ADVERTISEMENT

ADVERTISEMENT

ഭിന്നശേഷിക്കാർക്ക് സ്‌കൂട്ടർ വിതരണം

തളിപ്പറമ്പ്: തളിപ്പറമ്പ് നഗരസഭ 2024-25 വാർഷിക പദ്ധതിയിൽ ഉൾപ്പെടുത്തി ഭിന്നശേഷിക്കാരായ ഗുണഭോക്താക്കൾക്ക് സൈഡ് വീൽ ഘടിപ്പിച്ച സ്കൂട്ടർ വിതരണം ചെയ്തു.

തളിപ്പറമ്പ് നഗരസഭ ചെയർപേഴ്സൺ മുർഷിദ കൊങ്ങായി വിതരണം ഉദ്ഘാടനം ചെയ്തു. ക്ഷേമകാര്യ സ്ഥിരം സമിതി അധ്യക്ഷ പി. രജുല അധ്യക്ഷത വഹിച്ചു.

സ്ഥിരം സമിതി അധ്യക്ഷന്മാരായ എം.കെ. ഷബിത, പി.പി. മുഹമ്മദ്‌ നിസാർ, കെ.പി. കദീജ, കൗൺസിലർമാരായ സലീം കൊടിയിൽ, സി.വി. ഗിരീശൻ, എം.പി. സജീറ, ഐസിഡിഎസ് സൂപ്പർ വൈസർ സ്മിത കെ. കുന്നിൽ എന്നിവർ പ്രസംഗിച്ചു.

ADVERTISEMENT

ആരാധനാ സ്വാതന്ത്ര്യം ഇല്ലാതാക്കരുത്: കത്തോലിക്ക കോൺഗ്രസ്

പയ്യാവൂർ: മതസൗഹാർദ രാജ്യമായ ഇന്ത്യയിൽ എല്ലാ മതവിഭാഗങ്ങൾക്കും ആരാധനയ്ക്കും പ്രാർഥനയ്ക്കുമുള്ള സ്വാതന്ത്ര്യം ക്രമസമാധാനത്തിന്‍റെ പേരുപറഞ്ഞ് തടയുന്നത് അപലനീയമാണെന്ന് കത്തോലിക്ക കോൺഗ്രസ് തലശേരി അതിരൂപത എക്സിക്യൂട്ടീവ് കമ്മിറ്റി യോഗം അഭിപ്രായപ്പെട്ടു. ഡൽഹിയിൽ വിശുദ്ധവാരത്തോടനുബന്ധിച്ചുള്ള ഓശാന ഞായർ പ്രദക്ഷിണം നടത്താൻ പാടില്ലെന്ന സർക്കാർ നിലപാട് ഭാരതത്തിലെ പൗരന്മാർക്കുള്ള ആരാധന സ്വാതന്ത്ര്യം തടയുന്നതിനു തുല്യമാണെന്നും വടക്കേ ഇന്ത്യൻ സംസ്ഥാനങ്ങളിൽ ക്രൈസ്തവ പുരോഹിതർക്കെതിരെയും വിശ്വാസികൾക്കെതിരെയും ആരാധനാലയങ്ങൾക്കെതിരെയും വർധിച്ചുവരുന്ന ആക്രമണങ്ങളിൽ യോഗം പ്രതിഷേധിച്ചു. വായാട്ടുപറമ്പ് സെന്‍റ് ജോസഫ്സ് ഫൊറോന പാരിഷ് ഹാളിൽ ചേർന്ന യോഗം റവ.ഡോ. തോമസ് തെങ്ങുംപള്ളിൽ ഉദ്ഘാടനം ചെയ്തു. അതിരൂപത വൈസ് പ്രസിഡന്‍റ് ബെന്നിച്ചൻ മഠത്തിനകം അധ്യക്ഷത വഹിച്ചു. ഗ്ലോബൽ ഡയറക്‌ടർ റവ. ഡോ. ഫിലിപ്പ് കവിയിൽ മുഖ്യപ്രഭാഷണവും ഫൊറോന ഡയറക്‌ടർ ഫാ. ജോസഫ് ഈനാച്ചേരി അനുഗ്രഹ പ്രഭാഷണവും നടത്തി. അതിരൂപത ജനറൽ സെക്രട്ടറി ജിമ്മി ആയിത്തമറ്റം, ട്രഷറർ സുരേഷ് കാഞ്ഞിരത്തിങ്കൽ, ടോമി കണയങ്കൽ, ഐ.സി. മേരി, ഷിനോ പാറയ്ക്കൽ, ജെയ്സൺ അട്ടാറിമാക്കൽ, ജോർജ് കാനാട്ട്, ജോസ് പുത്തൻപുര, മാത്യു വള്ളോംകോട്ട്, ബിജു ഒറ്റപ്ലാക്കൽ, തോമസ് വർഗീസ്, ബെന്നി ചേരിയ്ക്കത്തടത്തിൽ, ബിജു മണ്ഡപം, ജോസഫ് മാത്യു കൈതമറ്റം, ബേബി കോയിക്കൽ, ഷാജൻ, സാജു പുത്തൻപുര, സാജു പടിഞ്ഞാറേട്ട് എന്നിവർ പ്രസംഗിച്ചു. കത്തോലിക്ക കോൺഗ്രസിന്‍റെ ആഭിമുഖ്യത്തിൽ സംഘടിപ്പിക്കുന്ന സാമുദായിക ശാക്തീകരണ റാലിയും പൊതു സമ്മേളനവും 26, 27 തീയതികളിൽ പാലക്കാട് നടക്കുമെന്ന് ഭാരവാഹികൾ അറിയിച്ചു.

അന്ത്യത്താഴ സ്മരണയിൽ പെസഹ ആചരിച്ചു

കണ്ണൂർ: ക്രിസ്തുവിന്‍റെ അന്ത്യത്താഴത്തിന്‍റെ ഓർമയിൽ ക്രൈസ്തവർ പെസഹ ആചരിച്ചു. പള്ളികളിൽ വിശുദ്ധ കുർബാനയ്ക്കൊപ്പം കാൽകഴുകൽ ശുശ്രുഷയും നടന്നു. അന്ത്യത്താഴത്തിനു മുന്പ് ക്രിസ്തു ശിഷ്യൻമാരുടെ കാൽ കഴുകിയതിനെ അനുസ്മരിച്ച് പള്ളികളിൽ വൈദികർ വിശ്വാസികളുടെ കാൽകഴുകി ചുംബിച്ചു. വൈകുന്നേരങ്ങളിൽ പള്ളികളിലും വീടുകളിലും അപ്പം മുറിക്കൽ ശുശ്രൂഷയും നടന്നു. തലശേരി സെന്‍റ് ജോസഫ് കത്തീഡ്രലിൽ നടന്ന കാൽകഴുകൽ ശുശ്രൂഷയ്ക്ക് ആർച്ച്ബിഷപ് മാർ ജോസഫ് പാംപ്ലാനി നേതൃത്വം നൽകി. സെന്‍റ് ജോസഫ് കത്തീഡ്രൽ വികാരി ഫാ.ജോർജ് കരോട്ട്, ഫാ.ജോൺ മുണ്ടോളിക്കൽ, ഫാ.ജോസഫ് മാളക്കാരൻ, ഫാ.കുര്യാക്കോസ് പ്ലാവുനിൽക്കുംപറന്പിൽ എന്നിവർ സഹകാർമികരായിരുന്നു. കണ്ണൂർ ശ്രീപുരം സെന്‍റ് മേരീസ് പള്ളിയിൽ കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ പെസഹാ തിരുകർമ്മങ്ങൾക്ക് നേതൃത്വം നല്കി. ഇടവ വികാരി ഫാ.ജോയി കട്ടിയാങ്കൽ, അസി.വികാരി ഫാ.ജോൺസൺ മാരിയിൽ എന്നിവർ സഹകാർമികരായിരുന്നു. ബർണശേരി ഹോളി ട്രിനിറ്റി കത്തീഡ്രലിൽ നടന്ന പെസഹ തിരുക്കർമങ്ങൾക്ക് കണ്ണൂർ ബിഷപ് ഡോ.അലക്സ് വടക്കുംതലയും തലശേരി ഹോളി റോസറി പള്ളിയിൽ കണ്ണൂർ രൂപത സഹായമെത്രാൻ ഡോ. ഡെന്നിസ് കുറുപ്പശേരിലും മുഖ്യകാർമികത്വം വഹിച്ചു. ദുഃഖ വെള്ളി ദിനാചരണമായ ഇന്ന് പള്ളികളിൽ ഇന്ന് പീഢാസഹന അനുസ്മരണ ശുശ്രൂഷ, കുരിശാരാധന, കുരിശിന്‍റെ വഴി എന്നിവ നടക്കും.

മലയോര ഹൈവേയിൽ പാഴ്സൽ ലോറി അപകടത്തിൽപ്പെട്ടു

നടുവിൽ: മലയോര ഹൈവേയിൽ പാഴ്സൽ ലോറി അപകടത്തിൽപ്പെട്ടു. ഇന്നലെ പുലർച്ചെ 5.30 ഓടെ താവുകുന്ന് രണ്ടാം വളവിലായിരുന്നു അപകടം. ബംഗളൂരുവിൽ നിന്ന് ആലക്കോട്ടേക്ക് പോവുകയായിരുന്ന പാഴ്സൽ ലോറിയാണ് അപകടത്തിൽപ്പെട്ടത്. വളവിൽ നിന്ന് താഴ്ചയിലേക്ക് വാഹനത്തിന്‍റെ മുൻഭാഗം താഴ്ന്ന നിലയിലാണുള്ളത്. ഡ്രൈവർ മാത്രമേ ഉണ്ടായിരുന്നുള്ളു. ആർക്കും പരിക്കില്ല. ഈ മേഖലയിൽ നിരവധി അപകടങ്ങളാണ് ഉണ്ടാകുന്നത്.

പ്രകൃതി ദുരന്തങ്ങളിൽ ജാഗ്രതയും ശാസ്ത്രീയ ആസൂത്രണവും അനിവാര്യം

കണ്ണൂർ: കാലാവസ്ഥാ പ്രതിസന്ധിയുടെ ഭാഗമായി ഉണ്ടാവുന്ന പ്രകൃതി ദുരന്തങ്ങൾ കേരളത്തിലെ ഏതു പ്രദേശത്തും ഏതു കാലത്തും സംഭവിക്കാവുന്നതാണെന്നും അതിനെ നേരിടാൻ ജാഗ്രതയും ശാസ്ത്രീയമായ ആസൂത്രണവും അനിവാര്യമാണെന്നും കുസാറ്റിലെ ശാസ്ത്രജ്ഞൻ ഡോ. എസ്. അഭിലാഷ്. കേരള ശാസ്ത്രസാഹിത്യ പരിഷത്ത് ജില്ലാ സമ്മേളനം ചെറുതാഴം ഗവ. ഹയർസെക്കൻഡറി സ്കൂളിൽ ഉദ്ഘാടനം ചെയ്ത് കാലാവസ്ഥയും അതിജീവനവും എന്ന വിഷയത്തിൽ ക്ലാസെടുക്കുകയായിരുന്നു അദ്ദേഹം. കർണാടക ബിജിവിഎസ് വൈസ് പ്രസിഡന്‍റ് ഡോ. ശുഭാങ്കർ ചക്രവർത്തി അഖിലേന്ത്യാതലത്തിൽ ജനകീയ ശാസ്ത്ര പ്രസ്ഥാനം വഹിക്കുന്നപങ്കിനെ കുറിച്ച് വിഷയവാതരണം നടത്തി. പരിഷത്ത് ജില്ലാ പ്രസിഡന്‍റ് കെ.പി. പ്രദീപൻ അധ്യക്ഷത വഹിച്ചു. കേരള ശാസ്ത്ര സാഹിത്യ പരിഷത്ത്, സ്കൂൾ കുട്ടികൾക്കായി പ്രസിദ്ധീകരിക്കുന്ന ശാസ്ത്ര ചെപ്പ് - വീട്ടിൽ ഒരു പരീക്ഷണ ശാല എന്ന പുസ്തകത്തിന്‍റെ കവർ പേജ് എം. വിജിൻ എംഎൽഎ പ്രകാശനം ചെയ്തു. മുൻ എംഎൽഎ ടി.വി രാജേഷ്, ജില്ലാ പഞ്ചായത്ത് പ്രസിഡന്‍റ് കെ കെ .രത്നകുമാരി, പരിഷത്ത് സംസ്ഥാന ജനറൽ സെക്രട്ടറി പി.വി. ദിവാകരൻ, സംസ്ഥാന ട്രഷറർ പി.പി ബാബു, കേന്ദ്ര നിർവാഹക സമിതി അംഗങ്ങളായഡോ. കാവുമ്പായി ബാലകൃഷ്ണൻ, ഒ.എം. ശങ്കരൻ, ടി.ഗംഗാധരൻ,എം. ദിവാകരൻ, കെ. വിനോദ്, വി.വി. ശ്രീനിവാസൻ, സി.പി. ഹരിന്ദ്രൻ, പി. ഗോവിന്ദൻ എന്നിവർ പ്രസംഗിച്ചു. സമ്മേളനം ഇന്ന് സമാപിക്കും

സിഐഎസ്എഫ് സോൾജിയേഴ്സ് കൂട്ടായ്മ സ്നേഹഭവനിൽ ഭക്ഷ്യവസ്തുക്കൾ കൈമാറി

ചെറുപുഴ: സിഐഎസ്എഫ് സോൾജിയഴ്സ് കൂട്ടായ്മ തിരുമേനി ചട്ടിവയലിലെ സ്നേഹഭവനിൽ ഭക്ഷ്യവസ്തുക്കളും മറ്റ് അവശ്യവസ്തുക്കളുമെത്തിച്ചു നൽകി. സിഐഎസ്എഫ് കണ്ണൂർ - കാസർഗോഡ് ജില്ലയിലെ കൂട്ടായ്മയുടെ ആഭിമുഖ്യത്തിലാണ് സ്നേഹഭവൻ സന്ദർശിച്ച് ഭക്ഷ്യവസ്തുക്കളും മറ്റ് സാധനങ്ങളും കൈമാറിയത്. പി.വി. സുരേന്ദ്രൻ, വി.പൃഥിരാജ്, പി.വി. സുധാകരൻ, പി.വി. പത്മനാഭൻ എന്നിവരാണ് സ്നേഹഭവനിലെത്തി സാധനങ്ങൾ സിസ്റ്റേഴ്സിനെ ഏൽപിച്ചത്. 2018-ൽ രൂപീകരിച്ച സിഐഎസ്എഫ് കൂട്ടായ്മയിൽ റിട്ട. ജവാന്മാരും നിലവവിൽ സർവീസിലുള്ളവരും അംഗങ്ങളാണ്. ഒരു സ്നേഹ കൂട്ടായ്മ എന്ന നിലയിലാണ് സംഘടന ചാരിറ്റി പ്രവർത്തനം നടത്തുന്നതെന്നും അടുത്ത ദിവസം പരിയാരത്തെ മദർ ഹോമിലും സാഹയമെത്തിക്കുമെന്നും ഇവർ പറഞ്ഞു. തിരുമേനി ചട്ടിവയലിലെ സ്നേഹഭവനിൽ 22 അന്തേവാസികളാണ് ഇപ്പോൾ ഉള്ളത്. 25പേർക്കുള്ള സൗകര്യമാണ് ഇവിടെ ഉള്ളതെന്നും സാമൂഹ്യ, സന്നദ്ധ സംഘടനകളുടെ സഹകരണം ലഭ്യമാവുന്നതിൽ ഏറെ നന്ദിയുണ്ടെന്നും സ്നേഹ ഭവനിലെ സിസ്റ്റർ റോസ് മാത്യു പറഞ്ഞു. ഇപ്പോൾ ഝാർഖണ്ഡിൽ നിന്നുള്ള വ്യക്തിയും ഇവിടുത്തെ അന്തേവാസിയായി പരിചരിക്കപ്പെടുന്നുണ്ട്.

നടുവിൽ ബസ് സ്റ്റാൻഡ് ടാർ ചെയ്തില്ല: പ്രതിഷേധം ശക്തമാകുന്നു

നടുവിൽ: മലയോര ഹൈവേയിൽ നടുവിൽ പഞ്ചായത്തിലെ ബസ് സ്റ്റാൻഡ് പുനരുദ്ധാരണ പ്രവൃത്തി നടത്താത്തതിൽ പ്രതിഷേധം ശക്തമാകുന്നു. നവീകരണത്തിന്‍റെ പേരിൽ സ്റ്റാൻഡ് കൊത്തി ഇളക്കിയിട്ടിട്ട് മാസം ഒന്നാകാനായെങ്കിലും പ്രവൃത്തിയൊന്നും നടത്തിയിരുന്നില്ല. 2024-25 വാർഷിക പദ്ധതിയിലാണ് ബസ് സ്റ്റാൻഡ് നവീകരണം ഉൾപ്പെടുത്തിയിരുന്നത്. ദീർഘദൂര ബസുകൾ ഉൾപ്പെടെ നിരവധി ബസുകളും മറ്റു വാഹനങ്ങളും കടന്നു പോകുന്നതുമായ മലയോരത്തെ പ്രധാന പാതയോട് ചേർന്നാണ് ബസ് സ്റ്റാൻഡ് സ്ഥിതിചെയ്യുന്നത്. ടൂറിസ്റ്റ് കേന്ദ്രമായ പൈതൽ മല, പാലക്കയംതട്ട്, ഏഴരക്കുണ്ട് വെള്ളച്ചാട്ടം എന്നിവിടങ്ങളിലേക്കുള്ള പ്രധാന റോഡു കൂടിയാണ് ബസ് സ്റ്റാൻഡിനോട് ചേർന്നുകിടക്കുന്നത്. മലയോര ഹൈവേ യാഥാർഥ്യമായതോടെ വാഹനഗതാഗതവും വർധിച്ചു. ടാക്സി വാഹനങ്ങൾക്ക് ഇവിടെ പാർക്കിംഗ് സൗകര്യം ഇല്ലാത്തതിനാൽ ടൗണിൽ ഗതാഗതക്കുരുക്കും സ്ഥിരം സംഭവമാണ്. ബസ് സ്റ്റാൻഡ് നവീകരണ പ്രവൃത്തി വൈകുന്നതിൽ പ്രതിഷേധിച്ച് സാജു ജോസഫിന്‍റെ നേതൃത്വത്തിൽ ഇടതുപക്ഷ അംഗങ്ങൾ കഴിഞ്ഞദിവസം ഭരണസമിതി യോഗത്തിൽ നിന്നും ഇറങ്ങിപ്പോയി. ചില താത്പര്യങ്ങൾ മുൻനിർത്തിയാണ് ഇത് പൊളിച്ചതെന്ന് അംഗങ്ങൾ ആരോപിച്ചു.

കുടിയാന്മലയിൽ പൊതുകിണർ ചപ്പുചവറുകളും കാടും മൂടിയ നിലയിൽ

കുടിയാന്മല: കുടിയാന്മല ടൗണിലെ പഞ്ചായത്ത് പൊതുകിണർ ചപ്പുചവറുകളും കാടും മുടിയ നിലയിൽ. പഞ്ചായത്ത് ഭരിക്കുന്ന പാർട്ടിയുടെ ഓഫീസിന് മുന്നിൽ തന്നെയാണ് ഈ കിണറുള്ളത്. പഞ്ചായത്തിന്‍റെ ഈ പൊതുകിണറിൽനിന്നാണ് ടൗണിലെ ഹോട്ടലുകൾ ഉൾപ്പെടെയുള്ള വ്യാപാര സ്ഥാപനങ്ങളിൽ കുടിവെള്ളമെത്തുന്നത്. സുരക്ഷയ്ക്കായി കിണറിന്‍റെ മുകളിൽ ഇരുമ്പ് ഗ്രില്ലും പ്ലാസ്റ്റിക് വലയും സ്ഥാപിച്ചിട്ടുണ്ടെങ്കിലും അതിന്മേൽ തെങ്ങിന്‍റെ ഓലമടൽ അടക്കമുള്ള ചപ്പ് ചവറുകൾ നിറഞ്ഞ നിലയിലാണുള്ളത്. മഴ പെയ്യുമ്പോൾ ഈ ചപ്പ് ചവറുകൾ അഴുകിച്ചേരുന്ന വെള്ളം കിണറിലേക്ക് പതിക്കും.

പി.പി. കൃഷ്ണൻ നമ്പ്യാർ അനുസ്മരണം

നടുവിൽ: കൃഷ്ണൻ നമ്പ്യാരുടെ 24-ാമത് ചരമ വാർഷികം സജീവ് ജോസഫ് എംഎൽഎ ഉദ്ഘാടനം ചെയ്തു. പി.പി.കെ. ട്രസ്റ്റ് വൈസ് ചെയർമാൻ കെ.പി. കേശവൻ അധ്യക്ഷത വഹിച്ചു. പഞ്ചായത്ത്‌ പ്രസിഡന്‍റ് ബേബി ഓടംപള്ളിൽ മുഖ്യപ്രഭാഷണം നടത്തി. രാജീവ്ഗാന്ധി ഇൻസ്റ്റിറ്റ്യൂട്ട് ഫോർ ഡെവലപ്പ്മെന്‍റ് സ്റ്റഡീസ് ഡയറക്ടർ പി.പി. ബാലൻ അനുസ്മരണ പ്രഭാഷണം നടത്തി. ചടങ്ങിൽ നടുവിൽ പഞ്ചായത്തിലെ സാമൂഹ്യ സാംസ്‌കാരിക വിദ്യാഭ്യാസ മേഖലകളിൽ നിറസാന്നിധ്യമായിരുന്ന മുതിർന്ന പൗരന്മാരായ ജോൺ ആക്കാട്ടയിൽ, ടി.കെ. ചിണ്ടൻ, ഇ.കെ. കൃഷ്ണൻ നമ്പ്യാർ എന്നിവരെ ആദരിക്കുകയും ഡോക്ടറേറ്റ് നേടിയ ഹിമ അജയകുമാർ, എം.പി. ജിതേഷ് എന്നിവരെ അനുമോദിക്കുകയും ചെയ്തു. ട്രസ്റ്റ്‌ വക ചികിത്സാ സഹായം ചെയർപേഴ്സൺ ടി.പി. ഭാർഗവിഅമ്മ ചെല്ലമ്മക്ക്‌ കൈമാറി. പഞ്ചായത്ത് അംഗം ധന്യമോൾ, നടുവിൽ ഹൈസ്കൂൾ മുൻ മുഖ്യാധ്യാപകൻ പി.പി. ദാമോദരൻ നമ്പ്യാർ, നടുവിൽ ഹയർ സെക്കൻഡറി സ്കൂൾ പ്രിൻസിപ്പൽ സിന്ധു നാരായണൻ, നടുവിൽ സർവീസ് സഹകരണ ബാങ്ക് പ്രസിഡന്‍റ് ദേവസ്യ പാലപ്പുറത്ത്, ഡോ. ടി.പി. രവീന്ദ്രൻ, ടി.എ. വാസുദേവൻ, ടി.പി. പദ്മനാഭൻ എന്നിവർ പ്രസംഗിച്ചു.

കനകക്കുന്ന് തീർഥാടന പള്ളിയിൽ തിരുനാൾ നാളെ മുതൽ

കുടിയാന്മല: കനകക്കുന്ന് കരുണാമയൻ ഇശോയുടെ തീർഥാടന പള്ളിയിൽ ഒമ്പത് ദിവസത്തെ തിരുനാൾ ആഘോഷങ്ങളും നൊവേന സമർപ്പണവും നാളെ മുതൽ 27 വരെ നടക്കും. നാളെ ഉച്ചകഴിഞ്ഞ് ഒന്നിന് വികാരി ഫാ. ജെറിൻ പന്തലൂപ്പറമ്പിൽ കൊടിയേറ്റും തിരുസ്വരൂപ പ്രതിഷ്ഠയും നിർവഹിക്കും. തുടർന്ന് കരുണയുടെ മണിക്കൂർ ആചരണം, നൊവേന, ദിവ്യകാരുണ്യ പ്രദക്ഷിണം എന്നിവയുണ്ടായിരിക്കും. 3.45 ന് ആഘോഷമായ വിശുദ്ധ കുർബാന, വചന പ്രഘോഷണം, പ്രസുദേന്തി വാഴ്ച, ലദീഞ്ഞ് എന്നിവക്ക് ഫാ.ടോണി കുന്നത്ത് കാർമികത്വം വഹിക്കും. 26 വരെ എല്ലാ ദിവസങ്ങളിലും ഉച്ചകഴിഞ്ഞ് ഒന്ന് മുതൽ ആരാധന, മധ്യസ്ഥ പ്രാർഥന, ജപമാല, കരുണക്കൊന്ത, കരുണയുടെ മണിക്കൂർ ആചരണം, നൊവേന, ദിവ്യകാരുണ്യ പ്രദക്ഷിണം എന്നിവയുണ്ടായിരിക്കും. ഫാ.ബാബു ജോസഫ് കുടക്കച്ചിറക്കുന്നേൽ, ഫാ.സെബിൻ കുടക്കച്ചിറക്കുന്നേൽ, ഫാ.ജയ്സൺ നരിപ്പാറയിൽ, ഫാ.തോമസ് പയ്യമ്പള്ളിൽ, ഫാ.റിമൽ ചെമ്പനാനിയ്ക്കൽ, ഫാ.ജോസ് മാണിക്കത്താഴെ, ഫാ.റോയിച്ചൻ പിണ്ടമംഗലത്ത്, ഫാ.മാണി മേൽവെട്ടം എന്നിവർ വിവിധ ദിവസങ്ങളിൽ തിരുക്കർമങ്ങൾക്ക് നേതൃത്വം നൽകും. 25 ന് വൈകുന്നേരം 6.45 ന് സൺഡേ സ്കൂൾ, ഭക്തസംഘടനകൾ എന്നിവയുടെ വാർഷികാഘോഷങ്ങളും 8.30 ന് കനകക്കുന്ന് നിവാസികൾ അവതരിപ്പിക്കുന്ന 'കാർമേഘങ്ങൾ പെയ്തൊഴിയുമ്പോൾ' എന്ന സാമൂഹിക നാടകവും അരങ്ങേറും. 26 ന് വൈകുന്നേരം 6.45 ന് തിരുനാൾ പ്രദക്ഷിണം, വാദ്യമേളങ്ങൾ. രാത്രി 8.30 ന് ചാനൽ ഫെയിം ഗായകർ നയിക്കുന്ന 'മ്യൂസിക്കൽ നൈറ്റ് 27 ന് പുലർച്ചെ 3 മുതൽ ആരാധന, മധ്യസ്ഥ പ്രാർഥന, ജപമാല, കരുണക്കൊന്ത, നൊവേന, ദിവ്യകാരുണ്യ പ്രദക്ഷിണം, നിയോഗ പ്രാർഥന എന്നിവക്ക് ശേഷം 10.30 ന് ആഘോഷമായ തിരുനാൾ കുർബാന, വചന പ്രഘോഷണം എന്നിവ നടക്കും. രാവിലെ 8.30 മുതൽ ഉച്ചകഴിഞ്ഞ് ഒന്ന് വരെയുള്ള ശുശ്രൂഷകൾക്ക് ഫാ.മാത്യു വയലാമണ്ണിൽ മുഖ്യ കാർമികത്വം വഹിക്കും. കുരിശടിയിലേക്ക് പ്രദക്ഷിണം, നേർച്ചഭക്ഷണം എന്നിവയുമുണ്ടായിരിക്കും.

സമരം ഇനി നഗരസഭാ ഓഫീസിലേക്കെന്ന് നാട്ടുകാർ

അലക്സ് നഗർ: വർഷങ്ങളായി തകർന്നുകിടക്കുന്ന അലക്സ് നഗർ - ഐച്ചേരി റോഡിന്‍റെ ദുരവസ്ഥയിൽ പ്രതിഷേധിച്ച് നാട്ടുകാർ റോഡിൽ വാഴ നട്ടു. റോഡ് നന്നാക്കാത്ത പക്ഷം സമരം ശ്രീകണ്ഠപുരം നഗരസഭയിലേക്ക് മാറ്റുമെന്ന് നാട്ടുകാർ മുന്നറിയിപ്പ് നൽകി. അറ്റകുറ്റപണി ന‌ടത്താത്തതു കാരണം ഈ റോഡിലൂടെയുള്ള യാത്ര അതീവ ദുഷ്കരമായിട്ടും ബന്ധപ്പെട്ടവർ നടപടി സ്വീകരിക്കാത്തിൽ പ്രതിഷേധം ശക്തമാണ്. അലക്സ് നഗർ പാലത്തിന് സമീപത്തും വാഴകളും കവുങ്ങുകളുമായി എത്തിയവർ മുദ്രാവാക്യം വിളികളോടെയാണ് റോഡിൽ വാഴകളും മറ്റും നട്ടത്. ജനകീയ സമരത്തിൽ ചെരിക്കോട്, ഐച്ചേരി,അലക്സ് നഗർ പ്രദേശവാസികൾ പങ്കെടുത്തു. റിട്ട.എസ്ഐ, എം.കെ.കൃഷ്ണൻ, സജികുര്യൻ എന്നിവർ പ്രസംഗിച്ചു. നേരത്തെ ഈ റോഡിലൂടെ ഒരു കെഎസ്ആർടിസി ബസ് സർവീസ് നടത്തിയിരുന്നെങ്കിലും റോഡിന്‍റെ ശോച്യാവസ്ഥ കാരണം ബസ് സർവീസ് നിർത്തുകയായിരുന്നു. തകർന്നു കിടക്കുന്ന റോഡിലൂടെ ടാക്സി വാഹനങ്ങളോ ഓട്ടോ റിക്ഷകളോ പോലും സർവീസ് നടത്താത്തത് കാരണം ജനം കടുത്ത ദുരിതത്തിലാണ്. രോഗികൾക്കും മറ്റ് അത്യാവശ്യ യാത്രക്കാർക്കും അലക്സ്നഗറിലേക്കും തിരിച്ചും എത്താൻ ചുറ്റിവളഞ്ഞ് നെടുങ്ങോംവഴി പോകേണ്ട സ്ഥിതിയാണ്. പാലം വന്നിട്ടും റോഡ് ടാർ ചെയ്തില്ല അലക്സ് നഗറിനെയും കാഞ്ഞിലേരിയേയും ബന്ധിപ്പിക്കുന്ന പാലം നിർമിച്ചെങ്കിലും റോഡ് നിർമാണത്തിന് തുക അനുവദിക്കാഞ്ഞതോടെ റോഡ് നവീകരണം അനിശ്ചിതത്വത്തിലാക്കി. നേരത്തെ റോഡിനുൾപ്പടെ ഫണ്ട് വകയിരുത്തിയെങ്കിലും പിന്നീട് റോഡിന്‍റെ ഫണ്ട് ഒഴിവാക്കുകയായിരുന്നു. അതിനിടെ 2019- ൽ പിഡബ്ല്യുഡി ഏറ്റെടുത്ത റോഡാണിതെന്നും പറയുന്നുണ്ട്. സജീവ് ജോസഫ് എംഎൽഎ ഇടപ്പെട്ടതിനെ തുടർന്ന് 15 ലക്ഷം രൂപ റോഡ് നവീകരണത്തിന് സർക്കാർ അനുവദിക്കുമെന്ന് ഉറപ്പുനൽകിയിരുവെങ്കിലും ഒന്നും നടന്നിട്ടില്ല. പിന്നീട് കേരള പൊതുമരാമത്ത് വകുപ്പ് ചീഫ് എൻജിനിയറുടെ കാര്യാലയത്തിൽനിന്ന് ലഭിച്ച കത്ത് പ്രകാരം റോഡ് നവീകരണത്തിന് 4.34 കോടി രൂപയുടെ എസ്റ്റിമേറ്റ് തയാറാക്കി സർക്കാരിന് സമർപ്പിച്ചുവെന്നും അറിയിച്ചിരുന്നുവെങ്കിലും നടപടികൾ എങ്ങുമെത്തിയില്ല. വോട്ടു ചോദിച്ചു വരേണ്ടെന്ന് ബാനറുകൾ ടാറിംഗ് നടത്തിയില്ലെങ്കിൽ വോട്ടും നോട്ടും തേടി വന്നാൽ ആട്ടിപ്പായിക്കുമെന്നും നാട്ടുകാരുടെ മുന്നറിയിപ്പ്. റോഡിലൂടെ ഓടി നടുവൊടിഞ്ഞ കൂട്ടായ്മയുടെ പേരിലാണ് റോഡരികിൽ ബാനറുകൾ ഉയർത്തിയിരിക്കുന്നത്. റോഡ് തോടായ സാഹചര്യത്തിൽ മാസാമാസം എല്ലാ വീടുകളിലും കുഴമ്പും തൈലവും നഗരസഭ അനുവദിക്കണമെന്ന അപേക്ഷയാണ് ഒരു ബാനറിലുള്ളത്. മറ്റൊന്നിൽ കീരിടമെന്ന സിനിമയിലെ തിലകൻ അവതരിച്ച് കഥാപാത്രത്തിന്‍റെ പഞ്ച് ഡയലോഗിനോട് സാമ്യമുള്ള വാചകമാണ്. തിലകന്‍റെ ചിത്ര സഹിതം നിന്‍റെ അച്ഛനാടാ പറയുന്നെ, റോഡ് ടാർ ചെയ്യെടാ എന്നാണ് എഴുതിയിരിക്കുന്നത്.

