ADVERTISEMENT

ADVERTISEMENT

ഗ്രാമീണമൂല്യങ്ങള്‍ തിരികെപ്പിടിക്കണം: മുല്ലക്കര രത്‌നാകരന്‍

ചങ്ങനാശേരി: കമ്പോള വത്കരണം രാജ്യത്തെ അപകടകരമായ നിലപാടിലേക്കാണ് നയിക്കുന്നതെന്നും അതിനെ അതിജീവിക്കാന്‍ നമ്മുടെ ഗ്രാമീണ മൂല്യങ്ങള്‍ തിരികെ കൊണ്ടുവരണമെന്നും സിപിഐ സംസ്ഥാന എക്‌സിക്യൂട്ടീവ് അംഗം മുല്ലക്കര രത്‌നാകരന്‍. ജോയിന്‍റ് കൗണ്‍സില്‍ ജില്ലാ സമ്മേളനത്തിന്‍റെ ഭാഗമായുള്ള സാംസ്‌കാരിക സമ്മേളനം ചങ്ങനാശേരി പെരുന്ന ബസ് സ്റ്റാന്‍ഡ് മൈതാനത്ത് ഉദ്ഘാടനം ചെയ്യുകയായിരുന്നു അദ്ദേഹം.

ജോയിന്‍റ് കൗണ്‍സില്‍ ജില്ലാ വൈസ് പ്രസിഡന്‍റ് ബിജു മുളകുപാടം അധ്യക്ഷത വഹിച്ചു. സിപിഐ സംസ്ഥാന എക്‌സിക്യൂട്ടീവ് അംഗം സി.കെ. ശശിധരന്‍ മുഖ്യപ്രഭാഷണം നടത്തി. സിപിഐ ജില്ലാ സെക്രട്ടറി വി.ബി. ബിനു, ജോയിന്‍റ് കൗണ്‍സില്‍ സംസ്ഥാന ജനറല്‍ സെക്രട്ടറി ജയശ്ചന്ദ്രന്‍ കല്ലിങ്കല്‍, കെ. മാധവന്‍ പിള്ള, വി.ടി. തോമസ്, എം.ആര്‍. രഘുദാസ്, ഡി. ബിനില്‍, പി. സുമോദ്, എം.ജെ. ബെന്നി മോന്‍ എന്നിവര്‍ പ്രസംഗിച്ചു.

അരിക്കത്തില്‍ ഓഡിറ്റോറിയത്തില്‍ ഇന്നു നടക്കുന്ന പ്രതിനിധി സമ്മേളനം സിപിഐ ജില്ലാ സെക്രട്ടറി വി.ബി. ബിനു ഉദ്ഘാടനം ചെയ്യും. കോട്ടയം ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ സുഹൃദ് സമ്മേളനം ഉദഘാടനം ചെയ്യും.

ADVERTISEMENT

പാറേച്ചാല്‍ പൊക്കുപാലത്തിന്‍റെ നിര്‍മാണ പ്രവര്‍ത്തനങ്ങള്‍ ദ്രുതഗതിയിൽ

കോട്ടയം: ശക്തമായ കാറ്റില്‍ തകര്‍ന്ന കോട്ടയം-ആലപ്പുഴ ജലപാതയിലെ പാറേച്ചാല്‍ പൊക്കുപാലത്തിന്‍റെ നിര്‍മാണ പ്രവര്‍ത്തനങ്ങള്‍ പുരോഗമിക്കുന്നു. രണ്ടു ദിവസത്തിനകം നിര്‍മാണ പ്രവര്‍ത്തനങ്ങള്‍ പൂര്‍ത്തിയാകും. രണ്ടാഴ്ച മുമ്പുണ്ടായ ശക്തമായ കാറ്റിലും മഴയിലുമാണ് പാലം തകര്‍ന്നത്. പാലത്തിനായി സ്ഥാപിച്ചിരുന്ന തെങ്ങിന്‍കുറ്റികളില്‍ ആറെണ്ണം മാറ്റി സ്ഥാപിച്ചു. നഗരസയുടെ എന്‍ജനിയറിംഗ് വിഭാഗത്തിന്‍റെ നേതൃത്വത്തിലാണ് നിര്‍മാണ പ്രവര്‍ത്തനങ്ങള്‍ നടക്കുന്നത്. നടപ്പാതയുടെ നിര്‍മാണവും പൂര്‍ത്തിയായി. കൈവരി ഉള്‍പ്പെടെയുള്ളവയാണ് ഇനി പൂര്‍ത്തിയാക്കേണ്ടത്. പൊക്കുപാലം തകര്‍ന്നതോടെ കോട്ടയത്തുനിന്ന് ആലപ്പുഴയ്ക്കുള്ള ജലഗതാഗതം തടസപ്പെട്ടിരുന്നു. പാലത്തിന്‍റെ അവശിഷ്ടങ്ങള്‍ നീക്കം ചെയ്യാത്തതിനാലായിരുന്നു ബോട്ട് സര്‍വീസ് തടസപ്പെട്ടത്. തുടര്‍ന്ന് ഇറിഗേഷന്‍ വകുപ്പിന്‍റെ പോളവാരല്‍ യന്ത്രം ഉപയോഗിച്ച് അവശിഷ്ടങ്ങളും തകര്‍ന്ന തെങ്ങിന്‍കുറ്റികളും നീക്കം ചെയ്തു. പാലം തകര്‍ന്നതോടെ പ്രദേശവാസികള്‍ വളരെയധികം ബുദ്ധിമുട്ടിലായിരുന്നു. ആളുകള്‍ക്ക് അക്കരെ ഇക്കരെ കടക്കാനായിരുന്നു ബുദ്ധിമുട്ട്. വള്ളത്തില്‍ കയര്‍കെട്ടിയായിരുന്നു പ്രദേശവാസികളുടെ യാത്ര. സ്‌കൂള്‍ കുട്ടികളടക്കം നൂറിലധികം പേര്‍ ദിവസവും കടന്നുപോകുന്ന പാലമാണിത്. പുത്തന്‍ തോട്ടിന്‍റെ അക്കരെയിക്കരെയുള്ളവര്‍ക്ക് കടന്നുപോകുന്നതിനായി തീര്‍ത്തതാണ് പൊക്കുപാലം. ബോട്ടു കടന്നുവരുമ്പോള്‍ പൊക്കുപാലങ്ങള്‍ ഉയര്‍ത്തുകയാണ് ചെയ്യുന്നത്.

കെസിവൈഎല്‍ സെനറ്റ് സമ്മേളനം ചേർന്നു

കോട്ടയം: കെസിവൈഎല്ലിന്‍റെ 2024-25 പ്രവര്‍ത്തന വര്‍ഷത്തിലെ അഞ്ചാമത് സെനറ്റ് സമ്മേളനം ആര്‍ച്ച്ബിഷപ് മാര്‍ മാത്യു മൂലക്കാട്ട് ഉദ്ഘാടനം ചെയ്തു. കെസിവൈഎല്‍ കോട്ടയം അതിരൂപത പ്രസിഡന്‍റ് ജോണീസ് പി. സ്റ്റീഫന്‍ അധ്യക്ഷത വഹിച്ചു. അതിരൂപത ഡയറക്ടര്‍ ഷെല്ലി ആലപ്പാട്ട്, അതിരൂപത ചാപ്ലയിന്‍ ഫാ. മാത്തുക്കുട്ടി കുളക്കാട്ടുകുടിയില്‍, ജനറല്‍ സെക്രട്ടറി അമല്‍ സണ്ണി, വൈസ് പ്രസിഡന്‍റ് നിതിന്‍ ജോസ്, ജോയിന്‍റ് സെക്രട്ടറി ബെറ്റി തോമസ്, ട്രഷറര്‍ അലന്‍ ജോസഫ് ജോണ്‍, വൈസ് പ്രസിഡന്‍റ് ജാക്‌സണ്‍ സ്റ്റീഫന്‍ തുടങ്ങിയവര്‍ പ്രസംഗിച്ചു. സമ്മേളനത്തില്‍ 40 യൂണിറ്റുകളില്‍ നിന്നായി 96 സെനറ്റ് അംഗങ്ങള്‍ പങ്കെടുത്തു.

സ്‌നേഹഭവനം നിര്‍മിച്ചു നല്‍കി ഏറ്റുമാനൂര്‍ സെന്‍റ് ജോസഫ് ക്‌നാനായ പള്ളി ഇടവകാംഗങ്ങള്‍

ഏറ്റുമാനൂര്‍: സെന്‍റ് ജോസഫ് ക്‌നാനായ കത്തോലിക്കാ ഇടവകാംഗമായ പട്ടിത്താനത്ത് താമസിക്കുന്ന അന്നമ്മ കണിയാകുന്നേലിനും മകന്‍ സന്തോഷിനും താമസയോഗ്യമായ ഭവനം നിര്‍മിച്ചുനല്‍കി മാതൃകയായി ഇടവകയിലെ സെന്‍റ് പോള്‍സ് വാര്‍ഡ് അംഗങ്ങള്‍. ഏകദേശം 15 വര്‍ഷങ്ങള്‍ക്ക് മുമ്പ് വാര്‍ഡ് അംഗങ്ങള്‍ തന്നെ നിര്‍മിച്ചുനല്‍കിയ ഭവനം താമസയോഗ്യമല്ലാത്ത അവസ്ഥ വന്നപ്പോള്‍ വാര്‍ഡ് അംഗങ്ങളോടൊപ്പം ഇടവക കെഎസ്എസ്എസ് യൂണിറ്റിന്‍റെയും മറ്റു ചില അംഗങ്ങളുടെയും സഹായത്തോടെ അഞ്ചു ലക്ഷം രൂപ മുടക്കി വീട് നിര്‍മിച്ചു നല്‍കുകയായിരുന്നു. ഇടവക വികാരി ഫാ. ലൂക്ക് കരിമ്പില്‍ ഭവനം വെഞ്ചരിച്ച് താക്കോല്‍ കൈമാറി. കൂടാരയോഗം കേന്ദ്ര കമ്മിറ്റി ഭാരവാഹികളും വാര്‍ഡ് അംഗങ്ങളും സഹായം നല്‍കിയവരും ചടങ്ങില്‍ പങ്കെടുത്തു. വാര്‍ഡ് പ്രസിഡന്‍റ് പ്രഭ അലക്‌സ് കറത്തേടം സെക്രട്ടറി ഷിന്‍സി മാത്യു കറത്തേടം എന്നിവരോടൊപ്പം വാര്‍ഡ് എക്‌സിക്യൂട്ടീവും ടോമി ഓട്ടപ്പള്ളി, ബെന്നി കറത്തേടം, രാജു പുളിക്കല്‍ എന്നിവരും നേതൃത്വം നല്‍കി.

കൃഷി പ്രോത്സാഹന പദ്ധതി: ധനസഹായം ലഭ്യമാക്കി

കോട്ടയം: കോട്ടയം സോഷ്യല്‍ സര്‍വീസ് സൊസൈറ്റിയുടെ നേതൃത്വത്തില്‍ കൃഷി പ്രോത്സാഹന പദ്ധതിയുടെ ഭാഗമായി ധനസഹായം ലഭ്യമാക്കി. തെള്ളകം ചൈതന്യയില്‍ സംഘടിപ്പിച്ച ധനസഹായ വിതരണ പൊതുസമ്മേളനത്തിന്‍റെ ഉദ്ഘാടനം തിരുവഞ്ചൂര്‍ രാധാകൃഷ്ണന്‍ എംഎല്‍എ നിര്‍വഹിച്ചു. സഹായ മെത്രാന്‍ ഗിവര്‍ഗീസ് മാര്‍ അപ്രേം അധ്യക്ഷത വഹിച്ചു. മോന്‍സ് ജോസഫ് എംഎല്‍എ, സംസ്ഥാന ന്യൂനപക്ഷ വികസന ധനകാര്യ കോര്‍പറേഷന്‍ ചെയര്‍മാന്‍ സ്റ്റീഫന്‍ ജോര്‍ജ്, കെഎസ്എസ്എസ് ഡയറക്ടര്‍ ഫാ. സുനില്‍ പെരുമാനൂര്‍, അതിരമ്പുഴ പഞ്ചായത്ത് പ്രസിഡന്‍റ് ജോസ് ജോസഫ്, കോട്ടയം മുനിസിപ്പല്‍ ചെയര്‍പേഴ്സണ്‍ ബിന്‍സി സെബാസ്റ്റ്യന്‍, ഏറ്റുമാനൂര്‍ മുനിസിപ്പല്‍ ചെയര്‍പേഴ്സണ്‍ ലൗലി ജോര്‍ജ്, കോ-ഓര്‍ഡിനേറ്റര്‍ മേരി ഫിലിപ്പ് എന്നിവര്‍ പ്രസംഗിച്ചു.

പുതുപ്പള്ളി മണ്ഡലത്തോട് സർക്കാർ അവഗണന: ചാണ്ടി ഉമ്മൻ എംഎൽഎ ഉപവാസം നടത്തി

പാമ്പാടി: ജനാധിപത്യമൂല്യങ്ങൾക്കു വില കൽപ്പിക്കുന്നുണ്ടെങ്കിൽ പിണറായി സർക്കാർ ജനങ്ങളിലേക്ക് ഇറങ്ങിവരണമെന്ന് വി.എം. സുധീരൻ. പുതുപ്പള്ളി നിയോജകമണ്ഡലത്തോടുള്ള സർക്കാർ സമീപനത്തിനെതിരേ ചാണ്ടി ഉമ്മൻ എംഎൽഎ നടത്തുന്ന ഉപവാസ സമരം ഉദ്ഘാടനം ചെയ്യുകയായിരുന്നു അദ്ദേഹം. ബ്ലോക്ക് പ്രസിഡന്‍റ് കെ.ബി. ഗിരീശൻ അധ്യക്ഷത വഹിച്ചു. കെ. ഫ്രാൻസിസ് ജോർജ് എംപി, തിരുവഞ്ചൂർ രാധാകൃഷ്ണൻ എംഎൽഎ. രാഷ്‌ട്രീയകാര്യസമിതിയംഗം കെ.സി. ജോസഫ്, കെപിസിസി നിർവാഹക സമിതിയംഗം ജോഷി ഫിലിപ്പ്, ജില്ലാ കൺവീനർ ഫിൽസൻ മാത്യൂസ്, കെപിസിസി സെക്രട്ടറിമാരായ സുധാ കുര്യൻ, കുഞ്ഞ് ഇല്ലംപള്ളി, നിയോജക മണ്ഡലം കൺവിനർ കുഞ്ഞുഞ്ഞു പുതുശേരി, കേരള കോൺഗ്രസ് നിയോജകമണ്ഡലം പ്രസിഡന്‍റ് ആന്‍റണി തുപ്പലഞ്ഞി, സിഎംപി നിർവാഹക സമിതിയംഗം എൻ.ഐ. മത്തായി തുടങ്ങിയവർ പ്രസംഗിച്ചു.

ബസ് ലോബിയുടെ കൂലിക്കൊള്ള: കർണാടകയിൽ പരീക്ഷയെഴുതാൻ പാക്കേജ് സർവീസുമായി നീണ്ടൂർ സ്വദേശി

ഏറ്റുമാനൂർ: കർണാടകയിൽ പൊതു പ്രവേശന പരീക്ഷ എഴുതാൻ പോകാൻ യാത്രാ മാർഗമില്ലാതെ വിഷമിച്ച വിദ്യാർഥികളെ സ്വന്തം ബസിൽ എത്തിച്ച് നീണ്ടൂർ സ്വദേശി. നാളെ മുതൽ 18 വരെ നടക്കുന്ന കർണാടക കോമൺ എൻട്രൻസ് ടെസ്റ്റ് എഴുതാൻ ബംഗളൂരുവിലും മംഗലാപുരത്തും പോകേണ്ട വിദ്യാർഥികൾക്ക് ട്രെയിൻ, ബസ് ടിക്കറ്റ് ലഭിക്കാൻ ഉണ്ടായിരുന്നില്ല. വിഷു, ഈസ്റ്റർ ഉത്സവ സീസണും അവധിക്കാലവുമായതുകൊണ്ടുള്ള തിരക്കിനിടയിലാണ് ഈ ദിവസങ്ങളിൽ പരീക്ഷകൂടി വരുന്നത്. തിരക്കേറിയതോടെ സ്വകാര്യ ബസ് കമ്പനികൾ ടിക്കറ്റ് നിരക്ക് കുത്തനെ ഉയർത്തി. മൂവായിരം രൂപയും അതിനു മുകളിലുമായി ടിക്കറ്റ് നിരക്ക് കുതിച്ചുയർന്നു. ഒരു വിദ്യാർഥി രക്ഷിതാവിനൊപ്പം പോയി വരുമ്പോൾ യാത്രാചെലവു മാത്രം 12,000 രൂപയെങ്കിലും മുടക്കേണ്ടിവരും. ഈ സാഹചര്യം മനസിലാക്കിയാണ് നീണ്ടൂർ സ്വദേശിയും അമേരിക്കൻ ഈഗിൾസ് എന്ന ടൂറിസ്റ്റ് ബസ് കമ്പനി ഉടമയുമായ നിഥിൻ തോട്ടത്തിൽ വിദ്യാർഥികൾക്കും രക്ഷിതാക്കൾക്കും ആശ്വാസമായി രംഗത്തുവരുന്നത്. ടൂർ പാക്കേജ് എന്ന നിലയിൽ പെർമിറ്റ് എടുത്താണ് നിഥിൻ സർവീസ് നടത്തുന്നത്. ഇരുവശത്തേക്കുമുള്ള യാത്രക്കായി നിഥിൻ ഈടാക്കുന്നത് 3,000 രൂപ മാത്രമാണ്. പരീക്ഷ എഴുതേണ്ട സാധാരണക്കാരായ വിദ്യാർഥികളുടെ ബുദ്ധിമുട്ട് മനസിലാക്കിയാണ് സർവീസ് നടത്താൻ തീരുമാനിച്ചതെന്ന് നിഥിൻ പറഞ്ഞു.നിഥിന്‍റെ നല്ല മനസ് പരക്കെ പ്രകീർത്തിക്കപ്പെടുകയാണ് ഇപ്പോൾ. കർണാടകയിലെ ഇംഗ്ലീഷ് ദിനപത്രങ്ങളിൽ ഉൾപ്പെടെ നിഥിന്‍റെ ബസ് സർവീസിന്‍റെ വാർത്തകൾ വന്നു കഴിഞ്ഞു.

അക്രമാസക്തമായി തെരുവുനായ്ക്കള്‍; കുരിശുംമൂട്ടിലെ വ്യാപാരികള്‍ക്കും യാത്രക്കാര്‍ക്കും ഭീഷണിയായി

ചങ്ങനാശേരി: കുരിശുംമൂട്ടിലെത്തുന്ന യാത്രക്കാരുടെമേല്‍ അക്രമാസക്തരായ തെരുവ്‌നായക്കൂട്ടം കുരച്ചുകൊണ്ട് ചാടിവീഴുന്നു. കാല്‍നട യാത്രക്കാരും ഇരുചക്രവാഹന സഞ്ചാരികളും ഭീഷണിയില്‍. സമീപ വ്യാപാരികളും ദുരിതത്തില്‍. കുരിശുംമൂട് ജംഗ്ഷനിലും പരിസരപ്രദേശങ്ങളിലുമാണ് നായകള്‍ പകലും രാത്രികാലങ്ങളിലും കൂട്ടമായി വിഹരിക്കുത്. പുലര്‍ച്ചെ പള്ളികളിലേക്കു പോകുന്നവര്‍ക്കും തെരുവ് നായ്ക്കള്‍ ഏറെ ഭീഷണിയാണ്. വിവിധ ഇറച്ചിക്കടകളില്‍നിന്നും മത്സ്യസ്റ്റാളുകളില്‍ നിന്നുമുള്ള മാലിന്യങ്ങള്‍ ഭക്ഷിച്ചാണ് തെരുവ് നായ്ക്കള്‍ പെറ്റുപെരുകുന്നത്. കുരിശുംമൂട്ടിലെ പ്രമുഖ ബാങ്കിനു സമീപം കടത്തിണ്ണയില്‍ തെരുവ് നായകള്‍ പ്രസവിച്ചു കിടക്കുന്നതും ആളുകള്‍ക്ക് ഭീഷണിയാണ്. ചങ്ങനാശേരി ബൈപാസില്‍ തള്ളുന്ന മാലിന്യം ഭക്ഷിക്കാന്‍ എത്തുന്ന നായ്ക്കള്‍ ഇരുചക്രവാഹന സഞ്ചാരികള്‍ക്കും പ്രഭാത, സായാഹ്ന സവാരിക്കാര്‍ക്കും കടുത്ത ശല്യമാണ്. വാഴപ്പള്ളി വില്ലേജ് ഓഫീസ് പരിസരങ്ങളിലും തെരുവ് നായശല്യം വര്‍ധിച്ചിരിക്കുകയാണ്. ചങ്ങനാശേരി മത്സ്യമാര്‍ക്കറ്റ്, വണ്ടിപ്പേട്ട, ബോട്ട്‌ജെട്ടി, ഫാത്തിമാപുരം, റെയില്‍വേ സ്റ്റേഷന്‍, മതുമൂല തെങ്ങണ, മാമ്മൂട് ഭാഗങ്ങളിലും തെരുവ് നായ്ക്കളുടെ ശല്യം ജനങ്ങള്‍ക്ക് ഭീഷണിയാണ്. തെരുവ് നായ്ക്കളുടെ ബാഹുല്യം നിയന്ത്രിക്കുന്നതിന് തദ്ദേശസ്ഥാപനങ്ങള്‍ കര്‍ശന നടപടി സ്വീകരിക്കണമെന്ന ആവശ്യം ശക്തമാണ്.

ഗ്രേറ്റ് ഗാതറിംഗ് ഓഫ് മിഷന്‍ ചെത്തിപ്പുഴയില്‍ 28 മുതല്‍ മേയ് നാലുവരെ ഓഫീസ് ഉദ്ഘാടനം ചെയ്തു

ചെത്തിപ്പുഴ: ഫിയാത്ത് മിഷന്‍റെ നേതൃത്വത്തില്‍ ചെത്തിപ്പുഴ തിരുഹൃദയ ദേവാലയത്തിലും ക്രിസ്തുജ്യോതി കാമ്പസിലുമായി 28 മുതല്‍ മേയ്‌ നാലുവരെ ഗ്രേറ്റ് ഗാതറിംഗ് ഓഫ് മിഷന്‍ നടക്കും. സ്വാഗതസംഘം ഓഫീസ് അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം ചെയ്തു. ചെത്തിപ്പുഴ ആശ്രമം പ്രിയോറും വികാരിയുമായി ഫാ. തോമസ് കല്ലുകളം അധ്യക്ഷത വഹിച്ചു. മിഷനെ അറിയാനും സ്‌നേഹിക്കാനും വളര്‍ത്താനുമായി 2018 മുതല്‍ ഫിയാത്ത് മിഷന്‍ സംഘടിപ്പിച്ചു വരുന്ന മിഷന്‍ മഹാസംഗമങ്ങളാണ് ഗ്രേറ്റ് ഗാതറിംഗ് ഓഫ് മിഷന്‍ (ജിജിഎം). വിശ്വാസികള്‍ക്ക് കൂടുതല്‍ മിഷന്‍ അവബോധം നല്‍കുകയെന്നതാണ് ഇതിന്‍റെ ലക്ഷ്യം. ഇന്ത്യയിലെ വിവിധ മിഷന്‍ മേഖലകളില്‍ പ്രവര്‍ത്തിക്കുന്ന മിഷണറിമാര്‍ സംഗമത്തില്‍ പങ്കെടുക്കും. വിവിധ സ്ഥലങ്ങളിലെ മിഷന്‍ മേഖലകളെ പരിചയപ്പെടുത്തുന്നതിനായി മിഷന്‍ എക്‌സിബിഷന്‍, മിഷന്‍ പ്രവര്‍ത്തനങ്ങള്‍ക്ക് പോകാന്‍ ആഗ്രഹിക്കുന്നവരെ അതിന് സജ്ജരാക്കുന്ന മിഷന്‍ ധ്യാനങ്ങള്‍, വിവിധ മിഷന്‍ യോഗങ്ങള്‍, വിവിധ സഭാസമൂഹങ്ങളുടെ പ്രതിനിധികളെ ഒരുമിച്ച് ചേര്‍ത്ത് ഭാരത സുവിശേഷീകരണ പ്രവര്‍ത്തനങ്ങളില്‍, എങ്ങനെ കൂട്ടായി യത്‌നിക്കാമെന്ന് പര്യാലോചിക്കുന്ന എക്യുമെനിക്കല്‍ ഗാതറിംഗ്, ഇന്‍റര്‍നാഷണല്‍ മിഷന്‍ ഫിലിം ഫെസ്റ്റിവല്‍ എന്നിവയാണ് ജിജിഎമ്മിലെ പരിപാടികള്‍. ഇംഗ്ലീഷിലും ഹിന്ദിയിലും മലയാളത്തിലുമായി 20 വ്യത്യസ്ത സ്റ്റേജുകളിലായി പരിപാടി നടക്കും.

കെഎൽഎം മേയ്ദിന റാലിയും തൊഴിലാളി മഹാസംഗമവും നടത്തും

ചങ്ങനാശേരി: കേരള ലേബര്‍ മൂവ്‌മെന്‍റിന്‍റെ നേതൃത്വത്തില്‍ ചങ്ങനാശേരിയില്‍ മേയ് ഒന്നിന് മേയ്ദിന റാലിയുടെയും തൊഴിലാളി മഹാസംഗമവും സംഘടിപ്പിക്കും. ഇതിനുള്ള സ്വാഗതസംഘം ഓഫീസ് ഉദ്ഘാടനം അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട് ഉദ്ഘാടനം ചെയ്തു. റാലിയിലും തൊഴിലാളി മഹാസംഗമത്തിലും ചങ്ങനാശേരി അതിരൂപതയുടെ വിവിധ ഭാഗങ്ങളില്‍നിന്നുള്ള ആയിരക്കണക്കിന് തൊഴിലാളികള്‍ അണിചേരും. അതിരൂപത ഡയറക്ടര്‍ ഫാ. ജോണ്‍ വടക്കേക്കളം, ജനറല്‍ സെക്രട്ടറി പി.ജെ. സെബാസ്റ്റ്യന്‍, ഷാജി കോര, ലാലി ബോബന്‍, സ്മിനു ജോസഫ്, ടിസണ്‍ തോമസ്, ജോണ്‍ സെബാസ്റ്റ്യന്‍, കെ.ഡി. ചാക്കോ, കെ.വി. കുര്യാക്കോസ്, ജിമ്മി അഗസ്റ്റിന്‍, സന്തോഷ് തോമസ് എന്നിവര്‍ നേതൃത്വം നല്‍കുന്ന 151 അംഗ കമ്മിറ്റി രൂപീകരിച്ചു പ്രവര്‍ത്തനമാരംഭിച്ചു.

വിശുദ്ധവാര തിരുക്കര്‍മങ്ങള്‍

തൃക്കൊടിത്താനം ഫൊറോനപള്ളി തൃക്കൊടിത്താനം: സെന്‍റ് സേവ്യേഴ്‌സ് ഫൊറോന പള്ളിയില്‍ പെസഹാവ്യാഴ തിരുക്കര്‍മങ്ങള്‍ വൈകുന്നേരം 4.30ന് വിശുദ്ധകുര്‍ബാന, കാലുകഴുകല്‍. വികാരി ജനറാള്‍ മോണ്‍. മാത്യു ചങ്ങങ്കരി മുഖ്യകാര്‍മികത്വം വഹിക്കും. തുടര്‍ന്ന് ദിവ്യകാരുണ്യ ആരാധന. പീഡാനുഭവവെള്ളി രാവിലെ ആറുമുതല്‍ 2.30വരെ ആരാധന. 2.30ന് പൊതുആരാധന. തുടര്‍ന്ന് പീഡാനുഭവ തിരുക്കര്‍മങ്ങള്‍, നഗരികാണിക്കല്‍, സ്ലീവാചുംബനം. വലിയശനി വൈകുന്നേരം അഞ്ചിന് വിശുദ്ധകുര്‍ബാന, മാമ്മോദീസ വ്രതവാഗ്ദാനം, പുത്തന്‍തീ, പുത്തന്‍വെള്ളം വെഞ്ചരിപ്പ്. ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികത്വം വഹിക്കും. ഉയിര്‍പ്പ് തിരുനാള്‍ പുലര്‍ച്ചെ 2.45ന് ഉയര്‍പ്പ് തിരുക്കര്‍മങ്ങള്‍, വിശുദ്ധകുര്‍ബാന. 5.30നും 7.30നും വിശുദ്ധകുര്‍ബാന. വികാരി ഫാ. സെബാസ്റ്റ്യന്‍ പുന്നശേരി കാര്‍മികത്വം വഹിക്കും. പെരുന്ന സെന്‍റ് ആന്‍റണീസ് പള്ളി‍ ചങ്ങനാശേരി: പെരുന്ന സെന്‍റ് ആന്‍റണീസ് പള്ളിയില്‍ പെസഹാവ്യാഴ തിരുക്കര്‍മങ്ങള്‍ വൈകുന്നേരം അഞ്ചിന് നടക്കും. വിശുദ്ധകുര്‍ബാന, കാല്‍കഴുകല്‍ ശുശ്രൂഷ, പൊതുആരാധന. പീഡാനുഭവവെള്ളി രാവിലെ ഏഴിന് കുരിശിന്റെവഴി, 9.30മുതല്‍1.30വരെ ആരാധന, നേര്‍ച്ചഭക്ഷണം, പാനവായന. മൂന്നിന് പീഡാനുഭവ തിരുക്കര്‍മങ്ങള്‍, നഗരികാണിക്കല്‍. വലിയശനി വൈകുന്നേരം അഞ്ചിന് വിശുദ്ധകുര്‍ബാന, പുത്തന്‍തീ, പുത്തന്‍വെള്ളം വെഞ്ചരിപ്പ്, മാമ്മോദീസ വ്രതനവീകരണം. ഉയിര്‍പ്പ് തിരുനാള്‍ ദിനത്തില്‍ പുലര്‍ച്ചെ മൂന്നിന് വിശുദ്ധകുര്‍ബാന, ഉയിര്‍പ്പ് തിരുക്കര്‍മങ്ങള്‍. മുണ്ടത്താനം സെന്‍റ് ആന്‍റണീസ് പള്ളി മുണ്ടത്താനം: സെന്‍റ് ആന്‍റണീസ് പള്ളിയില്‍ പെസഹാ തിരുക്കമങ്ങള്‍ ഉച്ചകഴിഞ്ഞ് മൂന്നിന് ആരംഭിക്കും. കാല്‍കഴുകല്‍ ശുശ്രൂഷക്കുശേഷം പൊതുആരാധന. പീഡാനുഭവവെള്ളി രാവിലെ ഏഴുമുതല്‍ 12വരെ ആരാധന. തുടര്‍ന്ന് പൊതുആരാധന. രണ്ടിന് കുരിശിന്‍റ വഴി. പീഡാനുഭവ വായന, നഗരികാണിക്കല്‍. ശനി രാവിലെ ഏഴിന് വിശുദ്ധകുര്‍ബാന. ഉയിര്‍പ്പ് ഞായര്‍ പുലര്‍ച്ചെ മൂന്നിന് ഉയിര്‍പ്പ് തിരുക്കർമങ്ങള്‍, വിശുദ്ധ കുര്‍ബാന.

