പൂഞ്ഞാർ ഐഎച്ച്ആർഡി കോളജ് ബയോഡൈവേഴ്സിറ്റി കാമ്പസിന്റെ പാതയിൽ
1451752
Sunday, September 8, 2024 11:50 PM IST
ഈരാറ്റുപേട്ട: ആഗോളതാപനത്തിന്റെ ഭാഗമായി ലോകത്തിലെവിടെയും കാർബണിന്റെ അതിപ്രസരം അതിവേഗം ഉണ്ടാകുന്നന്ന കാലഘട്ടത്തിലും പെട്ടെന്നുണ്ടാകുന്ന കാലാവസ്ഥാമാറ്റവും മുൻകൂട്ടിക്കണ്ടു ഹരിത കേരളം മിഷന്റെ നേതൃത്വത്തിൽ പൂഞ്ഞാർ എൻജിനിയറിംഗ് കോളജ് ജൈവവൈവിധ്യ കാമ്പസാക്കാനുള്ള ശ്രമങ്ങൾക്ക് തുടക്കം കുറിച്ചു.
ഇതിന്റെ ഭാഗമായി ആദ്യഘട്ടത്തിൽ കോളജിന്റെ പത്ത് ഏക്കർ ഭൂമിയിൽ 15 ഇനത്തിലുള്ള വിവിധ തരത്തിലുള്ള ആയിരം ബിഗ് ബാസ്കറ്റ് തൈകൾ വച്ചു പിടിപ്പിക്കാനുള്ള പ്രവർത്തനങ്ങൾ ആരംഭിച്ചു.
കോട്ടയം സോഷ്യൽ ഫോറസ്റ്റ് ഓഫീസിൽനിന്നു ആയിരം ബിഗ് ബാസ്കറ്റ് തൈകൾ കോളജിനു ലഭിച്ചു. തദ്ദേശസ്വയംഭരണ വകുപ്പ്, വനംവകുപ്പ്, ഈരാറ്റുപേട്ട ബ്ലോക്ക് പഞ്ചായത്ത്, പരിസ്ഥിതി സംഘടനയായ ഭൂമിക എന്നിവരുടെ സഹായസഹകരണങ്ങളും ഈ പ്രവർത്തനങ്ങൾക്ക് ലഭിച്ചു.
കോട്ടയം ഹരിത കേരളം മിഷൻ ജില്ലാ കോ-ഓർഡിനേറ്റർ ഐസക്, കോളജ് പ്രിൻസിപ്പൽ ഡോ. എം.വി. രാജേഷ്, കോ-ഓർഡിനേറ്റർ ജസ്റ്റിൻ, സെക്ഷണൽ ഫോറസ്റ്റ് ഓഫീസർ വി. സുരേഷ്, ഭൂമിക ഭാരവാഹി എബി ഇമ്മാനുവൽ, ക്യാമ്പ് കോ-ഓർഡിനേറ്റർ മിഥുൻ പോൾ, കോളജിലെ എൻഎസ്എസ് കോ-ഓർഡിനേറ്റർമാരായ ആർച്ച, മഹേഷ്, ഹരിത കേരളം മിഷൻ റിസോഴ്സ് പേഴ്സൺമാരായ വിഷ്ണു പ്രസാദ്, ഇ.പി. സോമൻ എന്നിവർ പ്രവർത്തനങ്ങൾക്ക് നേതൃത്വം നൽകി.