പരിഷത്ത് സമ്മേളനം ഇന്നും നാളെയും ചെറുതാഴത്ത്

കണ്ണൂർ: കേരള ശാസ്ത്ര സാഹിത്യ പരിഷത് 62-ാമത് ജില്ലാ വാർഷിക സമ്മേളനം ഇന്നും നാളെയും ചെറുതാഴം ഗവ. ഹയർ സെക്കൻഡറി സ്കൂളിൽ ന‌‌ടക്കും. ജില്ലയുടെ വിവിധ ഭാഗങ്ങളിൽ നിന്നും തെരഞ്ഞെടുത്ത 300 പ്രതിനിധികൾ പങ്കെടുക്കും. ഇന്ന് രാവിലെ പത്തിന് കൊച്ചിൻ ശാസ്ത്ര സാങ്കേതിക സർവകലാശാലയിലെ റഡാർ സെന്‍റർ ഡയറക്ടർ ഡോ. എസ്. അഭിലാഷ് അസ്ഥിരമാകുന്ന കാലാവസ്ഥയും പ്രാദേശിക അതിജീവനവും എന്ന വിഷയത്തിൽ പ്രബന്ധം അവതരിപ്പിച്ച് പ്രതിനിധി സമ്മേളനം ഉദ്ഘാടനം ചെയ്യും. മുൻ എംഎൽഎ ടി.വി. രാജേക്ഷ്. എം.വിജിൽ എംഎൽഎ, ഡോ. ശുഭാ ശങ്കർ ചക്രവർത്തി എന്നിവർ പങ്കെടുക്കും. അവധിക്കാലത്ത് കേരളത്തിലെ സ്കൂൾ കുട്ടികൾക്ക് വേണ്ടി -വീട്ടിൽ ഒരു ലബോറട്ടറി - എന്ന പരിഷത്ത് തയാറാക്കുന്ന പുസ്തകത്തിൻറെ കവർ പേജ് പ്രകാശനം ചെയ്യും. ജീവിതശൈലി രോഗങ്ങളിലും മറ്റ് അനുബന്ധ രോഗാതുരത കൊണ്ടും വിഷമിക്കുന്ന കേരള ജനതക്ക് ശാസ്ത്രീയ വിവരങ്ങൾ ലഭ്യമാക്കുന്ന-ഭക്ഷണവും ശാസ്ത്രവും - എന്ന സമ്പൂർണ ഗ്രന്ഥത്തിന്‍റെ രൂപരേഖ സമ്മേളനം ചർച്ച ചെയ്യും. ഗാർഹിക കടബാധ്യത, ചികിത്സ കടബാധ്യത ഇവ സംബന്ധിച്ച വിഷയങ്ങളിലും ചർച്ച നടക്കും.അന്ധവിശ്വാസ വ്യാപനത്തിനെതിരെയും കപടശാസ്ത്രത്തിനും എതിരെയും ലഹരി വസ്തുക്കൾക്കെതിരെയും നടത്തേണ്ട വിപുലമായ ശാസ്ത്ര പ്രചാരണ പരിപാടികൾ സമ്മേളനത്തിൽ ആസൂത്രണം ചെയ്യും.

നിർദേശങ്ങൾ പാലിക്കാതെ മൃതദേഹങ്ങൾ സംസ്കരിക്കുന്നതിൽ പ്രതിഷേധം

പയ്യാവൂർ: ശ്രീകണ്ഠപുരം നഗരസഭയിലെ പൊതുശ്മശാനത്തിൽ സംസ്ഥാന മലിനീകരണ നിയന്ത്രണ ബോർഡിന്‍റെ നിർദേശങ്ങൾ പാലിക്കാതെ മൃതദേഹം സംസ്കരിക്കുന്നതിനെതിരെ പ്രതിഷേധവുമായി നാട്ടുകാർ. പുകക്കുഴലിന് ആവശ്യമായ ഉയരമില്ലാതെയും ബോർഡ് നൽകിയിട്ടുള്ള നിർദേശങ്ങൾ പാലിക്കാതെയും മൃതദേഹം സംസ്കരിക്കുന്നതിനാൽ പുറത്തേക്കു വ്യാപിക്കുന്ന പുക കടുത്ത അസ്വസ്ഥതയ്ക്കും ആരോഗ്യ പ്രശ്നങ്ങൾക്കും ഇടയാക്കുന്നുവെന്ന ആക്ഷൻ കമ്മിറ്റിയുടെ പരാതിയെ തുടർന്നാണു സംസ്ഥാന മലിനീകരണ നിയന്ത്രണ ബോർഡിന്‍റെ എൻവയോൺമെന്‍റൽ എൻജിനിയർ ശ്രീകണ്ഠപുരം നഗരസഭാ സെക്രട്ടറിക്ക് ശ്മശാനങ്ങളിൽ പാലിക്കേണ്ട നിർദേശങ്ങൾ അടങ്ങുന്ന നോട്ടീസ് അയച്ചത്. ഈ നിർദേശങ്ങൾ പാലിക്കാതെയാണു കഴിഞ്ഞ ദിവസവും ഇവിടെ മൃതദേഹം സംസ്കരിച്ചത്. നഗരസഭയുടെ ധിക്കാരപരമായ നടപടികൾക്കെതിരെ ശക്തമായ പ്രതിഷേധിക്കുന്നതിനൊപ്പം ബന്ധപ്പെട്ട അധികാരികൾക്ക് പരാതിയും നൽകാൻ ആക്ഷൻ കമ്മിറ്റി തീരുമാനിച്ചു. കൺവീനർ സി.കെ. രതീഷ്, കെ. സവിത, എൽ. വത്സലൻ എന്നിവർ പങ്കെടുത്തു.

കാട്ടാന ആക്രമണം തടയാൻ അടിയന്തര നടപടിക്ക് മുഖ്യമന്ത്രി ഇടപെടണം: കേരള കോൺഗ്രസ്-എം

പയ്യാവൂർ: മനുഷ്യജീവന് വില കൽപ്പിക്കാതെ കാടിനും കാട്ടുമൃഗങ്ങൾക്കും സംരക്ഷണം നൽകുന്ന വനം വകുപ്പിന്‍റെ പ്രവണത അവസാനിപ്പിക്കണമെന്നും കാട്ടാനകൾ മനുഷ്യരെ ആക്രമിച്ചു കൊല്ലുന്ന സംഭവങ്ങൾ പതിവാകുന്നതിനാൽ വിഷയത്തിൽ ശാശ്വത പരിഹാരത്തിനായി മുഖ്യമന്ത്രി ഇടപെടണമെന്നും കേരള കോൺഗ്രസ്-എം പയ്യാവൂർ മണ്ഡലം കമ്മിറ്റി ആവശ്യപ്പെട്ടു. കേരളത്തിലെ ഭൂരിപക്ഷം മലയോര മേഖലകളിലും പതിവായി വന്യമൃഗങ്ങൾ മനുഷ്യരെ ആക്രമിക്കുമ്പോൾ മനുഷ്യന്‍റെ ജീവനും സ്വത്തിനും സംരക്ഷണം നൽകേണ്ട സർക്കാർ ഉറക്കം നടിക്കുകയാണ്. അടിയന്തരമായി ഈ വിഷയങ്ങളിൽ സർക്കാർ ഇടപെട്ടില്ലെങ്കിൽ പ്രത്യക്ഷ സമരത്തിലേക്ക് കടക്കുമെന്ന് കേരള കോൺഗ്രസ്-എം നേതാക്കൾ മുന്നറിയിപ്പ് നൽകി. ജില്ലാ വൈസ് പ്രസിഡന്‍റ് ബിനു മാത്യു യോഗം ഉദ്ഘാടനം ചെയ്തു. പയ്യാവൂർ മണ്ഡലം പ്രസിഡന്‍റ് ജോസ് മണ്ഡപത്തിൽ അധ്യക്ഷത വഹിച്ചു.ജെയ്സൺ കാച്ചപ്പിള്ളി, ടോമി വടക്കുംവീട്ടിൽ, ലിജു പാറയിൽ, നോബിൻസ് ചെരിപുറം, ചാക്കോ കാരത്തുരുത്തൽ, ജോസഫ് ചക്കാനിക്കുന്നേൽ, തുളസീധരൻ നായർ, മാത്യു എണിയക്കാട്ട്, ഏബ്രഹാം വെട്ടത്ത്, തങ്കച്ചൻ തോമസ്, ഏബ്രഹാം ചമതച്ചാൽ, അഭിലാഷ് വട്ടക്കാട്ട്, റോബിൻ ചാണ്ടിക്കൊല്ലിയിൽ, റോഷൻ ഓലിയ്ക്കൽ, പി.എൻ. ശിവദാസൻ, സിജു കുറുമുള്ളിൽ എന്നിവർ പ്രസംഗിച്ചു.

"ഏരുവേശി വിഷു സന്ധ്യ' സംഘടിപ്പിച്ചു

ചെമ്പേരി: ഏരുവേശി യുവജന ക്ലബ് ആൻഡ് ഗ്രന്ഥാലയം, എകെജി യൂത്ത് സെന്‍റർ എന്നിവയുടെ സംയുക്താഭിമുഖ്യത്തിൽ സംഘടിപ്പിച്ച "ഏരുവേശി വിഷു സന്ധ്യ' പ്രശസ്ത നാടകകൃത്ത് അനിൽകുമാർ ആലത്തുപറമ്പ് ഉദ്ഘാടനം ചെയ്തു. വാർഡംഗം എം.ഡി. രാധാമണി, എം. നാരായണൻ, ഇ.പി. ബാലകൃഷ്ണൻ, എം. സന്തോഷ്കുമാർ, പി. രാഗേഷ്, അക്ഷയ് കെ. ജിഷ്ണു. എന്നിവർ പ്രസംഗിച്ചു. തുടർന്ന് പ്രദേശവാസികളുടെ വിവിധ കലാപരിപാടികളും കണ്ണൂർ നാട്ടുപൊലിമയുടെ പാട്ടരങ്ങും നടന്നു.

തളിപ്പറമ്പിൽ ഓയില്‍ മില്ലിന് തീപിടിച്ച് ലക്ഷങ്ങളുടെ നഷ്ടം

തളിപ്പറമ്പ്: തളിപ്പറമ്പ് നഗരത്തിലുണ്ടായ വന്‍ തീപിടിത്തത്തിൽ കോടികളുടെ നാശനഷ്ടം. മെയിന്‍ റോഡില്‍ പ്രവര്‍ത്തിക്കുന്ന യു.എം.മുഹമ്മദ്കുഞ്ഞി ഹാജിയുടെ ഉടമസ്ഥതയിലുള്ള മുതുകുട ഓയില്‍ മില്ലിനാണ് ഇന്നലെ പുലർച്ചെ രണ്ടോടെ തീപിടിച്ചത്. ആളിപ്പടർന്ന തീ അണയ്ക്കാൻ കണ്ണൂര്‍, മട്ടന്നൂര്‍, കൂത്തുപറമ്പ്, പെരിങ്ങോം, തലശേരി, പയ്യന്നൂര്‍ എന്നിവിടങ്ങളില്‍ നിന്ന് പത്തോളം അഗ്നിശമനയൂണിറ്റുകളെത്തിയിരുന്നു. ടണ്‍ കണക്കിന് വെളിച്ചെണ്ണ, കൊപ്ര, പിണ്ണാക്ക്, തേങ്ങ എന്നിവ സംഭരിച്ച ഗോഡൗണ്‍ പൂര്‍ണമായും കത്തി നശിച്ചു. മെയിന്‍ റോഡില്‍ നിന്ന് കാക്കാത്തോട് ഭാഗത്തേക്ക് പോകുന്ന റോഡില്‍ ശാദുലിപള്ളിക്ക് മുന്നിലായ പ്രവര്‍ത്തിക്കുന്ന ഓയില്‍മില്ലിന്‍റെ മുകള്‍ഭാഗത്താണ് ആദ്യം തീപിടിച്ചത്. തീ കണ്ട ഉടന്‍ തന്നെ സമീപവാസികള്‍ പോലീസിലും അഗ്നിശമനനിലയത്തിലും വിവരമറിയിച്ചു. കെഎസ്ഇബി അധികൃതര്‍ സ്ഥലത്തെത്തി കെട്ടിടത്തിലേക്കുള്ള വൈദ്യുതിബന്ധം വിച്ഛേദിച്ചു. ഷോര്‍ട്ട് സര്‍ക്യൂട്ടാണ് തീപിടിക്കാന്‍ കാരണമെന്നാണ് പ്രാഥമിക നിഗമനം. ലക്ഷങ്ങളുടെ നഷ്ടം ഉണ്ടായതായി കണക്കാക്കുന്നു. മലബാറിലെ തന്നെ പ്രശസ്തമായ ഓയില്‍മില്ലാണ് മുതുകുട ഓയില്‍മില്‍. വ്യാപാരി-വ്യവസായി ഏകോപനസമിതി തളിപ്പറമ്പ് യൂണിറ്റ് പ്രസിഡന്‍റ് കെ.എസ് റിയാസ്, ജന.സെക്രട്ടറി വി.താജുദ്ദീന്‍ എന്നിവരും സംഭവസ്ഥലത്ത് എത്തിയിരുന്നു. അഗ്നിശമനസനേയും വ്യാപാരികളും നാട്ടുകാരും ചേര്‍ന്നാണ് തീ തൊട്ടടുത്ത സ്ഥാപനങ്ങളിലേക്ക് പടരുന്നത് തടഞ്ഞത്.

കോൺഗ്രസ് പ്രതിഷേധ പ്രകടനം നടത്തി

കണ്ണൂർ: യുപിഎ ചെയർപേഴ്‌സൺ സോണിയ ഗാന്ധി, പ്രതിപക്ഷ നേതാവ് രാഹുൽ ഗാന്ധി എന്നിവരെ ബിജെപി സർക്കാർ ഇഡിയെ ഉപയോഗപ്പെടുത്തി വേട്ടയാടുകയാണെന്നാരോപിച്ച് കോൺഗ്രസ് കണ്ണൂരിൽ പ്രതിഷേധ പ്രകടനം നടത്തി. ഡിസിസി ഓഫീസിൽ നിന്നാരംഭിച്ച പ്രകടനം കാൽ ടെക്സിൽ സമാപിച്ചു. തുടർന്ന് പ്രവർത്തകർ പ്രധാനമന്ത്രി നരേന്ദ്ര മോദിയുടെയും ആഭ്യന്തര മന്ത്രി അമിത്ഷായുടെയും കോലം കത്തിച്ചു. വി.വി. പുരുഷോത്തമൻ , മുൻ മേയർ ടിഒ മോഹനൻ ,ചന്ദ്രൻ തില്ലങ്കേരി ,രാജീവൻ എളയാവൂർ , വി.പി. അബ്ദുൽ റഷീദ് , ടി.ജയകൃഷ്ണൻ ,കെ.പി. സാജു എം.കെ. മോഹനൻ ,ബിജു ഉമ്മർ, ഇ.ആർ. വിനോദ് , ശ്രീജ മഠത്തിൽ ,പി.മുഹമ്മദ് ഷമ്മാസ്,വിജിൽ മോഹനൻ, ശുഹൈബ് ,എം.പി വേലായുധൻ ,നൗഷാദ് ബ്ലാത്തൂർ ,കായക്കൽ രാഹുൽ , കൂക്കിരി രാജേഷ് എന്നിവർ പ്രസംഗിച്ചു.

പരിഷത്ത് സമ്മേളനം ഇന്നും നാളെയും ചെറുതാഴത്ത്

കണ്ണൂർ: കേരള ശാസ്ത്ര സാഹിത്യ പരിഷത് 62-ാമത് ജില്ലാ വാർഷിക സമ്മേളനം ഇന്നും നാളെയും ചെറുതാഴം ഗവ. ഹയർ സെക്കൻഡറി സ്കൂളിൽ ന‌‌ടക്കും. ജില്ലയുടെ വിവിധ ഭാഗങ്ങളിൽ നിന്നും തെരഞ്ഞെടുത്ത 300 പ്രതിനിധികൾ പങ്കെടുക്കും. ഇന്ന് രാവിലെ പത്തിന് കൊച്ചിൻ ശാസ്ത്ര സാങ്കേതിക സർവകലാശാലയിലെ റഡാർ സെന്‍റർ ഡയറക്ടർ ഡോ. എസ്. അഭിലാഷ് അസ്ഥിരമാകുന്ന കാലാവസ്ഥയും പ്രാദേശിക അതിജീവനവും എന്ന വിഷയത്തിൽ പ്രബന്ധം അവതരിപ്പിച്ച് പ്രതിനിധി സമ്മേളനം ഉദ്ഘാടനം ചെയ്യും. മുൻ എംഎൽഎ ടി.വി. രാജേക്ഷ്. എം.വിജിൽ എംഎൽഎ, ഡോ. ശുഭാ ശങ്കർ ചക്രവർത്തി എന്നിവർ പങ്കെടുക്കും. അവധിക്കാലത്ത് കേരളത്തിലെ സ്കൂൾ കുട്ടികൾക്ക് വേണ്ടി -വീട്ടിൽ ഒരു ലബോറട്ടറി - എന്ന പരിഷത്ത് തയാറാക്കുന്ന പുസ്തകത്തിൻറെ കവർ പേജ് പ്രകാശനം ചെയ്യും. ജീവിതശൈലി രോഗങ്ങളിലും മറ്റ് അനുബന്ധ രോഗാതുരത കൊണ്ടും വിഷമിക്കുന്ന കേരള ജനതക്ക് ശാസ്ത്രീയ വിവരങ്ങൾ ലഭ്യമാക്കുന്ന-ഭക്ഷണവും ശാസ്ത്രവും - എന്ന സമ്പൂർണ ഗ്രന്ഥത്തിന്‍റെ രൂപരേഖ സമ്മേളനം ചർച്ച ചെയ്യും. ഗാർഹിക കടബാധ്യത, ചികിത്സ കടബാധ്യത ഇവ സംബന്ധിച്ച വിഷയങ്ങളിലും ചർച്ച നടക്കും.അന്ധവിശ്വാസ വ്യാപനത്തിനെതിരെയും കപടശാസ്ത്രത്തിനും എതിരെയും ലഹരി വസ്തുക്കൾക്കെതിരെയും നടത്തേണ്ട വിപുലമായ ശാസ്ത്ര പ്രചാരണ പരിപാടികൾ സമ്മേളനത്തിൽ ആസൂത്രണം ചെയ്യും.

ഇരിട്ടി സംഗീതസഭ സാംസ്കാരിക സമ്മേളനം നടത്തി

ഇരിട്ടി: കത്തോലിക്ക കോൺഗ്രസും എവി അമ്യൂസ്മെന്‍റും സംയുക്തമായി നടത്തി വരുന്ന അണ്ടർ വാട്ടർ എക്സിബിഷനിൽ ഇരിട്ടി സംഗീതസഭയുമായി സഹകരിച്ച് നടത്തിയ സാംസ്‌കാരിക സമ്മേളനം തലശേരി ആർച്ച് ബിഷപ് മാർ ജോസഫ് പാംപ്ലാനി ഉദ്ഘാടനം ചെയ്തു. സജീവ് ജോസഫ് എംഎൽഎ അധ്യക്ഷത വഹിച്ചു. എക്സിബിഷൻ കമ്മിറ്റി ചെയർമാൻ തോമസ് വർഗീസ്, ഇരിട്ടി സെന്‍റ് ജോസഫ് പള്ളി വികാരി ഫാ. ജോസഫ് കളരിക്കൽ, സംഗീതസഭ ഭാരവാഹികളായ മനോജ്‌, ജി. ശിവരാമകൃഷ്ണൻ, സി. സുരേഷ് കുമാർ, ഷാജി ജോസ് കുറ്റിയിൽ, പ്രകാശൻ പാർവണം, എ.കെ. ഹസൻ, "പെണ്ണില്ലം " എഴുത്തുകാരുടെ കൂട്ടായ്മ നയിക്കുന്ന രാജി അരവിന്ദ്, "തിരുത്തു"സിനിമ ഡയറക്റ്റർ ജോഷി വള്ളിത്തല എന്നിവർ പ്രസംഗിച്ചു. ഷാർജ ബുക്ക്‌ ഫെസ്റ്റിൽ 62 പുസ്തകങ്ങൾ പ്രദർശിപ്പിച്ച "പെണ്ണില്ലം " എഴുത്തിടം കൂട്ടായ്മയിലെ അംഗങ്ങളും, "തിരുത്ത് " സിനിമയുടെ അണിയറ പ്രവർത്തകരുംസംഗീത സഭയുടെ ആദരം ആർച്ച്ബിഷപ്പിൽ നിന്നും എംഎൽഎയിൽ നിന്നും ഏറ്റുവാങ്ങി.

പ്ലസ് ടു സയൻസ് ബ്ലോക്കിന് ശിലാസ്ഥാപനം നടത്തി

തലശേരി: സേക്രഡ് ഹാർട്ട് ഗേൾസ് ഹയർ സെക്കൻഡറി സ്കൂളിന്‍റെ പ്ലസ് ടു സയൻസ് ബ്ലോക്ക് ശിലാസ്ഥാപനം നിയമസഭാ സ്പീക്കർ എ.എൻ. ഷംസീർ നിർവഹിച്ചു. പിടിഎ പ്രസിഡന്‍റ് പി. റോഷിത് അധ്യക്ഷത വഹിച്ചു. ലോക്കൽ മാനേജർ സിസ്റ്റർ പ്രിൻസി ആന്‍റണി മുഖ്യപ്രഭാഷണം നടത്തി. പ്രിൻസിപ്പൽ സിസ്റ്റർ രേഖ, വാർഡ് കൗൺസിലർ ഫൈസൽ പുനത്തിൽ, എസ്എസ്ജി അംഗങ്ങളായ മുഹമ്മദലി, ദിനേശൻ മാസ്റ്റർ, ഹയർ സെക്കൻഡറി അധ്യാപിക രഹന നാരായണൻ എന്നിവർ പ്രസംഗിച്ചു.

"ഇൻസ്പയർ’ഏകദിന ക്യാമ്പ് സംഘടിപ്പിച്ചു

കണ്ണൂർ: തോട്ടട അസീസി ഇൻസ്റ്റ്യൂട്ട് ഫോർ പീസ് സ്റ്റഡീസ് (എഐപിഎസ് ) "ഇൻസ്പയർ’ ഏകദിന ട്രെയിനിംഗ് ക്യാമ്പ് നടത്തി. യുവതി-യുവാക്കൾക്കിടയിൽ അസമാധാനം വളർത്തുന്ന പ്രധാന പ്രശ്നമാണ് രാസ ലഹരിയുടെ അമിതമായ ഉപയോഗവും വിതരണവും. ഈ സാമൂഹ്യ പ്രശ്നത്തെ അഭിമുഖീകരിക്കാൻ യുവാക്കന്മാരെയും മാതാപിതാക്കളെയും ശക്തിപ്പെടുത്തുക എന്ന ലക്ഷ്യത്തോടെയാണ് അസീസി ഇൻസ്റ്റിറ്റ്യൂട്ട് ഫോർ പീസ് സ്റ്റഡീസ് പരിപാടി സംഘടിപ്പിച്ചത്. പ്രശസ്ത ട്രെയിനറും ഈ വർഷത്തെ എക്സൈസ് വിഭാഗത്തിന്‍റെ മികച്ച ലഹരി വിരുദ്ധ അധ്യാപകനുള്ള അവാർഡ് നേടിയ സതീശൻ മാസ്റ്റർ ട്രെയിനിംഗിന് നേതൃത്വം നൽകി. മുട്ടോകടവ് വാർഡ് മെംബർ മോൻസി ജോയ് ഉദ്ഘാടനം ചെയ്ത പരിപാടിയിൽ എഐപിഎസ് ഡയറക്ടർ ഫാ. ഡിറ്റോ സെബാസ്റ്റ്യൻ അധ്യക്ഷത വഹിച്ചു.

ടൂറിസ്റ്റ് ബസും ലോറിയും കൂട്ടിയിടിച്ച് മൂന്നു പേർക്ക് പരിക്ക്

ചാവശേരി: ചാവശേരിയിൽ ടൂറിസ്റ്റ് ബസും ലോറിയും കൂട്ടിയിടിച്ച് മൂന്നുപേർക്ക് പരിക്ക്. ബംഗളൂരുവിൽ നിന്ന് കണ്ണൂരിലേക്ക് പോകുകയായിരുന്ന ടൂറിസ്റ്റ് ബസും നാഷണൽ പെർമിറ്റ് ലോറിയുമാണ് അപകടത്തിൽപ്പെട്ടത്. മട്ടന്നൂർ - ഇരിട്ടി റൂട്ടിൽ ചാവശേരി ടൗണിൽ ഇന്നലെ പുലർച്ചെ അഞ്ചോടെയായിരുന്നു അപകടം. ബംഗളൂരുവിൽ നിന്ന് കണ്ണൂർ വഴി കാഞ്ഞങ്ങാടേക്ക് പോകുകയായിരുന്ന ടൂറിസ്റ്റ് ബസും തിരൂരിൽ നിന്ന് കർണാടകത്തിലേക്ക് തേങ്ങയും കയറ്റി പോകുകയായിരുന്ന നാഷണൽ പെർമിറ്റ് ലോറിയുമാണ് കൂട്ടിയിടിച്ച് അപകടമുണ്ടായത്. ചാവശേരി ടൗണിൽ വളവിൽ വച്ചാണ് അപകടമുണ്ടായത്. അപകടത്തിൽ ബസ് യാത്രികരായ മൂന്നുപേർക്കാണ് പരിക്കേറ്റത്. ഇവരെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. അപകടത്തെ തുടർന്ന് റോഡിലേക്ക് വീണുടഞ്ഞ തേങ്ങകളും പൊട്ടിയ വാഹനത്തിന്‍റെ ഗ്ലാസുകളും മട്ടന്നൂരിൽ നിന്നെത്തിയ അഗ്നിശമന വിഭാഗം വെള്ളം ചീറ്റിച്ച് റോഡിൽ നിന്നും നീക്കം ചെയ്തു. അപകടത്തെ തുടർന്ന് അരമണിക്കൂറോളം ഗതാഗതം തടസപ്പെട്ടു. മട്ടന്നൂർ പോലീസ് സ്ഥലത്തെത്തി അപകടത്തിൽപ്പെട്ട വാഹനങ്ങൾ റോഡിൽ നിന്ന് നീക്കിയാണ് ഗതാഗതം പുനഃസ്ഥാപിച്ചത്.

പ്രതിഷേധ മാർച്ച് നടത്തി

ഇരിട്ടി: ആറുമാസത്തിലധികമായി വേതനം ലഭിക്കാത്ത തൊഴിലുറപ്പ് തൊഴിലാളികളുടെ കൂലി കുടിശിക അനുവദിക്കുക, ആറളം പഞ്ചായത്ത് ഭരണ നേതൃത്വം പദ്ധതി നടത്തിപ്പില്‍ പൊതുമരാമത്ത് ടെണ്ടറുകൾ അധിക തുകയ്ക്ക് കരാർ നൽകിയതിലെ ലക്ഷങ്ങളുടെ അഴിമതിയെക്കുറിച്ച് അന്വേഷണം നടത്തുക തുടങ്ങി ആവശ്യങ്ങളുന്നയിച്ച് കോൺഗ്രസ് ആറളം, കീഴ്പള്ളി മണ്ഡലം കമ്മിറ്റികളുടെ നേതൃത്വത്തിൽ എടൂരിൽ ആറളം പഞ്ചായത്ത് ഓഫീസിലേക്ക് പ്രതിഷേധ മാർച്ച് നടത്തി. കെപിസിസി മെന്പർ രാജീവൻ എളയാവൂർ ഉദ്ഘാടനം ചെയ്തു. ജോഷി പാലമറ്റം അധ്യക്ഷത വഹിച്ചു. കെ. വേലായുധൻ, വി.ടി. തോമസ്, പി.എ. നസീർ, ജിമ്മി അന്തിനാട്ട് , അരവിന്ദൻ അക്കാനശ്ശേരി, ഷിജി നടുപ്പറമ്പിൽ, രജിത മാവില , ലില്ലി മുരിയംകരി, അമൽ മാത്യു, വത്സജോസ്, ജോസ് അന്ത്യാകുളം, വി. ശോഭ, ജോർജ് ആലാംപള്ളി, സെലിൻ ടീച്ചർ, ജെസി ഉമ്മിക്കുഴി, മാർഗരറ്റ് വീറ്റോ, അബ്ദുൾ നാസർ, ഫ്രാൻസിസ് കുട്ടിക്കാട്ട്, കെ.എം. പീറ്റർ, ഹരീന്ദ്രൻ, സജി കൂറ്റനാൽ എന്നിവർ പ്രസംഗിച്ചു.

മാഹി റെയിൽവേ സ്റ്റേഷൻ നവീകരണം പൂർത്തിയാകുന്നു

മാഹി: മാഹി റെയിൽവേ സ്റ്റേഷന്‍റെ വികസന പ്രവർത്തനങ്ങളുടെ ഭാഗമായി ആധുനിക സൗകര്യങ്ങൾ ഏർപ്പെടുത്തി മോടി പിടിപ്പിക്കുന്ന പ്രവൃത്തി അവസാനഘട്ടത്തിൽ. രാജ്യത്തെ ചെറിയ റെയിൽവേ സ്റ്റേഷനുകളുടെ വികസനത്തിനായി ആവിഷ്കരിച്ച അമൃത് ഭാരത് പദ്ധതിയുടെ ഭാഗമായാണ് വികസന പ്രവർത്തനങ്ങൾ നടക്കുന്നത്. 95 ശതമാനത്തോളം പ്രവൃത്തിയും ഇതിനകം പൂർത്തിയായി. അസൗകര്യങ്ങൾ ഏറെയുള്ള ഈ റെയിൽവേ സ്റ്റേഷനിൽ 10 കോടിയിൽപരം രൂപയുടെ വികസന പ്രവർത്തനങ്ങളാണ് പൂർത്തിയായിട്ടുള്ളത്. പ്രവേശന കവാടം ഉൾപ്പെടെയുള്ളവ പ്രവൃത്തികൾ നേരത്തെ തന്നെ പൂർത്തിയാക്കി അതിമനോഹരമാക്കിയിട്ടുണ്ട്. പ്രവേശന കവാടത്തിന്‍റെ വലത് ഭാഗത്തും ഇടത് ഭാഗത്തും രണ്ടാമത്തെ പ്ലാറ്റ് ഫോമിനോട് ചേർന്നുമുള്ള പാർക്കിംഗ് ഏരിയകളും പൂർത്തിയായി. പ്ലാറ്റ് ഫോമിന്‍റെ ഷെൽട്ടർ ഉയരം കൂട്ടൽ, പ്ലാറ്റ്ഫോമിന്‍റെ തറയിൽ ഇരു ഭാഗങ്ങളിലുമായി കടപ്പ വിരിക്കൽ തുടങ്ങിയവയും പൂർത്തിയാക്കി. പൂന്തോട്ടം ഉൾപ്പെടെയുള്ള പ്രകൃതി സൗഹൃദമായ ഗ്രീൻ പാർക്കിംഗ് ഏരിയയും സ്ഥാപിച്ചിട്ടുണ്ട്. അതേ സമയം ഒന്നാമത്തെ പ്ലാറ്റ്ഫോമിലെ നിലവിലുള്ള ശൗചാലയം നവീകരിക്കുന്ന പ്രവൃത്തി അടുത്ത ദിവസം തുടങ്ങും. രണ്ട് പ്ലാറ്റ്ഫോമിനെയും ബന്ധിപ്പിക്കുന്ന മേൽപാതയിലേക്കുള്ള ലിഫ്റ്റിന്‍റെ നിർമാണം അവസാന ഘട്ടത്തിലാണ്. രണ്ടാമത്തെ പ്ലാറ്റ്ഫോമിലെ ഏതാനും ഷെൽട്ടറുകളുടെ മേൽക്കൂരയുടെ ഇരുമ്പ് ഷീറ്റ് മാറ്റുന്ന പ്രവൃത്തിയും അടുത്ത ദിവസം പൂർത്തിയാക്കും. കുറ്റവാളികളുടെയും മദ്യപസംഘത്തിന്‍റെ താവളമായി മാറിയ റെയിൽവേ സ്റ്റേഷനിൽ രണ്ടാമത്തെ പ്ലാറ്റ്ഫോമിന്‍റെ ഭാഗത്ത് ആർപിഎഫിന്‍റെ ഔട്ട്പോസ്റ്റും സ്ഥാപിച്ചിട്ടുണ്ട്. രണ്ടോ മൂന്നോ ആഴ്ചകൾക്കകം നിർമാണ പ്രവൃത്തികൾ മുഴുവൻ പൂർത്തിയാക്കി ഉദ്ഘാടനം നടക്കുമെന്നാണ് സൂചന.

