ADVERTISEMENT

ADVERTISEMENT

കരിയര്‍ ഗൈഡന്‍സ് സെമിനാര്‍

കരൂര്‍: എസ്എംവൈഎം കരൂര്‍ യൂണിറ്റിന്‍റെയും രാമപുരം ഫൊറോനയുടെയും ആഭിമുഖ്യത്തില്‍ കരിയര്‍ ഗൈഡന്‍സ് സെമിനാര്‍ നടത്തി. എസ്എംവൈഎം രൂപത ജനറല്‍ സെക്രട്ടറി റോബിന്‍ ടി. ജോസ് താന്നിമല ഉദ്ഘാടനം ചെയ്തു. യൂണിറ്റ് പ്രസിഡന്‍റ് ബിബിന്‍ മനോജ് അധ്യക്ഷത വഹിച്ചു. ജൂലിമോള്‍ ആഗസ്തി കരിയര്‍ ഗൈഡന്‍സ് സെമിനാര്‍ ക്ലാസ് നയിച്ചു. ഫൊറോന പ്രസിഡന്‍റ് ജെഫിന്‍ റോയി എലിപ്പുലിക്കാട്ട്, നേഹ സ്‌കറിയ, എഡ്വിന്‍ ടെനിസണ്‍, ബെന്‍സി ബെന്നി, മോളി ജോണ്‍സന്‍, പ്രിയ ജോര്‍ജ്, ജൂബിറ്റ് ആഗസ്തി എന്നിവര്‍ പ്രസംഗിച്ചു.

ADVERTISEMENT

മാടപ്പള്ളി ബ്ലോക്ക് റിസോഴ്‌സ് പേഴ്‌സണ്‍മാരുടെ പരിശീലനം പൂര്‍ത്തിയായി

ചങ്ങനാശേരി: വിജ്ഞാനകേരളം പദ്ധതിയുടെ ഭാഗമായി മാടപ്പള്ളി ബ്ലോക്കിലെ ലോക്കല്‍ റിസോഴ്‌സ് പേഴ്‌സണ്‍മാര്‍ക്കുള്ള പരിശീലനം പൂര്‍ത്തിയായി. ബ്ലോക്ക് പഞ്ചായത്ത് പരിധിയിലെ തൃക്കൊടിത്താനം, പായിപ്പാട്, മാടപ്പള്ളി, വാഴപ്പള്ളി, വാകത്താനം പഞ്ചായത്തുകളില്‍നിന്നുള്ളവരാണ് പരിശീലനം നേടിയത്. കേരള നോളജ് ഇക്കോണമി മിഷന്‍ പ്രവര്‍ത്തനങ്ങള്‍ സന്നദ്ധ സേവന മാതൃകയിലും ജനപങ്കാളിത്തത്തോടെയും കൂടുതല്‍ വിപുലീകരിക്കുന്നതിന്‍റെ ഭാഗമായാണ് ഓരോ വാര്‍ഡില്‍നിന്നും റിസോഴ്‌സ് പേഴ്‌സണ്‍മാരെ തെരഞ്ഞെടുത്തത്. ഇവരാണ് വിജ്ഞാനകേരളം പ്രവര്‍ത്തനങ്ങള്‍ കൂടുതല്‍ കാര്യക്ഷമമായി നടപ്പിലാക്കാന്‍ സഹായിക്കുന്നത്. കേരള നോളജ് ഇക്കോണമി മിഷന്‍റെ നേതൃത്വത്തില്‍ തദേശ സ്വയംഭരണ വകുപ്പുമായി സഹകരിച്ചുകൊണ്ട് ജനകീയ പങ്കാളിത്തത്തോടെ നടപ്പിലാക്കുന്ന പദ്ധതിയാണ് വിജ്ഞാനകേരളം. ബ്ലോക്ക് അടിസ്ഥാനത്തില്‍ പ്രവര്‍ത്തിക്കുന്ന ജോബ്‌ സ്റ്റേഷന്‍ കേന്ദ്രീകരിച്ചായിരിക്കും പദ്ധതിയുടെ പ്രവര്‍ത്തനം. ബ്ലോക്ക് പഞ്ചായത്ത് സെക്രട്ടറി വിനോദ് കെ. പദ്ധതി വിശദീകരിച്ചു. കില റിസോഴ്‌സ് പേഴ്‌സണ്‍മാരായ വി.ടി. കുര്യന്‍, രഞ്ജിത്ത് രവീന്ദ്രന്‍ എന്നിവര്‍ ക്ലാസുകള്‍ നയിച്ചു.

മഹല്ല് കോ-ഓര്‍ഡിനേഷന്‍ കമ്മിറ്റി റാലി നടത്തി

ചങ്ങനാശേരി: വഖഫ് നിയമ ഭേദഗതിക്കെതിരേ സംയുക്ത മഹല്ല് കോ-ഓര്‍ഡിനേഷന്‍ കമ്മിറ്റി നടത്തിയ പ്രതിഷേധ സമ്മേളനം ജോണ്‍ ബ്രിട്ടാസ് എംപി ഉദ്ഘാടനം ചെയ്തു. മുസ്‌ലീമിന്‍റെയും ക്രിസ്ത്യാനിയുടെയും ഹിന്ദുവിന്‍റെയും പേരുപറഞ്ഞ് ബിജെപി ഇന്ത്യയില്‍ ഭിന്നത വളര്‍ത്തുകയാണെന്ന് അദ്ദേഹം പറഞ്ഞു. മഹല്ല് കോ-ഓര്‍ഡിനേഷന്‍ കമ്മിറ്റി സെക്രട്ടറി എസ്.എം. ഫുവാദ് അധ്യക്ഷത വഹിച്ചു. ഡോ. ജുനൈദ് ജൗഹരി അല്‍ അസ്ഹരി മുഖ്യപ്രഭാഷണം നടത്തി. പുതൂര്‍പ്പള്ളി പ്രസിഡന്‍റ് ടി.പി. അബ്ദുല്‍ ഹമീദ്, ഡോ. അര്‍ഷദ് ഫലാഹി ബാഖവി, ഹക്കീം പാറയില്‍ എന്നിവര്‍ പ്രസംഗിച്ചു.

എട്ടിയാകരി -കൈപ്പുഴയ്ക്കല്‍ തോട്ടില്‍ നീരൊഴുക്ക് കൂട്ടാനുള്ള ജോലിയാരംഭിച്ചു

പായിപ്പാട്: പഞ്ചായത്തിലെ ഒന്നാംവാര്‍ഡിലുള്ള എട്ടിയാകരി-കൈപ്പുഴയ്ക്കല്‍ തോട്ടില്‍നിന്നും എക്കലും ചെളിയും നീക്കം ചെയ്ത് തോടിന് ആഴം കൂട്ടുന്ന പ്രവൃത്തി ആരംഭിച്ചു. ജോബ് മൈക്കിള്‍ എംഎല്‍എ ഉദ്ഘാടനം നിര്‍വഹിച്ചു. എക്കലും ചെളിയും അടിഞ്ഞ് തോട്ടിലെ നീരൊഴുക്ക് തടസപ്പെടുന്ന സ്ഥിതി ഒഴിവാക്കാനുള്ള പദ്ധതിക്കാണ് തുടക്കംകുറിച്ചത്. തോടിന്‍റെ ആഴം കൂട്ടുന്നതിലൂടെ രണ്ടാം കൃഷിയിറക്കാനും കര്‍ഷകരുടെ നെല്ല് കയറ്റിവിടുന്ന പ്രവര്‍ത്തനങ്ങള്‍ എളുപ്പത്തിലാക്കാനും അതുപോലെ തന്നെ പാടശേഖരത്തിലേക്കു വെള്ളം കയറ്റുവാനും സാധിക്കും. 8.5 ലക്ഷം രൂപ മുടക്കിയാണ് പ്രവൃത്തി ചെയ്യുന്നത്. എംഎല്‍എയുടെ അടിയന്തര ഇടപെടലിലൂടെയാണ് പദ്ധതി നടപ്പാക്കാനായത്. മേജര്‍ ഇറിഗേഷന്‍ എ.ഇ. ജെപ്‌സണ്‍, അഗ്രികള്‍ച്ചര്‍ അസിസ്റ്റന്‍റ് ഡയറക്ടര്‍ അനീന സൂസന്‍ സക്കറിയ, പായിപ്പാട് കൃഷി ഓഫീസര്‍ ആല്‍ബി എന്നിവര്‍ പ്രസംഗിച്ചു.

പഞ്ചപാണ്ഡവ ക്ഷേത്രങ്ങള്‍ ആത്മീയതയുടെ പ്രതീകങ്ങള്‍: മഹാരാ‌ഷ്‌ട്ര ഗവര്‍ണര്‍

തൃക്കൊടിത്താനം: കേരളത്തിന്‍റെ ആത്മീയതയുടെയും ശില്പ സൗന്ദര്യത്തിന്‍റെയും പ്രതീകങ്ങളാണ് പഞ്ചപാണ്ഡവ ക്ഷേത്രങ്ങളെന്ന് മഹാരാഷ്‌ട്ര ഗവര്‍ണര്‍ സി.പി. രാധാകൃഷ്ണന്‍. തൃക്കൊടിത്താനം മഹാക്ഷേത്രത്തില്‍ അഞ്ചാമത് അഖില ഭാരത പാണ്ഡവീയ മഹാവിഷ്ണു സത്രത്തിന്‍റെ സത്രശാല സമര്‍പ്പണം നടത്തുകയായിരുന്നു അദ്ദേഹം. നാനാത്വത്തില്‍ ഏകത്വമെന്ന നിലയില്‍ സത്രത്തെ കാണാന്‍ കഴിയണ മെന്നും ഗവര്‍ണര്‍ പറഞ്ഞു. പഞ്ച ദിവ്യദേശ ദര്‍ശന്‍ ചെയര്‍മാന്‍ ബി. രാധാകൃഷ്ണമേനോന്‍ അധ്യക്ഷത വഹിച്ചു. സെക്രട്ടറി പ്രസാദ് കളത്തൂര്‍, സത്ര സമിതി ജനറല്‍ കണ്‍വീനര്‍ വിനോദ് ജി. നായര്‍, ഉപദേശക സമിതി സെക്രട്ടറി പി.ആര്‍. രാജേഷ് തിരുമല തേവള്ളി, സബ് ഗ്രൂപ്പ് ഓഫീസര്‍ ഐശ്വര്യ എന്നിവര്‍ പ്രസംഗിച്ചു.

ചങ്ങനാശേരി ഡിപ്പോയില്‍നിന്നുള്ള ദീര്‍ഘദൂര സര്‍വീസുകള്‍ നിലയ്ക്കുന്നു

ചങ്ങനാശേരി: ഡിപ്പോയില്‍നിന്നുള്ള ദീര്‍ഘദൂര സര്‍വീസുകള്‍ ഓരോന്നായി നിലയ്ക്കുന്നു. ആറുമാസം മുമ്പാരംഭിച്ച കോയമ്പത്തൂര്‍ സര്‍വീസും ഒരാഴ്ചമുമ്പ് നിര്‍ത്തലാക്കി. കളക്ഷനില്ലെന്ന കാരണം പറഞ്ഞാണ് ദീര്‍ഘദൂര സര്‍വീസുകളെല്ലാം വെട്ടിക്കുറയ്ക്കുന്നത്. വേണ്ടത്ര ദീര്‍ഘവീക്ഷണവും ആലോചനകളുമില്ലാതെ മേലുദ്യോഗസ്ഥര്‍ പെര്‍മിറ്റുകള്‍ തരപ്പെടുത്തുന്നതാണ് സര്‍വീസുകള്‍ റദ്ദു ചെയ്യേണ്ടി വരുന്നതിനു കാരണമായി യാത്രക്കാര്‍ ചൂണ്ടിക്കാട്ടുന്നത്. പെര്‍മിറ്റുകള്‍ എഴുതിയുണ്ടാക്കുമ്പോള്‍ റൂട്ടുകളുമായി ബന്ധമുള്ള ജീവനക്കാരോട് അഭിപ്രായം തേടുന്നത് അഭികാമ്യമാണെന്ന നിര്‍ദേശവും ഉയരുന്നുണ്ട്. ദീര്‍ഘകാലം സര്‍വീസ് നടത്തിയിരുന്ന പഴനി ബസ് ആറുമാസം മുമ്പ് നിര്‍ത്തലാക്കിയതിനു പിന്നാലെയാണ് അടുത്തകാലത്ത് ആരംഭിച്ച കോയമ്പത്തൂര്‍ സര്‍വീസും നിര്‍ത്തിയത്. രാവിലെ 7.25ന് ചങ്ങനാശേരിയില്‍നിന്നു പുറപ്പെട്ട് മൂവാറ്റുപുഴ, തൃശൂര്‍, ചിറ്റൂര്‍ വഴി വൈകുന്നേരം നാലിന് കോയമ്പത്തൂരെത്തി അന്നു വൈകുന്നേരം ആറിന് അവിടെനിന്നു പുറപ്പെട്ട് പിറ്റേന്നു പുലര്‍ച്ചെ രണ്ടിന് ചങ്ങനാശേരിയില്‍ എത്തുന്ന രീതിയിലായിരുന്നു ഈ സര്‍വീസിന്‍റെ സമയക്രമീകരണം. എന്നാൽ, 562 കിലോമീറ്ററിന് 13,000 രൂപ മാത്രമാണ് കളക്‌ഷന്‍ ലഭിക്കുന്നത്. കോയമ്പത്തൂര്‍ സര്‍വീസ് റൂട്ട് പുനഃക്രമീകരിച്ച് ആരംഭിക്കണം നിലവിലുള്ള കോയമ്പത്തൂര്‍ റൂട്ടില്‍ സര്‍വീസിന് കളക്‌ഷന്‍ കുറയുമെന്ന് നേരത്തേതന്നെ ജീവനക്കാര്‍ ചൂണ്ടിക്കാട്ടിയെങ്കിലും മേലുദ്യോഗസ്ഥര്‍ ചെവിക്കൊ ണ്ടിരുന്നില്ല. ഈ സര്‍വീസ് തൃശൂര്‍, പാലക്കാട് വഴി കോയമ്പത്തൂര്‍ എത്തുന്നവിധം പുനഃക്രമീകരിച്ചാല്‍ കളക്‌ഷന്‍ മെച്ചപ്പെടുമെന്നാണ് കെഎസ്ആര്‍ടിസി ജീവനക്കാരും ഈ റൂട്ടില്‍ യാത്ര ചെയ്യുന്നവരും പറയുന്നത്. ഈ രീതിയില്‍ റൂട്ട് ക്രമീകരിക്കണമെന്ന് ചങ്ങനാശേരി ഡിപ്പോ അധികൃതര്‍ രേഖാമൂലം കെഎസ്ആര്‍ടിസി മാനേജ്‌മെന്‍റിന് കത്ത് നല്‍കിയിട്ടുമുണ്ട്. കെഎസ്ആര്‍ടിസിയുടെ പ്രസ്റ്റീജ് വേളാങ്കണ്ണി സര്‍വീസ് നശിപ്പിക്കുന്നതാര്? വേളാങ്കണ്ണിക്ക് ഇപ്പോള്‍ സ്വിഫ്റ്റ് സര്‍വീസാണ് ഓടുന്നത്. ഡീലക്‌സ് ബസ് ഉപയോഗിച്ച് സ്വിഫ്റ്റ് സര്‍വീസ് തുടങ്ങിയതോടെയാണ് വേളാങ്കണ്ണി സര്‍വീസ് നഷ്ടത്തിലേക്കു കൂപ്പുകുത്തിയത്. ജീവനക്കാരുടെ ആത്മാര്‍ഥതക്കുറവാണ് ഈ കേരളത്തിലെതന്നെ പ്രസ്റ്റീജ് സര്‍വീസെന്ന് കെഎസ്ആര്‍ടിസി അവകാശപ്പെട്ടിരുന്ന റൂട്ട് തകരാന്‍ കാരണം. കെഎസ്ആര്‍ടിസി സര്‍വീസ് നടത്തിയിരുന്ന കാലത്ത് എക്‌സ്പ്രസ് ബസാണ് ഓടിയിരുന്നത്. അന്നു മിനിമം അറുപതിനായിരം വരെ കളക്ഷന്‍ ലഭിച്ചിരുന്നു. സീസണല്ലാത്തപ്പോള്‍ വെള്ളി, ശനി, ഞായര്‍ ദിവസങ്ങളില്‍ മാത്രമേ ഈ ബസ് സര്‍വീസ് നടത്തുന്നുള്ളു. സീസണായതിനാല്‍ ഇപ്പോൾ എല്ലാ ദിവസവും ഈ ബസ് സര്‍വീസ് നടത്തുന്നുണ്ട്. എന്നാൽ, നാല്‍പതിനായിരം രൂപ വരെ മാത്രമേ കളക്ഷനുള്ളു. സ്വിഫ്റ്റ് സര്‍വീസ് ഏറ്റെടുത്ത ശേഷം ബസ് നിരവധി തവണ അപകടത്തില്‍പ്പെട്ടിട്ടുമുണ്ട്. സ്വിഫ്റ്റിനെ ഒഴിവാക്കണം; കെഎസ്ആര്‍ടിസി നേരിട്ട് ഓപ്പറേറ്റ് ചെയ്യണം കളക്‌ഷന്‍ കുറയാനുള്ള കാരണം പഠിച്ച് പരിഹാരം കാണാന്‍ മാനേജ്‌മെന്‍റ് ഇതുവരെ തയാറായിട്ടില്ല. സൂപ്പര്‍ എക്‌സ്പ്രസ് ഓടിയപ്പോള്‍ സീറ്റ് ചാര്‍ജ് 730 രൂപയായിരുന്നു. എസി സൗകര്യം പോലുമില്ലാത്ത സ്വിഫ്റ്റ് ഡീലക്‌സ് ഇപ്പോള്‍ സീറ്റിന് 901 രൂപ വാങ്ങിയാണ് സര്‍വീസ് നടത്തുന്നത്. ദിവസവും ഉച്ചകഴിഞ്ഞ് 2.30ന് ചങ്ങനാശേരിയില്‍നിന്നു പുറപ്പെട്ട്, കോട്ടയം, പെരുമ്പാവൂര്‍, തൃശൂര്‍, പാലക്കാട്, പൊള്ളാച്ചി, പഴനി, ഡിണ്ടിഗല്‍, ട്രിച്ചി, തഞ്ചാവൂര്‍, നാഗപട്ടണം വഴിയാണ് ഈ ബസ് വേളാങ്കണ്ണിയിലെത്തുന്നത്. സ്വിഫ്റ്റ് നിര്‍ത്തലാക്കി സൂപ്പര്‍ എക്സ്പ്രസ് ബസ് ഉപയോഗിച്ച് കെഎസ്ആര്‍ടിസി നേരിട്ട് ഓപ്പറേറ്റ് ചെയ്താലേ ഈ സര്‍വീസും നിലനില്‍ക്കുകയുള്ളൂ. മുപ്പതിലേറെ വര്‍ഷമായി സര്‍വീസ് നടത്തുന്ന ഈ സര്‍വീസ് കളക്‌ഷന്‍റെ പേരുപറഞ്ഞ് ഉഴപ്പാനുള്ള അധികൃതരുടെ നീക്കം പരിശോധിക്കാന്‍ കെഎസ്ആര്‍ടിസി തയാറാകണമെന്നാണ് പാസഞ്ചേഴ്‌സ് അസോസിയേഷന്‍റെ‍ ആവശ്യം.

അറസ്റ്റ് ചെയ്തു

കോട്ടയം: കോട്ടയം റെയില്‍വേ സ്‌റ്റേഷന്‍ പ്ലാറ്റ് ഫോമില്‍ ഡ്യൂട്ടിയിലുണ്ടായിരുന്ന ആര്‍പിഎഫ് ഉദ്യോഗസ്ഥരെ ആക്രമിച്ചയാളെ പോലീസ് പിടികൂടി. തൃശൂര്‍ സ്വദേശി അരിക്കാട്ട് ജോമോന്‍ (31) ആണ് അറസ്റ്റിലായത്. മദ്യപിച്ചു യാത്രാരേഖകളില്ലാതെ പ്ലാറ്റ് ഫോമില്‍ നിന്ന ജോമോനെ ആര്‍പിഎഫ് ഉദ്യോഗസ്ഥരായ പ്രകാശ്കുമാര്‍, ദിലീപ്കുമാര്‍ എന്നിവർ ചോദ്യം ചെയ്തതില്‍ പ്രകോപിതനായാണ് ഇയാള്‍ ഉദ്യോഗസ്ഥരെ മര്‍ദിച്ചത്. എസ്എച്ചഒ റെജി പി. ജോസഫ്, എസ്‌ഐ സന്തോഷ് എന്നിവരുടെ നേതൃത്വത്തിലാണ് ഇയാളെ അറസ്റ്റ് ചെയ്തത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ചെത്തിപ്പുഴ സര്‍ഗക്ഷേത്രയില്‍ ഇന്നുമുതല്‍ നാടകോത്സവം

ചങ്ങനാശേരി: സര്‍ഗക്ഷേത്ര-ഇടിമണ്ണിക്കല്‍ അഖില കേരള പ്രഫഷണല്‍ നാടക മത്സരം യവനിക സീസണ്‍ ഫോര്‍ ഇന്നാരംഭിക്കും. സര്‍ഗക്ഷേത്ര അങ്കണത്തില്‍ തയാറാക്കിയ പന്തലില്‍ കേരളത്തിലെ പ്രമുഖ നാടക സമിതികളുടെ നാടകങ്ങള്‍ ദിവസവും വൈകുന്നേരം 6.30ന് അരങ്ങേറും. ഫൈന്‍ ആര്‍ട്‌സ് സൊസൈറ്റി അംഗങ്ങള്‍ക്കും പുതുതായി അംഗത്വം സ്വീകരിക്കുന്നവര്‍ക്കും പ്രവേശന പാസ് വാങ്ങുന്നവര്‍ക്കും നാടകോത്സവത്തില്‍ പങ്കെടുക്കാം. സര്‍ഗക്ഷേത്ര കള്‍ച്ചറല്‍, ചാരിറ്റബിള്‍, അക്കാദമിക്, മീഡിയ സെന്‍ററിന്‍റെ നേതൃത്വത്തില്‍ ഭവനരഹിതയായ വിധവയ്ക്ക് വീട് നിര്‍മ്മിച്ചു നല്‍കുന്ന സര്‍ഗ ഭവനം പദ്ധതിയും നാടകോത്സവത്തിന്റെ ഭാഗമായി നടക്കും. ഇന്ന് വൈകുന്നേരം 6.15 ന് ചലച്ചിത്ര താരങ്ങളായ സ്മിനു സിജോ, കോട്ടയം രമേശ് എന്നിവര്‍ ചേര്‍ന്ന് നാടകോത്സവം ഉദ്ഘാടനം ചെയ്യും. സര്‍ഗക്ഷേത്ര രക്ഷാധികാരി ഫാ. തോമസ് കല്ലുകളം സിഎംഐ അധ്യക്ഷത വഹിക്കും. പാലാ കമ്യൂണിക്കേഷന്‍സിന്‍റെ ലൈഫ് ഈസ് ബ്യൂട്ടിഫുള്‍ എന്ന നാടകം അവതരിപ്പിക്കും.

ക്ഷേത്രക്കുളത്തിന്‍റെ സംരക്ഷണഭിത്തി പുനർനിർമിക്കണം

ഉദയനാപുരം:ക്ഷേത്രക്കുളത്തിന്‍റെ റോഡിനോടു ചേർന്നുള്ള സംരക്ഷണഭിത്തി തകർന്നത് അപകട ഭീഷണി ഉയർത്തുന്നു. ഉദയനാപുരം ശ്രീസുബ്രഹ്മണ്യസ്വാമി ക്ഷേത്രത്തിലെ കുളത്തിന്‍റെ തകർന്ന സംരക്ഷണ ഭിത്തിയാണ് വാഹന യാത്രികർക്ക് അപകടക്കെണിയാകുന്നത്. ഏതാനും വർഷങ്ങൾക്കു മുമ്പ് തകർന്ന സംരക്ഷണ ഭിത്തി പുനർനിർമ്മിക്കണമെന്ന് നാട്ടുകാർ ഏറെക്കാലമായി ആവശ്യപ്പെട്ടുവരികയാണ്. സംരക്ഷണഭിത്തി പുനർനിർമിക്കാൻ ദേവസ്വം ബോർഡ് നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

ചങ്ങനാശേരി എസ്ബിയിൽ സൗജന്യ ഓണ്‍ലൈന്‍ ഓറിയന്‍റേഷന്‍ പ്രോഗ്രാം

ചങ്ങനാശേരി: സെന്‍റ് ബര്‍ക്കുമാന്‍സ് കോളജില്‍ ബിഎ ഇംഗ്ലീഷ് (ഓണേഴ്സ്) പഠിക്കാന്‍ ആഗ്രഹിക്കുന്ന വിദ്യാര്‍ഥികള്‍ക്കായി സൗജന്യ ഓണ്‍ലൈന്‍ ഓറിയന്‍റേഷന്‍ പരിപാടി സംഘടിപ്പിക്കുന്നു. വിദ്യാര്‍ഥികള്‍ക്ക് അവരുടെ അക്കാദമിക ഭാവിയെക്കുറിച്ച് വ്യക്തത നേടുന്നതിനും കേരളത്തിലെ പ്രമുഖ ഉന്നത വിദ്യാഭ്യാസ സ്ഥാപനങ്ങളിലൊന്നിലെ ഇംഗ്ലീഷ് വിഭാഗവുമായി ബന്ധപ്പെടുന്നതിനുമുള്ള മികച്ച അവസരമാണിത്. കോളജ് തലത്തിലേക്കുള്ള വിദ്യാര്‍ഥികളുടെ അക്കാദമിക പരിവര്‍ത്തനം സുഗമമാക്കുക എന്നതിനൊപ്പം വിവിധ കരിയര്‍ സാധ്യതകളെയും ബിരുദാനന്തര പഠനാവസരങ്ങളെയും പരിചിതമാക്കുകയും ചെയ്യുക എന്നതാണ് ഈ സെഷന്‍റെ ലക്ഷ്യം. 15ന് രാവിലെ 10ന് ഓണ്‍ലൈന്‍ പ്ലാറ്റ്‌ഫോമിൽ നടക്കുന്ന സെഷനിൽ ബിഎ (ഓണേഴ്സ്) പ്രോഗ്രാമിന്‍റെ ഘടനയെയും വ്യാപ്തിയെയും കുറിച്ചുള്ള ചര്‍ച്ചകളും ഉണ്ടായിരിക്കും. തത്സമയ ചോദ്യോത്തര സെഷനില്‍ പൂര്‍വ വിദ്യാര്‍ഥികളുമായി നേരിട്ടു സംവദിക്കാം. രജിസ്‌ട്രേഷന്‍ സൗജന്യമാണ്. താത്പര്യമുള്ള വിദ്യാര്‍ഥികള്‍ https:// shorturl.at/dzq02 എന്ന ഗൂഗിള്‍ ഫോം ലിങ്ക് വഴി രജിസ്റ്റര്‍ ചെയ്യുക.

തലയോലപ്പറന്പ് സെന്‍റ് ജോർജ് പള്ളിയിൽ തിരുനാൾ പ്രദക്ഷിണം ഭക്തിനിർഭരമായി

തലയോലപ്പറമ്പ്: സെന്റ്‌ ജോർജ് പള്ളിയിൽ വിശുദ്ധ ഗീവർഗീസ്‌ സഹദായുടെ തിരുനാളിനോടനുബന്ധിച്ചുള്ള പ്രദക്ഷിണം ഭക്തിനിർഭരമായി. തിരുസ്വരൂപങ്ങൾ സംവഹിച്ച പ്രദക്ഷിണം പള്ളിയുടെ മുൻകവാടത്തിലൂടെ ചന്ത കപ്പേള വഴി പ്രധാന ജംഗ്ഷൻ ചുറ്റി പള്ളിയിൽ സമാപിച്ചു. ഫാ. ജെയിംസ് അമ്പലത്തിൽ കാർമികത്വം വഹിച്ചു. തിരുനാൾ ദിനമായ ഇന്നലെ നടന്ന തിരുനാൾ കുർബാനയ്ക്ക് ഫാ. തോമസ് ചില്ലയ്ക്കൽ കാർമികത്വം വഹിച്ചു.ഫാ. വിന്തോഷ് കപ്പൂച്ചിൻ,ഫാ. ജോർജ് മേനാച്ചേരി കപ്പൂച്ചിൻ എന്നിവർ സഹ കർമികരായി. ഫാ. സുബിൻ പാറയ്ക്കൽ തിരുനാൾ ദിന സന്ദേശം നൽകി.

തിരുനക്കരയിൽ സൗജന്യ ആതുരാലയം തുടങ്ങി

കോട്ടയം: തിരുനക്കരയിൽ സൗജന്യ ആതുരാലയം പ്രവർത്തനം ആരംഭിച്ചു. ഇതോടെ ജനറൽ ആശുപത്രിയിലും മെഡിക്കൽ കോളജ് ആശുപത്രിയിലും ക്യൂനിൽക്കാതെ മരുന്നു വാങ്ങി വീട്ടിലെത്താം. കോട്ടയം നഗരസഭയുടെ കീഴിൽ തിരുനക്കര പുതിയ തൃക്കോവിൽ ക്ഷേത്രത്തിനു സമീപം ശബരി കോംപ്ലക്‌സിലാണ് സൗജന്യ ആതുരാലയം ഒരുക്കിയിരിക്കുന്നത്. ഞായറാഴ്ച്ചയും പൊതു അവധിദിനങ്ങളും ഒഴികെ എല്ലാ ദിവസവും ഉച്ചയ്ക്ക് 12 മുതൽ വൈകുന്നേരം ആറു വരെയാണ് ആതുരാലയത്തിന്‍റെ പ്രവർത്തനം.നഗര ജനകീയ ആരോഗ്യ കേന്ദ്രം എന്ന് പേരിട്ടിരിക്കുന്ന ആതുരാലയം ചുങ്കം, പനയക്കഴിപ്പ്, അറത്തൂട്ടി, പഴയ ചന്ത, തളിയിൽകോട്ട, ആലുംമൂട്, പുത്തനങ്ങാടി, യൂണിയൻ ക്ലബ്, തെക്കുംഗോപുരം, കോടിമത, വയസ്‌്കര, ചിറയിൽപ്പാടം, തിരുനക്കര എന്നിവിടങ്ങളിലെ ആളുകൾക്കാണ് ഏറെ പ്രയോജനകരമാകുന്നത്. വയോമിത്രം രോഗികൾക്കുള്ള മരുന്നുവിതരണം അങ്കണവാടിയിൽനിന്നു മാറ്റി ഇവിടെനിന്നു വിതരണം ചെയ്യും. മുനിസിപ്പൽ കൗൺസിലർമാരായ ഡോ.പി.ആർ സോന, സിൻസി പാറേൽ, ജയമോൾ ജോസഫ്, ജാൻസി ജേക്കബ്, ടോം കോര, എസ്.ജയകൃഷ്ണൻ, എൻ.ജയചന്ദ്രൻ തുടങ്ങിയവരുടെ സഹകരണത്തോടെയാണ് പ്രവർത്തനങ്ങൾ നടക്കുന്നത്. ചുങ്കം, പനയക്കഴിപ്പ്, അറത്തൂട്ടി, പഴയചന്ത, ആലുംമൂട് എന്നിവിടങ്ങളിൽനിന്നു വരുന്നവർക്ക് ചാലുകുന്ന് വഴി ശ്രീനിവാസ അയ്യർ റോഡിലൂടെയും പുതിയ തൃക്കോവിൽ ക്ഷേത്രം റോഡിലൂടെയും കോടിമത, വയസ്്കര, പുത്തനങ്ങാടി, തിരുനക്കര തുടങ്ങിയയിടങ്ങളിൽനിന്ന് എത്തുന്നവർക്ക് പുതിയ തൃക്കോവിൽ ക്ഷേത്രത്തിനു മുന്നിലൂടെയും ആരോഗ്യ കേന്ദ്രത്തിലെത്താം.