കഞ്ചാവുമായി യുവതി പിടിയിൽ

കോട്ടയം: നഗരത്തില്‍ വിൽപ്പനയ്ക്കായി കഞ്ചാവുമായി എത്തിയ യുവതിയെ ജില്ലാ പോലീസ് ചീഫിന്‍റെ ലഹരി വിരുദ്ധ സംഘവും ഈസ്റ്റ് പോലീസും ചേര്‍ന്നു പിടികൂടി. മണിമല ചേറാടിയില്‍ അര്‍ച്ചന രാജനെ (20) യാണ് പിടികൂടിയത്. ഇവരില്‍നിന്ന് 200 ഗ്രാം കഞ്ചാവും പിടിച്ചെടുത്തു. കഴിഞ്ഞ ദിവസം രാത്രി 9.30ന് കോട്ടയം പോലീസ് പരേഡ് ഗ്രൗണ്ട് ഭാഗത്തുവച്ചു സംശയകരമായി കണ്ട ഇവരെ ചോദ്യം ചെയ്യുകയായിരുന്നു. തുടര്‍ന്നു നടത്തിയ പരിശോധനയിലാണ് കഞ്ചാവ് കണ്ടെത്തിയത് പ്രതിയെ അറസ്റ്റ് ചെയ്തു കോടതിയില്‍ ഹാജരാക്കി. കോട്ടയം ജില്ലാ പോലീസ് ചീഫിന്‍റെ നേതൃത്വത്തില്‍ കര്‍ശനമായ ലഹരിപരിശോധനയാണ് ജില്ലയില്‍ നടക്കുന്നത്.

ഇത്തിത്താനം ഇളങ്കാവില്‍ പത്താമുദയ ഉത്സവത്തിന് കൊടിയേറി; 22ന് ഗജമേള

ഇത്തിത്താനം: ഇളങ്കാവ് ദേവീക്ഷേത്രത്തിലെ ഉത്സവത്തിന് കൊടിയേറി. 22ന് പ്രസിദ്ധമായ ഗജമേളയും 23ന് ആറാട്ടും നടക്കും. തന്ത്രി സൂര്യകാലടിമന സൂര്യന്‍ സുബ്രഹ്മണ്യന്‍ ഭട്ടതിരിപ്പാട് കൊടിയേറ്റി. ഇന്ന് രാത്രി 8.10നും 8.40നും തിരുവാതിര, 9.40ന് നൃത്തം. നാളെ വൈകുന്നേരം 6.40ന് നടന വര്‍ഷിണി, 7.40ന് തിരുവാതിര, 8.15ന് സംഗീതസദസ്. 18ന് വൈകുന്നേരം 6.45ന് കഥകളി ലവണാസുരവധം. 19ന് വൈകുന്നേരം 6.45ന് സിദ്ധിസംഗീതം, രാത്രി 8.30ന് താലപ്പൊലി എഴുന്നള്ളത്ത്. 20ന് വൈകുന്നേരം 6.45ന് പ്രഭാഷണം ശങ്കു ടി. ദാസ്. 7.30ന് ഗാനമേള. 7.45ന് ആദരവ് 2025 തിരുവഞ്ചൂര്‍ രാധാകൃഷ്ണന്‍ എംഎല്‍എ വിശിഷ്ടാതിഥിയാകും. 21ന് രാവിലെ 9.30ന് സംഗീതോത്സവം, രാത്രി എട്ടിന് നൃത്തസംഗീത നാടകം ശിവകാമി, 10ന് കാവടിവിളക്ക്, 10.30ന് കളമെഴുത്തുപാട്ട്. 22ന് രാവിലെ 8.30ന് കാവടി പുറപ്പാട്, 10ന് കാവടി കുംഭകുടം എഴുന്നള്ളിപ്പ്, 11ന് കാവടി കുംഭകുടം അഭിഷേകം. വൈകുന്നേരം നാലിന് ഗജമേള. 4.30ന് ഗജരാജപട്ടം സമര്‍പ്പണം മന്ത്രി വി.എന്‍. വാസവന്‍ നിര്‍വഹിക്കും. 23ന് വൈകുന്നേരം നാലിന് ആറാട്ട് പുറപ്പാട്, അഞ്ചിന് നാഗസ്വരക്കച്ചേരി, രാത്രി 10.30ന് കൊടിയിറക്ക്, ആകാശവിസ്മയം.

പ്രതിഷേധ കൂട്ടായ്മ നടത്തി

ചങ്ങനാശേരി: ഓശാനഞായറോടനുബന്ധിച്ച് ഡല്‍ഹി സേക്രഡ് ഹാര്‍ട്ട് പള്ളിയില്‍ കുരിശിന്‍റെ വഴിക്ക് അനുമതി നിഷേധിച്ച ഡല്‍ഹി പോലീസ് നടപടിക്കെതിരേ കത്തോലിക്ക കോണ്‍ഗ്രസ് ചങ്ങനാശേരി ഫൊറോന സമിതി പ്രതിഷേധ പ്രാര്‍ഥനക്കൂട്ടായ്മ നടത്തി. ചങ്ങനാശേരി അതിരൂപത സെക്രട്ടറി സൈബി അക്കര ഉദ്ഘാടനം ചെയ്തു. പ്രസിഡന്‍റ് കുഞ്ഞുമോന്‍ തൂമ്പുങ്കല്‍ അധ്യക്ഷത വഹിച്ചു. ഔസേപ്പച്ചന്‍ ചെറുകാട്, കെ.എസ്. ആന്‍റണി, കെ.പി. മാത്യു, തോമസുകുട്ടി മണക്കുന്നേല്‍, ലിസി ജോസ്, ജോയിച്ചന്‍ പാണ്ടിശേരി, ഷാജി മരങ്ങാട്, ജോഷി കൊല്ലാപുരം, ടോം കായിത്തറ, ബിജു പാണ്ടിശേരി, ജോസഫ് കാര്‍ത്തികപ്പള്ളി, ജെമിനി സുരേഷ്, ടി.പി. മാത്യു, ജോയമ്മ ഷാജന്‍ എന്നിവര്‍ പ്രസംഗിച്ചു.

കടുത്തുരുത്തിയോട് സര്‍ക്കാരിന് അവഗണന; ജനങ്ങളെ അണിനിരത്തി പ്രതിഷേധിക്കും

കടുത്തുരുത്തി: കടുത്തുരുത്തി നിയോജകമണ്ഡലത്തോട് വികസന രംഗത്ത് സംസ്ഥാന സര്‍ക്കാരിന് ചിറ്റമ്മനയമാണെന്ന് മോന്‍സ് ജോസഫ് എംഎല്‍എ. ഒരു വികസനകാര്യവും മണ്ഡലത്തില്‍ നടക്കാന്‍ സമ്മതിക്കില്ലെന്ന സമീപനമാണ് സര്‍ക്കാര്‍ സ്വീകരിക്കുന്നത്. ശത്രുക്കാരോടെന്ന പോലെയാണ് പ്രതിപക്ഷ മണ്ഡലങ്ങളെ സര്‍ക്കാര്‍ കാണുന്നത്. കടുത്തുരുത്തി കേന്ദ്രീയ വിദ്യാലയം നിര്‍മിക്കാനായി എട്ടേക്കര്‍ സ്ഥലം നികത്താന്‍ അനുമതി തേടി സര്‍ക്കാരിനു മുമ്പില്‍ നില്‍ക്കാന്‍ തുടങ്ങിയിട്ട് ഒമ്പത് വര്‍ഷമായി. രേഖയില്‍മാത്രം നിലം എന്ന് കിടക്കുന്ന കടുത്തുരുത്തി പഞ്ചായത്ത് വില കൊടുത്ത് വാങ്ങിയ സ്ഥലം നികത്താനാണ് അനുമതി ലഭിക്കാത്തത്. കേന്ദ്രീയ വിദ്യാലയത്തിന് കേന്ദ്ര സര്‍ക്കാര്‍ അനുവദിച്ച 30 കോടി രൂപ പാഴായിപ്പോകുന്ന അവസ്ഥയാണ്. കടുത്തുരുത്തി - പിറവം റോഡ് തകര്‍ന്നത് നന്നാക്കാനാവാതെ കിടക്കുന്നത് പൊതുമരാമത്ത് - ജലവിഭവ വകുപ്പുകള്‍ തമ്മിലുള്ള തര്‍ക്കം കാരണമാണ്. നാലു വര്‍ഷമായി ഫയലുകള്‍ക്ക് പുറകേ ദൈനംദിനം നടക്കുകയാണ്. കീഴൂര്‍ - അറുന്നൂറ്റിമംഗലം - ഞീഴൂര്‍ റോഡ് വികസനവും നടപ്പാകുന്നില്ല. ഉഴവൂര്‍ - കോട്ടയം മെഡിക്കല്‍ കോളജ് റോഡ് വികസന പദ്ധതിയും എങ്ങുമെത്തിയില്ല. കുറവിലങ്ങാട് സയന്‍സ് സിറ്റിയുടെ ഒന്നാംഘട്ടം പ്രവര്‍ത്തനം പൂര്‍ത്തിയായി വരുന്നതേയുള്ളൂ. ഗ്രാമീണ റോഡുകള്‍ക്ക് ഫണ്ട് അനുവദിക്കുന്നില്ല. മുട്ടുചിറ - എഴുമാന്തുരുത്ത് - വടയാര്‍ - വെള്ളൂര്‍ - മുളക്കുളം റോഡ് വികസനം ഉപേക്ഷിക്കപ്പെട്ട നിലയിലാണ്. സര്‍ക്കാരിന്‍റെ തുടര്‍ച്ചയായ അവഗണനയ്ക്കെതിരേ ജനങ്ങളെ അണിനിരത്തി ശക്തമായ പ്രതിഷേധ സമരങ്ങള്‍ സംഘടിപ്പിക്കുന്ന നിലയിലേക്കാണ് കാര്യങ്ങള്‍ നീങ്ങുന്നതെന്നും മോന്‍സ് ജോസഫ് പറഞ്ഞു.

മാന്‍വെട്ടം സെന്‍റ് ജോര്‍ജ് പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാള്‍

കടുത്തുരുത്തി: മാന്‍വെട്ടം സെന്‍റ് ജോര്‍ജ് പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാള്‍ 21 മുതല്‍ 28 വരെ തീയതികളില്‍ ആഘോഷിക്കും. 24ന് വൈകുന്നേരം തിരുനാളിന് കൊടിയേറും. 27ന് പ്രധാന തിരുനാള്‍ ആഘോഷിക്കും. 21ന് രാവിലെ ആറിന് വിശുദ്ധ കുര്‍ബാന, ബൈബിൾ പ്രതിഷ്ഠ, വൈകുന്നേരം 4.30ന് അഖണ്ഡ ബൈബിള്‍ പാരായണ സമാപനം, അഞ്ചിന് വിശുദ്ധ കുര്‍ബാന. സന്ദേശം - റവ.ഡോ. സെബാസ്റ്റ്യന്‍ കുറ്റിയാനിക്കല്‍. 22ന് രാവിലെ ആറിന് വിശുദ്ധ കുര്‍ബാന, വൈകുന്നേരം അഞ്ചിന് സീറോ മലങ്കര റീത്തില്‍ പാട്ടുകുര്‍ബാന, നൊവേന - ഫാ. ജോബിന്‍ വലിയപറമ്പില്‍. 23 ന് രാവിലെ ആറിനും ഏഴിനും വിശുദ്ധ കുര്‍ബാന, 2.30ന് കര്‍ഷക സമ്മേളനം, അഞ്ചിന് വിശുദ്ധ കുര്‍ബാന, സന്ദേശം - റവ.ഡോ. ആന്‍ഡ്രൂസ് മേക്കാട്ടുകുന്നേല്‍, ആറിന് ഭക്ഷ്യമേള, ഉത്പന്ന ലേലം. 24ന് വൈകുന്നേരം 4.45 ന് കൊടിയേറ്റ് വികാരി റവ.ഡോ. തോമസ് കക്കാട്ടുതടത്തില്‍ കാര്‍മികത്വം വഹിക്കും. അഞ്ചിന് വിശുദ്ധ കുര്‍ബാന, സന്ദേശം - മോണ്‍ ജോസഫ് കണിയോടിക്കല്‍, 6.30ന് സ്‌നേഹവിരുന്ന്, തുടര്‍ന്ന് കലാസന്ധ്യ. 25ന് രാവിലെ ആറിനും ഏഴിനും വിശുദ്ധ കുര്‍ബാന, വൈകുന്നേരം അഞ്ചിന് വിശുദ്ധ കുര്‍ബാന, സന്ദേശം - റവ.ഡോ. സൈറസ് വേലംപറമ്പില്‍, 6.30ന് മെഴുകുതിരി ജപമാല പ്രദക്ഷിണം, ഏഴിന് സമാപനാശീര്‍വാദം. 26ന് രാവിലെ ഏഴിന് വിശുദ്ധ കുര്‍ബാന, തുടര്‍ന്ന് ജോര്‍ജ് നാമധാരികളുടെ സംഗമം. അഞ്ചിന് പാട്ടുകുര്‍ബാന, സന്ദേശം - മോണ്‍ ജോസഫ് തടത്തില്‍, 6.30 ന് പ്രദക്ഷിണം, 8.30ന് സന്ദേശം - ഫാ. ജോണ്‍സണ്‍ നീലനിരപ്പേല്‍, 9.15ന് ആശീര്‍വാദം. പ്രധാന തിരുനാള്‍ ദിനമായ 27ന് 9.30 ന് തിരുനാൾ റാസ - ഫാ. അരുണ്‍ തെരുവില്‍ മുഖ്യ കാര്‍മികത്വം വഹിക്കും. പ്രസംഗം - റവ.ഡോ. ജോര്‍ജ് ഞാറകുന്നേല്‍, 11.30ന് പ്രദക്ഷിണം, തുടര്‍ന്ന് സമാപനാശീര്‍വാദം, പ്രസുദേന്തി വാഴ്ച, കോഴി ലേലം, ഏഴിന് മെഗാഷോ. സമാപനദിനമായ 28ന് രാവിലെ ആറിന് മരിച്ചവര്‍ക്കുവേണ്ടിയുള്ള വിശുദ്ധ കുര്‍ബാന, സെമിത്തേരി സന്ദര്‍ശനം, 7.15ന് വിശുദ്ധ കുര്‍ബാന, തിരുസ്വരൂപ പുനഃപ്രതിഷ്ഠ, കൊടിയിറക്കല്‍.

നന്മ പുരസ്‌കാരം ഒരുമ ചാരിറ്റബിള്‍ സൊസൈറ്റിക്ക്

ഞീഴൂര്‍: ദേശീയ പരിസ്ഥിതി കോണ്‍ഗ്രസ് നല്‍കിവരുന്ന മികച്ച ജീവകാരുണ്യ പ്രവര്‍ത്തനങ്ങള്‍ക്കുള്ള 2024-25 ലെ നന്മ പുരസ്‌കാരം ഒരുമ ചാരിറ്റബിള്‍ സൊസൈറ്റിക്ക് ലഭിച്ചു. കോട്ടയം പ്രസ് ക്ലബ്ബില്‍ ദേശീയ പരിസ്ഥിതി കോണ്‍ഗ്രസ് സംഘടിപ്പിച്ച പരിസ്ഥിതി സെമിനാറില്‍ അവാര്‍ഡ് ഒരുമ പ്രസിഡന്‍റ് കെ.കെ. ജോസ് പ്രകാശ് തിരുവഞ്ചൂര്‍ രാധാകൃഷ്ണന്‍ എംഎല്‍എയില്‍ നിന്ന് ഏറ്റുവാങ്ങി. സിഎസ്‌ഐ മധ്യകേരള മാഹായിടവക ബിഷപ് ഡോ. മലയില്‍ സാബു കോശി ചെറിയാന്‍, ഫ്രാന്‍സിസ് ജോര്‍ജ് എംപി, അഡ്വ. അനില്‍ ബോസ്, ഫാ. സുനില്‍ പെരുമാളൂര്‍, പരിസ്ഥിതി കോണ്‍ഗ്രസ് സംസ്ഥാന പ്രസിഡന്‍റ് ജ്യോതിഷ് കൃഷ്ണ തുടങ്ങിയവര്‍ പങ്കെടുത്തു

ശതോത്തര രജതജൂബിലി സമാപന ആഘോഷങ്ങളുടെ ഫ്ലാഗ് ഓഫ് നടത്തി

കല്ലറ: കല്ലറ പഴയ പള്ളിയുടെ ശതോത്തര രജതജൂബിലിയുടെ സമാപന ആഘോഷങ്ങളുടെ ഫ്ലാഗ് ഓഫ് വെച്ചൂർ സെന്‍റ് ജോർജ് ക്നാനായ കത്തോലിക്ക ദേവാലയ അങ്കണത്തിൽ കൈപ്പുഴ ഫൊറോന വികാരി ഫാ. സാബുമാലിത്തുരുത്തേൽ നിർവഹിച്ചു. കഴിഞ്ഞുപോയ 125 വർഷങ്ങളുടെ അനുസ്മരണയ്ക്കായി 125 വാഹനങ്ങളുടെ അകമ്പടിയോടെയാണ് വാഹന വിളംബരജാഥ നടത്തിയത്. കൈപ്പുഴ ഫൊറോനയിലെ ഒൻപത് ഇടവകകളിൽ വികാരിമാരുടെ നേതൃത്വത്തിൽ വാഹന യാത്രയ്ക്ക് ഊഷ്മളമായ സ്വീകരണം നൽകി. ഉച്ചകഴിഞ്ഞ് മൂന്നിന് ആരംഭിച്ച വാഹന വിളംബരജാഥ വൈകുന്നേരം 7.45ന് കല്ലറ പഴയപള്ളിയിൽ എത്തിച്ചേർന്നു. വികാരി ഫാ. സ്റ്റീഫൻ കണ്ടാരപ്പള്ളി, സഹവികാരി ഫാ. എബിൻ, കൈക്കാരൻമാർ, ജൂബിലി കമ്മിറ്റി കൺവീനർമാർ തുടങ്ങിയവർ നേതൃത്വം നൽകി.

കിളികള്‍ക്ക് ദാഹജലമേകാന്‍ കുട്ടികള്‍ക്ക് കിളിപ്പാത്രം

കുറുപ്പന്തറ: തപസ്യ കലാസാഹിത്യവേദി മാഞ്ഞൂര്‍ യൂണിറ്റും കേരള വൃക്ഷപരിസ്ഥിതി സംരക്ഷണ സമിതിയും ചേര്‍ന്ന് കിളികള്‍ക്ക് ദാഹജലം നല്‍കുവാന്‍ കുട്ടികള്‍ക്ക് കിളിപാത്രം വിതരണം ചെയ്തു. പരിസ്ഥിതി പ്രവര്‍ത്തകന്‍ കെ. ബിനു പരിപാടിയുടെ ഉദ്ഘാടനം നിര്‍വഹിച്ചു. തുടര്‍ന്ന് അദിതി പ്രാണ്‍രാജ് യോഗയും പ്രകൃതിയും എന്ന വിഷയത്തില്‍ പരിസ്ഥിതി ചര്‍ച്ച നയിച്ചു. തപസ്യ യൂണിറ്റ് പ്രസിഡന്‍റ് എന്‍.കെ. രാജന്‍ അധ്യക്ഷത വഹിച്ചു. സംസ്ഥാന ഉപസമിതിയംഗം ദിനീഷ് കെ. പുരുഷോത്തമന്‍, ജില്ലാ പരിസ്ഥിതി കോ-ഓര്‍ഡിനേറ്റര്‍ ഡോ. രാജേഷ് കടമന്‍ചിറ, ഹരിശങ്കര്‍ പ്രസാദ്, കെ.പി. രവീന്ദ്രന്‍ നായര്‍ എന്നിവര്‍ പ്രസംഗിച്ചു.

വയോജന സംഗമം നടത്തി

വടയാർ: ഉണ്ണിമിശിഹാ പള്ളിയിൽ അമ്പത് നോമ്പിലെ വലിയ ആഴ്ചയോടനുബന്ധിച്ച് വയോജന സംഗമം നടത്തി. വയോജനങ്ങൾക്കായി പ്രത്യേക കുമ്പസാരം, വിശുദ്ധകുർബാന, സ്നേഹവിരുന്ന് എന്നിവ സംഘടിപ്പിച്ചു. വികാരി ഫാ. സെബാസ്റ്റ്യൻ ചണ്ണാപ്പിളി, ഫാ. ജോർജ് കുന്നത്ത്, കൈക്കാരൻമാരായ സേവ്യർ തയ്യിൽ, ജോസഫ് തോട്ടപ്പള്ളി, ഫാമിലി യൂണിറ്റ് വൈസ് ചെയർമാൻ ജോസ് മാത്യു ചെറുതോട്ടുപുറം, കേന്ദ്ര സമിതി ജനറൽ സെക്രട്ടറി ജോസഫ് പാലായിൽതയ്യിൽ തുടങ്ങിവർ നേതൃത്വം നൽകി.

കാണിക്കവഞ്ചി കുത്തിത്തുറന്ന് പണം കവർന്നു

തലയോലപ്പറമ്പ്: ഗുരുമന്ദിരത്തിരത്തിന്‍റെ മുന്നിലെ കാണിക്കവഞ്ചി കുത്തിത്തുറന്ന് പണം അപഹരിച്ചു. വെട്ടിക്കാട്ടുമുക്കിലെ എസ്‌എൻഡിപി ശാഖാ യോഗത്തിന്‍റെ കീഴിലുള്ള ഗുരുമന്ദിരത്തിന് മുന്നിൽ സ്ഥാപിച്ചിരുന്ന കാണിക്കവഞ്ചിയുടെ പൂട്ട് തകർത്താണ് പണം അപഹരിച്ചത്. ചൊവ്വാഴ്ച പുലർച്ചെ രണ്ടോടെയായിരുന്നു മോഷണം നടന്നത്. ഹെൽമറ്റ് ധരിച്ച് ബൈക്കിൽ എത്തിയ മോഷ്ടാക്കൾ റോഡ് മുറിച്ച് നടന്നുവന്ന ശേഷം കാണിക്കവഞ്ചിയുടെ താഴ് തകർത്ത് പണം അപഹരിക്കുന്നതിന്‍റെ സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. സംഭവത്തിൽ തലയോലപ്പറമ്പ് പോലീസ് അന്വേഷണം ഊർജിതമാക്കി.

മൂത്തേടത്തുകാവ് ഭഗവതീ ക്ഷേത്രത്തിൽ എരിതേങ്ങ സമർപ്പണം ഭക്തിനിർഭരമായി

വൈക്കം: വൈക്കം മഹാദേവക്ഷേത്രവുമായി അഭേദ്യമായ ബന്ധമുള്ള വൈക്കം മൂത്തേടത്തുകാവ് ഭഗവതി ക്ഷേത്രത്തിലെ വിഷു മഹോത്സവത്തിലെ പ്രധാന ചടങ്ങായ എരിതേങ്ങ സമർപ്പണം ഭക്തിനിർഭരമായി. മധുരാപുരി കത്തിയമർന്നതിന്‍റെ പ്രതീകമായാണ് എരിതേങ്ങ സമർപ്പിക്കുന്നത്. കണ്ണകി ദേവിയായും വൈക്കത്തപ്പന്‍റെ പുത്രി ഭാവത്തിലുമാണ് മൂത്തേടത്തുകാവിലെ പ്രതിഷ്ഠയെന്നാണ് സങ്കല്പം. ഉത്സവത്തിനു ചാരുത പകർന്ന് വിവിധ ഭാഗങ്ങളിൽനിന്ന് ഗരുഡൻ തൂക്കമെത്തി. വാദ്യഘോഷങ്ങൾ, മുത്തുക്കുടകൾ തുടങ്ങിയവയുടെ അകമ്പടിയോടെ നടന്ന താലപ്പൊലികളിൽ നൂറുകണക്കിന് വനിതകൾ അണിനിരന്നു. രാത്രി 12ന് നടന്ന അരിയേറോടെ ഉത്സവത്തിന് സമാപനമായി. മധുരാപുരിയിലേക്കുപോയ ദേവി മൂന്നു മാസങ്ങൾക്ക് ശേഷം കർക്കിടകം ഒന്നിനു തിരിച്ചുവന്ന ശേഷമാണിനി ക്ഷേത്രനട തുറന്നു പൂജകൾ ആരംഭിക്കുക. ക്ഷേത്രം ഊരാഴ്മ ഇണ്ടുംതുരുത്തിമന നീലകണ്ഠൻ നമ്പൂതിരി, ക്ഷേത്ര കാര്യദർശി വി. ഹരിഹരൻ നമ്പൂതിരി, എ.വി. വാസുദേവൻ നമ്പൂതിരി തുടങ്ങിയവർ ഉത്സവ ചടങ്ങുകൾക്ക് നേതൃത്വം നൽകി.

സ്‌കൂട്ടര്‍ മോഷ്ടിച്ചയാളെ പോലീസ് പിടികൂടി

പെരുവ: സ്‌കൂട്ടര്‍ മോഷ്ടിച്ചയാളെ പോലീസ് പിടികൂടി. നിരവധി കേസുകളില്‍ പ്രതിയായ കാരിക്കോട് ഡെന്നീസ് വില്ലയില്‍ റൂബി രാജന്‍ (40) ആണ് വെള്ളൂര്‍ പോലീസിന്‍റെ പിടിയിലായത്. ഞായറാഴ്ച രാവിലെ പതിനൊന്നോടെ മൂര്‍ക്കാട്ടില്‍പടി ഭാഗത്തുനിന്നാണ് സ്‌കൂട്ടര്‍ മോഷണം പോയത്. കാരിക്കോട് സ്വദേശിയുടെതായിരുന്നു സ്‌കൂട്ടര്‍. സമീപത്തെ സിസിടിവി കാമറ പരിശോധിച്ച് നടത്തിയ അന്വേഷണത്തിലാണ് പ്രതിയെ വെള്ളൂര്‍ റെയില്‍വേ സ്റ്റേഷന്‍ ഭാഗത്തുനിന്ന് പോലീസ് കസ്റ്റഡിയിലെടുത്തത്. സ്‌കൂട്ടറും ഇയാളുടെ പക്കല്‍നിന്ന് പോലീസ് കണ്ടെടുത്തു. വെള്ളൂര്‍ എസ്എച്ച്ഒ കെ.എസ്. ലെബിമോന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ഭദ്രദീപ പ്രകാശനം നടത്തി

വൈക്കം: വൈക്കം വെച്ചൂർ അംബികാ മാർക്കറ്റ് തയ്യിൽ ശ്രീധർമശാസ്താ ക്ഷേത്രത്തിൽ എട്ടാമത് ശ്രീമദ് ഭാഗവത സപ്താഹ യജ്ഞം തുടങ്ങി. ക്ഷേത്രം തന്ത്രി ബ്രഹ്മശ്രീ ഹരിഗോവിന്ദൻ നമ്പൂതിരി ഭദ്രദീപ പ്രകാശനം നടത്തി. സുരേഷ് പ്രണവശേരി യജ്ഞാചാര്യനായ സപ്താഹ യജ്ഞത്തിൽ കള്ളിക്കാട് രതീഷ്, കായംകുളം ഗിരീഷ്, ഭരണിക്കാവ് ഹരി എന്നിവർ യജ്ഞ പൗരാണികരാണ്. ഇടയാഴം വൈകുണ്ഠപുരം ശ്രീകൃഷ്ണസ്വാമി ക്ഷേത്രത്തിൽനിന്ന് വാദ്യമേളങ്ങൾ, താലപ്പൊലി എന്നിവയുടെ അകമ്പടിയോടെയാണ് വിഗ്രഹ ഘോഷയാത്ര ക്ഷേത്രത്തിൽ എത്തിയത്. ക്ഷേത്രം മേൽശാന്തി അരുൺ തിരുനല്ലൂർ വിഗ്രഹ പ്രതിഷ്ഠ നടത്തി. ഗ്രന്ഥ സമർപ്പണം ദേവസ്വം പ്രസിഡന്‍റ് യു. ഷാജി നിർവഹിച്ചു. കടുത്തുരുത്തി എസ്‌ഐ ടി.എസ്. റെനീഷ് അൻപൊലിപ്പറ സമർപ്പണം നടത്തി. യജ്ഞാചാര്യൻ സുരേഷ് പ്രണവശേരി ശ്രീമദ് ഭാഗവതമാഹാത്മ്യ പ്രഭാഷണം നടത്തി. 16ന് രാവിലെ 11.30ന് ഉണ്ണിയൂട്ട്, വൈകുന്നേരം ഏഴിന് നാരങ്ങാ വിളക്ക്. 17ന് വൈകുന്നേരം 5.30ന് വിദ്യാഗോപാല മന്ത്രാർച്ചന.18ന് രാവിലെ 10.30നും 12.30 നും മധ്യേ രുഗ്‌മിണി സ്വയംവരം. വൈകുന്നേരം 5.30ന് സർവൈശ്വര്യ പൂജ, 19ന് രാവിലെ ഒൻപതിന് കുചേലോപാഖ്യാനം. 20ന് രാവിലെ ആറിന് 108 നാളികേരത്തിന്‍റെ മഹാഗണപതിഹോമം. 7.15ന് സ്വധാമ പ്രാപ്തി. ക്ഷേത്രം മേൽശാന്തി അരുൺ തിരുനല്ലൂർ ക്ഷേത്രം ഭരണസമിതി പ്രസിഡന്‍റ് യു. ഷാജി, സെക്രട്ടറി എബി മാഞ്ഞുപറമ്പ്, ശാന്തമ്മ, ബിപിൻ ബാബു, രമേഷ്, നാരായണൻ കൊയ്യുവേലി തുടങ്ങിയവർ നേതൃത്വം നൽകും.

കാണിക്കവഞ്ചിയുടെ പൂട്ട് തകർത്ത് പണം കവർന്നു

തോട്ടകം: തോട്ടകം സെന്‍റ് ഗ്രിഗോറിയോസ് പള്ളിയുടെ കവരപ്പാടിനടയിലെ കപ്പേളയുടെ കാണിക്കവഞ്ചി കുത്തിത്തുറന്ന് പണം കവർന്നു. ഇന്നലെ പുലർച്ചെ വഴിയാത്രക്കാരാണ് കാണിക്കവഞ്ചി പൂട്ടുതകർന്ന നിലയിൽ കണ്ടെത്തിയത്. രണ്ടു മാസം മുമ്പാണ് കാണിക്കവഞ്ചി ഒടുവിൽ തുറന്നത്. വൈക്കം പോലീസ് സ്ഥലത്തെത്തി പരിശോധന നടത്തി. തലയോലപ്പറമ്പ് വെട്ടിക്കാട്ടുമുക്കിലെ കാണിക്കവഞ്ചിയുടെ പൂട്ടു തകർത്തും പണം അപഹരിച്ചിരുന്നു. രാത്രി മഴപെയ്ത സമയത്താണ് മോഷണം നടന്നതെന്നാണ് കരുതപ്പെടുന്നത്.

