ADVERTISEMENT

ADVERTISEMENT

കെഎൻഇഎഫ് ജില്ലാ സമ്മേളനം ഇന്ന്

കണ്ണൂർ: കേരള ന്യൂസ് പേപ്പർ എംപ്ലോയീസ് ഫെഡറേഷൻ ജില്ലാ സമ്മേളനം ഇന്ന് കണ്ണൂർ ചേംബർ ഹാളിൽ നടക്കും. രാവിലെ 10ന് എം. വിജിൻ എംഎൽഎ ഉദ്ഘാടനം ചെയ്യും. ജില്ലാ പ്രസിഡന്‍റ് കെ. സജീവൻ അധ്യക്ഷത വഹിക്കും. സംസ്ഥാന പ്രസിഡന്‍റ് വി.എസ്. ജോൺസൺ മുഖ്യപ്രഭാഷണം നടത്തും. തുടർന്ന് പ്രതിനിധി സമ്മേളനവും സർവീസിൽ നിന്ന് വിരമിച്ച സി. മോഹനൻ (ദേശാഭിമാനി), ആർ.കെ. രത്നാകരൻ (മാതൃഭൂമി) എന്നിവർക്ക് യാത്രയയപ്പും നൽകും.

ADVERTISEMENT

ഭീകരവിരുദ്ധ പ്രതിജ്ഞയും പ്രതിഷേധ ജ്വാലയും

മണത്തണ: കാഷ്മീരിലുണ്ടായ ഭീകരാക്രമണത്തിൽ പ്രതിഷേധിച്ച് മണത്തണ ടൗൺ കോൺഗ്രസ് കമ്മിറ്റിയുടെ നേതൃത്വത്തിൽ ഭീകരവിരുദ്ധ പ്രതിജ്ഞയും പ്രതിഷേധ ജ്വാലയും തീർത്തു. കൊല്ലപ്പെട്ടവർക്ക് ആദരാഞ്ജലികൾ അർപ്പിച്ച് ടൗണിൽ ദീപം തെളിച്ചു നടത്തിയ അനുസ്മരണ സന്ധ്യ ഡിസിസി ജനറൽ സെക്രട്ടറി ബൈജു വർഗീസ് ഉദ്ഘാടനം ചെയ്തു. ഡിസിസി അംഗം ചോടത്ത് ഹരിദാസൻ, ബ്ലോക്ക് കോൺഗ്രസ് സെക്രട്ടറി സി.ജെ. മാത്യു, വർഗീസ് ചിരട്ടവേലിൽ, തോമസ് പാറക്കൽ, വി.കെ. രവീന്ദ്രൻ, ജോസ് വലിയവീട്ടിൽ, വി. രവീന്ദ്രൻ, സാബു പേഴ്ത്തുങ്കൽ, ജോസഫ് കദളിക്കാട്ടിൽ, പൗലോസ് പാറനാല്‍, മാത്യു കൊട്ടഞ്ചുരം, ജോഷി മുല്ലുക്കുന്നേൽ, മാത്യു മങ്കുഴിയിൽ, കെ.സി. ഹരികുമാർ എന്നിവർ നേതൃത്വം നൽകി.

പ്ലാസ്റ്റിക് മാലിന്യങ്ങൾ കത്തിച്ചതിന് 5000 രൂപ പിഴ ചുമത്തി

മട്ടന്നൂർ: കെട്ടിടത്തിന് മുകളിൽ പ്ലാസ്റ്റിക് ഉൾപ്പെടെയുള്ള മാലിന്യങ്ങൾ കൂട്ടിയിട്ട് കത്തിച്ചതിന് 5000 രൂപ പിഴ ഈടാക്കി. കളറോഡ് പാലത്തിന് സമീപത്തെ കഫെ ദിവാനിക്കാണ് ഇരിട്ടി നഗരസഭ പിഴയീടാക്കിയത്. നഗരസഭ ഹെൽത്ത്‌ സ്‌ക്വാഡ് സിസിഎം രാജീവിന്‍റെ നേതൃത്വത്തിൽ നടത്തിയ പരിശോധനയിലാണ് പ്ലാസ്റ്റിക് ഉൾപ്പെടെയുള്ള മാലിന്യങ്ങൾ കൂട്ടിയിട്ട് കത്തിച്ച നിലയിൽ കണ്ടെത്തിയത്. പിഎച്ച്ഐ സന്ദീപ്, ജീവനക്കാരായ യൂസഫ്, സന്തോഷ്‌, രാജേഷ് എന്നിവരും പരിശോധനാ സംഘത്തിലുണ്ടായിരുന്നു.

പൈപ്പ് പൊട്ടി റോഡിൽ കുഴിയായി

മട്ടന്നൂർ: കുടിവെള്ള വിതരണ പദ്ധതിയുടെ പൈപ്പ് ചോർച്ചയെ തുടർന്നു റോഡിൽ കുഴിയായി. മട്ടന്നൂർ-അഞ്ചരക്കണ്ടി റോഡിൽ വെൺമണലിലാണ് പൈപ്പിൽ ചോർച്ചയുണ്ടായത്. അടുത്തടുത്തായി മൂന്നിടങ്ങളിലാണ് വെള്ളം ഒഴുകി റോഡിൽ കുഴിയുണ്ടായത്. കണ്ണൂർ വിമാനത്താവളത്തിലേക്കടക്കം നിത്യേന നൂറു കണക്കിന് വാഹനങ്ങൾ കടന്നു പോകുന്ന റോഡിലാണ് പൈപ്പ് പൊട്ടി വെള്ളം പാഴാകുന്നത്. നിരവധി തവണ അധികൃതരെ വിവരം അറിയിച്ചിരുന്നുവെങ്കിലും നടപടിയുണ്ടായില്ല.

ജല സഭയും തോട് ശുചീകരണവും നടത്തി

മട്ടന്നൂർ: ഇരിട്ടി നഗരസഭയുടെ നേതൃത്വത്തിൽ ജല സഭയും തോട് ശുചീകരണവും നടത്തി. കളറോഡ് മുതൽ അടുവാരിവരെയുള്ള തോടിന്‍റെ ഇരുകരകളും വൃത്തിയാക്കി നിരൊഴുക്ക് പുനഃസ്ഥാപിച്ചു. തോട്ടിൽ അടിഞ്ഞു കിടന്ന മാലിന്യങ്ങളും ചരൽകൂനകളും നീക്കം ചെയ്തു. സർക്കാരിന്‍റെ മാലിന്യമുക്തം നവകേരളം പദ്ധതിയുടെ ഭാഗമായിട്ടാണ് പ്രവർത്തനങ്ങൾ സംഘടിപ്പിച്ചത്. നഗരസഭാ ചെയർപേഴ്സൻ കെ. ശ്രീലത ഉദ്ഘാടനം ചെയ്തു. വൈസ് ചെയർമാൻ പി.പി. ഉസ്മാൻ അധ്യക്ഷത വഹിച്ചു. മട്ടന്നൂർ നഗരസഭ ചെയർമാൻ എൻ. ഷാജിത്ത്, സ്റ്റാൻഡിംഗ് കമ്മിറ്റി ചെയർമാൻ വി.കെ. സുഗതൻ, ഇരിട്ടി നഗരസഭ വികസന സ്റ്റാൻഡിംഗ് കമ്മിറ്റി ചെയർപേഴ്സൻ പി.കെ. ബൽക്കിസ്, നഗരസഭ ക്ലിൻസിറ്റി മാനേജർ കെ.വി. രാജീവൻ എന്നിവർ പ്രസംഗിച്ചു. തൊഴിലുറപ്പ് തൊഴിലാളികൾ, ഹരിതസേനാംഗങ്ങൾ, ആരോഗ്യ വിഭാഗം ജീവനക്കാർ, നാട്ടുകാർ, സന്നദ്ധ സേനാംഗങ്ങൾ എന്നിവർ പ്രവർത്തനങ്ങളിൽ പങ്കെടുത്തു.

മികച്ച റോഡുണ്ടായിട്ടും ബസ് സര്‍വീസ് ഇല്ല; ജനങ്ങൾ ദുരിതത്തിൽ

പരിയാരം: ചന്തപ്പുര-കടന്നപ്പള്ളി ഹയർ സെക്കൻഡറി സ്കൂൾ-പരിയാരം റോഡ് മികച്ച നിലവാരമുള്ള റോഡായിട്ടും ബസ് സര്‍വീസ് ഇല്ലാത്തതിനാൽ ജനങ്ങൾ ബുദ്ധിമുട്ടുന്നു. മാതമംഗലം ഭാഗത്തു നിന്നും പാണപ്പുഴ ഭാഗത്തു നിന്നും ചന്തപ്പുര വഴി പരിയാരം കണ്ണൂര്‍ ഗവ. മെഡിക്കല്‍ കോളജിലേക്ക് വേഗം എത്തിച്ചേരുന്ന അഞ്ചുകിലോമീറ്റര്‍ നീളുന്ന ഈ ബൈപ്പാസ് റോഡ് ഗുണപരമായി ഉപയോഗിക്കപ്പെടുന്നില്ലെന്ന് നാട്ടുകാര്‍ ആരോപിക്കുന്നു. ഈ വഴി ബസ് ഗതാഗതം തുടങ്ങിയാൽ മലയോര മേഖലകളില്‍ നിന്നുള്ളവര്‍ക്ക് പിലാത്തറ റോഡു വഴി പോകാതെ വളരെ എളുപ്പത്തില്‍ ഗതാഗതക്കുരുക്കില്ലാതെ കണ്ണൂർ പരിയാരം ഗവ. മെഡിക്കല്‍ കോളജില്‍ എത്തിച്ചേരാന്‍ കഴിയും. ഇതു കൂടാതെ ജനസാന്ദ്രതയോറിയ ഈ പ്രദേശം കടന്നപ്പള്ളി-പാണപ്പുഴ പഞ്ചായത്തിന്‍റെ ഹൃദയഭൂമികൂടിയാണ്. ഒരു ഹയര്‍ സെക്കൻഡറി സ്കൂളും ഒരു യുപി സ്‌കൂളും ഈ റോഡരികില്‍ പ്രവര്‍ത്തിക്കുന്നുണ്ട്. സ്കൂൾ വിദ്യാർഥികൾ ഇപ്പോൾ ഒരുകിലോമീറ്ററോളം നടന്ന് ചന്തപ്പുരയിലെത്തിയാണു ബസ് കയറുന്നത്. അതുപോലെ തന്നെ ഈ റോഡ് കടന്നുപോകുന്ന പ്രദേശങ്ങളിലുള്ളവർ ഏറെ യാത്രാക്ലേശമാണ് അനുഭവിക്കുന്നത്. ആംബുലന്‍സുകള്‍ക്ക് ഉള്‍പ്പെടെ എളുപ്പത്തില്‍ മെഡിക്കല്‍ കോളജില്‍ എത്താന്‍ സാധിക്കുന്നതാണ് ഈ റോഡ്. നിര്‍മാണം പൂര്‍ത്തീകരിച്ചിട്ട് വര്‍ഷങ്ങളായിട്ടും ഒരു പോറല്‍പോലുമില്ലാതെ നല്ല രീതിയിലുള്ള ഈ റോഡിലൂടെ നിലവില്‍ ബസ് സർവീസ് ഇല്ലാത്തത് ജനങ്ങൾക്ക് ഏറെ ബുദ്ധിമുട്ട് ഉണ്ടാക്കുന്നുണ്ട്. ചന്തപ്പുരയില്‍ നിന്നും ഏഴോം കോട്ടക്കീലിലേക്കുള്ള റോഡിന്‍റെ ഭാഗമായി കല്യാശേരി എംഎല്‍എയുടെ ആസ്തി വികസന ഫണ്ട് ഉപയോഗപ്പെടുത്തിയാണു റോഡ് നിര്‍മിച്ചത്.

മട്ടന്നൂരിൽ ഡെങ്കിപ്പനി പ്രതിരോധ പ്രവർത്തനം ഊർജിതമാക്കി

മട്ടന്നൂർ: മട്ടന്നൂർ നഗരസഭയുടെയും സാമൂഹിക ആരോഗ്യ കേന്ദ്രത്തിന്‍റെയും സംയുക്താഭിമുഖ്യത്തിൽ ഡെങ്കിപ്പനി പ്രതിരോധ പ്രവർത്തനങ്ങൾ ഊർജിതമാക്കി. പഴശി ആയുഷ്മാൻ ആരോഗ്യ മന്ദിറിൽ നടന്ന "തോട്ടങ്ങളിലേക്ക് നീങ്ങാം' കാമ്പയിൻ മട്ടന്നൂർ നഗരസഭ വൈസ് ചെയർപേഴ്സൺ ഒ. പ്രീത ഉദ്ഘാടനം ചെയ്തു. കാമ്പയിനിന്‍റെ ഭാഗമായി റബർ, കവുങ്ങ് തുടങ്ങിയ തോട്ടങ്ങളിൽ പരിശോധന, തോട്ടം ഉടമകൾക്ക് നിർosശങ്ങൾ അടങ്ങിയ നോട്ടീസ് നല്കൽ, കൊതുകിന്‍റെ ഉറവിട നശീകരണം, ബോധവത്കരണം എന്നീ പരിപാടികൾ നടന്നുവരികയാണ്. മെഡിക്കൽ ഓഫീസർ ഡോ. കെ. സുഷമ, ഹെൽത്ത് ഇൻസ്പെക്ടർ കെ.ബി. ശ്രീജിത്ത്, ജൂണിയർ ഹെൽത്ത് ഇൻസ്പെക്ടർ ജനീഷ്, ആശാ പ്രവർത്തകർ എന്നിവർ നേതൃത്വം നൽകി.

അലക്സ്നഗർ സെന്‍റ് ജോസഫ്സ് പള്ളിയിൽ തിരുനാൾ ഇന്നുമുതൽ

പയ്യാവൂർ: അലക്സ് നഗർ സെന്‍റ് ജോസഫ്സ് ക്നാനായ കത്തോലിക്ക പള്ളിയിൽ തിരുനാൾ ഇന്നു മുതൽ മേയ് ഒന്നു വരെ നടക്കും. ഇന്നു വൈകുന്നേരം അഞ്ചിന് വിശുദ്ധ കുർബാന, നൊവേന. നാളെ വൈകുന്നേരം 4.30ന് മടമ്പം ഫൊറോന വികാരി ഫാ. സജി മെത്താനത്ത് കൊടിയേറ്റും. തുടർന്ന് വിശുദ്ധ കുർബാന, പരേത സ്മരണ, സെമിത്തേരി സന്ദർശനം. രാത്രി ഏഴിന് ഭക്തസംഘടനകളുടെ വാർഷികം-ഫാ. സജി മെത്താനത്ത് ഉദ്ഘാടനം ചെയ്യും. 30ന് വൈകുന്നേരം 4.15ന് വാദ്യമേളങ്ങൾ, അഞ്ചിന് ഫാ. സനീഷ് കയ്യാലയ്ക്കകത്തിന്‍റെ കാർമികത്വത്തിൽ ആഘോഷമായ വിശുദ്ധ കുർബാന. ഫാ. സിജോ കണ്ണമ്പുഴ തിരുനാൾ സന്ദേശം നല്കും. തുടർന്ന് ചെറുകര ഭാഗത്തേക്ക് തിരുനാൾ പ്രദക്ഷിണം, പരിശുദ്ധ കുർബാനയുടെ ആശീർവാദം, വാദ്യമേളങ്ങളുടെ ഡിസ്പ്ലേ എന്നിവയും ഉണ്ടായിരിക്കും. സമാപന ദിനമായ ഒന്നിന് വൈകുന്നേരം 4.15 ന് വാദ്യമേളങ്ങൾ. അഞ്ചിന് ആഘോഷമായ തിരുനാൾ പാട്ടുകുർബാനയ് ക്ക് ഫാ. ജിൻസൺ കൊട്ടിയാനിയ്ക്കൽ കാർമികത്വം വഹിക്കും. ഫാ. ജോമോൻ കൂട്ടുങ്കൽ തിരുനാൾ സന്ദേശം നല്കും. പ്രദക്ഷിണം, പരിശുദ്ധ കുർബാനയുടെ ആശീർവാദം എന്നിവയോടെ ആഘോഷച്ചടങ്ങുകൾ സമാപിക്കും.

പയ്യാവൂർ സൂപ്പർ മാർക്കറ്റിലെ കവർച്ച; രണ്ടാഴ്ചയായിട്ടും തുന്പില്ലാതെ പോലീസ്

പയ്യാവൂർ: ടൗണിന്‍റെ ഹൃദയഭാഗത്തെ സൂപ്പർ മാർക്കറ്റിൽ കവർച്ച നടന്ന് രണ്ടാഴ്ചയായിട്ടും തുന്പില്ലാ തെ പോലീസ്. ചെമ്പേരി റോഡിൽ വ്യാപാരഭവന് സമീപത്തെ പി മാർട്ട് സൂപ്പർ മാർക്കറ്റിലാണ് കഴിഞ്ഞ 17ന് പുലർച്ചെ കവർച്ച നടന്നത്. പൂട്ട് തകർത്ത് ഷട്ടർ ഉയർത്തി അകത്തു കടന്ന മോഷ്ടാവ് താഴെയും മുകളിലുമുള്ള കാഷ് കൗണ്ടറുകളിൽ സൂക്ഷിച്ച നാലു ലക്ഷത്തോളം രൂപയാണ് കവർന്നത്. രാവിലെ കട തുറക്കാനെത്തിയപ്പോഴാണ് മോഷണം ശ്രദ്ധയിൽപ്പെട്ടത്. പയ്യാവൂർ പോലീസ് കവർച്ച നടന്ന ദിവസം മുതൽ നിരവധി സിസിടിവി കാമറകൾ പരിശോധിച്ചുവെങ്കിലും ഇതുവരെ തുമ്പൊന്നും ആയിട്ടില്ലെന്നാണ് പറയുന്നത്. ടൗണിന് പുറത്തുള്ള കാമറകളും പോലീസ് പരിശോധിച്ചു വരികയാണ്. കണ്ണൂരിൽ നിന്നെത്തിയ ഡോഗ് സ്ക്വാഡും വിരലടയാള വിദഗ്ധരും പരിശോധന നടത്തിയിരുന്നു. തളിപ്പറമ്പ് ഡിവൈഎസ്പി പ്രദീപൻ കണ്ണിപൊയിൽ, പയ്യാവൂർ എസ്എച്ച്ഒ ടിങ്കിൾശശി, പയ്യാവൂർ എസ്ഐ രാജു എന്നിവരുടെ നേതൃത്വത്തിലാണ് പോലീസ് അന്വേഷണം പുരോഗമിക്കുന്നത്. കണ്ടകശേരിയിലും രണ്ട് സ്ഥാപനങ്ങളിൽ കവർച്ചാ ശ്രമം ഉണ്ടായിരുന്നു. വ്യാപാരികൾക്ക് നിർഭയമായി കച്ചവടം ചെയ്യാനുള്ള സാഹചര്യം പഞ്ചായത്തും പോലീസും ഒരുക്കി തരണമെന്ന് കേരള വ്യാപാരി വ്യവസായി ഏകോപനസമിതി നേതാക്കൾ ആവശ്യപ്പെട്ടു.

കണ്ണൂർ ഗവ. മെഡിക്കല്‍ കോളജ് കാമ്പസിലെ കക്കൂസ് മാലിന്യം റോഡരികിൽ ഒഴുക്കി

പരിയാരം: കണ്ണൂര്‍ ഗവ. മെഡിക്കല്‍ കോളജ് കാമ്പസിലെ മലിനജല പ്ലാന്‍റിലെ ദുര്‍ഗന്ധംവമിക്കുന്ന മലിനജലം റോഡരികിലേക്ക് ഒഴുക്കി വിട്ടു. തമിഴ്‌നാട്ടില്‍ നിന്നും വന്ന കരാർസംഘം ഇന്നലെ പട്ടാപ്പകലാണ് റോഡരികിലേക്ക് മാലിന്യം ഒഴുക്കിവിട്ടത്. സ്വീവേജ് പ്ലാന്‍റ് വീണ്ടും പണിമുടക്കിയതിനെ തുടർന്നാണ് കരാർ എടുത്ത കമ്പനി തൊഴിലാളികളെ ഉപയോഗിച്ച് മലമൂത്ര വിസര്‍ജ്യങ്ങള്‍ ദേശീയപാതയിലേക്ക് ഒഴുക്കിവിട്ടത്. കൊച്ചുകുട്ടികളുമായെത്തിയ സ്ത്രീകള്‍ ഉള്‍പ്പെടെയുള്ള തമിഴ്‌നാട്ടിൽ നിന്നുള്ള സംഘമാണ് പ്ലാന്‍റിന്‍റെ ടാങ്കിനകത്തേക്കിറങ്ങി മലിനജലം മുക്കിയെടുത്ത് റോഡിലേക്ക് ഒഴുക്കിയത്. നേരത്തേയും ഈ പ്ലാന്‍റില്‍ നിന്ന് മാലിന്യം പുറത്തേക്ക് ഒഴുക്കിവിട്ടത് ബഹുജനസമരത്തിന് ഇടയാക്കിയിരുന്നു. സ്വീവേജ് പ്ലാന്‍റിന്‍റെ അറ്റകുറ്റപ്പണി നടത്താന്‍ കരാര്‍ എടുത്തയാളാണ് തങ്ങളുടെ അറിവോ സമ്മത തോ കൂടാതെ മാലിന്യം ഒഴുക്കിയതെന്നും തങ്ങള്‍ക്ക് ഇതുമായി യാതൊരു ബന്ധവുമില്ലെന്നുമാണ് ആശുപത്രി അധികൃതർ പറയുന്നത്. സംഭവം അറിഞ്ഞയുടൻ സ്റ്റോപ്പ് മെമ്മോ കൊടുത്ത് പ്രവൃത്തി നിർത്തിവയ്പ്പിച്ചതായും അധികൃതര്‍ പറഞ്ഞു. കര്‍ശന നടപടിയെന്ന് സൂപ്രണ്ട് റോഡരികിലേക്ക് കക്കൂസ് മാലിന്യ ഒഴുക്കിയവർക്കെതിരേ കര്‍ശന നടപടി സ്വീകരിക്കുമെന്ന് ഗവ. മെഡിക്കല്‍ കോളജ് സൂപ്രണ്ട് ഡോ. കെ. സുദീപ് അറിയിച്ചു. മെഡിക്കല്‍ കോളജിലെ സീവേജ് ട്രീറ്റ്‌മെന്‍റ് പ്ലാന്‍റിന്‍റെ അറ്റകുറ്റപ്പണികള്‍ പൂര്‍ത്തീകരണ ഘട്ടത്തില്‍ എത്തിയിരിക്കെ കരാര്‍ പ്രകാരം പ്രവൃത്തി ചെയ്യാനേല്‍പ്പിച്ച ഏജന്‍സി മെഡിക്കല്‍ കോളജ് അധികൃതരുടെ അറിവോ സമ്മതമോ ഇല്ലാതെ കളക്ഷന്‍ ടാങ്ക് ശുദ്ധീകരണ ജോലിയുടെ ഭാഗമായി ടാങ്കിലെ പ്ലാസ്റ്റിക് മാലിന്യങ്ങളും മറ്റും കലക്ഷന്‍ ടാങ്കിന് സമീപം കൂട്ടിയിട്ടതായി ശ്രദ്ധയില്‍ പെട്ടിരുന്നു. ഇക്കാര്യം വ്യക്തമായ ഉടൻ പ്രസ്തുത പ്രവൃത്തി നിര്‍ത്തി വയ്ക്കാനുള്ള അടിയന്തര സ്റ്റോപ്പ് മെമ്മോ നല്കിയ തായും സൂപ്രണ്ട് അറിയിച്ചു. ഇക്കാര്യം അന്വേഷിച്ച് അടിയന്തരമായി റിപ്പോര്‍ട്ട് നല്കുവാനായി എൻജിനിയറിംഗ് വിഭാഗം തലവനെ ചുമതലപ്പെടുത്തിയിട്ടുണ്ടെന്നും റിപ്പോര്‍ട്ട് കിട്ടിയ ഉടനെ തന്നെ ഇക്കാര്യത്തില്‍ കര്‍ശന നടപടികള്‍ സ്വീകരിക്കുമെന്നും സൂപ്രണ്ട് അറിയിച്ചു.

മാടായിപ്പാറയിൽ വൻ തീപിടിത്തം

പഴയങ്ങാടി: ജൈവ വൈവിധ്യങ്ങളുടെ കലവറയായ മാടായിപ്പാറയിൽ വൻ തീപിടിത്തം. ഏക്കറു കണക്കിന് പുൽമേടുകൾ കത്തിനശിച്ചു. പാറക്കുളത്തിന് സമീപമുള്ള സ്വകാര്യ വ്യക്തിയുടെ സ്ഥലത്താണ് വൻ അഗ്നിബാധ ഉണ്ടായത്. ഇന്നലെ ഉച്ചയ്ക്ക് രണ്ടോടെയായിരുന്നു സംഭവം. നാട്ടുകാരുടെ ശ്രമം സമീപത്തെ വീടുകളിലേക്ക് തീ പടരുന്നത് ഒഴിവാക്കി. മാടായി മഹോത്സവത്തിന്‍റെ ഉദ്ഘാടനത്തിനെത്തിയ നാട്ടുകാരും മറ്റും തീ അണക്കാൻ നേതൃത്വം നല്കി. പയ്യന്നൂരിൽ നിന്ന് എത്തിയ അഗ്നിശമന സേനയും ചേർന്നാണ് മണിക്കൂറുകൾ നീണ്ട ശ്മത്തിനൊടുവിൽ തീ പൂർണമായും നിയന്ത്രണ വിധേയമാക്കിയത്.

ജനശ്രീ വാർഷികാഘോഷവും കുടുംബസംഗമവും നടത്തി

ചെറുപുഴ: വയലായി പ്രിയദർശിനി ജനശ്രീ ഒന്നാം വാർഷികാഘോഷവും കുടുംബസംഗമവും നടത്തി. കോൺഗ്രസ് പുളിങ്ങോം മണ്ഡലം പ്രസിഡന്‍റ് മനോജ്‌ വടക്കേൽ ഉദ്ഘാടനം ചെയ്തു. ജോയി കിഴക്കേകൊഴുവനാൽ അധ്യക്ഷത വഹിച്ചു. ചെറുപുഴ മണ്ഡലം ജനശ്രീ ചെയർമാൻ എം.കെ. ബാലചന്ദ്രൻ മുഖ്യപ്രഭാഷണം നടത്തി. ജോസ്റ്റിൻ ജെ. പുതുമന സമ്മാനദാനം നിർവഹിച്ചു. പഞ്ചായത്ത്‌ മെംബർ ജോയ്‌സി ഷാജി, വി.വി. ദാമോദരൻ, ഡെന്നി മേച്ചേരി, മജീദ് കോവുന്നേൽ, ജോജോ പുള്ളോലിക്കൽ, ഷോൺ പനക്കച്ചാലിൽ എന്നിവർ പ്രസംഗിച്ചു. വിവിധ കലാപരിപാടികളും അരങ്ങേറി.

ചെങ്ങളായിയിൽ യുവാവിന് ക്രൂരമർദനം

ശ്രീകണ്ഠപുരം: ചെങ്ങളായിയിൽ യുവാവിനു നേരെ ക്രൂരമർദനം. ടൈൽസും സോഡാ കുപ്പിയും ഉപയോഗിച്ച് യുവാവിന്‍റെ തലയ്ക്ക് അടിച്ച് പരിക്കേൽപ്പിച്ചതായി പരാതി. ചെങ്ങളായിയിലെ റിഷാദിനെയാണ് നാലംഗസംഘം വളഞ്ഞിട്ട് മർദിച്ചത്. സംഭവത്തിൽ രണ്ടു പരാതികളിൽ ശ്രീകണ്ഠപുരം പോലീസ് കേസെടുത്തു. സംഭവമിങ്ങനെ: പരാതിക്കാരനായ റിഷാദ് നസീബിനോട് സ്കൂട്ടി വാങ്ങിയിരുന്നു. ഏപ്രിൽ 25ന് രാവിലെ ഇതിന്‍റെ ആർസി മാറ്റത്തിന് ഒടിപി അറിയാൻ റിഷാദും ഉമ്മ മൈമൂനത്തും നസീബിന്‍റെ വീട്ടിൽ രാവിലെ എത്തിയപ്പോൾ ഉമ്മയെ അസഭ്യം പറഞ്ഞ് കഴുത്തിന് പിടിച്ച് തള്ളിയിരുന്നുവെന്നും പറയുന്നു. സംഭവദിവസം വൈകുന്നേരം പരിപ്പായിയിലുള്ള ടൈൽ കമ്പനിക്ക് സമീപംത്തുനിന്ന് റിഷാദിനെ നസീബും മറ്റു മൂന്നുപേരും ചേർന്ന് മർദിക്കുകയായിരുന്നുവെന്ന് പറയുന്നു. തലയ്ക്ക് ടൈൽസ് കൊണ്ടും സോഡാ കുപ്പി കൊണ്ടും അടിച്ചു. ക്രൂരമർദന ദൃശ്യങ്ങള്‍ സോഷ്യൽ മീഡിയയിൽ പ്രചരിക്കുന്നുണ്ട്. റിഷാദിനെ കണ്ണൂർ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരിക്കുകയാണ്. സ്കൂട്ടി വില്പനയെ തുടർന്നുണ്ടായ തർക്കമാണ് ആക്രമണത്തിൽ കലാശിച്ചത്. റിഷാദ് നൽകിയ പരാതിയിലും, മകനെ കൊല്ലുമെന്ന് ഭീഷണിപ്പെടുത്തിയതായി ആക്രമണത്തിനിരയായ ചെങ്ങളായി സ്വദേശി റിഷാദിന്‍റെ ഉമ്മ മൈമൂനത്തിന്‍റെ പരാതിയിലും പോലീസ് കേസെടുത്തു. നസീബും പോലീസിനെ സമീപിച്ചിരുന്നു.