അടഞ്ഞുകിടന്ന വീട്ടിൽ മോഷണം; യുവാവ് പിടിയിൽ

ഗാന്ധിനഗർ: അടഞ്ഞുകിടന്ന വീട്ടിൽ മോഷണം നടത്തിയ യുവാവ് പിടിയിൽ . ആർപ്പൂക്കര കരിപ്പൂത്തട്ട് ഭാഗത്ത് ഇരുപേരുംപത്തിൽ ശരത് മോഹനാ(20)ണ് അറസ്റ്റിലായത്. ആർപ്പൂക്കര കരിപ്പൂത്തട്ട് ഭാഗത്തുള്ള കരിവേലി വീട്ടിൽ അലമാരയ്ക്കുള്ളിൽ തടികൊണ്ടുള്ള പണപ്പെട്ടിയിൽ സൂക്ഷിച്ചിരുന്ന 45,000 രൂപ വിലവരുന്ന സ്വർണാഭരണങ്ങളാണ് മോഷണം പോയത്. ഗാന്ധിനഗർ പോലീസിന്‍റെ അന്വേഷണത്തെത്തുട ർന്ന് ശരത്തിനെ ശനിയാഴ്ച വൈകിട്ടോടെ അറസ്റ്റ് ചെയ്യുകയായിരുന്നു. ഗാന്ധിനഗർ എസ്എച്ച്ഒ ടി. ശ്രീജിത്ത്‌, എസ്ഐ അനുരാജ്, സിപിഒമാരായ ലിബിൻ, ശ്രീനിഷ് എന്നിവരടങ്ങുന്ന പോലീസ് സംഘമാണ് അന്വേഷണം നടത്തി പ്രതിയെ പിടികൂടിയത്.

കഞ്ചാവ് ലഹരിയില്‍ അക്രമം: യുവാവും അച്ഛനും പിടിയിൽ

ചിങ്ങവനം: കഞ്ചാവ് ലഹരിയിൽ യുവാവ് അയല്‍വാസിയെ ആക്രമിക്കുകയും സമീപത്തുണ്ടായിരുന്ന ഓട്ടോറിക്ഷ തല്ലിത്തകര്‍ക്കുകയും ചെയ്തു. ഇന്നലെ വൈകുന്നേരം 5.45ന് പനച്ചിക്കാട്ട് നെല്ലിക്കല്‍ കവലയ്ക്കു സമീപമാണ് സംഭവം. നാട്ടുകാർ അറിയിച്ചതിനെത്തുടര്‍ന്ന് സ്ഥലത്തെത്തിയ ചിങ്ങവനം പോലീസ് കുഴിമറ്റം, പുതുപ്പറമ്പില്‍ സന്തോഷിനെയും മകന്‍ സബിന്‍ സന്തോഷിനെയും കസ്റ്റഡിയിലെടുത്തു. സബിന്‍റെ നേതൃത്വത്തിലാണ് ആക്രമണമെന്ന് നാട്ടുകാര്‍ ആരോപിച്ചു. സ്‌കൂട്ടറില്‍ വ ന്ന കുഴിമറ്റം കളത്തില്‍പ്പറമ്പില്‍ രാമന്‍കുട്ടിയുടെ മകന്‍ രാജേഷിന്‍റെ കണ്ണിലും മുഖത്തും കുരുമുളക് സ്പ്രേ അടിക്കുകയും തല അടിച്ചുപൊട്ടിക്കുകയുമായിരുന്നു. തുടർന്ന് നെല്ലിക്കല്‍ കവലയില്‍ ഓടുന്ന പുതുപ്പറമ്പില്‍ മോനിച്ചന്‍റെ ഓട്ടോ തല്ലിത്തകര്‍ക്കുകയും ചെയ്തു. തലയ്ക്കു പരിക്കേറ്റ രാജേഷ് ജില്ലാ ജനറല്‍ ആശുപത്രിയില്‍ ചികിത്സ തേടി. സബിന്‍ നിരന്തരം പ്രശ്നക്കാരനാണെന്ന് നാട്ടുകാരുടെ പരാതിയിൽ പറയുന്നു.

കടത്തില്‍ മുങ്ങിയ സര്‍ക്കാര്‍ നടത്തുന്നത് ധൂര്‍ത്ത്: എന്‍ജിഒ അസോസിയേഷന്‍

ചങ്ങനാശേരി: സര്‍ക്കാര്‍ ജീവനക്കാര്‍ക്ക് ഉള്‍പ്പെടെ കോടികള്‍ കുടിശിക നല്കാനുള്ളപ്പോള്‍ നാലാം വാര്‍ഷിക ആഘോഷത്തിന്‍റെ പേരില്‍ സര്‍ക്കാര്‍ നടത്തുന്നത് ധൂര്‍ത്തും വഞ്ചനയുമാണെന്ന് കേരള എന്‍ജിഒ അസോസിയേഷന്‍ സംസ്ഥാന പ്രസിഡന്‍റ് എ.എം. ജാഫര്‍ഖാന്‍. സര്‍ക്കാര്‍ ജീവനക്കാര്‍ 22ന് നടത്തുന്ന സെക്രട്ടേറിയറ്റ് വളയല്‍ സമരത്തിനു മുന്നോടിയായി ചങ്ങനാശേരിയില്‍ സംഘടിപ്പിച്ച കോട്ടയം ജില്ലാ പ്രവര്‍ത്തക കണ്‍വന്‍ഷന്‍ ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാന സെക്രട്ടേറിയറ്റ് അംഗം അഷറഫ് പറപ്പള്ളില്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി ഉമാ ശങ്കര്‍ മുഖ്യപ്രഭാഷണം നടത്തി. സതീഷ് ജോര്‍ജ്, ജോഷി മാത്യു, പ്രദീഷ് കുമാര്‍, റോജന്‍ മാത്യു, പ്രകാശ് ജേക്കബ്, എസ്. ശ്രീകുമാര്‍ തുടങ്ങിയവര്‍ പ്രസംഗിച്ചു.

വിശാലകാഴ്ചപ്പാട് സമുദായ വളർച്ചയ്ക്ക് അനിവാര്യം: മാർ പെരുന്തോട്ടം

മാന്നാനം: വ്യക്തി ജീവിതത്തിലും തൊഴിൽ മേഖലകളിലും സമുദായാംഗങ്ങളുടെ കാഴ്ചപ്പാടുകൾ മാറണമെന്നും വിശാലമായ കാഴ്ചപ്പാട് എല്ലാ തലങ്ങളിലും സ്വീകരിക്കുവാനും ഏതു ജോലിയും ചെയ്യാനുള്ള ആഗ്രഹവും മനസും പുതുതലമുറയ്ക്ക് ഉണ്ടാകണമെന്നും ആർച്ച്ബിഷപ് മാർ ജോസഫ് പെരുന്തോട്ടം. ചങ്ങനാശേരി അതിരൂപത കത്തോലിക്ക കോൺഗ്രസിന്‍റെ ആഭിമുഖ്യത്തിൽ കത്തോലിക്ക കോൺഗ്രസ് ജന്മദിന സമ്മേളനവും വടക്കൻ മേഖല സമുദായ സംഗമവും മാന്നാനത്ത് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. എല്ലാവരെയും ഉൾക്കൊള്ളുക എന്നതാണ് കത്തോലിക്ക എന്ന പദത്തിന്‍റെ അർത്ഥം. സമൂഹത്തിൽ പിന്നോക്കം പോകുന്നവരെ കണ്ടില്ലെന്നു നടിക്കേണ്ടവരല്ല കത്തോലിക്കർ. അതുകൊണ്ടുതന്നെ സമുദായാംഗങ്ങൾ എല്ലാവരും പരസ്പരം സഹായിച്ചും പ്രോത്സാഹിപ്പിച്ചും മുന്നേറുന്ന ഒരു പ്രവർത്തന ശൈലി രൂപപ്പെടുത്തണമെന്ന് മാർ ജോസഫ് പെരുന്തോട്ടം പറഞ്ഞു. അതിരൂപത പ്രസിഡന്‍റ് ബിജു സെബാസ്റ്റ്യൻ പടിഞ്ഞാറെവീട്ടിൽ അധ്യക്ഷത വഹിച്ചു. അതിരൂപത വികാരി ജനറാൾ മോൺ. ആന്‍റണി എത്തയ്ക്കാട്ട് ആമുഖ പ്രഭാഷണവും ഗ്ലോബൽ പ്രസിഡന്‍റ് രാജീവ് ജോസഫ് കൊച്ചുപറമ്പിൽ മുഖ്യപ്രഭാഷണവും നടത്തി. മാന്നാനം കെഇ സ്കൂൾ പ്രിൻസിപ്പൽ റവ.ഡോ. ജയിംസ് മുല്ലശേരി, അതിരൂപത ജനറൽ സെക്രട്ടറി ബിനു ഡൊമിനിക്ക് നടുവിലേഴം, ട്രഷറർ ജോസ് ജോൺ വെങ്ങാന്തറ, ഗ്ലോബൽ വൈസ് പ്രസിഡന്‍റ് രാജേഷ് ജോൺ, കുടമാളൂർ ഫൊറോന ഡയറക്ടർ ഫാ. ജെന്നി കായംകുളത്തുശേരി, ഭാരവാഹികളായ കുഞ്ഞ് കളപ്പുര, ജോസ് പാറയ്ക്കൽ, ഷൈനമ്മ ജയിംസ്, സെബാസ്റ്റ്യൻ പുല്ലാട്ടുകാല, ജോയി പാറപ്പുറം, സൈബു കെ. മാണി എന്നിവർ പ്രസംഗിച്ചു. സമ്മേളനത്തിനു മുന്നോടിയായി വിശുദ്ധ ചാവറ കുര്യാക്കോസ് ഏലിയാസച്ചന്‍റെ കബറിടത്തിങ്കൽ പ്രാർഥനയും പുഷ്പാർച്ചനയും നടത്തി. മാന്നാനം സെന്‍റ് ജോസഫ്സ് ആശ്രമം പ്രിയോർ റവ.ഡോ. കുര്യൻ ചാലങ്ങാടി സിഎംഐ സന്ദേശം നൽകി. നിധീരിക്കൽ മാണിക്കത്തനാർ സ്മാരക നഗറിൽ കൺവീനർ കുഞ്ഞ് കളപ്പുര പതാക ഉയർത്തി. ഫ്രാൻസിസ് മാർപാപ്പ, വിശുദ്ധ ചാവറയച്ചൻ, നിധീരിക്കൽ മാണിക്കത്തനാർ എന്നിവരുടെ ഛായാ ചിത്രങ്ങളിൽ പുഷ്പാർച്ചന നടത്തിയതിന് ശേഷമാണ് സമ്മേളനം ആരംഭിച്ചത്. ഗ്ലോബൽ സെക്രട്ടറി ഡോ. ജേക്കബ് നിക്കോളാസ്, അതിരൂപത വൈസ് പ്രസിഡന്‍റുമാരായ ജോർജുകുട്ടി മുക്കത്ത്, റോസിലിൻ കെ. കുരുവിള, ഭാരവാഹികളായ ജിനോ ജോസഫ് കളത്തിൽ, ചാക്കപ്പൻ ആന്‍റണി, ജോബി ചൂരക്കുളം, സെബാസ്റ്റ്യൻ വർഗീസ്, പി.സി. കുഞ്ഞപ്പൻ, ജെസി ആന്‍റണി, ലിസി ജോസ്, മനു ജെ. വരാപ്പള്ളി, ജോർജ് വർക്കി, സിനി പ്രിൻസ് എന്നിവർ നേതൃത്വം നൽകി.

നാലുന്നാക്കല്‍ വലിയപള്ളിയിൽ പെരുന്നാളിനു കൊടിയേറി

നാലുന്നാക്കല്‍: സെന്‍റ് ആദായിസ് യാക്കോബായ വലിയ പള്ളിയിലെ വിശുദ്ധ ഗീവര്‍ഗീസ് സഹദായുടെ പെരുന്നാള്‍ ഇന്നും നാളെയും ആഘോഷിക്കും. പെരുന്നാളിന് മുന്നോടിയായി സഹവികാരി ഫാ. ബാബു പതിനാലിപ്പറയില്‍ കൊടിയേറ്റ് നിര്‍വഹിച്ചു. ഇന്നു വൈകുന്നേരം ആറിന് ഡോ. ഗീവര്‍ഗീസ് മാര്‍ കൂറിലോസ് മെത്രാപ്പോലീത്തായുടെ കാര്‍മികത്വത്തില്‍ സന്ധ്യാ പ്രാര്‍ഥനയും ആഘോഷമായ റാസയും നടക്കും. പ്രധാന തിരുനാള്‍ ദിനമായ നാളെ രാവിലെ എട്ടിന് മാത്യൂസ് മാര്‍ അപ്രേം മെത്രാപ്പോലീത്തായുടെ പ്രധാന കാര്‍മികത്വത്തില്‍ മൂന്നിന്മേല്‍ കുര്‍ബാനയും നേര്‍ച്ചവിളമ്പും നടക്കുമെന്നു വികാരി ഫാ. യൂഹാനോന്‍ വേലിക്കകത്ത് അറിയിച്ചു.

നാഗമ്പടം സെന്‍റ് ആന്‍റണീസ് തീര്‍ഥാടന കേന്ദ്രത്തില്‍ നൊവേനത്തിരുനാളിനു നാളെ സമാപനം

കോട്ടയം: നാഗമ്പടം സെന്‍റ് ആന്‍റണീസ് തീര്‍ഥാടന കേന്ദ്രത്തില്‍ നൊവേനത്തിരുനാള്‍ നാളെ സമാപിക്കും. ഇന്നു വൈകുന്നേരം അഞ്ചിനു ബിഷപ് ഡോ. ജസ്റ്റിന്‍ മഠത്തില്‍പറമ്പിലിന്‍റെ മുഖ്യകാര്‍മികത്വത്തില്‍ സമൂഹബലിയും തുടര്‍ന്ന് നൊവേനയും നടക്കും. മാര്‍പാപ്പയുടെ വിയോഗത്തില്‍ ദുഃഖാചരണം നടക്കുന്നതിനാല്‍ സായാഹ്ന പട്ടണപ്രദക്ഷിണം ഉണ്ടായിരിക്കില്ല. നാളെ രാവിലെ ആറിനും എട്ടിനും പത്തിനും ഉച്ചയ്ക്ക് 12നും വിശുദ്ധ കുര്‍ബാന, നൊവേന, ആരാധന എന്നിവ ഉണ്ടായിരിക്കും. ഉച്ചകഴിഞ്ഞു രണ്ടിന് കുഞ്ഞുങ്ങളില്ലാത്ത ദമ്പതികള്‍, വിവാഹ തടസം നേരിടുന്നവര്‍ എന്നിവര്‍ക്കു വേണ്ടിയുള്ള പ്രത്യേക പ്രാര്‍ഥനാ ശുശ്രൂഷ, നാലിനു തിരുനാള്‍ പൊന്തിഫിക്കല്‍ വിശുദ്ധ കുര്‍ബാനയ്ക്കു ബിഷപ് ഡോ. സെബാസ്റ്റ്യന്‍ തെക്കെത്തേച്ചേരില്‍ മുഖ്യകാര്‍മികത്വം വഹിക്കും.

പെണ്ണാർ തോടിന് ആഴംകൂട്ടൽ നടപടികൾ അന്തിമഘട്ടത്തിൽ

അതിരമ്പുഴ: അതിരമ്പുഴയുടെ ദീർഘകാല ആവശ്യം യാഥാർഥ്യമാകുന്നു. പെണ്ണാർ തോടിന് ആഴംകൂട്ടാനുള്ള നടപടികൾ അന്തിമഘട്ടത്തിൽ. കുമരകത്തുനിന്ന് അതിരമ്പുഴയിലേക്ക് ചെറുബോട്ടുകളും വള്ളങ്ങളുമെങ്കിലും എത്തുമെന്ന പ്രതീക്ഷയിൽ നാട്ടുകാർ. നിലവിൽ പോളയും പായലും വള്ളിപ്പടർപ്പുകളും നിറഞ്ഞ് ഒഴുക്കുനിലച്ച അവസ്ഥയിലാണ് പെണ്ണാർ തോട്. മുമ്പ് വള്ളങ്ങളും ചെറിയ ശിക്കാര ബോട്ടുകളും തോട്ടിലൂടെ അതിരമ്പുഴ ചന്തക്കടവിൽ എത്തിയിരുന്നു. എന്നാൽ കഴിഞ്ഞ നാലു വർഷങ്ങളായി പോളയും പായലും മറ്റും നീക്കം ചെയ്യാതായതോടെ തോട്ടിൽ തടസങ്ങൾ ഉണ്ടാകുകയും ഒഴുക്കു നിലയ്ക്കുകയും ചെയ്തു. ഇപ്പോൾ പെണ്ണാർ തോട് നവീകരണത്തിനായി പഞ്ചായത്തിന് ലഭിച്ച 50 ലക്ഷം രൂപയുടെ നവീകരണ പ്രവൃത്തികളാണ് നടക്കാൻ പോകുന്നത്. 15 മീറ്റർ വീതിയിൽ 1.5 മീറ്റർ ആഴത്തിൽ ചെളി നീക്കം ചെയ്യാനാണ് പദ്ധതി. ദേശീയ ജലപാതയായ പെണ്ണാർ തോടിന്‍റെ നവീകരണം പഞ്ചായത്തിനു നേരിട്ട് ചെയ്യാൻ സാധിക്കാത്തതിനാൽ മേജർ ഇറിഗേഷൻ വകുപ്പിനാണ് നവീകരണച്ചുമതല. തോട് നവീകരണത്തിനായി പഞ്ചായത്തിനു ലഭിച്ച 50 ലക്ഷം രൂപ പഞ്ചായത്ത് മേജർ ഇറിഗേഷൻ വകുപ്പിന് കൈമാറിക്കഴിഞ്ഞു. ടെൻഡർ നടപടികൾ പൂർത്തിയാക്കിയാലുടൻ നവീകരണ പ്രവൃത്തികൾ ആരംഭിക്കും. അതിരമ്പുഴയിൽ ഉത്ഭവിച്ച് കുമരകം ചീപ്പുങ്കലിൽ വേമ്പനാട് കായലിൽ ചെന്നു ചേരുന്ന പെണ്ണാർ തോട് നവീകരിക്കുന്നതോടെ ചെറിയ ശിക്കാര ബോട്ടുകളിലും വള്ളങ്ങളിലും സഞ്ചാരികളെ അതിരമ്പുഴ ചന്തക്കടവിൽ എത്തിക്കാനാകുമെന്ന പ്രതീക്ഷയാണുള്ളത്. മാന്നാനം പാലത്തിന്‍റെ നിർമാണം പൂർത്തിയാക്കുന്നതിനൊപ്പം നടയ്ക്കപ്പാലംകൂടി ദേശീയ ജലപാത മാനദണ്ഡങ്ങൾക്കനുസൃതം നിർമിച്ചാൽ അതിരമ്പുഴയ്ക്ക് ഗുണകരമാകുന്ന ടൂറിസം പദ്ധതികൾ രൂപപ്പെടുത്താൻ സാധിക്കും.

കലുങ്കിന്‍റെ അടിത്തറ തകര്‍ന്ന് അപകടഭീഷണി

കരൂര്‍: പാലാ-ഏഴാച്ചേരി റോഡില്‍ കരൂര്‍ പള്ളിക്കു മുന്‍വശം റോഡിലെ കലുങ്കിന്‍റെ അടിത്തറ തകര്‍ന്ന് അപകടഭീഷണിയായിട്ട് മാസങ്ങള്‍ പലതു കഴിഞ്ഞിട്ടും അധികൃതര്‍ നടപടി സ്വീകരിക്കുന്നില്ല. കഴിഞ്ഞ മഴക്കാലത്തുണ്ടായ കുത്തൊഴുക്കിലാണ് കരിങ്കല്ലില്‍ തീര്‍ത്ത അടിത്തറ തകര്‍ന്നത്. ഇക്കഴിഞ്ഞ ദിവസമുണ്ടായ മഴയിലും കുത്തൊഴുക്കിലും അടിത്തറയുടെ കൂടുതല്‍ ഭാഗം തകര്‍ന്നിട്ടുണ്ട്. ഭാരവാഹനങ്ങളും ബസുകളും ഉള്‍പ്പെടെ നിരവധി വാഹനങ്ങള്‍ സഞ്ചരിക്കുന്ന പ്രധാന റോഡാണിത്. പത്ത് അടിയിലധികം വീതിയുള്ള ചെറുതോടിന് കുറുകെയാണ് കലുങ്കുള്ളത്. മഴക്കാലത്ത് കനത്ത കുത്തൊഴുക്ക് രൂപപ്പെടുന്ന തോടാണിത്. അടുത്ത മഴക്കാലത്തിന് മുമ്പ് തകര്‍ന്ന സംരക്ഷണഭിത്തി പുനരുദ്ധരിച്ചില്ലെങ്കില്‍ അപകടഭീഷണി വര്‍ധിക്കുമെന്ന് നാട്ടുകാര്‍ പറഞ്ഞു. ഇതു സംബന്ധിച്ച് വാര്‍ഡ് മെംബര്‍ ലിന്‍റന്‍ ജോസഫിന്‍റെ നേതൃത്വത്തില്‍ പിഡബ്ല്യുഡി അധികൃതര്‍ക്ക് നിവേദനം നല്‍കിയെങ്കിലും യാതൊരു നടപടിയും സ്വീകരിക്കാത്തതില്‍ നാട്ടുകാര്‍ പ്രതിഷേധത്തിലാണ്.

കടനാട്ടിൽ മിനി മാസ്റ്റ് ലൈറ്റുകളുടെ ഉദ്ഘാടനം

കടനാട്: ജില്ലാ പഞ്ചായത്ത് പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ അനുവദിച്ച ഫണ്ട് ഉപയോഗിച്ച് കടനാട് പഞ്ചായത്തില്‍ അഞ്ച് മിനി മാസ്റ്റ് ലൈറ്റുകള്‍ കൂടി സ്ഥാപിച്ചു. 2024-25 സാമ്പത്തികവര്‍ഷം അനുവദിച്ച ഫണ്ട് ഉപയോഗിച്ചാണ് ലൈറ്റുകള്‍ സ്ഥാപിച്ചിരിക്കുന്നത്. പഞ്ചായത്ത് പ്രസിഡന്‍റ് ജിജി തമ്പിയുടെഅധ്യക്ഷതയില്‍ വിവിധ സ്ഥലങ്ങളില്‍ ചേര്‍ന്ന യോഗങ്ങളില്‍ ജില്ലാ പഞ്ചായത്ത് മെംബര്‍ രാജേഷ് വാളിപ്ലാക്കല്‍ ലൈറ്റുകളുടെ ഉദ്ഘാടനം നിര്‍വഹിച്ചു. കാവുംകണ്ടം പള്ളി വികാരി ഫാ. ഫ്രാന്‍സിസ് ഇടത്തിനാല്‍, പഞ്ചായത്ത് മെംബര്‍മാര്‍ തുടങ്ങിയവര്‍ പ്രസംഗിച്ചു.

സൗജന്യ മെഡിക്കൽ ക്യാന്പും ആരോഗ്യപ്രദര്‍ശനവും

പുന്നത്തുറ: സെന്‍റ് തോമസ് ക്‌നാനായ കത്തോലിക്ക പള്ളിയില്‍ കിടങ്ങൂര്‍ ലിറ്റില്‍ ലൂര്‍ദ് മിഷന്‍ ആശുപത്രിയും ലിറ്റില്‍ ലൂര്‍ദ് നഴ്‌സിംഗ് കോളജും സംയുക്തമായി സൗജന്യ മെഡിക്കല്‍ ക്യാമ്പും ലഹരിവസ്തുക്കളുടെ ദൂഷ്യവശങ്ങളെക്കുറിച്ചുള്ള ആരോഗ്യ പ്രദര്‍ശനവും നടത്തി. വികാരി ഫാ. ജയിംസ് ചെരുവില്‍ അധ്യക്ഷത വഹിച്ചു. അയര്‍ക്കുന്നം പഞ്ചായത്ത് പ്രസിഡന്‍റ് സീമ ബിജു ഉദ്ഘാടനം ചെയ്തു. അസി. വികാരി ഫാ. ജോസഫ് തച്ചാറ ആരോഗ്യപ്രദര്‍ശനം ഉദ്ഘാടനം ചെയ്തു. ലിറ്റില്‍ ലൂര്‍ദ് ആശുപത്രി ഡയറക്ടര്‍ സിസ്റ്റര്‍ സുനിത, ലിറ്റില്‍ ലൂര്‍ദ് കോളജ് ഓഫ് നഴ്‌സിംഗ് പ്രിന്‍സിപ്പല്‍ സിസ്റ്റര്‍ ഡോ. ജോസിന, ബിനു പല്ലോനിയില്‍ എന്നിവര്‍ പ്രസംഗിച്ചു. ജനറല്‍ മെഡിസിന്‍, ഓര്‍ത്തോപീഡിക്‌സ്, പീഡിയാട്രിക്, ഗൈനക്കോളജി, ദന്തരോഗവിഭാഗം എന്നിവയിലെ വിദഗ്ധരായ ഡോക്ടര്‍മാരുടെ സേവനം ലഭ്യമായിരുന്നു.

കത്തോലിക്ക കോണ്‍ഗ്രസിന്‍റെ പ്രവര്‍ത്തനം ശ്ലാഘനീയം: മാര്‍ ജോസഫ് കല്ലറങ്ങാട്ട്

കൊഴുവനാല്‍: കത്തോലിക്ക കോണ്‍ഗ്രസ് കേരള സമൂഹത്തിലും സമുദായത്തിലും ഒരു നൂറ്റാണ്ടിലേറെയായി ചെയ്തു വരുന്ന പ്രവര്‍ത്തനങ്ങള്‍ അത്യന്തം ശ്ലാഘനീയമെന്ന് ബിഷപ് മാര്‍ ജോസഫ് കല്ലറങ്ങാട്ട്. കത്തോലിക്ക കോണ്‍ഗ്രസിന്‍റെ 107-ാം ജന്മദിനാഘോഷം കൊഴുവനാല്‍ പള്ളി ഓഡിറ്റോറിയത്തില്‍ ഉദ്ഘാടനം ചെയ്തു പ്രസംഗിക്കുകയായിരുന്നു ബിഷപ്. സര്‍ സി.പിക്കെതിരേയുള്ള സമരം മുതല്‍ കത്തോലിക്ക കോണ്‍ഗ്രസ് നടത്തിയ സമരപോരാട്ടങ്ങളെ മാർ കല്ലറങ്ങാട്ട് അനുസ്മരിച്ചു. കേരളത്തിലെ ആതുരസേവനരംഗത്തും വിദ്യാഭ്യാസരംഗത്തും കത്തോലിക്കാസഭ ചെയ്തിട്ടുള്ള സംഭാവനകളെ ഒരിക്കലും അവഗണിക്കാവുന്നതല്ലെന്ന് മാര്‍ കല്ലറങ്ങാട്ട് പ്രസ്താവിച്ചു. രൂപത പ്രസിഡന്‍റ് ഇമ്മാനുവല്‍ നിധീരി അധ്യക്ഷത വഹിച്ചു. റവ.ഡോ. ജോര്‍ജ് വര്‍ഗീസ് ഞാറക്കുന്നേല്‍ ആമുഖപ്രസംഗം നടത്തി. ഫാ. ജോസ് നെല്ലിക്കത്തെരുവില്‍, ജോസ് വട്ടുകുളം, ആന്‍സമ്മ സാബു, ജോയി കണിപറമ്പില്‍, ജോണ്‍സണ്‍ വീട്ടിയാങ്കല്‍, സി.എം. ജോര്‍ജ്, പയസ് കവളംമാക്കല്‍, ജോണ്‍സണ്‍ ചെറുവള്ളി, സിന്ധു ജയ്ബു, ജോര്‍ജ് മണിയങ്ങാട്ട്, ഫാ. തോമസ് പരിയാത്ത്, ജോസഫ് പോള്‍, ടോമി കണ്ണീറ്റുമ്യാലില്‍, ബെന്നി കിണറ്റുകര, ബേബിച്ചന്‍ അഴിയാത്ത്, രാജേഷ് പാറയില്‍, ജോബിന്‍ പുതിയടത്തുചാലില്‍, എഡ്വിന്‍ പാമ്പാറ, ലിബി മണിമല തുടങ്ങിയവര്‍ പ്രസംഗിച്ചു.

കുറവിലങ്ങാട് സെൻട്രൽ ജംഗ്ഷനിൽ അപകട പരമ്പര

കുറവിലങ്ങാട്: സെൻട്രൽ ജംഗ്ഷനിൽ അപകടങ്ങൾ ആവർത്തിക്കുന്ന സാഹചര്യത്തിൽ അടിയന്തര ഇടപെടലുകൾ വേണമെന്ന ആവശ്യം ശക്തമാകുന്നു. ഇന്നലെ മണിക്കൂറുകളുടെ വ്യത്യാസത്തിൽ സെൻട്രൽ ജംഗ്ഷനിൽ രണ്ട് അപകടങ്ങളാണ് നടന്നത്. തടിലോറി സ്റ്റാൻഡിൽ പാർക്ക്‌ ചെയ്തിരുന്ന ഓട്ടോറിക്ഷ ഇടിച്ച് തകർത്തതാണ് ഒരു അപകടം. ഡ്രൈവറും യാത്രക്കാരും ഓട്ടോറിക്ഷയിൽ ഇല്ലാതിരുന്നതിനാൽ വൻ അപകടം ഒഴിവായി. ഇരുചക്രവാഹനത്തിലെത്തിയവരെ ഇടിച്ച് തെറിപ്പിച്ചതാണ് രണ്ടാമത്തെ അപകടം. ഈ അപകടത്തിൽ ഇരുചക്രവാഹനത്തിലെ രണ്ടു പേർക്കു പരിക്കേറ്റു. ബസ് വേ ഇല്ലാത്ത പ്രധാന ടൗൺ എംസി റോഡിൽ കുറവിലങ്ങാടിനേക്കാൾ പ്രാധാന്യം കുറഞ്ഞ പലസ്ഥലങ്ങളിലും എംസി റോഡ് വികസനത്തിൽ ബസ് വേയും ടാക്‌സി പാർക്കിംഗ് ക്രമീകരണവും ഒരുക്കിയെങ്കിലും കുറവിലങ്ങാട്ട് ഇതൊന്നും ഉണ്ടായില്ല. നിലവിൽ ഓട്ടോറിക്ഷാ സ്റ്റാൻഡിലാണ് ബസുകൾ യാത്രക്കാരെ കയറ്റിയിറക്കുന്നത്. ഇതിന് പരിഹാരമുണ്ടാക്കാൻ ജനപ്രതിനിധികളുടെയും ഉന്നത ഉദ്യോഗസ്ഥരുടെയും ഇടപെടൽ ആവശ്യമാണ്. ശാസ്ത്രീയതയില്ലാത്ത മീഡിയനും ട്രാഫിക് ലൈറ്റും മതിയായ ശാസ്ത്രീയ പഠനങ്ങളില്ലാതെയാണ് സെൻട്രൽ ജംഗ്ഷനിൽ മീഡിയനും ട്രാഫിക് ലൈറ്റും സ്ഥാപിച്ചിട്ടുള്ളത്. ട്രാഫിക് ലൈറ്റുകളിലൊന്ന് അടുത്തനാളിൽ വാഹമനിടിച്ച് തകർത്തു. ഇത് മീഡിയനിലെടുത്തുവച്ച് അടുത്ത അപകടത്തിന് വഴിമരുന്നിട്ടിരിക്കുകയാണ്. സീബ്രാലൈൻ ഉപയോഗിക്കാൻ മീഡിയനിലൂടെ കയറിയിറങ്ങേണ്ട ഗതികേടിലാണ് കാൽനട യാത്രക്കാർ. ഗതാഗത ഉപദേശകസമിതി വിളിച്ചുചേർക്കണം ടൗണിൽ നടത്തേണ്ട അടിയന്തര ഇടപെടലുകൾ സംബന്ധിച്ച് ഗതാഗത ഉപദേശക സമിതി വിളിച്ചുചേർക്കണം. പോലീസും മോട്ടോർ വാഹനവകുപ്പും ജനപ്രതിനിധികളും ഉൾക്കൊള്ളുന്ന സമിതി ഇപ്പോൾ കടലാസിൽ ഉറങ്ങുകയാണ്. ഇക്കാര്യത്തിൽ അധികൃതർ ഉറക്കം വിട്ടുണരണം.

