വന്തമായി വാഹനങ്ങൾ ഉണ്ടായിട്ടും കാർ വാഹന ഇനത്തിൽ17,600 രൂപയുടെ കണക്ക് തെറ്റിദ്ധരിപ്പിക്കുന്നതാണെന്ന ആരോപണവുമായി പ്രതിപക്ഷം കൗൺസിൽ യോഗങ്ങളിൽ പ്രതിഷേധിച്ചിരുന്നു. രാത്രി ഏഴുമുതൽ രാവിലെ ഏഴു വരെ അനധികൃത തട്ടുകടകൾ പൊളിക്കാൻ ഇറങ്ങിയ ആരോഗ്യ വിഭാഗം അധികൃതർ റൂം വാടകയ്ക്കെടുത്ത വകയിലും ഡീസൽ ചാർജിനത്തിലും 3,334 രൂപ ചെലവാക്കിയെന്നാണ് വിവരാവകാശ രേഖയിൽ ഉള്ളത്. 1,20,000 രൂപ ദോസ്ത് വാഹനത്തിന് വാടക ഇനത്തിൽ നൽകിയിട്ടുണ്ട്. കാർ വാഹന വാടകയായി 17,600 രൂപയും നൽകിയതായി പറയുന്നു. അതേസമയം ജെസിബിയും ടിപ്പറും വാടകക്കെടുത്തവകയിൽ 4,01400 രൂപ ചെലവാക്കിയ നഗരസഭ എൻജിനീയറിംഗ് വിഭാഗം ഉദ്യോഗസ്ഥർ പൊളിച്ചു കൊണ്ടുവന്ന സാധന സാമഗ്രികൾ തൂക്കി വിറ്റാൽ രണ്ടു ലക്ഷം രൂപ പോലും കിട്ടില്ലെന്നു പ്രതിപക്ഷം പറയുന്നു. പൊളിച്ചു മാറ്റിയ തട്ടുകടകൾ വീണ്ടും തലപൊക്കി കാക്കനാട്: തെരുവോരങ്ങളിലെ അനധികൃത രാത്രികാല തട്ടുകടകൾ ഒഴിപ്പിക്കാൻ നഗരസഭയുടെ പണം ഉപയോഗിച്ച് അഞ്ചു രാത്രികളിലായി എൻജിനീറിംഗ് ഭാഗം ഉദ്യോഗസ്ഥർനടത്തിയ രാത്രികാല ദൗത്യത്തിൽ 8,16,265 രൂപ ചെലവഴിക്കപ്പെട്ടതല്ലാതെ പൊളിച്ചു മാറ്റിയ കടകളെല്ലാം യഥാസ്ഥാനങ്ങളിൽ വീണ്ടും പ്രവർത്തിച്ചു തുടങ്ങിയിട്ട് മാസങ്ങളായിട്ടും നഗരസഭ പിന്നീട് തുടർ നടപടികൾ സ്വീകരിച്ചിട്ടില്ലെന്നതും ശ്രദ്ധേയം.

വിദേശജോലി തട്ടിപ്പ്; യുവാവ് അറസ്റ്റിൽ

മൂവാറ്റുപുഴ: വിദേശത്ത് ജോലി തരപ്പെടുത്തി നൽകാമെന്ന് പറഞ്ഞ് രണ്ട് പേരിൽനിന്ന് പണം തട്ടിയ കേസിൽ യുവാവ് അറസ്റ്റിൽ. രായമംഗലം പാലക്കാട്ടന്പലം ഭാഗത്ത് വാടകയ്ക്ക് താമസിക്കുന്ന കീഴില്ലം പറന്പിപ്പീടിക മാന്പിള്ളി അജു വിത്സനെ (35)യാണ് മൂവാറ്റുപുഴ പോലീസ് അറസ്റ്റ് ചെയ്തത്. മാറാടി പുൽപ്പറന്പ് സ്വദേശിയായ യുവാവിനും സുഹൃത്തിനുമാണ് പണം നഷ്ടമായത്. സൗത്ത് കൊറിയയിൽ ഹെൽപ്പർ ജോലി വാഗ്ദാനം ചെയ്താണ് 2,14,000 രൂപ തട്ടിയെടുത്തത്. ഇൻസ്പെക്ടർ ബേസിൽ തോമസ്, എസ്ഐ കെ. അനിൽ, എഎസ്ഐ മീരാൻ, ബി. ഹാരീസ്, ബിനിൽ എൽദോസ് എന്നിവരാണ് അന്വേഷണ സംഘത്തിലുള്ളത്.

നഗ്നചിത്രങ്ങള്‍ കാണിച്ച് ലൈംഗിക ചുവയോടെ സംസാരം; യുവാവ് അറസ്റ്റില്‍

കൊച്ചി: നഗ്നചിത്രങ്ങള്‍ കാണിച്ച് പെണ്‍കുട്ടിയോട് ലൈംഗിക ചുവയോടെ സംസാരിച്ച സംഭവത്തില്‍ യുവാവ് അറസ്റ്റില്‍. കോട്ടയം മുണ്ടക്കയം സ്വദേശി അമല്‍ മിര്‍സ സലിം(19) ആണ് കൊച്ചി സൈബര്‍ പോലീസിന്‍റെ പിടിയിലായത്. ഇന്‍ഫോപാര്‍ക്കില്‍ ജോലി ചെയ്യുന്ന മുണ്ടക്കയം സ്വദേശിനിയായ 21 കാരിയുടെ പരാതിയിലാണ് അറസ്റ്റ്. വ്യാജ ഐഡി നിര്‍മിച്ച് പ്രതി ഇന്‍സ്റ്റഗ്രാം വഴിയാണ് പരാതിക്കാരിയായ പെണ്‍കുട്ടിയെ പരിചയപ്പെട്ടത്. തുടർന്ന് മൊബൈല്‍ ആപ്ലിക്കേഷന്‍ ഉപയോഗിച്ച് ഇവരുടെ പ്രൊഫൈലില്‍ നിന്നുള്ള ഫോട്ടോ നഗ്നയാക്കിശേഷം പെണ്‍കുട്ടിക്ക് തന്നെ അയച്ചുകൊടുക്കുകയും ലൈംഗിക ചുവയോടെ സംസാരിക്കുകയുമായിരുന്നു. ഇതോടെയാണ് പെണ്‍കുട്ടി പരാതിയുമായി പോലീസിനെ സമീപിച്ചത്. നേരത്തെ പോക്‌സോ കേസില്‍ അറസ്റ്റിലായ പ്രതി ജാമ്യത്തില്‍ കഴിയുന്നതിനിടെയാണ് വീണ്ടും അറസ്റ്റിലായത്. സ്‌കൂള്‍, കോളജ് വിദ്യാര്‍ഥിനികളെ ലക്ഷ്യമിട്ട് പ്രതി, നിരവധി പെണ്‍കുട്ടികളോട് സമാന രീതിയില്‍ മോശമായി പെരുമാറിയിട്ടുള്ളതായി പോലീസ് അന്വേഷണത്തില്‍ കണ്ടെത്തിയിട്ടുണ്ട്.

