റെഗുലേറ്ററി കമ്മീഷന് അംഗീകരിച്ച 2022-2027 കാലയളവിലെ വരവു കമ്മി റിപ്പോര്‍ട്ടിന്‍റെ അടിസ്ഥാനത്തിലാണ് കെഎസ്ഇബി നിരക്ക് പരിഷ്കരണം ആവശ്യപ്പെട്ടത്. അതിനാല്‍തന്നെ നിരക്കുവര്‍ധനയുണ്ടാകും. എന്നാല്‍ കെഎസ്ഇബിയുടെ ശിപാര്‍ശ മുഴുവനായും അംഗീകരിക്കാനും സാധ്യതയില്ല.
2023ല് നാല് വര്‍ഷത്തെ നിരക്ക് പരിഷ്കരണ ശിപാര്‍ശയാണ് കെഎസ്ഇബി നല്‍കിയതെങ്കിലും എട്ടു മാസത്തേക്ക് മാത്രമാണ് കമ്മീഷന് പരിഷ്കരണം നടപ്പിലാക്കിയത്. ഇത്തവണ 2024 ജൂലൈ ഒന്നു മുതല്‍ 2027 മാര്‍ച്ച് 31 വരെയുള്ള കാലയളവിലേക്കാണ് കെഎസ്ഇബി നിരക്കുവര്‍ധന ആവശ്യപ്പെട്ടിരിക്കുന്നത്.
അതേസമയം, 2023-2024 വര്‍ഷത്തെ കെഎസ്ഇബിയുടെ പ്രകടന റിപ്പോര്‍ട്ട് നവംബര്‍ 30 ന് മുന്‍പ് സമര്‍പ്പിക്കാന്‍ കമ്മീഷന് നേരത്തേ നിര്‍ദേശിച്ചിരുന്നു. 2025 ലെ നിരക്ക് പരിഷ്കരണം ഈ റിപ്പോര്‍ട്ട് വിലയിരുത്തിയ ശേഷം മതിയെന്ന് കമ്മീഷന് തീരുമാനിക്കാനുമിടയുണ്ടെന്നാണ് വിവരം.