മരത്തിൽനിന്ന് വീണ് വയോധികൻ മരിച്ചു

വണ്ടൻപതാൽ: അസംബനിയിൽ സ്വകാര്യ വ്യക്തിയുടെ പുരയിടത്തിലെ മരം മുറിക്കുന്നതിനിടെ വയോധികൻ മരത്തിൽനിന്നു വീണ് മരിച്ചു. പഴയ പനയ്ക്കച്ചിറ സ്വദേശി മലയവീട്ടിൽ എം.ആർ. കൃഷ്ണൻ (73) ആണ് മരിച്ചത്. ഇന്നലെ ഉച്ചകഴിഞ്ഞ് മൂന്നോടെയാണ് അപകടം. മരത്തിന്‍റെ ശിഖരം മുറിക്കുന്നതിനിടെ നിയന്ത്രണംവിട്ട് താഴെ വീണ ഇദ്ദേഹത്തെ ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭാര്യ: ചെന്താമര. മക്കൾ: രാജൻ (ജ്യോതിഷാലയം മുണ്ടക്കയം), കണ്ണൻ (പോണ്ടിച്ചേരി), രമേശ് (പോണ്ടിച്ചേരി). മരുമകൾ: അനുപമ എസ്. പിള്ള. സംസ്കാരം ഇന്ന് ഉച്ചകഴിഞ്ഞ് രണ്ടിന് പഴയ പനയ്ക്കച്ചിറയിലെ വീട്ടുവളപ്പിൽ.

വീട്ടുമുറ്റത്ത് ഒരു മീറ്റർ നീളമുള്ള പയർ വിളഞ്ഞു

കാഞ്ഞിരപ്പള്ളി: വീട്ടുമുറ്റത്ത് ഒരു മീറ്റർ നീളമുള്ള പയർ വിളഞ്ഞു. കാഞ്ഞിരപ്പള്ളി ഹൗസിംഗ് ബോർഡ് കോളനിയിൽ താമസിക്കുന്ന വാഴയ്ക്കാപ്പാറ ബിജുമോൻ ഇമ്മാനുവലിന്‍റെ വീട്ടുമുറ്റത്താണ് ഈ വിളവ്. വീടിനോടു ചേർന്നുള്ള സ്ഥലത്ത് മുളപ്പിച്ച് പാകിയ ചുവന്ന ഹൈബ്രിഡ് പയർ വിത്തിൽ നിന്നാണ് ഈ വിളവ് ലഭിച്ചത്. മാത്രമല്ല ആറ് മൂട് പയർച്ചെടിയിൽനിന്ന് ദിവസവും മികച്ച വിളവ് ലഭിച്ചുകൊണ്ടിരിക്കുന്നു. വീട്ടിലെ അടുക്കള മാലിന്യങ്ങൾ സംസ്കരിക്കുന്ന ബയോഗ്യാസ് പ്ലാന്‍റിൽനിന്ന് ലഭിക്കുന്ന വെള്ളവും ചാണകപ്പൊടിയും മാത്രമാണ് വളമായി ഉപയോഗിക്കുന്നത്. കീടങ്ങളിൽനിന്നും ചാഴിയിൽനിന്നും പയർ കൃഷിയെ സംരക്ഷിക്കുന്നതിനായി പയർപന്തലിൽ നീറിനെ വളർത്തുക മാത്രമാണ് ചെയ്യുന്നത്. വീടിനോട് ചേർന്നുള്ള ചെറിയ സ്ഥലത്തുനിന്ന് വീട്ടാവശ്യങ്ങൾക്കുള്ള മറ്റ് പച്ചക്കറികളും ബിജു കൃഷി ചെയ്യുന്നുണ്ട്. മുന്പ് ഒരു മൂട് കപ്പയിൽനിന്ന് 45 കിലോ വരെ വിളവ് ലഭിച്ചിരുന്നു. മ്യൂച്ചൽ ഫണ്ട് ബിസിനസിന്‍റെ ബാക്കി സമയങ്ങൾ ഉപയോഗപ്പെടുത്തിയാണ് ബിജു കൃഷി ചെയ്യുന്നത്.

സിവിൽ സർവീസ് പരീക്ഷയിൽ ഉന്നത വിജയം നേടിയവരെ ആദരിച്ചു

വണ്ടൻപതാൽ: വണ്ടൻപതാൽ പൗരാവലിയുടെ നേതൃത്വത്തിൽ ലഹരിവിരുദ്ധ ബോധവത്കരണ ക്ലാസും സിവിൽ സർവീസ് പരീക്ഷയിൽ ഉന്നത വിജയം നേടിയ സോനറ്റ് ജോസിനും നസ്രിൽ പി. ഫാസിമിനും ആദരവും സംഘടിപ്പിച്ചു. കാഞ്ഞിരപ്പള്ളി ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് ഉദ്ഘാടനം ചെയ്തു. സെബാസ്റ്റ്യൻ ചുള്ളിത്തറ അധ്യക്ഷത വഹിച്ചു. മുണ്ടക്കയം പഞ്ചായത്ത് പ്രസിഡന്‍റ് രേഖ ദാസ് മുഖ്യപ്രഭാഷണം നടത്തി. ജോർജുകുട്ടി ആഗസ്തി ലഹരിവിരുദ്ധ ബോധവത്കരണ സന്ദേശം നൽകി. ബെന്നി ചേറ്റുകുഴി, ഫൈസൽമോൻ, തോമസ് കോശി, നിയാസ് കല്ലുപുരയ്ക്കൽ, കെ.എസ്. രാജു തുടങ്ങിയവർ പ്രസംഗിച്ചു.

ഏകദിന ശില്പശാല സംഘടിപ്പിച്ചു

കാഞ്ഞിരപ്പള്ളി: കോട്ടയം ലീഗൽ സർവീസ് അഥോറിറ്റിയുടെയും കാഞ്ഞിരപ്പള്ളി താലൂക്ക് ലീഗൽ സർവീസ് കമ്മിറ്റിയുടെയും ആഭിമുഖ്യത്തിൽ കാഞ്ഞിരപ്പള്ളി താലൂക്കിലെ തെരഞ്ഞെടുക്കപ്പെട്ട വിദ്യാർഥികൾക്കുവേണ്ടി ഏകദിന ശില്പശാല സംഘടിപ്പിച്ചു. കാഞ്ഞിരപ്പള്ളി മുൻസിഫ് മജിസ്ട്രേറ്റ് സ്മിത സൂസൻ മാത്യു ശില്പശാല ഉദ്ഘാടനം ചെയ്തു. അഡ്വ. രാജ്മോഹൻ അധ്യക്ഷത വഹിച്ചു. ടിഎൽസി സെക്രട്ടി സജു സെബാസ്റ്റ്യൻ, സോജ ബേബി തുടങ്ങിയവർ പ്രസംഗിച്ചു. അഡ്വ. നിയാസ്, അഡ്വ. ജയസൂര്യ, മുഹമ്മദ് സാലി, മാളവിക തുടങ്ങിയവർ വിവിധ വിഷയങ്ങളിൽ ക്ലാസുകൾ നയിച്ചു. കോടതി നടപടികളെക്കുറിച്ച് അറിയുന്നതിനായി കുട്ടികൾ മജിസ്ട്രേറ്റ് കോടതി സന്ദർശിച്ചു. തുടർന്നു നടന്ന സമാപന സമ്മേളനം താലൂക്ക് ലീഗൽ സർവീസസ് കമ്മിറ്റി ചെയർമാൻ നസീബ് എ. അബ്ദുൽ റസാഖ് ഉദ്ഘാടനം ചെയ്തു. ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് നിത്യാ പ്രസാദ് കുട്ടികൾക്ക് സർട്ടിഫിക്കറ്റുകൾ വിതരണം ചെയ്തു.

മിനി മാസ്റ്റ് ലൈറ്റ് ഉദ്ഘാടനം ചെയ്തു

കാഞ്ഞിരപ്പള്ളി: ആന്‍റോ ആന്‍റണി എംപിയുടെ പ്രാദേശിക വികസന ഫണ്ടിൽനിന്നു 2.5 ലക്ഷം രൂപ ചെലവഴിച്ച് പഞ്ചായത്ത് ടൗൺ ഹാളിന്‍റെ മുൻവശത്ത് സ്ഥാപിച്ച മിനി മാസ്റ്റ് ലൈറ്റിന്‍റെ ഉദ്ഘാടനം ആന്‍റോ ആന്‍റണി എംപി നിർവഹിച്ചു. പഞ്ചായത്തംഗം പി.എ. ഷെമീർ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് കെ.ആർ. തങ്കപ്പൻ മുഖ്യപ്രഭാഷണം നടത്തി. ‌ പഞ്ചായത്തംഗം ബിജു പത്യാല, റിവർവ്യൂ റെസിഡന്‍റ്സ് അസോസിയേഷൻ ഭാരവാഹികളായ ബിജു വാഴയ്ക്കപ്പാറ, ബോബസ് വർഗീസ്, തോമസ് മുഞ്ഞനാട്ട്, കോൺഗ്രസ് ബ്ലോക്ക് പ്രസിഡന്‍റ് പി. ജീരാജ്, ഒ.എം. ഷാജി, ബിനു കുന്നുംപുറം, ഷാജി പെരുന്നേപറമ്പിൽ, ദിലീപ് ചന്ദ്രൻ, നായിഫ് ഫൈസി, കെ.എസ്. ഷിനാസ്, അൻവർഷ കോനാട്ടുപറമ്പിൽ, പി.ഐ. ഷാജി തുടങ്ങിയവർ പ്രസംഗിച്ചു.

ഭരണങ്ങാനത്തെ മുങ്ങിമരണം; ശക്തമായ ഒഴുക്കും ആഴവും തെരച്ചില്‍ ദുഷ്‌കരമാക്കി

ഭരണങ്ങാനം: മീനച്ചിലാറ്റിലെ ആഴമേറിയതും ശക്തമായ ഒഴുക്കുള്ളതുമായ ഭാഗത്താണ് വിദ്യാര്‍ഥികളെ കാണാതായത്. അതുകൊണ്ടുതന്നെ തെരച്ചില്‍ അതീവ ദുഷ്‌കരമായിരുന്നു. ഇന്നലെ രാവിലെ എട്ടോടെയാണ് ഫയര്‍ഫോഴ്‌സ് സ്‌കൂബാ സംഘവും സന്നദ്ധ സംഘടനകളും തെരച്ചില്‍ പുനരാരംഭിച്ചത്. പാലാ പോലീസും എത്തിയിരുന്നു. വ്യത്യസ്ത സംഘങ്ങളായി വിലങ്ങുപാറ കടവില്‍ നിന്നായിരുന്നു തുടക്കം. രണ്ടു കിലോമീറ്ററോളം താഴെ കളരിയാമ്മാക്കല്‍ ചെക്ക്ഡാം ഭാഗം വരെ തെരച്ചില്‍ നടത്തിയെങ്കിലും ഉയര്‍ന്ന ജലനിരപ്പും ശക്തമായ ഒഴുക്കുംമൂലം ഫലം കണ്ടില്ല. ജലനിരപ്പ് കുറച്ച് തെരച്ചില്‍ സുഗമമാക്കാന്‍ കളരിയാമ്മാക്കല്‍ ചെക്ക്ഡാം തുറന്ന് വെള്ളം ഒഴുക്കിവിടാന്‍ ശ്രമം നടത്തിയെങ്കിലും വിഫലമായി. ചെക്ക്ഡാമിന്‍റെ ഷട്ടറില്‍ അടിഞ്ഞുകൂടിയ തടികളും ചെളിയും മാലിന്യങ്ങളും പാലത്തില്‍നിന്ന് ജെസിബി ഉപയോഗിച്ച് നീക്കാനുള്ള ശ്രമങ്ങള്‍ വൈകുന്നേരവും തുടരുകയാണ്. ഇതേത്തുടര്‍ന്ന് രാവിലെ തെരച്ചില്‍ നടത്തിയ ഭാഗങ്ങളില്‍ തിരികെയെത്തി വീണ്ടും നടത്തിയ തെരച്ചിലിലാണ് ഒരാളുടെ മൃതദേഹം കണ്ടെത്തിയത്. രക്ഷാപ്രവര്‍ത്തനങ്ങള്‍ക്കു ഡീന്‍ കുര്യാക്കോസ് എംപി, ജോസ് കെ. മാണി എംപി, മാണി സി. കാപ്പന്‍ എംഎല്‍എ, പാലാ നഗരസഭാ ചെയര്‍മാന്‍ തോമസ് പീറ്റര്‍, സാവിയോ കാവുകാട്ട്, ബിന്ദു മനു, ടോണി തൈപ്പറമ്പില്‍, പ്രസാദ് പെരുമ്പള്ളി തുടങ്ങിയവര്‍ രക്ഷാപ്രവര്‍ത്തനം നടത്തുന്നിടത്ത് എത്തിയിരുന്നു.

തൊമ്മൻകുത്തിൽ വീട്ടുമുറ്റത്ത് കുരിശു സ്ഥാപിച്ച് പ്രതിഷേധം

വണ്ണപ്പുറം: നാരങ്ങാനത്ത് കൈവശഭൂമിയിൽ സ്ഥാപിച്ച കുരിശ് വനംവകുപ്പ് പിഴുതുകൊണ്ടുപോയതിൽ പ്രതിഷേധിച്ച് നടത്തുന്ന സമരങ്ങളുടെ ഭാഗമായി വിശ്വാസികളുടെ വീട്ടുമുറ്റത്ത് കുരിശ് സ്ഥാപിച്ചു. നാരങ്ങാനം പുതിയാത്ത് ജോർജിന്‍റെ വീട്ടുമുറ്റത്താണ് ഇന്നലെ കുരിശ് സ്ഥാപിച്ചത്. വികാരി ഫാ. ജയിംസ് ഐക്കരമറ്റത്തിന്‍റെ സാന്നിധ്യത്തിലാണ് സമരത്തിന്‍റെ ഭാഗമായി കുരിശ് സ്ഥാപിച്ചത്. ബാക്കി ഇടവകാംഗങ്ങളുടെ വീട്ടുമുറ്റത്തും കുരിശ് സ്ഥാപിക്കും. കഴിഞ്ഞ ഏപ്രിൽ11നാണ് സെന്‍റ് തോമസ് പള്ളി നാരങ്ങാനത്ത് കൈവശഭൂമിയിൽ കുരിശ് സ്ഥാപിച്ചത്. പിറ്റേ ദിവസം വനംവകുപ്പ് കുരിശു പിഴുതു മാറ്റുകയായിരുന്നു. ഇതേത്തുടർന്ന് വലിയ പ്രതിഷേധമാണ് പ്രദേശത്തുണ്ടായത്. ഇടവകയിലെ കൈവശഭൂമിയിൽ താമസിക്കുന്ന വിശ്വാസികളുടെ വീടുകൾക്ക് മുന്നിലാണ് കുരിശ് സ്ഥാപിക്കുന്നത്. വനംവകുപ്പ് കൈവശഭൂമിയും വനംഭൂമിയുമായി ജണ്ടയിട്ടു വേർതിരിച്ച ഭാഗത്തു താമസിക്കുന്ന വിശ്വാസികളാണ് സമരത്തിന് പിന്തുണനൽകി വീട്ടുമുറ്റത്ത് കുരിശ് സ്ഥാപിക്കുന്നത്. ആറു പതിറ്റാണ്ടോളമായി താമസിക്കുന്ന പ്രദേശത്ത് ഇനിയും വനംവകുപ്പുദ്യോഗസ്ഥരുടെ ഭീഷണിയുടെ നിഴലിൽ കഴിയാൻ തയാറല്ലെന്ന് നാട്ടുകാർ പറഞ്ഞു. കുരിശ് സ്ഥാപിക്കുന്നതിന് ഇടവകക്കാർക്കു പിന്തുണയുമായി പ്രദേശവാസികൾ പൂർണമായും എത്തിയിരുന്നു. തുടർ സമരങ്ങൾ ഉണ്ടാകുമെന്നും പള്ളി കൈവശ ഭൂമിയിൽ സ്ഥാപിച്ച കുരിശ് തിരികെ എത്തിക്കണമെന്നും ഇതിന് നേതൃത്വം നൽകിയ വനംവകുപ്പ് ഉദ്യോഗസ്ഥനെതിരേ നടപടി എടുക്കണമെന്നുമാണ് വിശ്വാസികളുടെ ആവശ്യം. കുറ്റക്കാരായ ഉദ്യോഗസ്ഥരെ സംരക്ഷിക്കുന്ന നിലപാടാണ് ഉന്നത ഉദ്യോഗസ്ഥർ സ്വീകരിക്കുന്നതെന്നും ഇത് അംഗീകരിക്കൻ കഴിയില്ലെന്നും സമരസമിതി നേതാക്കൾ പറഞ്ഞു.

എം.എ. ബേബിക്ക് സ്വീകരണം നൽകി

കോട്ടയം: സിപിഎം ജനറല്‍ സെക്രട്ടറിയായി തെരഞ്ഞെടുക്കപ്പെട്ട എം.എ. ബേബിക്ക് സിപിഎം നേതൃത്വത്തില്‍ സ്വീകരണം നല്‍കി. തിരുനക്കര ബസ്‌സ്റ്റാന്‍ഡ് മൈതാനത്ത് പഹല്‍ഗാം ഭീകരാക്രമണത്തിന്‍റെ പശ്ചാത്തലത്തില്‍ തീവ്രവാദത്തിനെതിരേ സിപിഎം ജില്ലാ കമ്മിറ്റി ജനകീയ കൂട്ടായ്മയിലായിരുന്നു സ്വീകരണം. കൂട്ടായ്മ എം.എ. ബേബി ഉദ്ഘാടനം ചെയ്തു. മന്ത്രി വി. എന്‍. വാസവന്‍ അധ്യക്ഷനായി. എല്‍ഡിഎഫ് കണ്‍വീനര്‍ ടി. പി. രാമകൃഷ്ണന്‍, സിപിഎം ജില്ലാ സെക്രട്ടറി ടി. ആര്‍. രഘുനാഥന്‍, വൈക്കം വിശ്വന്‍, കെ.ജെ. തോമസ്, കെ. അനില്‍കുമാര്‍, കെ. സുരേഷ്‌കുറുപ്പ്, ലാലിച്ചന്‍ ജോര്‍ജ്, റെജി സഖറിയ, കൃഷ്ണകുമാരി രാജശേഖരന്‍, കെ.എന്‍. വേണുഗോപാല്‍, പി. വി. സുനില്‍ എന്നിവര്‍ പങ്കെടുത്തു. ചെഗുവേരയുടെ ചിത്രം ആലേഖനം ചെയ്ത ഫലകം എം. എ. ബേബിക്ക് ഉപഹാരമായി നല്‍കി. വിഴിഞ്ഞം പദ്ധതി യാഥാര്‍ഥ്യമാക്കാന്‍ മുന്നില്‍നിന്ന് പ്രവര്‍ത്തിച്ച തുറമുഖമന്ത്രി വി.എന്‍. വാസവനെ എം.എ. ബേബി അഭിനന്ദിക്കുകയും പൊന്നാടയണിക്കുകയും ചെയ്തു.

നെല്‍കര്‍ഷകരുടെ സമരപ്രഖ്യാപന സമ്മേളനം നാളെ ചങ്ങനാശേരിയില്‍

ചങ്ങനാശേരി: നെല്ല് സംഭരണത്തിന്‍റെ പിആര്‍എസ് ബാങ്കില്‍ എടുക്കാത്ത കര്‍ഷകരുടെയും ബാങ്കില്‍ കൊടുത്തിട്ടു പ്രോസസ് ചെയ്യാതെ വച്ചിരിക്കുന്ന കര്‍ഷകരുടെയും സമരപ്രഖ്യാപന സമ്മേളനം നെല്‍ കര്‍ഷക സംരക്ഷണ സമിതിയുടെ നേതൃത്വത്തില്‍ നാളെ വൈകുന്നേരം അഞ്ചിന് ചങ്ങനാശേരി അര്‍ക്കാലിയ ഹോട്ടല്‍ ഓഡിറ്റോറിയത്തില്‍ നടക്കും. നെല്‍ കര്‍ഷക സംരക്ഷണ സമിതി സംസ്ഥാന പ്രസിഡന്‍റ് റജീന അഷ്റഫിന്‍റെ അധ്യക്ഷതയില്‍ സമിതി രക്ഷാധികാരി വി.ജെ. ലാലി ഉദ്ഘാടനം ചെയ്യും. കുട്ടനാട്, അപ്പര്‍ കുട്ടനാട് മേഖലകളിലെ നെല്‍ കര്‍ഷകര്‍ സമ്മേളനത്തില്‍ പങ്കെടുക്കുമെന്ന് സമര സമിതി ചെയര്‍മാന്‍ സന്തോഷ് പറമ്പിശേരി അറിയിച്ചു.

അഖിലേന്ത്യ സെവന്‍സ് ഫുട്ബോള്‍ ടൂര്‍ണമെന്‍റിന് ചങ്ങനാശേരിയില്‍ തുടക്കം

ചങ്ങനാശേരി: എംഎസ്‌സിയുടെ 28ാമത് അഖിലേന്ത്യ സെവന്‍സ് ഫുട്ബോള്‍ ടൂര്‍ണമെന്‍റ് ചങ്ങനാശേരി പുതൂര്‍പ്പള്ളി ഫ്ളഡ്‌ലിറ്റ് സ്റ്റേഡിയത്തില്‍ ആരംഭിച്ചു. മന്ത്രി വി.എന്‍. വാസവന്‍ ഉദ്ഘാടനം ചെയ്തു. സിനി ആര്‍ട്ടിസ്റ്റ് കലാഭവന്‍ പ്രജോദ് മുഖ്യാതിഥിയായിരുന്നു. ജോബ് മൈക്കിള്‍ എംഎല്‍എ, നഗരസഭ ചെയര്‍പേഴ്സണ്‍ കൃഷ്ണകുമാരി രാജശേഖരന്‍, പുതൂര്‍പ്പള്ളി മുസ്‌ലിം ജമാഅത്ത് പ്രസിഡന്‍റ് ടി.പി. അബ്ദുല്‍ ഹമീദ്, പഴയപള്ളി മുസ്‌ലിം ജമാഅത്ത് പ്രസിഡന്‍റ് എസ്.എം. ഫൂവാദ്, എച്ച്. മുസമ്മില്‍ എന്നിവര്‍ പ്രസംഗിച്ചു. സ്ഥിരം ഗാലറിക്ക് പുറമേ താത്കാലിക ഗാലറികളും ഒരുക്കിയിട്ടുണ്ട്. സംസ്ഥാന, ദേശീയ, വിദേശ താരങ്ങളും അടങ്ങുന്ന 16 ടീമുകളാണ് ടൂര്‍ണമെന്‍റില്‍ മത്സരിക്കുന്നത്. എംഎസ്‌സിയുടെ സ്ഥാപക അംഗവും ഫുട്ബോള്‍ ക്യാപ്റ്റനും പരിശീലകനുമായിരുന്ന പി.എം. ഷാജഹാന്‍റെ ഓര്‍മയ്ക്കായുള്ള ട്രോഫിയും പാരിതോഷികവുമാണ് വിജയികള്‍ക്ക് സമ്മാനിക്കുന്നത്. രാത്രി എട്ടുമുതല്‍ ആരംഭിക്കുന്ന അഖിലേന്ത്യാ സെവന്‍സ് ഫുട്ബോള്‍ ടൂര്‍ണമെന്‍റില്‍ പ്രവേശനം ടിക്കറ്റ് മൂലമാണ് നിയന്ത്രിക്കുന്നത്.

അനുഗ്രഹനിറവില്‍ മണ്ണാര്‍കുന്ന് പള്ളിയുടെ ശതാബ്ദി ആഘോഷങ്ങള്‍ക്ക് സമാപനം

അതിരമ്പുഴ: അനുഗ്രഹനിറവില്‍ മണ്ണാര്‍കുന്ന് സെന്‍റ് ഗ്രിഗോറിയോസ് പള്ളിയുടെ ഒരു വര്‍ഷം നീണ്ട ശതാബ്ദി ആഘോഷങ്ങള്‍ക്ക് സമാപനം. ഇന്നലെ വൈകുന്നേരം നടന്ന ശതാബ്ദി സമാപന സമ്മേളനം കേന്ദ്ര സഹമന്ത്രി ജോര്‍ജ് കുര്യന്‍ ഉദ്ഘാടനം ചെയ്തു. ജൂബിലി ആഘോഷങ്ങള്‍ വിശ്വാസജീവിതം കൂടുതല്‍ പ്രോജ്വലമാക്കാന്‍ കാരണമാകണമെന്ന് കേന്ദ്രമന്ത്രി പറഞ്ഞു. ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിച്ചു. ദൈവം നല്‍കിയ അനുഗ്രഹങ്ങള്‍ക്കു നന്ദി പറയുന്നതിനൊപ്പം വരുംതലമുറയെക്കുറിച്ച് ചിന്തിക്കാനുള്ള അവസരം കൂടിയാണ് ശതാബ്ദി ആഘോഷമെന്നും ആര്‍ച്ച്ബിഷപ് പറഞ്ഞു. ശതാബ്ദി സ്മരണികയുടെ പ്രകാശനം ചങ്ങനാശേരി അതിരൂപത വികാരി ജനറാള്‍ ഫാ. സ്‌കറിയ കന്യാകോണില്‍ നിര്‍വഹിച്ചു. കെ. ഫ്രാന്‍സിസ് ജോര്‍ജ് എംപി, അതിരമ്പുഴ സെന്‍റ് മേരീസ് ഫൊറോന വികാരി റവ.ഡോ. ജോസഫ് മുണ്ടകത്തില്‍, മാന്നാനം കെഇ സ്‌കൂള്‍ പ്രിന്‍സിപ്പല്‍ ഫാ. ജയിംസ് മുല്ലശേരി സിഎംഐ, അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം, ജില്ലാ പഞ്ചായത്തംഗം പ്രഫ.ഡോ. റോസമ്മ സോണി, ഇടവക വൈദികരുടെ പ്രതിനിധി ഫാ. മാത്യു കാഞ്ഞിരംകാലാ, എഫ്‌സിസി ദേവമാതാ പ്രൊവിന്‍സ് പ്രൊവിന്‍ഷ്യല്‍ സിസ്റ്റര്‍ ബ്രിജി എഫ്‌സിസി എന്നിവര്‍ പ്രസംഗിച്ചു. വികാരി ഫാ. ഏബ്രഹാം തര്‍മശേരി സ്വാഗതവും ശതാബ്ദി ആഘോഷ ജനറല്‍ കണ്‍വീനര്‍ എല്‍.വി. ജോമോന്‍ കൃതജ്ഞതയും പറഞ്ഞു. ശതാബ്ദി ആഘോഷത്തോടനുബന്ധിച്ച് ഇടവകയെക്കുറിച്ച് തയാറാക്കിയ ഡോക്കുമെന്‍ററി കൃപയുടെ തിരമാലയുടെ പ്രകാശനം ശാന്തിഗിരി ആശ്രമത്തിലെ ചന്ദ്രപ്രകാശ് നിര്‍വഹിച്ചു. രാവിലെ മന്ത്രി വി.എന്‍. വാസവന്‍ പള്ളിയിലെത്തി ആശംസകള്‍ അറിയിച്ചു. കുട്ടികളുടെ വിവിധ കലാപരിപാടികള്‍, ഫ്യൂഷന്‍, സ്‌നേഹവിരുന്ന് എന്നിവയോടെ സമ്മേളനം സമാപിച്ചു. സമ്മേളനത്തിനു മുന്നോടിയായി ചങ്ങനാശേരി അതിരൂപത വികാരി ജനറാള്‍ ഫാ. സ്‌കറിയ കന്യാകോണില്‍ വിശുദ്ധ കുര്‍ബാന അര്‍പ്പിച്ചു സന്ദേശം നല്‍കി. മണ്ണാര്‍കുന്ന് ഇടവകാംഗങ്ങളായ വൈദികര്‍ സഹകാര്‍മികരായിരുന്നു. ട്രസ്റ്റിമാരായ ജോസ് ഇല്ലിച്ചിറ, ജോസ് കുഴിപ്പറമ്പില്‍, ജോണി കീപ്പുറം, പബ്ലിസിറ്റി കണ്‍വീനര്‍ ജിനു ഗ്രിഗോറിയോസ് കരിമ്പുകാലാ എന്നിവര്‍ പരിപാടികള്‍ക്ക് നേതൃത്വം നല്‍കി.

അരയ്ക്കു താഴേക്കു തളർന്ന യുവാവ് വേമ്പനാട്ടുകായൽ നീന്തി കീഴടക്കി

വൈക്കം: രണ്ടര വയസിൽ പോളിയോ ബാധിച്ച് അരയ്ക്ക് താഴേക്കു തളർന്ന 40 വയസുകാരൻ വേമ്പനാട്ടുകായൽ നീന്തി കീഴടക്കി. ആലുവ മേത്തശേരി പുഷ്കരൻ-ലളിത ദമ്പതികളുടെ മകൻ രതീഷാണ് ആലപ്പുഴ ചേർത്തല വടക്കുംകര അമ്പലക്കടവിൽ നിന്നും കോട്ടയം വൈക്കം ബീച്ചിലേക്ക് ഏഴു കിലോമീറ്റർ നീന്തി ചരിത്രം കുറിച്ചത്. ഞായറാഴ്ച രാവിലെ 7.31ന് അർജുന അവാർഡ് ജേതാവ് ക്യാപ്റ്റൻ സജി തോമസ് ഫ്ലാഗ് ഓഫ് ചെയ്ത നീന്തൽ 9.31 നാണ് അവസാനിച്ചത്. വൈക്കം കായലോര ബീച്ചിലേക്ക് നീന്തിക്കയറിയ രതീഷിനെ വൈക്കം നഗരസഭാ ചെയർപേഴ്സൺ പ്രീത രാജേഷ്, വൈസ് ചെയർമാൻ പി.ടി. സുഭാഷ്, വാർഡ് കൗൺസിലർ ബിന്ദു ഷാജി എന്നിവർ ചേർന്ന് സ്വീകരിച്ചു. വൈക്കം നഗരസഭാ അധികൃതർ, ഫയർ ഫോഴ്സ് ഉദ്യോഗസ്ഥർ, രതീഷിന്‍റെ സുഹൃത്തുക്കൾ, വാളശേരി റിവർ സ്വിമ്മിംഗ് ക്ലബ് അംഗങ്ങൾ എന്നിവർ ഉപഹാരങ്ങൾ നൽകി അനുമോദിച്ചു. നീന്തൽ പരിശീലകൻ സജി വാളശേരിയെ നഗരസഭ വൈസ്ചെയർമാൻ പി.ടി. സുഭാഷ് പൊന്നാട അണിയിച്ചു. നീന്തുന്നതിന് ശാരീരിക പരിമിതികൾ തടസമായില്ലെന്നും ഏറെ സന്തോഷത്തോടെയാണ് കായൽ നീന്തിയതെന്നും രതീഷ് പറഞ്ഞു. 15000 ലധികം പേരെ സൗജന്യമായി നീന്തൽ അഭ്യസിപ്പിച്ചിട്ടുണ്ടെങ്കിലും രതീഷിന്‍റെ വിജയം തന്നെ ഏറെ സന്തോഷിപ്പിക്കുന്നതായി പരിശീലകൻ സജി വാളാശേരി പറഞ്ഞു.

