ബോധവല്‍ക്കരണ സെമിനാര്‍ സംഘടിപ്പിച്ചു

മൂവാറ്റുപുഴ : ലയണ്‍സ് ക്ലബിന്‍റെ നേതൃത്വത്തില്‍ സാമൂഹിക അവബോധം വളര്‍ത്തുക എന്ന ലക്ഷ്യത്തോടെ ബോധവല്‍ക്കരണ സെമിനാര്‍ സംഘടിപ്പിച്ചു. പേഴയ്ക്കാപ്പിള്ളി ഗവ. ഹയര്‍ സെക്കന്‍ഡറി സ്‌കൂളില്‍ ജില്ലാ പഞ്ചായത്തംഗം ഷാന്‍റി ഏബ്രഹാം ഉദ്ഘാടനം ചെയ്തു. മൂവാറ്റുപുഴ ലയണ്‍സ് ക്ലബ് പ്രസിഡന്‍റ് ജയ ബാലചന്ദ്രന്‍ അധ്യക്ഷത വഹിച്ചു.

വിദ്യാര്‍ഥികളും പൗരത്വബോധവും എന്ന വിഷയത്തില്‍ റിട്ട. ഡിവൈഎസ്പി എന്‍. ശിവദാസ് ക്ലാസ് നയിച്ചു. ലഹരി ബോധവല്‍ക്കരണ സെമിനാറിന് മൂവാറ്റുപുഴ അസിസ്റ്റന്‍റ് എക്‌സൈസ് ഇന്‍സ്‌പെക്ടര്‍ എം.എ.കെ. ഫൈസല്‍ നേതൃത്വം നല്‍കി.

പ്രധാനാധ്യാപിക സഫീന, പിടിഎ പ്രസിഡന്‍റ് ഹസീന, ലയണ്‍സ് ക്ലബ് ഭാരവാഹികളായ നീന സജീവ്, ബീന സുരേഷ്, എ.ആര്‍. ബാലചന്ദ്രന്‍, വി.പി. സുരേഷ്, എസ്. ബാലചന്ദ്രന്‍ നായര്‍ തുടങ്ങിയവര്‍ പ്രസംഗിച്ചു.

ADVERTISEMENT

വയോധികയെ മരിച്ച നിലയിൽ കണ്ടെത്തി

പറവൂർ: വയോധികയെ മരിച്ച നിലയിൽ കണ്ടെത്തി. വടക്കേക്കര പാല്യത്തുരുത്ത് ചേലക്കാട് പരേതനായ സുധാകരന്‍റെ ഭാര്യ സാവിത്രി‌‌യേയാണ് (88) വ്യാഴാഴ്‌ച രാത്രി എട്ടരയോടെ വീടിനോട് ചേർന്നു മുറ്റത്തു മരിച്ച നിലയിൽ കണ്ടത്. മൃതദേഹം ഉറുമ്പരിച്ച നിലയിലായിരുന്നു. പത്തിന് പകൽ ഇവരെ വാർഡംഗം കണ്ടിരുന്നു. മത്സ്യബന്ധന തൊഴിലാളിയായ മകൻ സുധീർ അന്നു രാത്രി വീട്ടിലെത്തിയെങ്കിലും ശ്രദ്ധിച്ചിരുന്നില്ല. തയ്യൽ ജോലി ചെയ്യുന്ന മരുമകൾ ശ്രീദേവി ജോലിക്ക് പോയിരിക്കുകയുമായിരുന്നു. പോലീസ് തുടർനടപടികൾ സ്വീകരിച്ചു. മൃതദേഹം പോസ്റ്റ്മോർട്ടത്തിന് ശേഷം സംസ്കരിച്ചു. സുബൈദയാണ് സാവിത്രിയുടെ മറ്റൊരു മകൾ.

വികസന സദസും അയ്യപ്പ സംഗമവും സര്‍ക്കാരിന്‍റെ ധൂര്‍ത്ത്: വി.ഡി. സതീശന്‍

കൊച്ചി: നവകേരള സദസ് പോലെയുള്ള സര്‍ക്കാരിന്‍റെ ധൂര്‍ത്താണ് വികസന സദസും അയ്യപ്പ സംഗമവുമെന്ന് പ്രതിപക്ഷനേതാവ് വി.ഡി.സതീശന്‍. മിഷന്‍ 25 ന്‍റെ ഭാഗമായി നടന്ന ജില്ലാ കോണ്‍ഗ്രസ് നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. വികസന പ്രവര്‍ത്തനകള്‍ക്ക് പണം ചെലവഴിക്കാതെ ധൂര്‍ത്തിനാണ് സര്‍ക്കാരിന് താല്‍പര്യം. തദ്ദേശ സ്ഥാപനങ്ങളുടെ പ്ലാന്‍ ഫണ്ട് പോലും വെട്ടിക്കുറച്ചശേഷം കോടികള്‍ ചെലവഴിച്ച് മുഖം മിനുക്കാനാണ് സര്‍ക്കാര്‍ ശ്രമിക്കുന്നതെന്നും അദ്ദേഹം പറഞ്ഞു. രാഹുല്‍ മാങ്കൂട്ടത്തലിനെതിരായ നടപടി സംസ്ഥാന കോണ്‍ഗ്രസ് നേതൃത്വം കൂട്ടായി എടുത്ത തീരുമാനമാണ്. പാര്‍ട്ടിക്ക് ഒരു സംഭാവനയും നല്‍കാത്ത ചിലര്‍ വിദേശ രാജ്യങ്ങളിലിരുന്ന് സമൂഹമാധ്യമങ്ങളില്‍ പ്രചരിപ്പിക്കുന്നത് പാര്‍ട്ടി പ്രവര്‍ത്തകര്‍ ഏറ്റെടുക്കേണ്ടതില്ല. സിപിഎം സ്‌പോണ്‍സര്‍ ചെയ്യുന്നവരും ഇത്തരത്തില്‍ വ്യാജ പ്രചാരണം നടത്തുന്നുണ്ട്. പാര്‍ട്ടിയുടെ ലേബലില്‍ ഇത്തരം പ്രചാരണം നടത്തുന്നവര്‍ അതവസാനിപ്പിക്കണമെന്നും ഇല്ലെങ്കില്‍ പാര്‍ട്ടിയില്‍ നിന്ന് പുറത്താക്കുന്നതടക്കം പരിഗണിക്കേണ്ടി വരുമെന്നും അദ്ദേഹം മുന്നറിയിപ്പ് നല്‍കി. വികസന പത്രിക പുറത്തിറക്കും ആമ്പല്ലൂര്‍ പഞ്ചായത്ത് ഭരണസമിതി പുറത്തിറക്കിയ വികസന പത്രിക യോഗത്തില്‍ പ്രകാശനം ചെയ്തു. കോണ്‍ഗ്രസ് ഭരിക്കുന്ന എല്ലാ പഞ്ചായത്തുകളിലും വികസനനേട്ടങ്ങള്‍ ഉയര്‍ത്തിക്കാട്ടി വികസന പത്രിക പുറത്തിറക്കും. അടുത്ത മാസം ആദ്യം കേന്ദ്ര, സംസ്ഥാന സര്‍ക്കാരുകളുടെ ജനവിരുദ്ധ മുഖം തുറന്ന് കാട്ടി ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ പദയാത്ര നടത്തും. ഗൃഹ സമ്പര്‍ക്ക പരിപാടിയും ഫണ്ട് ശേഖരണവും ഈ മാസം 20 വരെ നീട്ടാനും യോഗം തീരുമാനിച്ചു. ഡി സിസി പ്രസിഡന്‍റ് മുഹമ്മദ് ഷിയാസ് അധ്യക്ഷത വഹിച്ചു. ഹൈബി ഈഡന്‍ എംപി, എംല്‍എമാരായ കെ. ബാബു, ടി.ജെ. വിനോദ്, അന്‍വര്‍ സാദത്ത്, റോജി എം. ജോണ്‍, എല്‍ദോസ് കുന്നപ്പിള്ളി, കെപിസിസി വൈസ് പ്രസിഡന്‍റ് സജീന്ദ്രന്‍, ജനറല്‍ സെക്രട്ടറി മാരായ അബ്ദുള്‍ മുത്തലിബ്, ദീപ്തി മേരി വര്‍ഗീസ്, ജോസഫ് വാഴയ്ക്കന്‍, അജയ് തറയില്‍, എന്‍. വേണുഗോപാല്‍, ജെയ്‌സണ്‍ ജോസഫ് തുടങ്ങിയവര്‍ പ്രസംഗിച്ചു.

നൈട്രോസെപ്പാം ഗുളികകളുമായി നീഗ്രോ സുരേഷ് പിടിയില്‍

കൊച്ചി: വില്പനയ്‌ക്കെത്തിച്ച നൈട്രോസെപ്പാം ഗുളികളുമായി നിരവധി കേസുകളിലെ പ്രതിയായ യുവാവ് പിടിയില്‍. എറണാകുളം ഉദയാകോളനി ഹൗസ് നമ്പര്‍ 102 ല്‍ സുരേഷ് എന്ന നീഗ്രോ സുരേഷിനെയാണ്(40) നാര്‍കോട്ടിക് സെല്‍ എസിപി കെ.എ. അബ്ദുള്‍ സലാമിന്‍റെ നേതൃത്വത്തിലുള്ള ഡാന്‍സാഫ് സംഘം അറസ്റ്റ് ചെയ്തത്. ഇയാളുടെ വീട്ടില്‍ നിന്ന് 62 നൈട്രോസെപ്പാം ഗുളികകള്‍ കണ്ടെടുത്തു. വില്പനയ്ക്കും സ്വന്തം ആവശ്യത്തിനുമായാണ് ഗുളികകള്‍ എത്തിച്ചതെന്ന് ഇയാള്‍ പോലീസിന് മൊഴി നല്‍കി.

ആലുവയിൽ തുണിക്കട കത്തിനശിച്ചു

20 ലക്ഷത്തിന്‍റെ നഷ്ടം ആലുവ: ആലുവ ബാങ്ക് കവലയിലെ പഴയ ഓടിട്ട കെട്ടിടത്തിൽ പ്രവർത്തിച്ചിരുന്ന തുണിക്കടയ്ക്ക് തീപിടിച്ചു. അഗ്നിശമന സേന മൂന്നുവട്ടം എത്തിയാണ് തീ അണച്ചത്. 20 ലക്ഷം രൂപയുടെ നഷ്ടം കണക്കാക്കുന്നു. ഇന്നലെ രാവിലെ 11.30 ഓടെയാണ് തിരക്കേറിയ ബാങ്ക് ജംഗ്ഷനിലെ ബസ് സ്റ്റോപ്പിന് മുന്നിലുള്ള കെട്ടിടത്തിൽ കട കാലിയാക്കൽ വില്പന എന്ന ബോർഡ് വച്ച് വിൽപ്പന നടത്തിയിരുന്ന തുണിക്കടയുടെ പിൻഭാഗത്ത്നിന്ന് തീയും പുകയും ഉയർന്നത്. മൂന്ന് ഷട്ടറുകളുള്ള കടയുടെ പിന്നിൽ ജനലുകൾ ഇല്ലാത്തതിനാൽ പുക കാരണം തീ കണ്ടെത്താൻ ആദ്യം ഫയർഫോഴ്സ് സംഘത്തിന് കഴിഞ്ഞില്ല. മുൻവശത്തെ ചില്ലുകൾ ആയുധങ്ങൾ കൊണ്ട് പൊട്ടിച്ചും പിൻവശത്തെ മതിൽ തകർത്തുമാണ് തീപിടിച്ച ഭാഗം കണ്ടെത്തിയത്. താഴത്തെ നിലയുടെ മേൽക്കൂര മരത്തിൽ നിർമിച്ചതായതിനാൽ അപകട സാധ്യത വർധിപ്പിച്ചു. കുറച്ച് തുണി മാത്രമാണ് തീപിടിക്കാതെ ലഭിച്ചത്. ആലുവയ്ക്ക് പുറമെ അങ്കമാലി, ഏലൂർ, പെരുമ്പാവൂർ ഫയർഫോഴ്സ യൂണിറ്റുകളും തീയണയ്ക്കാൻ എത്തി. മണിക്കൂറുകൾ നീണ്ട പ്രയത്നത്തിന് ശേഷം ഉച്ചയ്ക്ക് രണ്ടോടെ തീയണച്ച് അഗ്നിശമന സേന മടങ്ങിയെങ്കിലും അര മണിക്കൂറിന് ശേഷം തീ പടർന്നതോടെ വീണ്ടും എത്തി. വൈകിട്ട് ആറോടെ വീണ്ടും തീ പുകയുന്നതായി അറിയിച്ചതിനാൽ മൂന്നാമതും അഗ്നിശമന സേന എത്തിയാണ് പൂർണമായും കെടുത്തിയത്. വാരിയത്ത് പുത്തൻമഠം വിശ്വനാഥൻ സ്വാമിയാണ് കെട്ടിട ഉടമ. കെട്ടിടത്തിൽ വാടകയ്ക്ക് പ്രവർത്തിക്കുന്ന ശ്രീമൂലനഗരം തറയിൽ നിഷാ റഫീക്കിന്‍റെ സ്ഥാപനത്തിലാണ് തീപിടിച്ചത്. ഈ രണ്ടുനില കെട്ടിടത്തിൽ ഹാൻവീവ് അടക്കം നിരവധി സ്ഥാപനങ്ങൾ പ്രവർത്തിക്കുന്നുണ്ട്. ഇതിനു പിന്നിലാണ് ഉടമയുടെ വീട്.

വൈറ്റില റെയിൽവേ മേൽപ്പാലത്തിൽ കെഎസ്ആർടിസി ബസ് അപകടത്തിൽപ്പെട്ടു : മൂന്നര മണിക്കൂർ ഗതാഗതം സ്തംഭിച്ചു

വൈറ്റില: ദേശീയപാതയിൽ വൈറ്റില പാലം കഴിഞ്ഞുള്ള റെയിൽവേ മേൽപ്പാലത്തിൽ കെഎസ്ആർടിസി ബസ് അപകടത്തിൽപ്പെട്ടതിനെ തുടർന്ന് മണിക്കൂറുകളോളം ഗതാഗതം തടസപ്പെട്ടു. രാവിലെ എട്ടരയോടെയാണ് അപകടം നടന്നത്. ഇടപ്പള്ളി ഭാഗത്തേയ്ക്കുള്ള മേൽപ്പാലത്തിന്‍റെ ഇറക്കത്തിൽ വച്ച് ഓട്ടോറിക്ഷ പെട്ടെന്ന് വേഗം കുറച്ചതിനെ തുടർന്ന് പിന്നാലെ വന്ന വാഹനങ്ങൾ സഡൻ ബ്രേക്കിടുകയും ബസ് അപകടത്തിൽപ്പെട്ടുകയുമായിരുന്നു. ബൈക്കുകളിൽ തട്ടിയ ബസ് എൽപിജി ലോറിയിൽ ഇടിച്ചാണ് നിന്നത്. ബസിന്‍റെ ഡ്രൈവർ സീറ്റിന്‍റെ ഭാഗം പൂർണമായി തകർന്നു. സ്റ്റിയറിംഗ് ലോക്കായി ബസ് പാലത്തിന് കുറുകെയായതോടെ ഈ ഭാഗത്തെ ഗതാഗതം പൂർണമായി തടസപ്പെട്ടു. ബസ് അപകടസ്ഥലത്തുനിന്ന് നീക്കാൻ സാധിക്കാതെ വന്നതോടെ വാഹനങ്ങളുടെ നീണ്ടനിര കുണ്ടന്നൂർ വരെ നീണ്ടു. ഇതോടെ വൈറ്റില ഭാഗം മുഴുവൻ ഗതാഗതക്കുരുക്കിലായി. ഉച്ചയ്ക്ക് 12-ഓടെ ബസ് പാലത്തിൽനിന്ന് മാറ്റിയ ശേഷമാണ് ഗതാഗതക്കുരുക്കിന് ശമനമായത്.

മദ്യപിച്ച് പിരിവിനിറങ്ങിയ വെഹിക്കിൾ ഇൻസ്പെക്ടർ പിടിയിൽ

വഴിയോര മത്സ്യവ്യാപാര ദമ്പതികളോട് 3,000 രൂപ ആവശ്യപ്പെട്ടതായി പരാതി കാക്കനാട്: മദ്യപിച്ച് ലക്കുകെട്ട്, യൂണിഫോമില്ലാതെ വാഹനപരിശോധനയ്ക്കെത്തിയ വെഹിക്കിള്‍ ഇന്‍സ്പെക്ടറെ തൃക്കാക്കര പോലീസ് അറസ്റ്റ് ചെയ്തു. കാക്കനാട് ആര്‍ടി ഓഫിസിലെ വെഹിക്കിള്‍ ഇന്‍സ്പെക്ടര്‍ എന്‍.എസ്.ബിനുവാണ് പിടിയിലായത്. തോപ്പില്‍ ജംഗ്ഷന് സമീപം ബുധനാഴ്ച രാത്രി ഒമ്പതരയോടെയാണ് സംഭവം. വഴിയരികില്‍ സ്വന്തം വാഹനത്തില്‍ മല്‍സ്യ കച്ചവടം നടത്തിക്കൊണ്ടിരുന്ന ദമ്പതികളെ സമീപിച്ച് താന്‍ വെഹിക്കിള്‍ ഇന്‍സ്പെക്ടറാണെന്നും അനധികൃതമായി വാഹനത്തിൽ കച്ചവടം നടത്തുന്നതായി പരാതി ലഭിച്ചതിനാൽ 3000 രൂപ പിഴ അടയ്ക്കണമെന്നും ആവശ്യപ്പെട്ടു. തുടർന്ന് വാഹനം പിടിച്ചെടുക്കുമെന്ന് ഭീഷണിപ്പെടുത്തിയതോടെ നാട്ടുകാർ തടിച്ചുകൂടുകയും തൃക്കാക്കര പോലീസിനെ വിവരം അറിയിക്കുകയുമായിരുന്നു. പോലീസ് അറസ്റ്റ് ചെയ്ത് ആശുപത്രിയിലെത്തിച്ച് നടത്തിയ വൈദ്യപരിശോധനയിൽ മദ്യപിച്ചതായി സ്ഥിരീകരിക്കുകയും ചെയ്തു . തുടർന്ന് മദ്യപിച്ച് വാഹനം ഓടിച്ചതിനടക്കം എഫ്ഐആർ ഇട്ട് കേസ് രജിസ്റ്റർ ചെയ്യുകയായിരുന്നു. മൽസ്യക്കച്ചവടം നടത്തിയ യുവതിയും കുടുംബവും തങ്ങളോട് അപമര്യാദയായി പെരുമാറിയ ഉദ്യോഗസ്ഥനെതിരെ തൃക്കാക്കര സ്റ്റേഷനിൽ പരാതി കൊടുത്തിട്ടുണ്ട്. അതേസമയം മോട്ടോർ വെഹിക്കിൾ ഡിപ്പാർട്ട്മെന്‍റിന്‍റെ അറിവോടെയല്ലാതെ മദ്യപിച്ച് വാഹന പരിശോധന നടത്തിയ ഉദ്യോഗസ്ഥനെതിരെ നടപടി സ്വീകരിക്കുമെന്ന് ആർടിഒ അറിയിച്ചു

കവര്‍ച്ചക്കേസ് പ്രതികള്‍ പിടിയില്‍

കൊച്ചി: പനങ്ങാട് കുമ്പളം സൗത്ത് ഹോളി മേരി കോളജിനടുത്തു താമസിച്ചിരുന്ന ആസാം സ്വദേശിയുടെ വീട്ടില്‍ കവര്‍ച്ച നടത്തി രക്ഷപ്പെട്ട പ്രതികളെ മണിക്കൂറുകള്‍ക്കുള്ളില്‍ പിടികൂടി പനങ്ങാട് പോലീസ്. പള്ളുരുത്തി എംഎല്‍എ റോഡില്‍ താമസിച്ചുവരുന്ന സദ്ദാം (35), അസിബ് ശിഹാബ് (38) എന്നിവരാണ് പനങ്ങാട് പോലീസിന്‍റെ പിടിയിലായത്. വര്‍ഷങ്ങളായി കുടുംബസമേതം ചെറിയ ജോലി ചെയ്തു താമസിച്ചുവന്നിരുന്ന ആസാം സ്വദേശികളായ ഇതരസംസ്ഥാന തൊഴിലാളികള്‍ താമസിക്കുന്നിടത്ത് സ്ഥിരമായി എത്തി ഭീഷണിപ്പെടുത്തി പ്രതികള്‍ ഗുണ്ടാപ്പിരിവു നടത്തിയിരുന്നു. ഇവര്‍ക്ക് പണം നല്‍കാന്‍ വിസമ്മതിച്ചതിനെ തുടര്‍ന്നാണ് കുടുംബത്തെ അതിക്രൂരമായി മര്‍ദിച്ച് 5,000 രൂപയും മൊബൈല്‍ ഫോണ്‍ അടങ്ങിയ ബാഗും കവര്‍ച്ച ചെയ്ത് പ്രതികള്‍ കടന്നുകളഞ്ഞത്. സാരമായി പരിക്കേറ്റ ആസാം സ്വദേശി പോലീസില്‍ പരാതി നല്‍കി. ഇതിന്‍റെ അടിസ്ഥാനത്തില്‍ നടത്തിയ അന്വേഷണത്തിലാണ് പള്ളുരുത്തിയില്‍നിന്ന് പ്രതികളെ പിടികൂടിയത്. കവര്‍ച്ച ചെയ്ത ബാഗും ഫോണും പണവും പിന്നീട് പോലീസ് കണ്ടെടുത്തു. പനങ്ങാട് പോലീസ് ഇന്‍സ്‌പെക്ടര്‍ വിപിന്‍ ദാസിന്‍റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

പോലീസ് ലോഗോ ഉപയോഗിച്ചും സൈബർ സാന്പത്തിക തട്ടിപ്പ്

കൊച്ചി: കേരള പോലീസിന്‍റെ ഔദ്യോഗിക ചിഹ്നം ഉപയോഗിച്ചുള്ള വാട്‌സാപ്പ് നമ്പറുകളില്‍ നിന്ന് സന്ദേശങ്ങള്‍ അയച്ചും സൈബര്‍ സാമ്പത്തിക തട്ടിപ്പ്. ഇ ചെലാന്‍ ഫൈന്‍ അടയ്ക്കണമെന്നാവശ്യപ്പെട്ട് കേരള പോലീസിന്‍റെ ഔദ്യോഗിക ലോഗോ ഡിസ്‌പ്ലേ പിക്ചര്‍ ആയിട്ടുള്ള വാട്‌സാപ്പ് അക്കൗണ്ടില്‍ നിന്ന് മെസേജ് വരുന്നതോടെയാണ് തട്ടിപ്പിന്‍റെ തുടക്കം. ഇങ്ങനെയുള്ള നമ്പരുകള്‍ പരിശോധിച്ചാല്‍ ട്രാഫിക് പോലീസിന്‍റെയും കേരള പോലീസിന്‍റെയും സംയുക്ത ലോഗോ കാണാം. ഇത് വിശ്വാസ്യത വര്‍ധിപ്പിക്കും. വരുന്ന മെസേജിനൊപ്പം പണം പിഴയായി അയച്ചുകൊടുക്കേണ്ട ലിങ്കും ഉണ്ടാകും. ലിങ്ക് ഓപ്പണ്‍ ചെയ്യുമ്പോള്‍ പ്ലേ സ്‌റ്റോറിലേക്ക് പോവുകയും ഒരു ആപ് ഇന്‍സ്റ്റാള്‍ ചെയ്യാന്‍ ആവശ്യപ്പെടുകയും ചെയ്യും. ഇന്‍സ്റ്റാള്‍ ചെയ്യുന്ന ആപ്ലിക്കേഷനിലൂടെ അക്കൗണ്ടില്‍ നിന്ന് പണവും മറ്റു വിവരങ്ങളും തട്ടിപ്പുകാര്‍ കൈക്കലാക്കുന്നു. നിലവില്‍ സൈബര്‍ പോലീസില്‍ പരാതിയൊന്നും ലഭിച്ചിട്ടില്ലെങ്കിലും ഇത്തരത്തിലുള്ള തട്ടിപ്പിനെതിരെ ജാഗ്രത പാലിക്കണമെന്നാണ് പോലീസ് മുന്നറിയിപ്പ്. സൈബര്‍ സാമ്പത്തിക തട്ടിപ്പിന് ഇരയായാല്‍ 1930 എന്ന് നമ്പറിലേക്ക് വിളിക്കുകയോ www. cybercrime.gov.in എന്ന വെബ്‌സൈറ്റിലോ പരാതിപ്പെടാം.