അപകടത്തിന് കാരണമാകുന്ന സർക്കാർ ഭൂമിയിലെ മരക്കൊന്പുകൾ മുറിച്ചുമാറ്റണമെന്ന്

ആലക്കോട്: കാപ്പിമല സർക്കാർ ഭൂമിയിലുള്ള മരങ്ങളുടെ ശിഖരങ്ങൾ അപകടകരമായി റോഡിലേക്ക് ചാഞ്ഞു നിൽക്കുന്നത് സ്കൂൾ കുട്ടികൾക്കും പള്ളിയിൽ പോകുന്നവർക്കും വാഹനങ്ങളിൽ യാത്ര ചെയ്യുന്നവർക്കും ഭീഷണിയായിരിക്കുകയാണ്. മരങ്ങളുടെ ശിഖിരങ്ങൾ വൈദ്യുത ലൈനിലേക്ക് വീഴുന്നതും അപകട ഭീഷണിക്ക് കാരണമാകുന്നുണ്ട്. മരങ്ങളുടെ ശിഖരങ്ങൾ മുറിച്ചു മാറ്റുന്നതിന് പല പ്രാവശ്യം അപേക്ഷ നല്കിയിട്ടും മുറിച്ച് മാറ്റാത്ത നടപടിയെ കത്തോലിക്കാ കോൺഗ്രസ് ആലക്കോട് മേഖലാ കമ്മിറ്റി അപലപിച്ചു. അപകടകരമായ ശിഖരങ്ങൾ എത്രയും പെട്ടന്ന് നീക്കം ചെയ്യണമെന്ന് മേഖല കമ്മറ്റി ആവശ്യപ്പെട്ടു. ഫാ. ജിബിൻ വട്ടംകാട്ടേൽ ഉദ്ഘാടനം ചെയ്തു. ബേബി കോയിക്കൽ അധ്യക്ഷത വഹിച്ചു. ഫാ. ജോസഫ് കുത്തുളിയിൽ മുഖ്യപ്രഭാഷണം നടത്തി. ടോമി കണയങ്കൽ, ബേബി മുണ്ടയ്ക്കൽ, ബിന്ദു കാഞ്ഞിരത്തിനാൽ തുടങ്ങിയവർ പ്രസംഗിച്ചു.

വേജ് ബോർഡ് തൊഴിലാളികളുടെ അവകാശം: എം. വിജിൻ എംഎൽഎ

കണ്ണൂർ: വേജ്ബോർഡ്, തൊഴിലാളികളുടെ അവകാശമാണെന്നും അത് എന്തു വിലകൊടുത്തും സംരക്ഷിക്കണമെന്നും എം. വിജിൻ എംഎൽഎ. എല്ലാവരും ഒറ്റക്കെട്ടായി നിന്ന് പോരാടിയാൽ മാത്രമേ അവകാശ സംരക്ഷണം സാധ്യമാകൂ എന്നും അദ്ദേഹം പറഞ്ഞു. കേരള ന്യൂസ് പേപ്പർ എംപ്ലോയീസ് ഫെഡറേഷൻ (കെഎൻഇഎഫ്) ജില്ലാ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു എംഎൽഎ. പുതുതലമുറയെ കാർന്നുതിന്നുന്ന രാസ ലഹരിക്കെതിരേയുള്ള പ്രചാരണത്തിൽ കെഎൻഇഎഫും പങ്കാളികളാകണമെന്ന് എംഎൽഎ നിർദേശിച്ചു. ജില്ല പ്രസിഡന്‍റ് കെ. സജീവൻ അധ്യക്ഷനായിരുന്നു. സംസ്ഥാന പ്രസിഡന്‍റ് വി.എസ്. ജോൺസൺ മുഖ്യ പ്രഭാഷണം നടത്തി. കെ. വിജേഷ്, സി. സുനിൽകുമാർ, കെ. അശോകൻ, ഡോ. ജോസ് ജോർജ് പ്ലാത്തോട്ടം, സി. ലക്ഷ്മണൻ, എൻ. കരീം, ഒ.വി. വിജയൻ, ടി. അസീർ എന്നിവർ പ്രസംഗിച്ചു. സർവീസിൽ നിന്ന് വിരമിച്ച സി. മോഹനൻ, ആർ.കെ. രത്നാകരൻ എന്നിവർക്ക് യാത്രയയപ്പും നല്കി. ഭാരവാഹികൾ കെ. സജീവൻ (മാതൃഭൂമി)-പ്രസിഡന്‍റ്, സി. സുരേശൻ (ദേശാഭിമാനി)-സെക്രട്ടറി, ടി. അസീർ (മാധ്യമം)-ട്രഷറർ, ടി. ഷിബിൻ (മാതൃഭൂമി), ഇ. സുരേഷ് ബാബു (ജനയുഗം)-ജോയിന്‍റ് സെക്രട്ടറിമാർ, കെ.എം. ഷാഫി (ചന്ദ്രിക), ജയദേവൻ (ജന്മഭൂമി)-വൈസ് പ്രസിഡന്‍റുമാർ.

ആയുർവേദ മെഡിക്കൽ അസോ. ജില്ലാ സമ്മേളനം

കണ്ണൂർ: ആയുർവേദ മെഡിക്കൽ അസോസിയേഷൻ ഓഫ് ഇന്ത്യയുടെ ജില്ലാ സമ്മേളനം ഡോ. അരവിന്ദൻ നഗറിൽ ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി ഉദ്ഘാടനം ചെയ്തു. 2025-26 വർഷത്തെ സംസ്ഥാന ബജറ്റിൽ നാട്ടുവൈദ്യവും-പാരമ്പര്യ വൈദ്യം സംരക്ഷണത്തിനായി കമ്മീഷൻ രൂപീകരിക്കുന്നതിനും ഇൻസ്റ്റിറ്റ്യൂട്ട് സ്ഥാപിക്കുന്നതിനുള്ള നിർദേശങ്ങളിൽ നിന്നും സർക്കാർ പിൻമാറണമെന്ന് സർക്കാർ പ്രമേയത്തിലൂടെ ആവശ്യപ്പെട്ടു. ജില്ലാ പ്രസിഡന്‍റ് ഡോ. രാമചന്ദ്രൻ അധ്യക്ഷത വഹിച്ചു. സംസ്ഥാന ജനറൽ സെക്രട്ടറി ഡോ. കെ.സി. അജിത്കുമാർ മുഖ്യപ്രഭാഷണം നടത്തി. സംസ്ഥാന സെക്രട്ടറി ഡോ. സിരി സൂരജ് സംസ്ഥാന കമ്മിറ്റി റിപ്പോർട്ടും സോൺ സെക്രട്ടറി യു.പി. ബിനോയ് സംഘടനാ റിപ്പോർട്ടും ജില്ലാ സെക്രട്ടറി ഡോ. അനൂപ് ഭാസ്‌കർ ജില്ലാ റിപ്പോർട്ടും ഡോ. ലയ ബേബി വനിതാ കമ്മിറ്റി റിപ്പോർട്ടും ജില്ലാ ട്രഷറർ ഡോ. സനൂപ് വരവ് ചിലവ് കണക്കും അവതരിപ്പിച്ചു. പുതിയ ഭാരവാഹികളായി ഡോ. എ. രാമചന്ദ്രൻ-പ്രസിഡന്‍റ്, ഡോ.അനൂപ് ഭാസ്കർ-സെക്രട്ടറി, ഡോ. ടി.വി. ശ്രീജിത്ത്-ട്രഷറർ എന്നിവരെയും വനിതാ കമ്മിറ്റി ചെയർപേഴ്‌സണായി ഡോ. ആർ. ബിന്ദുവിനെയും വനിതാ കമ്മിറ്റി കൺവീനറായി ഡോ. എ.എം. അനുപമയെയും തെരഞ്ഞെടുത്തു.

ജലരേഖയായി കാക്കാത്തോട് ബസ്‌ സ്റ്റാൻഡ്

സ്വന്തം ലേഖകൻ തളിപ്പറമ്പ്: ഇന്‍റർലോക്ക് പണി പൂര്‍ത്തീകരിച്ചിട്ട് വര്‍ഷം രണ്ടു കഴിഞ്ഞിട്ടും കാക്കാത്തോട് ബസ്‌ സ്റ്റാൻഡ് മലയോര ബസ്‌ സ്റ്റാൻഡായി മാറിയില്ല. തളിപ്പറന്പ് നഗരത്തിലെ കീറാമുട്ടിയായ ഗതാഗതക്കുരുക്കിന് ശാശ്വത പരിഹാരമാണ് കാക്കാത്തോടിലെ ബസ്‌ സ്റ്റാൻഡ്. മൂന്നു പതിറ്റാണ്ടിനും മുന്പ് തളിപ്പറമ്പ് ഗ്രാമപഞ്ചായത്തായിരുന്ന കാലത്ത് എ.കെ. പൊതുവാൾ പഞ്ചായത്ത് പ്രസിഡന്‍റായിരുന്നപ്പോൾ വില കൊടുത്ത് വാങ്ങിയ സ്ഥലമായിരുന്നു ഇത്. വർഷങ്ങൾ പിന്നിട്ടപ്പോൾ ഇത് കെഎസ്ആര്‍ടിസി ബസ്‌സ്റ്റാൻഡാക്കാൻ ശ്രമം നടന്നെങ്കിലും മുന്നോട്ടു പോയില്ല. പിന്നീടാണ് മലയോര ബസ്‌ സ്റ്റാൻഡ് എന്ന പദ്ധതിയിലേക്ക് നഗരസഭ എത്തിയത്. പണികൾ ഏറെക്കുറെ പൂർത്തിയായെങ്കിലും ഇത് തുറന്നു നല്കാൻ നഗരസഭയും ബന്ധപ്പെട്ടവരും തയാറാകുന്നില്ല. നിലവിൽ തളിപ്പറമ്പിലെത്തുന്ന നാഷണൽ പെർമിറ്റ് ലോറികൾക്കും ടൂറിസ്റ്റ് ബസുകൾക്കും നിർത്തിയിടാനും അറ്റകുറ്റപ്പണികൾ നടത്താനുള്ള ഇടമായി മാറിയിരിക്കുകയാണ് കാക്കാത്തോട് ബസ്‌ സ്റ്റാൻഡ്. അടിസ്ഥാന സൗകര്യങ്ങൾ ഒരുക്കിയിട്ടില്ല 2022ൽ 98 ലക്ഷം രൂപ വകയിരുത്തിയാണ് 3200 ചതുരശ്ര മീറ്റർ ഇന്‍റർലോക്ക് പ്രവൃത്തി പൂർത്തീകരിച്ചത്. എന്നാൽ, ഒരു ബസ്‌സ്റ്റാൻഡിന് വേണ്ട അടിസ്ഥാന രീതിയിലുള്ള പ്രവർത്തനങ്ങൾ നടത്തുകയോ ചെയ്തിട്ടില്ല. ബസ്‌ സ്റ്റാൻഡ് സ്വകാര്യ പേ പാര്‍ക്കിംഗ് കേന്ദ്രമായി ഉപയോഗിച്ചിരുന്നെങ്കിലും ഇപ്പോൾ ഇതും നിലച്ചിട്ടാണുള്ളത്. ഷോപ്പിംഗ് കോംപ്ലക്സ്, പാർക്കിംഗ് യാർഡ്, കാത്തിരിപ്പു കേന്ദ്രം, ശുദ്ധജലം, ശൗചാലയം, വൈദ്യുതി തുടങ്ങിയവ ഒരുക്കേണ്ടതുണ്ട്. നിലവിലുള്ള നഗരസഭാ കൗണ്‍സിലിന്‍റെ കാലാവധിക്ക് മുമ്പായി മലയോര ബസ്‌ സ്റ്റാൻഡ് യാഥാർഥ്യമാക്കുമെന്ന് വർഷങ്ങൾക്ക് മുന്പേ ഭരണപക്ഷം പറഞ്ഞിട്ടുണ്ടെങ്കിലും ഇനി മാസങ്ങൾ മാത്രമേ കാലാവധിക്ക് ബാക്കിയുള്ളു എന്നതും യാഥാർഥ്യമാണ്. പ്രതീക്ഷയർപ്പിച്ച് മലയോര ജനത ആലക്കോട്, ശ്രീകണ്ഠപുരം ഭാഗങ്ങളിലെ മലയോര മേഖലകളിൽ നിന്നുള്ള യാത്രക്കാരാണ് കാക്കാത്തോട് ബസ് സ്റ്റാൻഡിനായി പ്രതീക്ഷയോടെ കാത്തിരിക്കുന്നത്. സംസ്ഥാനപാതയിൽ നിന്നും ബസ് സ്റ്റാൻഡിൽ കയറി ദേശീയപാതയിലക്കിറങ്ങും വിധമാണ് രൂപരേഖ. ഇവിടെ പദ്ധതികൾ പൂർത്തിയാക്കി പ്രവർത്തനക്ഷമമായാൽ തിരക്കു കൊണ്ട് ബുദ്ധിമുട്ടുന്ന നിലവിലെ ബസ് സ്റ്റാൻഡിൽ സൗകര്യങ്ങൾ കൂടും. നിലവിലെ സ്റ്റാൻഡിൽ ബസുകളുടെ ആധിക്യം കാരണവും സ്ഥല സൗകര്യം കുറവായതിനാലും ബസ് ജീവനക്കാരും യാത്രക്കാരും ഏറെ ബുദ്ധിമുട്ട് അനുഭവിക്കുയാണ്.

ലഹരിക്കെതിരേ വോളിബോൾ: കടന്നപ്പള്ളി മിന്നി, കരുത്തായി ഇപിയും രാഷ്‌ട്രീയക്കാരോട് സുല്ലിട്ട് വ്യവസായികൾ

കണ്ണൂർ: മിന്നും സർവുമായി മന്ത്രി കടന്നപ്പള്ളി രാമചന്ദ്രനും ആവേശമായി മുൻ കായികമന്ത്രി ഇ.പി.ജയരാജനും കളിക്കളത്തിൽ നിറഞ്ഞപ്പോൾ വോളി കോർട്ടിൽ രാഷ്‌ട്രീയക്കാരുടെ ടീം വ്യവസായികളെ കീഴടക്കി. മന്ത്രി കടന്നപ്പള്ളി രാമചന്ദ്രന്‍ നയിച്ച രാഷ്‌ട്രീയക്കാരുടെ ടീമും നോർത്ത് മലബാർ ചേംബർ ഓഫ് കോമേഴ്സ് പ്രസിഡന്‍റ് ടി.കെ.രമേഷ്കുമാറിന്‍റെ നേതൃത്വത്തിലുള്ള ചേംബർ ടീമും തമ്മിലുള്ള പോരാട്ടം മേയ് 2, 3, 4 തീയതികളിൽ നടക്കുന്ന ആറാമത് സംസ്ഥാന ജേണലിസ്റ്റ് വോളിയുടെ വിളംബരമായി. ലഹരിക്കെതിരേ സംസ്ഥാന സർക്കാർ നടത്തുന്ന പോരാട്ടത്തിന് പിന്തുണ പ്രഖ്യാപിച്ചുമാണ് കേരള പത്രപ്രവർത്തക യൂണിയൻ കണ്ണൂർ കോർപറേഷൻ ജവഹർ സ്റ്റേഡിയത്തിൽ പ്രത്യേകം സജ്ജമാക്കിയ കോർട്ടിൽ "ബ്രേക്കിംഗ് -ഡി' എന്ന പേരിൽ വോളി നടത്തിയത്. എം. വിജിൻ എംഎൽഎ, മേയർ മുസ്‌ലിഹ് മഠത്തിൽ, യുവജനക്ഷേമ കമ്മീഷനംഗം വി.കെ. സനോജ്, രാഷ്‌ട്രീയ നേതാക്കളായ അബ്ദുൾ കരീം ചേലേരി, സി.പി. ഷൈജൻ, കെ. രഞ്ജിത്ത്, ബിജു ഏളക്കുഴി, രഞ്ജിത്ത് നാറാത്ത്, മുൻ ഇന്ത്യൻ താരം കിഷോർ കുമാർ, സെബാസ്റ്റ്യൻ ജോർജ് എന്നിവർ കളത്തിലിറങ്ങി. മുൻ മന്ത്രി പി.കെ. ശ്രീമതി ടീം മാനേജരും ജില്ലാ പഞ്ചായത്ത് പ്രസിഡന്‍റ് കെ.കെ രത്നകുമാരി അസി. കോച്ചുമായിരുന്നു. ചേംബറിന് വേണ്ടി ഓണററി സെക്രട്ടറി കെ. അനിൽകുമാർ, വിനോദ് നാരായണൻ, സച്ചിൻ സൂര്യകാന്ത് മഖേച്ച, ഹനീഷ് വാണിയങ്കണ്ടി, ഇർഷാദ് തുടങ്ങിയവരും കോർട്ടിൽ അണിനിരന്നു. സർവീസിൽ തുടർച്ചയായി 12 പോയിന്‍റുകൾ നേടിയ മന്ത്രി കടന്നപ്പള്ളി രാമചന്ദ്രൻ പ്രദർശന മത്സരത്തിലെ താരമായി. 16 നെതിരേ 25 പോയിന്‍റുകൾ നേടിയായിരുന്നു രാഷ്‌ട്രീയക്കാരുടെ ടീമിന്‍റെ വിജയം. മത്സരം മുൻ ഇന്ത്യൻതാരം ഇ.കെ. കിഷോർകുമാർ ഉദ്ഘാടനം ചെയ്തു. വിജയികൾക്ക് കണ്ണൂർ കളക്ടർ അരുൺ കെ. വിജയൻ മെഡലുകൾ സമ്മാനിച്ചു. കെയുഡബ്ല്യുജെ സംസ്ഥാന ജനറൽ സെക്രട്ടറി സുരേഷ് എടപ്പാളിന്‍റെ നേതൃത്വത്തിൽ മെഴുകുതിരി കത്തിച്ച് ലഹരിവിരുദ്ധ പ്രതിജ്ഞയെടുത്തു. കണ്ണൂർ പ്രസ്ക്ലബ് പ്രസിഡന്‍റ് സി. സുനിൽകുമാർ അധ്യക്ഷത വഹിച്ചു. സൂപ്പർ എഐ സിഇഒ അരുൺ പെരുളി, കബീർ കണ്ണാടിപ്പറമ്പ് എന്നിവർ പ്രസംഗിച്ചു.

"കുടിവെള്ള വിതരണം പൊതുമേഖലയിൽ നിലനിർത്തണം'

കണ്ണൂർ: കുടിവെള്ള വിതരണം പൊതുമേഖലയിൽ നിലനിർത്തണമെന്ന് കണ്ണൂർ ശിക്ഷക് സദനിൽ നടന്ന അസോസിയേഷൻ ഓഫ് കേരള വാട്ടർ അഥോറിറ്റി ഓഫീസേഴ്സ് സംസ്ഥാന സമ്മേളനം പ്രമേയത്തിലൂടെ ആവശ്യപ്പെട്ടു. എഡിബി ധനസഹായത്തോടുകൂടി നടപ്പാക്കുന്ന നവീകരണ പ്രവൃത്തികളിൽ സുതാര്യത ഉറപ്പാക്കുക, പരിഷ്കരണത്തിലൂടെ ശമ്പളം വെട്ടിക്കുറച്ച നടപടി പിൻവലിക്കുക. ശമ്പള പരിഷ്കരണ അനോമലി പരിഹരിച്ച് ഉത്തരവാകുക, ജൽ ജീവൻ മിഷൻ നടത്തിപ്പിലെ അപാകതകൾ പരിഹരിച്ച് പൂർത്തിയാക്കുകയും തദ്ദേശ ഭരണ സ്ഥാപനങ്ങളുടെ പങ്കാളിത്തം ഉറപ്പാക്കുകയും ചെയ്യുക തുടങ്ങിയ പ്രമേയങ്ങളും അവതരിപ്പിച്ചു. പ്രതിനിധി സമ്മേളനം സിപിഎം സംസ്ഥാന സെക്രട്ടേറിയേറ്റംഗം എം.വി.ജയരാജൻ ഉദ്ഘാടനം ചെയ്തു. ആരോഗ്യകരമായ കുടിവെള്ളം ജനങ്ങളുടെ അവകാശമായി സംരക്ഷിക്കപ്പെടണമെന്നും ജലം ജനങ്ങളുടെ അവകാശമായി സംരക്ഷിക്കപ്പെടണമെന്ന നിലപാടാണ് കേരളത്തിലെ ഇടതുപക്ഷ സർക്കാർ പുലർത്തുന്നതെന്നും ജയരാജൻ പറഞ്ഞു. സംസ്ഥാന പ്രസിഡന്‍റ് എസ്. തമ്പി അധ്യക്ഷത വഹിച്ചു. ജനറൽ സെക്രട്ടറി ഇ.എസ്. സന്തോഷ് കുമാർ റിപ്പോർട്ടും ട്രഷറർ എസ്. രഞ്ജീവ് വരവുചിലവ് കണക്കും അവതരിപ്പിച്ചു. പുതിയ ഭാരവാഹികൾ: ഇ.എസ്. സന്തോഷ്കുമാർ-പ്രസിഡന്‍റ്, എസ്.തന്പി-ജനറൽ സെക്രട്ടറി, എസ്. രഞ്ജീവ് ട്രഷറർ.

പുഴ ശുചീകരണ യജ്ഞം സമാപിച്ചു

പയ്യന്നൂർ: ഒരു മാസമായി ചാൾസൺ സ്വിമ്മിംഗ് അക്കാദമി വിവിധ പുഴകളിൽ നടത്തിവന്ന പുഴ ശുചീകരണ യജ്ഞം സമാപിച്ചു. പുഴകളെ വീർപ്പുമുട്ടിച്ച് വർഷങ്ങളായി അടിഞ്ഞുകൂടിക്കിടന്ന പ്ലാസ്റ്റിക് മാലിന്യങ്ങൾ നീക്കി പുഴകളെ സ്വതന്ത്രമാക്കിയാണ് ശുചീകരണ യജ്‌ഞം സമാപിച്ചത്. സ്വാതന്ത്ര്യ സ്മരണകളിരമ്പുന്ന ഉളിയത്ത് കടവിൽ നടന്ന സമാപന പരിപാടി ടി.ഐ മധുസൂദനൻ എംഎൽഎ ഉദ്ഘാടനം ചെയ്തു. ശുചീകരണ പരിപാടിക്ക് നേതൃത്വം നല്കിയ ഡോ. ചാൾസൺ ഏഴിമലയെയും 30 വോളന്‍റിയർമാരെയും എംഎൽഎ പൊന്നാടയണിയിച്ച് ആദരിച്ചു. അക്കാദമി സെക്രട്ടറി ജാക്സൺ ഏഴിമല, ഉപ്പള ഫയർ സ്റ്റേഷൻ ഓഫീസർ സി.പി. രാജേഷ്, തൃക്കരിപ്പൂർ സ്റ്റേഷൻ ഓഫീസർ കെ.വി. പ്രഭാകരൻ തുടങ്ങിയവർ സംസാരിച്ചു. മാലിന്യവിരുദ്ധ പ്രതിജ്ഞയോടെയാണ് ചടങ്ങ് അവസാനിച്ചത്. ഫയർ ഓഫീസർമാരായ സി.പി. ഗോകുൽദാസ്, കൂത്തുപറമ്പ് സ്റ്റേഷൻ ഓഫീസർ മനോജ്, മണ്ടൂർ ശങ്കരവിലാസം യുപി സ്കൂൾ മാനേജർ കേശവൻ നമ്പൂതിരി, മാധ്യമപ്രവർത്തകൻ റഫീഖ് കമാൽ, ദേശീയ കയാക്കിംഗ താരം സ്വാലിഹ റഫീഖ്, വെയിറ്റ് ലിഫ്റ്റിംഗ് ചാമ്പ്യൻ ഷാജോൺ സുമേഷ് തുടങ്ങിയവരും മത്സ്യത്തൊഴിലാളികളും തായിനേരി എസ്എബിടിഎം സ്കൂളിലെ എൻഎസ്എസ് പ്രോഗ്രം കോ-ഓർഡിനേറ്റർ സമീറിന്‍റെ നേതൃത്വത്തിലുള്ള വൊളന്‍റിയാർമാരുൾപ്പടെ 56 പേർ സമാപന ശുചീകരണത്തിൽ പങ്കെടുത്തു. എട്ട് കയാക്കിംഗ് തോണികളിലും മൂന്ന് നാടൻ വള്ളങ്ങളിലുമായാണ് സമാപന ദിവസത്തെ ശുചീകരണം നടത്തിയത്. കവ്വായി പാലത്തിന് സമീപം നിന്നാരംഭിച്ച ശുചീകരണം പയ്യന്നൂർ നഗരസഭാ കൗൺസിലർ സമീറ ടീച്ചർ ഫ്ലാഗ് ഓഫ് ചെയ്തു. വലിയ ഇരുപത് ചാക്ക് പ്ലാസ്റ്റിക് മാലിന്യങ്ങളാണ് സമാപന ശുചീകരണത്തിൽ ശേഖരിച്ചത്.

കൊട്ടത്തലച്ചി മലയിൽ വിശ്വാസ തീർഥാടനവും പുതുഞായർ ആചരണവും

ചെറുപുഴ: കൊട്ടത്തലച്ചി മലയിൽ 68-ാമത് വിശ്വാസ തീർഥാടനവും പുതുഞായർ ആചരണവും ഭക്തിനിർഭരമായ ചടങ്ങുകളോടെ നടന്നു. ഇന്നലെ പുലർച്ചെ മൂന്നിന് ആനക്കുഴിയിൽ നിന്ന് കുരിശിന്‍റെ വഴിയോടെയാണ് തീർഥാടനം ആരംഭിച്ചത്. തുടർന്ന് കൊടിയേറ്റ്. വിശുദ്ധ കുർബാനയ്ക്ക് ഫാ.തോമസ് മേനപ്പാട്ടുപടിക്കൽ കാർമികത്വം വഹിച്ചു. ആറിനും 7.30 നും, ഒൻപതിനും വിശുദ്ധ കുർബാന നടന്നു. ഫാ.ജോസ് താമരക്കാട്ട്, ഫാ.അരുൺ പടിഞ്ഞാറെ ആനശേരിൽ, ഫാ.ജോസഫ് കളപ്പുരയ്ക്കൽ എന്നിവർ കാർമികത്വം വഹിച്ചു. നേർച്ചകൾ നേർന്നും പ്രത്യേക നിയോഗങ്ങൾ വച്ച് പ്രാർഥിച്ചും പ്രായമായവരും കുട്ടികളും ഉൾപ്പെടെ നൂറുകണക്കിന് വിശ്വാസികൾ കൊട്ടത്തലച്ചി മല കയറി. നേർച്ച കാഴ്ചകൾ അർപ്പിക്കുന്നതിനും കഴുന്നെടുക്കുന്നതിനും പ്രത്യേകം സൗകര്യം ഏർപ്പെടുത്തിയിരുന്നു.