കറുത്ത പൊന്നിന് തിരിച്ചടി; ഇക്കൊല്ലവും ഉത്പാദനം കുറയും

കോട്ടയം: പൊന്നുംവിലയില്‍ മോഹിപ്പിച്ച കറുത്ത പൊന്നിന് അപ്രതീക്ഷിത തിരിച്ചടി. കിലോയ്ക്ക് 721 രൂപയെന്ന റിക്കാര്‍ഡ് കയറ്റത്തിനുശേഷം കഴിഞ്ഞ രണ്ടാഴ്ചയ്ക്കുള്ളില്‍ കിലോയ്ക്ക് 21 രൂപ ഇടിഞ്ഞു. വടക്കേ ഇന്ത്യന്‍ മാര്‍ക്കറ്റുകളില്‍ ശ്രീലങ്കന്‍ കുരുമുളകിന്‍റെ വലിയ തോതിലുള്ള വരവുണ്ടായതാണ് വിലയിടിയാന്‍ കാരണമെന്ന് വ്യാപാരികള്‍ പറഞ്ഞു. അണ്‍ഗാര്‍ബിള്‍ഡ് കുരുമുളകിന് കിലോ 698 രൂപയാണ് ഇന്നലെ വില. ഗാര്‍ബിള്‍ഡ് വില 718 രൂപയായി കുറഞ്ഞു. ഏപ്രില്‍ രണ്ടാം വാരമാണ് അണ്‍ഗാര്‍ബിള്‍ഡിന് കിലോയ്ക്ക് 721 രൂപ വരെ കയറിയത്. 15 വര്‍ഷം മുന്‍പാണ് ഇതിനു മുന്‍പ് 720 രൂപയ്ക്കുമേല്‍ വില വന്നത്. ഇക്കൊല്ലം കേരളത്തിലും കര്‍ണാടകത്തിലും വിളവു കുറഞ്ഞത് സ്റ്റോക്കുള്ള കര്‍ഷകര്‍ക്ക് നേട്ടമായി. കാലാവസ്ഥാവ്യതിയാനം മൂലം മുന്‍ വര്‍ഷത്തെക്കാള്‍ 20 ശതമാനം ഉത്പാദനം കുറവാണ്. അടുത്ത സീസണിലും ഉത്പാദനം കുറയുമെന്നാണ് സൂചന. വില 750 കടന്നേക്കുമെന്ന പ്രതീക്ഷയില്‍ കുരുമുളക് സ്റ്റോക്ക് ചെയ്തവര്‍ക്ക് വലിയ തിരിച്ചടിയുണ്ടായി. കിലോയ്ക്ക് 690 രൂപ നിരക്കില്‍ ശ്രീലങ്കന്‍ മുളക് വിപണിയില്‍ കിട്ടാനുണ്ട്. മരുന്ന്, മസാലക്കമ്പനികള്‍ ശ്രീലങ്കന്‍ കുരുമുളകിനോട് പ്രത്യേക താത്പര്യം കാട്ടുന്നതായി കച്ചവടക്കാര്‍ പറയുന്നു. ജൂണില്‍ ശ്രീലങ്കയില്‍ അടുത്ത വിളവെടുപ്പ് തുടങ്ങുന്ന സാഹചര്യത്തില്‍ വിലമാന്ദ്യം തുടരാനാണ് സാധ്യത. വിയറ്റ്‌നാം, ഇന്തോനേഷ്യാ കുരുമുളകും എത്താനിരിക്കെ ഇവിടത്തെ കര്‍ഷകര്‍ക്ക് തിരിച്ചടിയുണ്ടായേക്കാം.

സയൻസ് സിറ്റി ഉദ്ഘാടനത്തിൽ സർക്കാർ വ്യക്തത വേണമെന്ന്

കുറവിലങ്ങാട്: സയൻസ് സിറ്റിയുടെ ഉദ്ഘാടനം സംബന്ധിച്ച് സംസ്ഥാന സർക്കാർ വ്യക്തത വരുത്തണമെന്ന് കെ. ഫ്രാൻസിസ് ജോർജ് എംപിയും മോൻസ് ജോസഫ് എംഎൽഎയും ആവശ്യപ്പെട്ടു. 2014ൽ നിർമാണം ആരംഭിച്ച് അഞ്ചു വർഷത്തിനുള്ളിൽ തുറന്നുകൊടുക്കാൻ ലക്ഷ്യമിട്ട സയൻസ് സിറ്റി 11 വർഷം കഴിഞ്ഞിട്ടും തുറക്കാത്തത് അനീതിയാണെന്ന് എംപിയും എംഎൽഎയും ആരോപിച്ചു. ജനവികാരം കണക്കിലെടുത്ത് സയൻസ് സിറ്റിയുടെ നിർമാണ പുരോഗതി വിലയിരുത്താനും നടപ്പാക്കാത്ത പദ്ധതികൾ സംബന്ധിച്ച റിപ്പോർട്ട് തയാറാക്കി സർക്കാരിലേക്ക് സമർപ്പിക്കുന്നതിനുമായി ഇന്നു രാവിലെ പത്തിന് സയൻസ് സിറ്റി സന്ദർശനവും വികസനയോഗവും നടത്തുമെന്നും പ്രാദേശിക ജനപ്രതിനിധികളും ഉദ്യോഗസ്ഥരും യോഗത്തിൽ പങ്കെടുക്കുമെന്നും എംഎൽഎ അറിയിച്ചു. 2025 ജനുവരി ഒന്നിന് സയൻസ് സിറ്റി നാടിന് സമർപ്പിക്കുമെന്ന് മന്ത്രി ഡോ. ആർ. ബിന്ദു നിയമസഭയിൽ പറഞ്ഞിരുന്നു. 2025 മേയ് 11ന് ഉദ്ഘാടനം നടത്തുമെന്ന് രാജ്യസഭാംഗവും അറിയിച്ചിരുന്നു. ഉന്നതവിദ്യാഭ്യാസമന്ത്രി സയൻസ് സിറ്റി നേരിട്ട് സന്ദർശിച്ച് മേയിൽ ഉദ്ഘാടനം നടത്തുമെന്ന് അറിയിച്ചു. ആവർത്തിച്ചുള്ള പ്രഖ്യാപനങ്ങൾക്കപ്പുറം കാര്യങ്ങൾ നടത്താൻ കഴിയാത്ത സ്ഥിതിയാണുള്ളത്. ഈ സാഹചര്യത്തിൽ അവ്യക്തത മാറ്റാൻ സർക്കാർ തയാറാകണമെന്നാണ് എംപിയുടെയും എംഎൽഎയുടെയും ആവശ്യം.

പൊളിച്ചുമാറ്റാൻ തീരുമാനിച്ച മൃഗാശുപത്രിക്ക് ഫിറ്റ്നസ് സർട്ടിഫിക്കറ്റ് നൽകി

എരുമേലി: ഗവൺമെന്‍റ് മൃഗാശുപത്രി കെട്ടിടം പൊളിച്ചു നിർമിക്കാൻ പഞ്ചായത്ത്‌ കമ്മിറ്റി തീരുമാനിച്ചപ്പോൾ കെട്ടിടത്തിന് ഫിറ്റ്നസ് സർട്ടിഫിക്കറ്റ് നൽകി അസിസ്റ്റന്‍റ് എക്‌സിക്യൂട്ടീവ് എൻജിനിയർ. ഇതോടെ കെട്ടിടം പൊളിക്കാൻ കഴിയാതെ വെട്ടിലായി പഞ്ചായത്ത്‌ കമ്മിറ്റി. പഞ്ചായത്ത്‌ ഓഫീസിന് സമീപമുള്ള മൃഗാശുപത്രി കെട്ടിടം അപകടാവസ്ഥയിലായെന്ന് വിലയിരുത്തിയാണ് പൊളിച്ചുമാറ്റാൻ കഴിഞ്ഞയിടെ നടന്ന പഞ്ചായത്ത്‌ കമ്മിറ്റിയിൽ തീരുമാനിച്ചത്. ഗുണനിലവാരമില്ലാത്ത പണികൾ നടത്തി കെട്ടിടം നിർമിച്ചതു മൂലമാണ് അപകടാവസ്ഥയിലായതെന്ന് കമ്മിറ്റി വിലയിരുത്തി. ഇതേത്തുടർന്ന് മൃഗാശുപത്രിയുടെ പ്രവർത്തനം പഞ്ചായത്ത്‌ ഓഫീസ് റോഡിൽ പെൻഷൻ ഭവന് സമീപമുള്ള സ്വകാര്യ വാടകക്കെട്ടിടത്തിലേക്ക് മാറ്റി. തുടർന്നാണ് കെട്ടിടം പൊളിക്കുന്നതിനുള്ള നടപടിക്രമത്തിന്‍റെ ഭാഗമായി കെട്ടിടം അൺ ഫിറ്റ്‌ ആണെന്ന് സാക്ഷ്യപ്പെടുത്തി സർട്ടിഫിക്കറ്റ് ലഭിക്കുന്നതിനായി അസിസ്റ്റന്‍റ് എക്‌സിക്യൂട്ടിവ് എൻജിനിയറോട് ആവശ്യപ്പെട്ടത്. എന്നാൽ, താൻ നടത്തിയ പരിശോധനയിൽ കെട്ടിടം അൺ ഫിറ്റ്‌ ആണെന്ന് ബോധ്യപ്പെട്ടിട്ടില്ലെന്നാണ് എൻജിനിയർ അറിയിച്ചത്. തുടർന്ന് കെട്ടിടത്തിന് ഫിറ്റ്നസ് സർട്ടിഫിക്കറ്റ് നൽകുകയായിരുന്നു. ഫിറ്റ്നസ് സർട്ടിഫിക്കറ്റ് ലഭിച്ചതിനാൽ ഇനി കെട്ടിടം പൊളിച്ചുമാറ്റാൻ കഴിയില്ല. അടുത്ത പഞ്ചായത്ത്‌ കമ്മിറ്റിയിൽ വിഷയം ചർച്ച ചെയ്ത് തീരുമാനമെടുക്കാനാണ് നീക്കം. കെട്ടിടം അൺ ഫിറ്റ്‌ ആണെന്ന് സർട്ടിഫിക്കറ്റ് ലഭിച്ചാലാണ് പൊളിച്ചു നീക്കാനുള്ള നടപടികൾ സ്വീകരിക്കാൻ കഴിയുക. ഇതിനുള്ള മാർഗങ്ങൾ അടുത്ത കമ്മിറ്റിയിൽ ചർച്ച ചെയ്ത് തീരുമാനിക്കേണ്ടിവരും. താഴത്തെ നിലയിൽ ഗവൺമെന്‍റ് ഹോമിയോ ഡിസ്‌പെൻസറിയും മുകളിൽ മൃഗാശുപത്രിയുമാണ് കെട്ടിടത്തിലുള്ളത്. 2007 ജനുവരിയിലാണ് ഇരുനില കെട്ടിടം നിർമിച്ച് ഉദ്ഘാടനം ചെയ്തത്. ഇതിനു ശേഷം 2010 ഫെബ്രുവരിയിൽ ഇതിനടുത്ത് കൃഷിഭവന് ശിലാസ്ഥാപനം നടത്തി. കൃഷിഭവനു വേണ്ടി ഒരു ഹാൾ നിർമിച്ച ശേഷം പണികൾ നിലച്ചു. സബ് രജിസ്ട്രാർ ഓഫീസ് കെട്ടിടത്തിന്‍റെ താഴെ നിലയിൽ കൃഷിഭവന്‍റെ പ്രവർത്തനം മാറ്റിയതോടെയാണ് പഞ്ചായത്ത്‌ ഓഫീസിനോട് ചേർന്ന് കൃഷിഭവന് നിർമിച്ചിരുന്ന ഹാൾ വേണ്ടെന്നു വച്ചത്. മൃഗാശുപത്രിയുടെ തൊട്ടടുത്ത് ശുചിത്വ സമുച്ചയവും നിർമിച്ചിരുന്നു. ശബരിമല സീസണിൽ ലേലം ചെയ്താണ് ശുചിത്വ സമുച്ചയം പ്രവർത്തിപ്പിച്ചിരുന്നത്. മൃഗാശുപത്രിയും ഹോമിയോ ഡിസ്‌പെൻസറിയും ശുചിത്വ സമുച്ചയവും കൃഷിഭവനു വേണ്ടി നിർമിച്ച ഹാളും ഉൾപ്പെടെ മൊത്തം പൊളിച്ചുമാറ്റി പുതിയ കെട്ടിട സമുച്ചയം നിർമിക്കാനാണ് ഇപ്പോൾ പദ്ധതി തയാറാക്കിയിരിക്കുന്നത്. മൃഗാശുപത്രി നിർമാണത്തിന് മൃഗസംരക്ഷണ വകുപ്പിൽനിന്ന് ഫണ്ട് അനുവദിക്കുമെന്ന് ഉറപ്പും ലഭിച്ചിരുന്നു.

നാടിനെ ഒന്നാകെ കണ്ണീരിലാഴ്ത്തി ആൽബിൻ വിടപറഞ്ഞു

മുണ്ടക്കയം: ഒരു നാടിനെ ഒന്നാകെ കണ്ണീരിലാഴ്ത്തി പന്തപ്ലാക്കൽ കുടുംബത്തിന്‍റെ പ്രതീക്ഷകളെ ഇല്ലാതെയാക്കി ആൽബിൻ മടങ്ങി. മീനച്ചിലാറ്റിൽ മുങ്ങി മരിച്ച തെക്കേമല പന്തപ്ലാക്കൽ ആൽവിൻ ജോസഫ് (21) ഇനി നീറുന്ന ഓർമ. ശനിയാഴ്ച വൈകുന്നേരം 4.30ഓടെയാണ് നാലംഗ വിദ്യാർഥിസംഘം മീനച്ചിലാറ്റിൽ കുളിക്കാൻ ഇറങ്ങിയത്. ആൽബിനും അമലും അടിയൊഴുക്കിൽപ്പെട്ട് മുങ്ങിത്താഴുകയായിരുന്നു. മറ്റു രണ്ടുപേർ രക്ഷപ്പെട്ടു. വിവിധ സംഘങ്ങളായി തിരിഞ്ഞ് തെരച്ചിൽ ശക്തമാക്കുമ്പോഴും നാട് ഒന്നാകെ ആൽബിനെ ജീവനോടെ കിട്ടണമേയെന്ന പ്രാർഥനയിലായിരുന്നു. ജർമൻ ഭാഷാ പഠനത്തിനുശേഷം വിദേശത്തു ജോലി നേടി കുടുംബത്തെ രക്ഷിക്കണമെന്ന് ആഗ്രഹിച്ചായിരുന്നു ആൽബിന്‍റെ പഠനം. എന്നാൽ, എല്ലാ പ്രതീക്ഷകളും ഇല്ലാതാക്കി ആൽബിൻ മടങ്ങി. പാലാ ജനറൽ ആശുപത്രിയിൽ പോസ്റ്റ്മോർട്ടത്തിനുശേഷം ഇന്നു തെക്കേമലയിലുള്ള ഭവനത്തിൽ മൃതദേഹം എത്തിക്കും. തുടർന്ന് സെന്‍റ് മേരീസ് പള്ളിയിൽ സംസ്കാരശുശ്രൂഷകൾ നടക്കും.

പൊളിച്ചുമാറ്റാൻ തീരുമാനിച്ച മൃഗാശുപത്രിക്ക് ഫിറ്റ്നസ് സർട്ടിഫിക്കറ്റ് നൽകി

എരുമേലി: ഗവൺമെന്‍റ് മൃഗാശുപത്രി കെട്ടിടം പൊളിച്ചു നിർമിക്കാൻ പഞ്ചായത്ത്‌ കമ്മിറ്റി തീരുമാനിച്ചപ്പോൾ കെട്ടിടത്തിന് ഫിറ്റ്നസ് സർട്ടിഫിക്കറ്റ് നൽകി അസിസ്റ്റന്‍റ് എക്‌സിക്യൂട്ടീവ് എൻജിനിയർ. ഇതോടെ കെട്ടിടം പൊളിക്കാൻ കഴിയാതെ വെട്ടിലായി പഞ്ചായത്ത്‌ കമ്മിറ്റി. പഞ്ചായത്ത്‌ ഓഫീസിന് സമീപമുള്ള മൃഗാശുപത്രി കെട്ടിടം അപകടാവസ്ഥയിലായെന്ന് വിലയിരുത്തിയാണ് പൊളിച്ചുമാറ്റാൻ കഴിഞ്ഞയിടെ നടന്ന പഞ്ചായത്ത്‌ കമ്മിറ്റിയിൽ തീരുമാനിച്ചത്. ഗുണനിലവാരമില്ലാത്ത പണികൾ നടത്തി കെട്ടിടം നിർമിച്ചതു മൂലമാണ് അപകടാവസ്ഥയിലായതെന്ന് കമ്മിറ്റി വിലയിരുത്തി. ഇതേത്തുടർന്ന് മൃഗാശുപത്രിയുടെ പ്രവർത്തനം പഞ്ചായത്ത്‌ ഓഫീസ് റോഡിൽ പെൻഷൻ ഭവന് സമീപമുള്ള സ്വകാര്യ വാടകക്കെട്ടിടത്തിലേക്ക് മാറ്റി. തുടർന്നാണ് കെട്ടിടം പൊളിക്കുന്നതിനുള്ള നടപടിക്രമത്തിന്‍റെ ഭാഗമായി കെട്ടിടം അൺ ഫിറ്റ്‌ ആണെന്ന് സാക്ഷ്യപ്പെടുത്തി സർട്ടിഫിക്കറ്റ് ലഭിക്കുന്നതിനായി അസിസ്റ്റന്‍റ് എക്‌സിക്യൂട്ടിവ് എൻജിനിയറോട് ആവശ്യപ്പെട്ടത്. എന്നാൽ, താൻ നടത്തിയ പരിശോധനയിൽ കെട്ടിടം അൺ ഫിറ്റ്‌ ആണെന്ന് ബോധ്യപ്പെട്ടിട്ടില്ലെന്നാണ് എൻജിനിയർ അറിയിച്ചത്. തുടർന്ന് കെട്ടിടത്തിന് ഫിറ്റ്നസ് സർട്ടിഫിക്കറ്റ് നൽകുകയായിരുന്നു. ഫിറ്റ്നസ് സർട്ടിഫിക്കറ്റ് ലഭിച്ചതിനാൽ ഇനി കെട്ടിടം പൊളിച്ചുമാറ്റാൻ കഴിയില്ല. അടുത്ത പഞ്ചായത്ത്‌ കമ്മിറ്റിയിൽ വിഷയം ചർച്ച ചെയ്ത് തീരുമാനമെടുക്കാനാണ് നീക്കം. കെട്ടിടം അൺ ഫിറ്റ്‌ ആണെന്ന് സർട്ടിഫിക്കറ്റ് ലഭിച്ചാലാണ് പൊളിച്ചു നീക്കാനുള്ള നടപടികൾ സ്വീകരിക്കാൻ കഴിയുക. ഇതിനുള്ള മാർഗങ്ങൾ അടുത്ത കമ്മിറ്റിയിൽ ചർച്ച ചെയ്ത് തീരുമാനിക്കേണ്ടിവരും. താഴത്തെ നിലയിൽ ഗവൺമെന്‍റ് ഹോമിയോ ഡിസ്‌പെൻസറിയും മുകളിൽ മൃഗാശുപത്രിയുമാണ് കെട്ടിടത്തിലുള്ളത്. 2007 ജനുവരിയിലാണ് ഇരുനില കെട്ടിടം നിർമിച്ച് ഉദ്ഘാടനം ചെയ്തത്. ഇതിനു ശേഷം 2010 ഫെബ്രുവരിയിൽ ഇതിനടുത്ത് കൃഷിഭവന് ശിലാസ്ഥാപനം നടത്തി. കൃഷിഭവനു വേണ്ടി ഒരു ഹാൾ നിർമിച്ച ശേഷം പണികൾ നിലച്ചു. സബ് രജിസ്ട്രാർ ഓഫീസ് കെട്ടിടത്തിന്‍റെ താഴെ നിലയിൽ കൃഷിഭവന്‍റെ പ്രവർത്തനം മാറ്റിയതോടെയാണ് പഞ്ചായത്ത്‌ ഓഫീസിനോട് ചേർന്ന് കൃഷിഭവന് നിർമിച്ചിരുന്ന ഹാൾ വേണ്ടെന്നു വച്ചത്. മൃഗാശുപത്രിയുടെ തൊട്ടടുത്ത് ശുചിത്വ സമുച്ചയവും നിർമിച്ചിരുന്നു. ശബരിമല സീസണിൽ ലേലം ചെയ്താണ് ശുചിത്വ സമുച്ചയം പ്രവർത്തിപ്പിച്ചിരുന്നത്. മൃഗാശുപത്രിയും ഹോമിയോ ഡിസ്‌പെൻസറിയും ശുചിത്വ സമുച്ചയവും കൃഷിഭവനു വേണ്ടി നിർമിച്ച ഹാളും ഉൾപ്പെടെ മൊത്തം പൊളിച്ചുമാറ്റി പുതിയ കെട്ടിട സമുച്ചയം നിർമിക്കാനാണ് ഇപ്പോൾ പദ്ധതി തയാറാക്കിയിരിക്കുന്നത്. മൃഗാശുപത്രി നിർമാണത്തിന് മൃഗസംരക്ഷണ വകുപ്പിൽനിന്ന് ഫണ്ട് അനുവദിക്കുമെന്ന് ഉറപ്പും ലഭിച്ചിരുന്നു.

ഇടശേരി പുരസ്‌കാരം പ്രഖ്യാപിച്ചു

ചങ്ങനാശേരി: കേരള അഡ്വക്കേറ്റ് ക്ലര്‍ക്‌സ് അസോസിയേഷന്‍ സംസ്ഥാന കമ്മറ്റി നല്‍കുന്ന ഇടശേരി പുരസ്‌കാരത്തിന് അമൃത കേളകത്തിന്‍റെ "രണ്ടിലകള്‍ ജീവിക്കാന്‍ തുടങ്ങുമ്പോള്‍’ എന്ന കവിതാ സമാഹാരവും പ്രത്യേക പുരസ്‌കാരത്തിന് അരുണ്‍കുമാര്‍ അന്നൂരിന്‍റെ "ചെറുമന്‍റെ പാട്ട്'എന്ന കവിതാ സമാഹാരവും തെരഞ്ഞെടുക്കപ്പെട്ടു. ആലങ്കോട് ലീലാകൃഷ്ണന്‍, ഡോ. സുരജ, നിസരി മേനോന്‍ എന്നിവര്‍ ചേര്‍ന്നുള്ള സമിതിയാണ് പുരസ്‌കാര ജേതാക്കളെ തെരഞ്ഞെടുത്തത്. മലപ്പുറം ജില്ലയിലെ പൊന്നാനിയില്‍ മരണം വരെ വക്കീല്‍ ഗുമസ്തനായി ജോലി ചെയ്തിരുന്ന മഹാകവി ഇടശേരി ഗോവിന്ദന്‍ നായരുടെ സ്മരണയ്ക്കായാണ് പുരസ്‌കാരം ഏര്‍പ്പെടുത്തിയത്. 2022, 2023, 2024 വര്‍ഷങ്ങളില്‍ പ്രസിദ്ധീകരിച്ച കവിതാ സമാഹാരങ്ങളാണ് പുരസ്‌കാരത്തിനായി ക്ഷണിച്ചിരുന്നത്. 9, 10 തീയതികളില്‍ എറണാകുളം ടൗണ്‍ ഹാളില്‍ നടത്തുന്ന കേരള അഡ്വക്കേറ്റ് ക്ലര്‍ക്‌സ് അസോസിയേഷന്‍ സംസ്ഥാന സമ്മേളനത്തില്‍ മന്ത്രി വി.എന്‍. വാസവന്‍ പുരസ്‌കാരം സമ്മാനിക്കും.

അഖിലഭാരത മഹാവിഷ്ണു സത്രത്തിനു 10ന് തുടക്കം

തൃക്കൊടിത്താനം: മഹാക്ഷേത്രത്തില്‍ 10 മുതല്‍ 17വരെ നടക്കുന്ന അഞ്ചാമത് അഖിലഭാരത പാണ്ഡവീയ മഹാവിഷ്ണു സത്രത്തിനുവേണ്ടി പണികഴിപ്പിച്ച സത്രശാലയുടെ സമര്‍പ്പണം നാളെ 3.30ന് മഹാരാഷ്‌ട്ര ഗവര്‍ണര്‍ സി.പി. രാധാകൃഷ്ണന്‍ നിര്‍വഹിക്കും. പതിനായിരത്തോളം പേര്‍ക്ക് ഇരിക്കാവുന്ന പടുകൂറ്റന്‍ പന്തലാണ് സത്രത്തിനുവേണ്ടി തയാറാക്കിയിട്ടുള്ളത്. തൃച്ചിറ്റാറ്റ്, തൃപ്പുലിയൂര്‍, തിരുവാറന്മുള, തിരുവന്‍വണ്ടൂര്‍ ക്ഷേത്രങ്ങളില്‍ ഓരോ പ്രാവശ്യം സത്രം നടന്നുകഴിഞ്ഞു. അഞ്ചാമത്തെ സത്രമാണ് തൃക്കൊടിത്താനത്തു നടക്കുന്നത്. സത്രം നടന്ന നാലു സ്ഥലങ്ങളിലും ഭക്തജന പങ്കാളിത്തംകൊണ്ട് ശ്രദ്ധനേടി. ദേവസ്വം ബോര്‍ഡിനും കെഎസ്ആര്‍ടിസിക്കും സത്രംകൊണ്ട് വലിയനേട്ടമുണ്ടാക്കാന്‍ കഴിഞ്ഞതായി ഭാരവാഹികള്‍ പറഞ്ഞു. മാത്രമല്ല, ക്ഷേത്രത്തില്‍ അടിയന്തര വികസന പ്രവര്‍ത്തനങ്ങളും നടത്താന്‍ കഴിഞ്ഞിട്ടുണ്ട്. സത്രത്തിനു മുന്നോടിയായി അന്പത്തിയൊന്ന് ദിവസം നീണ്ടുനില്‍ക്കുന്ന നാരായണീയ യജ്ഞം നടന്നുവരികയാണ്.

കത്തോലിക്ക കോണ്‍ഗ്രസ് ജന്മദിനവും സമുദായ സംഗമവും ഇന്ന് മാന്നാനത്ത്

ചങ്ങനാശേരി: അതിരൂപത കത്തോലിക്ക കോണ്‍ഗ്രസിന്‍റെ നേതൃത്വത്തില്‍ സംഘടനയുടെ 107-ാമത് ജന്മദിന സമ്മേളനവും വടക്കന്‍ മേഖല സമുദായ സംഗമവും ഇന്ന് ഉച്ചകഴിഞ്ഞ് രണ്ടിന് മാന്നാനത്ത് നടക്കും. ഗ്ലോബല്‍ സമിതിയുടെ ആഹ്വാനമനുസരിച്ച് ഇന്നു രാവിലെ എല്ലാ യൂണിറ്റുകളിലും പതാക ഉയര്‍ത്തും. ഉച്ചകഴിഞ്ഞ് രണ്ടിനു കത്തോലിക്ക കോണ്‍ഗ്രസ് രൂപമെടുത്ത മാന്നാനത്ത് വിശുദ്ധ ചാവറ കുര്യാക്കോസ് ഏലിയാസച്ചന്‍റെ കബറിടത്തില്‍ അതിരൂപത ഭാരവാഹികള്‍ പുഷ്പാര്‍ച്ചന നടത്തും. പ്രാര്‍ഥനകള്‍ക്ക് ഫാ. കുര്യന്‍ ചാലങ്ങാടി സിഎംഐ നേതൃത്വം നല്‍കും. തു‌ടർന്ന് 2.30ന് മാന്നാനം കെഇ സ്‌കൂളിലെ നിധീരിക്കല്‍ മാണിക്കത്തനാര്‍ നഗറില്‍ ജന്മദിന സമ്മേളനം നടക്കും. അതിരൂപതയുടെ വിവിധ മേഖലകളില്‍നിന്നുള്ള പ്രതിനിധികള്‍ ഈ സമ്മേളനത്തില്‍ പങ്കെടുക്കും. അതിരൂപത പ്രസിഡന്‍റ് ബിജു സെബാസ്റ്റ്യന്‍റെ അധ്യക്ഷതവഹിക്കുന്ന സമ്മേളനം മാര്‍ ജോസഫ് പെരുന്തോട്ടം ഉദ്ഘാടനം ചെയ്യും. അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട്, ഗ്ലോബല്‍ സമിതി പ്രസിഡന്‍റ് രാജീവ് കൊച്ചുപറമ്പില്‍, അതിരൂപത ഡയറക്ടര്‍ ഫാ. സെബാസ്റ്റ്യന്‍ ചാമക്കാല, കെഇ സ്‌കൂള്‍ പ്രിന്‍സിപ്പല്‍ ഫാ. ജയിംസ് മുല്ലശേരി സിഎംഐ, അതിരമ്പുഴ ഫൊറോനാ ഡയറക്ടര്‍ ഫാ. ജോസഫ് ആലുങ്കല്‍, കുടമാളൂര്‍ ഫൊറോന ഡയറക്ടര്‍ ഫാ. ജെന്നി കായംകുളത്തുശേരി, ജനറല്‍ സെക്രട്ടറി ബിനു ഡൊമിനിക്, ട്രഷറര്‍ ജോസ് വെങ്ങാന്തറ, ജിനോ ജോസഫ്, രാജേഷ് നന്തികാട്ട് തുടങ്ങിയവര്‍ പ്രസംഗിക്കും.

ഇന്ത്യന്‍ ഗ്രാമങ്ങളില്‍ ഇപ്പോഴും അടിമവേല: കെ.കെ. ശൈലജ

ചങ്ങനാശേരി: സ്വാതന്ത്ര്യത്തിന്‍റെ 77 വര്‍ഷം പിന്നിട്ടിട്ടും ഇന്ത്യയുടെ ഗ്രാമങ്ങളില്‍ അടിമപ്പണി നടക്കുന്നുണ്ടെങ്കില്‍ രാജ്യത്തെ ഗവണ്‍മെന്റുകള്‍ എന്താണ് ചെയ്യുന്നതെന്ന് സിപിഎം കേന്ദ്ര കമ്മറ്റിയംഗം കെ.കെ. ശൈലജ. സാര്‍വദേശീയ തൊഴിലാളി ദിനത്തോടനുബന്ധിച്ച് സിഐടിയു ചങ്ങനാശേരി ഏരിയ കമ്മിറ്റിയുടെ നേതൃത്വത്തില്‍ നടത്തിയ മെയ്ദിനറാലി ഉദ്ഘാടനം ചെയ്യുകയായിരുന്നു അവര്‍. 2016ലെ കണക്ക് പ്രകാരം 1.96 കോടി അടിമപ്പണി ചെയ്യുന്നവരുണ്ടന്നും പത്തു കൊല്ലംകൊണ്ട് 10,000 പേരെ മോചിപ്പിച്ചുവെന്നും ഇപ്പോഴത്തെസര്‍ക്കാര്‍ പറയുന്നു. ജനാധിപത്യവും, സോഷ്യലിസവും ഭരണഘടനയില്‍ എഴുതി വച്ചിട്ടു കാര്യമില്ലെന്നും ശൈലജ കൂട്ടിച്ചേര്‍ത്തു. സ്വാഗത സംഘം ചെയര്‍മാന്‍ കെ.ഡി സുഗതന്‍ അധ്യക്ഷത വഹിച്ചു. കൃഷ്ണകുമാരി രാജശേഖരന്‍, കെ.സി. ജോസഫ്, ടി.എസ്. നിസ്താര്‍, പി.എ.നിസാര്‍, ടി.പി. അജികുമാര്‍, പി.ആര്‍ അനില്‍ കുമാര്‍ എന്നിവര്‍ പ്രസംഗിച്ചു.