ജീവനെ ആറായി പകുത്ത് ഐസക് ജോർജ്

ആകാശമാർഗമെത്തിയ ഹൃദയം അജിന് പുതുജീവനായി കൊച്ചി: വാഹനാപകടത്തെത്തുടർന്നു മസ്തിഷ്കമരണം സംഭവിച്ച കൊല്ലം കൊട്ടാരക്കര ബഥേൽ ചരുവിള വടവോട് സ്വദേശി ഐസക് ജോർജിന്‍റെ ഹൃദയം ഉൾപ്പടെയുള്ള ആറ് അവയവങ്ങൾ ഇനി ആറുപേർക്ക് പുതുജീവനേകും. ഹൃദയം എറണാകുളം ലിസി ആശുപത്രിയിൽ ചികിത്സയിൽ കഴിയുന്ന ഇരുപത്തിയെട്ടുകാരനും ഒരു വൃക്ക തിരുവനന്തപുരം സർക്കാർ മെഡിക്കൽ കോളജ്, രണ്ട് നേത്രപടലങ്ങൾ തിരുവനന്തപുരം സർക്കാർ റീജണൽ ഇൻസ്റ്റിറ്റ്യൂട്ട് ഓഫ് ഒഫ്താൽമോളജി, മറ്റൊരു വൃക്കയും കരളും തിരുവനന്തപുരം കിംസ് ആശുപത്രി എന്നിവിടങ്ങളിലെ രോഗികൾക്കുമായാണു ദാനം ചെയ്തത്. അവയവം ദാനം ചെയ്യാൻ സന്നദ്ധരായ ബന്ധുക്കളെ ആരോഗ്യ മന്ത്രി വീണാ ജോർജ് നന്ദി അറിയിച്ചു. കൊട്ടാരക്കര കിഴക്കേത്തെരുവ് പള്ളിമുക്കിൽ കഴിഞ്ഞ ശനിയാഴ്ച ആറോടെ ഐസക് നടത്തുന്ന പള്ളിമുക്കിലെ റസ്റ്ററന്‍റിനു മുൻവശത്ത് റോഡ് മുറിച്ചുകടക്കവേ ബൈക്ക് ഇടിച്ചായിരുന്നു അപകടം. തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിലിരിക്കെ മരണം സംഭവിച്ചു. ഇന്നലെ മസ്തിഷ്കമരണം സ്ഥിരീകരിച്ചതിനെത്തുടർന്ന് കുടുംബാംഗങ്ങൾ അവയവദാനത്തിന് സന്നദ്ധരായി. ഭാര്യ: നാൻസി മറിയം സാം. മകൾ: അമീലിയ നാൻസി ഐസക്. സംസ്കാരച്ചടങ്ങുകൾ നാളെ ബഥേൽ ചരുവിള വീട്ടിൽ നടക്കും. സുസജ്ജം ടീം ലിസി അങ്കമാലി സ്വദേശിയായ അജിൻ ഏലിയാസിലാണ് ഐസക്കിന്‍റെ ഹൃദയം തുന്നിച്ചേര്‍ത്തത്. ഡോ. ജോസ് ചാക്കോ പെരിയപ്പുറത്തിന്‍റെ നേതൃത്വത്തിൽ എറണാകുളം ലിസി ആശുപത്രിയില്‍ നടന്ന ശസ്ത്രക്രിയ വിജയകരമായിരുന്നു. ബുധനാഴ്ച രാത്രിയോടെയാണു ലിസി ആശുപത്രിയിലേക്ക് സംസ്ഥാന സര്‍ക്കാര്‍ സംവിധാനമായ കെസോട്ടോയില്‍നിന്നു സന്ദേശമെത്തിയത്. പ്രാഥമിക പരിശോധനയില്‍ ഐസക്കിന്‍റെ ഹൃദയം ലിസി ആശുപത്രിയില്‍ ഹൃദയത്തിനായി കാത്തിരിക്കുന്ന അജിന് അനുയോജ്യമാണെന്ന് വ്യക്തമായി. തുടര്‍ന്ന് ആശുപത്രി ഡയറക്ടര്‍ ഫാ. പോള്‍ കരേടന്‍ മന്ത്രി പി. രാജീവിനെ വിവരം അറിയിച്ചു. രാത്രി ഏറെ വൈകിയിരുന്നെങ്കിലും അദ്ദേഹം മുഖ്യമന്ത്രിയുമായി ബന്ധപ്പെട്ട് സംസ്ഥാനസര്‍ക്കാര്‍ പോലീസ് സേനയ്ക്കായി വാടകയ്ക്കെടുത്തിരിക്കുന്ന ഹെലികോപ്റ്റര്‍ അവയവം കൊണ്ടുവരുന്നതിനായി വിട്ടുനല്‍കുന്നതിനുള്ള നടപടികളെടുത്തു. പൂര്‍ണമായും സൗജന്യമായാണ് ഹെലികോപ്റ്റര്‍ സേവനം വിട്ടുനല്‍കിയത്. ഹൃദയധമനികള്‍ക്കു വീക്കം സംഭവിക്കുന്ന കവാസാക്കി എന്ന അസുഖമായിരുന്നു ഹൃദയം സ്വീകരിച്ച അജിന് ഉണ്ടായിരുന്നത്. ഹൃദയത്തിനായി കെസോട്ടോയില്‍ രജിസ്റ്റര്‍ ചെയ്തു കാത്തിരിക്കുകയായിരുന്നു. ഹൃദയമാറ്റ ശസ്ത്രക്രിയയ്ക്ക് വഴി തുറന്നശേഷം അതിവേഗത്തിലായിരുന്നു ലിസി ആശുപത്രിയിലെ സജ്ജീകരണങ്ങൾ. ഇന്നലെ പുലർച്ചെ നാലോടെ ലിസിയിൽനിന്ന് ഡോ. ജേക്കബ് ഏബ്രഹാം, ഡോ. ജീവേഷ് തോമസ്, ഡോ. ജോ ജോസഫ്, ഡോ. ശ്രീശങ്കര്‍ എന്നിവരുടെ നേതൃത്വത്തിലുള്ള മെഡിക്കല്‍ സംഘം കിംസ് ആശുപത്രിയിലേക്ക് തിരിച്ചു. എട്ടോടെ ഹൃദയം എടുക്കുന്നതിനുള്ള ശസ്ത്രക്രിയ ആരംഭിച്ചു. ശസ്ത്രക്രിയ പൂര്‍ത്തിയാക്കി ഉച്ചക്ക് 12.35ന് തിരുവനന്തപുരത്തുനിന്നു പുറപ്പെട്ട ഹെലികോപ്റ്റര്‍ 1.30 ഓടെ കൊച്ചി ഹയാത്തിന്‍റെ ഹെലിപാഡിലെത്തി. നാലു മിനിറ്റുകൊണ്ട് പോലീസ് സേന ഒരുക്കിയ ഗ്രീന്‍ കോറി ഡോറിലൂടെ ലിസി ആശുപത്രിയില്‍ എത്തിച്ചു ശസ്ത്രക്രിയ ആരംഭിക്കുകയും ചെയ്തു. നാലുമണിക്കൂറിനുള്ളിൽത്തന്നെ ഹൃദയം പുതിയ ശരീരത്തില്‍ സ്പന്ദിക്കാന്‍ തുടങ്ങി. ഡോ. റോണി മാത്യു, ഡോ. ഭാസ്കര്‍ രംഗനാഥന്‍, ഡോ. പി. മുരുകന്‍, ഡോ. ജോബ് വില്‍സണ്‍, ഡോ. ഗ്രേസ് മരിയ, ഡോ. ആന്‍റണി ജോര്‍ജ്, ഡോ. ആയിഷ നാസര്‍, രാജി രമേഷ്, സൗമ്യ സുനീഷ് എന്നിവരും ശസ്ത്രക്രിയയില്‍ പങ്കാളികളായി. രാത്രി എഴോടെ ശസ്ത്രക്രിയ പൂര്‍ത്തിയായി. അടുത്ത 48 മണിക്കൂര്‍ പ്രധാനപ്പെട്ടതാണെന്ന് ഡോ. ജോസ് ചാക്കോ പെരിയപ്പുറം പറഞ്ഞു.

മുതിർന്ന പൗരന്മാർക്കൊപ്പം ഓണാഘോഷം

ആലുവ: തോട്ടക്കാട്ടുകര കെസിവൈഎം യൂണിറ്റിന്‍റെ ആഭിമുഖ്യത്തിൽ മുതിർന്ന പൗരന്മാരോടൊപ്പമുള്ള ഓണാഘോഷം ഓർമിക്കാൻ ഓമനിക്കാൻ തോട്ടക്കാട്ടുകര സെന്‍റ് ആൻസ് ദേവാലയത്തിൽ നടത്തി. വികാരി ഫാ. തോമസ് പുളിക്കൽ സഹവികാരി ഫാ. ഫെബിൻ കിഴവന, ഫാ. റിനോയ് തോമസ്, വരാപ്പുഴ അതിരൂപത കെസിവൈഎം പ്രസിഡന്‍റ് രാജീവ് പാട്രിക് എന്നിവർ പ്രസംഗിച്ചു.

വിപഞ്ചിക പുരസ്കാരം ഫർസാനയുടെ 'വോട്ടാള'ക്ക്‌

അങ്കമാലി: സാഹിത്യ വിമർശകനും പ്രഭാഷകനും കഥാകൃത്തുമായ കടാതി ഷാജിയുടെ സ്മരണാർത്ഥം അങ്കമാലി വിപഞ്ചിക സാഹിത്യവേദി ഏർപ്പെടുത്തിയ “വിപഞ്ചിക - കടാതി ഷാജി” ചെറുകഥാ പുരസ്കാരം യുവ കഥാകൃത്തുക്കളിൽ ശ്രദ്ധേയയായ ഫർസാനയുടെ 'വേട്ടാള' എന്ന കൃതിക്ക്. 6,666 രൂപയും ഫലകവും പ്രശസ്തിപത്രവും അടങ്ങുന്നതാണ് പുരസ്കാരം. 2025 ഒക്ടോബർ ഒന്നിന് അങ്കമാലി രുഗ്മിണി ചന്ദന ഹാളിൽ നടക്കുന്ന കടാതി ഷാജി അനുസ്മരണ സമ്മേളനത്തിൽ പ്രശസ്ത കഥാകൃത്ത് മനോജ് വെങ്ങോല പുരസ്കാര സമർപ്പണം നടത്തുമെന്ന് വിപഞ്ചിക പ്രസിഡന്‍റ് സതീഷ് മാമ്പ്ര അറിയിച്ചു.

എംഎസ്‌സി ബാങ്കിന്‍റെ പ്രവര്‍ത്തനമേഖല വ്യാപിപ്പിക്കാന്‍ അനുവദിക്കുന്നില്ലെന്ന്

കൊച്ചി: ജില്ലയിലെ അഞ്ച് അര്‍ബന്‍ ബാങ്കുകളില്‍ മൂന്നാം സ്ഥാനത്തുള്ള മട്ടാഞ്ചേരി സാര്‍വജനിക് സഹകരണ ബാങ്കിന്‍റെ (എംഎസ്‌സി) പ്രവര്‍ത്തനമേഖല വ്യാപിപ്പിക്കാന്‍ സംസ്ഥാന സഹകരണ വകുപ്പ് അനുവദിക്കുന്നില്ലെന്ന് ബാങ്ക് പ്രസിഡന്‍റ് പി.വി. ജയപ്രസാദ്. ഇതിനെതിരെ നിയമനടപടികള്‍ സ്വീകരിക്കുന്ന കാര്യം ആലോചിക്കുമെന്നും അദ്ദേഹം പറഞ്ഞു. 72-ാം വര്‍ഷത്തിലേക്ക് കടക്കുന്ന ബാങ്ക് ലാഭത്തിലാണ് പ്രവര്‍ത്തിക്കുന്നത്. വായ്പാ പദ്ധതിയുമായി ബന്ധപ്പെട്ട് ഒട്ടേറെ നൂനത പദ്ധതികള്‍ ബാങ്ക് രൂപം നല്‍കിയിട്ടുണ്ട്. 269.26 കോടി രൂപയാണ് ബാങ്കിന്‍റെ മൊത്തം പ്രവര്‍ത്തന മൂലധനം. 244.57 കോടി രൂപ നിക്ഷേപമുണ്ട്. ഒമ്പത് ശതമാനം ഡിവിഡന്‍റ് ഈ വര്‍ഷം നല്‍കും. യുപിഐ പേയ്‌മെന്‍റ് സൗകര്യവും ഉടന്‍ ഉപയോക്താക്കള്‍ക്ക് ലഭ്യമാക്കും. സാര്‍വജനിക് ലഘു നിക്ഷേപ ശേഖരണ പദ്ധതി, മരണ ക്ലെയിം ഇന്‍ഷ്വറന്‍സ് പദ്ധതി എന്നിവയും ആരംഭിക്കും. 31,952 അംഗങ്ങളുള്ള ബാങ്ക് റിസർസ് ബാങ്കിന്‍റെ എസ്എഎഫ് നിയന്ത്രണത്തില്‍ നിന്നും ഒഴിവാക്കപ്പെട്ടതാണെന്നും വൈസ് ചെയര്‍മാന്‍ വിശ്വനാഥ് ഹരി ഭട്ട്, ബോര്‍ഡ് ഓഫ് മാനേജ്‌മെന്‍റ് ചെയര്‍മാന്‍ വി.ഉമേഷ് മല്യ എന്നിവര്‍ ആവശ്യപ്പെട്ടു.

ഹെറോയിനും കഞ്ചാവുമായി പിടിയിൽ

ആലുവ: എടയാറിൽ 17 ഗ്രാം ഹെറോയിനും 10 ഗ്രാം കഞ്ചാവുമായി ആസാം സ്വദേശിയെ പിടികൂടി. ഹോജയ് ജില്ലയിലെ ഷഹബാസ് ഹുസൈനെയാണ് (27)എൻഡിപിഎസ് ആക്ട് പ്രകാരം പറവൂർ എക്സൈസ് അറസ്റ്റ് ചെയ്തത്. പറവൂർ എക്സൈസ് സർക്കിൾ ഇൻസ്പെക്ടർ എം. മഹേഷ്കുമാറിന്‍റെ നേതൃത്വത്തിലുള്ള സംഘമാണ് പിടികൂടിയത്.

ചെന്പ് തകിട് മോഷണം: ആസാം സ്വദേശി പിടിയില്‍‌

കൊച്ചി: വൈറ്റില ചളിക്കവട്ടത്തുള്ള വസ്ത്രവ്യാപാര ശാലയില്‍ നിന്ന് ലക്ഷത്തിലധികം രൂപ വിലവരുന്ന 100 കിലോയോളം ചെന്പ് തകിടുകൾ മോഷ്ടിച്ച സംഭവത്തിൽ ആസാം സ്വദേശി പിടിയിലായി. ആസാം നഗാവോണ്‍ സ്വദേശി നബി ഹുസൈനെ(21)യാണ് പാലാരിവട്ടം പോലീസ് അറസ്റ്റ് ചെയ്തത്. മോഷണം നടന്നതായി കഴിഞ്ഞമാസം സ്ഥാപനത്തിന്‍റെ മാനേജര്‍ പാലാരിവട്ടം പോലീസ് സ്റ്റേഷനില്‍ പരാതി നല്‍കിയതിന്‍റെ അടിസ്ഥാനത്തില്‍ കേസ് എടുത്ത് അന്വേഷണം നടത്തി വരവേയാണ് പ്രതി പിടിയിലായത്. നഗരത്തിലെ വിവിധ ഫ്ലാറ്റുകളിലും ബഹുനില കെട്ടിടങ്ങളിലും എര്‍ത്തിംഗിനായി സ്ഥാപിച്ചിരുന്ന ചെന്പ് തകിടാണ് പ്രതി മോഷ്ടിച്ചത്. അടുത്ത കാലത്തു നടന്ന മോഷണങ്ങളും മോഷണ ശ്രമങ്ങളും നടത്തിയത് ഇതരസംസ്ഥാനക്കാരനായ ഒരു ചെറുപ്പക്കാരന്‍ തനിച്ചാണെന്ന് സിസിടിവി ദൃശ്യങ്ങളില്‍ നിന്നും വ്യക്തമായിരുന്നു. ഇതിന്‍റെ അടിസ്ഥാനത്തില്‍ പോലീസ് വിവിധ സംഘങ്ങളായി തിരിഞ്ഞ് സമീപ പ്രദേശങ്ങളിലേതടക്കം 300ഓളം സിസിടിവി കാമറകള്‍ പരിശോധിച്ചാണ് പെരുമ്പാവൂരിലും തുടര്‍ന്ന് ആലുവ കമ്പനിപ്പടിയിലും താമസമാക്കിയ പ്രതിയിലേക്ക് അന്വേഷണ സംഘമെത്തിയത്. നഗരത്തില്‍ ആക്രി സാധനങ്ങള്‍ ശേഖരിച്ച് വഴി മനസിലാക്കിയ ശേഷം മോഷ്ടിക്കാനുള്ള സ്ഥലം കണ്ടെത്തി രാത്രി സമയത്ത് മോഷണം നടത്തുകയാണ് പ്രതിയുടെ രീതി. കെട്ടിടങ്ങളിലെ ഇലക്ട്രിക് പവര്‍ യൂണിറ്റുകളില്‍ എര്‍ത്തിംഗിനായി ഉപയോഗിക്കുന്ന ചെന്പ് തകിടുകൾ ഉപകരണങ്ങൾ ഉപയോഗിച്ച് അഴിച്ചെടുത്ത് ബാഗിലാക്കി കടത്തികൊണ്ടുപോകുകയാണ് പതിവ്. വസ്ത്രവ്യാപാര സ്ഥാപനത്തില്‍ നിന്ന് പല തവണയായാണ് പ്രതി ചെന്പ് തകിടുകൾ കടത്തിയത്. മോഷണമുതലിന്‍റെ കുറച്ചു ഭാഗം പോലീസ് കണ്ടെത്തി.

പൂത്തിരി-രാസലഹരി വില്പന; കൂട്ടുപ്രതി ഒളിവില്‍ തന്നെ

കൊച്ചി: ഓണാഘോഷം കളറാക്കാന്‍ പൂത്തിരി എന്ന പ്രത്യേക കോഡില്‍ രാസലഹരി വില്പന നടത്തിയ അറസ്റ്റിലായ യുവാവിന്‍റെ കൂട്ടാളി ഇപ്പോഴും ഒളിവില്‍ തന്നെ. കേസിലെ രണ്ടാം പ്രതി പറവൂര്‍ സ്വദേശി ഷെഫീക്ക് ഹനീഫ ബംഗളൂരുവിലേക്ക് കടന്നെന്നാണ് എക്‌സൈസിന്‍റെ സംശയം. ഓഗസ്റ്റ് 19 നാണ് കേസുമായി ബന്ധപ്പെട്ട് ആലുവ ഈസ്റ്റ് കൊടികുത്തിമല സ്വദേശി മുറ്റത്ത് ചാലില്‍ വീട്ടില്‍ മുസാബിര്‍ മുഹമ്മദി (33) നെയാണ് 9.178 ഗ്രാം എംഡിഎംഎയുമായി എക്‌സൈസ് സംഘം അറസ്റ്റ് ചെയ്തത്. ഇയാളുടെ സ്മാര്‍ട്ട് ഫോണും എക്‌സൈസ് കസ്റ്റഡിയിലെടുത്തിരുന്നു. ഇയാള്‍ റിമാന്‍ഡിലാണ്.

കോര്‍പറേഷന്‍ മുന്‍ കൗണ്‍സിലര്‍ കുത്തേറ്റ് ആശുപത്രിയിൽ

കൊച്ചി: കൊച്ചി കോര്‍പ്പറേഷന്‍ മുന്‍ കൗണ്‍സിലര്‍ക്ക് കുത്തേറ്റു. കതൃക്കടവ് ഡിവിഷന്‍ മുന്‍ കൗണ്‍സിലര്‍ ഗ്രേസി ജോസഫിനാണ് ഇന്നലെ വെകിട്ട് കുത്തേറ്റത്. മൂന്ന് കുത്തേറ്റ ഇവരെ എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ രാത്രി വൈകിയാണ് സംഭവം. മകനാണ് കുത്തിപ്പരിക്കേല്‍പ്പിച്ചതെന്ന് പറയുന്നു. കൂടുതല്‍ വിവരങ്ങള്‍ പോലീസ് പുറത്തു വിട്ടിട്ടില്ല.

ആളൊഴിഞ്ഞ പറമ്പിൽ ഭണ്ഡാരങ്ങൾ കണ്ടെത്തി

ചെറായി: ഒഴിഞ്ഞ പറമ്പിൽ മൂന്നു ഭണ്ഡാരങ്ങൾ പൊട്ടിച്ച നിലയിൽ കാണപ്പെട്ടു. ചെറായി സെന്‍റ് റോസ് പള്ളിയുടെ എതിർവശത്തുള്ള ഒഴിഞ്ഞ പറമ്പിൽ തൊഴിലുറപ്പ് തൊഴിലാളികളാണ് ഭണ്ഡാരങ്ങൾ കണ്ടെത്തിയത്. ഒന്ന് ചെമ്പ് നിർമിതവും മറ്റു രണ്ടും സ്റ്റീൽ നിർമിതവുമാണ്. മുനമ്പം പോലീസിനെ വിവരം അറിയിച്ചതിനെ തുടർന്ന് പോലീസ് സ്ഥലത്തെത്തി മൂന്ന് ഭണ്ഡാരങ്ങളും കസ്റ്റഡിയിലെടുത്ത് അന്വേഷണം ആരംഭിച്ചിട്ടുണ്ട്.

അയ്യൻകുഴി നിവാസികളുടെ സ്ഥലം ഏറ്റെടുക്കൽ: മൂന്ന് മാസത്തിനുള്ളിൽ തീരുമാനം

ചോറ്റാനിക്കര: അയ്യൻകുഴി നിവാസികളുടെ സ്ഥലം ഏറ്റെടുക്കുന്ന കാര്യത്തിൽ മൂന്നു മാസത്തിനുള്ളിൽ തീരുമാനം. വായു മലിനീകരണത്തെ തുടർന്ന് അമ്പലമുകളിലെ അയ്യൻകുഴിയിൽ നിന്നും ജില്ലാ ഭരണകൂടത്തിന്‍റെ നേതൃത്വത്തിൽ ചോറ്റാനിക്കരയിലെ ഇന്ദ്രപ്രസ്ഥം ഹോട്ടലിലേയ്ക്ക് മാറ്റി പാർപ്പിച്ച പ്രദേശവാസികളെ ഹോട്ടലുടമ കഴിഞ്ഞ ദിവസം ഇറക്കിവിടാൻ ശ്രമിച്ചിരുന്നു. ഇതിനെതിരെ പ്രതിഷേധമുയർന്നപ്പോൾ ഇന്നലെ ഉച്ചയ്ക്ക് ജില്ലാ കളക്ടറുടെ സാന്നിധ്യത്തിൽ നടന്ന ചർച്ചയിലാണ് അയ്യൻകുഴി നിവാസികൾക്ക് അനുകൂലമായ തീരുമാനമുണ്ടായത്. അമ്പലമുകളിൽ ബിപിസിഎൽ കമ്പനിയുടെ മതിൽക്കെട്ടിനോട് ചേർന്ന് 44 ഓളം കുടുംബങ്ങൾ താമസിക്കുന്ന അയ്യൻകുഴി പ്രദേശം കമ്പനി ഏറ്റെടുക്കുന്ന കാര്യത്തിൽ മൂന്ന് മാസത്തിനുള്ളിൽ തീരുമാനമാകണമെന്നും അതുവരെ വാടകയ്ക്ക് വീടെടുത്ത് താമസിക്കുന്നതിനും ചിലവിനുമായി 50,000 രൂപ വീതം ഓരോ കുടുംബത്തിനും നൽകണമെന്നുമാണ് ചർച്ചയിൽ ധാരണയായിരിക്കുന്നത്. ഇതിൻപ്രകാരം ചോറ്റാനിക്കരയിലെ ഹോട്ടൽ മുറികളിൽ നിന്നും എത്രയും വേഗം എല്ലാ താമസക്കാരും ഒഴിയാനും തീരുമാനമായി. ചർച്ചയിൽ പി.വി.ശ്രീനിജൻ എംഎൽഎ, വടവുകോട്-പുത്തൻകുരിശ് പഞ്ചായത്ത് പ്രസിഡന്‍റ് സോണിയ മുരുകേശൻ, ജനകീയ സമിതി പ്രവർത്തകരായ കെ.കെ. ബാബു, വി.ആർ. രാധാകൃഷ്ണൻ, പി.എൻ. സജി തുടങ്ങിയവർ പങ്കെടുത്തു. ബുധനാഴ്ച്ച ഉച്ചയോടെയാണ് താമസക്കാർ ജോലിക്കും മറ്റുമായി പുറത്തുപോയ സമയത്ത് ഹോട്ടലുടമയുടെ നേതൃത്വത്തിൽ മുറികൾ വേറെ താഴിട്ട് പൂട്ടിയത്. ‌ഇതോടെ പ്രതിഷേധിച്ച താമസക്കാർ ഹോട്ടലിന് മുന്നിൽ കൂട്ടം കൂടുകയും ചർച്ചയ്ക്കെത്തിയ സബ് കളക്ടറെ രാത്രി തടഞ്ഞു വയ്ക്കുകയും ചെയ്തിരുന്നു.

അദ്വൈതാശ്രമ പരിസരത്തെ കൊടികൾ മാറ്റിയ സംഭവം : ആലുവ നഗരസഭയിലേക്ക് പ്രതിഷേധ മാർച്ചുമായി സംഘടനകൾ

ആലുവ: ഗുരുദേവ ജയന്തിയുടെ ഭാഗമായി അദ്വൈതാശ്രമത്തിൽ സ്ഥാപിച്ചിരുന്ന പീതപതാകകളും ബോർഡുകളും വലിച്ചെറിഞ്ഞതിൽ പ്രതിഷേധിച്ച് ആലുവ നഗരസഭാ ഓഫീസിലേക്ക് വിവിധ സംഘടനകൾ പ്രതിഷേധ മാർച്ചുകൾ നടത്തി. ഇതിനിടയിൽ മഞ്ഞുരുക്കാൻ അൻവർ സാദത്ത് എംഎൽഎ, മുനിസിപ്പൽ ചെയർമാൻ എം.ഒ. ജോൺ എന്നിവർ അദ്വൈതാശ്രമം സന്ദർശിച്ച്‌ സെക്രട്ടറി സ്വാമി ധർമ ചൈതന്യയുമായി ആശയവിനിമയം നടത്തി. ബന്ധപ്പെട്ട ഉദ്യോഗസ്ഥർക്കെതിരെ ശക്തമായ നടപടി സ്വീകരിക്കണമെന്ന് അൻവർ സാദത്ത് എംഎൽഎ ആവശ്യപ്പെട്ടു. അദ്വൈതാശ്രമത്തിന്‍റെ ആഭിമുഖ്യത്തിലാണ് ആദ്യ പ്രതിഷേധ മാർച്ച് ആലുവ നഗരസഭ ഓഫീസിലേക്ക് നടന്നത്. അദ്വൈതാശ്രമത്തിൽ നിന്നും നൂറുകണക്കിന് ശ്രീനാരായണീയർ പങ്കെടുത്ത മാർച്ച് നഗരസഭ കവാടത്തിൽ ആലുവ പോലീസ് തടഞ്ഞു. തുടർന്ന് നടന്ന പ്രതിഷേധ യോഗം അദ്വൈതാശ്രമം സെക്രട്ടറി സ്വാമി ധർമ്മചൈതന്യ ഉദ്ഘാടനം ചെയ്തു. എസ്എൻഡിപി യൂണിയൻ പ്രസിഡന്‍റ് വി. സന്തോഷ് ബാബു അധ്യക്ഷനായി. സിപിഎം പ്രവർത്തകരുടെ നേതൃത്വത്തിൽ ഇതേ ആവശ്യം ഉന്നയിച്ച് പ്രതിഷേധ മാർച്ച് നടത്തി. ഉദ്യോഗസ്ഥരെ പുറത്താക്കണം എന്നാവശ്യപ്പെട്ട് സെക്രട്ടറിയുടെ മുറിയിൽ കയറി പ്രവർത്തകർ മുദ്രാവാക്യം വിളിച്ച് ബഹളം ഉണ്ടാക്കി. എല്ലാവരെയും പോലീസ് സമാധാനപ്പെടുത്തി തിരിച്ചയച്ചു. ബിജെപി പ്രവർത്തകരും നഗരസഭാ സെക്രട്ടറിയെ ഉപരോധിച്ചു. ഉത്തരവാദികളായ ഉദ്യോഗസ്ഥർക്കെതിരെ ശക്തമായ നടപടി ആവശ്യപ്പെട്ടായിരുന്നു ഉപരോധം. ബിജെപി ജില്ലാ സെക്രട്ടറി എ. സെന്തിൽകുമാർ, മണ്ഡലം ജനറൽ സെക്രട്ടറി എൻ. ശ്രീകാന്ത്, കൗൺസിലർമാർ തുടങ്ങിയവർ നേതൃത്വം നൽകി. പ്രതിഷേധം ശക്തമായതോടെ ബിജെപി പ്രവർത്തകരെ പോലീസ്ബലം പ്രയോഗിച്ച് അറസ്റ്റുചെയ്ത് നീക്കി.