പിഎം ശ്രീ പദ്ധതി: മന്ത്രിസഭ പരിഗണിച്ചില്ല

സ്വന്തം ലേഖകൻ തിരുവനന്തപുരം: സ്കൂളുകളുടെ അടിസ്ഥാന സൗകര്യ വികസനത്തിന് അടക്കം പൊതുവിദ്യാഭ്യാസ മേഖലയിൽ പണം അനുവദിക്കുന്ന കേന്ദ്രാവിഷ്കൃത പദ്ധതിയായ പിഎം ശ്രീ പദ്ധതി സംസ്ഥാനത്തു നടപ്പാക്കുന്നതു സംബന്ധിച്ചു സിപിഐയുടെ കടുത്ത എതിർപ്പിനെ തുടർന്നു മാറ്റിവച്ച ഫയൽ ഇന്നലെ ചേർന്ന മന്ത്രിസഭായോഗം പരിഗണിച്ചില്ല. ഇക്കാര്യത്തിൽ കാര്യമായ ചർച്ച നടന്നില്ല. ഇന്നലത്തെ മന്ത്രിസഭയിൽ കൊണ്ടുവരുമെന്നു പൊതു വിദ്യാഭ്യാസ മന്ത്രി വി. ശിവൻകുട്ടി കഴിഞ്ഞ ദിവസം പറഞ്ഞെങ്കിലും ഇന്നലെ ചേർന്ന മന്ത്രിസഭയിൽ ഇക്കാര്യം ചർച്ചയായില്ല. ഇനി എൽഡിഎഫിൽ ചർച്ച ചെയ്ത ശേഷം മാത്രമേ കേന്ദ്ര ഫണ്ട് ലഭിക്കാനുള്ള നടപടികൾ സ്വീകരിക്കുകയുള്ളൂവെന്നാണു വിവരം. എന്നാൽ, പിഎംശ്രീയുടെ കോടികളുടെ കേന്ദ്രഫണ്ട് കേരളത്തിനു വേണമെന്നാണു സിപിഎം നിലപാട്. പിഎംശ്രീ പദ്ധതിക്കെതിരേ സിപിഐ മുഖപത്രം മുഖപ്രസംഗവുമായി രംഗത്ത് എത്തിയിരുന്നു. സിപിഐ അനുകൂല അധ്യാപക സംഘടനയും ഇതിനെ കടുത്ത ഭാഷയിൽ വിമർശിച്ചു രംഗത്ത് എത്തിയിരുന്നു. കഴിഞ്ഞ ആഴ്ചയിലെ മന്ത്രിസഭയിൽ കേന്ദ്ര ഫണ്ട് ലഭിക്കുന്ന പദ്ധതിയിൽ കേന്ദ്രം നിർദേശിക്കുന്ന സിലബസും കരിക്കുലവും നിർദേശിക്കേണ്ടി വരുമോ എന്ന സിപിഐ മന്ത്രിമാരുടെ ചോദ്യത്തിനു മുഖ്യമന്ത്രിക്കും പൊതു വിദ്യാഭ്യാസ മന്ത്രിക്കും മറുപടി നൽകാനായില്ല. തുടർന്ന് സിപിഐ മന്ത്രിമാരുടെ എതിർപ്പിനെ തുടർന്നു മാറ്റിവയ്ക്കുകയായിരുന്നു. വിദ്യാഭ്യാസത്തിൽ സ്വകാര്യവത്കരണവും വർഗീയവത്കരണവും പ്രോത്സാഹിപ്പിക്കുന്നതാണ് എൻഇപി എന്നാണ് ഇടതുസംഘടനകളുടെ വാദം. ഒരു ബ്ലോക്കിൽ രണ്ടു സ്കൂളുകളിൽ പദ്ധതി നടപ്പാക്കിയതിന്‍റെ മികവു പ്രദർശിപ്പിക്കണമെന്നാണ് കേന്ദ്രനയം. പിഎം ശ്രീയുമായി ബന്ധപ്പെട്ടു സ്കൂളിന്‍റെ പേരിലും മാറ്റം വരുത്തേണ്ടിവരും. ഒരു സ്കൂളിന് ഒരുകേ ാടിയോളം രൂപ സഹായം ലഭിക്കുന്നതാണ് പദ്ധതി. കേന്ദ്രാവിഷ്കൃത പദ്ധതികൾ നടപ്പാക്കേണ്ട സമഗ്രശിക്ഷാ കേരളം വഴിയാണ് പിഎം ശ്രീ നടപ്പാക്കേണ്ടത്. സിബിഐ അന്വേഷണം നേരിടുന്ന ഡോ.കെ.എം. ഏബ്രഹാമിനെ മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറി പദവിയിൽ നിലനിർത്തുമോ എന്ന കാര്യത്തിൽ മന്ത്രിസഭയിൽ ചർച്ച വരുമെന്നു പ്രതീക്ഷിച്ചെങ്കിലും ഒരു മന്ത്രിയും ഇക്കാര്യം ഉന്നയിക്കാത്തതിനാലും മുഖ്യമന്ത്രി പിണറായി വിജയൻ ഇതു സംബന്ധിച്ച് ഒന്നും പറയാത്തതിനാലും ഈ വിഷയത്തിലും മന്ത്രിസഭയിൽ ചർച്ചയുണ്ടായില്ല. മുഖ്യമന്ത്രിയുടെ ചീഫ് പ്രിൻസിപ്പൽ സ്ഥാനത്തും കിഫ്ബി സിഇഒ സ്ഥാനത്തും കെ.എം. ഏബ്രഹാം തുടരണമോ എന്ന കാര്യം മുഖ്യമന്ത്രി തീരുമാനിക്കുമെന്നു കഴിഞ്ഞ ദിവസം കെ.എം. ഏബ്രഹാം വ്യക്തമാക്കിയിരുന്നു.

ദിവ്യയുടെ രാഗേഷ് സ്തുതി: കോണ്‍ഗ്രസിൽ അമർഷം

തിരുവനന്തപുരം: സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷിനെ അഭിനന്ദിച്ച ദിവ്യ എസ്. അയ്യരുടെ നിലപാടിൽ കോണ്‍ഗ്രസിനുള്ളിൽ അമർഷം. ദിവ്യ മുഖ്യമന്ത്രി പിണറായി വിജയനു പാദസേവ ചെയ്യുന്ന ഉദ്യോഗസ്ഥയാണെന്നു കോണ്‍ഗ്രസ് നേതാവ് കെ. മുരളീധരൻ പറഞ്ഞു. ഭർത്താവും മുൻ കോണ്‍ഗ്രസ് എംഎൽഎയുമായ കെ.എസ്. ശബരീനാഥനും ദിവ്യക്കെ തിരേ രംഗത്തെത്തി. രാഷ്ട്രീയ നിയമനം ലഭിച്ച വ്യക്തിയെ ദിവ്യ അഭിനന്ദിച്ചതു സദുദ്ദേശ്യപരമാണെങ്കിലും അതിലൊരു വീഴ്ചയുണ്ടെന്നായിരുന്നു ശബരിയുടെ പ്രതികരണം. സർക്കാരിനെയും നയങ്ങളെയും അഭിനന്ദിക്കാം. പക്ഷേ രാഷ്ട്രീയ നിയമനം ലഭിച്ച വ്യക്തിയെ അഭിനന്ദിച്ചത് അതുപോലെയല്ല. അതിനാൽതന്നെ ദിവ്യ നടത്തിയ പ്രതികരണം പെട്ടെന്നു സർക്കാർ തലത്തിൽ നിന്നു രാഷ്ട്രീയതലത്തിലേക്കു മാറി. അതുകൊണ്ടാണ് ഇങ്ങനെയൊരു വിവാദം ഉണ്ടായതെന്നും ശബരീനാഥൻ പറഞ്ഞു. കർണനു പോലും അസൂയ തോന്നുന്ന കെകെആർ കവചമെന്നായിരുന്നു മുഖ്യമന്ത്രിക്കൊപ്പമുള്ള രാഗേഷിന്‍റെ ചിത്രം പങ്കുവച്ചുകൊണ്ട് ദിവ്യ എസ്. അയ്യർ കഴിഞ്ഞ ദിവസം പുകഴ്ത്തിയത്. മുഖ്യമന്ത്രിയുടെ പ്രൈവറ്റ് സെക്രട്ടറിയായ കെ.കെ. രാഗേഷിനെ കഴിഞ്ഞ ദിവസം ചേർന്ന പാർട്ടി കണ്ണൂർ ജില്ലാ കമ്മിറ്റിയാണു ജില്ലാ സെക്രട്ടറിയായി തെരഞ്ഞെടുത്തത്. നേരത്തേയും ദിവ്യ എസ്. അയ്യർ സർക്കാരിനും സിപിഎം നേതാക്കൾക്കും അനുകൂലമായി പരാമർശങ്ങൾ നടത്തിയിരുന്നു. മുഖ്യമന്ത്രി പിണറായി വിജയനെ പുകഴ്ത്തിക്കൊണ്ടുള്ള ദിവ്യയുടെ പ്രസ്താവനകൾ കോണ്‍ഗ്രസിനെ പലപ്പോഴും വെട്ടിലാക്കിയിട്ടുണ്ട്.

മണത്തണയിലെ ക്ഷേത്ര കവർച്ച: പ്രതി അറസ്റ്റിൽ; തെളിവെടുപ്പ് നടത്തി

മണത്തണ: ചപ്പാരം ഭഗവതി ക്ഷേത്ര മോഷണക്കേസിൽ ഒരാൾ അറസ്റ്റിൽ. ആലക്കോട് സ്വദേശി പി.കെ.ഷിജുവിനെയാണ് പേരാവൂർ പോലീസ് അറസ്റ്റ് ചെയ്തത്. പേരാവൂർ എസ്എച്ച്ഒ പി.ബി. സജീവന്‍റെ നേതൃത്വത്തിലുള്ള പോലീസ് സംഘം ആലക്കോട് വച്ചാണ് പ്രതിയെ അറസ്റ്റ് ചെയ്തത്. വിരലടയാള വിദഗ്ധർ നടത്തിയ പരിശോധനയിൽ ലഭിച്ച വിവരങ്ങളുടെ അടിസ്ഥാനത്തിൽ നടത്തിയ അന്വേഷണത്തിലാണ് പ്രതിയെക്കുറിച്ച് വിവരങ്ങൾ ലഭിച്ചത്. പ്രതിയുമായി പോലീസ് ക്ഷേത്രത്തിലെത്തി തെളിവെടുപ്പ് നടത്തി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കഴിഞ്ഞ മാസം 25ന് രാത്രിയായിരുന്നു ക്ഷേത്രത്തിൽ കവർച്ച നടന്നത്. ഗണപതി കോവിലിന് മുന്നിലെ ഭണ്ഡാരവും ക്ഷേത്രത്തിന് പുറത്തുള്ള ഭണ്ഡാരവും കുത്തിതുറന്ന് പണം കവരുകയായിരുന്നു. കൂടാതെ ക്ഷേത്രത്തിലെ രണ്ടു ഭണ്ഡാരങ്ങൾ എടുത്തു കൊണ്ടു പോയി ക്ഷേത്രകമ്മിറ്റി ഓഫീസിനു പിറക് വശത്ത് വച്ച് പൂട്ട് തകർത്തും പണം കവർന്നിരുന്നു. രാവിലെ ക്ഷേത്രത്തിലെത്തിയ ജീവനക്കാർ ഭണ്ഡാരത്തിന് പുറത്ത് പത്തു രൂപ നോട്ട് കിടക്കുന്നത് കണ്ട് എടുത്ത് ഭണ്ഡാരത്തിലിടാൻ നോക്കിയപ്പോഴാണ് കുത്തിപ്പൊളിച്ച നിലയിൽ കണ്ടെത്തിയത്. മോഷ്ടാവിന്‍റേത് എന്ന് സംശയിക്കുന്ന ടോർച്ച് ക്ഷേത്രത്തിന് പുറത്തുനിന്ന് ലഭിച്ചിരുന്നു. മോഷ്ടാവിന്‍റെ സിസിടിവി ദൃശ്യവും ലഭിച്ചിരുന്നു.

വയോധികൻ പുഴയിൽ മുങ്ങി മരിച്ചു

ഇരിട്ടി: പുഴയിൽ കുളിക്കാനിറങ്ങിയ വയോധികനെ മരിച്ചനിലയിൽ കണ്ടെത്തി. ആനപ്പന്തിയിലെ തെക്കേപറമ്പിൽ ജോർജിനെ (സണ്ണി-73) ആണ് ആനപ്പന്തി കുണ്ടൂർ പുഴയിൽ മുങ്ങിമരിച്ച നിലയിൽ കണ്ടത്. ഇന്നലെ ഉച്ചയോടുകൂടി പുഴയിൽ കുളിക്കാനിറങ്ങിയ ജോർജിനെ മരിച്ച നിലയിൽ കണ്ടെത്തുകയായിരുന്നു. സംസ്കാരം ഇന്ന് ഉച്ചകഴിഞ്ഞ് ആനപ്പന്തി കരുണാമയനായ ഈശോയുടെ പള്ളിയിൽ. ഭാര്യ: അൽഫോൻസ. മക്കൾ: കൊളിൻസ്, റോബിൻസ്, ഷാരോൺ. മരുമക്കൾ: ലിജോ (ചുണ്ടപ്പറമ്പ്), ഷെബിൻ (നെല്ലിക്കാംപൊയിൽ).

യുവതിയെ വീട്ടിൽ മരിച്ച നിലയിൽ കണ്ടെത്തി

ആലക്കോട്: ഗർഭിണിയായ യുവതിയെ വീട്ടിൽ മരിച്ചനിലയിൽ കണ്ടെത്തി. കരുവഞ്ചാൽ കോട്ടക്കടവിലെ പട്ടയറക്കൽ അജേഷിന്‍റെ ഭാര്യ ദിവ്യ (30) ആണ് മരിച്ചത്. കഴിഞ്ഞ ദിവസം രാവിലെയായിരുന്നു സംഭവം. ഭർതൃവീട്ടിലെ കിടപ്പുമുറിയിൽ അവശനിലയിൽ കാണപ്പെട്ട യുവതിയെ ബന്ധുക്കൾ കരുവഞ്ചാലിലെ സ്വകാര്യ ആശുപത്രിയിൽ പ്രവേശിപ്പിച്ചുവെങ്കിലും മരണപ്പെട്ടിരുന്നു. ഒരുവർഷം മുമ്പാണ് ഇരുവരും വിവാഹിതരായത്. കൊല്ലം കുണ്ടറ കാഞ്ഞിരക്കോട്ടെ നന്ദാവനം ജോണിയുടെ മകളാണ് ദിവ്യ. മൃതദേഹം പരിയാരം മെഡിക്കൽ കോളജിൽ പോസ്റ്റുമോർട്ടത്തിനുശേഷം കുണ്ടറയിലെത്തിച്ച് സംസ്കരിച്ചു.

തലശേരിയിൽ കേരള ദിനേശ് ഏഴുനിലകളുള്ള ഫ്ലാറ്റ് നിർമിക്കും: എം.കെ. ദിനേശ് ബാബു

തലശേരി: ഇല്ലത്ത് താഴെയിൽ അഞ്ചുകോടി ചെലവിൽ ഏഴു നിലകളിൽ ഫ്ലാറ്റ് സമുച്ചയം നിർമിക്കുമെന്നും വൈവിധ്യവത്കരണത്തിലൂടെ കേരള ദിനേശ് കൂടുതൽ തൊഴിലവസരങ്ങൾ സൃഷ്ടിക്കുമെന്നും ചെയർമാൻ എം.കെ. ദിനേശ് ബാബു. തലശേരി പ്രസ് ഫോറം സംഘടിപ്പിച്ച മീറ്റ് ദ പ്രസ് പരിപാടിയിൽ സംസാരിക്കുകയായിരുന്നു അദ്ദേഹം. നിലവിലുള്ള ദിനേശ് ഫുഡ്സ്, ദിനേശ് അംബ്രല്ല, ദിനേശ് ഐഐടി സിസ്റ്റംസ്, ദിനേശ് അപ്പാരൽസ്, ദിനേശ് ഓഡിറ്റോറിയം, മിനി സൂപ്പർ മാർക്കറ്റുകൾ, ഹോട്ടലുകൾ എന്നിവ കൂടുതൽ സജീവമാക്കും. സഹകരണ മേഖലയിൽ ആദ്യത്തെ ഡ്രോൺ പരിശീലന കേന്ദ്രം കണ്ണൂരിൽ തുടങ്ങും. കേരളത്തിൽ വർധിച്ചുവരുന്ന വന്യമൃഗ സംഘർഷം ലഘൂകരിക്കാൻ പാലക്കാട്, വയനാട് ജില്ലകളിൽ നിർമിത ബുദ്ധിയിൽ പ്രവർത്തിക്കുന്ന ആധുനിക നിരീക്ഷണ സംവിധാനം ഏർപ്പെടുത്തും. വൈൽഡ് വാച്ച് എന്ന സിസ്റ്റത്തിലൂടെ വന്യമൃഗങ്ങൾ നാട്ടിലിറങ്ങുന്നതിന് മുന്പ് വനംവകുപ്പിന് മുന്നറിയിപ്പും ജനത്തിന് വിവരവും ലഭ്യമാക്കാനാണ് വനംവകുപ്പുമായി സഹകരിച്ച് ഈ പദ്ധതി നടപ്പിലാക്കുന്നത്. ഉൾക്കാടുകളിലൂടെയുള്ള വന്യമൃഗ സഞ്ചാരവഴിയും ഇതിലൂടെ കണ്ടെത്താനാകും. മായം കലരാത്തതും വിശ്വസിച്ച് വാങ്ങാൻ കഴിയുന്നതുമായ ഭക്ഷ്യ ഉത്പന്നങ്ങളാണ് വിപണിയിൽ ദിനേശിന്‍റേതായി എത്തിക്കുന്നത്. ഇത് ഒരിക്കൽ ഉപയോഗിച്ചവർ വീണ്ടും അതു തന്നെ ചോദിച്ച് വാങ്ങുന്നുണ്ട്. ദിനേശ് കുട ഇതിനകം ജനസമ്മതി നേടിക്കഴിഞ്ഞു. വില്പന മാത്രമല്ല, തകരാറുകൾ പരിഹരിച്ചു നൽകുന്നതും കുട വിപണിയിൽ ദിനേശിന്‍റെ പ്രത്യേകതയാണ്. തകരാറുകൾ ആറു മാസത്തിനകം പരിഹരിക്കാൻ കഴിയാതായാൽ കുട തന്നെ മാറ്റി നൽകുന്നുണ്ട്. പൈതൃക ടൂറിസം പദ്ധതിയിൽ നീലേശ്വരത്തും പ്രത്യേക സംരംഭങ്ങൾ തുടങ്ങും. ഇതിനുള്ള അനുമതിക്കായി സർക്കാരിനെ സമീപിച്ചിട്ടുണ്ട്. മീറ്റ് ദ പ്രസ് പരിപാടിയിൽ പ്രസ് ഫോറം പ്രസിഡന്‍റ് നവാസ് മേത്തർ അധ്യക്ഷത വഹിച്ചു.

തോൽക്കാൻ മനസില്ലാത്ത ബൈജുവിന്‍റെ അമ്പതാം ജന്മദിനം ആഘോഷമാക്കി നാട്ടുകാർ

ഇരിട്ടി: 30 വർഷങ്ങൾക്ക് മുന്പ് ജോലിക്കിടയിൽ നടന്ന അപകടത്തിൽ നട്ടെല്ലിന് പരിക്കുപറ്റി കിടപ്പിലായ കുന്നോത്ത്പറമ്പിലെ പാറയിൽ അച്യുതൻ- ചന്ദ്രിക ദന്പതികളുടെ മകനായ ബൈജുവിന്‍റെ അമ്പതാം ജനദിനം ആഘോഷമാക്കി നാട്ടുകാർ. തളർന്നു കിടന്നുപോകുമെന്ന് വൈദ്യശാസ്ത്രം വിധിയെഴുതിയ ബൈജുവിന്‍റെ ജീവിതം സ്വന്തം ഇച്ഛാശക്തികൊണ്ടുള്ള തിരിച്ചുവരവായിരുന്നു. ദുഃഖങ്ങൾക്കും വേദനകൾക്കും ഇനി തന്‍റെ ജീവിതത്തിൽ ഇടമില്ലെന്ന ഉറച്ച വിശ്വാസവും ചുറ്റും നിൽക്കുന്നവർ നൽകുന്ന സ്‌നേഹവും കരുതലുമെല്ലാം ബൈജുവിനെ കൈപിടിച്ചുയർത്തി. ബൈജുവിന്‍റെ അമ്പതാം പിറന്നാൾ ആഘോഷം അതിജീവനത്തിനുള്ള ആദരവ് കൂടിയായിരുന്നു. 1995 ഡിസംബർ 28 നായിരുന്നു ബൈജുവിന്‍റെ മോഹങ്ങളെയും സ്വപ്നങ്ങളെയും തച്ചുടച്ച് ജോലിക്കിടയിൽ അപകടം സംഭവിക്കുന്നത്. വീട് പെയിന്‍റിംഗ് ചെയ്യുന്നതിനിടെ താഴെവീണ് ബൈജുവിന് ഗുരുതരമായി പരിക്കേൽക്കുന്നത്. ഇരിട്ടി, കണ്ണൂർ, കോഴിക്കോട്, മംഗളൂരു ആശുപത്രികളിലായി പിന്നീട് ജീവിതം. പ്രതീക്ഷയില്ലെന്നായിരുന്നു ഡോക്ടർമാരുടെ വാക്കുകൾ. ബന്ധുക്കളും കൂട്ടുകാരും ഒപ്പമുണ്ടെങ്കിലും ചികിത്സയും പണവും ബൈജുവിന്‍റെ കുടുംബത്തിന് താങ്ങാൻ കഴിയുന്നതിനപ്പുറമായിരുന്നു. പതിയെ ആയുർവേദത്തിലേക്ക് ചികിത്സ മാറി. ആയുർവേദത്തിലെ ചികിത്സ അരയ്ക്ക് താഴേക്ക് തളർന്നുകിടപ്പിലായിരുന്ന ബൈജുവിന് ചെറിയ പ്രതീക്ഷകൾ നൽകി. അഞ്ചു വർഷത്തിന് ശേഷം വീൽചെയറിൽ എത്തി. ധാരാളം സൗഹൃദ വലയങ്ങളുള്ള ബൈജുവിന് നവമാധ്യമങ്ങൾ കൂട്ടിനെത്തിയപ്പോൾ പിന്നീടൊരിക്കലും പഴയ ഓർമകളിൽ ഒതുങ്ങി കഴിയേണ്ടതായി വന്നില്ല. വീട്ടിൽ തന്നെ ഒരു കട തുടങ്ങി. കടയിൽ എത്തുന്നവർ തന്നെ സാധങ്ങൾ എടുക്കണം. തുക കണക്കുകൂട്ടി പെട്ടിയിൽ നിക്ഷേപിക്കണം. ഇതിനെല്ലാമിടയിൽ വർഷങ്ങൾ പിന്നോട്ടോടിയത് ബൈജു അറിഞ്ഞില്ല. ഒരു നഷ്‌ടബോധവും തോന്നാതെ സുഹൃത്തുക്കൾക്കൊപ്പം വീൽചെയറിൽ അമ്പലപ്പറമ്പിലും ടൂറിസം കേന്ദ്രങ്ങളിലും ബൈജു എത്തും. കാലുകൾ തളർന്ന ബൈജുവിന്‍റെ കാലുകളായി സുഹൃത്തുക്കൾ ചുറ്റുമുണ്ടാകും. അമ്പതാം ജന്മദിനത്തിൽ ബൈജുവിന് ലഭിച്ച പിറന്നാൾ സമ്മാനം വീൽചെയറായിരുന്നു. ബ്ലോക്ക് പഞ്ചായത്ത് നൽകിയ പുതിയ വീൽചെയർ ബൈജുവിന്‍റെ സഞ്ചാരം കുറച്ചുകൂടി എളുപ്പത്തിലാക്കി. മുപ്പതു വർഷത്തെ അതിജീവനം പൂർത്തിയാക്കിയ ബൈജുവിന് എപ്പോഴും കരുത്തും സ്വാന്ത്വനവും ആത്മവിശ്വാസവും തണലുമായി അച്ഛനും അമ്മയും അനുജൻമാരും ബന്ധുക്കളും സുഹൃത്തുക്കളും കൂടെയുണ്ട്. അതിന്‍റെ തെളിവായിരുന്നു ഒരു ഗ്രാമം മുഴുവൻ ആടിപ്പാടി ആഘോഷിച്ച ബൈജുവിന്‍റെ അമ്പതാം ജന്മദിനം.

ദേവാലയങ്ങളിലേക്കുള്ള മൂറോൻ തൈലം വെഞ്ചരിച്ചു

ആലക്കോട്: തലശേരി അതിരൂപതയിലെ പരിശുദ്ധ മൂറോൻ തൈലം വെഞ്ചരിപ്പ് കർമം ആലക്കോട് സെന്‍റ് മേരീസ് ഫൊറോന പള്ളിയിൽ നടന്നു. ആർച്ച്ബിഷപ് മാർ ജോസഫ് പാംപ്ലാനി മുഖ്യകാർമികത്വം വഹിച്ചു. ആർച്ച്ബിഷപ് എമരിറ്റസ് മാർ ജോർജ് ഞറളക്കാട്ട് തിരുക്കർമങ്ങളിലും വിശുദ്ധ കുർബാനയിലും പങ്കെടുത്തു. മാമ്മോദീസ, സ്ഥൈര്യലേപനം, പട്ടം നൽകൽ, തൈലാഭിഷേകം എന്നിവയ്ക്ക് ഉപയോഗിക്കുന്ന അഭിഷേക തൈലത്തിന്‍റെ വെഞ്ചരിപ്പ് കർമമാണ് മൂറോൻ. അതിരൂപതയിലെ എല്ലാ പള്ളികളിലേക്കുള്ള തൈലത്തിന്‍റെ വെഞ്ചരിപ്പ് കർമമാണ് നടന്നത്. വിശുദ്ധ കുർബാനയിലും അഭിഷേകതൈലത്തിന്‍റെ വെഞ്ചരിപ്പ് കർമത്തിലും അതിരൂപതയിലെ 350 ഓളം വൈദികർ പ്രദക്ഷിണമായി പള്ളിയിൽ പ്രവേശിച്ച് തിരുക്കർമങ്ങളിൽ പങ്കുചേർന്നു. മൂറോൻ തൈല വെഞ്ചരിപ്പ് കർമത്തിൽ നിരവധി വിശ്വാസികളും പങ്കെടുത്തു. തുടർച്ചയായി രണ്ടാം വർഷമാണ് ആലക്കോട് ഫൊറോന പള്ളി മൂറോൻ തൈലം വെഞ്ചിരിപ്പിന് ആതിഥേയത്വം വഹിക്കുന്നത്. ******************** കണ്ണൂർ: കണ്ണൂർ രൂപതയ്ക്ക് അനുഗ്രഹത്തിന്‍റെ ദിനമായി വിശുദ്ധവാരത്തിലെ തിങ്കളാഴ്ച. ജ്ഞാനസ്നാനം, സ്ഥൈര്യലേപനം, പൗരോഹിത്യം, രോഗീലേപനം എന്നീ കൂദാശകൾക്കായി അടുത്തവർഷം മുഴുവൻ കണ്ണൂർ രൂപതയുടെ ദേവാലയങ്ങളിൽ ഉപയോഗിക്കേണ്ട പ്രത്യേക തിരുത്തൈലങ്ങൾ ബർണശേരി ഹോളി ട്രിനിറ്റി കത്തീഡ്രലിൽ കണ്ണൂർ ബിഷപ് ഡോ. അലക്സ് വടക്കുംതല ആശീർവദിച്ചു. രൂപത വൈദികദിനമായി ആഘോഷിച്ച തിങ്കളാഴ്ച ബിഷപ് ഡോ. അലക്സ് വടക്കുംതലയുടെ മുഖ്യകാർമികത്വത്തിൽ സഹായ മെത്രാൻ ഡോ. ഡെന്നീസ് കുറുപ്പശേരി, വികാരി ജനറാൾ മോൺ. ഡോ. ക്ലാരൻസ് പാലിയത്ത് രൂപതയിലെ എല്ലാ വൈദികരും ചേർന്ന് അർപ്പിച്ച ദിവ്യബലി മധ്യേയാണ് തൈലങ്ങൾ ആശീർവദിച്ചത്. പൗരോഹിത്യ കൂട്ടായ്മയെ അനുസ്മരിച്ച് രൂപതയിലെ എല്ലാ വൈദികരും പൗരോഹിത്യവ്രത വാഗ്ദാന നവീകരണവും നടത്തി. ദിവ്യബലിയിൽ വൈദികരും സന്യസ്തരും അല്മായരും പങ്കെടുത്തു.

അന്ത്യഅത്താഴ ഓർമകളിൽ നാളെ പെസഹ വ്യാഴം

കണ്ണൂർ: നാളെ പെസഹാ വ്യാഴം. കുരിശുമരണത്തിന് മുമ്പ് യേശുഎളിമയുടെ സന്ദേശം നൽകി തന്‍റെ ശിഷ്യന്മാരുടെ കാലുകൾ കഴുകി അവർക്കൊപ്പം അന്ത്യഅത്താഴം കഴിച്ചതിന്‍റെ ഓർമ പുതുക്കൽ. പെസഹാ ദിനത്തിന്‍റെ ഭാഗമായി ക്രൈസ്തവ ദേവാലയങ്ങളിൽ നാളെ കാൽകഴുകൽ ശുശ്രൂഷയും പ്രത്യേക പ്രാർഥനാ ചടങ്ങുകളും നടക്കും. തലശേരി സെന്‍റ് ജോസഫ്സ് കത്തീഡ്രലിൽ രാവിലെ ഏഴിന് കാലുകഴുകൽ ശുശ്രൂഷയും വിശുദ്ധ കുർബാനയും. രാവിലെ 9.30 നും വൈകുന്നേരം 4.30നും ദിവ്യകാരുണ്യ ആരാധന എന്നിവ നടക്കും. വൈകുന്നേരം പൊതുആരാധനയും ഉണ്ടായിരിക്കും. ദുഃഖവെള്ളി ദിവസം രാവിലെ ഏഴിന് പീഡാനുഭവ വെള്ളി തിരുക്കർമങ്ങൾ, വൈകുന്നേരം അഞ്ചിന് കുരിശിന്‍റെ വഴി എന്നിവ നടക്കും. വലിയ ശനി രാവിലെ 6.30ന് വിശുദ്ധ കുർബാന, വലിയ ശനി തിരുക്കർമങ്ങൾ എന്നിവ നടക്കും. ഉയിർപ്പു തിരുനാൾ ദിവസമായ 20ന് പുലർച്ചെ മൂന്നിന് ഉയിർപ്പുതിരുനാൾ തിരുക്കർമങ്ങളും ആഘോഷമായ വിശുദ്ധ കുർബാനയും നടക്കും. രാവിലെ ഒന്പതിനും വിശുദ്ധ കുർബാനയുണ്ടായിരിക്കും. തിരുക്കർമങ്ങൾക്ക് ആർച്ച്ബിഷപ് മാർ ജോസഫ് പാപ്ലാനി മുഖ്യകാർമികത്വം വഹിക്കും. ബർണശേരി ഹോളി ട്രിനിറ്റി കത്തീഡ്രലിൽ പെസഹ വ്യാഴാഴ്ച വൈകുന്നേരം ആറിന് കാൽകഴുകൽ ശുശ്രൂഷയും തിരുവത്താഴ പൂജയും ദിവ്യകാരുണ്യ പ്രദക്ഷിണവും രാത്രി 12 വരെ ദിവ്യകാരുണ്യാരാധനയും നടക്കും. ദുഃഖവെള്ളിയാഴ്ച ഉച്ചകഴിഞ്ഞ് മൂന്നിന് പീഢാനുഭവ തിരുക്കർമങ്ങളും കുരിശിന്‍റെ ആരാധനയും നടക്കും. തുടർന്നു പള്ളിയ്ക്കുചുറ്റും കുരിശിന്‍റെ വഴി, നഗരികാണിക്കൽ എന്നിവ ഉണ്ടായിരിക്കും.19നു രാത്രി 10.30ന് ഉയിർപ്പ് തിരുക്കർമങ്ങൾ. പെസഹാജാഗരം, ദീപാർച്ചന, പെസഹാ പ്രഘോഷണം, ജ്ഞാ നസ്നാനജല ആശീർവാദം, ദിവ്യബലിയും നടക്കും. 20 നു രാവിലെ ഏഴിന് ദിവ്യബലി (ഇംഗ്ലീഷ്) , 8.30നുള്ള ദിവ്യബലിയോടെ വിശുദ്ധവാര തിരുക്കർമങ്ങൾ സമാപിക്കും. ശ്രീപുരം സെന്‍റ് മേരീസ് പള്ളിയിൽ പെസഹാ വ്യാഴാഴ്ച രാവിലെ ഏഴിന് നടക്കുന്ന കാൽകഴുകൽ ശുശ്രൂഷക്ക് കോട്ടയം അതിരൂപത സഹായ മെത്രാൻ മാർ ജോസഫ് പണ്ടാരശേരിൽ മുഖ്യകാർമികത്വം വഹിക്കും. ദുഃഖവെള്ളിയാഴ്ച രാവിലെ ഏഴിനും ഈസ്റ്റർ ദിവസം പുലർച്ചെ അഞ്ചിനും നടക്കുന്ന തിരുക്കർമങ്ങൾക്കും മാർ പണ്ടാരശേരിൽ മുഖ്യകാർമികത്വം വഹിക്കും.ദുഃഖവെള്ളി രാവിലെ 8.30 ന് കണ്ണൂർ ടാണിലെ വിവിധ പള്ളികളുടെ നേതൃത്വത്തിൽ സംയുക്ത കുരിശിന്‍റെ വഴി സ്റ്റേഡിയം കോർണറിലേക്ക് നടക്കും.