എഴുപുന്ന ശ്രീനാരായണപുരം ക്ഷേത്രത്തിൽ വൻ മോഷണം

അരൂർ: എഴുപുന്ന ശ്രീനാരായണപുരം മഹാക്ഷേത്രത്തിൽ വൻ മോഷണം. 20 പവൻ വരുന്ന ദേവന്‍റെ തിരുവാഭരണങ്ങളാണ് നഷ്ടപ്പെട്ടത്. കീഴ്ശാന്തി കൊല്ലം സ്വദേശി ഒ.ടി. രാമന്ദ്രനെ കാണാനില്ല. തിരുവാഭരണം വിഷു തലേന്ന് വൈകിട്ട് ആറോടെ ദേവന് ചാർത്തുന്നതിന് ദേവസ്വം ഭാരവാഹികൾ കീഴ്ശാന്തി ഒ.ടി. രാമചന്ദ്രനു നൽകിയിരുന്നു. ഇത് വിഷു പുലർച്ചെ ദേവനു ചാർത്തിയിരുന്നു. വിഷു ദിനത്തിൽ വൈകിട്ട് ദീപാരാധനയ്ക്കു ശേഷം തിരിച്ചു നൽകേണ്ടതാണ്. എന്നാൽ ഒന്നിലേറെ പ്രവശ്യം ദേവസ്വം അധികാരികൾ ആഭരണങ്ങൾ ആവശ്യപ്പെട്ടെങ്കിലും ഇയാൾ ഒഴിഞ്ഞു മാറി. പിന്നീട് ഇയാളെ കാണാതാവുകയായിരുന്നു. തുടർന്ന് ശീകോവിലിലും മറ്റും പരിശോധന നടത്തിയെങ്കിലും തിരുവാഭരണങ്ങൾ കണ്ടുകിട്ടിയില്ല. തുടർന്ന് ദേവസ്വം ഭാരവാഹികൾ അരൂർ പോലീസിൽ പരാതി നൽകി. രണ്ട് നെക്ലസുകൾ. 10 പവൻ വരുന്ന മാല, 26.59 ഗ്രാം വരുന്ന കിരീടം ഉൾപ്പടെ 20 പവനോളം സ്വർണാഭരണങ്ങളാണ് നഷ്ടപ്പെട്ടത്. നാലു മാസം മുമ്പാണ് കീഴ്ശാന്തി രാമചന്ദ്രൻ ഇവിടെ എത്തുന്നത്. ഇയാളെ സംബന്ധിച്ചുളള ഒരു വിവരങ്ങളും ക്ഷേത്രം ഭാരവാഹികളുടെ കൈവശമില്ല എന്നാണ് അറിയുന്നത്. പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

കാർഷിക വിജ്ഞാന വ്യാപന കേന്ദ്രം നാടിനായി സമർപ്പിച്ചു

ആലങ്ങാട്: വെളിയത്തുനാട് സഹകരണ ബാങ്കിന്‍റെ നിർമാണം പൂർത്തിയാക്കിയ കാർഷിക വിജ്ഞാന വ്യാപന കേന്ദ്രം നാടിന് സമർപ്പിച്ചു. വെളിയത്തുനാട് തടിക്കകടവിൽ നിർമിച്ച കേന്ദ്രം മന്ത്രി പി. രാജീവാണ് നാടിനു സമർപ്പിച്ചത്. കൃഷിക്കൊപ്പം കളമശേരിയുടെ ഭാഗമായി കൂൺ ഗ്രാമം പദ്ധതി നടപ്പാക്കി കൂൺ സംഭരിച്ച് മൂല്യ വർധിത ഉത്പന്നങ്ങളായി വിപണിയിൽ എത്തിക്കുക എന്നതാണ് പദ്ധതിയുടെ ലക്ഷ്യം. കൂടാതെ കൂൺ വിത്തുത്പാദനം, ഭക്ഷ്യവസ്തു പരിശോധന ലാബ്, സോളാർ പവർ പ്ലാന്‍റ്, ഡിജിറ്റൽ ക്ലാസ് റൂം, കൂൺ ഹൈടെക് കൾട്ടിവേഷൻ എന്നിവയും പദ്ധതിയോടൊപ്പം സമർപ്പിച്ചു. മാരക രോഗം ബാധിച്ച നാൽപതു സഹകാരികൾക്കായി പത്തു ലക്ഷം രൂപ സമാശ്വാസ നിധിയും കൈമാറി. എഴുപതു കഴിഞ്ഞ ബാങ്ക് അംഗങ്ങൾക്ക് നടപ്പാക്കുന്ന വാർധക്യ ക്ഷേമ പെൻഷൻ പദ്ധതിയുടെ ഉദ്ഘാടനവും ചടങ്ങിൽ നടത്തി. പരിപാടിയിൽ ബാങ്ക് വൈസ് പ്രസിഡന്‍റ് വി.എം. ചന്ദ്രൻ സ്വാഗതം ആശംസിച്ചു. ബാങ്ക് പ്രസിഡന്‍റ് എം.കെ. ജയചന്ദ്രൻ അധ്യക്ഷത വഹിച്ചു.

