ADVERTISEMENT

ADVERTISEMENT

ഭാര്യക്കു പിന്നാലെ ഭർത്താവും മരിച്ചു

പെരുന്പാവൂർ: ഭാര്യക്ക് പിന്നാലെ ഭർത്താവും മരിച്ചു. മുള്ളൻകുന്ന് ഇലവുംകുടി സുലൈമാൻ കുട്ടിയുടെ ഭാര്യ ആസിയ (80) കഴിഞ്ഞ വെള്ളിയാഴ്ച രാത്രി മരിച്ചു. ശനിയാഴ്ച കബറടക്കം നടത്തി. തുടർന്ന് ഇന്നലെ രാവിലെ സുലൈമാൻ കുട്ടി (85) മരണപ്പെടുകയായിരുന്നു. കബറടക്കം നടത്തി. മക്കൾ: ഇ.എസ്. നിസാർ, ഇസ്മയിൽ, അൻവർ, റഹ്മത്ത്. മരുമക്കൾ സുലൈഖ, സബിത, സിൻസില, ഹംസ.

ADVERTISEMENT

തുമ്പിച്ചാലിലെ താമരക്കൃഷിക്ക് ഭീഷണിയായി രാസമാലിന്യം

ആലുവ: പ്രകൃതി രമണീയമായ തുമ്പിച്ചാൽ തടാകത്തിലേക്ക് മഴക്കാലം മറയാക്കി നാലാം മൈൽ വ്യവസായ മേഖലകളിൽനിന്ന് രാസമാലിന്യം ഒഴുകുന്നതായി പരാതി. തുമ്പിച്ചാലിൽ നിന്നുള്ള വെള്ളത്തിൽ കൈയും കാലും കഴുകുമ്പോൾ പലപ്പോഴും ശക്തമായ ചൊറിച്ചിലാണ് അനുഭവപ്പെടുന്നതെന്നാണ് ആക്ഷേപം. ഇന്നലെ ചേർന്ന കീഴ്മാട് പഞ്ചായത്ത് ആറാം വാർഡ് ഗ്രാമസഭയിലാണ് പരാതി ഉയർന്നത്. രാസമാലിന്യ മൊഴുക്കുന്നത് തടയുന്നതിന് അടിയന്തര നടപടി ഉണ്ടാവണമെന്ന് ആറാം വാർഡ് ഗ്രാമസഭ ആവശ്യപ്പെട്ടു. അടിയന്തര നടപടി ഉണ്ടാവുമെന്നും പഞ്ചായത്ത് പ്രസിഡന്‍റ് സതി ലാലു പറഞ്ഞു. 2022 ഒക്ടോബറിൽ വൻതോതിൽ മാലിന്യങ്ങൾ ഒഴുകി തുമ്പിച്ചാലിലെ മുഴുവൻ മത്സ്യങ്ങളും ചത്തുപൊങ്ങുകയും താമരക്കൃഷി അടക്കം കരിഞ്ഞ് ഉണങ്ങുകയും ചെയ്തിരുന്നു. മലിനീകരണ നിയന്ത്രണ ബോർഡിലെ ഉദ്യോഗസ്ഥർ അടക്കമുള്ളവർ വന്ന് പരിശോധിച്ചെങ്കിലും യാതൊരു നടപടിയും ഉണ്ടായില്ലെന്നും വാർഡ് യോഗത്തിൽ പങ്കെടുത്തവർ കുറ്റപ്പെടുത്തി.

പച്ചക്കറി, ചെണ്ടുമല്ലി കൃഷി ആരംഭിച്ചു

വാഴക്കുളം: ഓണം കുടുംബശ്രീയോടൊപ്പം ഓണക്കനി, നിറപ്പൊലിമ പദ്ധതികൾക്ക് ആവോലി പഞ്ചായത്തിൽ തുടക്കമായി. വിഷരഹിത പച്ചക്കറികൾ ലഭ്യമാക്കുന്നതിന് പച്ചക്കറി കൃഷിയും ഓണപ്പൂക്കളമൊരുക്കാൻ ചെണ്ടുമല്ലി കൃഷിയുമാണ് ആവോലി പഞ്ചായത്ത് കുടുംബശ്രീ സിഡിഎസിന്‍റെ നേതൃത്വത്തിൽ ജെഎൽജി കർഷകർ ആരംഭിച്ചത്. ആവോലി അമ്പലം കവലയ്ക്കു സമീപം മൂന്നേക്കറോളം വരുന്ന സ്ഥലത്താണ് പച്ചക്കറി കൃഷി ആരംഭിച്ചിട്ടുള്ളത്. ആവോലി പഞ്ചായത്ത് പ്രസിഡന്‍റ് ഷെൽമി ജോൺസ് ഉദ്ഘാടനം നിർവഹിച്ചു. ചെയർപേഴ്സൺ സ്മിത വിനു നേതൃത്വം നൽകി.

പിറവത്ത് തെരുവുനായ ആക്രമണം; ഒരാൾക്ക് പരിക്കേറ്റു

പിറവം: പിറവത്ത് വീണ്ടും തെരുവ് നായയുടെ ആക്രമണം. പാഴൂർ വടക്കില്ലത്ത് വടക്കേമന ഗോതൻ നമ്പൂതിരിപ്പാടിനെയാണ് ആക്രമിച്ചത്. ഇന്നലെ വൈകുന്നേരം വീടിന്‍റെ സിറ്റൗട്ടിൽ ഇരിക്കുമ്പോഴാണ് ആക്രമണം ഉണ്ടായത്. ഇദ്ദേഹത്തിന്‍റെ നേരെ നായ കുരച്ചു ചാടുകയായിരുന്നു. നിലത്തു വീണുപോയ നമ്പൂതിരിപ്പാടിന് കൈക്കു പൊട്ടലേറ്റു. കൂടാതെ തോളിനും കാലിനും മുറിവേറ്റു. വീട്ടിലുള്ള മറ്റ് അംഗങ്ങൾ ഓടിയെത്തിയാണ് നായയെ ഓടിച്ചത്. പിറവം താലൂക്ക് ആശുപത്രിയിൽ എത്തിച്ച അദ്ദേഹത്തെ വിദഗ്ധ ചികിത്സക്കായി മൂവാറ്റുപുഴ താലൂക്ക് ആശുപത്രിയിലേക്ക് മാറ്റി. കഴിഞ്ഞ ദിവസം പാലച്ചുവട്ടിൽ നാലോളം തെരുവ് നായ്ക്കൾ ചേർന്ന് 75കാരനെ ആക്രമിച്ചിരുന്നു. ആക്രമണത്തിനിടെ ഒരു വിരൽ അറ്റുപോവുകയും ശരീരത്തിന്‍റെ പല ഭാഗത്തും കടിയേറ്റ തോട്ടുപുറത്ത് ജോർജ് കോട്ടയം മെഡിക്കൽ കോളജിൽ ചികിത്സയിലാണ്. പിറവം നഗരസഭയിലെല്ലായിടത്തും തെരുവ് നായ്ക്കളെകൊണ്ട് നാട്ടുകാർ പൊറുതിമുട്ടിയിരിക്കുകയാണ്. ഇവ വളർത്തു മൃഗങ്ങളേയും ആക്രമിച്ച് കൊല്ലുകയാണ്. കുട്ടികളെ സ്കൂളിൽ വിടാൻ പോലും മാതാപിതാക്കൾക്ക് ഭയപ്പാടാണ്. പിറവം ടൗണിൽ പോലും ഓരോ ജംഗ്ഷനിലും എട്ടും പത്തും നായ്ക്കൾ വീതമാണ് തമ്പടിച്ചിരിക്കുന്നത്.

സ്വർണമാല മോഷ്ടിച്ച പ്രതി കർണാടകയിൽ പിടിയിൽ

കൂത്താട്ടുകുളം: പാലക്കുഴ സ്വദേശിയുടെ സ്വർണമാല മോഷ്ടിച്ച് കടന്നുകളഞ്ഞ പ്രതിയെ പോലീസ് കർണാടകയിൽനിന്നു പിടികൂടി. പാലക്കുഴ മംഗലത്തുപറമ്പിൽ അരുൺ സോമനെ(28)യാണ് കൂത്താട്ടുകുളം പോലീസ് കർണാടകയിലെ കുടകിൽനിന്നു പിടികൂടിയത്. പാലക്കുഴ പുന്നക്കൽ സാജു നൽകിയ പരാതിയുടെ അടിസ്ഥാനത്തിൽ മൊബൈൽ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിൽ അരുൺ സോമൻ കർണാടകയിലെ കുടകിൽ ഉണ്ടെന്ന് കണ്ടെത്തുകയായിരുന്നു. മേയ് 29ന് സാജുവിന്‍റെ വീട്ടിൽ സൂക്ഷിച്ചിരുന്ന നാല് പവനോളം സ്വർണമാല പ്രതി മോഷ്ടിച്ചത്. പിടിയിലായ അരുൺ കുറ്റം സമ്മതിച്ചിട്ടുണ്ട്. സാജുവിന്‍റെ വീട്ടിൽനിന്ന് മോഷ്ടിച്ച സ്വർണമാല കൂത്താട്ടുകുളം മാർക്കറ്റ് റോഡിൽ പ്രവർത്തിക്കുന്ന സ്വർണ കടയിൽ വിറ്റ് പണം വാങ്ങുകയായിരുന്നു. തുടർന്ന് മാർക്കറ്റ് റോഡിൽ തന്നെ പ്രവർത്തിക്കുന്ന മണി എക്സ്ചേഞ്ച് സെന്‍റർ വഴി പണം സ്വന്തം അക്കൗണ്ടിലേക്ക് ട്രാൻസ്ഫർ ചെയ്യുകയും ചെയ്തു. പോലീസ് നടത്തിയ അന്വേഷണത്തിൽ സ്വർണമാല വിറ്റ് ഇയാൾക്ക് രണ്ട് ലക്ഷം രൂപ ലഭിച്ചിട്ടുള്ളതായും ഈ തുകയിൽനിന്നു 60,000 രൂപ വിനിയോഗിച്ച് കാർ വാങ്ങിയിട്ടുള്ളതായും കണ്ടെത്തി. ബാക്കി തുക അരുൺ ആഡംബര ജീവിതത്തിനായി ഉപയോഗിക്കുകയായിരുന്നു. സാജുവിന്‍റെ വീടിനു മുകളിൽ ഭക്ഷണ സാധനങ്ങൾ ഉണ്ടാക്കി വിൽക്കുന്ന യൂണിറ്റിൽ താൽക്കാലിക ജോലിക്ക് എത്തിയതായിരുന്നു അരുൺ. പ്രതിയെ കോടതിയിൽ ഹാജരാക്കി റിമാൻഡ് ചെയ്യും. 2023ൽ വാഹന മോഷണക്കേസിൽ കൂട്ടുപ്രതി ഇയാൾ.

വടകര സെന്‍റ് ജോൺസ് കത്തോലിക്കാ പള്ളിയിൽ തിരുനാളിന് കൊടിയേറി

കൂത്താട്ടുകുളം: വടകര സെന്‍റ് ജോൺസ് കത്തോലിക്കാ പള്ളിയിൽ വിശുദ്ധ യോഹന്നാൻ മാംദാനയുടെ ജനന തിരുനാളിന് വികാരി ഫാ.ജോൺ പുതിയാമറ്റം കൊടിയേറ്റി. ഇന്നു മുതൽ 24 വരെയാണ് തിരുനാൾ ആഘോഷിക്കുന്നത്. നാളെ രാവിലെ 6.30ന് കുർബാന, വൈകുന്നേരം നാലിനു വിശുദ്ധ രൂപം പൊതുവണക്കത്തിനായി പ്രതിഷ്ഠിക്കും, അഞ്ചിനു കുർബാന, നൊവേന, വൈകുന്നേരം 6.30 നു പ്രദക്ഷിണം, ആശിർവാദം. 24ന് രാവിലെ 6.30 നു കുർബാന, 10 നു തിരുനാൾ കുർബാന, സന്ദേശം, ഉച്ചയ്ക്ക് 12നു പ്രദക്ഷിണം, ആശിർവാദം, 12.45 നു ഊട്ടുനേർച്ചയോടെ തിരുനാൾ ആഘോഷങ്ങൾ സമാപിക്കുമെന്ന് ഫാ. ജോൺ പുതിയാമറ്റം, സഹവികാരി ഫാ.മാത്യു പനങ്ങാട്ട് എന്നിവർ അറിയിച്ചു.

അറ്റകുറ്റപ്പണികൾ പൂർത്തിയാക്കി; നഗരസഭാ പൊതുശ്മശാനം പൂർണസജ്ജം

മൂവാറ്റുപുഴ: അറ്റകുറ്റപ്പണികൾക്കായി അടച്ച മൂവാറ്റുപുഴ നഗരസഭ പൊതുശ്മശാനം പൂർണ പ്രവർത്തന സജ്ജമാക്കി തുറന്നു നൽകിയതായി നഗരസഭ ചെയർമാൻ പി.പി. എൽദോസ്. നഗരസഭയുടെ തനതു ഫണ്ടില്‍നിന്നു 3,95,000 രൂപ ചെലവഴിച്ചാണ് നഗരസഭ ക്രിമറ്റോറിയം വീണ്ടും പ്രവര്‍ത്തന സജ്ജമാക്കിയതെന്നും ചെയർമാൻ വ്യക്തമാക്കി. ഇന്നലെ ഇവിടെ ഒരു മൃതദേഹം സംസ്കരിച്ചു. ഒരേ ദിവസം ഒന്നിലധികം സംസ്ക്കാരം നടത്താൻ കഴിയുന്ന വിധമാണ് ക്രിമറ്റോറിയം സജ്ജീകരിച്ചിരിക്കുന്നത്. നഗരസഭാ ക്രിമറ്റോറിയം അനിവാര്യ അറ്റകുറ്റപ്പണികള്‍ക്കായി കഴിഞ്ഞ മേയ്‌ രണ്ടിനാണ് താത്കാലികമായി പ്രവര്‍ത്തനം നിര്‍ത്തിവച്ചത്. കാലപ്പഴക്കത്താല്‍ പ്രവര്‍ത്തന രഹിതമായ ക്രിമറ്റോറിയത്തിന്‍റെ സ്ക്രബിംഗ് ടാങ്ക് പുനര്‍നിര്‍മിച്ചു. സ്ക്രബിംഗ് ടാങ്കിന്‍റെ പ്രവര്‍ത്തനം നിലച്ചതിനെതുടര്‍ന്ന് ക്രിമേഷന്‍ ചേംബറില്‍നിന്നും വരുന്ന 1200 ഡിഗ്രി സെല്‍ഷ്യസ് വരെയുള്ള താപം നേരിട്ട് ബ്ലോവര്‍ ഫാനിലേക്ക് കടന്നത്‌ കാരണം തകരാറിലായ ബ്ലോവര്‍ ഫാനിന്‍റെ കേസിംഗ്, ബെയറിംഗ്, ഷാഫ്റ്റ് എന്നിവ മാറ്റി. ബ്ലോവര്‍ ഫാനിലേക്കുള്ള ഡക്ട്സ് പുനര്‍നിര്‍മിച്ചും അധിക താപത്താല്‍ കേടുപാട് വന്ന ക്രിമേഷന്‍ ബെഡ് അറ്റകുറ്റപ്പണികള്‍ നടത്തിയും കേടായ ഒരു ബര്‍ണര്‍ മാറ്റിവച്ചും എല്ലാ ബര്‍ണറുകളുടെയും താപ പ്രതിരോധ കവചങ്ങള്‍ പുതുക്കി പണിതുമാണ് ക്രിമറ്റോറിയം പ്രവർത്തന സജ്ജമാക്കിയത്. പൊതുശ്മശാനം താത്കാലികമായി അടച്ചത് നഗര പ്രദേശത്ത് മരിക്കുന്നവരുടെ സംസ്ക്കാരത്തിന് ചെറിയ ബുദ്ധിമുട്ടുകൾ നേരിട്ടിരുന്നു. ഇത് തിരിച്ചറിഞ്ഞ് വേഗത്തിൽ അറ്റകുറ്റപ്പണികൾ പൂർത്തിയാക്കുകയായിരുന്നുവെന്ന് ചെയർമാൻ വ്യക്തമാക്കി. മൂവാറ്റുപുഴ നഗരസഭയ്‌ക്ക് പുറമെ സമീപ പഞ്ചായത്തുകളിലെയും കൂത്താട്ടുകുളം, തൊടുപുഴ, കടയിരിപ്പ് പ്രദേശങ്ങളിലെയും ജനങ്ങൾ ഈ ക്രിമറ്റോറിയത്തെ ശവ സംസ്ക്കാരത്തിനായി ആശ്രയിക്കുന്നുണ്ട്. സ്ഥലപരിമിതി മൂലം വീട്ടു വളപ്പുകളിൽ മൃതദേഹങ്ങൾ സംസ്കരിക്കാൻ കഴിയാത്തവർക്ക് ആശ്വാസമാകുന്നതാണ് മൂവാറ്റുപുഴ നഗരസഭ പൊതു ശ്മശാനം.

തൃപ്പൂണിത്തുറ റെയിൽവെ സ്റ്റേഷനെ എറണാകുളത്തിന്‍റെ കിഴക്കൻ കവാടമാക്കും: ഹൈബി ഈഡൻ എംപി

തൃപ്പൂണിത്തുറ: തൃപ്പൂണിത്തുറ റെയിൽവെ സ്റ്റേഷനെ എറണാകുളത്തിന്‍റെ കിഴക്കൻ കവാടമായി വികസിപ്പിക്കുമെന്ന് ഹൈബി ഈഡൻ എംപി. ട്രുറയുടെ നേതൃത്വത്തിൽ നടന്ന സായാഹ്ന പ്രതിഷേധ ധർണ ഉദ്ഘാടനം ചെയ്തു കൊണ്ട് പ്രസംഗിക്കുകയായിരുന്നു അദ്ദേഹം. അമൃതഭാരത് പദ്ധതിയുടെ ഭാഗമായി 4.75 കോടി രൂപയുടെ പ്രവർത്തനങ്ങൾ പൂർത്തിയാക്കുമെന്നും രണ്ടാം പ്ലാറ്റ്ഫോമിന്‍റെ പുനരുദ്ധാരണവും ലിഫ്റ്റ് സ്ഥാപിക്കലുമടക്കമുള്ള ബാക്കി പ്രവർത്തനങ്ങൾ കൂടി ഉടൻ നടപ്പാക്കുമെന്നും എംപി പറഞ്ഞു. ട്രുറ ചെയർമാൻ വി.പി. പ്രസാദ് അധ്യക്ഷത വഹിച്ചു. കെ. ബാബു എംഎൽഎ, വി.സി. ജയേന്ദ്രൻ, അംബികാ സോമൻ, എസ്.കെ. ജോയി, എം. സന്തോഷ്കുമാർ, എം. രവി, സേതുമാധവൻ മൂലേടത്ത് തുടങ്ങിയവർ പ്രസംഗിച്ചു. അന്യായമായ പാർക്കിംഗ് ഫീസ് വർധന പിൻവലിക്കുക, ദീർഘദൂര ട്രെയിനുകൾക്ക് സ്റ്റോപ്പനുവദിക്കുക, ടിക്കറ്റ് കൗണ്ടറിൽ കൂടുതൽ സ്റ്റാഫിനെ നിയമിക്കുക, മുഴുവൻ സമയവും ആർപിഎഫ് സംവിധാനം ഏർപ്പെടുത്തുക. പ്രീപെയ്ഡ് ഓട്ടോ സംവിധാനം ഏർപ്പെടുത്തുക തുടങ്ങിയ ആവശ്യങ്ങൾ ഉന്നയിച്ചു കൊണ്ടായിരുന്നു ധർണ.

കുട്ടികളുടെ കൈയെഴുത്ത് മാസിക പ്രകാശനം ചെയ്തു

നെടുമ്പാശേരി: പാറക്കടവ് ബ്ലോക്ക് പഞ്ചായത്തിന്‍റെ ബാലസൗഹൃദ പദ്ധതിയുടെ ഭാഗമായി അങ്കണവാടികൾ കേന്ദ്രീകരിച്ചു നടത്തിയ ലഹരി വിരുദ്ധ പ്രവർത്തനങ്ങളുടെ ഭാഗമായി കുട്ടികളുടെ സർഗ സൃഷ്ടികൾ ഉൾപ്പെടുത്തിക്കൊണ്ട് കൈയെഴുത്ത് മാസിക പ്രകാശനവും പോസ്റ്റർ പ്രദർശനവും സംഘടിപ്പിച്ചു. പരിപാടിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് നിർവഹിച്ചു. വൈസ് പ്രസിഡന്‍റ് താര സജീവ് അധ്യക്ഷയായിരുന്നു. സ്ഥിരം സമിതി അധ്യക്ഷരായ സി.എം. വർഗീസ്, ആനി കുഞ്ഞുമോൻ,ബ്ലോക്ക് മെമ്പർമാരായ അമ്പിളി ഗോപി, അമ്പിളി അശോകൻ, റൈജി സിജോ, എന്നിവർ സംസാരിച്ചു. ബ്ലോക്ക് തലത്തിൽ നടത്തിയ ലഹരിവിരുദ്ധ പോസ്റ്റർ രചന മത്സരത്തിന്‍റെ സമ്മാനദാനം ചടങ്ങിൽ നടത്തി. പോസിറ്റീവ് പാരന്‍റിംഗ് എന്ന വിഷയത്തെ ആസ്പദമാക്കി ബ്ലോക്ക് ശിശുവികസന ഓഫീസർ ഗീതാഞ്ജലി ക്ലാസ് എടുത്തു. കമ്യൂണിറ്റി വിമൻസ് ഫെസിലിറ്റേറ്റർ അലീഷ ജോർജ്, ബ്ലോക്ക് പഞ്ചായത്ത് സെക്രട്ടറി ഇൻ ചാർജ് സജി അഗസ്റ്റിൻ എന്നിവർ സംസാരിച്ചു. കൈയെഴുത്തു മാസികക്കായി രചനകൾ തയാറാക്കിയ കുട്ടികളും അവരുടെ മാതാപിതാക്കളും പരിപാടിയിൽ പങ്കെടുത്തു.

