യുജിസിയുടെയും ചാന്‍സലറുടെയും പ്രതിനിധികള്‍ മാത്രമാണു സെര്‍ച്ച് കമ്മിറ്റികളില്‍ ഉണ്ടായിരുന്നത്. വിസി നിയമനത്തിനുള്ള സെര്‍ച്ച് കമ്മിറ്റികള്‍ ഏകപക്ഷീയമായി നിയമിക്കാനുള്ള അധികാരം ചാന്‍സലര്‍ക്ക് ഇല്ലെന്നായിരുന്നു ഹര്‍ജിക്കാരുടെ വാദം. യുജിസി, സര്‍വകലാശാലാ ചട്ടപ്രകാരമല്ലാതെയുള്ള സെര്‍ച്ച് കമ്മിറ്റി രൂപീകരണം നിലനില്‍ക്കുന്നതല്ലെന്ന് സര്‍ക്കാര്‍ വ്യക്തമാക്കിയിരുന്നു. എംജി സര്‍വകലാശാലാ നിയമപ്രകാരം, സെനറ്റ് പ്രതിനിധിയടക്കം മൂന്നംഗ സെര്‍ച്ച് കമ്മിറ്റിയാണു രൂപീകരിക്കേണ്ടത്. എന്നാല്‍, ഗവര്‍ണര്‍ രണ്ടംഗ കമ്മിറ്റിയാണു രൂപീകരിച്ചത്. ഇതും നിലനില്‍ക്കുന്നതല്ല.
യുജിസിയുടെ 2018 റെഗുലേഷന്‍പ്രകാരം യുജിസി നോമിനിയെ ഉള്‍പ്പെടുത്തി അക്കാദമിക് മേഖലയിലുള്ളവരുടെ സെര്‍ച്ച് കമ്മിറ്റി രൂപീകരിക്കാനാണു വ്യവസ്ഥ ചെയ്യുന്നത്. കൂടാതെ സെര്‍ച്ച് കമ്മിറ്റിയില്‍ മൂന്നു മുതല്‍ അഞ്ചു വരെ അംഗങ്ങള്‍ വേണമെന്നാണു നിബന്ധനയെന്നും ഹര്‍ജിക്കാര്‍ കോടതി അറിയിച്ചു.