തൈക്കൂടത്ത് പീഡാനുഭവ ദൃശ്യാവിഷ്കാരവുമായി "ഒമ്പതാം മണിക്കൂർ’ ഒരുങ്ങുന്നു

മരട്: തൈക്കൂടം സെന്‍റ് റാഫേൽ ദേവാലയത്തിലെ വിശുദ്ധവാര തിരുക്കർമ്മങ്ങളുടെ ഭാഗമായി "ഒമ്പതാം മണിക്കൂർ' എന്ന ദൃശ്യാവിഷ്കരണത്തിനുള്ള തയാറെടുപ്പിലാണ് തൈക്കൂടത്തെ ഒരുപറ്റം കലാകാരന്മാർ. മനുഷ്യമക്കളുടെ പാപങ്ങൾ ഏറ്റെടുത്ത് കാൽവരി കുരിശിൽ യാഗമായി തീർന്ന യേശുവിന്‍റെ പീഡാസഹനവും മരണവും അനുഭവവേദ്യമായി തീരുന്ന ആറാം മണിക്കൂർ മുതൽ ഒമ്പതാം മണിക്കൂർ വരെയുള്ള സമയങ്ങളിൽ നടന്ന പീലാത്തോസിന്‍റെ അരമന മുതൽ കാൽവരി കുരിശുമരണം വരെയുള്ള സംഭവങ്ങൾ തൈക്കൂടം സെന്‍റ് റാഫേൽ പള്ളിയങ്കണത്തിൽ ദുഃഖവെള്ളിയാഴ്ച്ച രാവിലെ നടക്കും. രാവിലെ ആറിന് ആരംഭിക്കുന്ന കുരിശിന്‍റെ വഴി യാത്ര തൈക്കൂടം ജംഗ്ഷൻ, വൈറ്റില ജനത പ്രദേശങ്ങളിൽ കൂടി കടന്നുവന്ന് പള്ളിയിൽ എട്ടുമണിക്ക് എത്തിച്ചേർന്നശേഷമാണ് ദൃശ്യാവിഷ്ക്കാരം അരങ്ങേറുന്നത്. തുടർന്ന് വരാപ്പുഴ അതിരൂപത സഹായമെത്രാൻ ഡോ. ആന്‍റണി വാലുങ്കൽ സന്ദേശം നൽകും. ഇടവകയിലുള്ള കെഎൽസിഎ യൂണിറ്റിലെ പ്രധാന പ്രവർത്തകർ ചേർന്നാണ് കഴിഞ്ഞ വർഷം മുതൽ ദൃശ്യാവിഷ്ക്കാരം തുടങ്ങിവച്ചത്. മുൻ വർഷത്തെപോലെ തന്നെ ക്രിസ്തുവിന്‍റെ വേഷത്തിൽ ജനശ്രദ്ധ നേടിയ കുഞ്ഞുമോൻ തട്ടാലിയാണ് ഈ വർഷവും ഈശോയുടെ വേഷം ചെയ്യുന്നത്. ഭാരമുള്ള മരക്കുരിശ് ചുമന്നുകൊണ്ട് നാല് കിലോമീറ്റർ ദൂരം പിന്നിട്ട് പള്ളി ഗ്രൗണ്ടിൽ തിരിച്ചെത്തിയതിനു ശേഷമാണ് ദൃശ്യാവിഷ്ക്കാരം നടക്കുന്നത്. വികാരി ഫാ. സെബാസ്റ്റ്യൻ ജോബി അശീത്പറമ്പിൽ, സഹവികാരിമാരായ ഫാ. ആൽഫിൻ ആന്‍റണി കൊച്ചുവീട്ടിൽ, ഫാ. പ്രബിൻ എന്നിവരുടെ നിർദേശാനുസരണം എം.എ. ജോളി, ബേബി കൊച്ചുവീട്ടിൽ, അമൽ മാർട്ടിൻ, ബൈജു തോട്ടാളി, സോണിയ വിനു, സേവ്യർ പി. ആന്‍റണി, ജോഷി പള്ളൻ തുടങ്ങിയവരുടെ നേതൃത്വത്തിൽ 40ൽ പരം പ്രവർത്തകർ കൈകോർക്കുന്ന സംരംഭത്തിനായി സിനിമ മേക്കപ്പ് ആർട്ടിസ്റ്റ് പട്ടണം ഷായും സംഘവും, സിനിമ ഹെയർ ഡ്രസ്സർ ലിസി ഇഗ്നേഷ്യസ്, ഫോട്ടോഗ്രാഫിക് ഡിസൈനർ സുമൻ മേരിദാസ്, സൗണ്ട് ഡിസൈനർ സജീവ് എന്നിവർ അണിയറ പ്രവർത്തനങ്ങളിൽ ഒന്നിക്കുന്നു.

ഉഷയ്ക്കും മുരുകനും അന്തിയുറങ്ങാൻ ഇനി കാരുണ്യത്തിന്‍റെ ഈഡൻസ് ഗാർഡൻ

വൈപ്പിൻ : ഞാറക്കൽ വാലക്കടവിലെ ഉഷ-മുരുകൻ ദമ്പതികളുടെ ശിഷ്ട ജീവിതം ഇനി ഈഡൻസ് ഗാർഡനിൽ. നിർധനരും വയോധികരുമായ ഈ ദമ്പതികൾക്ക് പ്രവാസിയായ ജോമോൻ പുതുശേരി യുടെ കാരുണ്യത്താൽ നിർമിച്ചതാണീ ഭവനം. മുൻ എംപി ഈഡന്‍റെ ഓർമയ്ക്കായാണ് ഈഡൻ ഗാർഡൻസ് എന്ന് പേരു നൽകിയത്. ജോമോന്‍റെ മക്കളുടെ മാമ്മോദീസ/ആദ്യകുർബാന സ്വീകരണം എന്നിവയോടനുബന്ധിച്ചാണ് ഈ സദ്പ്രവർത്തി. വിഷുദിനത്തിൽ താക്കോൽ ദാനം രമേശ്‌ ചെന്നിത്തല എംഎൽഎയും നാമകരണം ടി.ജെ. വിനോദ് എംഎൽഎയും നിർവഹിച്ചു. ഡിസിസി വൈസ് പ്രസിഡന്‍റ് ടിറ്റോ ആന്‍റണി അധ്യക്ഷനായി. ജോമോൻ പുതുശേരി, ഭവന നിർമാണത്തിന് നേതൃത്വം കൊടുത്ത അരുൺ ബാബു, മുതിർന്ന കോൺഗ്രസ്‌ നേതാവ് കെ.കെ. ചെല്ലപ്പൻ എന്നിവരെ രമേശ് ചെന്നിത്തല ആദരിച്ചു.ആശാ പ്രവർത്തകരായ സൗമ്യ കെ.വി. ഷീജ പ്രദീപ് എന്നിവർക്ക് വിഷു കൈനീട്ടവും നൽകി.

ഓഞ്ഞിപ്പുഴയെ വീണ്ടെടുക്കാൻ ജനകീയ സമിതിയുടെ രാപ്പകൽ സമരം ഇന്ന് മുതൽ

ആലുവ: പെരിയാറിന്‍റെ കൈവഴിയായ ഓഞ്ഞിപ്പുഴയിലെ 64 കൈയേറ്റങ്ങൾ തിരിച്ചുപിടിക്കണമെന്നാവശ്യപ്പെട്ട് ഓഞ്ഞിത്തോട് സംരക്ഷണ ജനകീയ സമിതിയുടെ നേതൃത്വത്തിൽ രാപ്പകൽ സമരം നടത്തുന്നു. കടുങ്ങല്ലൂർ ഗ്രാമപഞ്ചായത്ത് കവലയിൽ ഇന്ന് രാവിലെ 11ന് സമരം ആരംഭിക്കുമെന്ന് സംഘാടകർ അറിയിച്ചു. സംവിധായകൻ സന്തോഷ് പണ്ഡിറ്റ് രാപ്പകൽ സമരം ഉദ്ഘാടനം ചെയ്യും. കടുങ്ങല്ലൂർ, ആലങ്ങാട് പഞ്ചായത്തുകളിലെ ജനങ്ങളുടെ കുടിവെള്ള, കാർഷികാവശ്യങ്ങൾക്കും മത്സ്യ ബന്ധനത്തിനും ഉപകരിച്ചിരുന്നതോട് കൈയേറ്റക്കാരുടെ പിടിയിലായെന്നാണ് ജനകീയ സമിതി കുറ്റപ്പെടുത്തുന്നത്. ജില്ലാ കളക്ടറുടെ സ്പെഷൽ സർവേ ടീം കണ്ടെത്തിയ 64 കൈയേറ്റങ്ങൾ തിരിച്ചുപിടിക്കണമെന്നാണ് സമിതിയുടെ പ്രധാന ആവശ്യം. ഓഞ്ഞിത്തോട് സംരക്ഷണ ജനകീയ സമിതിയുടെ ഹർജിയെ തുടർന്നാണ് 2021 ൽ കേരള ഹൈക്കോടതിയുടെ ഇടപെട്ടാണ് സർവേ നിർദേശിച്ചത്. പെരിയാറിന്‍റെ ഏലൂക്കര ഭാഗത്ത് നിന്നാരംഭിച്ച് പടിഞ്ഞാറു മേത്താനം ഭാഗത്ത് അവസാനിക്കുമ്പോൾ 19.4 കിലോമീറ്റർ ദൂരത്തിൽ 100 ഏക്കർ സ്ഥലമാണ് 50 വർഷം മുമ്പ് ഉണ്ടായിരുന്നത്. എന്നാൽ 2015 ൽ നടത്തിയ കണക്കെടുപ്പിൽ ഓഞ്ഞിത്തോട് എന്നറിയപ്പെടുന്ന ഓഞ്ഞിപ്പുഴ കേവലം 3.5 ഏക്കർ മാത്രമായി ചുരുങ്ങി. 2022 ൽ പുഴയുടെ അതിർത്തി നിർണയം നടത്തിയെങ്കിലും അതിർത്തി കല്ലുകൾ സ്ഥാപിക്കുന്നതിൽ കടുങ്ങല്ലൂർ ആലങ്ങാട് പഞ്ചായത്തുകൾ, റവന്യൂ, സർവേ വകുപ്പുകൾ കൈയേറ്റക്കാരെ സഹായിക്കുന്ന നിലപാടാണ് എടുക്കുന്നതെന്ന് പരിസ്ഥിതി പ്രവർത്തകർ ആരോപിക്കുന്നു.