ബാലപാഠങ്ങൾ ഡൽഹിയിൽ; പഠിപ്പിക്കാൻ കണ്ണൂരിൽ

റെനീഷ് മാത്യു കണ്ണൂർ: ഡൽഹിയുടെ കളരിയിൽ രാഷ്‌ട്രീയത്തിന്‍റെ ബാലപാഠങ്ങൾ പഠിച്ചാണ് രാജ്യത്ത് സിപിഎമ്മിന് ഏറ്റവും വേരോട്ടമുള്ള കണ്ണൂരിനെ നയിക്കാനുള്ള ചുമതല കെ.കെ. രാഗേഷിന് ലഭിക്കുന്നത്. വിദ്യാർഥി സംഘടനാ പ്രവർത്തനവുമായി ആറുവർഷത്തോളം ഡൽഹി കേന്ദ്രീകരിച്ചുപ്രവർത്തിച്ച രാഗേഷ് 2009 ലെ ലോക്സഭാ തെരഞ്ഞ െടുപ്പിൽ കണ്ണൂരിൽ കെ. സുധാകരനെതിരേ മത്സരിക്കാനാണു തലസ്ഥാനനഗരി വിട്ടത്. സിപിഎം ലേബലിൽ എ.പി. അബ്ദുള്ളക്കുട്ടി രണ്ടുതവണ മത്സരിച്ചു ജയിച്ച കണ്ണൂരിൽ ഉറച്ച വിജയപ്രതീക്ഷയോടെയായിരുന്നു പാർട്ടി രാഗേഷിനെ മത്സരിപ്പിച്ചത്. രാഗേഷിന്‍റെ കന്നിമത്സരം കൂടിയായിരുന്നു അത്. എന്നാൽ പരാജയമായിരുന്നു ഫലം. 43,151 വോട്ടുകൾക്കാണ് കെ.സുധാകരനോട് അടിയറവ് പറയേണ്ടിവന്നത്. അതോടെ രാഗേഷിന്‍റെ രാഷ്‌‌ട്രീയഭാവി തകർന്നെന്ന വിലയിരുത്തലുകളുണ്ടായി. എന്നാൽ, കണ്ണൂർ കേന്ദ്രീകരിച്ചു പാർട്ടി പ്രവർത്തനം തുടർന്ന കടുത്ത പിണറായി പക്ഷക്കാരനായ രാഗേഷ് പാർട്ടി സംസ്ഥാന കമ്മിറ്റിയംഗമായും മുഖ്യമന്ത്രിയുടെ പ്രൈവറ്റ് സെക്രട്ടറിയായും ഉയരുന്നതാണ് പിന്നീട് കണ്ടത്. എസ്എഫ്ഐയുടെ അഖിലേന്ത്യാ സെക്രട്ടറിയായ ഏക മലയാളി, കിസാൻ സഭയുടെ അഖിലേന്ത്യാ ജോയിന്‍റ് സെക്രട്ടറി, മുൻ രാജ്യസഭാ എംപിയുമായ രാഗേഷിന് രണ്ടാം നിരയിലെ സീനിയോറിറ്റിയും അനുകൂലമായി. തലമുറമാറ്റം നടപ്പായപ്പോൾ മുതിർന്ന നേതാക്കൾ പട്ടികയിൽ പിന്നിലായി. എം.വി. ജയരാജൻ രാഗേഷിനെ നിർദേശിച്ചു. മറ്റു പേരുകൾ ഉയർന്നില്ല. കഴിഞ്ഞ ലോക്‌സഭാ തെരഞ്ഞെടുപ്പ് കാലത്ത് താത്കാലിക സെക്രട്ടറിയായ ടി.വി. രാജേഷിനും സംസ്ഥാന കമ്മിറ്റിയംഗവും മുതിർന്ന നേതാവുമായ എം. പ്രകാശനും രാഗേഷ് വന്നപ്പോൾ വഴിയടഞ്ഞു. ഇംഗ്ലീഷ് സാഹിത്യത്തിലും നിയമത്തിലും ബിരുദധാരിയായ രാഗേഷിന്‍റെ നേതൃത്വത്തിൽ നവമാധ്യമങ്ങൾ ഉൾപ്പെടെയുള്ള സംവിധാനങ്ങൾ പരമാവധി പ്രയോജനപ്പെടുത്തി നടത്തിയ പ്രചാരണത്തിലാണ് 2014 ൽ കണ്ണൂർ ലോക്സഭാ മണ്ഡലത്തിൽ പി.കെ. ശ്രീമതിയിലൂടെ സീറ്റ് തിരിച്ചുപിടിച്ചത്. ഇതിനിടെ, 2015ൽ രാജ്യസഭാംഗമായും തെരഞ്ഞെടുക്കപ്പെട്ടു. പാർലമെന്‍ററി രംഗത്തല്ലാതെ കണ്ണൂർ കേന്ദ്രീകരിച്ചു മുന്പ് പ്രവർത്തിച്ചിട്ടില്ലാത്ത രാഗേഷിന് രാജ്യത്തെ കമ്മ്യൂണിസ്റ്റ് പാർട്ടിയുടെ ഏറ്റവും പ്രധാനപ്പെട്ട ജില്ലാ ഘടകത്തിന്‍റെ തലപ്പത്തെത്തുമ്പോൾ വെല്ലുവിളികൾ ഏറെയാണ്. ഒറ്റക്കെട്ടായി നീങ്ങിയ കണ്ണൂർ പാർട്ടിയിൽ ഇന്ന് നേതാക്കൾ പല തുരുത്തുകളിലാണ്. ഭിന്നിപ്പ് പാർട്ടി ലൈൻ കടക്കാതിരുന്നതിൽ എം.വി. ജയരാജന്‍റെ നയതന്ത്രം ജില്ലയിൽ സിപിഎമ്മിനെ തുണച്ചിരുന്നു. കെ.കെ. രാഗേഷിന് അതിനെ എങ്ങനെ മുന്നോട്ടു കൊണ്ടുപോകാനാകുമെന്നതാണ് ശ്രദ്ധേയം. ലോക്സഭാ തെരഞ്ഞെടുപ്പിലെ വോട്ടുചോർച്ചയും ശക്തി കേന്ദ്രങ്ങളിലെ ബിജെപി വളർച്ചയും ക്വട്ടേഷൻ സംഘങ്ങളുമായി ബന്ധപ്പെട്ട വിവാദങ്ങളും ഇവ ഉയർത്തിയ ക്ഷീണം മാറ്റുകയും വേണം. തദ്ദേശ തെരഞ്ഞെടുപ്പും തുടർ ഭരണം ലക്ഷ്യമിടുന്ന നിയമസഭാ തെരഞ്ഞെടുപ്പും കണ്ണൂർ പാർട്ടിക്കും നിർണായകമാണ്. പങ്കാളി പ്രിയ വർഗീസിന്‍റെ നിയമനവുമായി ബന്ധപ്പെട്ട് ഉയർന്ന വിവാദങ്ങളിൽ മൗനം പാലിച്ച രാഗേഷിന് പുതിയ പദവിയിലെത്തുമ്പോൾ അതു മതിയാകില്ല. കണ്ണൂർ ഘടകത്തിന്‍റെ നിലപാട് സംസ്ഥാന സിപിഎമ്മിന്‍റെ തീരുമാനങ്ങളിൽ നിർണായകമാകുമെന്നിരിക്കെ മുഖ്യമന്ത്രിയുടെ പിന്തുണയിൽ കെ.കെ. രാഗേഷിന്‍റെ വരവ് ഭാവി മുന്നിൽക്കണ്ടാണെന്നത് നിശ്ചയമാണ്. "പീപ്പിൾസ് ഡെമോക്രസി’ അടക്കമുള്ള ആനുകാലികങ്ങളിൽ പതിവായി എഴുതാറുള്ള രാഗേഷ് "സ്വാശ്രയ നിയമം-പ്രതീക്ഷയും പ്രതിരോധവും’ എന്ന പുസ്തകവും പ്രസിദ്ധീകരിച്ചു. എസ്എഫ്ഐയുടെ മുഖമാസികയായ സ്റ്റുഡന്‍റ്, സ്റ്റുഡന്‍റ് സ്ട്രഗിൾ എന്നിവയുടെ പത്രാധിപരായിരുന്നു. പാര്‍ലമെന്‍റിലെ മികച്ച പ്രവര്‍ത്തനത്തിന് പ്രൈം പോയിന്‍റ് ഫൗണ്ടേഷന്‍ നല്‍കുന്ന സന്‍സദ്രത്ന പുരസ്‌കാരത്തിന്‌ 2021ൽ കെ.കെ .രാഗേഷ് അർഹനായിട്ടുണ്ട്‌. അഖിലേന്ത്യാ കിസാൻ സഭയുടെ കേന്ദ്ര നേതൃത്വത്തിന്‍റെ ഭാഗമായും കെ.കെ.രാഗേഷ് പ്രവർത്തിച്ചിരുന്നു. മോദി സർക്കാർ നടപ്പിലാക്കാൻ ശ്രമിച്ച കാർഷിക നിയമങ്ങൾക്കെതിരെ ഉയർന്നുവന്ന കർഷക സമരത്തിലും ഡൽഹി കേന്ദ്രീകരിച്ച് സജീവമായി ഇടപെട്ടു. കാഞ്ഞിരോട് വീവേഴ്സ് സൊസൈറ്റിയിൽനിന്നു നെയ്ത്തു തൊഴിലാളിയായ വിരമിച്ച സി. ശ്രീധരൻ- കെ.കെ. യശോദ ദന്പതികളുടെ മകനാണ്. എഴുത്തുകാരനും ചിന്തകനുമായ തളിപ്പറന്പ് അള്ളാംകുളത്തെ വർഗീസിന്‍റെ മകൾ പ്രിയയയാണു ഭാര്യ. ശാരിക, ചാരുത എന്നിവർ മക്കൾ.

വാഷിംഗ് മെഷീന്‍ ദേഹത്തിട്ട് വയോധികയെ പരിക്കേല്‍പ്പിച്ചു

പയ്യന്നൂര്‍: മര്‍ദിച്ച ശേഷം വാഷിംഗ് മെഷീന്‍ ദേഹത്തിട്ട് പരിക്കേല്‍പ്പിച്ചതായുള്ള വയോധികയുടെ പരാതിയില്‍ പയ്യന്നൂര്‍ പോലീസ് കേസെടുത്തു. രാമന്തളി ചിറ്റടിയിലെ ടി.വി.കല്യാണിയുടെ (66)പരാതിയിലാണ് മകളുടെ ഭര്‍ത്താവ് ശശികുമാറിനെതിരേ കേസെടുത്തത്. കഴിഞ്ഞ ബുധനാഴ്ച രാത്രി എട്ടേമുക്കാലോടെയാണ് പരാതിക്കാസ്പദമായ സംഭവം.പരാതിക്കാരിയുടെ വീട്ടില്‍ താമസിക്കുന്ന പ്രതി പരാതിക്കാരിയെ തടഞ്ഞുവച്ച് അടിക്കുകയും പുറത്തേക്ക് തള്ളിയിട്ടശേഷം വാഷിംഗ് മെഷീനെടുത്ത് പരാതിക്കാരിയുടെ ദേഹത്തിട്ട് പരിക്കേല്‍പ്പിച്ചതായുള്ള പരാതിയിലാണ് കേസെടുത്തത്. ആടിനെ വിറ്റുകിട്ടിയ വകയില്‍ വീട്ടില്‍ സൂക്ഷിച്ചിരുന്ന പരാതിക്കാരിയുടെ 10000 രൂപ പ്രതിയെടുത്തതിനെ ചോദ്യം ചെയ്ത വിരോധമാണ് സംഭവത്തിന് കാരണമെന്നും പരാതിയിലുണ്ട്.

തീരദേശ മേഖലയില്‍ വ്യാപക കടലേറ്റം

കണ്ണൂര്‍: ജില്ലയിലെ തീരദേശ മേഖലയില്‍ വ്യാപക കടലേറ്റമുണ്ടായതോടെ ജനങ്ങൾ ഭീതിയിൽ. മുഴപ്പിലങ്ങാട് ബീച്ച് മേഖലയിലും ഏഴരക്കടപ്പുറത്തും തിരമാരകള്‍ കരയിലേക്ക് അടിച്ച് കയറിയത് ജനങ്ങളെ പരിഭ്രാന്തരാക്കി. കള്ളക്കടല്‍ പ്രതിഭാസത്തിന്‍റെ ഭാഗമായാണ് കടലേറ്റമുണ്ടായത്. ഏഴരക്കടപ്പുറത്തെ സംരക്ഷണഭിത്തി മണല്‍ മൂടിയ അവസ്ഥയിലാണ്. ഇവിടെയുള്ള അങ്കണവാടി മേഖലയിലാണ് കൂടുതല്‍ വെള്ളം കയറിയത്. സമീപത്തുള്ള വീടുകളിലും റിസോര്‍ട്ടിലും വെള്ളം കയറിയിട്ടുണ്ട്. മുഴപ്പിലങ്ങാട് ബീച്ച് ഭാഗങ്ങളിലും വ്യാപകമായി കടലേറ്റമുണ്ടായി. ഉച്ചക്ക് രണ്ടരയോടെ കയറിയ വെള്ളം വൈകുന്നേരം അഞ്ചോടെ ഇറങ്ങി. അവധിക്കാലമായതിനാല്‍ ബീച്ചുകളില്‍ കുടുംബസമേതം നിരവധിയാളുകള്‍ എത്തുന്നുണ്ട്. കാലാവസ്ഥ മുന്നറിയിപ്പുകള്‍ കൃത്യമായി പാലിക്കാന്‍ അധികൃതര്‍ നിര്‍ദേശം നല്‍കി. കേരള തീരത്ത് വ്യാഴാഴ്ച രാത്രി 11.30 വരെ 1.1 മുതല്‍ 1.4 മീറ്റര്‍ വരെ ഉയര്‍ന്ന തിരമാലകള്‍ കാരണം കടലേറ്റത്തിന് സാധ്യതയുണ്ടെന്ന് ജാഗ്രതാ നിര്‍ദേശമുണ്ട്.

മാലിന്യം കത്തിച്ചു; കൂത്തുപറന്പ് ടൗൺ പുകയിൽ മൂടി

കൂത്തുപറമ്പ്: സ്വകാര്യ വ്യക്തി പറമ്പിലെ മാലിന്യകൂന്പാരത്തിന് തീയി‌ട്ടതിനെ തുടർന്ന് കൂത്തുപറന്പ് ടൗൺ പുക കൊണ്ട് മൂടി. ദുർഗന്ധത്താലും പുകയാലും ടൗണിലെത്തിയവരും വ്യാപാരികളും വാഹനയാത്രക്കാരും വലഞ്ഞു.പുക പടർന്നതിന്‍റെ കാര്യം അറിയാതെ നഗരത്തിലുള്ളവർ പരിഭ്രാന്തരാകുകയും ചെയ്തു. പിന്നീട് വിവരമറിഞ്ഞെത്തിയ അഗ്നിരക്ഷാ സേന മാലിന്യ കൂന്പാരം കണ്ടെത്തി തീയണച്ചു. ഇന്നലെ ഉച്ചയോടെയായിരുന്നു സംഭവം. പുക വ്യാപിച്ചതോടെ സമീപത്തെ താലൂക്ക് ആശുപത്രിയിലെ രോഗികൾക്ക് വലിയ രീതിയുള്ള പ്രശ്നങ്ങൾ സൃഷ്ടിക്കുന്ന തരത്തിലായി മാറി. നഗരസഭ അധികൃതരും കൂത്തുപറമ്പ് പോലീസും സ്ഥലത്തെത്തി. ഫയർഫോഴ്സിന്‍റെ ഏറെ നേരത്തെ പരിശ്രമത്തിനൊടുവിലാണ് പുകയടക്കിയത്.

ഉപ്പുവെള്ളം ക‍യറുന്നത് തടയാനുള്ള ബണ്ടിന്‍റെ‌ പലക മാറ്റി; ഷെഡ് തർത്തു

പഴയങ്ങാടി: ചൂട്ടാട് ചേരിക്കള്ളി മഞ്ഞയിലെ മത്സ്യ ഷെഡ് രാത്രിയുടെ മറവിൽ ജെസിബി ഉപയോഗിച്ച് പൊളിച്ചു നീക്കുകയും ഉപ്പുവെള്ളം കയറുന്നത് തടയാനായി നിർമിച്ച ബണ്ടിൽ സ്ഥാപിച്ച പലകയും എടുത്തു മാറ്റി. ബണ്ടിന്‍റെ പലകകൾ മാറ്റിയതിനെ തുടർന്ന് ഉപ്പുവെള്ളം കയറിയതിനെ തുടർന്ന് ശുദ്ധജല സ്രോതസുകളും മലിനമായി. സംഭവത്തിനു പിന്നിൽ ആരാണെന്ന് വ്യക്തമല്ല. കഴിഞ്ഞ ദിവസമാണ് ബണ്ട് പഞ്ചായത്ത് മത്സ്യം പിടിക്കുന്നതിനായി ലേലം ചെയ്തത്. ലേലം കൊണ്ട വ്യക്തിയുടെ മത്സ്യബന്ധന ഉപകരങ്ങൾ സൂക്ഷിക്കുന്ന ഷെഡാണ് തകർത്തത്. ലക്ഷങ്ങളുടെ നഷ്ടമാണ് കണക്കാക്കുന്നത്. പഴയങ്ങാടി പോലീസ് അന്വേഷണം ആരംഭിച്ചു.

ഫ്രിഡ്ജിൽനിന്ന് തീ പടർന്ന് അടുക്കള കത്തിനശിച്ചു

പഴയങ്ങാടി: ഫ്രിഡ്ജിൽനിന്ന് തീ പടർന്ന് അടുക്കളയുടെ ഒരുഭാഗം പൂർണമായും കത്തിനശിച്ചു. കണ്ണപുരം തെക്കൻ കാരിയാത്തൻ ക്ഷേത്രത്തിന് സമീപം കാപ്പാടൻ ജാനകിയുടെ വീട്ടിലെ ഫ്രിഡ്ജിനാണ് തീപിടിച്ചത്. അടുക്കളയിലെ വീട്ടുപകരണങ്ങളും മറ്റ് സാധനങ്ങളും പൂർണമായി കത്തി നശിച്ചു. വീടിനും സാരമായ കേടുപാടുകൾ സംഭവിച്ചു. കഴിഞ്ഞ ദിവസം രാത്രി 11.30 യോടെയാണ് സംഭവം. ഷോർട്ട് സർക്യൂട്ടാണ് അപകട കാരണമെന്നാണ് പ്രാഥമിക നിഗമനം. ഒരു ലക്ഷം രൂപയുടെ നഷ്ടം കണക്കാക്കുന്നു. അടുക്കള ഭാഗത്ത് നിന്ന് തീയും പുകയും രൂക്ഷഗന്ധവും ഉയർന്നതിനെ തുടർന്ന് വീട്ടുകാർ ബഹളം വെച്ചപ്പോൾ ഓടിയെത്തിയ നാട്ടുകാരും മറ്റും ചേർന്ന്തി തീ അണയ്ക്കുകയായിരുന്നു.

ചുഴിലിക്കാറ്റും വേനൽമഴയും ; വ്യാപക നാശനഷ്ടം

ഉളിക്കൽ: വിഷുദിനത്തിൽ വീശിയടിച്ച ചുഴലി കാറ്റിലും വേനൽ മഴയിലും ഉളിക്കൽ, പയ്യാവൂർ പഞ്ചാത്തുകളിൽ വ്യാപക നാശം. രണ്ട് വീടുകൾ പൂർണമായും 100 ഓളം വീടുകൾ ഭാഗികമായും തകർന്നു. ആയിരക്കണക്കിന് ഏക്കർ സ്ഥലത്തെ കൃഷികൾ പൂർണമായതും നശിച്ചു. പ്രദേശത്തേക്കുള്ള വൈദ്യുതി, ഫോൺ, ഗതാഗത ബന്ധങ്ങൾ പൂണമായും തടസപ്പെട്ടു. തിങ്കളാഴ്ച വൈകുന്നേരം 3.30 ഓടെയാണ് മലയോര മേഖലയിൽ മഴക്കൊപ്പം ചുഴലിക്കാറ്റും വീശിയടിച്ചത്. ഉളിക്കൽ പഞ്ചായത്തിലെ മണിപ്പാറ, കോട്ടപ്പാറ, ആനയടി, അമേരിക്കൻ പാറ, ശാന്തിനഗർ, പയ്യാവൂർ പഞ്ചായത്തിലെ കുഞ്ഞിപ്പറമ്പ് ,കുന്നത്തൂർ മേഖലകളിലാണ് മിന്നൽ ചുഴലി വീശിയടിച്ചത്. റബർ, കശുമാവ്, പ്ലാവ്, മാവ്, തേക്ക് , കവുങ്ങ്, വാഴ, തെങ്ങ് തുടങ്ങി കാർഷിക വിളകൾ ഉൾപ്പെടെ കൃഷികൾ സർവതും കാറ്റിൽ നിലംപൊത്തി. മരങ്ങൾ പൊട്ടിവീണ് വീണ് വൈദ്യുതി ബന്ധവും നിലച്ചതോടെ മൊബൈൽ ബന്ധങ്ങളും തകരാറിലായി. മരങ്ങൾ പൊട്ടിവീണ് പ്രധാന റോഡിലെയും പഞ്ചായത്ത് റോഡിലെയും ഗതാഗത സംവിധാനം തടസപ്പെട്ടു. രാത്രി എട്ടോടെ നാട്ടുകാർ ഗതാഗതം പുനഃസ്ഥാപിച്ചു. വീടിനുള്ളിൽ കുടുങ്ങിപോയവരെയും നാട്ടുകാർ ചേർന്ന് വെളിയിൽ എത്തിച്ചു. മരം പൊട്ടിവീണും കാറ്റിൽ ഓടും അസ്പറ്റോസ് ഷീറ്റും പറന്നുപോയുമാണ് വീടുകൾക്ക് കേടുപാടുകൾ സംഭവിച്ചത്. മേൽക്കൂര തകർന്നതോടെ മഴയിൽ നനഞ്ഞ് വീട്ടുപകരങ്ങൾക്ക് കേടുപാടുകൾ സംഭവിച്ചു. പല വീടുകളിലും തലനാരിഴക്കാണ് വീട്ടുകാർ അപകടത്തിൽ നിന്നും രക്ഷപെട്ടത്. സജീവ് ജോസഫ് എംഎൽഎ, പഞ്ചായത്ത് പ്രസിഡന്‍റുമാർ , വിവിധ ജനപ്രതിധികൾ, രാഷ്ട്രീയ കക്ഷി നേതാക്കൾ ,അമേരിക്കൻ പാറ സെന്‍റ് ജോർജ് ഓർത്തഡോക്സ് പള്ളി വികാരി ഫാ.ജിനു ജോൺ ,കുഞ്ഞിപ്പറമ്പ് ഇടവക വികാരി ഫാ. ടോണി കുന്നത്ത് എന്നിവർ സ്ഥലം സന്ദർശിച്ചു. കൃഷി ഓഫീസർ, വില്ലേജ് ഓഫീസർ എന്നിവരോട് സ്ഥലം സന്ദർശിച്ച് നാശനഷ്ടങ്ങളെ സംബന്ധിച്ച യഥാർഥ വിവരങ്ങൾ ശേഖരിക്കാൻ എംഎൽഎ നിർദോശം നൽകി. വീടുകളും കൃഷിയും നശിച്ചു ഉളിക്കൽ പഞ്ചായത്തിലെ അമേരിക്കൻ പാറയിലെ മീനോത്ത് ദാമുവിന്‍റെ വീടിന്‍റെ മേൽക്കൂര കാറ്റിൽ പൂർണമായും പറന്നുപോയി. വീടിന്‍റെ ചിമ്മിനിക്ക് വിള്ളൽ വീണ് അപകടാവസ്ഥയിലാണ്. മരോട്ടിപ്പറമ്പിൽ മേഴ്‌സി, മണത്തിനാംകണ്ടി കല്യാണി, ചാന്തനാട്ട് കൃഷ്‌ണൻ കുട്ടി, മരോട്ടിക്കുഴി ബിനോയി, മേഴ്സി പൂവ്വത്തിങ്കൽ തുടങ്ങി നിരവധി വീടുകൾ ഭാഗികമായി തകരുകയും കേടുപാടുകൾ സംഭവിക്കുകയും ചെയ്തു. അമേരിക്കൻപാറ സെന്‍റ്. ജോർജ് ഓർത്തഡോക്സ് പള്ളിയുടെ 200 അധിക റബർ മരങ്ങൾ കാറ്റിൽ തകർന്നു.കൂട്ടുങ്കൽ ജോയി, പൊന്നംതാനത്ത് മാത്യു, മാടപ്പള്ളിക്കുന്നേൽ ലൈജു, നരിവേലിൽ ജിൽസ്, താനംചേരി ബാലകൃഷ്ണൻ തുടങ്ങി നിരവധി കർഷകരുടെ കൃഷികളാണ് കാറ്റിൽ നിലം പൊത്തിയത്. സ്വകാര്യ നെറ്റ് വർക്ക് ശൃംഖലയുടെ കേബിൾ പല സ്ഥലങ്ങളിലും പൊട്ടിവീണ് വലിയ നഷ്ടം സംഭവിച്ചു. പയ്യാവൂർ പഞ്ചായത്തിൽ കുഞ്ഞിപ്പറമ്പിലെ പൗലോസ് അറയ്ക്കപറമ്പിലിന്‍റെ വീട് മരം വീണ് പൂർണമായും തകർന്നു. ജയൻകുട്ടി കൽകുന്നത്ത്, മാത്യു കുളത്തിനപ്രായിൽ,റോയ് നെടുംതുണ്ടത്തിൽ,ജോൺസൺ ചൊറിയൻമാക്കൽ, ജോയി ചാരംകുഴിയിൽ, ചിന്നമ്മ പൈമ്പള്ളിൽ, വിൽസൺ നെടുമറ്റത്തിൽ, ജിമ്മി വല്ലേൽപുത്തേട്ട്, മോഹനൻ പൂണൂൽപറമ്പിൽ, തങ്കച്ചൻ മാപ്പറയിൽ എന്നിവരുടെ വീടുകൾ ഭാഗികമായി തകർന്നു. റോയി ഇടകഴിക്കൽ, മാത്യു അറക്കൽ, മാത്യു കുളത്തിനാപ്രായിൽ,ജിമ്മി വല്ലേൽപുത്തേട്ട്, തങ്കച്ചൻ കുപ്പക്കുഴിയിൽ, ക്രിസ്തുദാസി കോൺവെന്‍റ് കുഞ്ഞിപ്പറമ്പ്, സെന്‍റ് ജോസഫ് പള്ളി കുഞ്ഞിപ്പറമ്പ്, പെണ്ണമ്മ വാളിപാക്കൽ, സജി പുലിക്കുന്നേൽ, ജിമ്മി അറക്കൽ, ഉമ്മർ പയ്യാവൂർ, ഗിരിധരൻ അവരോത്ത്, രവീന്ദ്രൻ വെട്ടൂപറമ്പിൽ, സിബി പൂവന്നിക്കുന്നിൽ, ലിജു പുല്ലുമുറ്റത്തിൽ, സാബു കൂനാനിക്കൽ , ജോസഫ് എടാട്ട് എന്നിവരുടെ കൃഷിയിടങ്ങൾ പൂർണ്ണമായും നശിച്ചു. കേളകം: കനത്ത കാറ്റും മഴയും കേളകം പഞ്ചായത്തിലെ വിവിധ മേഖലകളിലും വ്യാപക നാശം വിതച്ചു. കൃഷിനാശത്തിനൊപ്പം വീടുകൾക്കും നാശനഷ്ടമുണ്ടായി. വെണ്ടേക്കുംചാൽ, പൊയ്യ മല, കമ്പിപ്പാലം, പാറത്തോട്,വാളുമുക്ക് പ്രദേശങ്ങളാലാണ് കാറ്റ് നാശം വിതച്ചത്. വെണ്ടയ്ക്കൽ സ്വദേശി മംഗലത്തിൽ ജോസിന്‍റെ വീടിനു മുകളിൽ തെങ്ങ് കടപുഴകി വീണു. വെണ്ടക്കഞ്ചാൽ സ്വദേശി പനക്ക പതാലിൽ അനീഷിന്‍റെ കോഴി ഷെഡുകൾ മരം വീണു പൂർണായും തകർന്നു. അടക്കാത്തോട് പാറത്തോട്ടിലെ പുതുശേരി പൗലോസിന്‍റെ തൊഴുത്തിന്‍റെ മേൽക്കൂര കനത്ത കാറ്റിൽ പറന്നു പോയി. മരം കടപുഴകി വീണ് പാറത്തോട് ഗ്രാമീണ വായനശാലയുട സൺഷേഡ് തകർന്നു. മരം കടപുഴകി വീണ് കേളകം വൈദ്യുതി സെക്ഷനിലെ ഒൻപതിന് വൈദ്യുതി തൂണുകൾ തകർന്നു. വാഴ തെങ്ങ് കമുങ്ങ് റബർ തുടങ്ങിയ കാർഷിക വിളകളാണ് നശിച്ചത്. ഇടിമിന്നലിൽ വീടുകളിലെ ഇലക്ട്രിക് ഉപകരണങ്ങളും വ്യാപകമായി നശിച്ചിട്ടുണ്ട്. മണിക്കൂറുകൾക്ക് ശേഷമാണ് പലയിടങ്ങളിലും വൈദ്യുത ബന്ധം പുനസ്ഥാപിച്ചത്. സർക്കാർ അടിയന്തര സഹായം എത്തിക്കണം: സജീവ് ജോസഫ് വീശിയടിച്ച ചുഴലിക്കാറ്റിൽ കൃഷി നശിച്ചവർക്കും വീട് നഷ്ടമായവർക്കും സർക്കാർ അടിയന്തര സഹായം എത്തിക്കണമെന്ന് സജീവ് ജോസഫ് എംഎൽഎ ആവശ്യപ്പെട്ടു. കഴിഞ്ഞ വർഷത്തെ കാലവർഷ കെടുതിയിൽ വീടും കൃഷിയും നശിച്ചവർക്ക് ഒരുവർഷം പിന്നിട്ടിട്ടും സർക്കാർ നഷ്ടപരിഹാരം നൽകാത്തത് കർഷകരോട് കണിക്കുന്ന അവഗണക്ക് ഉദാഹരമാണെന്നും അദ്ദേഹം ചൂണ്ടിക്കാട്ടി. തികച്ചും നിർധനയ കുടുംബങ്ങളാണ് നാശ നഷ്ടങ്ങൾക്ക് ഇരയായിരിക്കുന്നത്. ഇവരുടെ ആവശ്യങ്ങൾക്ക് നേരെ സർക്കാർ കണ്ണടക്കരുതെന്നും വീട് നഷ്ടപെട്ടവർക്ക് അടിയന്തരമായി സഹായം എത്തിക്കണമെന്നും അപകടാവസ്ഥയിലായ വീട്ടിൽനിന്നും ജനങ്ങളെ മാറ്റിതാമസിപ്പിക്കാനുള്ള നടപടികൾ സർക്കാർ ഇടപെടണമെന്നും എംഎൽഎ ആവശ്യപ്പെട്ടു.

അവധിക്കാല ബാസ്ക്കറ്റ്ബോൾ കോച്ചിംഗ് ക്യാമ്പ് ആരംഭിച്ചു

ചെമ്പന്തൊട്ടി: സെന്‍റ് ജോർജ് ഹൈസ്‌കൂളിൽ അവധിക്കാല ബാസ്ക്കറ്റ്ബോൾ കോച്ചിംഗ് ക്യാമ്പ് ആരംഭിച്ചു. സ്കൂൾ മാനേജർ ഫാ. ആന്‍റണി മഞ്ഞളാംകുന്നേൽ ക്യാമ്പ് ഉദ്ഘാടനം ചെയ്തു. സ്കൂൾ മുഖ്യാധ്യാപകൻ ബിജു സി. ഏബ്രഹാം, പിടിഎ പ്രസിഡന്‍റ് സജി അടവിച്ചിറ, കെ.വി. രാജേഷ് എന്നിവർ പ്രസംഗിച്ചു. മുൻ കായികാധ്യാപകനും പ്രശസ്ത ബാസ്ക്കറ്റ്ബോൾ പരിശീലകനുമായ സണ്ണി ജെയിംസ് പാറമ്പുഴയിലാണു പരിശീലനത്തിനു നേതൃത്വം നൽകുന്നത്. കായികാധ്യാപകൻ രജിത് മാളക്കാരൻ, മുൻ ബാസ്ക്കറ്റ്ബോൾ താരങ്ങൾ എന്നിവരും രാവിലെയും വൈകുന്നേരവുമായി നടത്തുന്ന പരിശീലന പരിപാടിയിൽ സഹകരിക്കുന്നുണ്ട്. വിവിധ സ്കൂളുകളിൽ നിന്നായി 120 വിദ്യാർഥികൾ പരിശീലനത്തിൽ പങ്കെടുക്കുന്നത്. മേയ് ഒന്നുമുതൽ നീന്തൽ പരിശീലനവും ആരംഭിക്കുന്നുണ്ട്.

