നെയ്പായസം, വെള്ളച്ചോറ്, തെരളി, മണ്ടപ്പുറ്റ് തുടങ്ങി വിവിധ നിവേദ്യങ്ങളാണ് മണ്കലങ്ങളില് തിളച്ചത്. പിന്നെ പൊങ്കാല നിവേദിക്കുന്നതിനായുള്ള കാത്തിരിപ്പ്. ഉച്ചയ്ക്ക് 2.30 ന് ക്ഷേത്ര പൂജാരി പണ്ടാര അടുപ്പിലെ പൊങ്കാല നിവേദിച്ചു. ഈ സമയം വ്യോമസേന ഹെലിക്കോപ്റ്റർ ആകാശത്തുനിന്നു പുഷ്പവൃഷ്ടി നടത്തി. തുടര്ന്ന് ക്ഷേത്ര ട്രസ്റ്റ് നിയോഗിച്ച 350 ഓളം ശാന്തിക്കാര് നഗരത്തിന്റെ വിവിധ കേന്ദ്രങ്ങളില് കമുകിന്പൂക്കുലയില് മുക്കിയ തീര്ഥം വിതറി പൊങ്കാല നിവേദ്യം നടത്തി.
രാവിലെ മുതല് ബാലികമാര് താലപ്പൊലിയേന്തി ക്ഷേത്രത്തിലെത്തി ദേവിയെ വണങ്ങി. രാത്രി 7.30 ന് കുത്തിയോട്ടത്തിനുള്ള ബാലന്മാര്ക്ക് ചൂരല്കുത്ത് നടന്നു. രാത്രി 11 ന് മണക്കാട് ശാസ്താക്ഷേത്രത്തിലേക്കു വാദ്യമേളങ്ങളുടയെും കുത്തിയോട്ടബാലന്മാരുടെയും അകമ്പടിയോടെ ദേവിയുടെ പുറത്തെഴുന്നള്ളിപ്പ് പുറപ്പെട്ടു. തൃക്കടവൂര് ശിവരാജു എന്ന കൊമ്പനാന ദേവിയുടെ തിടമ്പേറ്റി. ഇന്ന് രാവിലെ എട്ടിനാണ് തിരിച്ചെഴുന്നള്ളത്ത്. രാത്രി 9.45ന് കാപ്പഴിക്കല്. തുടര്ന്ന് പുലര്ച്ചെ നടക്കുന്ന കുരിതി തര്പ്പണത്തോടെ പൊങ്കാല മഹോത്സവത്തിനു പരിസമാപ്തിയാകും.