സഞ്ജു ഗണേഷിന് സ്വീകരണം നൽകി

ആലുവ: സന്തോഷ് ട്രോഫി ടീം ക്യാപ്റ്റനായി തെരഞ്ഞെടുക്കപ്പെട്ട സഞ്ജു ഗണേഷിന് ദേശീയ കായിക വേദി (കെപിസിസി കായിക വിഭാഗം) ആലുവ നിയോജകമണ്ഡലം കമ്മിറ്റി ഉപഹാരം നൽകി ആദരിച്ചു. ജില്ലാ പ്രസിഡന്‍റ് അഡ്വ. ജോർജ് ജോൺ വാലത്ത് ഉപഹാരം നൽകി. നിയോജകമണ്ഡലം പ്രസിഡന്‍റ് ആന്‍റോ എഡ്വിൻ ബേബി അധ്യക്ഷത വഹിച്ചു. ജില്ലാ ജനറൽ സെക്രട്ടറി ജോബി നെൽക്കര, എ.എ. മാഹിൻ തുടങ്ങിയവർ പ്രസംഗിച്ചു.

മെഡിക്കല്‍ ട്രസ്റ്റ് ആശുപത്രി സൗത്ത് ബ്ലോക്ക് ഉദ്ഘാടനം നാളെ

കൊച്ചി: മെഡിക്കല്‍ ട്രസ്റ്റ് ആശുപത്രിയുടെ പുതിയ ബ്ലോക്കിന്‍റെ ഉദ്ഘാടനം നാളെ ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കര്‍ നിര്‍വഹിക്കും. എറണാകുളം താജ് വിവാന്തയില്‍ വൈകുന്നേരം അഞ്ചിന് നടക്കുന്ന ചടങ്ങില്‍ മന്ത്രി പി.രാജീവ്, ഹൈബി ഈഡന്‍ എംപി, ടി.ജെ. വിനോദ് എംഎല്‍എ, മെഡിക്കല്‍ ട്രസ്റ്റ് ഹോസ്പിറ്റല്‍ മാനേജിംഗ് ഡയറക്ടര്‍ ഡോ. പി.വി. ലൂയിസ്, മെഡിക്കല്‍ ആന്‍ഡ് കൊമേഴ്സ്യല്‍ ഡയറക്ടര്‍ ഡോ. പി.വി. തോമസ്, ഫിനാന്‍സ് ഡയറക്ടര്‍ പി.വി. സേവ്യര്‍ എന്നിവര്‍ പ്രസംഗിക്കും. റോബോട്ടിക് സര്‍ജറി, ട്രാന്‍സ്പ്ലാന്‍റ് സെന്‍റര്‍, ബൈ പ്ലെയിന്‍ കാത്ത് ലാബ്, ബോണ്‍മാരോ ട്രാന്‍സ്പ്ലാന്‍റ്, കാര്‍- ടി സെല്‍ തെറാപ്പി തുടങ്ങി‌യ ചികിത്സാ സൗകര്യങ്ങളാണ് പുതിയ സൗത്ത് ബ്ലോക്ക് കെട്ടിടത്തിലുള്ളത്. മികച്ച കാന്‍റീന്‍ സൗകര്യവും ഇന്‍ഷ്വറന്‍സ് സംവിധാനങ്ങളും കൂടാതെ 150 ല്‍ പരം കാറുകള്‍ക്ക് പാര്‍ക്ക് ചെയ്യാവുന്ന സൗകര്യവും പുതിയ ബ്ലോക്കില്‍ ഉണ്ട്.

പറവൂരിൽ മാലിന്യസംസ്കരണത്തിന് ബയോമൈനിംഗ്

പറവൂർ: വെടിമറ മാലിന്യസംഭരണ കേന്ദ്രത്തിൽ വർഷങ്ങളായി കെട്ടിക്കിടക്കുന്ന മാലിന്യങ്ങൾ ശാസ്ത്രീയമായി സംസ്കരിക്കാൻ ബയോ മൈനിംഗ് ആരംഭിക്കുന്നതിനുള്ള ഒരുക്കങ്ങൾ പൂർത്തിയാകുന്നു. മാലിന്യങ്ങളിലെ വിവിധ ഘടകങ്ങളെ വേർതിരിച്ചെടുക്കുക, പുനരുപയോഗിക്കാൻ കഴിയുന്നവ പുനരുപയോഗിക്കുക, അല്ലാത്ത ജൈവ മാലിന്യം പ്രകൃതിക്കു ദോഷകരമല്ലാത്ത രീതിയിൽ സംസ്‌കരിക്കുക, മാലിന്യമല നിലനിൽക്കുന്ന ഭൂമി നിരപ്പാക്കിയെടുത്ത് ഉപയോഗപ്രദമാക്കുക എന്നിവയാണു ബയോ മൈനിങ്ങിൽ ഉൾപ്പെടുന്ന കാര്യങ്ങൾ. ലോക ബാങ്കിന്‍റെയും ഏഷ്യൻ ഇൻഫ്രാസ്ട്രക്‌ചർ ഇൻവസ്‌റ്റ്മെന്‍റ് ബാങ്കിന്‍റെയും സാമ്പത്തിക, സാങ്കേതിക സഹായത്തോടെ സംസ്‌ഥാന സർക്കാർ നടപ്പാക്കുന്ന കേരള ഖരമാലിന്യ സംസ്‌കരണ പദ്ധതിയുടെ ഭാഗമായാണു ബയോ മൈനിംഗ് നടത്തുന്നത്. നാലു കോടി രൂപയുടെ പദ്ധതിയുടെ നിർവഹണം നടത്തുന്നതു നാഗ്‌പൂർ ആസ്‌ഥാനമായ എസ്എംഎസ് ലിമിറ്റഡ് എന്ന കമ്പനിയാണ്. നേരത്തെ, സർക്കാർ അംഗീകൃത ഏജൻസി നടത്തിയ സർവേയിൽ 1.25 ഏക്കറിലായി 1866.272 ടൺ മാലിന്യം വെടിമറയിലെ മാലിന്യ സംഭരണ കേന്ദ്രത്തിൽ ഉള്ളതായി കണ്ടെത്തിയിരുന്നു. അവ ആർഡിഎഫ് (പ്ലാസ്‌റ്റിക്, തുണി മുതലായവ), ബയോസോയിൽ (മണ്ണ്, കല്ല് എന്നിവ), ഇൻഎർട് (ഇരുമ്പ്, സ്ക്രാപ് എന്നിവ) എന്നീ ഇനങ്ങളായാണു തരംതരിക്കുക. പ്ലാസ്‌റ്റിക്, തുണി എന്നിവ സിമന്‍റ് കമ്പനിക്ക് കൈമാറും. കല്ലും മണ്ണും വേർതിരിച്ച് അവിടെ തന്നെ നിക്ഷേപിക്കും. മണ്ണ് കാർഷിക ആവശ്യത്തിനും സൈറ്റ് ഫില്ലിങ്ങിനും ഉപയോഗിക്കുകയും ചെയ്യും. ഇരുമ്പ്, സ്ക്രാപ് തുടങ്ങിയവ ലേലം ചെയ്യും. ബയോ മൈനിംഗ് നടപ്പാക്കാൻ ആവശ്യമായ യന്ത്രങ്ങളും മറ്റും മാലിന്യസംഭരണ കേന്ദ്രത്തിൽ സ്‌ഥാപിച്ചിട്ടുണ്ട്. കഴിഞ്ഞ മാസം ട്രയൽ റൺ നടത്തിയിരുന്നു. മാലിന്യസംസ്‌കരണം പൂർത്തിയായാൽ നഗരത്തിന് ആവശ്യമായ ഖര-ദ്രവ്യ മാലിന്യ പദ്ധതികൾ നടപ്പാക്കാൻ കഴിയും. വൈകാതെ തന്നെ ബയോമൈനിംഗ് ആരംഭിക്കുമെന്നും തുടങ്ങിയാൽ ഒരു മാസം കൊണ്ടു പൂർത്തിയാകുമെന്നും നഗരസഭാധ്യക്ഷ ബീന ശശിധരൻ, ഉപാധ്യക്ഷൻ എം.ജെ. രാജു എന്നിവർ പറഞ്ഞു.