മണ്‍സൂണിനു മുമ്പായി അപകടകരമായ മരങ്ങള്‍ വെട്ടിമാറ്റണം: പൊതുമരാമത്തിനോട് എംഎൽഎ

ചങ്ങനാശേരി: മണ്‍സൂണ്‍ മഴക്കാലം ആരംഭിക്കുന്നതിന് മുമ്പായി അപകടാവസ്ഥയിലുള്ള മരങ്ങള്‍ മുറിച്ചു മാറ്റുന്നതിനുളള അടിയന്തര നടപടി എല്ലാ പഞ്ചായത്തുകളും മുനിസിപ്പാലിറ്റിയും സ്വീകരിക്കണമെന്നും വൈദ്യുത കമ്പികള്‍ക്കുമീതെ വീണുകിടക്കുന്ന മരങ്ങള്‍ നീക്കം ചെയ്യുന്നതിനു പൊതുമരാമത്തുവകുപ്പ് കര്‍ശന നടപടി സ്വീകരിക്കണമെന്നും താലൂക്ക് വികസന സമിതി യോഗത്തില്‍ ജോബ് മൈക്കിള്‍ എംഎല്‍എ നിര്‍ദേശം നല്‍കി. ചങ്ങനാശേരി ബൈപാസ് റോഡ്, ചങ്ങനാശേരി-വാഴൂര്‍ റോഡ്, റെയില്‍വേ ഗുഡ്‌സ് ഷെഡ് റോഡ് തുടങ്ങിയ റോഡുകളുടെ വശങ്ങളില്‍ അപകടാവസ്ഥയിലുള്ള വൃക്ഷങ്ങളും വൃക്ഷ ശിഖരങ്ങളും മുറിച്ചുമാറ്റണമെന്ന് താലൂക്ക് സഭയില്‍ അംഗങ്ങള്‍ ഉന്നയിച്ച ആവശ്യങ്ങളുടേയും മാധ്യമവാര്‍ത്തകളുടേയും അടിസ്ഥാനത്തിലാണ് പൊതുമരാമത്ത് ഉദ്യോഗസ്ഥര്‍ക്ക് എംഎല്‍എ കര്‍ശന നിര്‍ദേശം നല്‍കിയത്. ചങ്ങനാശേി കെഎസ്ആര്‍ടിസി ബസ് സ്റ്റാന്‍ഡിലെ ശൗചാലയങ്ങളില്‍നിന്നുള്ള മലിനജലം പിന്നിലെ റോഡിലൂടെ ഒഴുകുന്നത് തടയാന്‍ അടിയന്തര നടപടി സ്വീകരിക്കണമെന്നും യോഗം ആവശ്യപ്പെട്ടു. സ്‌കൂളുകള്‍ തുറക്കുന്നതിനുമുമ്പ് ഏതെങ്കിലും തരത്തിലുളള പരാതികളോ ആവശ്യങ്ങളോ ഉണ്ടെങ്കില്‍ വിവരം ചങ്ങനാശേരി, കറുകച്ചാല്‍ ഉപജില്ലാ വിദ്യാഭ്യാസ ഓഫീസർമാർ ഈ മാസം 15നുമുമ്പായി എംഎല്‍എയെ അറിയിക്കണം. താലൂക്ക് ആശുപത്രിയില്‍ ഓര്‍ത്തോ വിഭാഗത്തില്‍ വരുന്ന രോഗികളെ കോട്ടയം മെഡിക്കല്‍ കോളജിലേക്ക് റഫര്‍ ചെയ്യുന്നതു സംബന്ധിച്ച പരാതി ലഭിച്ചിട്ടുള്ളതായും ആവശ്യമുള്ള കേസുകള്‍ മാത്രമേ മെഡിക്കല്‍ കോളജിലേക്ക് റഫര്‍ ചെയ്യേണ്ടതുള്ളൂവെന്നും എംഎല്‍എ ആശുപത്രി അധികൃതര്‍ക്കു നിര്‍ദേശം നല്‍കി. നഗരത്തിലെ ചില സ്ഥലങ്ങളില്‍ പഴകിയ മത്സ്യങ്ങളുടെ വില്പന നടക്കുന്നതായും മഴക്കാല മുന്‍കരുതലുകള്‍ വേണമെന്നും യോഗത്തില്‍ നിര്‍ദേശങ്ങള്‍ ഉയര്‍ന്നു. പി.എ. കബീര്‍, ജയിംസ് കലാവടക്കന്‍, ഭൂരേഖ തഹസില്‍ദാര്‍ നിജു കുര്യന്‍, ജൂണിയര്‍ സൂപ്രണ്ട് സിന്ധു എന്നിവര്‍ ചര്‍ച്ചകളില്‍ പങ്കെടുത്തു.

തുരുത്തി-മുളയ്ക്കാംതുരുത്തി റോഡ് നിര്‍മാണം എസ്പിഎല്‍ ഇന്‍ഫ്രാ ലിമിറ്റഡ് കമ്പനിക്ക്

ചങ്ങനാശേരി: തുരുത്തി-മുളയ്ക്കാംതുരുത്തി-വീയപുരം-എടത്വ റോഡിന്‍റെ ടെന്‍ഡര്‍ നടപടികള്‍ പൂര്‍ത്തിയായി. നിര്‍മാണച്ചുമതല എസ്പിഎല്‍ ഇന്‍ഫ്രാ ലിമിറ്റഡ് കമ്പനിക്ക് ലഭിച്ചതായി ജോബ് മൈക്കിള്‍ എംഎല്‍എ അറിയിച്ചു. റീബില്‍ഡ് കേരള ഇനിഷ്യേറ്റീവിന്‍റെ നാലാം പാക്കേജില്‍ ഉള്‍പ്പെടുത്തി ജര്‍മന്‍ ബാങ്കിന്‍റെ ധനസഹായത്തോടുകൂടി കെഎസ്ടിപി മുഖാന്തരം നിര്‍മിക്കുന്ന റോഡിന്‍റെ ടെന്‍ഡര്‍ നടപടികളാണ് പൂര്‍ത്തീകരിച്ചത്. ഭരണാനുമതി ലഭിച്ച 156 കോടി രൂപയില്‍നിന്നും ജിഎസ്ടി തുക ഒഴിവാക്കിയുള്ള 107 കോടി രൂപയുടെ ടെന്‍ഡറാണ് ക്ഷണിച്ചത്. ആധുനികരീതിയില്‍ ബിഎം ആൻഡ് ബിസി നിലവാരത്തില്‍ റോഡ് പുനര്‍നിര്‍മിക്കുന്നതിന് ആവശ്യമായ എല്ലാ ഘടകങ്ങളും പരിശോധിച്ച് കുറ്റമറ്റ രീതിയിലാണ് റോഡ് നിര്‍മിക്കുന്നതിനുള്ള നടപടികള്‍ പൂര്‍ത്തീകരിച്ചിരിക്കുന്നത്. റോഡ് താഴാതിരിക്കാന്‍ കോക്കനട്ട് പൈലിംഗ് റോഡിന്‍റെ ഇരുവശങ്ങളിലും റീടെയിനിംഗ് വാളുകള്‍ നിര്‍മിക്കും. റോഡിന്‍റെ ഉപരിതലം ബലപ്പെടുത്തുന്നതിന് ജിയോ ഗ്രിഡ് സംവിധാനം, കൂടാതെ ഭാരമേറിയ വാഹനങ്ങള്‍ കടന്നുപോകുമ്പോള്‍ റോഡ് താഴ്ന്നു പോകാകാതിരിക്കാന്‍ റോഡ് ബലപ്പെടുത്തുന്നതിനായി തെങ്ങിന്‍കുറ്റികള്‍ ഉപയോഗിച്ചുള്ള കോക്കനട്ട് പൈലിംഗ് എന്നിവ പ്രവൃത്തിയില്‍ ഉള്‍പ്പെടുത്തിയിട്ടുണ്ട്. ഈ റോഡില്‍ നിലവിലുള്ള എല്ലാ കള്‍വര്‍ട്ടുകളും വീതി കൂട്ടി പുനര്‍ നിര്‍മിക്കുന്നതിനും കൃഷിക്കാര്‍ക്ക് കൃഷി ഉപകരണങ്ങള്‍കൊണ്ട് പോകാന്‍ സാധിക്കുന്ന തരത്തില്‍ അമ്പതോളം റാമ്പുകളും നിര്‍മിക്കും. റോഡ് നിര്‍മാണം തുടങ്ങിയിട്ട് നാലുവര്‍ഷക്കാലം ചങ്ങനാശേരി മണ്ഡലത്തിലൂടെ കടന്നുപോകുന്ന പ്രധാന റോഡുകളില്‍ ഒന്നായ തുരുത്തി-മുളയ്ക്കാംതുരുത്തി റോഡിന്‍റെ നിര്‍മാണം റീ ബില്‍ഡ് കേരള ഇന്‍ഷ്യേറ്റീവില്‍ ഉള്‍പ്പെടുത്തി 2021ലാണ് ആരംഭിച്ചത്. നിര്‍മാണത്തിലെ അപാകതകള്‍ മൂലം 2023 ജനുവരിയില്‍ കരാറുകാരനെ സസ്‌പെന്‍ഡ് ചെയ്യേണ്ടിവന്നു. തുടര്‍ന്ന് റോഡ് നിര്‍മാണ പ്രവര്‍ത്തനങ്ങള്‍ മുടങ്ങിക്കിടക്കുകയായിരുന്നു. ഇത് വാഹന സഞ്ചാരികള്‍ക്കും നാട്ടുകാര്‍ക്കും വലിയ ദുരിതത്തിനിടയാക്കി. തുടര്‍ന്ന് ജോബ് മൈക്കിള്‍ എംഎല്‍എയുടെ ശ്രമഫലമായി പഴയ കരാര്‍ റദ്ദാക്കുകയും വീയപുരം മുതല്‍ മുളയ്ക്കാംതുരുത്തി വരെയുള്ള 22 കിലോമീറ്റര്‍ റോഡ് ആധുനികരീതിയില്‍ പുനര്‍നിര്‍മിക്കുന്നതിന് പുതിയ എസ്റ്റിമേറ്റ് തയാറാക്കി ഭരണാനുമതി വാങ്ങുകയുമായിരുന്നു. 18 മാസത്തിനുള്ളില്‍ നിര്‍മാണം പൂര്‍ത്തീകരിക്കും 18 മാസത്തിനുള്ളില്‍ പൂര്‍ത്തീകരിക്കുന്ന തരത്തിലാണ് പ്രവൃത്തികള്‍ ക്രമീകരിച്ചിട്ടുള്ളത്. ഇതോടെ ദീര്‍ഘനാളായ ഈ പ്രദേശത്തെ ജനങ്ങളുടെ യാത്രദുരിതത്തിന് ശാശ്വത പരിഹാരമാവും. 2025 ജനുവരിയില്‍ നടപടികള്‍ ആരംഭിച്ചു. സാങ്കേതിക യോഗ്യതാ പരിശോധന പൂര്‍ത്തീകരിച്ച് ജർമന്‍ ബാങ്കിന്‍റെ അനുമതി ലഭ്യമായശേഷം ടെന്‍ഡര്‍ നടപടികള്‍ പൂര്‍ത്തീകരിച്ചാണ് നിര്‍മാണ ചുമതല എസ്പിഎല്‍ ഇന്‍ഫ്രാ ലിമിറ്റഡ് കമ്പനിക്ക് നല്‍കിയത്. ജോബ് മൈക്കിള്‍ എംഎല്‍എ

ഫിയാത്ത് മിഷന്‍ രാജ്യാന്തര കോണ്‍ഗ്രസ്: ഇന്ന് വൈകുന്നേരം സമാപിക്കും

ചങ്ങനാശേരി: കഴിഞ്ഞ ഏഴുദിവസങ്ങളായി ചെത്തിപ്പുഴ തിരുഹൃദയ പള്ളിയങ്കണത്തിലും ക്രിസ്തുജ്യോതി, പ്ലാസിഡ് സ്‌കൂളുകളിലുമായി നടന്നുവന്ന ഫിയാത്ത് മിഷന്‍ കോണ്‍ഗ്രസിലേക്ക് നാടിന്‍റെ നാനാഭാഗങ്ങളില്‍നിന്നും ഒഴുകിയെത്തിയത് ആയിരങ്ങള്‍. രാജ്യത്തിനകത്തും പുറത്തും സഭ നടത്തിവരുന്ന സാമൂഹ്യ-ജീവകാരുണ്യ ശുശ്രൂഷകളുടെ നേര്‍ക്കാഴ്ചകളാണ് പ്രദര്‍ശനങ്ങളിലും സെമിനാറുകളിലും സമ്മേളനങ്ങളിലും വരച്ചുകാട്ടിയത്. വിവിധ രൂപതകളിലെ മുപ്പതോളം ബിഷപ്പുമാരും നൂറുകണക്കിനു വൈദികരും സന്യസ്തരും അല്മായരും കുട്ടികളും സമ്മേളനങ്ങളിലും പ്രദര്‍ശന സ്റ്റാളുകളിലുമെത്തി. പരിപാടിയുടെ ഭാഗമായി സെന്‍റ് ജോസഫ് കോളജ് ഓഫ് കമ്യൂണിക്കേഷനില്‍ സംഘടിപ്പിച്ച ഇന്‍റര്‍നാഷണല്‍ ഫിലിം ഫെസ്റ്റിവലും നൂറുകണക്കിനാളുകള്‍ പങ്കെടുത്തു. പരിപാടി ഇന്നു സമാപിക്കും. ഇന്നലെ രാവിലെ ചെത്തിപ്പുഴ തിരുഹൃദയ ദേവാലയത്തില്‍ ബിഷപ് ഡോ. ചാക്കോ തോട്ടുമാരിക്കല്‍ ഹിന്ദിയില്‍ ദിവ്യബലിയര്‍പ്പിച്ചു. വിജയപുരം രൂപതയിലെ മിഷന്‍ ലീഗ് അംഗങ്ങള്‍ക്കായുള്ള കൂട്ടായ്മയിലും ബിഷപ് മുഖ്യാതിഥിയായിരുന്നു. വൈകുന്നേരം ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളി ബിഷപ് ഡോ. ചാക്കോ തോട്ടുമാരിക്കല്‍, ബിഷപ് ഡോ. ജോണ്‍ തോമസ്, ബിഷപ് ഡോ. ജോസ് ചിറയ്ക്കല്‍, ഡോ. ജയിംസ് തോപ്പില്‍ എന്നിവര്‍ സന്ദര്‍ശിച്ചു. ഇന്ന് വൈകുന്നേരം ആറിന് ജപമാല റാലി വൈകുന്നേരം ആറിന് ചെത്തിപ്പുഴ തിരുഹൃദയ ദേവാലയത്തില്‍ നിന്ന് ആരംഭിക്കുന്ന ജപമാലറാലി പാറേൽ പള്ളിയിലെത്തി തിരികെ ചെത്തിപ്പുഴ തിരുഹൃദയ ദേവാലയത്തില്‍ സമാപിക്കും. വിവിധ സംസ്ഥാനത്തുനിന്നുള്ളവര്‍ അവിടുത്തെ പരമ്പരാഗത വസ്ത്രങ്ങളിഞ്ഞ് റാലിയില്‍ അണിനിരക്കുന്നത് വിസ്മയക്കാഴ്ചയാകും. അതേത്തുടര്‍ന്ന് അടുത്ത മിഷന്‍ മിഷന്‍ കോണ്‍ഗ്രസിന്‍റെ വേദി പ്രഖ്യാപിക്കുകയും പതാക കൈമാറപ്പെടുകയും ചെയ്യും. മിഷന്‍ എക്‌സിബിഷന്‍ ഇന്ന് രാത്രി ഏഴിന് അസാനിക്കും. തുടര്‍ന്ന് മെന്‍ ഇന്‍ കാസക്‌സ് സംഗീത നിശയും നടക്കും.

മാതൃപൂജ നടത്തി കുരുന്നുകൾ

വൈക്കം: പുതിയ അധ്യയന വർഷത്തിലേക്ക് പദമൂന്നാൻ മാതാവിന് പാദപൂജ ചെയ്ത് കുട്ടികള്‍. പളളിപ്രത്തുശേരി എസ്എന്‍ഡിപി ശാഖയുടെ കീഴിലുളള പഴുതുവളളില്‍ ക്ഷേത്രത്തിലാണ് പുതിയ അധ്യയന വര്‍ഷത്തിലേക്ക് കടക്കുന്ന കുട്ടികൾക്കായി മാതൃപൂജ നടത്തിയത്. ആചാര്യന്‍ കെ.എന്‍. ബാലാജി, ക്ഷേത്രം മേൽശാന്തി ചെമ്മനത്തുകര ഷിബുശാന്തികൾ എന്നിവർ മുഖ്യകാര്‍മികരായിരുന്നു. ക്ഷേത്രത്തിലെ 15-ാമത് ഗുരുദേവ പ്രതിഷ്ഠാ വാര്‍ഷികവും ഗുരുകുലം പഠന കളരിയുടെ ഒന്നാം വാര്‍ഷികവും ഇതോടൊപ്പം നടത്തി. ആര്‍. ശങ്കര്‍ യൂത്ത് മൂവ്‌മെന്‍റിന്‍റെ നേതൃത്വത്തില്‍ ലഹരിവിരുദ്ധ ബോധവത്കരണ പരിപാടിയും ലഹരിവിരുദ്ധ പ്രതിജ്ഞയും നടത്തി. എക്‌സൈസ് പ്രിവന്‍റീവ് ഓഫീസര്‍ അശോക് ബി. നായര്‍ ബോധവത്കരണ ക്ലാസെടുത്തു. ശാഖാ പ്രസിഡന്‍റ് സത്യന്‍ രാഘവന്‍, വൈസ് പ്രസിഡന്‍റ് ആര്‍. മനോജ്, സെക്രട്ടറി വി.ആര്‍. അഖില്‍, ശാഖാ കമ്മിറ്റി അംഗങ്ങൾ, വനിതാ സംഘം പ്രസിഡന്‍റ് സ്മിത മനോജ്, സെക്രട്ടറി രമ ബാബു, യൂത്ത് മൂവ്‌മെന്‍റ് പ്രസിഡന്‍റ് സന്ദീപ് സന്തോഷ്, സെക്രട്ടറി എം. രാധാകൃഷ്ണന്‍ എന്നിവര്‍ നേതൃത്വം നല്‍കി.

വൈക്കം ബോട്ടുജെട്ടി കെട്ടിടം : പുനർനിർമാണ പ്രവൃത്തികൾ പുരോഗമിക്കുന്നു

വൈക്കം: നൂറ്റാണ്ടു പിന്നിട്ട വൈക്കത്തെ പഴയ ബോട്ടുജെട്ടി കെട്ടിടം തനിമ നിലനിർത്തി ചരിത്രസ്മാരകമായി പുനർനിർമിക്കുന്നതിന്‍റെ പണികൾ പുരോഗമിക്കുന്നു . ബോട്ടുജെട്ടിയുടെ നവീകരണത്തിനായി 25 ലക്ഷം രൂപയാണ് എസ്റ്റിമേറ്റ് തുക. ബോട്ടുജെട്ടി കെട്ടിടത്തിന്‍റെ പഴയ രൂപത്തിനു മാറ്റംവരുത്താതെയാണ് നിർമാണ പ്രവർത്തനങ്ങൾ നടന്നു വരുന്നത്. ഓഗസ്റ്റ് ആദ്യ ആഴ്ച പണികൾ പൂർത്തിയാക്കാനാണ് അധികൃതർ ശ്രമം നടത്തിവരുന്നത്. ബോട്ടുജെട്ടിയുടെ നവീകരണത്തിനായി ആദ്യഘട്ടം 42 ലക്ഷം രൂപ അനുവദിച്ചിരുന്നു. ഈ തുക വിനിയോഗിച്ചാണ് കരിങ്കൽക്കെട്ട് ബലപ്പെടുത്തുകയും നീണ്ട പ്ലാറ്റ്ഫോം വീതി കൂട്ടിപ്പണിത് ടൈൽ പാകുകയും ചെയ്തത്. കെട്ടിടത്തിന്‍റെ മേൽക്കൂരയുടെ ആസ്ബറ്റോസ് മാറ്റാൻ ശ്രമം ആരംഭിച്ചപ്പോൾ നാട്ടുകാർ എതിർപ്പുമായി എത്തിയതോടെ പണി നിലച്ചു. പിന്നീട് തനിമ നിലനിർത്തി ബോട്ടുജെട്ടി പുനർനിർമിക്കാൻ 25 ലക്ഷം രൂപയുടെ എസ്റ്റിമേറ്റിന് സർക്കാർ അംഗീകാരം നൽകുകയായിരുന്നു. വൈക്കം സത്യഗ്രഹത്തിൽ പങ്കെടുക്കാനായി വന്ന മഹാത്മജി അടക്കമുള്ള നേതാക്കൾ ബോട്ടു മാർഗമെത്തി വൈക്കം ജെട്ടിയിലാണ് ഇറങ്ങിയത്. ബോട്ടുജെട്ടി ചരിത്രസ്മാരകമായി പുനർനിർമിക്കണമെന്ന് ജനങ്ങൾ ഏറെക്കാലമായി ആവശ്യപ്പെട്ടു വരികയായിരുന്നു.

വിംസി വണ്ടേഴ്‌സ് ജലച്ചായ ചിത്രപ്രദര്‍ശനം ഇന്നു മുതല്‍

കോട്ടയം: 16 ചിത്രകാരന്മാരും 10 ചിത്രകാരികളും പങ്കെടുക്കുന്ന വിംസി വണ്ടേഴ്‌സ് ജലച്ചായ ചിത്രപ്രദര്‍ശനം ഇന്നു ഡിസി കിഴക്കേമുറിയിടത്തിലുള്ള ലളിതകലാ അക്കാഡമി ആര്‍ട്ട് ഗാലറിയില്‍ ആരംഭിക്കും. കോട്ടയം ആര്‍ട്ട് ഫൗണ്ടേഷന്‍റെ ആഭിമുഖ്യത്തില്‍ നടക്കുന്ന പ്രദര്‍ശനം കെ.സി. ജോസഫ് ഉദ്ഘാടനം ചെയ്യും. സംസ്‌കാര സാഹിതി സംസ്ഥാന വര്‍ക്കിംഗ് പ്രസിഡന്‍റ് എന്‍.പി. പ്രദീപ്കുമാര്‍ അധ്യക്ഷത വഹിക്കും. ജവഹര്‍ ബലഭവന്‍ ഡയറക്ടര്‍ വി. ജയകുമാര്‍, മാവേലിക്കര രാജാ രവിവര്‍മ കോളജ് ഓഫ് ഫൈന്‍ ആര്‍ട്‌സ് പെയിന്‍റിംഗ് വിഭാഗം തലവന്‍ ലിന്‍സി സാമുവല്‍, കോട്ടയം ആര്‍ട്ട് ഫൗണ്ടേഷന്‍ പ്രസിഡന്‍റ് ടി.ആര്‍. ഉദയകുമാര്‍, സെക്രട്ടറി മിനി ശര്‍മ, ചിത്രകാരന്മാരായ പ്രമോദ് കൂരമ്പാല, ടി.ആര്‍. രാജേഷ് തുടങ്ങിവര്‍ പങ്കെടുക്കും. എം.എസ്. വിനോദ്, ഗോപി സംക്രമണം, മനോജ് തോപ്പില്‍, മനു, കെ.ജി. സുനില്‍, ടെന്‍സി ജോസഫ്, ശ്രീജ പള്ളം, എന്‍.ബി. ലതാദേവി, സീമ നടരാജന്‍, ധന്യാ ലോഹി, ലേഖ ടി. പുഷ്പപിള്ള, ശുഭ എസ്. നാഥ്, ഗ്രേസി ഫിലിപ്പ്, ജോബി രവീന്ദ്രന്‍, ജോണ്‍ ജോസഫ് ഉള്‍പ്പെടയുള്ളവരാണ് പ്രദര്‍ശനത്തില്‍ പങ്കെടുക്കുന്നത്.

ചങ്ങനാശേരി അതിരൂപത 139-ാമത് ദിനാഘോഷം 20ന്

മെത്രാപ്പോലീത്തന്‍ പള്ളിയില്‍ ഒരുക്കങ്ങള്‍ പുരോഗമിക്കുന്നു ചങ്ങനാശേരി: ചങ്ങനാശേരി അതിരൂപത 139-ാമത് ദിനാഘോഷം 20നു രാവിലെ 9.30 മുതല്‍ 1.30 വരെ ചങ്ങനാശേരി മെത്രാപ്പോലീത്തന്‍ പള്ളിയിലെ കര്‍ദിനാള്‍ മാര്‍ ആന്‍റണി പടിയറ നഗറില്‍ നടക്കും. കേരളത്തിലെ അഞ്ച് ജില്ലകളില്‍ മുന്നൂറോളം ഇടവകകളിലായി എണ്‍പതിനായിരത്തോളം കുടുംബങ്ങളിലെ അഞ്ചുലക്ഷത്തോളം വരുന്ന വിശ്വാസികളുടെ പ്രതിനിധികളും വൈദികരും സന്യസ്ത പ്രതിനിധികളും പരിപാടികളില്‍ പങ്കെടുക്കും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. സംഗമത്തില്‍ അഭിവന്ദ്യ പിതാക്കന്മാരും മറ്റ് വിശിഷ്ട വ്യക്തികളും സന്ദേശങ്ങള്‍ നല്‍കും. അതിരൂപത നല്കുന്ന പരമോന്നത ബഹുമതിയായ എക്‌സലന്‍സ് അവാര്‍ഡ് അന്നു സമ്മാനിക്കും. തങ്ങളുടെ പ്രത്യേകമായ ഇടപെടല്‍കൊണ്ട് സഭയിലും സമൂഹത്തിലും ശ്രദ്ധേയമായ സംഭാവനകള്‍ നല്കിയവരെയും സംസ്ഥാന ദേശീയ അന്തര്‍ദേശീയ തലങ്ങളില്‍ അംഗീകാരം നേടിയ അതിരൂപതാംഗങ്ങളെയും പ്രത്യേകമായി ആദരിക്കും. അതിരൂപതയെ സംബന്ധിക്കുന്ന വിവിധ പ്രഖ്യാപനങ്ങളും അന്നു നടക്കും. 18ന് ഇടവകതല ആഘോഷങ്ങള്‍ അതിരൂപതാദിനത്തിന് മുന്നോടിയായി 18ന് അതിരൂപതയിലെ എല്ലാ പള്ളികളിലും ഇടവകതല ആഘോഷങ്ങള്‍ നടക്കും. അന്ന് ആഘോഷമായ വിശുദ്ധ കുര്‍ബാനയ്ക്കുശേഷം അതിരൂപത ദിനം വിളംബരം ചെയ്ത് പേപ്പല്‍ പതാക ഉയര്‍ത്തുകയും അതിരൂപത ആന്തം ആലപിക്കുകയും അതിരൂപതാദിന പ്രതിജ്ഞ ചൊല്ലുകയും ചെയ്യും. 19ന് ഛായാചിത്ര, ദീപശിഖാ പ്രയാണങ്ങള്‍ 19ന് കര്‍ദിനാള്‍ മാര്‍ ആന്‍റണി പടിയറയുടെ മാതൃ ഇടവകയായ മണിമല സെന്‍റ് ബേസില്‍ പള്ളിയില്‍നിന്നു ഛായാചിത്രപ്രയാണവും ധന്യന്‍ മാര്‍ തോമസ് കുര്യാളശേരി യുടെ കബറിടത്തിങ്കല്‍നിന്നു ദീപശിഖാ പ്രയാണവും അതിരൂപത യുവദീപ്തി എസ്എംവൈഎം, മിഷന്‍ ലീഗ് എന്നീ സംഘടനകളുടെ ആഭിമുഖ്യത്തില്‍ ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയിലേക്കു ക്രമീകരിച്ചിട്ടുണ്ട്. തുടര്‍ന്ന് ആഘോഷമായ സായാഹ്ന പ്രാര്‍ഥന. പരിപാടികളുടെ വിജയത്തിനായി അതിരൂപതാദിന ജനറല്‍ കണ്‍വീനര്‍ മോണ്‍. ആന്‍റണി എത്തയ്ക്കാട്ട്, മെത്രാപ്പോലീത്തന്‍ പള്ളി വികാരി ഫാ. ജോസഫ് വാണിയപ്പുരയ്ക്കല്‍, കോഓര്‍ഡിനേറ്റര്‍ ഫാ. ജോബിന്‍ ആനക്കല്ലുങ്കല്‍ എന്നിവരുടെ നേതൃത്വത്തില്‍ വിവിധ കമ്മിറ്റികള്‍ പ്രവര്‍ത്തിച്ചുവരുന്നു.

കൈപ്പുഴ പള്ളി തിരുനാളിന് കൊടിയേറി

കൈപ്പുഴ: സെന്‍റ് ജോർജ് ക്നാനായ കത്തോലിക്ക ഫൊറോനാ പള്ളിയിൽ ഇടവക മധ്യസ്ഥനായ വിശുദ്ധ ഗീവർഗീസ് സഹദായുടെ തിരുനാളിന് കൊടിയേറി. വികാരി ഫാ. സാബു മാലിത്തുരുത്തേൽ കൊടിയേറ്റ് നിർവഹിച്ചു. തുടർന്ന് വികാരി ജനറാൾ ഫാ. തോമസ് ആനിമൂട്ടിലിന്‍റെ കാർമികത്വത്തിൽ കുട്ടികളുടെ പ്രഥമ ദിവ്യകാരുണ്യ സ്വീകരണം നടത്തി. വൈകുന്നേരം ഭക്തിനിർഭരമായ പ്രദക്ഷിണം നടത്തി. ഇന്നു രാവിലെ 6.30നു വിശുദ്ധ കുർബാന, 9.30ന് റാസ: കാർമികൻ-ഫാ. ഫിലിപ്പ് കൊച്ചുപറമ്പിൽ. സഹകാർമികർ- ഫാ. ഫിൽമോൻ കുളത്ര, ഫാ. ജിബിൻ കീച്ചേരിൽ, ഫാ. ആൽബിൻ പുത്തൻപറമ്പിൽ, ഫാ ജോർജ്കുട്ടി താന്നിച്ചുവട്ടിൽ. പ്രസംഗം: ഫാ. സൈമൺ പുല്ലാട്ട്. 12.30ന് വിശുദ്ധ കുർബാനയുടെ ആശീർവാദം. 12.45ന് പ്രദക്ഷിണം: ഫാ. അലക്സ‌് നൂറ്റിയാനിക്കുന്നേൽ. തുടർന്ന് ഊട്ടുനേർച്ച.