റോഡ് ശുചീകരണം നടത്തി

പെരുമ്പടവ്: പെരുമ്പടവ് മേത്തരുമ്പ പൊതുമരാമത്ത് റോഡിലെ പെരുമ്പടവ് മുതൽ തലവിൽ വരെയുള്ള റോഡ് പെരുമ്പടവ് ഇടവക സെന്‍റ് ജോസഫ് സ്നേഹസേനയുടെ നേതൃത്വത്തിൽ ശുചീകരിച്ചു. റോഡിന്‍റെ ഇരുവശവും കാടുകയറിയ നിലയിലായിരുന്നു. വാഹനങ്ങൾ കടന്നുപോകുമ്പോൾ കാൽനടയാത്രക്കാർക്ക് മാറിനിൽക്കാൻ പറ്റാത്ത അവസ്ഥയായിരുന്നു. 10 മീറ്ററിൽ അധികം വീതിയുള്ള ഈറോഡ് കാട് കയറി പല സ്ഥലങ്ങളിലും മൂന്ന് മീറ്റർ വീതിയിൽ ചുരുങ്ങിയിരുന്നു. പൊതുമരാമത്ത് വകുപ്പിന്‍റെ അനാസ്ഥയ്ക്കെതിരെ പ്രതിഷേധം ഉയരുമ്പോഴാണ് പെരുമ്പടവ് സെന്‍റ് ജോസഫ് സ്നേഹസേനയുടെ നേതൃത്വത്തിൽ റോഡ് ശുചീകരണം നടത്തി മാതൃകയായത്.

"ആശങ്ക വേണ്ട അരികിലുണ്ട് കരുതൽ' ടെലി കൗൺസലിംഗ് ഉദ്ഘാടനം

തളിപ്പറമ്പ്: "ആശങ്ക വേണ്ട അരികിലുണ്ട് കരുതൽ' ടെലി കൗൺസലിംഗ് ഉദ്ഘാടനവും പോസ്റ്റർ പ്രകാശനവും എം.വി. ഗോവിന്ദൻ എംഎൽഎ നിർവഹിച്ചു. തളിപ്പറമ്പ് മണ്ഡലത്തിലെ എസ്എസ്എൽസി-പ്ലസ്ടു പരീക്ഷാഫലം കാത്തിരിക്കുന്ന വിദ്യാർഥികൾക്ക് ആശങ്കകളില്ലാതെ അവ അഭിമുഖീകരിക്കാൻ എം.വി. ഗോവിന്ദൻ എംഎൽഎ നടപ്പാക്കുന്ന പദ്ധതിയാണ് "ആശങ്ക വേണ്ട അരികിലുണ്ട് കരുതൽ.' തളിപ്പറമ്പ് മണ്ഡലം സമഗ്ര വിദ്യാഭ്യാസ പദ്ധതിയുടെ തുടർച്ചയായാണു ടെലി കൗൺസിലിംഗ് സംവിധാനം ഏർപ്പെടുത്തിയത്. പദ്ധതിയുടെ പോസ്റ്റർ ബ്ലോക്ക് പഞ്ചായത്ത് പ്രസിഡന്‍റ് സി.എം. കൃഷ്ണൻ എം.വി. ഗോവിന്ദനിൽ നിന്ന് ഏറ്റുവാങ്ങി. തളിപ്പറമ്പ് ഡിഇഒ എസ്. വന്ദന അധ്യക്ഷത വഹിച്ചു. എഇഒ കെ. മനോജ്, ഹയർ സെക്കൻഡറി വിഭാഗം ജില്ലാ പ്രോഗ്രാം കോ-ഓഡിനേറ്റർ കെ. അനൂപ്, ബിപിസി കെ. ബിജേഷ്, പി.ഒ. മുരളീധരൻ, പി.പി. ദിനേശൻ എന്നിവർ പ്രസംഗിച്ചു. സമഗ്രവിദ്യാഭ്യാസ പദ്ധതി കോ-ഓഡിനേറ്റർ കെ. സി. ഹരികൃഷ്ണൻ, ഡോ. കെ.പി. രാജേഷ് എന്നിവർ പ്രസംഗിച്ചു.

ചുഴിലിക്കാറ്റും വേനൽമഴയും ; വ്യാപക നാശനഷ്ടം

ചെറുപുഴ: വിഷുദിനത്തിലുണ്ടായ കനത്ത കാറ്റിലും മഴയിലും ഇടിമിന്നലിലും ചെറുപുഴ മേഖലയിൽ വ്യാപക നാശം. കാർഷിക വിളകൾ വ്യാപകമായി നശിച്ചതിനു പുറമേ നിരവധി വൈദ്യുത തൂണുകളും ട്രാൻസ്ഫോർമറുകളും തകർന്നു. മരം വീണും മറ്റും വീടുകൾക്കും കെട്ടിടങ്ങൾക്കും നാശനഷ്ടമുണ്ടായി. തിരുമേനി കോക്കടവിലെ പന്തലാനിക്കൽ സെബാസ്റ്റ്യന്‍റന്‍റെ വീടിന് മുകളിൽ തെങ്ങ് വീണ് മേൽക്കൂര ഭാഗികമായി തകർന്നു. പാടിയോട്ടുചാൽ ഹാജിമുക്കിലെ കാക്കനാട്ട് ബാബു ചാക്കോയുടെ വീടിന്‍റെ വൈദ്യുത മീറ്ററും വയറിംഗും ഇടിമിന്നലേറ്റ് കത്തി നശിച്ചു. ചൂരപ്പടവിലെ ട്രാൻസ്ഫോർമർ കാറ്റിൽ നിലംപൊത്തി. മുളപ്ര പെരുങ്കുടൽ റോഡരികിൽ പാട്ടത്തിനെടുത്ത് നേന്ത്രവാഴ നട്ട ചെറുപാറ തെക്കേവയലിൽ ജയിസന്‍റെ കുലച്ച 200 ഓളം വാഴകൾ കാറ്റിൽ ഒടിഞ്ഞു വീണു. വാഴക്കുണ്ടം സെവൻസിലെ ചിറ്റാട്ടിൽ ബിനോയുടെ കമുക്, വാഴ എന്നിവയും നശിച്ചു. വീടിന് മുകളിൽ കമുക് ഒടിഞ്ഞു വീണു. ചുണ്ട, പുളിങ്ങോം, കോഴിച്ചാൽ, കായക്കര, ഇടവരമ്പ്, വിളക്കുവട്ടം, ചൂരപ്പടവ്, തിരുമേനി, കോക്കടവ്, വാഴക്കുണ്ടം, പാടിയോട്ടുചാൽ, ഹാജിമുക്ക്, എയ്യൻകല്ല് എന്നിവിടങ്ങളിലെല്ലാം കനത്ത നാശനഷ്ടമാണുണ്ടായിരിക്കുന്നത്. കൊക്കോ, ജാതി, റബർ, കമുക്, തെങ്ങ് എന്നിവയാണ് വ്യാപകമായി നശിച്ചത്. ലക്ഷങ്ങളുടെ നഷ്ടമാണ് കണക്കാക്കുന്നത്. ചെറുപുഴ പഞ്ചായത്തിലെ ഏഴാം വാർഡിൽ ഇടവരമ്പിലെ സജേഷ് പയ്യാടക്കൻ വാടകയ്ക്ക് താമസിക്കുന്ന വീടിനു മുകളിൽ മരം പൊട്ടിവീണ് വീട്ടുപകരണങ്ങൾ തകർന്നു. തലപ്പുലത്ത് വിജയന്‍റെ കാലിത്തൊഴുത്ത്, പെരുമാലിൽ ബിനോയിയുടെ വീട് എന്നിവയും മരങ്ങൾ വീണ് ഭാഗികമായി തകർന്നു. പുളിങ്ങോം ശങ്കര നാരായണ ക്ഷേത്ര ഓഡിറ്റോറിയത്തിന്‍റെ മേൽക്കൂരയിലെ ഷീറ്റുകൾ കാറ്റിൽ തകർന്നു വീണു. പ്രാപ്പൊയിൽ, കക്കോട്, മഞ്ഞക്കാട്, പെരുന്തടം, ചൂരപ്പടവ്, കുളത്ത് വായ ഭാഗങ്ങളിൽ കനത്ത നാശനഷ്ടം സംഭവിച്ചു. ഇവിടങ്ങളിൽ വൈദ്യുതി വിതരണം പൂർണണമായും നിലച്ചു. വൈദ്യുതി പുനസ്ഥാപിക്കാൻ ദിവസങ്ങൾ എടുക്കുമെന്നാണ് അധികൃതർ പറയുന്നത്. വൈദ്യുതി വകുപ്പിന് ലക്ഷങ്ങളുടെ നഷ്ടം സംഭവിച്ചു. പെരുന്തടം - ചൂരപ്പടവ് ഭാഗത്ത് 20 എച്ച്ടി പോസ്റ്റുകളും, 15 എൽടി പോസ്റ്റുകളും കമ്പികളും തകർന്നു. കാറ്റിൽ കൃഷി നാശം നേരിട്ടവർ കൃഷി ഇൻഷ്വർ ചെയ്തിട്ടുണ്ടെങ്കിൽ അഞ്ചു ദിവസത്തിനകം മതിയായ രേഖകളോടെ അപേക്ഷ നൽകണമെന്ന് ചെറുപുഴ കൃഷിഭവൻ അധികൃതർ അറിയിച്ചു. വാഴക്കുണ്ടം സെവൻസിലെ ചിറ്റാട്ടിൽ ബിനോയുടെ കമുക്, വാഴ എന്നിവ നശിച്ചു. വീടിന് മുകളിൽ കമുക് ഒടിഞ്ഞു വീണ് വീടിനും കേടുപാടുകൾ സംഭവിച്ചു. ചൂരപ്പടവിലെ കൊച്ചു വിളയിൽ ദിവാകരന്‍റെ വീടിന്‍റെ മേൽക്കൂരയിലെ ഷീറ്റുകൾ കനത്ത കാറ്റിൽ പറന്നു പോയി. വീട്ടിനുള്ളിൽ സാധനങ്ങൾ നശിച്ചു. 60 റബർ മരങ്ങളും കമുക്, കശുമാവ്, തുടങ്ങിയവയും പൊട്ടി വീണു. തിരുമേനിയിലെ കിഴക്കരക്കോട്ട് ജോസ് കുട്ടിയുടെ വാഴത്തോട്ടം പൂർണമായും നശിച്ചു. നൂറോളം കുലച്ച വാഴകഴളടക്കമുള്ള തോട്ടമാണ് കാറ്റിൽ നശിച്ചത്. പഞ്ചായത്ത് - വില്ലേജ് അധികൃതർ, കൃഷിഭവൻ ഉദ്യോഗസ്ഥർ എന്നിവർ നാശനഷ്ടമുണ്ടായ സ്ഥലങ്ങൾ സന്ദർഗിച്ചു. പലയിടത്തും ഏറെ വൈകിയാണ് വൈദ്യതി പുന:സ്ഥാപിക്കുവാൻ കെഎസ്ഇബി ജീവനക്കാർക്ക് കഴിഞ്ഞത്. ഉളിക്കൽ: വിഷുദിനത്തിൽ വീശിയടിച്ച ചുഴലി കാറ്റിലും വേനൽ മഴയിലും ഉളിക്കൽ, പയ്യാവൂർ പഞ്ചാത്തുകളിൽ വ്യാപക നാശം. രണ്ട് വീടുകൾ പൂർണമായും 100 ഓളം വീടുകൾ ഭാഗികമായും തകർന്നു. ആയിരക്കണക്കിന് ഏക്കർ സ്ഥലത്തെ കൃഷികൾ പൂർണമായതും നശിച്ചു. പ്രദേശത്തേക്കുള്ള വൈദ്യുതി, ഫോൺ, ഗതാഗത ബന്ധങ്ങൾ പൂണമായും തടസപ്പെട്ടു. തിങ്കളാഴ്ച വൈകുന്നേരം 3.30 ഓടെയാണ് മലയോര മേഖലയിൽ മഴക്കൊപ്പം ചുഴലിക്കാറ്റും വീശിയടിച്ചത്. ഉളിക്കൽ പഞ്ചായത്തിലെ മണിപ്പാറ, കോട്ടപ്പാറ, ആനയടി, അമേരിക്കൻ പാറ, ശാന്തിനഗർ, പയ്യാവൂർ പഞ്ചായത്തിലെ കുഞ്ഞിപ്പറമ്പ് ,കുന്നത്തൂർ മേഖലകളിലാണ് മിന്നൽ ചുഴലി വീശിയടിച്ചത്. റബർ, കശുമാവ്, പ്ലാവ്, മാവ്, തേക്ക് , കവുങ്ങ്, വാഴ, തെങ്ങ് തുടങ്ങി കാർഷിക വിളകൾ ഉൾപ്പെടെ കൃഷികൾ സർവതും കാറ്റിൽ നിലംപൊത്തി. മരങ്ങൾ പൊട്ടിവീണ് വീണ് വൈദ്യുതി ബന്ധവും നിലച്ചതോടെ മൊബൈൽ ബന്ധങ്ങളും തകരാറിലായി. മരങ്ങൾ പൊട്ടിവീണ് പ്രധാന റോഡിലെയും പഞ്ചായത്ത് റോഡിലെയും ഗതാഗത സംവിധാനം തടസപ്പെട്ടു. രത്രി എട്ടോടെ നാട്ടുകാർ ഗതാഗതം പുനഃസ്ഥാപിച്ചു. വീടിനുള്ളിൽ കുടുങ്ങിപോയവരെയും നാട്ടുകാർ ചേർന്ന് വെളിയിൽ എത്തിച്ചു. മരം പൊട്ടിവീണും കാറ്റിൽ ഓടും അസ്പറ്റോസ് ഷീറ്റും പറന്നുപോയുമാണ് വീടുകൾക്ക് കേടുപാടുകൾ സംഭവിച്ചത്. മേൽക്കൂര തകർന്നതോടെ മഴയിൽ നനഞ്ഞ് വീട്ടുപകരങ്ങൾക്ക് കേടുപാടുകൾ സംഭവിച്ചു. പല വീടുകളിലും തലനാരിഴക്കാണ് വീട്ടുകാർ അപകടത്തിൽ നിന്നും രക്ഷപെട്ടത്. സജീവ് ജോസഫ് എംഎൽഎ, പഞ്ചായത്ത് പ്രസിഡന്‍റുമാർ , വിവിധ ജനപ്രതിധികൾ, രാഷ്ട്രീയ കക്ഷി നേതാക്കൾ ,അമേരിക്കൻ പാറ സെന്‍റ് ജോർജ് ഓർത്തഡോക്സ് പള്ളി വികാരി ഫാ.ജിനു ജോൺ ,കുഞ്ഞിപ്പറമ്പ് ഇടവക വികാരി ഫാ. ടോണി കുന്നത്ത് എന്നിവർ സ്ഥലം സന്ദർശിച്ചു. കൃഷി ഓഫീസർ, വില്ലേജ് ഓഫീസർ എന്നിവരോട് സ്ഥലം സന്ദർശിച്ച് നാശനഷ്ടങ്ങളെ സംബന്ധിച്ച യഥാർഥ വിവരങ്ങൾ ശേഖരിക്കാൻ എംഎൽഎ നിർദോശം നൽകി. വീടുകളും കൃഷിയും നശിച്ചു ഉളിക്കൽ പഞ്ചായത്തിലെ അമേരിക്കൻ പാറയിലെ മീനോത്ത് ദാമുവിന്‍റെ വീടിന്‍റെ മേൽക്കൂര കാറ്റിൽ പൂർണമായും പറന്നുപോയി. വീടിന്‍റെ ചിമ്മിനിക്ക് വിള്ളൽ വീണ് അപകടാവസ്ഥയിലാണ്. മരോട്ടിപ്പറമ്പിൽ മേഴ്‌സി, മണത്തിനാംകണ്ടി കല്യാണി, ചാന്തനാട്ട് കൃഷ്‌ണൻ കുട്ടി, മരോട്ടിക്കുഴി ബിനോയി, മേഴ്സി പൂവ്വത്തിങ്കൽ തുടങ്ങി നിരവധി വീടുകൾ ഭാഗികമായി തകരുകയും കേടുപാടുകൾ സംഭവിക്കുകയും ചെയ്തു. അമേരിക്കൻപാറ സെന്‍റ്. ജോർജ് ഓർത്തഡോക്സ് പള്ളിയുടെ 200 അധിക റബർ മരങ്ങൾ കാറ്റിൽ തകർന്നു.കൂട്ടുങ്കൽ ജോയി, പൊന്നംതാനത്ത് മാത്യു, മാടപ്പള്ളിക്കുന്നേൽ ലൈജു, നരിവേലിൽ ജിൽസ്, താനംചേരി ബാലകൃഷ്ണൻ തുടങ്ങി നിരവധി കർഷകരുടെ കൃഷികളാണ് കാറ്റിൽ നിലം പൊത്തിയത്. സ്വകാര്യ നെറ്റ് വർക്ക് ശൃംഖലയുടെ കേബിൾ പല സ്ഥലങ്ങളിലും പൊട്ടിവീണ് വലിയ നഷ്ടം സംഭവിച്ചു. പയ്യാവൂർ പഞ്ചായത്തിൽ കുഞ്ഞിപ്പറമ്പിലെ പൗലോസ് അറയ്ക്കപറമ്പിലിന്‍റെ വീട് മരം വീണ് പൂർണമായും തകർന്നു. ജയൻകുട്ടി കൽകുന്നത്ത്, മാത്യു കുളത്തിനപ്രായിൽ,റോയ് നെടുംതുണ്ടത്തിൽ,ജോൺസൺ ചൊറിയൻമാക്കൽ, ജോയി ചാരംകുഴിയിൽ, ചിന്നമ്മ പൈമ്പള്ളിൽ, വിൽസൺ നെടുമറ്റത്തിൽ, ജിമ്മി വല്ലേൽപുത്തേട്ട്, മോഹനൻ പൂണൂൽപറമ്പിൽ, തങ്കച്ചൻ മാപ്പറയിൽ എന്നിവരുടെ വീടുകൾ ഭാഗികമായി തകർന്നു. റോയി ഇടകഴിക്കൽ, മാത്യു അറക്കൽ, മാത്യു കുളത്തിനാപ്രായിൽ,ജിമ്മി വല്ലേൽപുത്തേട്ട്, തങ്കച്ചൻ കുപ്പക്കുഴിയിൽ, ക്രിസ്തുദാസി കോൺവെന്‍റ് കുഞ്ഞിപ്പറമ്പ്, സെന്‍റ് ജോസഫ് പള്ളി കുഞ്ഞിപ്പറമ്പ്, പെണ്ണമ്മ വാളിപാക്കൽ, സജി പുലിക്കുന്നേൽ, ജിമ്മി അറക്കൽ, ഉമ്മർ പയ്യാവൂർ, ഗിരിധരൻ അവരോത്ത്, രവീന്ദ്രൻ വെട്ടൂപറമ്പിൽ, സിബി പൂവന്നിക്കുന്നിൽ, ലിജു പുല്ലുമുറ്റത്തിൽ, സാബു കൂനാനിക്കൽ , ജോസഫ് എടാട്ട് എന്നിവരുടെ കൃഷിയിടങ്ങൾ പൂർണ്ണമായും നശിച്ചു. അടിയന്തര സഹായം എത്തിക്കണം: സജീവ് ജോസഫ് വീശിയടിച്ച ചുഴലിക്കാറ്റിൽ കൃഷി നശിച്ചവർക്കും വീട് നഷ്ടമായവർക്കും സർക്കാർ അടിയന്തര സഹായം എത്തിക്കണമെന്ന് സജീവ് ജോസഫ് എംഎൽഎ ആവശ്യപ്പെട്ടു. കഴിഞ്ഞ വർഷത്തെ കാലവർഷ കെടുതിയിൽ വീടും കൃഷിയും നശിച്ചവർക്ക് ഒരുവർഷം പിന്നിട്ടിട്ടും സർക്കാർ നഷ്ടപരിഹാരം നൽകാത്തത് കർഷകരോട് കണിക്കുന്ന അവഗണക്ക് ഉദാഹരമാണെന്നും അദ്ദേഹം ചൂണ്ടിക്കാട്ടി.

അഞ്ചുവയസുകാരി കുഴഞ്ഞുവീണു മരിച്ചു

തലശേരി: വിഷുദിനത്തില്‍ അഞ്ചുവയസുകാരി കുഴഞ്ഞുവീണു മരിച്ചു. എരഞ്ഞോളി വടക്കുമ്പാട് നിടുമ്പ്രത്ത് പവിത്രം വീട്ടില്‍ അവനിക അജിത്താണ് മരിച്ചത്. വിഷുദിനത്തില്‍ ഉച്ചയ്ക്ക് 12 ഓടെ ക്ഷീണം അനുഭവപ്പെട്ടതിനെ തുടര്‍ന്ന് കുഴഞ്ഞുവീഴുകയായിരുന്നു. അവനികയെ ആദ്യം തലശേരി മിഷന്‍ ആശുപത്രിയിലും തുടര്‍ന്ന് ചാല മിംസ് ആശുപത്രിയിലും എത്തിച്ചെങ്കിലും രക്ഷിക്കാനായില്ല. എരഞ്ഞോളി നോര്‍ത്ത് എല്‍പി സ്‌കൂള്‍ മലാൽ യുകെജി വിദ്യാര്‍ഥിനിയാണ്. അജിത്ത് (ബഹറിന്‍)-സന്ധ്യ പവിത്രൻ (ഡാറ്റ എന്‍ട്രി ഓപ്പറേറ്റര്‍ തലശേരി നോര്‍ത്ത് ബിആര്‍സി) ദന്പതികളുടെ മകളാണ്. സഹോദരി: ആത്മിക (മൂന്നാം ക്ലാസ് വിദ്യാര്‍ഥിനി). തലശേരി ജനറല്‍ ആശുപത്രിയില്‍ പോസ്റ്റ്‌മോര്‍ട്ടത്തിനു ശേഷം മൃതദേഹം സംസ്കരിച്ചു.

കെട്ടിടത്തിൽനിന്നു വീണു പരിക്കേറ്റ യുപി സ്വദേശി മരിച്ചു

തലശേരി: കെട്ടിടത്തിൽനിന്നു വീണ് പരിക്കേറ്റ ഇതര സംസ്ഥാന തൊഴിലാളി മരിച്ചു. ഉത്തർപ്രദേശ് മഹാരാജ് ഗഞ്ച് അതിരുളി സ്വദേശി സന്ദീപാണ് (25) മരിച്ചത്. കഴിഞ്ഞ ശനിയാഴ്ച രാത്രിയിലാണ് ചിറക്കരയിലെ സ്വകാര്യ കെട്ടിടത്തിൽനിന്നു വീണു ഗുരുതരമായി പരിക്കേറ്റ സന്ദീപ് പരിയാരം ഗവ. മെഡിക്കൽ കോളേജിൽ ചികിത്സയിലായിരുന്നു.

ലഹരിക്കെതിരേ ഫുട്ബോൾ മത്സരം

കണ്ണൂർ: ലഹരിക്കെതിരേയുള്ള ബോധവത്കരണവുമായി ദുബായ് സോക്കർ ഇറ്റാലിയൻ സ്റ്റൈലിന്‍റെ സഹകരണത്തോടെ കണ്ണൂർ സ്പോർട്സ് ഡെവലപ്മെന്‍റ് ട്രസ്റ്റിന്‍റ് ആഭിമുഖ്യത്തിൽ ഫുട്ബോൾ ചാമ്പ്യൻഷിപ്പ് സംഘടിപ്പിക്കുന്നു. എം.ഇ.കെ. നമ്പ്യാർ മെമ്മോറിയൽ ട്രോഫി വേണ്ടി അണ്ടർ 15 ഉത്തര മലബാർ ലെവൻസ് ഫുട്ബോൾ ടൂർണമെന്‍റ് 16 മുതൽ 18വരെയുള്ള തിയതികളിൽ ജവഹർ സ്റ്റേഡിയത്തിൽ നടക്കും. " സേ നോ ടു ഡ്രഗ്സ് ' എന്ന സന്ദേശവുമായി താരങ്ങളും സംഘാടകരും ലഹരിക്കെതിരേയുള്ള പ്രതിജ്ഞ എടുക്കുകയും ചെയ്യും. 16 ന് വൈകുന്നേരം അഞ്ചിന് കേരള ഫുട്ബോൾ അസോസിയേഷൻ വൈസ് പ്രസിഡന്‍റ് വി.പി. പവിത്രൻ ചാമ്പ്യൻഷിപ്പ് ഉദ്ഘാടനം ചെയ്യും. കേരള ഫുട്ബോൾ അസോസിയേഷൻ എക്സിക്യൂട്ടീവ് മെമ്പർ എ.കെ. ശരീഫ്, കോർപറേഷൻ സ്റ്റാൻഡിംഗ് കമ്മിറ്റി ചെയർമാൻ എം.പി. രാജേഷ് മുഖ്യഥിതിയാവും. ട്രസ്റ്റ് ചെയർമാൻ പി.വി. സുമൻ അധ്യക്ഷത വഹിക്കും. ട്രസ്റ്റ് ഓർഗനൈസിംഗ് സെക്രട്ടറി മൻമോഹൻ സംസാരിക്കും. 18 ന് വൈകുന്നേരം അഞ്ചിന് സമാപന സമ്മേളനം മന്ത്രി രാമചന്ദ്രൻ കടന്നപ്പള്ളി ഉദ്ഘാടനം ചെയ്യും. കോർപറേഷൻ സ്റ്റാൻഡിംഗ് കമ്മിറ്റി ചെയർമാൻ സുരേഷ് ബാബു എളയാവൂർ, ടാറ്റാ സ്പോർട്സ് കൺട്രോൾ ബോർഡ്‌ സെക്രട്ടറിയും ടാറ്റാ ട്രസ്റ്റ്‌ പ്രിൻസിപ്പൽ അഡ്വൈസറുമായ ഡോ.രമേശ്‌ നമ്പ്യാർ എന്നിവർ മുഖ്യാതിഥികളാകും.

മാലിന്യ പ്ലാന്‍റ് പ്രവർത്തനം നിർത്തി; കോഴി വ്യാപാരികൾ പ്രതിസന്ധിയിൽ

കണ്ണൂർ: ചിക്കൻ വ്യാപാര മേഖലയിൽ മാലിന്യങ്ങൾ അസംസ്‌കൃത വസ്തുവായി മാറ്റുന്ന റെൻഡറിംഗ് പ്ലാന്‍റ് പ്രവർത്തനം നിർത്തിവെച്ചത് ജില്ലയിലെ ആയിരക്കണക്കിന് കോഴി വ്യാപാരികളെ പ്രതിസന്ധിയിലാക്കി. ജില്ലാ ഭരണകൂടവും വ്യാപാരികളും പ്ലാന്‍റ് ഉടമകളുമായി ഉണ്ടാക്കിയ ധാരണ പ്രകാരം കിലോയ്ക്ക് അഞ്ചുരൂപ നൽകിയാണ് പ്ലാന്‍റ് മാലിന്യം എടുത്ത് വരുന്നത്. പെരുന്നാൾ സമയത്ത് ഒരു മുന്നറിയിപ്പും ഇല്ലാതെ 10 രൂപ നിരക്ക് പ്ലാന്‍റ് ഈടാക്കുകയായിരുന്നു. ഇതിനെതിരെ ചിക്കൻ വ്യാപാരികൾ കളക്ടർക്ക്‌ നൽകിയ പരാതി പ്രകാരം നടന്ന ചർച്ചയിൽ അഞ്ചുരൂപ നിരക്കിൽ തന്നെ വാങ്ങുന്നതിനും 10 രൂപ വാങ്ങിയ വ്യാപാരികൾക്ക് അഞ്ചുരൂപ തിരിച്ചു നല്കുവാനും കളക്‌ടർ നിർദേശിച്ചിരുന്നു. ഇപ്പോൾ വിഷുവിന്‍റെ ഏറ്റവും തിരക്കുള്ള സമയം തന്നെ പ്ലാന്‍റ് അടയ്ക്കുകയും മാലിന്യങ്ങൾ കടകളിൽ നിന്ന് എടുക്കാതിരിക്കികയും ചെയ്ത് വില വർധിപ്പിക്കാനുള്ള സമ്മർദ്ധ തന്ത്രമാണ് ജില്ലയിലെ ഭൂരിഭാഗം പ്രദേശങ്ങളിൽ നിന്നും മാലിന്യം ശേഖരിക്കുന്ന മട്ടന്നൂരിലെ റെൻഡറിംഗ് പ്ലാന്‍റിന്‍റെ ഭാഗത്ത് നിന്നും നടക്കുന്നതെന്ന് വ്യാപാരികൾ ആരോപിക്കുന്നു. നിലവിൽ 2026 വരെ കോഴി മാലിന്യം എടുക്കുന്നതിനുള്ള കരാർ നിലനിൽക്കെ ഏകപക്ഷീയമായി മട്ടന്നൂരിലെ റെൻഡറിംഗ് പ്ലാന്‍റ് എടുത്ത തീരുമാനം വഴി ചിക്കൻ മാലിന്യം സംസ്കരിക്കാൻ പറ്റാതെ വ്യാപാരികൾ പ്രതിസന്ധിയിലായിരിക്കുകയാണ്. മാലിന്യ പ്രശ്നം അടിയന്തിരമായി പരിഹരിക്കുന്നതിന് ജില്ലാ ഭരണകൂടം തയാറാവണമെന്ന് വ്യാപാരി വ്യവസായി സമിതി കണ്ണൂർ ജില്ലാ എക്സിക്യൂട്ടീവ് ആവശ്യപ്പെട്ടു. യോഗത്തിൽ ജില്ലാ പ്രസിഡന്‍റ് പി. വിജയൻ അധ്യക്ഷത വഹിച്ചു. സംസ്ഥാന ട്രഷറർ വി.ഗോപിനാഥൻ, ജില്ലാ സെക്രട്ടറി പി.എം. സുഗുണൻ എന്നിവർ സംസാരിച്ചു.

തളിപ്പറമ്പ് ബ്ലോക്ക് പഞ്ചായത്തിന് വൃത്തിയുടെ പൊൻതിളക്കം

തളിപ്പറമ്പ്: മാലിന്യമുക്ത നവകേരളം ജനകീയ കാമ്പയിൻ വൃത്തി 2025 ക്ലീൻ കേരള കോൺക്ലേവിൽ സംസ്ഥാനത്തെ ഏറ്റവും മികച്ച ബ്ലോക്ക് പഞ്ചായത്തായി തളിപ്പറമ്പ് ബ്ലോക്ക് പഞ്ചായത്ത് തെരത്തെടു ക്കപ്പെട്ടു. രണ്ടു ലക്ഷം രൂപയുടെ കാഷ് പ്രൈസ് സമ്മാനമായി ലഭിച്ചു. ബ്ലോക്ക് പഞ്ചാ യത്ത് പരിധിയിലെ ഒമ്പത് ഗ്രാമപഞ്ചായത്തുകൾക്കുമായി ഈ പുരസ്കാരം സമർപ്പിക്കുന്നുവെന്ന് ബ്ലോക്ക് പഞ്ചായത്ത് പ്രസിഡൻറ് സി.എം. കൃഷ്ണൻ പറഞ്ഞു. ഇതുവരെ ഗ്രാമ പഞ്ചായത്തുകൾ ഏറ്റെടുത്ത് നടപ്പിലാക്കിയ വർണം 2025 പദ്ധതി, ജനകീയ സദസുകൾ, വിട്ടുമുറ്റ സദസുകൾ, വിദ്യാലയമുറ്റം സദസുകൾ, എൻഎസ്എസ് സ്നേഹാരാമങ്ങൾ, ശുചിത്വ സന്ദേശ റാലികൾ, ഹരിത സഭകൾ, ഹരിത അയൽക്കൂട്ടങ്ങൾ, അങ്കണവാടികളിലെ എന്‍റെ പാത്രം നിന്‍റെ കണ്ണാടി, ഹരിത നഗറുകൾ, ഹരിത മദ്രസകൾ, ഹരിത ആരാധനാലയങ്ങൾ, വ്യാപാരി കൾ സ്വീകരിച്ച ശാസ്ത്രീയ ശുചിത്വ മനോഭാവം, തൊഴിലാളികളുടെ സഹകരണം, കുടുംബശ്രീ, ഹരിത കർമ സേന തുടങ്ങിയ നിരവധിയായ പ്രവർത്തനങ്ങളാണ് ഈ നേട്ടങ്ങളിലേക്കെത്താൻ സാധിച്ചതെന്നും പ്രസിഡന്‍റ് പറഞ്ഞു. ജില്ല കളക്ടർ അരുൺ കെ വിജയൻ, ജില്ല പഞ്ചായത്ത് പ്രസിഡന്‍റ് രത്നകുമാരി, ടി.ജെ. അരുൺ, സുഭാഷ്, ഹരിത കേരളം മിഷൻ ജില്ല കോ -ഓർഡിനേറ്റർ ഇ.കെ. സോമശേഖരൻ, ശുചിത്വമിഷൻ ജില്ല കോ -ഓർഡിനേറ്റർ കെ.എം. സുനിൽകുമാർ എന്നിവരും മിഷന്‍റെ റിസോഴ്സ് പേഴ്സൺ മാരായ വി. സഹദേവൻ, എം. സുജന എന്നിവരൊക്കെ നൽകിയ പിന്തുണയും മാർഗ നിർദേശങ്ങളും ചാലകശക്തിയായി മാറിയെന്നും സി.എം കൃഷ്ണൻ പറഞ്ഞു.