തിരുനാൾ

മലയാറ്റൂർ കുരിശുമുടിയില്‍ കാലടി: മലയാറ്റൂര്‍ കുരിശുമുടിയില്‍ കല്ലിട്ട തിരുനാളും വിശുദ്ധ കുരിശിന്‍റെ പുകഴ്ച്ചയുടെ തിരുനാളും 14ന്. രാവിലെ ആറിനും 7.30 നും, 9.30 നും വിശുദ്ധ കുര്‍ബാനയും മാര്‍ത്തോമ്മാ ശ്ലീഹായുടെ നൊവേനയും വിശുദ്ധകുരിശിനോടുള്ള പ്രത്യേക പ്രാര്‍ഥനയും ഉണ്ടായിരിക്കും. ഞാറക്കൽ പള്ളിയിൽ വൈപ്പിൻ : ഞാറക്കൽ സെന്‍റ് മേരീസ് പള്ളിയിലെ പുത്തരി തിരുനാളിനു വികാരി ഫാ. ജോർജ് ആത്തപ്പിള്ളി കൊടിയേറ്റി. 13ന് വൈകുന്നേരം നാലിന് ജപമാല. 4.30ന് തിരി ,രൂപം വെഞ്ചിരിപ്പ്. തുടർന്ന് ആഘോഷമായ ദിവ്യബലി. തുടർന്ന് പ്രദക്ഷിണം.14 നാണ് തിരുനാൾ. വൈകിട്ട് അഞ്ചിന് തിരുനാൾ ദിവ്യബലി. തുടർന്ന് പട്ടണ പ്രദക്ഷിണം. ചക്കരക്കടവ് പള്ളിയിൽ ചെറായി: ചക്കരക്കടവ് സെന്‍റ് റോസ് പള്ളിയിലെ തിരുനാളിനു ഫാ. ജോൺസൺ ഇലവുംകുടി കൊടികയറ്റി. ദിവ്യബലിക്ക് ഫാ. സിബി കൈതാരൻ കാർമികത്വം വഹിച്ചു. 14 നാണ് തിരുനാൾ. 13ന് വൈകിട്ട് ആഘോഷമായ തിരുനാൾ പാട്ടുകുർബാന. തുടർന്ന് പ്രദക്ഷിണം. 14 ന് രാവിലെ 9.30 ന് ആഘോഷമായ തിരുനാൾ പാട്ടുകുർബ്ബാന. തുടർന്ന് പ്രദക്ഷിണം. വിശുദ്ധ സ്ലീബാ പള്ളിയിൽ കാലടി: മറ്റൂര്‍ സെന്‍റ് ജോര്‍ജ് യാക്കോബായ സുറിയാനി പള്ളിയില്‍ വിശുദ്ധ സ്ലീബാ പെരുന്നാള്‍ 14 ന് ആഘോഷിക്കുന്നു. പഞ്ചസാര മണ്ഡ നേര്‍ച്ചയാണ് ശ്രദ്ധേയം. ആദ്യമായാണ് ഇവിടെ ഈ നേര്‍ച്ച വിഭവം തയാറാക്കുന്നത്.

സ്കൂൾ വളപ്പിൽനിന്ന് തെരുവുനായ്ക്കളെ പിടികൂടി

തൃപ്പൂണിത്തുറയിൽ സ്കൂളിന് അവധി നല്കി തൃപ്പൂണിത്തുറ: സ്കൂൾ വളപ്പിൽ തെരുവുനായ്ക്കളുടെ എണ്ണവും ആക്രമണവും വർധിച്ചതോടെ തൃപ്പൂണിത്തുറ നഗരസഭയുടെ നേതൃത്വത്തിൽ ഇന്നലെ രാവിലെ അഞ്ച് നായകളെ പിടികൂടി. തൃപ്പൂണിത്തുറ ഗവ. ഗേൾസ് സ്കൂളിന് അവധി നല്കിയ ശേഷമാണ് നഗരസഭയുടെ നേതൃത്വത്തിൽ തെരുവുനായ്ക്കളെ പിടികൂടിയത്. ഈ നായ്ക്കൾക്ക് വാക്സിനേഷൻ നൽകി മൃഗാശുപത്രിയിലുള്ള ഷെൽട്ടറിലേയ്ക്ക് മാറ്റി. പിടികൂടുന്നതിനിടെ സ്കൂൾ വളപ്പിൽനിന്ന് ഓടിപ്പോയ നായ്ക്കളെ രാത്രിയും പകലുമായി രണ്ട് ദിവസത്തിനകം പിടികൂടാനാണ് തീരുമാനം. വിദ്യാലയ പരിസരം തെരുവുനായ്ക്കളുടെ ആക്രമണത്തിൽ നിന്ന് സുരക്ഷിതമാക്കുന്നതിനായി വരുംദിവസങ്ങളിൽ ഗവ. ബോയ്സ് സ്കൂൾ, ഗവ. സംസ്കൃത സ്കൂൾ എന്നിവിടങ്ങളിൽ അലഞ്ഞുതിരിയുന്ന ‌നായ്ക്കളെയും പിടികൂടും. മൃഗസംരക്ഷണ വകുപ്പ് ഡെപ്യൂട്ടി ഡയറക്ടർ ഡോ. ലാലി, നഗരസഭാ സെക്രട്ടറി പി.കെ. സുഭാഷ്, വിദ്യാഭ്യാസ സ്ഥിരംസമിതി അധ്യക്ഷൻ യു.കെ. പീതാംബരൻ, കൗൺസിലർ കെ.ടി. അഖിൽ ദാസ് എന്നിവരുടെ സാന്നിധ്യത്തിലാണ് നായകളെ പിടികൂടി മൃഗാശുപത്രിയിലേക്ക് മാറ്റിയത്.

സര്‍ഗപഥം-2025ന് തുടക്കമായി

കൊച്ചി: തേവര സേക്രഡ് ഹാര്‍ട്ട് കോളജിലെ സ്പീക്കേഴ്‌സ് ഫോറത്തിന്‍റെ നേതൃത്വത്തില്‍ സംഘടിപ്പിക്കുന്ന ഇന്‍റര്‍ കോളിജിയേറ്റ് സാഹിത്യോത്സവം സര്‍ഗപഥം-2025 ന് തുടക്കമായി. രണ്ട് ദിവസമായി നടക്കുന്ന ഫെസ്റ്റിന്‍റെ ഔദ്യോഗിക ഉദ്ഘാടനം മനോരമ ന്യൂസ് ഡയറക്ടര്‍ ജോണി ലൂക്കോസ്, പ്രഫ. എം.എന്‍. കാരശേരി എന്നിവര്‍ ചേര്‍ന്ന് നിര്‍വഹിച്ചു. കോളജ് പ്രിന്‍സിപ്പല്‍ ഡോ. സി.എസ്. ബിജു, സ്റ്റാഫ് സെക്രട്ടറി ഡോ. റോബി ചെറിയാന്‍, സര്‍ഗപഥം കോ ഓര്‍ഡിനേറ്റര്‍ ഡോ. ടി.ജി.എബി, ഡോ. വിഷ്ണുരാജ് എന്നിവര്‍ സംസാരിച്ചു. ദേശീയതയുടെ നിര്‍വചനം എന്ന വിഷയത്തില്‍ സംഘടിപ്പിച്ച സിംപോസിയത്തില്‍ മനോരമ ന്യൂസ് ഡയറക്ടര്‍ ജോണി ലൂക്കോസ്, പ്രഫ. എം.എന്‍. കാരശേരി, രാഹുല്‍ ഈശ്വര്‍ എന്നിവര്‍ സംസാരിച്ചു. മോക്ക് പ്രസ്, നിമിഷ പ്രസംഗം, ഗ്രൂപ്പ് ഡിസ്‌കഷന്‍, ഉപന്യാസ രചന, ജനറല്‍ ക്വിസ് എന്നീ അഞ്ചിനങ്ങളില്‍ വിവിധ കോളജുകളില്‍ നിന്നായി നൂറിലേറെ വിദ്യാര്‍ഥികള്‍ പങ്കെടുക്കുന്നുണ്ട്. വിജയികള്‍ക്ക് ക്യാഷ്പ്രൈസും എവര്‍ റോളിംഗ് ട്രോഫിയും സമ്മാനമായി ലഭിക്കും.

വല്ലാർപാടം സ്കൂളിന് ആധുനിക സാനിറ്റേഷൻ സൗകര്യം

പാലാരിവട്ടം: വല്ലാർപാടം സെന്‍റ് മേരീസ് ഹയർ സെക്കൻഡറി സ്കൂളിൽ ആധുനിക സാനിറ്റേഷൻ സൗകര്യം നടപ്പിലാക്കി. ഡിപി വേൾഡ് കൊച്ചിയുടെ സഹകരണത്തോടെ എറണാകുളം സോഷ്യൽ സർവീസ് സൊസൈറ്റി (ഇഎസ്എസ്എസ്)യാണ് സാനിറ്റേഷൻ സൗകര്യം ഏർപ്പെടുത്തിയത്. കെ.എൻ. ഉണ്ണികൃഷ്ണൻ എംഎൽഎ ഉദ്ഘാടനം നിർവഹിച്ചു. ഡിപി വേൾഡ് കൊച്ചിൻ പീപ്പിൾ ഹെഡ് എ. പൂർണചന്ദർ അധ്യക്ഷത വഹിച്ചു. ഇഎസ്എസ്എസ് ഡയറക്ടർ റവ. ഡോ. ആന്‍റണി സിജൻ മണുവേലിപ്പറമ്പിൽ, മുളവുകാട് ഗ്രാമപഞ്ചായത്ത് പ്രസിഡന്‍റ് വി.എസ്. അക്ബർ, ഡിപി വേൾഡ് പ്രതിനിധി മഹേഷ് കുമാർ, ഫാ. ജയൻ പയ്യപ്പിള്ളി, ഫാ. മിക്സൺ റാഫേൽ പുത്തൻപറമ്പിൽ, പിടിഎ പ്രസിഡന്‍റ് സാബി ജോസഫ്, പ്രിൻസിപ്പൽ മേരി ജീന, ഹെഡ്മിസ്ട്രസ് ഇൻ ചാർജ് കെ.എം. ഷെർലി തുടങ്ങിയവർ പ്രസംഗിച്ചു.

43.7 കോടിയുടെ നിര്‍മാണത്തിന് തുടക്കം : കുമ്പളങ്ങി-അരൂര്‍ കെല്‍ട്രോണ്‍ പാലം യാഥാര്‍ഥ്യമാകുന്നു

കൊച്ചി: കുമ്പളങ്ങി-അരൂര്‍ കരകളെ തമ്മില്‍ ബന്ധിപ്പിക്കുന്ന കുമ്പളങ്ങി-കെല്‍ട്രോണ്‍ പാലത്തിന്‍റെ നിര്‍മാണ പ്രവൃത്തികള്‍ക്ക് തുടക്കമായി. എംഎല്‍എമാരായ കെ.ജെ. മാക്‌സി, ദലീമ ജോജോ എന്നിവര്‍ ചേര്‍ന്ന് നിര്‍മാണോദ്ഘാടനം നിര്‍വഹിച്ചു. പാലം യാഥാര്‍ഥ്യമാകുന്നതോടെ കുമ്പളങ്ങിയില്‍ നിന്ന് അരൂരിലേക്കും അരൂരില്‍ നിന്ന് കൊച്ചിയിലേക്കും കുറഞ്ഞ സമയത്തില്‍ സഞ്ചരിക്കാനാകുമെന്ന് കെ.ജെ. മാക്‌സി എംഎല്‍എ പറഞ്ഞു. കിഫ്ബി പദ്ധതിയില്‍ ഉള്‍പ്പെടുത്തി 43.7 കോടി രൂപ മുടക്കിയാണ് നിര്‍മാണം. 290.6 മീറ്റര്‍ നീളവും 11 മീറ്റര്‍ വീതിയുമുള്ള പാലം 36.2 മീറ്റര്‍ നീളത്തിലുള്ള എട്ടു സ്പാനുകളിലാണ് നിര്‍മിക്കുന്നത്. ഇരു കരകളിലും 140 മീറ്റര്‍ വരെ അപ്രോച്ച് റോഡുകളും നിര്‍മിക്കും. പാലത്തിന്‍റെ നിര്‍മാണ ചുമതല കേരള റോഡ് ഫണ്ട് ബോര്‍ഡിനാണ്.

നഷ്ടമായത് ജനകീയ അടിത്തറയുള്ള നേതാവിനെ: മുഹമ്മദ് ഷിയാസ്

കൊച്ചി: പി.പി. തങ്കച്ചന്‍റെ നിര്യാണത്തിലൂടെ കോണ്‍ഗ്രസിന് നഷ്ടപ്പെട്ടത് ജനകീയാടിത്തറയുള്ള നേതാവിനെയാണെന്ന് ഡിസിസി പ്രസിഡന്‍റ് മുഹമ്മദ് ഷിയാസ്. കെപിസിസി ആക്ടിംഗ് പ്രസിഡന്‍റും യുഡിഎഫ് കണ്‍വീനറുമായി അദ്ദേഹം പാര്‍ട്ടിയേയും മുന്നണിയേയും ഐക്യത്തോടെ നയിച്ചു. പ്രതിസന്ധി ഘട്ടങ്ങളില്‍ പക്വതയോടെ തീരുമാനങ്ങളെടുത്തു. സ്പീക്കറെന്ന നിലയിലും കൃഷിമന്ത്രി എന്ന നിലയിലും സംശുദ്ധമായ തീരുമാനങ്ങള്‍ എടുക്കുന്നതില്‍ അദ്ദേഹം ശ്രദ്ധ പുലര്‍ത്തിയിരുന്നു. ജില്ലയിലെ കോണ്‍ഗ്രസിന് കരുത്തുറ്റ നേതാവിനെയാണ് നഷ്ടമായതെന്നും ഷിയാസ് പറഞ്ഞു.

മൊബൈൽ ഫോൺ ഹാക്ക് ചെയ്തു മൂന്നര ലക്ഷം കവർന്നു

ആലുവ: മൊബൈൽ ഫോൺ ഹാക്ക് ചെയ്തു യുവാവിന്‍റെ മൂന്നര ലക്ഷം രൂപ ഓൺലൈൻ ബാങ്ക് അക്കൗണ്ട് വഴി കവർന്നതായി പരാതി. മൂക്കന്നൂർ പാലിമറ്റം മെബിൻ എമേഴ്സിന്‍റെ മൂന്നു ലക്ഷത്തി അമ്പത്തി എണ്ണായിരം രൂപയാണ് സ്മാർട്ട്ഫോൺ ഹാക്ക് ചെയ്ത് കവർന്നത്. യുകെ പ്രവാസിയായിരുന്ന മെബിന്‍റെ വിദേശ നമ്പറിലേക്ക് വന്ന ലിങ്ക് ഓപ്പൺ ചെയ്തതാണ് ബാങ്കിന്‍റെ പാസ്‌വേഡ് ചോരാൻ കാരണമെന്നാണ് കരുതുന്നത്. ലിങ്കിൽ ക്ലിക്ക് ചെയ്തപ്പോൾ യൂസർ നെയിമും പാസ്‌വേഡും ചോദിച്ചതോടെ സ്ക്രീൻ ബാക്ക് അടിച്ച്‌ പുറത്തുവന്നു. എന്നാൽ ജോലി കഴിഞ്ഞ് വൈകിട്ട് ബാങ്ക് സ്റ്റേറ്റ്മെന്‍റ് പരിശോധിച്ചപ്പോഴാണ് പണം നഷ്ടപ്പെട്ടതായി മെബിൻ അറിഞ്ഞത്. അങ്കമാലി ശാഖയിൽ ഉണ്ടായിരുന്ന പണമാണ് നഷ്ടപ്പെട്ടത്. പലപ്പോഴായി കേരളത്തിനു പുറത്താണ് പണം പിൻവലിച്ചത്. ആലുവ സൈബർ പോലീസ് സ്റ്റേഷനിൽ പരാതി നൽകി.

എന്‍റെ നാട് ജനകീയ കൂട്ടായ്മ ജനസമ്പർക്ക യാത്ര

കോതമംഗലം: എന്‍റെ നാട് ജനകീയ കൂട്ടായ്മയുടെ ഗാന്ധിദർശൻ പദ്ധതിയുടെ ഭാഗമായി കുട്ടമ്പുഴ പഞ്ചായത്തിലെ വടാട്ടുപാറ 26-ാം ബൂത്തിൽ നടത്തിയ ജനസമ്പർക്ക യാത്ര വാർഡ് മെമ്പർ രേഖ രാജു ഉദ്ഘാടനം ചെയ്തു. ബൂത്ത്‌ പ്രസിഡന്‍റ് സി.കെ. ജോയി അധ്യക്ഷത വഹിച്ചു. എന്‍റെ നാട് ചെയർമാൻ ഷിബു തെക്കുംപുറം മുഖ്യപ്രഭാഷണം നടത്തി. ഷാനിഫ അബു, ജയിംസ് കോറമ്പേൽ, പി.വി. വർഗീസ്, ദിനു ബിജു എന്നിവർ പ്രസംഗിച്ചു. തുടർന്ന് പണ്ടാരസിറ്റി മേഖലയിൽ ഭവന സന്ദർശനവും നടത്തി.

സമര പ്രചാരണജാഥയുടെ സംഘാടകസമിതി രൂപീകരിച്ചു

മൂവാറ്റുപുഴ: കെപിഎസ്ടിഎ സംസ്ഥാന സമിതി സംഘടിപ്പിക്കുന്ന സമര പ്രചാരണ ജാഥ മാറ്റൊലിയുടെ മൂവാറ്റുപുഴ വിദ്യാഭ്യാസ ജില്ലാതല സംഘാടക സമിതി രൂപീകരിച്ചു. 15ന് കാസര്‍ഗോഡ് നിന്നാരംഭിച്ച് എല്ലാ ജില്ലകളിലും പര്യടനം നടത്തി 27ന് തിരുവനന്തപുരം സെക്രട്ടറിയേറ്റില്‍ അധ്യാപക പ്രകടനത്തോടെ സമാപിക്കുന്ന രീതിയിലാണ് പരിപാടികള്‍ ക്രമീകരിച്ചിരിക്കുന്നത്. 23ന് വൈകുന്നേരം മൂന്നിന് മൂവാറ്റുപുഴയില്‍ ജാഥ എത്തിച്ചേരും. യോഗം എറണാകുളം റവന്യൂ ജില്ലാ പ്രസിഡന്‍റ് തോമസ് പീറ്റര്‍ ഉദ്ഘാടനം ചെയ്തു. വിദ്യാഭ്യാസ ജില്ല പ്രസിഡന്‍റ് ബിജു കെ. ജോണ്‍ അധ്യക്ഷത വഹിച്ചു. യോഗത്തില്‍ സംസ്ഥാന എക്‌സിക്യൂട്ടീവംഗം അജിമോന്‍ പൗലോസ്, സെലിന്‍ ജോര്‍ജ്, ജില്ലാ സെക്രട്ടറി ബിജു കുര്യന്‍, വിദ്യാഭ്യസ ജില്ലാ സെക്രട്ടറി അനൂബ് ജോണ്‍, ജോബി കുര്യാക്കോസ്, ടോംസണ്‍ പി. ജോസ്, ജൂണോ ജോര്‍ജ്, ബിന്‍സി മോള്‍ കുര്യന്‍, ബിസ്മി ജോര്‍ജ് എന്നിവര്‍ പ്രസംഗിച്ചു. രക്ഷാധികാരികളായി ഡീന്‍ കുര്യാക്കോസ് എംപി, മാത്യു കുഴല്‍നാടന്‍ എംഎല്‍എ, അനൂപ് ജേക്കബ് എംഎല്‍എ എന്നിവരെയും നഗരസഭാധ്യക്ഷന്‍ പി.പി. എല്‍ദോസ് - ചെയര്‍മാന്‍, കോണ്‍ഗ്രസ് ബ്ലോക്ക് പ്രസിഡന്‍റ് സാബു ജോണ്‍ - വൈസ് ചെയര്‍മാന്‍, യൂത്ത് കോണ്‍ഗ്രസ് സംസ്ഥാന സെക്രട്ടറി എല്‍ദോ ബാബു വടക്കാവില്‍ - വര്‍ക്കിംഗ് ചെയര്‍മാന്‍, സെലിന്‍ പി. ജോര്‍ജ് - ജനറല്‍ കണ്‍വീനര്‍, സെസില്‍ സി. ബാബു - ട്രഷറര്‍ എന്നിവരടങ്ങുന്ന 51 അംഗ സ്വാഗത സംഘം രൂപീകരിച്ചു.

മൊബൈൽ ഫോൺ ഹാക്ക് ചെയ്തു മൂന്നര ലക്ഷം രൂപ കവർന്നു

ആലുവ: മൊബൈൽ ഫോൺ ഹാക്ക് ചെയ്തു യുവാവിന്‍റെ മൂന്നര ലക്ഷം രൂപ ഓൺലൈൻ ബാങ്ക് അക്കൗണ്ട് വഴി കവർന്നതായി പരാതി. മൂക്കന്നൂർ പാലിമറ്റം മെബിൻ എമേഴ്സിന്‍റെ മൂന്നു ലക്ഷത്തി അമ്പത്തി എണ്ണായിരം രൂപയാണ് സ്മാർട്ട്ഫോൺ ഹാക്ക് ചെയ്ത് കവർന്നത്. യുകെ പ്രവാസിയായിരുന്ന മെബിന്‍റെ വിദേശ നമ്പറിലേക്ക് വന്ന ലിങ്ക് ഓപ്പൺ ചെയ്തതാണ് ബാങ്കിന്‍റെ പാസ്‌വേഡ് ചോരാൻ കാരണമെന്നാണ് കരുതുന്നത്. ലിങ്കിൽ ക്ലിക്ക് ചെയ്തപ്പോൾ യൂസർ നെയിമും പാസ്‌വേഡും ചോദിച്ചതോടെ സ്ക്രീൻ ബാക്ക് അടിച്ച്‌ പുറത്തുവന്നു. എന്നാൽ ജോലി കഴിഞ്ഞ് വൈകിട്ട് ബാങ്ക് സ്റ്റേറ്റ്മെന്‍റ് പരിശോധിച്ചപ്പോഴാണ് പണം നഷ്ടപ്പെട്ടതായി മെബിൻ അറിഞ്ഞത്.

പൂത്തിരി-രാസലഹരി വില്പന; കൂട്ടുപ്രതി ഒളിവില്‍ തന്നെ

കൊച്ചി: ഓണാഘോഷം കളറാക്കാന്‍ പൂത്തിരി എന്ന പ്രത്യേക കോഡില്‍ രാസലഹരി വില്പന നടത്തിയ അറസ്റ്റിലായ യുവാവിന്‍റെ കൂട്ടാളി ഇപ്പോഴും ഒളിവില്‍ തന്നെ. കേസിലെ രണ്ടാം പ്രതി പറവൂര്‍ സ്വദേശി ഷെഫീക്ക് ഹനീഫ ബംഗളൂരുവിലേക്ക് കടന്നെന്നാണ് എക്‌സൈസിന്‍റെ സംശയം. ഓഗസ്റ്റ് 19 നാണ് കേസുമായി ബന്ധപ്പെട്ട് ആലുവ ഈസ്റ്റ് കൊടികുത്തിമല സ്വദേശി മുറ്റത്ത് ചാലില്‍ വീട്ടില്‍ മുസാബിര്‍ മുഹമ്മദി (33) നെയാണ് 9.178 ഗ്രാം എംഡിഎംഎയുമായി എറണാകുളം റേഞ്ച് എക്‌സൈസ് സംഘം അറസ്റ്റ് ചെയ്തത്. ഇയാളുടെ സ്മാര്‍ട്ട് ഫോണും എക്‌സൈസ് കസ്റ്റഡിയിലെടുത്തിരുന്നു. നിലവില്‍ ഇയാള്‍ റിമാന്‍ഡിലാണ്. ബംഗളൂരുവില്‍നിന്ന് ആപ്പിള്‍, മുന്തിരി എന്നിവ കൊണ്ടുവരുന്ന ചരക്കുലോറിയിലാണ് കൊച്ചിയിലേക്ക് ലഹരി എത്തിച്ചിരുന്നത്. ഇവിടെ എത്തിക്കഴിഞ്ഞാല്‍ എറണാകുളം ഭാഗത്ത് ലോഡ് ഇറക്കാന്‍ തുടങ്ങുമ്പോള്‍ തന്നെ ലഹരിക്ക് പൈസ മുടക്കിയ ആള്‍ സാധനം എടുത്ത് കൊണ്ടുപോകും. തുടര്‍ന്ന് സമൂഹ മാധ്യമങ്ങളിലെ ഇവരുടെ പ്രത്യേക ഗ്രൂപ്പുകളിലൂടെ പൂത്തിരി ഓണായിട്ടുണ്ട് എന്ന കോഡ് നല്‍കി ഓണ്‍ലൈനായി പണം സ്വീകരിച്ചായിരുന്നു വില്പന.