അതിരമ്പുഴ സെന്‍റ് മേരീസ് ഫൊറോനാ പള്ളിയിൽ

അതിരമ്പുഴ: വിശുദ്ധ കുരിശിന്‍റെ തിരുശേഷിപ്പ് പ്രതിഷ്ഠിച്ചിട്ടുള്ള തീർഥാടന കേന്ദ്രമായ അതിരമ്പുഴ സെന്‍റ്മേരീസ് ഫൊറോനാ പള്ളിയിൽ നടന്നുവരുന്ന നാല്പതുമണി ആരാധന ഇന്ന് സമാപിക്കും. രാവിലെ 5.45ന് സപ്രാ, വിശുദ്ധ കുർബാന, ഏഴിന് വിശുദ്ധ കുർബാന. എട്ടിന് ആരാധന ആരംഭം. വൈകുന്നേരം ആറിന് പരിശുദ്ധ കുർബാനയുടെ പ്രദക്ഷിണം. തുടർന്ന് ആശീർവാദത്തോടെ നാല്പതുമണി ആരാധന സമാപിക്കും.നാളെ രാവിലെ 9.30 മുതൽ 12.30 വരെ യുവജന ധ്യാനം ഫാ. റോയി കണ്ണഞ്ചിറ സിഎംഐ നയിക്കും. വൈകുന്നേരം അഞ്ചിന് വിശുദ്ധ കുർബാന, കാൽകഴുകൽ ശുശ്രൂഷ, പൊതു ആരാധന. വികാരി റവ. ഡോ. ജോസഫ് മുണ്ടകത്തിൽ മുഖ്യകാർമികത്വം വഹിക്കും. മാന്നാനം ആശ്രമ ദേവാലയത്തിൽ മാന്നാനം: സെന്‍റ് ജോസഫ്സ് ആശ്രമ ദേവാലയത്തിൽ നാളെ വൈകുന്നേരം 4.30ന് പെസഹാ തിരുക്കർമങ്ങൾ ആരംഭിക്കും. കാൽകഴുകൽ ശുശ്രൂഷ, വിശുദ്ധ കുർബാന- മുഖ്യകാർമികൻ ഫാ. കുര്യൻ ചാലങ്ങാടി സിഎംഐ, തിരുമണിക്കൂർ ആരാധന - ഫാ. സജി പാറക്കടവിൽ സിഎംഐ. ഏറ്റുമാനൂർ ക്രിസ്തുരാജ പള്ളിയിൽ ഏറ്റുമാനൂർ: ഏറ്റുമാനൂർ ക്രിസ്തുരാജ പള്ളിയിൽ നാളെ വൈകുന്നേരം 4.30ന് വിശുദ്ധ കുർബാന, പാദം കഴുകൽ ശുശ്രൂഷ, 6.30ന് ആരാധന. വികാരി ഫാ. ജോസ് മുകളേൽ തിരുക്കർമങ്ങളിൽ കാർമികത്വം വഹിക്കും. മുടിയൂർക്കര തിരുക്കുടുംബ പള്ളിയിൽ മുടിയൂർക്കര: മുടിയൂർക്കര തിരുക്കുടുംബപള്ളിയിൽ പെസഹാ വ്യാഴാഴ്ച വൈകുന്നേരം നാലിന് കാൽ കഴുകൽ ശുശ്രൂഷ , വിശുദ്ധ കുർബാന, തിരുമണിക്കൂർ ആരാധന, ദുഃഖവെള്ളിയാഴ്ച രാവിലെ ആറു മുതൽ 11 വരെ ആരാധന,12 മുതൽ പൊതു ആരാധന, ഉച്ചകഴിഞ്ഞ് മൂന്നിനു പീഡാനുഭവ തിരുക്കർമങ്ങൾ, കുരിശിന്‍റെ വഴി, നഗരി കാണിക്കൽ, സ്ലീവാ വണക്കം, നേർച്ചകഞ്ഞി, വലിയ ശനി രാവിലെ 6.15ന് വിശുദ്ധ കുർബാന, ജ്ഞാനസ്നാന വ്രത നവീകരണം, പുത്തൻ തീ പുത്തൻ വെള്ളം വെഞ്ചരിപ്പ്. വൈകുന്നേരം അഞ്ചിന് യുവജനസംഗമം , ഉയിർപ്പ് ഞായർ പുലർച്ചെ ഉയിർപ്പ് തിരുനാൾ തിരുക്കർമങ്ങൾ. വചന സന്ദേശം, വിശുദ്ധ കുർബാന, പ്രദക്ഷിണം, രാവിലെ 6.30 ന് വിശുദ്ധ കുർബാന വികാരി. ഫാ. ഏബ്രാഹം കാടാത്തുകളം, ഫാ. ജെന്നി കായംകുളത്തുശേരി എന്നിവർ കാർമികത്വം വഹിക്കും. വെട്ടിമുകൾ സെന്‍റ് മേരീസ് പള്ളിയിൽ വെട്ടിമുകൾ: വെട്ടിമുകൾ സെന്‍റ് മേരീസ് പള്ളിയിൽ നാളെ വൈകുന്നേരം നാലിന് വിശുദ്ധ കുർബാന, പാദക്ഷാളന ശുശ്രൂഷ, ആറു മുതൽ ഏഴുവരെ തിരുമണിക്കൂർ. വികാരി ഫാ. ജോസഫ് കളരിക്കൽ കാർമികത്വം വഹിക്കും. കാരിസ് ഭവനിൽ അതിരമ്പുഴ: കാരിസ് ഭവൻ ധ്യാനകേന്ദ്രത്തിൽ നാളെ വൈകുന്നേരം ആറിന് പെസഹാ തിരുക്കർമങ്ങൾ. തുടർന്ന് രാത്രി 12 വരെ ദിവ്യകാരുണ്യ ആരാധന.

കേന്ദ്ര സര്‍ക്കാര്‍ അവഗണന: പ്രവാസികൾ ധര്‍ണ നടത്തി

കോട്ടയം: കേന്ദ്ര സര്‍ക്കാരിന്‍റെ‍ പ്രവാസികളോടുള്ള അവഗണനക്കെതിരേ പ്രവാസി മലയാളി വെല്‍ഫെയര്‍ അസോസിയേഷന്‍ ഇന്ത്യയുടെ നേതൃത്വത്തില്‍ കോട്ടയം ഹെഡ് പോസ്റ്റ് ഓഫീസിന്‍റെ മുമ്പില്‍ നടത്തിയ ധര്‍ണ സംസ്ഥാന പ്രസിഡന്‍റ് ഐസക് പ്ലാപ്പള്ളില്‍ ഉദ്ഘാടനം ചെയ്തു. സംസ്ഥാന ജനറല്‍ സെക്രട്ടറി എ.ആര്‍. സലിം അധ്യക്ഷത വഹിച്ചു. ജേക്കബ് മാത്യു, ബിജു അട്ടിയില്‍, വിജി ജേക്കബ്, റാഫി ഇരിങ്ങാലക്കുട, ഇ. സദാനന്ദന്‍, പി.ജി. രാജന്‍, സുരേഷ് ലാല്‍, പുന്നൂസ് ഏബ്രഹാം എന്നിവര്‍ പ്രസംഗിച്ചു.

പീഡാനുഭവ ഗാന ശുശ്രൂഷ സംഘടിപ്പിച്ചു

കോട്ടയം: കോട്ടയം വൈഎംസിഎയും സിഎംഎസ് കോളജും സംയുക്തമായി സംഘടിപ്പിച്ച പീഡാനുഭവ ഗാന ശുശ്രൂഷ സിഎംഎസ് കോളജ് ഗ്രേറ്റ് ഹാളില്‍ നടന്നു. കോട്ടയം മിക്‌സഡ് വോയിസസ് പീഡാനുഭവ ഗാനങ്ങള്‍ അവതരിപ്പിച്ചു. സിഎംഎസ് കോളജ് ചാപ്ലയിന്‍ റവ. ടിബു ഉമ്മന്‍ ജോര്‍ജ്, റവ. ബിജിന്‍ ജോണ്‍ വര്‍ഗീസ്, വൈഎംസിഎ പ്രസിഡന്‍റ് അനൂപ് സി. ജോണ്‍, റിലീജിയസ് പ്രോഗ്രാംസ് ചെയര്‍മാന്‍ ഡീക്കന്‍ മാത്യു സി. ജോണ്‍, ജനറല്‍ സെക്രട്ടറി ഷൈജു വര്‍ഗീസ് എന്നിവര്‍ പ്രസംഗിച്ചു.

വിഷുവിപണി: കുടുംബശ്രീക്ക് 43,66,315 രൂപ വരുമാനം

കോട്ടയം: ജില്ലയില്‍ കുടുംബശ്രീ ജില്ലാ മിഷന്‍റെ നേതൃത്വത്തില്‍ നടന്ന വിഷു വിപണനമേള സമാപിച്ചു. ജില്ലയില്‍ 79 വിപണനമേളയില്‍നിന്ന് 43,66,315 രൂപയാണ് കുടുംബശ്രീക്ക് വരുമാനം ലഭിച്ചത്. കോട്ടയത്ത് ആദ്യമായി കുടുംബശ്രീ വാണിജ്യാടിസ്ഥാനത്തില്‍ കൃഷി ചെയ്ത തണ്ണിമത്തനും 150 ഏക്കറില്‍ കൃഷി ചെയ്ത കണിവെള്ളരിയുമായിരുന്നു മേളയെ സമ്പന്നമാക്കിയത്. ജില്ലയിലെ മുഴുവന്‍ കുടുംബശ്രീ സിഡി എസുകളുടെ നേതൃത്വത്തിലും തദ്ദേശ സ്ഥാപനങ്ങളിലും കൂടാതെ ജില്ലാ പഞ്ചായത്ത് അങ്കണത്തിലുമായിരുന്നു മേള. വിവിധ സിഡിഎസുകളില്‍നിന്നുള്ള 50ല്‍പ്പരം കൃഷി ഗ്രൂപ്പുകളുടെ വിഷരഹിത തണ്ണിമത്തന്‍, കണിവെള്ളരി, ചീര, പയര്‍ ഉള്‍പ്പെടെ നിരവധി കാര്‍ഷിക ഉത്പന്നങ്ങളും 12 കുടുംബശ്രീ യൂണിറ്റുകളുടെ 50 ഓളം ഉത്പന്നങ്ങളും കുടുംബശ്രീ ബ്രാന്‍ഡ് ഐറ്റംസായ ധ്യാനപ്പൊടികള്‍, കറിപ്പൊടികള്‍, അച്ചാറുകള്‍, പപ്പടം, തുടങ്ങി 21 സാധനങ്ങളും വിവിധ തരം സ്നാക്സും വിപണിയില്‍ ലഭ്യമായിരുന്നു. വിവിധ കുടുംബശ്രീകള്‍ നടത്തിയ പായസമേളകളും മേളയെ ആകര്‍ഷകമാക്കി.

എസിക്ക് തീ പിടിച്ചു

കോട്ടയം: എംജി സര്‍വകലാശാലയുടെ അഡ്മിനിസ്‌ട്രേറ്റീവ് ബ്ലോക്കിലുള്ള ടെലിഫോണ്‍ എക്‌സ്‌ചേഞ്ചിലെ എസിക്ക് തീപിടിച്ചു. ഇന്നലെ ഉച്ചകഴിഞ്ഞ് 2.30നായിരുന്നു സംഭവം. എസി പൂര്‍ണമായും കത്തിനശിച്ചു. ജീവനക്കാര്‍ ഫയര്‍ എസ്റ്റിങ്ക്യൂഷര്‍ ഉപയോഗിച്ച് തീ അണയ്ക്കാന്‍ ശ്രമം നടത്തിയെങ്കിലും കോട്ടയം ഫയര്‍ഫോഴ്‌സ് എത്തിയാണ് തീ അണച്ചത്. ഏകദേശം 20,000 രൂപയുടെ നഷ്ടം കണക്കാക്കുന്നതായും ഷോര്‍ട്ട് സര്‍ക്യൂട്ടാവാം തീ പിടിക്കാന്‍ കാരണമെന്നും സേനാംഗങ്ങള്‍ പറഞ്ഞു.

പി.ടി. ഏബ്രഹാം ജന്മശതാബ്ദി 20ന്

കോട്ടയം: വാഴൂരിന്‍റെ സാമൂഹിക, രാഷ്‌ട്രീയ മണ്ഡലങ്ങളില്‍ സജീവസാന്നിധ്യമായിരുന്ന കടവുംഭാഗം പി.ടി. ഏബ്രഹാമിന്‍റെ (ജോയി) ജന്മശതാബ്ദി 20ന് സംഘടിപ്പിക്കും. വൈകുന്നേരം നാലിനു മണര്‍കാട് ഗ്രാമറ്റം അമ്മവീട് സെന്‍റ് മേരീസ് റിട്രീറ്റ് ഹോമില്‍ നടക്കുന്ന ജന്മശതാബ്ദി അനുസ്മരണ സമ്മേളനം ഗീവര്‍ഗീസ് മാര്‍ ബര്‍ണബാസ് മെത്രാപ്പോലീത്ത ഉദ്ഘാടനം ചെയ്യും. മണര്‍കാട് സെന്‍റ് മേരീസ് യാക്കോബായ കത്തീഡ്രല്‍ സഹവികാരി ഫാ. തോമസ് മറ്റത്തില്‍ അധ്യക്ഷത വഹിക്കും. കുര്യന്‍ തോമസ് അനുസ്മരണ പ്രഭാഷണം നടത്തും. കേരള കോണ്‍ഗ്രസ് രൂപീകരണം മുതല്‍ നേതാവും ഏഴ് വര്‍ഷം കങ്ങഴ പഞ്ചായത്ത് പ്രസിഡന്‍റുമായിരുന്ന കടവുംഭാഗം പി.ടി. ഏബ്രഹാം 11 വര്‍ഷം പഞ്ചായത്ത് വൈസ് പ്രസിഡന്‍റും രണ്ട് പതിറ്റാണ്ടിലേറെ പഞ്ചായത്തംഗവുമായിരുന്നു. വാഴൂര്‍ സര്‍വീസ് കോ-ഓപ്പറേറ്റീവ് ബാങ്ക് സ്ഥാപക പ്രസിഡന്‍റ്, വാഴൂര്‍ ക്ഷീരവ്യവസായ സഹകരണ സംഘം പ്രസിഡന്‍റ്, കറുകച്ചാല്‍ റബര്‍ മാര്‍ക്കറ്റിംഗ് സൊസൈറ്റി ഡയറക്ടര്‍ ബോര്‍ഡ് അംഗം, കങ്ങഴ എംജിഡിഎം ആശുപത്രി അഡ്‌വൈസറി ബോര്‍ഡ് അംഗം, യാക്കോബായ സുറിയാനി സഭ കോട്ടയം ഭദ്രാസന കൗണ്‍സില്‍ അംഗം തുടങ്ങിയ നിലകളില്‍ പ്രവര്‍ത്തിച്ചിരുന്നു.

നാല്പത് മണി ആരാധനയിൽ ആയിരങ്ങൾ; അനുഗ്രഹമാരിയായി ദിവ്യകാരുണ്യപ്രദക്ഷിണം

കുറവിലങ്ങാട്: ആഗോളമരിയൻ തീർഥാടന കേന്ദ്രമായ മർത്ത്മറിയം മേജർ ആർക്കിഎപ്പിസ്‌കോപ്പൽ അർക്കദിയാക്കോൻ ദേവാലയത്തിൽ 40 മണി ആരാധനയിൽ പങ്കെടുക്കാൻ ഭക്തജനപ്രവാഹം. മൂന്ന് ദിനങ്ങളിലായി ക്രമീകരിച്ചിരിക്കുന്ന ആരാധനയിൽ പങ്കെടുക്കാൻ ദൂരസ്ഥലങ്ങളിൽ നിന്നടക്കമുള്ള വിശ്വാസികളാണ് എത്തിച്ചേരുന്നത്. വലിയ ആഴ്ചയിലേക്ക് പ്രവേശിച്ചതോടെ പീഡാനുഭവ സ്മരണകളിൽ നിറഞ്ഞ് ദിവ്യകാരുണ്യസന്നിധിയിലായിരിക്കാൻ ആഗ്രഹിക്കുന്നവരേറെയാണ്. ഇടവകയിൽ പുരാതന കാലം മുതലേ വലിയ ആഴ്ചയിലെ തിങ്കൾ, ചൊവ്വാ, ബുധൻ ദിവസങ്ങളിൽ നടക്കുന്ന 40 മണി ആരാധന ഏറെ പ്രസിദ്ധവുമാണ്. ദിവ്യകാരണ്യപ്രദക്ഷിണത്തിൽ എത്തുന്നതും ആയിരക്കണക്കിന് വിശ്വാസികളാണ്. ഇക്കുറി ആരാധനയുടെ ദിനങ്ങളിലാണ് വാർഷിക ധ്യാനവും ഒരുക്കിയിട്ടുള്ളത്. ഇടവകയിൽ ഹോം മിഷന് നേതൃത്വം നൽകുന്ന ഹോളി ഫാമിലി സന്യാസിനി സമൂഹമാണ് ധ്യാനം നയിക്കുന്നത്. പെസഹാ വ്യാഴാഴ്ചത്തെ തിരുകർമ്മങ്ങൾ രാവിലെ ഏഴിന് ആരംഭിക്കും. വിശുദ്ധ കുർബാനയും കാൽകഴുകൽ ശുശ്രൂഷയും. പൊതു ആരാധന വൈകുന്നേരം അഞ്ച് മുതൽ ആറുവരെ. വെള്ളിയാഴ്ച ഏഴിന് തിരുകർമങ്ങൾ ആരംഭിക്കും. മൂന്നിന് പാനവായന. നാലിന് കോഴാ കപ്പേളയിലേക്ക് കുരിശിന്‍റെ വഴി. ശനിയാഴ്ച ഏഴിന് തിരുക്കർമങ്ങൾ തുടങ്ങും. ഉയിർപ്പ് തിരുക്കർമങ്ങൾ പുലർച്ചെ മൂന്നിന്. 5.30, 7.00. 8.45, 4.30 എന്നീസമയങ്ങളിൽ വിശുദ്ധ കുർബാന.

അരുവിത്തുറ കോളജിൽ സമീക്ഷ 2025 മുഖാമുഖം നടത്തി

അരുവിത്തുറ : ബിരുദ പഠനത്തിൽ സാധ്യതകളുടെ അക്ഷയ ഖനി തുറന്ന് അരുവിത്തുറ സെന്‍റ് ജോർജസ് കോളജിൽ സമീക്ഷ - 2025 മുഖാമുഖം പരിപാടി സംഘടിപ്പിച്ചു. ദേശീയ വിദ്യാഭ്യാസ നയത്തിന്‍റെ ഭാഗമായി അന്താരാഷ്ട്ര നിലവാരത്തിൽ നവീകരിച്ച ഡിഗ്രി ഓണേഴ്സ് കോഴ്സുകളിൽ വിജയകരമായി ബിരുദ പഠനം ആഗ്രഹിക്കുന്ന വിദ്യാർഥികൾക്കും അവരുടെ മാതാപിതാക്കൾക്കുമായാണ് പരിപാടി സംഘടിപ്പിച്ചത്. ഡിഗ്രി ഓണേഴ്സ് കോഴ്സുകൾ സംബന്ധിച്ച് അറിയേണ്ടതെല്ലാം ഉൾപ്പെടുത്തി സംഘടിപ്പിച്ച പരിപാടിയുടെ ഉദ്ഘാടനം എംജി യൂണിവേഴ്സിറ്റി സിൻഡിക്കറ്റ് മെംബർ ഡോ. ജോജി അലക്സ് നിർവഹിച്ചു. പ്രിൻസിപ്പൽ ഡോ. സിബി ജോസഫ്, ബർസാർ ഫാ. ബിജു കുന്നയ്ക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ, ഐക്യുഎസി കോഓർഡിനേറ്റർ ഡോ. സുമേഷ് ജോർജ്, എഫ് വൈ യു ജി പി നോഡൽ ഓഫീസർ ഡോ. സിബിൽ ജോസ് തുടങ്ങിയവർ പ്രസംഗിച്ചു.

സര്‍ക്കാര്‍ നടപടി അപലപനീയം: കത്തോലിക്ക കോണ്‍ഗ്രസ്

പാലാ: ഡല്‍ഹി അതിരൂപതയുടെ നേതൃത്വത്തില്‍ വര്‍ഷങ്ങളായി ഓശാന ഞായറാഴ്ച നടത്താറുണ്ടായിരുന്ന കുരിശിന്‍റെവഴിക്ക് പോലീസ് അനുമതി നിഷേധിച്ചതില്‍ കത്തോലിക്ക കോണ്‍ഗ്രസ് പാലാ രൂപതാസമിതി പ്രതിഷേധിച്ചു. എല്ലാ വര്‍ഷവും ഓശാന ഞായറാഴ്ച ഓള്‍ഡ് ഡല്‍ഹിയിലെ സെന്‍റ് മേരീസ് പള്ളിയില്‍ നിന്ന് ആരംഭിച്ച് നഗരത്തിന്‍റെ വിവിധ ഭാഗങ്ങള്‍ കടന്ന് സേക്രഡ് ഹാര്‍ട്ട് കത്തീഡ്രലില്‍ അവസാനിക്കുന്ന രീതിയില്‍ ദൃശ്യാവിഷ്‌കാരത്തോടെ നടത്തിയിരുന്ന കുരിശിന്‍റെവഴിക്ക് സുരക്ഷാ പ്രശ്‌നങ്ങളുണ്ടാകുമെന്നു കാട്ടി പോലീസ് അനുമതി നി ഷേധിക്കുകയായിരുന്നു. 2022 ല്‍ ജഹംഗീര്‍പുരിയില്‍ ഉണ്ടായ വ്യാപക അക്രമങ്ങളില്‍ പോലീസിനും നാട്ടുകാര്‍ക്കും വന്‍തോതില്‍ പരിക്ക് ഉണ്ടായതിനെ തുടര്‍ന്ന് നിര്‍ത്തി വച്ച ഹനുമാന്‍ ജയന്തി റാലിയുമായി ഇതിനെ തുലനം ചെയ്യാനാവില്ല. ജനാധിപത്യപരമായും ഭരണഘടനപരമായും അര്‍ഹമായ അവകാശങ്ങള്‍ നിഷേധിക്കരുതെന്ന് സമിതി സര്‍ക്കാരിനോട് ആവശ്യപ്പെട്ടു. രൂപത പ്രസിഡന്‍റ് ഇമ്മാനുവല്‍ നിധീരി അധ്യക്ഷത വഹിച്ച യോഗത്തില്‍ റവ. ഡോ. ജോര്‍ജ് വര്‍ഗീസ് ഞാറക്കുന്നേല്‍, രൂപത ജനറല്‍ സെക്രട്ടറി ജോസ് വട്ടുകുളം, ജോയി കണിപറമ്പില്‍, ആന്‍സമ്മ സാബു, അഡ്വ. ജോണ്‍സണ്‍ വീട്ടിയാങ്കല്‍, സി. എം. ജോര്‍ജ്, ജോണ്‍സന്‍ ചെറുവള്ളി, പയസ് കവളമ്മക്കല്‍, സിന്ധു ജയിബു, ടോമി കണ്ണീറ്റുമാലില്‍, സാബു പൂണ്ടികുളം, ബെന്നി കിണറ്റുകര, രാജേഷ് പാറയില്‍, ജോബിന്‍ പുതിയടത്തുചാലില്‍, എഡ്വിന്‍ പാമ്പാറ, ലിബി മണിമല, ബെല്ലാ സിബി, അജിത് അരിമറ്റം തുടങ്ങിയവര്‍ പ്രസംഗിച്ചു.

പാലാ അല്‍ഫോന്‍സയിൽ അഡ്മിഷന്‍ ഹെല്‍പ്പ് ഡെസ്‌ക്

പാലാ: വിദ്യാര്‍ഥികള്‍ക്ക് സമഗ്ര വിദ്യാഭ്യാസ കരിയര്‍ മാര്‍ഗ നിര്‍ദേശങ്ങള്‍ നല്കുന്നതിനും ഉന്നത വിദ്യാഭ്യാസ പ്രവേശനത്തിന് സഹായിക്കുന്നതിനുമായി അഡ്മിഷന്‍ ഹെല്‍പ്പ് ഡെസ്‌ക് പാലാ അല്‍ഫോന്‍സാ കോളജില്‍ പ്രവര്‍ത്തനം ആരംഭിച്ചു. ഇന്ത്യയിലെയും വിദേശത്തെയും വിദ്യാഭ്യാസ അവസരങ്ങളെക്കുറിച്ച് വിദ്യാര്‍ഥികള്‍ക്ക് സമഗ്രമായ മാര്‍ഗ നിര്‍ദേശങ്ങള്‍ ഇവിടെ ലഭ്യമാക്കും. കൂടാതെ വിദ്യാര്‍ഥികള്‍ക്ക് അവരുടെ താല്‍പര്യങ്ങള്‍ക്കും കഴിവുകള്‍ക്കും അനുസരിച്ച് അനുയോജ്യമായ കരിയര്‍ പാതകള്‍ കണ്ടെത്താന്‍ സഹായിക്കുന്ന വിദഗ്ധ കരിയര്‍ കൗണ്‍സലിംഗ് സേവനങ്ങളും ലഭ്യമാക്കുന്നു. പ്രഫഷണല്‍ കരിയര്‍ ഗുരുക്കന്മാര്‍ വിദ്യാര്‍ഥികള്‍ക്ക് വിവിധ കോഴ്‌സുകളെപ്പറ്റിയും അവയുടെ ഭാവി സാധ്യതകളെപ്പറ്റിയും വിശദമായ വിവരങ്ങള്‍ നല്‍കുന്നതാണ്. രാജ്യത്തിന്‍റെ വിവിധ ഭാഗങ്ങളിലെ പുതിയ വിദ്യാഭ്യാസ, തൊഴില്‍ സാധ്യതകളെക്കുറിച്ചുള്ള സമഗ്ര വിവരങ്ങളും ഇവിടെ വിദ്യാര്‍ഥികള്‍ക്ക് ലഭ്യമാകും. വിദേശ സര്‍വകലാശാലകളിലേക്ക് പോകാന്‍ ആഗ്രഹിക്കുന്ന വിദ്യാർഥികള്‍ക്ക് പ്രവേശനം, സ്‌കോളര്‍ഷിപ്പുകള്‍, വിസ നടപടിക്രമങ്ങള്‍, ജീവിതച്ചെലവ് തുടങ്ങിയവയെക്കുറിച്ച് വിദഗ്ധര്‍ വിശദമായി വിവരിച്ചു നല്‍കും. എംജി സര്‍വകലാശാലയുടെ ബിരുദ പ്രോഗ്രാമുകളിലേക്കുള്ള രജിസ്‌ട്രേഷനും പ്രവേശന നടപടിക്രമങ്ങള്‍ക്കുമുള്ള സഹായവും ഈ ഹെല്‍പ്പ് ഡെസ്‌കിലൂടെ ലഭ്യമാകും. പുതിയ ദേശീയ വിദ്യാഭ്യാസ നയത്തെക്കുറിച്ചും അതിന്‍റെ പ്രാധാന്യത്തെക്കുറിച്ചും വിദ്യാർഥികള്‍ക്കും രക്ഷിതാക്കള്‍ക്കും മാര്‍ഗനിര്‍ദേശം ലഭിക്കുന്നതോടൊപ്പം നാല് വര്‍ഷ ബിരുദ പ്രോഗ്രാമിന്‍റെ ഘടന, ഗുണങ്ങള്‍, കരിയര്‍ സാധ്യതകള്‍ എന്നിവയെക്കുറിച്ചും അറിവുകള്‍ ലഭിക്കും. ഈ കേന്ദ്രത്തില്‍ വിദേശ വിദ്യാഭ്യാസ വിദഗ്ധര്‍, എംജി സര്‍വകലാശാല പ്രതിനിധികള്‍, അല്‍ഫോന്‍സ കോളജിലെ അധ്യാപകര്‍ എന്നിവരുടെ സേവനം വിദ്യാര്‍ഥികള്‍ക്ക് ലഭ്യമാകും. ഫോണ്‍ വഴിയും നേരിട്ടും വിദ്യാര്‍ഥികള്‍ക്കും രക്ഷാകര്‍ത്താക്കള്‍ക്കും ഈ സേവനങ്ങള്‍ പ്രയോജനപ്പെടുത്താം. ഉന്നത വിദ്യാഭ്യാസ അവസരങ്ങളും കരിയര്‍ പാതകളും കണ്ടെത്താന്‍ സഹായിക്കുന്ന ഈ ഹെല്‍പ്പ് ഡെസ്‌ക് വിദ്യാര്‍ത്ഥികളുടെ ഭാവി വികസനത്തിന് വഴികാട്ടിയാകുമെന്ന് കോളജ് പ്രിന്‍സിപ്പൽ റവ. ഡോ. ഷാജി ജോണ്‍ പുന്നത്താനത്തുകുന്നേല്‍ പറഞ്ഞു. ഫോണ്‍ 9946141006, 9446049331, 8281716557, 9400273445.

പാലാ ളാലം പഴയ പള്ളി നേതൃത്വം നല്‍കുന്ന ടൗണ്‍ കുരിശിന്‍റെ വഴി ദുഃഖവെള്ളിയാഴ്ച നടക്കും

പാലാ:പുണ്യശ്ലോകനായ ഫാ. ഏബ്രഹാം കൈപ്പന്‍പ്ലാക്കല്‍ ആരംഭിച്ച് ളാലം സെന്‍റ് മേരീസ് പഴയപള്ളി നേതൃത്വം നല്‍കുന്ന നഗരം ചുറ്റിയുള്ള 67ാമത് കുരിശിന്‍റെ വഴിയും ഈശോയുടെ കബറടക്കരൂപം വഹിച്ചുള്ള നഗരികാണിക്കല്‍ പ്രദക്ഷിണവും ദുഃഖവെള്ളിയാഴ്ച ഉച്ചകഴിഞ്ഞ് മൂന്നിന് നടത്തും. വികാരി ഫാ. ജോസഫ് തടത്തില്‍ മുഖ്യ കാര്‍മികത്വം വഹിക്കും. അരുവിത്തുറ സെന്‍റ് ജോര്‍ജ് കോളജ് ബര്‍സാര്‍ ഫാ. ബിജു കുന്നക്കാട്ട് സന്ദേശം നല്‍കും. ഉച്ചകഴിഞ്ഞ് 2.30 നു വൈദികരുടെ നേതൃത്വത്തില്‍ അര്‍ണോസ് പാതിരി രചിച്ച വിഖ്യാതമായ പുത്തന്‍പാനയുടെ 12-ാം പാദ വായനയ്ക്കു ശേഷമാണ് കുരിശിന്‍റെ വഴി ആരംഭിക്കുന്നത്. പട്ടണം പൂര്‍ണമായി ചുറ്റിയുള്ള കുരിശിന്‍റെ വഴി എന്നതാണ് പ്രത്യേകത. പാലായുടെ പരിസര പ്രദേശങ്ങളില്‍ നിന്നായി അനേകായിരങ്ങളാണ് കുരിശിന്‍റെ വഴിയില്‍ പങ്കെടുക്കുന്നത്. ളാലം പഴയ പള്ളിയില്‍ പ്രാരംഭ പ്രാര്‍ഥനയോടെ ആരംഭിക്കുന്ന കുരിശിന്‍റെ വഴി പുത്തന്‍പള്ളിക്കുന്ന് ഇറങ്ങി കൊട്ടാരമറ്റം വഴി ബിഷപ്‌സ് ഹൗസിനു മുന്‍പിലൂടെ കുരിശുപള്ളി, മഹാറാണി ജംഗ്ഷന്‍, കിഴതടിയൂര്‍ ജംക്ഷന്‍ വഴികളിലൂടെ സമാന്തര റോഡ് വഴി തിരികെ പള്ളിയിലെത്തി സമാപിക്കും. കുരിശിന്‍റെ വഴിയുടെ പ്രധാന അഞ്ച് സ്ഥലങ്ങളിലാണ് സന്ദേശങ്ങള്‍ നല്‍കുക. ദുഃഖവെള്ളിയാഴ്ച നടത്തുന്ന കുരിശിന്‍റെ വഴിയില്‍ പുഷ്പാലംകൃതമായ വാഹനത്തില്‍ മിശിഹായുടെ കബറടക്ക തിരുസ്വരൂപം സംവഹിക്കും. കുരിശിന്‍റെ വഴിയുടെ സമാപനത്തില്‍ നേര്‍ച്ചക്കഞ്ഞി വിതരണം ചെയ്യും. പെസഹാ വ്യാഴാഴ്ച രാവിലെ ആറിന് ആരാധന, ജപമാല തുടര്‍ന്ന് ആഘോഷമായ വിശുദ്ധ കുര്‍ബാനയും കാല്‍കഴുകല്‍ ശുശ്രൂഷയും നടക്കും. തിരുക്കര്‍മങ്ങള്‍ക്കും കുരിശിന്‍റെ വഴിക്കും വികാരി ഫാ.ജോസഫ് തടത്തില്‍, പാസ്റ്ററല്‍ അസിസ്റ്റന്‍റ് ഫാ.ജോസഫ് ആലഞ്ചേരില്‍, സഹവികാരിമാരായ ഫാ. സ്‌കറിയ മേനാംപറമ്പില്‍, ഫാ.ആന്‍റണി നങ്ങാപറമ്പില്‍, കൈക്കാരന്മാരായ ടോം ഞാവള്ളി തെക്കേല്‍ പ്രഫ .തങ്കച്ചന്‍ മാത്യു, മാണി കുന്നംകോട്ട്, ബേബിച്ചന്‍ ചക്കാലക്കല്‍, കണ്‍വീനര്‍മാരായ രാജേഷ് പാറയില്‍, ലിജോ ആനിത്തോട്ടം എന്നിവര്‍ നേതൃത്വം നല്‍കും. പത്രസമ്മേളനത്തില്‍ വികാരി. ഫാ ജോസഫ് തടത്തില്‍, പാസ്റ്ററല്‍ അസിസ്റ്റന്‍റ് ഫാ.ജോസഫ് ആലഞ്ചേരില്‍, കൈക്കാരന്‍മാരായ മാണി കുന്നംകോട്ട്, ബേബിച്ചന്‍ ചക്കാലയ്ക്കല്‍, കണ്‍വീനര്‍മാരായ രാജേഷ് പറയില്‍, ലിജോ ആനിത്തോട്ടം എന്നിവര്‍ പങ്കെടുത്തു.