പുതുപ്പള്ളി പെരുന്നാൾ: സാംസ്‌കാരിക സമ്മേളനം ഇന്ന്

പുതുപ്പള്ളി: സെന്‍റ് ജോര്‍ജ് ഓര്‍ത്തഡോക്സ് പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിനോടനുബന്ധിച്ചുള്ള സാംസ്‌കാരിക സമ്മേളനം ഇന്നും തീര്‍ഥാടന സംഗമം നാളെയും നടക്കും. ഇന്നു രാവിലെ എട്ടിന് ഡോ. യൂഹാനോന്‍ മാര്‍ ദീയസ്‌കോറോസിന്‍റെ മുഖ്യകാര്‍മികത്വത്തില്‍ വിശുദ്ധ മൂന്നിന്മേല്‍ കുര്‍ബാന. 11നു സാംസ്‌കാരിക സമ്മേളനം. ഡോ. യുഹാനോന്‍ മാര്‍ ദിയസ്‌കോറസ് അധ്യക്ഷത വഹിക്കും. മഹാരാഷ്ട്ര ഗവര്‍ണര്‍ സി.പി. രാധാകൃഷ്ണന്‍ ഉദ്ഘാടനം ചെയ്യും. മന്ത്രി വി.എന്‍. വാസവന്‍ മുഖ്യസന്ദേശം നല്‍കും. പുതുപ്പള്ളി പള്ളി നല്‍കുന്ന ഓര്‍ഡര്‍ ഓഫ് സെന്‍റ് ജോര്‍ജ് അവാര്‍ഡ് ഓര്‍ത്തഡോക്സ് സഭയിലെ കുര്യാക്കോസ് മാര്‍ ക്ലീമിസ് മെത്രാപ്പോലീത്തയ്ക്ക് ഗവര്‍ണര്‍ നല്‍കും. ഫ്രാന്‍സിസ് ജോര്‍ജ് എംപി, തിരുവഞ്ചൂര്‍ രാധാകൃഷ്ണന്‍ എംഎല്‍എ, ചാണ്ടി ഉമ്മന്‍ എംഎല്‍എ, വൈദിക ട്രസ്റ്റി ഫാ. തോമസ് വര്‍ഗീസ് അമയില്‍ എന്നിവര്‍ പ്രസംഗിക്കും. മേയ് അഞ്ച് മുതല്‍ ഏഴുവരെയാണു പ്രധാന പെരുന്നാള്‍. നാളെയാണ് തീര്‍ഥാടന സംഗമം. വൈകുന്നേരം കൊച്ചാലുംമൂട് ഓര്‍ത്തഡോക്‌സ് സെന്‍റര്‍, കൈമറ്റം ചാപ്പല്‍, പാറക്കല്‍ കടവ്, കാഞ്ഞിരത്തിന്‍മൂട്, വെട്ടത്തുകവല, കൊച്ചക്കാല എന്നീ കുരിശുപള്ളികളില്‍ സന്ധ്യനമസ്‌കാരത്തിനുശേഷം പള്ളിയിലേക്ക് പ്രദക്ഷിണം. റാസയ്ക്കുശേഷം രാത്രി 8.30 മുതല്‍ ആകാശവിസ്മയം.

ബോണ്ടിംഗ് ഫാമിലീസ് പദ്ധതി ലോഗോ പ്രകാശനം ചെയ്തു

കോട്ടയം: സാമൂഹ്യതിന്മകള്‍ക്കെതിരേ അവബോധത്തോടൊപ്പം സഹായഹസ്തവും ഒരുക്കുവാന്‍ കോട്ടയം അതിരൂപതയുടെ നേതൃത്വത്തില്‍ വിഭാവനം ചെയ്ത ബോണ്ടിംഗ് ഫാമിലീസ് പദ്ധതിയുടെ ലോഗോ പ്രകാശനം ചെയ്തു. തെള്ളകം ചൈതന്യയില്‍ സംഘടിപ്പിച്ച ചടങ്ങില്‍ ലോഗോ പ്രകാശനം മന്ത്രി രാമചന്ദ്രന്‍ കടന്നപ്പള്ളി നിര്‍വഹിച്ചു. സംസ്ഥാന ന്യൂനപക്ഷ വികസന ധനകാര്യ കോര്‍പറേഷന്‍ ചെയര്‍മാന്‍ സ്റ്റീഫന്‍ ജോര്‍ജ്, സൊസൈറ്റി എക്‌സിക്യൂട്ടീവ് ഡയറക്ടര്‍ ഫാ. സുനില്‍ പെരുമാനൂര്‍, ചൈതന്യ പ്രോഗ്രാം കോ-ഓര്‍ഡിനേറ്റര്‍ സിസ്റ്റര്‍ ഷീബ എസ്‌വിഎം, സിജോ തോമസ്, ഫെലിക്‌സ് സിറിയക് എന്നിവര്‍ പ്രസംഗിച്ചു. അതിരൂപതയുടെ സാമൂഹ്യസേവന വിഭാഗമായ കോട്ടയം സോഷ്യല്‍ സര്‍വീസ് സൊസൈറ്റിയുടെയും അമേരിക്കയിലെ ക്‌നാനായ കാത്തലിക് റീജിയന്‍റെ ബോണ്ടിംഗ് ഫാമിലീസ് സംഘടനയുടെയും പങ്കാളിത്തത്തോടെയാണ് പദ്ധതി നടപ്പാക്കുന്നത്. പദ്ധതിയുടെ ഉദ്ഘാടനം ആറിനു രാവിലെ 10.30ന് തെള്ളകം ചൈതന്യ പാസ്റ്ററല്‍ സെന്‍ററില്‍ കോട്ടയം ആർച്ച്ബിഷപ് മാര്‍ മാത്യു മൂലക്കാട്ട് നിര്‍വഹിക്കും. വികാരി ജനറാള്‍ ഫാ. തോമസ് ആനിമൂട്ടില്‍ ചടങ്ങില്‍ അധ്യക്ഷത വഹിക്കും. ചിക്കാഗോ രൂപത വികാരിജനറാള്‍ ഫാ. തോമസ് മുളവനാല്‍ അനുഗ്രഹ പ്രഭാഷണം നടത്തും. അതിരൂപതയിലെ സന്യാസ സമൂഹ പ്രതിനിധികളും ജനപ്രതിനിധികളും ചടങ്ങില്‍ പങ്കെടുക്കും.

മണ്ണാർകുന്ന് സെന്‍റ് ഗ്രിഗോറിയോസ് പള്ളി ശതാബ്ദി ആഘോഷ സമാപനം ഇന്ന്

അതിരമ്പുഴ: മണ്ണാർകുന്ന് സെന്‍റ് ഗ്രിഗോറിയോസ് പള്ളിയുടെ ഒരു വർഷം നീണ്ട ശതാബ്ദിയാഘോഷങ്ങൾ ഇന്നു സമാപിക്കും. ഇന്നു വൈകുന്നേരം നാലിന് ചങ്ങനാശേരി അതിരൂപത വികാരി ജനറാൾ മോൺ. സ്കറിയ കന്യാകോണിലിന്‍റെ മുഖ്യകാർമികത്വത്തിൽ വിശുദ്ധ കുർബാന. മണ്ണാർകുന്ന് ഇടവകാംഗങ്ങളായ വൈദികർ സഹകാർമികരാകും. വൈകുന്നേരം ആറിന് ചങ്ങനാശേരി അതിരൂപതാധ്യക്ഷൻ മാർ തോമസ് തറയിലിന്‍റെ അധ്യക്ഷതയിൽ നടക്കുന്ന ശതാബ്ദി സമാപന സമ്മേളനം കേന്ദ്രമന്ത്രി ജോർജ് കുര്യൻ ഉദ്ഘാടനം ചെയ്യും. മന്ത്രി വി.എൻ. വാസവൻ മുഖ്യപ്രഭാഷണം നടത്തും. ആർച്ച്ബിഷപ് മാർ ജോസഫ് പെരുന്തോട്ടം ശതാബ്ദി സ്മരണികയും ശാന്തിഗിരി ആശ്രമം ജനറൽ സെക്രട്ടറി സ്വാമി ഗുരുരത്നം ജ്ഞാനതപസ്വി ‘സ്നേഹ വഴിയിൽ ഒരു ദേവാലയം’ ഡോക്യുമെന്‍ററിയും പ്രകാശനം ചെയ്യും. ഫ്രാൻസിസ് ജോർജ് എംപി, അതിരമ്പുഴ ഫൊറോനാ വികാരി റവ. ഡോ. ജോസഫ് മുണ്ടകത്തിൽ, മാന്നാനം കെഇ സ്കൂൾ പ്രിൻസിപ്പൽ ഫാ. ജയിംസ് മുല്ലശേരി സിഎംഐ, അതിരമ്പുഴ പഞ്ചായത്ത് പ്രസിഡന്‍റ് ജോസ് അമ്പലക്കുളം, ജില്ലാ പഞ്ചായത്ത് മെംബർ ഡോ. റോസമ്മ സോണി, എഫ്സിസി ചങ്ങനാശേരി ദേവമാതാ പ്രൊവിൻസിന്‍റെ പ്രൊവിൻഷ്യൽ സിസ്റ്റർ ബ്രിജി എഫ്സിസി, മണ്ണാർകുന്ന് പള്ളി വികാരി ഫാ. ഏബ്രഹാം തർമശേരി, ഇടവക വൈദികരുടെ പ്രതിനിധി ഫാ. മാത്യു കാഞ്ഞിരംകാല, ജനറൽ കൺവീനർ എൽ.വി. ജോമോൻ ളാപ്പള്ളി എന്നിവർ പ്രസംഗിക്കും. ശതാബ്ദി സമാപന പരിപാടികളുടെ ഭാഗമായി തലപ്പള്ളിയായ അതിരമ്പുഴ സെന്‍റ് മേരീസ് ഫൊറോനാ പള്ളിയിൽനിന്ന് മണ്ണാർകുന്ന് പള്ളിയിലേക്ക് വികാരി ഫാ. ഏബ്രഹാം തർമശേരിയുടെ നേതൃത്വത്തിൽ വിശ്വാസ പ്രഘോഷണ റാലി നടത്തി. അതിരമ്പുഴ പള്ളി വികാരി റവ. ഡോ. ജോസഫ് മുണ്ടകത്തിൽ ഫ്ളാഗ് ഓഫ് ചെയ്തു. ശതാബ്ദി സ്മാരകമായി നിർമിച്ച ഗ്രോട്ടോയുടെ ആശീർവാദവും നടത്തി. കുടിൽരഹിത ഇടവകയായി മണ്ണാർകുന്ന് ഇടവകയെ മാറ്റാനുള്ള പദ്ധതി ശതാബ്ദിയോടനുബന്ധിച്ച് ആവിഷ്കരിച്ചിട്ടുണ്ട്. ഈ പദ്ധതിയിൽ പൂർത്തിയാക്കിയ വീടുകളുടെ താക്കോൽ ദാനവും ഇന്നു നടക്കും.

റെയില്‍പാത ഇരട്ടിപ്പിക്കൽ : നഗരസഭ വിട്ടുകൊടുത്ത ഭൂമിയുടെ നഷ്ടപരിഹാരം കൈപ്പറ്റാനാകാത്തത് വിവാദമാകുന്നു

കോട്ടയം: കോട്ടയംവഴി കടന്നുപോകുന്ന മുളന്തുരുത്തി-ചെങ്ങന്നൂര്‍ റെയില്‍പാത ഇരട്ടിപ്പിക്കലിന്‍റെ ഭാഗമായി റെയില്‍വേയ്ക്ക് വിട്ടുകൊടുത്ത വസ്തുക്കളുടെ നഷ്ടപരിഹാരത്തുകയായ 6.67 കോടി രൂപ കോട്ടയം നഗരസഭയ്ക്ക് ഇപ്പോഴും കൈപ്പറ്റാനാകാത്തത് വിവാദമാകുന്നു. വസ്തുക്കളുടെ ഉടമസ്ഥാവാകാശം തെളിയിക്കുന്നതിനുള്ള രേഖകള്‍ ഹാജരാക്കാന്‍ നഗരസഭയ്ക്ക് കഴിയാത്തതിനാലാണ് തുക ലഭ്യമാകാത്തതെന്ന് 2023-24 വര്‍ഷത്തെ ഓഡിറ്റ് റിപ്പോര്‍ട്ടില്‍ പറയുന്നു. കാലതാമസം ഒഴിവാക്കി നടപടികള്‍ ത്വരിതപ്പെടുത്തണമെന്നും ഓഡിറ്റ് റിപ്പോര്‍ട്ടില്‍ നിര്‍ദേശമുണ്ട്. ഏഴ് സര്‍വേ നമ്പറുകളില്‍പ്പെട്ട ഭൂമിയാണ് റെയില്‍വേ ഏറ്റെടുത്തത്. അഡീഷണല്‍ ജില്ലാ കോടതിയില്‍ (സ്‌പെഷല്‍) കെട്ടിവച്ചിരിക്കുകയാണ് തുക. രേഖകള്‍ ഹാജരാക്കിയാലേ തുക വിട്ടുകിട്ടൂ. എന്നാല്‍, വസ്തുക്കളുടെ ഉടമസ്ഥാവകാശം തെളിയിക്കുന്ന രേഖകളൊന്നും നഗരസഭയിലില്ല. 2023ലെ കൗണ്‍സില്‍ തീരുമാനം അനുസരിച്ച് പഴയ മിനിറ്റ്‌സ് ബുക്കും കേസ് രേഖകളും ആര്‍ക്കിയോളജി വകുപ്പില്‍നിന്നു ലഭ്യമാക്കാന്‍ ആവശ്യപ്പെട്ടെങ്കിലും അക്കാലത്തെ മിനിറ്റ്‌സ് ലഭ്യമായില്ല. ഒരു സര്‍വേ നമ്പറിലുള്‍പ്പെട്ട ഭൂമിയുടെ വിവരം മാത്രമാണ് പഴയ ആസ്തി രജിസ്റ്ററില്‍നിന്നു ലഭ്യമായത്. റെയില്‍പാത ഇരട്ടിപ്പിക്കല്‍ നഷ്ടപരിഹാരത്തുക പുനര്‍നിര്‍ണയിക്കുന്നതിന് 2024 മാര്‍ച്ചില്‍ എല്‍എ സ്‌പെഷല്‍ തഹസില്‍ദാരുടെ കാര്യാലയത്തില്‍ നടത്തിയ ഹിയറിംഗില്‍ രേഖകള്‍ 2024 ഫെബ്രുവരിയില്‍ ഹാജരാക്കാന്‍ ആവശ്യപ്പെട്ടിരുന്നെങ്കിലും തുടര്‍നടപടിയുണ്ടായിട്ടില്ല. ഓഡിറ്റ് റിപ്പോര്‍ട്ട് പുറത്തുവന്നതോടെ സംഭവം വിവാദമായിരിക്കുകയാണ്. നഗരസഭയുടെ കെടുകാര്യസ്ഥതയ്‌ക്കെതിരേ പ്രതിഷേധം നടത്തിവരുന്ന എല്‍ഡിഎഫ് ഈ വിഷയം ശക്തമായി ഉന്നയിക്കാനൊരുങ്ങുകയാണ്. അതേസമയം, ആവശ്യമായ രേഖകള്‍ ഉടന്‍ സമര്‍പ്പിച്ച് നഷ്്ടപരിഹാരത്തുക ഈടാക്കാനുള്ള നടപടികള്‍ ആരംഭിച്ചതായി നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ പറഞ്ഞു. കൗണ്‍സിലര്‍മാരുമായി വാക്കേറ്റം: യോഗത്തില്‍നിന്ന് ചെയര്‍പേഴ്‌സണ്‍ ഇറങ്ങിപ്പോയി കോട്ടയം: നഗരസഭ അടിയന്തര കൗണ്‍സില്‍ യോഗത്തില്‍ കൗണ്‍സിലര്‍മാരുമായി വാക്കേറ്റമുണ്ടായതിനെത്തുടര്‍ന്ന് ചെയര്‍പേഴ്‌സൺ‍ ഇറങ്ങിപ്പോയി. കുടുംബശ്രീ യോഗത്തിനിടെ പ്രസംഗം നിര്‍ത്താന്‍ പരസ്യമായി ആവശ്യപ്പെട്ടെന്ന ക്ഷേമകാര്യ സ്റ്റാന്‍ഡിംഗ് സമിതി ചെയര്‍പേഴ്‌സണ്‍ ദീപാമോളുടെ ആരോപണമാണ് ചെയര്‍പേഴ്‌സണ്‍ ബിന്‍സി സെബാസ്റ്റ്യനെ ചൊടിപ്പിച്ചത്. ഇതോടെ കൗണ്‍സില്‍ യോഗം അവസാനിപ്പിച്ചതായി പ്രഖ്യാപിച്ച് ബിന്‍സി സെബാസ്റ്റ്യന്‍ കാബിനിലേക്കു മടങ്ങുകയായിരുന്നു. കൈക്കൂലി വാങ്ങുന്നതായി ആരോപണം ഉയര്‍ന്ന ഓവര്‍സിയറെ ചെയര്‍പേഴ്‌സണ്‍ സംരക്ഷിക്കുകയാണെന്ന ഭരണപക്ഷ കൗണ്‍സിലര്‍ എം.എ. ഷാജിയുടെ പരാതിയും കൗണ്‍സിലിനെ ബഹളമയമാക്കി. കുടുംബശ്രീ യോഗത്തില്‍ ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ദീപമോള്‍ സംസാരിക്കുന്നതു വിലക്കിയെന്ന വിഷയം പ്രതിപക്ഷ നേതാവ് ഷീജ അനിലാണ് ഉന്നയിച്ചത്. ഇതേച്ചൊല്ലി ഏറെനേരം ഷീജ അനിലും ചെയര്‍പേഴ്‌സണും തമ്മില്‍ വാക്കേറ്റമുണ്ടായി. ചെയര്‍പേഴ്‌സണ് അസഹിഷ്ണുതയാണെന്നും ഷീജ അനില്‍ ആരോപിച്ചു. അവസാനം ബിന്‍സി സെബാസ്റ്റ്യന്‍ ഇറങ്ങിപ്പോവുകയായിരുന്നു.

സ്‌പ്രെയിംഗ്, മഴമറ സബ്‌സിഡിക്കു തുടക്കമായി

കോട്ടയം: റബര്‍ കര്‍ഷകര്‍ക്ക് സ്‌പ്രെയിംഗിനും മഴമറയ്ക്കും ഹെക്ടറൊന്നിന് നാലായിരം രൂപ വീതം സബ്‌സിഡി നല്‍കുന്ന റബര്‍ ബോര്‍ഡ് സ്‌കീമിന് ആര്‍പിഎസുകള്‍ മുഖേന തുടക്കമായി. പരമാവധി രണ്ടു ഹെക്ടറിന് വരെ (എണ്ണായിരം രൂപ) സബ്‌സിഡി ലഭിക്കും. ഒരു മരത്തിന് മഴമറ വയ്ക്കാന്‍ 35 രൂപ ചെലവു വരും. ഇത്തരത്തില്‍ ഒരു ഹെക്ടറിന് 13,500 രൂപ മുടക്കണം. ഇതില്‍ നാലായിരം രൂപ പിന്നീട് സബ്‌സിഡിയായി ലഭിക്കുമെന്നതാണ് കര്‍ഷകര്‍ക്ക് ആശ്വാസം. ഒക്‌ടോബര്‍ അവസാനം വരെ സബ്‌സിഡി സ്‌കീമില്‍ ആര്‍പിഎസുകള്‍ മുഖേന അപേക്ഷ നല്‍കാം. കരം അടച്ച രതീസും കാര്‍ഷിക സാമഗ്രികള്‍ വാങ്ങിയ ബില്ലും സമര്‍പ്പിക്കണം. ഇതേ പദ്ധതിയില്‍ കഴിഞ്ഞ വര്‍ഷത്തെ അപേക്ഷകര്‍ക്കുള്ള സബ്‌സിഡി വിതരണം കഴിഞ്ഞയാഴ്ച പൂര്‍ത്തിയായി. പരമാവധി ഉത്പാദനം വര്‍ധിപ്പിക്കാനുള്ള ഊര്‍ജിതശ്രമത്തിന്‍റെ ഭാഗമായാണ് ഇക്കൊല്ലവും സബ്‌സിഡി നല്‍കുന്നത്. സ്‌പ്രെയിംഗ് നടത്തിയാല്‍ ഇലകൊഴിച്ചില്‍ കുറഞ്ഞ് 20 ശതമാനം വരെ ഉത്പാദനം വര്‍ധിക്കുമെന്നാണ് വിലയിരുത്തല്‍. മഴമറ വച്ചാല്‍ മഴക്കാലത്തും ടാപ്പിംഗ് തുടരാം. ഇത്തരത്തില്‍ വാര്‍ഷിക ഉത്പാദനം 20 ശതമാനം ഉത്പാദനവര്‍ധനയാണ് കണക്കുകൂട്ടുന്നത്. ചില ഉത്പാദകസംഘങ്ങള്‍ പ്ലാസ്റ്റിക്, പശ, ബെല്‍റ്റ് എന്നിവ വാങ്ങി കൃഷിക്കാര്‍ക്ക് വിതരണം ചെയ്യുന്നുണ്ട്. ബില്ല് സംഘം ബോര്‍ഡിന് നല്‍കി അവര്‍ക്ക് പണം നല്‍കുന്ന രീതിയായിരുന്നു. സാധനങ്ങള്‍ കുറഞ്ഞ വിലയ്ക്ക് ഒരുമിച്ചു വാങ്ങി കര്‍ഷകര്‍ക്ക് നല്‍കുന്ന സംഘങ്ങളുണ്ട്. തൊഴിലാളി ക്ഷാമം രൂക്ഷമായതോടെ ചില സംഘങ്ങള്‍ സ്‌പ്രെയിംഗ് നടത്തിക്കൊടുക്കുന്നു. മഴമറ വച്ചുകൊടുക്കുന്ന ആര്‍പിഎസുകളുമുണ്ട്. കഴിഞ്ഞ വര്‍ഷം 250 രൂപ വരെ ഉയര്‍ന്ന ഷീറ്റുവില പിന്നീട് 170 രൂപയിലേക്ക് താഴ്ന്നു. കഴിഞ്ഞമാസം വീണ്ടും 200 രൂപ കടന്നെങ്കിലും അമേരിക്കയുടെ പകരച്ചുങ്കം വന്നതോടെ വില താഴ്ന്നു. നിലവില്‍ 199 രൂപയാണ് ആര്‍എസ്എസ് നാല് ഗ്രേഡിന് വില. വിദേശത്തും ഇതേ നിരക്കിലാണ് വില. അടുത്ത മാസത്തോടെ റബര്‍ വിലയില്‍ നേരിയ ഉയര്‍ച്ചയുണ്ടാകുമെന്നാണ് വിപണി സൂചന.

ഹോളി മാഗി ഫൊറോന പള്ളി മണിമലയെ വിശ്വാസത്തണലിലേക്ക് കൈപിടിച്ച ദേവാലയം: വി.ഡി. സതീശൻ

മണിമല: ഇരുനൂറ് വർഷക്കാലം മണിമല ഗ്രാമത്തിലെ ജനസമൂഹത്തെ വിശ്വാസത്തിന്‍റെ തണലിലേക്ക് കൈപിടിച്ചുയർത്തിയ ദേവാലയമാണ് ഹോളി മാഗി ഫൊറോന പള്ളിയെന്ന് പ്രതിപക്ഷ നേതാവ് വി.ഡി. സതീശൻ. മണിമല ഹോളി മാഗി ഫൊറോന പള്ളി ദ്വിശതാബ്ദിയുടെ ഭാഗമായി നടന്ന സാംസ്കാരിക സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദേഹം. ക്രൈസ്തവ വിദ്യാഭ്യാസ സ്ഥാപനങ്ങളുടെയും ആതുരശുശ്രൂഷാ സ്ഥാപനങ്ങളുടെയും ഗുണഭോക്താക്കൾ എല്ലാ മതവിശ്വാസത്തിലുംപെട്ട ആളുകളാണ്. സ്കൂളുകളിൽ പ്രവേശനമില്ലാത്ത പിന്നാക്ക ജനവിഭാഗങ്ങൾക്ക് ആദ്യമായി വിദ്യാഭ്യാസം നൽകിയത് ക്രൈസ്തവ വിദ്യാലയങ്ങളാണെന്നും സതീശ ൻ കൂട്ടിച്ചേർത്തു. ചങ്ങനാശേരി അതിരൂപതാധ്യക്ഷൻ മാർ തോമസ് തറയിൽ അധ്യക്ഷത വഹിച്ചു. അധ്വാനിക്കുന്ന കർഷകന് എന്നും ദൈവവിശ്വാസം ശക്തമായിരുന്നുവെന്നും മണിമലയിലെ പൂർവികർ നല്ല കർഷകരായിരുന്നുവെന്നും മാർ തോമസ് തറയിൽ പറഞ്ഞു. ക്രൈസ്തവ സംസ്കാരം ഉള്ളിടത്തെല്ലാം മതസൗഹാർദമുണ്ട്. കേരളത്തിൽ ഇത്രയും മതസൗഹാർദമുണ്ടെങ്കിൽ, ജാതി വ്യവസ്ഥയൊക്കെ വളരെ ദുർബലമായി പോയിട്ടുണ്ടെങ്കിൽ അതിനു പ്രധാന കാരണം ക്രൈസ്തവ വിദ്യാലയങ്ങളാണ്. ആ വിദ്യാലയങ്ങളുടെ സംസ്കാരങ്ങളാണ് ഇപ്പോൾ അപകടത്തിലായിരിക്കുന്നതെന്നും മാർ തോമസ് തറയിൽ കൂട്ടിച്ചേർത്തു. ചീഫ് വിപ്പ് ഡോ.എൻ. ജയരാജ് മുഖ്യപ്രഭാഷണം നടത്തി. ആന്‍റോ ആന്‍റണി എംപി ആശംസപ്രസംഗവും സമ്മാനദാനവും നിർവഹിച്ചു. വികാരി ഫാ. മാത്യു താന്നിയത്ത്, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ, മുൻ കേന്ദ്രമന്ത്രി അൽഫോൻസ് കണ്ണന്താനം, ബ്ലോക്ക് പഞ്ചായത്തംഗം കെ.എസ്. എമേഴ്സൺ, ബ്രഹ്മശ്രീ പ്രജ്ഞാനാനന്ദ തീർഥപാദസ്വാമി, അൽ ഹാഫിസ് നൗഷാദ് റഷാദി, പഞ്ചായത്ത് പ്രസിഡന്‍റുമാരായ സിറിൾ തോമസ്, പി.ടി. അനൂപ്, പഞ്ചായത്തംഗങ്ങളായ അതുല്യ ദാസ്, സുനി സജി, ജനറൽ കൺവീനർ ജോസ് വർഗീസ് കൂനംകുന്നേൽ എന്നിവർ പ്രസംഗിച്ചു. സമ്മേളനത്തിനു മുന്നോടിയായി മൂങ്ങാനിയിൽനിന്നു പള്ളിയിലേക്കു നടത്തിയ സാംസ്കാരിക ഘോഷയാത്ര വികാരി ഫാ. മാത്യു താന്നിയത്ത്, ഫാ. മാത്യു പുളിച്ചമാക്കൽ എന്നിവർ ചേർന്ന് ഫ്ലാഗ് ഓഫ് ചെയ്തു. കറിക്കാട്ടൂർ കവലയിൽനിന്ന് ആരംഭിച്ച ടൂവീലർ ഫാൻസിഡ്രസ് മത്സരം മണിമല-മൂങ്ങാനി ചുറ്റി ഫൊറോന പള്ളി അങ്കണത്തിൽ സമാപിച്ചു. മണിമല എസ്എച്ച്ഒ വി.കെ. ജയപ്രകാശ് മത്സരം ഫ്ലാഗ് ഓഫ് ചെയ്തു. അസിസ്റ്റന്‍റ് വികാരി ഫാ. വർഗീസ് ചിറയിൽ, ജോസ് വർഗീസ്, ജോസ് കൊള്ളിക്കൊളവിൽ എന്നിവർ നേതൃത്വം നൽകി.

പുഞ്ച വിളവെടുപ്പ് അവസാന ഘട്ടത്തില്‍

കോട്ടയം: പുഞ്ചക്കൊയ്ത്തും നെല്ലുസംഭരണവും ജില്ലയില്‍ അവസാന ഘട്ടത്തിലേക്ക്. 85 ശതമാനം പാടങ്ങളിലും കൊയ്ത്ത് പൂര്‍ത്തിയായി. അപ്രതീക്ഷിത വേനല്‍മഴയില്‍ മുന്‍പൊരിക്കലുമുണ്ടാകാത്ത വിളനഷ്ടമാണ് ഇത്തവണ കര്‍ഷകര്‍ക്കുണ്ടായത്. 26 കിലോ വരെ നെല്ല് കിഴിവു നല്‍കേണ്ടിവന്നതും ഇതാദ്യമായാണ്. മില്ലുകാര്‍ വിട്ടുനില്‍ക്കുകയും കൊയ്ത്ത് യന്ത്രങ്ങള്‍ വൈകുകയും ചെയ്തതോടെ 15 ശതമാനം വിളവ് പാടങ്ങളില്‍ നഷ്ടമായതായാ ണ് വിലയിരുത്തല്‍. കിഴിവിനെച്ചൊല്ലിയുള്ള തര്‍ക്കത്തില്‍ 30 ദിവസം വരെ വിവിധ പാടങ്ങളില്‍ നെല്ല് കൂടിക്കിടന്നു. സര്‍ക്കാരിന്‍റെയും കൃഷിവകുപ്പിന്‍റെയും ഗുരുതരമായ അനാസ്ഥയാണ് രണ്ടര മാസം നീണ്ട കൊയ്ത്ത് സീസണിലെ കൊയ്ത്തും സംഭരണവും താറുമാറാകാന്‍ കാരണമെന്ന് കര്‍ഷകര്‍ ആരോപിക്കുന്നു. സപ്ലൈകോയ്ക്കു കൈമാറിയ നെല്ലിന്‍റെ പണത്തിനായി കാത്തിരിപ്പു തുടരുകയാണ്. 400 കോടി രൂപയുടെ നെല്ല് ഇതു വരെ കൈമാറിയിട്ടുണ്ട്. നെല്ല് വിറ്റതിന് പാഡി ഓഫീസര്‍ നല്‍കുന്ന രസീത് കര്‍ഷകര്‍ ബാങ്കുകളില്‍ സമര്‍പ്പിച്ച് കാത്തിരിപ്പു തുടരുകയാണ്. വില ലഭിക്കാന്‍ ആറു മാസം വരെ കാത്തിരിക്കേണ്ടിവരുമെന്നാണ് സൂചന.

തുടർച്ചയായ മഴ: ക്ഷീരകര്‍ഷകര്‍ ദുരിതത്തിൽ

കോട്ടയം: തുടര്‍ച്ചയായ മഴയെത്തുടര്‍ന്ന് തമിഴ്‌നാടിലും കേരളത്തിലും കച്ചിസംഭരിക്കാന്‍ സാധിക്കാത്തതിനാല്‍ ക്ഷീരകര്‍ഷകര്‍ ദുരിതത്തിൽ. തമിഴ്നാട്ടില്‍ കിലോയിക്ക് അഞ്ചുരൂപയില്‍ താഴെ ലഭിച്ചുകൊണ്ടിരുന്ന കച്ചിക്ക് 10 രൂപയ്ക്കു മുകളിലാണ് ഇപ്പോള്‍ വില. കേരളത്തില്‍ മഴമൂലം കച്ചി റോളാക്കാന്‍ സാധിക്കാത്തതുമൂലം മിക്ക ഇടങ്ങളിലും കച്ചി ലഭിക്കാനുമില്ല. പാല്‍വില വര്‍ധിപ്പിക്കാന്‍ സര്‍ക്കാര്‍ തയാറായില്ലെങ്കില്‍ ക്ഷീരകര്‍ഷകര്‍ കൂടുതല്‍ ദുരിതത്തിലാകുമെന്ന് കര്‍ഷക കോണ്‍ഗ്രസ് ക്ഷീര സെല്‍ ജില്ല ചെയര്‍മാന്‍ എബി ഐപ്പ് പറഞ്ഞു.