ഫ്രാൻസിസ് പാപ്പ പ്രത്യാശയുടെ പ്രവാചകൻ: ഡോ. അലക്സ് വടക്കുംതല

കണ്ണൂർ: ഫ്രാൻസിസ് പാപ്പയുടെ ആത്മശാന്തിക്ക് വേണ്ടി കണ്ണൂർ രുപതയുടെ ഭദ്രാസന കേന്ദ്രമായ ബർണശേരി ഹോളി ട്രിനിറ്റി കത്തീഡ്രലിൽ കണ്ണൂർ ബിഷപ് ഡോ. അലക്സ് വടക്കുംതലയുടെ മുഖ്യകാർമികത്വത്തിൽ അനുസ്മരണ ദിവ്യബലി അർപ്പിച്ചു. ജീവിതത്തിന്‍റെ ആനന്ദത്തെക്കുറിച്ചും ജീവിതത്തിൽ പുലരേണ്ട പ്രത്യാശയെക്കുറിച്ചും അളവുകളില്ലാതെ പ്രഘോഷിച്ച ഇടയനായിരുന്നു ഫ്രാൻസിസ് പാപ്പയെന്നു ബിഷപ് അനുസ്മരിച്ചു. വിശ്വാസ വിഷയങ്ങളിലും സഭാ പ്രബോധനങ്ങളിലും ആത്മീയ നിറവോടെ പാപ്പ സഭയെ നയിച്ചെന്നും ബിഷപ് പറഞ്ഞു. നീതിക്കും സമാധാനത്തിനു വേണ്ടി ജീവിതാവസാനംവരെ നിലകൊണ്ട കരുണയുടെ മുഖമായിരുന്നു ഫ്രാൻസിസ് പാപ്പയെന്ന് രുപത സഹായ മെത്രാൻ ഡോ. ഡെന്നിസ് കുറുപ്പശേരി പറഞ്ഞു. വികാരി ജനറൽ മോൺ. ഡോ. ക്ലാരൻസ് പാലിയത്തും രുപതയിലെ എല്ലാ വൈദികരും സഹകാർമികരായി. രൂപതയിലെ എല്ലാ ഇടവകകളിൽ നിന്നും സന്യസ്തരും അൽമായരും ബലിയർപ്പണത്തിൽ പങ്കുചേർന്നു. ബിഷപ്പുമാരും വൈദികരും സന്യസ്ഥരും ഫ്രാൻസിസ് പാപ്പയുടെ ചിത്രത്തിൽ പുഷ്പാർച്ചന നടത്തി.

ലൈബ്രറി കൗണ്‍സില്‍ വായനോത്സവം: അഭിനവ്, പ്രിയങ്ക, ഡോ. ആര്‍ദ്ര വിജയികള്‍

കണ്ണൂർ: സ്റ്റേറ്റ് ലൈബ്രറി കൗണ്‍സില്‍ സംസ്ഥാന തലത്തില്‍ സംഘടിപ്പിച്ച വായനോത്സവം സമാപിച്ചു. മത്സരങ്ങളില്‍ ആലപ്പുഴ പറവൂര്‍ ഗവ. ഹയര്‍ സെക്കന്‍ഡറി സ്‌കൂള്‍ വിദ്യാർഥി അഭിനവ് കൃഷ്ണ -ഹൈസ്‌കൂള്‍ വിഭാഗത്തിലും ജി. പ്രിയങ്ക മുതിര്‍ന്നവരുടെ വിഭാഗം ഒന്നിലും ഡോ. വി. ആര്‍ദ്ര മുതിര്‍ന്നവരുടെ വിഭാഗം രണ്ടിലും ജേതാക്കളായി. ആലപ്പുഴ ജില്ലയിലെ പറവൂര്‍ പബ്ലിക് ലൈബ്രറിയുടെ പ്രതിനിധിയായി മത്സരിച്ച് തുടര്‍ച്ചയായ രണ്ടാം തവണയാണ് പ്രിയങ്ക ഈ വിഭാഗത്തില്‍ ഒന്നാമതെത്തുന്നത്. ഹൈസ്‌കൂള്‍ വിഭാഗത്തില്‍ തിരുവനന്തപുരം ജില്ലയിലെ ആറ്റിങ്ങല്‍ ഗവ. മോഡല്‍ എച്ച്എസ്എസി ലെ വൈഷ്ണവ് ദേവ് എസ്. നായര്‍ രണ്ടാം സ്ഥാനവും കൊല്ലം ജില്ലയിലെ പ്രാക്കുളം എന്‍എസ്എസ് എച്ച്എസിലെ എസ്.ആര്‍. ചിത്തിര മൂന്നാം സ്ഥാനവും നേടി. മുതിര്‍ന്നവരുടെ വിഭാഗം ഒന്നില്‍ കോഴിക്കോട് നൊച്ചാട് സമത ലൈബ്രറിയിലെ എ.എന്‍. ഫിദ സാനിയ രണ്ടാം സ്ഥാനവും കൊല്ലം കുമ്മിള്‍ സമന്വയ ഗ്രന്ഥശാലയിലെ എസ്.എസ്. ഫെമിന മൂന്നാം സ്ഥാനവും നേടി. മുതിര്‍ന്നവരുടെ രണ്ടാമത്തെ വിഭാഗത്തില്‍ കോഴിക്കോട് കൂത്താളി ഇഎംഎസ് ഗ്രന്ഥാലയത്തില്‍ നിന്നുള്ള ടി. സുമേഷ്‌കുമാര്‍ രണ്ടാം സ്ഥാനവും ആലപ്പുഴ തുറവൂര്‍ ഗ്രാമപഞ്ചായത്ത് പബ്ലിക് ലൈബ്രറി റീഡിംഗ് റൂമിന്‍റെ പ്രതിനിധി ഡോ. ആർ. സേതുനാഥ് മൂന്നാം സ്ഥാനവും കരസ്ഥമാക്കി. മൂന്ന് വിഭാഗങ്ങളിലും ഒന്നാം സ്ഥാനം നേടിയവര്‍ക്ക് 25,000 രൂപയും ഫലകവും പ്രശസ്തി പത്രവും സമ്മാനിച്ചു. രണ്ടൂം മൂന്നും സ്ഥാനങ്ങളില്‍ വന്നവര്‍ക്ക് യഥാക്രമം 15,000, 10,000 രൂപ വീതം കാഷ് അവാര്‍ഡും ഫലകവും പ്രശസ്തിപത്രവും സമ്മാനിച്ചു. മൂന്ന് ദിവസങ്ങളിലായി കണ്ണൂര്‍ ഗവ. എൻജിനിയറിംഗ് കോളജില്‍ നടത്തിയ എഴുത്ത് പരീക്ഷ, അഭിമുഖം, ക്വിസ് എന്നിവയില്‍ പങ്കെടുത്ത് ഏറ്റവും കൂടുതല്‍ മാര്‍ക്ക് നേടിയവരെയാണ് വിജയികളായി തെരഞ്ഞെടുത്തത്. സമാപന സമ്മേളനം മന്ത്രി കടന്നപ്പള്ളി രാമചന്ദ്രന്‍ ഉദ്ഘാടനം ചെയ്തു. വിജയികള്‍ക്ക് എം. മുകുന്ദന്‍ സമ്മാനങ്ങള്‍ വിതരണം ചെയ്തു.

വിശ്വാസ പ്രഘോഷണമായി സാന്തോം തീർ‌ഥാടനം

കൊളക്കാട്: പുതുഞായറാഴ്ച കൊളക്കാട് കുരിശുമലയിലേക്ക് തലശേരി അതിരൂപതയുടെ നേതൃത്വത്തിൽ നടത്തിയ സാന്തോം തീർഥാടനത്തിൽ ആയിരങ്ങൾ പങ്കെടുത്തു. പേരാവൂർ ഫൊറോനയിലെ വിവിധ പള്ളികളിൽനിന്ന് ആരംഭിച്ച കുരിശുമല പ്രയാണം കൊളക്കാട് കുരിശുമലയിൽ തലശേരി ആർച്ച്ബിഷപ് മാർ ജോസഫ് പാംപ്ലാനിയുടെ മുഖ്യകാർമികത്വത്തിലുള്ള വിശുദ്ധ കുർബാനയോടെ സമാപിച്ചു. പേരാവൂർ സെന്‍റ് ജോസഫ്സ് മേജർ ആർക്കി എപ്പിസ്കോപ്പൽ പള്ളിയിൽ നിന്ന് പുലർച്ചെ ഒന്നിനാണ് മാർ ജോസഫ് പാംപ്ലാനിയുടെ നേതൃത്വത്തിൽ കൊളക്കാട്ടേക്ക് തീർഥാടനം ആരംഭിച്ചത്. അതേസമയം കണിച്ചാർ പ്രദേശത്തെ വിവിധ പള്ളികളിലെ വിശ്വാസികൾ കണിച്ചാർ സെന്‍റ് ജോർജ് പള്ളിയിൽ സമ്മേളിച്ച് ദിവ്യകാരുണ്യ ആരാധനയ്ക്കും വിശുദ്ധ കുർബാനയ്ക്കും ശേഷം കൊളക്കാട്ടേക്ക് തീർഥാടനം തുടങ്ങി. പുലർച്ചെ 2.45ന് കൊളക്കാട് സെന്‍റ് തോമസ് പള്ളിയിൽ എത്തിയ ആർച്ച്ബിഷപ്പിന്‍റെ നേതൃത്വത്തിലുള്ള തീർഥാടക സംഘത്തെ ഇടവക വികാരി ഫാ.തോമസ് പട്ടാംകുളത്തിന്‍റെ നേതൃത്വത്തിൽ ഇടവകാജനം സ്വീകരിച്ചു. തുടർന്ന് മൂന്നോടെ തീർഥാടകസംഘം മാർ ജോസഫ് പാംപ്ലാനിയുടെ നേതൃത്വത്തിൽ കുരിശുമലയിലേക്ക് തീർഥാടനം ആരംഭിച്ചു. 4.30ന് കുരിശുമലയിൽ എത്തിയതിനു ശേഷം ആർച്ച്ബിഷപ്പിന്‍റെ നേതൃത്വത്തിൽ വിശുദ്ധ കുർബാന അർപ്പിച്ചു. ആയിരക്കണക്കിന് വിശ്വാസികളാണ് വിവിധ ഇടവകകളിൽ നിന്ന് കുരിശുമല തീർഥാടനത്തിനായി എത്തിയത്. കുരിശുമല തീർഥാടനത്തിനു ശേഷം എല്ലാവർഷവും നടക്കാറുള്ള കുരിശുമല കയറ്റവും ഉണ്ടായിരുന്നു. തലശരി അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴി, വൈസ് ചാൻസിലർ ഫാ.സുബിൻ റാത്തപ്പള്ളി, എകെസിസി ഗ്ലോബൽ ഡയറക്ടർ റവ. ഡോ. ഫിലിപ്പ് കവിയിൽ, മാതൃവേദി ഡയറക്ടർ ഫാ. ജോബി കോവാട്ട്, ചെറുപുഷ്പ മിഷൻലീഗ് ഡയറക്ടർ ഫാ. ജോസഫ് വടക്കേപറമ്പിൽ, ജുഡീഷ്യൽ വികാരി റവ.ഡോ. ജോസ് വെട്ടിക്കൽ, പേരാവൂർ സെന്‍റ് ജോസഫ്സ് മേജർ ആർക്കി എപ്പിസ്കോപ്പൽ തീർഥാടന കേന്ദ്രം ആർച്ച്പ്രീസ്റ്റ് ഫാ. മാത്യു തെക്കേമുറി, റവ. ഡോ.തോമസ് കൊച്ചുകരോട്ട്, ഫാ. സെബാസ്റ്റ്യൻ പൊടിമറ്റം, ഫാ. സെബാൻ ഇടയാടി തുടങ്ങിയവർ തീർഥാടനത്തിനും കുരിശുമലയിലെ വിശുദ്ധ കുർബാനയ്ക്കും നേതൃത്വം നല്കി. തുടർന്ന് കുരിശുമലയിൽ നടന്ന വിശുദ്ധ കുർബാനകൾക്ക് ഫാ. ആന്‍റണി അമ്പാട്ട്, ഫാ. ജോസഫ് തകിടിയേൽ, ഫാ. ജോബി കാരക്കാട്ട്, ഫാ. ജോസഫ് കാക്കരമറ്റം, ഫാ. മാത്യു വടക്കേപ്പാറ ഒസിഡി, ഫാ.മാത്യു പാലമറ്റം തുടങ്ങിയവർ കാർമികത്വം വഹിച്ചു. രാവിലെ ഒന്പതിന് ക്രൂശിതനോടൊപ്പം കുരിശുമലയിലേക്ക് കുരിശിന്‍റെ വഴിയും ഉണ്ടായിരുന്നു.

ഓട്ടോ മറിഞ്ഞ് പരിക്കേറ്റ ഡ്രൈവർ മരിച്ചു

കണ്ണൂർ: ഓട്ടോ ഡിവൈഡറിൽ ഇടിച്ചു മറിഞ്ഞ് ഗുരുതരമായി പരിക്കേറ്റ ഓട്ടോ ഡ്രൈവർ മരിച്ചു. ധർമശാല അസീസി നഗറിലെ പീറ്റർ ഹൗസിൽ പരേതനായ ക്രിസ്റ്റി പീറ്റർ-ജോയ്‌സി ദന്പതികളുടെ മകൻ സാമുവൽ സജിത്ത് പീറ്റർ (48) ആണ് മരിച്ചത്. സംസ്കാരം ഇന്ന് ഉച്ചകഴിഞ്ഞ് 3.30 ന് ബക്കളം ഫാത്തിമ മാതാ പള്ളിയിൽ. ശനിയാഴ്ച ഉച്ചകഴിഞ്ഞ് 2.15 ഓടെയാണ് സാമുവൽ ഓടിച്ച ഓട്ടോറിക്ഷ ചെട്ടിപീടികയിൽ ഡിവൈഡറിൽ ഇടിച്ച് മറിഞ്ഞത്. ഗുരുതരമായി പരിക്കേറ്റ സാമുവലിനെ കണ്ണൂർ എകെജി ആശുപത്രിയിൽ പ്രവേശിപ്പിച്ചെങ്കിലും ഇന്നലെ ഉച്ചയോടെ മരിച്ചു. ധർമശാലയിലെ ഓട്ടോ ഡ്രൈവറാണ്. ഭാര്യ: ശാന്തി. മക്കൾ: സിയോൻ, സിമ്രാൻ. സഹോദരങ്ങൾ: റോഷിനി, സോളമൻ.

ചോദ്യപേപ്പർ ലഭിക്കാത്ത സംഭവം:യൂണിവേഴ്സിറ്റി കവാടത്തിൽ വാഴനട്ട് കെഎസ്‌യു പ്രതിഷേധം

കണ്ണൂർ: നാലു വർഷ ബിരുദ കോഴ്സിന്‍റെ രണ്ടാം സെമസ്റ്റർ പരീക്ഷ ചോദ്യപേപ്പർ ഇല്ലാത്തതിനെ തുടർന്ന് മാറ്റിവച്ച സംഭവത്തിൽ കെഎസ്‌യു കണ്ണൂർ യൂണിവേഴ്സിറ്റിയുടെ കവാടത്തിൽ വാഴനട്ട് പ്രതിഷേധിച്ചു. കെഎസ്‌യു ജില്ലാ പ്രസിഡന്‍റ് എം.സി. അതുലിന്‍റെ നേതൃത്വത്തിൽ പ്രകടനമായെത്തിയ കെഎസ്‌യു പ്രവർത്തകരെ പോലീസ് ഗേറ്റിൽ തടഞ്ഞു. തുടർന്ന് സമരം ജില്ലാ പ്രസിഡന്‍റ് എം.സി. അതുൽ ഉദ്ഘാടനം ചെയ്യുകയും പ്രവർത്തകർ വാഴനട്ട് പ്രതിഷേധിക്കുകയുമായിരുന്നു. സമരത്തിന് ശേഷം പരീക്ഷാ കൺട്രോളറുടെ ചുമതലയുള്ള രജിസ്ട്രാറെ കാണണമെന്നും അകത്തേക്ക് കടത്തിവിടണമെന്നും പ്രവർത്തകർ ആവശ്യപ്പെട്ടെങ്കിലും പോലീസ് അനുമതി നൽകിയില്ല. ഇതേ തുടർന്ന് പോലീസും സമരക്കാരും തമ്മിൽ വാക്കേറ്റവും സംഘർഷവുമുണ്ട‌ായി. സമരക്കാരെ പോലീസ് അറസ്റ്റ് ചെയ്തു നീക്കി.പരീക്ഷ നടത്താൻ പോലും കഴിയാത്ത കണ്ണൂർ യൂണിവേഴ്സിറ്റി പൊതുസമൂഹത്തിന് അപമാനമാണെന്നും വേനൽക്കാലത്ത് വിദ്യാർഥികളെ വീണ്ടും പരീക്ഷകളിലേക്ക് തള്ളിവിടുന്നത് വിദ്യാർഥി ദ്രോഹമാണെന്നും എം.സി. അതുൽ പറഞ്ഞു. പരീക്ഷ നടത്തിപ്പിലെ വീഴ്ചകൾ മുഴുവൻ അന്വേഷിച്ച് പുറത്ത് കൊണ്ടുവരണമെന്നും കെഎസ്‌യു ആവശ്യപ്പെട്ടു. കെഎസ്‌യു സംസ്ഥാന സമിതി അംഗം ആദർശ് മാങ്ങാട്ടിടം, ജില്ലാ വൈസ് പ്രസിഡന്‍റ് ആഷിത്ത് അശോകൻ, അക്ഷയ് മാട്ടൂൽ, സി.എച്ച്. മുബാസ്, അർജുൻ ചാലാട്, എ.എം. സൂര്യതേജ് , അഹമ്മദ് യാസീൻ, മുഹമ്മദ്‌ സലീം, ഗോകുൽ രാജ് എന്നിവർ സമരത്തിന് നേതൃത്വം നൽകി.

കുടിവെള്ളം കൈപ്പിടിയിലാക്കാനുള്ള മൂലധന ശക്തികളുടെ ശ്രമം ചെറുക്കണം: ഡോ. വിജൂ കൃഷ്ണൻ

കണ്ണൂർ: ലോകമെമ്പാടും കുടിവെള്ള സ്രോതസുകൾ കൈപ്പിടിയിലാക്കി ലാഭ കേന്ദ്രങ്ങളാക്കാനുള്ള മൂലധന ശക്തികളുടെ ശ്രമം ചെറുത്ത് തോൽപ്പിക്കണമെന്ന് കിസാൻസഭ അഖിലേന്ത്യാ സെക്രട്ടറിയും സിപിഎം പോളിറ്റ് ബ്യൂറെോ അംഗവുമായ ഡോ. വിജൂ കൃഷ്ണൻ. അസോസിയേഷന്‍ ഓഫ് കേരള വാട്ടർ അഥോറിറ്റി ഓഫീസേഴ്സ് സംസ്ഥാന സമ്മേളനം കണ്ണൂർ ശിക്ഷക് സദനിൽ ഉദ്ഘാടനം ചെയ്തു പ്രസംഗിക്കുകയായിരുന്ന അദ്ദേഹം. രാജ്യത്ത് കുടിവെള്ള വിതരണം സ്വകാര്യവത്കരിക്കാനാണ് നീക്കം നടത്തുന്നത്. ഈ ശ്രമത്തെ ഉപഭോക്താക്കളും തൊഴിലാളികളും ജീവനക്കാരും പൊതുജനങ്ങളും പ്രതിരോധനിര തീർത്ത് തോൽപ്പിക്കണം. കുടിവെള്ളമേഖലയിലും വൈദ്യുത മേഖലയിലും സ്വകാര്യ പങ്കാളികളെ ആനയിക്കുന്ന കേന്ദ്രസർക്കാരിന്‍റെ നയങ്ങൾ ജനദ്രോഹ നയങ്ങളാണെന്നും ഡോ. വിജൂ കൃഷ്ണൻ പറഞ്ഞു. അസോസിയേഷൻ പ്രസിഡന്‍റ് എസ്. തമ്പി അധ്യക്ഷത വഹിച്ചു. ജനറൽ സെക്രട്ടറി ഇ.എസ്. സന്തോഷ്കുമാർ, ട്രഷറർ എസ്. സഞ്ജീവ്, വിവിധ സംഘടനകളെ പ്രതിനിധീകരിച്ച് സീമ നായർ, ഡോ. ഇ.വി. സുധീർ, കെ.വി. അനിൽകുമാർ, പി. ഉണ്ണികൃഷ്ണൻ, ഹണി ബാലചന്ദ്രൻ എന്നിവർ പ്രസംഗിച്ചു. സർവീസിൽ നിന്ന് വിരമിക്കുന്നവർക്കുള്ള യാത്രയയപ്പ് സമ്മേളനം വാട്ടർ അഥോറിറ്റി ബോർഡ് മെന്പർ ആർ. സുഭാഷ് ഉദ്ഘാടനം ചെയ്തു. പുതിയ ഭാരവാഹികളുടെ തെരഞ്ഞെടുപ്പോടെ സമ്മേളനം ഇന്ന് സമാപിക്കും. രാവിലെ പത്തിന് പൊതുസമ്മേളനം മുൻ എംപി പി. കരുണാകരൻ ഉദ്ഘാടനം ചെയ്യും. എസ്. തന്പി അധ്യക്ഷത വഹിക്കും.

ഫോണും പണവും മോഷ്‌ടിച്ച ഭർത്താവിനെതിരേ കേസ്

പെരിങ്ങോം: മൊബൈൽ ഫോണും പണവും മോഷ്‌ടിച്ചുവെന്ന ഭാര്യയുടെ പരാതിയിൽ ഭർത്താവിനെതിരെ കേസ്. വെള്ളോറ കരിപ്പാൽ സ്വദേശിനിയുടെ പരാതിയിലാണ് എടക്കോം കണാരംവയലിലെ സന്തോഷിനെതിരെ പെരിങ്ങോം പോലീസ് കേസെടുത്തത്. കഴിഞ്ഞ 17 ന് രാവിലെ 9.30 ഓടെയാണു പരാതിക്കാസ്പദമായ സംഭവം. ആളില്ലാത്ത സമയത്ത് പരാതിക്കാരിയുടെ വീട്ടിൽ കയറിയാണു പരാതിക്കാരിയിൽനിന്ന് അകന്നു കഴിയുന്ന ഭർത്താവ് മോഷണം നടത്തിയത്. 18,000 രൂപ വിലവരുന്ന ഫോണും 6,000 രൂപയും മോഷ്‌ടിച്ചുവെന്ന പരാതിയിലാണു പോലീസ് കേസെടുത്തത്. കൂടെ താമസിച്ചില്ലെങ്കിൽ വെച്ചേക്കില്ലെന്ന് ഫോൺ വിളിച്ച് ഭീഷണിപ്പെടുത്തിയതായും പരാതിയിലുണ്ട്.

നിർത്തിയിട്ട ലോറിയിൽനിന്ന് പണം ‌കവർന്ന കേസിൽ രണ്ടുപേർ അറസ്റ്റിൽ

തലശേരി: ചോനാടത്ത് ബൈപ്പാസിൽ നിർത്തിയിട്ട ലോറിയിൽ നിന്ന് പതിമൂന്നര ലക്ഷം കവർന്ന കേസിൽ രണ്ടുപേർ അറസ്റ്റിൽ. ലോറിയിലെ ക്ലീനർ വടക്കുന്പാട്ടെ ടി.കെ.ജറീഷ്, എം.സി. അഫ്നാസ് എന്നിവരെയാണ് തലശേരി പോലീസ് അറസ്റ്റ് ചെയ്തത്. ഇക്കഴിഞ്ഞ 16നായിരുന്നു കേസിനാസ്പദമായ സംഭവം. വടകര ചോളംവയൽ സ്വദേശി പ്രജേഷ് രത്തൻഷിയുടെ നിർത്തിയിട്ട ലോറിയിൽ നിന്നായിരുന്നു പണം കവർന്നത്. കാബിനിന്‍റെ വലതുവശത്തെ ഗ്ലാസ് തകർത്ത് ബർത്തിൽ സൂക്ഷിച്ച പണം കവരുകയായിരുന്നു. മുംബൈയിൽ കൊപ്ര വിറ്റ് കിട്ടിയ പണവുമായി വടകരയിലേക്ക് തിരിച്ചുവരികയായിരുന്ന ലോറി ബൈപാസിൽ നിർത്തിയിട്ട സമയത്തായിരുന്നു കവർച്ച. ഉടമയുടെ പരാതിയിൽ തലശേരി എസ്ഐ പി.വി. പ്രശോഭിന്‍റെ നേതൃത്വത്തിൽ നടത്തിയ അന്വേഷണത്തിൽ പണം സൂക്ഷിച്ച സ്ഥലം അറിയാവുന്നയാളാണ് കവർച്ചയ്ക്ക് പിന്നിലെന്ന് സംശയമുണ്ടായിരുന്നു. തുടർന്ന് നടത്തിയ അന്വേഷണത്തിലാണ് ലോറിയിലെ ക്ലീനറുടെ സഹായത്തോടെയാണ് കവർച്ച നടത്തിയതെന്ന് കണ്ടെത്തിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

വീട്ടിൽ നിന്ന് ബ്രൗൺഷുഗർ പിടികൂടി

കണ്ണൂർ: കക്കാട് ശാദുലിപ്പള്ളിയിൽ കണ്ണൂർ ടൗൺ പോലീസ് നടത്തിയ പരിശോധനയിൽ ബ്രൗൺഷുഗർ പിടികൂടി. സംഭവവുമായി ബന്ധപ്പെട്ട് ശാദുലിപ്പള്ളിയിലെ സി.പി. സാജിറിനെ (26) കണ്ണൂർ ടൗൺ എസ്ഐ വി.വി. ദീപ്തിയും സംഘവും അറസ്റ്റ് ചെയ്തു. ഇന്നലെ പുലർച്ചെ 1.45 ഓടെയാണ് ടൗൺ പോലീസ് പ്രതിയുടെ നാസ് കോട്ടേജിൽ റെയ്ഡ് നടത്തിയത്. ഇവിടെ നിന്നാണ് 0.23 ഗ്രാം ബ്രൗൺഷുഗർ പിടികൂടിയത്. പോലീസിനു ലഭിച്ച രഹസ്യവിവരത്തെ തുടർന്നായിരുന്നു റെയ്ഡ്.

അവധിക്കാല യോഗ ക്യാമ്പ്

പറശിനിക്കടവ്: കുട്ടികളുടെ മാനസിക ശാരീരിക സംരക്ഷണത്തിനും ആരോഗ്യത്തിനും വേണ്ടി എം.വി.ആർ ആയുർവേദ മെഡിക്കൽ കോളജ് പറശിനിക്കടവിലെ സ്വസ്ഥവൃത്ത ഡിപ്പാർട്ട്മെന്‍റ് അവധിക്കാല യോഗ ക്യാമ്പ് സംഘടിപ്പിക്കുന്നു. കുട്ടികൾക്ക് തീർത്തും അനുയോജ്യമായ രീതിയിലാണു പരിശീലനം സംഘടിപ്പിക്കുന്നത്. മൂന്നാം ക്ലാസ് മുതൽ പ്ലസ്‌ടു വരെയുള്ള വിദ്യാർഥികൾക്ക് പ്രസ്തുത ക്യാമ്പിൽ പങ്കെടുക്കാം. 29 മുതൽ മേയ്‌ ഏഴുവരെ രാവിലെ ഒന്പതുമുതൽ ഉച്ചയ്ക്ക് 12 വരെയാണു പരിശീലനം. ഫോൺ: 8086995286.