ഇരു കൈവരികളും തകർന്ന് ചീങ്കല്ലേൽ പാലം; അപകടം പതിയിരിക്കുന്നത് എംസി റോഡിൽ

കുറവിലങ്ങാട്: ആയിരക്കണക്കിനു വാഹനങ്ങൾ യാത്രനടത്തുന്ന എംസി റോഡിൽ കണ്ണൊന്നു പിഴച്ചാൽ തോട്ടിലാകും യാത്ര. എംസി റോഡിൽ മോനിപ്പള്ളി ചീങ്കല്ലേൽ ഭാഗത്താണ് ഈ ചതിക്കുഴി. ഇവിടുത്തെ പാലത്തിന്‍റെ ഇരുവശങ്ങളിലേയും കൈവരികൾ തകർന്നൊടിഞ്ഞ നിലയിലാണ്. മോനിപ്പള്ളി ഭാഗത്തേക്കു പോകുന്ന വാഹനങ്ങൾ വളവു തിരിഞ്ഞാലുടൻ എത്തുന്നത് ഈ പാലത്തിലാണ്. ഏത് വശത്തേക്കു വാഹനം അല്പം നിയന്ത്രണം വിട്ടാലും സംരക്ഷണത്തിന് ഒടിഞ്ഞുതകർന്ന കൈവരികൾ മാത്രമാണുള്ളത്. പലതവണ വാഹനങ്ങൾ ഇടിച്ച കൈവരികൾ റോഡിൽനിന്ന് അകന്നുമാറിയ നിലയിലാണ്. കോടികൾ ചെലവഴിച്ചു കെഎസ്ടിപി വികസനം നടത്തിയ റോഡിൽ പാലത്തിന് ശക്തമായ കൈവിരികൾ നിർമിക്കാൻ പോലും കഴിഞ്ഞില്ലെന്നതാണ് സ്ഥിതി. നാട്ടുകാർ ചുവന്ന ചായക്കടലാസുകൾ കെട്ടി അപകടഭീഷണി സംബന്ധിച്ചു മുന്നറിയിപ്പ് നൽകിയിരിക്കുകയാണ്.

സെപ്റ്റിക് ടാങ്ക് പൊട്ടിയൊലിക്കൽ; പൊൻകുന്നം ബസ് സ്റ്റാൻഡിലെ കംഫർട്ട് സ്റ്റേഷൻ തുറക്കുന്നില്ല

പൊൻകുന്നം: പൊൻകുന്നം ബസ് സ്റ്റാൻഡിലെ കംഫർട്ട് സ്റ്റേഷൻ സെപ്റ്റിക് ടാങ്ക് തകരാർ മൂലം ദിവസങ്ങളായി തുറക്കുന്നില്ല. കഴിഞ്ഞയാഴ്ച സെപ്റ്റിക് ടാങ്കിന്‍റെ സ്ലാബുകൾക്കിടയിലൂടെയും മാൻഹോളിലൂടെയും മലിനജലം സ്റ്റാൻഡിലേക്ക് ഒഴുകിപ്പരന്നിരുന്നു. അടുത്തിടെ നന്നാക്കിയ ടാങ്കാണിത്. പൊൻകുന്നത്തെത്തുന്ന നൂറു കണക്കിന് യാത്രക്കാരും പൊതുജനങ്ങളും കംഫർട്ട് സ്റ്റേഷൻ അടച്ചതോടെ ദുരിതത്തിലായിരിക്കുകയാണ്. പൊൻകുന്നത്ത് മറ്റൊരിടത്തും പൊതുശൗചാലയമില്ല. സ്ത്രീകളും കുട്ടികളും പ്രായമായ യാത്രക്കാരുമാണ് ഏറെ ബുദ്ധിമുട്ടിലായിരിക്കുന്നത്. സെപ്റ്റിക് ടാങ്ക് നിറഞ്ഞതിനാലാണ് ശൗചാലയം അടച്ചിട്ടിരിക്കുന്നതെന്നും അടിയന്തരമായി പുതിയ ടാങ്ക് സ്ഥാപിച്ച് ശൗചാലയം പൊതുജനങ്ങൾക്കായി തുറന്നു നൽകുമെന്നും ചിറക്കടവ് പഞ്ചായത്ത് പ്രസിഡന്‍റ് സി.ആർ. ശ്രീകുമാർ പറഞ്ഞു.

സംയുക്ത വാർഷികാഘോഷം നടത്തി

എലിക്കുളം: പാമ്പോലി നവഭാരത് ആർട്‌സ് ആൻഡ് സ്‌പോർട്‌സ് ക്ലബിന്‍റെ സംയുക്ത വാർഷികാഘോഷം മാണി സി. കാപ്പൻ എംഎൽഎ ഉദ്ഘാടനം ചെയ്തു. ആഘോഷക്കമ്മിറ്റി ചെയർമാൻ ജോബി പുളിയങ്കൽ അധ്യക്ഷത വഹിച്ചു. മുൻ ലൈബ്രറി ഭാരവാഹികളെ പാമ്പാടി ബ്ലോക്ക് പ്രസിഡന്‍റ് ബെറ്റി റോയ് ആദരിച്ചു. ജില്ലാ പഞ്ചായത്ത് മുൻ പ്രസിഡന്‍റ് തോമസ് കുന്നപ്പള്ളി പ്രഭാഷണം നടത്തി. ജില്ലാ പഞ്ചായത്തംഗം ജോസ്മോൻ മുണ്ടയ്ക്കൽ, എലിക്കുളം പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്, പഞ്ചായത്തംഗങ്ങളായ എസ്. ഷാജി, മാത്യൂസ് പെരുമനങ്ങാട്ട്, സിൽവി വിൽസൺ, ആശ മോൾ റോയ്, താലൂക്ക് ലൈബ്രറി കൗൺസിൽ വൈസ് പ്രസിഡന്‍റ് കെ.ആർ. മന്മഥൻ, പൈക കൈരളി ഗ്രന്ഥശാല സെക്രട്ടറി റെജി ആയിലുക്കുന്നേൽ, എലിക്കുളം പബ്ലിക് ലൈബ്രറി പ്രസിഡന്‍റ് സി. മനോജ്, താഷ്‌കന്‍റ് ലൈബ്രറി സെക്രട്ടറി സന്ദീപ് ലാൽ, തോമസ് മാത്യു, നവ ഭാരത് ലൈബ്രറി പ്രസിഡന്‍റ് എൻ.ആർ. ബാബു, സെക്രട്ടറി ജസ്റ്റിൻ ജോർജ് എന്നിവർ പ്രസംഗിച്ചു.

ജില്ലയിലെ ആദ്യ ജോബ് സ്റ്റേഷനുമായി കാഞ്ഞിരപ്പള്ളി ബ്ലോക്ക് പഞ്ചായത്ത്

കാഞ്ഞിരപ്പള്ളി: സംസ്ഥാന സര്‍ക്കാരിന്‍റെ കേരള നോളഡ്ജ് ഇക്കോണമി മിഷന്‍ ആരംഭിച്ച ഡിജിറ്റല്‍ വര്‍ക്ക് ഫോഴ്സ് മാനേജ്മെന്‍റ് സിസ്റ്റത്തിന്‍റെ ഭാഗമായ ജോബ്സ്റ്റേഷന്‍ കാഞ്ഞിരപ്പളളി ബ്ലോക്ക് പഞ്ചായത്തില്‍ ആരംഭിച്ചു. അഭ്യസ്തവിദ്യരായ തൊഴില്‍ അന്വേഷകര്‍ക്ക് വളരെ എളുപ്പത്തില്‍ തൊഴില്‍ കണ്ടെത്തുന്നതിന് ആവശ്യമായ സഹായം നല്‍കുകയെന്നതാണ് ജോബ് സ്റ്റേഷനിലൂടെ ലക്ഷ്യമിടുന്നത്. കോട്ടയം ജില്ലയിലെ ആദ്യത്തെ ജോബ് സ്റ്റേഷനാണ് കാഞ്ഞിരപ്പളളിയില്‍ ആരംഭിക്കുന്നത്. കാഞ്ഞിരപ്പളളി ബ്ലോക്കിന് കീഴില്‍ വരുന്ന 127 വാര്‍ഡുകളില്‍ നിന്നു തെരഞ്ഞെടുത്ത ലോക്കല്‍ റിസോഴ്സ് പേഴ്സണ്‍മാര്‍ക്കുളള ഏകദിന പരിശീലനവും നടത്തി. ബ്ലോക്കിന്‍റെ പരിധിയിലുളള ഏഴ് പഞ്ചായത്തുകളിലും ജോബ് സ്റ്റേഷന്‍റെ ഭാഗമായ ഫെസിലിറ്റേഷന്‍ സെന്‍റര്‍ ആരംഭിക്കും. ബ്ലോക്ക് പഞ്ചായത്ത് പ്രസിഡന്‍റ് അജിത രതീഷ് ജോബ് സ്റ്റേഷന്‍റെ ഉദ്ഘാടനം നിര്‍വഹിച്ചു. വൈസ് പ്രസിഡന്‍റ് ജോളി മടുക്കക്കുഴി അധ്യക്ഷത വഹിച്ചു. ബ്ലോക്ക് പഞ്ചായത്തംഗങ്ങളായ ജയശ്രീ ഗോപിദാസ്, ഷക്കീലാ നസീര്‍, ടി.എസ്. കൃഷ്ണകുമാര്‍, പി.കെ. പ്രദീപ്, കെ.എസ്. എമേഴ്സണ്‍, രത്നമ്മ രവീന്ദ്രന്‍, മാഗി ജോസഫ്, ജൂബി അഷറഫ്, അനു ഷിജു, ബ്ലോക്ക് പഞ്ചായത്ത് സെക്രട്ടറി എസ്. ഫൈസല്‍, ജോയിന്‍റ് ബിഡിഒ ടി.ഇ. സിയാദ്, എക്സ്റ്റന്‍ഷന്‍ ഓഫീസര്‍ സി. പ്രശാന്ത് തുടങ്ങിയവർ പ്രസംഗിച്ചു.

പദയാത്രയായി കുരിശിന്‍റെ വഴി നടത്തി യുവജനങ്ങൾ

പൊൻകുന്നം: പൊൻകുന്നം ഫൊറോന എസ്എംവൈഎമ്മിന്‍റെ ആഭിമുഖ്യത്തിൽ യുവജനങ്ങൾ ഫൊറോനയിലെ വിവിധ ഇടവകകളിലൂടെ പദയാത്രയായി കുരിശിന്‍റെ വഴി നടത്തി. കുരിശിന്‍റെ വഴിയിലെ 14 സ്ഥലങ്ങളെ ഓരോ പള്ളികളിലായി സജ്ജീകരിച്ചായിരുന്നു കുരിശിന്‍റെ വഴി നടത്തിയത്. രാവിലെ 7.30ന് ചെങ്കൽ തിരുഹൃദയ പള്ളിയിൽ നിന്ന് ആരംഭിച്ച കുരിശിന്‍റെ വഴി തച്ചപ്പുഴ, നെയ്യാട്ടുശേരി, ഇളമ്പള്ളി, പുല്ലാന്നിത്തകിടി, ആനിക്കാട്, ചെങ്ങളം പന്തമാക്കൽ, ഇളങ്ങുളം വഴി പൊൻകുന്നം തിരുക്കുടുംബ ഫൊറോന പള്ളിയിലെത്തി വൈകുന്നേരം 6.30ന് സമാപിച്ചു. ഏകദേശം 26 കിലോമീറ്ററോളം യുവജനങ്ങൾ കാൽനടയായി സഞ്ചരിച്ചു. ഫാ. സാവിയോ കുരീക്കാട്ട് സമാപന സന്ദേശം നൽകി. ഫാ. ടിബിൻ ചേനപുരയ്ക്കൽ, ഫാ. ജോൺ കുന്നേൽ, ബ്രദർ നെവിൽ പൊടിമറ്റത്തിൽ എന്നിവർ പങ്കെടുത്തു. പൊൻകുന്നം ഫൊറോന എസ്എംവൈഎം ഡയറക്ടർ ഫാ. നോബി വെള്ളാപ്പള്ളി, പ്രസിഡന്‍റ് മെറിൻ സക്കറിയാസ്, വൈസ് പ്രസിഡന്‍റ് ആൽബിൻ ജോയി, ജെനറൽ സെക്രട്ടറി ആൽബി പോൾ, സെക്രട്ടറി അന്ന കാതറിൻ, ഡപ്യൂട്ടി പ്രസിഡന്‍റ് എയ്ബൻ ജേക്കബ്, ജോയിന്‍റ് സെക്രട്ടറി ജെസ്വിൻ ജെയിംസ്, ട്രഷറർ സെബിൻ സിബി, കൗൺസിലർ ഷെബിൻ ജോയി എന്നിവർ നേതൃത്വം നൽകി.

പെൺമക്കളുമായി അമ്മയുടെ ആത്മഹത്യ വീണ്ടും; നടുക്കം മാറാതെ നാട്

ഏറ്റുമാനൂർ: ഒന്നര മാസത്തിനിടെ ഏറ്റുമാനൂരിന് സമീപ പ്രദേശത്ത് രണ്ടാമത്തെ സംഭവം. പെൺമക്കളുമായി അമ്മയുടെ ആത്മഹത്യ വീണ്ടും. ദുരന്തവാർത്തയുടെ നടുക്കത്തിലാണ് നാട്. കണ്ണമ്പുരയിൽ അഞ്ചും രണ്ടും വയസുള്ള പെൺമക്കളുമായി യുവ അഭിഭാഷക ആറ്റിൽ ചാടി മരിച്ചു എന്ന വാർത്ത കേട്ട നാട്ടുകാരുടെ മനസിലേക്ക് ഒന്നര മാസം മുമ്പ് പാറോലിക്കലിൽ നടന്ന സമാനമായ ദുരന്തമാണ് ഓടിയെത്തിയത്. അന്ന് സ്കൂൾ വിദ്യാർഥികളായ പെൺമക്കളെ ചേർത്തു പിടിച്ച് ട്രെയിനിനു മുന്നിലേക്ക് വീട്ടമ്മ ചാടുകയായിരുന്നു. കുടുംബ പ്രശ്നങ്ങൾമൂലം ഭർതൃവീട്ടിൽനിന്ന് സ്വന്തം വീട്ടിൽ വന്നുനിന്ന പാറോലിക്കൽ വടകര വീട്ടിൽ ഷൈനി ജോലി കണ്ടെത്തുന്നതിൽ പരാജയപ്പെടുകയും ഭർത്താവിന്‍റെ മാനസിക പീഡനം തുടരുകയും ചെയ്തതോടെയാണ് മക്കളുമായി ട്രെയിനിനു മുന്നിൽ ചാടി ജീവിതം അവസാനിപ്പിച്ചത്. ഇന്നലെ കണ്ണമ്പുരയിൽ ആറ്റിൽ ചാടാൻ എത്തും മുമ്പ് ജിസ്മോൾ കൈ ഞരമ്പ് മുറിക്കുകയും പിഞ്ചുകുഞ്ഞുങ്ങളെ ഹാർപിക് കുടിപ്പിക്കുകയും ചെയ്തിരുന്നു. ഹൈക്കോടതിയിൽ പ്രാക്ടീസ് ചെയ്യുന്ന അഭിഭാഷകയായ ജിസ്മോൾക്കോ കുടുംബത്തിനോ സാമ്പത്തിക പ്രശ്നങ്ങൾ ഒന്നുമില്ലെന്ന് നാട്ടുകാർ പറയുന്നു. പിന്നെ കുട്ടികളെയുംകൂടി മരണത്തിനു വിട്ടുനൽകി ജീവിതം അവസാനിപ്പിക്കാൻ ജിസ്മോളെ പ്രേരിപ്പിച്ചതെന്തെന്ന് നാട്ടുകാർക്കുമറിയില്ല. കാരണം എന്തുതന്നെയായാലും മക്കളെക്കൂടി മരണത്തിന് വിട്ടുകൊടുത്ത് ജീവിതം അവസാനിപ്പിക്കുന്ന അമ്മമാരുടെ എണ്ണം കൂടിവരുന്നത് ആശങ്ക വർധിപ്പിക്കുന്നു. മണിമലയാറ്റിൽ ചാടിയ യുവതി മരിച്ചു മണിമല: മണിമല വലിയപാലത്തിൽനിന്നു മണിമലയാറ്റിലേക്ക് ചാടിയ യുവതി മരിച്ചു. റാന്നി അത്തിക്കയം കണ്ണമ്പള്ളി വല്യപറമ്പിൽ അമ്പിളി നാരായണൻ (38) ആണ് മരിച്ചത്. തിങ്കളാഴ്ച ഉച്ചകഴിഞ്ഞ് 2.30ാടെയാണ് സംഭവം. പാലത്തിൽനിന്ന് ആറ്റിലേക്കു യുവതി ചാടുന്നത് ശ്രദ്ധയിൽപ്പെട്ട നാട്ടുകാർ രക്ഷപ്രവർത്തനം നടത്തി കരയ്ക്കെത്തിച്ചിരുന്നു. തുടർന്ന് പ്രാഥമിക ശുശ്രൂഷകൾ നൽകിയെങ്കിലും ജീവൻ രക്ഷിക്കാനായില്ല. പോസ്റ്റ്മോർട്ടത്തിനു ശേഷം മൃതദേഹം ബന്ധുക്കൾക്ക് വിട്ടുനൽകും. സംസ്കാരം പിന്നീട്. ഭർത്താവ്: ശ്യാം ലാൽ, എട്ട് മാസം പ്രായമുള്ള മകളുണ്ട്.

വിശുദ്ധ വാരാചരണം

കുടമാളൂര്‍ പള്ളിയില്‍ നീന്തുനേര്‍ച്ച കുടമാളൂര്‍: നൂറ്റാണ്ടുകളുടെ പാരമ്പര്യം പേറി 900 വര്‍ഷ മഹാജൂബിലി സമാപനത്തിലേക്ക് കടക്കുന്ന കുടമാളൂര്‍ സെന്‍റ് മേരീസ് മേജര്‍ ആര്‍ക്കി എപ്പിസ്‌കോപ്പല്‍ തീര്‍ഥാടന ദേവാലയത്തില്‍ പീഡാനുഭവ വാരത്തോടനുബന്ധിച്ചുള്ള പ്രസിദ്ധമായ നീന്തുനേര്‍ച്ച പെസഹാ വ്യാഴം രാവിലെ ആരംഭിക്കും. 900 വര്‍ഷങ്ങള്‍ക്കു മുമ്പ് പള്ളി സ്ഥാപിക്കുന്നതിനായി ആരംഭം കുറിച്ച ചെമ്പകശേരി രാജകുടുംബം തുടങ്ങിവച്ചതാണ് നീന്തുനേര്‍ച്ച. പെസഹാ വ്യാഴം രാവിലെ തുടങ്ങുന്ന നീന്തുനേര്‍ച്ച ദുഃഖവെള്ളി രാത്രിവരെ നീളും. പെസഹാ വ്യാഴാഴ്ചത്തെ മറ്റൊരു നേര്‍ച്ചയാണ് തമുക്ക് നേര്‍ച്ച. കുമാരനല്ലൂര്‍ സ്വദേശികളായ പൂര്‍വികരായ ഇടവകാംഗങ്ങള്‍ക്ക് നൂറ്റാണ്ടുകള്‍ക്ക് മുമ്പ് മുക്തിയമ്മവഴി ലഭിച്ച അനുഗ്രഹത്തിന് നന്ദി സൂചകമായി ആരംഭിച്ചതാണ് തമുക്ക് നേര്‍ച്ച. പാളയും കയറും നേര്‍ച്ച, മുള്‍മുടി ആണി നേര്‍ച്ച, നേര്‍ച്ചക്കഞ്ഞി എന്നിവയും ദുഃഖവെള്ളി ദിനത്തില്‍ ഉണ്ടായിരിക്കും. ദുഃഖവെള്ളിയാഴ്ച കുരിശിന്‍റെ വഴിയും നഗരികാണിക്കലും നൂറ്റാണ്ടുകളുടെ പാരമ്പര്യമുള്ള പീഡാനുഭവ പ്രദര്‍ശന ധ്യാനവുമുണ്ട്. വാഗമണ്‍ കുരിശുമല കയറ്റം വാഗമണ്‍: പുരാതനവും പ്രകൃതിരമണീയവുമായ വാഗമണ്‍ കുരിശുമലയിലേക്ക് തീര്‍ഥാടകരുടെ പ്രവാഹം. വലിയ നോമ്പിലെ എല്ലാ വെള്ളിയാഴ്ചകളിലും കുരിശുമലയിലേക്ക് കുരിശിന്‍റെ വഴിയുണ്ടായിരുന്നു. പെസഹാവ്യാഴം രാത്രിമുതല്‍ കുരിശുമലയിലേക്ക് നാടിന്‍റെ നാനാ ഭാഗത്തു നിന്നും ആയിരക്കണക്കിനു തീര്‍ഥാടകര്‍ എത്തിത്തുടങ്ങും. ദുഃഖവെള്ളിയിലെ തിരുക്കര്‍മങ്ങള്‍ മലയടിവാരത്തിലുള്ള ദേവാലയത്തില്‍ രാവിലെ 7.30ന് ആരംഭിക്കും. തുടര്‍ന്ന് ഒമ്പതിന് മലമുകളിലേക്ക് കുരിശിന്‍റെ വഴി. ഫാ. തോമസ് മണ്ണൂര്‍ പീഡാനുഭവ സന്ദേശം നല്‍കും. രാവിലെ ആറു മുതല്‍ മലമുകളില്‍ നേര്‍ച്ചക്കഞ്ഞി വിതരണവും ഉണ്ടായിരിക്കും. രാത്രി കുരിശുമല കയറുന്നതിനുള്ള ലൈറ്റ് സൗകര്യവും ക്രമീകരിച്ചിട്ടുണ്ട്. കട്ടപ്പന, പാലാ, ഈരാറ്റുപേട്ട, മൂലമറ്റം ഡിപ്പോകളില്‍നിന്നും കെഎസ്ആര്‍ടിസി സ്പെഷല്‍ സര്‍വീസ് രാവിലെമുതല്‍ ഉണ്ടായിരിക്കും. ദുഃഖവെള്ളി രാവിലെ ആറു മുതല്‍ ബസുകള്‍ പോലുള്ള വലിയ വാഹനങ്ങള്‍ വാഗമണ്‍ - കുരിശുമല റോഡില്‍ കടത്തി വിടുന്നതല്ല. ബസുകളില്‍ എത്തുന്ന തീര്‍ഥാടകര്‍ വഴിക്കടവില്‍നിന്ന് കാല്‍നടയായോ ചെറുവണ്ടികളിലോ കുരിശുമലയിലേക്ക് എത്തിച്ചേരണം. തീര്‍ഥാടകര്‍ക്കായി എല്ലാവിധ സൗകര്യങ്ങളും ഒരുക്കിയിട്ടുണ്ടെന്ന് വാഗമണ്‍ പള്ളി വികാരി ഫാ.ആന്‍റണി വാഴയില്‍ അറിയിച്ചു. അരുവിത്തുറ വല്യച്ചന്‍മല അരുവിത്തുറ: സെന്‍റ് ജോര്‍ജ് ഫൊറോന പള്ളിയുടെ കീഴിലുള്ള വല്യച്ചന്‍മലയില്‍ നോമ്പിന്‍റെ എല്ലാ ദിവസവും കുരിശിന്‍റെ വഴിയുണ്ട്. ദുഃഖവെള്ളി രാവിലെ ഒമ്പതിന് മലയടിവാരത്തുനിന്നും ആരംഭിക്കുന്ന കുരിശിന്‍റെ വഴിയില്‍ ആയിരങ്ങള്‍ പ്രാര്‍ഥനാപൂര്‍വം അണിചേരും. മലമുകളില്‍ ഫാ. ജോണ്‍ കണ്ണന്താനം പീഡാനുഭവ സന്ദേശം നല്‍കും. രാവിലെ മുതല്‍ വല്യച്ചന്‍മലയില്‍ നേര്‍ച്ചക്കഞ്ഞി വിതരണവുമുണ്ടായിരിക്കും.

മെതിയന്ത്രം വന്നില്ല; കൊയ്തുകൂട്ടിയ കറ്റ കര്‍ഷകന്‍ കത്തിച്ചു

കോട്ടയം: നീലംപേരൂര്‍ മുക്കോടിയില്‍ കൊയ്തുകൂട്ടിയ രണ്ടേക്കര്‍ പാടത്തെ കറ്റ ഗതികെട്ട കര്‍ഷകന്‍ ചാമ്പലാക്കാന്‍ നിര്‍ബന്ധിതനായി. ഈര തൊടുകയില്‍ സോണിച്ചനാണ് പാടത്ത് കൊയ്തടുക്കിയ കറ്റ ഹൃദയവ്യഥയോടെ തീയിട്ടുനശിപ്പിച്ചത്. കൊയ്ത്ത് യന്ത്രം കിട്ടാതെ വന്നതോടെ സോണിച്ചന്‍ 40 തൊഴിലാളികളെ ഇറക്കി രണ്ടു ദിവസം കൊയ്തു. ചുമട്ടുകാരെ ഉപയോഗിച്ച് കറ്റ മറ്റൊരാളുടെ പാടത്ത് കൂട്ടി. ഇത്തരത്തില്‍ ഒരു ലക്ഷം രൂപയോളം ചെലവ് ചെയ്തതിനുശേഷം മെതിയന്ത്രം വരാന്‍ ഒരാഴ്ച കാത്തിരുന്നു. നാളെ വരാം എന്ന മട്ടില്‍ യന്ത്രം നടത്തിപ്പുകാര്‍ പല തവണ ഉറപ്പുനല്‍കിയതല്ലാതെ നടപടിയുണ്ടായില്ല. വേനല്‍മഴ അതിശക്തമായ സാഹചര്യത്തില്‍ പാടത്തെ കറ്റ ബാധ്യതയായപ്പോള്‍ മാസങ്ങളുടെ അധ്വാനവും ചെലവും ചാമ്പലാക്കാന്‍ സോണിച്ചന്‍ നിര്‍ബന്ധിതനായി. കുറഞ്ഞത് 60 ക്വിന്‍റല്‍ നെല്ലാണ് ചാരമാക്കിയത്. കഴിഞ്ഞ മാസം കൊയ്ത നാല്‍പതു ക്വിന്‍റല്‍ നെല്ല് അഞ്ചു കിലോ കിഴിവോടെ മില്ലുകാര്‍ക്ക് കൊടുത്തു. ഇനിയും ശേഷിക്കുന്ന രണ്ടേക്കറിലെ നെല്ല് എന്തെടുക്കുമെന്നറിയാതെ ആശങ്കയിലാണ് സോണിച്ചന്‍. സമയബന്ധിതമായി യന്ത്രം എത്താത്ത സാഹചര്യത്തില്‍ ഒരിടത്തും കൊയ്ത്ത് പ്രായോഗികമാകില്ല. മറ്റൊരു മാര്‍ഗവുമില്ലാതെ വിളവുനിറഞ്ഞ നെല്‍പ്പാടം ഒന്നാകെ തീയിടേണ്ടി വരുമോ എന്ന ആശങ്കയിലാണ് ഈ കര്‍ഷകര്‍. സോണിച്ചന്‍റെ മാത്രമല്ല, മുക്കോടി പാടശേഖരത്തിലെ 50 ഏക്കറില്‍ 25 ഏക്കറിലും കൊയ്ത്ത് നടന്നിട്ടില്ല. പാടത്ത് വെള്ളം നിറഞ്ഞതോടെ ഉള്‍പ്രദേശത്തെ പാടങ്ങളില്‍ പുഞ്ചക്കൊയ്ത്തും വില്‍പനയും നടക്കാനിടയില്ല. ഈര, നീലംപേരൂര്‍, കുറിച്ചി പ്രദേശങ്ങളിലെ ഇരുന്നൂറ് ഏക്കര്‍ പാടത്ത് കൊയ്ത്ത് മുടങ്ങാനാണ് സാധ്യത.