അഗ്‌നിരക്ഷാ സേനാ ദിനം ആചരിച്ചു

കാക്കനാട്: തൃക്കാക്കര അഗ്നി രക്ഷാ നിലയത്തിൽഅഗ്‌നിരക്ഷാ സേനാ ദിനം ആചരിച്ചു. ഇന്നലെ രാവിലെ ഒന്പതിന് പതാക ഉയർത്തി ലഹരി വിരുദ്ധ പ്രതിജ്ഞ ചൊല്ലിയാണ് ചടങ്ങുകൾ ആരംഭിച്ചത്. മണ്‍മറഞ്ഞ ധീരരായ അഗ്‌നിരക്ഷാ സേനാംഗങ്ങളുടെ അനുസ്മരണ ചടങ്ങും വാഹന റാലിയും സംഘടിപ്പിച്ചു. എൻജിഒ ക്വാർട്ടേഴ്സ്, സീപോർട്ട് റോഡ്, തൃക്കാക്കര നഗരസഭ, കാക്കനാട്, ഐഎംജി ജംഗ്ഷൻ, കളക്ടറേറ്റ്, പടമുകൾ, കുന്നുംപുറം എന്നിവിടങ്ങൾ വഴി വാഹന റാലി തൃക്കാക്കര അഗ്നി രക്ഷാ നിലയത്തിൽ സമാപിച്ചു. അഗ്നിരക്ഷാസേനയോടൊപ്പം സിവിൽ ഡിഫൻസ് അംഗങ്ങളും റാലിയിലുടനീളം പങ്കെടുത്തു. തൃക്കാക്കര അഗ്നിരക്ഷാ നിലയം ഓഫീസർ ബി. ബൈജു ചടങ്ങുകൾ ഉദ്ഘാടനം ചെയ്തു. സീനിയർ ഫയർ ആൻഡ് റെസ്ക്യൂ ഓഫീസർ ഷിജാം അധ്യക്ഷത വഹിച്ചു.

ശ്രീജേഷ് സ്പോർട്സ് അക്കാദമിയിൽ കോച്ചിംഗ് ക്യാന്പ് തുടങ്ങി

കിഴക്കമ്പലം: ഒളിംപ്യൻ പി.ആർ. ശ്രീജേഷിന്‍റെ പേരിലുള്ള കേരളത്തിലെ ആദ്യ സ്പോർട്സ് അക്കാദമിയായ ശ്രീജേഷ് സ്പോർട്സ് അക്കാദമിയിൽ കോച്ചിംഗ് ക്യാന്പ് ആരംഭിച്ചു. പഴങ്ങനാട് ലയൺസ് ക്ലബിന്‍റെ ആഭിമുഖ്യത്തിൽ പഴങ്ങനാട് പ്രവർത്തിക്കുന്ന സ്പോർട്സ് ആക്കാദമിയിലാണ് മെഗാകോച്ചിംഗ് ക്യാമ്പ് ആരംഭിച്ചത്. ബാഡ്മിന്‍റൺ, ക്രിക്കറ്റ്, ഫുട്ബോൾ, കരാത്തേ, സ്കേറ്റിംഗ് എന്നിവയ്ക്ക് പുറമേ ക്ലാസിക്കൽ ഡാൻസ്, മ്യൂസിക്, ചിത്രരചന, പെയിന്‍റിംഗ്, ചെസ്, ഗിത്താർ എന്നിവയും ആരംഭിച്ചു. പഴങ്ങനാട് ലയൺസ് ക്ലബിന്‍റെ നേതൃത്വത്തിൽ ആണ് അക്കാദമിയുടെ പ്രവർത്തനം. 24 മണിക്കൂർ പ്രവർത്തിക്കുന്ന ഉയരം കൂടിയ ടർഫിൽ ക്രിക്കറ്റ്, ഫുട്ബോൾ കോച്ചിംഗ് എന്നിവ കൂടാതെ ടൂർണമെന്‍റുകളും നടക്കുന്നുണ്ട് .

നവീകരിച്ച കേരള ബാങ്ക് ശാഖ ഉദ്ഘാടനം ചെയ്തു

കൊച്ചി: കേരള ബാങ്കിന്‍റെ നവീകരിച്ച അങ്കമാലി ശാഖ ബാങ്ക് പ്രസിഡന്‍റ് ഗോപി കോട്ടമുറിക്കല്‍ ഉദ്ഘാടനം ചെയ്തു. അങ്കമാലി മുന്‍സിപ്പല്‍ ചെയര്‍മാന്‍ അഡ്വ. ഷിയോ പോള്‍, ബാങ്ക് ഭരണസമിതിയംഗം അഡ്വ. പുഷ്പദാസ്, ബോര്‍ഡ് ഓഫ് മാനേജ്‌മെന്‍റ് അംഗം അഡ്വ. മാണി വിതയത്തില്‍, ചീഫ് എക്‌സിക്യുട്ടീവ് ഓഫീസര്‍ ജോര്‍ട്ടി എം. ചാക്കോ, അങ്കമാലി ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യാ തങ്കച്ചന്‍, വാര്‍ഡ് കൗണ്‍സിലര്‍ ഗ്രേസി, റീജിയണല്‍ ജനറല്‍ മാനേജര്‍ ഡോ. എന്‍. അനില്‍കുമാര്‍, ഡിജിഎം രഞ്ജിനി വര്‍ഗീസ് എന്നിവര്‍ പങ്കെടുത്തു.