നിർത്തിയിട്ട ടൂറിസ്റ്റ് ബസുകൾക്ക് നേരെ കല്ലേറ്; ചില്ലുകൾ തകർന്നു

പഴയങ്ങാടി: മാട്ടൂലിൽ റോഡരികിൽ നിർത്തിയിട്ട ടൂറിസ്റ്റ് ബസുകൾക്കു നേരെ ആക്രമണം. കഴിഞ്ഞ ദിവസം രാത്രിയിൽ മാട്ടൂൽ സൗത്ത് യാസിൻ പള്ളിക്ക് സമീപത്തും മാട്ടൂൽ ഹൈസ്കൂൾ കവാടത്തിന ടുത്തും സമീപത്തും നിർത്തിയിട്ട മാട്ടൂൽ സ്വദേശി ടി.പി. അജീറിന്‍റെ ഉടമസ്ഥതയിലുള്ള ടൂറിസ്റ്റ് ബസിന് നേരെയാണ് ആക്രമണം ഉണ്ടായത്. കല്ലേറിൽ ബസിന്‍റെ ചില്ലുകൾ തകരുകയും ബോഡിക്ക് കേ ടുപാടുകളും സംഭവിച്ചു. കഴിഞ്ഞ ദിവസങ്ങളിൽ പഴയങ്ങാടി -മാട്ടൂൽ -കണ്ണൂർ റൂട്ടിൽ ബസ് ജീവനക്കാർ തമ്മിലുണ്ടായ വാക്കേ റ്റവും കൈയാങ്കളിയും തുടർന്നുണ്ടായ സംഘർഷവുമാണ് ആക്രമണത്തിന് പിന്നിലെന്ന സംശയം ഉയരുന്നുണ്ട്. ബസ് ജീവനക്കാർ തമ്മിലുള്ള വാക്കേറ്റത്തേ തുടർന്ന് കഴിഞ്ഞ ദിവസം രണ്ട് ബസുകൾ കസ്റ്റഡിയിലെ ടുക്കുകയും മൂന്ന് ജീവനക്കാരെ അറസ്റ്റ് ചെയ്യുകയും ചെയ്തിരുന്നു. പഴയങ്ങാടി എസ്ഐ കെ. സുഹൈലിന്‍റെ നിർദേശ പ്രകാരമാണ് കേസെടുത്തത്.

മട്ടന്നൂർ ഗവ. സ്‌പെഷ്യാലിറ്റി ആശുപത്രി നിർമാണത്തിന് പുതിയ ടെൻഡറായി

മട്ടന്നൂർ: ഒരു വർഷത്തിലേറെയായി നിർമാണ പ്രവൃത്തി മുടങ്ങി കിടക്കുന്ന മട്ടന്നൂരിലെ ഗവ. സ്‌പെഷ്യാലിറ്റി ആശുപത്രിയുടെ നിർമാണത്തിന് പുതിയ ടെൻഡറായി. ബംഗളൂരുവിലെ ഒരു കമ്പനിയാണ് ടെൻഡർ എടുത്തത്. ഈ മാസം അവസാനത്തോടെ നിർമാണ പ്രവൃത്തി ആരംഭിക്കും. കരാർ ഏറ്റെടുത്ത കമ്പനി സാമ്പത്തിക പ്രതിസന്ധി മൂലം പ്രവൃത്തി ഉപേക്ഷിച്ചു പോയതോടെയാണ് നിർമാണം നിലച്ചത്. റീടെൻഡർ ചെയ്തതോടെയാണ് പുതിയ കരാർ നൽകി പ്രവൃത്തി പുനഃരാരംഭിക്കാനുള്ള ശ്രമങ്ങൾ നടക്കുന്നത്. 2019 ഒക്ടോബറിലാണ് സ്‌പെഷ്യാലിറ്റി ആശുപത്രിക്ക് മുഖ്യമന്ത്രി പിണറായി വിജയൻ തറക്കല്ലിട്ടത്. കിഫ്ബി വഴി 71.5 കോടി രൂപ ചെലവിട്ടാണ് ആധുനിക സൗകര്യങ്ങളോടെ ആശുപത്രി നിർമിക്കുന്നത്. കെഎസ്ഇബിയാണ് പദ്ധതിയുടെ നിർവഹണ ഏജൻസി. 67 കോടി രൂപയുടെ ഒന്നാംഘട്ട പ്രവൃത്തികളാണ് തുടങ്ങിയിരുന്നത്. മട്ടന്നൂർ-ഇരിട്ടി റോഡിൽ റവന്യു ടവറിന് പിറകിലായി ജലസേചന വകുപ്പിൽ നിന്ന് വിട്ടുകിട്ടിയ സ്ഥലത്താണ് ആശുപത്രി നിർമിക്കുന്നത്. നിർമാണ കരാർ ഏറ്റെടുത്ത കമ്പനി സാമ്പത്തിക പ്രതിസന്ധിയിലായതിനെ തുടർന്ന് തൊഴിലാളികൾക്ക് ശമ്പളം മുടങ്ങിയതോടെയാണ് പ്രവൃത്തി നിർത്തിവച്ചത്. തുടർന്ന് കമ്പനിയെ കരാറിൽ നിന്ന് ഒഴിവാക്കിയതോടെ ഇവർ നിയമനടപടിയുമായി മുന്നോട്ടുപോകുകയായിരുന്നു. കഴിഞ്ഞ നവംബറോടെ ആദ്യഘട്ട പ്രവൃത്തി പൂർത്തിയാക്കി ഉദ്ഘാടനം നടത്താനാണ് ലക്ഷ്യമിട്ടിരുന്നത്. എന്നാൽ, കോവിഡ് ഉൾപ്പടെയുള്ള തടസങ്ങൾ തുടക്കത്തിൽ തന്നെ പ്രവൃത്തിയെ ബാധിച്ചു.

കത്തോലിക്കാ കോൺഗ്രസ് യൂത്ത് വിംഗ് യോഗം

ഇരിട്ടി: കത്തോലിക്കാ കോൺഗ്രസ് യൂത്ത് വിംഗ് ഇരിട്ടി റീജൺ എക്സിക്യൂട്ടീവ് മീറ്റിംഗ് ഗ്ലോബൽ ഡയറക്ടർ റവ. ഡോ. ഫിലിപ്പ് കവിയിൽ ഉദ്ഘാടനം ചെയ്തു. ഇരിട്ടി സെന്‍റ് ജോസഫ് പള്ളി ഓഡിറ്റോറിയത്തിൽ നടന്ന യോഗത്തിൽ യുവജനങ്ങൾ സമുദായത്തിന്‍റെ ശക്തികേന്ദ്രങ്ങൾ ആകണമെന്ന് ഡയറക്ടർ ആഹ്വാനം ചെയ്തു. ഗ്ലോബൽ യൂത്ത് കോ-ഓർഡിനേറ്റർ സിജോ കണ്ണേഴത്ത് അധ്യക്ഷനായിരുന്നു. ഫാ. ജോസഫ് കളരിക്കൽ, രൂപത വൈസ് പ്രസിഡന്‍റ് ബെന്നിച്ചൻ മഠത്തിനകം, ട്രഷറർ സുരേഷ് ജോർജ്, ഫൊറോനാ പ്രസിഡന്‍റുമാരായ അഡ്വ. ബിജു ഒറ്റപ്ലാക്കൽ, മാത്യു വള്ളോംകോട്ട്, തോമസ് വർഗീസ്‌, ജോസ് പുത്തൻപുര, യൂത്ത് വിംഗ് കോ-ഓർഡിനേറ്റർമാരായ പാട്രിക്ക്, അബിൻ എന്നിവർ പ്രസംഗിച്ചു.

നിർമാണത്തിലിരിക്കുന്ന കിണറ്റിൽ വീണ കാട്ടുപന്നികളെ വെടിവച്ചു കൊന്നു

അടയ്ക്കാത്തോട്: അടയ്ക്കാത്തോട് മേഖലയിൽ രണ്ടു കാട്ടുപന്നികളെ വെടിവച്ചുകൊന്നു. മേമലയി ലെ ഇടമനാംപൊയ്കയിൽ സത്യന്‍റെ നിർമാണത്തിലിരിക്കുന്ന കിണറ്റിൽ വീണ രണ്ട് കാട്ടുപന്നികളെ യാണ് വെടിവച്ചുകൊന്നത്. ഹോണററി വൈൽഡ് ലൈഫ് വാർഡൻ എന്ന അധികാരമുപയോഗിച്ച് കേളകം ഗ്രാമപഞ്ചായത്ത് പ്രസിഡന്‍റ സി.ടി. അനീഷിന്‍റെ നിർദേശ പ്രകാരം എംപാനൽ ഷൂട്ടർ ജോബി സെബാസ്റ്റ്യനാണ് വെടിവച്ചു കൊന്നത്. പ്രസിഡന്‍റ് സി.ടി. അനീഷ്, വൈസ് പ്രസിഡന്‍റ് തങ്കമ്മ മേലേക്കുറ്റ്, ആരോഗ്യ വിദ്യഭ്യാസ സ്റ്റാൻഡിംഗ് കമ്മിറ്റി ചെയർമാൻ സജീവൻ പാലുമ്മി, ബീറ്റ് ഫോറസ്റ്റ് ഓഫീസർമാരായ പ്രജീഷ്, അനൂപ്, ഫോറസ്റ്റ് വാച്ചർ ബാലകൃഷ്ണൻ എന്നിവരുടെ സാന്നിധ്യത്തിൽ കാട്ടുപന്നികളുടെ ജഡം മറവു ചെയ്തു. ഇത് നാലാമത്തെ പ്രാവശ്യമാണ് കേളകം ഗ്രാമപഞ്ചായത്തിൽ കാട്ടുപന്നികളെ വെടിവയ്ക്കുന്നത്.

മികച്ച അംഗീകാരവുമായി വീണ്ടും ചപ്പാരപ്പടവ് ഗ്രാമപഞ്ചായത്ത്

ചപ്പാരപ്പടവ്: തിരുവനന്തപുരത്ത് നടന്ന "വൃത്തി-2025 ക്ലീൻ' കേരള കോൺക്ലേവിൽ ചപ്പാരപ്പടവ് ഗ്രാമപഞ്ചായത്തിന് മികച്ച അംഗീകാരം. മൂന്നു വേദികളിലായി അവതരണം നടത്തുന്നതിനുള്ള അവസരവും ആദരവും പഞ്ചായത്തിന് ലഭിച്ചു. മാലിന്യ സംസ്കരണത്തിലെ മികച്ച വിവര വിജ്ഞാപനം മാതൃകകൾ, മികച്ച ശുചിത്വ മാതൃക, ഹരിത കർമ്മ സേന ആൻഡ് റസിഡൻസ് അസോസിയേഷൻ സംവാദം എന്നിവയുടെ അവതരണമാണ് നടത്തിയത്. മറ്റൊരു പഞ്ചായത്തിനും ലഭിക്കാത്തത്ര അവസരങ്ങളാണ് ചപ്പാരപ്പടവിന് ലഭിച്ചത്. അസി.സെക്രട്ടറി ജി.അജയകുമാർ, ഗ്രാമപഞ്ചായത്ത് പ്രസിഡന്‍റ് സുനിജ ബാലകൃഷ്ണൻ, ഹരിത കർമ്മ സേന പ്രസിഡന്‍റ്, സെക്രട്ടറി എന്നിവരാണ് യഥാക്രമം നിറഞ്ഞ സദസിനു മുമ്പിൽ അവതരണങ്ങൾ നടത്തിയത്. വിലയിരുത്തിയ ജൂറിമാരിൽ നിന്നും വളരെ വിലപ്പെട്ട അഭിപ്രായങ്ങളും അനുമോദനങ്ങളും ആദരവുകളും ഏറ്റുവാങ്ങാൻ ഇവർക്ക് സാധിച്ചു. കഴിഞ്ഞ നാല് വർഷമായി പഞ്ചായത്ത് നടത്തിയ പ്രവർത്തനങ്ങൾക്കുള്ള അംഗീകാരമാണ് ആദരവുകൾ. കണ്ണൂർ ജില്ലയിൽ നിന്നും പഞ്ചായത്ത് വിഭാഗത്തിൽ സ്റ്റാളൊരുക്കിയത് ചപ്പാരപ്പടവ് മാത്രമാണ്. സഹകരിച്ച എല്ലാവർക്കുമായി ഈ നേട്ടങ്ങൾ സമർപ്പിക്കുകയാണെന്ന് പഞ്ചായത്ത് പ്രസിഡന്‍റ് സുനിജ ബാലകൃഷ്ണൻ അറിയിച്ചു.

മ്യൂസിയം ചരിത്രവസ്തുതകൾ കൊണ്ട് നുണകളെ നേരിടുന്ന വിജ്ഞാനശാല: മുഖ്യമന്ത്രി

കണ്ണൂർ: യഥാർഥ ചരിത്രവസ്തുതകൾ കൊണ്ട് നുണകളെ നേരിടാൻ നമ്മെ പ്രാപ്തമാക്കുന്ന വിജ്ഞാനശാലയാണ് മ്യൂസിയമെന്ന് മുഖ്യമന്ത്രി പിണറായി വിജയന്‍. മക്രേരി ശ്രീ സുബ്രഹമണ്യസ്വാമി ക്ഷേത്ര തീര്‍ഥാടന ടൂറിസം പദ്ധതി ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി. വിവര സാങ്കേതിക വിദ്യയുടെ യുഗമാണ് ഇത്. അറിവുകൾ വേഗത്തിൽ പകർന്നു നൽകപ്പെടുന്നു. നുണകളും ഇക്കാലത്ത് അതിവേഗതയിലാണ് പ്രചരിക്കപ്പെടുന്നത്. അതുകൊണ്ടുതന്നെ മ്യൂസിയങ്ങൾക്ക് വലിയ പ്രാധാന്യമുണ്ടെന്നും മുഖ്യമന്ത്രി പറഞ്ഞു. ടൂറിസം വകുപ്പ് സ്റ്റേറ്റ് ഫണ്ട് മുഖേനയും കിഫ്ബി സാമ്പത്തിക വകയിരുത്തല്‍ പ്രകാരവും പൂര്‍ത്തീകരിച്ച ഊട്ടുപുര, ദക്ഷിണമൂർത്തി സ്വാമികളുടെ ഓർമകൾ പകരുന്ന സോപാന സംഗീത മ്യൂസിയം, മ്യൂസിയം കെട്ടിടം, ലാന്‍ഡ് സ്‌കേപ്പിംഗ്, ചുറ്റമ്പലം ടൈല്‍ പാകല്‍, കല്ല് പാകല്‍, കുളം നവീകരണം, ടോയ്‌ലറ്റ് സംവിധാനങ്ങൾ എന്നിവയാണ് ഉദ്ഘാടനം ചെയ്തത്. മേയ് ഒന്നുമുതൽ പൊതുജനങ്ങൾക്ക് മ്യൂസിയം തുറന്നു കൊടുക്കും.മന്ത്രി രാമചന്ദ്രന്‍ കടന്നപ്പള്ളി അധ്യക്ഷത വഹിച്ചു. ഡോ.വി. ശിവദാസന്‍ എംപി, ജില്ലാ പഞ്ചായത്ത് പ്രസിഡന്‍റ് കെ.കെ രത്നകുമാരി എന്നിവര്‍ വിശിഷ്ടാതിഥികളായിരുന്നു. കേരള മ്യൂസിയം എക്സിക്യൂട്ടീവ് ഡയറക്ടര്‍ ആര്‍. ചന്ദ്രന്‍പിള്ള, കെഐഐഡിസി ചീഫ് എൻജിനിയര്‍ പ്രകാശ് ഇടിക്കുള എന്നിവര്‍ റിപ്പോര്‍ട്ട് അവതരിപ്പിച്ചു.

ബൈക്കും കാറും കൂട്ടിയിടിച്ച് യുവാവ് മരിച്ചു; മൂന്നുപേർക്കു പരിക്ക്

തൊണ്ടിയിൽ: തൊണ്ടിയിൽ-തെറ്റുവഴി റോഡിൽ ബൈക്കും കാറും ഓട്ടോറിക്ഷയും കൂട്ടിയിടിച്ച് ബൈക്ക് യാത്രികൻ മരിച്ചു. ആനയാണ്ടകരിയിലെ വെന്പള്ളിക്കുന്നേൽ മനു ജോസഫ് (23) ആണ് മരിച്ചത്. മൂന്നുപേർക്ക് പരിക്കേറ്റു. ഇന്നലെ ഉച്ചയ്ക്ക് 12.30 യോടെയായിരുന്നു അപകടം. ഓട്ടോറിക്ഷയെ മറികടന്നെത്തിയ കാർ എതിർദിശയിൽനിന്ന് വരികയായിരുന്ന മനു ഓടിച്ചിരുന്ന ബൈക്കിലിടിച്ചായിരുന്നു അപകടം. കാർ വെട്ടിച്ചുമാറ്റുന്നതിനിടെ ഓട്ടോയിലും ഇടിച്ചു. അപകടത്തിൽ ബൈക്ക് പൂർണമായും തകർന്നു. റോഡിലക്ക് തെറിച്ചുവീണ മനു ജോസഫിന്‍റെ തലയ്ക്കാണ് ഗുരുതര പരിക്കേറ്റത്. ഉടൻ പേരാവൂരിലെ സൈറസ് ആശുപത്രിയിൽ എത്തിച്ചെങ്കിലും മരിച്ചിരുന്നു. വെമ്പള്ളിക്കുന്നേൽ ജോണി -ബെറ്റി ദമ്പതികളുടെ മകനാണ്. അനു ഏക സഹോദരിയാണ്. ജെസിബി ഡ്രൈവറാണ് മരിച്ച മനു ജോസഫ്. അപകടത്തിൽ ആനയാണ്ടങ്കരി സ്വദേശിയായ കാർ ഡ്രൈവർ ടോമി, ഓട്ടോറിക്ഷയിൽ ഉണ്ടായിരുന്ന രമ്യ ദേവി, ബിജു സെബാസ്റ്റ്യൻ എന്നിവർക്കും പരിക്കേറ്റു. ടോമിയെ പേരാവൂർ താലൂക്ക് ആശുപത്രിയിലും, രമ്യ ദേവിയെ പേരാവൂർ രശ്മി ആശുപത്രിയിലും പ്രവേശിപ്പിച്ചു.

കരിയർ സ്വപ്നങ്ങൾക്ക് വഴികാട്ടി ദിശ എഡ്യുക്കേഷന്‍ എക്സ്പോ

കണ്ണൂർ: ദീപിക ദിനപത്രവും തലശേരി അതിരൂപതയുടെ സാമൂഹ്യ സേവന വിഭാഗമായ തലശേരി സോഷ്യൽ സർവീസ് സൊസൈറ്റിയും (ടിഎസ്എസ്എസ് ) എഡ്യുസ്പാർക്കും സംയുക്തമായി ദിശ എഡ്യുക്കേഷന്‍ എക്സ്പോ കണ്ണൂർ ശ്രീപുരം ഇംഗ്ലീഷ് മീഡിയം സ്കൂളിൽ സംഘടിപ്പിച്ചു. കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ ഉദ്ഘാടനം ചെയ്തു.നൂതന വിദ്യാഭ്യാസ സാധ്യതകളെക്കുറിച്ച് വിദ്യാർഥികളോട് അക്കാദമിക്ക് എക്സ്പേർട്ടും കേരളത്തിന്‍റെ മുൻ ഡിജിപിയുമായിരുന്ന ഡോ. അലക്സാണ്ടർ ജേക്കബ് ഐപിഎസ് സംസാരിച്ചു. കണ്ണൂർ യൂണിവേഴ്സിറ്റി രജിസ്ട്രാർ ജോബി കെ. ജോസ് ആമുഖ പ്രഭാഷണം നടത്തി. പ്ലസ് വൺ, പ്ലസ് ടു പരീക്ഷ കഴിഞ്ഞ് ഉന്നത വിദ്യാഭ്യാസത്തിന് കാത്തിരിക്കുന്ന കണ്ണൂർ, കാസർഗോഡ് ജില്ലകളിലെ ആയിരത്തോളം വിദ്യാർഥികൾ എക്സ്പോയിൽ പങ്കെടുത്തു. കേരളത്തിനകത്തും പുറത്തുമുള്ള പ്രശസ്തമായ പ്രഫഷണൽ വിദ്യാഭ്യാസ സ്ഥാപനങ്ങളുടെയും സർവകലാശാലകളുടെയും സ്റ്റാളുകൾ എക്സ്പോയിൽ ഉണ്ടായിരുന്നു. വിദ്യാർഥികൾക്ക് സ്പോട്ട് അഡ്മിഷൻ എടുക്കാനും സൗകര്യമുണ്ടായിരുന്നു. എക്സ്പോയിൽ പങ്കെടുത്ത വിദ്യാഭ്യാസസ്ഥാപനങ്ങളുടെ പ്രതിനിധികളും സംസാരിച്ചു. തലശേരി അതിരൂപത വൈസ് ചാൻസിലർ ഫാ. സുബിൻ റാത്തപ്പള്ളി, ടിഎസ്എസ് അസോസിയേറ്റ് ഡയറക്ടർ ഫാ. ലൂക്കോസ് മാടശേരി, ദീപിക കണ്ണൂർ യൂണിറ്റ് റസിഡന്‍റ് മാനേജർ ഫാ. ജോബിൻ വലിയപറന്പിൽ, ദീപിക സീനിയർ സർക്കുലേഷൻ മാനേജർ ജോർജ് തയ്യിൽ എന്നിവർ പ്രസംഗിച്ചു. വെല്ലുവിളികളെ അതിജീവിച്ച് മുന്നേറണം: മാർ ജോസഫ് പണ്ടാരശേരിൽ നാം ഇന്ന് ജീവിക്കുന്നത് ആർട്ടിഫിഷ്യൽ റോബോട്ടിക് കാലത്താണെന്നും ലോകം അതിവേഗം മുന്നോട്ട് പോയിക്കൊണ്ടിരിക്കുകയാണെന്നും കോട്ടയം അതിരൂപത സഹായമെത്രാൻ മാർ ജോസഫ് പണ്ടാരശേരിൽ. ഇന്ന് എംപ്ലോയിയെന്ന വാക്ക് ആരും പറയാറില്ല. പകരം സ്റ്റാർട്ടപ്പ്, ഇൻവെസ്റ്റേഴ്സ് എന്നൊക്കെയാണ് അറിയപ്പെടുന്നത്. നിരവധി സാധ്യതകളും അവസരങ്ങളും യുവതലമുറയുടെ മുന്നിലുണ്ട്. എന്നാൽ, ഇവയൊക്കെ നേടാൻ വെല്ലുവിളികളേറെയാണ്. ഇവയെ അതിജീവിച്ച് വിജയം നേടണമെന്നും മാർ ജോസഫ് പണ്ടാരശേരിൽ പറഞ്ഞു. ഇന്നത്തെ തലമുറ വിദേശ രാജ്യങ്ങളിലെ ജോലികളിൽ ആകൃഷ്ടരായി പോകുന്നവരാണ്. നമ്മുടെ നാട്ടിൽ ഒരുപാട് സാധ്യതകൾ ഉണ്ടെങ്കിലും അവയൊന്നും ആരും പ്രയോജനപ്പെടുത്താറില്ല. വിദേശരാജ്യങ്ങളിൽ പോയി ജോലി നേടിയാലും പത്ത് വർഷത്തിനകം തിരിച്ച് നാട്ടിലേക്ക് വരാൻ എല്ലാവരും ശ്രമിക്കണമെന്നും മാർ ജോസഫ് പണ്ടാരശേരിൽ പറഞ്ഞു. അഭിരുചിക്കനുസരിച്ചുള്ള കരിയർ കണ്ടെത്തണം: ഡോ. അലക്സാണ്ടർ ജേക്കബ് ഒരോരുത്തരും അവരുടെ അഭിരുചിയ്ക്കനുസരിച്ചുള്ള കരിയർ കണ്ടെത്തണമെന്ന് മുൻ ഡിജിപി ഡോ. അലക്സാണ്ടർ ജേക്കബ്. നൂതന വിദ്യാഭ്യാസ സാധ്യതകളെക്കുറിച്ച് വിദ്യാർഥികളോട് സംസാരിക്കുകയായിരുന്നു അദ്ദേഹം. ഓരോ വ്യക്തിയും ജനിക്കുന്പോൾത്തന്നെ കഴിവുകൾ ലഭിച്ചിട്ടുണ്ടാകും. അത് എന്താണെന്ന് കണ്ടെത്തി അതിനനുസരിച്ച് ജീവിക്കാനാണ് നാം ശ്രദ്ധിക്കേണ്ടത്. പണ്ട് പലർക്കും കഴിവുകൾ ഉണ്ടെങ്കിലും പഠിക്കാനുള്ള സാഹചര്യങ്ങൾ കുറവായിരുന്നു. എന്നാൽ ഇന്ന് അങ്ങനെയല്ല. ഇഷ്ടമുള്ള വിദ്യാഭ്യാസസ്ഥാപനങ്ങളിൽ അഭിരുചിക്ക് അനുസരിച്ച് കോഴ്സുകൾ ചെയ്യാൻ സാധിക്കും. ഏതൊരു കോഴ്സ് നമ്മൾ തെരഞ്ഞെടുക്കുമ്പോഴും ഒരു സെക്കൻഡ് ഓപ്ഷൻ നല്ലതാണ്. ഇപ്പോൾ എൻട്രൻസ് എക്സാം എഴുതി കിട്ടിയില്ലെങ്കിൽ അടുത്തത് ഞാൻ എന്ത് ചെയ്യുമെന്ന് മുൻകൂട്ടി തീരുമാനിക്കണമെന്നും അദ്ദേഹം പറഞ്ഞു. ക്ലാസിനു ശേഷം അദ്ദേഹം കുട്ടികളുമായി സംവദിച്ചു. എവിടെ പോയാലും അറിവ് നേടുകയാണ് പ്രധാനം: ജോബി കെ. ജോസ് വിദേശരാജ്യങ്ങളിലേക്ക് പോയാൽ രക്ഷപ്പെടാം എന്ന ധാരണയാണ് പലരേയും ആകർഷിക്കുന്നതെന്ന് കണ്ണൂർ യൂണിവേഴ്സിറ്റി രജിസ്ട്രാർ ജോബി.കെ. ജോസ്. ഇവിടെയുള്ളത് മോശമാണ് അതുകൊണ്ട് വിദേശരാജ്യത്തേക്ക് പോകണം എന്ന ചിന്താഗതി മാറ്റേണ്ട സമയം കഴിഞ്ഞു. എവിടെ നിന്നാലും അറിവ് നേടുകയെന്നതാണ് പ്രധാനം. ഉന്നത വിദ്യാഭ്യാസം നേടിയാൽ തൊഴിൽ നേടുന്നതിന് പ്രാപ്തരായി. കേരളത്തിൽ ഉന്നത വിദ്യാഭ്യാസത്തിനായി നിരവധി സാധ്യതകളാണ് ഇന്നുള്ളത്. ഏത് രാജ്യത്ത് പഠിച്ചാലും അറിവ് നേടുകയെന്നത് വളരെ പ്രധാനമാണെന്നും അദ്ദേഹം പറഞ്ഞു. ഡിജെയും മറ്റും കാണിച്ച് നിങ്ങളെ ആകൃഷ്ടരാക്കാൻ നിരവധി കോളജുകൾ ഉണ്ടായിരിക്കും. എന്നാൽ, നമ്മൾക്ക് ശരിയായ അറിവ് എവിടുന്നാണോ കിട്ടുന്നതെന്ന് നോക്കിവേണം വൈബുകൾ തേടാനെന്നും അദ്ദേഹം പറഞ്ഞു.

കൂട്ടുപുഴ പോലീസ് ചെക്ക്പോസ്റ്റിൽ കഞ്ചാവും ഹാഷിഷ് ഓയിലും പിടികൂടി

ഇരിട്ടി: കൂട്ടുപുഴ പോലീസ് ചെക്പോസ്റ്റിൽ 1.5 കിലോ ഗ്രാം കഞ്ചാവും 360 ഗ്രാം ഹാഷിഷ് ഓയിലുമായി തൃശൂർ സ്വദേശി സരിത് സെബാസ്റ്റ്യനെ (39) ഇരിട്ടി എസ്ഐ കെ. ഷറഫുദ്ദീൻ അറസ്റ്റ് ചെയ്തു. റൂറൽ പോലിസ് മേധാവിയുടെ ലഹരി വിരുദ്ധ സ്‌ക്വാഡും ഇരിട്ടി ഡിവൈഎസ്പിയുടെ സ്‌ക്വാഡും ഇരിട്ടി പോലീസും ചേർന്ന് അതിർത്തിയിൽ നടത്തിയ പരിശോധനയിലാണു പ്രതി പിടിയിലാകുന്നത് . കർണാടക ഭാഗത്തുനിന്ന് പാലത്തിലൂടെ കേരളത്തിലേക്കു നടന്നെത്തിയ പ്രതിയെ സംശയം തോന്നി പരിശോധിച്ചപ്പോഴാണ് ബാഗിൽ ഒളിപ്പിച്ച നിലയിൽ ലഹരി വസ്തുക്കൾ കണ്ടെടുക്കുന്നത്. ബാഗിൽ ബ്രൗൺ പായ്ക്കിംഗ് ടേപ്പ് ഉപയോഗിച്ച് മണം പുറത്തുവരാത്ത രീതിയിൽ പായ്ക്ക് ചെയ്തതായിരുന്നു കഞ്ചാവ് സൂക്ഷിച്ചിരുന്നത്. ഹാഷിഷ് ഓയിൽ ഹോമിയോ ഗുളികകൾ സൂക്ഷിക്കുന്ന രീതിയിലുള്ള ചെറിയ ചില്ലുകുപ്പികളിൽ നിറച്ച് സൂക്ഷിച്ച നിലയിലായിരുന്നു. 139 ചെറിയ ബോട്ടിലുകളിൽ നിറച്ചനിലയിലായിരുന്നു ഹാഷിഷ് ഓയിൽ. ഹാഷിഷ് ഓയിൽ നിറയ്ക്കാൻ പ്രത്യേകം തയാറാക്കിയ ബോട്ടിലുകളായിരുന്നുവെന്ന് സംശയിക്കുന്നു. കേരളത്തിൽ ഇത്തരത്തിലുള്ള ബോട്ടിലുകൾ ലഭ്യമല്ലെന്നാണു പോലീസ് പറയുന്നത്. ഹാഷിഷ് ഓയിലിന് മാർക്കറ്റിൽ ഗ്രാമിന് 3,000 രൂപയാണ് വില. ആവശ്യക്കാർക്ക് വിതരണം ചെയ്യാൻ ഒരുഗ്രാം മുതൽ രണ്ടും മൂന്നും ഗ്രാം വരെ ബോട്ടിലുകളാലാണ് ഹാഷിഷ് ഓയിൽ സൂക്ഷിച്ചിരുന്നത്. ഹാഷിഷ് ഓയിലിന് മാത്രം മാർക്കറ്റിൽ 10.50 ലക്ഷം രൂപ വിലവരുമെന്നാണു പോലീസ് പറയുന്നത്. പ്രതിയുടെ പേരിൽ നാർക്കോട്ടിക് കേസുകൾ ഒന്നും മുന്പ് രജിസ്റ്റർ ചെയ്തിട്ടില്ലെങ്കിലും കർണാടകയിലെ പരപ്പന അഗ്രഹാര ജയിലിൽ തടവുശിക്ഷ ലഭിച്ചിട്ടുണ്ടെന്നാണു പ്രാഥമിക വിവരം. കൂടുതൽ വിവരങ്ങൾക്കായി പ്രതിയെ ഇരിട്ടി സിഐ എ. കുട്ടിക്കൃഷ്ണന്‍റെ നേതൃത്വത്തിലുള്ള പോലീസ് ചോദ്യം ചെയ്തു വരികയാണ്.