എടൂർ വെമ്പുഴയിൽ സംരക്ഷണഭിത്തി നിർമിക്കും

എടൂർ: മലയോര ഹൈവേ നവീകരണത്തിന്‍റെ ഭാഗമായി എടൂർ സെമിത്തേരിക്കു സമീപം വെമ്പുഴ തീരത്തെ അപകടാവസ്ഥ ഒഴിവാക്കാൻ സംരക്ഷണ ഭിത്തി നിർമിക്കാൻ തീരുമാനം. പുഴയുടെ നീരൊഴുക്ക് മാറ്റുന്നതിനു മണ്ണുമാന്തി യന്ത്രം ഉപയോഗിച്ചുള്ള പ്രവൃത്തി തുടങ്ങി. മലയോര ഹൈവേയുടെ വള്ളിത്തോട്-മണത്തണ റീച്ച് 25.3 കിലോമീറ്റർ റോഡ് 83.17 കോടി രൂപ ചെലവിൽ വീതി കുട്ടിയുള്ള നവീകരിക്കുകയാണ്. ഇതിന്‍റെ ഭാഗമായി വള്ളിത്തോട് മുതൽ എടൂർ വരെ ആദ്യഘട്ട ടാറിംഗ് നടത്തിയിരുന്നു. നേരത്തേ ഉണ്ടായിരുന്നു ആറുമീറ്റർ വീതിയിലെ ടാറിംഗ് ഒന്പത് മീറ്ററായി ഉയർത്തിയതോടെ എടൂർ-കരിക്കോട്ടക്കരി റോഡ് തുടങ്ങുന്നിടത്ത് 20 അടിയോളം താഴ്ച‌യായിരുന്നു. വെമ്പുഴയുടെ തീരം വരെ ടാറിംഗ് വന്നതോടെ വാഹനങ്ങൾ അപകടത്തിൽപ്പെടാനുള്ള സാധ്യത വർധിച്ചു. പ്രശ്‌നം അധികൃതരുടെ ശ്രദ്ധയിൽപെടുത്തിയതോടെയാണ് ആറുമീറ്റർ ഉയരത്തിൽ 30 മീറ്റർ ദൂരത്തിലായി സംരക്ഷണ ഭിത്തി പണിയുന്നത്. ഇതിനായി 20 ലക്ഷത്തിലധികം രൂപ ചെലവ് വരും. സംരക്ഷണ ഭിത്തി നിർമിച്ച ശേഷം ഉണ്ടാകുന്ന വെള്ളക്കെട്ട് അടക്കം ക്രമീകരിക്കുമെന്ന് കെആർ എഫ്ബി അസി. എക്‌സിക്യുട്ടീവ് എൻജിനിയർ പി. സജിത്ത് അറിയിച്ചു. മലയോര ഹൈവേയിൽ റോഡ് നവീകരണവും ടാറിംഗും മേയ് 30 നകം പൂർത്തിയാക്കുകയാണ് ലക്ഷ്യം.

പാലത്തുംകടവിൽ കാട്ടാന കൃഷി നശിപ്പിച്ചു

ഇരിട്ടി: അയ്യൻകുന്ന് പഞ്ചായത്തിൽ തൂക്ക് വേലിയുടെ നിർമാണത്തിനിടെ കൃഷിയിടത്തിൽ എത്തി കാട്ടാനയുടെ പരാക്രമം. കർണാടക ബ്രഹ്മഗിരി വന്യജീവി സങ്കേത്തതിൽ നിന്നും ബാരാപോൾ പുഴ കടന്ന് എത്തിയ ആറ് ആനകളാണ് പാലത്തുംകടവ് മീൻകുണ്ട് മേഖലയിൽ കാർഷിക വിളകൾ നശിപ്പിച്ചത്. 20 തെങ്ങുകളും നിരവധി വാഴയും കശുമാവും ആനക്കൂട്ടം പിഴുതെറിഞ്ഞു. പ്രദേശത്തെ ഷിജി കോട്ടായി, രാജേഷ് ഇലവുങ്കൽ, ജിൽസൺ പുതുപ്പറമ്പിൽ, തമ്പി പോളക്കൽ എന്നിവരുടെ വിളകളാണ് നശിപ്പിച്ചത്. പുലർച്ചെയോടെ ആനക്കൂട്ടം കർണാടക വനത്തിലേക്ക് തിരിച്ചു കയറി. കാട്ടാനകളെ പ്രതിരോധിക്കാൻ വളവുപാറ മുതൽ പാലത്തുംകടവ് വരെ പുഴയോരങ്ങളിൽ സോളാർ തൂക്കുവേലി നിർമിച്ചിരുന്നു. പകരം ബാരാപോൾ പാലത്തും കടവ് മേഖലകളിലാണ് ഇപ്പോൾ ആന ശല്യം കൂടിയിരിക്കുന്നത്. കൊട്ടിയൂർ വന്യജീവി സങ്കേതത്തിൽ നിന്നുള്ള ആനകളെ പ്രതിരോധിക്കാൻ എട്ടു കിലോമീറ്ററോളം സോളർ വേലിയുടെ നിർമാണം അവസാനഘട്ടത്തിലാണ്. കർണാടക വനത്തിൽ നിന്നുള്ള ആനകളെ പ്രതിരോധിക്കാൻ ബാരാപോൾ മുതൽ പാലത്തുംകടവ് വരെയുള്ള ഒന്നര കിലോമീറ്റൽ വേലിയുടെ നിർമാണം ഉടൻ ആരംഭിക്കണമെന്നാണ് പഞ്ചായത്തംഗം ബിജോയി പ്ലാത്തോട്ടം പറഞ്ഞു.

മട്ടന്നൂരിൽ കഞ്ചാവ് ചെടി കണ്ടെത്തി

മട്ടന്നൂർ: മട്ടന്നൂർ നഗരത്തിൽ എക്സൈസ് കഞ്ചാവ് ചെടി കണ്ടെത്തി. മട്ടന്നൂർ-തലശേരി റോഡരികിൽ കാനറാ ബാങ്ക് എടിഎമ്മിന് സമീപമാണ് കഞ്ചാവ് ചെടി കണ്ടെത്തിയത്. ഓപ്പറേഷൻ ക്ലീൻ സ്റ്റേറ്റ് സ്പെഷൽ ഡ്രൈവിന്‍റെ ഭാഗമായി മട്ടന്നൂർ റേഞ്ച് എക്സൈസ് ഇൻസ്പെക്ടർ ലോതർ എൽ. പെരേരയുടെ നേതൃത്വത്തിൽ നടത്തിയ പരിശോധനയിലാണ് ചെടി കണ്ടെത്തിയത്. ചെടി വടകര എൻഡിപിഎസ് പ്രത്യേക കോടതിയിൽ ഹാജരാക്കും. പ്രതിയെ കുറിച്ച് അന്വേഷണം നടത്തിവരികയാണെന്ന് എക്സൈസ് അറിയിച്ചു. അസിസ്റ്റന്‍റ് എക്സൈസ് ഇൻസ്‌പെക്ടർ (ഗ്രേഡ്), കെ. ഉത്തമൻ, പ്രിവന്‍റീവ് ഓഫീസർ സി.പി. ഷാജി, അസിസ്റ്റന്‍റ് എക്സൈസ് ഇൻസ്‌പെക്ടർ ഗ്രേഡ് കെ.കെ. സാജൻ, സിവിൽ എക്സൈസ് ഓഫീസർമാരായ റിനീഷ് ഓർക്കാട്ടേരി, സി.വി. റിജുൻ എന്നിവരും പരിശോധനയിൽ ഉണ്ടായിരുന്നു.

കാഞ്ഞിരോട്-പഴശി 33 കെവി ലൈൻ നവീകരണ പ്രവൃത്തി അന്തിമഘട്ടത്തിൽ

മട്ടന്നൂർ: കാഞ്ഞിരോട്-പഴശി 33 കെവി ലൈനിന്‍റെ നവീകരണ പ്രവൃത്തി അന്തിമഘട്ടത്തിലെത്തി. കാഞ്ഞിരോട് മുതൽ പെരിഞ്ചേരി വരെയുള്ള മുക്കാൽ ഭാഗത്തെ പ്രവൃത്തി പൂർത്തിയായിക്കഴിഞ്ഞു. പഴശി സബ്‌ സ്റ്റേഷനിൽ നിന്ന് മട്ടന്നൂരിലേക്ക് ഒരു 33 കെവി ലൈൻ മാത്രമാണ് ഉണ്ടായിരുന്നത്. ഈ ലൈനിൽ തകരാർ സംഭവിച്ചാലും അറ്റകുറ്റപ്പണി നടത്തുമ്പോഴും പ്രദേശവാസികൾ ബുദ്ധിമുട്ടിലാകും. മഴക്കാലത്ത് തകരാർ സംഭവിക്കുന്നത് പതിവായിരുന്നു. കാഞ്ഞിരോട്-പഴശി ലൈൻ നവീകരണം പൂർത്തിയാകുന്നതോടെ പ്രശ്‌നത്തിൽ പരിഹാരമാകും. ആർഡിഡിഎസ് പദ്ധതിയിൽ ഉൾപ്പെടുത്തി 15 കോടി രൂപ ചെലവഴിച്ചാണ് ലൈനിന്‍റെ നവീകരണം നടത്തുന്നത്. പുതുതായി സ്ഥാപിക്കുന്ന ഐടി, സയൻസ് പാർക്കിലേക്കുള്ള വൈദ്യുതി വിതരണവും ഇതുവഴിയായിരിക്കും. കെഎസ്ഇബി അസി. എക്‌സിക്യുട്ടീവ് എൻജിനിയർ ബിജു മോഹൻ, അസി. എൻജിനിയർ വിനോദ്കുമാർ എന്നിവരാണ് പ്രവൃത്തിയുടെ മേൽനോട്ടം വഹിക്കുന്നത്. വൈദ്യുത വിതരണം അപകട രഹിതമാക്കുന്നതിന് ഇൻസുലേറ്റഡ് കേബിളുകളും 14 മീറ്റർ എ പോളുകളും ലാറ്റിസ് പോളുകളുമാണ് ഉപയോഗിച്ചിട്ടുള്ളത്. കൂടുതൽ ഉയർത്തി ലൈൻ സ്ഥാപിക്കുന്നതും അപകടങ്ങൾ ഒഴിവാക്കാൻ സഹായകമാണ്. മേയ് മാസത്തിനകം ലൈനിന്‍റെ പ്രവൃത്തി പൂർത്തീകരിക്കാനാണ് ലക്ഷ്യമിടുന്നതെന്ന് കെഎസ്ഇബി കാഞ്ഞിരോട് ട്രാൻസ്മിഷൻ ഡിവിഷൻ എക്‌സിക്യുട്ടീവ് എൻജിനിയർ ബാബു പ്രജിത്ത് അറിയിച്ചു.

റൂഡ്‌സെറ്റ് ഇന്‍സ്റ്റിറ്റ്യൂട്ടിന് മികച്ച നേട്ടം

കണ്ണൂർ: 2024- 25 വര്‍ഷ കാലയളവില്‍ റൂഡ്‌സെറ്റിന്നു സമസ്ത മേഖലയിലും മികച്ച നേട്ടം കൈവരിക്കാനായെന്ന് ജില്ലാതല ആര്‍സെറ്റി ഉപദേശക സമിതി ത്രൈമാസ അവലോകന യോഗം വിലയിരുത്തി. അടുത്ത സാമ്പത്തിക വര്‍ഷം ബൃഹത്തായ പരിശീലന-കര്‍മ പരിപാടികള്‍ നൈപുണ്യ മേഖലയില്‍ നടപ്പിലാക്കാനും തീരുമാനിച്ചു. തളിപ്പറമ്പ് റവന്യൂ ഡവലപ്മെന്‍റ് ഓഫീസര്‍ ടി.വി. രഞ്ജിത് അധ്യക്ഷത വഹിച്ചു. ഉപദേശകസമിതി വൈസ് ചെയര്‍മാനും കാനറാ ബാങ്ക് കണ്ണൂര്‍ മേഖലാ മേധാവിയുമായ അന്‍ഷുമാന്‍ ഡേ റൂഡ്സെറ്റിയില്‍ നിന്നുള്ള സംരംഭകര്‍ക്കായി വായ്പാ സൗകര്യം ഒരുക്കുമെന്ന് അറിയിച്ചു. ഡയറക്ടര്‍ സി.വി. ജയചന്ദ്രന്‍, ജില്ലാ വ്യവസായ കേന്ദ്രം മാനേജര്‍ രഞ്ജു മണി, സംസ്ഥാന ചെറുകിട വ്യവസായ അസോസിയേഷന്‍ സ്റ്റേറ്റ് ജനറല്‍ സെക്രട്ടറി ജോസഫ് പൈക്കട, ദേശീയ നൈപുണ്യ ഇന്‍സ്റ്റിറ്റൂട്ട് കോഴിക്കോട് ട്രെയിനിംഗ് ഓഫീസര്‍ ബി.കെ. ബിജോയ്, തുടങ്ങിയവർ പങ്കെടുത്തു.

കുന്നോത്ത് വിശുദ്ധ യൂദാശ്ലീഹയുടെ തീർഥാടന കേന്ദ്രത്തിൽ തിരുനാളിന് തുടക്കം

ഇരിട്ടി: സെന്‍റ് ജൂഡ് നഗർ വിശുദ്ധ യൂദാശ്ലീഹായുടെ തിരുനാളിന് തുടക്കമായി. കുന്നോത്ത് ഫൊറോന വികാരി ഫാ. സെബാസ്റ്റ്യൻ മുക്കിലിക്കാട്ട് കൊടിയേറ്റി. തുടർന്ന് നടന്ന ദിവ്യബലിക്ക് ഫാ. തോമസ് പാണാക്കുഴിയിൽ കാർമികത്വം വഹിച്ചു. ഇന്നു മുതൽ മേയ് നാലുവരെ രാവിലെ 8.30നും വൈകുന്നേരം ആറിനും നടക്കുന്ന ദിവ്യബലിക്കും നെവേനക്കും ഫാ. സിജോ കണ്ണംപുഴ, ഫാ. ജോസഫ് പുതുശേരി, ഫാ. കുര്യാക്കോസ് കോലകുന്നേൽ, ഫാ. ബെന്നി നിരപ്പേൽ, ഫാ. ഐസ്ക് മറ്റത്തിൽ, ഫാ. ആന്‍റണി ആനകല്ലിൽ, ഫാ. ജോർജ് അച്ചാണ്ടിയിൽ, ഫാ. ടോജി ചേലംപറമ്പത്ത്, ഫാ. ജോൺ പോൾ പൂവത്താനിക്കൽ, കണ്ണൂർ രൂപത സഹായമെത്രാൻ ഡോ. ഡെന്നീസ് കുറുപ്പശേരി, ഫാ. ജോസഫ് തേനമാക്കൽ, ആർച്ച് ബിഷപ്പ് എമരിറ്റസ് മാർ ജോർജ് ഞറളകാട്ട്, ഫാ. തേജസ് ഐഎംഎസ്, ഫാ. തോമസ് വടക്കേമുറി, ഫാ. ജോസ് തേൻപള്ളി, ആർച്ച് ബിഷപ്പ് മാർ ജോസഫ് പാംപ്ലാനി എന്നിവർ കാർമികത്വം വഹിക്കും. മൂന്നിന് രാത്രി 7.30ന് എയ്ഞ്ചൽ വോയ്സിന്‍റെ ഗാനമേള. പെരുന്നാൾ സമാപന ദിവസമായ നാലിന് വൈകുന്നേരം ദിവ്യബലിക്ക് ശേഷം പ്രദക്ഷിണം, സമാപന ആശിർവാദം.

കാർ നിയന്ത്രണംവിട്ട് മതിലിൽ ഇടിച്ച് അപകടം; രണ്ടുപേർക്ക് പരിക്ക്

മട്ടന്നൂർ: കണ്ണൂർ വിമാനത്താവള റോഡായ വായാന്തോട് കാർ നിയന്ത്രണം വിട്ട് മതിലിൽ ഇടിച്ച് അപകടം. കാർ യാത്രക്കാരായ രണ്ടുപേർക്ക് പരിക്കേറ്റു. ഇന്നലെ ഉച്ചയോടെയായിരുന്നു അപകടം. മട്ടന്നൂർ ഭാഗത്ത് നിന്ന് അഞ്ചരക്കണ്ടി ഭാഗത്തേക്ക് പോകുകയായിരുന്ന വാഗണർ കാറാണ് അപകടത്തിൽപ്പെട്ടത്. നിയന്ത്രണം വിട്ട കാർ റോഡരികിലെ ചെങ്കല്ല് മതിലിൽ ഇടിച്ച ശേഷം സമീപത്തെ ഓവുചാലിലേക്ക് വീഴുകയായിരുന്നു. അപകടത്തിൽ പരിക്കേറ്റ കാർ യാത്രക്കാർ ആശുപത്രിയിൽ ചികിത്സ തേടി. അപകടത്തിൽ കാർ ഭാഗികമായി തകർന്നു.

ആറളം കാർഷിക ഫാമിനെ സംരക്ഷിക്കണമെന്ന് ആവശ്യപ്പെട്ട് ഡിമാൻഡ് നോട്ടീസ് നൽകി

ഇരിട്ടി: ആറളം കാർഷിക ഫാമിനെ സംരക്ഷിക്കണമെന്ന് ആവശ്യപ്പെട്ട് ഡിമാൻഡ് നോട്ടീസ് നൽകി. ആറളം ഫാം ലേബർ യൂണിയൻ (എഐടിയുസി) ആണ് അടിയന്തരമായി വിവിധ ആവശ്യങ്ങൾ നടപ്പിലാക്കണമെന്ന് ആവശ്യപ്പെട്ട് കേരള മുഖ്യമന്ത്രിക്കും ആറളം ഫാം മാനേജിംഗ് ഡയറക്‌ടർക്കും നോട്ടീസ് നൽകിയത്. കാർഷിക ഫാമിനെ സംരക്ഷിക്കാൻ മുഖ്യമന്ത്രി അടിയന്തരമായി ഇടപെടണമെന്ന് മുഖ്യമന്ത്രിക്ക് നൽകിയ നിവേദനത്തിൽ പറയുന്നു. കാർഷിക ഫാമിനെ കൃഷിവകുപ്പിന് കൈമാറുക, 240 തൊഴിൽ ദിനങ്ങൾ പൂർത്തിയാക്കിയ തൊഴിലാളികളെ സ്ഥിരം തൊഴിലാളികൾ ആക്കുക, ആറളം പട്ടികവർഗ സങ്കേതത്തിലെ ഒരു കുടുംബത്തിൽ നിന്നും ഒരാൾക്കെങ്കിലും കാർഷിക ഫാമിൽ ജോലി നൽകുക, വിരമിച്ച തൊഴിലാളികൾക്കും ജീവനക്കാർക്കും നൽകാനുള്ള വിരമിക്കൽ ആനുകൂല്യങ്ങൾ ഉടൻ വിതരണം ചെയ്യുക, പ്ലാന്‍റേഷൻ തൊഴിലാളികളെ അഗ്രികൾച്ചർ തൊഴിലാളികളാക്കി മാറ്റാനുള്ള മുൻ ഉത്തരവ് നടപ്പാക്കുക, സംസ്ഥാന സർക്കാർ പ്രഖ്യാപിച്ച മിനിമം കൂലി വ്യവസ്ഥ ആറളം കാർഷിക ഫാമിലും നടപ്പാക്കുക തുടങ്ങിയ ആവശ്യങ്ങളാണ് ആറളം ഫാം മാനേജിംഗ് ഡയറക്‌ടർക്ക് നൽകിയ ഡിമാൻഡ് നോട്ടീസിൽ പറയുന്നത്. അല്ലാത്തപക്ഷം തൊഴിലാളികളെ സംഘടിപ്പിച്ച് പ്രക്ഷോഭത്തിനു നേതൃത്വം നൽകുമെന്നും നോട്ടീസിൽ പറയുന്നു. ആറളം ഫാമിംഗ് കോർപറേഷൻ മാനേജിംഗ് ഡയറക്‌ടർക്കുള്ള ഡിമാൻഡ് നോട്ടീസ് യൂണിയൻ ജനറൽ സെക്രട്ടറി കെ.ടി. ജോസ്, പ്രസിഡന്‍റ് വി. ഷാജി, ട്രഷറർ ടി.എം. മാത്യു, കെ.ബി. ഉത്തമൻ എന്നിവർ ഫാം മെയിൻ ഓഫീസിലെത്തി ഫാം അഡ്മിനിസ്ട്രേറ്റീവ് ഓഫീസർക്കു കൈമാറി. മുഖ്യമന്ത്രിക്കുള്ള നിവേദനം ഇമെയിൽ സന്ദേശത്തിലൂടെയും കൈമാറി.

രാമപുരത്ത് നിർത്തിയിട്ട ലോറിയിൽ ബൈക്കിടിച്ച് ഒരാൾക്കു പരിക്ക്

പഴയങ്ങാടി: പഴയങ്ങാടി-പിലാത്തറ കെഎസ്ടിപി റോഡിൽ ചെറുതാഴം രാമപുരത്ത് നിർത്തിയിട്ട ലോറിക്ക് പിറകിൽ ബൈക്കിടിച്ച് ബൈക്ക് യാത്രികന് പരിക്ക്. വാടിക്കൽ സ്വദേശി മുഹാദിനാണ് പരിക്കേറ്റത്. ഗുരുതരമായ പരിക്കേറ്റ ഇയാളെ കണ്ണൂർ ഗവ. മെഡിക്കൽ കോളജിൽ പ്രവേശിപ്പിച്ചു. ഇന്നലെ രാത്രി എട്ടോടെ രാമപുരം കൊത്തികുഴിച്ച പാറയിലായിരുന്നു അപകടം.

ഇടിമിന്നലിൽ വീടുകൾക്കു നാശം

ഇരിട്ടി: ആറളം പഞ്ചായത്തിൽ ഇടിമിന്നലിൽ വീടുകൾക്കു നാശം. ആറളം പഞ്ചായത്തിലെ വിയറ്റ്നാം പട്ടികവർഗ സങ്കേതത്തിലെ വീടുകൾക്കാണു കഴിഞ്ഞദിവസം രാത്രിയുണ്ടായ ഇടിമിന്നലിൽ നാശനഷ്‌ടം സംഭവിച്ചത്. വിയറ്റ്നാമിൽ താമസിക്കുന്ന വേലേരി ജാനു, പാലുമ്മി പുഷ്പ എന്നിവരുടെ വീടുകൾക്കാണു കനത്ത നാശം സംഭവിച്ചത്. ഇടിമിന്നലുണ്ടായ സമയത്ത് ജാനുവിന്‍റെ വീട്ടിൽ മകന്‍റെ ഭാര്യ ഷംനയും അവരുടെ ചെറിയ കുട്ടിയും മാത്രമായിരുന്നു ഉണ്ടായിരുന്നത്. ഇവർക്ക് ഇടിമിന്നലിൽ ഭയന്ന് ബോധക്ഷയം സംഭവിച്ചു. ഇടിമിന്നലിനുശേഷം അയൽപക്കത്തുള്ളവർ വന്നു നോക്കിയപ്പോഴാണ് ഇവരെ വീടിനുള്ളിൽ കണ്ടത്. ഇടിമിന്നലിൽ വീടിന്‍റെ ഭിത്തി ഉൾപ്പെടെ തകർന്ന നിലയിലാണ്. വീടിന്‍റെ വയറിംഗ് തകർന്നിട്ടുണ്ട്. നഷ്‌ടപരിഹാരത്തിനായി ആറളം വില്ലേജിൽ അപേക്ഷ നൽകി കാത്തിരിക്കുകയാണ് ഈ കുടുംബങ്ങൾ. പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഇ.സി. രാജു ഉൾപ്പെടെയുള്ള ജനപ്രതിനിധികൾ സംഭവസ്ഥലം സന്ദർശിച്ചു.

ബിഎസ്എൻഎൽ കേബിൾ മോഷണം അതിഥി തൊഴിലാളി പിടിയിൽ

ന്യൂമാഹി: പെരിങ്ങാടി മമ്മിമുക്കിൽ നിന്നും ബിഎസ്എൻഎൽ കേബിൾ മുറിച്ചു മാറ്റുന്നതിനിടെ അതിഥി തൊഴിലാളി പിടിയിൽ. പ്ലാസ്റ്റിക്ക് ബോട്ടിലുകൾ ശേഖരിക്കുന്ന ആസാം സ്വദേശി ബാബുവാണ് നാട്ടുകാരുടെ പിടിയിലാകുന്നത്. ഇയാൾ മോന്താലിലാണ് താമസിക്കുന്നത്. ന്യൂമാഹി പോലീസ് തൊണ്ടി മുതൽ സഹിതമാണ് പോലീസിനെ കസ്റ്റഡിയിലെടുത്തത്.

ചെറുപുഴയിൽ കാറ്റിന്‍റെ താണ്ഡവം; വ്യാപക നാശം

ചെറുപുഴ: ചെറുപുഴയെ ഭീതിയിലാഴ്ത്തി ടൗണിലും പരിസര പ്രദേശത്തും കാറ്റിന്‍റെ താണ്ഡവം. ഇന്നലെ ഉച്ചകഴിഞ്ഞ് മൂന്നോടെ ഉണ്ടായ കനത്ത കാറ്റിലും മഴയിലും മരങ്ങൾ കടപുഴകിയും കെട്ടിടങ്ങളും വൈദ്യുത ബന്ധങ്ങളും തകർന്ന് വലിയ നാശനഷ്ടമാണ് ഉണ്ടായത്. ചെറുപുഴ പഞ്ചായത്തിലെ പാണ്ടിക്കടവ്, ഭൂദാനം, ചെറുപുഴ, ഈസ്റ്റ് എളേരി പഞ്ചായത്തിലെ തവളക്കുണ്ട്, അരിയിരുത്തി, ആയന്നൂർ എന്നിവിടങ്ങളിലാണ് കാറ്റ് വ്യാപക നാശം വിതച്ചത്. ടൗണിലെ നിരവധി കടകളുടെ പരസ്യ ബോർഡുകളും മേൽക്കൂരയും കാറ്റിൽ പറന്നു. വൈദ്യുതി വിതരണം പൂർണമായും നിലച്ചു. നിരവധി വൈദ്യുത തൂണുകളാണ് നിലംപൊത്തിയത്. ചെറുപുഴ ലീഡർ ഹോസ്പിറ്റലിലേയ്ക്കുള്ള വഴിയിൽ വൈദ്യുതി കമ്പിയിൽ തെങ്ങ് വീണു. ചെറുപുഴ ഗാർഡൻസിന്‍റെ ടൗണിലുള്ള നഴ്സറിയുടെ മുകളിലുളള പോളിഹൗസ്, ഗ്രീൻ ഷെയ്ഡ് എന്നിവയുടെ മുകളിലേയ്ക്ക് തെങ്ങ്, കമുക് എന്നിവ കടപുഴകി വൻ നാശമുണ്ടായി. ചെറുപുഴ ബസ് സ്റ്റാൻഡിലെ ഹോട്ടൽ പാലസിന്‍റെ പലഹാരങ്ങൾ സൂക്ഷിച്ചിരുന്ന അലമാര കാറ്റിൽ മറിഞ്ഞു വീണു. കാര്യങ്കോട് പുഴയ്ക്ക് അക്കരെ തവളക്കുണ്ടിലെ ബിജു ലൂക്കോസിന്‍റെ മീൻ വളർത്തുന്ന കുളം കവുങ്ങ് വീണു തകർന്നു. നിരവധി തെങ്ങ്, കവുങ്ങ്, റബർ, ഫലവൃക്ഷങ്ങൾ എന്നിവ നശിച്ചു. ചെറുപുഴ-പുളിങ്ങോം റോഡിൽ മരം വീണ് ഗതാഗതം ഏറെ നേരം തടസപ്പെട്ടു. തവളക്കുണ്ടിലെ ബിജു ലൂക്കോസ്, ജോജി ജോസഫ്, പി.എം. വാസുദേവൻ, ജോർജ് തോട്ടുപ്പുറം, അനീഷ്, സോജൻ പുതിയിടത്ത്, ബേബി മുണ്ടയ്ക്കൽ തുടങ്ങിയവരുടെ റബർ, വാഴ, കവുങ്ങ്, തെങ്ങ്, മഹാഗണി, പ്ലാവ് തുടങ്ങിയ നശിച്ചു. പാണ്ടിക്കടവിലെ ജയേഷ് ജോസിന്‍റെ വാഴകൾ കാറ്റിൽ നശിച്ചു. പാണ്ടിക്കടവിലെ പലേരി രാഘവന്‍റെ വീടിന് മുകളിൽ മരം വീണ് ഭാഗികമായി തകർന്നു. ഇവിടെ വാടകയ്ക്ക് താമസിക്കുന്ന പൊന്നാരട്ട വിനയന്‍റെ കുടുംബം പരിക്കേൽക്കാതെ രക്ഷപ്പെട്ടു. എടക്കോം മഠംതട്ടിലും നാശനഷ്ടം എടക്കോം: മഠംതട്ട് മൈത്രി നഗറിലെ മൂലംതുരുത്തിയിൽ ഡെന്നീസിന്‍റെ കട്ടക്കളം പൂർണമായും കാറ്റിൽ തകർന്നു. മേൽക്കൂരയും ഷെഡും തകർന്ന് ഉപകരണങ്ങൾക്കും കേടുപാടുകൾ സംഭവിച്ചു. ഞാറക്കുളം ബേബി, സൗദാമിനി, സിദ്ദിഖ് തുടങ്ങിയവരുടെ വീടുകളുടെ മേൽക്കൂരയ്ക്കും നാശഷ്ടം സംഭവിച്ചു. നിരവധി കൃഷിയിടങ്ങളിലും നാശനഷ്ടം സംഭവിച്ചു. വൈദ്യുതി പോസ്റ്റുകളിലും തകർന്നിട്ടുണ്ട്.