രാജഗിരി വിശ്വജ്യോതി കോളജിൽ ദേശീയ സെമിനാറിനു തുടക്കമായി

പെരുമ്പാവൂർ: വേങ്ങൂർ രാജഗിരി വിശ്വജ്യോതി കോളേജും ഐകെഎസ് റിസർച്ച് ഇനീഷ്യേറ്റീവ് ഓഫ് പിവൈആർടിസിയും സംയുക്തമായി "ഇന്ത്യൻ സൈക്കോളജിയും യോഗയും" എന്ന വിഷയത്തിൽ സംഘടിപ്പിച്ച ത്രിദിന സെമിനാർ ഗവർണർ രാജേന്ദ്ര വിശ്വനാഥ ആർലേക്കർ ഉദ്ഘാടനം ചെയ്തു. ചടങ്ങിൽ രാജഗിരി വിശ്വജ്യോതി കോളജ് അസോസിയേറ്റ് ഡയറക്ടർ ഫാ. ഡിബിൻ കരിങ്ങേൻ, എ.പി.ജെ. അബ്ദുൽ കലാം ടെക്നോളജിക്കൽ യൂണിവേഴ്സിറ്റി വൈസ് ചാൻസലർ ഡോ. കെ. ശിവപ്രസാദ്, പിവൈആർടിസി റിസർച്ച് ഡയറക്ടർ ഡോ. മേഘ ജോബി, പ്രജ്ഞ പ്രവാഹ് നാഷണൽ കൺവീനർ ജെ. നന്ദകുമാർ, പിവൈആർടിസി പ്രസിഡന്‍റ് ഡോ. എ. രാധാകൃഷ്ണൻ, അഡ്വ. സുന്ദരൻ ഗോവിന്ദ്, ജി.ബി. ദിനചന്ദ്രൻ, ഡോ. കെ. ശിവപ്രസാദ് എന്നിവർ സംസാരിച്ചു. ചടങ്ങിൽ റവ. ഡോ. അഗസ്റ്റിൻ തോട്ടക്കരയ്ക്ക് ജ്ഞാന ശ്രേഷ്ഠ പുരസ്കാരവും, ഡോ. എം.ഐ. ജോസഫിന് ഭാരതീയ മനോവിജ്ഞാൻ വിഭൂഷൻ പുരസ്കാരവും നൽകി ആദരിച്ചു. രാജഗിരി വിശ്വജ്യോതി കോളജിൽ ദേശീയ സെമിനാറിനു തുടക്കമായി പെരുമ്പാവൂർ: വേങ്ങൂർ രാജഗിരി വിശ്വജ്യോതി കോളേജും ഐകെഎസ് റിസർച്ച് ഇനീഷ്യേറ്റീവ് ഓഫ് പിവൈആർടിസിയും സംയുക്തമായി "ഇന്ത്യൻ സൈക്കോളജിയും യോഗയും" എന്ന വിഷയത്തിൽ സംഘടിപ്പിച്ച ത്രിദിന സെമിനാർ ഗവർണർ രാജേന്ദ്ര വിശ്വനാഥ ആർലേക്കർ ഉദ്ഘാടനം ചെയ്തു. ചടങ്ങിൽ രാജഗിരി വിശ്വജ്യോതി കോളജ് അസോസിയേറ്റ് ഡയറക്ടർ ഫാ. ഡിബിൻ കരിങ്ങേൻ, എ.പി.ജെ. അബ്ദുൽ കലാം ടെക്നോളജിക്കൽ യൂണിവേഴ്സിറ്റി വൈസ് ചാൻസലർ ഡോ. കെ. ശിവപ്രസാദ്, പിവൈആർടിസി റിസർച്ച് ഡയറക്ടർ ഡോ. മേഘ ജോബി, പ്രജ്ഞ പ്രവാഹ് നാഷണൽ കൺവീനർ ജെ. നന്ദകുമാർ, പിവൈആർടിസി പ്രസിഡന്‍റ് ഡോ. എ. രാധാകൃഷ്ണൻ, അഡ്വ. സുന്ദരൻ ഗോവിന്ദ്, ജി.ബി. ദിനചന്ദ്രൻ, ഡോ. കെ. ശിവപ്രസാദ് എന്നിവർ സംസാരിച്ചു. ചടങ്ങിൽ റവ. ഡോ. അഗസ്റ്റിൻ തോട്ടക്കരയ്ക്ക് ജ്ഞാന ശ്രേഷ്ഠ പുരസ്കാരവും, ഡോ. എം.ഐ. ജോസഫിന് ഭാരതീയ മനോവിജ്ഞാൻ വിഭൂഷൻ പുരസ്കാരവും നൽകി ആദരിച്ചു.

ഞാറ്റുവേല ആരംഭവും ഫലവൃക്ഷത്തൈ വിതരണവും

അങ്കമാലി: തുറവൂർ സെന്‍റ് അഗസ്റ്റിൻസ് ഇടവക കേന്ദ്ര സമിതിയുടെ നേതൃത്വത്തിൽ ഞാറ്റുവേല ആരംഭവും ഫലവൃക്ഷ തൈകളുടെ വിതരണവും സംയുക്തമായി സംഘടിപ്പിച്ചു. ഇടവക വൈസ് ചെയർമാൻ ജോയ് പടയാട്ടിൽ അധ്യക്ഷത വഹിച്ച സമ്മേളനത്തിൽ ഇടവക വികാരി ഫാ. ആന്‍റണി പുതിയാപറമ്പിൽ ഉദ്ഘാടനം ചെയ്തു. ചാലക്കുടി ഫോറസ്റ്റ് റേഞ്ച് ഓഫീസ് ഓഫീസർ സി.എസ്. സൗമ്യ മുഖ്യാഥിതിയായി പങ്കെടുത്തു. സഹവികാരി ഫാ. നിഖിൽ പടയാട്ടി പരിസ്ഥിതി സംരക്ഷണ പ്രതിജ്ഞ നടത്തി. ഇടവക ട്രസ്റ്റിമാരായ കുര്യൻ തളിയൻ , സിബി പാലമറ്റം , മദർ സുപ്പീരിയർ സിസ്റ്റർ ഡിവോഷ്യാ ,ഫാമിലി യൂണിയൻ സെൻട്രൽ കമ്മിറ്റി ജനറൽ സെക്രട്ടറി സിൽവി ബൈജു , ട്രഷറർ ബിജു വളപ്പിലാൻ , ജോയിന്‍റ് സെക്രട്ടറിമാരായ ബാബു വടക്കുംതല, ജെസി ജോസഫ് ചുണ്ടനായി തുടങ്ങിയവർ പ്രസംഗിച്ചു. ദിനാചരണ ഭാഗമായി ദേവാലയ പരിസരത്ത് കുടുംബ യൂണീറ്റുകളുടെ നേതൃത്വത്തിൽ ഫലവൃക്ഷ തൈകൾ നടൽ, ഇടവകയിലെകുടുംബങ്ങൾക്ക് പച്ചക്കറിത്തൈകളുടെ വിതരണം, കുടുംബ യൂണീറ്റുകളിലേക്ക് ഫലവൃക്ഷ തൈ വിതരണം എന്നിവ സംഘടിപ്പിച്ചു. ഫലവൃക്ഷ തൈകൾ നട്ട് നന്നായി പരിപാലിക്കുന്ന കുടുംബങ്ങളെ തുടർന്ന് ഇടവകയിൽ ആദരിക്കും.

വിശുദ്ധ തോമസ് മൂർ ദിന അനുസ്മരണ യോഗം സംഘടിപ്പിച്ചു

തോപ്പുംപടി: കെസിവൈഎം കൊച്ചി രൂപത വിശുദ്ധ തോമസ് മൂറിന്‍റെ അനുസ്മരണ യോഗം സംഘടിപ്പിച്ചു. കെആർഎൽസിബിസി യുവജന കമ്മീഷൻ സെക്രട്ടറി ഫാ. അനൂപ് ആന്‍റൺ അനുസ്മരണ യോഗം ഉദ്ഘാടനം ചെയ്തു. കെസിവൈഎം കൊച്ചി രൂപത പ്രസിഡന്‍റ് ഡാനിയ ആന്‍റണി അധ്യക്ഷത വഹിച്ചു. കെസിവൈഎം കൊച്ചി രൂപത ഡയറക്ടർ ഫാ. മെൽറ്റസ് കൊല്ലശേരി ആമുഖ പ്രഭാഷണം നടത്തി. തോപ്പുംപടി സെന്‍റ് സെബാസ്റ്റ്യൻസ് പള്ളി വികാരി ഫാ. ടോമി ചമ്പക്കാട്ട്, കെസിവൈഎം മുൻ സംസ്ഥാന ജനറൽ സെക്രട്ടറി ക്രിസ്റ്റി ചക്കാലക്കൽ, കെസിവൈഎം കൊച്ചി രൂപത മുൻ ജനറൽ സെക്രട്ടറി ടോസി പൂപ്പന, കെസിവൈഎം കൊച്ചി രൂപത വൈസ് പ്രസിഡന്‍റ് ക്ലിന്‍റൺ ഫ്രാൻസിസ്, കെസിവൈഎം കൊച്ചി രൂപത എക്സിക്യൂട്ടീവ് അംഗം ബേസിൽ റിച്ചാർഡ്, സംസ്ഥാന സിൻഡിക്കേറ്റ് അംഗം അന്ന സിൽഫ, സംസ്ഥാന സെനറ്റംഗം കാസി പൂപ്പന, തോപ്പുംപടി യൂണിറ്റ് പ്രസിഡന്‍റ് സയന ഫിലോമിന എന്നിവർ സംസാരിച്ചു.

പൊട്ടിപ്പൊളിഞ്ഞ് ചെറായി ബീച്ചിലെ വാക്‌വേ

ചെറായി: കാലപ്പഴക്കത്താൽ ചെറായി ബീച്ചിലെ നടപ്പാതയിലെ ടൈലുകൾ തകർന്നു. ഇതാകട്ടെ ഇപ്പോൾ സന്ദർശകർക്ക് അപകടക്കെണിയായിരിക്കുകയാണ്. വാക് വേയുടെ തെക്കും വടക്കും ഭാഗത്തായി ഒന്നു രണ്ടിടളിലാണ് ടൈൽ ഇളകുകയും പൊട്ടിത്തകരുകയും ചെയ്തിട്ടുള്ളത്. ഇതുമൂലം വാക് വേയിലൂടെ നടന്ന് പോകുന്നവർ ഇതിൽ തട്ടി അപകടകങ്ങളും സംഭവിക്കുക പതിവാണെന്ന് നാട്ടുകാർ പറയുന്നു. എന്നാൽ പരാതികൾ ഉയർന്നിട്ടും അറ്റകുറ്റപ്പണികൾ നടത്താൻ ആളില്ല.

തുമ്പിച്ചാലിലെ താമരക്കൃഷിക്ക് ഭീഷണിയായി രാസമാലിന്യം

ആലുവ: പ്രകൃതി രമണീയമായ തുമ്പിച്ചാൽ തടാകത്തിലേക്ക് മഴക്കാലം മറയാക്കി നാലാം മൈൽ വ്യവസായ മേഖലകളിൽ നിന്ന് രാസമാലിന്യം ഒഴുകുന്നതായി പരാതി. തുമ്പിച്ചാലിൽ നിന്നുമുള്ള വെള്ളത്തിൽ കൈയും കാലും കഴുകുമ്പോൾ പലപ്പോഴും ശക്തമായ ചൊറിച്ചിലാണ് അനുഭവപ്പെടുന്നതെന്നാണ് ആക്ഷേപം. ഇന്നലെ ചേർന്ന കീഴ്മാട് ഗ്രാമപഞ്ചായത്ത് ആറാം വാർഡ് ഗ്രാമ സഭയിലാണ് പരാതി ഉയർന്നത്. രാസമാലിന്യ മൊഴുക്കുന്നത് തടയുന്നതിന് അടിയന്തര നടപടി ഉണ്ടാവണമെന് ആറാം വാർഡ് ഗ്രാമസഭ ആവശ്യപ്പെട്ടു. അടിയന്തര നടപടി ഉണ്ടാവുമെന്നും പഞ്ചായത്ത് പ്രസിഡന്‍റ് സതി ലാലു പറഞ്ഞു. 2022 ഒക്ടോബറിൽ വൻതോതിൽ മാലിന്യങ്ങൾ ഒഴുകി തുമ്പിച്ചാലിലെ മുഴുവൻ മത്സ്യങ്ങളും ചത്തുപൊങ്ങുകയും താമര കൃഷി അടക്കം കരിഞ്ഞ് ഉണങ്ങുകയും ചെയ്തിരുന്നു. മലിനീകരണ നിയന്ത്രണ ബോർഡിലെ ഉദ്യോഗസ്ഥർ അടക്കമുള്ളവർ വന്ന് പരിശോധിച്ചെങ്കിലും യാതൊരു നടപടിയും ഉണ്ടായില്ലെന്നും വാർഡ് യോഗത്തിൽ പങ്കെടുത്തവർ കുറ്റപ്പെടുത്തി.

വൈദികർക്കെതിരായ കേസ്; കണ്ണമാലിയിൽ പ്രതിഷേധ ജ്വാല

ഫോർട്ടുകൊച്ചി: കണ്ണമാലിയിലേയും ചെറിയകടവിലേയും ദുരിതമനുഭവിക്കുന്നവർക്ക് പിന്തുണ നല്കി ഉപവാസസമര നടത്തിയ വൈദികർക്കെതിരെ കള്ളക്കേസ് എടുത്ത പോലീസ് നടപടിക്കെതിരെ കണ്ണമാലി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ പ്രതിഷേധ ജ്വാല തെളിയിച്ചു. ജില്ലാ കമ്മിറ്റി അംഗം ഷാജി കുറുപ്പശേരി ഉദ്ഘാടനം ചെയ്തു. മണ്ഡലം പ്രസിഡന്‍റ് ജോഷി ആന്‍റണി അധ്യക്ഷത വഹിച്ചു. ബ്ലോക്ക് ഭാരവാഹികളായ കെ.ജെ. ജെൽട്ടൻ, തോമസ് ആന്‍റണി, പീറ്റർ കണ്ണമാലി, സമ്മേൽ അരശേരിൽ, രാജൻ കൈതവളപ്പിൽ , സേവിയർ തോലാട്ട് തുടങ്ങിയവർ സംസാരിച്ചു.

ഭാരതമാത ലോ കോളജിൽ "ഞാറ്റുവേല' ഇഞ്ചിക്കൃഷിക്ക് തുടക്കമായി

ആലുവ: ചൂണ്ടി ഭാരതമാത സ്കൂൾ ഓഫ് ലീഗൽ സ്റ്റഡീസിൽ ഞാറ്റുവേല' എന്ന പേരിൽ ഇഞ്ചിക്കൃഷിക്ക് തുടക്കമായി. കോളജ് ഡയറക്ടറും, പ്രിൻസിപ്പൽ ഇൻ ചാർജുമായ റവ. ഡോ. ബിജു ആന്‍റണി തേയ്ക്കാനത്ത് വിത്ത് നട്ട് ഉദ്ഘാടനം ചെയ്തു. അസിസ്റ്റന്‍റ് ഡയറക്ടർ റവ. ഫാ. ജോമിഷ് വട്ടക്കര, ഡോ. സുരണ്യ എസ്. കുമാർ, ബി. ശ്യാമ എന്നിവർ പ്രസംഗിച്ചു. അധ്യാപകരും വിദ്യാർഥികളും വിത്തു നടുന്നതിൽ പങ്കാളികളായി. കോളജ് പരിസ്ഥിതി ക്ലബ്ബും, ഐക്യുഎസിയും സഹകരിച്ചാണ് പദ്ധതി നടപ്പാക്കുന്നത്.

പൊതുമരാമത്ത് വകുപ്പ് അനാസ്ഥയ്ക്കെതിരെ കുഴിയടയ്ക്കൽ പ്രതിഷേധം

കളമശേരി: സംസ്ഥാന പാതയായ ഇടപ്പള്ളി-പുക്കാട്ടുപടി റൂട്ടിൽ വ്യാപകമായി കുഴികൾ രൂപപ്പെട്ടിട്ടും പൊതുമരാമത്ത് വകുപ്പ് നടപടിയെടുക്കാത്തതിൽ പ്രതിഷേധം. പൊതുമരാമത്ത് വകുപ്പിന്‍റെ അനാസ്ഥയ്ക്കെതിരേ മുസ്ലിം യൂത്ത് ലീഗ് പ്രവർത്തകർ കുഴിയടച്ചു പ്രതിഷേധിച്ചു. മുണ്ടം പാലം മുതൽ തേവക്കൽ വരെയുള്ള ഭാഗങ്ങളിലാണ് കൂടുതൽ അപകടകരമായ കുഴികളുള്ളത്. എല്ലാ ദിവസവും രാത്രിയിൽ അടക്കം നിരവധി അപകടങ്ങളാണ് ഈ പ്രദേശത്ത് ഉണ്ടായിക്കൊണ്ടിരിക്കുന്നത്. ഇരുചക്ര വാഹനയാത്രികരാണ് കൂടുതലായി ഇവിടെ അപകടത്തിൽപ്പെടുന്നത്. ജില്ലയിലെ ഏറ്റവും തിരക്കേറിയ പാതകൂടിയായ ഇവിടെ ഒട്ടേറെ വിദ്യാഭ്യാസ സ്ഥാപനങ്ങളും, ഹോസ്പിറ്റലുകളും, ആരാധനാലയങ്ങളും സ്ഥിതി ചെയ്യുന്ന പ്രദേശം കൂടിയാണ്. റോഡിൽ കുഴികൾ രൂപപ്പെട്ടതു മൂലം ഗതാഗത സടസമുണ്ടാകുന്നു. പരാതികൾ പിഡബ്ല്യുഡി ഉദ്യോഗസ്ഥരെ അറിയിച്ചെങ്കിലും ഇതുവരെ പരിഹാരമുണ്ടായിട്ടില്ല. ഇതിൽ പ്രതിഷേധിച്ചാണ് മുസ്ലിം യൂത്ത് ലീഗ് കങ്ങരപ്പടി ശാഖ കമ്മിറ്റിയുടെ ആഭിമുഖ്യത്തിൽ കുഴി അടക്കൽ സമരം നടത്തിയത്.

ശ്രേഷ്‌ഠ കാതോലിക്കാ ബാവയ്ക്ക് പൗരസ്വീകരണം നൽകി

തൃപ്പൂണിത്തുറ: യാക്കോബായ സുറിയാനി ഓർത്തഡോക്സ് സഭയുടെ നവാഭിഷിക്തനായ ശ്രേഷ്‌ഠ കാതോലിക്കാ ബസേലിയോസ് ജോസഫ് ബാവയ്ക്ക് തൃപ്പൂണിത്തുറ പൗരാവലിയുടെ ആഭിമുഖ്യത്തിൽ സ്വീകരണം നൽകി. ലായം കൂത്തമ്പലത്തിൽ നടന്ന സ്വീകരണ സമ്മേളനം കെ. ബാബു എംഎൽഎ ഉദ്ഘാടനം ചെയ്തു. നഗരസഭ ചെയർപേഴ്‌സൺ രമ സന്തോഷ് അധ്യക്ഷത വഹിച്ചു. പാലസ് ട്രസ്റ്റ് അഡ്‌മിനിസ്‌ട്രേഷൻ ബോർഡ് പ്രസിഡന്‍റ് എസ്. അനുജൻ കൊച്ചി രാജകുടുംബത്തിന്‍റെ ചിഹ്നമടങ്ങിയ ഉപഹാരം നൽകി. അനൂപ് ജേക്കബ് എംഎൽഎ, ഫാ. ജോഷി വേഴപ്പറമ്പിൽ, ഫാ. ആന്‍റണി ഫ്രാൻസിസ്, ഫാ. ഗ്രിഗർ ആർ. കൊള്ളന്നൂർ, പുലിയന്നൂർ ശശി നമ്പൂതിരിപ്പാട്, ഇബ്രാഹിം കാമിൽ സഖാഫി, പി. വാസുദേവൻ, കെ.വി. സാജു , ശ്രീക്കുട്ടൻ തുണ്ടത്തിൽ തുടങ്ങിയവർ പ്രസംഗിച്ചു. കെ. ബാബു എംഎൽഎ, പാലസ് ട്രസ്റ്റ് അഡ്‌മിനിസ്‌ട്രേഷൻ ബോർഡ് പ്രസിഡന്‍റ് എസ്. അനുജൻ എന്നിവർ ചേർന്ന് ബാവയ്ക്ക് മംഗളപത്രം സമർപ്പിച്ചു.

കുപ്രസിദ്ധ ഗുണ്ട പിടിയിൽ

അരൂർ: ഒളിവിൽ കഴിഞ്ഞിരുന്ന കുപ്രസിദ്ധ ഗുണ്ട പോലീസ് പിടിയിൽ. ഭായി നസീർ, തമ്മനം ഫൈസൽ, ആലുവ ഗുണ്ടാ മനാഫ്, വെടിമരം ശ്യാം, ചുക്ക് നജീബ് എന്നീ കുപ്രസിദ്ധ ഗുണ്ടകളുടെ അനുയായിയായ ബെന്നി എന്നറിയപ്പെടുന്ന കുര്യാക്കോസിനെയാണ് അരൂർ പോലീസ് അറസ്റ്റു ചെയ്തത്. തിരുവനന്തപുരം, ആലപ്പുഴ, മലപ്പുറം, എറണാകുളം, കോഴിക്കോട് ജില്ലകളിൽ കൊലപാതക ശ്രമം, വീട് കയറി ആക്രമണം, ആയുധ നിയമം മുതലായ കുറ്റകൃത്യങ്ങളിൽ ഉൾപ്പെട്ടിട്ടുള്ളയാളാണ് ബെന്നി. ഇയാൾ അടുത്തിടെ ആലപ്പുഴയിൽ നടന്ന ഗുണ്ടാ സംഗമത്തിലും പങ്കെടുത്തിരുന്നു. കോഴിക്കോട് തിരുവമ്പാടിയിൽനിന്ന് മണിക്കൂറുകൾ നീണ്ട പരിശ്രമത്തിനൊടുവിലാണ് ഇയാളെ പിടികൂടിയത്. അരൂർ പോലീസ് സ്റ്റേഷൻ ഇൻസ്പെക്ടർ കെ.ജി. പ്രതാപചന്ദ്രൻ, എസ്ഐ ഗീതു മോൾ എന്നിവരടങ്ങിയ സംഘമാണ് പ്രതിയെ അറസ്റ്റു ചെയ്തത്.

എംപി അവാര്‍ഡ് 2025 വിതരണം ചെയ്തു

കൊച്ചി: എറണാകുളം പാര്‍ലമെന്‍റ് മണ്ഡലത്തില്‍ ഹയര്‍ സെക്കൻഡറി പരീക്ഷയില്‍ എല്ലാ വിഷയത്തിനും എ പ്ലസ് നേടിയ വിദ്യാര്‍ഥികള്‍ക്കായി ഹൈബി ഈഡന്‍ എംപി ഏര്‍പ്പെടുത്തിയ എംപി അവാര്‍ഡ് 2025ന്‍റെ വിതരണോദ്ഘാടനം നടൻ ടൊവിനോ നിർവഹിച്ചു. അറിവ് വളരെ വേഗത്തില്‍ സഞ്ചരിക്കുന്ന കാലഘട്ടത്തില്‍ അതിനൊപ്പം ഓടിയെത്താനുള്ള ശ്രമകരമായ ദൗത്യം വിദ്യാര്‍ഥികളുടെ ഭാഗത്തുനിന്ന് ഉണ്ടാകണമെന്ന് ഹൈബി ഈഡന്‍ എംപി പറഞ്ഞു. മണ്ഡലത്തിലെ 86 സ്‌കൂളുകളില്‍ നിന്നായി 1128 വിദ്യാര്‍ഥികള്‍ക്കാണ് അവാര്‍ഡ് നല്‍കിയത്. വിദ്യാഭ്യാസ നിലവാരം ഉയര്‍ത്തുന്നതിനൊപ്പം തന്നെ കുട്ടികള്‍ക്ക് അവരുടെ പാഷന്‍ ഫോളോ ചെയ്യാന്‍ കഴിയണമെന്ന് ചടങ്ങില്‍ പങ്കെടുത്ത ജെയിന്‍ ഡീംഡ് ടു ബി യൂണിവേഴ്‌സിറ്റി ഡയറക്ടര്‍ ന്യൂ ഇനീഷ്യേറ്റീവ്‌സ് ഡോ. ടോം ജോസഫ് പറഞ്ഞു. ജെയിന്‍ ഡീംഡ് ടു ബി യൂണിവേഴ്‌സിറ്റി കൊച്ചിയുമായി സഹകരിച്ചാണ് പദ്ധതി നടപ്പാക്കിയത്. മണ്ഡലത്തില്‍ പ്ലസ്ടു പരീക്ഷയില്‍ 100 ശതമാനം വിജയം നേടിയ തോപ്പുംപടി സെന്‍റ് സെബാസ്റ്റ്യന്‍ എച്ച്എസ്എസ്, കളമശേരി രാജഗിരി എച്ച്എസ്എസ് എന്നീ സ്‌കൂളുകളെ ആദരിച്ചു. പ്ലസ്ടു പരീക്ഷയില്‍ മുഴുവന്‍ മാര്‍ക്കും കരസ്ഥമാക്കിയ സെന്‍റ് തെരേസാസ് എച്ച്എസ്എസിലെ ദേവിക ശ്രീജിത്തിനെ അനുമോദിച്ചു. എറണാകുളം സെന്‍റ് തെരേസാസ് കോളജില്‍ നടന്ന ചടങ്ങില്‍ ടി.ജെ. വിനോദ് എംഎല്‍എ, ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍, ജില്ലാ കളക്ടര്‍ എന്‍.എസ്.കെ. ഉമേഷ്, സെന്‍റ് തെരേസാസ് കോളജ് വൈസ് പ്രിന്‍സിപ്പൽ സിസ്റ്റര്‍ സുചിത തുടങ്ങിയവര്‍ പങ്കെടുത്തു.