14 കിലോഗ്രാം കഞ്ചാവുമായി ബംഗാൾ സ്വദേശികളായ ദന്പതികൾ പിടിയിൽ

ചക്കരക്കൽ: വാടക വീട്ടിൽ വില്പനയ്ക്കായി കൊണ്ടു വന്ന 14 കിലോഗ്രാം കഞ്ചാവുമായി ബംഗാൾ സ്വദേശികളായ ദമ്പതികൾ അറസ്റ്റിൽ. മുണ്ടേരി കടവ് റോഡിൽ മുള ഡിപ്പോയ്ക്ക് സമീപം വാടകവീട്ടിൽ താമസിക്കുന്ന പശ്ചിമ ബംഗാൾ സ്വദേശി ജാക്കിർ സിക്ദാർ(38), ഭാര്യ അലീമബീവി (33) എന്നിവരെയാണ് ചക്കരക്കൽ എസ്എച്ചഒ എം.പി. ആസാദിന്‍റെ നേതൃത്വത്തിലുള്ള പോലീസ് സംഘം അറസ്റ്റു ചെയ്തത്. കുറച്ചു നാളായി ഇരുവരും ഇവിടെ താമസിച്ചു വരികയായിരുന്നു. പായ്ക്കറ്റുകളിലാക്കിയ നിലയിലായിരുന്നു കഞ്ചാവ്. കഞ്ചാവ് കൊണ്ടുവന്നതെന്ന് സംശയിക്കുന്ന നിരവധി പ്ലാസ്റ്റിക് സഞ്ചികളും അലസമായി റൂമിൽ കിടപ്പുണ്ടായിരുന്നു. കഞ്ചാവ് വില്പന ഉണ്ടെന്ന രഹസ്യ സന്ദേശത്തിന്‍റെ അടിസ്ഥാനത്തിലായിരുന്നു പോലീസ് പരിശോധന. എസ്ഐമാരായ സജേഷ് ജോസഫ്, പ്രേമരാജൻ, സിപിഒമാരായ കൃഷ്ണൻ, സിനിജ തുടങ്ങിയവരും പോലീസ് സംഘത്തിൽ ഉണ്ടായിരുന്നു.

കണ്ണൂർ രൂപത ലഹരി വിരുദ്ധ കാന്പയിൻ ഉദ്ഘാടനവും രൂപത റിസോഴ്സ് ടീം രൂപീകരണവും

കണ്ണൂർ: കണ്ണൂർ രൂപത സാമൂഹ്യസേവന വിഭാഗമായ കയ്റോസിന്‍റെ നേതൃത്വത്തിൽ കണ്ണൂർ രൂപത ലഹരി വിരുദ്ധ കാന്പയിൻ ഉദ്ഘാടനവും രൂപത റിസോഴ്സ് ടീം രൂപീകരണവും നടന്നു. കയ്റോസ് ട്രെയിനിംഗ് ഹാളിൽ കണ്ണൂർ രൂപത സഹായ മെത്രാൻ ഡോ. ഡെന്നിസ് കുറുപ്പശേരി ഉദ്ഘാടനം ചെയ്തു. കണ്ണൂർ ബിഷപ് ഡോ. അലക്സ് വടക്കുംതല അധ്യക്ഷത വഹിച്ചു. ലഹരിക്കെതിരെ നമുക്ക് ഏവർക്കും ഒറ്റക്കെട്ടായി പോരാടാമെന്ന് ബിഷപ് ഡോ. അലക്സ് വടക്കുംതല പറഞ്ഞു. കണ്ണൂർ അസിസ്റ്റന്‍റ് എക്സൈസ് കമ്മീഷണറും വിമുക്തി മിഷൻ മാനേജരുമായ പി.കെ. സതീഷ്കുമാർ മുഖ്യാതിഥിയായിരുന്നു. കയ്റോസ് ഡയറക്‌ടർ ഫാ. ജോർജ് മാത്യു, കയ്റോസ് എച്ച്ആർ മാനേജർ പി.ജെ. ഫ്രാൻസിസ്, സണ്ണി പൗലോസ്, സിസ്റ്റർ ക്ലറീന എന്നിവർ പ്രസംഗിച്ചു. കണ്ണൂർ രൂപതയിലെ ആറ് ഫൊറോനകളിൽ നിന്നും രൂപത കോർപറേറ്റ് മാനേജ്മെന്‍റിന്‍റെ കീഴിലുള്ള മാനേജർമാരും പ്രിൻസിപ്പൽമാരും അടക്കം 60 പേർ പരിപാടിയിൽ പങ്കെടുത്തു. കയ്റോസ് സ്റ്റാഫ് അംഗങ്ങൾ നേതൃത്വം നൽകി.

എക്സൈസ് സംഘത്തെ കൈയേറ്റം ചെയ്തതിന് രണ്ടുപേർക്ക് തടവും പിഴയും

മേൽപറമ്പ്: അനധികൃത മദ്യവില്പന തടയാനെത്തിയ എക്സൈസ് സംഘത്തിനു നേരെ നായയെ അഴിച്ചുവിടുകയും എക്സൈസ് ഉദ്യോഗസ്ഥനെ കൈയേറ്റം ചെയ്യുകയും ചെയ്തതിന് രണ്ടുപേർക്ക് രണ്ടുവർഷം വീതം തടവും 25000 രൂപ പിഴയും ശിക്ഷ വിധിച്ചു. കളനാട് കൈനോത്തെ ഉദയൻ, അജിത്ത് എന്നിവർക്കാണ് ഹോസ്ദുർഗ് അഡീഷണൽ സെഷൻസ് കോടതി ശിക്ഷ വിധിച്ചത്. 2022 മേയ് ഒന്നിനായിരുന്നു കേസിനാസ്പദമായ സംഭവം. ഡ്രൈ ഡേയിൽ ഉദയ ഇരുചക്രവാഹനത്തിൽ മദ്യവില്പന നടത്തുന്നുണ്ടെന്ന് വിവരം ലഭിച്ചതിനെ തുടർന്നാണ് എക്സൈസ് സംഘം എത്തിയത്. ഇവർക്കുനേരെ വളർത്തുനായയെ അഴിച്ചുവിടുകയും എക്സൈസ് ഉദ്യോഗസ്ഥൻ ബിനോയിയെ കല്ലുകൊണ്ട് തലയ്ക്കടിക്കുകയും ചെയ്തുവെന്നാണ് കേസ്.

സാമൂഹ്യ പെൻഷൻ സർക്കാർ ആഘോഷ പെൻഷനാക്കി: മേയർ മുസ്‌ലിഹ് മഠത്തിൽ

കണ്ണൂർ: ഭിന്നശേഷിക്കാർക്കടക്കം സാമൂഹ്യ പെൻഷൻ നല്കാനെന്നു പറഞ്ഞു പെട്രോളിനും മറ്റും സെസ് ഏർപ്പെടുത്തി മുടങ്ങാതെ പണം പിരിച്ചെടുക്കുന്ന സർക്കാർ കൃത്യമായി പെൻഷൻ നല്കാതെ വിഷുവിനും പെരുന്നാളിനും ക്രിസ്മസിനും നല്കുന്ന ആഘോഷ പെൻഷനാക്കി അതിനെ ചുരുക്കി യെന്ന് മേയർ മുസ്‌ലിഹ് മഠത്തിൽ ആരോപിച്ചു. ഡിഫറന്‍റ്ലി ഏബിൾഡ് പീപ്പിൾസ് ലീഗ് (ഡിഎപിഎൽ) കണ്ണൂർ സിഎച്ച് സെന്‍റിറിൽ സംഘടിപ്പിച്ച ജില്ലാ കൺവൻഷനും നിരാമയ ഇൻഷ്വറൻസ് രജിസ്ട്രേഷൻ ക്യാന്പും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. രണ്ടു മാസത്തിലധികമായി തുഛമായ വേതന വർധനവിന് വേണ്ടി വെയിലും മഴയും കൊണ്ട് സെക്രട്ടേറിയറ്റ് പടിക്കൽ സമരം ചെയ്യുന്ന ദുർബലരായ സ്ത്രീകളെ തിരിഞ്ഞു നോക്കാത്ത സർക്കാർ ലക്ഷങ്ങൾ പറ്റുന്ന പിഎസ്‌സി മെംബർമാർക്കും ഒരു പണിയും ചെയ്യാത്ത ഡൽഹിയിലെ കേരളാ പ്രതിനിധി കെ.വി. തോമസിനും വേതനം ലക്ഷങ്ങൾ വർധിപ്പിച്ചുകൊടുത്തുകൊണ്ട് ദുർബലരെ നോക്കി കൊഞ്ഞനം കുത്തുകയാണെന്നും മേയർ പറഞ്ഞു. ഡിഎപിഎൽ ജില്ലാ വൈസ് പ്രസിഡന്‍റ് ഉമർ വിളക്കോട് അധ്യക്ഷ വഹിച്ചു. മുസ്‌ലിം ലീഗ് ജില്ലാ പ്രസിഡന്‍റ് അബ്ദുൾ കരീം ചേലേരി മുഖ്യ പ്രഭാഷണവും അംഗത്വ വിതരണവും നടത്തി. യുഡിഐഡി കാർഡിന്‍റെ ആദ്യ അപേക്ഷ ജില്ലാ വൈസ് പ്രസിഡന്‍റ് കെ.പി. താഹിർ സ്വീകരിച്ചു.

കണ്ണൂർ മണ്ഡലം സമ്പൂർണ വായനശാലാ പ്രഖ്യാപനം 17ന്

കണ്ണൂർ: നിയമസഭാ മണ്ഡലത്തെ സമ്പൂർണ വായനശാലാ മണ്ഡലമായി 17ന് ഉച്ചകഴിഞ്ഞ് രണ്ടിന് മന്ത്രി വി.എൻ. വാസവൻ പ്രഖ്യാപിക്കും. എല്ലാ വാർഡിലും വായനശാലകളുള്ള രാജ്യത്തെ ആദ്യ ജില്ലയായി കണ്ണൂരിനെ മാറ്റാൻ പീപ്പിൾസ്‌ മിഷൻ ഫോർ സോഷ്യൽ ഡവലപ്‌മെന്‍റ് സംഘടിപ്പിക്കുന്ന തീവ്രയജ്ഞ പരിപാടി "വിഷുക്കണി'യുടെ ഭാഗമായാണ് പ്രഖ്യാപനം. കണ്ണൂർ ജില്ലാപഞ്ചായത്ത് ഹാളിൽ നടക്കുന്ന പരിപാടിയിൽ മന്ത്രി കടന്നപ്പള്ളി രാമചന്ദ്രൻ അധ്യക്ഷത വഹിക്കും. അന്നേദിവസം രാവിലെ 10 മുതൽ ജില്ലാതല കാവ്യാലാപന മത്സരവും ജില്ലാപഞ്ചായത്ത് ഹാളിൽ നടക്കും. പരിപാടിയുടെ ഭാഗമായി എംഎൽഎ ഫണ്ടിൽ നിന്നും സ്‌കൂൾ ലൈബ്രറികൾക്കും വായനശാലകൾക്കുമുള്ള പുസ്ത‌ക വിതരണം, പീപ്പിൾസ് അവാർഡ് പ്രഖ്യാപനവും വിതരണം, പഞ്ചായത്ത് ഭാരവാഹികൾക്ക് ഉപഹാര സമർപ്പണം, വായനശാലകൾക്കുള്ള പീപ്പിൾസ് മിഷന്‍റെ പുസ്തക വിതരണം, എസ്‌പിസി കേഡറ്റുകൾക്കുള്ള ഉപഹാര വിതരണം എന്നിവയും നടക്കും. കണ്ണൂർ മണ്ഡലത്തിലെ 60 തദ്ദേശ വാർഡുകളിലായി 65 വായനശാലകൾ പ്രവർത്തിക്കുന്നുണ്ട്. ജില്ലയിലെ 81 തദ്ദേശ സ്ഥാപനങ്ങളിൽ 42 തദ്ദേശ സ്ഥാപനങ്ങൾ ഇതിനോടകം തന്നെ സമ്പൂർണ വായനശാലാ പ്രഖ്യാപനം നടത്തിയിട്ടുണ്ട്. എംഎൽഎ ഓഫീസിൽ നടന്ന സംഘാടക സമിതി രൂപീകരണ യോഗത്തിൽ മന്ത്രി കടന്നപ്പള്ളി രാമചന്ദ്രൻ ഡോ. വി. ശിവദാസൻ എംപി, എൻ.ടി. സുധീന്ദ്രൻ, ഇ.പി.ആർ. വേശാല, എം. ഉണ്ണികൃഷ്‌ണൻ, എം. ബാലൻ, കെ. പ്രകാശൻ എന്നിവർ പ്രസംഗിച്ചു. ഡോ. വി. ശിവദാസൻ എംപി മുഖ്യരക്ഷാധികാരിയായും മന്ത്രി കടന്നപ്പള്ളി രാമചന്ദ്രൻ ചെയർമാനായും എൻ.ടി. സുധീന്ദ്രൻ കൺവീനറുമായ കമ്മിറ്റിയെ യോഗത്തിൽ തെരഞ്ഞെടുത്തു.

പണിതിട്ടും തീരാത്ത കരുവഞ്ചാൽ പാലം

ആലക്കോട്: കരുവഞ്ചാൽ പാലം നിർമാണം ഏതാണ്ട് പൂർത്തിയായെങ്കിലും അപ്രോച്ച് റോഡും അനുബന്ധ പ്രവൃത്തികളും ഇഴഞ്ഞുനീങ്ങുകയാണ്. പ്രവർത്തി നീളുന്നത് ഗതാഗത കുരുക്കിന് വഴിവയ്ക്കുകയാണ്. നിർമാണം തുടങ്ങി രണ്ടര വർഷം കഴിഞ്ഞിട്ടും പ്രവൃത്തി നീട്ടിക്കോണ്ടുപോകുന്നതിൽ ജനങ്ങൾക്ക് ശക്തമായ പ്രതിഷേധമുണ്ട്. 2022 ഡിസംബറിൽ മന്ത്രി മുഹമ്മദ് റിയാസാണ് നിർമാണം പ്രവൃത്തി ഉദ്ഘാടനം ചെയ്തത്. തിരു നാൾ, ഉത്സവ തിരക്കുകളുടെ ഭാഗമായി ഡിസംബറിൽ പാലം ഗതാഗതത്തിന് തുറന്നു കൊടുത്തിരുന്നുവെങ്കിലും പ്രവൃത്തി പുനരാരംഭിക്കാനായി രണ്ടുമാസം മുമ്പ് പാലം അടച്ചു. ഇതാണ് വീണ്ടും ഗതാഗതക്കുരുക്കിന് വഴിവച്ചത്. വീതി കുറഞ്ഞ പഴയ പാലത്തിലൂടെയാണ് വാഹനങ്ങൾ ഇപ്പോൾ കടന്നുപോകുന്നത്. പുതിയ പാലത്തിന്‍റെ അവശേഷിക്കുന്ന പ്രവൃത്തി എന്ന് കഴിയുമെന്ന കാര്യത്തിൽ ബന്ധപ്പെട്ട വർക്ക് വ്യക്തതയില്ല. ഗതാഗത കുരുക്ക് പരിഹരിക്കുന്നതിന് അടിയന്തര നടപടികൾ സ്വീകരിക്കണമെന്നാണ് നാട്ടുകാരുടെയും വ്യാപാരികളുടെയും ആവശ്യം.

കഞ്ചാവുമായി ഇതരസംസ്ഥാന തൊഴിലാളി പിടിയിൽ

തളിപ്പറമ്പ്: കഞ്ചാവുമായി ഇതരസംസ്ഥാന തൊഴിലാളി പിടിയിൽ. തളിപ്പറമ്പ് എക്സൈസ് റേഞ്ച് ഓഫീസിലെ അസിസ്റ്റന്‍റ് എക്സൈസ് ഇൻസ്പെക്‌ടർ അഷ്റഫ് മലപ്പട്ടവും സംഘവും നടത്തിയ പരിശോധനയിൽ തളിപ്പറമ്പ് കാനത്ത്ചിറ എന്ന സ്ഥലത്ത് നിന്നും വെസ്റ്റ് ബംഗാളിലെ മുർഷിദാബാദ് ജില്ലയിലെ ഉത്പൽ മൊണ്ടലിനെയാണ് (36) 25 ഗ്രാം കഞ്ചാവ് സഹിതം പിടികൂടിയത്. ഇയാൾക്കെതിരേ എൻഡിപിഎസ് നിയമപ്രകാരം കേസെടുത്തു. പ്രിവന്‍റീവ് ഓഫീസർ ഉല്ലാസ് ജോസ്, സിവിൽ എക്സൈസ് ഓഫീസർ ടി.വി. വിജിത്ത്, വനിതാ സിവിൽ എക്സൈസ് ഓഫീസർ എം.പി. അനു എന്നിവർ പരിശോധനയിൽ പങ്കെടുത്തു.

കെസിവൈഎം വീട് നിർമിച്ചു നല്കി

രയറോം: കെസിവൈഎം രയറോം യൂണിറ്റിന്‍റെ നേതൃത്വത്തിൽ നിർമിച്ചു നല്കുന്ന സ്നേഹവീടിന്‍റെ വെഞ്ചരിപ്പ് കർമം വികാരി. ഫാ. ആന്‍റണി തെക്കേമുറിയിൽ നിർവഹിച്ചു. വീടിന്‍റെ താക്കോൽ മത്തായി ചവനാലിൽ, അജേഷ് പൂവനാട്ട് എന്നിവർ ചേർന്നു കൈമാറി. നിർമാണ കമ്മിറ്റി അംഗങ്ങളായ ജസ്റ്റിൻ കിഴക്കേൽ, ജോൺസൺ വെട്ടിക്കാലായിൽ, ജോസ് തെക്കേമലയിൽ, ബിനു സ്രാമ്പിക്കൽ, ഷിജു മടിപാറ, ടോമി മൈലക്കാട്, ജോർജ് നാഞ്ഞിലത്ത്, സിസ്റ്റർ സൗമ്യ എംഎസ്എംഐ, സിസ്റ്റർ ഷീൻ മരിയ എംഎസ്എംഐ, സിസ്റ്റർ ജീന ജോസ് എംഎസ്എംഐ, സെബാസ്റ്റ്യൻ കൊല്ലംകുന്നേൽ, ഐബിൻ കാരക്കാട്ട് എന്നിവർ നേതൃത്വം നൽകി.

വിവാഹ വാഗ്ദാനം നല്കി പീഡനം, സാന്പത്തിക തട്ടിപ്പ്: യുവാവിനും വീട്ടുകാർക്കുമെതിരേ കേസ്

കണ്ണൂർ: വിവാഹ വാഗ്ദാനം നൽകി യുവതിയെ ലൈംഗികമായി പീഡിപ്പിക്കുകയും ഗർഭിണിയാക്കിയും ലക്ഷങ്ങൾ തട്ടിയെടുക്കുകയും ചെയ്ത സംഭവത്തിൽ യുവാവിനെതിരെയും കൂടാതെ യുവതിയുടെ വാഹനം കൈക്കലാക്കി ലോൺ വച്ച് പണം വാങ്ങിയ സംഭവത്തിൽ രണ്ടുപേർക്കെതിരെയും കണ്ണൂർ ടൗൺ പോലീസ് കേസെടുത്തു. കൊല്ലം സ്വദേശിനിയായ മുപ്പത്തിനാലുകാരിയുടെ പരാതിയിലാണ് എടച്ചൊവ്വയിലെ സവാൻ, അച്ഛൻ വസന്തൻ, സഹോദരൻ സാരംഗ് എന്നിവർക്കെതിരേ കേസെടുത്തത്. ഒന്നാം പ്രതിയായ സവാൻ 2024 ജനുവരിയിൽ ദുബായിൽ വച്ച് യുവതിയെ പരിചയപ്പെടുകയും പിന്നീട് പ്രണയത്തിലാകുകയുമായിരുന്നു. 2024 ഓഗസ്റ്റ് നാലുമുതൽ യുവതിയെ ലൈംഗീകമായി പീഡിപ്പിച്ച് ഗർഭിണിയാക്കിയെന്നാണു പരാതി. കൂടാതെ ബിസിനസ് തുടങ്ങാമെന്ന് വിശ്വസിപ്പിച്ച് യുവതിയുടെ പക്കൽ നിന്ന് 12 ലക്ഷം രൂപ തട്ടിയെടുത്തതായും പരാതിയിൽ പറയുന്നു. ഇതിനിടെ വസന്തൻ, സാരംഗ് എന്നിവരുടെ സഹായത്തോടെ സവാൻ യുവതിയുടെ വാഹനം കള്ള ഒപ്പിട്ട് കൈക്കലാക്കുകയും വാഹനത്തിന്‍റെ ആർസി വച്ച് സ്വകാര്യ പണമിടപാട് സ്ഥാപനത്തിൽ നിന്ന് ലോൺ എടുത്തതായും പറയുന്നു.

ജൈവ വൈവിധ്യ കോൺഗ്രസ്: ജില്ലാതല മത്സരം സംഘടിപ്പിച്ചു

കണ്ണൂർ: ജൈവ വൈവിധ്യ സംരക്ഷണത്തിനായി യുവമനസുകളെ ശാക്തീകരിക്കുക എന്ന പ്രമേയത്തോടെ സംസ്ഥാന ജൈവവൈവിധ്യ ബോർഡ് ജില്ലാതലത്തിൽ വിദ്യാർഥികൾക്കായി മത്സരങ്ങൾ സംഘടിപ്പിച്ചു. കണ്ണൂർ സെന്‍റ് മൈക്കിൾസ് ആംഗ്ലോ ഇന്ത്യൻ ഹയർ സെക്കഡറി സ്കൂളിൽ സംസ്ഥാന ജൈവവൈവിധ്യ ബോർഡ് മെംബറും കേരള കാർഷിക സർവകലാശാല പ്രഫസറുമായ ഡോ. എ.വി. സന്തോഷ്കുമാർ മത്സരങ്ങളുടെ ഉദ്ഘാടനം നിർവഹിച്ചു. ചിത്രരചന, ജലഛായം, വീട്ടുവളപ്പിലെ ജൈവവൈവിധ്യ സംരക്ഷണം-അവതരണം, പ്രോജക്ട് അവതരണം എന്നീ മത്സരങ്ങളിലായി 150 വിദ്യാർഥികൾ പങ്കെടുത്തു. വിജയികൾക്ക് മെറിറ്റ് സർട്ടിഫിക്കറ്റും മെമന്‍റോയും സമ്മാനിച്ചു. മത്സരത്തിൽ പങ്കെടുത്ത എല്ലാവർക്കും പങ്കാളിത്ത സർട്ടിഫിക്കറ്റും വിതരണം ചെയ്തു. കണ്ണൂർ പൊതുവിദ്യാഭ്യാസ വകുപ്പ് ഡപ്യൂട്ടി ഡയറക്ടർ കെ.പി. നിർമല അധ്യക്ഷത വഹിച്ചു. സെന്‍റ് മൈക്കിൾസ് ആംഗ്ലോ ഇന്ത്യൻ ഹയർ സെക്കഡറി സ്കൂൾ മുഖ്യാധ്യാപകൻ ഫാ. തോംസൺ എസ്ജെ, സംസ്ഥാന ജൈവ വൈവിധ്യ ബോർഡ് ജില്ലാ കോ-ഓർഡിനേറ്റർ എ. സുഹദ തുടങ്ങിയവർ പ്രസംഗിച്ചു.

കുട്ടി പോലീസിന് അവധിക്കാലം കുട്ടിക്കളിയല്ല

ഇരിക്കൂർ: ഇരിക്കൂർ ഗവ. ഹയർ സെക്കൻഡറി സ്കൂൾ സ്റ്റുഡൻസ് പോലീസ് കേഡറ്റുകൾ അവധിക്കാല ക്യാമ്പിന്‍റെ ഭാഗമായി പലവിധ നിർമാണ പ്രവൃത്തികൾ ഏറ്റെടുത്തു നടത്തി മാതൃകയാകുന്നു. പേപ്പർ ബാഗുകൾ, മുഴുവൻ ക്ലാസുകളിലേക്കും ആവശ്യമായ പേപ്പർ കുട്ടകൾ, കുടകൾ എന്നിവയുൾപ്പെടെ വ്യത്യസ്ത ഉത്പന്നങ്ങളാണ് അവധിക്കാല ക്യാമ്പിന്‍റെ ഭാഗമായി വിദ്യാർഥികൾ നിർമിച്ചത്. അടുത്ത വർഷത്തെ പ്രവേശനോത്സവത്തിന്‍റെ ഭാഗമായി നവാഗതരായെത്തുന്ന കൂട്ടുകാർക്ക് നൽകാനുള്ള ഉപഹാരങ്ങളും നിർധന വിദ്യാർഥികൾക്ക് സമ്മാനിക്കാനുള്ള കുടകളുമൊക്കെയാണ് ഒരുക്കിയിട്ടുള്ളത്. ലഹരിയുടെയും സൈബർ ചതികളുടെയും ലോകത്തേക്ക് യുവാക്കളും കൗമാരക്കാരായ വിദ്യാർഥികളും വഴിതെറ്റുന്ന വാർത്തകൾ വരുമ്പോഴാണ് പ്രതീക്ഷയുടെയും കരുതലിന്‍റെയും മികച്ച മാതൃക സ്റ്റുഡന്‍റ് പോലീസ് കേഡറ്റുകൾ സൃഷ്ടിക്കുന്നത്. വർക്ക് എക്സ്പീരിയൻസ് സംസ്ഥാന റിസോഴ്സ് പേഴ്സൺ സി.പി. ഷീജ, സ്കൂൾ മുഖ്യാധ്യാപിക വി.സി. ശൈലജ, സ്റ്റാഫ് സെക്രട്ടറി കെ.പി. സുനിൽകുമാർ, കമ്യൂണിറ്റി പോലീസ് ഓഫീസർ വി.വി. സുനേഷ്, ടി. വത്സലൻ, കെ. ശ്രീജിത്ത്, വി. രമ്യ, യു.കെ. പ്രിയേഷ് എന്നിവർ നിർമാണ പ്രവർത്തനങ്ങൾക്ക് നേതൃത്വം നൽകി.

ഭക്ഷ്യവസ്തുക്കൾ വിതരണം ചെയ്തു

ചെന്പേരി: വിശുദ്ധവാരാചരണത്തിന്‍റെ ഭാഗമായി വൈഎംസിഎ യൂണിറ്റുകളുടെ ആഭിമുഖ്യത്തിൽ "അനാഥർക്കും ആലംബരഹിതർക്കും വൈഎംസിഎയുടെ കൈത്താങ്ങ് 'എന്ന ജീവകാരുണ്യ സഹായ പദ്ധതി പ്രകാരം വൈഎംസിഎ കണ്ണൂർ സബ് റീജിയന്‍റെ സഹകരണത്തോടെ മലയോരമേഖലയിലെ പത്ത് അഗതിമന്ദിരങ്ങളിൽ പലവ്യഞ്ജന, ഭക്ഷ്യവസ്തുക്കൾ വിതരണം ചെയ്തു. ചെമ്പേരി വൈഎംസിഎ ഭാരവാഹികൾ ചെമ്പേരിയിലെ വൃദ്ധജന സംരക്ഷണ കേന്ദ്രമായ കരുണാലയം ഡയറക്ടർ ഫാ. ബിജു ചേന്നോത്ത്, മദർ സുപ്പീരിയർ എന്നിവർക്ക് ഭക്ഷ്യവസ്തുക്കൾ കൈമാറി. വൈഎംസിഎ ചെമ്പേരി യൂണിറ്റ് പ്രസിഡന്‍റ് ജോമി ചാലിൽ, ട്രഷറർ സന്ദീപ് കടൂക്കുന്നേൽ, ഡയറക്ടർ ബോർഡ് അംഗങ്ങളായ അജി കൊട്ടാരത്തിൽ, ട്വിങ്കിൾ ജേക്കബ്, മനോജ് കിടങ്ങത്താഴെ, ഷൈജു കുടിയിരിപ്പിൽ എന്നിവർ പങ്കെടുത്തു.

വയനാട് ദുരന്ത നിവാരണം: കേന്ദ്ര നിലപാട് അതിക്രൂരം- ജോസ് ചെമ്പേരി

കണ്ണൂർ: വയനാട്ടിലെ ദുരന്തബാധിതരെ സഹായിക്കുന്നതിൽ കേന്ദ്ര നിലപാട് അതിക്രൂരമെന്ന് കേരള കോൺഗ്രസ്-എം രാഷ്‌ട്രീയകാര്യ സമിതിയംഗം ജോസ് ചെമ്പേരി. ദുരന്തബാധിതരുടെ വായ്പകൾ എഴുതിത്തള്ളാൻ കേന്ദ്ര സർക്കാരിനും, കേന്ദ്ര ദുരന്തനിവാരണ അതോറിറ്റിക്കുമുള്ള വിവേചനാധികാരം ഉപയോഗിക്കണമെന്ന ഹൈക്കോടതി ഡിവിഷൻ ബെഞ്ചിന്‍റെ നിർദേശം നടപ്പാക്കണമെന്നും അദ്ദേഹം ആവശ്യപ്പെട്ടു. ഇന്ധനവില വർധനവിലൂടെ കേന്ദ്ര സർക്കാരിന് ലഭിക്കുന്ന ലക്ഷക്കണക്കായ കോടികളിൽനിന്നും കുറച്ചെങ്കിലും കൊടുക്കാവുന്നതാണ്. കേരളത്തിൽ ഓരോരുത്തരും സ്കൂട്ടറോ, ബൈക്കോ ഉള്ളവരാണ്. മിക്കവാറും വീടുകളിൽ കാറുകളുമുണ്ട്. ഇവരൊക്കെ വാങ്ങുന്ന ഓരോ ലിറ്റർ പെട്രോളിനും 25 രൂപ വീതം നികുതിയിനത്തിൽ കേന്ദ്ര സർക്കാരിന് ലഭിക്കുന്നുണ്ട്. ഇങ്ങനെ ജനങ്ങളെ കൊള്ളചെയ്ത് വസൂലാക്കുന്ന പണം ജനങ്ങൾക്ക് അവകാശപ്പെട്ടതാണ്. ഇത് കോർപ്പറേറ്റുകളുടെ മാത്രം കടം എഴുതിത്തള്ളാനുള്ളതല്ലെന്നും ദുരന്തബാധിതരുടെ കടങ്ങൾക്കും പ്രയോജനപ്പെടണമെന്നും ജോസ് ചെമ്പേരി പത്രക്കുറിപ്പിൽ അറിയിച്ചു.

മയക്കുമരുന്ന്, ഓൺലൈൻ തട്ടിപ്പ്: നടപടി ശക്തമാക്കണമെന്ന്

കണ്ണൂർ: വർധിച്ചു വരുന്ന മയക്കുമരുന്ന് ലഹരി മാഫികൾക്കും ഓൺലൈൻ തട്ടിപ്പുകാർക്കെതിരേയും സംസ്ഥാന സർക്കാർ കൈക്കൊള്ളുന്ന നടപടികൾക്ക് സീനിയർ ജേർണലിസ്റ്റ് യൂണിയൻ ജില്ലാ കമ്മിറ്റി യോഗം പിന്തുണ പ്രഖ്യാപിച്ചു. അനുദിനം ശക്തി പ്രാപിക്കുന്ന മയക്കുമരുന്ന് ലഹരി-ഓൺലൈൻ തട്ടിപ്പ് മാഫികൾക്കെതിരേയുള്ള ബോധവത്കരണം കുടുംബങ്ങളിൽ തന്നെ ഉണ്ടാവണം. നിലവിൽ കേരളത്തിലാണ് ഇത്തരം മാഫിയകൾക്കെതിരേ കടുത്ത നടപടിയുണ്ടാകുന്നതെന്നും അതിന്‍റെ ഫലമാണ് ദൈനം ദിനം നിരവധി പേരെ പിടികൂടാനാകുന്നതെന്നും യോഗം ചൂണ്ടിക്കാട്ടി. പ്രസിഡന്‍റ് ടി.പി. വിജയൻ അധ്യക്ഷത വഹിച്ചു. സംസ്ഥാന സെക്രട്ടറി സി.പി. സുരേന്ദ്രൻ, ഹനീഫ് കുരിക്കളകത്ത്, മുഹമ്മദ് മുണ്ടേരി, കെ.സി. രാജഗോപാൽ, ഇ.എം. രഞ്ചിത്ത് ബാബു, എം. രാജേന്ദ്രൻ മട്ടന്നുർ സുരേന്ദ്രൻ എന്നിവർ പ്രസംഗിച്ചു.

ലോറിയിൽ നിന്ന് സ്ഫോടക വസ്തുക്കൾ പിടികൂടി

കണ്ണൂർ: നിർത്തിയിട്ട ലോറിയിൽ നിന്നും സ്ഫോടക വസ്തുക്കൾ പിടികൂടി. വെള്ളിയാഴ്ച രാത്രി 7.20 ഓടെയാണ് പോലീസ് പരിശോധനയ്ക്കിടെ കണ്ണൂർ എസ്എൻ കോളജിനു സമീപത്തുള്ള റോഡിൽ നിർത്തിയിട്ട തമിഴ്നാട് രജിസ്ട്രേഷനുള്ള ലോറിയിൽ നിന്ന് സ്ഫോടക വസ്തുക്കൾ പിടികൂടിയത്. 15 കാർഡ്ബോർഡ് പെട്ടികളിൽ സൂക്ഷിച്ച പടക്കങ്ങളാണ് പിടികൂടിയത്. പോലീസ് സ്വമേധയാ കേസെടുത്തു.