ജനത്തിന് ഭീഷണിയായി നായനാർമലയിൽ പുതിയ ക്വാറി; കളക്ടർക്ക് പരാതി നൽകി

ചെമ്പന്തൊട്ടി: നായനാർ മലയിൽ കഴിഞ്ഞ ഒരു വർഷത്തോളമായി പ്രവർത്തനം നിരോധിച്ചിരിക്കുന്ന മൂളിയാൻ ക്രഷറിനും ക്വാറിക്കും സമീപം പുതുതായി മറ്റൊരു ക്വാറി ആരംഭിക്കാനുള്ള നീക്കം തടയണമെന്ന് ആവശ്യപ്പെട്ട് ജില്ലാ കളക്ടർ അരുൺ കെ. വിജയന് പരാതി നൽകി. സജീവ് ജോസഫ് എംഎൽഎ, ക്വാറി വിരുദ്ധ ജനകീയ സമരസമിതി മുഖ്യരക്ഷാധികാരി ഫാ. ആന്‍റണി മഞ്ഞളാംകുന്നേൽ, രക്ഷാധികാരി കെ.ജെ. ചാക്കോ കൊന്നയ്ക്കൽ, ചെയർമാൻ വർഗീസ് വയലാമണ്ണിൽ, കൺവീനർ കെ.എം. ഷംസീർ എന്നിവർ ഒപ്പിട്ട പരാതിയാണ് കളക്ടർക്ക് നേരിട്ട് കൈമാറിയത്. നിലവിലുള്ള ക്വാറിയിൽ പ്രവർത്തനം തുടരാനോ പുതുതായി മറ്റൊരു ക്വാറി തുടങ്ങാനോ ശ്രമിച്ചാൽ പ്രദേശവാസികളും സമരസമിതിയും ചേർന്ന് തടയാനാണ് തീരുമാനമെന്നും ഭാരവാഹികൾ അറിയിച്ചു.

പയ്യാവൂർ ദൈവകരുണയുടെ തീർഥാടന പള്ളിയിൽ തിരുനാൾ തുടങ്ങി

പയ്യാവൂർ: ദൈവകരുണയുടെ തീർഥാടന പള്ളിയിൽ 10 ദിവസത്തെ തിരുനാളാഘോഷങ്ങൾക്കും നവനാൾ പ്രാർഥനയ്ക്കും തുടക്കംകുറിച്ച് ഇടവക വികാരി ഫാ. ജോൺ വാഴകാട്ട് കൊടിയേറ്റി. ഇന്നു മുതൽ മേയ് മൂന്നുവരെ എല്ലാ ദിവസവും വൈകുന്നേരം നാലിന് കരുണക്കൊന്ത, വിശുദ്ധ കുർബാന, വചന സന്ദേശം, നൊവേന, ദിവ്യകാരു ണ്യ പ്രദക്ഷിണം എന്നിവയുണ്ടായിരിക്കും. ഫാ. മാത്യു ആനിക്കുഴിക്കാട്ടിൽ, ഫാ. ബിബിൻ അഞ്ചെമ്പിൽ, ഫാ. നോബിൾ ഓണംകുളം, ഫാ. അഗസ്റ്റിൻ ചെറുനിലം, ഫാ. വർഗീസ് കളപ്പുരയ്ക്കൽ, ഫാ. ജോസഫ് ചൊള്ളമ്പുഴ എന്നിവർ വിവിധ ദിവസങ്ങളിൽ തിരുക്കർമങ്ങൾക്ക് നേതൃത്വം നൽകും. മൂന്നിന് വൈകുന്നേരം 6.45ന് പയ്യാവൂർ ടൗണിലേക്ക് തിരുനാൾ പ്രദക്ഷിണം, ലദീഞ്ഞ്, സമാപനാശീർവാദം എന്നിവ നടക്കും. സമാപന ദിനമായ നാലിന് രാവിലെ ഏഴിന് വിശുദ്ധ കുർബാന. 8.30ന് ആഘോഷമായ തിരുനാൾ കുർബാന, വചനപ്രഘോഷണം എന്നിവയ്ക്ക് തലശേരി അതിരൂപതാ ചാൻസലർ ഫാ. ജോസഫ് മുട്ടത്ത്കുന്നേൽ മുഖ്യകാർമികത്വം വഹിക്കും. ലദീഞ്ഞ്, പ്രദക്ഷിണം, സമാപനാശീർവാദം എന്നിവയ്ക്ക് ശേഷം ഊട്ട് നേർച്ചയും ഉണ്ടായിരിക്കും.

ദന്പതി സംഗമം നടത്തി

ചെറുപുഴ: വനിതാ ശിശു വികസന വകുപ്പ്, ഐസിഡിഎസ് പയ്യന്നൂർ അഡീഷ്ണൽ പോഷൻ പക്വാദ 2025 നോടാനുബന്ധിച്ച് പെരിങ്ങോത്ത് ദമ്പതി സംഗമം സംഘടിപ്പിച്ചു. പെരിങ്ങോം പഞ്ചായത്തിലെ നവദമ്പതികൾ, ഗർഭിണികൾ, ചെറിയ കുട്ടികൾ ഉള്ള ദമ്പതിമാർ എന്നിവർ പങ്കെടുത്തു. ദമ്പതിമാർക്ക് ആദ്യത്തെ ആയിരം ദിവസത്തിന്‍റെ പ്രാധാന്യം, ഗർഭാവസ്ഥയിലെ പോഷകാഹാരം, മാനസികാരോഗ്യം എന്നിവയെക്കുറിച്ചുള്ള അവബോധം സൃഷ്‌ടിക്കുന്നതിന്‍റെ ഭാഗമായാണ് സംഗമം സംഘടിപ്പിച്ചത്. സംഗമം പഞ്ചായത്ത് സ്റ്റാൻഡിംഗ് കമ്മിറ്റി ചെയർപേഴ്സൺ ഫാത്തിമ ബീവി ഉദ്ഘാടനം ചെയ്തു. പഞ്ചായത്തംഗം ഷജീർ ഇക്ബാൽ അധ്യക്ഷത വഹിച്ചു. തുടർന്ന് ഒരു കുഞ്ഞിന്‍റെ ആദ്യത്തെ ആയിരം ദിവസത്തിന്‍റെ പ്രാധാന്യം എന്ന വിഷയത്തിൽ പെരിങ്ങോം താലൂക്ക് ആശുപത്രി ഹെൽത്ത്‌ ഇൻസ്‌പെക്ടർ ടി.എം. രാജീവൻ ക്ലാസെടുത്തു. ഗർഭാവസ്ഥയും പ്രസവവും എന്ന വിഷയത്തിൽ പെരിങ്ങോം താലൂക്ക് ആശുപത്രിയിലെ ഗൈനക്കോളജിസ്റ്റ് ഡോ. ഗ്രസിയ മരിയ പീറ്റർ ക്ലാസ് നയിച്ചു.

പോഷണ്‍ പക്വാഡ 2025: ജില്ലാതല പരിപാടി സമാപിച്ചു

കണ്ണൂർ: വനിതാ ശിശുവികസന വകുപ്പ് പോഷണ്‍ അഭിയാന്‍ പദ്ധതിയുടെ ഭാഗമായുള്ള പോഷണ്‍ പക്വാഡ 2025ന്‍റെ ജില്ലാതല സമാപന പരിപാടി സെന്‍ട്രല്‍ ബ്യൂറോ ഓഫ് കമ്യൂണിക്കേഷന്‍ അസിസ്റ്റന്‍റ് ഡയറക്ടര്‍ ബിജു കെ. മാത്യു ഉദ്ഘാടനം ചെയ്തു. ആര്‍സിഎച്ച് ജില്ലാ മെഡിക്കല്‍ ഓഫീസര്‍ ഡോ. അശ്വിന്‍ അധ്യക്ഷത വഹിച്ചു. ആദ്യ ആയിരം ദിനങ്ങളുടെ പ്രാധാന്യം, കുട്ടികളിലെ അമിത വണ്ണം, ഗുണഭോക്തൃ രജിസ്ട്രഷേന്‍, സുപോഷിത് ഗ്രാമപഞ്ചായത്ത് എന്നീ വിഷയങ്ങളെ ആസ്പദമാക്കി സെന്‍ട്രല്‍ ബ്യൂറോ ഓഫ് കമ്യൂണിക്കേഷന്‍റെ കലാകാരന്മാര്‍ നുക്കാദ് നാടകം അവതരിപ്പിച്ചു. തുടര്‍ന്ന് അങ്കണവാടി വര്‍ക്കര്‍മാരുടെ വിവിധ കലാപരിപാടികളും പോഷകാഹാര പ്രദര്‍ശന മേളയും നടന്നു. കണ്ണൂര്‍ ചന്ദ്രശേഖര്‍ ഓഡിറ്റോറിയത്തില്‍ നടന്ന പരിപാടിയില്‍ പ്രോഗ്രാം ഓഫീസര്‍ സി.എ. ബിന്ദു, സീനിയര്‍ സൂപ്രണ്ട് അമര്‍നാഥ് വി. ഭാസ്‌കര്‍, ശിശുവികസന പദ്ധതി ഓഫീസര്‍മാരായ കെ. ജയമിനി, എം. രജനി, പോഷണ്‍ അഭിയാന്‍ ജില്ലാ കോ-ഓർഡിനേറ്റർ സി.പി. അഭിജിത്ത് എന്നിവർ പ്രസംഗിച്ചു. അമ്മമാര്‍, ദമ്പതികള്‍, കൗമാരക്കാര്‍, അങ്കണവാടി പ്രവര്‍ത്തകര്‍ എന്നിവര്‍ പരിപാടിയില്‍ പങ്കെടുത്തു.

ജൽജീവൻ മിഷൻ: പൈപ്പിടാൻ കീറിയ റോഡുകളുടെ ശോച്യാവസ്ഥ പരിഹരിക്കണം

കണ്ണൂർ: ജൽജീവൻ മിഷൻ പദ്ധതിക്കായി പൈപ്പിടാൻ കീറിയ റോഡുകളുടെ ശോച്യാവസ്ഥ പരമാവധി വേഗത്തിൽ പരിഹരിക്കണമെന്ന് ജില്ലാ വികസനസമിതി യോഗം. ജൽജീവൻ മിഷൻ പദ്ധതി നടപ്പാക്കുന്നതിന് റോഡ് വെട്ടിപ്പൊളിച്ച് പൈപ്പ് ലൈനുകളും കേബിളുകളുംമറ്റും വലിച്ചതിനുശേഷം റോഡ് പൂർവസ്ഥിതിയിലാക്കാറില്ലെന്നും അനുമതി വാങ്ങിയല്ല പലപ്പോഴും പ്രവൃത്തി നടത്തുന്നതെന്നും യോഗത്തിൽ പരാതി ഉയർന്നു. ജില്ലാ കളക്‌ടർ അരുൺ കെ. വിജയന്‍റെ അധ്യക്ഷതയിൽ ചേർന്ന യോഗത്തിൽ സണ്ണി ജോസഫ് എംഎൽഎ, കണ്ണൂർ കോർപറേഷൻ മേയർ മുസ്‌ലിഹ് മഠത്തിൽ, ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ എന്നിവരാണ് വിഷയം ഉന്നയിച്ചത്. ജലവിഭവ വകുപ്പ് തുടർ നടപടികൾ സ്വീകരിക്കണമെന്ന് കളക്ടർ നിർദേശിച്ചു. നിർമാണ പ്രവർത്തനങ്ങളിൽ ജാഗ്രത കാണിക്കണമെന്നും ജനപ്രതിനിധികൾ, പഞ്ചായത്ത് പ്രസിഡന്‍റ് എന്നിവരെ ഉൾപ്പെടുത്തി മഴക്കാലത്തിനു മുമ്പ് മണ്ഡലം തിരിച്ച് അവലോകനം നടത്തണമെന്നും നിർദേശം നൽകി. കേരള നെൽവയൽ തണ്ണീർത്തട സംരക്ഷണ നിയമപ്രകാരം ഭൂമി തരം മാറ്റുന്നതിന് സമർപ്പിക്കപ്പെട്ട അപേക്ഷകൾ തീർപ്പാക്കുന്നതിന് താലൂക്ക് തലത്തിൽ അദാലത്ത് മാതൃകയിൽ സംവിധാനം ഒരുക്കണമെന്ന് മന്ത്രി കടന്നപ്പള്ളി രാമചന്ദ്രൻ കത്തിലൂടെ ആവശ്യപ്പെട്ടു. തൃപ്രങ്ങോട്ടൂർ, പാട്യം പഞ്ചായത്തുകളിൽ അനുവദിച്ച അംബേദ്കർ സെറ്റിൽമെന്‍റ് പദ്ധതി സംബന്ധിച്ച രൂപരേഖ തയാറാക്കുന്നതിൽ കാലതാമസം നേരിടുകയാണെന്ന് കെ.പി. മോഹനൻ എംഎൽഎ കത്തിലൂടെ പരാമർശിച്ചു. കൂത്തുപറമ്പ് നിയോജക മണ്ഡലത്തിലെ രണ്ടു നഗരസഭകളിലും അഞ്ചു പഞ്ചായത്തുകളിലുമായി ഉയർന്ന പ്രദേശങ്ങളിലെല്ലാം രൂക്ഷമായ കുടിവെള്ള ക്ഷാമം നേരിടുകയാണ്. കുടിവെള്ള വിതരണം കാര്യക്ഷമമാക്കാൻ ജില്ലാ ഭരണകൂടം നടപടി സ്വീകരിക്കണമെന്നും എംഎൽഎ നിർദ്ദേശിച്ചു. റീസർവേ ഓഫീസ് മാറ്റിയ നടപടി പിൻവലിക്കണം: സണ്ണി ജോസഫ് ശ്രീകണ്ഠപുരത്ത് പ്രവർത്തിച്ചിരുന്ന റവന്യൂ വകുപ്പിന്‍റെ റീസർവേ ഓഫീസ് മട്ടന്നൂർ റവന്യൂ ടവറിലേക്ക് മാറ്റിയ നടപടി പിൻവലിക്കണമെന്ന് സണ്ണി ജോസഫ് എംഎൽഎ ആവശ്യപ്പെട്ടു. സ്‌കൂൾ ബസുകൾക്ക് രണ്ടുവർഷം മുമ്പ് ഫണ്ട് അനുവദിച്ചിട്ടും ഇതുവരെ ലഭ്യമായിട്ടില്ലെന്നും എംഎൽഎ പറഞ്ഞു. എന്നാൽ, ഈ അധ്യയന വർഷത്തിനു മുമ്പ് ഫണ്ട് ലഭ്യമാക്കാൻ നടപടി സ്വീകരിക്കുമെന്ന് പൊതുവിദ്യാഭ്യാസ വകുപ്പ് അറിയിച്ചു. കാലവർഷക്കെടുതി മൂലം നഷ്ടം സംഭവിച്ച വിളകൾക്ക് നഷ്‌ടപരിഹാരത്തുക ഇതുവരെ ലഭ്യമായിട്ടില്ലെന്ന് കർഷകരിൽ നിന്നും പരാതി ലഭിക്കുന്നുണ്ടെന്ന് എംഎൽഎ ചൂണ്ടിക്കാട്ടി. അടുത്ത മഴക്കാലത്തിനു മുമ്പ് അടിയന്തരമായി നടപടി സ്വീകരിക്കണമെന്നും എംഎൽഎ നിർദേശിച്ചു. ദേശീയപാത വികസന പ്രവർത്തനങ്ങളുമായി ബന്ധപ്പെട്ട് കുപ്പം പുഴയിൽ പാലം നിർമിക്കുന്നതിനായി മണ്ണിട്ട് നികത്തിൻ ഫലമായി ഉണ്ടായ വെള്ളപ്പൊക്കത്തിൽ വിളനാശം ഉണ്ടായ കർഷകർക്ക് നഷ്ടപരിഹാരം നൽകുന്നതിനുള്ള പ്രൊപ്പോസൽ ഹെഡ് ഓഫീസിലേക്ക് അനുമതിക്കായി അയച്ചിട്ടുണ്ടെന്ന് എൻഎച്ച്എഐ പ്രതിനിധി റിപ്പോർട്ട് ചെയ്തു. കണ്ണൂർ സിവിൽ സ്റ്റേഷൻ കോമ്പൗണ്ടിൽ പൊതുജനങ്ങൾക്ക് പൊതു ടോയ്‌ലറ്റ് സൗകര്യത്തിനായി കെട്ടിട നിർമാണ വിഭാഗം എക്സിക്യൂട്ടീവ് എൻജിനിയറിംഗ് നിർവഹണ ഉദ്യോഗസ്ഥനായി ചുമതലപ്പെടുത്തിയതായി പൊതുമരാമത്ത് കെട്ടിട വിഭാഗം എൻജിനിയർ പറഞ്ഞു. പുതിയ റേറ്റ് റിവിഷൻ നടത്തുന്നതുമായി ബന്ധപ്പെട്ട പ്രൈസ് സോഫറ്റ്‌വെയർ സാങ്കേതിക ക്രമീകരണം നടക്കുന്നതിനാൽ ടെൻഡർ അംഗീകരിക്കാൻ സാധിച്ചിട്ടില്ലെന്നും നടപടികൾ അംഗീകരിച്ച 20 ദിവസത്തിനുള്ളിൽ പ്രവൃത്തിയുടെ കരാർ നടപ്പാക്കാൻ സാധിക്കുമെന്നും എൻജിനിയർ അറിയിച്ചു. കളക്‌ടറേറ്റ് ഓഡിറ്റോറിയത്തിൽ ചേർന്ന ജില്ലാ വികസന സമിതി യോഗത്തിൽ ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, വകുപ്പ് മേധാവികൾ തുടങ്ങിയവർ പങ്കെടുത്തു.

റീ സർവേ സൂപ്രണ്ട് ഓഫീസ് മാറ്റരുത്; കളക്ടറെ കണ്ട് സർവകക്ഷി സംഘം

ശ്രീകണ്ഠപുരം: ശ്രീകണ്ഠപുരത്ത് പ്രവർത്തിച്ചുവരുന്ന റീ സർവേ സൂപ്രണ്ട് ഓഫീസ് മട്ടന്നൂരിലേക്ക് മാറ്റാനുള്ള നടപടി പിൻവലിക്കണമെന്ന് ആവശ്യപ്പെട്ട് സജീവ് ജോസഫ് എംഎൽഎ, നഗരസഭ അധ്യക്ഷ ഡോ. കെ.വി. ഫിലോമിന എന്നിവരുടെ നേതൃത്തിൽ സർവകക്ഷി നേതാക്കൾ ജില്ലാ കളക്ടർ അരുൺ കെ. വിജയന് നിവദനം നൽകി. പൊതുജനങ്ങളുമായി ബന്ധമില്ലാത്തതിനാലാണ് മട്ടന്നൂരിലേക്ക് മാറ്റുന്നതെന്ന് കളക്ടർ അറിയിച്ചു. മന്ത്രിസഭ തലത്തിൽ ഇടപെടൽ നടത്തി അതിൽ തീരുമാനം ഉണ്ടായാൽ ഇവിടെ തന്നെ തുടരുന്നതിനുള്ള നടപടികൾ സ്വീകരിക്കുമന്നും കളക്ടർ നിവേദക സംഘത്തെ അറിയിച്ചു. നേതാക്കളായ ഇ.വി. രാമകൃഷ്ണൻ, എൻ.പി. സിദ്ദിഖ്, വി.സി. രാമചന്ദ്രൻ, ടി. കെ. വത്സൻ, വർഗീസ് വയലാമണ്ണിൽ, കെ. സലാവുദ്ധീൻ, കെ. ശശിധരൻ, എം.വി. ജഗത്, ശ്രീകണ്ഠപുരം വ്യാപാരി വ്യവസായ ഏകോപന സമിതി ട്രഷറർ കെ. മുരളീധരൻ, പവിത്രൻ തുടങ്ങിയവർ പങ്കെടുത്തു. തീരുമാനം പുനഃപരിശോധിക്കണമെന്ന് ആവശ്യപ്പെട്ട് തിരുവനന്തപുരത്ത് പോയി റവന്യൂ മന്ത്രിയെ നേരിട്ടു കണ്ട് നിവേദനം നൽകാൻ സർവകക്ഷിയോഗം തീരുമാനിച്ചു.

നിർത്തിയിട്ട ലോറിയിൽ ബൈക്കിടിച്ച് ഒരാൾക്കു പരിക്ക്

പഴയങ്ങാടി: പഴയങ്ങാടി-പിലാത്തറ കെഎസ്ടിപി റോഡിൽ ചെറുതാഴം രാമപുരത്ത് നിർത്തിയിട്ട ലോറിക്ക് പിറകിൽ ബൈക്കിടിച്ച് ബൈക്ക് യാത്രികന് പരിക്ക്. വാടിക്കൽ സ്വദേശി മുഹാദിനാണ് പരിക്കേറ്റത്. ഗുരുതരമായ പരിക്കേറ്റ ഇയാളെ കണ്ണൂർ ഗവ. മെഡിക്കൽ കോളജിൽ പ്രവേശിപ്പിച്ചു. ഇന്നലെ രാത്രി എട്ടോടെ രാമപുരം കൊത്തികുഴിച്ച പാറയിലായിരുന്നു അപകടം.

കരുവഞ്ചാൽ പുഴ കൈയേറ്റം; പന്ത് ഇനി താലൂക്ക് സർവേയറുടെ കൈയിൽ

ആലക്കോട്: കരുവഞ്ചാൽ ടൗണിലും പരിസരങ്ങളിലും പുഴ കൈയറ്റം കണ്ടെത്താൻ താലൂക്ക് സർവേയറുടെ സേവനം ആവശ്യമുണ്ടെന്ന് കാണിച്ച് വെള്ളാട് വില്ലേജ് ഓഫീസർ തഹസിൽദാർക്ക് റിപ്പോർട്ട് നല്കി. കരുവഞ്ചാലിലെ പുഴ കൈയേറ്റത്തിനെതിരേ നടപടികൾ സ്വീകരിക്കണമെന്നാവശ്യപ്പെട്ട് നാഷണൽ ഹ്യൂമെൻറൈറ്റ്സ് എൻവയോൺമെന്‍റ് മിഷൻ ആലക്കോട് മേഖലാ സെക്രട്ടറി ജെയ്‌സൺ ഡൊമിനിക്കിന്‍റെ നേതൃത്വത്തിൽ പരാതി നൽകിയിരുന്നു. ഇതേക്കുറിച്ചുള്ള അന്വേഷണ റിപ്പോർട്ടിലാണ് താലൂക്ക് സർവേയറുടെ സേവനം ആവശ്യപ്പെട്ടിട്ടുള്ളത്. കരുവഞ്ചാൽ ഭാഗത്ത് പുഴയ്ക്ക് റീസർവേ സബ് ഡിവിഷൻ ഇല്ലാത്തതിനാൽ പുഴ കൈയേറ്റം സ്ഥിരീകരിക്കാൻ സാധിക്കുന്നില്ലെന്നും ഈ സാഹചര്യത്തിൽ കൈയേറ്റം കണ്ടെത്തുന്നതിനും തുടർ നടപടികൾ സ്വീകരിക്കുന്നതിനും താലൂക്ക് സർവേയറുടെ സേവനം ആവശ്യമായി വന്നിരിക്കുകയാണെന്നും റിപ്പോർട്ടിലുണ്ട്.

ലഹരിക്കെതിരേ പൊതുസമൂഹം ഉണരണം: കെ.വി. സുമേഷ് എംഎല്‍എ

പയ്യാവൂർ: കേരള പോലീസ് ഓഫീസേഴ്സ് അസോസിയേഷന്‍ കണ്ണൂര്‍ റൂറല്‍ ജില്ലാ സമ്മേളനത്തി ന്‍റെ ഭാഗമായുള്ള പ്രതിനിധി സമ്മേളനം പയ്യാവൂരിൽ കെ.വി. സുമേഷ് എംഎല്‍എ ഉദ്ഘാടനം ചെയ്തു. ലഹരി വിപത്തിനെതിരെയുള്ള മഹായജ്ഞത്തിന് നാടിന്‍റെയാകെ പിന്തുണയും പങ്കാളിത്തവും ആവശ്യമാണെന്ന് എംഎല്‍എ പറഞ്ഞു. എൻ.വി. രമേശൻ അധ്യക്ഷത വഹിച്ചു. ജില്ലാ പോലീസ് മേധാവി അനൂജ് പാലിവാള്‍ മുഖ്യാതിഥിയായിരുന്നു. പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ, ഡിവൈഎസ്പിമാരായ ധനജ്ഞയബാബു, കെ.വി. പ്രമോദൻ, കെ.വി. ശിവദാസൻ, നേതാക്കളായ ആർ. പ്രശാന്ത്, പി.പി. മഹേഷ്കുമാർ, പി.രമേശൻ, പി.വി. രാജേഷ്, കെ. പ്രവീണ, കെ.പി. അനീഷ് തുടങ്ങിയവർ പ്രസംഗിച്ചു.

മദ്യലഹരിയിൽ കാറോടിച്ച് പോലീസ് സ്റ്റേഷനിലേക്ക്; കേസെടുത്ത് പോലീസ്

ആലക്കോട്: മദ്യലഹരിയിൽ കാറോടിച്ച് ആലക്കോട് പോലീസ് സ്റ്റേഷനിലേക്ക് വന്നയാൾക്കെതിരേ കേസെടുത്തു. തടിക്കടവ് സ്വദേശി ജിജിക്കെതിരേയാണ് ആലക്കോട് എസ്എച്ചഒ മഹേഷ് കെ. നായർ കേസെടുത്തത്. കഴിഞ്ഞ ദിവസമാണ് സംഭവം. പരാതിയുമായി ബന്ധപ്പെട്ട് സ്റ്റേഷനിലേക്ക് വന്നതായിരുന്നു ജിജി. അപകടകരമായ വിധത്തിൽ പോലീസ് സ്റ്റേഷൻ കോമ്പൗണ്ടിലേക്ക് കാറോടിച്ച് കയറ്റിയത് ശ്രദ്ധയിൽപ്പെട്ടതിനെത്തുടർന്ന് എസ്എച്ച് ആൽക്കോ മീറ്റർ ഉപയോഗിച്ച് നടത്തിയ പരിശോധനയിലാണ് ഇയാൾ മദ്യലഹരിയിലാണ് വാഹനമോടിച്ചതെന്ന് മനസിലായത്. തുടർന്ന് ജിജിയുടെ കാർ കസ്റ്റഡിയിലെടുക്കുകയും ചെയ്തു.

പരീക്ഷാ നടത്തിപ്പിലെ പിഴവ് പ്രതിഷേധാർഹം: എഐഎസ്എഫ്

കണ്ണൂർ: കണ്ണൂർ സർവകലാശാലയിൽ പരീക്ഷയ്ക്ക് വിദ്യാർഥികൾ തയാറായി വന്നശേഷം ചോദ്യപേപ്പറില്ലാത്തതിനാൽ പരീക്ഷ മാറ്റിവച്ചത് പരീക്ഷാ നടത്തിപ്പിലെ ഗുരുതര പിഴവാണെന്നും ഒരിക്കലും അംഗീകരിക്കാൻ കഴിയാത്ത അലംഭാവമാണ് സർവകലാശാലയുടെ ഭാഗത്തു നിന്നുണ്ടായതെന്നും എഐഎസ്എഫ്. സർവകലാശാലയുടെ ഭാഗത്തു നിന്നുണ്ടായത് വിദ്യാർഥി വിരുദ്ധ നിലപാടാണ്. ഇത്തരം സംഭവങ്ങൾ വിദ്യാർഥികളുടെ പഠനത്തെ ബാധിക്കുകയും സർവകലശാലയുടെ വിശ്വസം നഷ്ടപ്പെടുത്തുന്നതുമാണ്. വീഴ്ചകൾ ഗൗരവമായി പരിശോധിച്ച് പരീക്ഷാ നടത്തിപ്പ് കൂടുതൽ സുതാര്യമാക്കണമെന്ന് എഐഎസ്എഫ് ജില്ലാ പ്രസിഡന്‍റ് എ. പ്രണോയും സെക്രട്ടറി സി. ജസ്വന്തും പ്രസ്താവനയിൽ ആവശ്യപ്പെട്ടു.