കുട്ടമശേരി മേഖലയിൽ തെരുവുനായ ശല്യം രൂക്ഷം; നിരവധി പേർക്ക് കടിയേറ്റു

ആലുവ: കീഴ്മാട് ഗ്രാമപഞ്ചായത്തിലെ കുട്ടമശേരി അമ്പലപ്പറമ്പ് ,സൂര്യ നഗർ എന്നിവിടങ്ങളിൽ നായ ശല്യം രൂക്ഷമാകുന്നു. കഴിഞ്ഞ രണ്ടാഴ്ചയ്ക്കുള്ളിൽ അഞ്ചു പേർക്കാണ് തെരുവുനായകളുടെ കടിയേറ്റത്. ഇന്നലെ സൂര്യ നഗറിന് സമീപം നായ കുറുകെ ചാടിയതിനെത്തുടർന്ന് ഇരുചക്ര യാത്രികന് റോഡിൽ മറിഞ്ഞുവീണ് പരിക്കേറ്റു. മനക്കക്കാട് സ്വദേശി ശ്യാം ( 32 ) ആണ് വാഹന അപകടത്തിൽപ്പെട്ടത്. അമ്പലപ്പറമ്പ് വാരിക്കാട്ടുകുടി വീട്ടിൽ ഫാത്തിമ, അശ്വതി നിലയത്തിൽ നന്ദനൻ, അതിഥി തൊഴിലാളി അടക്കമുള്ളവർക്കാണ് രണ്ടാഴ്ചയ്ക്കിടെ നായയുടെ കടിയേറ്റത്. ഇതുകൂടാതെ നിരവധി പേർക്ക് നായയുടെ ആക്രമങ്ങളിൽ നിന്ന് രക്ഷപ്പെടാൻ ശ്രമിക്കുന്നതിനിടെ പരിക്കുപറ്റിയിട്ടുണ്ട്. മുതിർന്നവർ അടക്കം ഭീതിയോടെയാണ് കുട്ടമശേരി മേഖലയിൽ യാത്ര ചെയ്യുന്നത്. മദ്രസയിലും സ്കൂളുകളിലുംപോകുന്ന വിദ്യാർഥികളും ആശങ്കയിലാണ്. തെരുവു നായ ശല്യം ഇല്ലാതാക്കാൻ അടിയന്തിരമായി പഞ്ചായത്ത് അധികൃതർ ഇടപെടണമെന്ന് പ്രദേശവാസികൾ ആവശ്യപ്പെട്ടു.

നഗ്നഫോട്ടോ കാട്ടി പണം തട്ടാന്‍ ശ്രമം : യുവതി അടക്കം മൂന്നുപേര്‍ അറസ്റ്റില്‍

കൊച്ചി: നഗ്ന ഫോട്ടോ കാണിച്ച് ഭീഷണിപ്പെടുത്തി പണംതട്ടാന്‍ ശ്രമിച്ച കേസില്‍ യുവതി അടക്കം മൂന്നുപേര്‍ അറസ്റ്റില്‍. പാലക്കാട് ചിറ്റൂര്‍ സ്വദേശിനി ഗ്രീഷ്മ (29), പത്തനംതിട്ട കോന്നി സ്വദേശി അനു ജോര്‍ജ്(25), നിലമ്പൂര്‍ ചുങ്കത്തറ സ്വദേശി പി.എം. അബിന്‍ മാത്യു(32) എന്നിവരെ കളമശേരി പോലീസ് ആണ് പിടികൂടിയത്. ഇടപ്പള്ളി സ്വദേശിയായ യുവാവുമായി മുമ്പ് സൗഹൃദത്തിലായിരുന്ന ഗ്രീഷ്മ, യുവാവിന്‍റെ നഗ്ന ഫോട്ടോകള്‍ കാണിച്ചു ഭീഷണിപ്പെടുത്തി പത്ത് ലക്ഷം രൂപ ആവശ്യപ്പെടുകയും പണം നല്‍കിയില്ലെങ്കില്‍ സ്ത്രീ പീഡനക്കേസില്‍പ്പെടുത്തുമെന്ന് പറഞ്ഞു നിരന്തരം ഭീഷണിപ്പെടുത്തുകയുമായിരുന്നു. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

കഞ്ചാവ് ചെടിയുമായി യുവാവ് അറസ്റ്റിൽ

തൃപ്പൂണിത്തുറ: കഞ്ചാവ് ചെടിയുമായി യുവാവിനെ പോലീസ് അറസ്റ്റ് ചെയ്തു. അടൂർ പറക്കാല വലിയവിളയിൽ വീട്ടിൽ രോഹിത്തിനെയാണ്(19) ശനിയാഴ്ച രാത്രി 11ഓടെ ചാത്താരി വൈമീതി റോഡിലുള്ള സ്റ്റാർ അപ്പാർട്ട്മെന്‍റിൽ നിന്ന് ഹിൽപാലസ് പോലീസ് പിടികൂടിയത്. എസ്ഐമാരായ അനില, എം.ആർ. സന്തോഷ് കുമാർ, വി.എസ്.സതീശൻ, എസ്‌സിപിഒമാരായ പോൾ മൈക്കിൾ, ബൈജു, സിപിഒ അഖിൽ എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

2.750 കിലോ കഞ്ചാവുമായി രണ്ടുപേർ പിടിയിൽ

പെരുമ്പാവൂർ: നെടുംതോട് ഭാഗത്തുനിന്ന് 2.750 കിലോഗ്രാം കഞ്ചാവുമായി രണ്ടു പേർ പോലീസിന്‍റെ പിടിയിലായി. ആലുവ മണലിമുക്ക് നമ്പിപ്പറമ്പിൽ അൻസിൽ (30), ഒഡീഷ കണ്ടമാൽ സ്വദേശി ദേബെന്ദ്ര നായിക്ക് (46) എന്നിവരെയാണ് പെരുമ്പാവൂർ എഎസ്പിയുടെ നേതൃത്വത്തിലുള്ള പ്രത്യേക അന്വേഷണ സംഘം അറസ്റ്റ് ചെയ്തത്. ഒഡീഷയിൽ നിന്ന് കഞ്ചാവുമായി ആലുവ റെയിൽവേ സ്റ്റേഷനിൽ ഇറങ്ങിയശേഷം അൻസിലിന് കൈമാറുന്നതിനായി നെടുംതോട് എത്തിയപ്പോൾ ഇരുവരെയും പോലീസ് കസ്റ്റഡിയിലെടുക്കുകയായിരുന്നു. അൻസിലിന്‍റെ കാറിൽ നിന്നാണ് കഞ്ചാവ് കണ്ടെടുത്തത്. കിലോയ്ക്ക് 15000 രൂപയ്ക്കാണ് അൻസിലിന് ദേബെന്ദ്രനായിക് കഞ്ചാവ് നൽകിയിരുന്നത്. അൻസിൽ ഇത് മറിച്ചു വിറ്റിരുന്നത് കിലോയ്ക്ക് 25,000 രൂപ നിരക്കിലും. മലയാളികളായ യുവാക്കളായിരുന്നു കഞ്ചാവ് വാങ്ങിയിരുന്നത്. ജോലി ചെയ്യുന്ന തടി മില്ലിന്‍റെ മറവിലായിരുന്നു അൻസിലിന്‍റെ കഞ്ചാവ് വില്പന. പ്രതിയുടെ പക്കൽനിന്ന് കഞ്ചാവ് വാങ്ങുന്നവരെ കുറിച്ച് പോലീസ് അന്വേഷണമാരംഭിച്ചു. പെരുമ്പാവൂർ എഎസ്പി ശക്തി സിംഗ് ആര്യ, ഇൻസ്പെക്ടർ ടി.എം. സൂഫി, എസ്ഐ പി.എം. റാസിഖ്, എഎസ്ഐ പി.എ. അബ്ദുൽ മനാഫ്, സീനിയർ സിപിഒമാരായ വർഗീസ് വേണാട്ട്, ടി.എ. അഫ്സൽ, ബെന്നി ഐസക്, രജിത്ത് രാജൻ, എം. കനിഷാദ്, മുഹമ്മദ് ഷാൻ എന്നിവരാണ് അന്വേഷണസംഘത്തിൽ ഉണ്ടായിരുന്നത്.

ദേശീയപാത നിർമാണം : ഇരുന്പു സാമഗ്രികൾ മോഷ്ടിച്ച നാലുപേർ പിടിയിൽ

പറവൂർ: പെരുമ്പടന്നയിൽ ദേശീയപാത നിർമാണം നടക്കുന്ന സ്‌ഥലത്തു നിന്ന് 50,000 രൂപയുടെ ഇരുമ്പു സാമഗ്രികൾ മോഷ്‌ടിച്ച കേസിൽ നാലു പേർ അറസ്റ്റിലായി. മാക്കനായി മണപ്പാടം ഷിഹാബ് (46), ആളംതുരുത്ത് സ്വദേശികളായ പറമ്പുംമേൽ അഭിജിത്ത് (28), അപ്പോൾ അലി ഹാഫിസ് (23), പട്ടണം കൈമപ്പറമ്പിൽ ആകാഷ് (23) എന്നിവരെയാണ് പറവൂർ പോലീസ് അറസ്റ്റ് ചെയ്തത്. വെള്ളിയാഴ്‌ച രാത്രിയായിരുന്നു സംഭവം. ഇവർ മറ്റു മോഷണ കേസുകളിൽ ഉൾപ്പെട്ടിട്ടുണ്ടോ എന്ന് അന്വേഷിച്ചുവരുന്നതായി പോലീസ് പറഞ്ഞു. മുനമ്പം ഡിവൈഎസ്‌പി എസ്. ജയകൃഷ്‌ണന്‍റെ നേതൃത്വത്തിൽ ഇൻസ്പെക്‌ടർ ഷോജോ വർഗീസ്, എസ്ഐമാരായ നസീർ, മനോജ്, എഎസ്ഐമാരായ അൻസാർ, സിനുമോൻ, റെജി, സിപിഒമാരായ അനൂപ്, സുജിത്ത് എന്നിവരടങ്ങിയ സംഘമാണ് പ്രതികളെ പിടികൂടിയത്. പ്രതികളെ കോടതിയിൽ ഹാജരാക്കി റിമാൻഡ് ചെയ്‌തു.

ട്രാഫിക് നിയമലംഘനം: പിഴ അടയ്ക്കാം ഇ-അദാലത്തിൽ

കൊച്ചി: ഗതാഗത നിയമലംഘനങ്ങളുമായി ബന്ധപ്പെട്ട് ഭാവിയില്‍ പ്രോസിക്യൂഷന്‍ നടപടികള്‍ ഉണ്ടാകുമോ എന്ന ആശങ്ക ഇനി വേണ്ട. ഇതിനു പരിഹാരവുമായി എത്തിയിരിക്കുകയാണ് കൊച്ചി സിറ്റി പോലീസും മോട്ടോര്‍ വാഹന വകുപ്പും. മെഗാ ഇ അദാലത്തിലൂടെ പിഴയടക്കാനുള്ള സൗകര്യമാണ് ഇരു വകുപ്പുകളും ചേര്‍ന്ന് ഒരുക്കിയിട്ടുള്ളത്. കറന്‍സി രഹിതമെന്നതാണ് അദാലത്തിന്‍റെ പ്രത്യേകത. വിവിധ തരത്തിലുള്ള ഗതാഗത നിയമലംഘനങ്ങള്‍ക്ക് മോട്ടോര്‍ വാഹന വകുപ്പും പോലീസും ഇ-ചെലാന്‍ മുഖേന നല്‍കിയിട്ടുള്ള ഫൈനുകളാണ് ഇതുവഴി തീര്‍പ്പാക്കാനാകുക. യഥാസമയം പിഴ അടയ്ക്കാന്‍ സാധിക്കാത്തതും നിലവില്‍ കോടതിയില്‍ ഉള്ളതുമായ ചെലാനുകളില്‍ പ്രോസിക്യൂഷന്‍ നടപടികള്‍ക്ക് ശുപാര്‍ശ ചെയ്തിട്ടുള്ളവ ഒഴികെ ബാക്കി എല്ലാ ചെലാനുകളും പിഴയടച്ച് തീര്‍പ്പാക്കാം. 24, 25 തിയതികളില്‍ ഹൈക്കോടതിക്ക് സമീപം കൊച്ചി സിറ്റി പോലീസ് ട്രാഫിക് വെസ്റ്റ് എന്‍ഫോഴ്‌സ്‌മെന്‍റ് യൂണിറ്റിൽ രാവിലെ 10 മുതല്‍ വൈകിട്ട് നാല് വരെയാണ് അദാലത്ത് നടക്കുക. ഓണ്‍ലൈനായി മാത്രമേ പിഴ അടയ്ക്കാനാകൂ. ഇതിനായി ഡെബിറ്റ്, ക്രെഡിറ്റ് കാര്‍ഡുകളും യുപിഐ സംവിധാനവും ഉപയോഗിക്കാം. കൂടുതല്‍ വിവരങ്ങള്‍ക്ക് ഫോൺ: 0484 2394218.

കത്തിക്കയറി മത്തിവില; കിലോ ₹ 350

വൈപ്പിൻ: കടലിൽ മത്സ്യലഭ്യത കുറഞ്ഞതോടെ ചാളയ്ക്ക് തീവില. ഒരു കിലോ ഇടത്തരം ചാള കിലോയ്ക്ക് 350 രൂപയാണ് ഇപ്പോഴത്തെ വില. തീരദേശത്തോട് ചേർന്നുള്ള പ്രാദേശിക മാർക്കറ്റുകളിലെ വിലയാണിത്. കിഴക്കൻ മേഖലയിലും മറ്റും 400 രൂപ വരെയാകും. ഒരു മാസം മുമ്പുവരെ തീരദേശമാർക്കറ്റുകളിൽ രണ്ടര കിലോ ചാളയ്ക്ക് 100 രൂപ മാത്രമായിരുന്നു വില. എന്നാൽ ഇപ്പോൾ തീരക്കടലിൽ ചാളയുടെ ലഭ്യത കുറഞ്ഞതാണ് ചാള വില കൂടാൻ കാരണമത്രേ. ഹാർബറിൽ നിന്ന് മൊത്തക്കച്ചവടക്കാർ ലേലം ചെയ്തെടുക്കുമ്പോൾ തന്നെ ചാളയ്ക്ക് കിലോയ്ക്ക് 230 രൂപ വില വീഴുന്നുണ്ടെന്ന് മുനമ്പം ഹാർബറിലെ മൊത്തവ്യാപാരികളായ എ. ആർ. ബിജുകുമാർ, പി.എസ്. ഷൈൻ എന്നിവർ പറയുന്നു.പിന്നെ ഐസ്, കയറ്റുകൂലി, വാഹന വാടക എല്ലാം കൂടി വരുമ്പോൾ 250 രൂപയോളം ചെലവ് വരുമത്രേ. ട്രോളിംഗ് നിരോധനത്തെ തുടർന്ന് ബോട്ടുകൾ കടലിൽ പോകാത്തതും മൽസ്യവില ഉയാരാൻ കാരണമായിട്ടുണ്ട്.

ഗവർണർക്കെതിരെ എസ്എഫ്ഐ പ്രതിഷേധിച്ചു

കളമശേരി: കുസാറ്റിൽ പാസിംഗ് ഔട്ട് പരേഡിനെത്തിയ കേരള ഗവർണർ രാജേന്ദ്ര വിശ്വനാഥ്‌ അർലേക്കറിനു നേരെ കുസാറ്റ് ഗേറ്റിനു പുറത്ത് എസ്എഫ്ഐ വിദ്യാർഥികളുടെ പ്രതിഷേധം. പത്തോളം വിദ്യാർഥികളാണ് കൊടികളും ബനറുമായെത്തി പ്രതിഷേധിച്ചത്. ‘വൺസ് ട്രൈഡ് സിപി, റെസ്റ്റ് ഈസ് ഹിസ്റ്ററി- എസ്എഫ്ഐ’ എന്നെഴുതിയ ബാനറുമായാണ് വിദ്യാർഥികൾ പ്രതിഷേധിച്ചത്. വിദ്യാർഥികളെ തടഞ്ഞ് സുരക്ഷാവലയം തീർത്താണ് പോലീസ് ഗവർണറെ കുസാറ്റിലേക്ക് കടത്തിവിട്ടത്.

സിപിഎം മുൻ ബ്രാഞ്ച് സെക്രട്ടറിക്ക് കുത്തേറ്റു

ഫോർട്ടുകൊച്ചി :സിപിഎം മുൻ ബ്രാഞ്ച് സെക്രട്ടറിക്ക് കുത്തേറ്റു. ഫോർട്ട്കൊച്ചി സൗത്ത് ലോക്കൽ കമ്മിറ്റിയിലെ വെളി ബ്രാഞ്ച് മുൻ സെക്രട്ടറി റൂഫസ് ഫർണാണ്ടസിനാണ് കുത്തേറ്റത്. ഇന്നലെ വൈകിട്ട് വെളിയിലാണ് സംഭവം. വയറിന് കുത്തേറ്റ റൂഫസിനെ ആദ്യം കരുവേലിപ്പടി സർക്കാർ ആശുപത്രിയിൽ എത്തിച്ചെങ്കിലും പിന്നീട് എറണാകുളത്തെ സ്വകാര്യ ആശുപത്രിയിലേക്ക് മാറ്റി. സംഭവത്തിൽ നിലവിലെ വെളി ബ്രാഞ്ച് സെക്രട്ടറിയായ ബിന്ദുവിന്‍റെ ഭർത്താവ് മുരളിയെ പോലീസ് കസ്റ്റഡിയിലെടുത്തു. വ്യക്തിവൈരാഗ്യമാണ് കാരണമെന്ന് പോലീസ് പറഞ്ഞു. ബിന്ദുവിനെ റൂഫസ് ഫോണിൽ വിളിച്ച് മോശമായി പെരുമാറിയതാണ് കുത്താൻ കാരണമായി പറയുന്നത്. ഇതു സംബന്ധിച്ച് നേരത്തെ പാർട്ടിക്ക് പരാതി നൽകുകയും പാർട്ടി നടപടികളിലേക്ക് കടന്നിരുന്നതായും പറയപ്പെടുന്നു.

കുസാറ്റിൽ പാസിംഗ് ഔട്ട് പരേഡ് ഗവർണർ ഉദ്ഘാടനം ചെയ്തു

കളമശേരി: വ്യവസായങ്ങൾക്ക് ആവശ്യമുള്ള അറിവുകൾ ഉത്പാദിപ്പിക്കുന്ന ഉന്നതവിദ്യാഭ്യാസസ്ഥാപനങ്ങൾ ഇനി സൃഷ്ടിക്കേണ്ടത് നന്മയും മനുഷ്യത്വവും സാമൂഹ്യസേവനതല്പരരുമായ ആളുകളെ കൂടിയാണെന്ന് കേരള ഗവർണറും കൊച്ചി ശാസ്ത്ര സാങ്കേതിക സർവകലാശാലയുടെ (കുസാറ്റ്) ചാൻസലറുമായ രാജേന്ദ്ര വിശ്വനാഥ് അർലേക്കർ പറഞ്ഞു. കുസാറ്റ് കുഞ്ഞാലി മരക്കാർ സ്‌കൂൾ ഓഫ് മറൈൻ എൻജിനീയറിംഗിന്‍റെ 18-ആം ബാച്ച് ബിടെക് മറൈൻ എൻജിനീയറിംഗ് വിദ്യാർഥികളുടെ പാസിംഗ് ഔട്ട് പരേഡിൽ മുഖ്യാതിഥിയായി സംസാരിക്കുകയായിരുന്നു അദ്ദേഹം. പരേഡിൽ ഗാർഡ് ഓഫ് ഓണർ സ്വീകരിച്ചശേഷം ഗവർണർ കുസാറ്റ് സെമിനാർ കോംപ്ലക്സിൽ നടന്ന ചടങ്ങിൽ ഉന്നതവിജയം നേടിയ വിദ്യാർഥികൾക്ക് പുരസ്‌കാരങ്ങൾ വിതരണം ചെയ്തു. സർവകലാശാലാ ഡീൻ, സിൻഡിക്കേറ്റ്, സെനറ്റ് അംഗങ്ങളുമായും ഗവർണർ കൂടിക്കാഴ്ച നടത്തി. കുസാറ്റ് വൈസ് ചാൻസലർ പ്രഫ. ഡോ. എം. ജുനൈദ് ബുഷിരി അധ്യക്ഷത വഹിച്ച ചടങ്ങിൽ രജിസ്ട്രാർ പ്രഫ. ഡോ.എ.യു. അരുൺ, കൊച്ചിയിലെ മർക്കന്‍റൈൽ മറൈൻ ഡിപ്പാർട്ട്മെന്‍റ് പ്രിൻസിപ്പൽ ഓഫീസർ ജെ. സെന്തിൽ കുമാർ, കുസാറ്റ് സിൻഡിക്കേറ്റ് അംഗം ഡോ. പി.കെ. ബേബി എന്നിവർ പ്രസംഗിച്ചു.

മാലിദ്വീപിലേക്ക് കടത്താൻ ശ്രമിച്ച അഞ്ച് ലക്ഷം രൂപയുടെ മരുന്നുകൾ പിടികൂടി

നെടുമ്പാശേരി: വിമാനത്താവളത്തിലൂടെ മാലിദ്വീപിലേക്ക് അനധികൃതമായി കടത്താൻ ശ്രമിച്ച അഞ്ച് ലക്ഷം രൂപ വിലവരുന്ന മരുന്നുകൾ കസ്റ്റംസ് വിഭാഗം പിടികൂടി. സംഭവത്തിൽ മാലിദ്വീപ് സ്വദേശികളായ മുഹാബ് സയ്യിദ്, അബ്ദുള്ള നസീം എന്നിവരെ കസ്റ്റഡിയിലെടുത്തു. ബാഗേജിനുള്ളിൽ അഞ്ച് ബോക്സുകളിലാണ് മരുന്നുകൾ സൂക്ഷിച്ചിരുന്നത്. വിദേശത്തേക്ക് നിശ്ചിത അളവിൽ കൂടുതൽ മരുന്ന് കൊണ്ടുപോകണമെങ്കിൽ എക്സ്പോർട്ട് സർട്ടിഫിക്കറ്റും ഡ്രഗ്സ് ടെക്നിക്കൽ ഓഫീസറുടെ സർട്ടിഫിക്കറ്റും കൈവശം കരുതണം. ഇവ രണ്ടും ഇവരുടെ കൈവശമുണ്ടായിരുന്നില്ല. മാലിദ്വീപിൽ ചില്ലറ വില്പനയ്ക്കോ അല്ലെങ്കിൽ മറ്റ് ആവശ്യങ്ങൾക്കോ ആകാം ഇത്രയധികം മരുന്നുകൾ കൊണ്ടുപോകുന്നതെന്നാണ് കരുതുന്നത്. മയക്കുമരുന്നായി ദുരുപയോഗം ചെയ്യാൻ സാധ്യതയുള്ള ഏതെങ്കിലും മരുന്നുകൾ ഇതിൽ ഉണ്ടോയെന്നും കസ്റ്റംസ് പരിശോധിക്കുന്നു.

ഡിസിസിയുടെ കൊച്ചി താലൂക്ക് ഓഫീസ് മാര്‍ച്ച് ഇന്ന്

കൊച്ചി: കണ്ണമാലിയിലെ കടല്‍ഭിത്തി നിര്‍മാണം പൂര്‍ത്തിയാക്കുക, കടലാക്രമണത്തില്‍ വീട് നഷ്ടപ്പെട്ടവര്‍ക്ക് നഷ്ടപരിഹാരം നല്‍കുക, കടലോര ജീവിതം സംരക്ഷിതമാക്കുക എന്നീ മുദ്രാവാക്യങ്ങള്‍ ഉയര്‍ത്തി ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ കൊച്ചി താലൂക്ക് ഓഫീസിലേക്ക് പ്രതിഷേധ മാര്‍ച്ച് സംഘടിപ്പിക്കുന്നു. ഫോര്‍ട്ട് കൊച്ചി ഞാലിപ്പറമ്പ് ജംഗ്ഷനില്‍ നിന്ന് ഇന്ന് രാവിലെ 10.30 ന് മാര്‍ച്ച് ആരംഭിക്കും. ഹൈബി ഈഡന്‍ എംപി ഉദ്ഘാടനം ചെയ്യും.