ചെറുവട്ടൂര്‍-പായിപ്ര റോഡ് തകർന്നു : നാട്ടുകാർക്ക് ദുരിതയാത്ര

മൂവാറ്റുപുഴ: പൊതുമരാമത്തിന്‍റെ കീഴിലുള്ള ചെറുവട്ടൂര്‍-പായിപ്ര റോഡിലെ ഏനാലികുന്ന് ഭാഗത്തെ റോഡ് തകർച്ചയിലായിട്ടും അറ്റകുറ്റപ്പണികൾ നടത്താതെ അധികൃതർ. സ്വകാര്യ ബസുകള്‍ ഉള്‍പ്പെടെ ദിവസവും നൂറുകണക്കിന് വാഹനങ്ങള്‍ സഞ്ചരിക്കുന്ന റോഡില്‍ രൂപപ്പെട്ടിരിക്കുന്ന കുഴികള്‍ മൂലം ഗതാഗത തടസവും പതിവാണ്. ഇതിനു പുറമെ ഇവിടെ ജല അഥോറിറ്റിയുടെ പൈപ്പ്‌പൊട്ടി വെള്ളം ഒഴുകാന്‍ തുടങ്ങിയിട്ടും മാസങ്ങളായി. റോഡിലെ കുഴികളില്‍ വെള്ളം നിറഞ്ഞു കിടക്കുന്നതിനാല്‍ ഇരുചക്രവാഹനങ്ങള്‍ അകടത്തില്‍പ്പെടുന്നതും പതിവാണ്. ദിവസവും കുഴികളുടെ വിസ്താരം കൂടുകയാണ്. പ്രദേശത്തെ 40 പ്ലൈവുഡ് കമ്പനികളിലേക്ക് ദിവസേന നിരവധി തടിലോറികളാണ് ലോടുമായി ഇതിലൂടെ ഇരുവശത്തേക്കും പോകുന്നത്. കൂടാതെ നിരവധി സ്‌കൂള്‍ ബസുകളും ഇതുവഴി സഞ്ചരിക്കുന്നുണ്ട്. റോഡിന്‍റെ ശോച്യാവ്ഥയിൽ അധികൃതര്‍ യാതൊരു നടപടിയും സ്വീകരിക്കാത്തതില്‍ പ്രതിഷേധിച്ച് നാട്ടുകാര്‍ സമരത്തിനൊരുങ്ങുകയാണ്. പായിപ്ര കലയില്‍നിന്ന് തുടങ്ങുന്ന റോഡ് ചെറുവട്ടൂര്‍ വരെ അഞ്ച് കിലോമീറ്റര്‍ ദൂരമാണുള്ളത്. ഇതില്‍ മൂന്നര കിലോമീറ്റര്‍ ദൂരം മൂവാറ്റുപുഴ പിഡബ്ല്യുഡിയുടെ കൈവശത്തിലാണ്. ബാക്കിഭാഗം കോതമംഗലത്തിന് കീഴിലും. മൂവാറ്റുപുഴ ഭാഗത്തെ റോഡാണ് തകര്‍ന്നുകിടക്കുന്നത്. ഏനാലികുന്നില്‍ മാത്രമല്ല എസ്റ്റേറ്റ് പടിയിലും ഷാപ്പുംപടിയിലും സമഷ്ടിപടിയിലും റോഡ് തകര്‍ച്ചയിലാണ്. റോഡിന് ആവശ്യമായ വീതി ഇല്ലാത്തതും അപകടം വര്‍ധിക്കുന്നതിന് കാരണമാകുന്നുണ്ട്.

നവീകരിച്ച കോൺഫറൻസ് ഹാൾ തുറന്നു

കോലഞ്ചേരി: കോലഞ്ചേരി മിനി സിവിൽ സ്റ്റേഷനിലെ നവീകരിച്ച കോൺഫറൻസ് ഹാളിന്‍റെ ഉദ്ഘാടനം പി.വി. ശ്രീനിജിൻ എംഎൽഎ നിർവഹിച്ചു. മിനി സിവിൽ സ്റ്റേഷനിൽ പ്രവർത്തിക്കുന്ന സർക്കാർ ഓഫീസുകൾക്ക് കോൺഫറൻസ് ആവശ്യങ്ങൾക്കായി ഉപയോഗപ്പെടുത്താനാവും വിധമാണ് കോൺഫറൻസ് ഹാൾ നവീകരിച്ചിട്ടുള്ളത്. ഇതിന്‍റെ ഭാഗമായി സ്റ്റേജ്, ഫർണിച്ചർ, ആധുനിക രീതിയിലുള്ള സൗണ്ട് സിസ്റ്റം, ഇലക്ട്രോണിക്സ് സിസ്റ്റങ്ങൾ, സ്മാർട്ട് പ്രൊജക്ടർ തുടങ്ങിയവ സജീകരിച്ചിട്ടുണ്ട്. കുന്നത്തുനാട് എംഎൽഎ യുടെ ആസ്തി വികസന ഫണ്ടിൽനിന്നും 15 ലക്ഷം രൂപ ചെലവഴിച്ചാണ് ഹാൾ നവീകരിച്ചത്. കോലഞ്ചേരി വിദ്യാഭ്യാസ ഉപജില്ല ഓഫീസർ മേഖലാ പി.ആർ. അധ്യക്ഷത വഹിച്ച യോഗത്തിൽ പിഡബ്ല്യുഡി അസി. എക്സിക്യൂട്ടീവ് എൻജിനീയർ കെ.സി. സുമിത, അസി.എൻജിനീയർ അഞ്ജലി ഷാജി, ഹെഡ്മാസ്റ്റേഴ്സ് ഫോറം സെക്രട്ടറി അനിയൻ പി. ജോൺ, സബ് ട്രഷറി ഓഫീസർ പി.പി. അജികുമാർ, എഇഒ സീനിയർ സൂപ്രണ്ട് കെ. നോബി, ഫുഡ് സേഫ്റ്റി ഓഫീസർ രേഷ്മ രത്നാകരൻ, മണ്ണ് സംരക്ഷണ ഓഫീസർ എം.എസ്. സുനിത, ഫോറം പ്രസിഡന്‍റ് സന്തോഷ് പ്രഭാകർ എന്നിവർ പ്രസംഗിച്ചു.

ദീപിക നമ്മുടെ ഭാഷ പദ്ധതി

പോത്തനിക്കാട്: പോത്താനിക്കാട് ഗവ എൽ പി സ്കൂളിൽ ദീപിക നമ്മുടെ ഭാഷ പദ്ധതിക്ക് തുടക്കമായി. പൗരാവകാശ പരിസ്ഥിതി സംരക്ഷണ ഫോറം ചെയർമാൻ ബെന്നി പോൾ ഉദ്ഘാടനം നിർവഹിച്ചു. പിടിഎ പ്രസിഡന്‍റ് കെ.ഡി. പ്രജീഷ് അധ്യക്ഷത വഹിച്ചു. പൗരാവകാശ പരിസ്ഥിതി സംരക്ഷണ ഫോറമാണ് സ്കൂളിലേക്ക് പത്രം സ്പോൺസർ ചെയ്തിരിക്കുന്നത്. ഭാരവാഹികളായ സാജു ആന്‍റണി, സണ്ണി ജോസഫ്, സജി മീനാം കുടി, ടി.പി. ഐസക്, പ്രധാനാധ്യാപകൻ ബിനു ജോസഫ്, ദീപിക ഏരിയാ മാനേജർ ജോഷി കുര്യൻ, സിജോ മോൾ പി. ജോൺ എന്നിവർ പ്രസംഗിച്ചു.

സംയുക്ത ഫൊറോന കണ്‍വന്‍ഷന്‍ ഇന്ന്

മാറിക: ദീപിക ഫ്രണ്ട്സ് ക്ലബ്, ഫാമിലി അപ്പോസ്തലേറ്റ് എന്നിവയുടെ മാറിക ഫൊറോന തല കണ്‍വന്‍ഷന്‍ ഇന്ന് ഉച്ചകഴിഞ്ഞ് 2.30 മുതല്‍ സെന്‍റ് ജോസഫ്സ് പള്ളി പാരിഷ് ഹാളില്‍ നടക്കും. രൂപത വികാരി ജനറാള്‍ മോണ്‍. വിന്‍സെന്‍റ് നെടുങ്ങാട്ട് ഉദ്ഘാടനം ചെയ്യും. ഫൊറോന ഡയറക്ടര്‍ ഫാ. മാത്യു കോണിക്കല്‍ അധ്യക്ഷത വഹിക്കും. രൂപത ഡയറക്ടര്‍ ഫാ. ആന്‍റണി പുത്തന്‍കുളം, ദീപിക ജനറല്‍ മാനേജര്‍ (സര്‍ക്കുലേഷന്‍) ഫാ. ജിനോ പുന്നമറ്റത്തില്‍ എന്നിവര്‍ ക്ലാസ് നയിക്കും. ഡിഎഫ്സി സംസ്ഥാന ഉപദേശക സമിതി ചെയര്‍മാന്‍ ജോയി നടുക്കുടി, ഡിഎഫ്സി സംസ്ഥാന പ്രസിഡന്‍റ് ലോറന്‍സ് കെ. ഏബ്രഹാം, രൂപത പ്രസിഡന്‍റ് ഡിഗോള്‍ കെ. ജോര്‍ജ്, തോമസ് കുണിഞ്ഞി, ജോസഫ് മൂലശേരി, ജോണ്‍സണ്‍ പൊന്നാട്ട് എന്നിവര്‍ പ്രസംഗിക്കും.

ഹയര്‍ സ്റ്റഡി എക്സ്പോ "മിനി ദിശ'

മൂവാറ്റുപുഴ: പൊതുവിദ്യാഭ്യാസ വകുപ്പ് ഹയര്‍ സെക്കന്‍ഡറി വിംഗ് കരിയര്‍ ഗൈഡന്‍സ് ആൻഡ് അഡോളസന്‍റ് കൗണ്‍സലിംഗ് സെല്ലിന്‍റെ ആഭിമുഖ്യത്തില്‍ ഹയര്‍ സ്റ്റഡി എക്സ്പോ "മിനി ദിശ' 2025 സംഘടിപ്പിച്ചു. മൂവാറ്റുപുഴ തര്‍ബിയത്ത് ഹയര്‍ സെക്കന്‍ഡറി സ്‌കൂള്‍ ഓഡിറ്റോറിയത്തില്‍ സംഘടിപ്പിച്ച എക്സ്പോ എറണാകുളം ആര്‍ഡിഡി ഡോ. ഡി.ജെ. സതീഷ് ഉദ്ഘാടനം ചെയ്തു. ദീര്‍ഘകാലം എറണാകുളം ജില്ലാ കോ-ഓര്‍ഡിനേറ്ററായി പ്രവര്‍ത്തിച്ചിരുന്ന ഡോ. സി.എ ബിജോയിയെ ചടങ്ങില്‍ ആദരിച്ചു. ജില്ലാ കോ-ഓര്‍ഡിനേറ്റര്‍ ശങ്കരനാരായണന്‍ അധ്യക്ഷത വഹിച്ചു.

കാടുമൂടി പെരിയാര്‍വാലി കനാല്‍ ബണ്ട് റോഡുകൾ; ദുരിതത്തിൽ യാത്രികർ

കോതമംഗലം: പെരിയാര്‍വാലി കനാല്‍ ബണ്ട് റോഡുകളുടെ ഇരുവശവും കാടുമൂടി യാത്ര ദുരിതമായി. പിണ്ടിമന പഞ്ചായത്തിലെ ചെങ്കരക്കും മുത്തംകുഴിക്കും ഇടയിലാണ് പ്രധാനമായും കാട് മൂടിക്കിടക്കുന്നത്. വീതി കുറവുള്ള റോഡിന്‍റെ ഇരുവശത്തും കാട് വളര്‍ന്നിരിക്കുകയാണ്. ഒരാള്‍ പൊക്കത്തില്‍ പുല്‍ച്ചെടികളും കുറ്റിച്ചെടികളും നിറഞ്ഞിട്ടുണ്ട്. ചിലയിടങ്ങളില്‍ വലിയ മരങ്ങള്‍തന്നെയുണ്ട്. ഇടതൂര്‍ന്ന കാട് വാഹനങ്ങള്‍ക്കും കാല്‍നടക്കാര്‍ക്കും ബുദ്ധിമുട്ടായിരിക്കുകയാണ്. എതിരേ വരുന്ന വാഹനങ്ങളുടെ കാഴ്ച മറക്കുന്നതാണ് ഒരു പ്രശ്‌നം. റോഡിന്‍റെ വീതി മനസിലാക്കി സൈഡ് കൊടുക്കാനും ബുദ്ധിമുട്ട് നേരിടുന്നു. കാട് വെട്ടിമാറ്റാന്‍ എത്രയും വേഗം തയാറാകണമെന്നാണ് നാട്ടുകാരുടെ ആവശ്യം.

കച്ചേരിത്താഴം ഗര്‍ത്തം മൂടുന്നതിനുള്ള അന്തിമ അനുമതി നല്‍കി കിഫ്ബി

മൂവാറ്റുപുഴ: കച്ചേരിത്താഴത്ത് രൂപപ്പെട്ട ഗര്‍ത്തം മൂടുന്നതിന് തീരുമാനമായി. വിദഗ്ധ പരിശോധനകള്‍ക്കും അന്തിമ റിപ്പോര്‍ട്ടിനും ശേഷം ഇന്നലെ തിരുവനന്തപുരത്ത് ചേര്‍ന്ന കിഫ്ബിയുടെ ഉന്നത അധികാരയോഗത്തിലാണ് തീരുമാനമെന്ന് മാത്യു കുഴല്‍നാടന്‍ എംഎല്‍എ പറഞ്ഞു. ഗര്‍ത്തം മൂടുന്നതിനു മുന്‍പായി ഗര്‍ത്തം ഉണ്ടാകുന്നതിന് കാരണമായി കണ്ടെത്തിയ ബലക്ഷയം സംഭവിച്ച കല്‍ക്കെട്ടുകൊണ്ടുള്ള പഴയ ഓവുചാൽ പൂര്‍ണമായും മൂടാനും തീരുമാനമായി. എന്‍സിഇഎസ്എസ് സംഘത്തിന്‍റെ പരിശോധനയില്‍ ഈ ഭാഗത്ത് രണ്ട് ഓവുചാലുകളാണുള്ളതെന്നു കണ്ടെത്തിയിരുന്നു. നിലവിലെ റോഡ് നിരപ്പില്‍നിന്നും ഒന്നര മീറ്റര്‍ താഴ്ചയില്‍ ആരംഭിച്ചു പുഴയിലേക്ക് എത്തുമ്പോള്‍ ഏഴു മീറ്റര്‍ താഴ്ചയിലേക്ക്പതിക്കുന്നതാണ് ഈ രണ്ട് ഓവുചാലുകളും. പ്രഷര്‍ സിമന്‍റ് ഗ്രൗട്ട് ഉപയോഗിച്ചാണ് ഈ രണ്ട് ഓവുചാലുകളും അടയ്ക്കാന്‍ തീരുമാനിച്ചിരിക്കുന്നത്. പഴയ ഓവുചാലുകൾ ഒഴിവാക്കുന്നതിനാല്‍ റോഡിന്‍റെ ഇരുവശത്തും പുതിയതായി നിര്‍മിച്ചിരിക്കുന്ന പ്രീ കാസ്റ്റ് ഡക്റ്റ് വഴിയുള്ള ഓടയുടെ തുടര്‍ച്ചയായി പുഴയിലേക്ക് പുതിയ ഓവുചാലുകളുടെ നിര്‍മാണവും ആരംഭിച്ചു. കച്ചേരിത്താഴത്ത് ഇന്ത്യന്‍ ബേക്കറിയുടെ മുന്‍വശത്തുള്ള ഓടയിലെ ജലം നഗരസഭയുടെ സ്ഥലത്തിലൂടെ പുഴയിലേക്ക് തിരിച്ചുവിടാനും, മറുഭാഗത്ത് രാജേശ്വരി ഹോട്ടലിന്‍റെ മുന്‍വശം വരെ എത്തിയിരിക്കുന്ന പുതിയ പ്രീ കാസ്റ്റ് ഡക്റ്റ് വഴിയുള്ള ഓടയുടെ തുടര്‍ച്ചയായി ഹ്യും പൈപ്പ് ഉപയോഗിച്ച് പുതിയ ഓവുചാൽ നിര്‍മിച്ചും പുഴയിലേക്ക് ബന്ധിപ്പിക്കും. തിരുവനന്തപുരത്ത് ചേര്‍ന്ന കിഫ്ബിയുടെ ഉന്നതാധികാര യോഗത്തില്‍ മാത്യു കുഴല്‍നാടന്‍ എംഎല്‍എ, കിഫ്ബി ജനറല്‍ മാനേജര്‍ പി.എ. ഷൈല, കിഫ്ബി എക്‌സിക്യൂട്ടീവ് ഡയറക്ടര്‍ പുരുഷോത്തമന്‍, കിഫ്ബി പ്രോജക്ട് മാനേജര്‍ രാജീവന്‍, കെആര്‍എഫ്ബി എക്‌സിക്യൂട്ടീവ് എന്‍ജിനീയര്‍ ജയരാജ് തുടങ്ങിയവര്‍ പങ്കെടുത്തു.

ഇരുചക്ര വാഹനമിടിച്ച് വയോധിക മരിച്ചു

മഞ്ഞപ്ര : റോഡ് മുറിച്ചു കടക്കവെ, ഇരുചക്ര വാഹനമിടിച്ച് വയോധിക മരിച്ചു. ചന്ദ്രപ്പുര കരിങ്ങേൻ പാപ്പുവിന്‍റെ ഭാര്യ മേരി (81)യാണ് മരിച്ചത്. പരേത വെള്ളാരപ്പിള്ളി പുത്തൻപുരയ്ക്കൽ കുടുംബാംഗമാണ്. വ്യാഴാഴ്ച രാവിലെ സ്വന്തം വീടിനു മുന്നിലായിരുന്നു അപകടം. പരിക്കേറ്റ മേരിയെ എറണാകുളത്തുള്ള സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. സംസ്കാരം പിന്നീട്. മക്കൾ: മോളി, ബെന്നി,വിൽസൺ, സിൽവി. മരുമക്കൾ: ചാക്കോച്ചൻ, ജോയ്, അർച്ചന, റെജി.

മത്സ്യബന്ധനത്തിനിടെ പരിക്കേറ്റ തൊഴിലാളി മരിച്ചു

പറവൂർ: മത്സ്യബന്ധനത്തിനിടെ ബോട്ടിൽ വീണു പരിക്കേറ്റ് ചികിത്സയിലായിരുന്ന തൊഴിലാളി മരിച്ചു. മാല്യങ്കര മാസമ്പടന്ന വീട്ടിൽ രമേഷ് (57) ആണ് മരിച്ചത്. കഴിഞ്ഞ ദിവസം കായംകുളം ഭാഗത്തായിരുന്നു അപകടം. കൊടുങ്ങല്ലൂരിലെ സ്വകാര്യ ആശുപത്രിയിൽ ചികിത്സയിലിരിക്കേയാണ് മരിച്ചത്. സംസ്കാരം ഇന്ന് പകൽ രണ്ടിന് ചെറായി ശ്മശാനത്തിൽ. ഭാര്യ: പ്രീത. മക്കൾ: അക്ഷയ്, അതുൽ. മരുമക്കൾ: രശ്മി, ശില്പ.

അവശനിലയിൽ കണ്ടെത്തിയ യുവാവ് മരിച്ചു

വാഴക്കുളം: റോഡിൽ അവശനിലയിൽ കണ്ടെത്തിയ യുവാവ് മരിച്ചു. കല്ലൂർക്കാട് ചാറ്റുപാറ പൊൻപനാൽ പ്രസന്നന്‍റെ മകൻ പ്രദീപ് (36) ആണ് മരിച്ചത്. ബുധനാഴ്ച രാത്രി പതിനൊന്നോടെ പാണംകുട്ടിപ്പാറ - തോണിക്കുഴി ലിങ്ക് റോഡിൽ പ്രദീപിനെ വീണു കിടക്കുന്ന നിലയിൽ പ്രദേശവാസികൾ കണ്ടെത്തുകയായിരുന്നു. വിവരമറിയിച്ചതിനെ തുടർന്ന് കല്ലൂർക്കാട് അഗ്നിശമന സേനയെത്തി തൊടുപുഴ കാരിക്കോട് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പോസ്റ്റുമോർട്ടത്തിനുശേഷം സംസ്കാരം നടത്തി. നട്ടെല്ലിനും വാരിയെല്ലുകൾക്കും ഗുരുതരമായി പരിക്കേറ്റ നിലയിലായിരുന്നു. പെയിന്‍റിംഗ് തൊഴിലാളിയാണ്. ഏതെങ്കിലും വാഹനം ഇടിച്ചതാണോ അപകട കാരണമെന്ന് കല്ലൂർക്കാട് പോലീസ് അന്വേഷണം നടത്തുന്നുണ്ട്. മാതാവ്: വിലാസിനി. സഹോദരി: പ്രിയ.

ആഡംബര വാഹനത്തിൽ കഞ്ചാവ് കടത്ത്; എട്ടു കിലോ പിടികൂടി

പെരുമ്പാവൂർ: ആഡംബര വാഹനത്തിൽ കഞ്ചാവ് കടത്ത്. എട്ട് കിലോ കഞ്ചാവുമായി രണ്ട് ഇതരസംസ്ഥാനക്കാർ പിടിയിൽ. പശ്ചിമ ബംഗാൾ മൂർഷിദാബാദ് മധുബോണ സ്വദേശി മണിറുൽ മണ്ഡൽ (27), സോൺജൂർ മണ്ഡൽ (25) എന്നിവരെയാണ് പെരുമ്പാവൂർ എഎസ്പിയുടെ പ്രത്യേക അന്വേഷണസംഘവും കോടനാട് പോലീസും ചേർന്ന് പിടികൂടിയത്. ബുധനാഴ്ച പുലർച്ചെ കൂവപ്പടി പാപ്പൻപടി ഭാഗത്തുവച്ച് കഞ്ചാവ് കൈമാറാൻ നിൽക്കുന്നതിനിടെ ആണ് ഇവരെ കസ്റ്റഡിയിലെടുത്തത്. ഒഡീഷയിൽ നിന്ന് ടാറ്റ ഹാരിയർ കാറിലാണ് ഇവർ കഞ്ചാവുമായി എത്തിയത്. പശ്ചിമബംഗാൾ രജിസ്‌ട്രേഷനിലുള്ള കാറിന്‍റെ നമ്പർ പ്ലേറ്റ് ഊരി മാറ്റി കേരള രജിസ്‌ട്രേഷനിലുള്ള കാറിന്‍റെ നമ്പർ ഘടിപ്പിച്ച് കഞ്ചാവ് കടത്തുകയായിരുന്നു.രഹസ്യവിവരത്തെ തുടർന്ന് കുറച്ചുനാളുകളായി ഇവർ അന്വേഷണസംഘത്തിന്‍റെ നിരീക്ഷണത്തിലായിരുന്നു. ഒഡീഷയിൽ നിന്ന് കിലേയ്ക്ക് 2000 രൂപയ്ക്ക് വാങ്ങുന്ന കഞ്ചാവ് ഇവിടെ 25000 രൂപ മുതൽ 30,000 വരെ നിരക്കിൽ വിൽപ്പന നടത്തി വരികയായിരുന്നു.. കഞ്ചാവ് വില്പന കഴിഞ്ഞ് അന്ന് തന്നെ നാട്ടിലേക്ക് മടങ്ങി പോകുന്നതായിരുന്നു ഇവരുടെ രീതി. കഴിഞ്ഞയാഴ്ച കാറിൽ കടത്തിയ 90 കിലോ കഞ്ചാവ് തടിയിട്ടപറമ്പ് പോലീസ് സ്റ്റേഷൻ പരിധിയിൽ വച്ച് പ്രത്യേക അന്വേഷണ സംഘം പിടികൂടിയിരുന്നു.

മണപ്പുറത്ത് മണൽ മാഫിയ വിളയാട്ടം; തോക്കു ചൂണ്ടി ഭീഷണിപ്പെടുത്തി പണംതട്ടാൻ ശ്രമിച്ചെന്ന് കേസ്

ആലുവ: മണൽ മാഫിയ മർദിച്ചെന്നാരോപിച്ച് പരാതി നൽകിയ കേസിലെ വാദികൾക്കെതിരേ തോക്കു ചൂണ്ടി ഭീഷണിപ്പെടുത്തി പണം തട്ടാൻ ശ്രമിച്ചെന്ന പേരിൽ ആലുവ പോലീസ് കേസെടുത്തു. ആലുവ ഉളിയന്നൂർ ചിതകുടത്ത് വീട്ടിൽ കബീർ, തോട്ടക്കാട്ടുകര മണപ്പുറം റോഡിൽ കയനാട്ട് വീട്ടിൽ ആന്‍റണി മാർട്ടിൻ, മണപ്പുറം റോഡിൽ താമസിക്കുന്ന അമൽകൃഷ്ണ, വിമൽ, രാഹുൽ എന്നിവർക്കെതിരെയാണ് ആലുവ കോടതിയുടെ നിർദേശപ്രകാരം കേസെടുത്തത്. മാർച്ച് 19ന് പുലർച്ചെ രണ്ടോടെ തോട്ടക്കാട്ടുകര മണപ്പുറം ഭാഗത്തുവച്ച് ഭീഷണിപ്പെടുത്തി ഗൂഗിൾപേ വഴി 10,000 രൂപ തട്ടിയെടുത്തെന്നാണ് പരാതി. ഉളിയന്നൂർ പനിച്ചിക്കുഴി പി.എം. ഷാജഹാൻ, സഹോദരൻ നിഷാദ് എന്നിവരുടെ പരാതിയിലാണ് കേസ്. മണൽലോറി തടഞ്ഞുനിർത്തി പോലീസിനെ അറിയിച്ചെന്നാരോപിച്ച് ആന്‍റണി മാർട്ടിനെ മണലൂറ്റുകാർ ആക്രമിച്ചിരുന്നു. സംഭവവുമായി ബന്ധപ്പെട്ട് പി.എം. ഷാജഹാനും സഹോദരൻ നിഷാദും പോലീസ് പിടിയിലായിരുന്നു. ആലുവ മണപ്പുറം കേന്ദ്രീകരിച്ച് നടക്കുന്ന മണലൂറ്റുകാരും ഗുണ്ടാ സംഘങ്ങളും തമ്മിലുള്ള അവിഹിത സാമ്പത്തിക ഇടപാടുകളുടെ തുടർച്ചയായിട്ടായിരുന്നു മർദ്ദനം. തൊട്ടടുത്ത ദിവസം ഇതേ അക്രമിസംഘം തോക്കുചൂണ്ടി ഭീഷണിപ്പെടുത്തി വീണ്ടും പണം തട്ടാൻ ശ്രമിച്ചു. ജൂൺ 11ന് മാർക്കറ്റ് ഭാഗത്തുവച്ച് മാരകായുധങ്ങളുമായി ആക്രമിച്ചു എന്നീ കുറ്റങ്ങളാണ് പ്രതികളുടെ മേൽ ചുമത്തിയിരിക്കുന്നത്. ഇന്നലെയാണ് കേസ് രജിസ്റ്റർ ചെയ്തത്. നേരത്തെ അനധികൃത മണലൂറ്റുകാരെ പിടികൂടിയിരുന്നവരാണ് പിന്നീട് ഇടനിലക്കാരായി നിന്ന് പണം തട്ടിയത്. പ്രതികൾക്കെതിരേ ജാമ്യമില്ലാ വകുപ്പ് പ്രകാരമാണ് കേസ്. എഫ്ഐആറിൽ മണൽ ഇടപാടുമായി ബന്ധപ്പെട്ട സംഘ‌ർഷമാണെന്ന് രേഖപ്പെടുത്തിയിട്ടില്ല.

