പെര്‍മിറ്റ് ഫീസ് വര്‍ധനയ്ക്കു മുന്‍പ് രണ്ട് സ്ലാബുകളാണ് ഉണ്ടായിരുന്നത്. 150 ചതുരശ്ര മീറ്റര്‍ വരെയുള്ള വീടുകളും, 150 ചതുരശ്ര മീറ്ററിന് മുകളിലുള്ള വീടുകളും എന്നതായിരുന്നു അത്.
2023ല് പെര്‍മിറ്റ് ഫീസ് വര്‍ധിപ്പിച്ചപ്പോള്‍ സര്‍ക്കാര്‍ തറവിസ്തീര്‍ണത്തിന്‍റെ അടിസ്ഥാനത്തില്‍ വീടുകളെ നാല് സ്ലാബുകളായി തരം തിരിച്ചു. 80 ചതുരശ്ര മീറ്റര്‍ വരെ, 81-150 ചതുരശ്ര മീറ്റര്‍ വരെ, 151-300 ചതുരശ്ര മീറ്റര്‍, 300 ചതുരശ്ര മീറ്ററിനു മുകളില്‍ എന്നിങ്ങനെ നാല് സ്ലാബുകളാണ് ഏര്‍പ്പെടുത്തിയത്.
നേരത്തേ ചെറുകിട നിര്‍മാണങ്ങളുടെ പരിധിയിലായിരുന്ന 50 ശതമാനം വരെ പെര്‍മിറ്റ് ഫീസില്‍ ഇളവുണ്ടായിരുന്ന 150 ചതുരശ്ര മീറ്റര്‍ വരെയുള്ള വീടുകളെ രണ്ട് സ്ലാബുകളിലാക്കി. അതില്‍ 80 ചതുരശ്ര മീറ്ററിനു (860.8 ചതുരശ്ര അടി) താഴെയുള്ള വീടുകളെ ചെറുകിട നിര്‍മാണങ്ങളുടെ പരിധിയില്‍ പെടുത്തി.
80 ചതുരശ്ര മീറ്ററിനു മുകളിലുള്ള വീടുകളെ ചെറുകിട നിര്‍മാണങ്ങളുടെ പരിധിയില്‍നിന്നു പുറത്താക്കുകയും ചെയ്തു. ഇതോടെ സാധാരണക്കാര്‍ നിര്‍മിക്കുന്ന വീടുകള്‍ ഉള്‍പ്പെടെ ചെലവേറിയ നിര്‍മാണത്തിന്‍റെ പരിധിയിലേക്കു മാറ്റി വന്‍ തുക പെര്‍മിറ്റ് ഫീസായി ഏര്‍പ്പെടുത്തി.
ഫലത്തില്‍ ഫീസ് വര്‍ധനയ്ക്ക് മുന്‍പ് 3.5 രൂപ മുതല്‍ 10 രൂപ വരെയായിരുന്ന പെര്‍മിറ്റ് ഫീസ്, ഏഴ് രൂപ മുതല്‍ 300 രൂപ വരെയാക്കി ഉയര്‍ത്തുകയാണ് സര്‍ക്കാര്‍ ആദ്യം ചെയ്തത്. അതിനു ശേഷം കഴിഞ്ഞ ദിവസം ഇത് ഏഴ് രൂപ മുതല്‍ 150 രൂപ വരെയാക്കി (ചതുരശ്ര മീറ്ററിന്) മാറ്റുകയും ചെയ്തു.