മോഷണം: ആസാം സ്വദേശി പിടിയിൽ

കളമശേരി: നഗരസഭയ്ക്കു സമീപത്തെ ഈസി ബേ എന്ന സ്ഥാപനത്തിന്‍റെ ജനറേറ്റർ റൂമിൽ നിന്ന് ലോഹ പട്ടകൾ മോഷ്ടിച്ച ആസാം സ്വദേശിയായ അൻവർ ഹുസൈ(26)നെ കളമശേരി പോലീസ് അറസ്റ്റ് ചെയ്തു. പത്തടിപ്പാലം ബസ് സ്റ്റോപ്പിന് സമീപത്തുനിന്നാണ് പ്രതിയെ മോഷണ മുതലുമായി പോലീസ് ഇന്നലെ കസ്റ്റഡിയിലെടുത്തത്. വ്യത്യസ്ത ആകൃതിയിലും നീളത്തിലുമുള്ള ചെന്പ് നിറത്തിലുള്ള ലോഹ പട്ടകൾ ഷോൽഡർ ബാഗിനുള്ളിലാക്കി കഴിഞ്ഞ ശനിയാഴ്ചയാണ് ഇയാൾ മുങ്ങിയത്. എസ്ഐ പി.യു. രഞ്ജിത്തിന്‍റെ നേതൃത്വത്തിൽ, എഎസ്ഐ സുബൈർ, സിപിഒമാരായ ജിജോ, രതീഷ് , ഷാബിൻ എന്നിവർ ചേർന്നാണ് പ്രതിയെ അറസ്റ്റ് ചെയ്തത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

എംഎസ്‌സി എല്‍സ3 അപകടം: പുതിയ സാല്‍വേജ് കമ്പനിയെ എത്തിക്കാന്‍ നീക്കം

കൊച്ചി: കൊച്ചി പുറംകടലില്‍ മുങ്ങിയ ലൈബീരിയന്‍ ചരക്കു കപ്പല്‍ എംഎസിസി എല്‍സ3 നിന്ന് എണ്ണയും കണ്ടെയ്‌നറുകളും വീണ്ടെടുക്കുന്നതിന് പുതിയ സാല്‍വേജ് കമ്പനിയെ എത്തിക്കാനുള്ള നീക്കങ്ങള്‍ ആരംഭിച്ചു. ഇതിനായി കപ്പല്‍ ഉടമകള്‍ ഡച്ച് കമ്പനിയായ എസ്എംഐടിയുമായി അവസാനഘട്ട ചര്‍ച്ചയിലാണ്. കരാര്‍ അംഗീകരിച്ചാല്‍ എണ്ണ നീക്കം വൈകാതെ ആരംഭിക്കാനാകും. അതേസമയം പുതിയ കരാറുകാരനെ 48 മണിക്കൂറിനകം അറിയിക്കണമെന്നാണ് ഡയറക്ടറേറ്റ് ജനറല്‍ ഓഫ് ഷിപ്പിംഗ് അറിയിച്ചിട്ടുള്ളത്. ഈ കാലാവധി ഇന്ന് അവസാനിക്കും. ‘വാന്‍ഹായ് 503' 91 നോട്ടിക്കല്‍മൈല്‍ അകലെ ബേപ്പൂരിന് സമീപം പുറംകടലില്‍ തീപിടിച്ച ‘വാന്‍ഹായ് 503' കപ്പല്‍ കേരളതീരത്തിന്‍റെ 91 നോട്ടിക്കല്‍ മൈല്‍ അകലെയെത്തി. കപ്പലിനെ നിലവില്‍ വലിച്ചുകൊണ്ടുപോകുന്നത് ഓഫ്‌ഷോര്‍ വാരിയര്‍ കപ്പലാണ്. കപ്പലിലെ തീ ഇനിയും പൂര്‍ണമായി അണയ്ക്കാനായിട്ടില്ല. കപ്പലിലെ വോയേജ് ഡാറ്റ റെക്കോഡര്‍ (വിഡിആര്‍) വീണ്ടെടുക്കാന്‍ എട്ടംഗ വിദഗ്ധസംഘം കപ്പലിനുള്ളിലെത്തി. കപ്പലിലെ തീയണയ്ക്കാനുള്ള അഗ്നിശമന ഉപകരണങ്ങള്‍ക്കുംമറ്റുമായി രണ്ടു ജനറേറ്ററുകള്‍ കപ്പലില്‍ എത്തിച്ചു. സരോജ ബ്ലെസിംഗ്, സക്ഷം എന്നീ കപ്പലുകളും ബോക്ക വിങ്കര്‍, വാട്ടര്‍ ലില്ലി എന്നീ ടഗ്ഗുകളും വാന്‍ഹായ് കപ്പലിനെ തണുപ്പിച്ചുകൊണ്ടിരിക്കുകയാണ്. അപകടത്തെത്തുടര്‍ന്ന് പരിക്കേറ്റ് ചികിത്സയില്‍ കഴിയുന്ന കപ്പല്‍ ജീവനക്കാര്‍ ഉടന്‍ ആശുപത്രി വിടും.

കെ-ഫോണിന് ജില്ലയിൽ 5,578 കണക്ഷനുകള്‍; ഒടിടി ഉടന്‍

കൊച്ചി: വീട്, സര്‍ക്കാര്‍ ഓഫീസുകള്‍, വ്യാണിജ്യ സ്ഥാപനങ്ങള്‍ എന്നിവിടങ്ങളിലായി ജില്ലയില്‍ കെ-ഫോണ്‍ കണക്ഷനുകള്‍ വര്‍ധിക്കുന്നു. ഇന്നലെ വരെ 5,578 കണക്ഷനുകളാണ് ജില്ലയില്‍ നല്‍കിയിട്ടുള്ളത്. 980 ബിപിഎല്‍ കുടുംബങ്ങള്‍ ഉള്‍പ്പെടെയാണിത്. കളക്ടറേറ്റ് ഉള്‍പ്പെടെ 1,525 സര്‍ക്കാര്‍ ഓഫീസുകള്‍ കെ ഫോണ്‍ നെറ്റ്‌വര്‍ക്കാണ് ഉപയോഗിക്കുന്നത്. അതിനിടെ കെ ഫോണിന്‍റെ സേവനം ജില്ലയിലെ ആദിവാസി മേഖലകളിലേക്കും വ്യപിപ്പിക്കുന്നതിനുള്ള നടപടികള്‍ പുരോഗമിക്കുകയാണ്. വിവിധ സ്ഥാപനങ്ങളുടെ സാമൂഹ്യ പ്രതിബദ്ധതാ(സിഎസ്ആര്‍) ഫണ്ട് ഉപയോഗിച്ച് പദ്ധതി നടപ്പാക്കാനാണ് ലക്ഷ്യമിടുന്നത്. ഇതിന്‍റെ ആദ്യഘട്ടമെന്ന നിലയില്‍ കോതമംഗലത്തിനടുത്തുള്ള കുട്ടമ്പുഴയില്‍ കെ-ഫോണ്‍ സര്‍വേ പൂര്‍ത്തിയായി. ജില്ലയിലെ വളന്തക്കാട് ദ്വീപില്‍ ഇതിനോടകം മൂന്നു കണക്ഷനുകളാണ് നല്‍കിയിട്ടുള്ളത്. ബിപിഎല്‍ കുടുംബങ്ങളാണിത്. 45 കുടുംബങ്ങളാണ് ഇവിടെ താമസിക്കുന്നത്. വൈകാതെ ഒടിടി കെ-ഫോണിന്‍റെ ഒടിടി സേവനം വൈകാതെ ജില്ലയിലെത്തും. ചാനലുകളും സിനിമകളും ലഭ്യമാക്കുന്ന ഒടിടി പ്ലാറ്റ്‌ഫോമിന്‍റെ അവസാനഘട്ട ടെസ്റ്റുകള്‍ നടന്നുവരികയാണ്. ഇതിനുശേഷമാകും ഒടിടി പൂര്‍ണസജ്ജമാകുന്നതെന്ന് കെ-ഫോണ്‍ അധികൃതര്‍ അറിയിച്ചു. സാധാരണക്കാര്‍ക്ക് താങ്ങാവുന്ന നിരക്കായിരിക്കും ഈടാക്കുക. മറ്റ് ഒടിടി പ്ലാറ്റ്‌ഫോമുകളും ലഭ്യമാകുന്ന രീതിയിലാകും പ്രവര്‍ത്തനം. കണക്ഷന്‍ ഇങ്ങനെ ഇന്‍സ്റ്റലേഷന്‍, മോഡം എന്നിവക്കൊന്നും പ്രത്യേക ചാര്‍ജ് ഈടാക്കാതെയാണ് ഗാര്‍ഹിക ഉപഭോക്താക്കള്‍ക്ക് കെ-ഫോണ്‍ കണക്ഷനുകള്‍ നല്‍കുന്നത്. കെ-ഫോണിനെക്കുറിച്ചും കണക്ഷനെക്കുറിച്ചും അറിയുന്നതിന് 1800 570 4466 എന്ന ടോള്‍ഫ്രീ നമ്പര്‍ പ്രയോജനപ്പെടുത്താം. ജില്ലയില്‍ കെ-ഫോണ്‍ ഉപയോഗിക്കുന്നവര്‍ അഡ്വക്കേറ്റ് ജനറല്‍ ഓഫീസ് കളക്ടറേറ്റ്, പഞ്ചായത്ത് ഓഫിസുകള്‍, വില്ലേജ് ഓഫിസുകള്‍, പോലീസ് സ്റ്റേഷനുകള്‍ വിദ്യാലയങ്ങള്‍ ഇന്‍ഫോപാര്‍ക്ക് സ്റ്റാര്‍ട്ട് അപ് മിഷന്‍ ജിസിഡിഎ കെഎസ്‌ഐഡിസി ട്രാവന്‍കൂര്‍ കൊച്ചിന്‍ കെമിക്കല്‍സ് കിന്‍ഫ്ര

തീവണ്ടിതട്ടി മരിച്ചനിലയിൽ

നെടുന്പാശേരി: നെടുന്പാശേരി ആവണംകോട് ഭാഗത്ത് ഇന്നലെ രാവിലെ ഒൻപതോടെ അജ്ഞാത യുവാവിനെ തീവണ്ടിതട്ടി മരിച്ച നിലയിൽ കാണപ്പെട്ടു. 40 വയസോളം പ്രായം തോന്നിക്കുന്ന മൃതദേഹം ആലുവ ഗവ. ആശുപത്രിയിൽ സൂക്ഷിച്ചിരിക്കുകയാണ്. വിവരം ലഭിക്കുന്നവർ നെടുന്പാശേരി പോലീസ് സ്റ്റേഷനുമായി ബന്ധപ്പെടണം. ഫോണ്‍: 0484-2610611, 9497933048.

‘ഓണക്കനി-നിറപൊലിമ’ഉദ്ഘാടനം ചെയ്തു

മൂവാറ്റുപുഴ : വാളകം പഞ്ചായത്ത് കുടുംബശ്രീ സിഡിഎസിന്‍റെ നേതൃത്വത്തിൽ ആരംഭിച്ച ‘ഓണക്കനി-നിറപൊലിമ’യുടെ സിഡിഎസ് തല ഉദ്ഘാടനം പഞ്ചായത്ത് പ്രസിഡന്‍റ് കെ.പി. ഏബ്രാഹം നിർവഹിച്ചു. സിഡിഎസ് ചെയർപേഴ്സണ്‍ സ്മിത സാബു അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് മോൾസി എൽദോസ്, പഞ്ചായത്തംഗം ബിനോ കെ. ചെറിയാൻ, സിഡിഎസ് വൈസ് ചെയർപേഴ്സണ്‍ ഗീത സുരേഷ്, സിഡിഎസ് അംഗം മേരി കുര്യാക്കോസ് തുടങ്ങിയവർ പ്രസംഗിച്ചു. ഓണത്തിന് പച്ചക്കറി, പൂക്കൾ എന്നിവ ഉല്പാദിപ്പിയ്ക്കുന്നതിനാണ് ഓണക്കനി-നിറപൊലിമ പദ്ധതി നടപ്പാക്കുന്നത്. പഞ്ചായത്തിലെ എല്ലാ കുടുംബശ്രീ യൂണിറ്റുകളിലും പദ്ധതി തുടങ്ങും.

സമഗ്ര ഗുണമേന്മ വിദ്യാഭ്യാസ പദ്ധതി

വാഴക്കുളം: സെന്‍റ് ലിറ്റിൽ തെരേസാസ് എൽപി സ്കൂളിൽ സമഗ്ര ഗുണമേന്മ വിദ്യാഭ്യാസ പദ്ധതിക്ക് തുടക്കമായി. ലൈഫ്ടെക് സൊല്യൂഷൻസ് ട്രെയിനിംഗ് ടീം ഡയറക്ടർ അഭിലാഷ് ജോസഫ് ഉദ്ഘാടനം ചെയ്തു. പദ്ധതിയുടെ ഭാഗമായി തയാറാക്കിയ വാർഷിക കലണ്ടർ യോഗത്തിൽ പ്രകാശനം ചെയ്തു. സ്കൂൾ മാനേജർ സിസ്റ്റർ ആൻ ഗ്രേസ്, പ്രധാനാധ്യാപിക സിസ്റ്റർ ഫ്രാൻസി മരിയ എന്നിവർ പ്രസംഗിച്ചു.

12 വീടുകളുടെ താക്കോൽ കൈമാറി

കോതമംഗലം: ലയണ്‍സ് ക്ലബ് മേജർ പ്രൊജക്ടായി സൗജന്യമായി സ്ഥലംവാങ്ങി വീടുവച്ചു നൽകുന്ന പദ്ധതിയിൽ 12 വീടുകളുടെ താക്കോൽ ദാനവും ലയണ്‍സ് ഗ്രാമത്തിന്‍റെ ഉദ്ഘാടനവും ഡീൻ കുര്യാക്കോസ് എംപി നിർവഹിച്ചു. ആന്‍റണി ജോണ്‍ എംഎൽഎ, നഗരസഭാധ്യക്ഷൻ കെ.കെ. ടോമി, ലയണ്‍സ് ഡിസ്ട്രിക്ട് ഗവർണർ രാജൻ നന്പൂതിരി, പ്രൊജക്ട് മുഖ്യ പ്രൊമോട്ടർമാരായ ചിറ്റിലപ്പിള്ളി ഫൗണ്ടേഷൻ, എക്സി. ഡയറക്ടർ ബി. ജയരാജ്, മാനേജർ ജി. ദീപക്, ഇവിഎം ഗ്രൂപ്പ് ചെയർമാൻ ഇ.എം ജോണി, സെന്‍റ് ജോർജ് കത്തീഡ്രൽ വികാരി റവ. ഡോ. മാത്യു കൊച്ചുപുരക്കൽ, കൗണ്‍സിലർ കെ.വി. തോമസ് തുടങ്ങിയവർ പ്രസംഗിച്ചു.

ലഹരിവിരുദ്ധ ദിനാചരണം

മൂവാറ്റുപുഴ: നിർമല മെഡിക്കൽ സെന്‍റർ ഓഫ് സൈക്യാട്രി ആൻഡ് സൈക്കോളജി വിഭാഗത്തിന്‍റെ ആഭിമുഖ്യത്തിൽ ലഹരിവിരുദ്ധ ദിനാചരണവും സെമിനാറും നടത്തി. കോതമംഗലം സോഷ്യൽ സർവീസ് സൊസൈറ്റി മുൻ ഡയറക്ടർ ഫാ. ജോർജ് പൊട്ടക്കൽ ഉദ്ഘാടനം നിർവഹിച്ചു. പ്രൊവിൻഷ്യൽ കൗണ്‍സിലർ സിസ്റ്റർ ടെസി ക്ലെയർ അധ്യക്ഷത വഹിച്ചു. ആശുപത്രി അഡ്മിനിസ്ട്രേറ്റർ സിസ്റ്റർ ജെസി ജോസ്, ഐഎംഎ പ്രസിഡന്‍റ് ഡോ. എബ്രാഹം മാത്യു, മെഡിക്കൽ സൂപ്രണ്ട് ഡോ. തെരേസ്, ഡോ. ലിൻസ് മരിയ തുടങ്ങിയവർ പ്രസംഗിച്ചു. ലഹരിവിരുദ്ധ ക്ലാസുകൾക്ക് നിർമല മെഡിക്കൽ സെന്‍ററിലെ ചീഫ് സൈക്യാട്രിസ്റ്റ് ഡോ. ലിൻസ് മരിയ നേതൃത്വം നൽകി. സൈക്യാട്രിസ്റ്റ് ഡോ. അജിനി ഫിലിപ്പ്, സൈക്കോളജിസ്റ്റ് അലീന ജോസ്, ഫാമിലി കൗണ്‍സിലിംഗ് പി.എം. മേരി, വിമല സോഷ്യൽ സർവീസ് ഡയറക്ടർ ഡോ. റാണി ജോസ്, സൈക്കോളജിസ്റ്റ് ആഷ്ന ചാക്കോ തുടങ്ങിയവർ ക്ലാസുകൾ നയിച്ചു. സന്നദ്ധപ്രവർത്തകരും, സ്കൂൾ അധ്യാപകരും, ജീവനക്കാരുമടക്കം 150 ഓളം പേർ സെമിനാറിൽ പങ്കെടുത്തു. നിർമല മെഡിക്കൽ സെന്‍ററിൽ ഡോ. ലിൻസ് മരിയയുടെ നേതൃത്വത്തിൽ സൈക്യാട്രി, സൈക്കോളജി, ഫാമിലി കൗണ്‍സിലിംഗ്, ഡീ അഡിക്ഷൻ ട്രീറ്റ്മെന്‍റ് തുടങ്ങിയ വിഭാഗങ്ങൾ, കിടത്തി ചികിത്സ ഉൾപ്പെടെയുള്ള സൗകര്യങ്ങളോടെ കാര്യക്ഷമമായി പ്രവർത്തിക്കുന്നുണ്ട്.

കോതമംഗലത്ത് എംഎൽഎയുടെ മെറിറ്റ് അവാർഡ്

കോതമംഗലം: കോതമംഗലം മണ്ഡലത്തിൽ മികവ് പുലർത്തിയ വിദ്യാലയങ്ങൾക്കും, വിദ്യാർഥികൾക്കുമുള്ള എംഎൽഎയുടെ മെറിറ്റ് അവാർഡ് വിതരണോദ്ഘാടനം ജില്ലാ കളക്ടർ എൻ.എസ്.കെ ഉമേഷ് നിർവഹിച്ചു. കോതമംഗലം സെന്‍റ് അഗസ്റ്റിൻസ് ഗേൾസ് ഹയർ സെക്കൻഡറി സ്കൂളിൽ നടന്ന ചടങ്ങിൽ ആന്‍റണി ജോണ്‍ എംഎൽഎ അധ്യക്ഷത വഹിച്ചു. ചടങ്ങിൽ അസിസ്റ്റന്‍റ് കളക്ടർ പാർവതി ഗോപകുമാർ മുഖ്യാതിഥിയായി. നഗരസഭാധ്യക്ഷൻ കെ.കെ. ടോമി, വൈസ് ചെയർപേഴ്സണ്‍ സിന്ധു ഗണേശൻ, പഞ്ചായത്ത് പ്രസിഡന്‍റുമാരായ മിനി ഗോപി, പി.കെ. ചന്ദ്രശേഖരൻ നായർ, എം.പി. ഗോപി, സിബി മാത്യു, കാന്തി വെള്ളക്കയ്യൻ, ഖദീജ മുഹമ്മദ്, ജില്ലാ പഞ്ചായത്തംഗം കെ.കെ. ദാനി, എംപിഐ ചെയർമാൻ ഇ.കെ ശിവൻ, സെന്‍റ് അഗസ്റ്റിൻസ് ഗേൾസ് ഹൈസ്കൂൾ പ്രധാനാധ്യാപിക സിസ്റ്റർ റിനി മരിയ, പ്രൈമറി ഹെഡ്മാസ്റ്റേഴ്സ് ഫോറം സെക്രട്ടറി വിൻസെന്‍റ് ജോസഫ് തുടങ്ങിയവർ പ്രസംഗിച്ചു.