വികസന രംഗത്ത് സര്‍ക്കാര്‍ വട്ടപ്പൂജ്യം: രമേശ് ചെന്നിത്തല

കൊച്ചി: വികസന രംഗത്ത് കേരളത്തിലെ സര്‍ക്കാര്‍ വട്ടപ്പൂജ്യമെന്ന് കോണ്‍ഗ്രസ് പ്രവര്‍ത്തക സമിതിയംഗം രമേശ് ചെന്നിത്തല. പത്തു വര്‍ഷം കേരളം ഭരിച്ച പിണറായി വിജയന് ഉയര്‍ത്തിക്കാട്ടാന്‍ ഒരു പദ്ധതിപോലും നടപ്പാക്കാനായില്ലെന്നും, വരുന്ന പദ്ധതികളെ മുടക്കാനാണ് സര്‍ക്കാര്‍ ശ്രമിക്കുന്നതെന്നും അദ്ദേഹം പറഞ്ഞു. അങ്കമാലി-കുണ്ടന്നൂര്‍ ബൈപ്പാസ് സർക്കാർ വൈകിപ്പിക്കുന്നെന്ന് ആരോപിച്ച് ജില്ലയിലെ ജനപ്രതിനിധികള്‍ സംഘടിപ്പിച്ച ധര്‍ണ കാക്കനാട് കളക്ടറേറ്റിനു മുന്നില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സംസ്ഥാനത്ത് മഞ്ഞക്കുറ്റി സ്ഥാപിക്കുക മാത്രമാണ് സര്‍ക്കാര്‍ ചെയ്യുന്നത്. വര്‍ഷങ്ങളായി അങ്കമാലി-ശബരിപാതയുടെ സ്ഥിതിയും മറിച്ചല്ല, അങ്കമാലിയില്‍ സര്‍ക്കാര്‍ പ്രഖ്യാപിച്ച ഗിഫ്റ്റ് സിറ്റി ഇതുവരെ ഒന്നുമായിട്ടില്ല, കൊച്ചി-പാലക്കാട് വ്യവസായ ഇടനാഴി പ്രഖ്യാപിച്ച് വര്‍ഷങ്ങളായി, തോമസ് ഐസക്കിന്‍റെ കാലം മുതല്‍ എല്ലാ ബജറ്റിലും പ്രഖ്യാപനം ഉണ്ടെങ്കിലും പ്രവര്‍ത്തനം ഇതുവരെ തുടങ്ങിയിട്ടില്ലെന്നും രമേശ് ചെന്നിത്തല കുറ്റപ്പെടുത്തി. എംപിമാരായ ബെന്നി ബഹനാന്‍, ഹൈബി ഈഡന്‍, എംഎല്‍എമാരായ റോജി എം. ജോണ്‍, കെ. ബാബു, അനൂപ് ജേക്കബ്, അന്‍വര്‍ സാദത്ത്, ടി.ജെ. വിനോദ്, ഉമ തോമസ്, എല്‍ദോസ് കുന്നപ്പിള്ളി എന്നിവരാണ് സര്‍ക്കാര്‍ അനാസ്ഥയ്‌ക്കെതിരെ കളക്ട്രേറ്റിനു മുന്നില്‍ ധര്‍ണാ സമരം നടത്തിയത്. എറണാകുളത്തിന്‍റെ സമഗ്ര വികസനത്തിന് ഉപകാരപ്രദമാകുന്ന പദ്ധതി സര്‍ക്കാരിന്‍റെ അനാസ്ഥ മൂലം അനശ്ചിതാവസ്ഥയിലാണെന്ന് ജന പ്രതിനിധികള്‍ ആരോപിച്ചു. ഡിസിസി പ്രസിഡന്‍റ് മുഹമ്മദ് ഷിയാസ് അധ്യക്ഷത വഹിച്ചു. നേതാക്കളായ ജോസഫ് വാഴയ്ക്കന്‍, ഡൊമിനിക് പ്രസന്‍റേഷന്‍, വി.പി. സജീന്ദ്രന്‍, ജയ്‌സണ്‍ ജോസഫ്, ഐ.കെ. രാജു, എം.ഒ. ജോണ്‍ എന്നിവര്‍ പങ്കെടുത്തു.

‘കുടിയുണ്ടെങ്കിൽ ലോക്കലിൽ വേണ്ട’; സിപിഎം പഠന ക്ലാസുകൾ തുടങ്ങി

കൊച്ചി: സിപിഎം സംസ്ഥാന കമ്മിറ്റിയുടെ തീരുമാനപ്രകാരമുള്ള പഠന ക്ലാസുകളും സംഘടനാ ചർച്ചകളും ജില്ലയിൽ ആരംഭിച്ചു. ജില്ലയിലെ 16 ഏരിയ കമ്മിറ്റികളിലും സംഘടനാ ചർച്ചകൾ പൂർത്തിയായി. ലോക്കൽ കമ്മറ്റികളിൽ ചർച്ചകൾ നടന്നുവരികയാണ്. ദിവസം രണ്ടു ലോക്കൽ കമ്മിറ്റികളിൽ വീതമാണ് ചർച്ച. നവകേരളം, സംഘടനാതലം, വർഗീയതയ്ക്കെതിരെ എന്നീ മൂന്ന് വിഷയങ്ങളിൽ ഉൗന്നിയുള്ള പഠന ക്ലാസുകൾ മൂന്നുമണിക്കൂർ നീളും. ലോക്കൽ, ഏരിയ നേതാക്കളാണ് ക്ലാസെടുക്കുന്നത്. മൂന്ന് ലോക്കൽ കമ്മറ്റികളിൽ തുടർച്ചയായി വരാത്തവരെയും, മദ്യപാന ശീലമുള്ള ലോക്കൽ കമ്മറ്റിയംഗങ്ങളുണ്ടെങ്കിൽ അവരെയും ഒഴിവാക്കണമെന്ന നിർദേശങ്ങളുള്ള സംസ്ഥാന സർക്കുലറാണ് ലോക്കൽ കമ്മറ്റികൾക്ക് വിതരണം ചെയ്തിട്ടുള്ളത്. പാർട്ടിയിൽ പ്രവർത്തിക്കാത്തവരെ ഒഴിവാക്കി പകരം വർഗ ബഹുജന സംഘടനകളിൽ നിന്നും 40 വയസിൽ താഴെയുള്ള യുവതീയുവാക്കളെ ഉൾപ്പെടുത്തണമെന്നും നിർദേശമുണ്ട്. കഴിഞ്ഞ ഒരു വർഷത്തെ ലോക്കൽ പ്രവർത്തന റിപ്പോർട്ട് ലോക്കൽ കമ്മിറ്റി സെക്രട്ടറി അവതരിപ്പിക്കണം. ഈ റിപ്പോർട്ട് ഏരിയ കമ്മിറ്റിക്കും സംസ്ഥാന കമ്മിറ്റിക്കും നൽകണമെന്നും നിബന്ധനയുണ്ട്. ചിട്ടയായ പ്രവർത്തനം നടത്തി ലോക്കൽ കമ്മിറ്റികളെ സജ്ജരാക്കി വരുന്ന തദ്ദേശ സ്വയംഭരണ തെരഞ്ഞെടുപ്പിൽ മുന്നേറ്റം നടത്താനുള്ള ശ്രമങ്ങളാണ് സിപിഎമ്മിൽ നടക്കുന്നത്.

എങ്ങുമെത്താതെ അങ്കമാലി– കുണ്ടന്നൂര്‍ ബൈപ്പാസ്

കൊച്ചി: ഭൂമിയേറ്റെടുക്കലിനുള്ള 3 എ വിജ്ഞാപനം ഇറങ്ങി ഒരുവര്‍ഷം പിന്നിട്ടിട്ടും നടപടികള്‍ പൂര്‍ത്തിയാകാത്തതിനാല്‍ അങ്കമാലി–കുണ്ടന്നൂര്‍ ബൈപ്പാസ് നിര്‍മാണം അനിശ്ചിതത്വത്തില്‍. രണ്ടര വര്‍ഷത്തിനുള്ളില്‍ പൂര്‍ത്തിയാക്കാന്‍ ലക്ഷ്യമിട്ടിരുന്ന പദ്ധതിയാണ് അധികൃതരുടെ അനാസ്ഥമൂലം അവതാളത്തിലായിരിക്കുന്നത്. ഭൂമിയേറ്റെടുക്കലിന് 3 എ വിജ്ഞാപനം ഇറങ്ങിയാല്‍ ഒരു വര്‍ഷത്തിനകം അതിര്‍ത്തിക്കല്ലുകള്‍ സ്ഥാപിച്ച് 3 ഡി വിജ്ഞാപനം ഇറക്കിയാലെ നടപടികള്‍ പൂര്‍ത്തിയാകൂ. ഡിപിആര്‍ പ്രകാരം അതിര്‍ത്തിക്കല്ലുകള്‍ സ്ഥാപിക്കേണ്ടത് ദേശീയപാത അഥോറിറ്റിയാണ്. 3 എ വിജ്ഞാപനത്തിന് ഒരുവര്‍ഷം പൂര്‍ത്തിയായ കഴിഞ്ഞ കഴിഞ്ഞ 29നകം നടപടികള്‍ പൂര്‍ത്തിയാകാത്തതിനാല്‍ 3 ഡി വിജ്ഞാപനം ഇറക്കാന്‍ അഥോറിറ്റിക്കായില്ല. ഇതോടെ 3 എ വിജ്ഞാപനം റദ്ദായി. പുതിയ വിജ്ഞാപനം ഇറക്കി നടപടികള്‍ പുനരാരംഭിക്കാന്‍ ഇനിയും ദേശീയപാത അഥോറിറ്റി തീരുമാനമെടുത്തിട്ടുമില്ല. ഇതോടെ 3 എ വിജ്ഞാപനത്തിലൂടെ അലൈന്‍മെന്‍റില്‍ ഉള്‍പ്പെട്ട ഭൂ ഉടമകളും പ്രതിസന്ധിയിലായിരിക്കുകയാണ്. അങ്കമാലി മുതല്‍ കുണ്ടന്നൂര്‍വരെ 44 കിലോമീറ്റര്‍ ആറുവരിപ്പാതയാണ് നിര്‍മിക്കേണ്ടത്. ഇതിനായി 18 വില്ലേജുകളിലായി 280 ഹെക്ടര്‍ സ്ഥലമാണ് ഏറ്റെടുക്കേണ്ടത്. നിലവില്‍ നാമമാത്രമായ ഭൂമിയിലാണ് കല്ലിടാന്‍ കഴിഞ്ഞിട്ടുള്ളത്. നെല്‍പ്പാടങ്ങളും തണ്ണീര്‍ത്തടങ്ങളും നികത്തി റോഡ് നിര്‍മിക്കാനുള്ള പദ്ധതി ഉപേക്ഷിച്ച് എലവേറ്റഡ് പാതയാണ് നിലവില്‍ ആലോചനയിലുള്ളതെന്നാണ് വിവരം. 6,000 കോടി രൂപ ചെലവില്‍ 44.7 കിലോമീറ്റര്‍ നീളുന്നതാണ് പുതിയ റോഡ്. കുണ്ടന്നൂര്‍ നെട്ടൂരില്‍ നിന്ന് ആരംഭിച്ച് പുത്തന്‍കുരിശ് . പട്ടിമറ്റം, കാഞ്ഞൂര്‍, മറ്റൂര്‍ വഴി അങ്കമാലി കരയാംപറമ്പിലെത്തുന്നതാണ് നിലവിലെ അലൈന്‍മെന്‍റ്. 45 മീറ്റര്‍ വീതിയിലാണ് റോഡ് നിര്‍മാണം. പുതിയ റോഡ് വരുന്നതോടെ വൈറ്റില, ഇടപ്പള്ളി, കളമശേരി, ആലുവ പ്രദേശങ്ങളിലെ തിരക്ക് ഒഴിവാക്കി യാത്ര ചെയ്യാനാകും.

കേരള അര്‍ബന്‍ കോണ്‍ക്ലേവ്: പ്രദര്‍ശനം ഇന്ന് മുതൽ

കൊച്ചി: കേരള അര്‍ബന്‍ കോണ്‍ക്ലേവ് 2025ന്‍റെ ഭാഗമായുള്ള പ്രദര്‍ശനം കൊച്ചി മറൈന്‍ഡ്രൈവില്‍ ഇന്ന് ആരംഭിക്കും. ഉച്ചകഴിഞ്ഞ് മൂന്നിന് മന്ത്രി എം.ബി. രാജേഷ് പ്രദര്‍ശനം ഉദ്ഘാടനം ചെയ്യും. കൊച്ചി മേയര്‍ എം. അനില്‍കുമാര്‍, മറ്റു ജനപ്രതിനിധികള്‍ തുടങ്ങിയവര്‍ പങ്കെടുക്കും. കോണ്‍ക്ലേവിനോടനുബന്ധിച്ച് 15 വരെയാണ് വിപുലമായ പ്രദര്‍ശനം സംഘടിപ്പിക്കുന്നത്. കേരളത്തിന്‍റെ നഗര വികസനയാത്ര, പുതിയ ആശയങ്ങള്‍, നവീന സാങ്കേതിക വിദ്യകള്‍, സുസ്ഥിര മാതൃകകള്‍, നഗര സൗകര്യങ്ങളിലെ പുരോഗതി എന്നിവ പൊതുജനങ്ങള്‍ക്കു മുന്നില്‍ അവതരിപ്പിക്കുന്ന വേദിയാകും പ്രദര്‍ശനം. നഗരവികസനവുമായി ബന്ധപ്പെട്ട് വിവിധ സര്‍ക്കാര്‍ ഏജന്‍സികളുടെയും തദ്ദേശസ്വയംഭരണസ്ഥാപനങ്ങളുടെയും നൂതനാശയങ്ങളും, വിജയിച്ച മാതൃകകളും, പ്രദര്‍ശനത്തില്‍ അവതരിപ്പിക്കും. 12,13 തീയതികളിലാണ് കൊച്ചി ഗ്രാന്‍ഡ് ഹയാത്ത് കണ്‍വന്‍ഷന്‍ സെന്‍ററിലാണ് കേരളത്തിന്‍റെ ആദ്യ സമഗ്ര നഗരനയം രൂപപ്പെടുത്തുന്നതിനുള്ള കേരള അര്‍ബന്‍ കോണ്‍ക്ലേവ് 2025 സംഘടിപ്പിക്കുന്നത്.

ജില്ലാ സ്‌പോര്‍ട്‌സ് കൗണ്‍സില്‍ തെരഞ്ഞെടുപ്പ് ഒക്‌ടോബര്‍ ആറിന്

കൊച്ചി: ജില്ലാ സ്‌പോര്‍ട്‌സ് കൗണ്‍സില്‍ തെരഞ്ഞെടുപ്പ് ഒക്ടോബര്‍ ആറിന് നടത്താന്‍ വിജ്ഞാപനം പുറത്തിറങ്ങി. ഈമാസം 15 വരെയുള്ള പ്രവര്‍ത്തി ദിവസങ്ങളില്‍ ജില്ലാ വരണാധികാരിയുടെ (അസി. രജിസ്ട്രാര്‍) ഓഫീസില്‍ നിന്ന് രാവിലെ 11 മുതല്‍ വൈകീട്ട് അഞ്ചുവരെ നാമനിര്‍ദേശ പത്രിക ലഭിക്കുന്നതാണ്. നാമനിര്‍ദേശ പത്രികകള്‍ 16 ന് ഉച്ചയ്ക്ക് രണ്ട് വരെ ജില്ലാ വരണാധികാരിയുടെ ഓഫീസില്‍ തപാല്‍ മുഖേനയോ ജില്ലാ സ്‌പോര്‍ട്‌സ് കൗണ്‍സില്‍ ഓഫീസില്‍ വച്ചിട്ടുള്ള പെട്ടിയിലോ നിക്ഷേപിക്കുകയോ ചെയ്യാവുന്നതാണ്.2000 ലെ കേരള സ്‌പോര്‍ട്‌സ് ആക്ട് പ്രകാരമാണ് ജില്ലകളില്‍ സ്‌പോര്‍ട്‌സ് കൗണ്‍സില്‍ രൂപീകരിക്കുന്നതിനായി വിജ്ഞാപനം പുറത്തിറക്കിയിരിക്കുന്നത്. മുനിസിപ്പല്‍ കൗണ്‍സില്‍ ചെയര്‍പേഴ്‌സണ്‍മാരില്‍ നിന്നും ബ്ലോക്ക് പഞ്ചായത്ത് പ്രസിഡന്‍റുമാരില്‍ നിന്നും ഒരാള്‍ വീതവും ഗ്രാമ പഞ്ചായത്ത് പ്രസിഡന്റുമാരുടെ എണ്ണം അന്പതില്‍ കുറവാണെങ്കില്‍ മൂന്ന് പേർ, അന്‍പതില്‍ കൂടതലാണെങ്കില്‍ അഞ്ച് പേര്‍ എന്നിങ്ങനെ പ്രതിനിധികളെ ജില്ലാ സ്‌പോര്‍ട്‌സ് കൗണ്‍സിലുകളിലേക്ക് തെരഞ്ഞെടുക്കുന്നതിനായാണ് വിജ്ഞാപനം. ഒക്ടോബര്‍ ആറിന് രാവിലെ 10 മുതല്‍ ഉച്ചയ്ക്ക് രണ്ട് വരെയാണ് തെരഞ്ഞെടുപ്പ്.

ചതയ ദിനാഘോഷം: കൊടികൾ നശിപ്പിച്ചതായി പരാതി

ആലുവ: മന്ത്രി പങ്കെടുക്കേണ്ട ചതയദിനാഘോഷ സമാപനത്തിനായി അദ്വൈതാശ്രമ അങ്കണത്തിൽ സ്ഥാപിച്ച കൊടിതോരണങ്ങൾ വലിച്ചെറിഞ്ഞ് നശിപ്പിച്ചതായി പരാതി. ഇന്ന് ആലുവ നഗരസഭാ ഓഫീസിലേക്ക് ആശ്രമ സമിതിയുടെ നേതൃത്വത്തിൽ ഇന്ന് രാവിലെ 11 ന് മാർച്ചും ധർണയും നടത്തും.ഇന്നലെ ഉച്ചയോടെ 12 നാണ് പൊതുസ്ഥലത്ത് കൊടിതോരണങ്ങൾ പാടില്ലെന്ന കോടതി ഉത്തരവിന്‍റെ മറവിൽ അദ്വൈതാശ്രമവളപ്പിൽ സ്ഥാപിച്ചിരുന്ന പീതപതാകകളും ബോർഡും നഗരസഭാ അധികൃതർ നശിപ്പിച്ചതായാണ് ആരോപണം. ശ്രീനാരായണ ഗുരുദേവ ജയന്തിയുടെ ഭാഗമായി സംഘടിപ്പിക്കുന്ന ഒരു മാസം നീണ്ടുനിൽക്കുന്ന ആഘോഷങ്ങളുടെ സമാപനം സമ്മേളനം 14നാണ് നടക്കുന്നത്. ഇതുമായി ബന്ധപ്പെട്ട് സ്ഥാപിച്ചിരുന്ന പ്രചരണമാണ് നശിപ്പിച്ചത്. നഗരസഭ ആരോഗ്യവിഭാഗത്തിന്‍റെനേതൃത്വത്തിലെത്തിയ കണ്ടിജൻസി വിഭാഗമാണ് ആശ്രമം അധികൃതരോട് പോലും ചോദിക്കാതെ ഗുരുദേവ സൂക്തങ്ങൾ ആലേഖനം ചെയ്ത കൊടികൾ പിഴുതെടുത്ത് എറിയുകയും ജയന്തി ആഘോഷങ്ങളുടെ പ്രചരണ ബോർഡുകൾ വലിച്ചെറിയുകയും ചെയ്തതത്. ആശ്രമത്തിലെ സെക്യൂരിറ്റി ജീവനക്കാരൻ തടയാൻ ശ്രമിച്ചെങ്കിലും അത് കാര്യമാക്കാതെ നശിപ്പിക്കുകയായിരുന്നുവെന്നാണ് പരാതി. പിഴുതെറിഞ്ഞ കൊടികൾ പിന്നീട് നഗരസഭയുടെ മലിജല സംസ്കരണ പ്ലാന്‍റിനോട് ചേർന്ന മാലിന്യം നിറഞ്ഞ ഗോഡൗണിലും ഏതാനും കൊടികൾ തള്ളിയിട്ടിട്ടുണ്ട്. അതേസമയം പൊതുസ്ഥലത്തെ കൊടിതോരണങ്ങളാണ് നശിപ്പിച്ചതെന്ന് ആലുവ നഗരസഭാധികൃതർ പറയുന്നു.

കുടുംബസംഗമവും ഓണാഘോഷവും

പെരുമ്പാവൂർ: പെരുന്പാവൂർ ബാർ അസോസിയേഷൻ ആഭിമുഖ്യത്തിൽ കുടുംബ സംഗമവും ഓണാഘോഷവും 40 വർഷം പൂർത്തിയാക്കിയ അഭിഭാഷകരെ ആദരിക്കലും നടത്തി. ഹൈക്കോടതി ജഡ്ജി ജസ്റ്റീസ് എൻ. നഗരേഷ് ഉദ്ഘാടനം ചെയ്തു. അസോസിയേഷൻ പ്രസിഡന്‍റ് എൻ.സി. മോഹനൻ അധ്യക്ഷനായി. പ്രിൻസിപ്പൽ ജില്ലാ ജഡ്ജി ഹണി എം. വർഗീസ് കലാമത്സര വിജയികൾക്കും എംഎസിറ്റി ട്രിബ്യൂണൽ ജില്ലാ ജഡ്ജി സ്മിത ജോർജ് കായിക മത്സരവിജയികൾക്കും സമ്മാനങ്ങൾ വിതരണം ചെയ്തു. എംഎൽഎമാരായ പി.വി. ശ്രീനിജിൻ, എൽദോസ് കുന്നപ്പിള്ളി, റോജി എം. ജോൺ, മുനിസിപ്പൽ ചെയർമാൻ പോൾ പാത്തിക്കൽ,സാജു പോൾ, കെ.പി. അജയൻ,അലക്‌സാണ്ടർ കോശി, കെ.എൻ. അനിൽകുമാർ, നവീൻ ബോസ്, കെ.കെ. നാസർ , രാജേഷ് വിജയൻ എന്നിവർ സംസാരിച്ചു. വിവിധ കലാപരിപാടികളും അരങ്ങേറി.

പെരുമ്പാവൂർ ഉപജില്ലാ സ്‌കൂൾ കലോത്സവം ഒക്ടോബർ ഏഴ് മുതൽ

പെരുമ്പാവൂർ: ഈ വർഷത്തെ പെരുമ്പാവൂർ ഉപജില്ലാ സ്‌കൂൾ കലോത്സവം ‌ഒക്ടോബർ ഏഴ് മുതൽ 10 വരെ ശാലേം വിഎച്ച്എസ്എസ്എസിൽ നടക്കും. കലോത്സവത്തിന്‍റെ സ്വാഗതസംഘം ഓഫീസ് ഉദ്ഘാടനം ചെയ്തു. ബെന്നി ബെഹനാൻ എംപി ഉദ്ഘാടനം നിർവഹിച്ചു. അഡ്വ. എൽദോസ് കുന്നപ്പിള്ളി എംഎൽഎ അധ്യക്ഷത വഹിച്ചു. ജില്ല പഞ്ചായത്ത് പ്രസിഡന്‍റ് മനോജ് മൂത്തേടൻ, ബ്ലോക്ക് പഞ്ചായത്ത് പ്രസിഡന്‍റ് കെ.എം. അൻവറലി, പഞ്ചായത്ത് പ്രസിഡന്‍റ് പി.പി. എൽദോസ്, മാർ ബഹനാം സഹദ വലിയ പള്ളി വികാരി ഫാ. ബിജു കാവാട്ട്, എഇഒ ഒ.കെ. ബിജിമോൾ,സ്ഥിരം സമിതി അധ്യക്ഷ വാസന്തി രാജേഷ് തുടങ്ങിയവർ സംസാരിച്ചു. 79 വിദ്യാലയങ്ങളിൽ നിന്നായി 6500 വിദ്യാർഥികൾ മത്സരങ്ങളിൽ പങ്കെടുക്കും. കലോത്സവ നടത്തിപ്പിനായി മന്ത്രി പി. രാജീവ്, ബെന്നി ബെഹനാൻ എംപി, അഡ്വ. എൽദോസ് കുന്നപ്പിള്ളി എംഎൽഎ , അഡ്വ. പി.വി. ശ്രീനിജൻ എംഎൽഎ എന്നിവർ മുഖ്യ രക്ഷാധികാരികളും പഞ്ചായത്ത് പ്രസിഡന്‍റ് പി.പി. എൽദോസ് ചെയർമാനുമായി 501 അംഗ സ്വാഗതസംഘം രൂപീരിച്ചു.