കോട്ടയ്ക്കുപുറം സെന്‍റ് മാത്യൂസ് പള്ളി വജ്രജൂബിലി സമാപനം ഇന്ന്

അതിരന്പുഴ: കോട്ടയ്ക്കുപുറം സെന്‍റ് മാത്യൂസ് പള്ളി വജ്രജൂബിലി സമാപനസമ്മേളനം ഇന്ന് വൈകുന്നേരം അഞ്ചിനു നടക്കും. അതിരന്പുഴ സെന്‍റ് മേരീസ് ഫൊറോന പള്ളി വികാരി റവ. ഡോ. ജോസഫ് മുണ്ടകത്തിൽ അധ്യക്ഷത വഹിക്കുന്ന പൊതുസമ്മേളനം ആർച്ച്ബിഷപ് മാർ തോമസ് തറയിൽ ഉദ്ഘാടനം ചെയ്യും. പ്രതിപക്ഷനേതാവ് വി.ഡി. സതീശൻ മുഖ്യപ്രഭാഷണം നടത്തും. മന്ത്രി വി.എൻ. വാസവൻ വിവിധ മേഖലയിൽ കഴിവ് തെളിയിച്ചവരെ ആദരിക്കും. ഫ്രാൻസിസ് ജോർജ് എംപി, കുടമാളൂർ സെന്‍റ് മേരീസ് മേജർ ആർക്കി എപ്പിസ്കോപ്പൽ തീർഥാടന കേന്ദ്രം ആർച്ച്പ്രീസ്റ്റ് റവ. ഡോ. മാണി പുതിയിടം, എടത്വ ഫൊറോന വികാരി ഫാ. ഫിലിപ്പ് വൈക്കത്തുകാരൻ വീട്ടിൽ, റവ. ഡോ. മാത്യു പുഞ്ചായിൽ തുടങ്ങിയവർ പ്രസംഗിക്കും. വികാരി റവ. ഡോ. സോണി തെക്കുംമുറിയിൽ സ്വാഗതവും അസി. വികാരി ഫാ. ജെറിൻ കാവനാട്ട് നന്ദിയും പറയും.

വാഹനാപകടത്തിൽ പരിക്കേറ്റ് ചികിത്സയിലിരുന്നയാൾ മരിച്ചു

ഈരാറ്റുപേട്ട: വാഹനാപകടത്തിൽ പരിക്കേറ്റ് ചികിത്സയിൽ കഴിഞ്ഞയാൾ മരിച്ചു. പത്താഴപ്പടി കന്നുപറമ്പിൽ ഷാഹുൽ (48) ആണ് മരിച്ചത്. വ്യാഴാഴ്ച വൈകുന്നേരം കാരികാട് ടോപ്പിന് സമീപമാണ് അപകടമുണ്ടായത്. വ്യാപാര ആവശ്യത്തിനായി വാഗമണ്ണിൽ പോയി മടങ്ങുമ്പോൾ ഷാഹുൽ സഞ്ചരിച്ച സ്‌കൂട്ടറും എതിരേ വന്ന കാറും തമ്മിൽ കൂട്ടിയിടിച്ചാണ് അപകടമുണ്ടായത്. പരിക്കേറ്റ ഷാഹുൽ ചേർപ്പുങ്കലിലെ സ്വകാര്യ ആശുപത്രിൽ ചികിത്സയിലിരിക്കെയാണ് മരിച്ചത്. ഭാര്യ: സബീന അണ്ണാമലപറമ്പിൽ കുടുംബാംഗം. മക്കൾ: ആസിയ, അൽഫിയ, ഐഷ. മരുമക്കൾ: മാഹിൻ, ഷഹീർ, റിയാസ്. ഖബറടക്കം നടത്തി.

ബ്രാഞ്ച്, ലോക്കല്‍ സമ്മേളനങ്ങള്‍ പൂര്‍ത്തിയാക്കി ; മണ്ഡലം, ജില്ലാ സമ്മേളനങ്ങളിലേക്ക് സിപിഐ

കോട്ടയം: ബ്രാഞ്ച്, ലോക്കല്‍ സമ്മേളനങ്ങള്‍ പൂര്‍ത്തിയാക്കി മണ്ഡലം, ജില്ലാ സമ്മേളനങ്ങളിലേക്ക് സിപിഐ. ഓഗസ്റ്റ് എട്ടു മുതല്‍ 10 വരെ വൈക്കത്ത് ജില്ലാ സമ്മേളനം നടക്കും. ചുവപ്പുസേന മാര്‍ച്ച്, പ്രകടനം, പൊതുസമ്മേളനം, സാംസ്‌കാരിക സമ്മേളനം, വിവിധ സെമിനാറുകള്‍ അനുബന്ധപരിപാടികള്‍ എന്നിവയോടെ വിപുലമായ രീതയിലാണ് ജില്ലാ സമ്മേളനം നടത്തുന്നത്. അഖിലേന്ത്യാ സംസ്ഥാന നേതാക്കള്‍ ജില്ലാ സമ്മേളനത്തിനായി എത്തും. ജില്ലാ സമ്മേളനത്തിനു മുന്നോടിയായി മണ്ഡലം സമ്മേളനം വൈക്കത്ത് ആരംഭിച്ചു. ഇന്നു സമാപിക്കും. 11 മണ്ഡലം കമ്മിറ്റികളാണു ജില്ലയില്‍ സിപിഐക്കുള്ളത്. ഒമ്പത് നിയോജക മണ്ഡലങ്ങള്‍ക്കു പുറമേ തലയോലപ്പറമ്പും മുണ്ടക്കയവുമാണ് മറ്റു രണ്ടു മണ്ഡലങ്ങള്‍. മൂന്നു ടേം പൂര്‍ത്തിയായ മണ്ഡലം സെക്രട്ടറിമാര്‍ സമ്മേളനത്തില്‍ മാറും. യുവാക്കളെയും വനിതകളെയും കൂടുതലായി കമ്മിറ്റിയില്‍ ഉള്‍പ്പെടുത്തണമെന്നാണ് സംസ്ഥന നേൃത്വത്തിന്‍റെ തീരുമാനം. കഴിഞ്ഞ സമ്മേളനകാലത്ത് ജില്ലയില്‍ മുന്‍ സംസ്ഥാന സെക്രട്ടറി കാനം രാജേന്ദ്രനെ അനുകൂലിക്കുന്നവരും എതിര്‍ക്കുന്നവ രുമായി രണ്ടു വിഭാഗങ്ങള്‍ ജില്ലയിലുണ്ടായിരുന്നു. കാനത്തിന്‍റെ നിര്യാണത്തോടെ ഇപ്പോള്‍ പൂര്‍ണമായും സംസ്ഥാന നേതൃത്വത്തിനൊപ്പമാണ് ജില്ലാ കമ്മിറ്റി. കഴിഞ്ഞ തവണ ഏറ്റുമാനൂര്‍ സമ്മേളനത്തില്‍ അപ്രതീക്ഷിതമായി വോട്ടെടുപ്പിലൂടെ സെക്രട്ടറിയായ വി.ബി. ബിനു ഇത്തവണയും സെക്രട്ടറിയായി തുടരാനാണ് സാധ്യത. മറ്റാരുടെയും പേരുകള്‍ ഇപ്പോള്‍ പരിഗണനയിലില്ല. മുന്‍കാലങ്ങളില്‍ ജില്ലയുടെ വിവിധ ഭാഗങ്ങളില്‍ സിപിഎമ്മുമായി സിപിഐക്കു പ്രശ്‌നങ്ങളുണ്ടായിരുന്നു. എന്നാല്‍ ഇപ്പോള്‍ ഇതു കുറഞ്ഞിട്ടുണ്ട്. കേരള കോണ്‍ഗ്രസ് -എം മുന്നണിയിലെത്തിയതോടെ സിപിഐയുടെ പ്രാതിനിധ്യം മുന്നണിയില്‍ കുറയുന്നതായും സിപിഎം കേരള കോണ്‍ഗ്രസിനോടു കൂടുത ൽ താത്പര്യം കാട്ടുന്നതായും താഴേതട്ടിലുള്ള സമ്മേളനങ്ങളില്‍ വിമര്‍ശനമുയര്‍ന്നിട്ടുണ്ട്. അതേപോലെ സിപിഐ മന്ത്രിമാരുടെ പ്രകടനത്തെക്കുറിച്ചും ബ്രാഞ്ച്, ലോക്കല്‍ തലങ്ങളില്‍ വിമർശനമുണ്ട്.

ത്രിതല പഞ്ചായത്ത് മുനിസിപ്പല്‍ തെരഞ്ഞെടുപ്പ്: പാർട്ടികളിലും മുന്നണികളും ഒരുക്കങ്ങള്‍ തുടങ്ങി

കോട്ടയം: ത്രിതല പഞ്ചായത്ത് മുനിസിപ്പല്‍ തെരഞ്ഞെടുപ്പ് നവംബര്‍, ഡിസംബര്‍ മാസങ്ങളില്‍ രണ്ടുഘട്ടങ്ങളിലായി നടത്താന്‍ തെരഞ്ഞെടുപ്പു കമ്മീഷന്‍ തീരുമാനിച്ചതോടെ പാര്‍ട്ടികളും മുന്നണികളും ഒരുക്കങ്ങള്‍ തുടങ്ങിക്കഴിഞ്ഞു. പ്രമുഖ കക്ഷികളായ കോണ്‍ഗ്രസും സിപിഎമ്മും ബിജെപിയും നേരത്തെതന്നെ ഒരുക്കങ്ങള്‍ തുടങ്ങിയിരുന്നു. പഞ്ചായത്തുകളിലും നഗരസഭകളിലും ഭരണസ്തംഭനവും അഴിമതിയും കെടുകാര്യസ്ഥതയും ഉന്നയിച്ച് പ്രതിപക്ഷം സമരപരിപാടികള്‍ തുടങ്ങിയതോടെ വികസനനേട്ടങ്ങള്‍ ഉയര്‍ത്തിക്കാട്ടി ഭരണസമിതികളും പ്രവര്‍ത്തനങ്ങള്‍ തുടങ്ങി. ഭരണത്തിന്‍റെ അവസാന ഘട്ടത്തിലേക്കു കടന്നതോടെ വികസനപദ്ധതികള്‍ എത്രയും വേഗം പൂര്‍ത്തീകരിക്കാനുള്ള ശ്രമത്തിലാണ് ജില്ലാ പഞ്ചായത്തും പഞ്ചായത്ത്, ബ്ലോക്ക്, നഗര ഭരണസമിതികളും. കഴിഞ്ഞ ത്രിതല പഞ്ചായത്ത് തെരഞ്ഞെടുപ്പില്‍ ജില്ലയില്‍ എല്‍ഡിഎഫിനായിരുന്നു മുന്നേറ്റം. ജില്ലാ പഞ്ചായത്തില്‍ ഭരണം പിടിച്ചതിനു പുറമേ ബ്ലോക്ക് പഞ്ചായത്തുകളും ഭൂരിഭാഗം പഞ്ചായത്തുകളും എല്‍ഡിഎഫ് നേടി. നഗരസഭകളില്‍ യുഡിഎഫിനായിരുന്നു നേട്ടം. രണ്ടു പഞ്ചായത്തുകളില്‍ ഭരണം പിടിച്ച് ബിജെപി ഗ്രാമ, നഗര വാര്‍ഡുകളില്‍ കരുത്തുകാട്ടി. മഹാത്മ കുടുബസംഗമവുമായി കോണ്‍ഗ്രസ് കോട്ടയം: എഐസിസിയുടെ പ്രത്യേക നിര്‍ദേശപ്രകാരമുള്ള മുന്നൊരുക്കങ്ങളാണ് കോണ്‍ഗ്രസ് നടത്തുന്നത്. ഇതിനായി ഡിസിസി പ്രസിഡന്‍റുമാര്‍ക്ക് കൂടുതല്‍ അധികാരം നല്‍കിക്കഴിഞ്ഞു. തദ്ദേശ തെരഞ്ഞെടുപ്പ് മുന്നൊരുക്കങ്ങള്‍ക്കു മാത്രമായി ജില്ലാ നേതൃയോഗങ്ങള്‍ കോണ്‍ഗ്രസ് ഉടന്‍ ചേരും. പഞ്ചായത്ത്, നഗരസഭ വാര്‍ഡുകളില്‍ മഹാത്മാഗാന്ധി കുടുംബസംഗമങ്ങള്‍ വിളിച്ചുചേര്‍ത്താണ് കോണ്‍ഗ്രസ് മുന്നൊരുക്കം നടത്തുന്നത്. കുടുംബസംഗമങ്ങളില്‍ പരമാവധി വനിതകളെയും യുവജനങ്ങളെയും പങ്കെടുപ്പിക്കാനു നിര്‍ദേശമുണ്ട്. ഇതു കൂടാതെ ഡിസിസി ഭാരവാഹികള്‍ക്കും കെപിസിസി ഭാരവാഹികള്‍ക്കും ഒരോ പഞ്ചായത്തുകളുടെയും നഗരസഭകളുടെയും ചുമതല നല്‍കിയിട്ടുണ്ട്. കഴിഞ്ഞ തവണ മത്സരിച്ച സീറ്റുകളില്‍ ഇത്തവണയും സ്ഥാനാര്‍ഥികളെ നേരത്തേ കണ്ടെത്തും. ഇതിനായി ബ്ലോക്ക് തലത്തില്‍ പ്രത്യേക സ്‌ക്രീനിംഗ് നടത്തും. പതിവായി മത്സരിക്കുന്നവരെ ഒഴിവാക്കണമെന്ന് നിര്‍ദേശമുണ്ടെങ്കിലും എത്രത്തോളം പ്രാവര്‍ത്തികമാകുമെന്ന കാര്യത്തില്‍ സംശയമുണ്ട്. വിവിധ ഗ്രൂപ്പുകളും തങ്ങളുടെ സ്വാധീനം ഉറപ്പിക്കാന്‍ ശ്രമം തുടങ്ങിയിട്ടുണ്ട്. യുഡിഎഫ് നേതൃത്വത്തില്‍ പ്രതിപക്ഷത്തായിരിക്കുന്ന ഭരണസമിതികളില്‍ എല്‍ഡിഎഫ് ഭരണസമിതിക്കെതിരേ വിവിധ വിഷയങ്ങള്‍ ഉന്നയിച്ച് പ്രാദേശികമായി സമരപരിപാടികളും ആരംഭിച്ചിട്ടുണ്ട്. കേരള കോണ്‍ഗ്രസ് ജില്ലാ ക്യാമ്പ് സംഘടിപ്പിച്ച് തദ്ദേശ ഒരുക്കം തുടങ്ങി. കഴിഞ്ഞ തവണത്തേക്കാള്‍ കൂടുതല്‍ സീറ്റാണ് ജോസഫ് ഗ്രൂപ്പ് ഇത്തവണ ലക്ഷ്യമിടുന്നത്. ഇതിനായി വാര്‍ഡ്, മണ്ഡലം തലത്തിലും ക്യാമ്പുകള്‍ നടത്തി സീറ്റും സ്ഥാനാര്‍ഥിയെയും കണ്ടെത്തും. മുസ്‌ലിം ലീഗും തങ്ങളുടെ സ്വാധീനമേഖലയില്‍ സീറ്റുകള്‍ ഉറപ്പിക്കാനുള്ള ശ്രമങ്ങള്‍ ആരംഭിച്ചു. വികസനയാത്രയും പ്രക്ഷോഭ പരിപാടികളുമായി എല്‍ഡിഎഫ് കോട്ടയം: എല്‍ഡിഎഫില്‍ സിപിഎം നേരത്തേ ഒരുക്കങ്ങള്‍ ആരംഭിച്ചു. ബ്രാഞ്ച് സെക്രട്ടറിമാര്‍ക്കും ലോക്കല്‍ സെക്രട്ടറിമാര്‍ക്കും ശില്പശാല സംഘടിപ്പിച്ചിരുന്നു. പ്രാദേശിക വിഷയങ്ങള്‍ ഉന്നയിച്ച് ജില്ലയുടെ വിവിധ കേന്ദ്രങ്ങളില്‍ കാമ്പയിനും സിപിഎം ആരംഭിച്ചു. വിശദമായ ഒരുക്കങ്ങള്‍ ചര്‍ച്ച ചെയ്യാന്‍ സിപിഎമ്മിന്‍റെ മുഴുവന്‍സമയ ജില്ലാ കമ്മിറ്റി യോഗം 10നു ചേരും. സിപിഐ രണ്ടു ദിവസത്തെ പ്രവര്‍ത്തന ക്യാമ്പ് നടത്തിയാണ് തദ്ദേശ തെരഞ്ഞെടുപ്പിനായുള്ള സംഘടനാ ഒരുക്കം ആരംഭിച്ചത്. സമ്മേളനം നടക്കുന്ന സമയമാണെങ്കിലം ഇത്തവണ 300 വാര്‍ഡ്‌ സീറ്റുകള്‍ കൂടുതല്‍ നേടാനുള്ള തയാറെടുപ്പാണ് ആരംഭിച്ചിരിക്കുന്നത്. കേരള കോണ്‍ഗ്രസ് -എം ജില്ലാ ക്യാമ്പ് നടത്തിയാണ് തദ്ദേശ ഒരുക്കം ആരംഭിച്ചത്. വാര്‍ഡ്, മണ്ഡലം, നിയോജക മണ്ഡലം സമ്മേളനങ്ങള്‍ ഉടന്‍ ചേരും. വാര്‍ഡ് അടിസ്ഥാനത്തില്‍ ഭവനസന്ദര്‍ശനവുമുണ്ട്. കഴിഞ്ഞ തവണ മത്സരിച്ച സീറ്റുകളില്‍ നേരത്തേ തന്നെ സ്ഥാനാര്‍ഥിയെ കണ്ടെത്താനാണ് ക്യാമ്പുകളില്‍ തീരുമാനം. ജനതാദള്‍, എന്‍സിപി, കോണ്‍ഗ്രസ് -എസ്, കേരള കോണ്‍ഗ്രസ് -ബി, ജനാധിപത്യ കേരള കോണ്‍ഗ്രസ് തുടങ്ങിയ പാര്‍ട്ടികളും സീറ്റുകളും സ്വാധീനവും ഉറപ്പിക്കാനുള്ള ശ്രമം ആരംഭിച്ചു. എല്‍ഡിഎഫ് നേതൃത്വത്തിലും ഒരുക്കങ്ങളുണ്ട്. ഭരണമുള്ള പഞ്ചായത്ത്, നഗരസഭകളില്‍ വികസനസന്ദേശ യാത്രകളും, ഭരണമില്ലത്ത ത്രിതല പഞ്ചായത്തുകളില്‍ ഭരണസമിതിക്കെതിരേയുള്ള പ്രക്ഷോഭ യാത്രകളും നടത്തിയുള്ള വിപുലമായ കാമ്പയിനാണ് എല്‍ഡിഎഫ് ആരംഭിക്കാന്‍ പോകുന്നത്. നഗരസഭകള്‍ കേന്ദ്രീകരിച്ച് ശക്തായ സമരപരിപാടികള്‍ എല്‍ഡിഎഫ് ആരംഭിച്ചു കഴിഞ്ഞു. ഭവന സമ്പര്‍ക്കവുമായി ബിജെപി കോട്ടയം: കഴിഞ്ഞ തെരഞ്ഞെടുപ്പില്‍ രണ്ടു പഞ്ചായത്തുകളില്‍ ഭരണവും പല പഞ്ചായത്തുകളിലും നഗരസഭകളിലും നിര്‍ണായകമായ സ്വാധീനവും നേടയ ബിജെപി ഇത്തവണ വിപുലമായ മുന്നൊരുക്കങ്ങളാണ് ഇതിനോടകം നടത്തി കഴിഞ്ഞിരിക്കുന്നത്. ‘’മാറാത്തത് മാറും’’ എന്ന മുദ്രാവാക്യവുമായി സംസ്ഥാന പ്രസിഡന്‍റ് രാജീവ് ചന്ദ്രശേഖര്‍ പങ്കെടുക്കുന്ന വികസിത കേരളം മഹായോഗം ആറിന് കോട്ടയത്ത് നടക്കും. പുതിയ ജില്ലാ മണ്ഡലം പഞ്ചായത്ത് ഭാരവാഹികള്‍ തദ്ദേശ തെരഞ്ഞെടുപ്പു ചുമതലക്കാരും ഇതില്‍ പങ്കെടുക്കും. യോഗത്തില്‍ തദ്ദേശ ഒരുക്കത്തിനുള്ള വിപുലമായ പ്ലാന്‍ തയാറാക്കും. ഇതിനു പുറമേ മഹാസമ്പര്‍ക്കം എന്ന പേരില്‍ വാര്‍ഡുതലത്തില്‍ ഭവന സന്ദര്‍ശനവും ബിജെപി നടത്തുന്നുണ്ട്. ജില്ലയിലെ ആറു നഗരസഭകളിലും ഭരണം പിടിക്കാനുള്ള രീതിയില്‍ വാര്‍ഡുകള്‍ കേന്ദ്രീകരിച്ച് പ്രത്യേക കാമ്പയിനും ബിജെപി ആരംഭിച്ചു കഴിഞ്ഞു.

നഗരസഭയില്‍ ജനം യുഡിഎഫിനെ അധികാരത്തിലേറ്റും: മാണി സി. കാപ്പന്‍

പാലാ: ഇച്ഛാശക്തിയും സ്ഥിരതയും ഇല്ലാത്ത നേതൃത്വത്തിന്‍റെ കീഴില്‍ തമ്മിലടിച്ചു കഴിയുന്ന നഗരസഭാ ഭരണ സമിതിയുടെ കെടുകാര്യസ്ഥതമൂലം ഭരണസ്തംഭനവും വികസന മുരടിപ്പും കണ്ട് മനംമടുത്ത ജനങ്ങള്‍ അടുത്ത തെരഞ്ഞെടുപ്പില്‍ യുഡിഎഫിനെ അധികാരത്തിലേറ്റുമെന്നു മാണി സി. കാപ്പന്‍ എംഎല്‍എ. എംഎല്‍എ ഫണ്ട് വിനിയോഗിച്ചു നഗരസഭയില്‍ നടത്തുന്ന വികസന പ്രവര്‍ത്തനങ്ങള്‍ നഗരസഭയുടെ സ്വന്തം നേട്ടമാക്കി എട്ടുകാലി മമ്മൂഞ്ഞ് ചമയുകയാണ് നഗരസഭാ ഭരണാധികാരികളെന്നു മാണി സി. കാപ്പന്‍ കൂട്ടിച്ചേർത്തു. നഗരസഭയുടെ കെടുകാര്യസ്ഥതയ്ക്കും ദുര്‍ഭരണത്തിനും എതിരെ നഗരസഭ യുഡിഎഫ് പാര്‍ലമെന്‍ററി പാര്‍ട്ടി സംഘടിപ്പിച്ച പ്രതിഷേധയോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. യുഡിഎഫ് പാര്‍ലമെന്‍ററി പാര്‍ട്ടി നേതാവ് പ്രഫ. സതീശ് ചൊള്ളാനി അധ്യക്ഷത വഹിച്ചു. എന്‍.സുരേഷ്, ജോര്‍ജ് പുളിങ്കാട്, സന്തോഷ് മണര്‍കാട്, സാബു ഏബ്രഹാം, ഷോജി ഗോപി, പ്രിന്‍സ് വി.സി, തോമസുകുട്ടി നെച്ചിക്കാട്ട്, ജോഷി വട്ടക്കുന്നേല്‍, എം.പി കൃഷ്ണന്‍ നായര്‍, ആനി ബിജോയി, സിജി ടോണി, ലിജി ബിജു, ജിമ്മി ജോസഫ്, ബിജോയി എബ്രഹാം, തുടങ്ങിയവര്‍ പ്രസംഗിച്ചു.

രാമപുരത്ത് കാറ്റിലും മഴയിലും നാശനഷ്ടം

രാമപുരം: കഴിഞ്ഞ ദിവസം പെയ്ത വേനല്‍ മഴയിലും വീശിയടിച്ച കാറ്റിലും രാമപുരത്തും പരിസര പ്രദേശങ്ങളിലും കനത്ത നാശനഷ്ടം. നിരവധി കര്‍ഷകരുടെ വാഴ, പ്ലാവ്, റബര്‍, തേക്ക്, കപ്പ തുടങ്ങിയവ ഒടിഞ്ഞു വീണ് നശിക്കുകയും വീടുകള്‍ക്ക് നാശനഷ്ടം സംഭവിക്കുകയും ചെയ്തു. കിഴതിരി കൂറ്റംകാവില്‍ ചന്ദ്രന്‍റെ വീടിന് മുകളിലേക്ക് പ്ലാവ് മരവും കൊണ്ടാട് വിമലാലയം രാജഗോപാലന്‍ നായരുടെ വീടിന്‍റെ മുകളിലേക്ക് അയല്‍വാസിയുടെ റബര്‍ മരവും ഒടിഞ്ഞു വീണ് വീടുകള്‍ ഭാഗികമായി തകര്‍ന്നു. കിഴതിരി പുത്തന്‍മ്യാലില്‍ രമേശന്‍, ഇടപ്പാട്ട് ഗോപാലന്‍ എന്നിവരുടെ റബര്‍ മരങ്ങള്‍ ഒടിഞ്ഞുവീണു. പൊരുന്നിക്കല്‍ ഷാജിയുടെ റബര്‍, തെങ്ങ് എന്നീ മരങ്ങള്‍ ഒടിഞ്ഞുവീണ് രണ്ട് വാട്ടര്‍ ടാങ്കുകള്‍ പൊട്ടിപ്പോയി. കിഴതിരി കൂറ്റന്താനത്ത് വാതിലില്‍ തേക്കുമരം വൈദ്യുതി ലൈനിലേക്ക് ഒടിഞ്ഞ് വീണ് റോഡ് ഗതാഗതം നിലയ്ക്കുകയും വൈദ്യുതി ബന്ധം തടസപ്പെടുകയും ചെയ്തു.

സിഐ നിർമാണം തടഞ്ഞു; എരുമേലിയിലെ കംഫർട്ട് സ്റ്റേഷൻ ശുചീകരണം മുടങ്ങി

എരുമേലി: പഞ്ചായത്ത്‌ വക ശുചി മുറികളുടെ ടാങ്കിൽ അറ്റകുറ്റപ്പണികളും ശുചീകരണവും നടത്തിക്കൊണ്ടിരുന്നവർ മദ്യപിച്ചിട്ടാണ് നിർമാണങ്ങൾ നടത്തുന്നതെന്ന് ആരോപിച്ച് സിഐ പണികൾ തടഞ്ഞു. സംഭവം വിവാദമായതോടെ നിലപാട് മാറ്റി സിഐ. ഇതോടെ ഒരു ദിവസം മുടങ്ങിയ നിർമാണങ്ങൾ പുനരാരംഭിച്ചു. എരുമേലി പ്രൈവറ്റ് ബസ് സ്റ്റാൻഡിൽ കഴിഞ്ഞ ദിവസം രാത്രിയിലാണ് സംഭവം. എരുമേലി പോലീസ് സ്റ്റേഷൻ എസ്എച്ച്ഒ ഇ.ഡി. ബിജു ആണ് രാത്രിയിൽ ബസ് സ്റ്റാൻഡിൽ പട്രോളിംഗ് നടത്തുന്നതിനിടെ പണികൾ തടഞ്ഞ് നിർത്തി വപ്പിച്ചത്. ദുർഗന്ധം നിറഞ്ഞ സെപ്റ്റിക് ടാങ്കിൽ നിന്നുള്ള ചോർച്ച മാറ്റാൻ ജെസിബി ഉപയോഗിച്ച് നിർമാണങ്ങൾ നടത്തി മാലിന്യങ്ങൾ നീക്കം ചെയ്തു കൊണ്ടിരുന്ന തൊഴിലാളികൾ മദ്യപിച്ചിട്ടുണ്ടെന്ന് ആരോപിച്ചാണ് പണികൾ തടഞ്ഞത്. രാത്രിയിൽ ഇത്തരം ജോലികൾ പാടില്ലന്നും മദ്യ ലഹരി ഇല്ലാതെ പണികൾ നടത്തിയാൽ മതിയെന്നും എസ്എച്ച്ഒ പറഞ്ഞെന്ന് തൊഴിലാളികൾ പറയുന്നു. ഇതോടെ നിർമാണങ്ങൾ നിർത്തി തൊഴിലാളികൾ പോയി. പിറ്റേന്ന് പണികൾ നടത്താനും ഇവർ എത്തിയില്ല. ഇതോടെ പഞ്ചായത്ത്‌ ഭരണസമിതി ഇടപെട്ട് ഇവരെ വീണ്ടും വിളിച്ചു വരുത്തി കഴിഞ്ഞ ദിവസം പണികൾ പുനരാരംഭിക്കുകയായിരുന്നു. നിർമാണം തടസപ്പെടുത്തില്ലെന്ന് പോലീസിൽ നിന്ന് ഉറപ്പ് ലഭിച്ചതിനെ തുടർന്നാണ് പണികൾ പുനരാരംഭിച്ചതെന്ന് അധികൃതർ വ്യക്തമാക്കി.

പാലാ ജനറല്‍ ആശുപത്രിയിലെ സുരക്ഷാ സംവിധാനം പരിശോധിക്കണമെന്ന് താലൂക്ക് വികസന സമിതി

പാലാ: കെ.എം. മാണി മെമ്മോറിയല്‍ ഗവൺമെന്‍റ് ജനറല്‍ ആശുപത്രിയിലെ ബഹുനില കെട്ടിടത്തിലെ വൈദ്യുതീകരണത്തില്‍ അപാകതയുണ്ടോയെന്നു പരിശോധിക്കണമെന്നും ഫയര്‍ ആന്‍ഡ് റസ്‌ക്യൂ സംവിധാനവും കെട്ടിട നിര്‍മാണത്തിലെ അപാകതയും പരിശോധിച്ച് അടിയന്തരമായി റിപ്പോര്‍ട്ട് നല്‍കണമെന്നും താലൂക്കു വികസന സമിതി നിര്‍ദേശം നൽകി. പൊതുമരാമത്ത് വൈദ്യുതി വിഭാഗം ബില്‍ഡിംഗ് ഇന്‍സ്‌പെക്ടറേറ്റ് ഉദ്യോഗസ്ഥരും ആശുപത്രി സൂപ്രണ്ടും ഫയര്‍ ആന്‍ഡ് റസ്‌ക്യൂ ഉദ്യോഗസ്ഥരും ചേര്‍ന്നു സംയുക്തമായി പരിശോധിച്ച് റിപ്പോര്‍ട്ട് നല്കുവാനാണ് നിര്‍ദേശം. ഇന്നലെ നടന്ന താലൂക്ക് വികസന സമിതിയില്‍ രാഷ്ട്രീയ ജനതാദള്‍ ജില്ലാ ജനറല്‍ സെക്രട്ടറി പീറ്റര്‍ പന്തലാനിയാണ് കോഴിക്കോട് മെഡിക്കല്‍ കോളജ് ആശുപത്രിയിലെ അത്യാഹിതം ശ്രദ്ധയില്‍പ്പെടുത്തി പരാതി ഉന്നയിച്ചത്. തുടര്‍ന്ന് ഒരു മാസത്തിനുള്ളില്‍ പരിശോധിച്ചു റിപ്പോര്‍ട്ട് നല്കുവാന്‍ വികസന സമിതിയോഗം നിര്‍ദേശം നല്കി. ഹോസ്പിറ്റല്‍ കെട്ടിടം നിര്‍മിച്ചപ്പോള്‍ ഫയര്‍ ആന്‍ഡ് സേഫ്റ്റി അനുമതിയില്ലാതെയും മതിയായ പാര്‍ക്കിംഗ് സൗകര്യമില്ലാതെയും ഇലക്ടിക് ഇന്‍സ്‌പെക്ടറേറ്റിന്‍റെ മാനദണ്ഡങ്ങള്‍ പാലിക്കാതെയുമാണു ബഹുനില കെട്ടിടങ്ങള്‍ നിര്‍മിച്ചതെന്നും സമിതിയംഗങ്ങള്‍ പരാതിപ്പെട്ടു. കെഎസ്ഇബി ഡിവിഷന്‍റെ കീഴിലുള്ള 11 സെക്ഷനിലും ജോലിക്കാരുടെ കുറവ് മൂലം വൈദ്യുതി തകരാര്‍ പരിഹരിക്കാന്‍ പെട്ടെന്ന് സാധിക്കുന്നില്ലെന്നു കെഎസ്ഇബി എക്‌സിക്യൂട്ടീവ് എൻജിനിയര്‍ യോഗത്തില്‍ അറിയിച്ചു. എല്ലാ സെക്ഷനിലും ആവശ്യമായ ജീവനക്കാരെ നിയമിച്ചു നല്കുന്നതിന് ശ്രമം നടത്താന്‍ യോഗത്തില്‍ പങ്കെടുത്ത മാണി സി. കാപ്പന്‍ എംഎല്‍എയോട് സമിതിയംഗങ്ങളും പഞ്ചായത്തു പ്രസിഡന്‍റുമാരും ആവശ്യപ്പെട്ടു. പൊതുമരാത്ത് റോഡുകളുടെ ഇരുവശങ്ങളും തടികളും കല്ലും മണ്ണും കൂട്ടിയിട്ടും സ്ഥലങ്ങള്‍ കൈയേറിയും നിയന്ത്രണമില്ലാതെ പെട്ടിക്കടകള്‍ പ്രവര്‍ത്തിക്കുന്നതും ഗതാഗത തടസവും അപകടവും ഉണ്ടാക്കുന്നുവെന്ന സമിതിയംഗങ്ങളുടെ പരാതിയില്‍ നടപടി സ്വീകരിക്കുവാന്‍ തഹസില്‍ദാര്‍ നിര്‍ദേശം നൽകി. സ്ഥാപനങ്ങളിലും വീടുകളിലും ജോലിക്ക് എത്തുന്ന ഇതര സംസ്ഥാന തൊഴിലാളികളുടെ അഡ്രസും രേഖകളും ഉള്‍പ്പെടെ സ്ഥാപന ഉടമകളും അവരെ എത്തിച്ചു നല്കുന്ന കോണ്‍ട്രാക്ടര്‍മാരും അതതു പോലീസ് സ്റ്റേഷന്‍ പരിധിയില്‍ അറിയിച്ചു രേഖകള്‍ സൂക്ഷിക്കുകയും ലേബര്‍ ഓഫീസില്‍ അറിയിച്ചു രജിസ്റ്റര്‍ നടത്തുകയും ചെയ്യണമെന്നും അറിയിച്ചു.

