രാഷ്ട്രീയത്തിൽ കൂടുതൽ സജീവമാകാൻവേണ്ടി 1940ൽ ജോലി രാജിവച്ചു. തുടർന്ന് വടകരയിൽ കോൺഗ്രസ് കമ്മിറ്റി പ്രസിഡന്റായി. അയിത്തോച്ചാടനം, മിശ്രഭോജനം, ഭൂദാനം, ഹരിജനോദ്ധാരണം, ഖാദിപ്രചാരണം, മദ്യനിരോധനം തുടങ്ങിയ വിവിധ സാമൂഹ്യപ്രവർത്തനമേഖലകളിലും കുമാരൻ മാസ്റ്റർ സജീവ സാന്നിധ്യമായിരുന്നു.
1939ലാണ് യൂത്ത്ലീഗ് മയ്യഴി മഹാജനസഭ എന്ന പേരിൽ ഐ.കെ. കുമാരൻ രാഷ്ട്രീയരംഗത്തേക്കിറങ്ങിയത്. 1942ൽ ക്വിറ്റിന്ത്യാ സമരത്തിൽ പങ്കെടുത്ത് അറസ്റ്റ്വരിച്ചു. രണ്ടു വർഷം ജയിൽ വാസമനുഭവിച്ചു. ഈ കാലഘട്ടത്തിൽ പോലീസുകാരുടെ ക്രൂരമർദനത്തിനും ഇരയായി. പിന്നീട് വിവിധ ഘട്ടങ്ങളിൽ ഫ്രഞ്ച് സർക്കാർ കുമാരനെ ജയിലിലടച്ചു.
1946ൽ മയ്യഴി നഗരസഭാംഗമായിരുന്നു. 1947ൽ ഇന്ത്യക്ക് ബ്രിട്ടീഷുകാരിൽനിന്നു സ്വാതന്ത്ര്യം ലഭിച്ചെങ്കിലും മയ്യഴി ഫ്രഞ്ച് കോളനിയായിത്തന്നെ തുടരുകയായിരുന്നു. ഇന്ത്യൻ യൂണിയനിൽ ലയിക്കാതിരുന്ന മയ്യഴിയിൽ ജനഹിതപരിശോധനയ്ക്ക് കുമാരൻമാസ്റ്റർ നേതൃത്വം നൽകി. എന്നാൽ 1947 ഒക്ടോബർ 21ന്, ജനഹിതപരിശോധനയ്ക്കു തയാറാകാതെ ഒരുവിഭാഗം ഫ്രഞ്ച് അനുകൂലികൾ കുമാരൻ മാസ്റ്ററെ അപായപ്പെടുത്താൻ ശ്രമിച്ചു.
ഇതിൽ പ്രതിഷേധിച്ച് ക്ഷുഭിതരായ ജനക്കൂട്ടം മയ്യഴി മുൻസിപ്പാലിറ്റിയും പോലീസ് സ്റ്റേഷനും പിടിച്ചടക്കി. സായുധസമരത്തിലൂടെ മയ്യഴിയെ മോചിപ്പിക്കാൻ വിപ്ലവസമിതിയുണ്ടാക്കി. കുമാരൻ മാസ്റ്ററായിരുന്നു അതിന്റെ പ്രസിഡന്റ്. എന്നാൽ ഫ്രഞ്ച് സൈന്യത്തിന്റെ ഇടപെടൽ മൂലം അതു നടന്നില്ല.
ഭരണ അട്ടിമറിക്ക് ശ്രമിച്ചതിന് കുമാൻമാസ്റ്ററെ ഇരുപത് കൊല്ലം തടവിനും ആയിരം രൂപ പിഴയൊടുക്കാനും പട്ടാളക്കോടതി ശിക്ഷിച്ചു.
ഇതോടെ പട്ടാളത്തിനു പിടികൊടുക്കാതെ ഇദ്ദേഹം മയ്യഴിക്കു വെളിയിൽ ഒളിവിൽ പോയി.
അഞ്ചുവർഷം ഒളിവിലിരുന്നുകൊണ്ടാണ് ഇദ്ദേഹം മയ്യഴി വിമോചനസമരത്തിനു നേതൃത്വം നല്കിയത്.