അയ്യൻകുഴി നിവാസികളെ ഹോട്ടലിൽനിന്ന് ഇറക്കിവിടാൻ ശ്രമം; പ്രതിഷേധം

ചോറ്റാനിക്കര: വായു മലിനീകരണത്തെ തുടർന്ന് അമ്പലമുകളിലെ അയ്യൻകുഴിയിൽ നിന്നും ജില്ലാ ഭരണകൂടത്തിന്‍റെ നേതൃത്വത്തിൽ ചോറ്റാനിക്കരയിലെ ഹോട്ടലിലേയ്ക്ക് മാറ്റി പാർപ്പിച്ച അയ്യൻകുഴി നിവാസികളെ ഹോട്ടലിൽ നിന്നും ഉടമ ഇറക്കി വിടാൻ ശ്രമിച്ചതായി പരാതി. ഇതേ തുടർന്ന് കുടുംബങ്ങളെ താമസിപ്പിച്ചിരുന്ന ചോറ്റാനിക്കരയിലെ ഇന്ദ്രപ്രസ്ഥം ഹോട്ടലിന് മുന്നിൽ അയ്യൻകുഴി നിവാസികൾ പ്രതിഷേധവുമായി ഒത്തു കൂടി. ഇന്നലെ ഉച്ചയോടെയാണ് താമസക്കാർ ജോലിക്കും മറ്റുമായി പുറത്തുപോയ സമയത്ത് ഹോട്ടലുടമയുടെ നേതൃത്വത്തിൽ വേറെ താഴിട്ട് മുറികൾ പൂട്ടിയതെന്ന് പറയുന്നു. ഇതോടെ ഇവിടെയുണ്ടായിരുന്നവർ ശുചിമുറി സൗകര്യം പോലും ലഭ്യമാകാതെ ബുദ്ധിമുട്ടിലായി. പ്രതിസന്ധി തുടർന്നതോടെ രാത്രിയോടെ സബ് കളക്ടർ ശ്യാം കൃഷ്ണയുടെ നേതൃത്വത്തിൽ താമസക്കാരുമായും മറ്റും ചർച്ചകൾ നടത്തിയെങ്കിലും ധാരണയായില്ല. ഇവിടെ താമസിച്ചിരുന്നവരോട് പഞ്ചായത്ത് കമ്യൂണിറ്റി ഹാളിലേയ്ക്കോ ചെല്ലാനത്തെസർക്കാർ ക്യാമ്പിലേയ്ക്കോ മാറുവാൻ അധികൃതർ ആവശ്യപ്പെട്ടെങ്കിലും താമസക്കാർ വഴങ്ങിയിട്ടില്ല. സ്വന്തം വീട്ടിൽ താമസിച്ചിരുന്ന തങ്ങളെ മറ്റിടങ്ങളിലേയ്ക്ക് മാറ്റുന്നതിനോട് യോജിക്കാനാവില്ലെന്നും ഇക്കാര്യത്തിൽ കമ്പനി അധികൃതരിൽ നിന്ന് അനുകൂലമായ നടപടികൾ വേണമെന്നുമാണ് താമസക്കാർ ആവശ്യപ്പെടുന്നത്. ഇതിന് മുൻപ് ഓണക്കാലത്തും താമസക്കാരെ ഇറക്കിവിടാൻ ശ്രമം നടന്നിരുന്നു. അതിനെതിരെ അയ്യൻകുഴി ജനകീയ സമിതിയുടെ നേതൃത്വത്തിൽ തിരുവോണ ദിനത്തിൽ ഉപവാസ സമരവും സംഘടിപ്പിച്ചിരുന്നു. മുറി വാടകയും ഭക്ഷണ കാര്യങ്ങളും നോക്കിക്കൊള്ളാമെന്ന ഉറപ്പിലാണ് ഇവരെ ചോറ്റാനിക്കരയിലേയ്ക്ക് മാറ്റിയതെന്ന് പറഞ്ഞിരുന്നെങ്കിലും ഓണക്കാലം മുതൽ ഇവർക്ക് ഭക്ഷണവും നൽകാറില്ലായിരുന്നുവെന്ന് പറയുന്നു. പ്രശ്ന പരിഹാരമാവാത്തതിനെ തുടർന്ന് അയ്യൻകുഴി നിവാസികൾ സബ്കളക്ടറെ രാത്രി തടഞ്ഞുവച്ചു.

മുനമ്പം വേളാങ്കണ്ണി പള്ളിയിൽ തിരുനാൾ

ചെറായി: മുനമ്പം ബീച്ച് പാഷനിസ്റ്റ് വേളാങ്കണ്ണിമാതാ പള്ളിയിലെ തിരുനാളിന് കോട്ടപ്പുറം ബിഷപ് ഡോ. അംബ്രോസ് പുത്തൻവീട്ടിൽ കൊടിയേറ്റി. തുടർന്ന് പൊന്തിഫിക്കൽ ദിവ്യബലി നടന്നു. 14 നാണ് തിരുനാൾ. 12ന് വൈകീട്ട് അഞ്ചിന് പ്രസുദേന്തിവാഴ്ച. 13ന് വൈകീട്ട് അഞ്ചിന് ദിവ്യബലി. തുടർന്ന് പ്രദക്ഷിണം. 14ന് രാവിലെ 10.30 നാണ് തിരുനാൾ ദിവ്യബലി.

ശാസ്ത്ര ക്വിസ് വിജയികളെ ആദരിച്ചു

അങ്കമാലി: കറുകുറ്റി സ്റ്റാർ ജീസസ് ഹൈസ്കൂളിൽ കേരള സംസ്ഥാന യൂത്ത് വെൽഫയർ ബോർഡിന്‍റെ നേതൃത്വത്തിൽ ഹൈസ്കൂൾ തലത്തിൽ നടന്ന ശാസ്ത്ര ക്വിസ് വിജയികളെ ആദരിച്ചു. ഹെഡ്മാസ്റ്റർ ഫാ. ജോണി ചിറയ്ക്കൽ ആദരവ് സമർപ്പണം നിർവഹിച്ചു. കുട്ടികളിൽ ശാസ്ത്രബോധം സൃഷ്ടിക്കാൻ ഈ പരിപാടി ഉപകരിച്ചതായി അദ്ദേഹം പറഞ്ഞു. പി ടിഎ പ്രസിഡന്‍റ് എം. ജെ. ഏല്യാസ് സമ്മാനദാനം നിർവഹിച്ചു. ഒന്നാം സ്ഥാനം നിരജ്ഞൻ അനീഷ്, അഡോൺ ജോജി ടീം കരസ്ഥമാക്കി. ജിഫി സി. ഏല്യാസ് ആശംസയർപ്പിച്ചു. വിജയികൾക്ക് സമ്മാനത്തിന് പുറമെ ട്രോഫിയും സർട്ടിഫിക്കറ്റും നൽകി. പരിപാടികൾക്ക് സിൻസി ജെ. തലക്കോട്ടൂർ, ഇ. ഡി. നിക്സി , എ.ജി. വിജയകൃഷ്ണൻ , വി.ടി . വർഗീസ് തുടങ്ങിയവർ നേതൃത്വം നല്കി.

സ്ഥലമെടുപ്പിൽ സർക്കാരിന് അനുകൂല വിധി; അവസാന കടമ്പ കടന്ന് അഴീക്കോട് - മുനമ്പം പാലം

വൈപ്പിൻ : മുനമ്പം -അഴീക്കോട് പാലത്തിന്‍റെ അപ്പ്രോച്ച് റോഡിന്‍റെ സ്ഥലമെടുപ്പുമായി ബന്ധപ്പെട്ട് മുനമ്പം ഭാഗത്ത് സ്വകാര്യ വ്യക്തി ഹൈക്കോടതിയിൽ നൽകിയിരുന്ന ഹർജിയിൽ സർക്കാരിനു അനുകൂലമായ വിധി വന്നതായി കൈപ്പമംഗലം എംഎൽഎ ഇ.ടി. ടൈസൺ മാസ്റ്റർ അറിയിച്ചു. ഇതോടെ പാലം പൂർത്തീകരിക്കാനുള്ള അവസാന കടമ്പയും പിന്നിട്ടതായി അദ്ദേഹം ചൂണ്ടിക്കാട്ടി. നിലവിൽ അഴീക്കോട് ഭാഗത്തെ നിർമാണ പ്രവർത്തനങ്ങൾ 90 ശതമാനം പൂർത്തീകരിച്ചു കഴിഞ്ഞു. ഇവിടെ കായലിലെ ഫൗണ്ടേഷൻ വർക്കുകൾ പൂർത്തിയാക്കിയതോടെ സബ്സ്ക്രൈബ് നിർമാണ പ്രവർത്തനങ്ങൾ നടന്നുവരികയാണ് .മുനമ്പം ഭാഗത്തെഫൗണ്ടേഷൻ വർക്കുകളും ധൃതഗതിയിൽ നടന്നുവരുന്നുണ്ട്. സൂപ്പർ സ്ട്രാക്ടർ സെഗ്മെന്‍റൽ ഓട്ടോ ലോഞ്ചിംഗ് സിസ്റ്റത്തിലൂടെയാണ് നിർമാണം നടക്കുന്നത് . 52.65 മീറ്റർ നീളമുള്ള മെയിൻ സ്ലാബിന് 18 സെഗ്‌മെന്റുകൾ ആക്കി നിർമിച്ച ശേഷം ഇത് കൊണ്ടുവന്ന് ആധുനിക യന്ത്ര സംവിധാനത്തോടെ ഘടിപ്പിക്കുന്നതാണ് ഈ നൂതന രീതി. സംസ്ഥാനത്ത് ആദ്യമായാണ് സെഗ്മെന്റിൽ ഓട്ടോ ലോഞ്ചിംഗ് സാങ്കേതികവിദ്യ ഉപയോഗിക്കുന്നത്. ഇതിലൂടെ പ്രവർത്തികൾ വേഗത്തിൽ പൂർത്തീകരിക്കുവാനും കായലിൽ കോൺക്രീറ്റ് മിശ്രിതം വീണ് ഉണ്ടാകാൻ സാധ്യതയുള്ള മലിനീകരണം തടയുവാനും, നിർമാണവേളയിൽ മത്സ്യബന്ധന യാനങ്ങൾക്ക് തടസമില്ലാതെ യാത്ര ചെയ്യാനും കഴിയുമെന്ന് എംഎൽഎ വ്യക്തമാക്കി.

വിശുദ്ധ കാര്‍ലോ അക്വിറ്റിസിനെ അനുസ്മരിച്ച് ഭാരത മാതാ കോളജ്

കൊച്ചി: സൈബര്‍ അപ്പസ്‌തോലന്‍ എന്നറിയപ്പെടുന്ന വിശുദ്ധ കാര്‍ലോ അക്വിറ്റിസിന്‍റെ ഓർമയ്ക്കായി തൃക്കാക്കര ഭാരത മാതാ കോളജിലെ കംപ്യൂട്ടര്‍ സയന്‍സ് എയ്ഡഡ് വിഭാഗം പ്രത്യേക പരിപാടികള്‍ സംഘടിപ്പിച്ചു. സാങ്കേതികവിദ്യയെയും വിശ്വാസത്തെയും സമന്വയിപ്പിച്ച് സമൂഹത്തിന് വെളിച്ചം പകര്‍ന്ന കാര്‍ലോ അക്യൂറ്റിസിന്‍റെ ജീവിതം വിദ്യാര്‍ഥികള്‍ക്ക് ഒരു പുതിയ പ്രചോദനമായി. മേധാവി ഡോ. ജോണ്‍ ടി.ഏബ്രഹാം അനുസ്മരണ പ്രഭാഷണം നടത്തി. കാര്‍ലോ അക്വിറ്റിസിനെ വിശുദ്ധനായി പ്രഖ്യാപിക്കുന്നതിന് മുമ്പുതന്നെ തൃക്കാക്കര ഭാരത മാതാ കോളജിലെ കംപ്യൂട്ടര്‍ സയന്‍സ് എയ്ഡഡ് ഡിപ്പാര്‍ട്ട്‌മെന്‍റില്‍ എത്തുന്നവര്‍ ആദ്യം കാണുന്നത് കാര്‍ലോ അക്വിറ്റിസിന്‍റെ വലിയ ചിത്രമായിരുന്നു. 2020- 21 അധ്യയന വര്‍ഷം കേരള സര്‍ക്കാരിന്‍റെ ന്യൂജനറേഷന്‍ പ്രോഗ്രാമായ ഇന്‍റഗ്രേറ്റഡ് എംഎസ്‌സി കംപ്യൂട്ടര്‍ സയന്‍സ് ആര്‍ട്ടിഫിഷ്യല്‍ ഇന്‍റലിജന്‍സ് ആന്‍ഡ് മെഷീന്‍ ലേണിംഗ് എയ്ഡഡ് വിഭാഗത്തില്‍ ആരംഭിച്ചപ്പോള്‍തന്നെ വകുപ്പ് തലവന്‍ ഡോ. ജോണ്‍ ടി.ഏബ്രഹാമിന്‍റെ അപേക്ഷ മാനിച്ച് കോളജ് മാനേജര്‍ ഫാ.ഏബ്രഹാം ഓലിയപ്പുറത്തും അസി. ഡയറക്ടര്‍ ഫാ. ജിമ്മിച്ചന്‍ കര്‍ത്താനവും ചേര്‍ന്ന് ആശീര്‍വദിച്ച് സ്ഥാപിച്ചതാണ് ഈ ചിത്രം.

ജൽജീവൻ പദ്ധതി : കുടിവെള്ള ടാങ്ക് മണ്ഡലം മലയിൽനിന്നും മാറ്റണമെന്ന ഹർജി ഹൈക്കോടതി തള്ളി

തിരുമാറാടി: ജൽജീവൻ പദ്ധതിയിൽ ഉൾപ്പെടുത്തി നാൽപ്പത്തിനാല് കോടി രൂപ മുതൽ മുടക്കിൽ തിരുമാറാടി പഞ്ചായത്തിലെ മണ്ഡലം മലയിൽ സ്ഥാപിക്കാനിരുന്ന കുടിവെള്ള ടാങ്ക് മാറ്റണമെന്ന ഹർജി ഹൈക്കോടതി തള്ളി. സമഗ്ര തിരുമാറാടി കുടിവെള്ള വിതരണ പദ്ധതി ടാങ്ക് സ്ഥാപിക്കുന്നതിനെതിരേ തേവർമടം ഗ്രാനൈറ്റ്സ് ഉടമയുടെ സഹോദരൻ ബോബി എബ്രഹാം നൽകിയ ഹർജിയാണ് ഹൈക്കോടതി തള്ളിയത്. ഇതോടെ ജൽജീവൻ മിഷൻ പദ്ധതിയുടെ നിർമാണ പ്രവർത്തനങ്ങളുമായി മുന്നോട്ട് പോകാം. ജലസംഭരണി സ്ഥാപിക്കുന്ന സ്ഥലത്തെ ചൊല്ലിയായിരുന്നു പ്രധാന തർക്കം. പദ്ധതിക്കായി മണ്ഡലം മലയിൽ സ്ഥലം ഏറ്റെടുത്ത് ജലസംഭരണി നിർമിക്കാനുള്ള തീരുമാനത്തെ ചോദ്യം ചെയ്താണ് ഹർജിക്കാർ കോടതിയെ സമീപിച്ചത്. മണ്ണത്തൂർ അരിയിത്തടം മലയിൽ സൗജന്യമായി സ്ഥലം ലഭിക്കുമെന്നും, അത് സർക്കാരിന് വലിയ സാമ്പത്തിക ലാഭമുണ്ടാക്കുമെന്നും ഹർജിക്കാർ വാദിച്ചു. എന്നാൽ മണ്ഡലം മലയിൽ ടാങ്ക് നിർമിച്ച് കുടിവെളള വിതരണം ചെയ്യുക എന്ന പ്രോജക്ട് റിപ്പോർട്ടിന്‍റെ അടിസ്ഥാനത്തിൽ കിലോമീറ്ററുകൾ ദൂരത്തിൽ പൈപ്പ് ലൈനുകൾ സ്ഥാപിച്ചതിന് ശേഷം ടാങ്ക് സ്ഥലം മാറ്റണമെന്ന വാദഗതിക്ക് പിന്നിൽ പദ്ധതി വൈകിപ്പിക്കാനുള്ള ശ്രമമാണെന്ന് 14-ാമത്തെ കക്ഷിയായ മണ്ഡലം മല സംരക്ഷണ സമിതി ചെയർമാൻ അജി എബ്രഹാം മഞ്ഞക്കടമ്പിൽ കോടതിയിൽ സമർപ്പിച്ച സത്യവാങ്മൂലത്തിൽ ബോധിപ്പിച്ചു. മണ്ഡലം മലയിലെ സ്ഥലം ശാസ്ത്രീയവും സാങ്കേതികവുമായ പഠനങ്ങളുടെ അടിസ്ഥാനത്തിലാണ് തെരഞ്ഞെടുത്തതെന്നും, അരിയിത്തടം മലയിലേക്ക് പദ്ധതി മാറ്റുന്നത് നിലവിൽ സ്ഥാപിച്ച പൈപ്പ് ലൈനുകൾ പൊളിച്ചുമാറ്റി പുതിയത് സ്ഥാപിക്കുന്നതിന് കാരണമാകുമെന്നും അദേഹം ചൂണ്ടിക്കാട്ടി. വാദങ്ങൾ പരിഗണിച്ച കോടതി, സാങ്കേതിക വിഷയങ്ങളിൽ ഇടപെടാൻ കഴിയില്ലെന്ന് വ്യക്തമാക്കി. സാങ്കേതിക വിദഗ്ധർ തയാറാക്കിയ വിശദമായ റിപ്പോർട്ടിന്‍റെ അടിസ്ഥാനത്തിലാണ് പദ്ധതിയുടെ സ്ഥലം നിശ്ചയിച്ചതെന്നും, ഇതിൽ ഇടപെടേണ്ട സാഹചര്യം നിലവിലില്ലെന്നും കോടതി അറിയിച്ചു. ഇതോടെ ഹർജി തള്ളിക്കൊണ്ട് പദ്ധതിയുമായി മുന്നോട്ട് പോകാൻ അനുമതി നൽകുകയായിരുന്നു. ടാങ്കിനായി ഭൂമിയേറ്റെടുക്കാനുള്ള നടപടിയിൽ കാലതാമസം ആരോപിച്ചു കളക്ടർക്കെതിരേയുള്ള കോടതിയലക്ഷ്യ കേസ് മറ്റെന്നാൾ പരിഗണിക്കാനിരിക്കെ വന്ന വിധി സ്വാഗതർഹമാണെന്ന് മണ്ഡലം മല സംരക്ഷണ സമിതി ഭാരവാഹികൾ പറഞ്ഞു.

മൂക്കന്നൂര്‍ കൃഷിഭവന് മുന്നിൽ കര്‍ഷകരുടെ ധര്‍ണ

അങ്കമാലി: ജാതിക്കൃഷിയിലുണ്ടായ വ്യാപക നാശത്തിന് നഷ്ട പരിഹാരം തേടി മൂക്കന്നൂർ ജാതി കർഷക സംരക്ഷണ സമിതിയുടെ നേതൃത്വത്തിൽ കൃഷിഭവന് മുന്നിൽ ധർണ നടത്തി. അതിവര്‍ഷം മൂലമാണ് ജാതിക്കൃഷിയിൽ വ്യാപക നാശനഷ്ടം സംഭവിച്ചത്. കൃഷിനാശത്തിന്‍റെ കാരണം കണ്ടെത്തി പ്രതിരോധ നടപടികള്‍ സ്വീകരിക്കുക. മണ്ണും ചെടികളും സമ്പുഷ്ഠമാക്കുന്നതിനുള്ള ജൈവ വളങ്ങള്‍ കൃഷിഭവന്‍ വഴി സൗജന്യമായി ലഭ്യമാക്കുക. കേടുവന്ന ജാതിമരങ്ങള്‍ വെട്ടിമാറ്റി പകരം കൃഷിചെയ്യുന്നതിന് ധനസഹായം നല്‍കുക എന്നീ ആവശ്യങ്ങളുന്നയിച്ച് സംഘടിപ്പിച്ച ധർണ യുഡിഎഫ് നിയോജക മണ്ഡലം കണ്‍വീനര്‍ ടി.എം. വര്‍ഗീസ് ഉദ്ഘാടനം ചെയ്തു. യോഗത്തിൽ ജാതി കര്‍ഷക സംരക്ഷണ സമിതി കണ്‍വീനര്‍ എം.പി. ദേവസി അധ്യക്ഷത വഹിച്ചു. കെ. ടി.ബെന്നി, ടി. ഒ.മത്തായി, തോമസ് മൂഞ്ഞേലി, നൈജോ പുളിയ്ക്കല്‍, ജോബി പോള്‍, ചാക്കപ്പന്‍ മുണ്ടാടന്‍ എന്നിവര്‍ പ്രസംഗിച്ചു. കര്‍ഷകര്‍ ഒപ്പിട്ട ഭീമഹര്‍ജി സമരക്കാര്‍ കൃഷി ഓഫീസര്‍ക്ക് നല്‍കി.

മൂവാറ്റുപുഴ ലത പാലത്തിലെ കുഴികള്‍ അടച്ച് ഓട്ടോ തൊഴിലാളികള്‍

മൂവാറ്റുപുഴ: അധികൃതരുടെ അനാസ്ഥയ്ക്കിടയില്‍ മൂവാറ്റുപുഴ ലത പാലത്തിലെ കുഴികള്‍ അടയ്ക്കാന്‍ മുന്നിട്ടിറങ്ങി ഓട്ടോ തൊഴിലാളികള്‍. ആശ്രമം ഓട്ടോസ്റ്റാന്‍ഡിലെ ഇരുപതോളം തൊഴിലാളികള്‍ ചേര്‍ന്നാണ് മൂവാറ്റുപുഴ-തൊടുപുഴ റോഡിലെ ലതാ പാലത്തിലുള്ള കുഴികള്‍ അടച്ചത്. ദിനംപ്രതി ആയിരക്കണക്കിന് വാഹനങ്ങള്‍ സഞ്ചരിക്കുന്ന പാലത്തില്‍ രണ്ട് മാസത്തോളമായി ടാറിംഗ് ഇളകി നിരവധി കുഴികള്‍ രൂപപ്പെട്ടതോടെ യാത്രക്കാര്‍ ദുരിതത്തിലായിരുന്നു. ഇതോടെ പാലത്തില്‍ ഗതാഗതക്കുരുക്കും പതിവായിരുന്നു, അധികൃതരോട് കുഴി അടയ്ക്കുന്നതിനുള്ള നടപടി സ്വീകരിക്കണമെന്ന് ആവശ്യപ്പെട്ടെങ്കിലും യാതൊരു നടപടിയും ഇല്ലാത്തതിനാലാണ് പോലീസ് ഉദ്യോഗസ്ഥരുടെ സഹകരണത്തോടെ കുഴിയടക്കാന്‍ മുന്നിട്ടിറങ്ങിയതെന്ന് ഓട്ടോ തൊഴിലാളി ദിലീപ് പറഞ്ഞു. പോലീസ് ഉദ്യോഗസ്ഥര്‍ ചേര്‍ന്ന് റോഡിലൂടെയുള്ള ഗതാഗതം നിയന്ത്രിച്ചാണ് പാലത്തില്‍ ടാറിംഗ് പ്രവര്‍ത്തികള്‍ നടത്തിയത്. പഴയ ഫയര്‍ സ്റ്റേഷന്‍ ഭാഗത്ത് കിടന്ന് ഉപയോഗശൂന്യമായിരുന്ന ടാറിംഗ് മിശ്രിതം ഉപയോഗിച്ചാണ് കുഴികളടച്ചത്.

ജനകീയ പ്രതിഷേധ സദസ്

മൂവാറ്റുപുഴ: മൂവാറ്റുപുഴ ബ്ലോക്ക് കോണ്‍ഗ്രസ് കമ്മിറ്റി സംഘടിപ്പിച്ച ഏകദിന സത്യഗ്രഹം യൂത്ത് കോണ്‍ഗ്രസ് അഖിലേന്ത്യാ സെക്രട്ടറി ജിന്‍ഷാദ് ജിന്നാസ് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് സാബു ജോണ്‍ അധ്യക്ഷത വഹിച്ചു. കൂത്താട്ടുകുളം: കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ കൂത്താട്ടുകുളത്ത് ജനകീയ പ്രതിഷേധ സദസ് സംഘടിപ്പിച്ചു. കുന്നംകുളം പോലീസ് സ്റ്റേഷനിൽ യൂത്ത് കോൺഗ്രസ്‌ പ്രവർത്തകനായ സുജിത്തിനെ മർദിച്ച പോലീസുകാരെ സർവീസിൽനിന്ന് പുറത്താക്കണമെന്ന് ആവശ്യപ്പെട്ട് സംസ്ഥാനവ്യാപകമായി നടക്കുന്ന പ്രതിഷേധത്തിന്‍റെ ഭാഗമായാണ് സദസ് സംഘടിപ്പിച്ചത്. ഡിസിസി നിർവാഹക സമിതി അംഗം വിൽസൺ കെ. ജോൺ ഉദ്ഘാടനം നിർവഹിച്ചു. മണ്ഡലം പ്രസിഡന്‍റ് റെജി ജോൺ അധ്യക്ഷത വഹിച്ചു. കോതമംഗലം: കോതമംഗലം പോലീസ് സ്റ്റേഷന് മുമ്പില്‍ കോണ്‍ഗ്രസ് മണ്ഡലം കമ്മിറ്റികളുടെ നേതൃത്വത്തില്‍ നടത്തിയ പ്രതിഷേധ സദസ് കെപിസിസി സെക്രട്ടറി എസ്.അശോകന്‍ ഉദ്ഘാടനം ചെയ്തു. ഷമീര്‍ പനക്കല്‍ അധ്യക്ഷത വഹിച്ചു. ഊന്നുകല്‍: ഊന്നുകല്‍ പോലീസ് സ്റ്റേഷന് മുമ്പില്‍ നടത്തിയ ധര്‍ണ സമരം കൂത്താട്ടുകുളം മുനിസിപ്പല്‍ ചെയര്‍പേഴ്‌സണ്‍ കലാ രാജു ഉദ്ഘാടനം ചെയ്തു. കോണ്‍ഗ്രസ് കവളങ്ങാട് ബ്ലോക്ക് പ്രസിഡന്‍റ് ബാബു ഏലിയാസ് അധ്യക്ഷത വഹിച്ചു. കോട്ടപ്പടി: കോട്ടപ്പടി പോലീസ് സ്റ്റേഷന് മുന്നിൽ നടന്ന പ്രതിഷേധ ധർണ ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം ചെയ്തു. സുരേഷ് കണ്ണോത്ത് കുടി അധ്യക്ഷതവഹിച്ചു.

ഒഴുക്കിൽപ്പെട്ട പത്ത് വയസുകാരനെ രക്ഷിച്ച വിദ്യാർഥിക്ക് ആദരം

മൂവാറ്റുപുഴ: കുടമുണ്ട പുഴയില്‍ കണ്ണാടിക്കോട് തടയിണക്കു സമീപം ഒഴുക്കില്‍പെട്ട പത്തുവയസുകാരനെ രക്ഷപെടുത്തിയ വിദ്യാർഥിയെ ആദരിച്ചു. പത്തു വയസുകാരനായ അദ്വൈതിനെ സാഹസികമായി രക്ഷപെടുത്തിയ കവളങ്ങാട് സെന്‍റ് ജോണ്‍സ് ഹയര്‍ സെക്കന്‍ഡറി സ്‌കൂള്‍ പത്താം ക്ലാസ് വിദ്യാര്‍ഥി മുഹമ്മദ് ഫയാസിനെയാണ് സ്‌കൂള്‍ മാനേജ്മെന്‍റ് അവാര്‍ഡ് നല്‍കി ആദരിച്ചത്. സ്‌കൂളിന് അഭിമാനവും, നാടിന് മാതൃകയുമായ മുഹമ്മദ് ഫയാസിന് കവളങ്ങാട് സെന്‍റ് ജോണ്‍സ് യാക്കോബായ പള്ളി വികാരി ഫാ. ബേബി മംഗലത്ത് മൊമന്‍റോയും, മാനേജര്‍ കാഷ് അവാഡും നല്‍കി. മാനേജിംഗ് കമ്മിറ്റിയംഗങ്ങളായ ജോര്‍ജ് എടപ്പാറയും, ബിനോയി പോളും ചേര്‍ന്ന് പൊന്നാട അണിയിച്ചു. ചടങ്ങില്‍ പ്രധാനാധ്യാപിക സോജി ഫിലിപ്പ്, പ്രിന്‍സിപ്പല്‍ സുമി ജോസഫ്, പിടിഎ പ്രസിഡന്‍റ് സുഭാഷ്, പള്ളി ട്രസ്റ്റി ടി.കെ. എല്‍ദോസ്, അധ്യാപകരായ മുഹമ്മദ് ഷിയാസ്, പി.കെ. ഷൈനി എന്നിവര്‍ പ്രസംഗിച്ചു.