ഇഞ്ചിയാനി മേഖലയിൽ വാട്സാപ്പ് നമ്പർ ഹാക്ക് ചെയ്ത് തട്ടിപ്പ്

മുണ്ടക്കയം: ഇഞ്ചിയാനി മേഖല കേന്ദ്രീകരിച്ച് നടന്ന സൈബർ സാമ്പത്തിക തട്ടിപ്പിൽ പണം നഷ്ടമായത് നിരവധി പേർക്ക്. ഇഞ്ചിയാനി ഹോളി ഫാമിലി പള്ളിയും ഇതിനോടനുബന്ധിച്ച് പ്രവർത്തിക്കുന്ന സ്ഥാപനങ്ങളും ലക്ഷ്യമിട്ടാണ് പ്രധാനമായും സൈബർ ആക്രമണമുണ്ടായത്. പതിവായി പങ്കെടുക്കുന്ന ഓൺലൈൻ കൂട്ടായ്മയുടെ നേതൃത്വത്തിൽ പ്രാർഥന ഉണ്ടെന്നും ഇതിൽ പങ്കെടുക്കണമെന്നും അറിയിച്ച് ഇവിടത്തെ ഒരു കന്യാസ്ത്രീക്കാണ് വാട്സാപ്പിൽ മെസേജ് ലഭിക്കുന്നത്. പതിവായി പങ്കെടുക്കാറുള്ള പ്രാർഥന കൂട്ടായ്മ ആയതുകൊണ്ട് മറ്റൊന്നും ചിന്തിക്കാതെ ലിങ്കിൽ ക്ലിക്ക് ചെയ്തു. നിമിഷങ്ങൾക്കുള്ളിൽ സിസ്റ്ററുടെ ഫോൺ ഹാക്ക് ആകുകയായിരുന്നു. പിന്നീട് കന്യാസ്ത്രീയുടെ ഫോണിലെ കോൺടാക്ട് ലിസ്റ്റിലുള്ള പല ആളുകൾക്കും ഹാക്ക് ചെയ്യപ്പെട്ട നമ്പരിൽ നിന്നു മെസേജ് എത്തുകയായിരുന്നു. അടിയന്തരമായി പണം വേണമെന്ന് ആവശ്യപ്പെട്ടുകൊണ്ടുള്ള മെസേജാണ് പല ആളുകൾക്കുമെത്തിയത്. സിസ്റ്ററിന്‍റെ സ്വന്തം നമ്പറിൽ നിന്ന് മെസേജ് എത്തിയതോടെ പല ആളുകളും പണം അയച്ചു. പിന്നീട് അന്വേഷിച്ചപ്പോഴാണ് ഇത് സൈബർ തട്ടിപ്പാണെന്ന് മനസിലായത്. സംഭവം ശ്രദ്ധയിൽപ്പെട്ടതോടെ മുണ്ടക്കയം പോലീസിലും സൈബർ സെല്ലിലും പരാതി നൽകുകയായിരുന്നു. ഇപ്പോഴും പല ആളുകൾക്കും ഇത്തരത്തിൽ മെസേജുകൾ ലഭിക്കുന്നുണ്ടെന്ന് നാട്ടുകാർ പറയുന്നു. സമ്മാനമായ രീതിയിൽ ഇഞ്ചിയാനി മേഖലയിൽ നിരവധി ഫോൺ നമ്പരുകൾ ഹാക്ക് ചെയ്ത് അവരുടെ വാട്സാപ്പിൽ നിന്നു പണം ചോദിച്ചുകൊണ്ടുള്ള മെസേജ് എത്തുന്നതായി നാട്ടുകാർ പറഞ്ഞു. ഇഞ്ചിയാനി മേഖലയിൽ മാത്രം ഒന്നര ലക്ഷത്തോളം രൂപയാണ് ഇങ്ങനെ നഷ്ടപ്പെട്ടത്. പ്രദേശവാസികളുടെ വിവരങ്ങൾ അറിയാവുന്ന ആളുകൾ തന്നെയാവാം തട്ടിപ്പിന് പിന്നിലെന്നാണു സംശയം. ഇത്തരം തട്ടിപ്പുകൾ വ്യാപിക്കാതിരിക്കാൻ പോലീസ് കർശന നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

തിടനാട് പഞ്ചായത്ത് പുരസ്‌കാര നിറവില്‍

തിടനാട്: പുരസ്‌കാര നിറവില്‍ തിടനാട് ഗ്രാമപഞ്ചായത്ത്. 2024-25 സാമ്പത്തിക വര്‍ഷത്തെ പദ്ധതി വിഹിതം നൂറു ശതമാനം വിനിയോഗിച്ചു കോട്ടയം ജില്ലയിലെ മൂന്നാം സ്ഥാനവും ഈരാറ്റുപേട്ട ബ്ലോക്കിലെ ഒന്നാം സ്ഥാനവും തിടനാട് പഞ്ചായത്ത് കരസ്ഥമാക്കി. മാലിന്യമുക്തം നവകേരളത്തിന്‍റെ ശുചിത്വ പ്രവര്‍ത്തനത്തിന് ജില്ലാതലത്തില്‍ ഹരിതവിദ്യാലയത്തിന് ഒന്നാം സ്ഥാനത്തിനും ബ്ലോക്ക് തലത്തില്‍ മികച്ച ശുചിത്വ പഞ്ചായത്തായും തെരഞ്ഞെടുക്കപ്പെട്ടു. പഞ്ചായത്തിനെ അനുമോദിക്കാന്‍ സംഘടിപ്പിച്ച യോഗം സെബാസ്റ്റ്യന്‍ കുളത്തുങ്കല്‍ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സ്‌കറിയാച്ചന്‍ പൊട്ടനാനി അധ്യക്ഷത വഹിച്ചു. വൈസ് പ്രസിഡന്‍റ് ലീന ജോര്‍ജ്, പഞ്ചായത്ത് അംഗങ്ങളായ വിജി ജോര്‍ജ് വെള്ളൂക്കുന്നേല്‍, ജോസ് ജോസഫ് കാവുങ്കല്‍, ഷെറിന്‍ ജോസഫ് പെരുമാക്കുന്നേല്‍ എന്നിവര്‍ പ്രസംഗിച്ചു.

നോമ്പുകാല തീര്‍ഥാടനം

ഏഴാച്ചേരി: എകെസിസി ഏഴാച്ചേരി, അന്ത്യാളം, ചക്കാമ്പുഴ യൂണിറ്റുകളുടെ സംയുക്താഭിമുഖ്യത്തില്‍ നോമ്പുകാല തീര്‍ഥാടനം ഏഴാച്ചേരി ഫാത്തിമാഗിരി കുരിശുമലയിലേക്ക് നടത്തി. വിവിധ ഇടവകകളില്‍ നിന്നായി എത്തിച്ചേര്‍ന്ന സംഘടനാപ്രവര്‍ത്തകര്‍ തീര്‍ഥാടനത്തില്‍ പങ്കെടുത്തു. സണ്‍ഡേ സ്‌കൂള്‍, മിഷന്‍ ലീഗ്, അള്‍ത്താര ബാലസഖ്യം എന്നിവയിലെ അംഗങ്ങളും ഇടവക ജനങ്ങളോടൊപ്പം തീര്‍ഥാടനത്തില്‍ സഹകാരികളായി. ഏഴാച്ചേരി പള്ളി വികാരി ഫാ. ലൂക്കോസ് കൊട്ടുകാപ്പള്ളി സന്ദേശം നല്‍കി. ഡീക്കന്‍ അലക്സ് കാഞ്ഞിരത്തിങ്കല്‍, എകെസിസി ഭാരവാഹികളായ ബിനോയി പള്ളത്ത്, സാജു തെങ്ങുംപള്ളിക്കുന്നേല്‍, സണ്ണി കുരിശുംമൂട്ടില്‍, സജി പള്ളിയാരടിയില്‍, ജോമിഷ് നടയ്ക്കല്‍, സോജന്‍ കവളക്കാട്ട്, സതീഷ് ഐക്കര എന്നിവര്‍ നേതൃത്വം നല്‍കി.

നോന്പിന്‍റെ ചൈതന്യത്തിൽ ദേവാലയങ്ങൾ: നാളെ പെസഹാവ്യാഴം

കാഞ്ഞിരപ്പള്ളി: കുരിശുമരണത്തിനുമുമ്പ് ശിഷ്യന്‍മാര്‍ക്കൊപ്പം ഈശോയുടെ അന്ത്യ അത്താഴത്തിന്‍റെ ഓര്‍മപുതുക്കി ക്രൈസ്തവര്‍ നാളെ പെസഹാവ്യാഴം ആചരിക്കും. നോന്പിന്‍റെ സുപ്രധാന തിരുക്കർമങ്ങൾക്ക് ദേവാലയങ്ങളും ഭവനങ്ങളും ഒരുങ്ങി. പെസഹാ ആചരണത്തോടെ അന്പതുനോന്പ് ഏറ്റവും തീവ്രമായ ദിവസങ്ങളിലേക്കു കടക്കുകയാണ്. ദേവാലയങ്ങളിൽ പ്രത്യേക പ്രാർഥനകളും കാല്‍കഴുകല്‍ ശുശ്രൂഷയും ആരാധനയും നടക്കും. ക്രൈസ്തവ ഭവനങ്ങളിൽ വൈകുന്നേരം തിരുവചന ഭാഗം വായിച്ചതിനു ശേഷം ഭവനത്തിലെ മുതിർന്ന അംഗം പെസഹാ അപ്പം മുറിച്ച് കുടുംബാംഗങ്ങൾക്ക് പങ്കുവയ്ക്കും. കുടുംബാംഗങ്ങളെല്ലാം പ്രാർഥനയോടെ ഒരുമിച്ചു കൂടുന്ന സന്ദർഭം കൂടിയാണ് പെസഹാ ആചരണം. പെസഹാ വ്യാഴം, ദുഃഖവെള്ളി, ദുഃഖശനി, ഉയിര്‍പ്പുതിരുനാളോടെ അമ്പത് ദിവസത്തെ വലിയനോമ്പ് അവസാനിക്കും. കാഞ്ഞിരപ്പള്ളി രൂപതാധ്യക്ഷന്‍ മാര്‍ ജോസ് പുളിക്കൽ പെസഹാവ്യാഴാഴ്ച ഉച്ചകഴിഞ്ഞ് 3.30ന് കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രലിലും ദുഃഖവെള്ളിയാഴ്ച ഉച്ചകഴിഞ്ഞ് രണ്ടിന് വെള്ളാരംകുന്ന് സെന്‍റ് മേരീസ് പള്ളിയിലും ദുഃഖശനിയാഴ്ച രാവിലെ 6.30ന് ആനവിലാസം സെന്‍റ് ജോര്‍ജ് പള്ളിയിലും ഉയിര്‍പ്പ് ഞായറിന് പുലർച്ചെ 2.45ന് കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രലിലും ശുശ്രൂഷകൾക്ക് കാർമികത്വം വഹിക്കും. കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രൽ കാഞ്ഞിരപ്പള്ളി സെന്‍റ് ഡൊമിനിക്സ് കത്തീഡ്രലിൽ നാളെ രാവിലെ എട്ട് മുതല്‍ 3.30 വരെ ആരാധന, ഉച്ചകഴിഞ്ഞ് 3.30ന് വിശുദ്ധ കുര്‍ബാന, കാല്‍കഴുകല്‍ ശുശ്രൂഷ. ദുഃഖവെള്ളിയാഴ്ച രാവിലെ 6.30ന് പുളിമാവിൽ നിന്നും മണ്ണാറക്കയത്തു നിന്നും കുരിശിന്‍റെ വഴി, 8.30ന് കുരിശിന്‍റെ വഴി സമാപനം, ഉച്ചകഴിഞ്ഞ് 3.30ന് പീഡാനുഭവ തിരുക്കര്‍മങ്ങള്‍, തുടര്‍ന്ന് നഗരികാണിക്കല്‍. ദുഃഖശനിയാഴ്ച രാവിലെ 5.40ന് വിശുദ്ധ കുര്‍ബാന, 6.45ന് വിശുദ്ധ കുര്‍ബാന, പുത്തൻതിരി, പുത്തൻവെള്ളം വെഞ്ചെരിപ്പ്, 10ന് യുവജനസംഗമം. ഈസ്റ്ററിന് പുലര്‍ച്ചെ 2.45ന് മാര്‍ ജോസ് പുളിക്കലിന്‍റെ കാര്‍മികത്വത്തില്‍ ഉയിര്‍പ്പ് തിരുക്കര്‍മങ്ങള്‍ ആരംഭിക്കും. രാവിലെ അഞ്ചിനും 6.30നും 8.10നും വിശുദ്ധ കുര്‍ബാന. വെളിച്ചിയാനി സെന്‍റ് തോമസ് ഫൊറോന പള്ളി വെളിച്ചിയാനി സെന്‍റ് തോമസ് ഫൊറോന പള്ളിയിൽ നാളെ രാവിലെ ഏഴിന് കാൽകഴുകൽ ശുശ്രൂഷ, വിശുദ്ധ കുർബാന, തുടർന്ന് ഒന്പതു മുതൽ വൈകുന്നേരം അഞ്ചുവരെ ആരാധന, അഞ്ചു മുതൽ ആറുവരെ പൊതുആരാധന. ദുഃഖവെള്ളിയാഴ്ച രാവിലെ എട്ടിന് പീഡാനുഭവ തിരുക്കർമങ്ങൾ, 9.30ന് പാറത്തോട്ടിലേയ്ക്ക് കുരിശിന്‍റെ വഴി, 11ന് പള്ളിയിൽ പീഡാനുഭവ സന്ദേശം, നേർച്ചക്കഞ്ഞി വിതരണം. ദുഃഖശനിയാഴ്ച രാവിലെ 6.30ന് വിശുദ്ധ കുർബാന, പുത്തൻതിരി, പുത്തൻവെള്ളം വെഞ്ചെരിപ്പ്. ഈസ്റ്ററിന് പുലർച്ചെ മൂന്നിന് ഉയിർപ്പ് തിരുക്കർമങ്ങൾ, രാവിലെ ആറിനും എട്ടിനും വിശുദ്ധ കുർബാന. മുണ്ടക്കയം വ്യാകുലമാതാ ഫൊറോന പള്ളി മുണ്ടക്കയം വ്യാകുലമാതാ ഫൊറോന പള്ളിയിൽ നാളെ രാവിലെ ആറുമുതൽ വൈകുന്നേരം അഞ്ചുവരെ ആരാധന, തുടർന്ന് വിശുദ്ധ കുർബാന, കാൽകഴുകൽ ശുശ്രൂഷ. ദുഃഖവെള്ളിയാഴ്ച രാവില 10.15ന് പുത്തൻ പാന പാരായണം, 11ന് കുരിശിന്‍റെ വഴിയും കുരിശുമലകയറ്റവും, ഉച്ചയ്ക്ക് നേർച്ചക്കഞ്ഞി, 2.45ന് ദുഃഖവെള്ളി തിരുക്കർമങ്ങൾ. ദുഃഖശനിയാഴ്ച രാവിലെ ആറിന് വിശുദ്ധ കുര്‍ബാന, പുത്തൻതിരി, പുത്തൻവെള്ളം വെഞ്ചെരിപ്പ്. ഈസ്റ്ററിന് പുലർച്ചെ മൂന്നിന് ഉയിർപ്പ് തിരുക്കർമങ്ങൾ, രാവിലെ 5.30നും 7.15നും വിശുദ്ധ കുർബാന. മണിമല ഹോളി മാഗി ഫൊറോന പള്ളി മണിമല ഹോളി മാഗി ഫൊറോന പള്ളിയിൽ നാളെ വൈകുന്നേരം നാലിന് കാൽകഴുകൽ ശുശ്രൂഷ, വിശുദ്ധ കുർബാന, തുടർന്ന് പൊതുആരാധന. ദുഃഖവെള്ളിയാഴ്ച രാവിലെ ആറിന് ആരാധന, 7.30ന് കുടുംബകൂട്ടായ്മകളിൽ നിന്ന് കുരിശിന്‍റെ വഴി ആരംഭിച്ച് ഒന്പതിന് ഗ്രോട്ടോയിലെത്തി പള്ളിചുറ്റി കുരിശിന്‍റെ വഴി, 11ന് പീഡാനുഭവ സന്ദേശം, 12.45ന് നേർച്ചക്കഞ്ഞി, ഉച്ചയ്ക്ക് രണ്ടിന് പീഡാനുഭവ തിരുക്കർമങ്ങൾ, നഗരികാണിക്കല്‍. ദുഃഖശനിയാഴ്ച വൈകുന്നേരം 4.30ന് വിശുദ്ധ കുര്‍ബാന, പുത്തൻതിരി, പുത്തൻവെള്ളം വെഞ്ചെരിപ്പ്. ഈസ്റ്ററിന് പുലർച്ചെ മൂന്നിന് ഉയിർപ്പ് തിരുക്കർമങ്ങൾ, രാവിലെ ഏഴിന് വിശുദ്ധ കുർബാന. ചെങ്ങളം സെന്‍റ് ആന്‍റണീസ് തീർഥാടന പള്ളി ചെങ്ങളം സെന്‍റ് ആന്‍റണീസ് തീർഥാടന പള്ളിയിൽ നാളെ രാവിലെ 6.30ന് വിശുദ്ധ കുർബാന, കാൽകഴുകൽ ശുശ്രൂഷ, ഒന്പതു മുതൽ വൈകുന്നേരം ആറുവരെ ആരാധന. ദുഃഖവെള്ളിയാഴ്ച രാവിലെ 7.30ന് പീഡാനുഭവ തിരുക്കർമങ്ങൾ, തുടർന്ന് കുരിശിന്‍റെ വഴി. ദുഃഖശനിയാഴ്ച രാവിലെ 6.30ന് വിശുദ്ധ കുർബാന, പുത്തൻതിരി, പുത്തൻവെള്ളം വെഞ്ചെരിപ്പ്. ഈസ്റ്ററിന് പുലർച്ചെ മൂന്നിന് ഉയിർപ്പ് തിരുക്കർമങ്ങൾ, വിശുദ്ധ കുർബാന, രാവിലെ 5.30നും ഏഴിനും വിശുദ്ധ കുർബാന. കുന്നുംഭാഗം സെന്‍റ് ജോസഫ്സ് പള്ളി കുന്നുംഭാഗം സെന്‍റ് ജോസഫ്സ് പള്ളിയിൽ നാളെ രാവിലെ ഏഴു മുതൽ ഉച്ചകഴിഞ്ഞ് 3.30 വരെ ആരാധന, തുടർന്ന് വിശുദ്ധ കുര്‍ബാന, കാല്‍കഴുകല്‍ ശുശ്രൂഷ. ദുഃഖവെള്ളിയാഴ്ച രാവിലെ എട്ടിന് പീഡാനുഭവ തിരുക്കർമങ്ങൾ, തുടർന്ന് കുരിശിന്‍റെ വഴി, നേർച്ചക്കഞ്ഞി. ദുഃഖശനിയാഴ്ച രാവിലെ 6.45ന് വിശുദ്ധ കുർബാന, പുത്തൻതിരി, പുത്തൻവെള്ളം വെഞ്ചെരിപ്പ്. ഈസ്റ്ററിന് പുലർച്ചെ 2.45ന് ഉയിർപ്പ് തിരുക്കർമങ്ങൾ, രാവിലെ 5.30നും ഏഴിനും വിശുദ്ധ കുർബാന. ഇളങ്ങോയി മാർ സ്ലീവ പള്ളി ഇളങ്ങോയി മാർ സ്ലീവ പള്ളിയിൽ നാളെ രാവിലെ ഏഴിന് വിശുദ്ധ കുർബാന, കാൽകഴുകൽ ശുശ്രൂഷ, ഒന്പതു മുതൽ വൈകുന്നേരം ആറുവരെ ആരാധന. ദുഃഖവെള്ളിയാഴ്ച രാവിലെ എട്ടിന് പീഡാനുഭവ തിരുക്കർമങ്ങൾ, തുടർന്ന് ബ്ലോക്ക് പടി നാലാംമൈൽ കുരിശുപള്ളി വഴി കുരിശിന്‍റെ വഴി, നേർച്ചക്കഞ്ഞി. ദുഃഖശനിയാഴ്ച രാവിലെ 6.30ന് വിശുദ്ധ കുർബന, പുത്തൻതീ, പുത്തൻവെള്ളം വെഞ്ചെരിപ്പ്. ഈസ്റ്ററിന് പുലർച്ചെ മൂന്നിന് വിശുദ്ധ കുർബാന, ഉയിർപ്പ് തിരുക്കർമങ്ങൾ, രാവിലെ ഏഴിന് വിശുദ്ധ കുർബാന. ഇളങ്ങുളം സെന്‍റ് മേരീസ് പള്ളി ഇളങ്ങുളം സെന്‍റ് മേരീസ് പള്ളിയിൽ നാളെ 8.30 മുതൽ 12.30 വരെ ആരാധന, വൈകുന്നേരം 4.15ന് കാൽകഴുകൽ ശുശ്രൂഷ, വിശുദ്ധ കുർബാന. ദുഃഖവെള്ളിയാഴ്ച രാവിലെ 6.15ന് പീഡാനുഭവ തിരുക്കർമങ്ങൾ, 8.15ന് കുരിശിന്‍റെ വഴി ആരംഭിക്കും. കൂരാലി, വയലുങ്കൽപടി, ത്രിവേണി വഴി 11.30ന് പള്ളിയിലെത്തി സമാപനാശീർവാദം, തുടർന്ന് നേർച്ചക്കഞ്ഞി. ദുഃഖശനിയാഴ്ച രാവിലെ 6.15ന് വിശുദ്ധ കുർബാന, പുത്തൻതിരി, പുത്തൻവെള്ളം വെഞ്ചെരിപ്പ്. ഈസ്റ്ററിന് പുലർച്ചെ മൂന്നിന് ഉയിർപ്പ് തിരുക്കർമങ്ങൾ, വിശുദ്ധ കുർബാന, രാവിലെ 5.30നും ഏഴിനും വിശുദ്ധ കുർബാന. വികാരി ഫാ. ഡാർവിൻ വാലുമണ്ണേൽ, അസിസ്റ്റന്‍റ് വികാരി ഫാ. ജോയിസ് തെക്കേവയലിൽ എന്നിവർ തിരുക്കർമങ്ങൾക്ക് കാർമികത്വം വഹിക്കും. ചിറക്കടവ് സെന്‍റ് ഇഫ്രേംസ് പള്ളി ചിറക്കടവ് സെന്‍റ് ഇഫ്രേംസ് പള്ളിയിൽ നാളെ രാവിലെ ഏഴിന് കാൽകഴുകൽ ശുശ്രൂഷ, വിശുദ്ധ കുർബാന, ഒന്പതു മതൽ രാത്രി ഏഴുവരെ ദിവ്യകാരുണ്യ ആരാധന. ദുഃഖവെള്ളിയാഴ്ച രാവിലെ 7.30ന് പീഡാനുഭവ തിരുക്കർമങ്ങൾ, കുരിശിന്‍റെ വഴി, സമാപന പ്രാർഥന, നേർച്ചക്കഞ്ഞി വിതരണം. ദുഃഖശനിയാഴ്ച രാവിലെ 5.30ന് വിശുദ്ധ കുർബാന, ഏഴിന് വിശുദ്ധ കുർബാന, പുത്തൻതിരി, പുത്തൻവെള്ളം വെഞ്ചെരിപ്പ്. ഈസ്റ്ററിന് പുലർച്ചെ മൂന്നിന് ഉയിർപ്പ് തിരുക്കർമങ്ങൾ, വിശുദ്ധ കുർബാന, ഏഴിന് വിശുദ്ധ കുർബാന. വാളക്കയം കുരിശുപള്ളിയിലും പരുന്തൻമല കുരിശുപള്ളിയിലും പുലർച്ചെ മൂന്നിന് ഉയിർപ്പ് തിരുക്കർമങ്ങൾ ഉണ്ടായിരിക്കും. പൊടിമറ്റം സെന്‍റ് മേരീസ് പള്ളി പൊടിമറ്റം സെന്‍റ് മേരീസ് പള്ളിയില്‍ നാളെ രാവിലെ എട്ടു മുതല്‍ ആരാധന, വൈകുന്നേരം നാലിന് പെസഹാ തിരുക്കര്‍മങ്ങൾ. ദുഃഖവെള്ളിയാഴ്ച രാവിലെ ഒന്പതിന് പൊടിമറ്റം - ആനക്കല്ല് റോഡിനു സമീപമുള്ള പുതിയ കുരിശടിയില്‍ നിന്ന് കുരിശിന്‍റെ വഴി, 10.30 ന് പീഡാനുഭവ തിരുക്കർമങ്ങൾ. ദുഃഖശനിയാഴ്ച രാവിലെ 6.30ന് വിശുദ്ധ കുര്‍ബാന, ഒന്പതിന് ഇടവകയിലെ പ്രായമായവര്‍ക്കുവേണ്ടി വിശുദ്ധകുര്‍ബാനയും സ്‌നേഹവിരുന്നും. ഈസ്റ്ററിന് പുലര്‍ച്ചെ 2.45ന് ഉയിര്‍പ്പ് തിരുനാള്‍ തിരുക്കർമങ്ങൾ ആരംഭിക്കും. രാവിലെ 6.30 ന് വിശുദ്ധ കുർബാന. പൊടിമറ്റം സെന്‍റ് ജോസഫ്സ് പള്ളി പൊടിമറ്റം സെന്‍റ് ജോസഫ്സ് പള്ളിയില്‍ നാളെ വൈകുന്നേരം ആറിന് വിശുദ്ധ കുര്‍ബാന, കാൽകഴുകല്‍ ശുശ്രൂഷ, രാത്രി 12 വരെ ദിവ്യകാരുണ്യ ആരാധന. ദുഃഖവെള്ളിയാഴ്ച ഉച്ചകഴിഞ്ഞ് രണ്ടിന് പൊടിമറ്റം കുരിശടിയില്‍ നിന്ന് പള്ളിയിലേക്ക് കുരിശിന്‍റെ വഴി, പൊടിമറ്റം ഹോളിഫാമിലി കുരിശടിയില്‍ നിന്ന് കുരിശിന്‍റെ വഴി, മൂന്നിന് കുരിശ് ആരാധന, ദിവ്യകാരുണ്യ സ്വീകരണം. ദുഃഖശനിയാഴ്ച രാവിലെ ഏഴിന് പ്രഭാത പ്രാർഥന, രാത്രി 10ന് പെസഹാ ജാഗരണം, വിശുദ്ധ കുര്‍ബാന. ഈസ്റ്ററിന് രാവിലെ ഏഴിന് വിശുദ്ധ കുര്‍ബാന. പുല്ലാന്നിത്തകിടി വിശുദ്ധ റീത്ത പള്ളി പുല്ലാന്നിത്തകിടി: വിശുദ്ധ റീത്ത പള്ളിയിൽ നാളെ ഉച്ചകഴിഞ്ഞ് രണ്ടിന് ആരാധന, 3.30ന് വിശുദ്ധ കുര്‍ബാന, കാല്‍കഴുകല്‍ ശുശ്രൂഷ, തുടർന്ന് പൊതു ആരാധന. ദുഃഖവെള്ളിയാഴ്ച രാവിലെ ഒന്പതിന് പീഡാനുഭവ തിരുക്കർമങ്ങൾ, കുരിശിന്‍റെ വഴി, പാന വായന. ദുഃഖശനിയാഴ്ച രാവിലെ 6.30ന് വിശുദ്ധ കുർബാന, പുത്തൻതിരി, പുത്തൻവെള്ളം വെഞ്ചെരിപ്പ്, ഉച്ചകഴിഞ്ഞ് രണ്ടിന് രോഗികൾക്കും പ്രായമായവർക്കും വേണ്ടി വിശുദ്ധ കുർബാന. ഈസ്റ്ററിന് പുലർച്ചെ 2.30ന് വിശുദ്ധ കുർബാന, ഉയിർപ്പ് തിരുക്കർമങ്ങൾ, രാവിലെ ആറിന് വിശുദ്ധ കുർബാന. കാഞ്ഞിരമറ്റം മാര്‍ സ്ലീവാ പള്ളി കാഞ്ഞിരമറ്റം: മാര്‍ സ്ലീവാ പള്ളിയില്‍ വിശുദ്ധവാര തിരുക്കര്‍മങ്ങളുടെ ഭാഗമായി പെസഹാ വ്യാഴാഴ്ച രാവിലെ കാല്‍കഴുകല്‍ ശുശ്രൂഷയും വിശുദ്ധ കുര്‍ബാനയും.18ന് രാവിലെ 6.30ന് ദുഃഖ വെള്ളി തിരുക്കര്‍മങ്ങള്‍ ആരംഭിക്കും. 8.30ന് കുരിശിന്‍റെ വഴി .19ന് രാവിലെ 6.30ന് വിശുദ്ധ കുര്‍ബാനയും മാമ്മോദീസ നവീകരണവും. 20ന് ഈസ്റ്റര്‍ തിരുക്കര്‍മങ്ങള്‍ പുലര്‍ച്ചെ മൂന്നിന് ആരംഭിക്കും. വിശുദ്ധ കുര്‍ബാനയും സന്ദേശവും. രാവിലെ ആറിനും എട്ടിനും വിശുദ്ധ കുര്‍ബാന . വികാരി ഫാ. ജോസഫ് മണ്ണനാലും സഹവികാരി ഫാ. ജോസഫ് മഠത്തിപ്പറമ്പിലും തിരുക്കര്‍മങ്ങള്‍ക്ക് നേതൃത്വം നല്‍കും.

കോരുത്തോട് പഞ്ചായത്തിൽ മഞ്ഞപ്പിത്തം പടരുന്നു

കോരുത്തോട്: കോരുത്തോട് പഞ്ചായത്തിൽ മഞ്ഞപ്പിത്തം പടരുന്നു. പഞ്ചായത്തിലെ ഒന്പത്,10 വാർഡുകളിലെ മാങ്ങാപ്പേട്ട, 504 കോളനി എന്നിവിടങ്ങളിലെ15 പേർക്കാണ് മഞ്ഞപ്പിത്തം സ്ഥിരീകരിച്ചത്. ഒമ്പതാം വാർഡിൽ കഴിഞ്ഞദിവസം മഞ്ഞപ്പിത്തം റിപ്പോർട്ട് ചെയ്തിരുന്നു. ഇതിനെത്തുടർന്ന് ആരോഗ്യ വകുപ്പിന്‍റെ നേതൃത്വത്തിൽ ജാഗ്രത നിർദേശം നൽകുകയും വാർഡിൽ ക്ലോറിനേഷൻ അടക്കമുള്ള ശുചീകരണ പ്രവർത്തനങ്ങൾ നടത്തുകയും ചെയ്തിരുന്നു. ഇതിനു പിന്നാലെയാണ് പത്താം വാർഡിൽ മൂന്നു പേർക്കുകൂടി മഞ്ഞപ്പിത്തം സ്ഥിരീകരിച്ചത്. സ്വകാര്യ കുടിവെള്ള വിതരണക്കാരിൽ നിന്നുമാണ് മേഖലയിൽ മഞ്ഞപ്പിത്തം പിടിപെട്ടതെന്ന് ആരോഗ്യവകുപ്പ് കണ്ടെത്തിയിട്ടുണ്ട്. കൂടാതെ 504ലെ സ്വകാര്യ വ്യക്തിയുടെ കടയിൽനിന്നു ഭക്ഷണം കഴിച്ച നാലുപേർക്കും മഞ്ഞപ്പിത്തം സ്ഥിരീകരിച്ചതിനെതുടർന്ന് ആരോഗ്യ വകുപ്പ് കട അടപ്പിച്ചു. ഇവിടെ അനധികൃത മദ്യ വിൽപ്പന നടക്കുന്നതായും ആരോപണം ഉയർന്നിരുന്നു. സൻസ് ഇല്ലാതെ പ്രവർത്തിക്കുന്ന കുടിവെള്ള വിതരണക്കാർക്ക് ആരോഗ്യവകുപ്പ് നോട്ടീസ് നൽകിയിട്ടുണ്ട്. മേഖലയിൽ ജനങ്ങൾക്കു ബോധവത്കരണം നൽകാനും നിർദേശങ്ങൾ ലംഘിക്കുന്നവർക്കെതിരേ കർശന നടപടി സ്വീകരിക്കാനും പഞ്ചായത്ത് പ്രസിഡന്‍റിന്‍റെ അധ്യക്ഷതയിൽ ചേർന്ന യോഗം തീരുമാനിച്ചു. ആരോഗ്യ വകുപ്പ് ഇൻസ്പെക്ടർ സന്തോഷ് മാത്യു, ജെഎച്ച്ഐ അനീഷ്, ടെക്നിക്കൽ അസിസ്റ്റന്‍റ് ബൈജു, പഞ്ചായത്ത് അംഗങ്ങൾ എന്നിവർ പങ്കെടുത്തു. കോരുത്തോട് പഞ്ചായത്തിൽ മഞ്ഞപ്പിത്തത്തിന്‍റെ അതീവ ജാഗ്രത നിർദേശം നൽകിയിട്ടുണ്ടെന്നും എല്ലാവരും തിളപ്പിച്ചാറിച്ച വെള്ളമേ ഉപയോഗിക്കാവൂവെന്നും ആരോഗ്യവകുപ്പ് അധികൃതർ അറിയിച്ചിട്ടുണ്ട്. കഴിഞ്ഞ മാസം പുഞ്ചവയൽ ടൗണിലും ഒന്പതു പേർക്ക് മഞ്ഞപ്പിത്തം സ്ഥിരീകരിച്ചിരുന്നു.

അരുവിത്തുറ കോളജിൽ മുഖാമുഖം പരിപാടി സംഘടിപ്പിച്ചു

അരുവിത്തുറ: ബിരുദ പഠനത്തിൽ സാധ്യതകളുടെ അക്ഷയഖനി തുറന്ന് അരുവിത്തുറ സെന്‍റ് ജോർജസ് കോളജിൽ "സമീക്ഷ - 2025' മുഖാമുഖം പരിപാടി സംഘടിപ്പിച്ചു. ദേശീയ വിദ്യാഭ്യാസ നയത്തിന്‍റെ ഭാഗമായി അന്താരാഷ്‌ട്ര നിലവാരത്തിൽ നവീകരിച്ച ഡിഗ്രി ഓണേഴ്സ് കോഴ്സുകളിൽ വിജയകരമായി ബിരുദ പഠനം ആഗ്രഹിക്കുന്ന വിദ്യാർഥികൾക്കും അവരുടെ മാതാപിതാക്കൾക്കുമായാണ് പരിപാടി സംഘടിപ്പിച്ചത്.