യോഗ ദിനാചരണം

നിർമല കോളജിൽ മുവാറ്റുപുഴ: നിർമല കോളജ് ഫിസിക്കൽ എഡ്യുക്കേഷൻ വിഭാഗത്തിന്‍റെ ആഭിമുഖ്യത്തിൽ കോളജ് യോഗ ക്ലബ്, എൻഎസ്എസ്, എൻസിസിയുമായി സഹകരിച്ച് അന്താരാഷ്ട്ര യോഗദിനം വിവിധ പരിപാടികളോടെ ആഘോഷിച്ചു. കോളജ് ഓഡിറ്റോറിയത്തിൽ നടത്തിയ യോഗാ ദിനാചരണം പ്രിൻസിപ്പൽ റവ. ഡോ. ജസ്റ്റിൻ കെ. കുര്യാക്കോസ് ഉദ്ഘാടനം ചെയ്തു. ചടങ്ങിൽ ഫിസിക്കൽ എഡ്യുക്കേഷൻ വിഭാഗം വിദ്യാർഥികൾ ഒരുക്കിയ ഗ്രൂപ്പ് യോഗ അവതരണവും നടത്തി. ഫിസിക്കൽ എഡ്യുക്കേഷൻ വിഭാഗം മേധാവി ഡോ. ബോബു ആന്‍റണി വിദ്യാർഥികൾക്ക് യോഗ പരിശീലനവും നൽകി. കോളജ് ബർസാർ ഫാ. പോൾ കളത്തൂർ, സ്പോർട്സ് അധ്യാപിക ലിസ റേച്ചൽ ഷാജി, എൻഎസ്എസ് പ്രോഗ്രാം ഓഫീസർ ഡോ. സംഗീത നായർ, എൻസിസി ഓഫീസർ ലെഫ്. ഡോ. ആൽബിഷ് കെ. പോൾ എന്നിവർ യോഗ ദിനാചരണത്തിന് നേതൃത്വം നൽകി. കൂടാതെ കോളജ് ബിസിഎ വിഭാഗത്തിന്‍റെ നേതൃത്വത്തിൽ യോഗ ദിനത്തിന്‍റെ പ്രാധാന്യം വിദ്യാർഥികളിലെത്തിക്കാൻ ഫ്ളാഷ് മോബും കോളജിൽ അവതരിപ്പിച്ചു. എംഒഎസ്‌സി നഴ്സിംഗ് കോളജ് കോലഞ്ചേരി: എംഒഎസ്‌സി നഴ്സിംഗ് കോളജിൽ നാഷണൽ സർവീസ് സ്കീമിന്‍റെ ആഭിമുഖ്യത്തിൽ അന്താരാഷ്ട്ര യോഗ ദിനാചരണം നടത്തി. യോഗാചാര്യൻ എം.എ. സജീവൻ ദൈനംദിന ജീവിതത്തിൽ യോഗയ്ക്കുള്ള പ്രാധാന്യത്തെക്കുറിച്ച് ബോധവത്കരണം നടത്തുകയും അടിസ്ഥാനപരമായുള്ള യോഗാസനങ്ങൾ വിദ്യാർഥികളെ പരിശീലിപ്പിക്കുകയും ചെയ്തു. രണ്ടാം സെമസ്റ്റർ ബിഎസ്‌സി നഴ്സിംഗ് വിദ്യാർഥികൾ പരിപാടിയിൽ പങ്കെടുത്തു. മൂവാറ്റുപുഴ ബ്ലോക്ക് പഞ്ചായത്ത് മൂവാറ്റുപുഴ ബ്ലോക്ക് പഞ്ചായത്തിൽ യോഗ ദിനാചരണം പ്രസിഡന്‍റ് കെ.ജി. രാധാകൃഷ്ണൻ ഉദ്ഘാടനം ചെയ്തു. സ്ഥിരംസമിതി അധ്യക്ഷൻ ഷിവാഗോ തോമസ് അധ്യക്ഷത വഹിച്ചു. ബ്ലോക്ക് പഞ്ചായത്ത് സെക്രട്ടറി ടി.വി. പ്രശാന്ത് യോഗദിന സന്ദേശം നൽകി. ബ്ലോക്ക് പഞ്ചായത്തംഗങ്ങളായ ബെസ്റ്റിൻ ചേറ്റൂർ, പ്രഫ. ജോസ് അഗസ്റ്റിൻ, രമ രാമകൃഷ്ണൻ, മേഴ്സി ജോർജ്, റിയാസ് ഖാൻ തുടങ്ങിയവർ പങ്കെടുത്തു. ആരക്കുഴ പഞ്ചായത്ത് ആരക്കുഴ പഞ്ചായത്തും, ഗവ. ആയുർവേദ ഡിസ്പെൻസറിയും, ഗവ. ഹോമിയോ ഡിസ്പെൻസറിയും സംയുക്തമായി അന്താരാഷ്ട്ര യോഗ ദിനാചരണം സംഘടിപ്പിച്ചു. ആയുർവേദ ഡിസ്പെൻസറിയിൽ സംഘടിപ്പിച്ച ദിനാചരണം പഞ്ചായത്ത് പ്രസിഡന്‍റ് ലസിത മോഹനൻ ഉദ്ഘാടനം ചെയ്തു. ആയുർവേദ മെഡിക്കൽ ഓഫീസർ ഡോ. പി. ജയറാണി യോഗാദിന സന്ദേശം നൽകി. പഞ്ചായത്ത് സ്ഥിരംസമിതി അധ്യക്ഷ ദീപ്തി സണ്ണി അധ്യക്ഷത വഹിച്ചു. ബിജെപി മണ്ഡലം ഭാരതീയ ജനതാ പാർട്ടി മൂവാറ്റുപുഴ നിയോജക മണ്ഡലം കമ്മിറ്റിയുടെ നേതൃത്വത്തിൽ വെള്ളൂർക്കുന്നം ശ്രീകൈലാസം ഓഡിറ്റോറിയത്തിൽ നടന്ന പരിപാടി ബിജെപി എറണാകുളം ഈസ്റ്റ് ജില്ലാ പ്രസിഡന്‍റ് പി.പി. സജിവ് ഉദ്ഘാടനം നിർവഹിച്ചു. ബിജെപി മൂവാറ്റുപുഴ മണ്ഡലം പ്രസിഡന്‍റ് ടി. ചന്ദ്രൻ അധ്യക്ഷത വഹിച്ചു. ഇഎൻടി സ്പെഷ്യലിസ്റ്റ് ഡോ. സതീശൻ മുഖ്യാതിഥിയായിരുന്നു. പൂതൃക്ക പഞ്ചായത്ത് കോലഞ്ചേരി: പൂതൃക്ക പഞ്ചായത്തിന്‍റെയും സർക്കാർ ആയുർവേദ ഡിസ്‌പെൻസറിയുടെയും ആഭിമുഖ്യത്തിൽ ഗ്രാമപഞ്ചായത്തു ഹാളിൽ യോഗ ദിനാചരണം നടത്തി. പൂതൃക്ക ഗ്രാമപഞ്ചായത്ത് പ്രസിഡന്‍റ് മാത്യൂസ് കുമ്മണ്ണൂർ ചടങ്ങ് ഉദ്ഘാടനം ചെയ്തു. ആരോഗ്യകാര്യ സ്ഥിരംസമിതി അധ്യക്ഷൻ ബിജു കെ. ജോർജ്, പഞ്ചായത്ത് വൈസ് പ്രസിഡന്‍റ് സിനി ജോയ്, ബ്ലോക്ക് പഞ്ചായത്തംഗം രാജമ്മ രാജൻ, പഞ്ചായത്ത് സെക്രട്ടറി ദീപു ദിവാകരൻ, ആയുർവേദ മെഡിക്കൽ ഓഫീസർ ഡോ. ബിനി വർഗീസ്, ഹോമിയോ മെഡിക്കൽ ഓഫീസർ ഡോ. വജ്രകുമാരി എന്നിവർ പ്രസംഗിച്ചു. ചടങ്ങിൽ യോഗ പരിശീലക ഡോ. കെ. ധന്യ ക്ലാസ് നയിച്ചു. തുടർന്ന് യോഗ നൃത്തം അരങ്ങേറി.

സെൻട്രൽ കേരള സഹോദയ ‘മെരിറ്റ് ഡേ’

കൂത്താട്ടുകുളം: സെൻട്രൽ കേരള സഹോദയയുടെ ‘മെരിറ്റ് ഡേ’ കൂത്താട്ടുകുളം മേരിഗിരി പബ്ലിക് സ്കൂളിൽ നടന്നു. ആലുവ രാജഗിരി ആശുപത്രി ഡയറക്ടർ ഫാ. ജോയി കിളിക്കുന്നേൽ ഉദ്ഘാടനം ചെയ്തു. സിനിമതാരം സിജോയ് വർഗീസ് മുഖ്യപ്രഭാഷണം നടത്തി. സ്കൂൾ പ്രിൻസിപ്പലും സെൻട്രൽ കേരള സഹോദയ പ്രസിഡന്‍റുമായ ഫാ. മാത്യു കരീത്തറ അധ്യക്ഷത വഹിച്ചു. നഗരസഭാ അധ്യക്ഷ വിജയാ ശിവൻ, വൈസ് ചെയർമാൻ സണ്ണി കുര്യാക്കോസ്, മുൻ ചെയർമാൻ പ്രിൻസ് പോൾ ജോണ്‍ എന്നിവർ പങ്കെടുത്തു. സെക്രട്ടറി ജയ്ന പോൾ, വൈസ് പ്രസിഡന്‍റ് ഫാ. ജോണ്‍സണ്‍ പാലപ്പിള്ളി, ട്രഷറർ സിസ്റ്റർ റോസ് മരിയ, സ്കൂൾ വൈസ് പ്രിൻസിപ്പൽ ഫാ. ജിബിൻ കുറ്റനാൽ, പ്രധാനാധ്യാപിക ബി. രാജിമോൾ തുടങ്ങിയവർ നേതൃത്വം നൽകി. സെൻട്രൽ കേരള സഹോദയ അംഗങ്ങളായ സ്കൂളുകളിൽ പത്ത്, പന്ത്രണ്ട് ക്ലാസുകളിൽ ഉന്നത വിജയം നേടിയ 600ലേറെ വിദ്യാർഥികളെ പരിപാടിയിൽ മെമന്‍റോ നൽകി ആദരിച്ചു.

കോലഞ്ചേരിയിലും തെരുവുനായ ശല്യം രൂക്ഷം

കോലഞ്ചേരി: കോലഞ്ചേരി നഗരത്തിൽ തെരുവുനായ് ശല്യം രൂക്ഷമാകുന്നതായി പരാതി. നഗരത്തിലെ വാഹന-കാൽനട യാത്രക്കാർക്ക് ഭീഷണിയായി വ്യാപാര സ്ഥാപനങ്ങൾക്കു മുന്നിലും തെരുവുനായ്ക്കൾ കൂട്ടമായി നിലയുറപ്പിച്ചിരിക്കുകയാണ്. ഇടവഴിയിൽ വരെ ഇവ വിഹരിക്കുകയാണെന്നു നാട്ടുകാർ ചൂണ്ടിക്കാട്ടുന്നു. ഇവയ്ക്കു മൃഗപ്രേമികൾ ഭക്ഷണമിട്ടു കൊടുക്കുന്നതും മറ്റും കാര്യങ്ങൾ വഷളാക്കുന്നതായി ഇവർ പറയുന്നു. വിഷയത്തിൽ അധികൃതർ ഇടപെട്ട് ഉടൻ നടപടിയെടുക്കണമെന്നാണ് നാട്ടുകാരുടെ ആവശ്യം.

13 കുടുംബങ്ങൾക്ക് ഭൂമി വിതരണം ചെയ്തു

പോത്താനിക്കാട്: പഞ്ചായത്തിലെ ഭൂരഹിതരായ 13 കുടുംബങ്ങൾക്ക് ഭൂമി വിതരണം ചെയ്തു. പ്രവാസിയായ പുളിന്താനം മഠത്തിക്കുടിയിൽ ബേബി ജോസഫ് പോത്താനിക്കാട് ഗ്രാമപഞ്ചായത്തിന് വിട്ടുനൽകിയ ഒരേക്കർ 10 സെന്‍റിൽ നിന്ന് 50 സെന്‍റ് സ്ഥലമാണ് ലൈഫ് ഭവന പദ്ധതിയിൽ ഉൾപ്പെട്ട അർഹരായ 13 പേർക്ക് വിതരണം ചെയ്തത്. മാത്യു കുഴൽനാടൻ എംഎൽഎ യോഗം ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് സജി കെ. വർഗീസ് അധ്യക്ഷത വഹിച്ചു. കളക്ടർ എൻ.എസ്.കെ. ഉമേഷ് ഗുണഭോക്താക്കൾക്ക് ഭൂമിയുടെ രേഖകൾ കൈമാറി. വൈസ് പ്രസിഡന്‍റ് ആശ ജിമ്മി, സ്ഥിരംസമിതി അംഗങ്ങളായ ജിനു മാത്യു, മേരി തോമസ്, ഫിജിന അലി, പഞ്ചായത്തംഗങ്ങളായ ജോസ് മേലേത്ത്, ബിസ്നി ജിജോ, സുമ ദാസ്, ഡോളി സജി, വിൻസൻ ഇല്ലിക്കൽ, സാബു മാധവൻ, സിഡിഎസ് അധ്യക്ഷ സിജി ജോർജ്, എ.ബി. മൈതീൻ എന്നിവർ പ്രസംഗിച്ചു. സൗജന്യമായി ലഭിച്ച സ്ഥലത്തിൽ നിന്ന് 60 സെന്‍റ് ട്രീറ്റ്മെന്‍റ് പ്ലാന്‍റിന്‍റെ നിർമാണത്തിനായി വാട്ടർ അഥോറിറ്റിക്ക് കൈമാറിയിരുന്നു.

വാൻ വൈദ്യുത പോസ്റ്റിലിടിച്ച് ഡ്രൈവർക്ക് പരിക്ക്

കൂത്താട്ടുകുളം: എംസി റോഡ് രാമപുരം കവലയിൽ ഗുഡ്സ് വാനിന്‍റെ നിയന്ത്രണം നഷ്ടപ്പെട്ട വൈദ്യുത പോസ്റ്റിലിടിച്ച് ഡ്രൈവർക്ക് പരിക്ക്. പട്ടിക്കാട് സ്വദേശി കോനാരത്ത് ഷാനവാസിനാണ് പരിക്കേറ്റത്. ശനിയാഴ്ച രാത്രി 12.30ഓടെയായിരുന്നു അപകടം. തൃശൂർ ഭാഗത്തുനിന്നു വരികയായിരുന്ന വാഹനമാണ് അപകടത്തിൽപെട്ടത്. അപകടത്തെ തുടർന്ന് വാഹനത്തിനുള്ളിൽ കുടുങ്ങിയ ഡ്രൈവറെ കൂത്താട്ടുകുളം അഗ്നിശമന രക്ഷാസേനയെത്തിയാണ് പുറത്തെടുത്തത്. ഷാനവാസിനെ കൂത്താട്ടുകുളത്തെ സ്വകാര്യ ആശുപത്രിയിൽ പ്രവേശിപ്പിക്കുകയും പിന്നീട് വിദഗ്ധ പരിശോധനയ്ക്കായി കോട്ടയം മെഡിക്കൽ കോളജ് ആശുപത്രിയിലേക്ക് മാറ്റുകയും ചെയ്തു.

വാഹനാപകടം : കാർ മീഡിയനിലേക്ക് ഇടിച്ചുകയറി

മൂവാറ്റുപുഴ: നിയന്ത്രണംവിട്ട കാർ മീഡിയനിലേക്ക് ഇടിച്ചുകയറി. വെള്ളൂർക്കുന്നം ബസ് കാത്തിരിപ്പു കേന്ദ്രത്തിനു സമീപം ഇന്നലെ രാവിലെ ഏഴോടെയായിരുന്നു അപകടം. തൊട്ടുപിന്നാലെ എത്തിയ ലോറി കാറിന് പിന്നിൽ ഇടിച്ചുകയറുകയും ചെയ്തു. കൃത്യമായ ദിശാ ബോർഡുകൾ സ്ഥാപിക്കാത്തതിനെത്തുടർന്ന് നഗരത്തിലെ മീഡിയനുകളിൽ വാഹനങ്ങൾ ഇടിച്ചു കയറി അപകടം ഉണ്ടാകുന്നത് പതിവായിരിക്കുകയാണ്. രാത്രികാലങ്ങളിലാണ് അപകടങ്ങൾ കൂടുതലും.

പിറവത്ത് വയോധികനെ തെരുവു നായ്ക്കൾ കൂട്ടമായി ആക്രമിച്ചു

പിറവം: പാലച്ചുവടിനടുത്ത് വയോധികന് തെരുവുനായ്ക്കളുടെ ആക്രമണത്തിൽ ഗുരുതര പരിക്കേറ്റു. പാലച്ചുവട് ക്ഷീരസംഘത്തിനു സമീപം താമസിക്കുന്ന തോട്ടുപുറത്ത് ടി.വി. ജോർജി(75) നാണ് നായ്ക്കുട്ടത്തിന്‍റെ ആക്രമണത്തിൽ പരിക്കേറ്റത്. ഇന്നലെ വൈകുന്നേരം നാലരയോടെയായിരുന്നു സംഭവം. പാലച്ചുവട് കവലയിൽ പോയ ശേഷം വീട്ടിലേക്ക് മടങ്ങുന്ന വഴിയാണ് ആക്രമണം. ഒരു നായ കുരച്ച് ചാടി ആക്രമിക്കുകയായിരുന്നു. റോഡിലേക്ക് വീണുപോയ വയോധികനെ സമീപത്തുണ്ടായിരുന്ന മറ്റു നായ്ക്ക്ളെത്തി കടിച്ചു നാശമാക്കി. മൂന്നോ നാലോ നായ്ക്കൾ ഉണ്ടായിരുന്നുവെന്ന് സംഭവം കണ്ട് ഓടിക്കൂടിയവർ പറഞ്ഞു. നാട്ടുകാർ ഒച്ചവച്ച് നായ്ക്കളെ ഓടിക്കാൻ ശ്രമിച്ചെങ്കിലും ഫലമുണ്ടായില്ല. ഒടുവിൽ തെങ്ങിൻ മടലുകൊണ്ട് തല്ലിയാണ് നായ്ക്കളെ ഓടിച്ചത്. നായ മടലിലും കുടിച്ചു തൂങ്ങിയിരുന്നു. ജോർജിന് കൈകാലുകളിലും മുഖത്തുമെല്ലാം സാരമായി പരിക്കേറ്റു. പിറവം താലൂക്ക് ആശുപത്രിയിലെത്തി പ്രഥമ ശുശ്രൂഷ നൽകിയശേഷം കോട്ടയം മെഡിക്കൽ കോളജിലേക്ക് മാറ്റി. പിറവത്ത് തെരുവ് നായ്ക്കളുടെ ശല്യം വ്യാപകമായിരിക്കുകയാണ്. പിറവം ടൗണിലൂടെ നായക്കൾ പലപ്പോഴും കൂട്ടമായി പോകുന്നത് കാണാം. പാലച്ചുവട് കവലയിലും ശല്യം പെരുകിയിരിക്കുകയാണ്.

"കുറിയടിച്ചാൽ‌ പുസ്തകം' : പുസ്തകക്കുറി പദ്ധതിയുമായി കെപിസിസി വിചാർ വിഭാഗ്

കൊച്ചി: വായനയെ പ്രോത്സാഹിപ്പിക്കാൻ കെപിസിസി വിചാർ വിഭാഗ് എറണാകുളം ജില്ലാ കമ്മിറ്റിയുടെ പുസ്തകക്കുറി പദ്ധതിക്ക് തുടക്കം. സാഹിത്യകാരൻ എൻ.എസ്. മാധവൻ ഉദ്ഘാടനം ചെയ്തു. അഞ്ഞൂറു രൂപ വീതം കുറിയിൽ നിക്ഷേപിക്കുന്നവരിൽ നിന്നു നറുക്കെടുപ്പിലൂടെ ഭാഗ്യശാലിക്കു 7800 രൂപയുടെ പുസ്തകങ്ങൾ നൽകുന്നതാണു പദ്ധതി. നിലവിൽ 50 ഓളം പേർ പുസ്തകക്കുറിയിൽ ചേർന്നതായി കെപിസിസി വിചാർവിഭാഗ് ജില്ലാ ചെയർമാൻ ഷൈജു കേളന്തറ അറിയിച്ചു.

ശതാബ്ദിമന്ദിരം ആശീർവദിച്ചു

കൊച്ചി: ചേരാനല്ലൂര്‍ ലിറ്റില്‍ ഫ്ലവര്‍ സ്‌കൂൾ ശതാബ്ദിമന്ദിരം ആശീര്‍വദിച്ചു. വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ ആശീർവാദവും ഉദ്ഘാടനവും നിര്‍വഹിച്ചു. അതിരൂപത കോര്‍പറേറ്റ് എഡ്യുക്കേഷണല്‍ ഏജന്‍സി ജനറല്‍ മാനേജര്‍ ഫാ. ജയന്‍ പയ്യപ്പിള്ളി അധ്യക്ഷത വഹിച്ചു. ഹൈബി ഈഡന്‍ എംപി, ടി.ജെ. വിനോദ് എംഎല്‍എ, ജില്ലാ പഞ്ചായത്തംഗം യേശുദാസ് പറപ്പിള്ളി, ബ്ലോക്ക് പഞ്ചായത്ത് പ്രസിഡന്‍റ് സരിത സനിൽ, പഞ്ചായത്ത് പ്രസിഡന്‍റ് കെ.ജി. രാജേഷ്, സ്‌കൂള്‍ മാനേജര്‍ ഫാ. ഫെലിക്‌സ് ചക്കാലക്കല്‍, ഹെഡ്മാസ്റ്റര്‍ ജോണി തൈക്കൂട്ടത്തിൽ തുടങ്ങിയവർ പ്രസംഗിച്ചു.

പള്ളുരുത്തി ബോസ്‌കോ നിലയത്തില്‍ യോഗദിനാചരണം

കൊച്ചി: ലഹരിയുടെ അമിത ഉപയോഗം മൂലം അപകട സാഹചര്യത്തില്‍പ്പെട്ട കുട്ടികളുടെ സംരക്ഷണ കേന്ദ്രമായ പള്ളുരുത്തി ബോസ്‌കോ നിലയം ഷെല്‍ട്ടര്‍ ഹോമില്‍ യോഗദിനം ആചരിച്ചു. ഡോണ്‍ ബോസ്‌കോ ബോയ്‌സ് ഹോം ഡയറക്ടറും പ്രമുഖ സാമൂഹിക പ്രവര്‍ത്തകനുമായ ഫാ. ജോണ്‍ മുട്ടത്ത്പാടത്ത് മുഖ്യ പ്രഭാഷണം നടത്തി. യോഗ ട്രെയിനര്‍ അഭിരാജ് മുക്കത്തിന്റെ നേതൃത്വത്തില്‍ കുട്ടികള്‍ക്ക് യോഗ പരിശീലനം നല്‍കി. ഷെല്‍ട്ടര്‍ ഹോം ഡയറക്ടര്‍ ഫാ. അഭിലാഷ് പാലക്കുടിയില്‍, ഐസക് ജോസഫ്, അലന്‍ ഡേവിസ്, ഭാവന തുടങ്ങിയവര്‍ പങ്കെടുത്തു.

എക്കോ നാച്വറൽ പ്രോഡക്ട് യൂണിറ്റ് ഉദ്ഘാടനം ചെയ്തു

കാഞ്ഞൂർ: കാഞ്ഞൂർ പഞ്ചായത്തിലെ ഏഴാം വാർഡിൽ എം.എസ്. സ്വാമിനാഥൻ റിസർച്ച് ഫൗണ്ടേഷനും (എംഎസ്എസ്ആർഎഫ്) എച്ച്ഡിഎഫ്സി ബാങ്ക് സമഗ്ര ഗ്രാമ വികസന പദ്ധതിയും ചേർന്നു നടപ്പാക്കുന്ന എക്കോ നാച്വറൽ പ്രോഡക്ട് യൂണിറ്റ് ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് പ്രിയ രഘു അധ്യക്ഷത വഹിച്ചു. എംഎസ്എസ്ആർഎഫ് പ്രോജക്ട് കോ-ഓർഡിനേറ്റർ സിജോ തോമസ്, ജില്ലാ പഞ്ചായത്തംഗം ശാരദ മോഹൻ, പഞ്ചായത്ത് സ്റ്റാൻഡിംഗ് കമ്മിറ്റി ചെയർ‌പേഴ്സൺ സിമി ടിജോ, ബ്ലോക്ക് പഞ്ചായത്തംഗങ്ങളായ കെ.വി. അഭിജിത്ത്, ആൻസി ജിജോ, സർവീസ് സഹകരണ ബാങ്ക് പ്രസിഡന്‍റ് ടി.ഐ. ശശി, കോ-ഓർഡിനേറ്റർ ദീപ ബിജൻ, യൂണിറ്റ് പ്രസിഡന്‍റ് വൽസ സേവ്യർ, ജോളി ജോസ് എന്നിവർ പ്രസംഗിച്ചു. കിഴക്കുംഭാഗം വില്ലേജിലെ ക്ഷീരകർഷക വനിതാസംഘത്തിന്‍റെ നേതൃത്വത്തിൽ പ്രവർത്തിക്കുന്ന യൂണിറ്റിൽ പാലുത്പന്നങ്ങൾ, ചിപ്സുകൾ, അച്ചാറുകൾ എന്നിവ നിർമിച്ചു വിപണിയിലെത്തിക്കുന്നുണ്ട്.

ആന്‍റിബയോട്ടിക്കുകളുടെ ദുരുപയോഗം വിനാശകരം: ഡോ. സൗരവ് ശേഖര്‍ പോള്‍

കൊച്ചി: ആന്‍റിബയോട്ടിക്കുകളുടെ അമിത ഉപയോഗവും ദുരുപയോഗവും കാരണം ലോകം നിശബ്ദ മഹാമാരിയെ നേരിടുകയാണെന്ന് രാജഗിരി ആശുപത്രിയിലെ ഇന്‍ഫെക്ഷ്യസ് ഡിസീസസ് കണ്‍സള്‍ട്ടന്‍റ് ഡോ. സൗരവ് ശേഖര്‍ പോള്‍. ആന്‍റിബയോട്ടിക്കുകളുടെ അമിത ഉപയോഗത്തിന്‍റെ ഭാഗമായ ആന്‍റിമൈക്രോബിയല്‍ റെസിസ്റ്റന്‍സ് (എഎംആര്‍) സാധാരണ അണുബാധകളെ പോലും മാരകമാക്കുന്നതിലേക്ക് നമ്മെ എത്തിച്ചേക്കാമെന്നും അദ്ദേഹം പറഞ്ഞു. നിലവില്‍ ഇന്ത്യയിലെ ബാക്ടീരിയ അണുബാധകളില്‍ 60 ശതമാനവും സാധാരണയായി ഉപയോഗിക്കുന്ന ആന്‍റിബയോട്ടിക്കുകളോട് പ്രതിരോധം കാണിക്കുന്നുണ്ട്. ഈ ഭീഷണി തടയാന്‍ ബഹുമുഖ സമീപനം ആവശ്യമാണെന്ന് ഡോ. പോള്‍ പറഞ്ഞു. ആത്യാവശ്യമില്ലാത്തപ്പോള്‍ ആന്‍റിബയോട്ടിക്കുകള്‍ ഒഴിവാക്കുകയാണ് പ്രധാനം. ആരോഗ്യ വിദഗ്ധര്‍, നയരൂപ കര്‍ത്താക്കള്‍, ഫാര്‍മസ്യൂട്ടിക്കല്‍ കമ്പനികള്‍, പൊതുജനങ്ങള്‍ എന്നിവരുടെ കൂട്ടായ പ്രയത്‌നം ഇതിന് അത്യന്താപേക്ഷിതമാണ്. ആന്‍റിബയോട്ടിക്കുകളുടെ ഉപയോഗത്തില്‍ കര്‍ശന നിയന്ത്രണങ്ങള്‍ ഏര്‍പ്പെടുത്തുക, പുതിയ ആന്‍റിബയോട്ടിക്കുകളുടെ ഗവേഷണത്തിലും വികസനത്തിലും കൂടുതല്‍ നിക്ഷേപം നടത്തുക, ഉത്തരവാദിത്വമുള്ള ആന്‍റിബയോട്ടിക് ഉപയോഗത്തെക്കുറിച്ച് ജനങ്ങളെ ബോധവത്കരിക്കുക എന്നിവയും ഈ പ്രതിസന്ധി മറികടക്കാന്‍ അനിവാര്യമാണെന്നും അദ്ദേഹം ചൂണ്ടിക്കാട്ടി.