കാഞ്ഞിരപ്പള്ളി താലൂക്ക് വികസന സമിതി യോഗത്തിൽ പരാതികൾ കുറയുന്നു

കാഞ്ഞിരപ്പള്ളി: താലൂക്ക് വികസന സമിതി യോഗത്തിൽ പരാതിക്കാരും പരാതികളും കുറയുന്നു. ഇന്നലെ നടത്തിയ യോഗത്തിൽ ആറു പരാതികളാണ് ലഭിച്ചത്. കഴിഞ്ഞ മാസം നടത്തിയ യോഗത്തിൽ പരാതികൾ ഒന്നുതന്നെ ലഭിച്ചില്ല. പതിനഞ്ചും ഇരുപതും പരാതികൾ ലഭിച്ചുകൊണ്ടിരുന്നിടത്താണ് ഇപ്പോൾ പരാതികൾ ഒന്നുതന്നെ ലഭിക്കാത്ത അവസ്ഥയിലേക്ക് എത്തിയിരിക്കുന്നത്. യോഗത്തിൽ പലപ്പോഴും ബന്ധപ്പെട്ട ഉദ്യോഗസ്ഥർ പങ്കെടുക്കാത്തതു പരാതികൾ കുറയുന്നതിന് കാരണമാകുന്നതായി യോഗത്തിൽ പങ്കെടുക്കുന്നവർ പറയുന്നു. പൊൻകുന്നം മിനിസിവിൽ സ്റ്റേഷനിലെ പൊന്നുംവില ഓഫീസിന്‍റെ പ്രവർത്തനം അവസാനിക്കാറായതിനാൽ എരുമേലി വിമാനത്താവളത്തിന്‍റെ സ്ഥലം ഏറ്റെടുക്കലിന്‍റെ ഓഫീസായി ഇവിടം പ്രവർത്തിപ്പിക്കുന്നതിനുള്ള നടപടി സ്വീകരിക്കണം, ദേശീയ പാതയിൽ മുണ്ടക്കയം പൈങ്ങന ഭാഗത്ത് റോഡിന്‍റെ വശത്ത് കാടുകയറിയും മണ്ണിടിഞ്ഞും കിടക്കുന്നതു കാൽനടയാത്രക്കാർക്കു ദുരിതം സൃഷ്ടിക്കുന്നു, മുണ്ടക്കയം പൈങ്ങന ഭാഗത്തെ വൈദ്യുതി പോസ്റ്റിലെ ബൾബുകൾ കത്തുനില്ല, ചാരുവേലി - മുക്കട - എരുമേലി റോഡിലെ വെള്ളക്കെട്ട്, താലൂക്കിലെ ലഘുഭക്ഷണശാലകളിൽ ഫുഡ് ആൻഡ് സേഫ്റ്റി പരിശോധന നടത്തണം, കാളകെട്ടി പിഎച്ച്സിലെ ഡോക്ടർമാരുടെ കുറവ് പരിശോധിക്കണം തുടങ്ങിയ പരാതികളാണ് ലഭിച്ചത്. പരാതികൾ ബന്ധപ്പെട്ട വകുപ്പ് ഉദ്യോഗസ്ഥർ കൈമാറാൻ‌ യോഗത്തിൽ തീരുമാനിച്ചു. മിനിസിവില്‍ സ്റ്റേഷന്‍ ഹാളില്‍ നടത്തിയ താലൂക്ക് വികസന സമിതി യോഗത്തിൽ കാഞ്ഞിരപ്പള്ളി ബ്ലോക്ക് പഞ്ചായത്ത് വൈസ് പ്രസിഡന്‍റ് ജോളി മടുക്കക്കുഴി അധ്യക്ഷത വഹിച്ചു. ബ്ലോക്ക് പഞ്ചായത്തംഗം ഡാനി ജോസ്, തഹസിൽദാർ പി.എസ്. സുനിൽകുമാർ, എംപി, എംഎൽഎമാരുടെ പ്രതിനിധികൾ തുടങ്ങിയവർ യോഗത്തില്‍ പങ്കെടുത്തു.

അഖില കേരള ചേരമര്‍ ഹിന്ദു മഹാസഭ സംസ്ഥാന കമ്മിറ്റി: എം.കെ. അപ്പുക്കുട്ടൻ പ്രസിഡന്‍റ്, ഡോ. കല്ലറ പ്രശാന്ത് ജന. സെക്രട്ടറി

ചങ്ങനാശേരി: അഖില കേരള ചേരമര്‍ ഹിന്ദു മഹാസഭ സംസ്ഥാന കമ്മിറ്റിയുടെ പ്രസിഡന്‍റായി എം.കെ. അപ്പുക്കുട്ടന്‍, ജനറല്‍ സെക്രട്ടറിയായി ഡോ. കല്ലറ പ്രശാന്ത്, ട്രഷററായി കെ. കുട്ടപ്പന്‍ എന്നിവരെ തെരഞ്ഞെടുത്തു. വൈസ് പ്രസിഡന്‍റുമാരായി മധു നീണ്ടൂര്‍, തങ്കച്ചന്‍ മ്യാലില്‍, സെക്രട്ടറിമാരായി പി.ജി. അശോക്‌കുമാര്‍, കെ.സി. മനോജ്, രാജേഷ് മുടിമല, കമ്മിറ്റി അംഗങ്ങളായി ഒ.കെ. സാബു, ഗോപി മഞ്ചാടിക്കര, സാബു പതിക്കല്‍, രാജന്‍ നാല്പാത്തിമല, ബിബിന്‍ രാജാക്കാട്, വി.എസ്. കുട്ടപ്പന്‍, മണി പൂത്തോട്ട, കെ.കെ. വിജയന്‍, സനില്‍കുമാര്‍ വെളിയനാട്, സുനില്‍കുമാര്‍ എന്നിവരെ തെരഞ്ഞെടുത്തു.17 അംഗ ഡയറക്ടര്‍ ബോര്‍ഡിനെയും തെരഞ്ഞെടുത്തു.

ഇളങ്ങുളം ഇടവകയിൽ ദേവാലയ ശുശ്രൂഷയിൽ 55 വർഷം പിന്നിട്ട അപ്പച്ചൻ ചേട്ടൻ വിരമിക്കുന്നു

ഇളങ്ങുളം: സെന്‍റ് മേരീസ് ഇടവകയിലെ ദേവാലയ ശുശ്രൂഷിയായി 55 വർഷം സേവനം ചെയ്തശേഷം ഇരുന്പുകുത്തിയിൽ അപ്പച്ചൻ ചേട്ടൻ എന്ന ജോസഫ് പൈലോ ഇന്ന് വിരമിക്കുന്നു. 15ാം വയസിലാണ് ദേവാലയ ശുശ്രൂഷിയുടെ സഹായിയായി ഇദ്ദേഹം സേവനം ആരംഭിക്കുന്നത്. അന്നത്തെ ഇടവക വികാരിയായിരുന്ന ഫാ. തോമസ് ആയിത്തമറ്റവും ട്രസ്റ്റി പൊൻമലക്കുന്നേൽ കൊച്ചേട്ടനുംകൂടി ജോസഫ് പൈലോയുടെ മാതാപിതാക്കളെ സമീപിച്ച് മകനെ ദേവാലയ ശുശ്രൂഷിയായി പരിശീലനത്തിന് പള്ളിയിലേക്ക് അയയ്ക്കണമെന്ന് അറിയിച്ചു. ഇതനുസരിച്ച് 1970 മുതൽ അദ്ദേഹം ദേവാലയ ശുശ്രൂഷിയുടെ സഹായിയായും തുടർന്ന് ദേവാലയ ശുശ്രൂഷിയായും സേവനം ആരംഭിച്ചു. ചങ്ങനാശേരി അതിരൂപതയിലെയും തുടർന്ന് കാഞ്ഞിരപ്പള്ളി രൂപതയിലെയുമായി 18 വികാരിമാരുടെകൂടെയും 48 അസിസ്റ്റന്‍റ് വികാരിമാരുടെകൂടെയും സേവനം ചെയ്തിട്ടുണ്ട്. എല്ലാദിവസവും രാവിലെ നാലിന് എഴുന്നേൽക്കുന്ന ഇദ്ദേഹം അഞ്ചോടെ പള്ളിയിൽ എത്തും. വൈകുന്നേരം സന്ധ്യാ പ്രാർഥനയ്ക്കുള്ള 6.45ന്‍റെ മണിമുഴക്കിയശേഷമാണ് വീട്ടിലേക്കുള്ള മടക്കം. ആദ്യ നാളുകളിൽ രാത്രി എട്ടിനുള്ള അത്താഴമണികൂടി മുഴക്കിയതിനുശേഷമാണ് വീട്ടിൽ പോയിരുന്നത്. ദേവാലയ ചടങ്ങുകളെപ്പറ്റി ആഴത്തിലുള്ള അറിവുണ്ടായിരുന്ന അപ്പച്ചൻചേട്ടനെക്കുറിച്ച് വികാരി ഫാ. ഡാർവിൻ വാലുമണ്ണേലിനും അസിസ്റ്റന്‍റ് വികാരി ഫാ. ജോയിസ് തെക്കേവയലിനും മറ്റ് വൈദികർക്കും പറയാൻ നല്ലതുമാത്രം. ഭാര്യ എൽസമ്മയും മക്കളായ സെമിൽ, ജോസ്കുട്ടി, സോണിയ എന്നിവരും നൽകിയ പിന്തുണയാണ് ഒഴിവുപറയാൻ പറ്റാത്ത ഈ ശുശ്രൂഷ പൂർണതയിൽ നിർവഹിക്കാൻ സാധിച്ചതിനു പിന്നിലെന്നും ഇദ്ദേഹം പറഞ്ഞു.

വീടുകളുടെ താക്കോൽ ദാനം

പൂഞ്ഞാർ: ദേശീയ സേവാഭാരതി കേരളം കെ. ചിറ്റിലപ്പള്ളി ഫൗണ്ടേഷന്‍റെ സഹകരണത്തോടെ തല ചായ്ക്കാനൊരിടം പദ്ധതി പ്രകാരം പൂഞ്ഞാർ പഞ്ചായത്ത്‌ അഞ്ചാം വാർഡിൽ ശ്രീരാമ നിലയം വീട്ടിൽ മിനി സാജൻ, രണ്ടാം വാർഡിൽ പാനിക്കോട്ടിൽ മധു ജേക്കബ് എന്നിവർക്ക് നിർമിച്ചു നൽകുന്ന വീടിന്‍റെ താക്കോൽ ദാനം ഇന്നു രാവിലെ ഒന്പതിന് പനച്ചിപ്പാറ എടിഎം ലൈബ്രറി അങ്കണത്തിൽ കേന്ദ്ര മന്ത്രി ജോർജ് കുര്യൻ നിർവഹിക്കും. പൂഞ്ഞാർ സേവാ ഭാരതി പ്രസിഡന്‍റ് എ.എൻ. ഹരികുമാർ അധ്യക്ഷത വഹിക്കും. രാഷ്ട്രീയ സ്വയം സേവക സംഘം വിഭാഗ് സംഘചാലക് പി.പി. ഗോപി സേവാ സന്ദേശം നൽകും. സ്വാമി ദർശനാനന്ദ സരസ്വതി , ജില്ലാ പഞ്ചായത്തംഗം ഷോൺ ജോർജ്, സേവാഭാരതി സംസ്ഥാന സെക്രട്ടറി പി. ശ്രീജിത്ത്‌ മാസ്റ്റർ തുടങ്ങിയവർ പ്രസംഗിക്കും.

മനപ്പാട്ടുകുന്ന് ക്ഷേത്രത്തിൽ ഉത്സവം

ഇളമ്പള്ളി: മനപ്പാട്ടുകുന്ന് ഉമാമഹേശ്വരക്ഷേത്രത്തിൽ ഉത്സവം ഇന്ന് തുടങ്ങും. തന്ത്രി കുടമാളൂർ മരങ്ങാട്ടില്ലം ഗണപതിനമ്പൂതിരിയും മേൽശാന്തി തിരുനക്കര പുത്തൻമഠം കൃഷ്ണൻനമ്പൂതിരിയും കാർമികത്വം വഹിക്കും. ഇന്ന് രാവിലെ എട്ടിന് നാരായണീയപാരായണം, രാത്രി ഏഴിന് ചുറ്റുമതിൽ, പ്രദക്ഷിണവഴി, ആൽത്തറ, റോഡ് എന്നിവയുടെയും മഹാദേവന്‍റെയും ഭുവനേശ്വരിദേവിയുടെയും വാഹനങ്ങളുടെയും സമർപ്പണവും നടത്തും. 7.30ന് അക്ഷരശ്ലോകസദസ്, തിരുവാതിര, ഭക്തിഗാനാമൃതം. നാളെ രാവിലെ 10ന് കലശാഭിഷേകം, രാത്രി 7.30ന് തിരുവാതിര, കൈകൊട്ടിക്കളി, വീരനാട്യം, 8.30ന് കരോക്കെ ഗാനമേള. ആറിന് രാവിലെ 10.30ന് കലശാഭിഷേകം, 12.30ന് തിരുമുമ്പിൽപറ, ഒന്നിന് മഹാപ്രസാദമൂട്ട്, വൈകുന്നേരം 4.30ന് പറയ്‌ക്കെഴുന്നള്ളിപ്പ്, രാത്രി ഏഴിന് ധർമശാസ്താക്ഷേത്രത്തിൽ നിന്ന് താലപ്പൊലി ഘോഷയാത്ര, 10ന് എതിരേൽപ്പ്.

പാന്പോലിയിൽ മോഷണം

എലിക്കുളം: എലിക്കുളം പഞ്ചായത്തിലെ പാന്പോലി ഭാഗത്ത് മോഷണം. ആയലിക്കുന്നേൽ സജിമോൻ മാത്യുവിന്‍റെ വീട്ടിൽ ബുധനാഴ്ച രാത്രി 1.45ാടെ എത്തിയ മോഷ്ടാവ് പുറക് വശത്തെ കതക് തുറക്കുവാൻ ശ്രമിച്ചു. സാധിക്കാതെ വന്നതോടെ വീടിന്‍റെ സൈഡിലിരുന്ന 15 കിലോയോളം വരുന്ന ചെന്പുകലവും മറ്റുസാധനങ്ങളും മോഷ്ടിച്ചു കൊണ്ടുപോകുകയായിരുന്നു. മോഷണം വീട്ടിലെ സിസിടിവിയിൽ തെളിഞ്ഞിട്ടുണ്ട്. പൊൻകുന്നം പോലീസിൽ നൽകിയ പരാതിയെ തുടർന്ന് പോലീസ് സിസിടിവി പരിശോധിക്കുകയും മോഷ്ടാവിന്‍റെ ചിത്രം ശേഖരിക്കുകയും ചെയ്തിട്ടുണ്ട്.

സമ്മര്‍ ക്യാമ്പ് സമാപിച്ചു

പാലാ: പാലാ അല്‍ഫോന്‍സാ കോളജിന്‍റെയും ജൂവല്‍സ് ഓഫ് പത്തനംതിട്ടയുടെയും നേതൃത്വത്തില്‍ അല്‍ഫോന്‍സാ കോളജില്‍ എട്ടാം ക്ലാസ് മുതല്‍ 12ാം ക്ലാസ് വരെയുള്ള കുട്ടികള്‍ക്കായി പത്തു ദിവസമായി നടന്ന സമ്മര്‍ ക്യാമ്പ് സമാപിച്ചു. സമാപന സമ്മേളനത്തിന്‍റെയും കുട്ടികള്‍ക്കുള്ള സിര്‍ട്ടിഫിക്കറ്റ് വിതരണത്തിന്‍റെയും ഉദ്ഘാടനം പ്രിന്‍സിപ്പല്‍ ഡോ. സിസ്റ്റര്‍ മിനിമോള്‍ മാത്യുവിന്‍റെ അധ്യക്ഷതയില്‍ പാലാ മുനിസിപ്പല്‍ ചെയര്‍മാന്‍ തോമസ് പീറ്റര്‍ നിര്‍വഹിച്ചു. ലയന്‍സ് 318 ന്‍റെ ചീഫ് പ്രോജക്ട് കോഓര്‍ഡിനേറ്റര്‍ സിബി മാത്യു പ്ലാത്തോട്ടം, ഡോ. സിസ്റ്റര്‍ മഞ്ജു എലിസബത്ത് കുരുവിള, ഡോ. സോണിയ സെബാസ്റ്റ്യന്‍, ഷീന സെബാസ്റ്റ്യന്‍, സിസ്റ്റര്‍ ജെയിമി ഏബ്രഹാം, ദീപ ജോസ് എന്നിവര്‍ പ്രസംഗിച്ചു. സമ്മര്‍ ക്യാമ്പില്‍ മികച്ച പ്രവര്‍ത്തനം കാഴ്ചവച്ച കുട്ടികളെ ആദരിച്ചു.

പൈങ്ങന മുതൽ 31-ാം മൈൽ വരെ അപകടങ്ങൾ വർധിക്കുന്നു

മുണ്ടക്കയം: കൊട്ടാരക്കര-ദിണ്ഡിഗൽ ദേശീയപാതയിൽ മുണ്ടക്കയം പൈങ്ങന മുതൽ 31ാംമൈൽ വരെയുള്ള ഭാഗങ്ങളിൽ വാഹനാപകടങ്ങൾ വർധിക്കുന്നു. റോഡിന്‍റെ വശങ്ങളിലെ അനധികൃത വാഹന പാർക്കിംഗാണ് അപകടങ്ങൾ വർധിക്കുവാൻ ഇടയാക്കുന്നതെന്ന് ആക്ഷേപം ഉയരുകയാണ്. കഴിഞ്ഞ ഒരാഴ്ചയ്ക്കിടെ നാലോളം അപകടങ്ങളാണ് ഈ ഭാഗത്ത് സംഭവിച്ചത്. റോഡിന്‍റെ വശങ്ങളിൽ മാസങ്ങളായി പാർക്ക് ചെയ്തിരിക്കുന്ന വാഹനങ്ങൾ വരെ ഉണ്ട്. നിരപ്പായ റോഡിലൂടെ വളവ് തിരിഞ്ഞ് വേഗത്തിൽ വാഹനങ്ങൾ വരുമ്പോൾ അനധികൃത വാഹന പാർക്കിംഗ് മൂലം അപകടങ്ങൾ സംഭവിക്കുകയാണെന്ന് നാട്ടുകാർ പറയുന്നു. കൂടാതെ ഇതുമൂലം കാൽനടയാത്രക്കാർക്ക് സുഗമമായി നടക്കാനും സാധിക്കുന്നില്ല. കാലങ്ങളായി റോഡിന്‍റെ വശത്ത് പാർക്ക് ചെയ്തിരിക്കുന്ന വാഹനങ്ങൾ മാറ്റി അപകടങ്ങൾ ഒഴിവാക്കുവാൻ അധികാരികൾ അടിയന്തര നടപടി സ്വീകരിക്കണമെന്ന ആവശ്യം ശക്തമായി.

സെന്‍റ് ഡൊമിനിക്സിൽ ദേശീയ ഗണിതശാസ്ത്ര പ്രതിഭാപരിശീലനം

കാഞ്ഞിരപ്പള്ളി: നാഷണൽ ബോർഡ് ഫോർ ഹയർ മാത്തമാറ്റിക്സിന്‍റെ (എൻബിഎച്ച്എം) സാമ്പത്തിക സഹായത്തോടെ സെന്‍റ് ഡൊമിനിക്സ് കോളജ് ഗണിതശാസ്ത്ര വകുപ്പും മാത്തമാറ്റിക്സ് ടെയ്നിംഗ് ആന്‍ഡ് ടാലന്‍റ് സെർച്ചും (എംടിടിഎസ്) സംയുക്തമായി സംഘടിപ്പിക്കുന്ന ഷഡ്ദിന ദേശീയ ഗണിതശാസ്ത്ര പ്രതിഭാപരിശീലന ശില്പശാലയ്ക്ക് നാളെ തുടക്കമാകും. ഗണിതശാസ്ത്രത്തിൽ ഇന്ത്യയിലെ ഏറ്റവും മികച്ച രണ്ടാം വർഷ ഗണിതശാസ്ത്ര ബിരുദ വിദ്യാർഥികൾക്കായി സംഘടിപ്പിക്കുന്ന ഈ ശില്പശാലയിൽ ഇന്ത്യയിലെ വിവിധ സംസ്ഥാനങ്ങളിൽ നിന്ന് തെരഞ്ഞെടുക്കപ്പെട്ട 40 യുവ ഗണിതശാസ്ത്രപ്രതിഭകൾ പങ്കെടുക്കും. ശില്പശാല രൂപകല്പന ചെയ്തിരിക്കുന്നത് ഗണിതശാസ്ത്ര പരിശീലന രംഗത്ത് രാജ്യത്തെ ഏറ്റവും പ്രശസ്ത സ്ഥാപനമായ എംടിടിഎസ് ആണ്. കേന്ദ്രസർക്കാർ സ്ഥാപനമായ എൻബിഎച്ച്എം സാമ്പത്തിക പിന്തുണ നൽകും. പ്രഫ.ഡോ. വിഷ്ണു നമ്പൂതിരി (ബിജെഎം കോളജ് ചവറ), പ്രഫ.ഡോ.കെ.വി ജയന്തൻ (ഐഐടി മദ്രാസ്), ഡോ. ഗായത്രി പണിക്കർ (വിഐടി വെല്ലൂർ) എന്നീ പ്രഗത്ഭ അധ്യാപകർ ക്ലാസുകൾ നയിക്കും. മാനേജർ റവ.ഡോ. കുര്യൻ താമരശേരി, പ്രിൻസിപ്പൽ ഡോ. സീമോൻ തോമസ്, വകുപ്പു മേധാവി ഡോ. ഷിബു മാനുവൽ, പ്രഫ. റാണി ജോസ് എന്നിവർ നേതൃത്വം നൽകും.

ഈഴവ മഹാസമ്മേളനം 22ന് ഈരാറ്റുപേട്ടയില്‍

പാലാ: എസ്എന്‍ഡിപി യോഗം ജനറല്‍ സെക്രട്ടറിയായി 30 വര്‍ഷം പൂര്‍ത്തിയാക്കിയ വെള്ളാപ്പള്ളി നടേശന് എസ്എന്‍ഡിപി യോഗം മീനച്ചില്‍ യൂണിയന്‍ 22ന് ഈരാറ്റുപേട്ടയില്‍ നടക്കുന്ന മഹാസമ്മേളനത്തില്‍ സ്‌നേഹാദരവ് നല്‍കുമെന്ന് യോഗം മീനച്ചില്‍ യൂണിയന്‍ ഭാരവാഹികളായ സുരേഷ് ഇട്ടിക്കുന്നില്‍, എ.ഡി. സജീവ് വയലാ, എം.ആര്‍. ഉല്ലാസ് എന്നിവര്‍ പത്രസമ്മേളനത്തില്‍ അറിയിച്ചു. 22 ന് ഉച്ചകഴിഞ്ഞ് മൂന്നിന് പിടിഎംഎസ് ഓഡിറ്റോറിയത്തിലാണ് മഹാസമ്മേളനം നടക്കുന്നത്. ഇതോടൊപ്പം വനിതാ സംഘം മീനച്ചില്‍ യൂണിയന്‍ നടത്തിയ ശാക്തേയം, സ്ത്രീശക്തി, ശ്രീശക്തി സമ്മേളനങ്ങളുടെ പരിസമാപ്തിയും നടത്തപ്പെടും. എസ്എന്‍ഡിപി യോഗം വൈസ് പ്രസിഡന്‍റ് തുഷാര്‍ വെള്ളാപ്പള്ളി സമ്മേളനം ഉദ്ഘാടനം ചെയ്യും. യൂണിയന്‍ ചെയര്‍മാന്‍ ഓ.എം. സുരേഷ് ഇട്ടികുന്നേല്‍ അധ്യക്ഷത വഹിക്കും. എസ്എന്‍ ട്രസ്റ്റ് ബോര്‍ഡ് മെമ്പര്‍ പ്രീതി നടേശന്‍ ഭദ്രദീപ പ്രകാശനം നിര്‍വഹിക്കും. സജീഷ് മണലേല്‍, എം.ആര്‍. ഉല്ലാസ്, സെബാസ്റ്റ്യന്‍ കുളത്തുങ്കല്‍ എംഎല്‍എ, ഇന്‍കം ടാക്‌സ് അസിസ്റ്റന്‍റ് കമ്മീഷണര്‍ ജ്യോതിഷ് മോഹന്‍, ബാബുരാജ്, അഡ്വ. സംഗീത വിശ്വനാഥന്‍, എ. ഡി. സജീവ് വയല, കെ.ആര്‍. ഷാജി തലനാട്, സി.ടി. രാജന്‍, അനീഷ് പുല്ലുവേലില്‍, കെ.ജി. സാബു, സി.പി. സുധീഷ് ചെമ്പന്‍കുളം, സജി കൂന്നപ്പള്ളി എന്നിവര്‍ പ്രസംഗിക്കും.

അഖിലേന്ത്യ സെവന്‍സ് ഫുട്‌ബോള്‍ ടൂര്‍ണമെന്‍റിന് നാളെ തുടക്കം

ചങ്ങനാശേരി: 48 വര്‍ഷം പിന്നിടുന്ന എംഎസ്‌സിയുടെ 28-ാമത് അഖിലേന്ത്യ സെവന്‍സ് ഫുട്‌ബോള്‍ ടൂര്‍ണമെന്‍റ് നാളെ വൈകുന്നേരം ആരംഭിക്കും. പുതൂര്‍പ്പള്ളി ഫ്‌ളെഡ്‌ലിറ്റ് സ്റ്റേഡിയത്തില്‍ 18 വരെ 15 ദിവസങ്ങളിലായാണ് മത്സരങ്ങള്‍ ഒരുക്കിയിരിക്കുന്നത്. സ്ഥിരം ഗാലറിക്കു പുറമേ താത്കാലിക ഗാലറികളും ഒരുക്കിയിട്ടുണ്ട്. സംസ്ഥാന, ദേശീയ, വിദേശ താരങ്ങൾ അടങ്ങുന്ന 16 ടീമുകള്‍ ടൂര്‍ണമെന്‍റില്‍ മത്സരിക്കും. നാളെ രാത്രി എട്ടിന് മന്ത്രി വി.എന്‍. വാസവന്‍ ഉദ്ഘാടനം ചെയ്യും. സിനി ആര്‍ട്ടിസ്റ്റ് കലാഭവന്‍ പ്രജോദ് മുഖ്യാതിഥിയാകും. ജോബ് മൈക്കിള്‍ എംഎല്‍എ, നഗരസഭാ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, പുതൂര്‍ പള്ളി മുസ്‌ലിം ജമാഅത്ത് പ്രസിഡന്‍റ് ടി.പി. അബ്ദുല്‍ ഹമീദ്, പഴയപള്ളി മുസ്‌ലിം ജമാഅത്ത് പ്രസിഡന്‍റ് എസ്.എം. ഫൂവാദ്, എച്ച്. മുസമ്മില്‍ തുടങ്ങിയവര്‍ പ്രസംഗിക്കും. 18ന് നടക്കുന്ന സമാപന സമ്മേളനം മന്ത്രി വീണാ ജോര്‍ജ് ഉദ്ഘാടനം ചെയ്യും. കൊടിക്കുന്നില്‍ സുരേഷ് എംപി സമ്മാനദാനം നിര്‍വഹിക്കും. ടൂര്‍ണമെന്‍റില്‍ പ്രവേശനം ടിക്കറ്റ് മൂലമാണ് നിയന്ത്രിക്കുന്നത്. ടൂര്‍ണമെന്‍റിനു പി.എ. നസീര്‍ -ചെയര്‍മാന്‍, നഹാസ് സുലൈമാന്‍ -ജനറല്‍ കണ്‍വീനര്‍, ഇസ്മായില്‍ -കണ്‍വീനര്‍, ഹാരിസ് പി.എം. -പ്രോഗ്രാം കമ്മിറ്റി ചെയര്‍മാന്‍, ക്ലബ് പ്രസിഡന്‍റ് നജീബ് പത്താന്‍, സെക്രട്ടറി അബ്ദുൾ സലാം പറക്കവെട്ടി എന്നിവരുടെ നേതൃത്വത്തില്‍ കമ്മിറ്റിയും പ്രവര്‍ത്തിച്ചുവരുന്നു.

നൂറുമേനി മത്സരങ്ങൾക്ക് തുടക്കം

ചങ്ങനാശേരി: അതിരൂപതയുടെ ബൈബിള്‍ വചന മനഃപാഠ മത്സരമായ നൂറുമേനി സീസണ്‍ 3യ്ക്ക് ചെത്തിപ്പുഴ സെന്‍റ് തോമസ് ആശുപത്രിയില്‍ തുടക്കമായി. ആര്‍ച്ച്ബിഷപ് മാര്‍ ജോര്‍ജ് കോച്ചേരി ഉദ്ഘാടനം നിര്‍ഹിച്ചു. അതിരൂപത ബൈബിള്‍ അപ്പൊസ്‌തലേറ്റ് ഡയറക്ടര്‍ ഫാ. ജോര്‍ജ് മാന്തുരുത്തില്‍, ഹോസ്പിറ്റല്‍ എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത്, അസോസിയേറ്റ് ഡയറക്ടർമാരായ ഫാ. ജോഷി മുപ്പതില്‍ച്ചിറ, ഫാ. ജേക്കബ് അത്തിക്കളം, ഫാ. ജോസ് പുത്തന്‍ചിറ, ഫാ. മാര്‍ട്ടിന്‍ തൈപ്പറമ്പില്‍ എന്നിവര്‍ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]