മാള: വിശുദ്ധ മറിയം ത്രേസ്യ- ധന്യൻ ഫാ. ജോസഫ് വിതയത്തിൽ തീർഥാടന കേന്ദ്രത്തിൽ വിശുദ്ധ മറിയം ത്രേസ്യയുടെ തിരുനാൾ നാളെ നടക്കും. കുടുംബങ്ങളുടെ മധ്യസ്ഥയായ വിശുദ്ധ മറിയം ത്രേസ്യയുടെ തിരുനാൾ ദിനത്തിൽ രാവിലെ രാവിലെ 9.30നുളള ആഘോഷമായ തിരുനാൾ കുർബാനയിൽ ഇരിങ്ങാലക്കുട രൂപത ബിഷപ് മാർ പോളി കണ്ണൂക്കാടൻ മുഖ്യകാർമികനാകും.
രാവിലെ മുതൽ ആറ്, ഏഴ്, ഉച്ചയ്ക്ക് 12, ഉച്ചതിരിഞ്ഞ് മൂന്ന്, ഏഴ് സമയങ്ങളിൽ ദിവൃബലി. രാവിലെ 8.30ന് നേർച്ചഭക്ഷണം ആശീർവദിച്ച് വിതരണം തുടങ്ങും. ഉച്ചതിരിഞ്ഞ് മൂന്നിനുള്ള ദിവ്യബലിയെ തുടർന്ന് വിശുദ്ധയുടെ തിരുശേഷിപ്പും വഹിച്ചുകൊണ്ടുള്ള ഭക്തിനിർഭരമായ തിരുനാൾ പ്രദക്ഷിണം. തുടർന്ന് തിരുശേഷിപ്പ് വണക്കം. എട്ടാമിട തിരുനാൾ 15ന് ആഘോഷിക്കും. അന്ന് രാവിലെ 10.30ന് ആഘോഷമായ ദിവ്യബലി. തുടർന്ന് പ്രദക്ഷിണം, തിരുശേഷിപ്പ് വണക്കം എന്നിവ നടക്കും.
തിരുനാളിന്‍റെ കൊടിയേറ്റം ഷംഷാബാദ് രൂപത മെത്രാൻ മാർ റാഫേൽ തട്ടിൽ നിർവഹിച്ചു. തുടർന്നുള്ള നവനാൾ ദിവസങ്ങളിൽ ദിവ്യബലി, നൊവേന, ലദീഞ്ഞ്, സന്ദേശം, പ്രദക്ഷിണം എന്നിവ നടക്കുന്നുണ്ട്. മെത്രാൻമാരായ മാർ തോമസ് തറയിൽ, മാർ സെബാസ്റ്റ്യൻ വാണിയപുരക്കൽ, ഡോ. ഗീവർഗീസ് മാർ അപ്രേം, ഡോ. വർഗീസ് ചക്കാലക്കൽ, മാർ ടോണി നീലങ്കാവിൽ, മാർ അലക്സ് താരാമംഗലം, മാർ മാത്യു വാണിയകിഴക്കേൽ, മാർ ജോർജ് വലിയമറ്റം എന്നിവർ ഓരോ ദിവസവും മുഖ്യകാർമികരാകുന്നു. തിരുനാളിന് മുന്നോടിയായി കഴിഞ്ഞ ദിവസങ്ങളിൽ കുടുംബ സംഗമവും ഹോളിഫാമിലി അത്മായ കൂട്ടായ്മയും നടത്തി.
തിരുനാളിന്‍റെ വിജയത്തിനായി മോണ് ജോസ് മഞ്ഞളി ചെയർമാനായി, തീർഥാടന കേന്ദ്രം റെക്ടർ ഫാ. ജോണ് കവലക്കാട്ട്, പ്രമോട്ടർ ഫാ. സെബാസ്റ്റ്യൻ അരിക്കാട്ട്, ഹോളിഫാമിലി സന്യാസിനി സമൂഹത്തിന്‍റെ സുപ്പീരിയർ ജനറൽ മദർ ആനി കുര്യാക്കോസ്, അഡ്മിനിസ്ട്രേറ്ററും ജനറൽ കണ്‍വീനറുമായ സിസ്റ്റർ എൽസി സേവ്യർ, ജനറൽ കണ്‍വീനർ ജോസ് പോൾ ചെതലൻ, വൈസ് പോസ്റ്റുലേറ്റർ സിസ്റ്റർ റോസ്മിൻ മാത്യു തുടങ്ങിയവരുടെ നേതൃത്വത്തിൽ വിവിധ കമ്മിറ്റികൾ പ്രവർത്തിക്കുന്നു