കിഴക്കേ കടുങ്ങല്ലൂർ റോഡ് വികസനം: ഉദ്യോഗസ്ഥ സംഘം സ്ഥലം സന്ദർശിച്ചു

ആലുവ: കിഴക്കേ കടുങ്ങല്ലൂർ റോഡ് വീതി കൂട്ടുന്നതിന് മുന്നോടിയായി ഉദ്യോഗസ്ഥതല പരിശോധന നടന്നു. എറണാകുളം എൽഎ വിഭാഗം ഡെപ്യൂട്ടി കളക്ടർ എസ്. റജീനയുടെ നേതൃത്വത്തിലാണ് ഉദ്യോഗസ്ഥ സംഘം എത്തിയത്. ആലുവ നഗരസഭാ പരിധിയിൽ വരുന്ന തോട്ടക്കാട്ടുകര മുതൽ കടുങ്ങല്ലൂർ വരെയുള്ള പെരിക്കപ്പാലം റോഡ്, കടുങ്ങല്ലൂർ പഞ്ചായത്തിൽ ഉൾപ്പെടുന്ന ആലങ്ങാട് വരെയുള്ള കിഴക്കേ കടുങ്ങല്ലൂർ റോഡ് എന്നിവയാണ് വീതി കൂട്ടുന്നത്. ഇരുവശത്തു നിന്നും രണ്ടു മീറ്റർ എടുത്ത് 12 മീറ്ററായാണ് റോഡ് വീതി കൂട്ടുന്നത്. ഏഴ് മീറ്റർ വീതിയിലുള്ള ടാർ റോഡിനൊപ്പം സർവീസ് റോഡ്, ഡ്രെയിൻ കം ഫുട്പാത്ത്, കേബിൾ ഡക്ട് എന്നിവ ഉൾപ്പെടെയാണ് 12 മീറ്റർ വീതിയുണ്ടാവുക. വീടുകൾ, കടകൾ തുടങ്ങിയവ ഒഴിയേണ്ടി വന്നവരുടെ കണക്കാണ് ഇന്നലെ എടുത്തത്. ഭൂമിയുടെയും കെട്ടിടങ്ങളുടെയും വിലനിർണയിക്കുന്നതിനുള്ള നടപടികളും അവസാന ഘട്ടത്തിലാണ്. പുനരധിവാസ പാക്കേജും ഉടൻ പ്രഖ്യാപിക്കും. കഴിഞ്ഞ വർഷം ജൂണിൽ പുറത്തിറങ്ങിയ വിജ്ഞാപന പ്രകാരമാണ് പൊന്നുംവില ഓഫീസറായി പി ഡബ്ല്യുഡി ലാൻഡ് അക്വിസിഷൻ സ്പെഷൽ തഹസീൽദാറെ നിയമിച്ചത്. അങ്കമാലിയിലാണ് ഓഫീസ് പ്രവർത്തിക്കുന്നത്. അങ്കമാലി എൽഎ പിഡബ്ല്യുഡി സ്പെഷൽ തഹസിൽദാർ എം.കെ. ഗിരീഷ് ലാൽ, ഡെപ്യൂട്ടി തഹസിൽദാർ കെ.കെ. ബഷീർ, കളക്ടറേറ്റ് എൽഎ വിഭാഗം ജൂനിയർ സൂപ്രണ്ട് ധന്യ, റവന്യു ഇൻസ്പെക്ടർ ജിജോ പോൾ, പി.സി.മുരളീധരൻ എന്നിവരും സംഘത്തിലുണ്ടായിരുന്നു.

യോഗദിനാചരണം

കാർമൽ കോളജ് ഓഫ് നഴ്സിംഗിൽ ആലുവ: കാർമൽ കോളജ് ഓഫ് നഴ്സിംഗിലെ എസ്എസ്ജിപി സെല്ലും കോളജ് യൂണിയനും എസഎൻഎയും സംയോജിതമായി അന്താരാഷ്ട്ര യോഗ ദിനം ആചരിച്ചു. യു ജി കോ ഓർഡിനേറ്ററും എസ്എസ്ജിപി നോഡൽ ഓഫീസറുമായ ഡോക്ടർ ദീപ ജോർജ് ആശാലക്ഷ്മി എന്നിവർ പ്രസംഗിച്ചു. അമൃതയിൽ യോഗ ദിനാചരണം കൊച്ചി: കൊച്ചി അമൃത ഹെൽത്ത് സയൻസ് കാന്പസിൽ വിവിധ സ്കൂളുകളുടെയും അയുദ്ധിന്‍റെയും നേതൃത്വത്തിൽ നടന്ന അന്താരാഷ്ട്ര യോഗദിനാചരണം സിറ്റി പോലീസ് കമ്മീഷണർ പുട്ട വിമലാദിത്യ ഉദ്ഘാടനം ചെയ്തു. സ്വാമി അനഘാമൃതാനന്ദപുരി, യോഗാചാര്യൻ സുകുമാരൻ, ഡോ. മനോരഞ്ജിനി സുരേഷ് എന്നിവർ പ്രസംഗിച്ചു. യോഗാചാര്യന്മാരെ ആദരിച്ചു ആലുവ: മുപ്പത്തടം ഹോട്ടല്‍ ദ്വാരകയില്‍ അന്താരാഷ്ട്ര യോഗദിനം ആചരിച്ചു. യോഗാചാര്യന്മാരായ എസ്. ആന്‍റണിയും ടി.എ. ജോയിയും കെ.ഡി. വാസന്തിയും ചേര്‍ന്ന് ഭദ്രദീപം തെളിച്ചു. ചടങ്ങിൽ മൂന്നു യോഗാചാര്യന്മാരേയും ശ്രീമന്‍ നാരായണന്‍ ആദരിച്ചു.

ഭാരതമാതാ കോളജിൽ"വായന മഴ'

തൃക്കാക്കര: ഭാരതമാതാ കോളജിൽ മലയാള വിഭാഗത്തിന്‍റെ ആഭിമുഖ്യത്തിൽ വായന വാരാചരണം ( വായന മഴ) 26നു സമാപിക്കും. വിവിധ ദിനങ്ങളിലായി പ്രഫ. എം.കെ. സാനുവിന്‍റെ വസതി സന്ദർശനം, കാവ്യാലാപനം, സാഹിത്യ കൃതികളെ പരിചയപെടുത്തൽ, വിവിധ മത്സരങ്ങൾ, നാടൻപാട്ടും വർത്തമാനവും തുടങ്ങിയ പരിപാടികൾ നടക്കും. കവി ഒ. അരുൺകുമാർ ഉദ്ഘാടനം ചെയ്തു. പ്രിൻസിപ്പൽ ഡോ. സൗമ്യ തോമസ് മുഖ്യപ്രഭാഷണം നടത്തി. മലയാളം വകുപ്പ് മേധാവി ഡോ. അനീഷ് പോൾ അധ്യക്ഷത വഹിച്ചു. ഡോ. തോമസ് പനക്കളം, ഡോ. വർഗീസ് പോൾ തുടങ്ങിയവർ പ്രസംഗിച്ചു.

കരുമാലൂർ-കുന്നുകര കുടിവെള്ള പദ്ധതി നിർമാണോദ്ഘാടനം നടത്തി

കരുമാലൂർ: അടുത്ത 50 വർഷത്തേക്ക് കുന്നുകര, കരുമാലൂർ പഞ്ചായത്തുകളിലെ മുഴുവൻ ജനങ്ങൾക്കും ആവശ്യമായ കുടിവെള്ള ലഭ്യത ഉറപ്പാക്കുന്നതാണ് കുന്നുകര-കരുമാലൂർ കുടിവെള്ള പദ്ധതിയെന്ന് വ്യവസായ മന്ത്രി പി. രാജീവ്. പദ്ധതി സമയബന്ധിതമായി പൂർത്തിയാക്കും. മുപ്പത്തടം ജലശുദ്ധീകരണശാലയുടെ ശേഷി 20 എംഎൽഡി ആയി വർധിപ്പിക്കുന്നതോടെ ആലങ്ങാട് പഞ്ചായത്തിലേക്കും കൂടുതൽ കുടിവെള്ളമെത്തിക്കാൻ കഴിയുമെന്നും അദ്ദേഹം പറഞ്ഞു. കളമശേരി നിയമസഭാ മണ്ഡലത്തിലെ കുടിവെള്ള ലഭ്യത ഉറപ്പാക്കുന്ന പ്രധാന പദ്ധതികളിൽ ഒന്നായ കരുമാല്ലൂർ - കുന്നുകര കുടിവെള്ള വിതരണ കിഫ്ബി പദ്ധതിയുടെ നിർമാണ ഉദ്ഘാടനച്ചടങ്ങിൽ സംസാരിക്കുകയായിരുന്നു മന്ത്രി. കുന്നുരയിൽ നടന്ന ചടങ്ങിൽ ജലവിഭവ മന്ത്രി റോഷി അഗസ്റ്റിൻ നിർമാണോദ്ഘാടനം നിർവഹിച്ചു. വ്യവസായമന്ത്രി പി. രാജീവ് അധ്യക്ഷനായി. കൊച്ചിയിൽ നടപ്പാക്കുന്ന എഡിബി പദ്ധതിയിൽ ആലുവയിലെ 190 എംഎൽഡി പദ്ധതിയും ഉൾപ്പെടുത്തിയതോടെ കുടിവെള്ളക്ഷാമത്തിന് പരിഹാരമാവുകയാണെന്ന് റോഷി അഗസ്റ്റിൻ പറഞ്ഞു. സംസ്ഥാന സർക്കാർ 51.30 കോടി രൂപയാണ് കിഫ്ബി മുഖേന കുന്നുകര - കരുമാല്ലൂർ പദ്ധതിക്കായി അനുവദിച്ചത്. ടെൻഡർ പൂർത്തിയാക്കി 48.52 കോടി രൂപയുടെ ഭരണാനുമതി നൽകി. ബ്ലോക്ക് പഞ്ചായത്ത് പ്രസിഡന്‍റുമാരായ ടി.വി. പ്രദീഷ്, രമ്യ തോമസ്, ഗ്രാമ പഞ്ചായത്ത് പ്രസിഡൻ്റുമാരായ സൈനബാബു സബിത നാസർ തുടങ്ങിയവർ സംസാരിച്ചു.

ഗോശ്രീ വഴിയുള്ള ബസ് സർവീസ് നിർത്തുമെന്ന്

വൈപ്പിന്‍: ഗതാഗതതടസം മൂലം ഗോശ്രീപാലം വഴിയുള്ള സ്വകാര്യബസുകള്‍ സര്‍വീസ് നിര്‍ത്തിവയ്ക്കുമെന്ന് ബസുടമാ സംഘത്തിന്‍റെ മുന്നറിയിപ്പ്. ടാറിംഗിനായി പൊളിച്ചിട്ടിരിക്കുന്ന ഗോശ്രീ രണ്ടാം പാലത്തിനു സമാന്തരമായുള്ള പാലത്തിന്‍റെ അപ്രോച്ച്‌റോഡ് സമയബന്ധിതമായി ടാറിംഗ് നടത്താത്തതാണ് വിനയായിരിക്കുന്നത്. ഇതുമൂലം രണ്ടാം പാലത്തിലൂടെയാണ് വാഹനങ്ങൾ അങ്ങോട്ടുമിങ്ങോട്ടും കടന്നു പോകുന്നത്. ഇതോടെ തിരക്കേറിയ രാവിലെയും വൈകിട്ടും ഗതാഗതക്കുരുക്ക് നിത്യസംഭവമായിരിക്കുകയാണിവിടെ. വല്ലാര്‍പാടത്ത് മണിക്കൂറുകൾ നീളുന്ന ഗതാഗതതടസം മൂലം ബസുകള്‍ക്കു സമയനിഷ്ഠ പാലിക്കാന്‍ കഴിയുന്നില്ല. ഇതിനാൽ ട്രിപ്പുകൾ റദ്ദാക്കേണ്ടിവരുന്നു. ഇതാകട്ടെ സാമ്പത്തിക നഷ്ടത്തിനിടയാക്കുന്നതുമൂലം സര്‍വീസ് തുടര്‍ന്നു കൊണ്ടുപോകാനാവാത്ത സ്ഥിതിയാണിപ്പോഴെന്ന് പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ പ്രസിഡന്‍റ് പി.കെ. ലെനില്‍, സെക്രട്ടറി എ.ജെ. ഓജന്‍, പി.പി. വര്‍ഗീസ്, സി.കെ. പ്രദീപ് എന്നിവര്‍ ചൂണ്ടിക്കാട്ടി.

കുമ്പളങ്ങി പടന്നക്കരി സ്ലൂയിസ് തുറന്നു

മട്ടാഞ്ചേരി : കുമ്പളങ്ങി പഞ്ചായത്തിലെ പടന്നക്കരി സ്ലൂയിസിന്‍റെയും അപ്പ്രോച്ച് റോഡിന്‍റെയും ഉദ്ഘാടനം മന്ത്രി റോഷി അഗസ്റ്റിൻ നിർവഹിച്ചു. കെ.ജെ. മാക്സി എംഎൽഎ അധ്യക്ഷത വഹിച്ചു. വർഷങ്ങളായി കുമ്പളങ്ങി പഞ്ചായത്തിന് ലേലത്തിലൂടെ ലക്ഷങ്ങൾ നേടി കൊടുക്കുന്ന സ്ലൂയിസാണ് പടന്നക്കരി, എന്നാൽ സ്ലൂയിസ് തകർന്നതുമൂലം പഞ്ചായത്തിന്‍റെ വരുമാന മാർഗം നിലയ്ക്കുകയും പാടശേഖരത്തിലെ 152 ഏക്കറോളം ഭൂമി കൃഷി ചെയ്യുവാൻ സാധിക്കാതെ വരികയും ചെയ്തു. ഈ പ്രദേശത്ത് യാത്രാക്ലേശവും ഓര് വെള്ള പ്രശ്നവും ഇതുമൂലം ഉണ്ടായി. ജലവിഭവവകുപ്പിന്‍റെ 1.53 കോടി രൂപയും എംഎൽഎ ഫണ്ടിൽനിന്ന് 25 ലക്ഷം രൂപയും അനുവദിച്ചാണ് സ്ലൂയിസും അപ്പ്രോച്ച് റോഡ് നിർമാണവും നിർവഹിച്ചിരിക്കുന്നത്. സ്ലൂയീസ് യഥാർഥ്യമായതോടെ പടന്നക്കരി നിവാസികളുടെ യാത്രാ ക്ലേശത്തിനും കുമ്പളങ്ങിയിലെ പടിഞ്ഞാറൻ മേഖലയിലെ ഓരു വെള്ളക്കെട്ടിനും പരിഹാരമാകും. ബ്ലോക്ക് പഞ്ചായത്ത് പ്രസിഡന്‍റ് ബേബി തമ്പി, പഞ്ചായത്ത് പ്രസിഡന്‍റ് സൂസൻ ജോസഫ്, പി.എ. പീറ്റർ, ജയ്സൺ ടി. ജോസ്, എം.എം. ഫ്രാൻസിസ് തുടങ്ങിയവർ സംസാരിച്ചു.

ഹൈ സ്പീഡ് ട്രെയിൻ പദ്ധതി: സിൽവർ ലൈൻ പദ്ധതിയെ ഒളിച്ചു കടത്താൻ ശ്രമമെന്ന്

സിൽവർ ലൈൻ വിരുദ്ധ സമിതി വീണ്ടും സമരപാതയിൽ ആലുവ: കേന്ദ്ര അംഗീകാരം ലഭിക്കില്ലെന്ന് ഉറപ്പായപ്പോൾ നേരിയ വ്യത്യാസം വരുത്തി ഹൈ സ്പീഡ് ട്രെയിൻ പദ്ധതി എന്ന പേരിൽ സിൽവർ ലൈൻ പദ്ധതിയെ ഒളിച്ചു കൊണ്ടുവരാൻ ശ്രമമെന്ന് സിൽവർ ലൈൻ വിരുദ്ധ ജനകീയ സമിതി. ഇതിനെതിരെ 28 ന് സംസ്ഥാന വ്യാപകമായി എല്ലാ യൂണിറ്റുകളിലും പ്രതിഷേധ ദിനമായി ആചരിക്കും. 30ന് തിരുവനന്തപുരത്ത് സെക്രട്ടറിയേറ്റ് നടയിൽ പ്രതിഷേധ സംഗമം സംഘടിപ്പിക്കുമെന്ന് സംഘാടകർ അറിയിച്ചു. ഇ. ശ്രീധരൻ നിർദ്ദേശിച്ച ഹൈ സ്പീഡ് ട്രെയിൻ പദ്ധതി നേരത്തെ സർക്കാർ പരിഗണിക്കുകയും കേരളത്തിന്‍റെ സാമ്പത്തിക, പാരിസ്ഥിതിക, സാമൂഹ്യ സാഹചര്യത്തിൽ പ്രായോഗികമല്ലെന്ന് കണ്ടെത്തി ഉമ്മൻചാണ്ടി സർക്കാർ വേണ്ടെന്ന് വെച്ചതാണെന്ന് ആലുവയിൽ ചേർന്ന കെ - റെയിൽ സിൽവർ ലൈൻ വിരുദ്ധ ജനകീയ സമിതി സമ്മേളനം ചൂണ്ടിക്കാട്ടി. ഒന്നാം പിണറായി സർക്കാരും ഇക്കാര്യത്തിൽ സമാന തീരുമാനമാണ് കൈക്കൊണ്ടത്. ബ്രോഡ്ഗേജ് അല്ലാത്ത ഒരു പാതയും സ്വീകാര്യമല്ലെന്ന് കഴിഞ്ഞ മാസവും റെയിൽവേ ബോർഡ് ആവർത്തിച്ച് വ്യക്തമാക്കി. എന്നിട്ടും സംസ്ഥാന സർക്കാർ ഹൈ സ്പീഡ് പദ്ധതിക്ക് വേണ്ടി ശ്രമങ്ങൾ നടത്തുന്നത് യാത്രാസൗകര്യം വർദ്ധിപ്പിക്കുക എന്ന സദുദ്ദേശത്തോടെയല്ലെന്നും വിദേശ വായ്പയിൽ കണ്ണ് വച്ചാണെന്നും സമ്മേളനം അഭിപ്രായപ്പെട്ടു. കെ - റെയിൽ സിൽവർ ലൈൻ വിരുദ്ധ ജനകീയ സമിതി സംസ്ഥാന ചെയർമാൻ എം.പി. ബാബുരാജ് അധ്യക്ഷത വഹിച്ചു. കേരള കോൺഗ്രസ് വൈസ് ചെയർമാൻ ജോസഫ് എം. പുതുശേരി സമ്മേളനം ഉദ്ഘാടനം ചെയ്തു. സമിതി സംസ്ഥാന ജനറൽ കൺവീനർ എസ്. രാജീവൻ, ചന്ദ്രംഗതൻ മാടായി, എം.ടി. തോമസ്, പ്രൊഫ. കുസുമം ജോസഫ്, ബാബു കുട്ടൻചിറ, വിനു കുര്യാക്കോസ്, ശിവദാസ് മഠത്തിൽ, ടി. സി. രാമചന്ദ്രൻ, മിനി കെ. ഫിലിപ്പ്, മുരുകേഷ് നടക്കൽ, എൻ.എ. രാജൻ, എ.ഓ.പൗലോ, കെ.എം.തോമസ്, സി.കെ.ശിവദാസൻ, മാരിയ അബു, കെ. പി. സാൽവിൻ, എ. ഷൈജു, ബി. രാമചന്ദ്രൻ, മധു ചെങ്ങന്നൂർ, കെ. ആർ. പ്രസാദ് എന്നിവർ പ്രസംഗിച്ചു.

മുനമ്പം ഭൂസംരക്ഷണ സമിതിക്ക് ഐക്യദാര്‍ഢ്യവുമായി ലീജിയന്‍ ഓഫ് മേരി അംഗങ്ങള്‍

കൊച്ചി: കത്തോലിക്കാ സഭയിലെ അന്താരാഷ്ട്ര പ്രസ്ഥാനമായ ലീജിയന്‍ ഓഫ് മേരിയുടെ വരാപ്പുഴ അതിരൂപത എറണാകുളം മേഖല മുനമ്പം ഭൂസംരക്ഷണ സമിതിക്ക് ഐക്യദാര്‍ഢ്യവുമായി സമരപ്പന്തലിലെത്തി. മുനമ്പം തീരജനത അനുഭവിക്കുന്ന കഷ്ടപ്പാടുകളും ദുരന്തങ്ങളും മനസിലാക്കാനും അവരുടെ പോരാട്ടത്തിന് പിന്തുണ നല്‍കാനുമാണ് ഇവർ മുനമ്പം സമരപ്പന്തലില്‍ എത്തിയത്. ഭൂസംരക്ഷണസമിതി രക്ഷാധികാരി ഫാ. ആന്‍റണി സേവ്യര്‍ തറയില്‍ സമരസേനാനികള്‍ക്ക് ഷാളണിയിച്ച് നിരാഹാര സമരം ഉദ്ഘാടനം ചെയ്തു. സമാപന സമ്മേളനത്തിന്‍റെ എറണാകുളം മേഖല പ്രസിഡന്‍റ് ബ്രദര്‍ ഗാസ്പര്‍ നിര്‍വഹിച്ചു. വൈസ് പ്രസിഡന്‍റ് ടി.എം. വര്‍ഗീസ്, സെക്രട്ടറി ഡെന്‍സി സേവ്യര്‍, വേളാങ്കണ്ണി മാതാ പള്ളി അസിസ്റ്റന്‍റ് വികാരി ഫാ. മോന്‍സി വര്‍ഗീസ് അറക്കല്‍, ഭൂസംരക്ഷണ സമിതി ചെയര്‍മാന്‍ ജോസഫ് റോക്കി പാലക്കല്‍, സമരസമിതി കണ്‍വീനര്‍ ജോസഫ് ബെന്നി കുറുപ്പശേരി തുടങ്ങിയവര്‍ പ്രസംഗിച്ചു.