ഡിഗ്രി ഓണേഴ്സ് കോഴ്സുകൾ സംബന്ധിച്ച് അറിയേണ്ടതെല്ലാം ഉൾപ്പെടുത്തി സംഘടിപ്പിച്ച പരിപാടിയുടെ ഉദ്ഘാടനം എംജി യൂണിവേഴ്സിറ്റി സിൻഡിക്കേറ്റ് അംഗം ഡോ. ജോജി അലക്സ് നിർവഹിച്ചു. പ്രിൻസിപ്പൽ പ്രഫ.ഡോ. സിബി ജോസഫ്, ബർസാർ റവ.ഫാ. ബിജു കുന്നയ്ക്കാട്ട്, വൈസ് പ്രിൻസിപ്പൽ ഡോ. ജിലു ആനി ജോൺ, ഐക്യുഎസി കോഓർഡിനേറ്റർ ഡോ. സുമേഷ് ജോർജ്, എഫ്‌വെെയുജിപി നോഡൽ ഓഫീസർ ഡോ. സിബിൽ ജോസ് തുടങ്ങിയവർ സംസാരിച്ചു.

ചങ്ങനാശേരിയിലെ റേഷന്‍കടകളില്‍ ഈ മാസത്തെ അരി എത്തിയില്ല : വിഷുവിന് കിട്ടിയില്ല; ഈസ്റ്ററിനു കിട്ടുമെന്ന് ഉറപ്പില്ല

ചങ്ങനാശേരി: ചങ്ങനാശേരി താലൂക്കിലെ റേഷന്‍ കടകളില്‍ ഈ മാസത്തെ ഭക്ഷ്യസാധനങ്ങള്‍ എത്തിയില്ല. വിഷുവിന് അരി വിതരണം മുടങ്ങി. ഈസ്റ്ററിനും കിട്ടുമെന്ന് ഉറപ്പില്ല. താലൂക്കില്‍ 147 റേഷന്‍ കടകളാണുള്ളത്. റേഷന്‍ വ്യാപാരികളുടേയും കാര്‍ഡ് ഉടമകളുടേയും പ്രതിഷേധത്തെത്തുടര്‍ന്ന് കഴിഞ്ഞ ശനിയാഴ്ച ആറുകടകളില്‍ സപ്ലൈകോയില്‍നിന്നും ഭക്ഷ്യസാധനങ്ങള്‍ എത്തിച്ചിട്ടുണ്ട്. 141 കടകളില്‍ സാധനങ്ങള്‍ ഇനിയും എത്തിയിട്ടില്ല. സാധനങ്ങളില്ലാത്തതുമൂലം വിഷുവിന് സാധാരണക്കാര്‍ക്ക് റേഷന്‍കടകളില്‍നിന്നു സാധനങ്ങള്‍ ലഭ്യമായില്ല. വിഷു പ്രമാണിച്ച് ഇന്ന് റേഷന്‍കടകള്‍ക്ക് അവധിയാണ്. നാളെയും ബുധനാഴ്ചയുമായി സാധനങ്ങള്‍ കടകളില്‍ എത്തിയെങ്കിലേ ഈസ്റ്ററിനും ഭക്ഷ്യവിതരണം നടക്കുകയുള്ളു. കഴിഞ്ഞമാസവും അവസാന ദിനങ്ങളിലാണ് റേഷന്‍കടകളില്‍ സാധനങ്ങളെത്തിയത്. പല കടകളിലും സ്റ്റോക്കുള്ള അരി പുഴുക്കെട്ടും പൂപ്പലുമുള്ളതാണെന്നു കാര്‍ഡ് ഉടമകള്‍ പറയുന്നു. എവൈ, പിഎച്ച്എച്ച് തുടങ്ങിയ വിഭാഗങ്ങള്‍ക്കുള്ള ആട്ട, കോന്നിയിലെ മില്ലില്‍നിന്നു പായ്ക്കു ചെയ്തു സപ്ലൈകോ ഗോഡൗണില്‍ എത്താന്‍ വൈകിയതാണ് കടകളില്‍ സാധനങ്ങള്‍ എത്താന്‍ വൈകിയതിനു കാരണമെന്നാണ് സപ്ലൈകോ അധികൃതരുടെ ഭാഷ്യം.

ഡല്‍ഹിയില്‍ കുരുത്തോല പ്രദക്ഷിണത്തിന് അനുമതി നിഷേധിച്ചത് ഫാസിസം: കൊടിക്കുന്നില്‍

ചങ്ങനാശേരി: ഡല്‍ഹിയില്‍ സമാധാനപരമായി നടത്തിവരുന്ന കത്തോലിക്കരുടെ കുരുത്തോല പ്രദിക്ഷിണത്തിന് ഡല്‍ഹി പോലീസ് അനുമതി നിഷേധിച്ച നടപടിയെ ശക്തമായി അപലപിക്കുന്നതായി കൊടിക്കുന്നില്‍ സുരേഷ് എംപി. പതിറ്റാണ്ടുകളായി പ്രത്യേക പ്രശ്‌നങ്ങളൊന്നുമില്ലാതെ നടത്തിവരുന്ന ഈ ആത്മീയ ചടങ്ങിന് എതിരായ നടപടി ബിജെപി സര്‍ക്കാരിന്‍റെ മതനിരോധന രാഷ്‌ട്രീയമാണെന്നും അദ്ദേഹം ആരോപിച്ചു. ഇത്തരം നീക്കങ്ങള്‍ ന്യൂനപക്ഷ സമൂഹത്തില്‍ ഭീതിയും അവഗണനയും വളര്‍ത്തുന്നുവെന്നും രാജ്യത്തിന്‍റെ മതനിരപേക്ഷതയും ജനാധിപത്യ ഘടനയും ഇത്തരത്തില്‍ ദുര്‍ബലമാകാന്‍ അനുവദിക്കരുതെന്നും എംപി പറഞ്ഞു.

ലഹരിക്കെതിരേ വെട്ടിത്തുരുത്തില്‍ ജനകീയ സദസും വാഹന വിളംബര റാലിയും

ചങ്ങനാശേരി: വര്‍ധിച്ചുവരുന്ന മയക്കുമരുന്ന്, രാസലഹരി ഉപയോഗത്തിലൂടെ യുവതലമുറ നാശത്തിലേക്കു നീങ്ങുന്നതിനെതിരേ വെട്ടിത്തുരുത്ത് ഇടവകയില്‍ ജനകീയ സദസും വാഹന വിളംബര റാലിയും ബോധവത്കരണ ക്ലാസും സംഘടിപ്പിച്ചു. കത്തോലിക്കാ കോണ്‍ഗ്രസ്, യുവദീപ്തി-എസ്എംവൈഎം യൂണിറ്റുകള്‍ സംയുക്തമായി നേതൃത്വം നല്‍കിയ വിളബര വാഹനജാഥ ബോട്ട് ജെട്ടിയില്‍നിന്നുമാരംഭിച്ചു. കത്തോലിക്കാ കോണ്‍ഗ്രസ് ഗ്ലോബല്‍ വൈസ് പ്രസിഡന്‍റ് രാജേഷ് ജോണ്‍ ഉദ്ഘാടനം ചെയ്തു. അതിരൂപത സെക്രട്ടറി സൈബി അക്കര പ്രസംഗിച്ചു. വാഹന വിളംബര ജാഥ വെട്ടിത്തുരുത്ത് കുരിശടി ജംഗ്ഷനില്‍ എത്തിച്ചേര്‍ന്നപ്പോള്‍ ചേര്‍ന്ന ലഹരി വിരുദ്ധ ജനകീയ സദസ് ജോബ് മൈക്കിള്‍ എംഎല്‍എ ഉദ്ഘാടനം ചെയ്തു. കത്തീഡ്രല്‍ പള്ളി വികാരി ഫാ. ജോസഫ് വാണിയപ്പുരയ്ക്കല്‍ അധ്യക്ഷത വഹിച്ചു. ദീപിക ന്യൂസ് എഡിറ്റര്‍ ജോണ്‍സണ്‍ പൂവന്തുരുത്ത് മുഖ്യപ്രഭാഷണം നടത്തി. വെട്ടിത്തുരുത്ത് ഇടവക വികാരി ഫാ. ടോം കൊറ്റത്തില്‍, കത്തോലിക്ക കോണ്‍ഗ്രസ് വെട്ടിത്തുരുത്ത് യൂണിറ്റ് പ്രസിഡന്‍റ് കെ.എസ്. ആന്‍റണി കരിമറ്റം, ഇമാം എസ്. സക്കീര്‍ ഹുസൈന്‍ മൗലവി, വിവിധ രാഷ്‌ട്രീയ സമുദായിക നേതാക്കളായ വി.ജെ. ലാലി, എം.പി. രാജഗോപാല്‍, സുധീഷ് സുഗതന്‍, സിബി വാസുദേവന്‍, കുഞ്ഞുമോന്‍ തൂമ്പുങ്കല്‍, ഔസേപ്പച്ചന്‍ ചെറുകാട്, ഇമ്മാനുവല്‍ പോള്‍സണ്‍, രാജേഷ് വര്‍ഗീസ്, ജോയിച്ചന്‍ കാര്‍ത്തികപ്പള്ളി, വി.എസ്. ജോര്‍ജ് വട്ടപ്പറമ്പില്‍, അലന്‍ സജി, ആന്‍ മരിയ രാജീവ്, ഉണ്ണിമോന്‍ ജോര്‍ജ്, സാബു കക്കാട്ടുപറമ്പില്‍ എന്നിവര്‍ പ്രസംഗിച്ചു.

തൃക്കൊടിത്താനത്ത് ലഹരിവിരുദ്ധ സന്ദേശയാത്ര

തൃക്കൊടിത്താനം: ലഹരിവിരുദ്ധ സന്ദേശവുമായി യുവദീപ്തി-എസ്എംവൈഎം തൃക്കൊടിത്താനം ഫൊറോനായുടെ നേതൃത്വത്തില്‍ ബൈക്ക് റാലി നടത്തി. കുന്നന്താനം സെന്‍റ് ജോസഫ് ദേവാലയത്തില്‍നിന്ന് ആരംഭിച്ച റാലി ഇടവക വികാരി ഫാ. തോമസ് പ്ലാത്തോട്ടത്തില്‍ ഫ്‌ളാഗ് ഓഫ് ചെയ്തു. തൃക്കൊടിത്താനം ജംഗ്ഷനില്‍ എത്തിയ ബൈക്ക് റാലി ഫൊറോനാ വികാരി ഫാ. സെബാസ്റ്റ്യന്‍ പുന്നശേരി സ്വീകരിച്ച് സന്ദേശം നല്‍കി. തൃക്കൊടിത്താനം പോലീസ് സ്റ്റേഷനിലെ പോലീസ് ഉദ്യോഗസ്ഥര്‍ ബര്‍ണബാസ് യു. ലഹരിക്കെതിരേ അവബോധ സന്ദേശം നല്‍കി. സിസ്റ്റര്‍ സ്‌നേഹ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. ഡയറക്ടര്‍ ഫാ. ജോണ്‍സണ്‍ മുണ്ടുവേലില്‍, പ്രസിഡന്‍റ് ദീപു അപ്രേം, ഹിമാ ട്രീസാ ജോബി, ജോസണ്‍ ജോസ് ജോസഫ്, ഷോണ്‍ തോമസ് എന്നിവര്‍ പ്രസംഗിച്ചു.

ഓശാനത്തിരുനാൾ ആചരണത്തോടെ വിശുദ്ധവാരത്തിനു തുടക്കം

ചങ്ങനാശേരി: ഓശാനത്തിരുനാള്‍ ആചരണത്തോടെ ക്രൈസ്തവര്‍ വിശുദ്ധവാരത്തിലേക്കു പ്രവേശിച്ചു. ഈശോയുടെ പീഡാനുഭവവും കുരിശുമരണവും ഉയിര്‍പ്പും വിശുദ്ധവാരത്തില്‍ അനുസ്മരിക്കും. കഴുതപ്പുറത്ത് എഴുന്നള്ളിയ ഈശോയ്ക്ക് ജറൂസലേം ജനത ഓശാന പാടിയതിന്‍റെ ഓര്‍മ പുതുക്കി ക്രൈസ്തവ ദേവാലയങ്ങളില്‍ കുരുത്തോല വെഞ്ചരിപ്പും കുരുത്തോല പ്രദക്ഷിണവും വിശുദ്ധകുര്‍ബാനയും നടന്നു. ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയിലെ ഓശാനശുശ്രൂഷകള്‍ രാവിലെ 6.15ന് പാരീഷ്ഹാളില്‍ ആരംഭിച്ചു. കുരുത്തോല വെഞ്ചരിപ്പിനും വിശുദ്ധകുര്‍ബാനയ്ക്കും ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികത്വം വഹിച്ചു. വികാരി ഫാ. ജോസഫ് വാണിയപ്പുരയ്ക്കല്‍, ഫാ. നിഖില്‍ അറയ്ക്കത്തറ, ഫാ. ഷെറിന്‍ കുറശേരി, ഫാ. സിറിള്‍ കളരിക്കല്‍, ഫാ. റോബിന്‍ പുതുപ്പറമ്പില്‍ എന്നിവര്‍ സഹകാര്‍മികത്വം വഹിച്ചു. ചങ്ങനാശേരി പാറേല്‍ സെന്‍റ് മേരീസ് പള്ളിയില്‍ കുരുത്തോല വെഞ്ചരിപ്പ്, വിശുദ്ധകുര്‍ബാന. എന്നീ ശുശ്രൂഷകളോടെ ഓശാനത്തിരുനാള്‍ ആചരിച്ചു. വികാരി ഫാ. ജേക്കബ് വാരിക്കാട്ട്, ഫാ. ടെജി പുതുവീട്ടിക്കളം, ഫാ. ജിജോ മാറാട്ടുകളം എന്നിവര്‍ കാര്‍മികത്വം വഹിച്ചു. കുറുമ്പനാടം സെന്‍റ് ആന്‍റണീസ് ഫൊറോന പള്ളിയിലെ ഓശാനത്തിരുക്കര്‍മങ്ങള്‍ സെന്‍റ് പീറ്റേഴ്സ് സ്‌കൂളില്‍ ആരംഭിച്ചു. കുരുത്തോല വെഞ്ചരിപ്പിനും വിശുദ്ധകുര്‍ബാനയ്ക്കും അതിരൂപത വികാരി ജനറാള്‍ മോണ്‍. സ്‌കറിയ കന്യാകോണില്‍, വികാരി റവ.ഡോ. ജോബി കറുകപ്പറമ്പില്‍ എന്നിവര്‍ കാര്‍മികരായിരുന്നു. തൃക്കൊടിത്താനം സെന്‍റ് സേവ്യേഴ്സ് ഫൊറോന പള്ളിയില്‍ കുരുത്തോല വെഞ്ചരിപ്പിനും വിശുദ്ധകുര്‍ബാനയ്ക്കും വികാരി ഫാ. സെബാസ്റ്റ്യന്‍ പുന്നശേരി കാര്‍മികത്വം വഹിച്ചു. നെടുംകുന്നം സെന്‍റ് ജോണ്‍ ദി ബാപ്റ്റിസ്റ്റ് ഫൊറോന പള്ളിയിലെ ഓശാനത്തിരുക്കർമങ്ങൾക്കു വികാരി ഫാ. വര്‍ഗീസ് കൈതപ്പറമ്പില്‍ കാര്‍മികത്വം വഹിച്ചു. കുറുമ്പനാടം അസംപ്ഷന്‍ പള്ളിയില്‍ ഓശാനത്തിരുക്കര്‍മങ്ങള്‍ക്കും വിശുദ്ധകുര്‍ബാനയ്ക്കും വികാരി ഫാ. ജോസ് കൊച്ചുപറമ്പില്‍, ഫാ. ജോസഫ് പാറത്താനം എന്നിവര്‍ കാര്‍മ്മികരായിരുന്നു. ചെത്തിപ്പുഴ തിരുഹൃദയ പള്ളിയില്‍ കുരുത്തോല വെഞ്ചരിപ്പ്, പ്രദക്ഷിണം, വിശുദ്ധകുര്‍ബാന ശുശ്രൂഷകള്‍ക്ക് വികാരി ഫാ. തോമസ് കല്ലുകളം,ഫാ. ജിന്നു താഴത്ത് എന്നിവര്‍ കാര്‍മികത്വം വഹിച്ചു. ഫാത്തിമാപുരം ഫാത്തിമാമാതാ പള്ളിയില്‍ ഓശാന തിരുക്കര്‍മങ്ങള്‍ക്കും വിശുദ്ധകുര്‍ബാനയ്ക്കും വികാരി റവ.ഡോ. തോമസ് പാറത്തറ കാര്‍മികത്വം വഹിച്ചു. മാടപ്പള്ളി ചെറുപുഷ്പം പള്ളിയില്‍ കുരുത്തോല വെഞ്ചരിപ്പിനും വിശുദ്ധ കുര്‍ബാനയ്ക്കും വികാരി ഫാ. മാത്യു ചെത്തിപ്പുഴ, ഫാ. ജോണ്‍ തത്തക്കാട്ടുപുളിക്കല്‍ എന്നിവര്‍ കാര്‍മികത്വം വഹിച്ചു. വെരൂര്‍ സെന്‍റ് ജോസഫ് പള്ളിയില്‍ ഓശാനത്തിരുക്കര്‍മങ്ങള്‍ക്കും വിശുദ്ധകുര്‍ബാനയ്ക്കും വികാരി ഫാ. തോമസ് പുത്തന്‍പുരയ്ക്കല്‍, ഫാ. നിധിന്‍ അമ്പലത്തുങ്കല്‍ എന്നിവര്‍ കാര്‍മികരായിരുന്നു. തുരുത്തി മര്‍ത്ത്മറിയം ഫൊറോന പള്ളിയില്‍ കുരുത്തോല വെഞ്ചരിപ്പിനും വിശുദ്ധകുര്‍ബാന യ്ക്കും വികാരി ഫാ. ജോസ് വരിക്കപ്പള്ളി കാര്‍മികത്വം വഹിച്ചു. സഭയെ ഭിന്നിപ്പിക്കാൻ ആര്‍ക്കും കഴിയില്ല: മാര്‍ തോമസ് തറയില്‍ ചങ്ങനാശേരി: പൗരാവകാശങ്ങള്‍ മാനിച്ചും പൊതുനന്മ ലക്ഷ്യം വച്ചും പ്രവര്‍ത്തിക്കുന്ന ക്രൈസ്തവ സഭയെ സങ്കുചിത താല്പര്യങ്ങളുടെ പേരില്‍ ആര്‍ക്കും ഭിന്നിപ്പിക്കാന്‍ കഴിയില്ലെന്നും ക്രൈസ്തവര്‍ രാഷ്‌ട്രീയ പ്രബുദ്ധതയുള്ളവരാണെന്നും ആര്‍ച്ച്ബിഷപ് മാര്‍ തോമസ് തറയില്‍. ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയില്‍ ഓശാനത്തിരുക്കര്‍മങ്ങള്‍ക്ക് മുഖ്യകാര്‍മികത്വം വഹിച്ചു സന്ദേശം നല്‍കുകയായിരുന്നു ആര്‍ച്ച്ബിഷപ്. സമൂഹം എക്കാലവും അവഗണിക്കുന്ന കഴുതക്കുട്ടിയുടെ പുറത്താണ് കര്‍ത്താവ് തന്‍റെ രക്ഷാകരദൗത്യം പൂര്‍ത്തീകരിക്കാന്‍ വിനയാന്വിതനായി ജറുസലേമിലേക്കു കടന്നുവന്നത്. ലാളിത്യത്തിന്‍റെയും വിനയത്തിന്‍റെയും മഹനീയ മാതൃകയാണ് അവിടുന്ന് വെളിവാക്കിയത്. എളിമ, സഹനം, വിനയം, ലാളിത്യം, ത്യാഗം, അഹിംസ എന്നിവയാണ് ദൈവരാജ്യത്തിന്‍റെ മുഖമുദ്രയെന്ന് ഈശോ തന്‍റെ രാജകീയ പ്രവേശനത്തിലൂടെ വ്യക്തമാക്കുന്നുവെന്നും മാര്‍ തോമസ് തറയില്‍ കൂട്ടിച്ചേര്‍ത്തു.

ദേവാലയങ്ങളിൽ ഓശാനത്തിരുനാൾ ആചരിച്ചു

കടുത്തുരുത്തി: പെസഹ ആചരണത്തിന് മുന്നോടിയായി യേശുക്രിസ്തു ജറുസലേമിലേക്കു നടത്തിയ രാജകീയ പ്രവേശനത്തെ അനുസ്മരിച്ചു ക്രൈസ്തവര്‍ ഓശാന തിരുനാള്‍ ആചരിച്ചു. ദേവാലയങ്ങളില്‍ പ്രത്യേക പ്രാര്‍ഥനകളും തിരുക്കര്‍മങ്ങളും നടന്നു. രാവിലെ ദേവാലയങ്ങളില്‍ നടന്ന കുരുത്തോല വെഞ്ചരിപ്പ്, നേര്‍ച്ച വെഞ്ചരിപ്പ്, കുരുത്തോല പ്രദക്ഷിണം, ജപമാല, ആരാധന, വിശുദ്ധ കുര്‍ബാന എന്നീ തിരുക്കര്‍മങ്ങളില്‍ വിശ്വാസികളുടെ വലിയ തിരക്കായിരുന്നു. കടുത്തുരുത്തി സെന്‍റ് മേരീസ് ഫൊറോന താഴത്തുപള്ളിയുടെ ‍ പഴയപള്ളിയില്‍ രാവിലെ തിരുക്കര്‍മങ്ങള്‍ ആരംഭിച്ചു. തുടര്‍ന്ന് കുരുത്തോല വെഞ്ചരിപ്പ്, പുതിയ പള്ളിയിലേക്കു കുരുത്തോല പ്രദക്ഷിണം, വിശുദ്ധ കുര്‍ബാന എന്നിങ്ങനെയാണ് തിരുക്കര്‍മങ്ങള്‍ നടന്നത്. വികാരി ഫാ.മാത്യു ചന്ദ്രന്‍കുന്നേല്‍ മുഖ്യകാര്‍മികത്വം വഹിച്ചു. കടുത്തുരുത്തി സെന്‍റ് മേരീസ് ഫൊറോന വലിയപള്ളിയില്‍ രാവിലെ ഏഴിന് കുരുത്തോല വെഞ്ചരിപ്പോടെ തിരുക്കര്‍മങ്ങള്‍ ആരംഭിച്ചു. തുടര്‍ന്ന് പ്രദക്ഷിണം, വിശുദ്ധ കുര്‍ബാന, നേര്‍ച്ച വെഞ്ചരിപ്പ്, ദമ്പതികള്‍ക്കായുള്ള പ്രത്യേക പ്രാര്‍ഥന എന്നിവ നടന്നു. വികാരി ഫാ.ജോണ്‍സണ്‍ നീലനിരപ്പേല്‍ മുഖ്യകാര്‍മികത്വം വഹിച്ചു. മുട്ടുചിറ ഫൊറോന പള്ളിയില്‍ രാവിലെ 6.30ന് തിരുക്കര്‍മങ്ങള്‍ ആരംഭിച്ചു. കുരുത്തോല വെഞ്ചരിപ്പ്, തുടര്‍ന്ന് വിശുദ്ധ കുര്‍ബാന എന്നിങ്ങനെയാണ് തിരുക്കര്‍മങ്ങള്‍ നടന്നത്. വികാരി ഫാ.ഏബ്രഹാം കൊല്ലിത്താനത്തുമലയില്‍ കാര്‍മികത്വം വഹിച്ചു. മണ്ണാറപ്പാറ സെന്‍റ് സേവ്യേഴ്‌സ് പള്ളിയില്‍ രാവിലെ ആറിന് ഓശാന തിരുക്കര്‍മങ്ങള്‍ ആരംഭിച്ചു. തുടര്‍ന്ന് വിശുദ്ധ കുര്‍ബാനയ്ക്ക് വികാരി ഫാ.ജോസ് വള്ളോംപുരയിടം കാര്‍മികത്വം വഹിച്ചു. കാഞ്ഞിരത്താനം സെന്‍റ് ജോണ്‍സ് പള്ളിയിലെ ഓശാന തിരുക്കര്‍മങ്ങള്‍ രാവിലെ 6.45 ന് ആരംഭിച്ചു. 10.30നുള്ള വിശുദ്ധ കുര്‍ബാനയെത്തുടര്‍ന്ന് തമുക്ക് നേര്‍ച്ച വെഞ്ചരിപ്പും വിതരണവും നടന്നു. വികാരി ഫാ. ജയിംസ് വയലില്‍ നേര്‍ച്ച വെഞ്ചരിപ്പ് നിര്‍വഹിച്ചു. കോതനല്ലൂര്‍ കന്തീശങ്ങളുടെ ഫൊറോന പള്ളിയില്‍ രാവിലെ ഏഴിനു നടന്ന തിരുക്കര്‍മങ്ങള്‍ക്ക് വികാരി ഫാ. സെബാസ്റ്റ്യന്‍ പടിക്കക്കുഴുപ്പില്‍ കാര്‍മികത്വം വഹിച്ചു. അറുനൂറ്റിമംഗലം സെന്‍റ് തോമസ് മലകയറ്റ പള്ളിയില്‍ രാവിലെ ഏഴിന് ഓശാനയുടെ തിരുക്കര്‍മങ്ങള്‍ ആരംഭിച്ചു. വികാരി ഫാ.അഗസ്റ്റിന്‍ വരിക്കമാക്കല്‍ കാര്‍മികത്വം വഹിച്ചു. തലയോലപ്പറന്പ്: വിശുദ്ധ വാരാചരണത്തിന് പ്രാർഥനാനിർഭരമായ തുടക്കം കുറിച്ച് തലയോലപ്പറമ്പ് സെന്‍റ് ജോർജ് പള്ളിയിൽ ഓശാന ഞായർ ആചരിച്ചു. ഓശാന തിരുക്കർമങ്ങൾ സെന്‍റ് ജോർജ് സ്കൂൾ അങ്കണത്തിൽ ആരംഭിച്ചു. കുരുത്തോല വെഞ്ചരിച്ച് പ്രദക്ഷിണം പള്ളിയിലെത്തിയതിനെ തുടർന്ന് വിശുദ്ധ കുർബാന നടന്നു. വികാരി റവ. ഡോ. ബെന്നി ജോൺ മാരാംപറമ്പിൽ തിരുക്കർമങ്ങൾക്ക് കാർമികത്വം വഹിച്ചു. ഫാ. ജോഷി വാസുപുരത്തുകാരൻ സന്ദേശം നൽകി. ഇന്നും, നാളെയും കുമ്പസാരം ഉണ്ടായിരിക്കും. 17നു രാവിലെ 6.30ന് കാൽ കഴുകൽ ശുശ്രുഷ, വിശുദ്ധ കുർബാന പ്രസംഗം. ഏഴിന് അപ്പം മുറിക്കൽ ശുശ്രൂഷ. 18നു രാവിലെ ഏഴിന് പീഡാനുഭവ തിരുക്കർമങ്ങൾ. പ്രസംഗം സഹ വികാരി ഫാ. ഫ്രെഡ്‌ഡി കോട്ടൂർ, വൈകുന്നേരം നാലിന് യൂണിറ്റുകളിൽ നിന്ന് കുരിശിന്റെ വഴി പള്ളിയിൽ എത്തും. തുടർന്ന് പരിഹാര പ്രദക്ഷിണം. 5.30ന് പീഡാനുഭവ സന്ദേശം: സിസ്റ്റർ ഷെറിൻ. 19നു രാവിലെ 6.30ന് വിശുദ്ധ കുർബാന. ഉയിർപ്പ് തിരുക്കർമങ്ങൾ ശനിയാഴ്ച രാത്രി 10ന് പാരീഷ് ഹാളിൽ ആരംഭിക്കും.

ഇൻഡോർ സ്റ്റേഡിയം ഉദ്ഘാടനം ചെയ്തു

വൈക്കം: വൈക്കം ബാഡ്മിന്‍റൺ അക്കാദമിയുടെ ആഭിമുഖ്യത്തിൽ ഉദയനാപുരം നക്കം തുരുത്തിൽ നിർമിച്ച ഇൻഡോർ സ്റ്റേഡിയത്തിൽ ബാഡ്മിന്‍റൺ സമ്മർ കോച്ചിംഗ് ക്യാമ്പിന് തുടക്കമായി. വൈക്കം ബാഡ്മിന്‍റൺ അക്കാദമി പ്രസിഡന്‍റ് എൻ.പി. ലൗജി ന്‍റെ അധ്യക്ഷതയിൽ നടന്ന യോഗത്തിൽ ഇൻഡോർ സ്റ്റേഡിയത്തിന്‍റെ ഉദ്ഘാടനം ഫ്രാൻസിസ് ജോർജ് എംപി നിർവഹിച്ചു. ഇന്ത്യൻ ബാഡ്മിന്‍റൺ അസോസിയേഷൻ സീനിയർ വൈസ് പ്രസിഡന്‍റ് ദ്രോണാചാര്യ എസ്. മുരളീധരൻ ബാഡ്മിന്‍റൺ സമ്മർ കോച്ചിംഗ് ക്യാമ്പ് ഉദ്ഘാടനം ചെയ്തു. കെബിഎസ്എ ട്രഷറർ ജി. പ്രശാന്ത് മുഖ്യപ്രഭാഷണം നടത്തി. ഉദയനാപുരം പഞ്ചായത്ത് പ്രസിഡന്‍റ് പി.കെ.ആനന്ദവല്ലി, വൈസ് പ്രസിഡന്‍റ് സി.പി.അനൂപ്, കെഡിബിഎസ്എ കോട്ടയം പ്രസിഡന്‍റ് കുഞ്ഞ് മൈക്കിൾ മണർകാട്, അഡ്വ. ജോർജ്കാരിത്താനം, വൈക്കം ബാഡ്മിന്‍റൺ അക്കാദമി സെക്രട്ടറി ഡോ. പി.വിനോദ് തുടങ്ങിയവർ പ്രസംഗിച്ചു.

ആശാ പ്രവർത്തകയ്ക്ക് 12,000 രൂപ ഇൻസന്‍റീവ് നൽകി പഞ്ചായത്തംഗം

വൈക്കം: വിഷുവിനും ആശമാരുടെ സമരം സെക്രട്ടേറിയറ്റിൽ തുടരുമ്പോൾ തലയാഴത്ത് പഞ്ചായത്തംഗം ഒരു വർഷത്തെ ഇൻസന്‍റീവായി 12,000 രൂപ വാർഡിലെ ആശാ വർക്കർക്ക് വിഷുക്കൈനീട്ടമായി നൽകി.തലയാഴം പഞ്ചായത്ത് 10 -ാം വാർഡിലെ ബിജെപി മെംബർ പ്രീജു കെ. ശശിയാണ് വാർഡിലെ ആശാ പ്രവർത്തക മഹിളാമണിക്ക് 12,000 രൂപ ഇൻസന്‍റീവ് കൈ നീട്ടമായി നൽകിയത്. കോവിഡ് കാലത്തടക്കം വാർഡിലെ ആരോഗ്യ രംഗത്തെ പ്രവർത്തനങ്ങളിൽ മഹിളാമണി പ്രതിബദ്ധതയോടെ പ്രവർത്തിച്ചത് മുൻനിർത്തിയാണ് മാസം ആയിരം രൂപ എന്ന നിരക്കിൽ ഒരു വർഷത്തെ ഇൻസന്‍റീവ് പ്രിജു ഒരുമിച്ച് നൽകിയത്. സർക്കാർ പിഎസ്‌സി അംഗങ്ങൾക്കടക്കം ആനുകൂല്യങ്ങൾ വാരിക്കോരി നൽകിയിട്ടും നേരിയ വർധനയെങ്കിലും വരുത്തി ആശമാരുടെ സമരം വിഷുവിന് മുമ്പ് തീർക്കാതിരുന്നതിലെ തന്‍റെ പ്രതിഷേധമാണ് ഈ വിധത്തിൽ പ്രകടിപ്പിച്ചതെന്നു പ്രീജു കെ. ശശി പറഞ്ഞു. മഹിളാമണിക്കു പുറമെ തന്‍റെ വാർഡിലെ എഡിഎസ്, സിഡിഎസ്, മേറ്റുമാർ, വയോജനങ്ങൾഎന്നിവരുൾപ്പെട്ട 236 തൊഴിലുറപ്പ് തൊഴിലാളികൾക്കും പ്രീജു വിഷുക്കൈനീട്ടം നൽകി.