ആറളം ഫാമിൽ നിന്ന് 14 ആനകളെ കാട്ടിലെത്തിച്ചു

ഇരിട്ടി: ആറളം ഫാമിലെ കൃഷിയിടത്തിൽ തമ്പടിച്ച കാട്ടാനകളെ തുരത്തുന്ന ആനയോടിക്കൽ ദൗത്യത്തിൽ ഇന്നലെ 14 ആനകളെ വനത്തിൽ എത്തിച്ചു. ആർആർടി ഡപ്യൂട്ടി റേഞ്ചർ എം. ഷൈനി കുമാറിന്‍റെ നേതൃത്വത്തിൽ ആന തുരത്തലിൽ സെക്‌ഷൻ ഫോറസ്റ്റ് ഓഫിസർമാരായ സജീവൻ തെന്നിയാടൻ, സി. സുനിൽകുമാർ, സി. ചന്ദ്രൻ, ബീറ്റ് ഫോറസ്റ്റ് ഓഫിസർമായ എം.ഇ. വിപിൻ, വി. സുരേഷ്, ഇ.സി. അനൂപ്, വി.സി. പ്രജീഷ്കുമാർ, പി. വിജയ്, വി. സിബു, ഫോറസ്റ്റ് വാർഡന്മാരായ അനീഷ്, ടി. ബാലകൃഷ്ണൻ, രാമചന്ദ്രൻ, ആറളം ഫാം സെക്യൂരിറ്റി ഓഫിസർ എം.കെ. ബെന്നി എന്നിവരോടൊപ്പം കണ്ണൂർ, ആറളം വൈൽഡ് ലൈഫ് ഡിവിഷനുകളിലെ ജീവനക്കാരും വാച്ചർമാരും ആറളം ഫാം ജീവനക്കാരും ദൗത്യത്തിൽ പങ്കെടുത്തു.

മിനി ബസും കാറും കൂട്ടിയിടിച്ച് അപകടം

പഴയങ്ങാടി: കെഎസ്ടിപി റോഡിൽ ചെറുകുന്ന് പുന്നച്ചേരിയിൽ മിനി ബസും കാറും കൂട്ടിയിടിച്ച് അപകടം. അപകടത്തിൽ കാർ ഓടിച്ചിരുന്ന പുഴാതി സ്വദേശിക് നിസാര പരിക്കേറ്റു. പയ്യന്നൂർ ഭാഗത്ത് നിന്നു വരുകയായിരുന്ന മിനി ബസും എതിരേ നിന്നു വരികയായിരുന്ന കാറും തമ്മിൽ കൂട്ടിയിടിച്ചായിരുന്നു അപകടം. ഇടിയുടെ ആഘാതത്തിൽ കാറിന്‍റെ ദിശ മാറുകയും ഒരു ഭാഗം പൂർണമായും തകരുകയും ചെയ്തു. പുന്നച്ചേരി പെട്രോൾ പമ്പിന് സമീപം ഇന്നലെ വൈകുന്നേരമായിരുന്നു സംഭവം. അപകടത്തെ തുടർന്ന് അല്പസമയം ഇതുവഴിയുള്ള ഗതാഗതം തടസപ്പെട്ടു. ഇതേ സ്ഥലത്തായിരുന്നു മുന്പ് കാറും ലോറിയും കൂട്ടിയിടിച്ച് അഞ്ചുപേരുടെ ജീവൻ പൊലിഞ്ഞത്. വേഗത നിയന്ത്രിക്കാൻ ഇവിടെ സംവിധാനങ്ങൾ ഇല്ലാത്തതാണ് അപകടത്തിന് പ്രധാനകാരണം. കണ്ണപുരം പോലീസ് സ്ഥലത്ത് എത്തിയിരുന്നു.

ഉരുൾപൊട്ടൽ: മോക്ഡ്രിൽ നടത്തി

കണിച്ചാർ: ചുഴലിക്കാറ്റിനോടനുബന്ധമായി ഉരുൾപൊട്ടലുണ്ടാകുന്പോൾ സ്വീകരിക്കേണ്ട സുരക്ഷാ സംവിധാനങ്ങളെ കുറിച്ചുള്ള ബോധവത്കരണത്തിന്‍റെ ഭാഗമായി പൂളക്കുറ്റി സെമിനാരി വില്ല ഭാഗത്ത് മോക്ഡ്രിൽ നടത്തി. ജില്ലാ ദുരന്ത നിവാരണ അഥോറിറ്റിയുടെടെ ജില്ലാ എമര്‍ജന്‍സി ഓപ്പറേഷന്‍ സെന്‍ററിൽ നിന്ന് കണ്ണൂര്‍ താലൂക്ക് എമര്‍ജന്‍സി ഓപ്പറേഷന്‍ സെന്‍ററിലേക്ക് അപകട സാധ്യതാ സന്ദേശം ലഭിച്ചതിനെത്തുടര്‍ന്നുള്ള നടപടികൾ എന്ന രീതിയിലാണ് മോക്ഡ്രിൽ നടത്തിയത്. കണിച്ചാര്‍ പഞ്ചായത്ത് പ്രസിന്‍റ് ആന്‍റണി സെബാസ്റ്റ്യൻ, ഡിവൈഎസ്പി കെ.വി പ്രമോദന്‍, വില്ലേജ് ഓഫീസര്‍ എസ്. പ്രകാശ്, പേരാവൂര്‍ ഫയര്‍ ആന്‍ഡ് റെസ്‌ക്യൂ ഓഫീസര്‍ സി. ശശി, ഇരിട്ടി ഫയര്‍ ആന്‍ഡ് റെസ്‌ക്യു ഓഫീസര്‍ ടി.വി. ഉണ്ണികൃഷ്ണന്‍, പേരാവൂര്‍ സിഐ പി.ബി. സജീവ്, ഇരിട്ടി സിഐ എ. കുട്ടികൃഷ്ണന്‍, കേളകം സിഐ ഇതിഹാസ് താഹ മറ്റ് ഉദ്യോഗസ്ഥര്‍ എന്നിവരുടെ നേതൃത്വത്തില്‍ സുരക്ഷയൊരുക്കുന്നതുമായി ബന്ധപ്പെട്ട കാര്യങ്ങൾ വിശദീകരിച്ചു. മോക്ഡ്രില്ലിന്‍റെ ഭാഗമായി കേളകം സെന്‍റ് മേരീസ് ചര്‍ച്ച് സണ്‍ഡേ സ്‌കൂളില്‍ ദുരിതാശ്വാസ ക്യാന്പും തയാറാക്കിയിരുന്നു. ദുരന്ത മേഖലയിലെ രക്ഷാപ്രവർത്തനം, സുരക്ഷാ ക്രമീകരണം, ആളുകളെ മാറ്റൽ എന്നിവ സംബന്ധിച്ച ഡില്ലും നടന്നു. ദുരന്തസമയത്ത് പ്രവര്‍ത്തിപ്പിക്കുന്ന വിവിധ സാങ്കേതിക സംവിധാനങ്ങളും പരീക്ഷിച്ചു. ഇരിട്ടി തഹസില്‍ദാര്‍ സി.വി. പ്രകാശന്‍റെ നേതൃത്വത്തില്‍ മോക്ഡ്രില്‍ അവലോകനം നടത്തി. മെഡിക്കല്‍ ഓഫീസര്‍ ഡോ. അതുല്‍, ഡപ്യൂട്ടി തഹസില്‍ദാര്‍മാരായ കെ.ടി. രാജീവന്‍, എം.സി. സീനത്ത്, ഭൂരേഖ തഹസില്‍ദാര്‍ രഘുനാഥ്, പഞ്ചായത്ത് റെസിലന്‍സ് ഓഫീസര്‍ കെ. നിധിന്‍, മറ്റ് ഉദ്യോഗസ്ഥര്‍ തുടങ്ങിയവരും പങ്കെടുത്തു.

കൂത്തുപറമ്പ് സഹകരണ റൂറൽ ബാങ്കിന്‍റെ നവീകരിച്ച ഓഡിറ്റോറിയം ഉദ്ഘാടനം നാളെ

കൂത്തുപറമ്പ്: കൂത്തുപറമ്പ് സഹകരണ റൂറൽ ബാങ്കിന്‍റെ നവീകരിച്ച ഓഡിറ്റോറിയം കോംപ്ലക്സ് നാളെ മുഖ്യമന്ത്രി പിണറായി വിജയൻ ഉദ്ഘാടനം ചെയ്യുമെന്ന് ബന്ധപ്പെട്ടവർ പത്രസമ്മേളനത്തിൽ അറിയിച്ചു. 24 വർഷം മുമ്പ് നിർമിച്ച ഓഡിറ്റോറിയവും ഡൈനിംഗ് ഹാളും നവീകരിച്ച് എയർകണ്ടീഷൻ സൗകര്യത്തോടെ മെയിൻ ഓഡിറ്റോറിയവും മറ്റൊരു ബാങ്ക്വറ്റ് ഹാളും ഡൈനിംഗ് ഹാളിന്‍റെയും നിർമാണവുമാണു പൂർത്തീകരിച്ചിരിക്കുന്നത്. ഹെഡ്‌ ഓഫീസിനു പുറമേ 14 ബ്രാഞ്ചുകളും ഓഡിറ്റോറിയം കോംപ്ലക്സും കൊമേഴ്‌സ്യൽ കോംപ്ലക്‌സും കോപ്പ്-ഹോം ലോഡ്ജുമാണു നിലവിൽ പ്രവർത്തിച്ചുവരുന്നത്. ഇതിനുപുറമേ ആധുനിക സൗകര്യത്തോടെയുള്ള പാചകശാലയും വിഐപി ലോഞ്ചും പുതിയ ലിഫ്റ്റും സീവേജ് ട്രീറ്റ്‌മെന്‍റ് പ്ലാന്‍റും ഓപ്പൺ ഓഡിറ്റോറിയവും വിശാലമായ പാർക്കിംഗ് യാഡും സോളാർ പാനൽ ഉൾപ്പെടെ കോപ്ലക്സിൽ ഒരുക്കിയിട്ടുണ്ട്. ഉദ്ഘാടന ചടങ്ങിൽ ബാങ്ക് പ്രസിഡന്‍റ് കെ. ധനഞ്ജയൻ അധ്യക്ഷത വഹിക്കും. സെക്രട്ടറി എം. ദിലീപ് കുമാർ റിപ്പോർട്ട് അവതരിപ്പിക്കും. ബാങ്ക്വറ്റ് ഹാളിന്‍റെ ഉദ്ഘാടനം കെ.കെ. ശൈലജ എംഎൽഎയും ഡൈനിംഗ് ഹാളിന്‍റെ ഉദ്ഘാടനം ഡോ. വി. ശിവദാസൻ എംപിയും ആധുനിക കിച്ചണിന്‍റെ ഉദ്ഘാടനം കെ.പി. മോഹനൻ എംഎൽഎയും വിഐപി ലോഞ്ചിന്‍റെ ഉദ്ഘാടനം ഖാദി ബോർഡ് വൈസ് ചെയർമാൻ പി. ജയരാജനും സോളാർ പാനൽ ഉദ്ഘാടനം റെയ്ഡ്കോ മുൻ ചെയർമാൻ വത്സൻ പനോളിയും ലിഫ്റ്റിന്‍റെ ഉദ്ഘാടനം യുവജനക്ഷേമ ബോർഡംഗം വി.കെ. സനോജും സീവേജ് ട്രീറ്റ്മെന്‍റ് പ്ലാന്‍റിന്‍റെ ഉദ്ഘാടനം നഗരസഭാ ചെയർപേഴ്സൺ വി. സുജാതയും നിർവഹിക്കും. റെയ്ഡ്കോ ചെയർമാൻ എം. സുരേന്ദ്രൻ ഉപഹാര സമർപ്പണം നിർവഹിക്കും. ഉദ്ഘാടന ചടങ്ങിനുശേഷം വിവിധ കലാപരിപാടികളും അരങ്ങേറുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ബാങ്ക് പ്രസിഡന്‍റ് കെ. ധനഞ്ജയൻ. സെക്രട്ടറി എം. ദിലീപ് കുമാർ, അസിസ്റ്റന്‍റ് സെക്രട്ടറി ടി. പവിത്രൻ, ഡയറക്‌ടർ കെ.എൻ. ഗോപി, ചീഫ് അക്കൗണ്ടന്‍റ് പി. രമേശൻ എന്നിവർ പത്രസമ്മേളനത്തിൽ പങ്കെടുത്തു.

വിഷു-ഈസ്റ്റർ: വിപണികൾ സജീവം; തിരക്കിലമർന്ന് നഗരം

കണ്ണൂർ: വിഷവും ഈസ്റ്ററും ഒന്നിച്ചെത്തിയതോടെ തിരക്കിലമർന്ന് നഗരം. വഴിയോര വിപണിയിലും തുണിക്കടകളിലും പച്ചക്കറി-ഇറച്ചി മാർക്കറ്റുകളിലുമെല്ലാം വൻ തിരക്കാണ്. സ്റ്റേഡിയം കോർണറും പഴയ ബസ്‌സ്റ്റാൻഡ് പരിസരവുമെല്ലാം വഴിയോര കച്ചവടക്കാർ കൈയടക്കിക്കഴിഞ്ഞു. വിഷുവിന് ഇനി ഒരുദിവസം മാത്രമാണ്. വസ്ത്രങ്ങൾ വാങ്ങാനും കണിവയ്ക്കാനാവശ്യമായ സാധനങ്ങൾ വാങ്ങാനുമൊക്കെയായി കുടുംബത്തോടെയാണ് ആളുകൾ നഗരത്തിലെത്തുന്നത്. ടൗൺ സ്ക്വയറിൽ നടക്കുന്ന കൈത്തറി മേളയിലും ഖാദി മേളയിലും വ്യവസായ വകുപ്പിന്‍റെ മേളയിലുമെല്ലാം വലിയ തിരക്കാണ്. സ്റ്റേഡിയം കോർണറിൽ മൺപാത്രങ്ങൾ വാങ്ങാനും നൂറുകണക്കിനാളുകളാണ് എത്തുന്നത്. സ്കൂൾ അവധിയായതിനാൽ കുടുംബസമേതമാണ് ഭൂരിഭാഗം പേരുടേയും ഷോപ്പിംഗ്. തുണിക്കടകളിൽ വലിയ തിരക്കുള്ളത്. ഡിസ്കൗണ്ടുകളും പ്രത്യേക ഓഫറുകളും നൽകി തുണിക്കടകൾ ആളുകളെ ആകർഷിക്കുകയാണ്. നഗരത്തിലെ മൊബൈൽ ഷോപ്പുകൾ, ജ്വല്ലറികൾ, ഗൃഹോപകരണ-ഇലക്‌ട്രോണിക്‌സ് ഷോപ്പുകൾ എന്നിവിടങ്ങളിലെല്ലാം വലിയ തിരക്കാണ്. പുതിയ ഓഫറുകളും പാക്കേജുമെല്ലാം ഇവിടങ്ങളിലുമുണ്ട്. പുത്തൻ സ്റ്റോക്കുകൾ എത്തിച്ചും ആകർഷകമായ സമ്മാന പദ്ധതികളൊരുക്കിയുമെല്ലാമാണ് കമ്പനികൾ വിഷു-ഈസ്റ്റർ വിപണിയിലേക്ക് ആളുകളെയെത്തിക്കുന്നത്. ‌ട്രെൻഡുകൾക്കൊപ്പം ഖാദി ട്രെന്‍ഡുകള്‍ക്കൊപ്പം സഞ്ചരിച്ച് പുത്തന്‍ ഡിസൈനുകളോടെയാണ് ഖാദിയില്‍ വിഷുക്കോടികള്‍ തയാറാക്കിയിരിക്കുന്നത്. ഏതു പ്രായത്തിലുള്ളവര്‍ക്കും ഇഷ്ടപ്പെടുന്ന കലംകാരി സാരികളാണ് ഇത്തവണ ഖാദിയില്‍ ട്രെന്‍ഡ്. 1235 രൂപ വിലയുള്ള സാരി റിബേറ്റ് കിഴിച്ച് 865 രൂപയ്ക്കാണ് വില്ക്കുന്നത്. പരിപാടികളില്‍ മൂന്നുപേര്‍ക്ക് ഒരുപോലെ ധരിക്കാനുള്ള ടോപ്പും ഈ സാരിയില്‍നിന്ന് തയ്ച്ചെടുക്കാം. പ്രകൃതിദത്ത നിറങ്ങള്‍ ഉപയോഗിച്ചാണ് ഡിസൈന്‍. ഖാദി കോട്ടണ്‍ സാരികള്‍ക്ക് 1560 മുതല്‍ 2210 വരെയാണ് വില. 4260 രൂപ മുതല്‍ വിലയുള്ള പയ്യന്നൂര്‍ പട്ടു സാരികളുമുണ്ട്. പരമ്പരാഗത ഡിസൈനിലുള്ള കാന്താവര്‍ക്ക് സാരികള്‍ക്ക് 8060 രൂപയും വിഷുവിന് ഉടുക്കാനുള്ള ഖാദി സെറ്റ് മുണ്ടിന് 742 രൂപയുമാണ് വില. 11,700 രൂപ വിലയുള്ള മാങ്കോബുട്ട പട്ടുസാരികളും മേളയിലുണ്ട്. കേരള ഖാദി ഗ്രാമവ്യവസായ ബോര്‍ഡും പയ്യന്നൂര്‍ ഖാദികേന്ദ്രവും കണ്ണൂര്‍ ടൗണ്‍ സ്‌ക്വയറിലെ ഖാദി ഗ്രാമസൗഭാഗ്യയില്‍ ഒരുക്കിയ മേളയില്‍ മുപ്പത് ശതമാനം റിബേറ്റിലാണ് വില്പന. കൈത്തറി മേളയിൽ വൻ തിരക്ക് സംസ്ഥാന കൈത്തറി ഡയറക്‌ടറേറ്റ്, ജില്ലാ വ്യവസായ കേന്ദ്രം, ഹാന്‍ഡ്‌ലൂം ഡവലപ്മെന്‍റ് കമ്മിറ്റി എന്നിവ ചേര്‍ന്ന് ഒരുക്കിയ വിഷു കൈത്തറി പ്രദര്‍ശനവിപണന മേളയില്‍ തിരക്കേറുന്നു. 20 ശതമാനം റിബേറ്റിലാണ് കൈത്തറി ഉത്പന്നങ്ങള്‍ വില്ക്കുന്നത്. ഓരോ സഹകരണ സംഘങ്ങളും വ്യത്യസ്ത തുണിത്തരങ്ങളുമായാണ് ഇത്തവണ മേളയിലെത്തിയത്. പാപ്പിനിശേരി, തളിപ്പറമ്പ്, മോറാഴ, കണ്ണപുരം, പയ്യന്നൂര്‍, മയ്യില്‍, ചിറക്കല്‍, അഴീക്കല്‍, കൂത്തുപറമ്പ് വീവേഴ്സുകളുടെ സ്റ്റാളുകളില്‍ വ്യത്യസ്ത തുണിത്തരങ്ങളുണ്ട്. മുണ്ട്, സാരി, കസവുസാരി, ബെഡ് ഷീറ്റ്, പില്ലോ കവര്‍, ലുങ്കി, കൈത്തറി ഷര്‍ട്ടുകള്‍ തുടങ്ങി നിരവധി തുണിത്തരങ്ങളാണ് മേളയിലുള്ളത്. കണിവയ്ക്കാനായി മൺപാത്രങ്ങളും മൺപാത്ര വിപണിയും സജീവമായി. കഴിഞ്ഞ ഒരാഴ്ചയായി സ്റ്റേഡിയം കേർണറിൽ മൺപാത്രവിൽപനക്കാർ കച്ചവടം തുടങ്ങിയിട്ട്. കണിവയ്ക്കാനും മറ്റുമായി നിരവധി പേരാണ് മൺപാത്രങ്ങൾ വാങ്ങുന്നത്. 50 മുതൽ അഞ്ഞൂറുവരെയാണ് മൺപാത്രങ്ങളുടെ വില. കറുത്ത ചട്ടികൾക്ക് 70 മുതൽ 250 രൂപവരെയാണ് വില. കറുത്ത ചട്ടികൾക്കാണ് താരതമ്യേന വില കൂടുതൽ. നൂറോളം ചട്ടികളാണ് ഇത്തവണ വിപണിയിൽ എത്തിയത്. അതിൽ കൽക്കത്തയിൽ നിന്ന് ഇറക്കുമതി ചെയ്ത ചായകപ്പുകൾക്കാണ് ആവശ്യക്കാർ ഏറെ. മൺപാത്രങ്ങൾ എല്ലാം മറ്റ് സംസ്ഥാനങ്ങളിൽ നിന്ന് ഇറക്കുമതി ചെയ്യുന്നതാണെന്നും മൺപാത്ര കച്ചവടക്കാർ പറയുന്നു. പടക്ക വിപണിയും സജീവം‌ വിഷുവിനെ വരവേല്‍ക്കാന്‍ പടക്ക വിപണി സജീവമായി. അഞ്ചുമുതല്‍ 5000 രൂപവരെയുള്ള പടക്കങ്ങളാണ് വിപണിയിലുള്ളത്. പതിവു പടക്കള്‍ക്കു പുറമേ ഓള്‍ഡ് ഈസ് ബെസ്റ്റ്, ജില്‍ ജില്‍, ഗോളി നെറ്റ്, മേരി ഗോ റൗണ്ട്, വയര്‍ ചക്രം, പികോക്, ഡ്രംസ്റ്റിക് തുടങ്ങിയ പുതിയ ഇനങ്ങളിലും കടകളില്‍ കൊണ്ടുവന്നിട്ടുണ്ട്. മുന്‍വര്‍ഷങ്ങളിലുള്ള 999 രൂപക്ക് 19 ഐറ്റംസുകള്‍ അടങ്ങിയ ഫാമിലി കിറ്റുകള്‍ പലയിടത്തും ഒരുക്കിയിട്ടുണ്ട്. അഞ്ചു നിറങ്ങളില്‍ കത്തുന്ന കമ്പിത്തിരികള്‍, 50 സെന്‍റീ മീറ്റര്‍ നീളമുള്ളതും 150 രൂപ വില വരുന്നതുമായ വലിയ കമ്പിത്തിരി, ഡിസൈനില്‍ കത്തുന്ന പൂക്കള്‍, പല നിറത്തില്‍ മിന്നിമിന്നി വിരിയുന്ന മേശപ്പൂക്കള്‍ തുടങ്ങിയവയെല്ലാം വിപണിയിലുണ്ട്. ഓണ്‍ലൈനിലെ പടക്ക വില്പന വലിയ തിരിച്ചടിയാകുന്നുണ്ടെന്ന് ജില്ലയിലെ പടക്ക വ്യാപാരികള്‍ പറയുന്നുണ്ട്. മധുരയില്‍ നിന്നും ശിവകാശിയില്‍ നിന്നുമുള്ള ഗുണനിലവാരം കുറഞ്ഞ കുടില്‍ വ്യവസായ നിര്‍മിതിയായ പടക്കങ്ങളാണ് ഓണ്‍ലൈന്‍ വഴി ജില്ലയില്‍ എത്തുന്നത്. ഗുണനിലവാരമില്ലാത്തതിനാല്‍ അപകട സാധ്യതകളും ഇവയ്ക്ക് കൂടുതലാണ്.

പയ്യാവൂർ-കാഞ്ഞിരക്കൊല്ലി റോഡിനോട് അവഗണന: നാട്ടുകാർ പ്രക്ഷോഭത്തിലേക്ക്

കാഞ്ഞിരക്കൊല്ലി: ജില്ലയിലെ പ്രധാന ഹിൽ ടൂറിസം കേന്ദ്രമായ കാഞ്ഞിരക്കൊല്ലിയിലേക്കുള്ള പ്രധാന റോഡായ പയ്യൂവൂർ-കാഞ്ഞിരക്കൊല്ലി നവീകരിക്കണമെന്ന് ആവശ്യത്തിന് പത്തു വർഷത്തിലേറെ പഴക്കമുണ്ടെങ്കിലും ഇതുവരെ നടപടിയില്ല. റോഡ് വീതികൂട്ടി വളവും കയറ്റവും കുറച്ച് മെക്കാഡം ടാറിംഗ് നടത്തിയാൽ ടൂറിസം മേഖലയക്കും മുതൽക്കൂട്ടാകുമെങ്കിലും ബന്ധപ്പെട്ടവരുടെ ഭാഗത്ത് നിന്ന് ഇതിനുള്ള ശ്രമങ്ങൾ ഉണ്ടാകുന്നില്ലെന്നാണ് പ്രദേശവാസികൾ പറയുന്നത്. അധികൃതരുടെ അവഗണനയ്ക്കെതിരെ ശക്തമായ പ്രക്ഷോഭം സംഘടിപ്പിക്കാനുള്ള ഒരുക്കത്തിലാണ് പ്രദേശവാസികൾ. വിനോദസഞ്ചാരകേന്ദ്രമായ കാഞ്ഞിരക്കൊല്ലിയിലേക്കും തീർഥാടനകേന്ദ്രമായ കുന്നത്തൂർപാടിയിലേക്കും പോകുന്ന പയ്യാവൂരിൽ നിന്നുള്ള പ്രധാന റോഡാണിത്. വർഷങ്ങളായി ഒരു നവീകരണവും നടത്താത്ത റോഡിൽ വാഹനാപകടങ്ങൾ പതിവാണ്. ജില്ലയിലെ പ്രധാന ഹിൽ ടൂറിസം കേന്ദ്രമായ കാഞ്ഞിരക്കൊല്ലിയിലെ ആമിനത്തോട് വരെയാണ് 20 വർഷം മുന്പ് റോഡ് വികസിപ്പിച്ചത്. പയ്യാവൂർ മുതൽ കുന്നത്തൂർ വരെയുള്ള ഭാഗത്ത് പലപ്പോഴായി കുഴിയടക്കൽ ചടങ്ങ് നടക്കാറുണ്ടെങ്കിലും പാടാംകവല മുതൽ കാഞ്ഞിരക്കൊല്ലി വരെ ഒരുപണിയും നടന്നിട്ടില്ല. വാഹനങ്ങൾക്ക് സൈഡ് കൊടുക്കാൻപോലും മിക്കയിടത്തും സൗകര്യമില്ല. റോഡരികിൽ നടപ്പാതയും ഇല്ല. കെഎസ്ആർടിസി ഉൾപ്പെടെ അഞ്ചു ബസുകൾ ഇതുവഴി സർവീസ് നടത്തുന്നുണ്ടെങ്കിലും വീതികൂട്ടി നവീകരിക്കണമെന്ന ആവശ്യം നടപ്പായില്ല. കെ.സി. ജോസഫ് മന്ത്രിയായ കാലത്ത് 10 മീറ്റർ വീതിയിൽ റോഡ് വികസിപ്പിക്കാനായി എസ്റ്റിമേറ്റ് നൽകിയെങ്കിലും തുടർനടപടിയുണ്ടായില്ല. ജനകീയ കമ്മിറ്റി റോഡരികിൽ സ്ഥലമുള്ളവരിൽനിന്ന് സമ്മതപത്രമടക്കം വാങ്ങി നൽകിയിരുന്നു. അടുത്തകാലത്ത് പയ്യാവൂർ പഞ്ചായത്തിനെ ജോൺ ബ്രിട്ടാസ് എംപിയുടെ നേതൃത്വത്തിൽ സാഗി പദ്ധതിയിൽ ഉൾപ്പെടുത്തിയിരുന്നു. ഇതിന്‍റെ ഭാഗമായി റോഡ് വികസിപ്പിക്കാൻ പഞ്ചായത്ത് പ്രസിഡന്‍റ് സാജു സേവ്യറിന്‍റെ നേതൃത്വത്തിൽ ശ്രമം നടത്തിയെങ്കിലും പുരോഗതി ഉണ്ടായില്ല. കുന്നത്തൂർപാടി ഉത്സവ സീസണിൽ ഇടുങ്ങിയ റോഡിൽ ഗതാഗതതടസം നിത്യസംഭവമാണ്. കുന്നത്തൂരിൽ എത്തുന്ന വാഹനങ്ങൾ ഈ റോഡിന് ഇരുവശവും പാർക്ക് ചെയ്താൽ മറ്റ് വാഹനങ്ങൾക്ക് പോകാൻ പറ്റാത്ത അവസ്ഥയാണ്.

ആലക്കോട്-അരങ്ങം ബൈപ്പാസ് തകർന്നു: യാത്രാക്കാർ ദുരിതത്തിൽ

ആലക്കോട്: ആലക്കോട് മേഖലയിലെ പ്രധാന റോഡുകളിലൊന്നായ ആലക്കോട്-അരങ്ങം ബൈപ്പാസ് റോഡ് ടാറിംഗ് തകർന്നതോടെ യാത്രക്കാർ ദുരിതത്തിലായി. റോഡിന്‍റെ പല ഭാഗങ്ങളും തകർന്ന് ഗതാഗതയോഗ്യമല്ലാത്ത സ്ഥിതിയാണ്. നൂറുകണക്കിന് യാത്രക്കാരാണ് ദിനംപ്രതി ഈ റോഡിലൂടെ യാത്രചെയ്യുന്നത്. നേരത്തെ പ്രധാനമന്ത്രി യോജന പദ്ധതിയിൽ ഉൾപ്പെടുത്തി മെക്കാഡം ടാറിംഗ് നടത്തിയ റോഡാണിത്. നിർമാണ കാലഘട്ടത്തിൽ തന്നെ റോഡ് പണിയിൽ അഴിമതി നടക്കുന്നതായി ആരോപിച്ച് നാട്ടുകാരും വിവിധ സംഘടനങ്ങളും രംഗത്ത് വന്നിരുന്നു. വിവിധ ആഘോഷ പരിപാടികളുടെ ഭാഗമായി ആലക്കോട് ടൗണിൽ ബ്ലോക്ക് വരുന്ന സമയങ്ങളിൽ ബസ് അടക്കമുള്ള വാഹനങ്ങൾ വഴിതിരിച്ചുവിടുന്നതും ഈ റോഡിലൂടെയാണ്. രണ്ടുതവണ ലക്ഷങ്ങൾ ചിലവിട്ട് അറ്റകുറ്റപ്പണികൾ നടത്തിയെങ്കിലും റോഡിന്‍റെ ശോചനീയാവസ്ഥക്ക് മാറ്റമുണ്ടായിട്ടില്ല. റോഡ് റീ ടാറിംഗ് നടത്തി ഗതാഗത യോഗ്യമാക്കണമെന്നാണ് നാട്ടുകാരുടെ ആവശ്യം.

കേരളത്തെ തകർക്കാനുള്ള കേന്ദ്ര‌ത്തിന്‍റെ‌ ശ്രമങ്ങളെ ചെറുക്കണം: എൻജിഒ യൂണിയൻ ജില്ലാ സമ്മേളനം‌

കണ്ണൂർ: കേരളത്തിന്‍റെ ക്ഷേമത്തെയും വികസനങ്ങളെയും തകർക്കാൻ കേന്ദ്ര സർക്കാർ ആസൂത്രിത നീക്കങ്ങൾ നടത്തുകയാണെന്നും ഇതിനെതിരെ ശക്തമായി പോരാടണമെന്നും കേരള എൻജിഒ യൂണിയൻ കണ്ണൂർ ജില്ലാ സമ്മേളനം. കണ്ണൂർ കൃഷ്ണമേനോൻ വനിതാ കോളജിൽ രണ്ടു ദിവസങ്ങളിലായി നടക്കുന്ന സമ്മേളനം കെ.വി. സുമേഷ് എംഎൽഎ ഉദ്ഘാടനം ചെയ്തു. ജില്ലാ പ്രസിഡന്‍റ് പി.പി. സന്തോഷ് കുമാർ അധ്യക്ഷത വഹിച്ചു. സാമ്രാജ്യത്വ വിരുദ്ധ പോരാട്ടങ്ങളിൽ അണിചേരുക, അഴിമതിരഹിതവും കാര്യക്ഷമവുമായ സിവിൽ സർവീസിനായി അണിചേരുക, ശമ്പള പരിഷ്കരണ നടപടികൾ ആരംഭിക്കുക, ക്ഷാമബത്ത കുടിശിക അനുവദിക്കുക തുടങ്ങിയ പ്രമേയങ്ങൾ സമ്മേളനം പാസാക്കി. കെ.സി. സുനിൽ, അനു കവിണിശേരി, വി.പി. കിരൺ, പി.പി. അജിത്ത്കുമാർ എന്നിവർ പ്രസംഗിച്ചു. ഇന്ന് സംഘടന റിപ്പോർട്ടിന്മേൽ ചർച്ച നടക്കും 11ന് നടക്കുന്ന സുഹൃദ് സമ്മേളനം സിഐടിയു കണ്ണൂർ ജില്ലാ ജനറൽ സെക്രട്ടറി കെ. മനോഹരൻ ഉദ്ഘാടനം ചെയ്യും. സമ്മേളനം ഇന്നു വൈകുന്നേരം സമാപിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]