കീരമ്പാറ പഞ്ചായത്തിൽ വയറിളക്കവും ഛർദ്ദിയും വ്യാപിച്ച സംഭവം; വില്ലനായത് റൊട്ട വൈറസ്

കോതമംഗലം: കീരമ്പാറ പഞ്ചായത്തിൽ കഴിഞ്ഞ ദിവസങ്ങളിൽ വയറിളക്കവും ഛർദ്ദിയും പടർന്നുപിടിച്ചതിന് കാരണം റൊട്ട വൈറസാണെന്ന് കണ്ടെത്തൽ. കഴിഞ്ഞ ദിവസം പരിശോധനയ്ക്കായി നൽകിയ ജലത്തിന്‍റെയും മറ്റു സാമ്പിളുകളുടെയും പരിശോധന ഫലം പുറത്ത് വന്നതോടെയാണ് രോഗവ്യാപാനത്തിന്‍റെ കാരണം വ്യക്തമായത്. ആലപ്പുഴ വൈറോളജി ലാബിലും കക്കാനാട്ടെ ജല പരിശോധന ലാബിലുമാണ് സാമ്പിളുകൾ ആരോഗ്യ വകുപ്പ് പരിശോധനയ്ക്ക് അയച്ചത്. സുരക്ഷിതമല്ലാത്ത ജലത്തിലൂടെയും മലിനമായ ഭക്ഷണത്തിലൂടെയുമാണ് ഈ വൈറസ് പകരുന്നത്. കുട്ടികളിലാണ് ഇവ രോഗബാധയുണ്ടാകുന്നത്. നിലവിൽ പുതിയ കേസുകൾ ഒന്നും റിപ്പോർട്ട് ചെയ്തിട്ടില്ല. കളപ്പാറ, കരിയിലപ്പാറ, ചെങ്കര എന്നിവടങ്ങളിൽ ഈ മാസം ഒന്നു മുതലാണ് രോഗം പ്രത്യക്ഷപ്പെട്ടത്. ജില്ല ആരോഗ്യ വിഭാഗം ചൊവ്വാഴ്ച്ച സ്ഥലം സന്ദർശിച്ച് കാര്യങ്ങൾ വിലയിരുത്തിയിരുന്നു.

മന്ത്രി രാജീവ് ബിഷപ് മാർ ജോർജ് മഠത്തിക്കണ്ടത്തിലിനെ സന്ദർശിച്ചു

കോതമംഗലം : കോതമംഗലം രൂപത ബിഷപ് മാർ ജോർജ് മഠത്തിക്കണ്ടത്തിലിനെ മന്ത്രി പി.രാജീവ് ബിഷപ്സ് ഹൗസിൽ സന്ദർശിച്ചു. പഴയ ആലുവ-മൂന്നാർ രാജപാത സംബന്ധിച്ച് കേരള ഹൈക്കോടതി സർക്കാർ നിലപാട് അറിയിക്കാൻ ആവശ്യപ്പെട്ടിരിക്കുന്ന സാഹചര്യത്തിൽ സർക്കാരിന്‍റെ അടിയന്തര ഇടപെടൽ ആവശ്യപ്പെട്ട് ബിഷപ് മന്ത്രിക്കും ആന്‍റണി ജോൺ എംഎൽഎക്കും കത്തുനൽകി. വന്യജീവി ആക്രമണങ്ങൾക്കു ശാശ്വത പരിഹാരം കാണാനും അധ്യാപക നിയമനവുമായി ബന്ധപ്പെട്ട് ഭിന്നശേഷി പ്രശ്നത്തിൽ സർക്കാർ നിലപാടെടുത്ത് ഇപ്പോൾ ജോലി ചെയ്യുന്ന സാധാരണക്കാരായ അധ്യാപകർക്ക് അനുകൂല നിലപാട് സ്വീകരക്കണമെന്നും കത്തിൽ ആവശ്യപ്പെട്ടു.

വായന മത്സരം 13ന്

മൂവാറ്റുപുഴ: സംസ്ഥാന ലൈബ്രറി കൗണ്‍സില്‍ ഹൈസ്‌കൂള്‍ വിദ്യാര്‍ഥികള്‍ക്കും മുതിര്‍ന്നവര്‍ക്കുമായി സംഘടിപ്പിക്കുന്ന വായനോത്സവം 2025ന്‍റെ താലൂക്ക് തല മത്സരം 13ന് നടക്കും. രാവിലെ 10 മുതല്‍ ഉച്ചയ്ക്ക് ഒന്നു വരെ മൂവാറ്റുപുഴ എസ്എന്‍ഡിപി ഹൈസ്‌കൂളിലാണ് വായനോത്സവം സംഘടിപ്പിച്ചിരിക്കുന്നത്. ഹൈസ്‌കൂള്‍ വിദ്യാര്‍ഥികള്‍ക്കും മുതിര്‍ന്നവര്‍ക്ക് രണ്ട് വിഭാഗത്തിലുമാണ് താലൂക്ക് തലത്തില്‍ മത്സരം നടത്തുന്നത്. ക്വിസ് മത്സരവും എഴുത്ത് പരീക്ഷയും ഉണ്ടായിരിക്കും. 100 മാര്‍ക്കിന്‍റെ മത്സരത്തില്‍ 20 മാര്‍ക്ക് ക്വിസിനും, 80 മാര്‍ക്ക് നിര്‍ദേശിക്കപ്പെട്ട പുസ്തകങ്ങളില്‍ നിന്നുള്ള എഴുത്തു പരീക്ഷക്കുമാണ്. പൊതുവിജ്ഞാനത്തെ ആധാരമാക്കിയും പത്രവാര്‍ത്തയെ മുന്‍ നിര്‍ത്തിയുമായിരിക്കും ക്വിസ് മത്സരം. നിര്‍ദേശിക്കപ്പെട്ട പുസ്തകങ്ങളില്‍ നിന്നായിരിക്കും എഴുത്ത് പരീക്ഷയ്ക്കുള്ള ചോദ്യങ്ങള്‍. രാവിലെ ഒമ്പതിന് രജിസ്‌ട്രേഷന്‍ തുടര്‍ന്ന് 9.30ന് കവി ജയകുമാര്‍ ചെങ്ങമനാട് പരിപാടി ഉദ്ഘാടനം ചെയ്യും. താലൂക്ക് പ്രസിഡന്‍റ് ജോഷി സ്‌കറിയ അധ്യക്ഷത വഹിക്കും.

ആളുമാറി പോലീസ് ആക്രമണം; റിപ്പോര്‍ട്ട് ഇന്നും സമര്‍പ്പിക്കില്ല

മൂവാറ്റുപുഴ: ബാറ്ററി മോഷണക്കേസില്‍ ആളുമാറി യുവാവിനെ കസ്റ്റഡിയിലെടുത്ത് ക്രൂരമായി മര്‍ദിച്ച കേസില്‍ ജില്ലാ പോലീസ് മേധാവിക്ക് മൂവാറ്റുപുഴ പോലീസ് റിപ്പോര്‍ട്ട് ഇന്നും സമര്‍പ്പിക്കില്ല. ഒരാളുടെ കൂടെ മൊഴി രേഖപ്പെടുത്തേണ്ടതിനാലാണ് റിപ്പോർട്ട് ഇന്ന് സമര്‍പ്പിക്കാത്തതെന്നാണ് വിശദീകരണം.ശനിയാഴ്ച റിപ്പോര്‍ട്ട് സമര്‍പ്പിക്കുമെന്നാണ് ഇപ്പോള്‍ പറയുന്നത്. കഴിഞ്ഞ 12 നാണ് പെരുമ്പല്ലൂര്‍ മടത്തിക്കുടിയില്‍ ആന്‍റണിയുടെ മകന്‍ അമല്‍ (35)ആണ് പോലീസ് മര്‍ദനത്തിന് ഇരയായത്. വീട്ടില്‍ ഉച്ചഭക്ഷണം കഴിച്ചുകൊണ്ടിരിക്കുന്ന അമലിനെ പോലീസ് അകാരണമായി കസ്റ്റഡിയിലെടുത്ത് ക്രൂര മര്‍ദനത്തിനിരയാക്കുകയായിരുന്നു. ശരീരമാസകലം പരിക്കേറ്റ അമല്‍ ഇപ്പോഴും ചികിത്സയിലാണ്. സംഭവം നടന്ന് ഒരു മാസം ആകുമ്പോള്‍ പോലും എഫ്‌ഐആര്‍ രജിസ്റ്റര്‍ ചെയ്യാത്ത പോലീസ് നടപടിക്കെതിരെ പ്രതിഷേധം വ്യാപകമായിട്ടുണ്ട്. ഇലക്ട്രിക്കല്‍ ജോലി ചെയ്ത് കുടുംബം നോക്കിയിരുന്ന അമലിന്‍റെ കഴുത്തിനും നട്ടെല്ലിനുമാണ് മൂവാറ്റുപുഴ പോലീസിന്‍റെ മര്‍ദനത്തില്‍ പരിക്കേറ്റത്. മാതാവിന്‍റെയും ഭാര്യയുടെയും കുട്ടിയുടെയും മുന്നില്‍ വച്ചായിരുന്നു ക്രൂരമര്‍ദനം. ആക്രികടയില്‍ ബാറ്ററി വിറ്റിരുന്നോ എന്ന് ചോദിച്ചെത്തിയ പോലീസിനോട് തന്‍റെ വീട്ടിലെ പത്തുവര്‍ഷത്തിലേറെ പഴക്കമുള്ള ഇന്‍വെര്‍ട്ടിന്‍റെ ബാറ്ററി തകറാറിലായതിനെ തുടര്‍ന്ന് ആക്രികടയില്‍ വിറ്റിരുന്നതായി മറുപടി നല്‍കി. ഉടന്‍ പോലീസ് ഉദ്യോഗസ്ഥന്‍ അമലിനെ വലിച്ചിറക്കി വീട്ടു മുറ്റത്തിട്ട് മര്‍ദിക്കുകയായിരുന്നു. പിന്നീട് ബലമായി ജീപ്പില്‍ കയറ്റി കൊണ്ടുപോകുന്നതിനിടയും മര്‍ദനം തുടര്‍ന്നു. മൂവാറ്റുപുഴ പി.ഒ ജംഗ്ഷനിലെ വ്യാപാര സ്ഥാപനത്തില്‍ നിന്നും ബാറ്ററി മോഷണം പോയി എന്ന പരാതിയുടെ അന്വേഷണാടിസ്ഥാനത്തിലാണ് ആറംഗ പോലീസ് സംഘമെത്തിയത്. പോലീസ് സ്റ്റേഷനില്‍ പരാതിക്കാരും എത്തി ബാറ്ററിയുടെ ബില്ല് നല്‍കിയപ്പോഴാണ് മോഷണം പോയ ബാറ്ററി അല്ലെന്ന് പോലീസിന് മനസിലായത്. ഇതോടെ നിരപരാധിയാണെന്നുകണ്ട് അമലിനെ അനുനയിപ്പിച്ച് വിട്ടയയ്ക്കുകയായിരുന്നു. മര്‍ദനത്തെ തുടര്‍ന്ന് ശരീരവേദനയും ക്ഷീണവും മാറാതെ വന്നതോടെ അമല്‍ ആശുപത്രിയില്‍ ചികിത്സ തേടി. സംഭവം വിവാദമായതോടെ അന്വേഷണം ഊര്‍ജിതമാക്കിയെന്ന പോലീസിന്‍റെ പതിവ് പല്ലവിയല്ലാതെ കുറ്റക്കാര്‍ക്കെതിരെ യാതൊരു നടപടിയും സ്വീകരിച്ചിട്ടില്ലെന്നാണ് അമല്‍ പറയുന്നത്.

പിറവം വള്ളംകളി ഒക്‌ടോബര്‍ നാലിന്

പിറവം: ചാമ്പ്യൻസ് ബോട്ട് റേസ് ലീഗിന്‍റെ ഭാഗമായി പിറവത്ത് വള്ളംകളി മത്സരം ഒക്‌ടോബര്‍ നാലിന് നടക്കും. ഇതിനായി വിപുലമായ ഒരുക്കങ്ങൾ പിറവത്ത് ആരംഭിച്ചു. പിറവം പാലത്തിന് സമീപം മുവാറ്റുപുഴയാറിലാണ് മത്സരം നടക്കുന്നത്. ഇതിനു മുമ്പ് നടന്ന സിബിഎൽ മത്സരങ്ങളിലും പിറവം വേദിയായിട്ടുണ്ട്. പിറവത്തെ വള്ളം കളി മത്സരം ഒഴുക്കിനെതിരേ നടക്കുന്നുവെന്നുള്ള പ്രത്യേകതയുമുണ്ട്. സിബിഎൽ മത്സരങ്ങളിൽ മറ്റെങ്ങും ഒഴുക്കിനെതിരേ തുഴയെറിയുന്നില്ല. ഇതിനാൽ മത്സരം കാണുന്നതിനായി വിദേശികളടക്കം നിരവധി കാണികൾ ഇവിടെ എത്തിച്ചേരാറുണ്ട്. സിബിഎൽ മത്സരത്തിൽ ഒമ്പതോ അതിലധികമോ ചുണ്ടൻ വള്ളങ്ങളാണ് മത്സരിക്കാനെത്തുന്നത്. ഇതിനൊപ്പം തന്നെ പ്രാദേശികമായി പിറവം നഗരസഭ ഓടി, ചുരുളൻ വള്ളങ്ങളുടെ മത്സരവും സംഘടിപ്പിക്കും. സിബിഎൽ മത്സരം സംബന്ധിച്ച് സർക്കാർ തലത്തിൽ ചേർന്ന യോഗത്തിലാണ് തീരുമാനമെടുത്തതെന്ന് അനൂപ്‌ ജേക്കബ്‌ എംഎല്‍എ അറിയിച്ചു. നേരത്തെ ചാമ്പ്യൻസ് ബോട്ട് റേസ് ചാമ്പ്യന്‍സ് ലീഗിന്‍റെ തീയതികളെ സംബന്ധിച്ച് ഡയറക്ടര്‍ ബോര്‍ഡ് ചേര്‍ന്ന് തീരുമാനമെടുക്കുകയും, തുടർന്ന് അന്തിമ തീരുമാനത്തിനായി സര്‍ക്കാരില്‍ സമര്‍പ്പിക്കുകയും ചെയ്തിരുന്നു. സിബിഎൽ മത്സരം 19ന് ആലപ്പുഴ കൈനകരിയില്‍ ആരംഭിച്ച് ഡിസംബര്‍ ആറിന് കൊല്ലം പ്രസിഡന്‍റ്സ് ട്രോഫിയിലൂടെ സമാപിക്കും. സംഘാടക സമിതി കൂടി പിറവം വള്ളംകളിയുടെ വിപുലമായ ഒരുക്കങ്ങളെ സംബന്ധിച്ച് ചര്‍ച്ച ചെയ്തു തീരുമാനമെടുക്കുമെന്ന് അനൂപ് ജേക്കബ് എംഎല്‍എ അറിയിച്ചു.

കസ്റ്റഡി മര്‍ദനം കോൺഗ്രസിന്‍റെ പോലീസ് സ്‌റ്റേഷന്‍ ധര്‍ണയില്‍ പ്രതിഷേധമിരമ്പി

കൊച്ചി: സംസ്ഥാനത്തെ പോലീസ് സ്‌റ്റേഷനുകളില്‍ നടക്കുന്ന ക്രൂര മര്‍ദനങ്ങളില്‍ പ്രതിഷേധിച്ച് കോണ്‍ഗ്രസ് നടത്തിയ പോലീസ് സ്‌റ്റേഷന്‍ ധര്‍ണയില്‍ പ്രതിഷേധമിരമ്പി. കസ്റ്റഡി മര്‍ദനങ്ങളില്‍ മുഖ്യമന്ത്രി മൗനം അവസാനിപ്പിക്കുക, കുന്നംകുളം സ്‌റ്റേഷനില്‍ സുജിത്തിനെ ക്രൂരമായി ആക്രമിച്ച പൊലീസുകാരെ പിരിച്ചു വിടുക തുടങ്ങിയ ആവശ്യങ്ങളുന്നയിച്ചാണ് കെപിസിസി ആഹ്വാന പ്രകാരം ജില്ലയിലെ പോലീസ് സ്‌റ്റേഷനുകള്‍ക്ക് മുന്നില്‍ കോണ്‍ഗ്രസ് പ്രതിഷേധ ധര്‍ണ സംഘടിപ്പിച്ചത്. ജില്ലാതല ഉദ്ഘാടനം ബെന്നി ബെഹനാന്‍ എംപി കുറുപ്പുംപടി പോലീസ് സ്‌റ്റേഷന് മുന്നില്‍ നിര്‍വഹിച്ചു. ഡിസിസി പ്രസിഡന്‍റ് മുഹമ്മദ് ഷിയാസ് പള്ളുരുത്തി സ്‌റ്റേഷന് മുന്നിലും എംഎല്‍എമാരായ കെ ബാബു. -തൃപ്പൂണിത്തുറ സ്‌റ്റേഷന്‍, അന്‍വര്‍ സാദത്ത് -ആലുവ ഈസ്റ്റ്, റോജി എം. ജോണ്‍ -അങ്കമാലി, മാത്യു കുഴല്‍നാടന്‍ -മൂവാറ്റുപുഴ, ടി.ജെ.വിനോദ് -തേവര, ഉമ തോമസ് -തൃക്കാക്കര, എല്‍ദോസ് കുന്നപ്പിള്ളി -കോടനാട് സ്റ്റേഷൻ എന്നിവിടങ്ങളിലും ധര്‍ണ ഉദ്ഘാടനം ചെയ്തു. കെപിസിസി നേതാക്കളായ ദീപ്തി മേരി വര്‍ഗീസ്- പാലാരിവട്ടം, വി.പി.സജീന്ദ്രന്‍ - പട്ടിമറ്റം, റോയ് കെ. പൗലോസ്-കുട്ടന്പുഴ, വി.ജെ. പൗലോസ് -മുളന്തുരുത്തി, കെ.പി. ധനപാലന്‍ -ഞാറക്കല്‍, അജയ് തറയില്‍ -മുനമ്പം, അബ്ദുള്‍ മുത്തലിബ് - കടുങ്ങല്ലൂര്‍, എസ്.അശോകന്‍ -കോതമംഗലം, ജിന്‍റോ ജോണ്‍ -കളമശേരി, എം.ആര്‍.അഭിലാഷ് - എളമക്കര, ടോണി ചമ്മിണി -ഫോര്‍ട്ടുകൊച്ചി, ഐ.കെ. രാജു പുത്തന്‍കുരിശ് എന്നീ സ്‌റ്റേഷനുകള്‍ക്ക് മുന്നില്‍ പ്രതിഷേധം ഉദ്ഘാടനം ചെയ്തു.

അഞ്ചു വയസുകാരന്‍റെ വിരൽ കട്ടിലിൽ കുരുങ്ങി

വൈപ്പിൻ: അഞ്ചുവയസുകാരന്‍റെ കൈവിരൽ ആശുപത്രി കാഷ്വാലിറ്റിയിലെ ഇരുമ്പ് കട്ടിലിന്‍റെ ഓട്ടയിൽ കുരുങ്ങി. കൂടെയുണ്ടായിരുന്നവർ എത്രകണ്ട് പരിശ്രമിച്ചിട്ടും വിരൽ ഊരിയെടുക്കാൻ കഴിഞ്ഞില്ല. തുടർന്ന് വൈപ്പിൻ അഗ്നി രക്ഷാ നിലയത്തിലെ ജീവനക്കാർ എത്തി കട്ടറും ഷിയേഴ്സും ഉപയോഗിച്ച് ഏതാനും മിനിട്ടുകൾക്കുള്ളിൽ കുഞ്ഞിന്‍റെ കൈവിരൽ മോചിപ്പിച്ചു. കഴിഞ്ഞ ദിവസം ഞാറക്കലിലെ ഒരു സ്വകാര്യ ആശുപത്രിയിലായിരുന്നു സംഭവം.

കണിയാമ്പുഴ റോഡിൽദുരിതയാത്ര

തൃപ്പൂണിത്തുറ: കണിയാമ്പുഴ റോഡിലൂടെയുള്ള യാത്ര യാത്രക്കാർക്ക് ദുരിതമാകുന്നു. എരൂർ മാത്തൂർ മേൽപ്പാലത്തിന് താഴെ നിന്നും വൈറ്റില ഹബ്ബിലേയ്ക്കുള്ള റോഡിൽ മാത്തൂർ അമ്പലത്തിന് ശേഷം പിഷാരികോവിൽ റോഡ് തുടങ്ങുന്നത് വരെയുള്ള ഭാഗമാണ് റോഡ് പൊട്ടിപ്പൊളിഞ്ഞ് തകർന്ന് യാത്ര ദുഷ്ക്കരമായിരിക്കുന്നത്. ആകെ തകർന്നു കിടക്കുന്ന ഇടുങ്ങിയ റോഡിൽ, ഇടക്കിടയ്ക്കായി കിടങ്ങിന് സമാനമായി നീളത്തിലുള്ള കുഴികളാണ് രൂപപ്പെട്ടിരിക്കുന്നത്. ഈ കുഴികൾ, വീതികുറഞ്ഞ റോഡിന്‍റെ അരിക് ഭാഗങ്ങളിലായതിനാൽ കുഴികളിൽ വീഴാതെ വാഹനങ്ങൾക്ക് മുന്നോട്ട് പോകാനാവാത്ത അവസ്ഥയാണ്. മഴ പെയ്ത സമയമാണെങ്കിൽ കുഴികൾ നിറഞ്ഞ് കവിഞ്ഞ് വെള്ളം റോഡിൽ പരക്കുന്നത് കാരണം കുഴികളുടെ വലിപ്പമറിയാതെ വരുന്നതിനാൽ വാഹന ഡ്രൈവർമാർ ഈ ഭാഗം കടന്നുപോകാൻ പെടാപ്പാട് പെടുന്നു. കൂടാതെ താഴ്ന്ന റോഡിലുള്ള നീരൊഴുക്കും, ഇരുവശത്ത് നിന്നുമായി പരസ്പരം ബന്ധിപ്പിക്കപ്പെടാതെ കിടക്കുന്ന കാനകൾ നിറഞ്ഞ് കവിഞ്ഞ് റോഡിലൂടെ പരന്നൊഴുകുന്ന വെള്ളവും ഈ ഭാഗത്ത് തടാക പ്രതീതിയും സൃഷ്ടിക്കുകയാണ്. കാക്കനാട്, വെണ്ണല ഭാഗങ്ങളിൽ നിന്നും തൃപ്പൂണിത്തുറയുടെ കിഴക്കൻ മേഖലയിൽ നിന്നുമുള്ള വാഹനങ്ങൾ വൈറ്റിലയിലേയ്ക്കെത്താനും തിരിച്ചും ഏറ്റവുമധികം ഉപയോഗപ്പെടുത്തുന്നത് ഈ റോഡാണ്. വീതികുറഞ്ഞ റോഡിൽ ഇരുദിശകളിൽ നിന്നും വലിയ വാഹനങ്ങൾ വന്നാൽ ഗതാഗതം തടസപ്പെടുന്ന സാഹചര്യമാണ്. പരസ്പരം കടന്നുപോകാനാകാതെ കിടക്കുന്ന വാഹനങ്ങൾക്ക് പിന്നിൽ ഈസമയത്തിനുള്ളിൽ വാഹനങ്ങളുടെ നീണ്ട നിര രൂപപ്പെട്ടിട്ടുണ്ടാകും. റോഡരികിലെ മതിലിലും എതിർഭാഗത്തുള്ള വാഹനത്തിലും ഉരയാതെ വാഹനം കടത്തിക്കൊണ്ടു പോകാൻ ബുദ്ധിമുട്ടുന്ന ഡ്രൈവർമാരെ റോഡിന്‍റെ തകർച്ച ഏറെ വിഷമിപ്പിക്കുകയാണ്. റോഡ് വികസനം അടുത്തൊന്നും നടക്കാനിടയില്ലാതിരിക്കെ ഉള്ള റോഡെങ്കിലും ഗതാഗത യോഗ്യമാക്കിത്തരണമെന്നാണ് യാത്രക്കാർ ആവശ്യപ്പെടുന്നത്.

വാഹനാപകടം: ചികിത്സയിലായിരുന്ന മധ്യവയസ്‌കന്‍ മരിച്ചു

കൊച്ചി: വാഹനാപകടത്തില്‍പ്പെട്ട് ചികിത്സയിലായിരുന്ന മധ്യവയസ്കൻ മരിച്ചു. കാഞ്ഞൂര്‍ വട്ടേലി ദേവസി മകന്‍ സേവ്യര്‍ (59) ആണ് മരിച്ചത്. തിരുവോണ ദിവസം കാഞ്ഞൂര്‍ പാറപ്പുറം വല്ലം കടവ് റോഡിലുണ്ടായ വാഹനാപകടത്തെ തുടര്‍ന്ന് അങ്കമാലിയിലെ സ്വകാര്യ ആശുപത്രിയില്‍ ചികിത്സയിലിരിക്കെയാണ് മരിച്ചത്. സ്വന്തം വാഹനത്തില്‍ വീട്ടില്‍ നിന്ന് ഇറങ്ങി എതിര്‍വശത്തേക്ക് കടക്കുമ്പോള്‍ അമിത വേഗതയില്‍ വന്ന ബൈക്ക് ഇടിക്കുകയായിരുന്നു. സംസ്‌കാരം പിന്നീട് പാറപ്പുറം സെന്‍റ് ജോര്‍ജ് പള്ളിയില്‍. ഭാര്യ: റാണി (ചെത്തിക്കോട് മല്‍പ്പാന്‍ കുടുംബാംഗം). മക്കള്‍: മെര്‍ലിന്‍ (യുകെ), മെറിന്‍, മേബിള്‍ (യുകെ). മരുമക്കള്‍: അനില്‍, ജിസ്‌റ്റോ.