വിഷുക്കൈനീട്ടമായി സഹോദരങ്ങളുടെ മാമ്പഴ വിതരണം

കടുത്തുരുത്തി: വിഷുക്കൈനീട്ടമായി കുരുന്നുകളായ സഹോദരങ്ങളുടെ മാമ്പഴ വിതരണം. വിഷുവിന് വീട്ടില്‍ കണി വയ്ക്കാനായി പിതാവ് സന്തോഷ് മാമ്പഴം പറിക്കുന്നത് കണ്ടപ്പോഴാണ് ആയാംകുടി സെന്‍റ് തെരേസ് ഇംഗ്ലീഷ് മീഡിയം സ്‌കൂളിലെ വിദ്യാര്‍ഥിനിയായ മകള്‍ ജ്യോതികയ്ക്ക് ഇത്തരമൊരു ചിന്തയുണ്ടാകുന്നത്. തലയോലപ്പറമ്പ് കുറുന്തറ കണ്ടത്തില്‍ സന്തോഷിന്‍റെ മകളാണ് നാലാം ക്ലാസുകാരി ജ്യോതിക. പറിച്ചെടുക്കാത്തതിനാല്‍ മാമ്പഴമെല്ലാം വെറുതേ വീണ് പോവുകയാണല്ലോ. വിഷുവല്ലേ, ഇതു പറിച്ചെടുത്ത് എല്ലാവര്‍ക്കും സൗജന്യമായി നല്‍കിയാല്‍ അവര്‍ കണിയൊരുക്കുമ്പോള്‍ മാമ്പഴം കൊടുത്ത നമ്മളെയും ഓര്‍ക്കുമല്ലോ. ഇതായിരുന്നു ഈ കുരുന്നിന്‍റെ മനസിലെ ചിന്ത. മകളുടെ ആഗ്രഹത്തിന് സന്തോഷും ഭാര്യ റാണിയും പിന്തുണ നല്‍കി. തുടര്‍ന്ന് പറ്റാവുന്നിടത്തോളം മാമ്പഴം മക്കള്‍ക്കായി ഇരുവരും ചേര്‍ന്ന് പറിച്ചെടുത്തു. യുകെജി വിദ്യാര്‍ഥിനിയായ സഹോദരി സാന്‍വികയുമായി ചേര്‍ന്ന് ജ്യോതിക ബക്കറ്റില്‍ മാമ്പഴവും കൂട്ടിവച്ചു ഫ്രീ മാംഗോ എന്ന ബോര്‍ഡും വച്ച് പരിസരത്തുള്ള വീടുകളിലും റോഡിലൂടെ നടന്നും കാണുന്നവര്‍ക്കെല്ലാം മാമ്പഴം വിതരണം ചെയ്തു. 75 കിലോയോളം വരുന്ന അല്‍ഫോന്‍സ് ഇനത്തില്‍പ്പെട്ട മാമ്പഴമാണ് കുട്ടികള്‍ വിതരണം ചെയ്തത്. ആയാംകുടി സെന്‍റ് തെരേസാസ് ഇംഗ്ലീഷ് മീഡിയം സ്‌കൂളില്‍തന്നെയാണ് സാന്‍വികയും പഠിക്കുന്നത്.

വേനല്‍മഴയില്‍ പാടത്ത് വെള്ളം നിറഞ്ഞു :വിളവെടുക്കാനാവാതെ 47 ഏക്കറിലെ നെല്‍കൃഷി

കടുത്തുരുത്തി: വേനല്‍മഴയില്‍ പാടത്ത് വെള്ളം നിറഞ്ഞു. 47 ഏക്കറിലെ നെല്‍കൃഷി വിളവെടുക്കാനാവാതെ നാശാവസ്ഥയില്‍. മാഞ്ഞൂര്‍ പഞ്ചായത്തിലെ ആനിത്താനം-പെരുങ്കരി പാടശേഖരത്തെ നെല്‍കൃഷിയുടെ വിളവെടുപ്പാണ് പ്രതിസന്ധിയിലായിരിക്കുന്നത്. പാടത്ത് വെള്ളം കിടക്കുന്നതിനാല്‍ കൊയ്ത്തു യന്ത്രം ഇറക്കാനാവാത്തതാണ് പ്രതിസന്ധിക്ക് കാരണം. വേനല്‍മഴയില്‍ ജലനിരപ്പ് ഉയര്‍ന്ന് ഞാറക്കല്‍ തോട്ടില്‍നിന്നാണ് വെള്ളം പാടത്തേക്കു കയറിയത്. പുറംബണ്ടില്ലാത്തതാണ് വെള്ളം കയറാന്‍ കാരണമെന്ന് കര്‍ഷകനായ അനില്‍ പറയുന്നു. മോട്ടോര്‍ ഉണ്ടെങ്കിലും പാടത്തെയും സമീപമുള്ളതുമായ ചാലുകളൊന്നും കൃത്യമായി തെളിക്കാത്തതുമൂലം വെള്ളം പൂര്‍ണമായും വറ്റിക്കാനാവാത്തതും പ്രതിസന്ധിക്ക് ആക്കം കൂട്ടി. വെള്ളം കയറ്റാനും ഇറക്കാനും നിര്‍മിച്ച പാടത്തെ ചീപ്പ് (തടയണ) തകര്‍ന്ന് കിടക്കുകയാണ്. രണ്ടു വര്‍ഷമായി ഇവിടത്തെ കൃഷി വേനല്‍മഴയെത്തുടര്‍ന്ന് കൊയ്ത്ത് നടത്താനാവാതെ കര്‍ഷകര്‍ ഉപേക്ഷിക്കുകയായിരുന്നെന്നും അനില്‍ പറഞ്ഞു. 52 കര്‍ഷകരാണിവിടെയുള്ളത്. നവംബര്‍ ആദ്യം വിതച്ച നെല്ല് 25 ദിവസം വളര്‍ച്ചയെത്തിയപ്പോള്‍ മഴയെത്തുടര്‍ന്നു വെള്ളം കയറി നശിച്ചുപോയിരുന്നു. തുടര്‍ന്ന് ഡിസംബറില്‍ കിലോയ്ക്ക് 47 രൂപ നിരക്കില്‍ വിത്ത് വില കൊടുത്തു വാങ്ങിയാണ് വീണ്ടും വിതച്ചത്. രണ്ടാമത് ചെയ്ത കൃഷിയാണ് ഇപ്പോള്‍ വിളവെടുക്കാറായ സമയത്ത് വെള്ളം കയറി നാശാവസ്ഥയിലായിരിക്കുന്നത്. ഇത്തവണയും കൃഷി നശിച്ചാല്‍ വരുംകാലങ്ങളില്‍ കൃഷി ഉപേക്ഷിക്കേണ്ട അവസ്ഥയിലാണ് കര്‍ഷകരെന്നു പാടശേഖര സമിതി സെക്രട്ടറി ജോസഫും പ്രസിഡന്‍റ് ഏബ്രഹാമും പറഞ്ഞു. വലിയ സാമ്പത്തിക നഷ്ടമാണ് കര്‍ഷകര്‍ക്കുണ്ടായിരിക്കുന്നത്. ഒരേക്കറില്‍നിന്ന് 25 ക്വിന്‍റല്‍ നെല്ല് ലഭിക്കുന്ന നിലയില്‍ മികച്ച വിളവ് കിട്ടേണ്ട പാടശേഖരമാണ് കൊയ്ത്ത് നടത്താനാകാതെ കിടക്കുന്നതെന്നും പാടശേഖര സമിതി ഭാരവാഹികള്‍ പറയുന്നു.

ലഹരിവിരുദ്ധ കാമ്പയിൻ

കൂരോപ്പട: പബ്ലിക് ലൈബ്രറിയുടെ ആഭിമുഖ്യത്തിൽ ലഹരി വ്യാപനത്തിനെതിരേ സംഘടിപ്പിച്ച ലഹരിവിരുദ്ധ കാന്പയിനും ഇരുപതിൽ അധികം ഗായകർ പങ്കെടുത്ത സംഗീതനിശയും ചാണ്ടി ഉമ്മൻ എംഎൽഎ ഉദ്ഘാടനം ചെയ്തു. ലൈബ്രറി പ്രസിഡന്‍റ് ടി. ജി. ബാലചന്ദ്രൻ നായർ അധ്യക്ഷത വഹിച്ചു. ഡോ. മഞ്ജുഷ വി. പണിക്കർ, ലൈബ്രറി സെക്രട്ടറി ടി.എസ്. ഉണ്ണികൃഷ്ണൻ നായർ, വൈസ് പ്രസിഡന്‍റ് എസ്. അരുൺ തുടങ്ങിയവർ പ്രസംഗിച്ചു.

ഡോ. ബി.ആര്‍. അംബേദ്കര്‍ ജന്മദിനാഘോഷം

കോട്ടയം: അഖില കേരള ചേരമര്‍ ഹിന്ദു മഹാസഭ സംസ്ഥാന കമ്മിറ്റിയുടെ അഭിമുഖ്യത്തില്‍ ഡോ. ബി.ആര്‍. അംബേദ്ക്കര്‍ ദ്വിദിന ജന്മദിനാഘോഷ സംസ്ഥാന തല ഉദ്ഘാടം കോട്ടയം ഹെഡ് ഓഫീസില്‍ സംസ്ഥാന പ്രസിഡന്‍റ് എസ്. ബാബു നിര്‍വഹിച്ചു. സംസ്ഥാന വൈസ് പ്രസിഡന്‍റ് മുട്ടമ്പലം ശ്രീകുമാർ അധ്യക്ഷത വഹിച്ചു. ജനറല്‍ സെക്രട്ടറി സി.കെ. സനില്‍ കുമാര്‍, എസ്. കൃഷ്ണകുമാര്‍, എസ്. കണ്ണന്‍, സന്തോഷ് മണര്‍ക്കാട് തുടങ്ങിയവര്‍ പ്രസംഗിച്ചു. ജന്മദിന ദിവസമായ ഇന്നു ശാഖകളില്‍ ഛായാചിത്രത്തില്‍ പുഷ്പ്പാര്‍ചന, സംമ്മേളനം എന്നിവ നടത്തും.

ഓഹരിയുടമ ആവശ്യപ്പെട്ടാൽ പൊതുയോഗ മിനിറ്റ്സ് നൽകണമെന്ന് വിവരാവകാശ കമ്മീഷണർ

ഏറ്റുമാനൂർ: ഓഹരിയുടമ ആവശ്യപ്പെട്ടാൽ സഹകരണ ബാങ്ക് പൊതുയോഗത്തിന്‍റെ മിനിറ്റ്സിന്‍റെ പകർപ്പ് നൽകണമെന്ന് സംസ്ഥാന വിവരാവകാശ കമ്മീഷണർ ഡോ. കെ.എം. ദിലീപ് ഉത്തരവിട്ടു. അസിസ്റ്റന്‍റ് രജിസ്ട്രാർക്ക് വിവരാവകാശ അപേക്ഷ നൽകിയാൽ ബാങ്കിൽനിന്ന് മിനിറ്റ്സിന്‍റെ പകർപ്പ് വാങ്ങിക്കൊടുക്കണമെന്ന് ഉത്തരവിൽ പറയുന്നു. ഏറ്റുമാനൂർ സർവീസ് സഹകരണ ബാങ്ക് ഓഹരിയുടമയും സാമൂഹിക പ്രവർത്തകനുമായ പി.ജെ. ചാക്കോ (ജയിംസ് പുളിക്കൻ) നൽകിയ ഹർജിയിലാണ് ഉത്തരവ്.

ചാണ്ടി ഉമ്മന്‍റെ ഉപവാസം നാളെ

പാമ്പാടി: പുതുപ്പള്ളി നിയോജക മണ്ഡലത്തോടുള്ള സർക്കാരിന്‍റെ അവഗണനയ്ക്കെതിരേ നാളെ രാവിലെ എട്ടു മുതൽ പാമ്പാടി ബസ് സ്‌റ്റാൻഡിൽ ചാണ്ടി ഉമ്മൻ എംഎൽഎ ഉപവാസ സമരം നടത്തും. കെപിസിസി മുൻ പ്രസിഡന്‍റ് വി.എം.സുധീരൻ ഉദ്ഘാടനം ചെയ്യും. പാമ്പാടി വില്ലേജ് ഓഫീസ് നിർമാണം, പൊതുമരാമത്ത്-പഞ്ചായത്ത് റോഡുകളുടെ നവീകരണം, അകലക്കുന്നം അയുർവേദ ആശുപത്രി, കൂരോപ്പട വില്ലേജ് ഓഫീസ് ഉദ്ഘാടന പരിപാടികളിൽനിന്ന് എംഎൽഎയെ മാറ്റിനിർത്തൽ എന്നതടക്കമുള്ള വിഷയങ്ങൾക്കെതിരേയാണ് സമരം. കെ.ആർ നാരായണൻ ഫിലിം ഇൻസ്റ്റ‌ിറ്റ്യൂട്ട്, പാമ്പാടി ബസ് സ്‌റ്റാൻഡ് എന്നിവയ്ക്ക് അനുവദിച്ച എംഎൽഎ ഫണ്ട് ഉപയോഗിക്കാൻ തയാറാകുന്നില്ലെന്നും ചാണ്ടി ഉമ്മൻ എംഎൽഎ ആരോപിച്ചു. സ്വന്തം നിലയിൽ ഫണ്ടു കണ്ടെത്തിയതിനാൽ സർക്കാര് ഫണ്ട് നിഷേധിക്കുന്നതായും അദ്ദേഹം പറഞ്ഞു.

അനധികൃത നിർമാണം ഒഴിപ്പിക്കണം: ശാസ്ത്ര സാഹിത്യ പരിഷത്ത്

കുമരകം: നദീതീരങ്ങൾ കൈയേറിയുള്ള അനധികൃത നിർമാണങ്ങൾക്കെതിരേ നടപടി വേണമെന്ന് ശാസ്ത്ര സാഹിത്യ പരിഷത്ത് ജില്ലാ സമ്മേളനം. രണ്ടുദിവസമായി കുമരകത്ത് നടന്ന കേരള ശാസ്ത്ര സാഹിത്യ പരിഷത്ത് ജില്ലാ സമ്മേളനം ഇന്നലെ സമാപിച്ചു. ജില്ലയുടെ വികസന പ്രശ്നങ്ങൾ ഉയർത്തി പ്രത്യേക പ്രചാരണ പരിപാടികളും പദയാത്രയും സംഘടിപ്പിക്കാൻ സമ്മേളനത്തിൽ തീരുമാനായി. ജില്ലാ പ്രസിഡന്‍റ് കെ.കെ. സുരേഷ്കുമാർ അധ്യക്ഷത വഹിച്ചു. ജിസ് ജോസഫ്, വിഷ്ണു ശശിധരൻ, മഹേഷ് ബാബു, ആർ. സനൽകുമാർ എന്നിവർ പ്രസംഗിച്ചു. ഭാരവാഹികളായി പ്രഫ.എം.കെ. രാധാകൃഷ്ണൻ- പ്രസിഡന്‍റ്, ഡോ. എം.കെ. ബിജു, രശ്മി മാധവ് -വൈസ് പ്രസിഡന്‍റുമാർ, വിഷ്ണു ശശിധരൻ-സെക്രട്ടറി, കെ. ജയകുമാർ, സുനിത ശ്രീകുമാർ- ജോയിന്‍റ് സെക്രട്ടറിമാർ, ആർ. രാജേഷ് -ഖജാൻജി എന്നിവരെ തെരഞ്ഞെടുത്തു.

കുരുത്തോല പ്രദിക്ഷിണത്തിന് അനുമതി നിഷേധിച്ചത് ഫാസിസ്റ്റ് നിലപാട്: കൊടിക്കുന്നില്‍

ചങ്ങനാശേരി: ഡല്‍ഹിയില്‍ സമാധാനപരമായി നടത്തിവരുന്ന കത്തോലിക്കരുടെ കുരുത്തോല പ്രദിക്ഷിണത്തിന് ഡല്‍ഹി പോലീസ് അനുമതി നിഷേധിച്ച നടപടിയെ ശക്തമായി അപലപിക്കുന്നതായി കൊടിക്കുന്നില്‍ സുരേഷ് എംപി. പതിറ്റാണ്ടുകളായി പ്രത്യേക പ്രശ്‌നങ്ങളൊന്നുമില്ലാതെ നടത്തിവരുന്ന ഈ ആത്മീയ ചടങ്ങിന് എതിരായ നടപടി ബിജെപി സര്‍ക്കാരിന്‍റെ മതനിരോധന രാഷ്‌ട്രീയമാണെന്നും അദ്ദേഹം ആരോപിച്ചു. ഇത്തരം നീക്കങ്ങള്‍ ന്യൂനപക്ഷ സമൂഹത്തില്‍ ഭീതിയും അവഗണനയും വളര്‍ത്തുന്നുവെന്നും രാജ്യത്തിന്‍റെ മതനിരപേക്ഷതയും ജനാധിപത്യ ഘടനയും ഇത്തരത്തില്‍ ദുര്‍ബലമാകാന്‍ അനുവദിക്കരുതെന്നും എംപി പറഞ്ഞു.

സിന്തറ്റിക്ക് ഡ്രഗ്ഗുകളിൽനിന്ന് സിന്തറ്റിക്ക് ട്രാക്കുകളിലേക്ക് കുട്ടികളെ വഴിതിരിച്ചുവിടണം: കാതോലിക്കാബാവാ

കോട്ടയം: കലാലയങ്ങളിലടക്കം കുട്ടികൾ ലഹരിവലയിലേക്ക് വീഴുന്നതായി മലങ്കര ഓർത്തഡോക്സ് സഭയുടെ പരമാധ്യക്ഷൻ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാബാവാ. മാതൃദേവാലയമായ വാഴൂർ സെന്‍റ് പീറ്റേഴ്സ് ഓർത്തഡോക്സ് പള്ളിയിൽ ഓശാന ഞായർ ശുശ്രൂഷകൾക്ക് മുഖ്യകാർമികത്വം വഹിച്ച് പ്രസംഗിക്കുകയായിരുന്നു അദ്ദേഹം. ലഹരി ഉപയോഗത്തെ ലഘൂകരിക്കുന്ന സിനിമകൾ കുട്ടികൾക്ക് പ്രചോദനമാകുന്നുണ്ട്. സിന്തറ്റിക്ക് ഡ്രഗ്ഗുകളിൽനിന്ന് സിന്തറ്റിക്ക് ട്രാക്കുകളിലേക്ക് കുട്ടികളെ വഴിതിരിച്ചുവിടണം. ഇക്കാര്യത്തിൽ പത്തനംതിട്ട ജില്ലാ കളക്ടർ പ്രേം കൃഷ്ണന്‍റേത് മികച്ച മാതൃകയാണ്. മൊബൈൽ ഫോണുകളിൽ തളയ്ക്കപ്പെടുന്ന ബാല്യത്തിൽനിന്നു കുട്ടികളെ കളിക്കളങ്ങളിലേക്കാണ് കളക്ടർ സ്വാഗതം ചെയ്തത്. കുട്ടികൾ വായനാശീലത്തിൽ വളരണമെന്നും ലോകത്തെ ജയിച്ചവരുടെ ചരിത്രം കുട്ടികൾക്ക് പ്രചോദനമാകണമെന്നും പരിശുദ്ധ ബാവാ കൂട്ടിച്ചേർത്തു. വാഴൂർ സെന്‍റ് പീറ്റേഴ്സ് പള്ളിയിൽ രാവിലെ പ്രഭാതനമസ്ക്കാരത്തിന് ശേഷം പ്രദക്ഷിണവും കുരുത്തോല വാഴ്‌വും വിശുദ്ധ കുർബാനയും നടന്നു. ഇടവക വികാരി ഫാ. കുര്യാക്കോസ് മാണി, സഹവികാരി ഫാ. ജേക്കബ് ഫിലിപ്പോസ് എന്നിവർ നേതൃത്വം നൽകി. വലിയ ആഴ്ചയിൽ കാതോലിക്കാബാവാ മാതൃ ഇടവകയിൽ താമസിച്ച് ശുശ്രൂഷകൾക്ക് മുഖ്യകാർമികത്വം വഹിക്കുമെന്ന് ഇടവക ട്രസ്റ്റി എം.എ. അന്ത്രയോസ് മറ്റത്തിൽ, സെക്രട്ടറി സെബിൻ ബാബു എന്നിവർ അറിയിച്ചു.

സഭയെ ഭിന്നിപ്പിക്കാൻ ആര്‍ക്കും കഴിയില്ല: മാര്‍ തോമസ് തറയില്‍

ചങ്ങനാശേരി: പൗരവകാശങ്ങള്‍ മാനിച്ചും പൊതുനന്മ ലക്ഷ്യം വച്ചും പ്രവര്‍ത്തിക്കുന്ന ക്രൈസ്തവ സഭയെ സങ്കുചിത താല്പര്യങ്ങളുടെ പേരില്‍ ആര്‍ക്കും ഭിന്നിപ്പിക്കാന്‍ കഴിയില്ലെന്നും ക്രൈസ്തവര്‍ രാഷ്‌ട്രീയ പ്രബുദ്ധതയുള്ളവരാണെന്നും മാര്‍ തോമസ് തറയില്‍. ചങ്ങനാശേരി സെന്‍റ് മേരീസ് മെത്രാപ്പോലീത്തന്‍ പള്ളിയില്‍ ഓശാന തിരുക്കര്‍മങ്ങള്‍ക്ക് മുഖ്യകാര്‍മികത്വം വഹിച്ചു സന്ദേശം നല്‍കുകയായിരുന്നു ആര്‍ച്ച്ബിഷപ്. സമൂഹം എക്കാലവും അവഗണിക്കുന്ന കഴുതക്കുട്ടിയുടെ പുറത്താണ് കര്‍ത്താവ് തന്‍റെ രക്ഷാകരദൗത്യം പൂര്‍ത്തികരിക്കാന്‍ വിനയാന്വിതനായി ജറുസലേമിലേക്കു കടന്നുവന്നത്. ലാളിത്യത്തിന്‍റെയും വിനയത്തിന്‍റെയും മഹനീയ മാതൃകയാണ് അവിടുന്ന് വെളിവാക്കിയത്. എളിമ, സഹനം, വിനയം, ലാളിത്യം, ത്യാഗം, അഹിംസ എന്നിവയാണ് ദൈവരാജ്യത്തിന്‍റെ മുഖമുദ്രയെന്ന് ഈശോ തന്‍റെ രാജകീയ പ്രവേശനത്തിലൂടെ വ്യക്തമാക്കുന്നുവെന്നും മാര്‍ തോമസ് തറയില്‍ കൂട്ടിച്ചേര്‍ത്തു.

സഭകൾ സഹോദരങ്ങളെപ്പോലെ ജീവിക്കണം: ശ്രേഷ്ഠ കാതോലിക്ക

കോട്ടയം: ദൈവത്തിന്‍റെ സഭകൾ സഹോദരങ്ങളെ പോലെ ജീവിക്കാനുള്ള വഴികൾ തേടണമെന്ന് യാക്കോബായ സുറിയാനി സഭയുടെ ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവാ.ആഗോള മരിയൻ തീർഥാടന കേന്ദ്രമായ മണർകാട് വിശുദ്ധ മർത്തമറിയം യാക്കോബായ സുറിയാനി കത്തീഡ്രലിലെ ഓശാന പെരുന്നാൾ ശുശ്രൂഷകൾക്കും വിശുദ്ധ മൂന്നിന്മേൽ കുർബാനയ്ക്കും മുഖ്യകാർമികത്വം വഹിച്ച് പ്രസംഗിക്കുകയായിരുന്നു അദ്ദേഹം. തർക്കങ്ങളും വ്യവഹാരത്തിന്‍റെ വഴികളും ഒഴിവാക്കണം. അതാണ് ക്രിസ്തുവിന്‍റെ മാർഗം. കഴിഞ്ഞ കാലങ്ങളിലെ മുറിവുകൾ ഉണങ്ങാൻ, അതിന്‍റെ ആഴങ്ങൾ എത്ര വലുതാണെങ്കിലും ഈ പീഡാനുഭവ വാരം കർത്താവിന്‍റെ ക്രൂശിന്‍റെ വഴി ധ്യാനിക്കുന്നതിലൂടെ സാധിക്കണമെന്നും കാതോലിക്ക ബാവ പറഞ്ഞു. കത്തീഡ്രൽ സഹവികാരിമാരായ കുര്യാക്കോസ് കോർ എപ്പിസ്കോപ്പ കിഴക്കേടത്ത്, കുര്യാക്കോസ് കോർഎപ്പിസ്കോപ്പ കറുകയിൽ, ഫാ. കുര്യാക്കോസ് കാലായിൽ, ഫാ. എം.ഐ. തോമസ് മറ്റത്തിൽ, ഫാ. ഗീവറുഗീസ് നടുമുറിയിൽ, ഫാ. സനോജ് തെക്കേകുറ്റ്, ഫാ. ലിറ്റു തണ്ടാശേരിയിൽ, ഡീക്കൻ ഡോ. ജിതിൻ കുര്യൻ ആൻഡ്രൂസ് ചിരവത്തറ, ഡീക്കൻ ജിതിൻ മൈലക്കാട്ട് എന്നിവർ സന്നിഹിതർ ആയിരുന്നു. മണർകാട് കത്തീഡ്രലിലെ ദുഃഖവെള്ളി ശുശ്രൂഷകൾക്കും ശ്രേഷ്ഠ ബാവാ മുഖ്യകാർമികത്വം വഹിക്കുമെന്ന് കത്തീഡ്രൽ ട്രസ്റ്റിമാരായ സുരേഷ് കെ. ഏബ്രഹാം, ബെന്നി ടി. ചെറിയാൻ, ജോർജ് സഖറിയാ, സെക്രട്ടറി പി.എ. ചെറിയാൻ എന്നവർ അറിയിച്ചു.

60 ലക്ഷവും 61 പവനും തട്ടിയെടുത്ത ദമ്പതികൾക്കും സുഹൃത്തിനുമെതിരേ കേസ്

ഗാന്ധിനഗർ: ഹണി ട്രാപ്പിൽ കുടുക്കി യുവ എൻജിനിയറിൽനിന്ന് 60 ലക്ഷം രൂപയും 61 പവൻ സ്വർണവും തട്ടിയെടുത്ത ദമ്പതികൾക്കും സുഹൃത്തിനുമെതിരേ കേസ്. അമ്മഞ്ചേരി സ്വദേശി ധന്യ, ഭർത്താവ് അർജുൻ, സുഹൃത്ത് തിരുവഞ്ചൂർ സ്വദേശി അലൻ തോമസ് എന്നിവർക്കെതിരേയാണ് ഗാന്ധിനഗർ പോലീസ് കേസെടുത്തിരിക്കുന്നത്. പ്രതികൾ സമാനമയ തട്ടിപ്പു നടത്തി നിരവധി ആളുകളിൽനിന്നു പണം തട്ടിയതായാണ് വിവരം. പ്രതികൾ മൂന്നുപേരും ഒളിവിലാണ്. പ്രതിയായ യുവതി കഴിഞ്ഞമാസം ഗാന്ധിനഗർ പോലീസ് സ്റ്റേഷനിലെ പിആർഒക്കെതിരേ വിജിലൻസിൽ പരാതിപ്പെട്ടിരുന്നു. കൈക്കൂലിയായി ലൈംഗികബന്ധവും മദ്യവും ആവശ്യപ്പെട്ടതായി ആരോപിച്ചാണ് യുവതി പിആർഒക്കെതിരേ വിജിലൻസിനെ സമീപിച്ചത്. ഇതേത്തുടർന്ന് വിജിലൻസ് സംഘം യുവതിയെ കാണാനെത്തിയ പിആർഒയെ കസ്റ്റഡിയിൽ എടുത്തിരുന്നു.

വിദ്യാഭ്യാസ വകുപ്പിലെ വിവേചനത്തിനെതിരേ എച്ച്‌ജെടിഎഫ്

കോട്ടയം: ഹയര്‍ സെക്കന്‍ഡറി വിദ്യാഭ്യാസ വകുപ്പിലെ വിവേചനത്തിനെതിരേ ഹയര്‍ സെക്കന്‍ഡറി ജൂണിയര്‍ ടീച്ചേഴ്സ് ഫെഡറേഷന്‍ (എച്ച്‌ജെടിഎഫ്). തുല്യ യോഗ്യതയുണ്ടായിട്ടും പഠിപ്പിക്കല്‍ സമയത്തിന്‍റെ പേരില്‍ 25 വര്‍ഷത്തിലധികമായി കടുത്ത അവഗണ നേരിട്ടുകൊണ്ടിരിക്കുന്ന വിഭാഗമാണ് എച്ച്എസ്എസ്ടി ജൂണിയര്‍ അധ്യാപകര്‍. യോഗ്യത നേടിയിട്ടും പ്രിന്‍സിപ്പല്‍ പ്രമോഷന്‍ നിഷേധിക്കപ്പെടുകയാണ്. ഒരേസമയമുള്ള (ആഴ്ചയില്‍ അഞ്ച് ദിവസം രാവിലെ ഒന്പതു മുതല്‍ വൈകുന്നേരം 4.45 വരെ) എച്ച്എസ്എസ്ടി സീനിയറും ജൂണിയറും തമ്മില്‍ ശമ്പളത്തിലും പെന്‍ഷനിലും ഉണ്ടാകുന്ന വലിയ സാമ്പത്തിക അന്തരവും നിലവിലെ സ്‌പെഷല്‍ റൂളിന്‍റെയും ശമ്പള നിര്‍ണയത്തിന്‍റെയും അപാകതകള്‍ പ്രമോഷന്‍ ലഭിച്ചാല്‍ പോലും ശമ്പളവും ആനുകൂല്യങ്ങളും നഷ്ടമാകുകയുമാണ്. ക്ലറിക്കല്‍, ഓഫീസ് മുതലായ ജോലികള്‍ ജൂണിയറായതിനാല്‍ നിര്‍ബന്ധപൂര്‍വം നല്‍കുകയുമാണ്. അധ്യാപകര്‍ നേരിടുന്ന പ്രശ്‌നങ്ങള്‍ അനുഭാവപൂര്‍വം പരിഗണിച്ച് പരിഹാരം കാണണമെന്ന് അഭ്യര്‍ഥിച്ചു സംസ്ഥാന വ്യാപകമായി ഒമ്പതിനു വിവേചനവിരുദ്ധ ദിനമായി ബ്ലാക്ക് ആന്‍ഡ് വൈറ്റ് ഡ്രസ് കോഡ് ധരിച്ച് ഫോട്ടോകളെടൂത്ത് സ്റ്റാറ്റസ് ആക്കി പ്രതിഷേധിക്കും. തുടര്‍ച്ചയായി മേയ് 22നു തിരുവനന്തപുരത്ത് സംസ്ഥാനസമ്മേളനവും വിവേചന വിരുദ്ധ ജാഥയും സംഘടിപ്പിക്കുമെന്നും ഭാരവാഹികള്‍ പറഞ്ഞു. പത്രസമ്മേളനത്തില്‍ സംസ്ഥാന സെക്രട്ടറി ബോബന്‍ ഫിലിപ്പ്, ജില്ലാ പ്രസിഡന്‍റ് ചാള്‍സണ്‍ മാത്യു തുടങ്ങിയവര്‍ പങ്കെടുത്തു.