മത്സ്യം കഴിച്ചയാൾക്ക് വയറിളക്കവും ഛർദ്ദിയും: പരാതി നൽകി

പള്ളുരുത്തി: തോപ്പുംപടി ബിഎസ്എൻഎൽ ഓഫീസിനു സമീപത്തെ മീൻ മാർക്കറ്റിൽ നിന്ന് വാങ്ങിയ മത്സ്യം കഴിച്ച് വയറിളക്കും ഛർദ്ദിയും സംഭവിച്ച പള്ളുരുത്തി എംഎൽഎ റോഡ് ഐഷാ കോട്ടേജിൽ സിയാദ് (49) നെ കരുവേലിപ്പടി ആശുപത്രിയിൽ പ്രവേശിപ്പിച്ചു. കഴിഞ്ഞ ദിവസം സിയാദിന്റെ മകനാണ് മാർക്കറ്റിൽ നിന്നും മീൻ വാങ്ങിയത് കാഴ്ചയിൽ പച്ച മീൻ എന്ന് തോന്നുമെങ്കിലും കറിവെച്ചതിനുശേഷമാണ് ഫോർമാലിന്‍റെ രൂക്ഷമായ ഗന്ധം ഉണ്ടായതായി സിയാദ് പറഞ്ഞു. മാസങ്ങൾക്ക് മുൻപ് ഫുഡ് ഇൻസ്പെക്ടറുടെ നേതൃത്വത്തിൽ പരിശോധനയിൽ പള്ളുരുത്തി, തോപ്പുംപടിമാർക്കറ്റുകളിൽ നിന്ന് 500 കിലോയോളം ചീഞ്ഞ മീനാണ് പിടിച്ചെടുത്തത്. ഹാർബറിൽ നിന്നും ശേഖരിക്കുന്ന നല്ല മീനിന്റെ കൂടെ ഇതര സംസ്ഥാനങ്ങളിൽ നിന്ന് കൊച്ചിയിൽ എത്തിക്കുന്ന മാസങ്ങൾ പഴക്കമുള്ള മീനും ചേർത്താണ് വിൽപന നടത്തുന്നത്. സംഭവത്തിൽ ഫുഡ് ഇൻസ്പെക്ടർക്ക് പരാതി നൽകിയതായി കോൺഗ്രസ് ഇടക്കൊച്ചി ബ്ലോക്ക് സെക്രട്ടറിയായ ടി.എ. സിയാദ് പറഞ്ഞു.

പാലത്തിൽ മെഴുകുതിരി കത്തിച്ച് പ്രതിഷേധിച്ചു

നെടുമ്പാശേരി : നെടുമ്പാശേരി ഗ്രാമ പഞ്ചായത്തിലെ എയർപോർട്ട് 11ാം വാർഡിലെ ആവണംകോട് കുഴിപ്പള്ളം പാലത്തിൽ വഴി വിളക്കുകൾ സ്ഥാപിക്കാത്തതിലും പഞ്ചായത്ത് ഭരണ സമിതിയുടെ അനാസ്ഥയിലും പ്രതിഷേധിച്ച് കോൺഗ്രസ് വാർഡ് കമ്മിറ്റിയുടെ നേതൃത്വത്തിൽ പാലത്തിൽ മെഴുകുതിരി കത്തിച്ച് പ്രതിഷേധ സമരം നടത്തി. പ്രതിഷേധ സമരത്തിൽ കോൺഗ്രസ് വാർഡ് പ്രസിഡന്‍റ് കെ.പി. ഡേവി അധ്യക്ഷത വഹിച്ചു. പ്രവാസി കോൺഗ്രസ് സംസ്ഥാന സെക്രട്ടറി ബിജു കെ. മുണ്ടാടൻ പ്രതിഷേധ സമരം ഉദ്ഘാടനം ചെയ്തു.

മുനമ്പം നിവാസികളെ കബളിപ്പിച്ചു: മുഹമ്മദ് ഷിയാസ്

കൊച്ചി: മുനമ്പത്തെ ജനങ്ങള്‍ നിയമപോരാട്ടം തുടരേണ്ടിവരുമെന്നും ഭൂമി തര്‍ക്കത്തിന് നിയമ വഴിയിലൂടെ തന്നെ പരിഹാരം കാണണമെന്നും കേന്ദ്രമന്ത്രി കിരണ്‍ റിജിജു തുറന്ന് സമ്മതിച്ചതോടെ ബിജെപിയുടെ തനിനിറം പുറത്തായതായി ഡിസിസി പ്രസിഡന്‍റ് മുഹമ്മദ് ഷിയാസ്. പാവപ്പെട്ട മത്സ്യത്തൊഴിലാളികളെ ബിജെപി നേതാക്കള്‍ പറഞ്ഞു പറ്റിക്കുകയായിരുന്നു. മുനമ്പം ഭൂമി തര്‍ക്കത്തിന് പരിഹാരം എന്ന് കൊട്ടിഘോഷിച്ചാണ് ബിജെപി വഖഫ് നിയമഭേദഗതി നടപ്പാക്കിയത്. എന്നാല്‍ ഇപ്പോള്‍ പറയുന്നത് കോടതിവഴി പരിഹാരത്തിന് ശ്രമിക്കുമെന്നാണ്. ക്രൈസ്തവ വോട്ട് തട്ടിയെടുക്കാന്‍ വേണ്ടിയുള്ള നാടകമായിരുന്നു വഖഫ് ഭേദഗതിയെന്ന് ഇതോടെ തെളിഞ്ഞിരിക്കുകയാണ്. സംസ്ഥാന സര്‍ക്കാര്‍ മനസ് വച്ചാല്‍ പരിഹരിക്കാവുന്ന വിഷയമേ മുനമ്പത്തുള്ളൂ. എന്നാല്‍ സിപിഎമ്മും ബിജെപിയും ചേര്‍ന്ന് രാഷ്ട്രീയം കളിക്കുകയാണ്. വര്‍ഗീയ സംഘര്‍ഷത്തിനായി കാത്തിരിക്കുന്ന കഴുകന്മാരാണ് ഇരുവരുമെന്നുമെന്നും ഷിയാസ് ആരോപിച്ചു.

ശലഭോദ്യാനത്തിൽ നിന്ന് മോഷ്ടിച്ച ചെടിച്ചട്ടികൾ തിരികെയെത്തിച്ചു

നെടുമ്പാശേരി: പാറക്കടവ് പഞ്ചായത്തിന്‍റെ നേതൃത്വത്തിൽ മൂഴിക്കുളം നാട്ടു കൂട്ടത്തിന്‍റെ സഹകരണത്തോടെ ചീരോത്തി തോടിൽ പ്രത്യേകം തയാറാക്കിയ സ്ഥലത്ത് നിർമിച്ച ശലഭോദ്യാനത്തിൽ നിന്നും ചെടി ചട്ടികൾ മോഷ്ടിച്ചവർ തിരികെ കൊണ്ടു വച്ചു. കഴിഞ്ഞ ചൊവ്വാഴ്ച വൈകിട്ട് കോണ്ടസ കാറിൽ വന്ന ഒരു കുടുംബം രണ്ടു ചെടിച്ചട്ടികൾ മോഷ്ടിച്ചു കൊണ്ടു പോകുന്നത് സിസിടിവി കാമറയിൽ ദൃശ്യമായി. ചെങ്ങമനാട് പോലീസ് സ്റ്റേഷനിൽ കാമറ ദൃശ്യങ്ങളോടു കൂടി പരാതി കൊടുത്തു. ചെടിച്ചട്ടിയുമായി പോലീസ് സ്റ്റേഷനിൽ എത്താൻ ആവശ്യപ്പെട്ടപ്പോളാണ് ചെടിച്ചട്ടികൾ മോഷ്ടിച്ച സ്ഥലത്ത് തന്നെ കൊണ്ടു വച്ച് തലയൂരാൻ ശ്രമിച്ചത്. പോലീസ് വീണ്ടും സ്റ്റേഷനിലേക്ക് പ്രതികളെ വിളിപ്പിച്ചിരിക്കുകയാണ്.