ഫാഷന്‍ ഗോള്‍ഡ് ജ്വല്ലറി നിക്ഷേപ തട്ടിപ്പ് : രണ്ട് പ്രതികള്‍ക്ക് ജാമ്യം

കൊച്ചി: ഫാഷന്‍ ഗോള്‍ഡ് ജ്വല്ലറി നിക്ഷേപ തട്ടിപ്പുമായി ബന്ധപ്പെട്ട എന്‍ഫോഴ്‌സ്‌മെന്‍റ് ഡയറക്ടറേറ്റ് കേസില്‍ രണ്ടു പ്രതികള്‍ക്ക് ജാമ്യം. കേസിലെ അഞ്ചും ആറും പ്രതികളായ മുന്‍ എംഎല്‍എ എം.സി. കമറുദ്ദീന്‍, ടി.പി. പൂക്കോയ തങ്ങള്‍ എന്നിവര്‍ക്കാണ് ഹൈക്കോടതി ഉപാധികളോടെ ജാമ്യം അനുവദിച്ചത്. കാസര്‍ഗോഡ് ചെറുവത്തൂരിലെ ജ്വല്ലറിയുമായി ബന്ധപ്പെട്ട നിക്ഷേപ തട്ടിപ്പ് കേസില്‍ 2025 ഏപ്രില്‍ ഏഴിന് ഇഡി അറസ്റ്റ് ചെയ്ത ഇരുവരും 155 ദിവസമായി കസ്റ്റഡിയിലാണെന്നതടക്കം വിലയിരുത്തിയാണ് ജസ്റ്റീസ് ബെച്ചു കുര്യന്‍ തോമസിന്‍റെ ഉത്തരവ്. 50,000 രൂപയുടെ ബോണ്ട് രണ്ടാള്‍ ജാമ്യം തുടങ്ങിയ വ്യവസ്ഥകളോടെയാണ് ജാമ്യം.സ്വര്‍ണവ്യാപാരത്തിനായി 2006 മുതല്‍ 2008 വരെയായി നാല് കമ്പനികള്‍ രജിസ്റ്റര്‍ ചെയ്തത് നിക്ഷേപ തട്ടിപ്പ് നടത്തിയെന്നായിരുന്നു കേസ്. സമാഹരിച്ച തുകയില്‍ 20 കോടിയോളം രൂപ വകമാറ്റിയെന്നും ഇഡി ആരോപിച്ചു. വഞ്ചിക്കുകയെന്ന ഉദ്ദേശ്യം പ്രതികള്‍ക്കുണ്ടായിരുന്നില്ലെന്നും അതിനാല്‍ ഇന്ത്യന്‍ ശിക്ഷാ നിയമ പ്രകാരമുള്ള കുറ്റം നിലനില്‍ക്കില്ലെന്നും കോടതി വിലയിരുത്തി. നേരത്തെ ക്രൈംബ്രാഞ്ച് അറസ്റ്റ് ചെയ്തതിനെ തുടര്‍ന്ന് 110 ദിവസത്തോളവും കസ്റ്റഡിയില്‍ കഴിഞ്ഞിരുന്നു.

പോലീസ് മർദനം : റിപ്പോര്‍ട്ട് നാളെ സമര്‍പ്പിക്കും

മൂവാറ്റുപുഴ: ബാറ്ററി മോഷണക്കേസില്‍ ആളുമാറി പോലീസ് കസ്റ്റഡിയിലെടുത്ത് മർദിച്ചെന്ന കേസില്‍ ആലുവ റൂറല്‍ ജില്ലാ പോലീസ് മേധാവിക്ക് മൂവാറ്റുപുഴ പോലീസ് നാളെ റിപ്പോര്‍ട്ട് സമര്‍പ്പിക്കും. സംഭവം നടന്ന് ഒരു മാസം പിന്നിടുമ്പോഴാണ് പോലീസ് റിപ്പോര്‍ട്ട് നല്‍കാന്‍ ഒരുങ്ങുന്നത്. രണ്ടുപേരുടെ കൂടെ മൊഴി രേഖപ്പെടുത്തേണ്ടതിനാലാണ് ഇന്നലെ സമര്‍പ്പിക്കാതിരുന്നത്. കഴിഞ്ഞ 12ന് പെരുമ്പല്ലുരുള്ള വീട്ടില്‍ ഉച്ചഭക്ഷണം കഴിച്ചു കൊണ്ടിരിക്കുന്ന അമല്‍ ആന്‍റണിയെയാണ് പോലീസ് കസ്റ്റഡിയിലെടുത്ത് മര്‍ദിച്ചത്. അമല്‍ മോഷ്ടാവല്ലെന്ന് തെളിഞ്ഞതോടെ മാതാവിനൊപ്പം തിരികെ പറഞ്ഞുവിട്ടിരുന്നു.

എംഡിഎംഎയുമായി ഡോക്ടര്‍ ഉൾപ്പെടെ രണ്ടു പേർ അറസ്റ്റില്‍

കൊച്ചി: നഗരത്തില്‍ പോലീസ് നടത്തിയ പരിശോധനയില്‍ എംഡിഎംഎയുമായി യുവ ഡോക്ടർ ഉൾപ്പെടെ രണ്ടു പേർ അറസ്റ്റിലായി. ഡോക്ടറായ പറവൂര്‍ വടക്കേക്കര ഐഷാ മന്‍സിലില്‍ അംജാദ് അഹസാന്‍ (31), കൊല്ലം വടക്കേവിള പട്ടത്താനം പുതുവീട് ഹാരിസ് (33) എന്നിവരെയാണ് കൊച്ചി സിറ്റി ഡാന്‍സാഫ് ടീം അറസ്റ്റ് ചെയ്തത്. എറണാകുളം നോര്‍ത്തില്‍ നിന്നാണ് അംജാദ് ഹസനെ നര്‍ക്കോട്ടിക് സെല്‍ എസിപി കെ.എ. അബ്ദുള്‍ സലാമിന്‍റെ നേതൃത്വത്തിലുള്ള സംഘം അറസ്റ്റ് ചെയ്തത്. ഇയാളുടെ പക്കൽനിന്ന് 1.06 ഗ്രാം എംഡിഎംഎ പിടിച്ചെടുത്തു. ഇയാള്‍ ഉക്രെയ്നില്‍ നിന്ന് എംബിബിഎസ് പഠനം പൂര്‍ത്തിയാക്കിയ ശേഷം എറണാകുളം ജനറല്‍ ആശുപത്രിയിലെ കോള്‍ സെന്‍ററില്‍ ജോലി ചെയ്തിരുന്നു. ലഹരി ഉപയോഗത്തിന് ഇയാള്‍ക്കെതിരെ പാലാരിവട്ടം പോലീസ് സ്റ്റേഷനില്‍ കേസ് ഉണ്ട്. ഹാരിസിനെ കളമശേരി കുസാറ്റ് ഭാഗത്ത് നടത്തിയ പരിശോധനയിലാണ് പിടികൂടിയത്. ഇയാളുടെ പക്കല്‍ നിന്ന് 19.79 ഗ്രാം എംഡിഎംഎ പിടിച്ചെടുത്തു.

കോണ്‍ഗ്രസിന്‍റെ പോലീസ് സ്റ്റേഷന്‍ മാര്‍ച്ച് ഇന്ന്

കൊച്ചി: സംസ്ഥാനത്തെ പോലീസ് സ്റ്റേഷനുകളില്‍ അരങ്ങേറുന്ന ക്രൂരകൃത്യങ്ങളില്‍ മുഖ്യമന്ത്രി പാലിക്കുന്ന മൗനം അവസാനിപ്പിക്കുക, കുന്നംകുളം സ്റ്റേഷനില്‍ യൂത്ത് കോണ്‍ഗ്രസ് പ്രവര്‍ത്തകനായ സുജിത്തിനെ ക്രൂരമായി ആക്രമിച്ച പാലീസുകാരെ പിരിച്ചു വിടുക തുടങ്ങിയ ആവശ്യങ്ങളുന്നയിച്ച് ഇന്ന് ജില്ലയിലെ പോലീസ് സ്റ്റേഷനുകള്‍ക്ക് മുന്നില്‍ കോണ്‍ഗ്രസ് പ്രതിഷേധ ധര്‍ണ സംഘടിപ്പിക്കുമെന്ന് ഡിസിസി പ്രസിഡന്‍റ് മുഹമ്മദ് ഷിയാസ് അറിയിച്ചു. ഇന്ന് രാവിലെ 10ന് ബെന്നി ബഹനാന്‍ എംപി കൂവപ്പടി പോലീസ് സ്റ്റേഷന് മുന്നിലും, ഡിസിസി പ്രസിഡന്‍റ് മുഹമ്മദ് ഷിയാസ് പള്ളുരുത്തി സ്റ്റേഷന് മുന്നിലും പ്രതിഷേധ ധര്‍ണ ഉദ്ഘാടനം ചെയ്യും. എംഎല്‍എമാരായ കെ. ബാബു-മരട് സ്റ്റേഷന്‍, അന്‍വര്‍ സാദത്ത്-ആലുവ ഈസ്റ്റ്, റോജി എം. ജോണ്‍-അങ്കമാലി, മാത്യു കുഴല്‍നാടന്‍-മൂവാറ്റുപുഴ, ടി.ജെ. വിനോദ് -തേവര, ഉമാ തോമസ്-തൃക്കാക്കര, എല്‍ദോസ് കുന്നപ്പിള്ളി-കുറുപ്പംപടി, കെപിസിസി നേതാക്കളായ ദീപ്തി മേരി വര്‍ഗീസ്-പാലാരിവട്ടം, വി.പി. സജീന്ദ്രന്‍-പട്ടിമറ്റം, റോയ് കെ. പൗലോസ്-കുട്ടംപുഴ, വി.ജെ. പൗലോസ്-മുളന്തുരുത്തി, അബ്ദുള്‍ മുത്തലിബ്-കടുങ്ങല്ലൂര്‍, ജിന്‍റോ ജോണ്‍-കളമശേരി, എം.ആര്‍. അഭിലാഷ്-എളമക്കര എന്നിവരും ഉദ്ഘാടകരാകും.

പാതിവില തട്ടിപ്പ് പ്രതികളെ രക്ഷപ്പെടുത്താന്‍ ശ്രമമെന്ന് മുഹമ്മദ് ഷിയാസ്

കൊച്ചി: പാതിവില തട്ടിപ്പ് കേസില്‍ പ്രതികളെ രക്ഷപ്പെടുത്താന്‍ സിപിഎം-ബിജെപി നേതൃത്വം ശ്രമിക്കുന്നതായി ഡിസിസി പ്രസിഡന്‍റ് മുഹമ്മദ് ഷിയാസ്. ബിജെപി നേതാവ് എ.എന്‍. രാധാകൃഷ്ണന്‍ അടക്കമുള്ളവര്‍ ഉള്‍പ്പെട്ട കേസില്‍ പ്രതികളെ രക്ഷിക്കാന്‍ സിപിഎം നേതാക്കള്‍ കടുത്ത സമ്മര്‍ദം ചെലുത്തുകയാണെന്ന് ഷിയാസ് ആരോപിച്ചു. പ്രത്യേക അന്വേഷണ സംഘം പിരിച്ചു വിട്ടത് സിപിഎം-ബിജെപി ഒത്തുതീര്‍പ്പിന്‍റെ ഭാഗമാണ്. കേസിലെ പ്രധാന പ്രതിയായ അനന്തുകൃഷ്ണനെ പോലീസ് വഴിവിട്ട് സഹായിക്കുന്നു. പണം നല്‍കി പോലീസിനെ സ്വാധീനിക്കാനും ശ്രമങ്ങള്‍ നടക്കുന്നുണ്ട്. ആക്ഷന്‍ കൗസില്‍ നടത്തുന്ന പ്രക്ഷോഭങ്ങള്‍ക്ക് കോണ്‍ഗ്രസ് പിന്തുണ നല്‍കും. പാതിവില തട്ടിപ്പ് കേസ് അട്ടിമറിക്കാനുള്ള നീക്കങ്ങള്‍ക്കെതിരെ കോണ്‍ഗ്രസ് ശക്തമായ പ്രക്ഷോഭം ആരംഭിക്കുമെന്നും മുഹമ്മദ് ഷിയാസ് പറഞ്ഞു.

ഓപ്പറേഷന്‍ ഷൈലോക്ക് : എറണാകുളം റൂറലില്‍ നാലുപേര്‍ കുടുങ്ങി

ആലുവ: കൊള്ളപ്പലിശക്കാര്‍ക്ക് കടിഞ്ഞാണിടാന്‍ ഓപ്പറേഷന്‍ ഷൈലോക്കുമായി പോലീസ്. എറണാകുളം റൂറലില്‍ 40 ഇടങ്ങളിലായി നടത്തിയ പരിശോധനയില്‍ നാലു കേസുകള്‍ രജിസ്റ്റര്‍ ചെയ്തു. ആലുവ, നെടുമ്പാശേരി, പറവൂര്‍, കുറുപ്പംപടി എന്നിവിടങ്ങളിലാണ് കേസ് രജിസ്റ്റര്‍ ചെയ്തതിട്ടുള്ളത്. അഞ്ച് സബ് ഡിവിഷനുകളിലെ 34 സ്റ്റേഷനുകളിലായിരുന്നു പരിശോധന. രാവിലെ ഏഴിന് ആരംഭിച്ച പരിശോധന രാത്രി വൈകിയും തുടര്‍ന്നു. നെടുമ്പാശേരിയില്‍നിന്ന് 13 ഇരുചക്രവാഹനങ്ങള്‍, മൂന്ന് ആര്‍സി ബുക്ക്, 3,446,30 രൂപ എന്നിവ പിടികൂടി. സംഭവത്തില്‍ ഡേവിസ് എന്നയാളെ അറസ്റ്റ് ചെയ്തു. ആലുവയില്‍ ഏഴ് കാറുകള്‍, 15 ആര്‍സി ബുക്ക്, 13 മുദ്രപ്പത്രങ്ങള്‍ തുടങ്ങിയവയും പിടിച്ചെടുത്തു. സംഭവവുമായി ബന്ധപ്പെട്ട് കുന്നത്തേരി സ്വദേശി ഹമീദിനെ അറസ്റ്റ് ചെയ്തു. കുറുപ്പംപടിയില്‍ 157 ഗ്രാം സ്വര്‍ണവും, 40,150 രൂപയും പിടികൂടി. സംഭവത്തില്‍ രായമംഗലം സ്വദേശി അജയൻ അറസ്റ്റിലായി. പറവൂരില്‍ നിന്ന് ആധാരം, ബ്ലാങ്ക് മുദ്രപ്പത്രങ്ങള്‍, വാഹന ഉടമ്പടി കരാര്‍, ആര്‍സി ബുക്കുകള്‍ തുടങ്ങിയവ കണ്ടെടുത്തു. ഷുക്കൂര്‍ എന്നയാളെ അറസ്റ്റ് ചെയ്തിട്ടുണ്ട്. പണം പലിശയ്ക്ക് കൊടുത്തതുമായി ബന്ധപ്പെട്ട വാഹനങ്ങളും, രേഖകളും, ഉരുപ്പടികളുമാണ് പിടികൂടിയിട്ടുള്ളത്.

ടെലിവിഷന് അധിക വാറന്‍റി നിഷേധിച്ചു; 33,500 രൂപ നഷ്ടപരിഹാരം നല്‍കണം

കൊച്ചി: കൂടുതല്‍ പണം നല്‍കി എടുത്ത എക്‌സ്റ്റെന്‍ഡഡ് വാറന്‍റി കാലയളവില്‍ ടെലിവിഷന്‍ സൗജന്യമായി നന്നാക്കി നല്‍കാതിരുന്ന ടെലിവിഷന്‍ കമ്പനിക്കും വിപണന സ്ഥാപനത്തിനുമെതിരെ പിഴശിക്ഷ വിധിച്ച് ജില്ലാ ഉപഭോക്തൃ തര്‍ക്ക പരിഹാര കോടതി. വൈറ്റില സ്വദേശിനി സുനിത ബിനുകുമാറിന്‍റെ പരാതിയില്‍ ഫിലിപ്‌സ് ഇന്ത്യ ലിമിറ്റഡിനും പ്രമുഖ ഗൃഹോപകരണ വിപണന സ്ഥാപനത്തിനെതിരെയുമാണ് നടപടി. സേവനത്തിലെ ഗുരുതരമായ വീഴ്ച വിലയിരുത്തിയ കോടതി ഉപഭോക്താവിന് 33,500 രൂപ നഷ്ടപരിഹാരം നല്‍കണമെന്ന് ഉത്തരവിട്ടു. 2015 ഏപ്രിലിലാണ് പരാതിക്കാരി 27,000 രൂപയ്ക്ക് ഫിലിപ്‌സ് എല്‍ഇഡി ടിവി വാങ്ങിയത്. നിര്‍മാതാവ് നല്‍കുന്ന മൂന്ന് വര്‍ഷത്തെ വാറന്‍റിക്ക് പുറമെ 2,690 രൂപ അധികമായി നല്‍കി രണ്ട് വര്‍ഷത്തേക്ക് എക്‌സ്റ്റെന്‍ഡഡ് വാറന്‍റിയും എടുത്തു. ഇതനുസരിച്ച് ടിവിക്ക് ആകെ അഞ്ച് വര്‍ഷത്തെ പരിരക്ഷ ലഭിക്കേണ്ടതാണ്. എന്നാല്‍ നിര്‍മാതാവിന്‍റെ മൂന്ന് വര്‍ഷത്തെ വാറന്‍റി കാലയളവ് അവസാനിച്ചതിന് തൊട്ടുപിന്നാലെ എക്‌സ്റ്റെെന്‍ഡഡ് വാറന്‍റി കാലയളവ് നിലനില്‍ക്കേ ടിവിക്ക് ശബ്ദസംബന്ധമായ തകരാറുണ്ടായി. തുടര്‍ന്ന് പരാതി നല്‍കിയപ്പോള്‍ സൗജന്യമായി നന്നാക്കി നല്‍കുന്നതിന് പകരം 2,200 രൂപ ആവശ്യപ്പെടുകയും വാറന്‍റി കഴിഞ്ഞെന്ന കാരണം പറഞ്ഞ് കൈയൊഴിയുകയുമായിരുന്നെന്നാണ് പരാതി. ഒന്നാം എതിര്‍കക്ഷിയായ ഗൃഹോപകരണ വിപണന സ്ഥാപനവും രണ്ടാം എതിര്‍കക്ഷിയായ ഫിലിപ്‌സ് ഇന്ത്യ ലിമിറ്റഡും ടെലിവിഷന്‍ സൗജന്യമായി നന്നാക്കുകയോ അല്ലെങ്കില്‍ ടിവി വിലയുടെ 50 ശതമാനമായ 13,500 രൂപയോ നല്‍കണം. കൂടാതെ, പരാതിക്കാരിക്ക് നേരിടേണ്ടി വന്ന മാനസിക വിഷമത്തിനും പ്രയാസങ്ങള്‍ക്കും നഷ്ടപരിഹാരമായി 15,000 രൂപയും കോടതിച്ചെലവുകള്‍ക്കായി 5,000 രൂപയും 30 ദിവസത്തിനകം നല്‍കണമെന്നും കോടതി ഉത്തരവ് നല്‍കി. പരാതിക്കാരിക്ക് വേണ്ടി അഡ്വ. രാജേഷ് വിജയേന്ദ്രന്‍ ഹാജരായി.

യുവാവിനെ മർദിച്ചു കൊലപ്പെടുത്താൻ ശ്രമം : അഞ്ചുപേർ അറസ്റ്റിൽ

കോതമംഗലം: കീരംപാറ പുന്നേക്കാട് സ്വദേശിയായ യുവാവിനെ ആക്രമിച്ച് കൊലപ്പെടുത്താൻ ശ്രമിച്ച കേസിൽ അഞ്ചുപേർ അറസ്റ്റിലായി. കീരംപാറ കൊമ്പനാട് മേക്കപ്പാല പ്ലാച്ചേരി അജിത്ത് (32), പുന്നേക്കാട് പ്ലാങ്കുടി അമൽ (32), പുന്നേക്കാട് പുത്തൻപുരക്കൽ സഞ്ജയ് (20), പുന്നേക്കാട് പാറക്കൽ അലക്സ് ആന്‍റണി (28), അശമന്നൂർ പയ്യാൽ കോലക്കാടൻ ജിഷ്ണു (28) എന്നിവരെയാണ് കോതമംഗലം പോലീസ് അറസ്റ്റ് ചെയ്തത്. ഓണാഘോഷ പരിപാടിക്കിടെ, സംഘാടകരെ പ്രതികൾ ദേഹോപദ്രവം ഏൽപ്പിച്ചത് ചോദ്യം ചെയ്തതിലുള്ള വിരോധമാണ് ആക്രമണത്തിന് കാരണം. എട്ടിനു പുലർച്ചെ പന്ത്രണ്ടേകാലോടെ കോതമംഗലം അങ്ങാടിയിലെ ആശുപത്രിക്ക് മുന്നിൽ വച്ചായിരുന്നു മർദനം. അജിത്ത് വിവിധ സ്റ്റേഷനുകളിലായി 13 കേസുകളിൽ പ്രതിയാണ്. അമൽ സജിയുടെ പേരിൽ മൂന്നു കേസുകളും ജിഷ്ണുവിന്‍റെ പേരിൽ നാലു കേസുകളും ഉണ്ട്. കോതമംഗലം ഇൻസ്പെക്ടർ പി.ടി. ബിജോയിയുടെ നേതൃത്വത്തിലായിരുന്നു അന്വേഷണം.

ആഗോള അയ്യപ്പസംഗമത്തിനു പിന്നിൽ കപട അയ്യപ്പസ്‌നേഹം: യുഡിഎഫ്

കൊച്ചി: തിരുവിതാംകൂര്‍ ദേവസ്വം ബോര്‍ഡിനെ മുന്‍നിര്‍ത്തി സര്‍ക്കാര്‍ നടത്തുന്ന ആഗോള അയ്യപ്പ സംഗമം കപട അയ്യപ്പ സ്‌നേഹവും രാഷ്ട്രീയ ദുഷ്ടലാക്കോടെയുള്ളതുമാണെന്ന് യുഡിഎഫ് ജില്ലാ നേതൃയോഗം. ശബരിമലയുടെ വിശ്വാസ സംരക്ഷണം ഉറപ്പാക്കാതെയും ഉമ്മന്‍ ചാണ്ടി സര്‍ക്കാര്‍ സുപ്രീം കോടതിയില്‍ നല്‍കിയ സത്യവാങ്മൂലം തിരുത്തിയത് പിന്‍വലിക്കാതെയും ഈ സര്‍ക്കാര്‍ നടത്തുന്ന അയ്യപ്പസ്‌നേഹം തദ്ദേശ തെരഞ്ഞെടുപ്പ് മുന്നില്‍ക്കണ്ട് മാത്രമാണ്. ഉമ്മന്‍ ചാണ്ടിയുടെ കാലത്ത് ശബരിമലയുടെ വികസനത്തിനായി കേന്ദ്ര സര്‍ക്കാരിന്‍റെ അനുമതിയോടെ ഏറ്റെടുത്തു നല്‍കിയ 112 ഏക്കര്‍ ഭൂമിയില്‍ വികസനത്തിന്‍റെ ചെറുവിരലനക്കാത്തവരാണ് ഇപ്പോള്‍ ആഗോള അയ്യപ്പസംഗമം നടത്തുന്നതെന്ന് നേതൃയോഗം കുറ്റപ്പെടുത്തി. തദ്ദേശ സ്ഥാപനങ്ങളുടെ ഫണ്ട് 3000 കോടി രൂപ വെട്ടിക്കുറച്ച സര്‍ക്കാര്‍ സ്വന്തം ഫണ്ടില്‍നിന്ന് പണം കണ്ടെത്തി വികസന സദസുകള്‍ നടത്താന്‍ തദ്ദേശ സ്ഥാപനങ്ങള്‍ക്ക് നിര്‍ദേശം നല്‍കിയിരിക്കുന്നതിന് പിന്നിലും തെരഞ്ഞെടുപ്പ് ലക്ഷ്യങ്ങളാണുള്ളത്. ജനങ്ങളെ നിരന്തരം വഞ്ചിക്കുന്ന സര്‍ക്കാരിനെതിരെ 13ന് ആലുവയില്‍ ജനസദസ് സംഘടിപ്പിക്കുമെന്ന് യോഗം അറിയിച്ചു. യുഡിഎഫ് ജില്ലാ ചെയര്‍മാന്‍ ഡൊമിനിക് പ്രസന്‍റേഷന്‍ അധ്യക്ഷനായി. ഡിസിസി പ്രസിഡന്‍റ് മുഹമ്മദ് ഷിയാസ്, അഡ്വ. മുഹമ്മദ് ഷാ, ഷിബു തെക്കുംപുറം തുടങ്ങിയവർ പ്രസംഗിച്ചു.

നിയന്ത്രണംവിട്ട കാർ കായലിൽ വീണു ഗ്ലാസ് തകർത്ത് ഡ്രൈവർ രക്ഷപ്പെട്ടു

ചെറായി: നിയന്ത്രണംവിട്ട കാർ കായലിൽ വീണു മുങ്ങി, കാർ ഓടിച്ചിരുന്നയാൾ ചില്ല് തകർത്ത് അദ്ഭുതകരമായി രക്ഷപ്പെട്ടു. ഇന്നലെ രാവിലെ 11ഓടെ ചെറായി രക്തേശ്വരി ബീച്ച് റോഡിലായിരുന്നു അപകടം. കോതമംഗലം പുതുപ്പാടി ചിറപ്പാട്ട് വീട്ടിൽ ജിഷ്ണു വിക്രമൻ ഓടിച്ചിരുന്ന കാറാണ് അപകടത്തിൽപ്പെട്ടത്. ബീച്ചിൽ റിസോർട്ടിൽ താമസിച്ചിരുന്ന ഇയാൾ എന്തോ വാങ്ങുന്നതിനായി ചെറായിയിൽ പോയി തിരിച്ചുവരും വഴിയാണ് അപകടത്തിൽപ്പെട്ടത്. കാറിൽ മറ്റാരും ഉണ്ടായിരുന്നില്ല. കാർ കായലിൽ പതിച്ച ഉടൻ ഇയാൾ ഗ്ലാസ് പൊട്ടിച്ച് പുറത്തിറങ്ങി നീന്തി രക്ഷപ്പെടുകയായിരുന്നു. തുടർന്ന് അയ്യമ്പിള്ളി സർക്കാർ ആശുപത്രിയിൽ പ്രാഥമിക ശുശ്രൂഷ തേടി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]