കോടതി ആവശ്യങ്ങൾക്കല്ലാത്ത നോണ് ജുഡീഷൽ മുദ്രപ്പത്രങ്ങളാണ് ഇപ്പോൾ ലഭ്യമല്ലാതായിരിക്കുന്നത്. സർക്കാർ പ്രഖ്യാപിച്ച ഇ-സ്റ്റാന്പിംഗ് ഇതുവരെ പ്രാവർത്തികമായിട്ടുമില്ല. നിലവിൽ ഒരു ലക്ഷം രൂപയ്ക്കു മുകളിലുളള പത്രങ്ങൾ മാത്രമേ ഇ-സ്റ്റാന്പിംഗിലൂടെ ലഭ്യമാകുകയുളളൂ. കോടതി ഫീസ് ഏറിയ പങ്കും ഇ-പേയ്മെന്റ് ആയതോടെ നിലവിൽ കോടിക്കണക്കിന് രൂപയുടെ ജുഡീഷൽ മുദ്രപ്പത്രങ്ങൾ സെൻട്രൽ സ്റ്റാന്പ് ഡിപ്പോയിൽ കെട്ടിക്കിടക്കുകയാണ്.
നാസിക്കിൽനിന്നാണ് സംസ്ഥാനത്തിന് ആവശ്യമായ മുദ്രപ്പത്രങ്ങൾ ഓർഡർ അനുസരിച്ച് പ്രിന്റ് ചെയ്തിരുന്നത്. ഇ- സ്റ്റാന്പിംഗ് പ്രഖ്യാപനത്തോടെ പുതിയ മുദ്രപ്പത്രത്തിന് നൽകേണ്ട ഓർഡറും നൽകിയില്ല.
ഇ-സ്റ്റാന്പിംഗ് പ്രഖ്യാപനം വന്നിട്ട് മൂന്ന് വർഷം കഴിഞ്ഞെങ്കിലും യാതൊരു നടപടിയും ഉണ്ടാകുന്നില്ല. ഇ-സ്റ്റാന്പിംഗ് നടപ്പാക്കുന്നതിനൊപ്പം പ്രിന്റ് ചെയ്ത മുദ്രപ്പത്രങ്ങൾകൂടി വിതരണം ചെയ്തശേഷം കാലക്രമേണ പൂർണമായും ഇ- സ്റ്റാന്പിംഗിലേക്ക് മാറിയിരുന്നെങ്കിൽ നിലവിലെ ദുഃസ്ഥിതി ഉണ്ടാകുമായിരുന്നില്ല.