താത്കാലിക ആലുവ കോടതി; കരാർ തുക കൈമാറി

ആലുവ: നിലവിലെ ആലുവ മുൻസിഫ്, മജിസ്ട്രേറ്റ് കോടതികൾ താത്കാലികമായി ബിഎസ്എൻഎൽ കെട്ടിടത്തിലേക്ക് മാറ്റുന്നതിന് തയാറെടുപ്പ് ആരംഭിച്ചു. ഇന്നലെ ബിഎസ്എൻഎൽ കെട്ടിടത്തിലെത്തി കരാർ തുക കൈമാറി. അൻവർ സാദത്ത് എംഎൽഎ, ജില്ലാ ജഡ്ജി ഷിബു ഡാനിയേൽ, മുൻസിഫ് പ്രിയങ്കാ പോൾ, മജിസ്ട്രേറ്റുമാരായ ലതികാ മോഹൻ, അൻജു ക്ലീറ്റസ്, ബാർ അസോസിയേഷൻ പ്രസിഡന്‍റ് അഡ്വ. പി.എൻ. ഉണ്ണികൃഷ്ണൻ എന്നിവരാണ് സ്ഥലം സന്ദർശിച്ചത്. പൊതുമരാമത്ത് വകുപ്പാണ് ബിഎസ്എൻഎൽ കെട്ടിട സമുച്ചയത്തിലെ ഒരു ഭാഗം കോടതികളായി ഒരുക്കുക. നിലവിലെ കോടതി കെട്ടിടം പൊളിച്ച് അതേ സ്ഥലത്ത് പുതിയ ബഹുനില കെട്ടിടമാണ് ഉയരുക.

തൃക്കാക്കര നഗരസഭാ വൈസ് ചെയർമാൻ അബ്ദു ഷാനയുടെ രാജി ഇന്ന്

കാക്കനാട്: തൃക്കാക്കര നഗരസഭാ വൈസ് ചെയർമാൻ അബ്ദു ഷാന ഇന്ന് ഉച്ചയ്ക്ക് ശേഷം രണ്ടിന് പദവി രാജിവക്കും. ഇടച്ചിറ ഡിവിഷനിൽ നിന്നും സ്വതന്ത്രനായി മത്സരിച്ചു വിജയിച്ച അബ്ദു ഷാനയ്ക്ക് അഞ്ചു മാസത്തേക്ക് വൈസ് ചെയർമാൻ പദവി നൽകുന്നതിന് യുഡിഎഫിൽ ധാരണ ഉണ്ടായിരുന്നു. മുസ്ലിം ലീഗിന്‍റെ കൈവശമുള്ള വൈസ് ചെയർമാൻ പദവി ധാരണപ്രകാരം അബ്ദു ഷാനക്ക് കൈമാറുകയും ചെയ്തു. കാലാവധി പൂർത്തിയായ മാർച്ച് 23 ന് തന്നെ അബ്ദു ഷാന രാജി സന്നദ്ധത അറിയിച്ചെങ്കിലും ലീഗിലെ ഗ്രൂപ്പ് ഭിന്നത മൂലം രാജി നീളുകയായിരുന്നു. ലീഗ് ജില്ലാ നേതൃത്വം ഏപ്രിൽ 16ന് മുമ്പ് പദവി രാജിവക്കാൻ അബ്ദു ഷാനക്ക് കത്തുനൽകിയിരുന്നു തുടർന്ന് ഡിസിസി നേതൃത്വവും അബ്ദു ഷാന രാജി വെയ്ക്കണമെന്നറിയിച്ചു. ഇന്ന് ഉച്ചയ്ക്ക് രണ്ടിന് മുനിസിപ്പൽ സെക്രട്ടറി മുമ്പാകെ അബ്ദു ഷാന രാജി സമർപ്പിക്കും. മുസ്ലിംലീഗിന്‍റെ സ്വതന്ത്ര കൗൺസിലർ എം.സി. ദിനൂപിനെ നഗരസഭാ വൈസ് ചെയർമാനായി നിർദ്ദേശിക്കാനാണ് ലീഗ് നേതൃത്വം ആലോചിക്കുന്നത്. ലീഗിലെ തന്നെ എ.എ. ഇബ്രാഹിം കുട്ടി രണ്ടര വർഷവും, തുടർന്ന് ഒന്നര വർഷം ലീഗിലെ പി.എം. യൂനിസും തുടർന്നുള്ള ഒരു വർഷം എം.സി. ദിനൂപിനും പദവി നൽകാനായിരുന്നു ലീഗിലെ ആദ്യ ധാരണ. യുഡിഎഫ് നേതൃത്വത്തിന്‍റെ തീരുമാനപ്രകാരം യൂനിസിന്‍റെ കാലാവധി തീരുന്നതിനും ആറു മാസം മുൻപ് പദവി അബ്ദു ഷാനയ്ക്ക് കൈമാറുകയായിരുന്നു. പുതിയ വൈസ് ചെയർമാനെ തെരഞ്ഞെടുക്കാൻ ഇനിയും മൂന്നാഴ്ച വൈകിയേക്കും. ധാരണപ്രകാരം പി.സി. ദിനൂപ് തന്നെയാവും ലീഗിന്‍റെ വൈസ് ചെയർമാൻ സ്ഥാനാർഥി.