വയോധികയുടെ മൃതദേഹം കുളിമുറിയിൽ കത്തിക്കരിഞ്ഞ നിലയിൽ

മട്ടന്നൂർ: വീട്ടിൽ തനിച്ച് താമസിക്കുന്ന വയോധികയുടെ മൃതദേഹം കുളിമുറിയിൽ കത്തിക്കരിഞ്ഞ നിലയിൽ കണ്ടെത്തി. മട്ടന്നൂർ മഞ്ചേരിപ്പൊയിൽ കുഴിക്കലിലെ പുഷ്പാലയത്തിൽ പി.എം. പുഷ്പാവതി അമ്മ (87) യാണ് മരിച്ചത്. ‌വീടിനു മുന്നിലായി നിർമിച്ച കുളിമുറിയിൽ പൂർണമായും കത്തിക്കരിഞ്ഞ നിലയിലുള്ള മൃതദേഹം ഇന്നലെ രാവിലെയാണ് സമീപവാസികളുടെ ശ്രദ്ധയിൽപ്പെടുന്നത്. വയോധിക പുലർച്ചെ അഞ്ചിന് എഴുന്നേറ്റു കുളിക്കുന്നത് പതിവായിരുന്നുവെന്ന് പറയുന്നു. കുളിമുറിയിൽ തന്നെയുള്ള അടുപ്പിൽ നിന്നാണ് വെള്ളം ചൂടാക്കിയിരുന്നത്. വെള്ളം ചൂടാക്കുമ്പോൾ തീ പിടിച്ചതാണോ ആത്മഹത്യയാണോ എന്നത് സംബന്ധിച്ച് പോലീസ് അന്വേഷിച്ചുവരികയാണ്. സംഭവമറിഞ്ഞ് മട്ടന്നൂർ എസ്എച്ച്ഒ എം. അനിലിന്‍റെ നേതൃത്വത്തിലുള്ള പോലീസ് സംഘം സംഭവ സ്ഥലത്തെത്തി പരിശോധന നടത്തി. ഭർത്താവ്: പരേതനായ അച്യുതൻ അടിയോടി. മക്കൾ: മാലതി, മായജ, ശ്രീജ, ഗിരിജ, ഗീത. മരുമക്കൾ: പി.കെ. വാസു, ഹരീഷ്, മോഹനൻ, പ്രകാശൻ, കെ.പി. രമേശൻ (ആർജെഡി സംസ്ഥാന സമിതി അംഗം). പോലീസ് ഇൻക്വസ്റ്റ് നടത്തിയ മൃതദേഹം പോസ്റ്റ്മോർട്ടത്തിന് ശേഷം വൈകുന്നേരം വീട്ടിലെത്തിച്ച് സംസ്കരിച്ചു.

യുവാവ് പുഴയിൽ വീണ് മരിച്ചു

മാഹി: പൊന്ന്യം പുഴയ്ക്ക് കുറുകെയുള്ള കുണ്ടുചിറ അണക്കെട്ടിൽനിന്ന് പുഴയിലേക്ക് വീണ് യുവാവ് മരിച്ചു. കുണ്ടുചിറ എകെജി ക്ലബിന് സമീപം കാളിയത്താൻ വീട്ടിൽ കെ. രമിത്ത് (38) ആണ് മരിച്ചത്. വെള്ളിയാഴ്ച രാത്രിയായിരുന്നു അപകടം. അണക്കെട്ടിന്‍റെ നടപ്പാതയുടെ കൈവരിയിൽ ഇരിക്കുന്നതിനിടെ അബദ്ധത്തിൽ പുഴയിലേക്ക് വീഴുകയായിരുന്നു. ഉടൻ കണ്ണുരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പരേതനായ രവീന്ദ്രൻ-നിർമല ദമ്പതികളുടെ മകനാണ്. സഹോദരിമാർ: രഗില, ര‌സ്ന.

ഉളിക്കൽ ടൗൺ സൗന്ദര്യവത്കരണം: എംഎൽഎ സ്ഥലം സന്ദർശിച്ചു

ഉളിക്കൽ: ഉളിക്കല്‍ നഗര സൗന്ദര്യവത്കരണത്തിനായി ബജറ്റിൽ വകയിരുത്തിയ 70 ലക്ഷം രൂപയുടെ പദ്ധതി സംബന്ധിച്ച പ്രവൃത്തിയുടെ രൂപരേഖ തയാറാക്കുന്നതിന്ന് വേണ്ടി എംഎൽഎ ഉൾപ്പെടുന്ന സംഘം സ്ഥലം സന്ദർശിച്ചു. സജീവ് ജോസഫ് എംഎൽഎയുടെ നേതൃത്വത്തില്‍ ഉളിക്കല്‍ പഞ്ചായത്ത് പ്രസിഡന്‍റ് പി.സി. ഷാജി, ഇരിക്കൂര്‍ ബ്ലോക്ക് പഞ്ചായത്ത് മെംബര്‍ ചാക്കോ പാലക്കലോടി, പഞ്ചായത്തംഗങ്ങളായ സുജ, ആയിഷ ഇബ്രാഹിം, പിഡബ്ല്യുഡി റോഡ് അസി. എൻജിനിയർ രാജന്‍ (ഇരിട്ടി), പിഡബ്ല്യുഡി ഇലക്‌ട്രിക്കല്‍ വിഭാഗം എൻജിനിയർ ലിമി (തളിപ്പറന്പ്), പിഡബ്ല്യുഡി ഇരിട്ടി ഓവര്‍സിയര്‍മാരായ അഷീക, റിമേഷ്, വ്യാപാരി വ്യവസായി ഭാരവാഹികള്‍, പത്രപ്രവര്‍ത്തക യൂണിയര്‍ ഭാരവാഹികള്‍ എന്നിവര്‍ ഉള്‍പ്പെടെ ഉളിക്കല്‍ ടൗണ്‍ സന്ദര്‍ശിച്ച സംഘത്തിൽ ഉണ്ടായിരുന്നു. ഉളിക്കൽ ടൗണിന്‍റെ വികസനം സംബന്ധിച്ച് ഇരിട്ടി താലൂക്ക് പത്രപ്രവർത്തക യൂണിയൻ എംഎൽഎയ്ക്ക് സമർപ്പിച്ച വികസന സമഗ്രരേഖയിലെ മൂന്നാമത്തെ നിർദേശത്തിനാണ് അംഗീകാരം ലഭിച്ചിരിക്കുന്നത്.

ജില്ലാതല ഉദ്ഘാടനവും ബോധവത്കരണവും നടത്തി

കണ്ണൂർ: ലോക മലമ്പനി ദിനാചരണത്തിന്‍റെ ജില്ലാതല ഉദ്ഘാടനം കണ്ണൂര്‍ സെന്‍ട്രല്‍ ജയിലില്‍ കോര്‍പറേഷന്‍ മേയര്‍ മുസ്‌ലിഹ് മഠത്തില്‍ നിര്‍വഹിച്ചു. ജില്ലാ ആരോഗ്യ വകുപ്പും ദേശീയ ആരോഗ്യ വകുപ്പും സംയുക്തമായി സംഘടിപ്പിച്ച പരിപാടിയില്‍ ജില്ലാ സര്‍വൈലന്‍സ് ഓഫീസറും ഡപ്യൂട്ടി മെഡിക്കല്‍ ഓഫീസറുമായ ഡോ. കെ.സി. സച്ചിന്‍ അധ്യക്ഷത വഹിച്ചു. സെന്‍ട്രല്‍ ജയില്‍ സൂപ്രണ്ട് കെ. വേണു മുഖ്യാതിഥിയായി. ദേശീയ ആരോഗ്യ ദൗത്യം ജില്ലാ പ്രോഗ്രാം മാനേജര്‍ ഡോ.പി.കെ. അനില്‍കുമാര്‍ ദിനചാരണ സന്ദേശം നല്‍കി. "മലമ്പനി നിവാരണം യാഥാര്‍ഥ്യമാക്കാം പുനര്‍നിക്ഷേപിക്കാം പുനര്‍ വിചിന്തനം നടത്താം പുനരുജ്ജ്വലിപ്പിക്കാം' എന്നതാണ് ഈ വര്‍ഷത്തെ മലമ്പനി ദിന സന്ദേശം. പരിപാടിയോടനുബന്ധിച്ച് ജയില്‍ അന്തേവാസികള്‍ക്ക് ജില്ലാ വെക്ടര്‍ കണ്‍ട്രോള്‍ യൂണിറ്റ് പി. റിജേഷ് മലേറിയ ബോധവത്കരണ ക്ലാസ് നല്‍കി. തുടര്‍ന്ന് അന്തേവാസികളില്‍ മലേറിയ പരിശോധനയും നടത്തി. 2027 അവസാനത്തോടെ കണ്ണൂര്‍ ജില്ലയെ മലമ്പനി നിവാരണ ജില്ലയായി പ്രഖ്യാപിക്കാനും ലക്ഷ്യമിടുന്നുണ്ട്. ജില്ലയില്‍ ഈ വര്‍ഷം 16 മലേറിയ കേസുകളാണ് ഇതുവരെ റിപ്പോര്‍ട്ട് ചെയ്തത്. ഇതില്‍ 10 കേസുകള്‍ അതിഥി തൊഴിലാളികള്‍ക്കിടയിലും ആറുകേസുകള്‍ മറ്റു സംസ്ഥാനങ്ങളില്‍ പോയി മടങ്ങിയെത്തിയ മലയാളികളിലുമാണ് സ്ഥിരീകരിച്ചിരിക്കുന്നത്. ആരോഗ്യ വകുപ്പ് സര്‍വേ പ്രകാരം കണ്ണൂര്‍ കോര്‍പറേഷന്‍ ഉള്‍പ്പെടെയുള്ള നഗര മേഖലയിലും മലയോര പ്രദേശം ഉള്‍പ്പെടുന്ന മറ്റ് പഞ്ചായത്തുകളിലും മലമ്പനി രോഗം പരത്തുന്ന കൊതുകുകളുടെ സാന്നിധ്യം കണ്ടെത്തിയിട്ടുണ്ട്. ഇതുപ്രകാരം ജില്ലയിലെ മലേറിയ പരത്തുന്ന കൊതുകുകളുടെ സാന്നിധ്യമുള്ള സ്ഥലങ്ങളുടെ മാപ്പ് ആരോഗ്യ വകുപ്പ് പുറത്ത് വിട്ടു. ജില്ലാ വെക്ടര്‍ കണ്‍ട്രോള്‍ യൂണിറ്റിന്‍റെ നേതൃത്വത്തില്‍ ജില്ലയില്‍ വ്യാപകമായി കൊതുക് നിയന്ത്രണ പ്രവര്‍ത്തനങ്ങളും ആരോഗ്യവകുപ്പിന്‍റെ നേതൃത്വത്തില്‍ "മഴയെത്തും മുമ്പേ മാറ്റാം മാലിന്യം, കാക്കാം ആരോഗ്യം' എന്ന ജില്ലയില്‍ മഴക്കാല രോഗപ്രതിരോധ കാമ്പയിനും നടന്നുവരുന്നുണ്ട്. ജില്ലാ വിബിഡി കണ്‍ട്രോള്‍ ഓഫീസ് ഡോ. കെ.കെ. ഷിനി, ബയോളജിസ്റ്റ് സി.പി. രമേശന്‍, ജില്ലാ ഡപ്യൂട്ടി മാസ് മീഡിയ ഓഫീസര്‍ ടി. സുധീഷ്, സെന്‍ട്രല്‍ ജയില്‍ ജോയിന്‍റ് സൂപ്രണ്ട് ഗിരീഷ്കുമാര്‍, സെന്‍ട്രല്‍ ജയില്‍ വെല്‍ഫെയര്‍ ഓഫീസര്‍ രാജേഷ്‌കുമാര്‍, സെന്‍ട്രല്‍ ജയില്‍ മെഡിക്കല്‍ ഓഫീസര്‍ ഡോ. ആഷിക്ക് ചന്ദ്ര, ഡിവിസി യൂണിറ്റ് ബയോളജിസ്റ്റ് സി.പി. രമേശന്‍, ജയില്‍ ഓഫീസേഴ്സ് സംഘടനാ പ്രതിനിധികളായ കെ.കെ. ബൈജു, കെ. അജിത്, ജയില്‍ ഉദ്യോഗസ്ഥര്‍, ആരോഗ്യ വിഭാഗം ജീവനക്കാര്‍, അന്തേവാസികള്‍ എന്നിവര്‍ പരിപാടിയില്‍ പങ്കെടുത്തു.

ജവഹർ ബാൽ മഞ്ച് ഭീകര വിരുദ്ധ പ്രതിജ്ഞയെടുത്തു

കണ്ണൂർ: ജമ്മുകാഷ്മീരിലെ പഹൽഗാം ഭീകരാക്രമണത്തിൽ കൊല്ലപ്പെട്ടവർക്ക് ആദരാഞ്ജലികൾ അർപ്പിച്ചും മാനവ സൗഹാർദവും ഇന്ത്യയുടെ മതേതരത്വവും തകർക്കുന്ന പാക്കിസ്ഥാൻ ഭീകരവാദ പ്രവർത്തനത്തിനെതിരേയും ജവഹർ ബാൽ മഞ്ച് ജില്ലാ കമ്മിറ്റിയുടെ നേതൃത്വത്തില്‍ ഭീകരവിരുദ്ധ പ്രതിജ്ഞയും മരണമടഞ്ഞവര്‍ക്ക് ആദരാഞ്ജലിയും അർപ്പിച്ചു. ഡിസിസി പ്രസിഡന്‍റ് മാർട്ടിൻ ജോർജ് ഉദ്ഘാടനം ചെയ്തു. ജില്ലാ ചെയർമാൻ സി.വി.എ. ജലീൽ അധ്യക്ഷത വഹിച്ചു. സംസ്ഥാന കോ-കോർഡിനേറ്റർ ലിഷ ദീപക്, ജവഹർബാൽ മഞ്ച് ജില്ലാ പ്രസിഡന്‍റ് മാർട്ടിൻ ജെ. മാത്യു തുടങ്ങിയവർ പ്രസംഗിച്ചു.

ഫ്രാൻസിസ് പാപ്പയ്ക്ക് ഓർമത്തിരി തെളിച്ച് കെഎൽസിഎ അനുസ്മരണ പ്രാർഥന

കണ്ണൂർ: കേരള ലാറ്റിൻ കാത്തലിക് അസോസിയേഷൻ (കെഎൽസിഎ) കണ്ണൂർ രൂപത സമിതിയുടെ ആഭിമുഖ്യത്തിൽ ഫ്രാൻസിസ് പാപ്പയുടെ ആത്മശാന്തിക്കായി ഓർമത്തിരി തെളിയിച്ചു പ്രാർഥനാഞ്ജ ലി നടത്തി. കണ്ണൂർ കാൽടെക്സ് ജംഗ്ഷനിലെ ഗാന്ധി സർക്കിളിൽ നടന്ന അനുസ്മരണ പ്രാർഥന കൾക്ക് കണ്ണൂർ ബിഷപ് ഡോ. അലക്സ് വടക്കുംതല നേതൃത്വം നൽകി. കാരുണ്യത്തിന്‍റെ ഒരു പുതിയ അധ്യായം ലോകത്തിന് മുന്നിൽ തുറന്നു തന്ന പാപ്പ, പാവപ്പെട്ടവരെ യും രോഗികളെയും കുടിയേറ്റക്കാരെയും സമൂഹത്തിന്‍റെ താഴെ തട്ടിൽ കഴിയുന്ന എല്ലാവരിലും യേശു ദർശനം ഉൾക്കൊണ്ട് ചേർത്ത് പിടിച്ച് ഈ കാലഘട്ടത്തിലെ ജീവിച്ചിരുന്ന മറ്റൊരു ക്രിസ്തുവായിരുന്നുവെന്ന് ബിഷപ് അനുസ്മരിച്ചു. മൗന ജാഥയായി പാപ്പയുടെ ചിത്രത്തിന് മുന്നിൽ മെഴുകുതിരി കത്തിച്ച് കൊണ്ടാണ് വിശ്വാസികൾ പ്രാർഥനാഞ്ജലിയിൽ പങ്കെടുത്തത്. സമൂഹ മനസാക്ഷിയെ ഞെട്ടിച്ച് ശ്രീനഗറിലെ പഹൽഗാമിൽ ഭീകരവാദികൾ വധിച്ച 26 വിനോദ സഞ്ചാരികൾക്കും ചടങ്ങിൽ ആദരാഞ്ജലികൾ അർപ്പിച്ചു. കെഎൽസിഎ മുൻ സംസ്ഥാന പ്രസിഡന്‍റ് ആന്‍റണി നൊറോണ അധ്യക്ഷത വഹിച്ചു. മോൺ. ഡോ. ക്ലാരൻസ് പാലിയത്ത്, രതീഷ് ആന്‍റണി, ഫാ. മാർട്ടിൻ രായപ്പൻ, ഉർസുലൈൻ പ്രോവിൻഷ്യൽ സൂപ്പരിയർ സിസ്റ്റർ വിനയ യുഎംഐ, ഷേർളി സ്റ്റാൻലി, ജോൺ ബാബു, ബോബി ചാലിൽ, ജോയ്സി മെനേസസ്, കെ.എച്ച്. ജോൺ, റിനേഷ് ആന്‍റണി, ലെസ്‌ലി ഫെർണാണ്ടസ്, എലിസബത്ത് കുന്നേത്ത്, ജെറി പൗലോസ്, റീജ സ്റ്റീഫൻ എന്നിവർ പ്രസംഗിച്ചു.

രണ്ടു വയസുകാരിയുടെ തലയിൽ പാത്രം കുടുങ്ങി; രക്ഷകരായി അഗ്നിരക്ഷാസേന

തലശേരി: കളിക്കുന്നതിനിടയിൽ രണ്ട് വയസുകാരിയുടെ തലയിൽ അലുമിനിയം പാത്രം കുടുങ്ങി. അണ്ടലൂർ മുണ്ടുപറമ്പിൽ താമസിക്കുന്ന രണ്ടു വയസുകാരിയുടെ തലയിലാണ് പാത്രം കുരുങ്ങിയത്. ഇന്നലെ ഉച്ചയോടെയാണ് സംഭവം. അടുക്കളയിൽ പാത്രം കൊണ്ടു കളിക്കുമ്പോഴാണ് അബദ്ധത്തിൽ കുട്ടിയുടെ തലയിൽ അലൂമിനിയത്തിന്‍റെ പാത്രം കുടുങ്ങിയത്. ഉടൻ തന്നെ വീട്ടുകാർ എല്ലാം ചേർന്ന് കലം ഊരിമാറ്റാൻ ശ്രമിച്ചെങ്കിലും കഴിഞ്ഞില്ല. ഇതോടെയാണ് കരയുന്ന കുട്ടിയെയും കൊണ്ട് വീട്ടുകാർ തലശേരി ഫയർ സ്റ്റേഷനിൽ എത്തി. ഏറെ സമയമെടുത്താണ് കുട്ടിയുടെ തലയിൽ കുടുങ്ങിയ അലൂമിനിയം പാത്രം അഗ്നിരക്ഷാസേന ഉദ്യോഗസ്ഥർ മുറിച്ചു നീക്കിയത്. അസി. സ്റ്റേഷൻ ഓഫീസർ ഒ.കെ. രജീഷ്, സീനിയർ ഫയർ ആൻഡ് റസ്ക്യു ഓഫീസർമാരായ ബി. ജോയ്, ബിനീഷ് നെയ്യോത്ത് എന്നിവരുടെ നേതൃത്വത്തിലായിരുന്നു. രക്ഷാപ്രവർത്തനം.

ജില്ലയിലെ മുഴുവൻ തദ്ദേശ സ്വയംഭരണ സ്ഥാപനങ്ങളുടെയും വാര്‍ഷിക പദ്ധതിക്ക് അംഗീകാരം

കണ്ണൂർ: ജില്ലയിലെ മുഴുവന്‍ തദ്ദേശ സ്ഥാപനങ്ങളുടെയും വാര്‍ഷിക പദ്ധതിക്ക് ജില്ലാ ആസൂത്രണ സമിതി അംഗീകാരം നല്‍കി. ചപ്പാരപ്പടവ്, മുഴപ്പിലങ്ങാട്, കതിരൂര്‍ പഞ്ചായത്തുകളുടെ വാര്‍ഷിക പദ്ധതിക്ക് കൂടി അംഗീകാരം ലഭിച്ചതോടെ ജില്ലയിലെ മുഴുവന്‍ തദ്ദേശ സ്വയംഭരണ സ്ഥാപനങ്ങളുടെയും വാര്‍ഷിക പദ്ധതികള്‍ക്ക് അംഗീകാരമായെന്ന് ജില്ലാ പ്ലാനിംഗ് ഓഫീസര്‍ നെനോജ് മേപ്പടിയത്ത് അറിയിച്ചു. പെരളശേരി, മുഴക്കുന്ന്, ഇരിക്കൂര്‍, കുറ്റ്യാട്ടൂര്‍, മുണ്ടേരി, പാപ്പിനിശേരി, രാമന്തളി, ചിറക്കല്‍, കടമ്പൂര്‍, പാട്യം, ഉളിക്കല്‍, വേങ്ങാട്, അയ്യന്‍കുന്ന്, ധര്‍മടം, പായം, അഞ്ചരക്കണ്ടി, എരഞ്ഞോളി, തൃപ്രങ്ങോട്ടൂര്‍, കൂടാളി, കൊളച്ചേരി, ആറളം, പയ്യാവൂര്‍, കണ്ണപുരം, കടന്നപ്പള്ളി-പാണപ്പുഴ, ചിറ്റാരിപ്പറമ്പ്, ചെമ്പിലോട്, കുറുമാത്തൂര്‍, മാട്ടൂല്‍ എന്നീ പഞ്ചായത്തുകളുടെയും തളിപ്പറമ്പ്, പാനൂര്‍, ഇരിട്ടി, കൂത്തുപറമ്പ് എന്നീ നഗരസഭകളുടെയും 2025-26 വര്‍ഷത്തെ വാര്‍ഷിക പദ്ധതിക്ക് കഴിഞ്ഞ 23ന് അംഗീകാരം നല്‍കിയിരുന്നു. മഴക്കാല പൂര്‍വ ശുചിത്വം-മുന്നൊരുക്കം എന്ന വിഷയത്തില്‍ ഡപ്യൂട്ടി ഡിഎംഒ ഡോ. കെ.സി. സച്ചിന്‍ ക്ലാസെടുത്തു. ജില്ലയിലെ അതിദാരിദ്ര്യ നിര്‍മാര്‍ജന പദ്ധതിയുടെ പുരോഗതി യോഗം അവലോകനം ചെയ്തു. മേയ് അവസാന വാരത്തോടെ കണ്ണൂരിനെ അതിദാരിദ്ര്യമുക്ത ജില്ലയായി പ്രഖ്യാപിക്കുമെന്ന് ജില്ലാ ആസൂത്രണ സമിതി അറിയിച്ചു. ജില്ലാ പഞ്ചായത്ത് ഓഡിറ്റോറിയത്തില്‍ നടന്ന ജില്ലാ ആസൂത്രണ സമിതി യോഗത്തില്‍ ഡിപിസി ചെയര്‍പേഴ്സണ്‍ കെ.കെ. രത്നകുമാരി അധ്യക്ഷത വഹിച്ചു. ഡിപിസി അംഗങ്ങളായ ബിനോയ് കുര്യന്‍, ടി. സരള, വി. ഗീത, കെ. താഹിറ, ബ്ലോക്ക് പഞ്ചായത്ത് അസോസിയേഷന്‍ സംസ്ഥാന ജനറല്‍ സെക്രട്ടറി സി.എം. കൃഷ്ണന്‍, ഡിപിസി മെംബര്‍ സെക്രട്ടറിയും ജില്ലാ കളക്ടറുമായ അരുണ്‍ കെ. വിജയന്‍, തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടര്‍ ടി.ജെ. അരുണ്‍, ഡിപിസി സര്‍ക്കാര്‍ നോമിനി കെ.വി. ഗോവിന്ദന്‍, ഹരിത കേരളം മിഷന്‍ ജില്ലാ കോ-ഓര്‍ഡിനേറ്റര്‍ ഇ.കെ. സോമശേഖരന്‍, ലിസി ജോസഫ്, ഇ. വിജയന്‍, ടി.ഒ. മോഹനന്‍ തുടങ്ങിയവര്‍ പങ്കെടുത്തു.

ഗ്യാസ് സിലിണ്ടർ പൊട്ടിത്തെറിച്ച് വിറകുപുര തകർന്നു

തലശേരി: എരഞ്ഞോളി വടക്കുമ്പാട് കപ്പരച്ചാൽ കുളത്തിന് സമീപം ഗ്യാസ് സിലിണ്ടർ പൊട്ടിത്തെറിച്ച് വിറകുപുര കത്തി നശിച്ചു. ഐ.പി. ദാമോദരന്‍റെ വീടിനോട് ചേർന്നുള്ള വിറകുപുരയിൽ സൂക്ഷിച്ച ഗ്യാസ് സിലിണ്ടറാണ് പൊട്ടിത്തെറിച്ചത്. ഇന്നലെ പുലർച്ചെയായിരുന്നു സംഭവം. പുലർച്ചെ ശബ്ദം കേട്ട് വീട്ടുകാർ പുറത്തിറങ്ങിയപ്പോൾ കോൺക്രീറ്റിൽ പണിത വിറകു പുരയിൽ നിന്നും തീ ആളിക്കത്തുന്നതാണ് കണ്ടത്. ഉടൻതന്നെ നാട്ടുകാരും തലശേരിയിൽ നിന്നും എത്തിയ അഗ്നിരക്ഷാ സേനയും ചേർന്നാണ് തീയണച്ചത്. വിറകും മറ്റു സാധനങ്ങളും കത്തിനശിച്ചു. കെട്ടിടം പൂർണമായും തകർന്നു.

കേരള പോലീസ് ഓഫീസേഴ്സ് അസോ. റൂറല്‍ ജില്ലാ സമ്മേളനം തുടങ്ങി

പയ്യാവൂർ: നമ്മുടെ നാടിനെ കാർന്നു തിന്നുന്ന ലഹരിക്കെതിരേ പ്രതിരോധജ്വാല തീർക്കാൻ പൊതുസമൂഹത്തിനൊപ്പം പോലീസ് മുന്നിലുണ്ടാവുമെന്നും അതിനുള്ള പ്രവർത്തനങ്ങൾ കാഴ്ചവയ്ക്കാൻ പോലീസുകാർക്ക് കഴിയണമെന്നും ജില്ലാ റൂറൽ പോലീസ് മേധാവി അനൂജ് പാലിവാള്‍. ഇത്തരം പ്രതിരോധ പ്രവർത്തനങ്ങൾക്ക് കുടുംബത്തിന്‍റെ പിന്തുണയും അനിവാര്യമാണെന്നും അദ്ദേഹം പറഞ്ഞു. കേരള പോലീസ് ഓഫീസേഴ്സ് അസോസിയേഷന്‍ കണ്ണൂര്‍ റൂറല്‍ ജില്ലാസമ്മേളനത്തിന്‍റെ ഭാഗമായി നടന്ന കുടുംബസംഗമം പയ്യാവൂരില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സംഗീതജ്ഞൻ ഡോ. ഉണ്ണികൃഷ്ണൻ പയ്യാവൂർ മുഖ്യാതിഥിയായിരുന്നു. പ്രസിഡന്‍റ് ടി.വി. ജയേഷ് അധ്യക്ഷത വഹിച്ചു. ഡിവൈഎസ്പിമാരായ പ്രദീപൻ കണ്ണിപ്പൊയിൽ, ധനജ്ഞയബാബു, ഭാരവാഹികളായ പി. രമേശൻ, കെ.പി. അനീഷ്, കെ.വി. പ്രസാദ് എന്നിവർ പ്രസംഗിച്ചു. ചടങ്ങിൽ പോലീസ് സേനയിൽ നിന്ന് വിരമിക്കുന്ന വിവിധ സ്റ്റേഷനുകളിലെ എട്ടുപേർക്ക് യാത്രയയപ്പ് നൽകി. തുടർന്ന് കുടുംബാംഗങ്ങൾ പങ്കെടുത്ത ദീപം തെളിക്കലും പ്രതിജ്ഞയും നടന്നു. കലാപരി പാടികളും അരങ്ങേറി. ഇന്ന് രാവിലെ നടക്കുന്ന പ്രതിനിധി സമ്മേളനം കെ.വി. സുമേഷ് എംഎൽഎ ഉദ്ഘാടനം ചെയ്യും.