കണ്ണാടിപ്പായയ്ക്ക് ഭൗമ സൂചികാപദവി

ചെറുതോണി: ആദിവാസികൾ നെയ്തെടുക്കുന്ന പുതുതലമുറയ്ക്ക് പരിചിതമല്ലാത്ത കണ്ണാടിപ്പായയ്ക്ക് ഭൗമസൂചിക പദവി ലഭിച്ചു. കഞ്ഞിക്കുഴി പഞ്ചായത്തിലെ വെണ്‍മണി പാലപ്ലാവ് ആദിവാസി കോളനിയിലെ ഉൗരാളി വിഭാഗത്തിൽപ്പെട്ട ആദിവാസികളാണ് കണ്ണാടിപ്പായ നെയ്തെടുക്കുന്നത്. ജില്ലയിലേക്ക് ഭൗമസൂചിക പദവിയെത്തുന്നത് ഇതു രണ്ടാംതവണയാണ്. കഴിഞ്ഞവർഷം വട്ടവട വെളുത്തുള്ളിക്കും ഭൗമസൂചിക പദവി ലഭിച്ചിരുന്നു. കേരളത്തിലെ ആദിവാസി വിഭാഗത്തിന് ആദ്യമായാണ് ഈ അംഗീകാരം ലഭിക്കുന്നത്. പാലപ്ലാവ് ആദിവാസി കോളനിയിൽ നൂറോളം ഉൗരാളി കുടുംബങ്ങളാണുള്ളത്. ഇതിൽ അറുപതോളം കുടുംബങ്ങളിൽ കണ്ണാടിപ്പായ നെയ്യുന്നുണ്ട്. ഇവരുടെ കുലത്തൊഴിലായ കണ്ണാടിപ്പായനിർമാണം ഉൗരാളി കുടുംബങ്ങളിൽപ്പെട്ട പ്രായമായ സ്ത്രീകൾ മാത്രമെ ഇവിടെ ചെയ്യുന്നുള്ളൂ. വനത്തിൽനിന്ന് പ്രത്യേകയിനം ഈറ്റ കൊണ്ടുവന്നാണ് കണ്ണാടിപ്പായ നെയ്യുന്നത്. പഴയ കാലത്ത് രാജാവിനെ മുഖം കാണിക്കാൻ ചെല്ലുന്പോൾ ആദിവാസികൾ കാണിക്കയായി സമർപ്പിച്ചിരുന്നത് കണ്ണാടി പ്പായയായിരുന്നു. ഏറെ മിനുസമുള്ളതും സൂര്യപ്രകാശത്തെ പ്രതിഫലിപ്പിക്കുന്നതുമായതിനാലാണ് ഇതിനെ കണ്ണാടിപ്പായ എന്നു വിളിക്കുന്നത്. ആറടി നീളവും നാലടി വീതിയുമുള്ളതാണ് ഒരു പായ. ഒരു പായ നെയ്തെടുക്കാൻ ഒരുമാസം വേണ്ടി വരും. 25,000 രൂപ മുതൽ 30,000 രൂപ വരെ ഒരു പായയ്ക്ക് വില ലഭിക്കും. ഏറെ ക്ഷമയും സൂക്ഷ്മതയും ആവശ്യമുള്ള തൊഴിലാണിത്. പ്രായം ചെന്നവർക്കേ ഇതു നെയ്തു പരിചയമുള്ളൂ. പരിശീലനം നൽകി പ്രോൽസാഹിപ്പിക്കാൻ അധികൃതർ തയാറാകാത്തതിനാൽ ഇപ്പോഴത്തെ തലമുറയ്ക്ക് പായ നെയ്യുന്നതിൽ പ്രാവീണ്യവുമില്ല. പ്രായമായവർ നാടുനീങ്ങുന്നതോടെ കണ്ണാടിപ്പായയും വിസ്മൃതിയിലാകുമെന്ന ആശങ്കയുമുണ്ട്. ഒരു കണ്ണാടിപ്പായ 10 വർഷം വരെ കേടുകൂടാതെയിരിക്കും. വനഗവേഷണകേന്ദ്രത്തിലെ ശാസ്ത്രജ്ഞന്മാരുടെയടക്കം കഴിഞ്ഞ ഒരു വർഷത്തെ പരിശ്രമത്തിന്‍റെ ഫലമായാണ് കഞ്ഞിക്കുഴിയിലെ ആദിവാസികൾ നെയ്തെടുക്കുന്ന കണ്ണാടിപ്പായയ്ക്ക് ഭൗമസൂചികാ പദവി ലഭിക്കുന്നത്.

ലഹരി: നാടിനെ രക്ഷിക്കാന്‍ സര്‍ക്കാര്‍ കര്‍ശന നടപടികള്‍ സ്വീകരിക്കണമെന്ന് ജി. സുകുമാരന്‍ നായര്‍

ചങ്ങനാശേരി: ലഹരിവസ്തുക്കളുടെ ഉപയോഗം നിരോധിക്കുന്നതിന് ഗവണ്‍മെന്‍റുകളുടെ ഭാഗത്തുനിന്നു കര്‍ശനനടപടി ഉണ്ടാകണമെന്ന് എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായര്‍. ലഹരിയുടെ ഉപയോഗംകൊണ്ട് ശാരീരികവും മാനസികവുമായി വ്യക്തികളില്‍ ഉണ്ടാകുന്ന പ്രത്യാഘാതങ്ങളെക്കുറിച്ച് പാഠ്യപദ്ധതിയില്‍ ഉള്‍പ്പെടുത്തി കുട്ടികളില്‍ അവബോധം സൃഷ്ടിക്കേണ്ടത് അനിവാര്യമാണ്. സ്‌കൂളുകളും കോളജുകളും കേന്ദ്രീകരിച്ച് അതത് സ്ഥാപനങ്ങളിലെ പ്രഥമാധ്യാപകരുമായി സഹകരിച്ച് ഷാഡോ പോലീസിംഗിലൂടെ കുട്ടികള്‍ക്കിടയിലുള്ള ലഹരി വിതരണം, ഉപഭോഗം എന്നിവ തടയാന്‍ ശക്തമായ നടപടി സ്വീകരിക്കണം. ചെക്ക് പോസ്റ്റുകളിലെ വാഹനപരിശോധന ശക്തിപ്പെടുത്തുന്നതിനൊപ്പം അയല്‍ സംസ്ഥാനങ്ങളിലെയും നമ്മുടെ സംസ്ഥാനത്തിനകത്തെയും ബന്ധപ്പെട്ട വകുപ്പുകളെ ഏകോപിപ്പിച്ച് സംയുക്ത പരിശോധന കര്‍ശനമാക്കണം. ഇക്കാര്യങ്ങള്‍ സര്‍ക്കാര്‍ ശ്രദ്ധിച്ചാല്‍ കുട്ടികളിലെയും യുവതലമുറയിലെയും ലഹരി ഉപയോഗവും വ്യാപനവും ഒരു പരിധിവരെ തടയാന്‍ സാധിക്കുമെന്നും സുകുമാരന്‍നായര്‍ കൂട്ടിച്ചേര്‍ത്തു. മയക്കുമരുന്നുകടത്ത് ആരോപണവിധേയരായ വ്യക്തികളുടെ സ്വത്ത് കണ്ടുകെട്ടുന്നതിനുള്ള വ്യവസ്ഥകള്‍ നര്‍കോട്ടിക് ഡ്രഗ്‌സ് ആൻഡ് സൈക്കോട്രോപിക് ആക്ട് ഭേദഗതിയിലൂടെ ശക്തിപ്പെടുത്തുകയും ആവര്‍ത്തിച്ചുള്ള കുറ്റകൃത്യങ്ങള്‍ക്ക് മരണശിക്ഷവരെ നല്കാനുള്ള വിവേചനാധികാരം കോടതികള്‍ക്ക് നൽകുകയും വേണമെന്ന് അദ്ദേഹം പറഞ്ഞു.

ജോസഫ് ജിമ്മിക്ക് ഒന്നാം റാങ്ക്

പാലാ: ഇന്ദിരാഗാന്ധി നാഷണല്‍ ഓപ്പണ്‍ യൂണിവേഴ്സിറ്റിയുടെ (ഇഗ്‌നൗ) 2024 ലെ ബാച്ചിലര്‍ ഓഫ് ആര്‍ട്സ് പ്രോഗ്രാമില്‍ ഒന്നാം റാങ്കും സ്വര്‍ണ മെഡലും ജോസഫ് ജിമ്മി കരസ്ഥമാക്കി. പാലാ അന്തീനാട് മുണ്ടത്താനത്ത് ജിമ്മി ജോസഫിന്‍റെയും ലിറ്റിയുടെയും മകനാണ്. പാലാ ഇടപ്പാടി കരിയര്‍ ഡ്രീംസ് കോളജ് വിദ്യാര്‍ഥിയായിരുന്നു. ന്യൂഡല്‍ഹിയിലെ ഇഗ്‌നൗ ആസ്ഥാനത്ത് കേന്ദ്ര വിദ്യാഭ്യാസ മന്ത്രി ധര്‍മേന്ദ്ര പ്രധാന്‍ മുഖ്യാതിഥിയായ സമ്മേളനത്തില്‍ ഇഗ്‌നൗ വൈസ് ചാന്‍സലര്‍ പ്രഫ. ഉമ കാഞ്ചിലാലിന്‍റെ സാന്നിധ്യത്തില്‍ ഐഐഎം. തിരുച്ചിറപ്പള്ളി ഡയറക്ടര്‍ ഡോ. പവന്‍ കുമാര്‍ സിംഗില്‍നിന്നു റാങ്ക് സര്‍ട്ടിഫിക്കറ്റും സ്വര്‍ണമെഡലും ജോസഫ് ജിമ്മി ഏറ്റുവാങ്ങി.

എരുമേലി സ്വദേശിനി മൈസൂരുവിൽ അപകടത്തിൽ മരിച്ചു

എരുമേലി: മൈസൂരുവിൽ ബൈക്ക് തെന്നിമറിഞ്ഞ് ഡിവൈഡറിലിടിച്ച് എരുമേലി സ്വദേശിയായ യുവതിക്ക് ദാരുണാന്ത്യം. ഒപ്പമുണ്ടായിരുന്ന യുവാവിനെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു. എരുമലി മുക്കൂട്ടുതറ പാണപിലാവ് എരുത്വാപ്പുഴ കളത്തൂർ ബിജു- സുനിത ദമ്പതികളുടെ ഏക മകൾ കാർത്തിക ബിജു (25) ആണ് മരിച്ചത്. സംസ്കാരം ഇന്ന് ഉച്ചയ്ക്ക് ഒന്നിന് വീട്ടുവളപ്പിൽ നടക്കും. ബംഗളൂരുവിലെ ഒരു സ്വകാര്യ കമ്പനിയില്‍ ജിയോളജിസ്റ്റായി ജോലി ചെയ്തിരുന്ന കാർത്തിക അവധിക്ക് നാട്ടിലേക്ക് സുഹൃത്തിന്‍റെ ബൈക്കിൽ വരുമ്പോഴായിരുന്നു അപകടം. കഴിഞ്ഞ ദിവസം ഉച്ചയ്ക്ക് മൈസൂരു-നഞ്ചന്‍ഗുഡ് ദേശീയപാതയിലാണ് അപകടം നടന്നത്. ബൈക്ക് ഡിവൈഡറില്‍ ഇടിച്ച്‌ മറിയുകയായിരുന്നുവെന്ന് ബന്ധുക്കളെ പോലിസ് അറിയിച്ചു. റോഡ് പണി നടക്കുന്നതിനാല്‍ ബൈക്ക് തെന്നി മറിഞ്ഞാണ് ഡിവൈഡറിലിടിച്ചത്. കാർത്തിക അപകട സ്ഥലത്തുവച്ച്‌ തന്നെ മരിച്ചു. ബൈക്ക് ഓടിച്ചിരുന്ന പാലക്കാട് ഒറ്റപ്പാലം മാങ്കോട് തൃക്കടേരി ചാമണ്ണൂർ ജി. ഗിരിശങ്കർ തരകൻ (26) ഗുരുതര പരിക്കുകളോടെ മൈസൂരു ജെഎസ്‌എസ് ആശുപത്രിയില്‍ ചികിത്സയിലാണ്. കാർത്തികയുടെ മൃതദേഹം ഇന്ന് രാവിലെ വീട്ടിൽ എത്തിക്കും.

ഓശാന... ഓശാന... ദാവീദിന്‍സുതനോശാന...

കോട്ടയം: കൂപ്പുകരങ്ങള്‍ക്കു നടുവില്‍ കുരുന്നോലകളേന്തി ദാവീതിന്‍സുദന് ജയ്ഗാനമാലപിച്ച് ദേവാലയത്തിലേക്ക് വിശ്വാസികള്‍ പ്രദക്ഷിണമായി എത്തി ഓശാനത്തിരുനാള്‍ ആഘോഷപൂര്‍വം കൊണ്ടാടി. ജറുസലേം ദേവാലയത്തോടു ചേര്‍ന്നുള്ള ഒലിവുമലയുടെ ഓരത്തുനിന്നു രണ്ടായിരം വര്‍ഷം മുന്‍പു യേശുവിനെ ജനാവലി ജറുസലേം ദേവാലയത്തിലേക്ക് വരവേറ്റതിനെ അനുസ്മരിച്ചു ക്രൈസ്തവര്‍ കുരുന്നോലകളും സൈത്തിന്‍ കൊമ്പുകളുമേന്തി ദേവാലയത്തിന്‍റെ പ്രധാനവാതില്‍ മുട്ടിത്തുറന്ന് ഓശാനഗീതികളോടെ പ്രദക്ഷിണമായെത്തി. ഒലിവുചില്ലകള്‍ക്കു പകരം ആശിര്‍വദിക്കപ്പെട്ട തെങ്ങിന്‍ കുരുത്തോല കൈയിലേന്തുന്നതോടെ വിശുദ്ധവാരാചരണത്തിനും തുടക്കമായി. ചങ്ങനാശേരി സെന്‍റ് മേരീസ് മെത്രപ്പോലീത്തന്‍ പള്ളിയില്‍ നടന്ന ഓശാന തിരുക്കര്‍മങ്ങള്‍ക്ക് ആര്‍ച്ച്ബിഷപ് മാര്‍ തോമസ് തറയിലും കോട്ടയം ക്രിസ്തുരാജ കത്തീഡ്രലില്‍ ആര്‍ച്ച്ബിഷപ് മാര്‍ മാത്യു മൂലക്കാട്ടും മുഖ്യകാര്‍മികത്വം വഹിച്ചു. പാലാ സെന്‍റ് തോമസ് കത്തീഡ്രലില്‍ ബിഷപ് മാര്‍ ജോസഫ് കല്ലറങ്ങാട്ടും കാഞ്ഞിരപ്പള്ളി സെന്‍റ് ഡൊമിനിക്‌സ് കത്തീഡ്രലില്‍ മാര്‍ ജോസ് പുളിക്കലും വിമലഗിരി കത്തീഡ്രലില്‍ ബിഷപ് ഡോ. സെബാസ്റ്റ്യന്‍ തെക്കത്തെച്ചേരിലും ഓശാനത്തിരുക്കര്‍മങ്ങളില്‍ കാര്‍മികരായി. യാക്കോബായ സുറിയാനി സഭ മലങ്കര മെത്രാപ്പോലീത്ത ശ്രേഷ്ഠ കാതോലിക്കാ ബസേലിയോസ് ജോസഫ് ബാവാ മണര്‍കാട് സെന്‍റ് മേരീസ് കത്തീഡ്രലിലും വാഴൂര്‍ സെന്‍റ് പീറ്റേഴ്‌സ് ഓര്‍ത്തഡോക്‌സ് പള്ളിയില്‍ മലങ്കര ഓര്‍ത്തഡോക്‌സ് സഭാധ്യക്ഷന്‍ ബസേലിയോസ് മാര്‍ത്തോമ മാത്യൂസ് തൃതീയന്‍ കാതോലിക്ക ബാവ കുരുത്തോല വാഴ്‌വിനും വിശുദ്ധ കുര്‍ബാനയ്ക്കും കാര്‍മികത്വം വഹിച്ചു. യാക്കോബായ സഭ സുന്നഹദോസ് സെക്രട്ടറി തോമസ് മാര്‍ തീമോത്തിയോസ് മെത്രാപ്പോലീത്ത കോട്ടയം സെന്‍റ് ജോസഫ്‌സ് കത്തീഡ്രലിലും കാര്‍മികത്വം വഹിച്ചു.

വിഷു: വിപണിയിൽ ഉണർവ്

കോട്ടയം: ഐശ്വര്യത്തിന്‍റെയും പ്രതീക്ഷയുടെയും ഉത്സവമായ വിഷു ആഘോഷിക്കുന്നതിനായി നാടും നാഗരവും ഒരുങ്ങി. വിഷുക്കണിഒരുക്കുന്നതിനായുള്ള സാധന സാമഗ്രികൾ വാങ്ങുന്നതിനും പുതു വസ്ത്രങ്ങൾ വാങ്ങുന്നതിനുമായി കുടുംബങ്ങൾ എത്തിയതോടെ നഗരങ്ങൾ തിരക്കിലമർന്നു. ഇന്നലെ രാവിലെ മുതൽ ജില്ലയിയിലുടനീളം പ്രധാന വ്യാപാര കേന്ദ്രങ്ങളിൽ അഭൂതപൂർവമായ തിരക്കായിരുന്നു അനുഭവപ്പെട്ടത്. പതിവിൽനിന്നു വ്യത്യസ്തമായി നാട്ടിൻപുറങ്ങളിൽ വീട്ടമ്മമാരും പുരുഷ അയൽക്കൂട്ടങ്ങളുമൊക്കെ പ്രാദേശികമായി ഉത്പാദിപ്പിച്ച കണിവെള്ളരിയും തണ്ണിമത്തനും മാങ്ങയും ചക്കയുമൊക്കെ പാതയോരങ്ങളിൽ മിതമായ നിരക്കിൽ വിൽപന നടത്തിയത് വിലക്കയറ്റത്തിനും സാമ്പത്തിക പ്രതിസന്ധിക്കുമിടയിൽ സാധാരണക്കാർക്ക് ഏറെ അനുഗ്രഹമായി. കൊന്നപ്പൂവ് വിഷുവിന് പ്രധാനമാണ്. വിഷുവിനു ദിവസങ്ങൾക്ക് മുമ്പേ കൊന്നകൾ പൂത്തുലഞ്ഞിരുന്നു. വഴിയോരങ്ങളിൽ പലയിടങ്ങളിലും കൊന്നപ്പൂക്കൾ വിൽക്കാൻ കുട്ടികളെത്തിയിരുന്നു. പ്രധാന വീഥികളിലെല്ലാം കണിക്കൊന്ന പൂക്കളുടെ വിൽപന രാവിലെ മുതൽ പൊടിപൊടിച്ചു. പഴം പച്ചക്കറികളും കണിയൊരുക്കാനുള്ള വിഭവങ്ങളുമായി ആരംഭിച്ച കുടുംബശ്രീയുടെ വിഷു ചന്തകളിലും സപ്ലൈകോ തുറന്ന വിഷു ചന്തകളിലും വലിയ തിരക്കനുഭവപ്പെട്ടു. വസ്ത്ര വ്യാപാര സ്ഥാപനങ്ങളും വിഷുത്തലേന്ന് ഉണർവിലായിരുന്നു. മുൻ വർഷത്തേക്കാൾ കൂടുതൽ പടക്കക്കടകൾ നിരന്നത് ഇക്കുറിയാണ്. ശബ്ദം കുറഞ്ഞ അപകടരഹിതമായ പടക്കങ്ങളോട് കുട്ടികൾക്കടക്കം പ്രിയമേറിയതാണ് പടക്ക വിപണി സജീവമാകാൻ കാരണമെന്ന് വ്യാപാരികൾ പറയുന്നു. വർണവിസ്മയം തീർക്കുന്ന ശിവകാശി പടക്കങ്ങളുടെ വിൽപനയും തകൃതിയായി നടന്നു. ഓണം കഴഞ്ഞാൽ മലയാളികളുടെ ഏറ്റവും വലിയ ആഘോഷമാണ് വിഷു. രാവുംപകലും തുല്യമായ ദിവസമാണ് വിഷു. അടുത്ത ഒരു കൊല്ലത്തെ ഫലത്തെ കുറിച്ചും ഇക്കാലയളവിൽ ജനങ്ങൾ ചിന്തിക്കുന്നു. വിഷുഫലമെന്നാണ്‌ ഇതിനു പറയുക. വിഷുക്കണി ഒരുക്കുക, കണികാണുക, കൈനീട്ടംവാങ്ങുക, പുതുവസ്ത്രങ്ങൾ ധരിക്കുക, കുടുംബാംഗങ്ങൾ ഒന്നിച്ചിരുന്നു വിഷുസദ്യ കഴിക്കുക തുടങ്ങിയവയാണ് വിഷുവിന്‍റെ പ്രധാന ചടങ്ങുകൾ.

ലൈംഗികാതിക്രമം കാട്ടി ദൃശ്യങ്ങൾ പ്രചരിപ്പിച്ചു: യുവാവ് അറസ്റ്റിൽ

എരുമേലി: യുവതിയെ ലൈംഗികാതിക്രമം കാട്ടുകയും നഗ്നദൃശ്യങ്ങളും ചിത്രങ്ങളും വിവിധ സൈറ്റുകളിൽ പ്രചരിപ്പിക്കുകയും ചെയ്ത യുവാവിനെ പോലീസ് അറസ്റ്റ് ചെയ്തു. എരുമേലി മുക്കട വടക്കേച്ചരുവിൽ അജിത്ത് മോഹനൻ (20) ആണ് പിടിയിലായത്. 2023 ജൂലൈ 14നും ഡിസംബർ 21നുമാണ് സംഭവം നടന്നത്. ഈ ദിവസങ്ങളിൽ 20 കാരിയായ സുഹൃത്തിനെ ബൈക്കിൽ കയറ്റി റാന്നി സെന്‍റ് തോമസ് കോളജ് ഗ്രൗണ്ടിന്‍റെ പിന്നിലെത്തിച്ച് ലൈംഗികാതിക്രമം കാട്ടുകയായിരുന്നു എന്ന് പോലീസ് പറഞ്ഞു. പിന്നീട് സൗഹൃദം സ്ഥാപിച്ച് വീഡിയോകോളിൽ വിളിച്ച് നഗ്നതകാട്ടാൻ പ്രേരിപ്പിക്കുകയും, തുടർന്ന് യുവതിയുടെ അറിവോ സമ്മതമോ കൂടാതെ വിവിധ സൈറ്റുകളിൽ അവ അപ്‌ലോഡ് ചെയ്യുകയും ചെയ്തു. കൂടാതെ കൂട്ടുകാർക്കും മറ്റും അയച്ചുകൊടുത്തതിലൂടെ യുവതിക്ക് മാനഹാനി ഉണ്ടാക്കുകയും ചെയ്തു. കഴിഞ്ഞദിവസം യുവതി സ്റ്റേഷനിലെത്തി പരാതി നൽകിയതിന്‍റെ അടിസ്ഥാനത്തിലാണ് റാന്നി പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചത്. സ്റ്റേഷനിൽ ഹാജരായ പ്രതിയെ വിശദമായി ചോദ്യം ചെയ്തപ്പോൾ കുറ്റം സമ്മതിച്ചു. പോലീസ് ഇയാളുടെ മൊഴി രേഖപ്പെടുത്തി, പിന്നീട് അറസ്റ്റ് ചെയ്തു. ശാസ്ത്രീയ പരിശോധനയ്ക്കായി മൊബൈൽ ഫോൺ പോലീസ് പിടിച്ചെടുത്തു. റാന്നി പോലീസ് ഇൻസ്പെക്ടർ ആർ. മനോജ് കുമാറിന്‍റെ നേതൃത്വത്തിൽ എസ്ഐ റെജി തോമസ്, എഎസ്ഐ അജു കെ. അലി എന്നിവരുൾപ്പെട്ട സംഘമാണ് അന്വേഷണം നടത്തുന്നത്.

എരുമേലി വനത്തിൽ ഫെൻസിംഗ് നിർമാണം പൂർത്തിയായി

എരുമേലി: പഞ്ചായത്തിലെ വനാതിർത്തി പ്രദേശങ്ങളിൽ ഹാങ്ങിംഗ് ഫെൻസിംഗ് നിർമാണ ജോലികൾ പൂർത്തിയായി. കിടങ്ങ് നിർമാണം പൂർത്തിയായിട്ടില്ല. ഒരു മാസത്തിനകം പൂർത്തിയാക്കി ഉദ്ഘാടനം ചെയ്യാനാകുമെന്ന് എരുമേലി ഫോറസ്റ്റ് റേഞ്ച് ഓഫീസർ ഹരിലാൽ പറഞ്ഞു. 19 കിലോമീറ്റർ ദൂരമാണ് ഫെൻസിംഗ് നിർമിച്ചിരിക്കുന്നത്. പഴയ ഫെൻസിംഗ് പൊളിച്ചു മാറ്റുന്നത് സംബന്ധിച്ച് തീരുമാനമായിട്ടില്ല. പുതിയ ഫെൻസിംഗിനോട്‌ ചേർന്നാണ് പഴയ ഫെൻസിംഗ് ഉള്ളത്. ഇത് ഭാഗികമായി പ്രവർത്തനരഹിതമാണ്. പുതിയ ഫെൻസിംഗിന് ഇടയിൽ ഒന്നര കിലോമീറ്ററാണ് കിടങ്ങ് നിർമിച്ചുകൊണ്ടിരിക്കുന്നത്. ഇതിന്‍റെ നിർമാണം പാതിവഴിയിൽ നിലച്ച അവസ്ഥയിലാണ്. കരാറുകാരൻ നിർമാണം നിർത്തിപ്പോയെന്ന് തൊഴിലാളികൾ പറയുന്നു. നിർമാണം പൂർത്തിയാക്കണമെന്ന് കരാറുകാരന് വനംവകുപ്പ് നിർദേശം നൽകിയിട്ടുണ്ട്. കോയിക്കക്കാവ് ശബരിമല കാനന പാതയിലാണ് കിടങ്ങ് നിർമിക്കുന്നത്. പദ്ധതി പൂർത്തിയാകുമ്പോൾ എരുമേലി ഫോറസ്റ്റ് റേഞ്ചിൽ പമ്പാവാലി, കാളകെട്ടി, തുമരംപാറ, പാക്കാനം വനമേഖലയിൽ ജനവാസ പ്രദേശങ്ങളിലെ വനാതിർത്തികൾ പൂർണമായും വന്യമൃഗ പ്രതിരോധ വലയത്തിൽ ആകുമെന്ന് വനംവകുപ്പ് പറയുന്നു. അതേസമയം തുടർപരിപാലനം ഇല്ലെങ്കിൽ പദ്ധതി പ്രയോജനരഹിതമാകും. കഴിഞ്ഞയിടെ എരുമേലി വനമേഖലയിലെ ഹാങ്ങിംഗ്, കിടങ്ങ് നിർമാണങ്ങൾ സെബാസ്റ്റ്യൻ കുളത്തുങ്കൽ എംഎൽഎ നേരിൽകണ്ട് വിലയിരുത്തിയിരുന്നു. എരുമേലി, കോരുത്തോട്, മുണ്ടക്കയം പഞ്ചായത്തുകളിലായി മൊത്തം 30 കിലോമീറ്റർ ദൂരത്തിലാണ് നിർമാണ പ്രവർത്തനങ്ങൾ പുരോഗമിക്കുന്നത്. ഇത് പൂർത്തിയായാൽ വനാതിർത്തി പൂർണമായും സുരക്ഷിതത്വ സംവിധാനങ്ങൾ ഒരുക്കുന്ന കേരളത്തിലെ ആദ്യത്തെ നിയോജകമണ്ഡലമായി പൂഞ്ഞാർ മാറുമെന്നാണ് കരുതുന്നത്. ആകെ 34 കോടി രൂപയാണ് ഇതിനായി ചെലവിടുന്നത്.

കണമലയ്ക്ക് കണ്ണീരായി കാർത്തികയുടെ വിയോഗം

കണമല: ഏകമകൾ മൈസൂരുവിൽ അപകടത്തിൽ മരിച്ചതിന്‍റെ ആഘാതത്തിൽ മാതാപിതാക്കൾ. ഇവരെ ആശ്വസിപ്പിക്കാൻ കഴിയാതെ കണ്ണീരടക്കി തേങ്ങുകയാണ് ബന്ധുക്കൾ. പാണപിലാവ് എരുത്വാപ്പുഴ കളത്തൂർ ബിജു- സുനിത ദമ്പതികളുടെ ഏകമകൾ കാർത്തിക ബിജു (25) ആണ് അപകടത്തിൽ ദാരുണമായി മരിച്ചത്. കഴിഞ്ഞ ദിവസം ഏറെ സന്തോഷത്തോടെ കാർത്തിക വീട്ടിൽ വിളിച്ചു മാതാപിതാക്കളോട് അവധിക്ക് ഉടനെ നാട്ടിലെത്തുമെന്ന് പറഞ്ഞിരുന്നു. മകളെ കാണാൻ എല്ലാം ഒരുക്കി കാത്തിരിക്കുകയായിരുന്ന മാതാപിതാക്കൾ അവളുടെ മരണവിവരമാണ് അറിയുന്നത്. ഏറെ സമർഥയായിരുന്ന കാർത്തിക പഠനങ്ങളിൽ റാങ്കുകളും ഒട്ടേറെ മെഡലുകളും നേടിയിരുന്നു. സുഹൃത്തുക്കളും നാട്ടുകാരും അതീവ ദുഃഖത്തിലാണ് ഇന്നലെ അവളുടെ മരണ വിവരം അറിഞ്ഞ് വീട്ടിൽ എത്തിയത്. പഞ്ചായത്ത്‌ അംഗങ്ങളായ ജിജിമോൾ സജി, ജിൻസി എന്നിവർ ഉൾപ്പെടെ ഒട്ടേറെ നാട്ടുകാർ വീട്ടിൽ എത്തിയിരുന്നു. ബംഗളൂരുവിലെ സ്വകാര്യ കമ്പനിയില്‍ ജിയോളജിസ്റ്റായി ജോലി ചെയ്തിരുന്ന കാർത്തിക അവധിക്ക് നാട്ടിലേക്ക് സുഹൃത്തിന്‍റെ ബൈക്കിൽ വരുമ്പോഴാണ് അപകടം. കഴിഞ്ഞ ദിവസം ഉച്ചയ്ക്ക് മൈസൂരു നഞ്ചന്‍ഗുഡ് ദേശീയപാതയിലാണ് അപകടം നടന്നത്. ബൈക്ക് ഡിവൈഡറില്‍ ഇടിച്ച്‌ മറിയുകയായിരുന്നുവെന്ന് ബന്ധുക്കളെ പോലീസ് അറിയിച്ചു. റോഡ് പണി നടക്കുന്നതിനാല്‍ ബൈക്ക് തെന്നിമറിഞ്ഞാണ് ഡിവൈഡറിലിടിച്ചത്. കാർത്തിക അപകടസ്ഥലത്തുതന്നെ മരിച്ചു. ബൈക്കോടിച്ചിരുന്ന പാലക്കാട് ഒറ്റപ്പാലം മാങ്കോട് തൃക്കടേരി ചാമണ്ണൂർ ജി. ഗിരിശങ്കർ തരകൻ (26) ഗുരുതര പരിക്കുകളോടെ മൈസൂരു ജെഎസ്‌എസ് ആശുപത്രിയില്‍ ചികിത്സയിലാണ്. കാർത്തികയുടെ മൃതദേഹം ഇന്നു രാവിലെ വീട്ടിൽ എത്തിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]