ആലുവ ബ്രിഡ്ജ് റോഡിൽ കുടിവെള്ളം ലഭിച്ചിട്ട് ആറുനാൾ : വാട്ടർ അഥോറിറ്റി ഓഫീസ് ഉപരോധിച്ചു

ആലുവ: നഗരമധ്യത്തിൽ ബാങ്ക് ജംഗ്ഷൻ മുതൽ ബൈപാസ് വരെ കുടിവെള്ളം കിട്ടാതെ ആലുവ നിവാസികൾ ദുരിതത്തിൽ. ആറ് ദിവസമായി കുടിവെള്ളം കിട്ടാത്തതിൽ പ്രതിഷേധിച്ച് ആലുവ താലൂക്ക് പൗരാവകാശ സരക്ഷണ സമിതിയുടെ നേതൃതത്തിൽ വാട്ടർ അഥോറിട്ടി അസിസ്റ്റന്‍റ് എക്സിക്യൂട്ടീവ് എൻജിനീയറെ ഉപരോധിച്ചു. പുതിയ പൈപ്പ് സ്ഥാപിച്ച് കുടിവെള്ള പ്രശ്നം പരിഹരിക്കാമെന്ന എക്സിക്യൂട്ടീവ് എഞ്ചിനീയറുടെ ഉറപ്പിനെ തുടർന്നാന്ന് ഉപരോധം അവസാനിപ്പിച്ചത്. അമ്പത് വർഷത്തിലധികമായി പഴക്കമുള്ള ആസ്ബസ്റ്റോസ് നിർമിതമായ ഭൂഗർഭ പൈപ്പുകൾ മാറ്റണമെന്ന സംസ്ഥാന മനുഷ്യാവകാശ കമ്മീഷന്‍റെ 2023 ഉത്തരവ് നടപ്പിലാക്കണമെന്ന് പൗരസമിതി സെക്രട്ടറി സാബു പരിയാരത്ത് ആവശ്യപ്പെട്ടു. ആലുവ ജലശുദ്ധീകരണ ശാലയുടെ ഒരു കിലോമീറ്റർ മാത്രം ചുറ്റളവിലുള്ള ആലുവ ബാങ്ക് ജംഗ്ഷൻ, ബ്രിഡ്ജ് റോഡ്, കോഡർ ലൈൻ, പേരേക്കാട്ട് റോഡ് എന്നീ മേഖലകിലാണ് ഞായറാഴ്ച മുതൽ കുടിവെള്ളം ഇല്ലാതായത്. എന്നാൽ എന്താണ് സംഭവിച്ചതെന്നോ എവിടെയാണ് പമ്പിംഗിൽ തടസം വന്നതെന്നോ കണ്ടെത്താനാകുന്നില്ലെന്നാണ് ഉദ്യോഗസ്ഥരുടെ വിശദീകരണം. നഗരത്തിൽ ജലവിതരണം ചെയ്യുന്ന ആസ്ബസ്റ്റോസ് പൈപ്പുകൾ പാലസ് റോഡിൽ ബാങ്ക് ജംഗ്ഷവൻ വരെ മൂന്ന് വർഷം മുമ്പ് മാറ്റിയിട്ടുണ്ട്. എന്നാൽ ബാങ്ക് ജംഗ്ഷൻ മുതൽ ബൈപാസ് വരെ പണമില്ലെന്ന പേരിൽ മാറ്റാതിരിക്കുകയായിരുന്നു. ഇന്നലെ ഉപരോധം നടത്തിയതോടെ ഇതിനായി ഫണ്ട് അനുവദിക്കാമെന്നും പൊതുമരാമത്ത് വകുപ്പിൽ നിന്ന് അനുമതി മേടിക്കാമെന്നും ഉദ്യോഗസ്ഥർ സമരക്കാരെ അറിയിച്ചു.

ചെല്ലാനത്തെ കടലാക്രമണത്തിന് ശാശ്വത പരിഹാരം കാണണം: സിപിഎം

കൊച്ചി: ചെല്ലാനത്ത് പുത്തന്‍തോടു മുതല്‍ മാനാശേരി വരെയുള്ള പ്രദേശങ്ങളിലെ കടലാക്രമണത്തിന് ശാശ്വത പരിഹാരം കാണണമെന്ന് സിപിഎം ജില്ലാ സെക്രട്ടേറിയറ്റ് ആവശ്യപ്പെട്ടു. കടലാക്രമണം മുമ്പെങ്ങുമില്ലാത്തവിധം രൂക്ഷമാണ്. തീരം കടലെടുത്തു എന്നു മാത്രമല്ല ഒമ്പത് വീടുകള്‍ പൂര്‍ണമായും നിരവധി വീടുകള്‍ ഭാഗികമായും തകര്‍ന്നു. തീരമേഖലയില്‍ കടലാക്രമണത്തെ പ്രതിരോധിക്കാന്‍ ഒരുവിധ സഹായവും നല്കാത്ത കേന്ദ്രസര്‍ക്കാര്‍ നടപടി ജനവിരുദ്ധമാണ്. പ്രശ്‌നത്തിന് ശാശ്വതമായ പരിഹാരം കാണാന്‍ സത്വര നടപടി സ്വീകരിക്കണമെന്നും ജില്ലാ സെക്രട്ടേറിയറ്റ് ആവശ്യപ്പെട്ടു.

കടലാക്രമണം: മന്ത്രി റോഷിക്കെതിരെ യൂത്ത് കോൺഗ്രസ്‌ പ്രതിഷേധം

കൊച്ചി: കൊച്ചി തീരത്തു കടലേറ്റം രൂക്ഷമായിട്ടും നടപടികൾ സ്വീകരിച്ചില്ലെന്ന് ആരോപിച്ചു മന്ത്രി റോഷി അഗസ്റ്റിനെതിരെ യൂത്ത് കോൺഗ്രസ് പ്രതിഷേധം. കൊച്ചിയിൽ വാട്ടർ അഥോറിറ്റിയുടെ പരിപാടിയിൽ പങ്കെടുക്കാനെത്തിയ മന്ത്രിക്കു നേരെ കരിങ്കൊടിയുമായി പ്രവർത്തകർ പ്രതിഷേധിച്ചു. ചെല്ലാനം, കണ്ണമാലി, ചെറിയ കടവ് പ്രദേശങ്ങളിൽ കടലേറ്റം രൂക്ഷമായ സാഹചര്യത്തിലായിരുന്നു പ്രതിഷേധം. പരിപാടിയുടെ ഉദ്ഘാടന ചടങ്ങിനിടെ വേദിയിലേക്ക് യൂത്ത് കോൺഗ്രസ്‌ പ്രവർത്തകർ കരിങ്കൊടിയുമായി എത്തുകയായിരുന്നു. സ്റ്റേജിനു സമീപം നിലയുറപ്പിച്ച പ്രവർത്തകരെ പോലീസ് എത്തി ബലമായി അറസ്റ്റ് ചെയ്തു നീക്കി. യൂത്ത് കോൺഗ്രസ്‌ ജില്ലാ പ്രസിഡന്‍റ് സിജോ ജോസഫ്, നിയോജകമണ്ഡലം പ്രസിഡന്‍റ് ജെർജസ് വി. ജേക്കബ്, നിയോജകമണ്ഡലം ഭാരവാഹികളായ അനീഷ് ചേനക്കര, ബി. അഷ്‌റഫ്‌ എന്നിവരെയാണ് പോലീസ് അറസ്റ്റ് ചെയ്തു നീക്കിയത്.

പുതിയ വാട്ടര്‍ പ്യൂരിഫയറിന് തകരാർ; കന്പനി നഷ്ടപരിഹാരം നല്‍കണമെന്ന് ഉപഭോക്തൃ കോടതി

കൊച്ചി: പുതിയ വാട്ടര്‍ പ്യൂരിഫയര്‍ ഇന്‍സ്റ്റാള്‍ ചെയ്തതിലെ അപാകത കാരണം പ്രവര്‍ത്തിക്കാതിരുന്നതിന് നഷ്ടപരിഹാരം നല്‍കണമെന്ന് എറണാകുളം ജില്ലാ ഉപഭോക്തൃ തര്‍ക്ക പരിഹാര കോടതി. ഭിന്നശേഷിക്കാരനും പെയിന്‍റിംഗ് തൊഴിലാളിയുമായ കെ.എ. ആഗസ്റ്റിന്‍ യുറേക്ക ഫോർബ്സിനും ഇന്‍സ്റ്റലേഷന്‍ സര്‍വീസ് സെന്‍ററിനുമെതിരെ സമര്‍പ്പിച്ച പരാതിയിലാണ് ഉത്തരവ്. കൊച്ചിയിലെ പ്രമുഖ ഗൃഹോപകരണ സ്ഥാപനത്തില്‍ നിന്ന് 10,200 രൂപയ്ക്കാണ് വാട്ടര്‍ പ്യൂരിഫയര്‍ വാങ്ങിയത്. ഉത്പന്നം സ്ഥാപിച്ചതിനുശേഷം ഇതുവരെയും ശരിയായി പ്രവര്‍ത്തിച്ചിട്ടില്ല. നിരവധി തവണ എതിര്‍കക്ഷികളെ സമീപിച്ചിട്ടും നപടികള്‍ ഉണ്ടായില്ലെന്നും പരാതിയിൽ പറയുന്നു. ഉപകരണം ശരിയായ രീതിയില്‍ ഇന്‍സ്റ്റാള്‍ ചെയ്യുന്നതില്‍ പരാജയപ്പെട്ടതായി ഡി.ബി. ബിനു അധ്യക്ഷനും വി. രാമചന്ദ്രന്‍, ടി.എന്‍. ശ്രീവിദ്യ എന്നിവര്‍ അംഗങ്ങളായ ബെഞ്ച് കണ്ടെത്തി. പരാതിക്കാരന് പുതിയ വാട്ടര്‍ പ്യൂരിഫയര്‍ നല്‍കുകയോ 10,200 രൂപ തിരികെ നല്‍കുകയും ചെയ്യണം. കൂടാതെ നഷ്ടപരിഹാരം കോടതി ചെലവ് ഇനങ്ങളില്‍ 10,000 രൂപയും 45 ദിവസത്തിനകം നല്‍കാന്‍ എതിര്‍കക്ഷികള്‍ക്ക് കോടതി ഉത്തരവ് നല്‍കി.

പണപ്പിരിവ് അവസാനിപ്പിക്കണം: കെഎസ്‌യു

കൊച്ചി: എറണാകുളം മഹാരാജാസ് കോളജിന്‍റെ ശതോത്തര സുവര്‍ണ ജൂബിലി ആഘോഷത്തിനായി വിദ്യാര്‍ഥികളില്‍ നിന്ന് പണപ്പിരിവ് നടത്തുന്നത് അവസാനിപ്പിക്കണമെന്ന് കെഎസ്‌യു. സര്‍ക്കാര്‍ കലാലയങ്ങളില്‍ അനധികൃത പിരിവ് നിരോധിച്ചിട്ടും പുതിയതായി അഡ്മിഷന്‍ എടുക്കുന്ന വിദ്യാര്‍ഥികളിൽനിന്ന് 500 രൂപ വീതമാണ് പിരിക്കുന്നത്. കോളജ് അഡ്മിനിസ്‌ട്രേഷന്‍റെ കഴിവുകേടിനെ വിദ്യാര്‍ഥികളുടെ ചുമലില്‍ കെട്ടിവയ്ക്കാന്‍ അനുവദിക്കില്ല. പ്രിന്‍സിപ്പലിന് പരാതി നല്‍കിയിട്ടുണ്ട്. മതിയായ കാരണം പറയാതെ പണപ്പിരിവ് തുടര്‍ന്നാല്‍ സമരപരിപാടികളുമായി മുന്നോട്ട് പോകുമെന്നും കെഎസ്‌യു യൂണിറ്റ് പ്രസിഡന്‍റ് രാജീവ് പാട്രിക് പറഞ്ഞു.

കാപ്പ ലംഘനം: യുവതി അറസ്റ്റിൽ

ഉദയംപേരൂർ: കാപ്പ ഉത്തരവ് ലംഘിച്ച കരിങ്ങാച്ചിറ പാലത്തിങ്കൽ സൂര്യപ്രഭ(21)യെ ഉദയംപേരൂർ പോലീസ് അറസ്റ്റ് ചെയ്തു. ഉദയംപേരൂർ, ഹിൽപാലസ് പോലീസ് സ്റ്റേഷനുകളിലെ നിരവധി കേസിൽ പ്രതിയായ ഇവരെ കാപ്പ ഉത്തരവ് പ്രകാരം എറണാകുളം ജില്ലയിൽനിന്ന് നാടുകടത്തിയിരുന്നു. ഉത്തരവ് ലംഘിച്ചെത്തിയ യുവതിയെ വലിയകുളം ഭാഗത്ത് നിന്നാണ് കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മലയാറ്റൂരിൽ കാട്ടാന ശല്യം രൂക്ഷം: ഫോറസ്റ്റ് ഓഫീസ് ഉപരോധിച്ച് ജനപ്രതിനിധികളും നാട്ടുകാരും

കാലടി: മലയാറ്റൂർ തേക്കുംതോട്ടം - ആറാട്ടുകടവ് ഭാഗത്ത് കാട്ടാനകളുടെ ആക്രമണം രൂക്ഷമായതോടെ ജനങ്ങൾ ഭീതിയിലാണ്. ഇതിൽ പ്രതിഷേധിച്ച് ജനപ്രതിനിധികളുടെ നേതൃത്വത്തിൽ പ്രദേശവാസികൾ ഇന്നലെ മലയാറ്റൂർ ഫോറസ്റ്റ് ഓഫീസ് ഉപരോധിച്ചു. തുടർന്ന് എസിഎഫ് ഡെൽറ്റ മറോക്കിയുമായി നടത്തിയ ചർച്ചയിൽ ലഭിച്ച ഉറപ്പിൻമേൽ നാട്ടുകാർ സമരം അവസാനിപ്പിക്കുകയായിരുന്നു. അടിക്കാട് വെട്ടും, ആവശ്യമുള്ള സ്ഥലങ്ങളിൽ ട്രഞ്ച് നിർമിക്കും, നാശനഷ്ടം സംഭവിച്ചവർക്ക് നഷ്ടപരിഹാരം നൽകുമെന്നും എസിഎഫ് നാട്ടുകാർക്ക് ഉറപ്പു നൽകി. ഗ്രാമപഞ്ചായത്ത് പ്രസിഡന്‍റ് ജോയി അവോക്കാരൻ, ജില്ലാ പഞ്ചായത്തംഗം അനിമോൾ ബേബി, ബ്ലോക്ക് പഞ്ചായത്തംഗം മനോജ് മുല്ലശേരി വാർഡ് മെമ്പർമാരായ വിജി സെബാസ്റ്റ്യൻ, സേവ്യർ വടക്കുംചേരി എന്നിവരാണ് സമരത്തിന് നേതൃത്വം നല്കിയത്. കഴിഞ്ഞ രാത്രിയിൽ കാട്ടാനക്കൂട്ടം വീടുകൾ ആക്രമിക്കുകയും വലിയ നാശനഷ്ടം വരുത്തുകയും ചെയ്തിരുന്നു. നാശനഷ്ടമുണ്ടായ വീടിന് അടിയന്തര ധനസഹായം നൽകുന്നതിനുള്ള നടപടികൾ ഊർജിതമാക്കുമെന്നും രാത്രികാല പരിശോധന ശക്തമാക്കുമെന്നും എസിഎഫ് ഉറപ്പു നല്കി. മലയാറ്റൂർ നീലിശ്വരം പഞ്ചായത്തിലെ 6, 7, 8 വാർഡുകളിൽ കാട്ടാന ആക്രമണം പതിവാണ്. രാത്രികളിൽ വീട്ടിനു ചുറ്റും ആനകൾ എത്തുന്നതിനാൽ ഉറങ്ങാൻ പോലും കഴിയുന്നില്ലെന്ന് നാട്ടുകാർ പറയുന്നു. വെള്ളിയാഴ്ച രാത്രി എട്ടാം വാർഡിൽ തേക്കുംതോട്ടം ഭാഗത്ത് പല വീടുകളിലും ആന നാശനഷ്ടം ഉണ്ടാക്കി. മതിലുകളും ഗേറ്റുകളും കൃഷികളും വലിയ തോതിൽ നശിപ്പിച്ചു. വനം-വന്യജീവി വകുപ്പിന്‍റെ ഭാഗത്ത് നിന്ന് അടിയന്തര ഇടപെടലുകൾ ഉണ്ടാകണമെന്ന് നാട്ടുകാർ ആവശ്യപ്പെട്ടു.

നെടുന്പാശേരിയിൽ മോഹൻലാലിന്‍റെ നേതൃത്വത്തിൽ യോഗ പരിശീലനം

നെടുമ്പാശേരി: ലഹരിക്കെതിരെ യോഗ എന്ന സന്ദേശവുമായി നടൻ മോഹൻലാൽ സ്ഥാപിച്ച വിശ്വശാന്തി ഫൗണ്ടേഷന്‍റെ നേതൃത്വത്തിൽ കൊച്ചി അന്താരാഷ്ട്ര വിമാനത്താവളം (സിയാൽ) കൺവൻഷൻ സെന്‍ററിൽ അന്താരാഷ്ട്ര യോഗ ദിനത്തിൽ കൂട്ടായ യോഗ പരിശീലനം നടത്തി. നാർക്കോട്ടിക് കൺട്രോൾ ബ്യൂറോയുടെ സഹകരണത്തോടെ ഒരു വർഷം നീണ്ടുനിൽക്കുന്ന ലഹരിക്കെതിരെയുള്ള ത്രീവ്രയജ്ഞത്തിനാണ് ഇവിടെ തുടക്കം കുറിച്ചത്. മോഹൻലാൽ മുഖ്യപ്രഭാഷണം നടത്തി. ഫൗണ്ടേഷൻ മാനേജിംഗ് ഡയറക്ടർ മേജർ രവി, നാർക്കോട്ടിക് കൺട്രോൾ ബ്യൂറോ കൊച്ചി സോണൽ ഡയറക്ടർ വേണുഗോപാൽ ജി. കുറുപ്പ് , ഡോ. ടെസി ഗ്രേസ് മാത്യൂസ്, ഗിരിജ ബി. നായർ എന്നിവർ പ്രസംഗിച്ചു. മോഹൻലാലിനൊടൊപ്പം വിദ്യാർഥികളും അധ്യാപകരും സിയാൽ ഉദ്യോഗസ്ഥൻമാരും ഉൾപ്പെടെ ആയിരത്തോളം പേർ യോഗയിൽ പങ്കെടുത്തു.

ഗവർണർ ഇന്ന് കുസാറ്റിൽ

കളമശേരി: കേരള ഗവർണറും കൊച്ചി ശാസ്ത്ര സാങ്കേതിക സർവകലാശാല(കുസാറ്റ്)യുടെ ചാൻസലറുമായ രാജേന്ദ്ര വിശ്വനാഥ് അർലേക്കർ ഇന്ന് സർവകലാശാലയിലെത്തും. കുഞ്ഞാലി മരക്കാർ സ്‌കൂൾ ഓഫ് മറൈൻ എൻജിനീയറിംഗിന്‍റെ 18-ാം ബാച്ച് ബിടെക് മറൈൻ എൻജിനീയറിംഗ് വിദ്യാർഥികളുടെ പാസിംഗ് ഔട്ട് പരേഡ് അദ്ദേഹം ഉദ്ഘാടനം ചെയ്യും. ഉച്ചകഴിഞ്ഞ് മൂന്നിന് കുസാറ്റ് സെമിനാർ കോംപ്ലക്സിൽ നടക്കുന്ന ചടങ്ങിൽ ഉന്നതവിജയം നേടിയ വിദ്യാർഥികൾക്ക് പുരസ്‌കാരങ്ങൾ നൽകും.

വീണ്ടും വാട്‌സ്ആപ്പ് പണം തട്ടിപ്പ്; ശ്രദ്ധിച്ചില്ലേല്‍ കാശ് പോകും

കൊച്ചി: ഒരിടവേളയ്ക്കു ശേഷം ജില്ലയില്‍ വാട്‌സ്ആപ്പ് ഹാക്ക് ചെയ്തുള്ള പണം തട്ടിപ്പ്. ഗായിക അമൃത സുരേഷിനാണ് ഒടുവില്‍ ഇത്തരത്തില്‍ 45,000 രൂപ നഷ്ടമായത്. വാട്‌സ്ആപ്പ് അക്കൗണ്ട് ഹാക്ക് ചെയ്തശേഷം ഉടമയുടെ കോണ്‍ടാക്ട് ലിസ്റ്റിലുള്ളവരോടും ഗ്രൂപ്പുകളിലുള്ളവരോടും പണം ആവശ്യപ്പെടുന്നതാണ് രീതി. വാട്‌സ്ആപ്പ് അക്കൗണ്ടിലെ സന്ദേശങ്ങള്‍, ചിത്രങ്ങള്‍, വീഡിയോകള്‍ എന്നിവ തട്ടിയെടുത്ത് ഭീഷിപ്പെടുത്താനും ശ്രമങ്ങള്‍ ഉണ്ടായേക്കാമെന്ന് സൈബര്‍ വിദഗ്ധര്‍ മുന്നറിയിപ്പു നല്‍കുന്നു. ഒടിപി നമ്പര്‍ ആവശ്യപ്പെട്ട് പരിചിതര്‍ സന്ദേശം അയച്ചാലും നേരിട്ട് വിളിച്ച് ഉറപ്പുവരുത്താതെ ഇത് പങ്കുവയ്ക്കരുതെന്ന് പോലീസും മുന്നറിയിപ്പ് നല്‍കുന്നു. തട്ടിപ്പ് ഇങ്ങനെ മുമ്പ് വാട്‌സ്ആപ്പിലേക്ക് എത്തിയ ഒടിപി നമ്പര്‍ പങ്കുവയ്ക്കുന്നതിലൂടെയാണ് തട്ടിപ്പ് നടന്നിരുന്നതെങ്കില്‍ നിലവില്‍ റിപ്പോര്‍ട്ട് ചെയ്തിട്ടുള്ള കേസില്‍ പരിചിതരായവര്‍ നേരിട്ട് പണം ആവശ്യപ്പെടുന്ന രീതിയാണ്. തട്ടിപ്പ് ആണെന്ന് മനസിലാക്കാതെ പലരും പണം കൈമാറുന്നു. പിന്നീട് നേരിട്ട് വിളിച്ച് അന്വേഷിക്കുന്നതോടെയാണ് തട്ടിപ്പിനിരയായ വിവരം മനസിലാകുന്നത്. അമൃത സുരേഷിന് പണം നഷ്ടമായത് ഇങ്ങനെ ഇഎംഐ അടയ്ക്കാനാണെന്നും ഒരു മണിക്കൂറിനകം തിരിച്ച് തരാമെന്നും കാണിച്ച് കസിന്‍ സിസ്റ്ററിന്‍റെ വാട്‌സ്ആപ്പില്‍ നിന്ന് 45,000 രൂപ ആവശ്യപ്പെട്ട് സന്ദേശം എത്തുന്നു. അമൃത പണം കൈമാറുന്നു, പിന്നാലെ 30,000 രൂപ കൂടി ആവശ്യപ്പെടുന്നു. പണം കൈയില്‍ ഇല്ലാത്തതിനാല്‍ അമൃത ഇവരെ വീഡിയോ കോള്‍ വിളിക്കുന്നു. കോള്‍ കട്ട് ചെയ്യുന്നു. പിന്നീട് നോര്‍മല്‍ കോള്‍ വിളിക്കുമ്പോഴാണ് യഥാര്‍ഥ വ്യക്തി ഇതറിഞ്ഞിട്ടില്ലെന്നും അയാളുടെ വാട്‌സ്ആപ്പ് ഹാക്ക് ചെയ്‌തതാണെന്നും വ്യക്തമാകുന്നത്. സംഭവത്തില്‍ അമൃത പോലീസിൽ പരാതി നല്‍കി. തട്ടിപ്പിന് ഇരയാകാതിരിക്കാന്‍ വാട്‌സ്ആപ്പ് ഹാക്ക് ചെയ്യപ്പെട്ട് കഴിഞ്ഞാൽ ഇതിന്‍റെ നിയന്ത്രണം തിരികെ കിട്ടാന്‍ ചുരുങ്ങിയത് ഒരാഴ്ചയെങ്കിലും സമയമെടുക്കും. അതിന് വാട്‌സ്ആപ്പ് തന്നെ വിചാരിക്കുകയും വേണം. വഞ്ചിതരാകാതിരിക്കാന്‍ ശ്രദ്ധിക്കേണ്ടതില്‍ പ്രധാനം രണ്ടു കാര്യങ്ങളാണ്. ഒന്ന് വാട്‌സ്ആപ്പ് അക്കൗണ്ടുകളില്‍ ടു സ്റ്റെപ് വെരിഫിക്കേഷന്‍ ആക്ടിവേറ്റാക്കുക. രണ്ട് ആറക്ക വെരിഫിക്കേഷന്‍ കോഡ് ആര് ചോദിച്ചാലും നല്‍കാതിരിക്കുക. പണം ആവശ്യപ്പെടുന്നത് പരിചയക്കാരാണെങ്കിലും നേരില്‍ വിളിച്ച് വിവരം തിരക്കുക. സജ്ജരാണ് ഉദ്യോഗസ്ഥര്‍ സംസ്ഥാനത്തെ നല്ലൊരു ശതമാനം സൈബര്‍ കുറ്റകൃത്യങ്ങളും രജിസ്റ്റര്‍ ചെയ്യപ്പെടുന്ന കൊച്ചിയില്‍ തട്ടിപ്പുകള്‍ക്ക് തടയിടാന്‍ സൈബര്‍ പോലീസ് സര്‍വ സജ്ജമാണ്. കൊച്ചി സിറ്റിയില്‍ ഒരു ഡിവൈഎസ്പി, മൂന്ന് ഇന്‍സ്‌പെക്ടര്‍മാര്‍, രണ്ട് എസ്‌ഐ, ഒരു എഎസ്‌ഐ, ഏഴ് എസിസിപിഒ, 11 സിപിഒ, എസ്‌ഐ(ടെലി) രണ്ട്, എച്ച്‌സി(ടെലി) രണ്ട്, പിസി(ടെലി) ഒന്ന്, പിസി (ഡ്രൈവര്‍) ഒന്ന് എന്നിങ്ങനെയും, എറണാകുളം റൂറലില്‍ ഒരു ഇന്‍സ്‌പെക്ടര്‍, രണ്ട് എസ്‌ഐമാര്‍, നാല് എസ്‌സിപിഒ, എസ്‌ഐ(ടെലി) രണ്ട്, എഎസ്‌ഐ(ടെലി) ഒന്ന്, പിസി (ടെലി) എന്നിങ്ങനെയുമാണ് ഉദ്യോഗസ്ഥരുടെ കണക്ക്.