മൂവാറ്റുപുഴ നഗര വികസനം: നിർമാണങ്ങൾക്ക് തുടക്കം

മൂവാറ്റുപുഴ: മൂവാറ്റുപുഴ നഗര വികസനത്തിന്‍റെ ഭാഗമായുള്ള റോഡ് നിർമാണ പ്രവർത്തനങ്ങൾക്ക് തുടക്കമായി. നാലുവരി പാതയായി പുനർ നിർമിക്കുന്ന റോഡ് ഉന്നത നിലവാരത്തിലായിരിക്കും പൂർത്തീകരിക്കുന്നതെന്ന് മാത്യു കുഴൽനാടൻ എംഎൽഎ അറിയിച്ചു. കൂടുതൽ കാലം നിലനിൽക്കുന്നതിന് നാല് പാളികളായിട്ടാണ് റോഡ് നിർമാണം രൂപകൽപ്പന ചെയ്തിട്ടുള്ളത്. നിലവിലെ ടാറിംഗ് പൊളിച്ചു നീക്കിയാണ് പുതിയ റോഡ് നിർമിക്കുന്നത്. നിശ്ചയിച്ച സമയത്ത് തന്നെയാണ് റോഡിന്‍റെ നിർമാണ പ്രവർത്തനങ്ങൾക്ക് തുടക്കം കുറിച്ചത്. സയാന ഹോട്ടലിന്‍റെ ഭാഗത്തുനിന്ന് കച്ചേരിത്താഴം വരെയാണ് ആദ്യഘട്ടം നിർമാണം ആരംഭിച്ചത്. ഈ ഭാഗത്തെ നിർമാണം പൂർത്തിയാക്കിയ ശേഷം ബാക്കി ഭാഗത്ത് നിർമാണ പ്രവർത്തനങ്ങൾ പൂർത്തീകരിക്കും. എംഎൽഎ ഓഫീസിന്‍റെ സമീപമുള്ള കലുങ്കിന്‍റെ രണ്ടാം ഭാഗത്തിന്‍റെ നിർമാണവും ഇതോടൊപ്പം ആരംഭിച്ചു. റോഡ് നിർമാണ പ്രദേശത്തെ യൂട്ടിലിറ്റി ഷിഫ്റ്റിംഗിന്‍റെ ഭാഗമായി വൈദ്യുതി ലൈൻ, കുടിവെള്ള വിതരണത്തിനുള്ള പൈപ്പുകൾ എന്നിവ മാറ്റി സ്ഥാപിക്കുന്ന പ്രവൃത്തികളും ഇതോടൊപ്പം നടക്കുന്നുണ്ട്. അടുത്ത ദിവസം തന്നെ ഇവ പൂർത്തീകരിക്കും. റോഡ് നിർമാണം ആരംഭിച്ചതോടെ ട്രാഫിക് നിയന്ത്രണവും ഏർപ്പെടുത്തിയിട്ടുണ്ട്. ട്രാഫിക് നിയന്ത്രണങ്ങളോട് വ്യാപാരികളും പൊതുജനങ്ങളും സഹകരിക്കണമെന്ന് എംഎൽഎയും നഗരസഭാധ്യക്ഷനും അഭ്യർഥിച്ചു. നിർമാണ പ്രവർത്തനങ്ങൾ നടക്കുന്ന പ്രദേശങ്ങൾ മാത്യു കുഴൽനാടൻ എംഎൽഎ, നഗരസഭാധ്യക്ഷൻ പി.പി. എൽദോസ്, വൈസ് ചെയർപേഴ്സണ്‍ സിനി ബിജു, സ്ഥിരംസമിതി അധ്യക്ഷരായ അജി മുണ്ടാട്ട്, പി.എം. അബ്ദുൾ സലാം, ജോസ് കുര്യാക്കോസ്, നഗരസഭാംഗങ്ങളായ കെ.കെ. സുബൈർ, അമൽ ബാബു, ജോളി മണ്ണൂർ, ജോയ്സ് മേരി ആന്‍റണി, മേരിക്കുട്ടി ചാക്കോ എന്നിവർ സന്ദർശിച്ചു.

‘ബംഗ്ലാവ് കടവ് പാലം യാഥാർഥ്യമാക്കണം’

കോതമംഗലം: വടാട്ടുപാറയെ കുട്ടന്പുഴയുമായി ബന്ധിപ്പിക്കുന്ന ബംഗ്ലാവ് കടവ് പാലം യാഥാർഥ്യമാക്കണമെന്ന് കേരള ഫോറസ്റ്റ് ലേബർ യൂണിയൻ (ഐഎൻടിയുസി) വടാട്ടുപാറ മേഖല കണ്‍വൻഷൻ ആവശ്യപ്പെട്ടു. കുട്ടന്പുഴയ്ക്കുള്ള യാത്രാദൂരം നാല് കിലോമീറ്ററായി കുറയ്ക്കുന്നതും കുട്ടന്പുഴ പഞ്ചായത്തിന്‍റെ സമഗ്രവികസനം ഉറപ്പ് വരുത്തുന്നതിനും കുട്ടന്പുഴ-ബംഗ്ലാവ് കടവ് പാലം യാഥാർഥ്യമാകണം. കൂടാതെ പലവൻപടി-കുട്ടന്പുഴ റോഡും യാഥാർഥ്യമാക്കണമെന്നും കണ്‍വൻഷൻ സർക്കാരിനോട് ആവശ്യപ്പെട്ടു. ഫോറസ്റ്റ് ലേബർ യൂണിയൻ 50-ാം വാർഷികത്തിന്‍റെ ഭാഗമായി രാഖി പാർക്കിൽ നടത്തിയ കണ്‍വൻഷൻ കുട്ടന്പുഴ പഞ്ചായത്ത് മുൻ പ്രസിഡന്‍റ് കെ.എം. അബ്ദുള്ളക്കുഞ്ഞ് ഉദ്ഘാടനം ചെയ്തു. യൂണിയൻ പ്രസിഡന്‍റ് പി.ഐ. പൈലി അധ്യക്ഷത വഹിച്ചു.

മറന്നുവച്ച പണം ഉടമയെ കണ്ടെത്തി തിരികെ നൽകി അക്ഷയ സെന്‍റർ ഉടമ

മൂവാറ്റുപുഴ: മറന്നുവച്ച പണം ഉടമയെ കണ്ടെത്തി തിരികെ നൽകി അക്ഷയ സെന്‍റർ ഉടമ മാതൃകയായി. റിട്ട. ഹെൽത്ത് ജീവനക്കാരൻ വീട്ടൂർ സ്വദേശി മാപ്പിളമാലിൽ എം.വൈ. പൗലോസിന്‍റെ (90) നഷ്ടമായ പണമാണ് അക്ഷയ സെന്‍റർ ഉടമ ഉമ്മർ മുതലക്കാലായിൽ ഉടമയെ കണ്ടെത്തി കൈമാറിയത്. കഴിഞ്ഞ ദിവസം പെൻഷൻ വാങ്ങാൻ മൂവാറ്റുപുഴ ട്രഷറിയിലെത്തിയ പൗലോസ് 24,500 രൂപ എടുത്തു. മടങ്ങും വഴി സിവിൽ സ്റ്റേഷനു മുന്നിലെ അക്ഷയ സെന്‍ററിൽ കയറിയ ശേഷം തിരികെ വീട്ടിലെത്തിയപ്പോഴാണ് പണം നഷ്ടപ്പെട്ട വിവരം അറിയുന്നത്. തുടർന്ന് പലയിടങ്ങളിലും പണം അന്വേഷിച്ചെങ്കിലും കണ്ടെത്താനായില്ല. അക്ഷയ സെന്‍റർ അടയ്‌ക്കുന്നതിനിടെയാണ് ഉടമയായ ഉമ്മറിന് പണമടങ്ങിയ കവർ ലഭിച്ചത്. പാസ് ബുക്കും പണവുമായിരുന്നു കവറിൽ ഉണ്ടായിരുന്നത്. തുടർന്ന് ട്രഷറി ഉദ്യോഗസ്ഥരുടെ സഹായത്തോടെയാണ് ഉടമയെ തേടിപ്പിടിച്ചത്. മൂവാറ്റുപുഴ പോലീസ് ഇൻസ്പെക്ടർ ബേസിൽ തോമസിന്‍റെ സാന്നിധ്യത്തിൽ ഉമ്മർ ഉടമയ്ക്ക് തുക കൈമാറി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]