പഹൽഗാം രക്തസാക്ഷികൾക്ക് ആദരാഞ്ജലിയർപ്പിച്ചു

ചെറുപുഴ: ജമ്മു കാശ്മീരിലെ പഹൽഗാം ഭീകരാക്രമണത്തിൽ കൊല്ലപ്പെട്ടവർക്ക് പുളിങ്ങോം മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ മെഴുകുതിരികൾ കത്തിച്ച് ആദരാഞ്ജലികൾ അർപ്പിക്കുകയും ഭീകരവിരുദ്ധ പ്രതിജ്ഞയെടുക്കുകയും ചെയ്തു. കോൺഗ്രസ്‌ മണ്ഡലം പ്രസിഡന്‍റ് മനോജ് വടക്കേൽ അധ്യക്ഷത വഹിച്ചു. വിമുക്തഭടൻ ജയിംസ് രാമത്തറ പ്രതിജ്ഞ ചൊല്ലിക്കൊടുത്തു. നേതാക്കളായ ആലയിൽ ബാലകൃഷ്ണൻ, ഉഷ മുരളി, ഷാജൻ ജോസ്, സെബാസ്റ്റ്യൻ കണ്ടത്തിൽ, ബാബു കണക്കൊമ്പിൽ, സുമേഷ് എമ്പ്രയിൽ, റോജി ജോൺ എന്നിവർ നേതൃത്വം നൽകി. പയ്യാവൂർ: പഹൽഗാമിൽ വെടിയേറ്റ് മരിച്ചവർക്ക് പയ്യാവൂർ മണ്ഡലം കമ്മിറ്റിയുടെ ആഭിമുഖ്യത്തിൽ ആദരാഞ്ജലികളർപ്പിച്ചു. മെഴുകുതിരി തെളിച്ച് ഭീകരവിരുദ്ധ പ്രതിജ്ഞയും ചൊല്ലി. കോൺഗ്രസ് മണ്ഡലം പ്രസിഡന്‍റ് ഇ.കെ. കുര്യൻ, നേതാക്കളായ ജേക്കബ് മാരിപ്പുറം, ടി.പി.അഷ്റഫ്, കുര്യാച്ചൻ മുണ്ടയ്ക്കൽ, അമൽ തോമസ്, ടി.ടി.സെബാസ്റ്റ്യൻ, ആനീസ് നെട്ടനാനി, സിന്ധു ബെന്നി തുടങ്ങിവർ നേതൃത്വം നല്കി. ആലക്കോട്: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ ആലക്കോട് ടൗണിൽ പഹൽഗാമിൽ കൊല്ലപ്പെട്ടവർക്ക് ആദരാഞ്ജലി അർപ്പിക്കുകയും ഭീകരവിരുദ്ധ പ്രതിജ്ഞയെടുക്കുകയും ചെയ്തു. മണ്ഡലം പ്രസിഡന്‍റ് ബാബു പള്ളിപ്പുറം പ്രതിജ്ഞ ചൊല്ലിക്കൊടുത്തു. ജോൺസൺ ചിറവയൽ, ജിൻസ് മാത്യു, അപ്പുക്കുട്ടൻ സ്വാമിമഠം, ലാലു കുന്നപ്പള്ളി, പ്രിൻസ് കച്ചിറയിൽ, ജനാർദ്ദനൻ വലമറ്റം തുടങ്ങിയവർ നേതൃത്വം നൽകി. തേർത്തല്ലി: മണ്ഡലം കോൺഗ്രസ് കമ്മിറ്റിയുടെ നേതൃത്വത്തിലും ഭീകര ആക്രമണത്തിൽ കൊല്ലപ്പെട്ടവർക്ക് ആദരാഞ്ജലി അർപ്പിച്ച് ഭീകരവിരുദ്ധ പ്രതിജ്ഞ നടത്തി. മണ്ഡലം പ്രസിഡന്‍റ് റോയി ചക്കാനിക്കുന്നേൽ പ്രതിജ്ഞ ചൊല്ലിക്കൊടുത്തു. നേതാക്കളായ ജോസ് വട്ടമല, ജോജി കന്നിക്കാട്ട്, ബിനേഷ് മുഞ്ഞനാട്ട്, എലിസബത്ത് നെല്ലുവേലിൽ, ജോൺ വട്ടമല, സി.സി. രാജു, വത്സമ്മ വാണിശേരിൽ തുടങ്ങിയവർ നേതൃത്വം നല്കി.

മഹാത്മാഗാന്ധി കുടുംബ സംഗമം നടത്തി

പയ്യാവൂർ: കോൺഗ്രസ് പയ്യാവൂർ മണ്ഡലം ആറാം വാർഡ് പൈസക്കരിയിൽ കോൺഗ്രസ് കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച മഹാത്മാഗാന്ധി കുടുംബ സംഗമവും മുതിർന്ന പൗരന്മാരെ ആദരിക്കലും കാരക്കാട്ട് കുഴിയിൽ ജോസൂട്ടിയുടെ വീട്ടിൽ നടന്നു. കെപിസിസി ജനറൽ സെക്രട്ടറി സോണി സെബാസ്റ്റ്യൻ ഉദ്ഘാടനം ചെയ്തു. കോൺഗ്രസ് വാർഡ് പ്രസിഡന്‍റ് സിബിച്ചൻ ഉദിന്താനത്ത് അധ്യക്ഷത വഹിച്ചു. ഡിസിസി ജനറൽ സെക്രട്ടറി സുരേഷ് ബാബു എളയാവൂർ മുഖ്യപ്രഭാഷണം നടത്തി. ചടങ്ങിൽ മുൻ കോൺഗ്രസ് നേതാക്കളായ ടി.എം. സേവ്യർ, ജേക്കബ് മാരിപ്പുറം, സ്കറിയ പാറയ്ക്കൽ തുടങ്ങി 35 ഓളം നേതാക്കളെയും പ്രവർത്തകരെയും പൊന്നാടയണിയിച്ച് ആദരിച്ചു. പയ്യാവൂർ മണ്ഡലം പ്രസിഡന്‍റ് ഇ.കെ. കുര്യൻ, കോൺഗ്രസ് നേതാക്കളായ ജേക്കബ് മാരിപ്പുറം, ആനീസ് നെട്ടനാനി, സിന്ധു ബെന്നി, ടി.പി. അഷ്റഫ്, ബിനോച്ചൻ വെട്ടിക്കുഴ, ജോസ് തോമസ് എന്നിവർ പ്രസംഗിച്ചു.

അഖില കേരള വായനോത്സവത്തിന് തിരിതെളിഞ്ഞു

കണ്ണൂർ: സംസ്ഥാന ലൈബ്രറി കൗണ്‍സില്‍ സംഘടിപ്പിക്കുന്ന അഖില കേരള വായനോത്സവം മന്ത്രി ആര്‍. ബിന്ദു ഉദ്ഘാടനം ചെയ്തു. ഗ്രന്ഥശാലകളുടെ സാന്ദ്രത ഏറ്റവും കൂടിയ നാടാണ് കേരളമെന്നും സംഘബോധത്തിന്‍റെയും അവകാശ ബോധത്തിന്‍റെയും സ്വാംശീകരണത്തില്‍ ഗ്രന്ഥശാലകള്‍ കേന്ദ്രീകരിച്ച് നടന്നിട്ടുള്ള സാംസ്‌കാരിക പ്രവർത്തനങ്ങളാണ് ഇന്നുകാണുന്ന കേരളത്തെ സൃഷ്ടിച്ചതെന്നും മന്ത്രി പറഞ്ഞു. കേരള സ്റ്റേറ്റ് കൗണ്‍സില്‍ ഏറ്റെടുത്ത് നടത്തുന്ന വായനയുടെ സര്‍ഗാത്മക ആഘോഷമായ അഖില കേരള വയനോത്സവത്തിന് ആദ്യമായാണ് കണ്ണൂര്‍ വേദിയാകുന്നത്. കണ്ണൂര്‍ ഗവ. എൻജിനിയറിംഗ് കോളജില്‍ മൂന്ന് ദിവസങ്ങളിലായി നടക്കുന്ന പരിപാടിയില്‍ സംസ്ഥാനതല വായന മത്സരം, എഴുത്തു പരീക്ഷ, ക്വിസ് മത്സരം, പറശിനിക്കടവ് ജലയാത്ര, ക്യാമ്പ് ഫയര്‍, സര്‍ഗ സംവാദം തുടങ്ങി നിരവധി പരിപാടികളാണ് സംഘടിപ്പിക്കുന്നത്. ഹൈസ്‌കൂള്‍ വിദ്യാര്‍ഥികള്‍ക്ക് സ്‌കൂള്‍ തലത്തിലും യുവജനങ്ങള്‍ക്കും മുതിര്‍ന്നവര്‍ക്കും ഗ്രന്ഥശാലാ തലത്തിലും നടന്ന വായനോത്സവത്തില്‍ വിജയികളായ 56 പേരാണ് സംസ്ഥാനതല മത്സരത്തിനെത്തുന്നത്. പരിപാടിയില്‍ കേരള സ്റ്റേറ്റ് ലൈബ്രറി കൗണ്‍സില്‍ പ്രസിഡന്‍റ് ഡോ. കെ.വി. കുഞ്ഞികൃഷ്ണന്‍ അധ്യക്ഷനായിരുന്നു. സാഹിത്യകാരനായ സി.വി. ബാലകൃഷ്ണന്‍ മുഖ്യപ്രഭാഷണം നടത്തി. ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരി, സി. ഷുക്കൂര്‍ എന്നിവര്‍ മുഖ്യാതിഥികളായിരുന്നു. സെൽഫി പോയിന്‍റ് ഉദ്ഘാടനം കണ്ണൂർ: കേരള സ്റ്റേറ്റ് ലൈബ്രറി കൗണ്‍സിൽ കണ്ണൂർ ഗവ. എൻജിനിയറിംഗ് കോളജിൽ സംഘടിപ്പിക്കുന്ന സംസ്ഥാന വായനാമത്സരത്തിന്‍റെ ഭാഗമായി സ്ഥാപിച്ച സെൽഫിപോയിന്‍റ് വിസ്മയ പാർക്ക് ചെയർമാൻ പി.വി. ഗോപിനാഥ് ഉദ്ഘാടനം ചെയ്തു. സംസ്ഥാന ലൈബ്രറി കൗണ്‍സിൽ പ്രസിഡന്‍റ് കെ.വി. കുഞ്ഞികൃഷ്ണൻ അധ്യക്ഷത വഹിച്ചു. സംസ്ഥാന സെക്രട്ടറി വി.കെ. മധു, മനയത്ത് ചന്ദ്രൻ, പി.വി.കെ. പനയാൽ, എം.കെ. രമേഷ്കുമാർ തുടങ്ങിയവർ പങ്കെടുത്തു. ജില്ലാ സെക്രട്ടറി പി.കെ. വിജയൻ സ്വാഗതം പറഞ്ഞു. വിസ്മയാപാർക്കാണ് സെൽഫി പോയിന്‍റ് ഒരുക്കിയത്. ഇന്നലെ തുടങ്ങിയ വായനാമത്സരം നാളെ അവസാനിക്കും.

ചന്ദനക്കാംപാറയിൽ അഖില കേരള ബാസ്കറ്റ്ബോൾ ടൂർണമെന്‍റിന് തുടക്കമായി

പയ്യാവൂർ: മുപ്പത്തൊമ്പതാമത് ചന്ദനക്കാംപാറ ചെറുപുഷ്പം അഖില കേരള പുരുഷ, വനിത ബാസ്കറ്റ്ബോൾ ടൂർണമെന്‍റിന് ചെറുപുഷ്പ ഫ്ലഡ്‌ലിറ്റ് സ്റ്റേഡിയത്തിൽ തുടക്കമായി. സജീവ് ജോസഫ് എംഎൽഎ ടൂർണമെന്‍റ് ഉദ്ഘാടനം ചെയ്തു. തലശേരി അതിരൂപത വികാരി ജനറാൾ മോൺ. ആന്‍റണി മുതുകുന്നേൽ അധ്യക്ഷത വഹിച്ചു. ചന്ദനക്കാംപാറ ഇടവക വികാരി ഫാ. ജോസഫ് ചാത്തനാട്ട് ആമുഖ പ്രഭാഷണം നടത്തി. ഇരിക്കൂർ ബ്ലോക്ക് പഞ്ചായത്ത് മെംബർ പി.ആർ. രാഘവൻ, പയ്യാവൂർ പഞ്ചായത്ത് സ്ഥിരം സമിതി അധ്യക്ഷ ഷീന ജോൺ, ചന്ദനക്കാംപാറ ചെറുപുഷ്പ ഹൈസ്കൂൾ കായികാധ്യാപകൻ എം.എം.വിനു എന്നിവർ പ്രസംഗിച്ചു. ചന്ദനക്കാംപാറ ഇടവക സഹവികാരി ഫാ. ജോസഫ് ചൊള്ളമ്പുഴ, ഹൈസ്കൂൾ മുഖ്യാധ്യാപകൻ റോയി ഏബ്രഹാം, യുപി സ്കൂൾ മുഖ്യാധ്യാപിക വിജി മാത്യു, എൽപി സ്കൂൾ മുഖ്യാധ്യാപകൻ തോമസ് മാത്യു, സ്കൂൾ പിടിഎ പ്രസിഡന്‍റ് ടോമി വടക്കുംവീട്ടിൽ എന്നിവർ പങ്കെടുത്തു.

പാപ്പയ്ക്ക് ഓർമത്തിരി തെളിച്ച് കെഎൽസിഎ അനുസ്മരണ പ്രാർഥന

കണ്ണൂർ: കേരള ലാറ്റിൻ കാത്തലിക് അസോസിയേഷൻ (കെഎൽസിഎ) കണ്ണൂർ രൂപത സമിതിയുടെ ആഭിമുഖ്യത്തിൽ ഫ്രാൻസിസ് പാപ്പയുടെ ആത്മശാന്തിക്കായി ഓർമത്തിരി തെളിയിച്ചു പ്രാർഥനാഞ്ജ ലി നടത്തി. കണ്ണൂർ കാൽടെക്സ് ജംഗ്ഷനിലെ ഗാന്ധി സർക്കിളിൽ നടന്ന അനുസ്മരണ പ്രാർഥന കൾക്ക് കണ്ണൂർ ബിഷപ് ഡോ. അലക്സ് വടക്കുംതല നേതൃത്വം നൽകി. കാരുണ്യത്തിന്‍റെ ഒരു പുതിയ അധ്യായം ലോകത്തിന് മുന്നിൽ തുറന്നു തന്ന പാപ്പ, പാവപ്പെട്ടവരെ യും രോഗികളെയും കുടിയേറ്റക്കാരെയും സമൂഹത്തിന്‍റെ താഴെ തട്ടിൽ കഴിയുന്ന എല്ലാവരിലും യേശു ദർശനം ഉൾക്കൊണ്ട് ചേർത്ത് പിടിച്ച് ഈ കാലഘട്ടത്തിലെ ജീവിച്ചിരുന്ന മറ്റൊരു ക്രിസ്തുവായിരുന്നുവെന്ന് ബിഷപ് അനുസ്മരിച്ചു. മൗന ജാഥയായി പാപ്പയുടെ ചിത്രത്തിന് മുന്നിൽ മെഴുകുതിരി കത്തിച്ച് കൊണ്ടാണ് വിശ്വാസികൾ പ്രാർഥനാഞ്ജലിയിൽ പങ്കെടുത്തത്. സമൂഹ മനസാക്ഷിയെ ഞെട്ടിച്ച് ശ്രീനഗറിലെ പഹൽഗാമിൽ ഭീകരവാദികൾ വധിച്ച 26 വിനോദ സഞ്ചാരികൾക്കും ചടങ്ങിൽ ആദരാഞ്ജലികൾ അർപ്പിച്ചു. കെഎൽസിഎ മുൻ സംസ്ഥാന പ്രസിഡന്‍റ് ആന്‍റണി നൊറോണ അധ്യക്ഷത വഹിച്ചു. മോൺ. ഡോ. ക്ലാരൻസ് പാലിയത്ത്, രതീഷ് ആന്‍റണി, ഫാ. മാർട്ടിൻ രായപ്പൻ, ഉർസുലൈൻ പ്രോവിൻഷ്യൽ സൂപ്പരിയർ സിസ്റ്റർ വിനയ യുഎംഐ, ഷേർളി സ്റ്റാൻലി, ജോൺ ബാബു, ബോബി ചാലിൽ, ജോയ്സി മെനേസസ്, കെ.എച്ച്. ജോൺ, റിനേഷ് ആന്‍റണി, ലെസ്‌ലി ഫെർണാണ്ടസ്, എലിസബത്ത് കുന്നേത്ത്, ജെറി പൗലോസ്, റീജ സ്റ്റീഫൻ എന്നിവർ പ്രസംഗിച്ചു.

ഭിന്നശേഷിക്കാർക്ക് ഉപകരണങ്ങൾ വിതരണം ചെയ്തു

ശ്രീകണ്ഠപുരം: നഗരസഭയിലെ വയോജനങ്ങൾക്കും ഭിന്നശേഷികാർക്കും നല്കുന്ന സഹായ ഉപകരണങ്ങൾ വിതരണം ചെയ്തു. നഗരസഭാധ്യക്ഷ കെ.വി. ഫിലോമിന ഉദ്ഘാടനം ചെയ്തു. നഗരസഭ വാർഷിക പദ്ധതിയിൽ ഉൾപ്പെടുത്തി ആറുലക്ഷം രൂപ ചെലവഴിച്ചാണ് ഉപകരണങ്ങൾ വാങ്ങിയത്. വീൽചെയറുകൾ, ഫോൾഡിംഗ് വാക്കറുകൾ, ഫുഡ്‌ വെയർ, തെറാപ്പി മാറ്റ്, തെറാപ്പി ബോൾ, കേൾവി സഹായ ഉപകരണങ്ങൾ, ഭിന്നശേഷി ക്കാർക്കും വയോജനങ്ങൾക്കും അസ്ഥിസംബന്ധമായ സഹായ ഉപകരണങ്ങൾ എന്നിവയാണ് വിതരണം ചെയ്തത്. ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പി.പി. ചന്ദ്രാംഗദൻ അധ്യക്ഷത വഹിച്ചു. ഐസിഡിഎസ് സൂപ്പർവൈസർ പുഷ്പജ, നഗരസഭ സ്ഥിരം സമിതി അധ്യക്ഷൻമാരായ ജോസഫിന, വി.പി. നസീമ, കൗൺസിലർ മിനി സജീവൻ, കമ്യൂണിറ്റി വുമൺ ഫെസിലിറ്റേറ്റർ എൻ.വി. സ്നേഹ തുടങ്ങിയവർ പ്രസംഗിച്ചു.

ഹരിത സംസ്‌കാരം ഓരോ വ്യക്തിയുടെയും ഉത്തരവാദിത്വം: മന്ത്രി ബിന്ദു

കണ്ണൂർ: ഹരിത സംസ്‌കാരം ഓരോ വ്യക്തിയുടെയും ഉത്തരവാദിത്വമാണെന്ന് മന്ത്രി ആര്‍. ബിന്ദു. ജില്ലാ ആസൂത്രണ സമിതിയുടെ നേതൃത്വത്തില്‍ ജില്ലാ പഞ്ചായത്ത് ഹാളില്‍ മാലിന്യ മുക്തം നവകേരളം ജനകീയ കാമ്പയിന്‍റെ ഭാഗമായി ശുചിത്വ മാലിന്യ സംസ്‌കരണ രംഗത്ത് മികച്ച പ്രവര്‍ത്തനങ്ങള്‍ നടത്തി സംസ്ഥാന തലത്തില്‍ പുരസ്‌കാരങ്ങള്‍ നേടിയ ജില്ലയിലെ തദ്ദേശ സ്ഥ പനങ്ങളെ അനുമോദിക്കുന്ന പരിപാടി ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. മത്സരാധിഷ്ഠിതമല്ലാതെ മാലിന്യ സംസ്‌കരണത്തെയും ശുചീകരണ പ്രവര്‍ത്തനങ്ങളെയും സമീപിക്കുന്ന ഇന്നത്തെ തലമുറ ഏറെ പ്രതീക്ഷ നല്‍കുന്നുണ്ട്. അവര്‍ക്ക് ഹരിത സംസ്‌കാരം പകര്‍ന്നു നല്‍കേണ്ടത് ഓരോരുത്തരുടെയും ഉത്തരവാദിത്വമാണെന്നും മന്ത്രി പറഞ്ഞു. ഏറ്റവും മികച്ച ജില്ല, ജില്ലാ പഞ്ചായത്ത്, എന്‍ഫോഴ്സ്‌മെന്‍റ് സ്‌ക്വാഡ്, മികച്ച ബ്ലോക്ക് പഞ്ചായത്തായി തളിപ്പറമ്പ്, മികച്ച രണ്ടാമത്തെ നഗരസഭയായ ആന്തൂര്‍, മികച്ച ഹരിത കര്‍മസേനയായ ആന്തൂര്‍ നഗരസഭയിലെ ഹരിതകര്‍മ സേന, രണ്ടാമത്തെ ഇന്‍റേണല്‍ വിജിലന്‍സ് സ്‌ക്വാഡ്, മികച്ച മൂന്നാമത്തെ കുടുംബശ്രീ സിഡിഎസ് പെരളശേരി എന്നിവയ്ക്കുള്ള പുരസ്‌കാരങ്ങൾ മന്ത്രി വിതരണം ചെയ്തു. ആസൂത്രണ സമിതി ചെയര്‍പേഴ്‌സണ്‍ കെ.കെ. രത്‌നകുമാരി അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യന്‍, കണ്ണൂര്‍ കോര്‍പറേഷന്‍ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍മാന്‍ സുരേഷ്ബാബു എളയാവൂര്‍, സി.എം കൃഷ്ണന്‍, പി. മുകുന്ദന്‍, എം. ശ്രീധരന്‍, ജില്ലാ കളക്ടര്‍ അരുണ്‍ കെ. വിജയന്‍, തദ്ദേശ സ്വയംഭരണ ജോയിന്‍റ് ഡയറക്ടര്‍ ടി.ജെ. അരുണ്‍, ജില്ലാ പ്ലാനിംഗ് ഓഫീസര്‍ നെനോജ് മേപ്പടിയത്ത്, ഹരിതകേരളം മിഷന്‍ ജില്ലാ കോ-ഓഡിനേറ്റര്‍ ഇ.കെ. സോമശേഖരന്‍ എന്നിവർ പ്രസംഗിച്ചു.

കുറ്റൂര്‍ മടിയമ്മക്കുളത്തെ കവര്‍ച്ച: പ്രതികളെ കണ്ടെത്താനാകാതെ പോലീസ്

പെരിങ്ങോം: മാതമംഗലം കുറ്റൂരില്‍ പൂട്ടിക്കിടന്ന വീട് കുത്തിത്തുറന്ന് 20 ലക്ഷത്തിന്‍റെ കവര്‍ച്ച നടത്തിയ സംഭവത്തില്‍ പ്രതികളെ കണ്ടെത്താനാവാതെ പോലീസ്. വിരലടയാള വിദഗ്ധരും ഡോഗ് സ്‌ക്വാഡുമുള്‍പ്പെടെ അന്വേഷണം നടത്തിയിട്ടും നിരീക്ഷണ കാമറ ദൃശ്യങ്ങള്‍ പരിശോധിച്ചിട്ടും പ്രതികളിലേക്കെത്താന്‍ പോലീസിനായില്ല. ഈമാസം മൂന്നിനു വൈകുന്നേരമാണ് കുറ്റൂര്‍ മെയിന്‍ റോഡിലെ മടയമ്മക്കുളത്തെ വി.വി. കുഞ്ഞാമിനയുടെ പൂട്ടിക്കിടന്ന വീട്ടില്‍ കവര്‍ച്ച നടന്നതായി കണ്ടെത്തിയത്. വീടിന്‍റെ അടുക്കള വാതിലും കിണറില്‍നിന്നും വെള്ളമെടുക്കുന്നതിനുള്ള വാതിലും കുത്തിപ്പൊളിച്ചായിരുന്നു കവര്‍ച്ച. മകളുടെ വിവാഹത്തിനായി കരുതിവച്ചിരുന്ന 19,72,000 രൂപയുടെ സ്വര്‍ണാഭരണങ്ങളും 20,000 രൂപയും നഷ്‌ടപ്പെട്ടതായുള്ള കുഞ്ഞാമിനയുടെ പരാതിയില്‍ കേസെടുത്തായിരുന്നു പോലീസിന്‍റെ അന്വേഷണം. സമീപ പ്രദേശങ്ങളിലെ നിരീക്ഷണ കാമറ ദൃശ്യങ്ങള്‍ ശേഖരിച്ച് പോലീസ് പരിശോധിച്ചിരുന്നു. ഡോഗ് സ്‌ക്വാഡും വിരലടയാള വിദഗ്ധരും സംഭവസ്ഥലത്തെത്തി പരിശോധിച്ചിരുന്നു. കവര്‍ച്ചയ്ക്കു പിന്നിലുള്ളവരെ കണ്ടെത്താനായി പ്രത്യേക അന്വേഷണ സംഘത്തെയും നിയോഗിച്ചിരുന്നു. എന്നാല്‍ ആഴ്ചകള്‍ കഴിഞ്ഞിട്ടും പ്രതികളെ കണ്ടെത്താനായില്ല എന്നതാണ് അവസ്ഥ. തെളിവുകള്‍ അവശേഷിപ്പിക്കാതെ നടത്തിയ വിദഗ്ധമായ കവര്‍ച്ചയ്ക്കു പിന്നില്‍ കുപ്രസിദ്ധ കവര്‍ച്ചക്കാരാണെന്ന നിഗമനത്തില്‍ ഇത്തരം സംഘങ്ങളിലേക്കുള്ള അന്വേഷണത്തിലാണു പോലീസ്.

അമ്പാടിയുടെ അവധിക്കാലവും അനിയത്തിക്കുട്ടിയുടെ കടയും

ഇരിട്ടി: കളിയും ബഹളവും അടിയും പിടിയുമായി കുട്ടികളിൽ ചിലർ അവധിക്കാലം ആടിത്തിമിർക്കുന്പോൾ മറ്റൊരു കൂട്ടർ മൊബൈലുകളുടെയും റീൽസിന്‍റെയും ലോകത്താണ്. എന്നാൽ, അവധിക്കാലത്ത് വളയും കമ്മലും ഹെയർ ബാൻഡും ഹെയർ ക്ലിപ്പും നിർമിക്കുന്ന തിരക്കിലാണ് എടൂർ മുണ്ടയാംപറന്പിലെ സഹോദരങ്ങൾ. എളമ്പ സ്വദേശികളായ ഐക്കോടൻ കണ്ണൻ-നിഷ ദമ്പതികളുടെ മക്കളായ അനന്തുവും അനാമികയുമാണ് അവധിക്കാലം വ്യത്യസ്തമായ അനുഭവമാക്കുന്നത്. കൂലിപ്പണിക്കാരാണ് ഇവരുടെ അച്ഛനും അമ്മയും. പതിമൂന്നുകാരനായ അനന്തു എടൂർ സെന്‍റ് മേരീസ് ഹയർ സെക്കൻഡറി സ്കൂളിലെ ഒമ്പതാം ക്ലാസ് വിദ്യാർഥിയാണ്. ഒന്പതുകാരി അനാമിക മുണ്ടയാംപറമ്പ് ദേവസ്വം സ്കൂളിൽ നിന്ന് നാലാം ക്ലാസ് പൂർത്തിയാക്കി വെള്ളരിവയൽ സുഹ്റ യുപി സ്കൂളിൽ അഞ്ചാം ക്ലാസിലേക്ക് പോകാൻ തയാറെടുക്കുകയാണ്. വേനലവധി അടിച്ചുപൊളിച്ച് കളയുന്നതിന് പകരം വ്യത്യസ്തമായ എന്തെങ്കിലും ചെയ്യണമെന്ന ആഗ്രഹമാണ് അമ്പാടി അമ്മയോട് പങ്കുവച്ചത്. കുട്ടികളുടെ മനസിലെ ആഗ്രഹം പറഞ്ഞപ്പോൾ ഹെയർ ബാൻഡും ഹെയർ ക്ലിപ്പുകളും നിർമിക്കാനുള്ള അത്യാവശ്യം വസ്തുക്കൾ അമ്മ വാങ്ങി നൽകി. തികയാതെ വന്നതോടെ ആവശ്യവുമായി അച്ഛന്‍റെ അടുത്തെത്തി. ഇതിനിടെ നിർമിച്ച വസ്തുക്കൾ വിറ്റുതുടങ്ങിയതോടെ ആത്മവിശ്വാസം ലഭിച്ച അച്ഛനും സാധനങ്ങൾ വാങ്ങിക്കൊടുത്തതോടെ സംരംഭം വിപുലീകരിച്ചു. നിർമിച്ച വസ്തുക്കൾ ഭംഗിയായി പായ്ക്ക് ചെയ്ത് വിലയൊട്ടിച്ചപ്പോൾ പുറത്തുനിന്ന് നിർമിച്ചതുപോലെ തോന്നിച്ചു. നിരത്തിവച്ചിരിക്കുന്ന വളയും കമ്മലും ഹെയർ ബാൻഡും ഹെയർ ക്ലിപ്പും കണ്ടാൽ ഇവർ വെളിയിൽനിന്ന് വാങ്ങി വിലയെല്ലാം ഒട്ടിച്ച് വച്ചിരിക്കുന്നതാണെന്ന് ആരും സംശയിക്കുമെന്ന് തീർച്ച. അത്രയ്ക്കും പൂർണതയോടെയാണ് നിർമാണം. അന്പാടിയും അനുജത്തിയും നിർമാണം വിപുലമാക്കിയപ്പോൾ ബന്ധുക്കളായ ആര്യനന്ദ, അനിവിന്ദ്, അഭിനാദ് എന്നീ കുട്ടികളും സഹായികളായെത്തി. യൂട്യൂബാണ് ഇവരുടെ ഗുരുനാഥൻ. മുണ്ടയാംപറമ്പ് ദേവീ ക്ഷേത്രത്തിലെ മേടത്തിറ മഹോത്സവത്തിന് ഒരു കടയിട്ട് തങ്ങളുണ്ടാക്കിയ വസ്തുക്കൾ വിൽക്കണമെന്നാണ് അനിയത്തിക്കുട്ടിയുടെ ആഗ്രഹം. അതിനായി സംഘാടകരോട് അനുവാദവും വാങ്ങി. "അമ്പാടിയുടെ അനിയത്തിക്കട ' എന്ന പേരിൽ കടയിൽ ഒട്ടിക്കാനുള്ള ഫ്ലക്സും തയാറാക്കിയിട്ടുണ്ട്.