മദ്യം മറിച്ചു വില്‍ക്കാന്‍ ശ്രമം; നേവി ഉദ്യോഗസ്ഥർ അടക്കം മൂന്നുപേര്‍ പിടിയില്‍

കൊച്ചി: ക്വാട്ടയില്‍ ലഭിച്ച വിദേശമദ്യം മറിച്ചുവിൽക്കുന്നതിനിടെ രണ്ട് നേവി ഉദ്യോഗസ്ഥരടക്കം മൂന്നുപേര്‍ പിടിയിലായി. രണ്ട് ഉത്തരേന്ത്യന്‍ സ്വദേശികളും ഒരു എറണാകുളം സ്വദേശിയുമാണ് അറസ്റ്റിലായത്. ഇവരുടെ പക്കല്‍നിന്നു 14 കുപ്പി മദ്യം പോലീസ് കസ്റ്റഡിയിലെടുത്തു. മൂവരുടെയും പേരുവിവരങ്ങള്‍ വെളിപ്പെടുത്തിയിട്ടില്ല. വെള്ളിയാഴ്ച രാത്രിയിലായിരുന്നു സംഭവം. നാവികസേന ആഭ്യന്തര അന്വേഷണം ആരംഭിച്ചു. നാവിക ആസ്ഥാനത്തുനിന്നു മദ്യം ബാഗില്‍ ഒളിപ്പിച്ചാണ് ഇവര്‍ പുറത്തെത്തിച്ചത്. തുടർന്ന് പെരുമാനൂരിലെത്തി എറണാകുളം സ്വദേശിക്ക് മദ്യം കൈമാറുന്നതിനിടെ പോലീസിന്‍റെ പിടിയിലാകുകയായിരുന്നു. അറസ്റ്റുവിവരം നാവികസേനയെ അറിയിച്ചു. പ്രതികളെ കോടതിയില്‍ ഹാജരാക്കി.

കുമ്പളങ്ങിയിൽ ഒഴിഞ്ഞപറമ്പില്‍ തലയോട്ടി കണ്ടെത്തി

പള്ളുരുത്തി: കുമ്പളങ്ങിയിൽ ഒഴിഞ്ഞ പറമ്പില്‍നിന്ന് മനുഷ്യന്‍റെ തലയോട്ടി കണ്ടെത്തി. കണ്ണമാലി സ്വദേശി ഫ്രാന്‍സിസ് മണ്ണാളിയുടെ ഉടമസ്ഥതയിലുള്ള പറമ്പ് വൃത്തിയാക്കുന്നതിനിടെയാണ് വർഷങ്ങൾ പഴക്കമുള്ള തലയോട്ടി കണ്ടെത്തിയത്. നാളുകളായി കാടുപിടിച്ചുകിടന്ന സ്ഥലം ഇതരസംസ്ഥാന തൊഴിലാളികൾ വൃത്തിയാക്കുന്നതിനിടെ തലയോട്ടി കണ്ടെത്തുകയായിരുന്നു. ഉടമയെ വിവരം അറിയിച്ചതിനെ തുടർന്ന് കുമ്പളങ്ങി പോലീസ് സ്ഥലത്തെത്തി. തലയോട്ടി കണ്ടെത്തിയ പറമ്പിന് 50 മീറ്റർ സമീപത്തായി സെമിത്തേരി സ്ഥിതി ചെയ്യുന്നുണ്ട്. സെമിത്തേരി വൃത്തിയാക്കുന്നതിനിടെ തലയോട്ടി ഇവിടെ എത്തിപ്പെട്ടതാണോയെന്ന് പോലീസ് അന്വേഷിക്കുന്നു. തലയോട്ടി കൂടാതെ മറ്റ് ശരീരഭാഗങ്ങൾ പറമ്പിലുണ്ടോയെന്ന് വിശദമായി പരിശോധന നടത്തുമെന്നും പോലീസ് അറിയിച്ചു. ഫോറൻസിക് വിദഗ്ധർ എത്തി തലയോട്ടി പരിശോധനയ്ക്കായി കൊണ്ടുപോയി.

അനധികൃത മത്സ്യബന്ധനം : 11 ഫൈബർ വള്ളങ്ങൾ കസ്റ്റഡിയിലെടുത്തു

വൈപ്പിൻ: ട്രോളിംഗ് നിരോധനം നിലനിൽക്കെ ചട്ടം ലംഘിച്ച് സമുദ്രത്തിലെ അടിത്തട്ട് മത്സ്യങ്ങൾ പിടികൂടിയ 11 ഫൈബർ വള്ളങ്ങൾ കൊച്ചി തീരത്ത് നിന്ന് ഫിഷറീസ് എൻഫോഴ്സ്മെന്‍റ് കസ്റ്റഡിയിലെടുത്തു. അമ്മ, വിൽസൺ, സിലുവിയാ തുണൈ, ഉണ്ണിയേശു, വടിപ്പെട്ടി മാതാ, സിന്ധു യാത്രമാതാ, സെന്‍റ് മൈക്കിൾ, മാതാ തുണൈ, സെൽവൻ, കുരിയച്ചൻ തുടങ്ങിയ ഫൈബർ വള്ളങ്ങളാണ് കസ്റ്റഡിയിലെടുത്തത്. ട്രോളിംഗ് നിരോധന കാലത്ത് പരമ്പരാഗത മത്സ്യബന്ധന യാനങ്ങൾക്ക് സമുദ്രോപരിതല മത്സ്യബന്ധനം മാത്രമേ അനുവദിച്ചിട്ടുള്ളു. ഇതു ലംഘിച്ച് അടിത്തട്ടിൽ വലകൾ ഇട്ട് കിളിമീൻ ഉൾപ്പെടെയുള്ള അടിത്തട്ട് മത്സ്യങ്ങളെ പിടികൂടുന്നത് ശ്രദ്ധയിൽപ്പെട്ടതോടെയാണ് നടപടിസ്വീകരിച്ചതെന്ന് ഫിഷറീസ് സ്റ്റേഷൻ അസി. ഡയറക്ടർ എം.എഫ്. പോൾ അറിയിച്ചു. ഫിഷറീസ് ഡെപ്യൂട്ടി ഡയറക്ടർ മാജ ജോസിന്‍റെ നിർദേശ പ്രകാരം വള്ളങ്ങൾക്ക് മൊത്തം ഒരു ലക്ഷം രൂപ പിഴയീടാക്കി. മത്സ്യങ്ങൾ കണ്ടുകെട്ടി വിറ്റവകയിൽ 36,300 രൂപയും സർക്കാരിലേക്കടച്ചു. പരിശോധനയ്ക്ക് മറൈൻ എൻഫോഴ്സ്മെന്‍റ് ഇൻസ്പെക്ടർ പി.എസ്. മഞ്ജിത്ത് ലാൽ നേതൃത്വം നൽകി.

നാളെ വിശ്വാസ ദീപശിഖാ പ്രയാണം

ആലങ്ങാട് : ആലങ്ങാട് കുന്നേൽ അത്ഭുത ദിവ്യ ഉണ്ണീശോയുടെ പുതിയ ദേവാലയത്തിന്‍റെ ‌‌ ശിലാസ്ഥാപന കർമത്തിന് മുന്നോടിയായി നാളെ വിശ്വാസ ദീപശിഖാ പ്രയാണം നടത്തും. ഞായറാഴ്ച വൈകിട്ട് നാലിന് പറവൂർ കോട്ടയ്ക്കാവ് പള്ളിയിൽ നിന്നും വിശ്വാസ ദീപ വാഹനാ യാത്ര മാതൃ ദേവാലയമായ ആലങ്ങാട് സെന്‍റ് മേരീസ് പള്ളിയിലെത്തും. ശിലാസ്ഥാപന കർമത്തിലുള്ള കല്ലുകൾ ഫാ. പോൾ ചുള്ളിയുടെ നേതൃത്വത്തിൽ വെഞ്ചിരിപ്പിക്കും. വാഹനജാഥയോടെ കുന്നേൽ പള്ളിയിലേക്ക് എത്തും. തുടർന്ന് ദിവ്യബലിയും നൊവേനയും നടക്കും. ഇതിന്‍റെ മുന്നോടിയായി 23 മുതൽ 28 വരെ കുന്നേൽപള്ളിയിൽ ഒരുക്ക പ്രാർഥനകൾ നടക്കും. രാവിലെ 6.30ന് ദിവ്യബലി തുടർന്ന് ആരാധന വൈകിട്ട് ഏഴിന് പൊതു ആരാധന, നൊവേന, ദിവ്യകാരുണ്യ ആശീർവാദം ,നേർച്ച ഭക്ഷണം എന്നിവ ഉണ്ടായിരിക്കുന്നതാണ്. ശിലാസ്ഥാപന കർമദിവസമായ 29ന് രാവിലെ 9.30ന് ദിവ്യബലിയും നൊവേനയും തുടർന്ന് 11ന് ശിലാസ്ഥാപന കർമം ബിഷപ് മാർ തോമസ് ചക്യത്ത് നിർവഹിക്കും. രാഷ്ട്രീയ സാമൂഹ്യ പ്രവർത്തകർ പങ്കെടുക്കും. ഇടവക വികാരി ഫാ. ജൂലിയസ് കറുകന്തറ , ട്രസ്റ്റി മാരായ സജ്ജു ജോസഫ് കളപ്പറമ്പത്ത്, സനിൽ അഗസ്റ്റിൻ കൈതാരത്ത്, നിർമാണ കൺവീനർ ജോസ് പോൾ കളപ്പറമ്പത്ത് എന്നിവർ വാർത്താസമ്മേളനത്തിൽ പങ്കെടുത്തു.

പള്ളിപ്പുറം മഞ്ഞുമാത ബസിലിക്കയിൽ തിരുനാൾ

ചെറായി: പള്ളിപ്പുറം മഞ്ഞുമാത ബസിലിക്കയിൽ ഈശോയുടെ തിരുഹൃദയ തിരുനാളിന് ബസിലിക്ക റെക്ടർ റവ. ഡോ. ആന്‍റണി കുരിശിങ്കൽ കൊടിയേറ്റി. തുടർന്ന് നടന്ന ദിവ്യബലിക്ക് കോട്ടപ്പുറം രൂപത വികാർ ജനറൽ മോൺ. റോക്കി റോബിൻ കളത്തിൽ കാർമികത്വം വഹിച്ചു. നാളെയാണ് തിരുനാൾ. വൈകീട്ട് 5.30 ന് ആഘോഷമായ തിരുനാൾ ദിവ്യബലി. ഫാ. ബിനു മുക്കത്ത് കാർമികത്വം വഹിക്കും. ഫാ. ജോസ് തോമസ് വചനപ്രഘോഷണം നടത്തും.

ഡിസ്റ്റിൽ മെഗാ ജോബ് ഫെയർ സംഘടിപ്പിച്ചു

അങ്കമാലി: ഡി പോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയുടെയും ഫ്ലോറൻസ് എജുക്കേഷൻ കൺസൾട്ടൻസിയുടെയും ആഭിമുഖ്യത്തിൽ ആലുവ ടൗൺ എംപ്ലോയ്മെന്‍റ് എക്സ്ചേഞ്ചും നാഷണൽ കരിയർ സർവീസും സഹകരിച്ച് ഉദ്യോഗ് 25 മെഗാ ജോബ് ഫെയർ ഡിസ്റ്റ് കാമ്പസിൽ നടന്നു. ജൂണിയർ എംപ്ലോയ്മെന്‍റ് ഓഫീസർ പി.വി. സിന്ധു ഉദ്ഘാടനം ചെയ്തു. കോളജ് പ്രിൻസിപ്പൽ ഡോ.ജോണി ചാക്കോ മംഗലത്ത് അധ്യക്ഷത വഹിച്ചു. ഡിസ്റ്റ് അധ്യാപകരായ ജോസഫ് പോൾ, ഡോ. ജാസ്മിൻ ബേബി, ഫ്ലോറൻസ് എഡ്യൂക്കേഷൻ കൺസൾട്ടൻസ് ഡയറക്ടർ ഉമേഷ് കൃഷ്ണ തുടങ്ങിയവർ സംസാരിച്ചു. നിപ്പോൺ ടൊയോട്ട, മുത്തൂറ്റ് മൈക്രോ ഫിനാൻസ്, ലാസാ ഐസ്ക്രീംസ് തുടങ്ങി 50ലധികം പ്രമുഖ കമ്പനികൾ ജോബ് ഫെയറിൽ പങ്കെടുത്തു. ഉദ്യോഗാർഥികൾക്ക് വിവിധ മേഖലകളിൽ തൊഴിൽ അവസരങ്ങൾ കണ്ടെത്താനുള്ള മികച്ച വേദിയായി മെഗാ ജോബ് ഫെയർ.

വയസ് 105: യോഗ ഉപേന്ദ്രനാചാരിയുടെ ജീവവായു

വൈപ്പിൻ : യോഗ ജീവ വായുവാക്കിയ ഉപേന്ദ്രനാചാരിക്ക് നൂറ്റിയഞ്ചിലും ഊർജം യോഗ തന്നെ. ഭക്ഷണം ആവശ്യത്തിനു മാത്രം. 1920 ൽ ജനിച്ച ആചാരി തന്‍റെ 37-ാം വയസു മുതൽക്കാണ് യോഗ ചെയ്തു തുടങ്ങിയത്. പിന്നീട് ആറര പതിറ്റാണ്ട് പിന്നിട്ട ഈ തപസ്യ ഇപ്പോഴും തുടരുകയാണ്. ഇതിനിടയിൽ ഈ യോഗാചാര്യൻനിരവധി ആളുകളെ യോഗ അഭ്യസിപ്പിച്ചു. പലയിടങ്ങളിലും യോഗ ക്ലാസുകൾ നടത്തി. ജന്മനാടായ ചെറായിയിൽ യോഗ പഠന കേന്ദ്രവും തുടങ്ങി. ഇപ്പോൾ105 ന്‍റെ നിറവിലും എല്ലാ ഓർമകളും നിലനിർത്തിപ്പോരുന്ന ആചാരി ദിവസവും യോഗ ചെയ്യും. ഇതാണ് തന്‍റെ ഊർജ്ജവും ജീവവായുവുമെന്നാണ് ആചാരി പറയുന്നത്. പക്ഷേ ഇദ്ദേഹത്തിന്‍റെ മനസിൽ ഇപ്പോഴും ഒരു ആഗ്രഹം ബാക്കിയുണ്ട്. പ്രധാനമന്ത്രി നരേന്ദ്ര മോദിയെ ഒന്നു നേരിൽ കാണണം. യോഗയെ കുറിച്ച് താൻ എഴുതിയ പുസ്തകങ്ങൾ അദ്ദേഹത്തിനു സമർപ്പിക്കണം. മാത്രമല്ല സ്കൂളുകളിലും മറ്റു പഠന കേന്ദ്രങ്ങളിലുമെല്ലാം യോഗ നിർബന്ധമാക്കുകയും ഇതിനായി പരിശീലകരെ നിയമിക്കുകയും വേണമെന്ന് അദ്ദേഹത്തോട് ആവശ്യപ്പെടണം. തന്‍റെ അഭ്യുദയകാംക്ഷികളോടാണ് ആചാരി ഈ ആഗ്രഹങ്ങൾ പങ്ക് വച്ചിട്ടുള്ളത്. ഇതറിഞ്ഞ് ഇവർ ഇതിനുള്ള ശ്രമങ്ങൾ നടത്തുന്നുണ്ടെങ്കിലും പ്രധാനമന്ത്രിയെ പോലെ ഒരാളെ നേരിൽ കാണുക എന്നതിലെ കടമ്പകൾ ഇവരുടെ ശ്രമത്തെ എത്രത്തോളം വിജയത്തിലെത്തിക്കുമെന്ന കാര്യത്തിൽ ഉറപ്പില്ല.

ലയൺസ് ക്ലബ് ഓഫ് കൊച്ചിൻ മിഡ്ടൗണിന് പുതിയ ഭാരവാഹികൾ

കൊച്ചി: മോഡൽ ലയൻസ് ക്ലബ് ഓഫ് കൊച്ചിൻ മിഡ്ടൗണ്‍ ന്‍റെ 2025-26 വർഷത്തെ ഭാരവാഹികളായി ലയൺ സിബി ചാക്കോ (പ്രസിഡന്‍റ്), ലയൺ ബിനോ പോൾ (സെക്രട്ടറി), രഹ്ന റിയാസ് (ട്രഷറർ) എന്നിവർ സ്ഥാനമേറ്റു. ഡിസ്ട്രിക്ട് ഗവർണർ ലയണ്‍ രാജൻ എൻ. നന്പൂതിരി, വൈസ് ഡിസ്ട്രിക്ട് ഗവർണർ (ഇലക്ട്) ലയണ്‍ കെ.പി. പീറ്റർ, മുൻ ഗവണ്‍ർമാർ, ലയൻസ് ക്ലബ് ഇന്‍റർനാഷണൽ ഫൌണ്ടേഷൻ 318 ആൻഡ് 317 ചെയർമാൻ ലയണ്‍ വി. അമർനാഥ് , വിവിധ സോണ്‍, റീജണൽ ഭാരവാഹികളും പങ്കെടുത്തു. ചടങ്ങിൽ തൃപ്പൂണിത്തുറ ലയൺസ് ആശുപത്രിയിൽ ഡയാലിസിസ് ഉപകരണം വാങ്ങുന്നതിനു ഒരു ലക്ഷം രൂപയും നാലു സ്കൂളുകളിലെ അർഹതപ്പെട്ട കുട്ടികൾക്കായി ബാഗും ബുക്കുകളും സ്കൂളുകളിൽ സാനിറ്ററി നാപ്കിൻ ഡിസ്പോസിബിൾ ഉപകരണം സ്ഥാപിക്കുന്നത്തിനുള്ള പദ്ധതിയും ലയണ്‍ വി. അമർനാഥ് പ്രഖ്യാപിച്ചു.

ആലുവ റെയിൽവേ ഓവർബ്രിഡ്ജ് : തകരാറിലായ കൈവരികൾ മാറ്റിത്തുടങ്ങി

ആലുവ: വർഷങ്ങളായി തകർന്നു കിടക്കുന്ന ആലുവ റെയിൽവേ ഓവർ ബ്രിഡ്ജിലെ കൈവരി നിർമാണം ആരംഭിച്ചു. ആലുവ ജില്ലാ ആശുപത്രി ജംഗ്ഷനേയും കാരോത്തുകുഴി ജംഗ്ഷനും റെയിൽവേ ട്രാക്കിന് മുകളിലൂടെ ബന്ധിപ്പിക്കുന്ന ഓവർ ബ്രിഡ്ജിന്‍റെ കൈവരികളാണ് പുനർനിർമിക്കുന്നത്. വീതി കുറവായതിനാൽ കണ്ടെയ്നർ ലോറികളുടെ വശങ്ങൾ ഇടിച്ചാണ് കൈവരികൾ പലപ്പോഴും തകരുന്നത്. താത്ക്കാലികമായി കോൺക്രീറ്റ് വയ്ക്കുകയും അവ ഏതാനും ദിവസങ്ങൾക്കുള്ളിൽ തകരുകയുമാണ് ചെയ്യുന്നത്. നടപ്പാതയിൽ ഒരു ഭാഗത് ഇന്‍റർനെറ്റ്, ടെലിഫോൺ കേബിളുകൾ വലിയ പൈപ്പുകൾക്ക് ഉള്ളിലാക്കി ഇട്ടിരിക്കുന്നതിനാൽ നടക്കാൻ കഷ്ടപ്പാടാണ്. കൂടാതെ മഴ പെയ്താൽ ചെളിവെള്ളവും കെട്ടിക്കിടക്കും. ഇതു കാരണം നടപ്പാത ഒഴിവാക്കിയാണ് കാൽനടയാത്രക്കാർ കടന്നു പോകുന്നത്. നടപ്പാതയിലെ കേബിളുകൾ മാറ്റി സ്ഥാപിക്കാനും സമാന്തരമായി ഒരു പാലം കൂടി നിർമിക്കാനും ബന്ധപ്പെട്ടവർ തയ്യാറാകണമെന്നാണ് പ്രദേശവാസികൾ ആവശ്യപ്പെടുന്നത്. ഒരു പാലം കൂടി നിർമിക്കുകയാണെങ്കിൽ ഗതാഗതക്കുരുക്ക് ഒഴിവാക്കാനാകുമെന്ന് വ്യാപാരികളും പറഞ്ഞു.

പൊങ്ങം ആര്‍കെഐ പദ്ധതി ഉദ്ഘാടനം ചെയ്തു

അങ്കമാലി: അങ്കമാലി നഗരസഭ 21-ാം വാര്‍ഡില്‍ നിര്‍മാണം പൂര്‍ത്തീകരിച്ച പൊങ്ങം ആര്‍കെഐ വികസന പദ്ധതിയുടെ ഉദ്ഘാടനം റോജി എം. ജോണ്‍ എംഎല്‍എ നിര്‍വഹിച്ചു. 50 ലക്ഷം രൂപ ചെലവഴിച്ച് പൊങ്ങം റോഡിലെ ശോചനീയാവസ്ഥയിലായിരുന്ന പൊട്ടിപ്പൊളിഞ്ഞ കാന സമീപമുള്ള സമീപവാസികള്‍ ഭൂമി സൗജന്യമായി വിട്ട് തന്നു കൊണ്ട് കോണ്‍ക്രീറ്റിംഗ് നടത്തി. ലോഡിംഗ് സ്ലാബ് സ്ഥാപിച്ച് മൂന്നു വണ്ടകള്‍ക്ക് അനായാസം കടന്നുപോകാവുന്ന രീതിയില്‍ സഞ്ചാര യോഗ്യമാക്കി. പൊങ്ങം റോഡിന്‍റെ മുഴുവന്‍ റീ-ടാറിംഗ് പ്രവര്‍ത്തികളടക്കം റോഡിന് കുറുകെ കലുങ്ക് നിര്‍മാണവും നടത്തി. ചടങ്ങില്‍ നഗരസഭാ ചെയര്‍മാന്‍ അഡ്വ. ഷിയോപോള്‍ അധ്യക്ഷത വഹിച്ചു. വാര്‍ഡ് കൗണ്‍സിലര്‍ ബാസ്റ്റിന്‍ ഡി. പാറയ്ക്കല്‍, മുന്‍ നഗരസഭാ ചെയര്‍മാന്‍ മാത്യു തോമസ്, ആരോഗ്യ സ്ഥിരം സമിതി അധ്യക്ഷന്‍ മനു നാരായണന്‍, സാജു നെടുങ്ങാടന്‍, ലിസി പോളി ടീച്ചര്‍, ജാന്‍സി അരീയ്ക്കല്‍, മുന്‍ ചെയര്‍മാന്‍ ദേവച്ചന്‍ കോട്ടയ്ക്കല്‍, ചര്‍ച്ച് നഗര്‍ അസോസിയേഷന്‍ പ്രസിഡന്‍റ് ഡാന്‍റി കാച്ചപ്പിള്ളി എന്നിവര്‍ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]