അദ്ഭുതകരമായി രക്ഷപ്പെട്ട ഡോക്‌ടർക്കും കുടുംബത്തിനും സ്വീകരണം നല്കി

മട്ടന്നൂർ: പഹൽഗാം ഭീകരാക്രമണത്തിൽനിന്ന് പാനൂരിലെ യുവ ഡോക്ടറും അദ്ഭുതകരമായി രക്ഷപ്പെട്ടു. പാനൂർ പൂക്കോത്തെ ഹോമിയോ ഡോക്ടർ റാഷിദ്‌ അബ്ദുള്ള (42), ഭാര്യ ഡോ. ഹബീബ (31), മക്കളായ ഷസിൻഷാൻ (11), ഹെബിൻഷാൻ (5) എന്നിവരാണ് തലനാരിഴയ്ക്ക് രക്ഷപ്പെട്ടത്. താഴ്വാരം നോക്കിക്കണ്ട് നടക്കുമ്പോൾ സൈന്യം പുറത്തുവിട്ട രേഖാചിത്രത്തിന് സമാനമായ രണ്ടു പേരെ തങ്ങൾ നേരിട്ട് കണ്ടിട്ടുണ്ടെന്നും മുഷിഞ്ഞ വേഷമാണെങ്കിലും പുൽത്തകിടിയിൽ ഇരിക്കുന്ന ഇരുവരും സൈനികരാണെന്നാണ് കരുതിയതെന്നും ഡോക്ടറും കുടുംബവും പറയുന്നു. മൂന്ന് കുതിരകളിലായി നാലു പേർ കുറച്ചകലെ നീങ്ങിയപ്പോഴേക്കും വെടിയൊച്ചയും ബഹളവും കേട്ടെന്നും ഡോക്ടർ പറഞ്ഞു. 50 മീറ്റർ അകലെ വച്ചാണ് വെടിയൊച്ച കേട്ടതെന്നും നൂറു കണക്കിന് കുതിരകൾ ഭയന്ന് ഓടിയെന്നും പിന്നീട് ചതുപ്പ് നിലങ്ങൾക്കും പാറക്കെട്ടുകൾക്കുമിടയിലൂടെ ഒരു കിലോമീറ്ററോളം കുഞ്ഞിനെ ഒക്കത്തെടുത്ത് ഓടിയാണ് രക്ഷപ്പെട്ടതെന്നും ഡോക്ടർ പറഞ്ഞു. കുതിരസവാരി പേടിച്ച് പഹൽഗാമിലേക്കുള്ള യാത്ര ഒഴിവാക്കിയതിനാൽ കണ്ണൂർ സ്വദേശികളായ 16 അംഗം രക്ഷപ്പെട്ടിരുന്നു. കരിയാട് കലാമന്ദിരത്തിൽ നിന്നും കിഴക്കയിൽ അശോകന്‍റെ നേതൃത്വത്തിൽ കാശ്മീരിലേക്ക് പോയവരാണ് യാത്ര വെട്ടിച്ചുരുക്കി നാട്ടിലേക്ക് മടങ്ങിയത്. എംഎൽഎമാരുൾപ്പടെയുള്ള മലയാളികൾ സംഭവസമയത്ത് സമീപ സ്ഥലങ്ങളിലുണ്ടായിരുന്നു. ജമ്മു കാഷ്‌മീരിലെ പഹൽഗാം ഭീകരാക്രമണത്തിൽ തലനാരിഴയ്ക്ക് രക്ഷപ്പെട്ട പാനൂരിലെ ഹോമിയോ ഡോക്ടർ റാഷിദ് അബ്ദുല്ലയും കുടുംബവും വ്യാഴാഴ്ച രാത്രി 12 ഓടെ കണ്ണൂർ വിമാനത്താവളത്തിൽ ഇറങ്ങി. കെ.പി. മോഹനൻ എംഎൽഎയുടെ നേതൃത്വത്തിൽ കുടുംബത്തെ സ്വീകരിച്ചു. പാനൂർ ബ്ലോക്ക് പഞ്ചായത്തംഗം കെ.പി.യൂസഫും എംഎൽഎയോടൊപ്പം ഉണ്ടായിരുന്നു.

പുത്തന്‍ അറിവുകള്‍ സൃഷ്ടിക്കുന്നവരാക്കി വിദ്യാര്‍ഥികളെ മാറ്റണം: മന്ത്രി ആര്‍. ബിന്ദു

കണ്ണൂർ: പുത്തന്‍ അറിവുകള്‍ സൃഷ്ടിക്കുന്നവരാകാന്‍ വിദ്യാര്‍ഥികളെ പ്രചോദിപ്പിക്കുക എന്നതാണ് അധ്യാപകരുടെ പുതിയദൗത്യമെന്ന് മന്ത്രി ആര്‍. ബിന്ദു. കണ്ണൂര്‍ ജില്ലാ വിദ്യാഭ്യാസ പരിശീലന കേന്ദ്രത്തിന്‍റെ ആഭിമുഖ്യത്തില്‍ ശിക്ഷക് സദനില്‍ സംഘടിപ്പിച്ച വിദ്യാഭ്യാസ സെമിനാര്‍ എന്‍ക്വയര്‍-2025 ന്‍റെ ഉദ്ഘാടനവും സര്‍വീസില്‍ നിന്ന് വിരമിക്കുന്നവര്‍ക്കുള്ള ആദരവും നിര്‍വഹിച്ചു പ്രസംഗിക്കുകയായിരുന്നു മന്ത്രി. വിവര സാങ്കേതിക വിദ്യയുടെ വികാസം മൂലം അറിവുശേഖരിക്കല്‍ വളരെ എളുപ്പമായെന്നും ഇത്തരത്തില്‍ ലഭിക്കുന്ന അറിവുകള്‍ ഉപയോഗിച്ച് സമൂഹത്തിനും മാനവരാശിക്കുതന്നെയും ഉപയോഗപ്പെടുത്താവുന്ന അറിവുകള്‍ സൃഷ്ടിക്കണമെന്നും മന്ത്രി പറഞ്ഞു. ഇന്ത്യയുടെ വിശാലമായ സംസ്‌കാരത്തില്‍ അലിഞ്ഞുചേര്‍ന്ന സാംസ്‌കാരിക ധാരകളെ തമസ്‌ക്കരിക്കാനും ചരിത്ര, ശാസ്ത്ര സത്യങ്ങളെ വക്രീകരിക്കാനുമുള്ള ശ്രമങ്ങള്‍ നടക്കുന്നുണ്ട്. വിദ്യാഭ്യാസത്തിന്‍റെ ഗുണമേന്മ നിലനിര്‍ത്താന്‍ അധ്യാപകര്‍ ജാഗരൂകരാകണം. ക്ലാസ് മുറികള്‍ അറിവുകളുടെ പ്രാഥമിക സ്രോതസുകളായിരുന്ന കാലം മാറിയ സാഹചര്യത്തില്‍ അധ്യാപനം പുനര്‍ നിര്‍വചിക്കപ്പെടണമെന്നും മന്ത്രി പറഞ്ഞു. കെ.വി. സുമേഷ് എം എല്‍ എ അധ്യക്ഷത വഹിച്ചു. സര്‍വീസില്‍ നിന്ന് വിരമിക്കുന്ന ഡയറ്റ് പ്രിന്‍സിപ്പല്‍ വി.വി. പ്രേമരാജന്‍, സീനിയര്‍ ലക്ചറര്‍ കെ.കെ സന്തോഷ് കുമാര്‍ എന്നിവര്‍ ആദരവ് ഏറ്റുവാങ്ങി.ജില്ലാപഞ്ചായത്ത് പ്രസിഡന്‍റ് കെ.കെ. രത്‌നകുമാരി, എസ് സി ആര്‍ ടി ഡയറക്ടര്‍ ആര്‍.കെ. ജയപ്രകാശ്, എന്‍ സി ആര്‍ ടി അസിസ്റ്റന്‍റ് പ്രഫ. മധുസൂദനന്‍ ഭരതാഞ്ജലി ഹയര്‍സെക്കന്‍ഡറി വിഭാഗം ആര്‍ഡിഡി ആര്‍ രാജേഷ് കുമാര്‍, കണ്ണൂര്‍ ഡിഡിഇ കെ.പി നിര്‍മല, വൊക്കേഷണല്‍ ഹയര്‍സെക്കൻഡറി എഡിഇ ആര്‍. ഉദയകുമാരി, സമഗ്രശിക്ഷാ കേരളം ഡിപിസി ഇ.സി. വിനോദ്, വിദ്യാകിരണം കോ ഓ-ഡിനേറ്റര്‍ കെ.സി. സുധീര്‍, കൈറ്റ് ജില്ലാ കോ-ഓഡിനേറ്റര്‍ കെ. സുരേന്ദ്രന്‍, ഡയറ്റ് സീനിയര്‍ ലക്ചറര്‍ ഡോ. എസ്.കെ. ജയദേവന്‍, ഡയറ്റ് ലക്ചറര്‍ കെ. രാകേഷ്, റിട്ട. സീനിയര്‍ ലക്ചറര്‍ പി.വി. പുരുഷോത്തമന്‍ എന്നിവർ പ്രസംഗിച്ചു.

വിദ്യാർഥിനികൾക്ക് നേരേ ലൈംഗികാതിക്രമം:‌ ഗവ. മെഡിക്കൽ കോളജ് ജീവനക്കാരന് സസ്പെൻഷൻ

പരിയാരം: കണ്ണൂര്‍ ഗവ.മെഡിക്കല്‍ കോളജില്‍ വിദ്യാർഥിനികൾക്കെതിരെ ലൈംഗികാതിക്രമണം നടത്തിയെന്ന പരാതിയിൽ താത്ക്കാലിക ജീവനക്കാരനെ സസ്പെൻഡ് ചെയ്തു. കാർഡിയോളജി കാത്ത് ലാബിൽ ജോലി ചെയ്യുന്ന ശ്രീജിത്തിനെതിരെ പന്ത്രണ്ടോളം പരാതികൾ ലഭിച്ചതിനെ തുടർന്നാണ് നടപടി. പരാതി സംബന്ധിച്ച് വകുപ്പ് മേധാവി ഇന്‍റേണല്‍ കമ്മറ്റിക്ക് കൈമാറിയിട്ടുണ്ട്. തൊഴിലിടങ്ങളിൽ സ്ത്രീകൾക്ക് നേരെയുള്ള ലൈംഗികാതിക്രമങ്ങൾ തടയുന്നതിനുള്ള പോഷ് ആക്ട് പ്രകാരമാണ് മൂന്നംഗ ഇന്‍റേണൽ കമ്മിറ്റി അന്വേഷണം നടത്തുന്നത്. ഏറെ ഗൗരവത്തോടേയാണ് വിഷയം കാണുന്നതെന്നും അതിനാലാണ് ഉടനടി സംഭവത്തിൽ അന്വേഷണം പ്രഖ്യാപിച്ച് ഇയാളെ സസ്പെൻഡ് ചെയ്തതെന്ന് മെഡിക്കൽ കോളജ് വൃത്തങ്ങൾ അറിയിച്ചു. മുൻ കാലങ്ങളിലും ഇയാള്‍ക്കെതിരെ സമാനമായ പരാതികള്‍ ഉയർന്നിരുന്നെന്നും ആരോപണമുണ്ട്. താത്കാലിക തസ്തികയില്‍ ജോലിക്ക് കയറിയ ഇയാള്‍ വര്‍ഷങ്ങളായി ഇവിടെ തുടരുകയാണ്. ഇയാൾ വിദ്യാർഥികളെ ശല്യം ചെയ്തതായി അന്വേഷണ റിപ്പോര്‍ട്ടില്‍ വ്യക്തമായാൽ പരാതി പോലീസിന് കൈമാറുമെന്നാണ് വിവരം.

സ്റ്റാമ്പുകളിൽ നിറയുന്ന ഫ്രാൻസിസ് പാപ്പ

കാലിച്ചാനടുക്കം: ഫ്രാൻസിസ് മാർപാപ്പയുടെ വിവിധ പശ്ചാത്തലങ്ങളിലുള്ള ചിത്രങ്ങളുമായി വത്തിക്കാൻ പുറത്തിറക്കിയ തപാൽ സ്റ്റാമ്പുകളുടെ അപൂർവ ശേഖരവുമായി കാലിച്ചാനടുക്കത്തെ ടോം വടക്കുംമൂല. അതത് കാലഘട്ടങ്ങളിലെ മാർപാപ്പമാരുടെ ചിത്രങ്ങളുമായി വത്തിക്കാൻ സ്റ്റാമ്പുകൾ പുറത്തിറക്കാറുണ്ട്. ഫ്രാൻസിസ് പാപ്പയുടെ ചിത്രങ്ങളുമായി ഇറങ്ങിയ 15 സ്റ്റാമ്പുകളാണ് ടോമിന്‍റെ ശേഖരത്തിലുള്ളത്. ദീർഘകാലം മാർപാപ്പയായിരുന്ന ജോൺ പോൾ രണ്ടാമന്‍റെ ചിത്രങ്ങളുമായി ഇറങ്ങിയ നാനൂറോളം സ്റ്റാമ്പുകളും ടോമിന്‍റെ ശേഖരത്തിലുണ്ട്. വത്തിക്കാൻ പുറത്തിറക്കിയ സ്റ്റാമ്പുകൾക്ക് പുറമേ മാർപാപ്പയുടെ വിദേശ സന്ദർശനവേളകളിൽ ബഹുമാനസൂചകമായി അതതു രാജ്യങ്ങൾ പുറത്തിറക്കിയ സ്റ്റാമ്പുകളും ഇക്കൂട്ടത്തിലുണ്ട്. മഹാത്മാഗാന്ധി, ജവഹർലാൽ നെഹ്റു, മദർ തെരേസ, ജോൺ കെന്നഡി, ഇന്ദിരാഗാന്ധി എന്നീ ലോകനേതാക്കളുമായി ബന്ധപ്പെട്ട സ്റ്റാമ്പുകളും ടോം വടക്കുംമൂലയുടെ ശേഖരത്തിലുണ്ട്. സ്കൂൾ വിദ്യാർഥിയായിരിക്കേ 11-ാം വയസിലാണ് ടോം സ്റ്റാമ്പ് ശേഖരണവും നാണയശേഖരണവും തുടങ്ങിയത്. ഇപ്പോൾ 61-ാം വയസിലെത്തി നിൽക്കുമ്പോൾ സാമൂഹ്യപ്രവർത്തനങ്ങൾക്കൊപ്പം മാതൃകാപരമായ സ്റ്റാമ്പ്, നാണയ ശേഖരങ്ങളുടെ ഉടമ കൂടിയാകാൻ കഴിഞ്ഞതിന്‍റെ ചാരിതാർഥ്യത്തിലാണ് ടോം വടക്കുംമൂല.

ഫ്രാൻസിസ് പാപ്പയെ അനുസ്മരിച്ച് കണ്ണൂർ രൂപത

കണ്ണൂർ: ഫ്രാൻസിസ് പാപ്പയോടുള്ള ആദരസൂചകമായി കണ്ണൂർ രൂപതയുടെ ആഭിമുഖ്യത്തിൽ ചേംബർ ഹാളിൽ അനുസ്മരണ പരിപാടികൾ നടന്നു. സമാനതകളില്ലാത്ത നേതൃമികവിലൂടെ സുവിശേഷ മൂല്യങ്ങൾ ലോകത്തിന് പകർന്ന വിശ്വപൗരനാണ് ഫ്രാൻസിസ് പാപ്പയെന്ന് യോഗ ത്തിൽ അധ്യക്ഷത വഹിച്ച കണ്ണൂർ ബിഷപ് ഡോ. അലക്സ് വടക്കുംതല അനു സ്മ രിച്ചു. കരുതലിന്‍റേയും സ്നേഹത്തിന്‍റേയും ഒരു തൂവൽസ്പർശം പോലെ ഇന്നും ഏവരുടെയും സ്മരണകളിൽ നിറഞ്ഞു നില്ക്കുന്ന വ്യക്തിത്വമാണ് ഫ്രാൻസിസ് പാപ്പയെന്ന് ബിഷപ് പറഞ്ഞു. മാനുഷിക സ്നേഹത്തിന്‍റെ ഉദാത്ത മാതൃകയായിരുന്നു കാലം ചെയ്ത ഫ്രാൻസിസ് പാപ്പയെന്ന് കണ്ണൂർ മേയർ മുസ്ലിഹ് മഠത്തിൽ അനുസ്മരണ പ്രസംഗത്തിൽ പറഞ്ഞു. കാലാവസ്ഥ വ്യതിയാനവും പരിസ്ഥിതിയും പോലുള്ള വിഷയങ്ങളിൽ കൃത്യമായ നിലപാടുകളുമായി മുന്നോട്ടു പോകാൻ ഫ്രാൻസിസ് പാപ്പയ്ക്ക് കഴിഞ്ഞിരുന്നുവെന്നും മേയർ അനുസ്മരിച്ചു. കെ.വി. സുമേഷ് എംഎൽഎ, സ്വാമി അമൃത കൂപാനന്ദപുരി , അബ്ദുൾ കരിം ചേലേരി, സോണി സെബാസ്റ്റ്യൻ, കെ.കെ. വിനോദ്കുമാർ, ഉർസുലൈൻ പ്രൊവിൻഷ്യൽ സൂപ്പീരിയർ സിസ്റ്റർ വിനയ യുഎംഐ, ഫാ. സ്കറിയ കല്ലൂർ, ഷിബു ഫെർണാണ്ടസ്, മോൺ ഡോ. ക്ലാരൻസ് പാലിയത്ത് എന്നിവർ സംസാരിച്ചു.

മാവിൽനിന്ന് വീണ് റിട്ട. എസ്ഐക്ക് ദാരുണാന്ത്യം

കേളകം: ഇരട്ടത്തോടിനു സമീപം മാവിൽ നിന്ന് വീണ് റിട്ട. എസ്ഐക്ക് ദാരുണാന്ത്യം. കേളകത്തെ തടത്തിൽ ജോണി (66) യാണ് മരിച്ചത്. ഇന്നലെ ഉച്ചകഴിഞ്ഞ് മൂന്നോടെ മുറ്റത്തെ മാവിൽനിന്ന് മാങ്ങ പറിക്കുന്നതിനിടെ കാൽവഴുതി വീഴുകയായിരുന്നു. തലയ്ക്ക് ഗുരുതരമായി പരിക്കേറ്റ ജോണിയെ കേളകത്തെ സ്വകാര്യ ആശുപത്രിയിലെ പ്രാഥമിക ശുശ്രൂഷയ്ക്കു ശേഷം കണ്ണൂരിലെ ആശുപത്രിയിലേക്ക് കൊണ്ടുപോകും വഴിയായിരുന്നു മരണം. കേളകം മണ്ഡലം കോൺഗ്രസ് കമ്മിറ്റി ഭാരവാഹിയും കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ പേരാവൂർ നിയോജകമണ്ഡലം കമ്മിറ്റി ഭാരവാഹിയുമായിരുന്നു. ഭാര്യ മേരി ചേരിയിൽ കുടുംബാംഗം. മകൻ: ജോൺ. സംസ്കാരം പിന്നീട് നടക്കും.

ഇരിട്ടി ഒയിസ്‌ക ഭാരവാഹികള്‍ സ്ഥാനമേറ്റു

ഇരിട്ടി: ഇരിട്ടി ഒയിസ്‌കയുടെ പുതിയ ഭാരവാഹികളുടെ സ്ഥാനാരോഹണ ചടങ്ങ് നിയുക്ത ജില്ലാ പ്രസിഡന്‍റ് വിനോദ് ചന്ദ്രന്‍ ഉദ്ഘാടനം ചെയ്തു. ഇരിട്ടി ചാപ്റ്റര്‍ പ്രസിഡന്‍റ് ബാബു ജോസഫ് അധ്യക്ഷത വഹിച്ചു. ജില്ലാ പ്രസിഡന്‍റ് ജെയ്‌സണ്‍ ബേസില്‍, സെക്രട്ടറി കക്കോത്ത് പ്രഭാകരന്‍, ഇരിട്ടി ചാപ്റ്റര്‍ സെക്രട്ടറി ഡോ. ജി. ശിവരാമകൃഷ്ണന്‍, വി.ടി. തോമസ്, അഡ്വ. പി.കെ. ആന്‍റണി, എ.കെ. ഹസന്‍, ദിവ്യ ദേവദാസ്, റെജി തോമസ്, ജോയ് പടിയൂര്‍, ജെയിംസ് പ്ലാക്കിയില്‍, മനോജ് അമ്മ, പ്രദീപ് കുമാര്‍ കാക്കറയില്‍ എന്നിവര്‍ പ്രസംഗിച്ചു. ഇരിട്ടി മേഖലയില്‍ പരിസ്ഥിതി സംരക്ഷണവുമായി ബന്ധപ്പെട്ട് ഒയിസ്‌ക ഇന്‍റര്‍നാഷണലിനു നൂതന പ്രോജക്ടുകള്‍ സമര്‍പ്പിക്കുമെന്ന് ഭാരവാഹികള്‍ അറിയിച്ചു. ഭാരവാഹികള്‍: ഡോ. ജി. ശിവരാമകൃഷ്ണന്‍-പ്രസിഡന്‍റ്, എ.കെ. ഹസന്‍-വൈസ് പ്രസിഡന്‍റ്, അഡ്വ. പി.കെ. ആന്‍റണി -സെക്രട്ടറി, ഹര്‍ഷന്‍ ഇമ്മാനുവേല്‍-ജോയിന്‍റ് സെക്രട്ടറി, ഷാജി ജോസ് കുറ്റിയില്‍-ട്രഷറര്‍.

പയ്യാന്പലത്തെ വിറക് ക്ഷാമം: കൗൺസിൽ യോഗത്തിൽ പ്രതിപക്ഷം മേയറെ വളഞ്ഞു

കണ്ണൂര്‍: പയ്യാന്പലം ശ്മശാനത്തിൽ മൃതദേഹം സംസ്കരിക്കാൻ വിറകില്ലാതായ സംഭവത്തിൽ കോർപറേഷന്‍ യോഗത്തിൽ ബഹളം. മൃതദേഹങ്ങളോട് കോർപറേഷൻ അനാദരവ് കാട്ടുകയാണെന്നാരോപിച്ച് പ്രതിപക്ഷാംഗങ്ങൾ യോഗത്തിനിടെ പ്ലക്കാർഡുകളുമായി മേയറെ വളഞ്ഞ് മുദ്രാവാക്യം മുഴക്കി. ഫ്രാന്‍സിസ് മാർപാപ്പയുടെ വിയോഗത്തിലും കശ്മീരിലെ പഹല്‍ഗ്രാം ആക്രമണത്തില്‍ മരണപ്പെട്ടവര്‍ക്കും അനുശോചനം രേഖപ്പെടുത്തിയാണ് കൗണ്‍സില്‍ യോഗ നടപടികള്‍ ആരംഭിച്ചത്. ഇതിനു ശേഷം അജണ്ടയിലേക്ക് കടക്കുന്നതിന് മുമ്പ് തന്നെ പയ്യാന്പലം വിഷയം ചർച്ച ചെയ്യണമെന്ന് എൽഡിഎഫ് അംഗം ടി. രവീന്ദ്രൻ ആവശ്യപ്പെട്ടു. ഇതിനിടെ ബിജെപി കൗൺസിലറായ വി.കെ.ഷൈജു പ്ലക്കാർഡുമായി കൗൺസിൽ ഹാളിന്‍റെ മധ്യത്തിൽ ഇരുന്ന് പ്രതിഷേധമാരംഭിച്ചിരുന്നു. അജണ്ടകൾ പൂർത്തിയാക്കിയ ശേഷം വിഷയം ചർച്ച ചെയ്യാമെന്ന് മേയർ മുസ്‌ലിഹ് പറഞ്ഞെങ്കിലും പ്രതിപക്ഷം അംഗീകരിച്ചില്ല. തുടർന്ന് മേയറുടെ ഡയസിനു ചുറ്റും നിന്ന് മുദ്രാവാക്യം വിളിക്കുകയായിരുന്നു. മേയർക്ക് സംരക്ഷണം തീർത്ത് യുഡിഎഫ് അംഗങ്ങൾ പ്രതിഷേധക്കാരെ പിന്തിരിപ്പിക്കാൻ ശ്രമിച്ചത് വാക്കേറ്റത്തിനിടയാക്കി. ഇതിനിടെ മേയർ അജണ്ടകൾ വായിച്ചു തീർത്ത് നടപടികൾ പൂർത്തിയായതായി പ്രഖ്യാപിച്ചു. പ്രതിപക്ഷാഗംങ്ങൾ കൗൺസിൽ ഹാളിന് പുറത്തേക്ക് നീങ്ങിയും മുദ്രാവാക്യം വിളിച്ചു. പ്രതിപക്ഷ പ്രതിഷേധം പ്രഹസനം: മേയർ കണ്ണൂർ: തദ്ദേശ തെരഞ്ഞെടുപ്പ് വരാനിരിക്കെ നിസാര വിഷയങ്ങൾ പോലും പെരുപ്പിച്ച് കാട്ടി പ്രതിപക്ഷം പ്രഹസനം കളിക്കുകയാണെന്ന് മേയർ മുസ്‌ലിഹ് മഠത്തിൽ. അനാവശ്യ പ്രതിഷേധങ്ങളിലൂടെ പ്രതിപക്ഷം കോർപറേഷന്‍റെ വികസന പദ്ധതികൾക്ക് തടസം നിൽക്കുകയാണ്. ഇതിന് മുമ്പും ചേലോറ ട്രഞ്ചിംഗ് ഗ്രൗണ്ടും പയ്യാമ്പലം ശ്മശാനവും ഉയർത്തി കൗൺസിൽ യോഗങ്ങളിൽ പ്രതിപക്ഷം തടസം സൃഷ്ടിച്ചിരുന്നു. മൃതദേഹ സംസ്കാരത്തിൽ പോലും രാഷ്ട്രീയം കലർത്തി നേട്ടം കൊയ്യാൻ പറ്റുമോ എന്ന ശ്രമത്തിലാണ് സിപിഎമ്മും ബിജെപിയും. ഇവർ പ്രചരിപ്പിക്കുന്നതു പോലെയുള്ള ഒരു സാഹചര്യവും പയ്യാന്പലത്ത് ഉണ്ടായിട്ടില്ല. പ്രസ്തുത ദിവസം തന്നെ ആവശ്യമായ വിറക് ശ്മശാനത്തില്‍ ഇറക്കിയിട്ടുണ്ട്. കൂടാതെ ഡിപ്പാര്‍ട്ട്മെന്‍റലായി തന്നെ 15 ടണ്ണോളം വിറക് ഇറക്കി സ്റ്റോക്ക് ചെയ്തിട്ടുമുണ്ടെന്നും മേയർ പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]